Паўла Латушку выклікалі ў Сьледчы камітэт у якасьці сьведкі ў крымінальнай справе супраць Каардынацыйнай рады. Ён мусіць зьявіцца ў СК заўтра ў 10.00, паведаміў Латушка Свабодзе.

Раней у гэтай справе былі дапытаныя Максім Знак і Сяргей Дылеўскі. На 15 гадзінаў 24 жніўня на допыт выклікалі Лілію Ўласаву

Сайт Belvpo.com сьцьвярджае, што на гэтых кадрах тая самая «антыдзяржаўная» сымболіка, якую запусьцілі над тэрыторыяй Літвы і на зьнішчэньне якой накіравалі беларускія баявыя верталёты. Заяўляюць, што «перахоп» адбываўся нібыта над тэрыторыяй Беларусі, у 3 км ад мяжы зь Літвой, і «правакацыя рыхтавалася на найвышэйшым узроўні прыбалтыйскай дзяржавы»

Затрыманая сябра прэзыдыюму Каардынацыйнай рады Вольга Кавалькова цяпер знаходзіцца ў Партызанскім РУУС Менску, дзе чакае пасяджэньня суду. У якім судзе будуць судзіць Кавалькову, пакуль невядома, паведамляецца на яе афіцыйнай старонцы ў Facebook са спасылкай на адваката

Лукашэнка і Пуцін зноў стэлефанаваліся. На беларусах хочуць выпрабаваць сумнеўную расейскую «вакцыну» 😳

Як піша БелТА, Лукашэнка і Пуцін 24 жніўня «абмеркавалі сытуацыю ўнутры нашай краіны і на вонкавым контуры, асабліва на заходнім кірунку».

Акрамя таго, яны дамовіліся аб дабраахвотным удзеле беларусаў у выпрабаваньнях вырабленай у Расеі «вакцыны» ад каранавірусу.

У расейскіх СМІ ня раз заяўлялі пра стварэньне і нібыта пасьпяховыя выпрабаваньні «вакцыны» ад COVID-19, але дэталі выпрабаваньняў не раскрываліся. Сусьветная арганізацыя здароўя заклікала праверыць адпаведна належным працэдурам бясьпеку гэтай «вакцыны»

У Гомлі на 5 дзён арышту асудзілі журналіста Яўгена Меркіса

Яўгена Меркіса затрымалі ў пятніцу. Выходныя ён правёў у ізалятары часовага ўтрыманьня.

Справу разглядаў судзьдзя Сяргей Кармановіч з суду Цэнтральнага раёну. Яўген Меркіс прасіў праводзіць суд на беларускай мове. Суд адхіліў хадайніцтва, матываваўшы тым, што журналіст разумее расейскую мову. Міліцыя абвінаваціла журналіста ў «парушэньні парадку правядзеньня масавага мерапрыемства» — актыўным удзеле ў пікеце.

«21 жніўня я быў у цэнтры гораду, там праходзілі розныя мерапрыемствы. Я ня бачыў прычын, што мне нельга знаходзіцца ў цэнтры гораду. Мяркую, што каб было нешта несанкцыянаванае, то пра гэта б напісалі і папярэдзілі — на сайце гарвыканкаму ці міліцыі», — патлумачыў журналіст.

«Што вы там рабілі?» — удакладніў судзьдзя. «Я размаўляў з людзьмі», — патлумачыў Меркіс.

Судзьдзя пастанавіў пакараць журналіста паводле артыкулу 23.34 КаАП арыштам на 5 дзён. Нядаўна Меркісу давалі 15 содняў, але яго адпусьцілі, як і многіх затрыманых падчас акцыяў пратэсту

У паведамленьні прэс-службы Крамля выпрабаваньні «вакцыны» ня згадваюцца. Перадаюць толькі, што Лукашэнка і Пуцін «працягнулі абмеркаваньне сытуацыі ў Беларусі», Лукашэнка «праінфармаваў» Пуціна пра «захады, што прымаюцца ў мэтах нармалізацыі абстаноўкі ў краіне», «закраналася тэматыка двухбаковай супрацы ў процідзеяньні каранавіруснай інфэкцыі».

З чыёй ініцыятывы адбылася размова, не ўдакладняюць

Замяніў чырвона-зялёны сьцяг на бел-чырвона-белы на плошчы Леніна — распачалі крымінальную справу

Як піша Міністэрства ўнутраных справаў, затрыманы — 23-гадовы беспрацоўны гамяльчук, якога раней нібыта прыцягвалі да адміністрацыйнай адказнасьці за расьпіваньне алькаголю ў неналежным месцы. Ён нібыта патлумачыў сілавікам, што ўчынак быў «свавольствам», не зьвязаным з палітычнай і грамадзянскай пазыцыяй.

Справу распачалі паводле крымінальнага артыкулу за «зьнявагу дзяржаўнай сымболікі» (арт. 370). Артыкул прадугледжвае пакараньні ад штрафу, арышту ці грамадзкіх работаў да абмежаваньня волі на год

🇷🇺 Міністэрства фінансаў Расеі прапануе абмежаваць дзяржаўныя крэдыты для Беларусі, Армэніі, Вэнэсуэлы і Кубы, — РБК

Міністэрства падрыхтавала правілы, якімі, у выпадку зацьвярджэньня, будзе кіравацца Расея пры выдачы дзяржаўных крэдытаў іншым краінам, паведамляе агенцтва РБК.

Паводле РБК, калі правілы наданьня дзяржаўных крэдытаў будуць зацьверджаныя ў тым выглядзе, што прапануе расейскае Міністэрства фінансаў, некалькі традыцыйных даўжнікоў Расеі, у тым ліку Беларусь, больш ня змогуць пазычаць у яе грошы паводле агульных правілаў

Адстаўку прынялі

Сьвятлану Алексіевіч таксама выклікалі ў Сьледчы камітэт як сьведку ў справе супраць Каардынацыйнай рады. Яна мусіць зьявіцца да сьледчых у сераду а 14.00.

Сьвятлана Алексіевіч уваходзіць у лік сям'і чальцоў прэзыдыюму Каардынацыйнай рады. Марыя Калесьнікава казала, што праз стан здароўя Алексіевіч ня можа ўдзельнічаць непасрэдна ў працы прэзыдыюму, але знаходзіцца на пастаяннай сувязі. Тое ж тычыцца і Сьвятланы Ціханоўскай, за зносіны зь якой адказвае Вольга Кавалькова.

Раней у гэтай справе дапытвалі іншых чальцоў Рады — Максіма Знака і Сяргея Дылеўскага, цяпер дапытваюць Лілію Ўласаву, заўтра маюць дапытаць Паўла Латушку. Сябры прэзыдыюму Вольга Кавалькова і Сяргей Дылеўскі цяпер затрыманыя, дакладных зьвестак пра іхнае месцазнаходжаньне і абвінавачаньні няма

«Людзі ў цывільным» адганяюць грамадзянаў ад стыхійнага мэмарыялу забітаму дэманстранту ля станцыі мэтро «Пушкінская» ў Менску, піша канал #МотолькоПомоги. Дакумэнты паказаць адмаўляюцца, здымаюць грамадзянаў на відэа, кажуць пра «несанкцыянаваную акцыю»

У чым прычыны жорсткасьці супрацоўнікаў АМАПу да затрыманых? Тлумачыць псыхоляг Раман Кручкоў, які прафэсійна працуе з агрэсарамі ў карэкцыйных групах

Сьцісла:
— Людзі ва ўмовах вакуўму маральных межаў, адсутнасьці заканадаўчай рэакцыі, грамадзкага кантролю могуць ісьці далей і далей, і такія дзеяньні могуць прыводзіць да сумных і трагічных наступстваў.
— Практыка сьведчыць, што людзі, якія ўжываюць празьмерны гвалт або жорстка абыходзяцца са сваімі блізкімі, разумеюць, што яны робяць. У пераважнай большасьці яны псыхічна здаровыя.
— Калі чалавек выходзіць «зараджаным» на выкананьне загаду, то трэба ўсьведамляць, што ён разумее, што робіць, і абсалютна дакладна ня варта ўзаемадзейнічаць зь ім, дакранацца рукамі. І гэта пытаньне не «правакаваньня», а бясьпекі

Сустаршыню страйкаму «Беларуськалію» Анатоля Бокуна 24 жніўня ў Салігорску аштрафавалі на 675 рублёў. Пра гэта Свабодзе напісаў прэс-сакратар страйкаму Глеб Сандрас

Ціск на Алексіевіч можа дорага абысьціся Лукашэнку — думка аглядальніка Свабоды Сяргея Навумчыка

Некаторыя апошнія крокі паліттэхнолягаў Аляксандра Лукашэнкі, якія мелі на мэце падвысіць ягоны рэйтынг, прывялі да супрацьлеглага — так, выхад зь верталёту з «калашнікавым» без ражка з патронамі выклікаў пачуцьці няёмкасьці ў ягоных маскоўскіх прыхільнікаў і трывогу — у заходніх палітыкаў.

І сёньняшняя навіна можа быць гэткім жа моцным ударам па іміджы Лукашэнкі на міжнародным узроўні, як і факты катаваньняў людзей на Акрэсьціна. Сьледчы камітэт выклікаў Сьвятлану Алексіевіч у якасьці сьведкі ў крымінальнай справе, заведзенай па факце стварэньня Каардынацыйнай рады, у склад якой пісьменьніца ўваходзіць.

Няма сумневу, што гэта будзе ўспрынята сусьветнай інтэлектуальнай элітай як палітычны ціск на нобэлеўскую ляўрэатку, прычым менавіта з боку дзейнага кіраўніка Беларусі.

Калі чальцы Каардынацыйнай рады імкнуліся б нанесьці Лукашэнку іміджавыя страты, ня здолелі б прыдумаць нічога больш эфэктнага, чым гэта сёньня зрабіў Сьледчы камітэт, мяркуе аглядальнік Свабоды Сяргей Навумчык

Клініка Charite: Навальны быў атручаны

Расейскі апазыцыянэр Аляксей Навальны стаў ахвярай узьдзеяньня таксычнага рэчыва з групы інгібітараў холінэстэразы. Пра гэта заявіла ў панядзелак бэрлінская клініка Charite, дзе Навальны праходзіць лячэньне.

У паведамленьні пад загалоўкам «Клінічныя дадзеныя паказваюць на атручэньне Аляксея Навальнага», апублікаваным на сайце клінікі, гаворыцца, што «клінічныя дадзеныя паказваюць на інтаксыкацыю рэчывам з групы актыўных рэчываў, якія зьяўляюцца інгібітарамі холінэстэразы». Пэўнае рэчыва яшчэ невядомае. У паведамленьні падкрэсьліваецца, што наяўнасьць інгібітару холінэстэразы ў арганізьме была даказаная некалькі разоў у незалежных лябараторыях.

Менск, плошча Незалежнасьці. Пачаліся затрыманьні людзей, што туды прыйшлі

Відэа: канал Антона Матолькі

Менск, плошча Незалежнасьці. Людзей становіцца болей

Менск. Відавочцы паведамляюць, што гэты чалавек ішоў са сьцягам, але яго спынілі людзі ў форме і не далі прайсьці. Бачна, што яго здымаюць на камэру.

Відэа Беларусь головного мозга

Менск. Сёньня на ст. м. «Пушкінская» пачалі таксама зьбірацца людзі. Пасьля гэтага зьявіліся міліцыянты і ў мэгафон пачалі папярэджваць людзей пра адказнасьць за ўдзел у несанкцыянаваным мерапрыемстве. Быццам гэтыя людзі парушаюць закон.

А гэтулькі людзей ужо сабралася на плошчы Незалежнасьці ў Менску.