📞.. نعم ، بس منو حضرتچ؟

📞.. اني ضي

📞.. ضي بنت خالتي احلام؟!

📞.. اي منو تكون غيري هاي اله اذا چانت اكو بحياتك الف وحده

📞.. اني انصحچ تحچين بأحترام وياي

📞.. ليش انت خليت بيها احترام حته احاچيك بأحترام؟ ، اسمعني وضاح اني رايدتك بموضوع كلش مهم وما عندي وقت اضيعه وياك
📞.. شنو هل موضوع المهم؟

📞.. يخص ودق ، وضاح ودق خط احمر وهاي امانه برگبتي امي وصتني عليها وعلى ليان ما اگدر اشوف خواتي يضيعن گدامي واسكت

📞.. وشنو المطلوب من كلامچ

📞.. يا حضره جناب المحترم لو انت صدگ محترم چان ما حبيت الك وحده صغيره بگد ودق هاي اذا بالصدگ تحبها

📞.. ليش تحسسيني ودق طفله عمرها ١٠ سنوات ، اسمعي يا بنت الناس اني رايد ودق على سنه الله ورسوله واني اتقدمت الها وهي الرفضت تريد تكمل اعداديه يلا اتقدم الها واني ما حبيت اضغط عليها وخليتها على راحتها ما رايد اخسرها وبس يصير عمرها ١٨ سنه تلگوني بالباب جاي متقدم الها وما اعتقد اكو فد شي غلط بالحچيته

📞.. احسن الك تبعد عنها وتعوف اختي بحالها

📞.. مستحيل ، ما راح اعوفها اله هي برضاتها واذا هي چانت رايده هل شي راح احترم قرارها وراح اجبر نفسي انساها بس مال انتي تجين وتگليلي اتركها ما راح اتركها

📞.. شنو اليخليك تتعلق بيها لهل درجه شنو التغير! مو چنتوا تكرهون بعض
📞.. ماكو أي كره بيناتنا لا هسه ولا بالماضي

📞.. وضاح ابعد عن اختيي عوفهااا تره انت راح تسبب النا مشاكل هواي بسبب حبك الها

📞.. هسه انتي شنو جايه حته تحاولين تفرقين بيناتنا؟

📞.. لمصلحه اختي اسوي كلشي

📞.. اذا رايده مصلحه اختچ ف المفروض ما تسوين كل هذا ، ضي انتي تعرفين فقدت هواي اشخاص بحياتي فقدت ابوي وفقدت اهلي وهسه بعد ما لگيت الانسانه الاحبها ورايد اكمل حياتي وياها واستقر جايه انتي تحاولين تبعديها عني ، حته بشريكتي ناوين تبعدوها عني بس بعدچ ما تعرفيني كلش زين اني اذا ردت شي احارب علمود احصله

سكتت وما اعرف شنو احچي بعد
مبين عليه هذا كلش قافل
ياربي شلون بلوه
يعني اني اخلص من بلوه ادخل ببلوه ثانيه
صافنه وما اعرف شنو ارد لحد ما قاطع صفنتي وگال ..

📞.. شنو السبب اليخليچ تكرهين اختچ؟!

📞.. شنوو؟!!
📞.. مداعي اكرر سؤالي سمعتي كلش زين

📞.. وضاح شنو تقصد! ، انييي اكره اختييي!!

📞.. مو من يمي گلت انتي تكرهيها بس افعالچ هي التثبت هل شي

📞.. تررره گمت تچفص شنووو اكره اختييي اني لو اكرهاا چااان ماا سوويت كل هذاا!!

📞.. چان ما حاولتي تفرقين بينها وبين التحبه وچان ما نزلتي دمعتها ولا ضربتيها؟ ، يعني لو ما سويتي كل هذا معناها انتي تكرهيها؟!

📞.. وضااح كاافييي

📞.. ليش كافي؟ ، الصراحه تضوجچ؟ ، چان الاتصال مفتوح باليوم النزلتي بيها دموع ودق وضربتيها وفوگ السويتي تگولين لا لمصلحتها هيچ داسوي خوش مصلحه الظاهر خالتي عافت بناتها يم وحده مريضه نفسياً ما تعرف تفرق بين مشاعر الحب والكره

📞.. لا واضح انت كلش محترم من كلامك هذا وياي

📞.. اني ما تجاوزت عليچ مجرد داواجهچ بالحقيقه واسمعيني يا ست ضي اياچ مره ثانيه تحاولين تندگين بودق بذاك الوكت اني الراح اتدخل وراح تصير السالفه غير شكل
📞.. شنوو انت تهدد! ، اختييي وحره بيهاا انت معليييك لا تدخل بمشاكلناا

📞.. ودق تخصني وما اسمحلچ تأذيها حته لو بكلمه وحده وواذا چنتي اختها شنو لازم تأذيها وتذليها لأن انتي اختها؟ ، هاي المره صارت گدامي بس شمدريني بالصاير من وراي

📞.. شنوو قصدك يعنييي اني معذبه اختييي؟!!! ، ركزز بكلامك قبل لااا تحچي رجاائاً

📞.. مداحچي فد شي غلط ومركز بكلامي كلش زين بس انتي الركزي على تصرفاتچ وحذرتچ اني ، من رخصتچ اختي

وسد الخط بوجهي
ضليت صافنه لا يا حقير
شگد نذل وما يستحي هل انسان
شلون يسد الخط بوجهي ويحاچيني بهل اسلوب!

الله ياخذه هاي البدايه وخلاها تعلگ بيني وبين اختي لعد بعدين شلون
وهذا لو طلع صدگ يحبها وصدگ يتقدم الها راح تصير مشكله ثانيه بينا وبين خالتي
وهي الوحيده الواگفه النا ما اگدر اخسرها بسبب افعال غبيه وما مدروسه من ودق وهذاك الحقير

ياربي ساعدني شلون اتصرف وشلون اتعامل ويه كل هل مشاكل كل مشكله اكبر من الثانيه ووحدي لازم احلها
تالي عمري يجي هذا وضاح يهدد بيه
بس خل يصبر الي كم يوم واعرف شلون اتعامل وياه
والله لخلي ودق بنفسها تسمعه حچي ويتذكر ويامن دايحچي

طلعت من هذا البيت وچنت حيل ضايجه ومتنرفزه من كلامه لهل مستفز
ورجعت لبيتنا بتكسي ونزلت قريب من منطقتنا بشوي حته ما يشوفني احد من اليعرفوني

وصلت للبيت ودخلت وما حچيت ويه ودق بالموضوع
اريد اتعامل وياها هل ايام بشكل كلش عادي
حته ما تنگلب ضدي وتوگف ويه وضاح
خل يعبر كم يوم واكشفلها وضاح على حقيقته
سالفه الحب البينهم ابد ما مرتاحه الها

بدت تمر الايام من بعد هل يوم
ومثل ما گلت ابد ما حاچيت ودق بأي كلمه تضوجها بخصوص هل موضوع خليتها على راحتها
وضليت مثل الساكته وبالعه الموس
والمصيبه من بعد ما كشفت السالفه صارت كلش عادي تجي وتخابر يمي ومداتنطيني ذره احترام
حته لو اعرف ما يصير هيچ تسوي بس هاي هم تعرف الاحترام شلونه اذا هي حبت الها واحد اصلاً مو محترم شلون ثنين راح يضيعها لأختي
اما عن ليان ف ملتهيه بزواجها وتجينا بين كل فتره تمر علينا لو تبات يمنا كم يوم وترجع

واما عن قيس ف ضاله وياه مثل المعلگه لا اني المتزوجه گدام الناس ولا اني العزباء
ومادري شلون اتصرف ويه هل مشكله

ما ضل شي على نهايه هل سنه ودخلت بكلوريا
وقربت امتحانات نهايه السنه وان شاء الله اگدر بهل سنه اطلع معدل زين
رغم كل الضغوطات والمشاكل الداوجها بس داحارب علمود دراستي داضغط على روحي رغم تعبي واحاول ادرس قدر الامكان
وعلى هل مشاكل الداوجها الدراسه مفروض انساها
منا ودق ومصيبتها ومنا زواج ليان ومنا سالفه قيس على صفحه والف مشكله موجوده بحياتي
بس شسوي داوزع طاقتي على كل هل مشاكل واخر ما يتبقى من طاقتي افرغها بالدراسه
لدرجه انام وبيدي كتابي اغفه واني داقره من التعب

ضليت على هل حال طول هل ايام وحامده ربي وشاكرته على كل الدايصير ومنتظره الفرج من الله
واگفه بالمطبخ وداسوي العشه وتعبانه گوه واگفه على رجلي ومنا بيدي الكتاب وداحاول اقره
واحفظ منا وانسه ، زهگت
ونوبه راسي يوجعني من الصبح وساطرني سطر صارلي فتره بس اتعب ..
- ضي

جاوبت بتعب ونعاس وگلت ..

ضي:: نعم

اجتي يمي تتمشى لحد ما وصلت لعندي وگفت وگالت ..

رهام:: ما كملتي تره متنا جوع

ضي:: هسه ما بقه شي ويكمل العشه

رهام:: اي ، عود سوي وياچ زلاطه ماشي؟

ضي:: سوي انتي تره تعبت هلكت بسببكم من الصبح واني اشتغل وانظف بهل بيت نوبه خلصت العصر ويادوب لحگت اسبح واجهز نفسي واروح لقيس ووراها رجعت وگبل تلگتني الماعين تله ما شاء الله وهسه داضغط على روحي واسويلكم العشه وداقره بنفس الوكت ونعسانه حيل وبلگوه مفتحه عيني وفوگاها مريضه

رهام:: عشتووو مريضه تگول ، ما بيچ شي چنچ حصان لا مريضه ولا شي

ضي:: اي مو اچذب عليچ اني

رهام:: والشغل غصب عنچ تنظفين هذا بيتكم ومن واجبچ تنظفي اني العليه انظف بس غرفتي واما عن قيس هم غصب عنچ ترحيله تره هو رجلچ مو رجلي
ضي:: وياهو الورطني بي غيرچ انتي

رهام:: هه دخفي ايدچ وخلصي وتره ايهاب يگول رايدچ بموضوع مهم من تكملين

ضي:: شنو يريد

رهام:: شمدريني عود من نجتمع على السفره نحچي

ضي:: ماشي بس روحي تره راسي ساطرني وانتي منا تحچين دوختينيي

غمتني ومشت
گبر هاي شبيها
فوگ ما ضاغطه على روحي وداسويلهم اكل واصلاً اني ما اشتهي بس علمودهم
ان شاء الله سم ببطنها واخلص من عدها

كملت ورحت فرشت السفره بالصاله ونقلت الماعين ورحت صحت ودق
ورجعت للصاله گعدت على التخم وميته تعب ..

ودق:: عاشت ايدچ ضوضيي

ضي:: اكلي وانتي ساكته لا ضوضي ولا صخام
ودق:: هاي شبيچ اليوم نفسيه ما تتحاچين زين تعالي اكلي

ضي:: ماريد ما اشتهي

ودق:: تره انتي حته غده ما اتغديتي شنو ما تشتهين

ضي:: داگلچ ماا اشتهييي مااا اريييد عوفينييي

ودق:: يمه شبيچ

ايهاب:: دعوفيهاا انتي الثاانيه

رهام:: مو عود ردت تحاچيها

ايهاب:: خل نتسمم بالأول

رهام:: اي خلص براحتك تره ما گلت شي حته تعصب

ايهاب:: وانتي ما دام گاعده وما تردين تاكلين روحي سوي چاي

ضي:: تره تعبت ارحموني عيني گوه مفتحتها اريد اخلص هل موضوع لأن الامتحانات ما بقالها شي

ايهاب:: تگووومييين لووو شلووون

ضي:: گاااييمه

گمت من مكاني وشمرت الكتاب على التخم بغضب وطلعت من الصاله
رحت للمطبخ اسوي چاي وگعدت انتظره يصير
ابد ما عدهم احساس عبالك خدامه عدهم
شايفين وضعي شگد تعبانه وگوه شايله روحي وعندي دراسه وكلش شوي دازيني على شغله
وهسه ياريت يطلبون ب احترام لا كله بالصياح
عبالك جايبيني فصليه مو بنتهم
صار الچاي واخذته بصينيه ورحت للصاله قدمته اله وشلت بالماعين ووديتهم بالمطبخ وعزلتهم على صفحه
عود الصبح اغسلهم گوه داتحرك نوبه اوگف اغسل ماعين
هو زين مني ما واگعه
رجعت للصاله اخذت كتابي وردت اطلع وصاحني ايهاب ..

ايهاب:: وين رايحه

ضي:: انطمر

ايهاب:: اي عود خل احاچيچ وبعدين روحي انطمري براحتچ

ضي:: استغفر الله

گعدت على التخم وحچيت بفارغ الصبر ورايده اروح ..

ضي:: احچي بسرعه

ايهاب:: اسمعيني ما دام ليان تزوجت ......

دايحچي وياي وابد ما منتبهه اله
لزمت راسي بوجع وحسيت معدتي داتگلب
گبل خليت ايدي على حلگي وگمت من مكاني ركض وطلعت من الصاله ورحت استفرغت بالمغسله
لحگتني ودق وهي تركض وراي ..

ودق:: ضييي ، ضيييي شبيچ!!
غسلت وصرت اتنفس سريع ودايخه ..

ودق:: انتي زينه؟

هزيت راسي بمعنى اي وصرت امشي گوه ارجع للصاله
رجعت وصاروا يباوعون الي بستغراب
گعدت واجت ودق گعدت يمي وتباوعلي بقلق ..

ايهاب:: شبيچ

ضي:: مابيه شي

ايهاب:: شو اليوم وضعچ ما عاجبني مادري شلونه

ضي:: ومادام انت شايف وضعي هيچ ليش مصر تكمل كلامك خليني أولي ارتاح ، يمكن ماكله شي على الريوگ مخلي معدتي هيچ بس تگلب

رهام:: وتعاالي ذبيهاا براسي وگولي رهام حاطتليي سم مثل ما ذبيتي سالفه موت ابوچ برااسي

ضي:: هسه انتييي منووو يمچ

ايهاب:: كااافيي تتعاركن واسمعي ضي خل اكمل كلامي وبعدين وين تردين تولين ولي بس اسمعي وكافي كل شوي گامزتلي من مكان المكان
ضي:: احچييي وفضنييي

#يــــتبـع ...

حبايب هذه بارت ١٦ من الجزء الثاني ناسي

اعلان البـارت الأخـير
ضي (جوانب مظلمه)

مقتطفات مـن البـارت ٢٥ والأخـير ...

.

.

.

- لل ل ليييش كلهم رر ررر راحوا اا ا انيي ااا اريد اموت مثلهم ليش الموت مم م ما رايدني تره تعب گلبي والله ااني متعوده على الموت ب بب بس مو كلهم يعوفوني بب بب بفتره قصيره

.

- احبچ

- اكرهك بكثر حبك الي ..
.
.
- لااا تخبلووونيييي شنوو يعنييي انتحرت؟!!!!

.

- مداگدر اطلع من راسي المنظر الدموي الشفته ، الدم چان متطشر بالگاع بكل مكان ..

.

- راح اعوضچ عن كل الصار

- ما تگدر ..

.

- لااا تخلواااا يمووووت ااا ا اترجااااكم سااعدووونييي

.

- انتي ضي عيوني ..

.

- شگد وراح تطلع؟

- تطلع؟ ، مؤبد ما راح تطلع راح تخيس بالسجن لو منطيها اعدام افضل

.

- تمنيت اخذچ واسجنچ بين ضلوعي حته احميچ من عدهم

.

- گلبي يريدك ..

.

- شدااتحرگييين ولچ؟

- ماضيي الأسود ، الجوانب المظلمه الموجوده بحياتي رايده اخلي حياتي عباره عن ضي مثل اسمي اكو فد مشكله؟ ........

.

.

.

#قريباً ..

توقعاتكم للبارت الأخير؟ ......

ضــ|الجزء الثاني|ــي
البـارت .. ٢١


•
•
•

اضرب على خدها وهي ولا صحت ولا شي
لزمت بأيدها وأول ما عفت ايدها بسرعه وگعت ايدها وكأنما ماتگدر تتحكم بيها
ما عرفت شنو اسوي توترت حيل
قربت ايدي من خشمها حته احس بأنفاسها شو مداحس بشي
تجمدت بمكاني وجسمي تلقائياً صار يرجف ..

ضي:: وو و وروود شش ش شبيچ گعدي

مديت ايدي لمتونها وصرت اهز بيها واصرخ ..

ضي:: وروووووود گعديييي لااا تخبلينيييي مااا بيچ شيييي قبل شووووويي چنتييي تضحكييين ويييه امچ شجاااچ ، لچ وروووووود
عفتها وصرت ارجع ليوره واباوع الها بخوف
.. ياربي سترك ، يارب ساعدني شدايصير!

سرعت خطواتي وبسرعه رحت انزل ليجوه ونسيت حملي اصلاً ما يهمني لازم الحگها شصارلها!
رحت لأمها الهث وارجف واحچي بتلعثم من الخوف ..

ضي:: خخ خ خاااله بب بببنتچ

عواطف:: شكوو شبيچ؟!

ضي:: وو و ورووود خااااله ماادرييي شبيهاا

عواطف:: لچ شبيهااا احچييي

ضي:: رحت اصيحهاااا لگيتهاا گاعده على التخم ومغمضه عيونهاا عباليي نااايمه وگعدت اصحي بيهاا بس مدااااتگعد

عواطف:: شنووو ما تگعد؟! ، يييمه بنتييي ورووود ..

وبسرعه راحت تركض وصارت تصعد الدرج وبكل خطوه تريد توگع
صعدت فوگ واني ضليت يم الدرج ورجلي مداتعيني اصعد ضليت واگفه لمده وارجف رجف لحد ما سمعت صوت صرختها وصلت ليجوه
وبسبب صرختها يمكن بهل لحظه ردت اولد من الخوف

رحت ادور على جنطتي لحد ما لگيتها
طلعت تلفوني من عدها وايدي ترجف وبلگوه لازمته للتلفون
لگيت رقم وضاح وبسرعه اتصلت عليه ومنتظرته يرد ومتوتره حيل
لحد ما اجاني صوته وبسرعه قاطعته وگلت ..

📞.. وضاااح انت وين؟!!

📞.. هسه جاي بالطريق ما ضل شي وادري تأخرت بس ازدحامات شسوي

📞.. وضاااح الحگلنااا

📞.. شكوو شصاااير؟!!

📞.. ورود مادريي شبيهاا

📞.. شنوو؟! ، شبيهاا ورووود

📞.. مااادرييي وضاااح ماادريييي مداااتگعد تعااال بسرعه ووديهاا للمستشفى

📞.. ايييي هسه جااايي

غلقت المكالمه بسرعه ورجعت تلفوني بالجنطه ورحت اصعد الدرج بهدوء ورجلي ترجف
رحت للغرفه ودخلت ولگيت ام ورود واگعه بالگاع يم بنتها ولازمها بأيدها وتبچي ..

عواطف:: يييمه شجاااچ شسوووويتيييي انتيييي ، لااا تعوفينييي فدوه لاا تعوفينييي مثل اختچ

ضي:: اا ا خاله ..

عواطف:: انتيييي شتسوووين هنااا روووحييي اتصليييي بوضااح

ضي:: اا ا انييي اتصلت عليه وگلي هسه جاي بالطريق

ما ردت عليه ورجعت تبچي ما عرفت شنو اسوي سكتت وعفتها وطلعت بره الغرفه ونزلت جوه حته خاف يجي وضاح اني الافتحله الباب

بعد مده يلا سمعت صوت الباب يندگ وأول ما سمعت صوت الباب بسرعه طلعت افتحله الباب وعرفت هذا وضاح

دخلته بسرعه للبيت وسئلني عن مكان ورود وگلت اله بغرفتها وهو راح ركض يصعد واني واگفه يم الدرج منتظرته وما طول هواي ونزل وشايل بيده ورود وام ورود تمشي وراه وعبايتها على راسها

طلعوا بره البيت واني لحگتهم وصعدت وياهم بالسياره وبسرعه حرك سيارته وضاح وصار يسوق بأسرع ما عنده وما طولنا هواي على سرعته هاي
وأول ما وصلنا اخذوا ورود بسديه وودها لقسم الطوارئ وگعدنا ننتظرها واني واگفه قريب من يم وضاح ومتوتره حيل ..

وضاح:: شصار بالضبط؟!!!

ضي:: مم م مادري وضاح فجأه لگيناها واگعه وو وبعدين هي مو عدها سكر يمكن اا ارتفع عدها

وضاح:: الله اليستر ..

راح يتمشى لخالتي وگعد يحاول يهدئها بس شيهدئها اذا هي كتلت روحها بالبچي
حقها بنتها وخايفه عليها وكلنا خايفين عليها صراحه

ضلينا واگفين لمده ومنتظرين على نار
لحد ما طلع احد الدكاتره وبسرعه راحله وضاح وگعد يحچي وياه ويسئل عن حالة ورود ..

وضاح:: بشر دكتووور شلووونهاا حالتهاا؟!!

جرله حسره الدكتور وويه هل جره احس روحي راح تطلع من مكانها ..

وضاح:: دكتوووور احچييي ليييش سااكت

الدكتور:: البقيه بحياتكم
وضاح:: شنو البقيييه بحياااتكم مرتيييي وين؟!! ، شبيهااا

الدكتور:: المريضه داخل لجسمها سم خطير جداً وأدى الى وفاتها ، راح نحقق بهل موضوع ..

سكت وضاح ومصدوم من السمعه
واني واگفه بمكاني ومتجمده وگوه واگفه على حيلي لحد ما سمعت صوت صرخه عواطف الرجت المستشفى رجت وخلت حيلي ينهد ..

عواطف:: بنتيييييييييي ، وروووود ، ورووود وينهااا طلعوووهااا اليييي ..

فجأه حسيت روحي نفصلت عن العالم ورحت بعيد وسرحت مادري وين
مداگدر اميز الكلام الداسمعه كأنما داسمع طلاسم
.. معقوله اني صرت مجرمه گول وفعل؟ ، بس اني دافعت عن نفسي وما چنت ادري بهل اكل اكو سم ، دخيلك ربي شدايصير ..................... اسمع صوت بچي وهوسه مادري شلون گدرت تاخذني رجلي لهنا؟

دخلت للبيت وبخطوات بطيئه وهادئه لحد ما دخلت ليجوه للمكان البي الفاتحه
ورحت متوجهه لعواطف العيونها رايحه من البچي ..

ضي:: ا اا ا البقيه بحياتچ
رفعت عينها من الگاع وخلت عينها بعيني ومادري شلون اوصف نظرتها بس چانت بحد ذاتها مرعبه وبيها حقد وحزن مو طبيعي

چانت اكو دمعه بطرف عينها ونزلت على خدها ومسحتها بكف ايدها وحچت بنبرة صوت كافيه توضح الحقد البگلبها تجاهي شلون ..

عواطف:: وبحياتچ البقيه ..

رحت گعدت يم خالتي وصرت افرك بأيدي بتوتر واباوع لعواطف وماعرف شنو اسوي

حسيت بأيد تمسح على كتفي درت وجهي وباوعت لخالتي والتعب واضح عليه ..

رباب:: عبالي ما راح تجين باليوم الثالث

ضي:: بعد صراعات هواي بيني وبين نفسي ، قررت اجي

رباب:: يعني مو وضاح الجبرچ؟

هزيت راسي بمعنى لا وگلت ..

ضي:: وضاح مو بحالي هسه ..

رباب:: عذري ضي تره ورود مرته مثل ما انتي مرته
ضي:: ادري خاله ، الله يرحمها

وجريت الي حسره بتعب وگلت الها ..

ضي:: اني أديت الواجب يصير اروح هسه؟

رباب:: بنتي تره هستوچ اجيتي شنو ترحين هسه

ضي:: ما اگدر ابقه خاله داحس بخنگه من باقيه هنا احس بشي گاعد يخنگ بيه

رباب:: ضي ما تصورتچ هيچ تتأذين بعد وفاة ضرتچ غيرچ اعوذ بالله تفرح

ضي:: افرح؟ ، خاله ضميري ديأنبني البنيه قبل وفاتها بيوم اني مفوتتها مستشفى وفوگاها ماتت گبالي

رباب:: هذا يومها ضي الله كتب الها تموت بهل يوم بس تدرين شنو المحيرني

ضي:: شنو؟

رباب:: امها گالت هل سم چانت تظن ورود ملح بس الغريب شنو يسوي السم يم الاكل شلون ما گدرت تنتبه وشمعنى بس هي التسممت

ضي:: لو سمعتي كلامها للأخير راح تعرفين قبلها چانت تصفي بالغراض وبالغلط مخليته بدال الملح واما عن شلون تسممت بس ورود لأن هي جابت الها ملح وگعدت تخلي لروحها من علبه الثانيه وللأسف چانت تخلي لروحها سم وما تدري بنفسها
رباب:: لا حول ولا قوة الى بالله ، عواطف خسرت بنتها الثانيه والوحيده الضلت الها بسبب اهمال ..

سكتت وما رديت على خالتي
شيصير لو عرفوا الحقيقه شنو؟
راح يوگفون وياي لو ضدي؟

سبب موت ورود الحقيقي ضل سر بيني وبين عواطف ومحد من عدنا تگدر تنطق بحرف وتكشف الحقيقه لا اني ولا هي
صحيح عواطف حاقده عليه وودها تشرب من دمي بس لو حچت هل شي راح ينعكس على بنتها وراح تنكشف سالفتها هي وبنتها وشلون رادن يموتني

مقهوره حيل بسبب الصار وديأنبني ضميري بس مرات اصفن بيها واحس روحي بريئه
اي فعلاً اني بريئه
ليش شنو سويت؟
لو اكلت من هل اكل چان صرت اني الضحيه وچان اني الدخلت مستشفى بدالها وچان اني الندفت جوه التراب

بس ما اتوقعت كرها الي يوصل لهل مرحله وتقتل نفس
وهسه اكتشفت صدگ وضاح تزوجله مجرمه
بس لا مو اني المجرمه ، چانت ورود .........

الأيام التمر عليه بهل فتره صعبه كلش
تأنيب الضمير لليوم دايلاحگني
واما عن وضاح صار بارد اكثر من قبل بعد وفاة ورود مادري اذا بسبب حبه الها لو من صدمته
قربت ولادتي والأشهر الاخيره كلش صعبه عليه وبطني كبرانه والحمل متعبني اضعاف تعب قبل

مادري شلون عبرت هل اشهر بهل سرعه واجه يوم ولادتي بس الاعرفه اني متوجهه لصاله الولادة وحالتي حاله ومادري اذا اگدر اطلع منا عايشه لو لا ..

ضي:: مااا ارييييييد رجعوووونيييي

وضاح:: شنرررجعچ اصبرييي هسه ينقلوچ

ضي:: مااااريييييد

رباب:: صلي على النبي بنتي واخذيلچ نفس اهدئي

صرخت صرخه بأعلى صوتي وصحت ..

ضي:: رااااح امووووت ماا ارييييدهاااا

وضاح:: اهدئييي ضيي

ضي:: شهدء گلييييي شهدء كل الصااار بسببك مااا اريييد اطفااال

اجن الممرضات ينقلني واني گوه عفت خالتي ووضاح ورحت وحدي
الخوف والقلق والوجع التموا عليه كلهم سوه
الدكتوره تگلي ساعديني واني اصلاً الرايدتها تساعدني
ياربي دخيلك ساعدني
داياخذن روحي مدايطلعن طفله

بعد صراخي الرج المستشفى رج ويمكن صوتي بعد كل الصراخ الصرخته راح
سمعت صوت طفل يبچي
اي هذا صوت بنتي

خلتها الدكتوره على بطني وقطعت الحبل السري وبعدين اخذنها الممرضات ينظفن ببنتي واكو ممرضات ينظفن بيه
واني خلص انتهيت هلكت

رجعولي بنتي وبلگوه شلتها بين ايدي وعيوني گوه مفتحتها من التعب
وبنتي بس تبچي وتصارخ وقابضه على ايدها

وبعدين يلا سمحوا لوضاح وخالتي يدخلون يشوفوني
اجت خالتي ركض عليه تتطمئن وصارت تبوس بيه وتتحمد الي على السلامه واجه وضاح وگف يمي ولزم بأيدي وتحمدلي على السلامه واني جاوبته بصوت تعبان
اخذ بنتي بين ايده وصار يأذن بذنها وهي بس تبچي ومن اذن يلا شوي هدئت ..

رباب:: ياا فدوووه هدئت على صوت ابوها
ضي:: واني شبيه صوتي ما تهدء عليه

رباب:: تعبانه والچ خلگ تنكدين

ضي:: اي انكد ليش لا

وضاح:: تشبهني يوم مو صحيح؟

رباب:: خل اشوفها واتأمل بملامح حفيدتي واردلك الجواب

اخذتها من وضاح وصارت تصلي على النبي وتتأملها ..

رباب:: اروحلها فدوه

ضي:: اي خاله تشبهني الي اني مو وضاح

رباب:: لا تشبه ابوها ولا امها تشبه بيبيتها

وضاح:: لا يوم احچي الصراحه

رباب:: اي الصراحه هاي تشبهني الي اني بس تعالوا صدگ هل بنوته الحلوه شنو مقررين تسموها لو ما محددين الكم اسم

وضاح:: لا شلون ما محددين

رباب:: شمحدد بلا؟

وضاح:: ان شاء الله بالجنسيه ينكتب اسمها ودق وضاح ..
ضي:: نعمممم؟!!!

وضاح:: شبيچ؟

ضي:: لاا عيد كلامك شنو گلت

وضاح:: ودق

ضي:: تسميها ودق؟

وضاح:: لا يكون ما عاجبچ

ضي:: لا يعجبني اسم اختي بس يكون على بنتي ما راح يعجبني

وضاح:: ضي شبيچ؟!!

ضي:: لا تنسه ودق منو تكون وبعدين اني مقرره اسميها ملك

وضاح:: مو بكيفچ راح اسميها ودق

ضي:: ملك

وضاح:: ودق

ضي:: ملك

وضاح:: ودق وبلاا عناااد
ضي:: ملك وانت هم بطل عناااد تره اني الحملت تسع اشهر وتحملت ألم الولاده وعذاب الحمل مو مو حقك تسميهاا على راحتك

وضاح:: شنو المو من حقييي لعد انيي شنو طرطور غييير ابوهااا

ضي:: واني امها

رباب:: يمعوودين شبيييكم صدگ تحچون وهي انت الثاني مرتك طالعه من ولاده وتعبانه جاي تتعارك وياها شنو

ضي:: اييي خاله عفيه رزلي دايغثني

رباب:: لا تفرحين انتي الثانيه طالعه من ولاده والچ خلگ تتعاركين اني اگول لو اجيب الكم سچاچين وتذابحون هنا گدامي شنو رأيكم؟

ضي:: والله خوش فكره بس عليچ الله خاله جيبي الي سچينه ام الياي

وضاح:: شوفي خبال چنتچ شووفيي هاي تالي الدلال تطول لسانهاا

رباب:: هسه شبيكم تتعاركون على اسم عمي اني اسميها
ضي:: وشتسميها؟

رباب:: صبيحه على اسم بيبيتي الطيبه المرحومه

وضاح:: اي خوش ابو صبيحه يسموني ، خلينا على ملك احسن

رباب:: ههههه شبيك داشاقه وبعدين شبي اسم ملك شحلاته ليش ما عاجبك

وضاح:: لا بس داگول اسم ودق احلا وبما انو ودق تصير ا..

ضي:: كافي كافي لا تگعد تطلع اعذار للأسم المختاره ملك وهاي هي

وضاح:: والله لو ما طالعه من ولاده چان عرفت شلون اتعامل وياچ

رباب:: هاا سالمييين اني هناا

ضي:: خاله عفيه حاچي شبي هذا ابنچ عنودي

رباب:: اذا ابني عنودي انتي شنو وتعالي ليش ما عاجبچ اسم اختچ

ضي:: خاله رايده اسم ملك وهاي هي بعد لحد يناقشني

وضاح:: خوووش خليها ملك بس البنيه الجايه ودق
ضي:: مممم ومنو يگول راح تجي الثانيه

صار يباوعلي ونظراته توترت من عدها وگال ..

وضاح:: تجي الثانيه والثالثه ولكل بنيه ان شاء الله عدها اخو علمود يصير عندي ثلاث بنات وثلاث ولد

رباب:: شدعوه يمه شنو رايد تموتها للبنيه شبيك رايد تسويلك فريق كرة قدم

حچيت بتوتر واتلعثم بكلامي وگلت ..

ضي:: اا ا انييي راح اا ا انام تعبانه

رباب:: نامي يمه نامي

ابتسمت الها بتوتر وتمددت بتعب وغمضت عيني واحس روحي هلكانه من التعب
غفيت بسرعه لأن چنت كلش تعبانه
ومن گعدت وراها بكم ساعه يلا رجعنا للبيت

طلبت من وضاح اقضي ايام النفاس يم بيت اهلي وطبعاً وضاح رفض وما وافق اله من تدخلت خالتي وعاد خالتي ما يگدر يردلها طلب
كل ما اشوفه قافل اروح لخالتي اخليها هي التقنعه

ووداني لبيت اهلي وگضيت يمهم أيام هواي
وخطيه ليان ابد ما قصره لا وياي ولا ويه بنتي
شايلتنا بوسط عينها
والمفروض باچر ارجع .....
چنت گاعده بالصاله وتعبانه وليان گاعد على التخم الگبالي وشايله بيدها ملك وسلر گاعده يم رجل امها ولازمه بدشداشتها ..

سلر:: ليان

ليان:: ماتت ليان ولچ شتردين

سلر:: اعابي وين

ليان:: انتي كسرتيهم اني شعليه

ضي:: يا فدوه شتريد

ليان:: من البارحه لليوم صرعتني بألعابها كسرتهم البارحه وهسه جايه تبچي يمي

ضي:: هههههه ولا فوگاها تسميچ ليان

ليان:: وشبيچ مستغربه عيني هاي بعدها هستوها راح تعبر سنتين وتصيحلي ليان ماكو أي احترام هنيالي

ضي:: هههههه دجيبي ملك والتهي ببنتچ خطيه

ليان:: دصبري خل انومها الچ بس تبچي وتصرخ شبيها هيچ عصبيه ، يمه يمه شوفي شلون قابضه الأيد وعاقده الحواجب

ضي:: اي بعد بنت وضاح طبعاً تطلع على ابوها
ليان:: هههههه

سمعت صوت الباب يندگ رجعت اباوع لليان وگلت ..

ضي:: روحي شوفي الباب

ليان:: هسه

گامت من مكانها وخلت بنتي بحضني ورادت تطلع وبنتها تمشي وراها وشنعماتها ..

ليان:: ولچ وين جايه وراي روحي لخاله

سلر:: ما

ولزمت بدشداشه امها وحضنت برجل ليان ..

ليان:: استغفر الله

شالتها من الگاع وطلعن هي وسلر بره حته يشوفن منو بالباب واني ملتهيه ويه بنتي واحاول اسكتها دخلت للصاله ايلاف باوعت الي بطرف عينها وگالت ..

ايلاف:: ها انتي هنا ، عبالي نايمه

ضي:: لا وين انام قابل مثلچ ما اگعد اله بالظهاري

ايلاف:: اهوو هسه شعليچ حبيبي وراضي
ضي:: اي ومخليه شغل البيت كله على هل مسكينه ليان طبعاً حبيبچ يرضى

ايلاف:: لا تدخلين بحياتي الزوجيه عفيه التهي بنفسچ

وراحت تگعد على التخم وخلت رجل على رجل ومعنفصه ..

ضي:: اي وعود رجلچ وين وله شو ما شفته

ايلاف:: عنده شغل

ضي:: ورهام

ايلاف:: شدراني بيها ليش خالتچ تگعد بالبيت وسكتي بنتچ عفيه تره دوختني اويي

ضي:: شبيچ انتييي

ايلاف:: اييي سكتيهاا تره دوختناا اذا مو گدها تصيرين ام شكوو تحمليين

ضي:: استغفر الله ..

سمعنا صوت هوسه من بره ووحده تصيح ومبين عليها معصبه
ستغربت من الصوت ردت اگوم من مكاني وچان تدخل سلوى للصاله وتلحگها ليان
وبس شافتي گاعده اجت عليه ركض سحبتني من ملابسي وردت اوگع اني وبنتي بسرعه دفعتها عني ليان واني جريت بنتي لحضني وخايفه منها ومن منظرها
حالتها حاله والدموع تنزل على خدها عشره عشره وماكو بوجها ولا قطرة مكياج يمكن هاي أول مره اشوفها بدون مكياج
والوجه تعبان والشعر ما مرتبته ولاحظت على جسمها دايرجف بشكل مو طبيعي
باوعتلي بكل حقد وحچت بنبرة صوت ترجف ..
سلوى:: عبااالچ رر ر راااح اسكت لااا وااالله م م ماا اسكت

ليان:: هيييي انتيييي شكووو جاايه وشعندچ طلعي بره

سلوى:: لاا تدخليييين كلاامي ويه اختچ موو ويااچ واسمعييينييي كلشش زين ضييي اني وعدتچ راح اهدمها لحياتچ اذا ما تزوجنييي ولا مو بس اهدم حياتچ حيااته هم

ليان:: شدااتحچييي هااي

سلوى:: خليهاا اختچ التفهمچ ، اخوووچن الحقيييير ضحك عليييييه وماا تزوجنيييي ولكم تعرفوووون منوو انييي ، انييي سلوووى ما ينضحك عليييه

ليان:: ايهاب؟!!!

سلوى:: اي منو غير الحقير ايهاب رايدته هسه يطلع الجبان الكلب

ايلاف:: هيييي هييي انتيييي شنوو دااخله عليناا هيچ وتألفييين حچييي على رجلييي

سلوى:: هااا يعنييي انتي مرته الگالي عود يطلگچ؟ ، ايي عادي مو فد مشكله اذا ما طلگچ برضااته رااح اخلييي يطلگچ غصب

ايلاف:: انتيييي منووو
سلوى:: انييي سلوووى ورااح اشووفچ منوو سلوى انييي لو هددت انفذ بدووون خووف

ايلاف:: طلعييي بره يلااا

سلوى:: اطلع بره؟ ، اي ماشي راح اطلع بس خل اگلچ شغله ، رجلچ هذا المسوي روحه يحبچ تره خاينچ وياي وكتل روحه عليه

ايلاف:: عبالچ اصدگ بكلامچ؟ ، اني اثق بأيهاب وايهاب مستحيل يخوني لأن يحبني وما اعتقد يعوفني اني بنت البيوت ويروح لوحده مادري منين

سلوى:: ههههه دشووفواا هااي ، داااگلچ خاانچ وياااييي يعنييي اله اگلچ ناام ويااي؟!!

سكتت ايلاف وضلت تباوعلها بصدمه
.. هاي شداتحچي؟

سلوى:: اي شبيكم منصدمين ، اخوكم زاني

جرتها من ملابسها ليان وصارت تدفع بيها بره الصاله وسلوى بس تسب وتلعن وبصوت عالي لحد ما طلعتها بره البيت ورجعت النا وسدت الباب وراها
گعدت على التخم ايلاف ولزمت براسها واني رحت گعدت قريب من يمها ..
ضي:: ايلاف هي اكيد داتچذب لا تصدگين كلامها

ايلاف:: شش ش ششنوو يعنيي خانيي ، لييييش يخوونييي

ضي:: انتييي موو عود ما صدگتي بكلاامهاا ليش هسه تأثرتييي

گامت من مكانها وطلعت بره الصاله ركض ردت اصيحها وسكتتني ليان وهي تگول ..

ليان:: عوفيها

ضي:: يمعووده شعووفهاا انتييي شفتيي الصاار

ليان:: اي عادي

ضي:: شنوو هل بروود

ليان:: متوقعه من اخوچ كلشي ، واحد سكير وطايح حظه تردين ما يزني؟

ضي:: سكير؟

ليان:: يا هسه يلا عرفتي؟ ، هنيالي

ضي:: لا تخبلينييي لياان شنوو سكيير من يمته ايهااب يشرب

ليان:: صارله فتره طويله بس حقچ نايمه ورجلچ بالشمس كلشي ما تعرفين
ضي:: دخيلك ربي شدايصير

ليان:: لا تهتمين

ضي:: شلوون ما اهتم هذووله راح تتهدم حياتهم

ليان:: اي عادي ، خلي نارهم تاكل حطبهم ..

وگعدت يمي وصارت تتصرف بكل برود ولا كأنما صاير شي

لا الظاهر حياتي ما تمشي طبيعي اله اذا طلعت مصيبه بكل يوم .......

بعد الصار مرت اكثر من ساعه وصارت دنيا الظهر ورجع ايهاب وليان تصرفت وياه بشكل عادي ولا حسسته اكو شي
ومن بعدها صعد فوگ لغرفتهم
واني وليان ضلينا على هل گعده لحد ما سمعنا صوت عالي جاي من فوگ
وشوي ونزلت النا ايلاف تركض وتبچي ..

ضي:: ايلااف شبيييچ

ايلاف:: ارييد اروح لأهلييي ما اريده طلگونييي من عنده

دخل ايهاب وراها وعصبي نار
وصاح بأسمها واجت الي ركض وختلت وره ظهري وتصيح ساعديني
سحلها من شعرها وصاح ..
ايهاب:: بنت الكلببب

ضي:: لااا ايهاااب لااااا تضربهاا

ايهاب:: لااا تدخلييين لا ادفنچ وياهاا

رادت تحچي ورگعها براشدي واستلمها ضرب وهي تصيح جوه ايده واني احاول اساعدها وكل شوي يدفعني وليان واگفه على صفحه وتباوعلهم ببرود ..

ايلاف:: عوووفنيييي راااح تمووت ابنك عوووفنيييي انييي حااامل

ايهاب:: ما يهمني عساچ بالموت انتي وابنچ

دفعها بعيد واني رحت اركض الها ووجها كله كدمات وتبچي ..

ايلاف:: طلگني

ضي:: اششش اهدئيي ايلاف

ايلاف:: خل يطلگنييي ما ارييييده ، طلگنيييي شنوو ما تسمع انت

ايهاب:: موو فد مشكله قاابل ميت عليييچ ، انتي طالگ ..

شهگت وصحت على ايهاب ..
ضي:: عزه بعييينيييي ، ايهاااب شسوووويت

ايهاب:: خل يجي واحد من اخوانها ياخذها ويخلصني من عدها ما رايد اشوف چهرتها

ودار وجهه ومشه وطلع بره الصاله
وايلاف ضلت بس تبچي واني احاول اهدء بيها ..

ايلاف:: سواها! ، شلون گدر يطلگني

ليان:: انتي الردتي الطلاگ شنو هل دراما تگليله طلگني وبعدين من يطلگچ تگعدين تبچين

ضي:: لياااان مو وكتچ

ليان:: هاي الصراحه اني رايحه اجيب تلفونها اتصل على اخوها واجي

عافتنا ليان وحدنا وايلاف مستمره تبچي
.. لا حول ولا قوة الى بالله ، الله لا يوفقچ سلوى خربت بينهم وهسه الضحيه ابنهم

وراها بشوي اجت ليان وجابت تلفون ايلاف انطته الها وايلاف خابرت على اخوها وتشكي اله وتبچي بعدين سدت الخط وگالت النا نجيب الها عبايتها وشالها لأن تخاف تصعد
راحت ليان جابتهم الها ولبستهم وگالت باچر تريد تجي حته تاخذ ملابسها وطلبت من عدنا نخابرها بس يطلع ايهاب
ما طول هواي واجه اخوها عمار للبيت نخبص بس شاف ايلاف بهل وضع وگعد يتحلف لأيهاب وعصبي ..

عمار:: شنووووو يمد ايده على اختييي هاااي فوگ ما انطيناهااا اله انييي گلت ، گلت لأبوووييي لا تنطيهااا بس عاندنييي

ايلاف:: فدوه خويه خل نروح

عمار:: ما نرووح مناا اله يطلعليي هذاا الكلب

ليان:: تره ايهاب ف..

گرصتها بخصرها وحچيت بتوتر ..

ضي:: ايهاب طلع

عمار:: وين وله؟!!

ايلاف:: خويه خل نروح داتگلك طلع ما اريد تصير مشاكل فدوه خل نروح للبيت

عمار:: هييين اني اله ، امشيي

ليان:: عليك الله من تكمشه بيس بي العافيه فدوه لگلبك

ورجعت اگرص بليان زهگت مني وصاحت ..
ليان:: اووووييي شبيچ انتيييي بس تگرصين بيه

وصارت تمسح على مكان الگرصه واني سكتت
ترخص من عدنا عمار واخذ اخته وطلع بره البيت
گعدت ليان رجل على رجل واني عفتها ورحت صعدت فوگ لغرفه ايهاب دخلت بدون ما ادگ الباب ولگيته داياخذ بالسويچ مال سيارته باوعتله بطرف عيني وگلت ..

ضي:: ليش ما نزلت ، تره عمار اجه

ايهاب:: شسويله

ضي:: ومتحلف الك

ايهاب:: وهسه مفروض شنو اخاف؟

ضي:: بلا زحمه هل بنيه منين تعرفها

وسويت روحي كأنما مو اني الدزيتها عليه ..

ايهاب:: يا بنيه

ضي:: تعرف منو اقصد ، اعتقد ايلاف حچتلك عنها وگالت الك شسوت وشحچت

ايهاب:: اي گالت
ضي:: تدري انت واحد ما تستحي وقليل ادب ما تدري شگد مقهوره ، مقهوره على تعب امي وابوي التعبوا بتربيتك اخر شي يطلع من عندك هيچ تصرف قذر

ايهاب:: لا تصيرين متدينه براسي

ضي:: ايهاب انت مستوعب شنو سويت

ايهاب:: ما سويت شي ، اني رجال ما يعيبني شي وتره هي بنت شارع ورخيصه فـعادي

ضي:: رجال؟ ، ليش حاسب روحك على الزلم انت

كملت كلامي وبسرعه اجه عليه ورگعني براشدي طيره لوجهي
لزمت خدي واحسه گب نار من الحراره ..

ايهاب:: عباالچ تزوجتي معناهااا ما اگدر أدبچ؟!!

ضي:: عبالك اخاف من الراشدي مالتك هذا ، عادي اضرب واذا رايد تأدب احد فأدب روحك بالأول يل زاني

جرني من شعري بكل قوته ودفعني على الگاع ردت اگوم وحسيت بدفره بخاصرتي
صرخت بصوت عالي من الوجع
ورجع جره لشعري وگومني من الگاع سحل ورگعني براشدي ثاني ..
ضي:: عوووفنييي

ايهاب:: قندره ، مره ثانيه حاولي تتجاوزين حته تشوفين شسوي بيچ

وضل يجر بشعري وطلعني بره الغرفه ودفعني ووگعت بالگاع
بلگوه گمت من مكاني وحركتها لروحي ومشيت الي كم خطوه بصعوبه وشفت ليان يم مقدمه الدرج ..

ليان:: عزززه ضييي شبيچ

ضي:: اخوچ العار ضربني

ليان:: شصااير

ضي:: شصاير يعني؟ ، حاچيته بالموضوع وضربني الحقير

ليان:: ام لساان انتيي شكوو رايحتله هاا شكوو

ضي:: شمدريني ، هو هم صوچي امداني اروح اشوف بنتي وهم يلا اجهز غراضي باچر وضاح يجي ياخذني منا

ليان:: روحي عيني روحي انتي ووجهچ المزورگ ..

عفتها ورحت للغرفه وچانت ملك نايمه وسلر هم نايمه
عفتهن نايمات ورحت للكنتور طلعت جنطتي وبديت اخلي بيها كل غراضي حته ارجع باچر وجهزت كلشي حته باچر ما اتعب

اجه ثاني يوم وما حچيت ويه ايهاب من بعد ما ضربني
واجه وضاح اخذني من بيت اهلي والحمد لله أثر الراشدي راح چان گلبها للدنيا

بعد ما وصلنا دخلنا جوه وتلگتنا خالتي
واجت تاخذني بالأحضان وفرحانه بجيتي
وملك چان شايلها وضاح اخذتها من ايده وصارت تبوس بيها ..

رباب:: يمه فدوه لحفيدتييي فدوه لحبيبه بيبيتهاا

ضي:: خاله اني رايحه ارتب غراضي وارتاح

رباب:: تمام بنتي خلي ملك يمي وروحي ارتاحي

ضي:: ماشي خاله

وضاح راح يصعدلي الجنط واني چنت بالممر ورايده اصعد وشفت داليا سلمت عليها شگد مشتاقه الها ..

داليا:: ولچ شتاقيتلچ كلش

ضي:: واني اكثر تعالي گليلي شخبارچ ويه حبيب الگلب

داليا:: منو؟

ضي:: لا الظاهر عندچ ألف واحد
داليا:: لاا يااا ادبسز تقصدييين دريد

ضي:: اي دريد

داليا:: شبيچ انتيييي

ضي:: هههه اعصابچ خلص ما گلنا شي

داليا:: ايي البنوته وينها مشتاقه الها رايده اشوفها

ضي:: يم خالتي

داليا:: اييي رايحه اشوفها

ضي:: تمام ..

راحت داليا وردت اصعد الدرچ ووضاح نزل ابتعدت عن الدرج ووگفت على صفحه
باوعلي وگال ..

وضاح:: شبيچ ابتعدتي اليشوفچ عبالك شايل مرض معدي

سكتت وما رديت عليه اجه يتمشى بتجاهي لحد ما وصل يمي
وگف قريب من يمي وگال ..

وضاح:: شبي وجهچ
ضي:: ها

تلمس خدي بأيده وگال ..

وضاح:: خدچ منا مادري شبي ، منو ضاربچ؟

ضي:: منو ضاربني

وضاح:: شبيچ ضي عفتچ كم يوم رجعتي الي ثوله ، اسئلها ترد على سؤالي بسؤال

ضي:: ااا ا لا ماكو شي بس چنت اتعارك اني وليان

وضاح:: واني موديچ عدهم حته يتعاركون وياچ لو يهتمون بيچ

ضي:: شبيك وضاح تره عادي خوات ونشاقه بيناتنا

وضاح:: هذا شقه؟

ضي:: اي شقه واصلاً هي ما ضربتني قوي على كيفها بس اني قسيت شوي خطيه فگست عينها

وضاح:: لا حلو خوش شقه

ضي:: وهسه انت شعليك هاا ويلا وخر ابعد عني

وضاح:: واذا ما بعدت؟
ضي:: شبيك وضاح رايده اصعد ارتاح وبعدين شدعوه هلگد قريب من يمي ابعد لا احد يشوفنا

وضاح:: ماكو احد بالبيت غير امي وداليا

ضي:: ايي واذا اجت وحده منهن وشافتنا ، يلا ابعد

وضاح:: داگلچ ما ابعد

ضي:: وضاح شبي..

داكمل كلامي وما احس اله شفته صارت على شفتي صرت اضرب على صدره ومصدومه من الدايسوي
.. لا هذا تخبل

سمعت صوت جاي من ورانا وبسرعه ابتعد عني ونخلسنا اني ووضاح ..

رباب:: روميووو وجووليييت

انتبهنا لخالتي واني من الفشله ما اعرف شسوي
ختلت وره ظهر وضاح ومتفشله
ووضاح صار يعدل بياخه قميصه من التوتر ..

رباب:: ولكم ما تستحون اليشوفكم چنكم عرسان جدد

وضاح:: عذريني يوم
رباب:: شعذرك ولك غرفتكم بشنو مقصره وياكم

وبعدين صارت تضحك واني وره وضاح وارجف اخر شي صاحتلي واله شوي راح انجلط ..

رباب:: ضي تعالي رايده احاچيچ ، لچ تعالي شبيچ خاتله

ابتعدت عن ظهر وضاح بهدوء وباوعت الها ومتفشله حيل وبسرعه خليت عيني بالگاع ..

رباب:: تعالي لحگيني

مشت واني بسرعه ما صدگت اعوفه لوضاح
ورحت وراها امشي ودتني لغرفتها وفتحت الباب ودخلت ودخلت وراها
وچانت مخليه ملك على الچربايه ونايمه

راحت لكنتورها وگعدت تدور عن شي واني واگفه يم الباب سديته ورحت گعدت يم بنتي لحد ما اجت خالتي يمي وگعدت ..

ضي:: ااا ا خااله اا ا اني اسفه والله ما چنت اقصد كله بسبب وضاح والله اني معليه

رباب:: ولچ شبيچ راح تبچين
ضي:: خاله مادرييي متفشله من عندچ مادري شسوي

رباب:: هههههه عادي بنتي واني چنت اشاقه وياكم هل سوالف تصير وبعد رجلچ مشتاقلچ خطيه عايفته فتره

وضحكت واني وجهي نگلب لونه مثل الطماطه
وسحبت ايدي وخلت بأيدي لبس مال اطفال كلش صغير ومن صوف ..

ضي:: شنو هذا

رباب:: ملابس شنو يعني

ضي:: اي ادري ملابس بس شسوي بيها

رباب:: ولچ شنو شتسوين بيها غير لبنتچ وخل اگلچ عن شغله تره هاي مو مني من امچ

ضي:: امي؟!

رباب:: اي ، هاي من حملت بمرام امچ سوته الي گالت أول بنوته الچ لبسيها هل لبس واني ما حبيت ارفض طلبها وهو ما شاء الله حلو احلام مبدعه بالحياكه

رجعت اباوع للبس وچان كلش حلو
مادري ليش من عرفت هل لبس امي سوته ما حسيته مجرد قطعه قماش
لا حسيته شي ديلامس روحي ..
رباب:: وبعدين من ولدت مرام لبستها هل لبس ولبسته حته لخواتها من كثر ما تعلقت بي ، بنتي هل لبس كلش غالي عليه ومو سهل انطي لأي شخص بس انتي مو أي شخص انتي ضي والراح تلبسه حفيدتي ، اتمنى تاخذي وتلبسي لملوكه ..

ضي:: اي خاله طبعاً راح اخذه كلش عجبني ماعرف شلون اشكرچ لأن انطيتي الي

رباب:: تدرين ضي اني شگد فرحانه لأن صرتي چنتي اني ما احسبچ مجرد بنت اختي لا احسچ وحده من بناتي كلش متعلقه بيچ انتي من أول ما نولدتي صرتي بين احضاني بعدين يلا رحتي لحضن امچ لأن بعد ما ولدتچ احلام تعبت كلش وما گدرت تهتم الچ لحد گدرت توگف على حيلها يلا گدرت تعتني بيچ

ابتسمت لخالتي واحس روحي مخنوگه
تمنيت لو امي موجوده وشاركتني فرحتي ببنتي ..

رباب:: اتذكر احلام الله يرحمها قبل لا تتزوج لازگه النا بنتي اسميها ضي ومن كثر ما صرعتنا بأسمچ صرنا ما نسميها احلام لا نسميها ام ضي بس بعدين تزوجت واجه أول مولد الها ولد وخربت السالفه

وضحكت ومبين عليها مقهوره
ضحكت وياها واكو غصه بگلبي
صارت دموع بطرف عيني وگالت ..
رباب:: بنتي شنو داتبچين! ، لاا لااا حبيبتييي اني مو قصدي ابچيچ اني داحچيلچ ذكرياات حلووه لا تبچين فدوه لگلبچ

ما گدرت اتحمل اكثر وشمرت روحي بحضن خالتي وصرت ابچي بحرگه گلب وخالتي جرتلها حسره وسكتت وصارت تمسح على ظهري ..

ضي:: خاله احس روحي تعبانه ومهمومه احس بحياتي اكو نقص من يوم ما الموت اخذ امي ومن بعدها اخذ ابوي وما اكتفى الموت بأخذ امي وابوي لا اخذ ودق مني وخايفه خاف ياخذ بعد

رباب:: اششش حبيبتي اسم الله لا تحچين هيچ

ضي:: من اني وطفله اتمنى أول جنازه تطلع من بيتنا هي جنازتي بس للأسف الظاهر اني الراح احضر كل الجنازات

رباب:: لا اعتراض على حكم الله ، كل شخص يموت بيومه

ضي:: خاله تدرين اني من شنو اخاف؟

رباب:: الموت؟

ضي:: لا ، المستقبل ، المستقبل يتخطى كل مخاوفي وياخذ المركز الأول لأن المستقبل اكثر شي يخوف بهل دنيا محد يگدر يعرف مصيره ولا يعرف باچر شنو راح يصير وشنو منتظره واني اليوم الواحد اليمر عليه ادعي ما يصير شي لحد يعبر واحمد ربي وابلش بدعائي لثاني يوم الله يستر بي وما يصير أي شي
رباب:: مادري شنو ارد عليچ ضي بس كلامچ صحيح المستقبل يخوف ما الومچ ..

سحبت روحي من حضن خالتي ومسحت دموعي وگلت ..

ضي:: عذريني خاله ضوجتچ

رباب:: لا يا گلبي شنو ضوجتيني ما اقبل بهل حچي وتذكري كلامي دائماً اني امچ الثانيه واني الاخذت مكان احلام من بعدها ولا تحسين بيوم من الأيام انتي يتيمه لا اني امچ

ابتسمت الها والحزن مزرفه لگلبي
گمت من مكاني ورحت اخذت ملك وشلتها بين ايدي ..

ضي:: خاله عن أذنچ رايحه لغرفتي

رباب:: اخذي راحتچ حبيبتي ..

طلعت من غرفه خالتي ورحت صعدت لغرفتي ووضاح ما چان موجود طالع
خليت ملك بالكاروك مالتها وگعدت ارتاح وصفنت بمستقبلي
وشنو ممكن يصير بعد احداث بحياتي
مرات افكر شلون گدرت اتخطى كل هل مشاكل الصارت الي
المشاكل المريت بيها لا تعد ولا تحصى ومو أي انسان يگدر يتحملها
يمكن لو غيري چان انهى حياته من زمان
بس اكتشفت اني انسانه صبوره بالرغم تدمرت نفسيتي وتعبت حيل وتغيرت عن قبل ١٨٠ درجه
مشت ايام وراحت ايام
لحد ما عبر على ولادتي شهرين
بهل شهرين الحمد لله داليا گدرت تختار قرارها الأكيد بعد ما شلتنا شل بتناقضها ساعه تريد دريد وساعه ما تريده لحد ما ثبتت على الموافقه وألف الحمد لله نخطبوا ومقررين وره تخرجهم بمده يتزوجون
واما عن بيت اهلي الاخبار توصلني من ليان
والعرفته ايهاب خلص اجرائات الطلاگ وطلگها لأيلاف وخلص راحت
.. الله ياخذچ يا سلوى ، گدرتي بكل سهوله تخربين حياتهم
اني ما منقهره عليهم لا طبهم مرض ثنينهم بس القاهرني ايلاف حامل وضحيه طلاقهم هو الطفل الموجوده ببطن ايلاف
شنو ذنبه يفتح عينه على هل دنيا يلگه ابو وامه كل واحد بطريق
حسبي الله ونعم الوكيل

........ بدلت لملك بعد ما سبحتها بمساعدة خالتي طبعاً لليوم هذا مداعرف اسبح بنتي وحدي بدون مساعدة خالتي وخو من تبچي وما اعرف شنو تريد اروح لخالتي ركض اگللها فدوه ساعديني وهي تلگالي حل ومادري شلون صرت ام على فهاوتي بس ميخالف يجي يوم واتعود على الأمومه

انتبهت لوضاح رايد يطلع ودايرش بالعطر عفت ملك على الچربايه ورحت وگفت قريب من يمه وريحته شحلاتها
انتبهت لفتحه قميصه أول دگمتين من القميص ما مدگمهم مديت ايدي لقميصه وسندت ايدي الثانيه على گلبه واحس بدگات گلبه
ردت ادگمهم ولزم بأيدي ..
وضاح:: شرايده

ضي:: سلامتك بس اعتقد گايله الك لا تفتح القميص

وضاح:: وانتي شعليچ

ضي:: شعليه؟ ، زوجتك اني

وضاح:: هاا زوجتي گلتيي ..

ضي:: اي وام بنتك

وضاح:: وعود شنو هسه داتغارين؟

ضي:: ممممم لا ما اعتقد

صار يباوع لعيوني بعدم الاقتناع
بعدين عافني وراح لملك
شالها وصار يبوس بيها قبل لا يطلع
وخطيه مبدل وكاشخ ورايد يطلع وچان ملك تستفرغ عليه ..

وضاح:: اشتعل ابوچ ، ولچ هاي فوگاها

واني طگيتها بضحكه شعلوها وخربت ضحك عليه ..

وضاح:: بنت الذيييين شبيچ تضحكيييين وبعديين شهل ضحكه بنت الشارع تستحييي هيچ تضحك
ضي:: بكيييفييي اضحك بالطريقه التعجبني وفديييت بنيتيي الحلووه التنتقم لأمها ارووحلچ فدوه ماماا

وضاح:: دتعالي اخذيها
رحت لوضاح واني بعدني اضحك واخذت ملك من ايده وهو راح يغير ملابسه
اخذت التلفون وصرت اتصفح بي وملك بحضني لحد ما وصل الي اتصال من ليان
رديت عليها واجاني صوتها تلهث ومبين عليها خايفه ..

📞.. ضض ض ضييي سس س سسااعدينيي

📞.. شبيچ ليان شكو؟ ، شبي صوتچ

📞.. ضيي لحگيليي مصيييبه چبييييره

📞.. ولچ شصاااايييير ردييي عليييه

📞.. كتلته .......

#يــــتبـع ...

ضــ|الجزء الثاني|ــي
البـارت .. ٢٢



📞.. ولچ شصاااايييير ردييي عليييه

📞.. كتلته ، رهااام كتلته

📞.. لاا تخبليينيييي شبيهاا رهاام وشقصدچ بكتلته

📞.. تعالي للمستشفى نفسها المستشفى هاي المسافتها مو كلش بعيده عن بيتنا انتي تندلين عفيه لا تتأخرين

وانفجرت بچي وصارت تحچي وكلشي ما مفتهمه من عدها بسبب بچيها ..

📞.. لياان هسه جايتچ اني راح اسد الخط بس اجي فهمينييي السالفه ..

وسديت الأتصال بسرعه
وتوترت حيل
رحت اخذت صايه من الكنتور وشال ولبستها للصايه
رجع وضاح واستغرب من خبصتي هاي ..
وضاح:: شداتسوين؟

ضي:: وضااح بسرعه بدووون اسئله وصلنيي للمستشفى

وضاح:: مستشفى؟ ، يا مستشفى وليش؟

ضي:: لياان هناك وكلشيي ما فهمت من عدهاا واني اندلها للمستشفى ودينييي عفيه

وضاح:: اييي ماشيي خفي ايدچ على السريع

خليت شالي على راسي وسترت بي شعري ووضاح اخذ السويچ مالته ونزلنا جوه ووديت ملك يم خالتي وگلت الها عن السالفه وخطيه نخبصت وياي
وگلت الها راح اردلها خبر بس اعرف شكو

طلعنا بره البيت وصعدنا السياره ووضاح صار يسوق سريع واني طول الطريق متوتره وخايفه
ياربي شصاير شبيها ليان وشنو تقصد بكلامها ورهام شنو مسويه؟

وصلنا بعد ما طلعت روحي من الأنتظار
ونزلنا ودخلنا للمستشفى واتصلت على ليان وسئلتها عن مكانها بالضبط وين وردت عليه ونفس نبرة صوتها الترجف
رحنالها ولگينها گاعده بالممر بالگاع ولامه روحها وترجف وملابسها وايدها ملطخه دم
تسارعت دگات گلبي ورحت اركض الها ووگعت يمها جريت ايدها وخليتها بين ايدي وتلطخت ايدي بالدم بسبب ايدها ..
ضي:: شنووو هل دم لياااان

باوعتلي وصارت ترجف اكثر من قبل وانفجرت بچي ورايدتها تنطق وتحچيلي شكو ولا حچت ..

ضي:: ليااان فدووه حاچينييي بااوعيلييي واحچييي شكووو شصاااير

ليان:: الشرطه بالبيت

ضي:: شرطه؟

ليان:: اا ا ايي

ضي:: شنو شرطه شداتحچييين شيسووون بالبيييت

ليان:: رهاام ، رر ر رهاام كتلت ، كك ك كتلت ..

ضي:: احچييي

ليان:: كتلت ايهاب وو وو وفرغت الطلق كله بجسمه

ضي:: شنو؟!!

اجه وضاح گومني من الگاع واحس روحي على أي لحظه اوگع
گوه واگفه على رجلي ..
وضاح:: شنو داتحچين؟

ليان:: داااگووول كتلته رهااام كتلت ايهاااب

وصارت تكرر بكلامها ومنهاره والدموع تنزل على خدها مثل الشلال
ملتهيه ويه ليان وطلعوا من الطوارئ سديه واكو شخص عليها ومغطي بغطه ابيض وهل غطه صاير احمر من كثر الدم
اباوع لليان صارت تباوع للشخص الموجود على هل سديه وترجف رجف مو طبيعي وچنها راح تموت ..

ليان:: مم م م ماات ..

ردت اروح اشوفه ومنعوني ودفعت احد الممرضات وسحبت الغطه عن وجهه وانصدم بأيهاب والدم مغرگه
جمدت بمكاني بخوف ومن المنظر الشفته ما حسيت على روحي من وگعت
فجأه ظلمت الدنيا بعيني وما شفت شي
يارب يطلع حلم ، ربي ساعدني كون يطلع حلم وافز من عنده

للأسف ، ما طلع حلم
اي هذا واقع
حسيت ، كأنما گلبي چان حاس المستقبل ضاملي مصيبه جديده بس ما اتصورت المصيبه بهل كبر
متعوده على المصايب البحياتي واذا تأخرت عليه مصيبه معناها اكو مصيبه بعده فتره طويله راح تكسرني وتهدمني وتدمرها لنفسيتي
اني وليان ودق
اتذكر الأيام الچنه نگعد بيها ونگول لو مات ايهاب نسوي حفله
والتگول اهلهل والتگول اني ارگص
بس كل هذا ما صار
چنه نظن مغادرة روح ايهاب من الدنيا هاي اكبر فرحه راح نفرحها
وصار العكس
چانت اكثر وحده بيناتنا منتظره موت ايهاب هي ليان وبموته اكثر وحده تضررت ونفسيتها تعبت حيل
ما شفت ليان الروحها حلوه وايجابيه رغم الحزن
متعوده على ليان تحافظ على طاقتها حته لو چانت بعز انكسارها تكتم الانكسار والحزن بداخل گلبها وتبين النا ليان القويه
بس بفاتحه ايهاب ظهر انكسارها الچانت ضامته علينا سنين

وفاة ايهاب
چانت صدمه بالنسبه للكل
والطريقه المات بيها الصدمتنا اكثر

خل نرجع شوي لليوم المات بي ايهاب
وشنو صار بالضبط؟

يوم عادي
مثل أي يوم
راجعه ليان من بيت عيالها بعد ما ودت بنتها يمهم حته يشوفوها
ومن رجعت لگت الدنيا مگلوبه والناس ملتمه على البيت
شنو صار وليش؟
بالمختصر لگت الدم واصل للركاب وجثه ايهاب واگعه بالممر وجسمه متزرف تزرف من كثر الطلقات الاخترقت جسمه
منين اجت هل طلقات وشلون؟
لگت رهام گاعده على الدرج والدم على رجلها وشايله السلاح وترجف
وهنا اتضح للكل المجرمه الارتكبت هل جريمه هي رهام
بس ليش؟
هذا چان سؤال الكل وبعد الاستجواب والتحقيق ظهرت النا الحقيقه
وياريت ما سمعناها واتمنى من كل گلبي تكون احد چذبات رهام المعروفه
شلون تگول حاول يعتدي عليها؟
ايهاب يعتدي على خالته!
شنو الصار بذاك اليوم بالضبط حته يخلي ايهاب يتصرف بهل تصرف

وشلون صار سلاح ايهاب بين ايديها
الله اليعلم ...
يوم عادي
مثل أي يوم
راجعه ليان من بيت عيالها بعد ما ودت بنتها يمهم حته يشوفوها
ومن رجعت لگت الدنيا مگلوبه والناس ملتمه على البيت
شنو صار وليش؟
بالمختصر لگت الدم واصل للركاب وجثه ايهاب واگعه بالممر وجسمه متزرف تزرف من كثر الطلقات الاخترقت جسمه
منين اجت هل طلقات وشلون؟
لگت رهام گاعده على الدرج والدم على رجلها وشايله السلاح وترجف
وهنا اتضح للكل المجرمه الارتكبت هل جريمه هي رهام
بس ليش؟
هذا چان سؤال الكل وبعد الاستجواب والتحقيق ظهرت النا الحقيقه
وياريت ما سمعناها واتمنى من كل گلبي تكون احد چذبات رهام المعروفه
شلون تگول حاول يعتدي عليها؟
ايهاب يعتدي على خالته!
شنو الصار بذاك اليوم بالضبط حته يخلي ايهاب يتصرف بهل تصرف
وشلون صار سلاح ايهاب بين ايديها
الله اليعلم ...

بعد القاء القبض على رهام وتمت محاكمتها
انحكم عليها بالسجن مدى الحياة
والغريب بيوم الحكم رهام تصرفت بشكل كلش عادي وبارد من سمعت الحكم الاطلق عليها
مؤبد ، شلون تكون ردة فعلها بهل برود؟!
بدت رهام تقضي ايامها بالسجن
وقضت يوم يومين شهر شهرين سنه سنتين
ولليوم هذا وهي مسجونه

اني مادري شلون عبرت هل سنتين بهل سرعه
وشلون مرت كل هل احداث بالسرعه هاي
شلون مات ايهاب؟
ويمته تزوجت مرام؟
ويمته تخرجوا داليا ودريد وتزوجوا؟
ويمته كبرت بنتي وكبرت وياها؟
شنو من وكت هذا؟ ، كأنما دخل بسباق .....

صافنه على التقويم
ومركزه على السنه الچانت مكتوبه بخط كلش چبير وواضح
٢٠١٩
ركزت على اليوم وتذكرت هل يوم بالتحديد شنو صار
وبسبب هل يوم بدت حياتنا اني وخواتي تدمر
يوم ٢٠ بالشهر وهو اليوم الرجعنا بي للعراق بعد ما چنه بتركيا
ومن يوم ما رجعنا للعراق بدت تنزل علينا المصايب مثل المطر وما گدرنا نرتاح
الناس ترجع لبلدها بسبب صعوبه الغربه ومن ترجع المعروف يرتاحون بين اهلهم
بس احنا عكس العالم چانت الغربه بالنسبه النا نعيم واحنا عفنا النعيم ورجعنا لبلدنا وأذانا حيل
ومنتظره بعد الأذيه من عنده
ومتأكده معاناتي ما راح تخلص لهنا
حسيت بأيد تجر بملابسي
نزلت عيني للگاع وشفت ملك متمسكه بملابسي ورافعتلي راسها وتصيحلي ..

ملك:: ماماا

عفت صفنتي وعفت كلشي وركزت على بنتي
دنگت الها حته أوصل الها ورغم هذا بعدها شنعماتها ..

ضي:: يا روح امچ

وچانت ضامه شي وره ظهرها
وطلعته بكل هدوء والدمعه بطرف عينها
واباوع للعبه مالها التحبها مشگوگه من جهه عينها ..

ضي:: يااا هاايي ليش شگيتيهاا

ملك:: تويها

ضي:: اسويها الچ ولا يهمچ

اخذت اللعبه من ايدها وچانت لعبه قطنيه من السهل ارجعها مثل ما چانت
اخذت علبه الخياطه وگعدت واجت تربعت يمي بالگاع وصافنه عليه شلون داخيط بيها ..
ملك:: مو هچي

ضي:: ها لعد؟

ملك:: ختيه

ضي:: ههههه يا هي الخطيه

ملك:: ثوثو

ضي:: اسمها ثوثو؟

ملك:: لاا ثوثوو

ضي:: سوسو؟

هزت براسها بمعنى اي
ضحكت وگلت ..

ضي:: ليش خطيه ثوثو اقصد سوسو؟

ملك:: ختيه لأن عدها أوا بعينها لا تذيها

ضي:: اي ميخالف هههههه

ملك:: ماما
ضي:: عيونها

ملك:: امته يجي بابا

ضي:: اي انتي تطربين على ابوچ اكثر مني لو طلعت اني ولا تسئلين عني

ملك:: اني اهبچ

ضي:: واني هم ويلا هاچ هاي سوسو خيطتها الچ بعد شتردين

اخذت اللعبه من عندي بكل حماس ومبتسمه وفرحانه بيها لأن رجعت
خليتها بالغرفه تلعب ورحت للمطبخ اشوف الغده اذا صار لو بعده
لگيته صار وطفيت العين ورحت للصاله رتبتها وتعبانه حيل من الشغل الاشتغلته اليوم وكل شوي اروح اعزل وره ملك

من عزلنا وحدنا صار شغل البيت كله عليه وداتعب هواي عكس قبل من چنا ببيت خالتي چنه نتقاسم الشغل اني والبنات

تمنيت ابقه يم خالتي بس وضاح رفض وگال مادام كملت القطعه خلص لازم نطلع وصار عدنا بنيه وما گدرت اعانده اذا هو اصلاً عنودي اكثر من عندي
اجتي ملك يمي وگعدت بحضني وگعدت تحچي وياي وتسولف وياي سوالفها البريئه
لحد ما اجه وضاح من الشغل وأول ما اجه بسرعه عافتني بنت ابوها وراحت ركض لأبوها وتحضن بي وهو يبوس بيها

گمت من مكاني ورحت وگفت قريب من يم وضاح وگلت ..

ضي:: اليوم توديني مو

وضاح:: ضي تره صرعتيني من البارحه لليوم بس تلحين الناس بالأول تگول الله يساعدك

ضي:: ايي عود الله يساعدك توديني مو؟

وضاح:: استغفر الله

ضي:: والله اذا ما وديتني راح ا..

وضاح:: كملي ليش سكتي شنو تسوين؟

ضي:: مممم مادري بس وديني

وضاح:: يصير خير

ضي:: يلا ملوكه عوفي بابا خل يروح يرتاح

ملك:: ما
ضي:: والله ما راح يطير هياته موجود بس خلي يرتاح

باسها بخدها وعاف ملك وگلي ..

وضاح:: حضريلي ملابسي رايد اسبح

ضي:: اي ماشي

عفت وضاح ورحت للغرفه دخلت وتوجهت للكنتور فتحته وطلعت ملابس وضاح
سمعت صوت الباب انفتح درت وجهي وشفت وضاح
رحت تمشيت بتجاهه وگلت ..

ضي:: وضاح اني ما كملت كلامي وياك وماگدرت اكمل لأن ملك چانت موجوده وما لازم افتح هيچ موضوع گدامها

باوعلي ببرود وصار ينزع بساعته وگال ..

وضاح:: يا موضوع؟

ضي:: رايده من توديني لخالتي ابقي يمها ملك وتوديني للسجن

وضاح:: سجن؟!!!

ضي:: اي سجن ، ليش منصدم؟ ، رايده اشوف رهام

وضاح:: تخبلتيي انتييي
ضي:: لا ما تخبلت ، من يوم ما نحكم عليها واني ما شفتها

وضاح:: الظاهر شتاقيتي للكتلت اخوچ بس حقچ مجرمه وشتاقيتي لمجرمه مثلچ

ضي:: وضاح لا تستفزني بكلامك هذا واني داگلك رايده اروح

وضاح:: وشتسوين؟

ضي:: رايده احاچيها ، عندي كومه اسئله واشياء غامضه لليوم هذا ما فاهمتها واني مادري شنو مصيرها باچر عگبه وشنو راح يصير بيها

وضاح:: راح اوديچ بس اسمعي مشاكل ما اريد وراح اجي وياچ ما اخليچ وحدچ

ضي:: مو مهم اهم شي اروح

وضاح:: بس اعتقد بزيارتچ الها مو من صالحچ

ضي:: لا من صالحي ..

گلت كلامي وانطيته ظهري ومشيت ورحت جهزت اله الحمام ومن كمل اجتمعنا على سفرة الغده
وقربت تصير دنيا العصر يلا طلعنا من البيت ومتوجهين لبيت خالتي
ومن وصلنا ورحنالها خالتي رحبت بينا بكل رحابه صدر وفرحانه بجيتنا بالرغم احنا بكل جمعه نزورها بس متعودين على ترحيبها الحار النا بكل مره نجي بيها

ضلينا يمها فد نص ساعه وبعدين گلت لخالتي عندي شغله ووضاح راح يوصلني ورايدتچ تبقين يمچ ملك وتديرين بالچ عليها وخالتي ما مانعت بهل شي

ومن بعدها طلعنا ورحنا متوجهين للسجن
السجن الما تصورت بيوم من الأيام رجلي توديني اله وازور منو؟
ازور رهام المجرمه ......

مادري ليش چنت خايفه طول الطريق كأنما رايحه للموت ومتوتره حيل
بعد صراعات بيني وبين نفسي بهل سنتين
يلا قررت اروح لهناك واواجها لرهام وجه لوجه

وصلنا واحس بصعوبه بحركتي متردده اشوفها وبنفس الوقت رايده اشوفها
ما اعرف شلون اوصف شعوري

افتر بتوتر ومنتظره يجيبوها لهنا واشوفها ..

وضاح:: مو چنچ افتريتي هواي؟ ، كافي اثبتي تره دوختيني
ضي:: متوتره

وضاح:: على شنو؟ ، مو انتي الضليتي تلحين اله اجيبچ وتشوفيها ، اني مادري شلون ينطيچ گلبچ تشوفين وحده كتلت اخوچ

جريت حسره وما رديت عليه لحد ما دخلت رهام وچانت مقيده ايدها
باوعت لوجها تعبان وشاحب كلش وضعفانه حييييل
هي قبل چان جسمها حلو ومرتب وبي سمن شوي بس هسه لا كلش ضعيفه جسمها صاير جلد على عظم
وعظام ايدها بارزه من كثر الضعف
فتحوا القيد عن ايدها وضلت تباوعلي ببرود واني التوقعته تنصدم من وجودي
خلوها يمنا ورهام ضلت واگفه بمكانها ومستمره تباوعلي بنفس النظرات
رحت تقربت بتجاها وبدون أي مقدمات گلت ..

ضي:: ليش؟

ما ردت عليه وكررت نفس كلامي وگلت ..

ضي:: ليش ، گليلي ليييش هيچ سويتي

واخيراً ردت عليه ونطقت
وحچت وچانت نبرة صوتها مختلفه تماماً
مو نفس النبرة المتعوده عليها كلها ثقه
لا هل مره احس بيها انكسار وبنفس الوقت حقد ..
رهام:: بعد ما عبرن سنتين جايه تعاتبين؟

ضي:: لو عسى عبر قرن ..

رهام:: مجرد دافعت عن شرفي ما سويت فد شي غلط

ضي:: قتلتي روح وما سويتي شي غلط؟

رهام:: اي ، اني اصلاً نظلمت ، ظلموني ما لازم يحكمون عليه مؤبد اني مجرد دافعت عن نفسي

ضي:: مممم گلتي مظلومه

رهام:: اي مظلومه

ضي:: تدرين انتي اصلاً ما قتلتي روح وحده قتلتي روحين ويمكن ثلاثه ويمكن اكثر

رهام:: وشنو شفتيني؟ ، سفاحه؟

ضي:: اني ادري بيچ انتي القتلتي ابوي وخليتي السم بالأكل حته تموتي

رهام:: شذكرچ بهل سالفه؟

ضي:: ليش اني نسيتها حته اتذكرها؟

رهام:: ما عندي عداوه ويه محمد حته انهي حياته بس چان عثره بطريقي
ضي:: معناها انتي الكتلتي

رهام:: ليش اني؟ ، ليش مو انتي

ضي:: لليوم هذا ومصره على الچذب؟

رهام:: يعني هسه انتي جايه حته بس تسمعيني هل كلام ، صدگ بطرانه لو كاتلتچ بدال اخوچ مو احسن لأن انتي اغث من عنده

ضي:: ما متندمه؟

رهام:: اتندم على شنو؟ ، اني اخذت حقي وحق سلوى

ضي:: سلوى؟ ، شدخلها لسلوى بوسط هل سالفه

رهام:: ليش عود علساس ما تعرفين اخوچ ضحك عليها؟ ، اصلاً اني اعرف بيچ انتي دزيتيها عليه

ضي:: اا انيي ، اني شعليه

رهام:: خل اگلچ فد شغله تره سلوى ما ميته على اخوچ بس انجبرت تنزل من مستواها شوي وتحاول تتزوجه لأن لو بقت بدون زواج راح تموت وهذا الصار

ضي:: شنو؟
رهام:: لا تستغربين ، تره سلوى بالفتره الاخيره چانت مطارده بسبب اهلها گدروا يعرفون مكانها وصارت تتنقل من مكان لمكان وتحاول تتزوج حته بلكت يتركوها لو عرفوا بيها متزوجه لأن هم عرفوا وين تشتغل

ضي:: اهلها؟ ، هي منيلها اهل اصلاً

رهام:: ههه دشوف هاي ، عندها ام وعندها اب بس هي ما گدرت تعيش وياهم وهربت من عدهم وللأسف اجه اليوم الرجعوها بي الهم بس ما دخلت لبيتهم اله وهي بجنازه

ضي:: رهااام شدااتخربطيين

رهام:: عمها وابوها هم چانوا السبب

ضي:: شنوو سوو الهااا احچيي

رهام:: نحروها ..

ضي:: نحروها؟!!

رهام:: اي نحروها وانتي بس ايهاب رفع عليچ السلاح وضربچ بطلقتين گلبتي الدنيا لو چنتي بمكان سلوى شراح تسوين هاي اذا بقيتي عايشه اصلاً وانتي مذبوحه

ضي:: شش ش شنو يعني سلوى مم م م ماتت
رهام:: انتي غبيه لو شنو؟ ، اگول الها ذبحوها تگلي شنو يعني ماتت گليلي منو اليگدر يعيش بدون راس؟ ، بس تدرين لا تفرحين گدروا يلقون القبض عليهم وحالياً هم بالسجن مثل ما اني هنا

ضي:: افرح! ، على شنوو افرح گليلييي تردينيي افرح بمووتهاا

رهام:: هذا التصورته بعد ما فبركت صور ودق ما اعتقد راح تحزنين على موتها

جسمي قشعر وجسمي صار يرجف
درت وجهي لوضاح وما اعرف شنو ارد
انفتح موضوع ودق گدامه
معقوله لهنا وراح اگدر اطلع بريئه گدامه

بعد ما چان متچي على الحايط وما منطينا أي اهميه ولا تدخل بيناتنا وخلانا نحچي على راحتنا
بس من نذكر اسم ودق عدل وگفته وگال ..

وضاح:: صور؟ ، يا صور تقصدين وشبيهاا ودق؟!!

صار يمشي بتجاه رهام وهي تباوعله ببرود ..

وضاح:: ودق شبيهااا

رهام:: معقوله لحد هسه ما شايف صور حبيبتك الفبركوها
وضاح:: ياا صووور

رهام:: هاا شكله رجلچ نايم ورجله بالشمس ، هل صور نفسهن الخلن ودق تنتحر

وضاح:: رهااام احچييي بوووضوووح

رهام:: داحچي بوضوح شلون رايدني احچي ، ودق تعرفت على بنيه وهل بنيه تكره ضي وعاد ما الومها صراحه مرتك غثيثه ما تنجرع وكم مره سببت الها مشاكل هل ضي وخلت البنيه تحقد عاد شسوت تعرفت على ودق وودق چانت تدزلها صورها اخذتهن وفبركت هل صور وابتزتها بيهم واني ما الومها السوته صحيح لأن لو ما مأذيها چان ما سوت هيچ وبعدين هي نيتها طيبه ما چانت تقصد تأذيها مجرد تشاقه ويه ودق وشوي تأذي ضي بس هاي مخبله راحت وانتحرت عاد البنيه مالها دخل ودق عدها الغباء موهبه ما شاء الله

وضاح:: لا تطلعينييي من طوورييي شنو هل كلاام

باوعتله بكل برود وما ردت عليه
وخلص وقت الزياره واجو ياخذوها ورجعوا يقيدون بأيدها ..

وضاح:: رهاام احچييي

رهام:: لا حرامات ، خلص وقت الزياره
وحچتها بأستفزاز
واني گوه مسيطره على دموعي ورغم هذا الدموع صارت بطرف عيني
بعد ما خلص وقت الزياره طلعنا ورحنا صعدنا السياره
ووضاح صار يسوق سريع وبأثناء سياقته طلع اله جگاره وصار يدخن ويسوق واني صافنه على الطريق من الجامه ودموعي تلقائياً نزلت
شهگت شهگه واحس روحي مخنوگه ..

وضاح:: كافي بچي

حچيت بنبرة صوت تعبانه
وگوه نطقت وگلت اله ..

ضي:: لا تحاچيني ..

وضاح:: ما احاچيچ؟ ، عندي كلام هواي لازم احچي

ضي:: كلام هواي؟ ، ليش اكو اتهام جديد رايد تطلعه عليه بعد ما بطل اتهام ودق؟ ، وضاح رجائاً اتركني بحالي وياريت تخليني ابقه يم خالتي اليوم لأن كلش تعبانه

وضاح:: يصير خير ..

وسكتنا ومن بعدها ما حچينا لحد ما وصلنا
نزلت بسرعه من السياره وقبل لا اسد الباب حاچاني وضاح ..
وضاح:: اني رايح ، وباچر يلا اجي اخذكم منا

ضي:: وين رايح؟

وضاح:: ما يخصچ ويلا دخلي جوه

سديت باب السياره وصرت امسح بدموعي حته محد يحس ودخلت جوه للبيت
رحت لخالتي چانت گاعده بالصاله ويمها داليا وملك گاعده بحضن داليا وتسولف وياها
گعدت قريب من يم خالتي وسئلتني عن وضاح وجاوبتها وگلت الها راح ..

رباب:: ليش ما بقه

ضي:: مادري خاله

رباب:: ضي شبيچ يمه شو چنچ تعبانه

ضي:: اي خاله شوي تعبانه دايخه ..

رباب:: ها يمه معقوله الطفل الثاني بالطريق

ضي:: لا خاله يا طفل ، بعدها ملك صغيره

داليا:: مبين عليچ تعبانه روحي ارتاحي بغرفه شهد
هزيت براسي بمعنى اي وعفت خالتي وداليا ورحت صعدت فوگ لغرفه شهد وما چانت موجوده بالغرفه نزعت شالي ورحت تمددت على چربايتها واحس اكو غصه بداخلي
دموعي رجعت تنزل واحس بگلبي دايأذيني
خليت ايدي على گلبي وصرت ابچي واشهگ

ياريت لو چنت اعرف بذاك اليوم شنو چانت تقصد بكلامها بس للأسف بعد ما ماتت يلا گدرت افهم كلامها وشنو چانت تقصد بأني بريئه

غمضت عيني وصار ينعاد المشهد گدامي شلون چانت الدموع مغرگه عينها وتحاول تشتكي الي بس ما تگدر توضحلي .........

ودق:: اني بريئه ضي

ضي:: بريئه من شنو؟!

ودق:: ما سويت شي والله اني بريئه

ضي:: اييي ادري ما سويتيي شي بس بريئه من شنوو؟! ، ودق احچي لا تخبليني

............. واتذكر كلامها شلون چانت تگلي اني راح اعوفچ واروح بس بطريقه غير مباشره

..........رايده انام لوقت طويل من تعبي ومن اشوفچ راح احچيلچ كلشي ويمكن انتي الراح تعرفين من نفسچ لو اخذتني النومه
.. ليش ما وضحتيلي ودق؟ ، وحچيتيلي الصاير؟ ، ليش استسلمتي لسلوى وصرتي ضعيفه گدامها لحد ما گدرت تخليچ تفكرين بالأنتحار ، ليش؟!

ضليت اتذكر كلشي صار بذاك اليوم ودموعي ابد ما وگفت
وما گدرت اهرب من حزني غير بس بالنوم
غفت عيني واني مقهوره وگلبي محترگ

وما گعدت غير على صوت حركه بالغرفه
فتحت عيني بكل هدوء وشفت شهد واگفه يم المرايه وداتعدل بالغراض الفوگ الميز ..

ضي:: الساعه بيش؟

دارت وجها الي وگالت ..

شهد:: صح النوم الساعه بـ٧

ضي:: الصبح؟

شهد:: يا صبح انتي ، ليل

ضي:: شگد اكره من تاخذني النومه ، راح اضل گاعده طول الليل ليش ما گعدتيني

شهد:: وشدراني اني واصلاً قبل لا اصعد امي گالت الي ضي نايمه بغرفتچ لا تگعديها
سكتت وما رديت عليها
گمت من مكاني وعدلت شعري وطلعت من غرفتها
نزلت جوه ورحت غسلت وجهي وتوجهت للصاله
دخلت وسلمت وچانوا گاعدين خالتي وداليا ودريد
رحت گعدت يم خالتي وسئلتها عن ملك گالت الي نايمه بغرفتها ..

داليا:: عفيييه دريد شنوو رايد تتعبني

دريد:: بلا تعاجز ولچ ويلا گومي

رباب:: شبيكم تتناگرون

دريد:: چنتچ العجوزيه صارلي ساعه اتوسل بيها تروح تجيبلي تلفوني من فوگ وما تقبل

رباب:: روح انت

دريد:: ما بيه حيل

رباب:: عشتوو وشبيك حته ما بيك حيل

داليا:: شفتييي يووم شفتييي دريد شگد عجووزي تره موتني

دريد:: يل حب عندي خوش حل مرضي

داليا:: اي هسه صارت يل حب بلا سمعني حلك الفاشل
دريد:: لا تخليني افشخ راسچ بالريمونت

داليا:: دگلي شنو الحل

دريد:: حجره ورقه مقص والخسران يروح يجيب التلفون

داليا:: ياا خووش فكره يلا

ومدت ايدها وگالت حجره ورقه مقص
ضربت على رجلها خالتي وگالت ..

رباب:: مزعطه ياربيييي ، تزوجوا وبعدهم على سوالف الزعاطيط

دريد:: خسرتي يلا روحي

داليا:: لاااا ماا ارووح انت غشيييت

دريد:: شنوو غشيييت اختاريت ورقه وانتي حجره

داليا:: اييي بس تأخرت شوي ويلا اختاريت انت غشااش

دريد:: اني الغشاش؟

شال المخده ورگعها براسها وهي رجعت الضربه عليه وصاروا يتناگرون
ضحكت على سوالفهم
والله هذوله عرفتهم ما راح يعقلون حته لو تزوجوا ..
رباب:: ولكم كاافيي زعااطيييط انتوو وداليا روحي للمطبخ كملي الماعين اني مو وصيتچ تغسليهم شو غلستي عليهم

داليا:: ها ، ماعين

رباب:: اي ماعين

دريد:: وبطريقك يا حلو جيب التلفون

داليا:: والله ما اجيبه ولا اغسل الماعين

وگامت من مكانها وخالتي هم گامت من مكانها وراحت للباب وهي ضلت واگفه وتگول ..

داليا:: يمه شداتسوين؟ ، لا تگليلي داتجهزين سلاحچ

رباب:: جبت السلاح

داليا:: عززززه دريد الحگليي

وجابت النعال خالتي وصارت تركض وراها ..

دريد:: عليچ الله يوم كتليها كتله زينه

داليا:: سااعدنييي

دريد:: ولا اساعدچ نكتلي يلا
راحت لدريد سحبته وگومته من مكانه وختلت وراه وخالتي رادت تقنصه هو ومرته وچان يطفرون ثنينهم ..

دريد:: ست الحبااايب سااالميييين مفرووض تقنصييين چنتچ مو انييي

رباب:: لا انتي ثنينكم يرادلكم تقنيص

شمرته وچان يجي بالحايط
ضحكت داليا ودريد صاح ..

دريد:: الله اكبررررر أول مره التقنييييص ما يجيي عدل ، شاااهد قبل الحذف

داليا:: ماما شنو شو تقنيصچ صاير عاوي

رباب:: طلعوا بره الصاله يلا ولوا لغرفتكم

دريد:: عيني رباب هاي ليش تطردينا

رباب:: ادبسز تطلع انت ومرتك لا اجيكم والله ، يلاا طلعوا هششش هششش

دريد:: ايي ادرييي يمه شنو داتطردين بشر لو ذبان

داليا:: امشي حبيبي امشي خل نزعل

دريد:: اي هو هذا الحل ، يلا احنا مزاعلينكم اخذ مرتي واروح ، يلا مرتي امشينا
ولزم بأيدها وهي سوت الحركه مال عود اني زعلت
وطلعوا وسمعنا صوت ضحكهم
لا خوش زعل هذا

رجعت خالتي گعدت يمي وضحكت وضحكت وياها على ضحكتها ..

ضي:: هاا خاله شو بسرعه نگلب مودچ قبل شوي معصبه

رباب:: لا وين معصبه داشاقه وياهم

ضي:: ههههه لا خوش شقه خاله اله شوي چان لگيت جثث بالگاع

رباب:: عاد انتي شفتي حماچ ومرته شلونهم تزوجوا وبعدهم معذبيني ، اني اعرف اليتزوج يعقل اما هذوله لا عكس العالم ويمكن اذا اجاهم طفل يتخبلون بالزايد يگعدون يلعبولي حجره ورقه مقص على الطفل ياهو يسهر وياه

ضحكت وگعدنا اني وخالتي گضيناها سوالف
وغيرت من نفسيتي شوي حسنتها بهل گعده وبعدت الحزن عني

بقيت يم بيت خالتي بهل يوم واليوم الثاني مفروض وضاح يجي بس گال راح يجي ياخذنا بليل لأن مشغول وبشنو مشغول مادري الله يعلم

چان وقت عصريه وقررت اروح للصالون حته اصبغه لشعري لأن رجع كما هو ويرادله صبغ
ومادام الصالون قريب منا گلت خل اخذ وياي داليا ونروح ..
ضي:: ولچ داليااا ما خلصتي

داليا:: كملت شگد تلحين

ضي:: يمعوده انتي على شنو خابصه روحچ هي صايه وشال وهاي هي اله تكشخين وين رايحين

داليا:: انيقه من يومي

ضي:: عوفي الأناقه للطلعات التسوه مو لطلعات سريعه

داليا:: هسه دريد يرزلني شگد تأخرنا عليه

ضي:: دريد يوصلنا؟

داليا:: اي

ضي:: تره الصالون كلش قريب مداعي يوصلنا

داليا:: لا راح اوديچ لصالون دماار مو صالون شغلهم يخبل هذا يصير شوي بعيد عنا وصاير على شارع عام وهذا الشارع بي هوااي محلات ومن ضمنهم الصالون

ضي:: على شنو خو نروح لهذا ونفض السالفه

داليا:: انتي بس تعالي وياي ومعليچ وشوفي شغلهم شلون
ضي:: ايي خوش نشوف واذا ما عجبني اكتلچ

داليا:: ميخالف قابله ويلا امشينا خلصت

ضي:: صلاوات ..

طلعنا من غرفتها ونزلنا جوه ورحنا للصاله ولگينا دريد منتظرنا ..

دريد:: وين صرتن يمعودات

ضي:: غير مرتك ما قبلت تنزل اله تكشخ

دريد:: عاد ما اوصيچ على مرتي ..

ضي:: ليش عيني وين ماخذتها اني حته توصيني عليها

دريد:: هههه ديلا امشينا

طفرت ملك من حضن خالتي واجت ركض عليه وحاضنه لعبتها ..

ملك:: اخديني

ضي:: وين ماما تره هسه اجي ما رايحه بعيد

ملك:: ما اخديني
دريد:: ام لسان وين ياخذنچ

ملك:: اليد الوح

رباب:: اخذيها ضي لأن بس تعوفيها راح تگلب الدنيا بالبچي والصراخ البارحه انتي موجوده بالبيت بس نايمه وگلبت الدنيا اله نگعدچ

ضي:: أمري لله اخذها ، عوفي اللعبه حته نروح

ملك:: ما ، ما اعوف ثوثو

ضي:: ماما تره زهگتيني بهل سوسو مالتچ ٢٤ ساعه لازمتها بيدچ

دريد:: عمو يصير اخطفها؟

ملك:: ما

دريد:: بعد عمچ ما عندچ غير كلمه الما هههههه

داليا:: هسه انتو گضيتوها سوالف شنو ما نروح

ضي:: يلا شمنتظرين ..

طلعنا بره البيت واخذت ملك وياي ما اگدر اعوفها راح تسوي هوسه شكبرها
وصلنا دريد للعنوان مال صالون ووگف قريب من يم الرصيف ونزلنا وگال بس نخلص نتصل عليه حته يرجعنا وراح

توجهنا للصالون ودخلنا جوه وگعدنا ننتظر حته يجي دوري ..

داليا:: ضي

ضي:: ها؟

داليا:: اني راح اطلع اشوف المحل هذا اليم الصالون يبيع مكياج رايده اشتريلي كم شغله

ضي:: اي روحي

داليا:: عادي اخذ هل حلوه وياي حته أمر على محل واشتريلها حلويات على طريقي

ضي:: تعذبچ والله ..

داليا:: لا معليچ خليها عليه وانتي التهي بنفسچ راح يجي دورچ تره وما راح تخليچ على راحتچ خل اخذها واريحچ

ضي:: ماشي بس مو بعدين تجين تشتكين اني گلتها الچ بنتي حركه وتتعب

داليا:: انچبي لا تحچين على ملك ، يلا ملوووكه تعاالي خل نروح نشتري
وما صدگت ملك بس گالت الها امشينا بسرعه راحت وياها
طلعت بره الصالون داليا واني بقيت گاعده بمكاني ومنتظره

ما شاء الله خير من الله جايين عدها واني شلون احب انتظر

ضليت على هل حاله وزهگانه من الملل
وچان اسمع ذاك الصوت الخله گلبي يفز فزه ويرعبني

گمت من مكاني وخليت ايدي على گلبي واحس بوجع بگلبي مو طبيعي اكو شي داينغزني
ما ارتاحيت للصوت ..

- هاي شصاير

- منو التصرخ هيچ؟

- بس لا صايره مشكله بره

والنسوان بالصالون صارن يتناقشن بينهن والبعض راحن للباب الصالون وفتحنه على النص وصارن يباوعن من الباب حته يعرفن شكو

صرت ادفع بيهن وبلگوه گدرت اطلع بره الصالون واشوف هوسه شكبرها صايره بنص الشارع
رغم هذا الشارع ابد ما يخلى عن السيارات بس هسه توقف وماكو سياره داتمشي بعد الهوسه الصارت
الناس ملتمه ومداعرف على شنو ملتمه
بدون ما احس اخذتني رجلي للهوسه ركض
ومادري شلون وصلت

انتبهت للگاع وچان اكو عليها دم يم رجل الناس الواگفه

ضليت اباوع للگاع واشهگ من الركض
والشارع صار بحيرة دم
هل دم من منو؟
وليش الناس ملتمه؟

اسمع صوت شهگات وبچي شخص محروگ گلبه ومبين خسر عزيز ، هل نبره مئلوفه الي بس مداگدر اميزها من خوفي ..

- لاااا ، لااا اترجاچ لاا تسوووين بيه هيچ گوومييي

ادفع بالناس واريد ادخل بينهم واشوف شكو وگلبي راح يوگف من الخوف
دخلت بالنص وبصعوبه واشوف الدم دايزداد والگاع صاير لونها احمر من كثر الدم
صرت اباوع للدم وخايفه اباوع لمصدره
ضلت نظراتي تتناقل بين هل دم المطشر لحد ما اجت عيني على بنيه ناعمه كلش بس مدايبين من شكلها شي چانت كلها دم وراسها ينزف بشكل مو طبيعي
ركزت بملابسها الچان لونها احمر بسبب دمها
ضليت اركز بهل ملابس وما حسيت على روحي من وگعت بالگاع وملابسي تدمرت بسبب الدم ..
ضي:: لل ل ل لا ، لاااااااا

صرخت بأعلى صوتي وارجف بشكل مو طبيعي واحس روحي فقدت عقلي ، شنو هذا الداشوفه؟!! ..

#يــــتبـع ...

ضــ|الجزء الثاني|ــي
البـارت .. ٢٣

•
•
•

ادفع بالناس واريد ادخل بينهم واشوف شكو وگلبي راح يوگف من الخوف
دخلت بالنص وبصعوبه واشوف الدم دايزداد والگاع صاير لونها احمر من كثر الدم
صرت اباوع للدم وخايفه اباوع لمصدره
ضلت نظراتي تتناقل بين هل دم المطشر لحد ما اجت عيني على بنيه ناعمه كلش بس مدايبين من شكلها شي چانت كلها دم وراسها ينزف بشكل مو طبيعي
ركزت بملابسها الچان لونها احمر بسبب دمها
ضليت اركز بهل ملابس وما حسيت على روحي من وگعت بالگاع وملابسي تدمرت بسبب الدم ..

ضي:: لل ل ل لا ، لاااااااا

صرخت بأعلى صوتي وارجف بشكل مو طبيعي واحس روحي فقدت عقلي ، شنو هذا الداشوفه؟!!
معقوله هاي ملك؟! ، بنتي شتسوي بالگاع وليش هيچ كلها دم! ..
ضي:: بب ب بب بنتييي

سحبت روحي الها گوه وصرت امسح الدم من راسها ووجها مختفيه ملامحه من كثر الدم

حسيت بغواش بعيني وفقدت السيطره على نفسي وگبل اوگع على وجهي على جسم بنتي
وما گدرت اشوف من بعدها شي
داشوف كله سواد
وصوت الهوسه لحد هسه بأذني لحد ما شوي شوي اختفت وبعدين راحت وصرت ما اسمع ولا شي

مادري اني وين
ولا اعرف شصار

احس بوجع بگلبي مدايروح
حسيت بشي دايخنگ بيه ودايحاول يقطع نفسي
بلگوه قاومته وفزيت بسرعه وشهگت

وأول ما فزيت وفتحت عيني لگيت روحي بغرفه مال مستشفى واني على الچربايه
واسمع صوت بچي
صارت عيني على الگاع وشفت داليا گاعده بالگاع ومتچيه على الحايط وجسمها يرجف وتبچي بهستريه
حچيت بتعب وگلت ..
ضي:: بب ب ب بنتي وين

گامت من مكانها داليا وملابسها متدمره بدم وتراب
واجت ركض الي والدموع تصب صب والكحل سايل من عينها والعين صايره حمره من كثر البچي ..

ضي:: داگول بنتي وين ، ردييي عليييه ملك وييين

داليا:: ضي اني اسفه

ونطقت هل كم كلمه وانفجرت بچي ..

ضي:: احچيييي ملك ويييين

ردت اگوم من مكاني وصاحت ..

داليا:: مااااتتتتت

جمدت بمكاني وجمدت حركتي واحس جسمي كله تجمد وصرت مثل الصنم مداگدر احركها لروحي
.. شنو يعني ماتت؟ ، تشاقه اكيد؟!

ضي:: تت ت تشاقين موو ، داليا مو وكت الشقه اريد اشوف بنتي

داليا:: مم مم ممم ماعرف شلون گدرت تفلت من ايدي بس والله اني ما ..
ضي:: شنوووو يعنييي مااااتتتتت وييين بنتييي داليااا گليلييي وييين

ما ردت عليه وضلت بس تبچي
بلگوه حركتها لروحي وگمت من مكاني وصرت امشي بصعوبه واستند بالغراض حته ما اوگع ..

انتبهت للعبه ملك چانت قريبه من يم داليا وگعت بالگاع وصرت اسحب بروحي الها واخذتها بين ايدي وصفنت بلعبتها المتلطخه بالدم
صرت اتنفس سريع والدموع صارت تنزل تلقائياً
واستوعبت شنو الصار

.. خسرت بنتي ، خسرت ضناي ، خسرت سعادتي وخسرت دنيتي وروحي وگلبي والنفس اليخليني عايشه
شلون اگدر اعيش بدون نفس؟
لو بدون گلب؟
لو بدون روح؟

معقوله حته ملك ما تريدني وقررت تروح وتعوفني وحدي بهل دنيا
لا ما استوعب ، ملك تحبني ، اي بنتي تحبني شلون تعوفني؟ ، اصلاً ملك ما تگدر تنام اله بحضني نوبه تعوفني وتروح ..

ضي:: مم م م ملك ، بنتي عافتني؟ ، دالياا رديي عليييه ملك عافتني؟!! ، يعني بعد ما اشوفها؟ ، لا واسمع صوتها؟!!
جريت لعبتها لحضني وصرخت صرخه شعلوها ومفجوع گلبي وچانت هل صرخه تعبر عن انكساري بعد رحيل بنتي
وصرت ابچي بأنهيار وهستريه
مادري شصارلي بهل لحظه بس چان عباره عن جنون فقدته لعقلي ومداگدر اسيطر على تصرفاتي
كأنما روحي غادرت جسمي وضليت بلا روح

لحد ما اجتي ممرضه حاولت تهدئني وتنطيني مهدء بس ما گدرت تسيطر عليه وتنطيني الأبره لحد ما اجت وياها ممرضات ولزمني واني ارفس واصرخ لحد ما حسيت بالأبره دخلت بأيدي وعافني واني مستمره اصرخ واحس بحنجرتي داتتأذى بكل صرخه داتموتني بس ما اگدر اوگف ماعندي سيطره على نفسي

وفجأه حسيت بتعب مو طبيعي وعيوني مداگدر اسيطر عليها وداتتقفل على كيفها
اريد افتح عيني مداگدر
غصب عني نغلقت عيني
ورجعت اشوف السواد المرعب
هل سواد كل ما اشوفه لازم تكون وياه مصيبه
وهل مصيبه چانت فقدان بنتي

اصعب شي على الأنسان
يفقد امه وابو وخصوصاً الأم
وفاة الأم كسر للظهر ومن بعدها الدنيا تصير ابيض واسود بعد ما چانت ملونه
ومن بعدهم يجي الصعب هو فقدان الضنى
أم وفقدت ضناها ، معناها فقدت روحها
وللأسف اني جربتهم كلهم
فقدان الأم وفقدان الأب وفقدان الضنى
وفقدت حته اختي واخوي

وهسه راح انتظر الموت واشوفه من الروح الجايه الرايد ياخذها؟

بعد ما صحيت لگيت وضاح جاي وگدر يعرف بسبب داليا الأتصلت عليه
وبس سمع بالخبر گلبها للدنيا واجتمع عنده الغضب والقهر بنفس الوقت
ومن كثر ما چان مقهور ومعصب طلع حرگته بداليا سمعها كلام يطعن بالگلب
مادري شنو اسوي بهل حاله
اهدء روحي؟
لو اهدء وضاح الدايذب اللوم على داليا؟
لو اهدء بداليا الداتجي عليها التهم وهي اساساً اكثر وحده متضرره بسبب الصار؟

موت ملك كسرنا كلنا
وضاح الچنت اشوفه شگد قوي وما يتأثر بأي شي بس موت بنته خلاه يتأثر
واتغير بسرعه بأيام قليله
ومن كثر القهر طلعت بلحيته كم شيبه
وشگد ما يحاول يكتم الحزن بگلبه عيونه تحچي غير شي وتفضحه
اما عن نفسي
شحچي عن المريت بي؟
عن الشيب الصار يتكاثر بشعري اكثر من قبل؟
لو عن الوجه التعب اكثر واكثر؟
لو عن الجسم النحل وصار عباره عن جلد على عظم
لو عن العيون الراحت والراح تنعمي من كثر البچي
لو عن الشعر الصار يتساقط بسبب سوء التغذيه
لو عن الكوابيس التخليني افز بكل يوم مفزوعه ومتوقعه بأي لحظه وبأي كابوس منهم يوگف گلبي واموت بمكاني

..... اليوم العاشر بعد فقدان بنتي
توجهت للچربايه وخايفه وكأنما رايحه لحرب ولا كأنما رايده انام
طبعاً راح اخاف لأن اني متأكده راح يجي كابوس يخليني افز مخروعه ويخلي دگات گلبي متسارعه

صعدت على الچربايه وصرت قريبه من وضاح ومدلي ايده وكأنما يعرف بيه جايه لحضنه

من يوم وفاة بنتي صرت اخاف انام بدون ما احضن وضاح
شگد چنت اخاف من قربه واتخبل بس يطخ جسمي بجسمه
بس هسه صرت اموت خوف اذا ما چنت قريبه من عنده وودي ادخل بين ضلوعه من كثر خوفي

حضنته مثل كل مره وخليت راسي على صدره وغمضت عيني ودموعي مرطبه خدي
واني مغمضه عيني اشهگ وارجف من قهري
شنو ذنبي افقد كل احبابي؟ ، ليش كل شخص احبه واتعلق بي لازم يروح؟!! ، حياتي صارت عباره عن موت بس يمته يجي اليوم الأموت بي واخلص؟!!
غفيت بدون ما احس على نفسي من النعاس
وسمعت صوت قريب من يمي بس هل صوت مئلوف الي وصوت بچي طفله
امشي وماعرف وين رايحه لحد ما رجلي اخذتني لمكان بي طفله دايره وجها وتبجي ولابسه فستان قصير ابيض وشعرها قصير تشبه هيئه ملك
گعدت يمها وگلت ..

ضي:: حبيبتي ليش تبچين؟

دارت وجها الي وانصدم بملك تباوعلي والعيون مغورگه دموع
أول ما شافتني حضنتني وضلت بس تبچي ..

ضي:: مم م م ملك؟!!! ، بنتيييي هااي انتييي

حضنتها بقوه ودموعي صارت تنزل بدون ما احس ..

ضي:: ليش عفتينيي ماماا ليييش اني مو امچ؟ ، تقبلين تزعلين ماما؟!! ، ها؟ ، جاوبيني وكافي تبچين

ضلت بس تبچي وما ردت عليه واني احچي وياها ورايدتها بس تنطق وابد ولا نطقت بأي حرف
وما اسمع غير صوت بچيها
حسيت بقمته بگلبي
وصار عندي ضيق بالتنفس فجأه
صرت اشهگ بالهوه واحاول اتنفس ومداگدر
فزيت بخوف ولزمت گلبي ويدگ سريع وصرت اتنفس بسرعه وكأنما مقطوع عني الاوكسجين لفتره طويله واشهگ وصوت شهگاتي عاليه ومسموعه

وعيت على نفسي وعرفت هذا چان كابوس مثل أي كابوس يراودني بكل يوم

وبدت دموعي تنزل كالعاده تعودت على عيني لازم تكون دائماً مغورگه بالدموع

فز على صوت بچيي وضاح واني مستمره ابچي ومحروگ گلبي على بنتي
اصعب اختبار ربي اختبرني بي
تمنيت الله يختبرني بأي شي بس مو بموت بنتي

وضاح بدون ما يحچي شي جرني من ايدي ودفعني لحضنه
يعرف اني مو بحال اسئله هسه
ضميت راسي بصدره وابچي وميته قهر وهو يمسح على ظهري وگال ..

وضاح:: اشششش ، اهدئي

ضي:: اا ا اريد بنتيي وضاح رجعوولي بنتي اني ماگدر اعيش بدونها والله ما اگدر هي المصبرتني على هل دنيا شلون اگدر اعيش بدونها گليي شلون؟!! ، ما متعوده بنتي تنام بدون ما انيمها على ايدي وما متعوده تنام بدون ما ابوسها واغطيها بيدي واحسسها بالأمان ، ملك تخاف من الظلمه وتخاف تبقه وحدها شلون بنتي راح تتحمل تنام بالگبر وبهل برد وظلمه ووحدها؟!!
رفع راسي بأيده وصار يباوع بعيوني ومبين عليه التعب ..

وضاح:: تعرفين هذا اختبار من رب العالمين؟

هزيت راسي بصعوبه من بين دموعي وگال ..

وضاح:: ما راح اگدر اتخطى موتها قبل لا اشوفچ متخطيته

ضي:: ما اگدر

وضاح:: تگدرين ..

ضي:: والله ما اگدر ملك هدت حيلي واخذت كل قوتي وراحت شلون راح اگدر

جرني اله وباسني براسي ورجعني لحضنه وحضني بقوه وحچه بنبرة صوت واضح عليه التعب والنعاس وگال ..

وضاح:: نامي ..

غمضت عيني وحاولت ارجع انام وبصعوبه يلا گدرت ارجع لنومي واخلي عيني تغفه

اجه اليوم ١١
ومن بعده يوم ١٢ والبعده ١٣ لحد ما عبرت كل هل أيام واجه اليوم ٣٥
وما بقى غير خمس أيام وتجي اربعينيه بنتي
ما حسيتهم ٣٥ يوم
لا چنت احسهم ٣٥ سنه من العذاب والقهر
وبكل يوم تنسحب روحي وبعذاب وبعدين ترجع لمكانها لمده ٣٥ يوم واني اجرب هل شعور

بعد ما غيرت ملابسي وجهزت روحي حته اروح لخالتي
صفنت بالمرايه واشوف وجهي شلون تعبان كلش والانكسار واضح عليه

هانت ما ضل شي ، تحملت هواي معانات وضيم وقهر
راح اتخلص من عدها فرد مره
حته لو چانت صعبه بس وره الاربعين مال بنتي راح احاول اتخلص من معاناتي وابدي بدايه جديده
وحدي وبحريه ......

طلعت لوضاح ورحت صعدت سيارته بعد ما خليته ينتظر سنه على ما اجهز
سديت الباب وراي وبده يسوق ..

وضاح:: مو چنچ تأخرتي

ضي:: اي

وضاح:: ضي رايد احاچيچ بموضوع بس من ترجعين

ضي:: شنو؟
وضاح:: يخص اليوم الرحنا بي للسجن ، من ذاك اليوم واني رايد احاچيچ بس ما صارتلي فرصه