Амбасадар Беларусі ў Нідэрляндах: Беларусі патрэбны рэформы, але не пад кіраўніцтвам Ціханоўскай

Андрэй Еўдачэнка ў інтэрвію нідэрляндзкаму тэлеканалу NOS выказаўся за дыялёг паміж рознымі палітычнымі сіламі ў Беларусі і асудзіў гвалт з боку сілавікоў.

Ён заявіў, што ў Беларусі насьпела неабходнасьць маштабных рэформаў, але не сыходу ад Расеі: «Мы на 95% эканамічна залежныя ад Расеі. Прыдумаць новы сьцяг ці новы гімн даволі лёгка, але адносіны з Расеяй — самая складаная частка жаданых зьменаў»

Дыплямат ня бачыць іх пасьпяховай рэалізацыі пад кіраўніцтвам Ціханоўскай: «Я ня ведаю спадарыню Ціханоўскую, ніколі не сустракаў яе. Яна павінна быць добрая гаспадыня. Але маёй краіне патрэбен іншы лідэр – зь вялікім досьведам». Але дадаў, што гатовы прыняць выбар беларускіх грамадзянаў, калі большасьць не падтрымае Лукашэнку

(архіўнае фота: Tut.by)

🌟🎸 Лявону Вольскаму сёньня 55

А сваё 50-годзьдзе ён сьвяткаваў канцэртам у падземным пераходзе ў Менску. Прыгадваем, як гэта было

🇨🇿 Чэская перакладчыца беларускай літаратуры Сьвятлана Ўранава кажа, што, калі ў Беларусі зьменіцца рэжым, беларуская мова вернецца да жыцьця ў грамадзтве

➖ «Любы зь беларусаў можа пачаць размаўляць па-беларуску адразу, а астатняе — апраўданьні. Напачатку яны будуць рабіць памылкі, блытацца, але вельмі хутка загавораць. Уся праблема ў тым, што большасьць зь іх гэтага ня хоча»
➖ «Падчас цяперашняй рэвалюцыі цікава назіраць, як людзі на вуліцах рэагуюць на беларускія пытаньні рэпартэраў незалежных СМІ. Шмат хто пачынае адказваць па-беларуску, але пасьля некалькіх фразаў спыняецца і пераходзіць на расейскую. Я лічу, што як толькі ў краіне зьменіцца рэжым, беларуская мова можа вярнуцца даволі хутка»

Чытаць далей: https://bit.ly/3kf0UpR

‼️ Усім тром чальцам страйкаму «Беларуськалію», якіх сёньня судзілі ў Салігорску, прысудзілі 15 дзён арышту: Раману Лявончыку, Сяргею Чаркасаву і былому чальцу страйкаму Паўлу Разумоўскаму

🇷🇺 Незалежныя лябараторыі Францыі і Швэцыі пацьвердзілі атручэньне Навальнага «Навічком»

Пра гэта паведаміў урад Нямеччыны. Нямецкія ўлады зьвярнуліся да эўрапейскіх партнэраў з просьбай правесьці незалежны агляд вынікаў нямецкіх дасьледаваньняў атручэньня расейскага апазыцыянэра

👮 Пазыцыя МУС да няпропуску мітрапаліта Кандрусевіча ў Беларусь: пачакайце

31 жніўня, на момант, калі мітрапаліта Кандрусевіча, які мае беларускае грамадзянства, не пускалі ў краіну з Польшчы, начальнік Дэпартамэнту грамадзянства і міграцыі МУС Беларусі Аляксей Бягун нічога ня змог сказаць Свабодзе аб прычынах такіх дзеяньняў уладаў. Цяпер ён недаступны для камэнтару.

Прэсавая сакратарка МУС Вольга Чамаданава сказала: «Ня ведаю, у чым ён несапраўдны. Кіраўнік дэпартамэнту грамадзянства і міграцыі падрыхтуе адказ, і тады ён будзе абнародаваны. Калі гэта будзе, ня ведаю, мая калега пакуль яшчэ зь ім працуе. Пазьней, ня зараз».

Мітрапаліт Кандрусевіч рыхтуе свой зварот у МУС з гэтай нагоды, паведаміў Свабодзе прэсавы сакратар Беларускага каталіцкага касьцёла айцец Юры Санько

🇷🇺 На якім узроўні сустракалі Аляксандра Лукашэнку па прылёце ў Сочы

Лукашэнка больш за тры з паловай гадзіны таму прыбыў у Сочы, толькі паўгадзіны таму выправіўся на перамовы з Пуціным. Паведамляюць, што цяпер перамовы пачаліся.

Лукашэнку сустракаў на лётнішчы губэрнатар Краснадарскага краю Веньямін Кандрацьеў, а канал пулу Пуціна кпіў, што гэты губэрнатар «набраў на выбарах 83% без усялякіх пратэстаў»

🇺🇳 У Радзе ААН у правах чалавека адбудуцца тэрміновыя дэбаты аб Беларусі

Дэбаты пройдуць 18 верасьня на просьбу Эўразьвязу.

Вярхоўны камісар ААН у пытаньнях правоў чалавека Мішэль Бачэлет на адкрыцьці сэсіі Рады ў Жэнэве 14 верасьня заявіла, што ўсе паведамленьні пра рэпрэсіі, празьмернае ўжываньне сілы, катаваньні і выкраданьні ўдзельнікаў акцый пратэсту ў Беларусі павінны быць належным чынам расьсьледаваны, а вінаватыя прыцягнуты да адказнасьці

🇷🇺🇧🇾 Сустрэча Лукашэнкі і Пуціна ідзе сам-насам (хоць раней паведамлялася, што да яе могуць далучыцца амбасадары). Ні падпісаньня дакумэнтаў, ні супольнай прэс-канфэрэнцыі па выніках перамоваў не заплянавалі.

Разам з тым у Крамлі адзначалі важнасьць візыту Лукашэнкі «з улікам тых дзён, якія перажывае Беларусь».

Лукашэнка заявіў раней, што разьлічвае на сустрэчы з расейскім калегам паставіць «тлустую кропку» ў рэалізацыі дамоўленасьцяў, дасягнутых раней прэм’ерамі дзьвюх краін, у прыватнасьці ў сфэры паставак энэрганосьбітаў

Пасьля «Маршу герояў» у Менску міліцыя на вуліцы Камайскай страляла па аўтамабілі.

Сьведка страляніны расказаў Свабодзе падрабязнасьці здарэньня

«Як хлусілі пра маё затрыманьне». Піша Наста Захарэвіч

«Калі нехта ўсё ж прызнаўся, што я там, узяць для мяне плед гэты чалавек адмовіўся — сказаў, што ў будынку цёпла. Я ў гэты час спадзявалася, што насьціл нагрэецца ад майго цела хутчэй, чым я канчаткова адмарожу ныркі і лёгкія, бо вакно трымалі ўсю ноч адчыненым.

Калі ўжо ў ізалятар на Акрэсьціна маці змагла перадаць мне лекі і была ўпэўнена, што цяпер усё больш-менш пад кантролем, супрацоўнікі даволі хутка пераслалі іх у Жодзіна. Я пры гэтым засталася на Акрэсьціна»

Чытаць далей: https://bit.ly/32u2E8G

Сайт міністэрства падаткаў і збораў і электронныя сэрвісы «працуе ў штатным рэжыме», сьцьвярджае прэс-служба міністэрства ў камэнтары Tut.by.

У міністэрстве прызнаюць, што хакерскія атакі ідуць, але сьцьвярджаюць, што збояў у працы сэрвісаў няма, хіба «нязначныя праблемы з уваходам у асабістыя кабінэты карыстальнікаў». Паведамленьні пра збоі ад саміх карыстальнікаў былі неадназначныя: некаторыя пісалі і пра збоі ў асабістым кабінэце, і пра праблемы з АРІП.

Тым часам адключыўся сайт БРСМ

👮 МУС расказала пра яшчэ адзін стрэл учора на пратэстах у Менску

Як сьцьвярджае міністэрства, 13 верасьня на вуліцы Ціхай у Менску «агрэсіўны натоўп аказаў непадпарадкаваньне», нападнікі мелі «гумавыя палкі і водаправодныя трубы», «закідалі міліцыянтаў камянямі і бутэлькамі». Адзін схапіў міліцыянта за куртку, паваліў на зямлю, дастаў траўматычны пісталет «Оса», але міліцыянт выхапіў у яго пісталет і зрабіў папераджальны стрэл уверх.

МУС публікуе відэа сьведкаў, на якім інцыдэнту ня бачна, але чуваць стрэлы. Стрэлы ў паветра з помпавага ружжа каля Драздоў, якія прызналі ўчора, у паведамленьні ня згадваюць