🇪🇺 Санкцыі Эўразьвязу супраць уладаў Беларусі ўступяць у сілу не пазьней за 21 верасьня, — кіраўнік МЗС Чэхіі

Міністар замежных спраў Чэхіі Томаш Пэтршычэк
заявіў, што сьпіс асобаў, якія трапілі пад санкцыі, можа быць дапоўнены.

Паводле міністра, Эўразьвяз ставіць на мэце пачатак перамоваў паміж беларускімі ўладамі і апазыцыяй. Акрамя таго, заявіў ён, кіраўніцтва Беларусі павінна выканаць абавязаньні, якія вынікаюць зь сяброўства краіны ў АБСЭ, і забясьпечыць, у прыватнасьці, дзейнасьць на тэрыторыі краіны місіі гэтай міжнароднай арганізацыі

Каля ГДУ ім.Ф.Скарыны прайшоў пікет з удзелам выкладчыцы і сьвятара

Ранкам 7 верасьня каля будынку Гомельскага дзяржаўнага ўнівэрсытэту імя Францыска Скарыны прайшоў пікет. У ім узялі ўдзел выкладчыца ўнівэрсытэту Натальля Суслава і праваслаўны сьвятар Уладзімір Драбышэўскі. Фота студэнта ўнівэрсытэту для Свабоды

‼️ Марыю Калесьнікаву выкралі невядомыя

Паводле Tut.by, каля 10.05 невядомыя людзі пасадзілі яе ў аўтобус з надпісам «Связь» ля Нацыянальнага мастацкага музэю і зьвезьлі ў невядомым кірунку.

Прэс-сакратар Каардынацыйнай рады Антон Раднянкоў сказаў, што Марыя была адна ў цэнтры гораду ў сваіх справах, затым сувязь зь ёй зьнікла. Няма сувязі і з выканаўчым сакратаром Рады Іванам Краўцовым — #МотолькоПомоги піша, што яго затрымалі невядомыя.

Дзе цяпер Марыя, у Радзе ня ведаюць. Максім Знак паведаміў, што ня можа зьвязацца з Марыяй.

Прэсавая сакратарка МУС Вольга Чамаданава заявіла Свабодзе, што пакуль не камэнтуе гэтую інфармацыю.

Марыя Калесьнікава — сябра прэзыдыюму Каардынацыйнай рады. Да таго яна фактычна ўзначаліла штаб кандыдата ў прэзыдэнты Віктара Бабарыкі, затым была паплечніцай Сьвятланы Ціханоўскай

Паведамленьне пра зьнікненьне старшага віцэ-прэзыдэнта кампаніі EPAM Максіма Баграцова выявілася непраўдзівым, ён усё ж выйшаў на сувязь

Паводле Kyky.org, сёньня затрымалі і мастачку Надзею Саяпіну, аўтарку пэрфомансу супраць канфіскацыі карцінаў галерэі «Белгазпрамбанку». Саяпіну павезьлі з дому ў Савецкі РУУС Менску нібыта для азнаямленьня з пратаколам аб удзеле ў несанкцыянаваным мерапрыемстве, але яе тэлефон «некалькі гадзінаў» недасяжны

☢️ На першым энэргаблёку БелАЭС пачалі гідраўлічныя выпрабаваньні рэактарнай устаноўкі

Паведамляецца, што пасьпяховае завяршэньне гідравыпрабаваньня дазволіць перайсьці да далейшых пунктаў праграмы запуску — разагрэву першага контуру рэактара да намінальных парамэтраў, вызначэньня яго гідраўлічных характарыстык і вываду рэактара на мінімальна кантраляваны ўзровень магутнасьці. Пуск першага энэргаблёку БелАЭС заплянаваны на чацьверты квартал гэтага году

Лукашэнка сьвядома абвастрае адносіны з Захадам, мяркуе аглядальнік Свабоды Сяргей Навумчык

Учорашнія жорсткія затрыманьні і зьбіцьцё ўдзельнікаў мірных акцыяў па ўсёй краіне, сёньняшні захоп чальца прэзыдыюму Каардынацыйнай рады Марыі Калесьнікавай сьведчаць, што ўлады не зрабілі высноваў пасьля адносна мяккіх санкцый з боку некаторых краінаў Эўразьвязу.

Альбо наадварот, вырашылі сьвядома ігнараваць думку міжнароднай супольнасьці.
Такая пазыцыя можа тлумачыцца імкненьнем прадэманстраваць Крамлю яшчэ больш выразную антызаходнюю пазыцыю напярэдадні сустрэчы Лукашэнкі з Пуціным, мяркуе аглядальнік Свабоды Сяргей Навумчык

Дзень гораду пройдзе без традыцыйных масавых гуляньняў, паведамляе Менгарвыканкам.

Такое рашэньне прынялі ў сувязі з эпідэмічнай сытуацыяй. Перавагу аддалі лякальным акцыям, выставам, тэматычным урокам, гаворыцца ў канале ўладаў Менску

(фота ілюстрацыйнае)

Міністэрства ўнутраных справаў, Сьледчы камітэт і Камітэт дзяржаўнага кантролю заяўляюць, што «ня маюць інфармацыі» пра сёньняшняе выкраданьне Марыі Калесьнікавай. Камэнтар Камітэту дзяржаўнай бясьпекі пакуль не ўдалося атрымаць

🔆 Злачыннасьць падае, нагрузка на Сьледчы камітэт зьменшылася, — старшыня СК Наскевіч

На сустрэчы з Лукашэнкам кіраўнік СК Іван Наскевіч заявіў, што Сьледчы камітэт сёлета «спакойна і плянамерна выконвае свае задачы адпаведна прызначэньню».

«Узровень злачыннасьці ў краіне зьнізіўся прыкладна на 8% у параўнаньні з папярэднім годам. Адпаведна, зьменшылася і нагрузка на Сьледчы камітэт», — дадаў ён.

Паводле Наскевіча, зьмянілася структура злачыннасьці, нахіл адбыўся ў бок злачынстваў у сфэры інфармацыйных тэхналёгій

Шукаюць сьведак затрыманьня Насты Захарэвіч

Беларуская асацыяцыя журналістаў просіць адгукнуцца сьведак працы і затрыманьня журналісткі Насты Захарэвіч у суботу на «Жаночым маршы» ў Менску. Яе няма ў даступных сьпісах зьняволеных у ізалятарах — дзе яна, невядома.

Тых, хто бачыў яе на маршы ці ў час затрыманьня, просяць тэлефанаваць на нумар +375 29 785-54-79

У Менску затрымалі айцішніка, які прапаноўваў Лукашэнку зьняцца з выбараў

Мяркуючы па фота, відэа і паведамленьнях у Facebook, айцішнікаў і яшчэ некалькіх удзельнікаў мітынгу груба затрымалі ў сталічнай кавярні O’Petit, якая стала ўчора «героем» навін. Там спрабавалі схавацца ўдзельнікі акцыі пратэсту, якія ўцякалі ад сілавікоў пасьля заканчэньня «Маршу адзінства». Невядомыя ў масках разьбілі ўваходныя дзьверы і затрымалі мітынгоўцаў, у тым ліку Канстанціна Канопку.

У ліпені ён запісаў відэазварот да Лукашэнкі, прапанаваўшы таму вызваліць затрыманых кандыдатаў у прэзыдэнты, а самому зьняцца з выбараў. Таксама ён зьвяртаўся да дзяржаўных службоўцаў з просьбай адмовіцца ад удзелу ў супрацьзаконнай дзейнасьці

У БарДУ прайшла акцыя салідарнасьці зь менскімі ўнівэрсытэтамі — студэнты сьпявалі «Перемен» і «Воины света» ў холе.

Сьпяваюць і ў Менску: напрыклад, у Інстытуце культуры, на юрыдычным факультэце БДУ, і ў МДЛУ

🇷🇺 Крэмль упершыню пракамэнтаваў «перахопленую размову» Ніка і Майка

У Крамлі азнаёміліся з запісам тэлефоннай размовы пра Аляксея Навальнага, якая была абнародаваная на беларускай тэлевізіі, заявіў прэс-сакратар прэзыдэнта Расеі Дзьмітрый Пяскоў.

«Безумоўна, мы мелі магчымасьць лёгка азнаёміцца з матэрыялам СМІ. Ну, напэўна, ня нам меркаваць аб карыснасьці і каштоўнасьці гэтага запісу. Гэта, хутчэй, праца спэцыяльных службаў, што яны і робяць», — сказаў Пяскоў журналістам у панядзелак.

Адказваць на пытаньне пра давер да гэтага запісу Пяскоў ня стаў і спаслаўся ізноў на тое, што гэта праца спэцслужбаў

«Людзі ў цывільным» ходзяць па кватэрах у Новай Баравой

Як перадае «Наша ніва», невядомыя грукаюць у кватэры, жыхары якіх вывешваюць бел-чырвона-белыя сьцягі — Новая Баравая вядомая тым, што сьцягоў там вывешваюць вельмі шмат. Зьвесткі пра візыты «людзей у цывільным» зьяўляюцца ў чатах Новай Баравой, але што гэта за людзі і чаго дакладна яны патрабуюць, невядома

Больш за 170 000 чалавек напісалі ў плятформу «Голас», што пратэставалі 6 верасьня.

МУС Беларусі налічыла 31 тысячу ўдзельнікаў з 42 акцый пратэсту. Міліцыя затрымала 633 чалавекі

🇷🇺 Крэмль назваў зьбіцьцё пратэстоўцаў у Менску і пабітае шкло ў кавярні «хуліганскімі выхадкамі»

Журналіст «Эхо Москвы» спытаўся сёньня ў прэс-сакратара Пуціна Дзьмітрыя Пяскова, ці лічыць Расея трывожным званком тое, што ў нядзелю ў Менску, апранутыя ў цывільную вопратку, білі дубінкамі іншых людзей і разьбілі ўваходныя дзьверы ў кавярню.

Карэспандэнта цікавіла, ці спатрэбіцца Расеі ўводзіць тую самую рэзэрву сілавікоў, ці гэта пакуль ня тое, пра што казаў Уладзімір Пуцін.

Пяскоў: «Не. Безумоўна, гэта нейкія хуліганскія выхадкі. Мы ведаем з заявы нашых беларускіх калег, што яны ўжо правяраюць гэтую інфармацыю, гэтыя здымкі. Спадзяёмся, што ў гэтым выпадку беларускія праваахоўныя органы выканаюць сваю працу».

Па шматлікіх сьведчаньнях, невядомымі людзьмі ў цывільным, якія білі і затрымлівалі ўдзельнікаў мірных акцыяў пратэсту, кіравалі супрацоўнікі праваахоўных ворганаў. Таксама паведамляецца, што дзьверы ў кавярні на праспэкце Пераможцаў разьбіў дубінкай начальнік ГУБАЗіКа, палкоўнік Мікалай Карпенкаў

Ціханоўская пра выкраданьне Калесьнікавай: «Улады памыляюцца, калі думаюць, што гэта нас спыніць»

«Улада займаецца тэрорам, па-іншаму гэта не назавеш. Выкраданьне Марыі Калесьнікавай, Антона Раднянкова і Івана Краўцова — гэта спроба сарваць працу Каардынацыйнай рады і запалохаць яе чальцоў. Улады памыляюцца, калі думаюць, што гэта нас спыніць.

Чым больш яны запалохваюць, тым больш людзей будзе выходзіць на вуліцу. Мы працягнем барацьбу, будзем дамагацца вызваленьня ўсіх зьняволеных і правядзеньня новых сумленных выбараў», — заявіла Сьвятлана Ціханоўская

У Магілёве на 810 рублёў аштрафавалі лідэра пратэставых акцыяў

Уладзімера Шанцава судзілі паводле чатырох пратаколаў за ўдзел у несанкцыянаваных акцыях. Шанцаў — старшыня абласной арганізацыі АГП, на мінулых выбарах быў даверанай асобай Сьвятланы Ціханоўскай