Выбары ў КР: агітацыя і камунікацыя цяпер на платформе «Тры Сланы»!

Каардынацыйная Рада стварыла свой лічбавы офіс на новай пляцоўцы — tryslany.com. Гэтая платформа стане асноўным месцам для перадвыбарчай агітацыі: тут будзе сабрана ўся інфармацыя пра кандыдатаў, іх праграмы і дыскусіі.

Чаму гэтая пляцоўка і чаму зараз?

Напярэдадні выбараў у КР ужо традыцыйна ўзнікаюць праблемы з сайтам. Каб у выбаршчыкаў падчас перадвыбарчага перыяду заўсёды была магчымасць знайсці актуальную інфармацыю, спатрэбілася альтэрнатыўная пляцоўка. Праект «Тры Сланы» створаны камандай Паўла Лібера, адказнасці і прафесійнасці якой КР цалкам давярае. Платформа пабудаваная на прынцыпах бяспекі, даступнасці і непрадузятасці.
Данііл Гаркавы, прадстаўнік платформы «Тры Сланы» і каманды «Новая Беларусь», падкрэслівае:

— Мы загадзя прадумалі магчымасць працы платформы ўнутры Беларусі. Каб людзям у Беларусі было адносна бяспечна карыстацца рэсурсам — і я заўсёды падкрэсліваю: менавіта адносна — акрамя стандартнай спасылкі tryslany.com мы запускаем люстэрка на Google Cloud. Калі людзі ў Беларусі будуць праходзіць па гэтай спасылцы, карыстацца платформай, а потым чысціць гісторыю і закрываць укладкі, то ўсё павінна быць ок.

У чым ідэя «Трох Сланоў»?

Гэта незалежная беларуская лічбавая платформа, створаная для аб'яднання грамадзянскіх і палітычных ініцыятыў і развіцця палітычнай культуры. Яна гарантуе бяспеку, ананімнасць карыстальнікаў і палітычную нейтральнасць.

Любая беларуская арганізацыя ці ініцыятыва можа стварыць на платформе свой офіс і распавядаць пра сваю дзейнасць. Падчас выбараў выбарчыя суб'екты змогуць стварыць свае старонкі на платформе і выкладваць свае праграмы, распавядаць пра ўдзельнікаў спісаў, ствараць мерапрыемствы (з рэгістрацыяй і QR-кодамі), выпускаць артыкулы (з аўтаматычнай сінхранізацыяй каналаў), ствараць апытанні і формы зваротнай сувязі з AI-мадэрацыяй.

Што гэта дае выбаршчыкам?

У беларусаў і беларусак будзе доступ да актуальнай інфармацыі пра кандыдатаў у беларускі протапарламент — Каардынацыйную Раду. Будзе магчымасць пачытаць перадвыбарчыя праграмы і нават задаць свае пытанні палітыкам.

Платформа не збірае ніякіх прыватных даных. Карыстацца рэсурсам можна ананімна без рэгістрацыі. Калі ж вы хочаце пакінуць каментарый або адказаць у формах, спатрэбіцца мінімальная аўтарызацыя праз электронную пошту, на якую прыходзіць аднаразовы код.

«Не адмова ад адказнасці, а прынцыповая пазіцыя». Заява фракцыі «Наша Справа» / БХД аб неўдзеле ў выбарах у Каардынацыйную Раду

Фракцыя «Наша Справа» / Беларускія Хрысціянскія Дэмакраты прыняла рашэнне не ўдзельнічаць у выбарчай кампаніі ў Каардынацыйную Раду ў яе сённяшнім фармаце. Гэта крок, накіраваны на сумленную ацэнку эфектыўнасці дэмакратычных інстытутаў.

— У сённяшняй мадэлі Каардынацыйная Рада не валодае дастатковай роляй, паўнамоцтвамі і рэальным палітычным уплывам, каб стаць паўнавартасным прадстаўнічым органам беларускага дэмакратычнага руху, — гаворыцца ў заяве.

Пры гэтым удзельнікі фракцыі заяўляюць, што застаюцца адкрытымі да супольнай працы дзеля ўзмацнення беларускага дэмакратычнага руху.

🔗 Заяву цалкам можна пачытаць па спасылцы.

Выбары ў Каардынацыйную Раду IV склікання: вынікі прыёму заявак

31 сакавіка афіцыйна завяршыўся этап падачы дакументаў. Выбарчая камісія падвяла папярэднія вынікі: атрыманы заяўкі ад 9 выбарчых спісаў.

Агулам на 80 месцаў у КР прэтэндуюць 175 кандыдатаў і кандыдатак. Гэта значыць, што конкурс складае больш за 2 чалавекі на месца.

✅ Ужо зарэгістраваныя спісы:

— «Еўрапейскі выбар» — 17 чалавек (лідар — Валер Мацкевіч).

— «ЗАКОН і Правапарадак» — 12 чалавек (лідар — Сяргей Макар).

⏳ Спісы, якія праходзяць верыфікацыю:

Зараз Выбарчая камісія праводзіць праверку дакументаў наступных аб’яднанняў:

— Кааліцыя Латушка і Рух «За Свабоду» — 38 чал. (лідары — Павел Латушка і Юрый Губарэвіч).

— Рух «Воля» — 28 чал. (лідар — Мікіта Забуга).

— «Аб’яднаная грамадзянская платформа» — 22 чал. (лідар — Мікалай Казлоў).

— «Ваш Голас» — 20 чал. (лідар — Андрэй Колас). —

«Хватит Бояться!» — 13 чал. (лідарка — Таццяна Мартынава). —

«Наступ» — 13 чал. (лідарка — Лізавета Пракопчык).

— Блок беларускіх палітычных зняволеных «Беларусы дзеяння» — 12 чал. (лідар — Юрась Зянковіч).

У кожнага зарэгістраванага спіса будзе магчымасць прэзентацыі сваіх праграмаў і камунікацыі з патэнцыйнымі выбаршчыкамі праз платформу «Тры сланы». Калі вы знаходзіцеся ў Беларусі, вы можаце бяспечна заходзіць на гэты сайт па гэтай спасылцы (пасля не забывайцеся чысціць гісторыю і закрываць укладкі).

Галасаванне запланавана на 11–17 траўня.

«Калі дойдзем да 10 тысяч, то гэта будзе поспех» — Спікер Каардынацыйнай Рады пра патэнцыйную яўку на выбары

У жывым эфіры тэлеканала «Белсат» Спікер Каардынацыйнай Рады Арцём Брухан пракаментаваў крытыку КР з боку «шумных» палітыкаў, а таксама адказаў на пытанні пра бяспеку галасавання і магчымую яўку.

Ключавыя цытаты з эфіру:

Пра альтэрнатыўныя структуры, якія могуць стварыць вядомыя палітыкі, што не ідуць на выбары ў КР:

— Выбары — лепшая зваротная сувязь. Ніхто ў дэмакратычных краінах не прыдумаў нічога лепшага за выбары. Гэта магчымасць атрымаць водгук ад грамадзян, ад сваіх выбаршчыкаў. Калі яе не атрымліваць, а проста казаць, што мы будзем штосьці праводзіць — гэта іх права і іх магчымасць, але я лічу, што гэта цалкам няправільна і несправядліва.

Пра перанос выбараў, каб моцныя кандыдаты паспелі падрыхтавацца:

— Усе ведалі, што кадэнцыя Каардынацыйнай Рады — два гады, то-бок выбары будуць  у маі ці крыху пазней. Мы ўжо столькі разоў распавядалі пра важнасць Каардынацыйнай Рады, чаму варта ўдзельнічаць у выбарах; і незалежныя медыя, і палітыкі вялі гэтую адвакацыйную і адукацыйную кампанію. Я не думаю, што 2–3 месяцы вырашаць гэтае пытанне крытычна.

Пра нецікавасць КР як «прадукту» для беларусаў:

— Можна ісці на гэтыя выбары з праграмай, як зрабіць «прадукт» Каардынацыйную Раду цікавай, як зрабіць яе такой, каб людзі за яе прагаласавалі. Гэта задача тых спісаў, якія хочуць рэфармаваць орган. Гэта ж класіка жанру: людзі ідуць на выбары менавіта для гэтага. Пазіцыя «мы не будзем, бо нам не падабаецца» — гэта недарослы падыход, я лічу.

Пра магчымую яўку:

— Мяркую, што можа быць яўка ад 5 да 10 тысяч чалавек. Разлічваю, што як мінімум паўторым мінулы вынік — гэта будзе добра. А калі будзе больш, калі дойдзем да 10 тысяч, то гэта будзе поспех.

Пра бяспеку галасавання:

— Галасаванне зноў будзе праходзіць на платформе, падрыхтаванай камандай Паўла Лібера. Як мы памятаем, у мінулы раз усё прайшло бяспечна, не было ніякіх зліваў. Гэта цалкам працуючая бяспечная сістэма, якая адпавядае міжнародным стандартам.

Эфір цалкам глядзіце на «Белсаце».

Гульня спісаў: хто ідзе ў КР і ў чым прайграюць тыя, хто не ідзе на выбары?

На гэтae ды іншыя пытанні ў эфіры @euroradio адказвае спікер Каардынацыйнай рады Арцём Брухан.

https://www.youtube.com/watch?v=X7H-Q4b8dbE

Наш спіс Кааліцыя Латушка і Рух «За Свабоду» зарэгістраваны для ўдзелу ў выбарах у Каардынацыйную Раду!

Сябры, важны этап пройдзены. Мы афіцыйна ў кампаніі! У нашай камандзе 38 чалавек — смелых і матываваных, і зусім хутка мы пачнем падрабязна знаёміць вас з кожнай і кожным з нашага спіса, а таксама з нашай праграмай.

Нам вельмі патрэбная вашая падтрымка. Менавіта ваш голас дае нам мандат на рэальную барацьбу за змены ў Беларусі.

Калі? З 11 па 17 мая.
Што рабіць? Падтрымайце НАС!
У нас ёсць досвед, ёсць каманда і ёсць стратэгія. Мы ідзем працаваць абапіраючыся на нашыя галоўныя прынцыпы:
🤍 НЕЗАЛЕЖНАСЦЬ
❤️ АДКАЗНАСЦЬ
🤍 СВАБОДА

Кааліцыя Латушка і Рух «За Свабоду».
Разам мы мацнейшыя. Жыве Беларусь! ✌️

Выбары ў КР: Усе спісы зарэгістраваны!

Выбарчая камісія падвяла канчатковыя вынікі рэгістрацыі кандыдатаў у Каардынацыйную раду. Афіцыйныя рашэнні атрымалі ўсе 9 спісаў. Усяго на 80 месцаў у складзе беларускага протапарламента прэтэндуюць 174 чалавекі.

✅ Поўны спіс зарэгістраваных кааліцый:

«Еўрапейскі выбар» — 17 чалавек (лідар — Валер Мацкевіч).

«ЗАКОН і Правапарадак» — 12 чалавек (лідар — Сяргей Макар).

Кааліцыя Латушкі і Рух «За Свабоду» — 38 чалавек (лідары — Павел Латушка і Юрый Губарэвіч).

Рух «Воля» — 28 чалавек (лідар — Мікіта Забуга).

«Аб’яднаная грамадзянская платформа» — 22 чалавекі (лідар — Мікалай Казлоў).

«Ваш Голас» — 19 чалавек (лідар — Андрэй Колас).

«Хватит Бояться!» — 13 чалавек (лідарка — Таццяна Мартынава).

«Наступ» — 13 чалавек (лідарка — Лізавета Пракопчык).

Блок беларускіх палітычных зняволеных «Беларусы дзеяння» — 12 чалавек (лідар — Юрась Зянковіч).

Усе рашэнні Выбарчай камісіі публікуюцца на афіцыйным сайце Каардынацыйнай Рады і дублююцца на платформе «Тры сланы».

У кожнага спіса будзе магчымасць прэзентаваць сваю праграму і камунікаваць з выбаршчыкамі праз платформу «Тры сланы».

Галасаванне запланавана на 11–17 траўня.

Кангрэс мясцовых і рэгіянальных улад Рады Еўропы падрыхтуе даклад па сітуацыі ў Беларусі

Падчас удзелу дэлегацыі Каардынацыйнай Рады ў складзе Ірыны Халопіцы (Каманда Латушкі і Рух «За свабоду»), Юрыя Губарэвіча (Каманда Латушкі і Рух «За свабоду») і Аляксандры Дойніч («Наступ») у 50-й сесіі Кангрэса мясцовых і рэгіянальных улад Рады Еўропы, упершыню Бюро Кангрэса прыняло рашэнне аб падрыхтоўцы асобнага даклада па сітуацыі ў Беларусі.

Даклад мае назву «Роля мясцовых і рэгіянальных улад у падтрымцы беларускіх дэмакратычных сіл і грамадзянскай супольнасці ў выгнанні».

Асноўная палітычная мэта дадзенага даклада заключаецца ў тым, каб вызначыць ролю еўрапейскіх мясцовых і рэгіянальных органаў улады ў абароне і падтрымцы беларускіх дэмакратычных сіл і грамадзянскай супольнасці ў выгнанні, а таксама даць рэкамендацыі па інтэграцыі.

Дакумент будзе грунтавацца на рэзалюцыі ПАРЕ вядомай як «Люксембургскія рашэнні», каб на лакальным узроўні вырашаць праблемы, з якімі сутыкаюцца беларусы ў эміграцыі. Даклад будзе спрыяць стварэнню комплекснай мясцовай палітыкі ўключэння (local inclusion policies), прадастаўленню муніцыпальных паслуг і фармаванню спецыяльных кансультатыўных органаў.

Даклад мае на мэце заахвоціць актыўны ўдзел беларусаў у мясцовых працэсах еўрапейскіх супольнасцей. Гэта не толькі дапаможа інтэграцыі, але і стане практычнай школай мясцовай дэмакратыі.

Ініцыятыва накіравана на кансалідацыю мясцовых і рэгіянальных намаганняў па абароне дэмакратычных суб’ектаў у выгнанні. Досвед, атрыманы беларусамі ў еўрапейскіх муніцыпалітэтах, стане базай для дэцэнтралізацыі і пабудовы сапраўднага мясцовага самакіравання ў дэмакратычнай Беларусі.

Падрыхтоўка такога даклада — гэта вынік сістэмнай працы дэлегацыі Каардынацыйнай Рады ў Кангрэсе мясцовых і рэгіянальных улад Рады Еўропы і важны крок да прызнання беларускай грамадзянскай супольнасці паўнавартасным партнёрам на еўрапейскім узроўні.

Без прадстаўнічага органа беларусаў — Каардынацыйнай Рады — дзеянні па дапамозе беларусам у Еўропе будуць мінімізаваны.

Апдэйты ад Выбарчай камісіі: лёсаванне кандыдатаў, назіральнікі, стан платформы для галасавання

Сёння а 20:00 па Мінску (19:00 па Варшаве і 20:00 па Вільні) адбудзецца адкрытае пасяджэнне Выбарчай камісіі Каардынацыйнай Рады.

У павестцы дня:

— Канчатковае рашэнне па рэгістрацыі выбарчых суб’ектаў.

— Лёсаванне: вызначэнне нумароў спісаў кандыдатаў выбарчых суб’ектаў.

— Актуальны стан з назіраннем за выбарамі.

— Стан гатоўнасці лічбавай платформы для галасавання.

— Платформа «Тры сланы», перыяд агітацыі, рэпрэзентаванасць.

Далучыцца да пасяджэння ў жывым эфіры можна на YouTube-канале Каардынацыйнай Рады.

Заява ад Выбарчай камісіі: Усе кандыдаты абавязаны зарэгістравацца на платформе «Тры Сланы»

Старшыня Выбарчай камісіі Алена Прыходзька падкрэсліла:

— Усім выбарчым суб’ектам неабходна завесці акаўнт на «Трох Сланах». Без яго яны не патрапяць на платформу для галасавання ў спіс суб’ектаў.

Гэта значыць, што кожны суб’ект павінен запоўніць на ўласнай старонцы на «Трох Сланах» мінімальную інфармацыю:

— Склад спіса з нумарамі па парадку.

— Палітычная праграма.

— Звесткі аб лідары з фота.

Гэтыя даныя будуць аўтаматычна падцягвацца на платформу для галасавання.

Выбары ў КР: Лёсаванне ШІ і падрыхтоўка да галасавання

Выключна для парадку: Штучны інтэлект правёў лёсаванне выбарчых спісаў. На агульным пасяджэнні Выбарчай камісіі быў вызначаны парадак выбарчых суб’ектаў у спісе.

📌 Парадкавыя нумары спісаў:

1. «Ваш Голас» — 19 чалавек (лідар — Андрэй Колас).

2. «Еўрапейскі выбар» — 17 чалавек (лідар — Валер Мацкевіч).

3. «Хватит Бояться!» — 13 чалавек (лідарка — Таццяна Мартынава).

4. Рух «Воля» — 28 чалавек (лідар — Мікіта Забуга).

5. «Аб’яднаная грамадзянская платформа» — 22 чалавекі (лідар — Мікалай Казлоў).

6. «Наступ» — 13 чалавек (лідарка — Лізавета Пракопчык).

7. «ЗАКОН і Правапарадак» — 12 чалавек (лідар — Сяргей Макар).

8. Блок беларускі палітычных зняволеных «Беларусы дзеяння» — 12 чалавек (лідар — Юрась Зянковіч).

9. Кааліцыя Латушка і Рух «За Свабоду» — 38 чалавек (лідары — Павел Латушка і Юрый Губарэвіч).

Афіцыйныя рашэнні атрымалі ўсе 9 спісаў. Усяго на 80 месцаў у складзе беларускага протапарламента прэтэндуюць 174 чалавекі.

Назіранне за выбарамі

Выбарчая камісія накіравала запрашэнні міжнародным суб’ектам. Ужо атрыманы пацверджанні ад:

— Міжпарламенцкай групы пад кіраўніцтвам Федэрыка Пеці. Яго каманда назірала за мінулымі выбарамі ў КР і рыхтавала вялікую справаздачу па выніках.

— Палітолага Яўгена Магды як прадстаўніка ўкраінскага боку.

Рэгламент назірання ўжо апублікаваны на сайце КР і на платформе «Тры Сланы».

Платформа «Тры Сланы» і платформа для галасавання:

Платформа для галасавання гатова да запуску і будзе дасяжная для правядзення тэхнічных тэстаў ужо ў сярэдзіне красавіка. Усе выбарчыя суб’екты абавязаны зарэгістравацца на платформе «Тры Сланы», якая будзе звязана з платформай для галасавання. На «Трох Сланах» ужо ёсць спісы «Еўрапейскі выбар» і «Закон і правапарадак».

У кожнага спіса будзе магчымасць прэзентаваць сваю праграму і камунікаваць з выбаршчыкамі напрамую праз платформу.

Калі вы ў Беларусі, заходзьце на «Тры Сланы» па гэтай спасылцы (не забывайце чысціць гісторыю і закрываць укладкі).

Галасаванне запланавана на 11–17 траўня.