#من_تورکم

شاعیر کؤنلومدن سؤز آخار یاغ کیمی
نعره چکر دهانیمدا دیل منسیز
باغلاسالار بولبول کیمی دیلیمی
سولار بیر-بیر لاله منسیز گول منسیز

ائل-اوبانی‌ وصفه چکن سؤز منیم
بو یایلایا دوغرو گیرن ایز منیم
اورمو زنگان اردبیل تبریز منیم
چنلی بئله گذر سالماز یئل منسیز

هر زامان بیر آدیم واردی یادیگار
نیظامی هم خسته قاسیم شهریار
گاه "دده کاتیبام" گاهدا "بختیار"
یالقیز قالار اوبا منسیز ائل منسیز

آلتایلاردان قالخیب گلن منم من
داغ-دنیزی سؤکوب گلن منم من
دالغا-دالغا آخیب گلن منم من
گلمز اولسام وطن قالار چؤل منسیز

آراز اولدوم خزر یولون یورودوم
قیزیل اوزن فریادینا سس وئردیم
قار اولوبان ساوالاندا اریدیم
اریمزسم چایدا آخماز سئل منسیز

تاریخلرده صایفا-صایفا آدیم وار
اوغوز خاندان چوخلو یادیگاریم وار
بیرجه کور اوغلویا مین نیگاریم وار
قهرمانلار یئرده قالار شیل منسیز

دده قورقوت سازین اله آلمیشام
خان چوبانین افسانه سین یازمیشام
سارای قیزی ماهنی لاردا چالمیشام
دوغرو چالماز او ساز داکی تئل منسیز

بیر آغاجام ییرمی ایکی بوتاغیم
اوزبک ، قازاق ، قیرقیز ،تورکو دایاغیم
آلتایلاردان بالکانلارا یاتاغیم
جهان اولار باشدان باشا چول منسیز

اورمو آدی گلسه کاظیم خان منم
مشروطه چاغیندا ستارخان منم
غیرتلی داماردا آخان قان منم
من آخماسام ضعفه یئتر قول منسیز

کاتيب اوغلو باخین گئچمیش ایزینه
دوغرو یازان شاعیرلرین سؤزونه
تاریخ میدانیندا یولون دوزونه
پهلوانلار آچا بیلمز یول منسیز.

#کاتب_اوغلو
#کؤنولدن_دیله
#فارص_طیار_قولونجو
#اورمیه #قولونجو
#اورمیه_تورک
#اورمیه_را_باید_دید
#تورکجه_شعر#شعر_توپلسو
#اورمو_شاعیرلری#تورک_شاعیرلر
#دده_کاتیب#دده_کاتب
#دده_کاتب_قولونجو
https://www.instagram.com/p/CG9c3ZRlNA7/?igshid=1eu05hsu37znx