ЦВК: Ярмошына не жыве ў Драздах

Старшыня Цэнтральнай выбарчай камісіі не знаходзілася і не жыве ў сваім доме ў Драздах, куды ў нядзелю 13 верасьня дайшла частка дэманстрантаў, расказалі ў яе прыёмнай. «Іншых камэнтароў ня будзе»

Памежны камітэт патлумачыў, чаму мітрапаліта Кандрусевіча не пусьцілі ў Беларусь: «Пашпарт прызналі несапраўдным»

Такое тлумачэньне перадае Catholic.by. Як так склалася, што пашпарт грамадзяніна Беларусі прызналі несапраўдным, пакуль той быў за мяжой, і цяпер ён ня можа законна трапіць у краіну, грамадзянінам якой зьяўляецца, незразумела

У менскую гімназію заявілася лектарка зь міліцыі. Бацькі выклікалі на размову дырэктара

Прычынай стаў пятнічны прыход у гімназію супрацоўніцы інспэкцыі ў справах непаўналетніх Фрунзэнскага РУУС Менска Вікторыі Рудой.

11 верасьня школьнікаў 8-х клясаў сабралі ў актавую залю, дзе прадстаўніца праваахоўных органаў папярэдзіла дзяцей пра адказнасьць за ўдзел у несанкцыянаваных мерапрыемствах, расказала пра «фашысцкія сымбалі», пад якімі ходзіць апазыцыя, а таксама папярэдзіла, каб больш за двое не зьбіраліся, бо гэта ўжо «масавая акцыя».

На ганак да бацькоў выйшла намесьніца дырэктара ў выхаваўчай працы Вольга Кулінковіч

Дзяніс Дудзінскі на волі

Дудзінскі пра тое, чаму ня выпусьцілі раней

Лукашэнка неаднаразова палохаў Крэмль, што пратэсты ў Беларусі могуць перакінуцца на Расею. Яму пярэчыў прэсавы сакратар Пуціна Дзьмітры Пяскоў: маўляў, у Расеі зусім іншая сытуацыя. Вынікі галасаваньня ў РФ на мінулым тыдні хутчэй пацьвердзілі рацыю Пяскова, — піша аналітык Юры Дракахруст

Каардынацыйная рада зьвярнулася да Расеі 🇷🇺

«Падтрымка афіцыйнымі асобамі дзеяньняў сілавых органаў Беларусі, палітыкі рэпрэсіяў замест дыялёгу, безумоўна, пакіне сур'ёзны нэгатыўны адбітак на двухбаковых адносінах.

У той жа час шчырая падтрымка рэальнага, а ня штучнага, дыялёгу ўнутры краіны паміж рознымі палітычнымі сіламі будзе садзейнічаць больш хуткай нармалізацыі становішча ў Беларусі і разьвіцьцю адносінаў Беларусі і Расеі»

Сваё 100-годзьдзе Купалаўскі тэатар сустракае за зачыненымі дзьвярыма

Дырэктар, рэжысэры і большасьць актораў звольненыя. У тэатры афіцыйна аб’яўлены трохмесяцовы прастой. Дзеячы культуры і спартоўцы выступілі ў падтрымку спустошанага тэатру ў межах акцыі #купалаўскі100

«У галаве дзьве гематомы, а саджаюць у турму»

У Ягора Сугойдзя, якога 9 жніўня зьбіў аўтазак (на фота), моцнае страсеньне мозгу, парвалася бубенная балона — правым вухам ня чуе, расказвае яго дзядзька. «Таксама пашкоджана шыйная хрыбетка, якая трымае чэрап. І зламана шэсьць рэбраў. Што тычыцца нагі, ня скардзіўся. Я да яго прыяжджаў, дык ён быццам хадзіў нармальна, не кульгаў. Што адразу кідаецца ў вочы, дык гэта проста неймаверна вялікія гузакі на лбе. Відаць, падаў галавой і грудзьмі, раз рэбры павыломваныя».

Гісторыі гвалту сілавікоў у жніўні: https://bit.ly/353Tb9E

🇸🇪 Бел-чырвона-белы сьцяг у швэдзкай Ляпляндыі. Кадры ад чытачоў Свабоды

«Саюзнай дзяржавы» Пуціну🇷🇺 дастаткова, каб наблізіцца да аншлюсу», — мяркуе аглядальнік Свабоды Сяргей Навумчык

«Вяртаньне блуднага сына» будзе суправаджацца падзякай Пуціну за падтрымку, безь якой, найхутчэй, гэтую восень Лукашэнка сустракаў бы ня ў статусе кіраўніка дзяржавы.

«Ніякіх дакумэнтаў сёньня падпісана ня будзе», але «Пуцін запатрабуе больш энэргічнага прасоўваньня інтэграцыі і напаўненьня рэальным зьместам» так званай «саюзнай дзяржавы», якая, калі б былі выкананыя ўсе раней падпісаныя пагадненьні, азначае фактычны аншлюс

МУС праводзіць праверку таго, як жодзінскі міліцыянт ударыў жанчыну

«Мы абавязкова гэты інцыдэнт пракамэнтуем і не пакінем яго без увагі. Цяпер праводзіцца праверка. Самае галоўнае, каб уся гэта сытуацыя, якая сёньня актыўна абмяркоўваецца ў інтэрнэц,е атрымала абʼектыўную ацэнку», — сказала прэс-сакратарка МУС Вольга Чамаданава

У Гомлі супрацоўнікі АМАП пры затрыманьні пашкодзілі нагу 22-гадовай мэдсястры

13 верасьня пасьля «Маршу герояў» у Гомлі затрымалі 27 чалавек, у тым ліку траіх байкераў і іх пасажыраў.

«Нас схапілі супрацоўнікі АМАП і жорстка цягнулі ў мікрааўтобус, „сіні бус“. Мяне штурхалі і пашкодзілі нагу. Аднаго майго прыяцеля білі пры затрыманьні. З Цэнтральнага РАУС мяне забралі на „хуткай“, дыягнаставалі расьцяжэньне зьвязак. Цяпер я хаджу на мыліцах», — расказала Ганна Астаф’ева.

Яна напісала заяву на супрацоўнікаў АМАП. Ноччу 13 верасьня Ганну ўжо апытвалі супрацоўнікі Сьледчага камітэту

🇷🇺Чаму расейская інтэлігенцыя маўчыць пра падзеі ў Беларусі? Журналістка расейскай службы Радыё Свабода спрабавала знайсьці адказ на пытаньне Сьвятланы Алексіевіч:

https://youtu.be/YMcy17Et_Lo

«Марш герояў» у Менску 13 верасьня. Відэа з вышыні, раён «Мінск-Арэны» і Драздоў. Пік калёны ў 17.30. У 17.38 толькі паказаўся хвост.

Відэа: @natbelographic

Чаму ў Беларусі не «каляровая рэвалюцыя», а зусім новая «тэхналёгія», піша Дзьмітры Гурневіч:

«Стараўладны лідэр кажа: „Калі ня я, то пачнецца вайна“. У новага лідэра ўсё інакш: „Мы і ёсьць перамены, да якіх мы імкнёмся“. Рухальная сіла „новай улады“ — гэта калегіяльнае ўзаемадзеяньне роўных. Адкрытасьць і празрыстасьць – адна зь яе галоўных прыкметаў»