.............. یانا یانا ..............

بیر باهاردا گئچدی سنسیز.
آچمادی گول یانا یانا.
یاغمور یاغماز بورا سنسیز .
اؤد آلیب چول یانا یانا.

تک خیالین منله قالیب.
حسرت یامان گونه سالیب.
دای گوجومو الدن آلیب .
قیریلیب قول یانا یانا.

گؤیلوم ائوی دولوب درده.
آیاق تیتریر بلا سرده .
اؤلو تکین جسد یئرده .
لال اولوب دیل یانا یانا.

یالنیز قالدیم بو یاشیمدا.
یاده دؤنوب سیر داشیم دا.
بلا قونان بو باشیمدا .
آغاردی تئل یانا یانا.

آخشام گؤیلوم کدر آلیر .
گئجه سنی یاده سالیر .
سحر گؤزوم یولدا قالیر.
اوسانیر یول یانا یانا

دؤن سئوگیلیم عومور بیتیر .
خاطیره لر گؤزدن ایتیر .
باخ جاوانلیق الدن گئدیر .
بوکولور بئل یانا یانا .

باش چالیرام داشدان داشا.
گونوم آغلار گئدیر باشا
باخ گؤزومدن آخان یاشا
اولوبدور سئل یانا یانا.

زای اولور امه ییم ساییم
توکنمیر هاواریم هاییم
سنسیز گئچن گونوم آییم
اولاجاق ایل یانا یانا

کاتيب اوغلو قالیب داردا.
گئجه گوندوز آه و زاردا.
بیر گون اولار منی یادا
سالاجاق ائل یانا یانا
‎‌‌‌‌
#کاتب_اوغلو
#کؤنولدن_دیله
#فارص_طیار_قولنجو
#اورمیه#قولنجو
https://www.instagram.com/p/CCqPtXvlgyy/?igshid=cwo2266mm8jj

....لبیک....
🍃🌸🍃

گئنه گلدی وقت-ی وصال-ی جانان.
یئتدی خوش یقینه الطاف-ی رحمان
مومنلر شوق ایله ائدیرلر بیان :
لبیک ..آللهُمَّ لبیک..نداسین

فَلَمّا اَسلَما تَلهُ لِلجَبین
فَدَیناهُ بِذِبح اولدو یقین
اوخودو شوقیله جمله مومنین
لبیک...آللهُمَّ لبیک... نداسین

(کَذالِکَ نَجزِی المُحسِنین )دلیل
یولداش اولدو حقه ابراهیم خلیل
جاری ائتدی دیلده نبیّ جمیل
لبیک ..آللهُمَّ لبیک ... نداسین

ذبیحین وارثی "محمد امین"
اوندا کامل اولدو ارکان-ی دین
سسله ییر کعبه ده جمله "سین" وُ "شین"
لبیک .. آللهُمَّ لبیک .. نداسین

طوافه مشغولدور عاشق اولانلار.
حسرتده یانیرلار غافیل قالانلار
ال آچیب دئییرلر بیر پای اومانلار
لبیک..آللهُمَّ لبیک...نداسین

کاتیب اوغلو دیلین توتماسین قرار
عید-ی اضحی گونو گلیبدی تکرار
خلیل الله کیمی سنده ائت اقرار
لبیک ... آللهُمَّ ... لبیک ... نداسین

#کاتب_اوغلو
#کؤنولدن_دیله
#فارص_طیار_قولنجو
#اورمیه#قولنجو
https://www.instagram.com/p/CDQqJKcFSQc/?igshid=1izkn3yp62pf3

مرداد آیینین 20_نجی گونو کاتیب اوغلونون دوغوم گونودور ، و رحمتلیک اللي یاشا وارینجا بو شعیری یازمیشدیر.
👇👇
....نه دردی وار....
🍃🌺🍃

بیلمیریم کؤنلومون نه دردی واردیر؟!
سیغینیب سینه ده یاسه باتیبدیر
یتیم اوشاق کیمی بوینونو بوکوب
غریب بولبول کیمی قیشا چاتیبدیر

آخیدیر گؤزومدن یاشی دالبادال .
گولمز اوزوم گونلر آیلار سال-با-سال.
ندیر باشیمداکی بو حال بو احوال؟
یامان چاغدا منی قاله قاتیبدیر

نه دینیر دیندیریم نه دیلدن آنلار
اینانمیر قوجالدیم گئچدی زامانلار
من اونو دانلارام او منی دانلار
قانمیر کی قاندیرام گونوم باتیبدیر

کاتيب اوغلو عومور اللینی گئچدی
تای توشلارین اجل باده سین ایچدی
فلک سنین بویان آغ دونو بیچدی
منیم غافیل کؤنلوم هله یاتیبدير

#کاتب_اوغلو
#کؤنولدن_دیله
#فارص_طیار_قولنجو
#اورمیه#قولنجو
https://www.instagram.com/p/CDtOBsWllN-/?igshid=1hgiuovwfmqzn

... وطن ....
🍃🌼🍃

یازیق خیال قوشوم قالدی قفسده.
دار یئرده بس داریخماسین نئیله سین.
بیر ایگیده میدان اؤلسا ساواشار.
باغلی قالسا یؤرولماسین نئیله سین

وطن ناموس اؤلار قیمت بیلئنه .
ناموسون اوغرونا جانین وئرنه.
وطنی تاپشیرسان آلچاق بیرینه.
گؤزل وطن آغلاماسین نئیله سین.

انسانلار قالماسین وطندن پایسیز.
آغاجلار تؤپراقدان دنیزده چایسیز.
ایللریمیز بوتون قیش اؤلسا یایسیز.
وطن باغی سارالماسین نئیله سین.

چنلی بئلده کوراوغلولار قالمیا.
بابک اؤله ستار خانلار قالمیا.
دده کاتیب شهریارلار قالمیا.
کاتب اوغلو قوجالماسین نئیله سین.

#کاتب_اوغلو
#کؤنولدن_دیله
#فارص_طیار_قولنجو
#اورمیه#قولنجو
#دده_کاتیب#دده_کاتب
#دده_کاتب_قولنجو
https://www.instagram.com/p/CEOVerilVCM/?igshid=lx45820zzrl8