«Купалаўскі сёньня жывы як ніколі», — Ганна Севярынец пра непераможных

Чамусьці цяпер, калі ў прэсе кажуць пра Купалаўскі тэатар, які сёньня адсьвяткаваў стагодзьдзе, дадаюць азначэньне «разгромлены». З пункту гледжаньня публіцыстычнага тэксту яно, здавалася б, і правільна: той Купалаўскі, куды можна было рэспэктабэльна прыйсьці па набытых квітках, прайсьціся па фае і калідорах, сесьці ва ўтульныя крэслы і глядзець спэктакль, аздоблены апошнімі тэхнічнымі навінкамі мадэрнізаванай сцэны — сапраўды разгромлены.

Але з пункту гледжаньня праўды жыцьця — Купалаўскі сёньня жывы як ніколі.

Працяг тут:

Затрыманы спартовы журналіст Сяргей Шчурко
Аўтар «Прэсболу» Сяргей Шчурко сёньня з гадзіны дня перастаў выходзіць на сувязь.

«Прэсбол» паведаміў са слоў Вольгі Хіжынковай, былой прэсавай сакратаркі ФК «Дынама-Берасьце», што журналіст пасьпеў напісаць, што да яго едуць на размову супрацоўнікі міліцыі, пасьля чаго тэлефон перастаў адказваць.

Увечары, як паведаміла «Наша Ніва», стала вядома, што Шчурко на Акрэсьціна. Пакуль невядома, у чым яго абвінавачваюць.

Лукашэнка адкінуў рыторыку аб «незалежнасьці» і вярнуўся на пазыцыі маскоўскага васала.

У Сочы Лукашэнка артыкуляваў тэзісы, якія ніяк не сумяшчальныя з ідэяй незалежнасьці Беларусі. «Ня мы развальвалі СССР», «беларускія межы — гэта межы саюзнай дзяржавы», «старэйшы брат» і падобнае — усё гэта гучала да 2014 году, калі беларускае кіраўніцтва, занепакоенае захопам Крыму, пачало палітыку «шматвэктарнасьці».

Увосень 1993-га тады яшчэ дэпутат Лукашэнка заявіў, што ён «гатовы на каленях паўзьці ў Расею». Сёньняшняе становішча можа быць канстатацыяй, што даўняя ягоная мэта — дасягнутая: ён стаіць на каленях перад Пуціным, ад якога цяпер залежны і палітычна, і асабіста.

Зяленскі: Ня будзе дыялёгу ў Беларусі – можна атрымаць «нешта накшталт Майдану»

Прэзыдэнт Украіны Уладзімір Зяленскі лічыць, што ў выпадку адсутнасьці дыялёгу паміж уладай і народам Беларусь можа атрымаць «нешта накшталт Майдану».

Пры гэтым ўкраінскі прэзыдэнт адзначыў, што не бачыць «сымбалічнага лідэра», вакол якога людзі ў Беларусі маглі б згуртавацца. Ён таксама заявіў, што «у любым выпадку падтрымлівае беларускі народ» і для яго важна, «каб беларусы самі вырашалі сваю будучыню».

У Салігорску аднаго за адным судзяць страйкамаўцаў: у ізалятарах Любані і Салігорску ўжо не хапае месцаў

Прадстаўніка страйкаму «Беларуськалія» Рамана Ляончыка ў сувязі з гэтым перавезьлі ў ізалятар у Копылі, паведамляе ТГ-канал страйкаму «Беларуськалію». Сёньня Ляончыка прысудзілі да 15 сутак за парушэньне парадку масавых мерапрыемстваў. Па 15 сутак далі сёньня таксама сябрам страйкаму Сяргею Чаркасаву і Паўлу Разумоўскаму.

За апошні час на 7, 10, 15 сутак, былі асуджаныя сябры страйкаму і ўдзельнікі стачкі Леанід Мархотка, Анатоль Бокун, Уладзімер Шыла, Дзяніс Тарасевіч, Мікалай Зімін, Пётр Печкуроў, суду чакае Сяргей Казелька.

500 хасідаў захрасьлі ў Гомлі, чакаючы, калі ўкраінцы адкрыюць межы

500 хасідаў з ЗША, Вялікай Брытаніі і Ізраілю «захрасьлі» ў Гомлі. Яны ехалі ва Ўкраіну на магілу цадзіка Нахмана, але сутыкнуліся з закрытымі праз каранавірус межамі. Хасіды ляцелі ва Ўкраіну празь Беларусь, каб паспрабаваць трапіць ва Ўмань. Аднак украінцы іх не пускаюць. Хасіды аселі пакуль у Пінску і Гомлі. У Гомлі яны занялі практычна ўсе месцы ў гатэлях, пасяліліся на арандаваных кватэрах і ў аграсядзібах. На мяжы з Украінай 14 верасьня было 150 хасідаў.

Вось тут шмат фота

Юры Гурскі адмовіўся ад стварэньня ў Беларусі IT-унівэрсытэту з-за палітычных умоваў

Адзін з самых буйных беларускіх ІТ-бізнэсоўцаў распавёў пра гэта ў інтэрвію часопісу Forbes

Да пратэстаў Гурскі з калегамі выношваў ідэю пабудаваць IT-унівэсытэт у Беларусі «па лепшых заходніх узорах». «Мы думалі браць не больш 1000-2000 чалавек. Мы маглі б сказаць выпускнікам, што тыя, хто будзе добра вучыцца, гарантавана будуць працаўладкаваныя ў пэўны пул кампаній. Бацькі былі б матываваныя аддаваць у такі унівэрсытэт таленавітых дзяцей », - цытуе часопіс Гурскага.

Зараз, мяркуе ён, падобныя ідэі залішне рызыкоўныя. «Напрыклад, могуць проста «прышыць»артыкул, калі з нашых 2000 студэнтаў 700 будуць мітынгаваць. А пасадзяць у выніку тых, хто адкрыў унівэрсытэт», - упэўнены Гурскі.

Агульнаканадзкія акцыі салідарнасьці прайшлі ва ўсіх вялікіх гарадах Канады

У Ванкувэры, Вініпэгу, Галіфаксе, Калгары, Атаве, Манрэалі, Рэджайне, Таронта, Эдмантане прайшлі акцыі падтрымкі народу Беларусі пад дэвізам «Беларусь не прадаецца!». Канадзкія беларусы хочуць прыцягнуць увагу грамадзкасьці і сусьветных СМІ да жорсткіх рэпрэсіяў рэжыму Лукашэнкі, а таксама дэвізам акцыяў папярэдзіць Расею. Вось як гэта выглядала.

Зьявілася яшчэ адно відэа таго, як кіраўнік ГУБАЗіК Мікалай Карпянкоў разьбівае дзьверы менскай кавярні OʼPetit

Яго ў сябе ў фэйсбуку апублікаваў праграміст Канстанцін Канапко, які 6 верасьня хаваўся ў кавярні і быў пасьля затрыманы.

На відэа Карпянкоў грукае ў зачыненыя дзьверы, адбываецца кароткі дыялёг і міліцэйскі начальнік пачынае біць шкло.

Мурал на Плошчы Пераменаў адноўлены. Ужо дзясяты раз. Фота даслалі чытачы.

Спартовага журналіста Сяргея Шчурко асудзілі на 15 сутак. Гэтую інфармацыю Свабодзе пацьвердзілі ў Першамайскім РУУС.

🇺🇸 Амэрыканскае выданьне The Washington Post апублікавала артыкул Сьвятланы Ціханоўскай.

Сьцісла пераказваем яго зьмест.

🔺️ «Мы настойваем на мірным пратэсьце і адмаўляемся ўжываць гвалт». Ціханоўская лічыць гэта дастатковым.
🔺 «У Лукашэнкі няма будучыні ў якасьці лідэра гэтай краіны, і ягоны сыход з улады – гэта толькі пытаньне часу».
🔺 Людзі будуць працягваць масавыя дэманстрацыі і ціск на інстытуты дзяржавы, а прыватныя бізнэсы – байкот дзяржаўнага апарату і прадпрыемстваў.
🔺 «Мы просім іншыя ўрады спыніць супрацоўнічаць з рэжымам і ўвесьці санкцыі ў дачыненьні да фізычных асоб, якія падрабілі вынікі выбараў і ўчынілі злачынствы супраць суграмадзян».

Колькі сувэрэнітэту Лукашэнка зьбіраецца здаць

Лукашэнка застаўся апошнім з постсавецкіх прэзыдэнтаў, які называе Расею «старэйшым братам». Так ён яе назваў і падчас візыту ў Сочы да Ўладзіміра Пуціна. Колькі сувэрэнітэту ён зьбіраецца здаць? У эфіры расейскай Свабоды пра гэта разважаюць расейскі палітоляг Станіслаў Бялкоўскі і беларускі палітык Анатоль Лябедзька разам зь вядоўцай Аленай Рыкаўцавай. https://svabod1.azureedge.net/a/30839471.html

Паглядзіце, якое відэа даслалі нам чытачы з Парыжу. Гэта акцыя салідарнасьці і пэрформанс «Людзі ў масках».

Як у Беларусі прымушаюць маўчаць спартоўцаў. Вялікае інтэрвію Алены Леўчанкі

Самая тытуляваная беларуская баскетбалістка Алена Леўчанка разам з шэрагам вядомых спартоўцаў выступіла супраць вынікаў прэзыдэнцкіх выбараў і тэрору з боку сілавікоў на вуліцах Беларусі пасьля 9 жніўня.

У вялікім інтэрвію праекту «Морква» яна расказала Каці Маркоўскай, чаму ходзіць на ўсе мірныя маршы і чым спартоўцам пагражаюць за гэта.

Глядзець https://www.youtube.com/watch?v=1ZplhYU_hc0&feature=emb_title

У ЗША навукоўцы выявілі бялок, які нэўтралізуе каранавірус

Навукоўцы зь Пітсбурскага ўнівэрсытэту выявілі бялок, здольны цалкам нэўтралізаваць каранавірус новага тыпу нават пры мінімальнай дозе. Выяўлены бялок здольны ўваходзіць у кантакт з S-бялком каранавірусу, пранікаць унутр яго і зьнішчаць.

Размова ідзе пра бялковае злучэньне, якое ў дзесяць разоў меншае за поўнапамернае антыцела, якое выкарыстоўваецца для стварэньня прэпарату Ab8 супраць COVID-19, гаворыцца ў дасьледаваньні, апублікаваным у панядзелак навуковым часопісе Cell.https://www.cell.com/cell/fulltext/S0092-8674(20)31148-X

У дасьледаваньні адзначаецца, што гэты прэпарат паказаў высокую эфэктыўнасьць у прафіляктыцы і лячэньні каранавіруснай інфэкцыі сярод мышэй і хамякоў.

«Ab8 ня толькі мае патэнцыял у тэрапіі COVID-19, але і разглядаецца як прафіляктычны сродак для прадухіленьня заражэньня людзей каранавірусам новага тыпу», — сказаў адзін з аўтараў дасьледаваньня Джон Мэларс.