انا زينب ••• يالحسن يلدللتني بموتت امي
انا زينب••• لو رحت ياخويه ياهو ليضل يمي

انا زينب انا زينب

* * * * * *

وداعت الله يالحسن هليله اودعك
لوبديه خويه للمنزل ارجعك
خويه كلي بيا كلب جنازه اتبعك
شلون من باب الزجيه خويه اطلعك

انا زينب ••• خويه ما ارضاها تتركنه وتسافر
انا زينب ••• من رحت عني واعيش بامل باجر

انا زينب انا زينب

* * * * * *

يالحسن وحسين يبقه بلايه ناصر
باجر منترك يا خويه وتسافر
لو وكع عل مشرعه العباس باجر
يبقه وحده خويه بين الكوم حاير

انا زينب ••• من بعدهم امشي يا خويه اسيره
انا زينب ••• لا اهل ضلتلي لا ضلت عشيره

انا زينب انا زينب

* * * * * *

يالحسن يا عضم الفراك بغيابك
نعيش كل ليله يخويه احنه بمصابك
يلي مارديت واحد داك بابك
احنه اخوتك ننتظر ردت جوابك

انا زينب ••• وانتضر منك يخويه ترجع وياي
انا زينب ••• كمت اتمنه يخويه تكعد حذاي

انا زينب انا زينب

* * * * * *

خويه باجر كربلا تطشر شملنه
يلحسن اكعد عليك بداعت امنه
لو شفت ياهو الذي يحدي بضعنه
يالحسن ذباح اخوتك يمشي يمنه

انا زينب ••• خويه مابيه بعد احمل مصايب
انا زينب ••• مابقالي حيل من عكب الحبايب

انا زينب انا زينب

* * * * * *

يالحسن يلي جنت امنه وابونه
بفكدك الشمات كام يحاربونه
بكربله وطفها الاعادي يضربونه
يشتمونه وتعبونه ولوعونه

انا زينب ••• من بعد عزي ودلالي اطلع سبيه
انا زينب ••• ادخل الديوان وكبال ال اميه

انا زينب انا زينب

* * * * * *

محمد عبدالحسين الساعدي ✏

عفنه بيوتنه ولزيارتك جينه
بقافلت الحزن زينب تلاكينه

* * * * * *

عفنه بيوتنه وجيناك يا مولاي
جبت امي وبوي وكل هلي وياي
جبنالك ويانه شويه شربت ماي
نرويك ونريد مصابك نعينه

* * * * * *

اجيناك ومخزنه بعينه الدمعه
وانته الجايك هيهات مترجعه
يشعر بالدرب وياه واتبعه
ومن يتعب تكومه بايدك تعينه

* * * * * *

انته تعين كلمن معتنيك وجاي
ولكاصد بحاجه تدزه للوفاي
كل عله دواها بستكان الشاي
بزادك حته الاعمه تبتصر عينه

* * * * * *

زادك وكل المحتاج والتاجر
وتجمع كلها صفه بموكب وجادر
اليوصل مرقدك لا ما يرد حاير
نجيك زحوف لو تعبنه رجلينه

* * * * * *

عفنه اهدافنه ونوصلك الغايه
وبيوم اربعينك كلنه مشايه
للكافل بدينه ترفرف الرايه
ندخل مرقدك يحسين خلينه

* * * * * *

محمد عبدالحسين الساعدي ✏

ذكرا استشهاد الرسول الأعظم صلوت الله تعالى عليه وعلى اله الطيبين الطاهرين

................... ................ ................

يا محمد ••• يا دمع يكفي لمصابك
يا محمد ••• وانته الدلي علا بابك

يا محمد يا محمد

* * * * * *

انه حيدر يا محمد وحجي وياك
بطيحتك يا نبي الرحمه فرحت عداك
انته الله يا محمد رحمه خلاك
مانزل قراءن الله والله لولاك

يا محمد ••• لكل بشر انته الشفاعه
يا محمد ••• بموتتك قامت الساعه

يامحمد يا محمد

* * * * * *

توصي بينه تكول انصحو بحرب بالميادين
حته بعدائك توصي وبال ملاعين
حكها تبجي دموم لجلك يا نبي العين
راح ائلمنك وكلك ذبحو حسين

يا محمد ••• وراحن الخدر سبايه
يا محمد ••• ونفذن هنه الروايه

يا محمد يا محمد

* * * * * *

منو للأسلام بعدك يا نبينه
وياهو من انام عينه تضل علينه
يا فجعتك وشكبرها يا ولينه
رايح من تروح ماضنك تجينه

يا محمد ••• وحنه مفجوعين صحنه
يا محمد ••• بموتتك وياك طحنه

يا محمد يا محمد

* * * * * *

يا أمير الدين من للدين بعدك
الله يرضه عليك للكفار ردك
بكلب طاهر جان للعدوان صدك
ولتشوفه ينصح تنطيه وعدك

يا محمد ••• وانته للعالم تجيه
يا محمد •••ياهو الضل للزجيه

يا محمد يا محمد

* * * * * *

محمد عبدالحسين الساعدي ✏

برحمتج غطيني يا ام البنين
اسمج اليحميني يا ام البنين

* * * * * *

لو نويت اتوجه اني المصعبات
اقره لجلج فاتحه ويالصلوات
وامشي وتوجه وكل النايبات
تكضي حاجاتي يبنت الطاهرات

والله متعوفيني يا ام البنين
اسمج اليحميني يا ام البنين

* * * * * *

انتي يا ام الأربعه الراحو فداء
للحسين وذلو جيوش العداء
عينج علينه يبنت الطهراء
نوصف اسمج انتي للداء دواء

عطفج يغطيني يا ام البنين
اسمج اليحميني يا ام البنين

* * * * * *

انتي يم عباس يا ام الوفه
صرتي للمحتاج رحمه وعاطفه
ولدج علا الجيش جنهم عاصفه
من ابوهم ربحو بهاي الصفه

همه كرت عيني يا ام البنين
اسمج اليحميني يا ام البنين

* * * * * *

والله لو مراك كل جور السنين
بدنيتك ماكو فرح بس الونين
ارفع ايدك وقصد الحصن الحصين
وطلب الحاجات من ام البنين

والله متعوفيني يا ام البنين
اسمج اليحميني يا ام البنين

* * * * * *

محمد عبدالحسين الساعدي ✏

منعوف الوصيه بأرض الكاظميه

يا مولاي يا مولاي

* * * * * *

احنه لليوم بوعدنه يا ابن خير البشر
نوصل زحوف لحضرتك ولي مايوصل خسر
الناس عدها الكرم ذره والكرم مالك بحر
وليشاجر بالكرامه لحضرته الخالق نضر

نتحده المنيه بأرض الكاظمية

يا مولاي يا مولاي

* * * * * *

دربك انترسه مواكب خل يشوفونه الدول
وهل مواكب مرتجاها للذي يشافي العلل
والله يا قاضي الحوائج والصعب يمك سهل
لو هدل بالناس محمل انته التعدل الحمل

ماتبقه الرزيه بأرض الكاظمية

يا مولاي يا مولاي

* * * * * *

العنده شده ويجي يمك تنكضي بلمحة بصر
يا مشافي المرضا كلها ويا شفيع لهل بشر
عينك علينه يا موسى وشفع النه بالحشر
الما يشوف انته حضرتك كلي شله بالنضر

وننصبلك عزيه بأرض الكاظميه

يا مولاي يا مولاي

* * * * * *

يا طبيب تشافي مرضه بدون كشفيه ودوه
الدوه مالك يا موسى يزورك بكلبه نوه
بحضرتك مولاي صحه حته في شمت الهوه
وحته العمه من يزورك يرجع بعينه ضوه

نحضر هالمسيه بأرض الكاظميه

يا مولاي يا مولاي

* * * * * *

محمد عبدالحسين الساعدي ✍

يا شهر الحزن ••• جم لوعه الك
بعيون الالم ••• زينب تنضرك
بقت زينب غريبه ••• يا شهر المصيبه
يا شهر الحزن يا شهر الحزن

*   *   *   *   *   *

هل شهر الحزن من ريته لا مرني
من لوعت سبي للشام مرمرني
بكيود والم وحبال كيدني
تره درب اليسر يا ناس عذبني

يا شهر الفجيعه  ••• بيا عين اطلعت
جم طفله وغريبه ••• ويه الخيمه حركت
ولراح النه هيبه ••• يا شهر المصيبه
يا شهر الحزن يا شهر الحزن

*   *   *   *   *   *

يا شهر الالم والدمعه هماله
بقيت الوحدي وهجمت الخياله
شمات وغرب والنضره كتاله
وفاكاها الشمر يضحك مع ارجاله

يا نضرت غرب ••• وي لوعت سبي
اطفال وحرم ••• وانه الوحدي
ولصاير عجيبه ••• يا شهر المصيبه
يا شهر الحزن يا شهر الحزن

*   *   *   *   *   *

يا شهر وبعد يوم الدخلت الشام
يصيحولي الخوارج زمرت الضلام
يا وسفه الوكت خله الوره كدام
وخله اهل الحميه بالرخص تنسام

عتبي علا الوكت ••• الخلانه وره
ابن بنت الرسول••• كطعو منحره
وموذر حبيبه ••• يا شهر المصيبه
يا شهر الحزن يا شهر الحزن

*   *   *   *   *   *

المغرب من يمرني يخفف احمالي
يجيب اليل حته يستر اخيالي
ويمر خيط الفجر ويجيب كتالي
يا فجر الله هونك مات كفالي

بيش استحلفك ••• اتاخر بعد
اوعد من صدك ••• واثبت بالوعد
الضل جثته سليبه ••• يا شهر المصيبه
يا شهر الحزن يا شهر الحزن

*   *   *   *   *   *

يا شهر الالم يا مكبر الحيره
بيك تعذبت من ديره الى ديره
امس جان بضعنه يدلي ابو الغيره
ويا وسفه الغرب هسه الذي تديره

بانت خلتي ••• بفراك الأخو
بأرضج كربلا ••• ضل وين الكفو
منو ضل للغريبه •••يا شهر المصيبه
يا شهر الحزن يا شهر الحزن

*   *   *   *   *   *

محمد عبدالحسين الساعدي ✏

اني عباس وفنهم يكربون
خيمتج زينب ابد ما يوصلون
انا عباس   انا عباس
٠
*   *   *   *   *   *
٠
عباس    لجل الخوه انطه
ذرعانه
وفاي   ما عز روحه هوه
وخوانه
٠
وينهم فنهم يجون لخيمتك يحسين
يوصلون شلون واني عندي ادين ثنين
٠
فدوه الجفوف الج ويه العيون
خيمتج زينب ابد مايوصلون
انا عباس انا عباس
٠
*   *   *   *   *   *
٠
من صال    محد كدر يوكف
كدامه
ويصيح يم الزهره رافعها
الهامه
٠
امي وصتني وصيه بيوم ولدتني
كالت ارفع راسي يم الزهره ها يبني
٠
فدوه الك يحسين هل اربع بنون
خيمتج زينب ابد ما يوصلون
انا عباس انا عباس
٠
*   *   *   *   *   *
٠
بتار    سيفه يطعن بروس
عدوانه
ليزيد   صاح انطيني اقوه
شجعانه
٠
اقوه شجعانك انطين ما اريد خفاف
جيش سبعين الف فارس كله مني يخاف
٠
هاي كل شجعانه مني يرجفون
خيمتج زينب ابد ما يوصلون
انا عباس انا عباس
٠
*   *   *   *   *   *
٠
هليوم    ناوي اكلب الكون
على الكافر
والجيش    مو بالسيف يقتل
بالحافر
٠
اليوم اكلب جيش اميه هوه والحومه
وانتصاري الفاطمه خل توصل اعلومه
.
يزيد جيشك وين عني يشردون
خيمتج زينب ابد ما يوصلون
انا عباس انا عباس
٠
*   *   *   *   *   *

محمد عبدالحسين الساعدي ✏

كلبي يوجعني وشفت لون السمه تغير
وهل جرح ما أدري بحلم لو يقضه يتفسر
احساسي طحت ••• مصدومه صرت
يا خويه عباس
٠
*    *    *   *   *   *
٠
كلبي انلجم صاير شي علا العباس
ما مرتاح كلب الاخت هم يعلم
اشوف السمه ضلمه بلا كمر هليوم
وشوف الدنيه كلهاا بعيني تتلعثم
اضن خانه النهر ونكطعن الجفين
ولعدوان كثره بصوبه تتهجم
واضن طاح الكمر علمشرعه بلا راس
مكطوع النحر ولجسم متثلم
٠
حسيت وحساسي ابد ميخيب ضنوني
من رحت كلشي اسود صفه ساعتها بعيوني
من بعدك ضعت ••• مصدومه صرت
يا خوي عباس
٠
*   *   *   *   *   *
٠
صفه وجه السمه بلايه كمر هليوم
ومكطوع النشد وبلا خبر عنه
شفت حسين وحده واكف ومكسور
ويكلي منخيج اكطعي الضنه
ويكلي يزينب حضري الطفال
ابو فاضل بعد ماكو خبر منه
تحضرن للسبي يابت علي الكرار
اخوجن مايرد ماتنفع الونه
٠
بساعته خويه تذكرت ايامنه الفاتن
الذكره وأيام الصغر وي موتتك ماتن
متت ماصدكت ٠٠٠٠ مصدومه صرت
يا خويه عباس
٠
*   *   *   *   *    *
سبعين الف فارس حاطو العباس
وحده ولا اخو وياه لابن عم
وبعينه المثلث طفه شوف العين
وسهام الغدر بكليبه جنهن سم
سمعت كل العده صاحت بعالي الصوت
يحسين وبعد چا بيش تتحزم
اخوك علا النهر ومكطه الجفين
وبلا راس باقي تحضر علا الهم
٠
يا عوزنه لطولك تره بطيحتك ساعتها
طاحت زلم ضلت حرم ومبينه خلتها
وبضعوني حرت ••• مصدومه صرت
يا خويه عباس
٠
*   *   *   *   *   *
٠
اصبر بالحرم لا تبجي يم شمات
يم شمات لا تنزل مدامعجن
شدن حيلجن صيرن علي وعباس
كدام الشمر مرفوعه رايتجن
صح ماضل اخو لا ابن ضل والطاح
چان يهزله دنيه وما يزعلجن
اسف يالى الأسف ماضل بعد عباس
امرجن الله يالبينت عازتجن
٠
الضعن يمشي بالا اخو ومبينه عازتنه
ويانه اجو حزمت زلم ردينه وحدنه
وراك شكد صحت ••• مصدومه صرت
يا خويه عباس
٠
*   *   *   *   *   *


محمد عبدالحسين الساعدي ✏

باجر ماتبقه الزلم
باجر ويطيح العلم
باجر تخنك كربلا
باجر يا كبر الهضم
.
* * * * * *
٠
لا ابن لا اخو باجر يبقه اليه
الله لا ينطيج يرض الغاضري
من بعد خدري ينادولي السبيه
وانه اخت عباس صكار المنيه
.
اهلي باجر عل ارض
اهلي بالحافر ترض
اهلي وبسيوف العدا
باجر يا كبر الهضم
٠
* * * * * *
٠
باجر يضل الضعن محتاج والي
ومن بعدكم يخوتي شصاير بحالي
امشي مسبيه بعد خدري ودلالي
واني ابد ما شايفه الوادم خيالي
٠
طولي الماشافه بشر
طولي يمشي باليسر
طولي كلها شافته
باجر يا كبر الهضم
٠
* * * * * *
٠
الخيم باجر تشب النار بيها
والطفال احبال تشدد بديها
سكنه ياهو الي تضل عينه عليها
وانه اصبرها واكللها تجيها
٠
بنتك رادت شوفتك
بنتك تنطر جيتك
بنتك ترضا تنضرب
باجر يا كبر الهضم
٠
* * * * * *
٠
راسك على الرمح ويباوع عليه
وتغضب عيونك اذا صاحو سبيه
من بعدكم ريت تاخذني المنيه
ولا اشوفن روسكم عل سمهريه
٠
راسك من فوك الرمح
راسك هذا اكبر جرح
راسك فيا علا الحرم
باجر يا كبر الهضم
٠
* * * * * *
٠
بس سوالفكم بقت بالروح تذكار
وهسه اشوف اجسامكم متوذره اوذار
بروسكم ياخويه تنطك ليش بحجار
وليش خويه خيامنه تشب بيهن النار
٠
وين اروح وانه مدلله
وين اروح اضيعن بالفله
وين اروح ماعندي ولي
باجر يا كبر الهضم
٠
* * * * * *

محمد عبدالحسين الساعدي✏

خلصنه المواكب رحنه مشايه
للكافل بدينه ترفرف الرايه
٠
*   *   *   *   *   *
٠
اجينه وندعي من الله الطريق يطول
والانفاس بينه تهتف المقتول
يا ابن النبوه وبكلبنه نكول
مانترك نهجكم نبقه وفايه
٠
*   *   *   *   *   *
٠
خلص يالى الأسف عاشورك بالحضات
ولا جنه شهر جنه بضع ساعات
نتمنه عمرنه يخلص قرايات
وما نوفي الوكع والما شرب مايه
٠
*   *   *   *   *   *
٠
دوم كبالنه تعرض حجاياتك
ورمز للتضحيه لليوم كلماتك
نشيد الكل مواكب بقت هيهاتك
حته بموتنه عرضت هلحجايه
٠
*   *   *   *   *   *
٠
شحلات العمر من نكضيه يم بابك
ونتمنه نموت ونشبك ترابك
لا تنسه الخدم يحسين واحبابك
لعافو كل ملكهم واجو وفاي
.
*   *   *   *   *   *
٠
عافو كل ملكهم وجو خدامك
نذرو روحهم مولاي كدامك
نذرآ للتراب الداسته جدامك
طلعو كل مدنه ولايه بولايه
.
*   *   *   *   *   *
.
محمد عبدالحسين الساعدي ✏

انا المهموم  انا المحروم  انا الي متت مسموم

*   *   *   *   *   *

انا   الكاظم  المسجون  كل   عمره
ولكظه   العمر    محبوس   بالحفره
ومن سجن السجن ودوني هل زمره
وانا  لباقي  وهوه  الي  نقص  قدره
انا الساجد   للواحد   انا الكضه العمر محروم

*   *   *   *   *   *

يا هارون لتضن تبق  املاكك
وقصورك تراها تفنه واعبادك
شتضنها  تدوم  عليك اموالك
ولا يبقه ذكركم انته وجدادك
ماتبقون   ثق تفنون   لا تتباها بالمحروم

*   *   *   *   *   *

يل   ضامي   نريد  اليوم   طلبتنه
وبس ننخاك نعرف تكضي حاجتنه
تعرفها   ومحاجه   نحجي   قصتنه
تشافي امراضنه  وتحفظ  عوائلنه
متردنه    وتسندنه      وتكضي حاجت المضلوم

*   *   *   *   * *

مده  التاريخ   يبقه  مرقدك  جنه
ومن  تضيق  بينه  نعتنيك   احنه
وذا بمحنه اعتنيك تزول هل محنه
يبو  طلبه  تره  بحكم  الزمن  تهنه
يلمعروف    بلمعروف   يل متت بسجن مضلوم

*   *   *   *   *   *

محمد عبدالحسين الساعدي✏

ليوم لأرض الكاظمية نعتني مشايه
للمقيد بالسلاسل رافعين الرايه

* * * * * *

اليوم اجينه ابابك احنه نرتجي مولانه
هذا اجاك وجايب امه وذاك جاب اخوانه
تهلك الرايد يضدنه وتخذل العادانه
وتحفظ الشعب العراقي وتحفظ الربانه

نريد هاي الطلبه منك تنكضي بحجايه
للمقيد بالسلاسل رافعين الرايه

* * * * * *

اهلي وصوني وصيه كالو الجد وجد
واني جديت ولكيتك نور لدروبي ومجد
كون اموت بدربك اني طلبه كون تصير جد
جا ربحت الدنيه كلها وجا خذيت اني المجد

كون تتحقق وصيتي بدرب بيه قرايه
للمقيد بالسلاسل رافعين الرايه

* * * * * *

اليوم بارض الكاظميه ترتفع راياتنه
نعتني الموسى ابن جعفر نسرع بخطواتنه
نلطم ونطبر الهامه ونقره بقراياتنه
بدفتر الخدمه طلبنه تسجلن دمعاتنه

وبطريق التوبه نبقه عل عهد وفايه
للمقيد بالسلاسل رافعين الرايه

* * * * * *

امشي لأرض الكاظميه ولا تعطل خطوتك
تضمن الجنه يزاير لون تنزل دمعتك
صيح يا باب الحوائج وبخشوع وعبرتك
نريد تكضي الحاجه منك يا امامي بحضرتك

رايد ارجع لهلي جايب حاجتي ويايه
للمقيد بالسلاسل رافعين الرايه

* * * * * *

محمد عبدالحسين الساعدي ✏

ياهلا بزلم الصعاب الداكين الثايه
ارتاح يا ابن ابوتراب. الحرب خلصت هايه

اليوم نقلب كربله. يا ابن سيد الفله

الداكين الثايه

*. *. *. *. *

صاحو اصحاب الحسين سهله عدنه نينوه
وصيح يا ام البنين ربعي رفعولي الوه
بيوم فزعو للطفوف الموت اعله من الهوه
كحلو لحسين عين بيوم شافاهم سوه

وصاحو مكضيه. ((علي)). لعيون رقيه ((علي))

(( ولعيون ام احسين ليوم الحومه نهزها))

وفزعو اصحاب الحسين. وسوو الما صاير
للحرب متحزمين. لموت بيهم حاير

وبالحرب صاحو هله. يا ابن سيد الفله

الداكين الثايه

• *. *. *. *. *. *

النوب راحو للخيام ودعو بت حيدرا
وكفو بمسك الختام للحرب لزمو سرا
لو فزع منهم غيور ابد ما ينضر ورا
وكالو لبنت البتول قضت يا زينب ترا

فزعو للحومه ((علي)). التكضي الملزومه ((علي))

((التكضي الملزومه اليوم الحق تجيبه ))

لو شهاده ولو ثبات. وحده منهن رايدين
بيوم فزعو عل طغات. لينوه الما يلين

بعزم واحدنه نمله. يا ابن سيد الفله

الداكين الثايه

• *. *. *. *. *

وصلو الأرض الطفوف واحد الواحد يقول
خلي نقضي هل الألوف ثأرآ لبنت الرسول
لو تقطعنه وصال ما اضن نوفي البتول
ولتخلف بالوعود عسآ لا عمره يطول

نريد نوافيها. ((علي)). بالدم نجزيها. ((علي))
(( بالدم نجزيها اليوم الزهرا وحيدر ))

نصره الج يام الحسين. عفنه كل املاكنا
يم محمد رايحين. ما نريد ارواحنا

ارواحنا فدوه اله. يا ابن سيد الفله

الداكين الثايه

• *. *. *. *. *

فزعو ابطال الصفا وذلو جيوش الكفر
ذوله اصحاب العطأ الجيش يمهم ينكسر
ثلمو جيوش ال اميه ورجعو غزوة بدر
اقوه واحد بالجيوش جون كسراله ضهر

رد العياله. ((علي)). اليخوف خياله. ((علي))

((اليخوف اخياله بجفه الجيش نهزمو ))

نوصل الجنة خلود. ردنه باستشهادنه
عادي نبقه بلا لحود. وبالشمس اجسادنه

بموتنه نلكه العله. يا ابن سيد الفله

الداكين الثايه

• *. *. *. *. *

محمد عبدالحسين الساعدي

يا حبيبي يا حسين يا حبيبي يا حسين

• *. *. *. *. *
انته اول شي عرفته من فتحت عيوني
وانته خارطتي وطريقي البيها ممشا ضعوني
انته مو بس بخيالي وتارس انته ضنوني
حسين اول كلمه اكولن لمن سيألوني

يا حبيبي يا حسين يا حبيبي يا حسين

• *. *. *. *. *
من بديت وياك شفتك مملكة حب وغرام
ومن لكيت الخدمه رحمه صحت عل دنيه السلام
ماكو لذه لكلشي اسمعه والك يا محله الكلام
مضيع ولاكيله جنه ابابك شعنده الحمام

يا حبيبي يا حسين يا حبيبي يا حسين

• *. *. *. *. *
حسين اول ما عرفتك شفتك تشيل الحمل
شكو حاجه ابابك اتفض ولصعب يمك سهل
ليش احتار ابطبيبي واني عندي ابا الفضل
لو دخل مابيه يمشي يطلع يهوس الكهل

يا حبيبي يا حسين يا حبيبي يا حسين

• *. *. *. *. *
ما اريدن احجي كلشي بس اكولن قصرت
من صحت هل من مناصر ريت كون اني فزعت
قبل لا يوكع عضيدك كون اني الي طحت
يا حبيبي امنيتي اني خيط بخيامك صرت

يا حبيبي يا حسين يا حبيبي يا حسين

• *. *. *. *. *

يا وسيله لكل فقير ويا امل للمرتجي
انته شيخي وانته اهلي وانته قانون الحجي
كون اتوضه بدمعتي سيدي من ليك اجي
يا دليل الحائرين وآلك شيكفي البجي

يا حبيبي يا حسين يا حبيبي يا حسين

• *. *. *. *. *

اعترفلك يا حبيبي منك هواي بعدت
وهسه حسيت بقصوري ومن شفت بابك صحت
ليلي سهرانه ويغيرك ولا مره تذكرت
انته غاسل كل ذنوبي ورحمتك كلشي شملت

يا حبيبي يا حسين يا حبيبي يا حسين

• *. *. *. *. *

محمد عبدالحسين الساعدي ✍️

ندبتك والضعن خايف بعد مادارت الازمان
اصيحن وبكلب ضامي شكبرها عازت الخوان
يخويه شتاكت عيوني بكثر خوفي علا الرضعان
هضيمه اهل بيت الله لا كافل ولا صيوان
٠
شوكي ودمع عيني الهلي
واني بضعن فاكد ولي
راح وبعد ماضن يرد
كفالي حامي محملي
٠
عباس
مشتاكه ليام الصغر
نوماس
من صغرك لحد الكبر
بلا راس
عفتك يخويه بلا قبر
٠
*   *   *    *    *    *
٠
احنن وحچي وي روحي بعد ماترجع الأيام
وبعد ما نكعد اني وياك يخويه حته بالاحلام
اشوفك وركض واوكع طلعت شوفتك اوهام
اكولن ترجع وعفته خويه الجسم كله اسهام


بأحلامي اشوفنك ترد
وادريك خويه مبتعد
شصبر علا الفركه بعد
من شفته ذبلان الورد

وياك
كون اندفن نفس الكبر
والكاك
حته بمماتي هم ذخر
بجفاك
اشتمه دخان العطر

* * * * * *

علامات الحزن بعدك ترسن كل شبر بيه
ولو تدري شجرا بحاله حسينك من رجع ليه
برز بعدك ابو اليمه وكع ونكلبت الدنيه
وبعد مارايده اجرحنك واكلك رحت مسبيه

ياخوتي مسبيه صرت
ومن ديره ألا ديره رحت
والشمر يشتم يا هلي
بسمائكم لمن صحت

ينراد
الأخو لأيام الكبر
مافاد
نوحي عليكم ولكسر
ينعاد
كون الوكت من الصغر

* * * * * *

اكول الوكت هم ينعاد ورجع وكعد وياكم
وشوفن طولكم يضوي يخوتي شمحلا ملكاكم
صارت دنيتي سوده اوحشه وضلمه بجفاكم
هضيمه يا اسياد الكون غربه الوكت سواكم

ياوسفه صرتو بلا وطن
ويامكم صارن محن
وعدكم غريبه تيسرت
وصارت كفيله لهلـ ضعن

تبقون
وحدكم بحر الشمس
وأم عون
يم الضعن صارت حرس
تذكرون
حاميني جنتو امس

* * * * * *

محمد عبدالحسين الساعدي

خل يكبر بقلبي العشگ
خليني احبك من صدك

مولاي يا حسين مولاي يا حسين

* * * * * *

خير البر بالتعجيل من هسه ارد احبنك
روحي وفطرتي مولاي كلهن ذني يردنك
اغمض عيني اشوف الماي ساجد للرضيع ابنك
وركض بالندم خجلان عبالي الحك بضعنك

ورجع ندامه محترك
خليني احبك من صدك

مولاي يا حسين مولاي يا حسين

* * * * * *

عادت كل محب يغار اذا غيره يحب خله
چا ليش انته يا مولاي كلما تنعشك تحله
غيرك ما احب يحسين حبك قلبي محتله
بحب غيرك ارد اردود بس بحبك اتعله

بلياك يحسين اختنك
خليني احبك من صدك

مولاي يا حسين مولاي يا حسين

* * * * * *

مادورت جاه وياك حبي وياك عل فطره
احب وحبي الك يحسين حب من روح منكسره
باسمك من صحت مولاي شفت بسمك الف حسره
لو قصر بشر وياك بطيبت كلبك تعذره

ربحان البابك يدك
خليني احبك من صدك

مولاي يا حسين مولاي يا حسين

* * * * * *

يحسين العشگ انواع كلمن يعشك لحاله
وبعض العشگ للعاشگ هوه يصير كتاله
بس حبك يبو الاكبر اليحبك خير سواله
والتنضرله بعيونك يا مولاي هنياله

حبك مخيط جم فتك
خليني احبك من صدك

* * * * * *

محمد عبدالحسين الساعدي

نشيد المواكب يضل ثورت عصرنه
نشيد المواكب نهتفه بكل عمرنه

لبيك يا حسين
مندمجه بالوجدان
لبيك يا حسين
مزروعه بالشريان

*   *   *   *   *   *

من قبلنه ترددت ••• ومن بعدنه تخلدت
يا حسين تمددت ••• ثوره والام
صرخه ما تسكت ابد ••• خالده تضل للأبد
للوكع صارت سند ••• ورفعت اعلام
عايشه بنص الكلب ••• بدونها نعيش بغرب
واليفاركها صعب ••• يعيش بأوهام

صعب نلكه مثلك فقط انته حبنه
صعب نلكه مثلك يالبنص كلبنه

لبيك يا حسين
بس هيه الي عنوان
لبيك يا حسين
مزروعه بالشريان

*   *   *   *   *   *

بيها افخر بالحشر ••• شمعه تضويلي الكبر
ابقه بالخدمه افتخر ••• يم علي هناك
صوت ما ينصه ابد ••• يا حسين والآبد
وانته منطينه وعد ••• نحشر وياك
ارواحنه فدوه الك ••• لعمر منذور الهلك
الك يندار الفلك ••• يطلب ارضاك

يمولانه لولاك صدك هلكنه
يمولانه لولاك شلنه بعمرنه

لبيك يا حسين
لولاها چا ماكان
لبيك يا حسين
مزروعه بالشريان

*   *   *   *   *   *

امي كالتلي بصباي ••• لا تعوف الخدمه هاي
بخدمتك توفي رباي ••• وارضه عنك
ولون تترك هلــ درب ••• تعيش عمرك بالغرب
تدخل بكلبي صعب ••• وابره منك
حب الحسين الحيات ••• هوه مفتاح النجات
ابابه تحقيق امنيات ••• بهذا ونك

اذا همك يزيد فقط اعتنيله
اذا همك يزيد يخلص الثكيله

لبيك يا حسين
حب وألم واحزان
لبيك يا حسين
مزروعه بالشريان

* * * * * *

صرخه بسم الحق تدوم ••• بيها تنزاح الهموم
يا حسينا يا رحوم •••ارضه عني
خلي اتنفس هواك •••غايتي اكسب رضاك
سجله بدفتر عزاك ••• هذا وني
ارضه تملكني غلام ••• يا اميرآ للسلام
الك كل هذا الكلام ••• وهذا حزني

انابدون الحسين شسوي بحياتي
انابدون الحسين ضلامه بمماتي

لبيك يا حسين
ثقيله بالميزان
لبيك يا حسين
مزروعه بالشريان

* * * * * *

محمد عبدالحسين الساعدي