"Укладаючыся ў культуру, мы падтрымліваем сацыяльную адказнасць і грамадзянскі актывізм… Мы ўкладаемся ў права на крэатыўнае самавызначэнне і роўныя магчымасці на асабісты рост. Мы атрымліваем права на жыццё, на выбар будучыні і свабоду творчасці.

Гаворка пра рэанімацыю нацыі. Гэта больш чым культура".

▪️Максім Жбанкоў і Мікалай Халезін пры ўдзеле Надзеі Зелянковай напісалі маніфест беларускага культурніцкага поля, версія 2023.

🔻Што адбываецца ў беларускай культурніцкай сферы? Навошта ўкладвацца ў культуру? Дзе перспектыва і што рабіць далей?

"Больш чым культура" — чытаць цалкам.

Тэкст падрыхтаваны ў межах раcпрацоўкі дарожнай мапы падтрымкі беларускай культуры.

🔥 #магчымасці тыдня:

▪️Далучайцеся да чэленджу "КЛІПЕНЬ48" для відэа-аматараў і паспрабуйце зняць кліп для беларускіх музыкаў за 48 гадзін! Музыкам, якія хочуць прымаць удзел, трэба даслаць свае трэкі, а прадакшн-камандам — зарэгістравацца да 18 ліпеня.

▪️Да 16 ліпеня падавайце заяўкі на ўдзел у першым нефармальным з'ездзе незалежных беларускіх кінематаграфістаў у Варшаве. Мэта: аб'яднанне ў супольнасць для працы над стварэннем агульнай стратэгіі развіцця беларускага кіно.

▪️"Прававая ініцыятыва" да 16 ліпеня праводзіць набор на КінаТрэнінг у Вільні, у выніку якога вы здымеце фільм па правах чалавека.

▪️Беларускі свабодны тэатр запрашае валанцёраў у Варшаве, каб разам рабіць маскі з пап'е-машэ для новага спектакля.

❓Што такое арт-рэзідэнцыі і як у іх трапіць? Адказвае Кацярына Раманчык, менеджарка культурніцкіх праектаў, эспертка @radakultury.

➕ Яшчэ #магчымасці — на @sekktor. Цяпер і ў інстаграме: гайды, анонсы кам’юніці-падзей, размовы з эксперт(к)амі з культсупольнасцяў і інш. Падпісвайцеся!

"Алесь — гэта ўзорны прыклад нязломнасці, нескаронасці і прынцыповасці. І ён засведчыў гэта ўсім сваім жыццём".

Кіраўнік @radakultury Сяргей Будкін узгадвае палітзняволенага мастака Алеся Пушкіна ў эфіры "Радыё Свабода".

▪️Алесь Пушкін памёр 11 ліпеня ў рэанімацыі гродзенскай бальніцы хуткай дапамогі. Па інфармацыі выдання Most, у шпіталь Алесь трапіў ужо ў непрытомным стане з прабадной язвай. У турме яму своечасова не аказалі дапамогу.

Алеся Пушкіна пахаваюць 13 ліпеня на радзіме ў Бабры. Развітанне пачнецца а 10-й раніцы ў двары па вул. Горная, 4. Паніхіда — у 12:30, пахаванне плануецца ў 13:30

🖤Беларуская Рада культуры выказвае шчырыя спачуванні сям'і, блізкім і сябрам Алеся Пушкіна.

Збор памяці Алеся Пушкіна: падтрымайма сям'ю Алеся і ўпарадкуйма творчы наробак мастака.

11 ліпеня стала вядома, што памёр палітвязень, выбітны мастак, перформер, рэстаўратар Алесь Пушкін. Страшная навіна пра смерць гэтага выбітнага творцы, а таксама жудасныя дэталі пра здзекі, праз якія прайшоў мастак у зняволенні, ускалыхнулі ўсю беларускую грамадзянскую супольнасць.

▪️Мы ладзім гэты збор, каб не пакінуць сям'ю мастака сам-насам з горам і фінансавай неўладкаванасцю. Таксама @radakultury хоча паспрыяць працы з творамі Алеся Пушкіна: сабраць, упарадкаваць і каталагізаваць яго спадчыну, матэрыялы, публікацыі.

Далучайцеся да падтрымкі

🙌 Запрашаем на вечар cалідарнасці з праваабаронцамі "Вясны".

14 ліпеня спаўняецца роўна 2 гады, як старшыня праваабарончага цэнтру "Вясна" Алесь Бяляцкі, яго намеснік Валянцін Стэфановіч і юрыст арганізацыі Уладзімір Лабковіч былі брутальна схопленыя і кінутыя за краты за сваю праваабарончую дзейнасць, легальную дапамогу грамадзянам і імкненне да дэмакратыі ў краіне.

🔻Што вядома пра зняволеных вясноўцаў на гэты момант? У якіх умовах утрымліваюцца праваабаронцы і з якімі праблемамі сутыкаюцца? Што іх падтрымлівае ў зняволенні?

#сустрэнемся_ў_гасцёўні Беларускай Рады культуры, каб абмеркаваць гэтыя і іншыя пытанні ды проста пабыць разам, падтрымаць адно аднаго.

📍14 ліпеня, пачатак у 18.00
Гасцёўня @radakultury / Вільня, Šv. Ignoto g. 5

Памяці Алеся Пушкіна — стрым на канале @radakultury.

У 3-гадзінным стрыме сабраныя дакументальныя фільмы пра Алеся Пушкіна, яго архіўныя відэазапісы, а таксама выступы беларускіх музыкантаў, прысвечаныя мастаку.

▪️Многія беларусы, якія ведалі творцу асабіста, якія шануюць яго за цвёрдую грамадзянскую пазіцыю і выбітны мастацкі талент, не маюць магчымасці сёння развітацца з Алесем Пушкіным: прыехаць на яго пахаванне, абняць яго блізкіх ды ўскласці кветкі на яго магілу.

▪️Але мы падрыхтавалі гэтую трансляцыю-развітанне, рэквіем па яскравым творцы, самаадданым беларусе, чыё сэрца назаўжды спынілася. Можна глядзець разам — за жалобным сталом, можна ўзгадваць Алеся Пушкіна на адзіноце. Якім ён быў і якім назаўжды застанецца ў нашай памяці. Энергічным, гучным, крэатыўным, бескампрамісным.

Пачатак у 20.00 па Мінску.

Сябры!

Стрым у памяць Алеся Пушкіна на канале @radakultury будзе ісці нон-стоп да вечара нядзелі, 16 ліпеня, да 20.00 па мінскім часе.

Падключайцеся ў любы зручны вам час і глядзіце трансляцыю-развітанне. Мы сабралі дакументальныя фільмы пра Алеся Пушкіна, яго архіўныя відэазапісы, а таксама выступы беларускіх музыкантаў, прысвечаныя мастаку. Дзяліцеся гэтым матэрыялам з сябрамі.

▪️Таксама нагадваем, што збор на падтрымку сям'і мастака і на працу па ўпарадкаванні яго творчага наробку працягваецца.

Ужо сабрана 13.733 еўра. Дзякуй усім, хто далучыўся!
Калі вы гатовыя ўнесці свой уклад у падтрымку, пераходзьце па спасылцы:

▪️Дапамога

Заклікаем прытрымлівацца правілаў бяспекі і не рабіць данаты з беларускіх і расійскіх картак.

Атрымальнік гранта праграмы #ArtPowerBelarus — Беларускі Моладзевы Хаб.

Яднаць людзей і ініцыятывы — задача, якую ставіць перад сабой Хаб. Ён дапамагае ствараць калабарацыі, за кошт сінергіі высілкаў сам становіцца заўважным і ўплывовым цэнтрам прыцягнення.

🔻"Звонку можа падавацца, што мы бярэмся амаль за ўсё і невядома, дзе Моладзевы Хаб большы эксперт: у моладзевым руху, культурніцкіх праектах, нефармальнай адукацыі ці грамадскім актывізме. Але ж мы самі рэалізуем толькі частку таго, што адбываецца ў нас. Займаемся менеджментам, а экспертнасць ідзе ад нашых рэзідэнтаў, якіх сёння больш як 24", — кажа каманда Хаба.

Па словах актывістаў, грант ArtPower азначае пэўныя гарантыі працы арганізацыі і яе партнёраў. Так, можна казаць, што падтрымку атрымае больш як 15 творчых суполак і ініцыятываў ў Варшаве, Беластоку, Сопаце і ў іншых гарадах Польшчы.

Беларускі Моладзевы Хаб заўсёды адкрыты да супрацы!

#ArtPowerBelarus рэлізуецца @radakultury і Дацкім інстытутам культуры пры фінансавай падтрымцы Еўразвязу.

⚡️Сустрэліся са Святланай Ціханоўскай: наперадзе шмат працы.

Прадстаўніцы @radakultury Таццяна Пашавалава, Надзея Гарэцкая, пры віртуальным удзеле Сяргея Будкіна, наведалі Офіс Святланы Ціханоўскай, каб распавесці пра дзейнасць Рады і яе падтрымку культурніцкіх ініцыятыў, абмеркаваць ролю культуры ў дэмакратычных зменах і ўзгадніцца па мэсіджах, якія агучваюцца падчас міжнародных візітаў.

"Размаўлялі пра тое, як можна ўзмацніць працу ў кірунку культурніцкай дыпламатыі і прыцягнуць большую ўвагу да нашай сферы падчас сустрэчаў на вышэйшым узроўні. І дамовіліся аб'яднаць высілкі ў гэтым кірунку", — кажа пра вынікі сустрэчы Надзея Гарэцкая.

✔️Мы прадставілі ацэнку патрэбаў па розных сферах культуры і маніфест "Больш чым культура", а з боку Офісу атрымалі інфармацыю, з прадстаўнікамі якіх краінаў у апошні час вяліся перамовы пра падтрымку беларускай культуры. І бярэмся за падрыхтоўку шэрагу дакументаў, на якія б маглі абапірацца прадстаўнікі Офіса і Аб’яднанага пераходнага кабінета ў сваёй дзейнасці.

🔥 #магчымасці тыдня:

▪️Стрыт-мастакі і мастачкі запрашаюцца да стварэння муралаў у Тбілісі, Грузія.

Арганізатары Art Yard Community не абмяжоўваюць з тэматыкай, але прапануюць раскрыць тэму калабарацыі беларусаў і грузінаў, пашукаць агульнае ў культурах. Падрыхтаваць канцэпцыю мурала і запоўніць форму рэгістрацыі трэба да 27 ліпеня.

▪️ Онлайн-курс па стварэнні муралаў прымае заяўкі да 1 жніўня. Курс складаецца з 10 лекцый па 75 хв. Будуць дыскусіі з мастакамі і магчымасць паказаць свае праекты спікерам і ўдзельнікам.

▪️Да 21 ліпеня падавайце заяўкі на ўдзел у біенале інтэрнэт-мастацтва The Wrong Biennale. Прымаюцца некамерцыйныя творы, ужо даступныя ў інтэрнэце.

▪️Творцы з эмігранцкім досведам могуць паўдзельнічаць у міждысцыплінарнай выставе ў Бішкеку, Кыргызстан. Тэма — "Свабода і яе адсутнасць", заяўкі прымаюцца да 24 ліпеня.

▪️Культурніцка-навуковы часопіс Pulse: Journal of Science and Culture абвяшчае конкурс публікацый. Артыкулы дасылайце да 31 ліпеня.

➕ Яшчэ #магчымасці — на @sekktor.

📢 Навіны магістратаў!

Платформа беларускіх экскурсіяў ULegend прэзентавала "Жменю легендаў Вільні". Новая аўдыяэкскурсія — магчымасць прагуляцца па містычных мясцінах горада. І зрабіць гэта можна не толькі ў Вільні, бо ULegend дае магчымасць вандраваць з любой кропкі свету і нават з канапы.

▪️"Вы даведаецеся, дзе шукаць прывідаў, а мо і сустрэнеце аднаго з іх. Усё, што спатрэбіцца ў дарогу, гэта вольны час, зручны абутак і рашучасць. Акрамя таго, аўтарка экскурсіі Паўліна Вітушчанка раіць узяць з сабою люстэрка і пеўня:) Яны дапамогуць вам у барацьбе з нячысцікамі", — абяцае каманда ULegend.

Далучайцеся да экскурсіі і падтрымкі магістрата!

▪️Таксама на 25 ліпеня на youtube-канале "Беларускіх магістратаў" запланаваны стрым, дзе стваральнікі распавядуць, як ужо цяпер можна скарыстацца праграмай і пагуляць па цікавых мясцінах Мінска, Вільні і Заслаўя з добрым аўдыягідам, а таксама падзеляцца планамі развіцця платформы і бліжэйшымі рэлізамі новых экскурсій.

Працягваем расказваць пра #art_born_Belarus і "вяртаць" Беларусь у сусветны мастацкі кантэкст.

🔻Сёння ўвага да Пітэра Блума, славутага амерыканскага мастака і скульптара беларускага паходжання.

Блум нарадзіўся ў Смаргоні, у габрэйскай сям'і, якая эмігравала ў Нью-Ёрк, калі будучаму мастаку было 6 гадоў. Уражанні ранняга дзяцінства адлюстраваліся ў некаторых творах Пітэра.

Пасля школы ён вывучаў мастацтва ў Адукацыйным альянсе і Інстытуце дызайну Beaux-Arts, стварыў студыю ў Нью-Ёрку, працаваў год у Італіі. У 1948-м стаў членам Нацыянальнай акадэміі дызайну. Таксама працаваў у Міністэрстве фінансаў ЗША і стварыў некалькі скульптурных твораў.

▪️Беларускі радавод Блума вымагае вывучэння. Як і ўплыў на ягоную творчасць уражанняў ад гадоў, праведзеных на радзіме. Але застаецца фактам, што творца нарадзіўся ў тутэйшай габрэйскай сям’і і правёў сваё дзяцінства ў Беларусі.

📃 Вось аргументацыя паходжання творцы.
📩 Шаблон ліста, які можна накіраваць пляцоўкам, дзе вы заўважылі некарэктны подпіс яго прац.

❤️‍🔥29 ліпеня пройдзе 12-гадзінны онлайн-марафон салідарнасці з палітвязнямі "Нам не ўсё адно".

Каб сабраць грошы для палітычных зняволеных і іх сем'яў, аб'ядналіся 30 незалежных медыяў. Трансляцыя будзе весціся адначасова на шматлікіх YouTube-пляцоўках з 10-й ранку да 10-й вечара па мінскім часе. Да стрыму далучацца палітыкі, блогеры, дзеячы культуры, спартоўцы, грамадскія актывісты.

▪️Усе данаты будуць збірацца на адзіны рахунак. Далей грошы размяркуюцца паміж ініцыятывамі, якія дапамагаюць палітзняволеным і іх родным — @radakultury будзе адной з іх. Кантраляваць размеркаванне сродкаў будзе назіральная рада прадстаўнікоў медыяў — арганізатараў марафону.

🚩Увага! Гледачоў марафона з Беларусі арганізатары просяць паклапаціцца пра сваю бяспеку (не рэпосціць, не лайкаць, не каментаваць, данаціць толькі праз замежныя карткі).

🔥 #магчымасці тыдня:

▪️Праект "Васьміног" да 26 ліпеня абвяшчае набор педагогаў, зацікаўленых у новых фарматах навучання, на ўдзел у практыкуме "Шлях героя да стварэння анлайн-курса".

▪️Трэнінг для дакументалістаў ад IMS. Дасылайце заяўку са сваім кінапраектам да 7 жніўня. Праект павінен весці да сацыяльных, палітычных і культурніцкіх зменаў.

▪️Слоўнік жывой гаворкі Nisho.me да 10 жніўня шукае 12 ілюстратараў, а таксама вярстальшчыка для стварэння календара на 2024 год.

▪️Да 1 верасня падавайцеся на конкурс эксперыментальнай літаратуры і тэкстаў, створаных у галіне лічбавага мастацтва. Падрабязнасці тут.

▪️Конкурс BULBAMOVIE 2023 да 11 кастрычніка прымае беларускія ігравыя і дакументальныя фільмы.

▪️Тэатр жывых скульптур Студыя Залатога Рэжысёра MB STATUE GDS & VS праводзіць кастынг у тэатр. Досвед працы не патрабуецца.

▪️Далучайцеся да community chat ініцыятывы @sekktor. Там можна шукаць працу, размесціць абвестку пра культурніцкае мерапрыемства і інш. Падрабязнасці і правілы тут.

📢 Вынікі другога туру конкурсу праграмы #ArtPowerBelarus: 12 праектаў атрымалі міні-гранты на суму каля €50 тыс., 25 чалавек — выправяцца ў прафесійныя вандроўкі.

Гэтым разам у конкурсе ўдзельнічалі 93 заяўкі на міні-гранты (агульная сума €417 тыс.) і 17 заявак — на праграму мабільнасці са сфераў літаратуры, кіно, тэатру, адукацыі, музыкі, выяўленчага мастацтва, захавання спадчыны, традыцыйнай культуры, міждысцыплінарныя праекты.

▪️"Прыняць канчатковае рашэнне было няпроста. Aдборачная камісія нават пашырылa першапачатковыя межы фінансавай падтрымкі ў межах гэтага кола, і замест планаваных 5 заявак удалося падтрымаць 12. Спадзяёмся, гэтае рашэнне ўспрымецца як знак высокай якасці заявак і сведчанне, што беларуская культура развіваецца, нягледзячы ні на што", — кажа Лізавета Дубінка-Гушча, рэгіянальная дырэктарка Дацкага інстытуту культуры.

ArtPower Belarus доўжыцца: кол на мідзі-гранты абвесцім увосень 2023 г., заяўкі на міні-гранты прымаюцца да 13.11.23 (разгляд у студзені 2024 г.).

☑️ Магістрат "Кнігаўка", які @radakultury запусціла летась, падвёў вынікі.

Каб дапамагчы Андрэю Янушкевічу аднавіць выдавецкую дзейнасць за мяжой, за 6 месяцаў дзеяння магістрата да "Кнігаўкі" далучыліся 325 чалавек, якія заданацілі 103 тыс. злотых (больш за 23 тыс. еўраў).

▪️За гэты час выйшлі 13 кніг, сярод якіх новыя апавяданні і ўспаміны Альгерда Бахарэвіча, перавыданні "Гары Потэра", пераклад рамана Эрнэста Хемінгуэя.

Беларускія кнігі пачалі рэгулярна з’яўляцца на польскіх кніжных кірмашах, выдавецтва распрацавала некалькі кніжных серый, хутка запусціць сайт і — самая гучная падзея — заключыла дамову са Стывэнам Кінгам!

▪️"Дзякуючы вашай падтрымцы "Кнігаўка" будзе цяпер лётаць яшчэ вышэй і далей:) Мы верым, што толькі супольнымі дзеяннямі беларусы змогуць пабудаваць моцную Беларусь", — кажа кіраўнік @bielmahistrat Цімафей Акудовіч.

"Кнігаўка" скончылася, але магістраты працягваюцца: проста цяпер вы можаце падтрымаць падлеткавы клуб Spadčyna і платформу аўдыягідаў ULegend.

29 ліпеня пройдзе 12-гадзінны онлайн-марафон салідарнасці з палітвязнямі "Нам не ўсё адно".

Яго мэта — сабраць грошы для палітычных зняволеных і іх сем'яў.

Данаты размяркуюцца паміж ініцыятывамі, якія дапамагаюць палітзняволеным і іх родным — @radakultury будзе адной з іх. Кантраляваць размеркаванне сродкаў будзе назіральная рада прадстаўнікоў медыяў-арганізатараў марафону.

Да эфіру далучацца Святлана Ціханоўская, Павел Латушка, Вольга Гарбунова, а таксама іншыя вядомыя беларусы і беларускі: Мікіта Мелказёраў, Аляксандр Івулін, Наста Роўда, Маргарыта Ляўчук, Кацярына Ваданосава, Піт Паўлаў, Юрый Стыльскі, Аляксандр Чарнуха, Ганна Златкоўская, Кацярына Сныціна, Арцём Шрайбман і шмат хто яшчэ.

Дзе: глядзіце трансляцыю на нашым youtube-канале.

Калі: 10.00-22.00 (мінскі час).

Заданаціць ужо цяпер і даведацца больш пра марафон

❗Гледачоў з Беларусі арганізатары просяць паклапаціцца пра сваю бяспеку (не рэпосціць, не лайкаць, не каментаваць, данаціць толькі праз замежныя карткі).

"Нам не ўсё адно!": 12-цігадзінны марафон салідарнасці з палітвязнямі распачаўся!

Далучыцца да прагляду

Падтрымаць палітвязняў (або наўпрост праз Stripe)

Данаціць можна ад 5 еўра. Збор скончыцца 30 ліпеня ў 23:59 па мінскім часе.

❗ Дзеля вашай бяспекі не рабіце пераводаў з картак беларускіх ці расійскіх банкаў.

🔥 #магчымасці тыдня:

▪️Да 4 жніўня можна падаць заяўку на KRAINA Sandbox - адукацыйную праграму ад Kraina Media і RAZAM па стварэнні беларускага кантэнта.

▪️АртКропка — творчы курс ад арт-групы “Чырвоны Баршчэўнік” па вышыўцы, калажы, перформансу і тэксту. Дэдлайн — 3 жніўня.

▪️ Кінафэст Bulbamovie прымае заяўкі! На конкурс 2023 года можна падаць ігравыя і дакументальныя фільмы. Дэдлайн — 11 лістапада.

🔻 Паўдзельнічайце ў апытаннях:

✔️Да 2 жніўня працоўная група ў складзе Каардынацыйнай Рады збірае інфармацыю пра цяжкасці, з якімі сутыкаліся стыпендыяткі і стыпендыяты праграм EU4BELARUS, SALT-I, SALT-II на любым з этапаў.

✔️@sekktor цікавіцца, наколькі часта сёння бываюць выпадкі адмовы ва ўдзеле ў тым ці іншым мерапрыемстве праз грамадзянства краіны-суагрэсара ў паўнамаштабным уварванні Расеі ва Украіну.

✔️Якая тэматыка курсаў і мерапрыемстваў запатрабавана? Якія фарматы нефармальнага навучання найбольш пасуюць беларускай дыяспары? Чакаюць адказы ад беларусаў/ак замежжа 18-35 гадоў.

⚡ Вядомы новы прамежкавы дэдлайн для заявак на гранты мабільнасці ў межах праграмы ArtPower Belarus.

Калі гэтай восенню ці ў пачатку зімы вы плануеце здзейсніць вандроўку з мэтай прафесійнага развіцця (узяць удзел у выстаўцы, зладзіць невялікія гастролі ці папрацаваць у замежных архівах) — спяшайцеся падаць заяўку да 10 жніўня 2023 года.

Пасяджэнне адборачнай камісіі, якая і прыме рашэнне адносна прапанаваных праектаў на гранты мабільнасці, адбудзецца напрыканцы лета.

▪️ Даведацца больш пра мабільнасці і падаць заяўку можна на сайце Рэсурснага цэнтра Беларускай Рады культуры.

За час рэалізацыі праграмы ArtPower Belarus прафесійныя вандроўкі ўжо здзейсніла ці да іх рыхтуецца больш як 30 дзеячаў беларускай культуры.

#ArtPowerBelarus рэалізуецца @radakultury і Дацкім інстытутам культуры пры фінансавай падтрымцы Еўразвязу.