ودق:: اسم الله لييييش ترسبين ان شاء الله تنجحين بعدچ ما رايحه للأمتحان وهيچ تگولين صدگ تحچين لو تشاقين وهاي ليش هيچ مشگگه كتابچ من هسه مأيسه تنجحين
ضي:: مو انييي الشگگته اخووووچ الحقيييير هو الشگ كتاااابييي وما يخلينييي ارووح امتحن
ودق:: شنوو! ، ليييش هيچ سووه
ضي:: شنووو ليش انتيي مااا تعررفييينه حقير والحقاره تجري بدمه گليلييي هسه شلون راح امتحن
ودق:: زين اهدئي شوي ما يصير هيچ ، موتي روحچ من البچي يمعوده ما تسوه السالفه
ضي:: انتييي مستوووعبه شدااحچي لو لااا شنو ما تسوه السالفه داگلچ شگ كتاابي واني ما عندي غير هل كتاب اعتمد عليه وبعدني ما خلصت كل المااده شلون اروح امتحن واني ما قااريه وهاي اذاا خلاااني اطلع
ودق:: هسه هو وين گليلي حته احاچي
ضي:: طلع شنو تحاچي وعود هو راح يسمعلچ؟
درت وجهي ومشيت ورحت گعدت على چربايتي ودموعي بس تنزل
شلون راح احقق حلمي
وهل حقير واگف بطريقي
لو امي وابوي موجودين چان ما صار كل هذا ولا خلوا ايهاب يتمادى ويتصرف بهل شكل
بس ما بيدي شي من بعد امي وابوي اني مثل الطير ومكسور جناحي
صرت تحت رحمه ايهاب
صار هو المسؤل عني ويتدخل بقرارات ما لازم يتدخل بيها ولا اله حق التدخل بس هل انسان ما يرتاح اله اذا تدخل بحياتنا ويگلبها علينا مثل الجحيم
مرات اگول بداخلي معقوله ايهاب من امي وابوي ومن دمنه ولحمنا هل شخص
شو مداحس بهل احساس
مداحس هذا اخوي ابن امي وابوي
مداحس عندي اخ داحس عندي عدو
شنو السبب اليخلي يكرهنا هيچ وما يخلينا نعيش حياتنا مثل ما نريد
رغم اقصى احلامنا بسيطه كلش مقارنه لغيرنا
احنا رايدين بس يكون قرارنا بيدنا ويكون عدنا رأي وبدون ما يجي احد يتدخل ويمشينا على حسب اليريده
ضليت حابسه روحي بالغرفه والقهر ياكل بروحي اكل
وحايره ماعرف شنو اسوي
والمشكله ادور على كتبي البقيه وادور على ملازمي ودفاتري بلكت الگه الي شي يفيدني مدالگاهم
عبالك اختفوا
بقيت على هل حال كل شوي اگوم ادور وارجع لمكاني ابچي لو اگعد افتر بالغرفه
لو اتمدد وبس افكر بأمتحاني
وما رايده شخص يدخل للغرفه حته ودق طردتها رغم غرفتي هي نفسها غرفتها
مر الوقت ساعات وحته عشه ما تعشيت
اباوع للساعه ب١٠:٠٠ بليل
گمت من مكاني وطلعت من الغرفه
وأول من نزلت ما ردت اشوف أي شخص
گبل رحت للمطبخ ورحت اشرب مي ريگي ناشف
واني بالمطبخ وبيدي الگلاص اشم ريحه حرگ جايه من بره
يمكن من الشارع دايحرگون فد شي
بس الريحه كلش قويه عبالك ببابنا دايحرگون
ما معقوله لهل درجه تكون الريحه قويه
عفت الگلاص وطلعت من المطبخ ودخلت للصاله شفت رهام گاعده تباوع تلفزيون وودق صافنه ورايحه بعالم ثاني ..
ضي:: اكو ريحه حرگ منين جايه؟
رهام:: مادري
ضي:: يعني داتشمين
رهام:: اي داشم شنو قابل فاقده حاسه الشم
ضي:: هاي شبيها ودق صافنه ، ودق هييي انتييي وين رايحه بعالم ثاني؟
ودق:: ها
ضي:: شبيچ
ودق:: لا ما بيه شي ، شنو يمته طلعتي
ضي:: لا انتي صدگ رايحه بعالم ثاني
عفتهم ومشيت للباب
فتحت الباب والباب يودي للطرمه
أول ما فتحت الباب واشوف مشتعله نار صغيره بالطرمه يم باب الشارع وشفت ايهاب يشمر كتب على هل نار
ركزت بهل كتب بس هاي مو كتبي؟!!!!
بسرعه ركضت بدون ما احس تلقائياً وردت ادفع ايهاب واخذ الكتب من عنده بس كالعاده هو الدفعني صرت اباوع للنار واصيح واترجاه يترك كتبي ..
ايهاب:: لچ سكتيييي فضحتينااا منااا شارع
ضي:: كتبييي لاااا ايهااااب عوووفهم
طلعن على صوتي ودق ووراها رهام
واني واگعه بالگاع واتوسل ب ايهاب بس رايده يعوفهم
شمر الباقي على النار
واني اباوع لكتبي واشوف النار شلون داتاكلهم اكل ودايصيرون رماد
مداحسهم كتب الداتحترگ لا داحس مستقبلي هو الدايحترگ
احس بغصه بداخلي ودموعي تنزل وما اگدر احچي من القهر خانگتني العبره ..
ايهاب:: تدخلين هسه لو شلون؟
ضليت ساكته واباوع للنار
واحسها داتحرگ بروحي
حسيت ب أيد على كتفي رفعت راسي وعيوني مغورگه دموع واشوف ودق واگفه
دنگت الي ولزمت ب ايدي ..
ودق:: ضي تعالي خل ندخل جوه ما يصير تبقين بره
ايهاب:: شكلها عاجبها تبقه حته تدفى بنار كتبها
رهام:: تره هن كتب شنو قحط شبيچ راح تموتين روحچ وهيچ مصدومه عبالك شايفتلچ جثه
ايهاب:: دخلوا معليكم بيها هسه تمل وتدخل
رهام:: اني رايحه انام مالي خلگ ابقه واگفه اباوع لمسرحيتها
سمعت صوت الباب نسد وراها
بدت النار تهدء شوي شوي لحد ما انطفت وما بقه منها غير الرماد
مشه ايهاب وعافني ودخل جوه
وما اهتم الي وكأنما ما سوه شي
ضلت ودق يمي وتحاول تگومني وتدخلني جوه واني باقيه بنفس مكاني ..
ودق:: ضيي لا تسوووين بروحچ هيييچ امشيي
حچيت گوه وبالگوه تطلع مني الكلمه واحچي بقهر ..
ضي:: كتبي ، ودق كتبي كلهم احترگوا راحوا

ودق:: گومي اترجاچ صدگيني مداعي هيچ تسوين انتي امتحنتي وخلصتي وگلتي انتي زينه شتسوين بيهم خل يولون وباچر روحي امتحني وان شاء الله تگدرين تجاوبين واذا ما گدرتي عوفي الدفتر فارغ وامتحني على الدور الثاني دبري الچ كتاب واقري وشدي حيلچ وتنجحين وتطلعين طب ان شاء الله
ضي:: مستقبلي راح ، دراستي راحت شنو ضل الي؟ ، بدون دراسه شلون راح يكون الي مستقبل؟
ودق:: ثقيي بكلااامي ضيي وكاافي گوميي لا تسوين بروحچ هيچ ما اگدر اشوفچ بهيچ حاله
جرتني من الگاع وگومتني وصارت تجر بيه گوه وتدخلني
دخلنا جوه وصعدتني فوگ
دخلنا للغرفه
ورحت بسرعه تمددت بچربايتي وحضنت مخدتي بقوه ودموعي صارت تنزل مثل الشلال على خدي ..
ودق:: لااا ضي اترجاااچ لااا تبچين ما استحمل اشوفچ تبچييين كاافي
ضي:: عوفينيي بحاالييي ودق عوفييينيي
ودق:: تمام راح اعوفچ بس صدگيني الداتسوي غلط ما يصير هيچ تسوين مفروض تدافعين عن نفسچ مو تصيرين ضعيفه هيچ ايهاب راح يستغل ضعفچ وبالصدگ ما يخليچ ترحين تمتحنين لا دور أول ولا ثاني
ضي:: ودق داگلچ عوووفينييي
سكتت وما جاوبتني وعافتني مثل ما گلت الها
ضليت ابچي من حرگه گلبي
مدابالغ بردة فعلي بس اني تعبت سنين لحد ما وصلت لهل مرحله
المرحله المصيريه الراح تحدد مستقبلي
وبكل سهوله يجي ايهاب يهدم كل هل تعب
زين وتعبي؟ ، شنو سويت حته يعاملني هيچ؟
هذا اخوي وهيچ سوه بيه
لعد الغريب شنو منتظره من عنده؟
هذا حالي صار ياهو يجي يگدر يكسرني وينزل دمعتي
شافوني بلا سند وگالوا هاي سهله
واني داتعب اكثر يوم عن يوم واريد ارتاح مداگدر
وچان أملي الوحيد وحبل نجاتي من هل معانات هو دراستي
چنت مخليه ببالي اتخرج اصير دكتوره واعتمد على نفسي واخلص من هل ذل ويكون الي دور بالمجتمع قوي وانقذ حياة الناس
بس الظاهر كل احلامي ما ناويه تتحقق ..........
ضليت ابچي لحد ما مليت وغفت عيني
والدموع على خدي
دائماً يحذرون من شخص ينام وهو مقهور
بس ما يدرون عيني ما تغفه اله والدموع تارستها ترس ............. فزيت من نومي على صوت عالي وچان الصوت فعلياً عالي بدون أي مبالغه صوت شخص يصرخ وعبالك داتنسحب روحه منه
بسرعه گمت من مكاني وگلبي يدگ سريع ومفزوعه من الصوت باوعت لچربايه ودق ماكو
والصوت الداسمعه صوت ودق
بهل لحظه حسيت گلبي راح يوگف من الخوف
متت خوف على اختي
استوعبت صفنتي هاي ما راح تفيد بشي
وطلعت بسرعه ركض من غرفتي وانزل الدرج بسرعه لدرجه شوي واطيح على وجهي
نزلت واتنفس سريع من سرعه ركضي
واشوف ودق واگعه بنص الممر ومدمايه تدمي
من اگول مدمايه هاي ابد مو مبالغه چان وجها كله دم
وكلها اثار ضرب مو طبيعيه
من كثر ما ركزت بيها ومصدومه من الداشوفه ما اجت عيني ابد بعين الشخص السوه بيها هيچ
اريد اتحرك وعبالك رجلي ثگيله ما اگدر احركها من المنظر الداشوفه
وهي تشهگ شهگ مو طبيعي وعلى أي شهگه ممكن تطلع روحها وياها ....
#يــــتبـع ...

بارت الثامن عشر
\ ضــــ{١٨}ــــــي /
•
•
بهل لحظه حسيت گلبي راح يوگف من الخوف
متت خوف على اختي
استوعبت صفنتي هاي ما راح تفيد بشي
وطلعت بسرعه ركض من غرفتي وانزل الدرج بسرعه لدرجه شوي واطيح على وجهي
نزلت واتنفس سريع من سرعه ركضي
واشوف ودق واگعه بنص الممر ومدمايه تدمي
من اگول مدمايه هاي ابد مو مبالغه چان وجها كله دم
وكلها اثار ضرب مو طبيعيه
من كثر ما ركزت بيها ومصدومه من الداشوفه ما اجت عيني ابد بعين الشخص السوه بيها هيچ
اريد اتحرك وعبالك رجلي ثگيله ما اگدر احركها من المنظر الداشوفه
وهي تشهگ شهگ مو طبيعي وعلى أي شهگه ممكن تطلع روحها وياها ....
ضي:: وو و ودق!
رفعت راسي عن الگاع واباوع لأيهاب چان واگف وايده ملطخه بدم ودق
مداعرف شنو صار بالضبط
وليش ضاربها!
بسرعه ركضت الها ومداسيطر على روحي بس ارجف
وگعت يم راسها وهي مفتحه عينها على النص واحسها تريد تحچي بس مداتگدر تنطق الحرف گوه وتريد تكمل الكلمه وتسكت ..
ضي:: ودق ووووودقق هاااايي شصااااير بيچ ودق جاااوبيينيي لا تضلييين ساكته ، انتييي زينه لااا لااا تسديييين عينچ فتحييي عينچ وجاوبينيييي
غلقت عينها واحرك بيها وهي مثل الجثه ما تتحرك ابد
حسيت بشخص جرني من ملابسي بقوه
رفعت راسي واشوف ايهاب
سحلني من ملابسي ودفعني على جهه بعيده عن ودق
ردت اگوم واجه جر ودق من شعرها وصار يسحلها من شعرها بس! ، مدايجرها من ايدها لو ملابسها لو شي لا من شعرها لدرجه يمكن شعرها دايتگطع بيده
وودق مداتنطي أي ردة فعل مغمضه عينها ويسحل بيها عبالك جماد
صرت امشي وراه واصيح واصرخ ب اعلى صوتي
طلعت رهام من غرفتها ووگفت بمكانها وصارت تباوع النا ومصدومه
واني امشي وره ايهاب واحاول ادفع بي واخلي يعوف ودق
بس مداگدر هو اقوى مني بهواي بدفعه وحده يرگعني بالحايط
هو يسحل بودق واني اترجاه يعوفها وباقيه احاول وياه وادفع بيه ومصره يعوفها
رغم اكثر من مره وگعت وكل شوي احصل الي ضربه من عنده بس ضليت احاول وياه ورهام داتشوف كل الدايصير وواگفه بمكانها وما تحركت بس تباوع النا وساكته
اخذها للغرفه المتروكه تعتبر مثل المخزن
فتح الباب ودخلها جوه ردت ادخل وجرني من ايدي ودفعني للگاع وطلع المفاتيح من جيبه واخذ منهم مفتاح المخزن وصار يقفل بالباب
واني واگعه بالگاع وبس ابچي على اختي ..
ضي:: لااا ايهاااب لاااا تروووح اترجاااك افتحليي الباااب خل اشوفهااا اترجاااك
باوعلي ببرود ودار وجهه وراد يمشي
صرت اسحب بروحي گوه اله وتمسكت بأيده ودموعي تنزل مثل الشلال على خدي ..
ضي:: ابوووسها لأيييدك افتحلييي البااااب وخل نوديهااا للمستشفى اترجاااك ايهاااب
ايهاب:: بعدي ايدچ عني لا اكسرها الچ
ضي:: ليش هيييچ سووويت بيهاااا ليييييش شنووو ذنبهاا گلييي
ايهاب:: ذنبها چبير وعقابها القتل ما راح اخليها تموت براحه لا والله لخليها تتمنى الموت الف مره لحد ما اموتها من الكتل يلا اضربها بطلقه براسها واخلص
ضي:: شنووووو تحچيييي انت طلع اختيييي مناااا طلعهاااا
دفع ايدي عنه
وما اهتم الي وصار يمشي واني بمكاني منهاره وميته قهر
مشه ايهاب واني گمت گوه من مكاني ورحت للباب وصرت ادگ بي واصرخ ..
ضي:: ودق گعدييييي گعديييي لااا تعذبييينييي ودق تررره گلبيي خلصااان ما نااقص قهرر گعديييي
رهام:: شنو سوت؟
درت وجهي بسرعه واشوف رهام جايه تتقرب من يمي
لحد ما وگفت يم الباب وصارت تباوعلي ومچتفه ايدها ..
رهام:: مو عود هاي اختچ شنو معقوله ما تعرفين بمصايبها؟ ، ما اعتقد ايهاب يكتلها بدون سبب
ضي:: وشنووو تقصدييين اختييي مسوويتلهاا فد مكسوره
رهام:: يمكن
ضي:: مااا اسمحلچ تحچين عليهاا وانتييي ليش هيچ باااارده ليش ماتدخلتييي
رهام:: مو بارده نفس الشي مقهوره عليها مثلچ واني لو تدخلت ما راح يسمع كلامي ف اضل ساكته احسن
ضي:: مقهوره عليها؟ ، لا كلش واااضح عليچ مقهوره
رهام:: هسه عوفينا من هل كلام الماله داعي وخري من الباب
ضي:: شنو تردين تسوين؟
رهام:: اكسره وخل نطلعها منا لأن هاي اذا ضلت هيچ يمكن تموت هنا ونبتلي كلنا واني مالي خلگ مشاكل وحچي ، يلا وخري
ضي:: تگدرين؟
رهام:: احاول
بعدت عن الباب
ورهام تقربت من عند الباب وصارت تحاول تكسره
تدفر بالباب وتدفع بي قوي وتحاول تكسره بس ما تگدر
بنيتها ضعيفه
ضليت اباوع الها ومنتظرتها بلكت تگدر
وهي مستمره تحاول وماكو أي فايده
بعدت عن الباب ومبين عليها تعبت وهي تحاول ..
ضي:: گلت الچ ما راح تگدرين
رهام:: هاي فوگ ما اساعد اختچ؟ ، صوچي اني اروح اكمل نومي احسن
ضي:: نومچ؟ ، ياااا نوووم انتييي وودق بحااله يرثى اليهااا ومااا ندريييي بيها عايشه لووو ميته
رهام:: ما راح تفيد بشي وگفتي هنا وودق عايشه لا تخافين هاي چنها بزونه عدها سبع ارواح
سكتت وما رديت عليها
وهي مشت وعافتني وما همها شي
وتگلي اني مقهوره عليها كلش مبين مقهوره
اتچيت على الباب وجريت حسره بتعب
ودموعي من كثر ما نزلت خلصت
ما اعرف شنو اسوي وشلون اطلع ودق من هنا
وهذا ايهاب شكله صدگ ناوي عليها

بس شبي فجأة نگلب عليها
معقوله اكتشف ودق تحچي ويه وضاح؟
ما گدرت اتصرف بهذا الموقف
وبقيت گاعده بمكاني وما اتحركت
لحد ما مر الوقت وعبر الفجر وگوه مفتحه عيني لدرجه كل شوي اغفه وبسرعه افز
لحد ما وگعت بالگاع من النعاس وغفيت بعد ما گدرت اسيطر على روحي اكثر من هيچ
احس بشخص يمي ودايحچي وياي بس مداگدر اعرف منو
ولا اگدر اميز هذا حلم لو واقع
وما احس اله اجت دفره بخاصرتي
فزيت بسرعه من نومي مخروعه وما اعرف يمته نمت اصلاً
رفعت راسي واباوع لأيهاب واگف
عدلت گعدتي وصرت اعدل بشعري وابعده عن وجهي واباوع اله بستغراب ..
ايهاب:: شعندچ نايمه هنا
ضي:: چان گدرت تگعدني مثل الأوادم مو بتدفر
ايهاب:: ما يفيد وياچن الأحترام لا انتي ولا خواتچ ويلا گومي منا ما اريد اشوف ولا شخص يوگف يم هل باب
ضي:: ممكن تگلي ليش هيچ سويت بودق؟
ايهاب:: معليچ انتي ، يلا تحركي
داريد اگوم من مكاني واحس روحي مكسره تكسر من نومتي هاي
نوبه حته الگاع بارده هسه اتمرض
لزمت ظهري بوجع
نايمه بدون فراش ولا مخده ولا شي
وطبعاً راح يكون كل جسمي يوجعني مو بس ظهري
ردت امشي وسمعت صوت شهگه واحد دايبچي من الغرفه
وگفت بمكاني وما اتحركت باوعلي ايهاب وگال ..
ايهاب:: انتي شنو ما تسمعين مو گلت الچ اتحركي
ما اهتميت اله واتقربت من يم الباب واسمع صوت بچي ودق
فرحت وحزنت بنفس الوقت مشاعري تخربطت
فرحت لأن اختي صاحيه وما صار الها شي
وحزنت عليها وعلى وضعها وبچيها ..
ضي:: وو و ودق ، انتي بخير؟!!
ايهاب:: هاي شنو صحت
ضي:: وخرررر منااا لااا تدخل
ايهاب:: اني ما فارغ الها عندي شغل ولازم اطلع بس اسمعينييي يااا ست موو شايفتنيي سااكت الچ معناهاا راح اعوفچ لاا وحق الخلقچ بس اصبريليي كم يوم واعتبري روحچ ميته ف استغلي ايامچ هاي بعباده هاي اذا چنتي صدگ خايفه من ربچ بس على فعلتچ هاي ما اعتقد
گال كلامه ومشه بكل برود وعافنا
ما اهتميت اله خل يحچي اليريده هو شنو؟ ، اصلاً بوخه شنو يگدر يسوي مثلاً؟
أول ما راح صرت ادگ الباب عليها واحچي وياها ورايده بس تجاوبني ..
ضي:: ودق اترجاچ جاوبينييي كاافي بچي احچيليي انتي شلونچ وشلون صحتچ
ودق:: طلعوووني منااا طلعوووونييي
ضي:: اهدئي ودق مو زين عليچ تنفعلين ولو بيدي اني چان طلعتچ بس ما بيدي شي حته البارحه رهام حاولت تكسر الباب وتطلعچ بس فشلت
ودق:: خل يذبحنييي ، انيييي رايدته يذبحنييي اليوووم قبل بااچر
ضي:: ليش هيچ تحچين ودق شنوو صار بالضبط؟
ودق:: تسوين روحچ ما تدرين؟
ضي:: لا لأن اني بالصدگ مادري شنو صاير احچي
ودق:: لعد گليلي شلون عرف بسالفتي ويه وضاح غييير منچ انتييي
ضي:: اني! ، ودق شنو هل حچي انتي صدگ تحچين شلون احچيله عن هيچ شي
ودق:: اني اصلاً ما چنت اخابره لوضاح مجرد مراسله وايهاب مو من طبعه فجأة يسحب التلفون بدون سابق انذار بس مادري شنو صار بهل يوم گبل سحب تلفوني وصار يباوع للرسائل وفجأة انگلب عليه وصار يضربني بدون أي رحمه حته حسيت بروحي راح اموت تصدگين اني نطقت الشهاده من كثر ما أيست بأنو اني اعيش
؟ ضي:: وانتييي شعندچ تراااسليي مو گلت الچ عووفي لوضااح عوفيي صخااام شووفي هسه شصاار بيچ بسببه مو گلت الچ هل شخص راح يضرچ
ودق:: ووضاح شعليه؟
ضي:: شنو شعليه هو راس البلا لو ما حاچيتي چان اصلاً ما صار كل هذا بيچ
ودق:: اني لو اتزوجه لو اموت وحده من الاثنين ماكو شي ثالث يشاركهم
ضي:: انتي مخبله! ، تخلين وضاح ويه اختيار ثاني وهو تضحين بحياتچ! ، مو طبيعيييه
ودق:: اي اني وحده مخبله اني تخبلت من حبيت هل شخص مادري شصار بيه ما اگدر اعوفه ولو اكون اله لو اموت هذا الرايدته
ضي:: هنا المصيبه من تحبين وانتي مراهقه ما راح تعرفين الصح من الخطأ
ودق:: تره خبصتيني مراهقه ومراهقه فهمنا عاد تره احنا عدنا عقل ونعرف نفكر لا تسوين روحچ نابغه وحكيمه علينا وماره بكل تجارب الحياة
ضي:: ما مريت بكل تجارب الحياة بس مريت ب اصعبها
ودق:: ضي روحي منا ما اريد لا اسمع صوتچ ولا صوت اخوچ مستعده اسمع صوت رهام الغثيثه بأذني ٢٤ ساعه ولا اسمع صوتچ دقيقه وحده
ضي:: ودق ليش تحاچيني هيچ وعود اني متت خوف عليچ وردت اموت بس شفتچ بهل حاله
ودق:: لا ما رايده تموتين عليه مشكوره ويلا روحي
ضي:: گدر يغيرچ عليه وضاح؟ ، خوش گدر يجرچ بسرعه لجهته حته توگفين وياه مو ضده
ودق:: انتي كلما حچيت كلمه دخلتي بنصها وضاح تره لعبتيها لروحي بلا شي اني حالتي حاله روحي منا لا تخليني انهار اكثر من هيچ
ضي:: اي ماشي اذا چان وجودي مضايقچ ف راح اروح واني الصوچي المهتمه الچ خليچ هيچ مذلوله ومحبوسه هنا محد يدري عنچ
حاولت اسوي روحي ما مهتمه گدامها بعد الكلام السمعتنيا
ومشيت وعفتها
بس اچذب لو گلت ما مهتمه لودق
لا مشيت وعبالك عفت گلبي يمها ورحت
ما اگدر ما افكر بيها ، طول الوقت واني افكر بيها وبحالها وشلون اگدر اطلعها منا
بس الله يهديها مادري شبيها تصدني

رغم اني ما سويت الها شي ولا تدخلت بينها وبين وضاح بعد المشكله الصارت بيني وبينها حاولت اتصرف وياها بكل لطف رغم هي مستمره بالغلط وگبال عيني
بس شگول عليك يا وضاح مصيبه ووگعت فوگ راسنا عاف كل البشر ما اجه اله على ودق
اخر وحده توقعت ينضحك عليها بسرعه
صعدت فوگ للغرفه وصرت ارتب بيها اريد اشغل نفسي بشي قبل لا اتخبل من وره التفكير
صرت اباوع لچربايه ودق ومنقهره
.. اخ يا ودق شسويتي بروحچ ، لو ما وگعتي روحچ بهل مصيبه چان هسه شفتچ مثل كل يوم گاعده بفراشچ
درت وجهي للشباك ورحت وگفت قريبه من يمه
وسحبت البرده واجت اشعه الشمس بعيني
صرت اباوع للشارع واكو طالبات دايمشن شكلهن هسه طالعات من الامتحان
لو ما ايهاب چان هسه اني حالي من حالهن راجعه من امتحاني
شگول غير حسبي الله ونعم الوكيل
بس ما راح يگدر يوگفني وراح امتحن الدور الثاني بأذن الله مو ايهاب اليگدر يهدملي مستقبلي الگعدت ابني بي طول هل سنين وراح ادخل كليه وغصب عنه
سمعت صوت باب الغرفه انفتح
درت وجهي واشوف ليان هسه جايه تدخل للغرفه
أول ما شافتني مشت بتجاهي سريع وحضنتني ..
ليان:: ضيييي مشتااااقه الچ
حچيت بصوت تعبان ورديت عليها
وهي سحبت روحها عن حضني وصارت تسئل عني وعن احوالي ..
ليان:: شنو هاي ضي داتبچين!
ما حسيت على روحي ولا ادري يمته نزلن دموعي
بسرعه صرت امسح بيهم وگلت ..
ضي:: لا لا بس ضوه الشمس ضرب بعيني وصارت تدمع مدابچي ، انتي شنو تسوين هنا صدمتيني بوجودچ
ليان:: ليش عيني ما تردوني؟
ضي:: لا طبعاً نريدچ ومشتاقيلچ بس انتي مو من عوايدچ تجين بهيچ اوقات
ليان:: ايي اليوم عندي انشغالات هواي ومشتاقه الكم گلت خل امر عليكم الصبح وارجع بنفس اليوم هسه عوفينا من هل حچي وگليلي ودق وين سئلت رهام عنچ وعن ودق تگلي ودق محبوسه وضي فوگ شنو صاير وشلون محبوسه؟
ضي:: اي محبوسه اخوچ الحبسها وما اكتفه بحبسها لا عذبها هم
ليان:: عزه بعيينييي شنوو عرف بسالفه وضاح!
ضليت اباوع الها ومصدومه
هاي شعرفها بسالفه ودق ويه وضاح؟! ..
ضي:: وضاح! ، ليش انتييي شعرفچ بالساالفه!
ليان:: هو انتي الشعرفچ
ضي:: جاااوبيي على سؤالي ولا تردين عليه بسؤال ثاني
ليان:: اا ا اي اعرف ومن زمان ومن أول ما تعرفوا بس انتي شلون عرفتي ودق حچت الچ؟
ضي:: وبكل فخر تگولين اي وفوگاها تعرفين من زمان وساكته وما حاچيه الي ولو ما كشفت ودق بذاك اليوم چان لحد هسه اني غافله
ليان:: ضي شلون احچيلچ تره هذا سر وهي أمنت بيه وحچتلي سرها ترديني اروح واحچي الچ وهي موصيتني ما احچي الچ خصيصاً
ضي:: لا حلو ريه وسكينه متفقات على السالفه من زمان وضاماتها عليه ، بس فهمني انتن يمته تبطلن من مصايبچن؟
ليان:: هسه عوفينا من الرزايل ضي تره گلبي شاب نار على ودق كلش خايفه عليها گليلي هي وين
ضي:: لو صدگ خايفه عليها چان نصحتيها وحچيتي الي مو دعمتي غلطها
ليان:: دكاافي ضي من تلحين بشغله بعد ابد ما تسكتين احچيلي هي وين وخل اولي اشوفها
ضي:: اگول الها محبوسه تگلي وين اريد اشوفها لچ محبوسه شنو تشوفين من عدها
ليان:: حته لو بس اسمع صوتها
ضي:: بالغرفه مال مخزن
ليان:: سوووده عليه هذيچ الغرفه كلها تراب ويمكن بيها حشرات وودق تخاف من الحشرات
ضي:: اوي عيني تخاف من الحشرات يل ثوووله تره البنيه جنازه صايره مالها خلگ تخاف من مردانه لو صرصر
ليان:: فوگاها الچ خلگ تصنفين شنو هل برود
ضي:: ديلا روحي وخلصيني
طلعت ليان من الغرفه وراحت تشوف ودق
واني ضليت بالغرفه اعزل بيها
وحته گدام ليان حاولت اسوي روحي ما مهتمه بودق
مو هذا التريده؟ ، ما تريد تسمع صوتي ولا اهتم الها خلص راح اسمع كلامها واسوي اليريحها
بده يمر الوقت لليل وليان ضلت يمنا للساعه ب٧:٠٠ وراحت وقبل لا تروح سطرت راسي بالوصايا
اهتمي بودق وگليلي شنو يصير كلشي بوكته
ولا تضمين عليه شي وودق ساعديها واني ما اگدر ابقه ومن هل حچي
دوختني وهي ودق بنفسها ما تريد احد يهتم بيها
صارت الساعه ب١١:٠٠ بليل والبيت هدوء
من هدوئه گدرت اسمع صوت الباب مال صاله انفتح وبكل وضوح واني اصلاً واگفه بالمطبخ اشتغل
عفت البيدي ونشفت ايدي كلها مي من الماعين
ورحت للصاله دخلت وشفت ايهاب هسه يلا رجع ..
ضي:: وين چنت كل هل وكت
ايهاب:: اني كم مره منبهچ انتي وخواتچ ما تسئلني هيچ اسئله؟
ضي:: يعني بس انت التسئل وين نروح وتحاسبنا على طلعاتنا
ايهاب:: انتن بنات والچن سمعه واني ما اثق بيچن صراحه من بعد ابوي ستهترتن
ضي:: شنو هل حچي
ايهاب:: بدال هل لغوه روحي سوي چاي وصعدي الي بغرفتي
ضي:: شنو خدامه عندك اني
ايهاب:: اني شنو گلت؟
صفنت بوجهه واجت ببالي فكره
لو اصعد لغرفه ايهاب الممنوع اصلاً ندخل الها
راح تكون فرصه ذهبيه بالنسبه الي وراح اگدر احاول اخذ المفتاح من عنده
قاطع صفنتي صوته وهو يصيح عليه ..
ايهاب:: انييي ويااامن داحچي ويه الحاايط؟!!
ضي:: هاا لااا خلص هسه رايحه اسوي الك چاي واصعده هم ، تأمر على شي ثاني؟
ايهاب:: هيچ صيري العناد مو حلو

گال كلامه ومشه وعافني واني بسرعه رحت للمطبخ وگعدت اسوي اله الچاي وبين ما يكمل خلصت الماعين
صار الچاي وبسرعه صبيت اله واخذته بين ايدي
ورحت اصعد ورايده اروح لغرفته وگلبي يدك سريع
.. يارب اگدر ، ياربي ساعدني اختي راح تموت اذا ضلت هيچ محبوسه لا اكل ولا شرب وفوگاها نص دمها راح وتحتاج تغذيه ولازم ننقلها للمستشفى ب اسرع وقت
ضليت ادعي ربي بلكت اگدر احصل المفتاح وخايفه حيل خاف الگاه ويلگفني
دگيت باب غرفته وسمعت صوته وهو يگلي دخلي
دخلت ورحت خليته اله على صفحه وايهاب چان واگف يم التلفزيون ورايد ياخذ الريمونت انتبهت للمفتاح چان على الميز هو ومفاتيح البيت وگدرت اميزه لأن كل مفتاح شكل
ياربي شسوي هسه؟ ..
ايهاب:: ما تمشين شعندچ واگفه
ضي:: ها ، لا هسه ماشيه
صرت امشي بكل بطئ واريد اسوي أي شي يمنعني اطلع منا لحد ما اخذ المفتاح بيدي
شفت تلفونه على الشحن وباوعت اله ملتهي يگلب بين القنوات
سويت روحي عود علساس مادري وبالغلط حركت الشاحنه
ووگع تلفونه بالگاع
أول ما وگع بسرعه اجه الي وصاح بوجهي ودفعني ..
ايهاب:: انتييي غبيييه؟
اخذ تلفونه من الگاع وگعد يشوف تلفونه اذا صارله شي لو لا
استغليت الفرصه بسرعه رحت اخذت المفتاح وضميته بجيبي بدون ما يشوفني لأن چان داير وجهه
يارب ما يكتشف اني اخذته ..
ايهاب:: طلعيي بره شنو لزگتيي هناا
ضي:: اا اني اسفه
ايهاب:: طلعييي بره
طلعت بره وگلبي يدگ سريع
احس شوي وراح يوگف گلبي
نزلت جوه وگعدت بالصاله وبس اقره سور وادعي
وميته خوف لأن اعرف لو ايهاب لاحظ المفتاح ماكو ما راح يرحمني وراح اكون ويه ودق محبوسه
انتظرت فوگ الساعه وما اگول هدئت بس احسن من قبل شوي قل خوفي
اكيد ما لاحظ المفتاح مفقود وهسه نايم اني متأكده من هل شي لأن اجه ومبين عليه تعبان مو مال يسهر
ولو لاحظ المفتاح ماكو چان هسه اني مو هنا لا چان روحي حالياً بالسمه صاعده
رغم اني متأكده نايم بس انتظرت بعد اكثر حته اطمئن فرد مره واتأكد
بعد ما تأكدت بسرعه اخذت تلفوني وگعدت ادور عن رقم دريد لحد ما لگيته وبسرعه وبدون أي تردد اتصلت عليه
ما رد عليه بالبدايه بس ضليت اتصل عليه
اعرف مو وكتها بس مجبوره ولازم يجي ضروري يساعدني حته انقل ودق للمستشفى
من رابع اتصال يلا رد عليه وأول ما رد عليه ما انطيته مجال يحچي وبسرعه گلت ..
📞.. دريد ما اگدر اوضح الك شنو دايصير هسه بس اترجاك لازم تجي ضروري
📞.. ضي؟!! ، شنو صاير!
📞.. صدگني ما عندي وقت اشرح الك بس اترجاك دريد تعال بسرعه وساعدني اوگف الي يم شارع ---------- القريب من بيتنا لا توصل لهنا ولا تتأخر عفيه
📞.. ضييي شنووو صاااير احچييي؟!!!
📞.. دريييد اترجااك تعااال وبعدين اشرح الك كلشي
📞.. هسه جااي على السريع ما راح اطول
سديت الاتصال وگمت مكاني وطلعت من الصاله ورحت للغرفه مال مخزن وكل شوي التفت يمنه ويسره واريد افتح الباب وميته خوف
فتحته بكل هدوء وما اريد يطلع أي صوت
أول ما فتحت الباب شفت ودق واگعه مثل الجثه
دخلت وحاولت اسيطر على خوفي وقلقي
ورحت گعدت يم راسها واحاول اگعد بيها واحچي بصوت ناصي ..
ضي .. ودق ، ودق جاوبيني اترجاچ
اضرب على خدها واحاول اگعد بيها وخايفه عليها وضعها ما يطمن ووجها مليان اثار وجروح
ومستمره احاول اگعد بيها لحد ما صارت تفتح بعينها بهدوء
حسيت مثل المي البارد ونزل على گلبي من شفتها فتحت عينها وما بيها شي ..
ضي .. ودق ليش هيچ تسوين بيه والله وگعتي گلبي گومي
أول ما شافتني بسرعه طفرت من مكانها بخوف ولزمت گلبها وصارت تشهگ ..
ضي .. اسم الله ، اهدئي اهدئي
ودق:: شنووو تسوووين هناا
ضي:: اششششش اسكتي لا يسمعچ ايهاب صدگيني بصعوبه حصلت هل مفتاح مداحسني شايله مفتاح بيدي لا داحس شايله متفجرات
صارت تبچي وتسحب روحها للزاويه
رحت امشي بتجاها ولزمت ب ايدها ..
ضي:: لا تبچين ودق اترجاچ ساعديني وگومي حته اگدر اساعدچ
ودق:: ما اريد اطلع عوفيني
ضي:: شنو ما تردين تطلعين انتي مخبله؟! ، المثل حالتچ من يجي شخص يساعده يشكره مو يحاچي هيچ
ودق:: تعبت الموت ارحم الي وحته لو طلعت وين توديني؟
ضي:: للمستشفى ، اني اتصلت بدريد وگلت اله يجي ياخذنا وهسه اكيد هو بالطريق لازم نطلع منا بسرعه
ودق:: أول وتالي من نرجع راح اموت ومو بس وحدي انتي هم
ضي:: خل نطلع منا بالأول ويصير خير تره ايهاب متحلف الچ طلعتي أو لا أول وتالي يكتلچ على الاقل بالمستشفى راح تكونين بأمان اكثر من هنا وتضلين هناك كم يوم وبعدين نشوف شلون نتصرف
ودق:: ما اريد
ضي:: مو بكيفچ
جريتها من ايدها وگومتها غصب وهاي ضلت تصيح بسرعه سديت حلگها وحچيت بهمس ..
ضي .. ودق لاا تصيحين راح تورطينا خل نطلع منا بدون مشاكل
ودق:: ايديي شبيچ انتي
ضي:: امشي
طلعتها من المخزن ووديتها للصاله بصعوبه گوه تمشي
ورحت بسرعه على السريع لبست صايه فوگ ملابسي والشال بس شمرته على شعري ولفيته بشكل عادي
وجبت شال لودق وصايه حته تلبسهم ونطلع
وگعدت اساعدها تلبسهم وخطيه بكل حركه الها تون من الوجع

بعد ما بدلنا طلعنا من البيت بنص هل ليل
وما احچي عن خوفي ، گلبي راح يوگف بأي لحظه من الخوف
ونمشي بالفرع بطيء وقربنا نوصل للشارع وودق بكل خطوه الها تريد توگع لحد ما وگفت وصارت تجر بالنفس گوه ..
ضي:: ودق تحملييي رااح نووصل اترجاچ اتحملييي ماا بقه شيي
ودق:: ض ضضي مم ماا اگدر
ضي:: لااا فدوووه اروووحلچ مااا بقه شيي تدرين لوو اجه ايهاب هسه راح نرجع جثتين؟!
ودق:: رجعي انتي خليني اموت وحدي لو حته بالموت لاحگتني ضي كافي اترجاچ اريدچ تتركيني ما اكتفيتي بالسويتي؟!
ضي:: لااا ل ل لاااااا ، ودق لخااطري واني سوويت كل هذاا علمووودچ صدگينيي لو سامعه كلامي چاان ما صاار كل هذاا
ودق:: رفضچ ما راح يوگفني ، ما رااح تووگفيني لاا انتي ولااا ذاااك الحقيررر
ضي:: لااا خلصص ودق اني رااضيه ولله راااضيه بس لا تسووين بروحچ هيچ عاونينييي
دفعتني عنها وباوعتلي وصارت تمشي كم خطوه
وبعد هل خطوات صارت تركض سريع بنص هل ليل وركضت على الشارع ب اسرع ما عندها من سرعتها ما گدرت اسوي شي غير اصرخ ..
ضي:: لاااااااا ، وووووودق لااااا تسوووويهاااا
مادري شلون اجتها كل هل سرعه وهي قبل شوي چانت گوه تمشي
لزمت بصايتي عدل وصرت اركض وراها راح تموتني هل بنيه
لحد ما شفتها وگعت بنص الشارع وتريد تگوم ومداتگدر
ولحسن حظنا ما چان اكو سيارات بس سيارتين مرن قبل شوي وقبل لا تركض ودق
من التعب وگعت يمها بالگاع واتنفس سريع واحچي گوه ..
ضي:: ليش هيچ ودق ليش
اباوع الها ساكته وبس تشهگ
سمعت صوت سياره جايه قريبه من يمنا وصوت باب سياره انفتح
بسرعه رفعت راسي وشفت سياره واگفه على صفحه
هاي مو سياره دريد؟
نزل دريد من السياره وبسرعه سد الباب وركض النا وصاح بأسمي ..
دريد:: ضييي
وصل لعندي وگومني من ايدي وصار يحچي بكل قلق ومتوتر ..
دريد:: شنووو صاااير وشعدكم هناا وبنص الشارع گاعداات
ضي:: دريييد عفيه خل نروح منا قبل لا يلاحظ احد طلعتنا من البيت
دريد:: شنوو سالفتكم انتوو
ضي:: دريد شووف ودق رااح تمووت سااعدنيي خل نوديهاا للمستشفى
مد ايده لودق وساعدها تگوم وهي تتحرك وتون وتشتكي من وجعها ..
ضي:: ارتااحيتيي هسه؟ ، يعني اله تركضيين للشارع انتي غبييه لوو شنو وبلاا شي صحتچ ما تسمح الچ تركضين وانتي المخبله رحتي ركض للشارع الحمد لله ماكو سيارات چان انتهيتي
دريد:: ضي مو وكتها ترزلين بيها شايفه شلونها حالتها
ضي:: من حرگه گلبييي شسوووي
دريد:: على كيفچ ودق لا تمشين سريع بهدوء
وداها للسياره وصعدت واني كذلك صعدت
وراح دريد صعد وبده يسوق سريع
وودق حاطه راسها بحضني ونص شعرها طالع من الحجاب وگعدت اضم بشعرها ولازمه بأيدها بالأيد الثانيه ..
دريد:: ممكن افهم شنو صاير؟ ، وضعكم مو طبيعي
ضي:: كله بسبب ايهاب
دريد:: شبي
ضي:: هو الضرب ودق بهل طريقه ، هسه هي احسن من قبل بالبدايه چانت فرد مره منتهيه عبالك جثه حته چانت حركه وحده ما تگدر تتحرك
دريد:: وهذااا شلووون يمد ايده عليهاا بهل شكل الى متى يضل يعاااملكم بهل اسلووووب
ضي:: كلش خايفه تدري لو عرف احنا طالعات شنو راح يسوي بينا راح يذبحنا وهو اصلاً ناوي يذبحها لودق وبس راح يعرف يذبحني وياها والله
ضي:: لا دريد لا تتمشكل وياه انت بلا شي ما ناقص مشاكل نوبه تطلع الك مشاكل جديده ويه ايهاب
دريد:: طلعي من السالفه ضي وخليها عليه
ضي:: دريد اني رايده اتأسف من عندك
دريد:: على شنو؟
ضي:: اتصلت بيك بوقت كلش متأخر وگعدتك من نومك وطلعتك بنص الليل
دريد:: لا تحچين هيچ ضي تره هذا واجبي واني چنت گاعد من اتصلتي بيه بس تأخرت عليچ لأن تلفوني ما چان يمي
سكتت وعم السكوت بالسياره ومستمر دريد يسوق بسرعه لحد ما وصلنا لأقرب مستشفى
نزلنا من السياره ودريد گعد يساعد بودق حته تمشي وهي كل خطوه تتخطاها بصعوبه
دخلنا جوه للمستشفى ونقلوا ودق لأحد غرف المستشفى حته يفحصوها واني ودريد بقينا بره وضليت واگفه يم دريد وادعي ودق تكون بخير ..
دريد:: ضي
ضي:: ها؟
دريد:: يصير اسئلچ سؤال واذا ما تردين تجاوبين براحتچ
ضي:: اكيد ، اتفضل
دريد:: شنو السبب اليخلي ايهاب يمد ايده على ودق بهل شكل اني اسف اذا داتدخل ب اشياء ما تخصني بس رايد افهم شنو السالفه بالضبط حته اعرف شلون اتصرف ويه ايهاب
ضي:: مادري
دريد:: ما تدرين لو ما تردين تحچين؟ ، اذا ما رايده تحچيلي عادي گولي الي ما رايده بس لا تگليلي مادري
ضي:: لا دريد اني مادري وما اعتقد اكو سبب يسوه ، ايهاب من يوم ما اتوفى ابوي صار يمد ايده علينا بسبب أو بدون سبب بس يمكن ودق مراددته لو شي لأن ودق تعرفها لسانها متبري من عدها
دريد:: يمته صار هل شي
ضي:: البارحه
دريد:: من البارحه ودق بهل حاله ومحد وداها للمستشفى!
ضي:: لأن حبسها وما قبل احد يوصل الها لو يشوفها حته اكل ممنوع تاكل ضلت ٢٤ ساعه محبوسه ولا اكل ولا شرب وما بيدي شي اسوي وهسه نام ايهاب واني گدرت اخذ المفتاح وعلى السريع اتصلت بيك وطلعتها ما تشوف ليش اني خايفه
اباوع اله مبين عليه عصب ودايحاول يسيطر على غضبه

سكتت وما حچيت شي لحد ما رد عليه وگال ..
دريد:: خل تطلع ودق منا بسلامه ويصير خير
ضي:: دريد عوفه لأيهاب تره تعودنا
دريد:: شنو تعودنا؟ ، ترديني اسمع بكل هذا صاير واسكت؟
ضي:: بس ..
دريد:: لا بس ولا شي ضي خليني اتصرف وياه وأوگفه عند حده هذا تمادى هواي عباله من اتوفى عمي معناها راح نسكت اله
سكتت وما رديت وضلينا ننتظر ودق بره
لحد ما مر الوقت طويل طلعت الدكتوره من الغرفه
أول ما طلعت اني ما صبرت اعرف حاله ودق شنو
خليتها تحچي ويه دريد وبسرعه دخلت للغرفه
واشوف ودق متمدده على الچربايه وشاديلها مغذي وايدها الثانيه مجبسيها الها
ومبين على ودق حيل تعبانه ونعسانه هم ..
ضي:: شلونچ هسه
ودق:: احسن من قبل بس بعدني داحس بوجع
ضي:: راح تتشافين ان شاء الله
ودق:: جايبه تلفونچ؟
ضي:: اي
ودق:: ايهاب ما اتصل؟
ضي:: لا ، مبين بعده نايم
ودق:: خايفه
ضي:: لا تخافين نامي وارتاحي ولا تفكرين بأي شي مادام دريد موجود ف احنا ب أمان ما راح يگدر يتعرض النا ايهاب
ودق:: تتوقعين راح يعرف مكان المستشفى ويجي لهنا؟
ضي:: اذا خطرت بباله فكره مال احنا بالمستشفى اعتقد يجي لهنا يدور لأن هاي اقرب مستشفى لبيتنا
جرت حسره ودق وسكتت
سمعت صوت دريد جاي
رفعت راسي وشفته دخل للغرفه
اجه وگف يمي وگال ..
دريد:: الحمد لله على السلامه
ودق:: الله يسلمك
ضي:: دريد الدكتوره شنو گالت عن حاله ودق
دريد:: الحمد لله ودق بخير ان شاء الله كم يوم وتترخص من المستشفى
ودق:: ما اريد ابقه بالمستشفى ما احبها
ضي:: اي علمود ترجعين لأيهاب يخليچ غصب ترجعين للمستشفى مره ثانيه بس هل مره مو بس ضرب لا يودوچ لثلاجه الموتى
ودق:: اي خل يموتني اني رايده هل شي
دريد:: بعدچ صغيره ليش تفكرين بالموت
ودق:: صغيره؟ ، اي صح صغيره بس الهموم الشايلتها ما يگدر يتحملها شخص چبير
ضي:: هو منو ما عنده هموم بهل دنيا؟
دريد:: من تترخص ودق من المستشفى ما ترجع للبيت اخذها لبيتنا امي هناك تهتم بيها وأمان الها وانتي هم ما ترجعين
ضي:: زين ودق فهمنا ليش ما ترجع اني ليش؟
دريد:: ليش عبالچ راح تكونين بأمان ببيتكم؟ ، خليچ يم ودق لحد ما تتشافى بشكل كامل يمنا وبعدين نشوف شلون نتصرف ويه هذا ....
دايحچي وياي واني حسيت بدوخه قويه
عبالك الدنيا داتفتر بيه
فقدت السيطره على توازني وردت اوگع واستندت ب ايد دريد والدوخه مداتروح ..
دريد:: ضييي ، ضيي شبييچ؟!!!
سيطرت على روحي گوه وبعدت عن دريد ولزمت راسي بوجع وگعدت على الكرسي وحچيت بتعب ..
ضي:: ما بيه شي
دريد:: شنوو ما بيچ شيي امشيي خل اخذچ اشوف شبيچ
ضي:: ما اريد اتحرك من مكاني ، ما بيه شي
دريد:: انتي ليش تعاندين
ضي:: مدا اعاند بس عادي اني كل مره تصير وياي هل حاله مو فد شي جديد
دريد:: واذا كل مره ليش ما ترحين تشوفين شبيچ لو انتي عادي عندچ تهملين صحتچ
ضي:: وهسه انت ليش مهتم تره اني اعرف شنو بيه عندي فقر دم لا اكثر
دريد:: ليش انتي حللتي؟
ضي:: لا
دريد:: خوش جايه تحددين حالتچ شنو وانتي اصلاً ما محلله صايرتلنا دكتوره من هسه
ودق:: ضي شبيچ شو هل ايام مادري شلونچ تتخربطين هواي ووجهچ اصفر وتدوخين
دريد:: من يمته بدت هل اعراض عدها
ودق:: مادري بس صارلها فتره طويله
ضي:: هسه شبيكم انتو داگول ما بيه شي وتره اعراض فقر الدم واضحه الشخص من يدوخ معناها عنده فقر دم هاي هي فضت خلوني براحتي
دريد:: اي ضلي عاندي
ضي:: اني عاجبني وضعي هيچ عاجبتني هل دوخه
دريد:: خليچ هيچ على عنادچ هذا
بقيت گاعده بمكاني وما اتحركت بس اوگف على حيلي ادوخ
.. بس رايده اعرف هل دوخه يمته تعوفني كل يوم دادوخ وراسي يسطرني سطر ولا فوگاها لعبان نفس
عبرت الساعات على وجودنا بهل مستشفى
وچنت مستنده راسي على الكرسي ومغمضه عيني
ومادري شلون غفيت بدون ما احس على روحي ....... گعدت على صوت حركه بالغرفه بسرعه فزيت واشوف ودق داتتحرك بمكانها ومبين عليها داتتأذى بسبب حركتها ..
ضي:: ودق گاعده؟
ودق:: اي
ضي:: شنو الدنيا صبح؟!
ودق:: لا ظهر ، شي اكيد صبح شبيچ ضي
ضي:: هو سؤال وسئلته شبيچ وهسه گليلي شلونچ اليوم
ودق:: مو كلش
ضي:: بمرور الايام راح تتحسنين وتگومين على حيلچ
ودق:: شو دريد ماكو
ضي:: يمكن بره
ودق:: لا صارلي فوگ الساعتين من گاعده وما شفته اجه
ضي:: هسه اتصل عليه واشوف
لزمت رگبتي بوجع احسها تكسرت بسبب هل نومه بس شسوي وين انام
اخذت تلفوني وفتحته چان مغلق وصارت تظهر الي الاشعارات مال اتصالات هواي من ايهاب
أول ما شفت اسمه رجعلي نفس خوف البارحه ..
ودق:: شبيچ
ضي:: هذا ايهاب متصل عليه هواي
ودق:: لااا تردييين عليه
ضي:: لا ما ارد
رحت لجهات الاتصال وطلعت رقم دريد وصرت اتصل عليه
ما تأخر هواي بالرد وجاوبني بسرعه واجاني صوته وهو يگول ..
📞.. ها ضي محتاجين شي؟
📞.. دريد وينك؟
📞.. هسه راجعلكم
📞.. شنو انت طلعت من المستشفى؟

📞.. اي رحت للبيت حته اجيب امي واجي لأن ودق تحتاج لأمي توگف وياها ما تگدرين انتي وحدچ ، اني هسه راجع بس منتظر امي تكمل وجاي ما راح اتأخر
📞.. ماشي براحتك بس خطيه خالتي راح نتعبها ويانا
📞.. يمعوده اصلاً امي تريد تجي أول ما سمعت بالسالفه أصرت عليه اجي اخذها واجيبها للمستشفى
📞.. خطيه چان ما گلت الها هسه اكيد نخبصت
📞.. قابل شگول الها اتصلت عليه وتسئلني وين بنص اليل واختفيت غير اگول الها الحقيقه لا يروح بالها بعيد وبعد شيفكني
📞.. لعد زين گلت الها چان هسه ما عافتك بحالك
📞.. اي بعد تعرفين خالتچ ، ضي اني هسه راح اسد الخط كملت الوالده
📞.. تمام الله وياك
سد الخط دريد وعفت تلفوني باوعتلي ودق وگلت ..
ضي:: شنو؟
ودق:: اريد اطلب منچ شي بس خاف تصيحين عليه
ضي:: لا ما اصيح ، احچي
ودق:: يصير اخذ تلفونچ؟
ضي:: شنو تسوين بي
ودق:: اتصل بي
ضي:: وضاح مو؟
ودق:: ها ، لااا لاا صديقتي
ضي:: اذا صديقتچ عادي بس اذا وضاح والله اكسر التلفون وما انطي الچ
ودق:: اي بس انطيني التلفون هسه
انطيته الها وصرت اباوع الها وهي أشرت الي بمعنى شكو ..
ضي:: اتصلي يلا شبيچ
ودق:: داتصل
ردت عليها صديقتها وصارت تحچي وياها ومبين من كلامها صدگ صديقتها
وگعدت تحچيلها عن الصار
گعدت بمكاني ومنتظره ودق تخلص ، طولت ..
ودق📞 .. انتي داتفهمين ليش هيچ داحاچيچ شبيچ افهميني ، اني متردده ، متأكده رايده تجين؟ ، زين ماشي خلص ما راح اعاندچ راح ادزلچ العنوان برساله ، بس استعجلي ، لا صدگيني اني زينه بس رايدتچ تستعجلين بجيتچ ، ماشي اني هسه راح اروح
باوعتلي ودق ومن بعدها سدت الاتصال وگالت ..
ودق:: شو رديلي العنوان
ضي:: شنو صديقتچ راح تجي؟
ودق:: اي مثل ما سمعتي شنو ما عاجبچ تجي؟
ضي:: لا ليش ما عاجبني بس مو چنه بعد وكت تجي هسه الساعه بالعشره الصبح العصر يكون افضل
ودق:: انتي شعليچ بيها تريد تتطمن عليه أصرت اله تجي وتشوفني ، هسه انتي انطيني العنوان وهاي هي
ضي:: اي ماشي سجلي يمچ ..
رديت الها عنوان المستشفى وين بالضبط وهي كتبته ودزته ومن بعدها مادري شنو سوت بالتلفون ورجعته الي ..
ضي:: شنو سويتي
ودق:: دامسح المحادثه والرقم من السجل
ضي:: ليش تمسحي؟
ودق:: وليش تسألين
صرت اباوع الها ببرود وغلقت تلفوني وعفته على صفحه
وگعدت بملل ومنتظره دريد وخالتي يجون بس تأخروا
بعد ما مر كل هل وقت باوعت لودق وگلت ..
ضي:: راح اروح اشوف الدكتوره
ودق:: ليش
ضي:: رايده اسئلها عن كم شغله تخصچ واسئلها بعد شگد ويرخصوچ
ودق:: ها ، لعد روحي بس لا تتأخرين
ضي:: لا ما اتأخر
طلعت من المكان ورحت ادور عن الدكتوره
گعدت اسئل ممرضه عنها وودتني الها
وصرت اسئلها عن حاله ودق وشنو من رعايه تحتاج تتقدم الها
وكم يوم وتطلع ومن هل سوالف ..
ضي:: مشكوره دكتوره
الدكتوره:: تدللين بس لا تنسين اهم شي خليها تتغذى تغذيه صحيه جسمها يحتاجله تغذيه حته يرجع مثل قبل وبصحه افضل
ضي:: ان شاء الله
ترخصت من الدكتوره وصعدت للطابق البي غرفه ودق
طلعت من المصعد بعد ما وصلت وصرت اتمشى لغرفتها
وچان گدامي شاب طويل وبنيته رياضيه ما گدرت اشوف وجهه لأن منطيني ظهره واني صايره وراه بمسافه بعيده عنه
رغم المسافه البينا بس عطره واصل لعندي وكاشخ
هذا رايح لمستشفى وهيچ انيق لعد بالمناسبات شلون؟
ما ركزت عليه لأن اني مهتمه اله لا بس لأن چان بطريقي والاستغربت منه دايمشي بتجاه الغرفه الرايده اروح الها
صرت اتسرع بخطواتي وخايفه من هل شخص بعد ما شفت هو اساساً جاي لهل غرفه
عبرته بالمسافات بركضه سريعه ورحت لباب الغرفه بدون ما اشوف وجهه
وفتحت الباب ودخلت بسرعه ورحت لودق واتنفس سريع من الركض ..
ودق:: يمه شبيچ مخترعه
ضي:: لچ ودق اكو واحد جاي
بسرعه عدلت گعدتها وحچت بكل توتر وگالت ..
ودق:: اا منو؟!
ضي:: مادري ما شفت وجهه
ودق:: يمكن غلطانه جاي لغير غرفه
ضي:: لا هو جاي لهنا اني متأكده ما غير طريقه شعنده جاي هل شخص ومنو
سمعت صوت باب الغرفه ندگ بسرعه فزيت من مكاني وودق گالت ..
ودق:: اا ا اتفضل
ضي:: اتفضل شنو؟
درت وجهي للباب ودخل هل شخص الچان رايد يجي لهل غرفه
وتجمدت بمكاني مثل الصنم وضليت فاتحه عيوني بصدمه ومصدومه حيل من الداشوفه
.. وضاح!!! ، هذا شجابه!
سلم وضاح وردت عليه السلام ودق واني ما نطقت بأي حرف ولا رديت عليه صار يمشي خطوات بتجاه ودق وحچه ..
وضاح:: الحمد لله على سلامتچ ما تشوفين شر
درت وجهي الهم واباوع لودق متوتره ومبتسمه بنفس الوقت وكل شوي تتناقل نظراتها بيني وبينه
واني بس رايده اعرف هذا شلون اجه وشلون عرف مكانا واصلاً شلون عرف بالسالفه!
بس لا ودق چذبت عليه والچانت تخابرها مو صديقتها چان وضاح؟!!! ..
وضاح:: شلونچ؟
ودق:: ما اگدر اگلك زينه ، شايف بعينك ايهاب شمسوي بيه
اباوع لوضاح قبض ايده بغضب وحچه بنبره واضح عليه معصب بس دايحاول يسيطر على غضبه ..
وضاح:: حسابه عندي وداعتچ لأخذ الچ حقچ من عنده واشوفه نجوم الظهر

ودق:: اني ما اريد تاخذلي حقي كل الاريده ايهاب ما يتعرض الي وبس
وضاح:: غصباً ما عليه ما يتعرضلچ هذا مسوي روحه رجال وجاي يتسبع على مره بس خل يصبر شوي واشوفه شلون يمد ايده عليچ
صرت امشي بتجاه ودق واباوع لوضاح وقاطعت كلامه وگلت ..
ضي:: شنو التغير؟ ، مو عود هذا صديقك؟ ، وضاح تره مداعي تسوي روحك مهتم لودق لأن انت لو صدگ مهتم الها وتخاف عليها چان عفتها ، كل الصار بسببك واختي رادت تموت وهم بسببك لو ما نقلناها للمستشفى چان هسه هي منتهيه
ودق:: وضاح ماله دخل بالصار وانتي تعرفين ايهاب شلون يتعامل ويانا هو من زمان هيچ تعامله ويانا جاف
وضاح:: لا خليها تحچي براحتها بس اني رايد ابلغها عن شي
ضي:: شنو؟
وضاح:: ودق راح تكون على ذمتي بهل شهر
ضي:: شنوووو؟!! ، انت راح تخطبهاا!
وضاح:: اي اخطبها وين المشكله؟!
ودق:: هااا؟!!! ، خطووبه!
وضاح:: مثل ما سمعتي شبيچ انصدمتي ترديني اشوفچ داتتعذبين واسكت؟ ، دراستچ راح تكمليها يمي ووجودچ يم ايهاب هذا اكبر خطر على حياتچ
ودق:: بس ..
وضاح:: صبرت هواي كافي ودق تره داتعذبيني بتأجيلچ هذا
ضي:: هووو منوو الرااح يسمحلك تخطبهاا ، ودق بعدهاا صغيره ومااا تصييير الك واطلع بره
ودق:: ضييي شنوو تطرديييي
ضي:: اي اطرده وبعدين اعرف شلون اتصرف وياچ شلون تچذبين عليه وتگليلي اريد احاچي صديقتي تاليها جايبتلي هذا وانتي تعرفين كلش زين خالتي ودريد بالطريق واذا اجو وشافوا راح تصير مشكله چبيره
وضاح:: انتي شو ما تحترمين نفسچ؟ ، گداامي وتهددين بيهااا
ضي:: لاا تدخل بينيييي وبييييين اختيييي اطلع بره ياااا حقييييير ما اريد اشوووف وجهك
وضاح:: لا علي صوتچ اكثر ونعم التربيه
ضي:: مترباايه احسن منك
ودق:: وضاح امسحها بوجهي لا تضوج من كلامها تره ضي ما تقصد
ضي:: لااا اقصد ونص عديييم التربيييه بكل صلااافه جاي لهنااا
وضاح:: اني محترمچ لأن انتي مره ما اگدر ارد عليچ ولا اسويلچ شي
ضي:: انتتتت شنووو من بشررر بس گلييي مدااتشوووف حالتهاا شلونهاا تريييدهاا تمووت بسببك
ودق:: ضي كاافي ما اسمحلچ هيچ تتجاوزين عليه تره تعديتييي حدودچ
ضي:: لاا حلوو صرتي تدافعين اله ووگفتي ضدي خوش حچي ودق تبيعين اختچ علمود واحد مثل هذا
ودق:: ماااا ااسمحلچ ضيييي
بدون وعي جريتها من ملابسها وصرت احچي بكل غضب ..
ضي:: شنوووو ماا تسمحييين اليي ل...
داكمل كلامي وما حسيت اله نسحبت من ايدي واندفعت بعيد عن ودق درت وجهي واشوف وضاح قابض على ايدي وبقوه
احاول اسحب ايدي منه وهو ولا يمه
خليت عيني بعينه وبداخلي نار ومشتعله من الغضب
وهو هم منا عصب وعيونه اله شوي تجدح نار ..
وضاح:: ايييدچ لوووو تنمد عليهااااا مره ثااانيه تنكسر فاااهمه؟!!
مصره احاول ابعد ايدي عنه واحس ايدي بدت توجعني من الضغط العليها
حس على روحه وعاف ايدي وابتعد عني
اباوع لأيدي صارت حمره بسببه
تجمعت الدموع بعيني وخنگتني العبره
شلون هل حقير يجر ايدي بهل طريقه ولا فوكاها يعلي صوته عليه وودق ساكته وما حچت شي
بس من اني حچيت عليه گبل ردت عليه وصارت تدافع اله
ودق مو مثل قبل ودق تغيرت بس حبت هل شيطان
من حبته فقدت عقلها صارت ما تعرف الصح من الخطأ
وصارت تفضل هل وضاح عليه واني اختها ومو أي اخت ، اني ضي الداضغط على روحي وداتعرض للأذيه وداتعذب بس علمود احميها هي وليان وتجي ودق ببساطه تردلي الجميل بعذاب ..
وضاح:: لا تخلينييي هسه اخذهااا واطلعهاا منااا وارووح اعقد عليهاا واتزوجهاا بعدم رضااكم ولو رضااكم مو مهم بالنسبه اليي ما دام ودق مواافقه ف ما راح يهمني رأي أي شخص
ضليت ساكته وما جاوبته ولا الي خلگ ارد عليه
اريد اسيطر على دموعي الغرگت عيني ما اريدها تنزل على خدي وتطلعني ضعيفه گدامهم
سمعت صوت جاي من وره الباب
وعرفتهم من صوتهم اجوي خالتي ودريد
وبس سمعت صوتهم مادري شصار بيه يمكن على أي دقيقه يوگف گلبي من وره الخوف
شحچي عليچ يا ودق ، شنو اجاوبهم بس يشوفون وضاح موجود
نفتح الباب واني ما اتجرئت ارفع عيني من الگاع من وره خوفي
وبس انفتح الباب اختفى صوتهم وما سمعتهم ينطقون بأي حرف .......
#يــــتبـع ...

البارت التاسع عشر
\ ضــــ{١٩}ــــــي /
•
•
•
نفتح الباب واني ما اتجرئت ارفع عيني من الگاع من وره خوفي
وبس انفتح الباب اختفى صوتهم وما سمعتهم ينطقون بأي حرف
رفعت راسي واشوف خالتي ودريد اجوي
ووضاح بكل برود مشه وما حچه شي وراد يطلع
دريد وگف بنص طريقه وجره من ياخة قميصه
ووضاح سحب ايد دريد وبعدها عنه ..
وضاح:: ناوي تتعارك بنص المستشفى هسه؟
دريد:: انت شنوو تسوووي هناا؟!!!
وضاح:: مالك دخل
دريد:: انييي ماليي دخل!
وضاح:: وخر من طريقي لا اشوهه لوجهك خليني اروح وبدون مشاكل
راد يضرب وضاح وبسرعه خالتي صارت بينهم ووضاح صار يباوع لدريد بكل برود ونظرات مستفزه
واني باقيه بنفس مكاني ولا حچيت ولا شي وبس اباوع الهم ..
رباب:: اطلع بره
وضاح:: طالع اني ، بس گولي لأبنچ لا يصير رجال براسي حته ما تنسحل كرامته
دريد منا معصب ووده يموته لوضاح وخالتي گوه داتهدء بي ووضاح يجي ويحچي هيچ
طلع من المكان وعافنا وخالتي صارت تباوع الي ولودق ونظراتها النا عجزت افسرها ..
دريد:: يوووم ماا يصير بكل مره تمنعينيي اتصرف ويه هذاا النذل حته اخلييي يحترم انتييي هيچ داااتنطييي مجاال يتماادى اكثر
ضلت ساكته خالتي وما جاوبته وضلت تباوعلنا
ودق صارت تعدل بگعدتها ومتوتره وتفرك ب أيدها بتوتر وساكته وساعه تباوعلي وساعه تباوع لخالتي ..
دريد:: ضييي ممكن افهم هذاااا شنوووو يسوووي هناا؟!
ضي:: اا ا..
دريد:: احچيييي
ضي:: اني مالي دخل بالصار بس ..
دريد:: بسسس شنوووو احچييي ضيي لاا تشلعين گلبييي گوه تحچيهاا للكلمه
ودق:: ضي مالها دخل بجيه وضاح وهي مثلكم ماتدري بي جاي واصلاً قبل شوي چانت تتعارك وياه
دريد:: وهسه تردين تقنعيني هو جاي من وحده؟!
ودق:: اا ا اني الگلت اله يجي
دريد:: شنو داتحچين؟
ودق:: ااا اايي اني الگلت اله
دريد:: لييييش؟!!!
ما گدرت اسكت ولا اگدر اضم عليهم اكثر من هيچ
راح تنكشف السالفه أول وتالي
واذا ما حچيت هسه راح تكبر السالفه بعدين ..
ضي:: اني راح احچي
دريد:: احچن شبيييچن
ضي:: دريد اهدء وخليني احچيلك شنو صاير
ودق:: معليچ انتي
ضي:: شنو معليه؟
رباب:: شنوو صاااير ، اكوو شي صااير وانتن ما تردنيي اعرفه احچن
ودق:: خاله ما صاير بس ..
ضي:: لا صااير خاله وصااير شي چبير هم زهگت واني اضمضم بهل سالفه
ودق:: انتي شنووو تردين من عندييي عوفينيي لا تدخلين بحيااتي گلت الهم انتي مالچ دخل وهاي هي
ضي:: اي ما راح اتدخل بحياتچ من اليوم افرحي بس خل يعرفون انتي تحبي لوضاح ويريد يتقدم الچ وبعدها خلص طلعيني من سالفتچ هاي لأن زهگت منچ ومن تصرفچ اليوم عرفت هل شخص گدر يلعب بعقلچ عدل لدرجه خلاچ تنسين حته اهلچ خلي يفيدچ هو اني بعد مالييي دخل بيچ لأن اصلاً راح انسه عندي اخت
دريد:: شنو هل حچي؟
ضي:: مثل ما سمعت دريد ، يرضيكم الدايصير؟
ضل ساكت دريد ومبين عليه مصدوم من السمعه
لدرجه حته مدايگدر ينطي ردة فعله للموضوع
صرت امسح بدموعي الچانت تارسه عيني
ورحت اتمشى بتجاه دريد وگلت ..
ضي:: ساعدوني ، اختي راح تضيع بسبب وضاح واني ما بيدي شي ، ما گدرت احچي لأيهاب حته يوگفها عند حدها لأن اعرف ايهاب شنو ممكن يسوي وهاي گدامكم بعد ما عرف شفتوا ودق شسوه بيها جنزها
رباب:: دريد رجعني
ضي:: خاله لاا ترحين اني اسفه اتأسف الچ نيابه عن ودق هي غلطت وادري انتي علمود مصلحتها ما تردين تكون لوضاح بس ما اگدر وحدي الها ساعديني خاله لا تعوفيني وحدي وياها وما اعرف شلون اتصرف
رباب:: انت شنو مداتسمع؟ ، دااااگلك رجعنييي
نطق دريد بعد ما چان طول هل مده ساكت ومصدوم من الصاير
وما اعترض على كلام خالتي ولا حاول يقنعها وبسرعه گال ..
دريد:: حاضر ، امشي خل ارجعچ
دارت وجها خالتي وطلعت ودريد جر حسره وصار يباوعلي ومبين دايعاتبني بنظراته
بس اني شنو سويت؟!
شنو ذنبي؟ ، ودق تغلط واني لازم اتحمل نتيجه اغلاطها!
طلعوا وخالتي مبين عليها زعلت ومو زعل عادي لا زعل ثگيل ومستحيل راح ترجع تحچي ويانا بعد سوايه ودق
لأن بالنسبه لخالتي هيچ موضوع كلش حساس
ومفروض نقدر هل شي بس شحچي على ودق الخلتني بهيچ موقف بايخ ويه خالتي ..
ضي:: ارتاحيتي؟
ودق:: ما گلت الچ تحچين
ضي:: حچيت من قهري اريد اخلص من هل عذاب الداعيشه بداخلي وداواجهه وحدي اريد شخص يساعدني حته نفتك من هذا الحقير لأن كلش تعبت واني داكتم كلشي بداخلي
ودق:: خلي خالتي تزعل ، كم يوم وترجع تحاچينا
ضي:: ليش تعتقدين الشي السويتي عادي حته كم يوم وترجع تحاچينا؟ ، انتي تعرفين وضاح بالنسبه لخالتي شنو وهيچ موضوع بالنسبه الها مصيبه چبيره ، ليش هيچ ودق؟ ، ليش تخلني دائماً بوجه المدفع انتي واختچ
ودق:: انتووو شنووو ما تحترموون مشااعر النااس اني احبه وهو يحبني وين الغلط بالموضوع وگدامچ گال راح يتقدم اليي اريد اعرف المشكله وين؟ ، الى متى تضلون تظلمون بوضاح وتطلعوا مو خوش انسان وانتو الملائكه تره ما يصير هيچ

ضي:: ما راح ارد على كلامچ بس ما اگول غير حسبي الله ونعم الوكيل الله ينتقم من عنده گدر يغيرچ علينا وخلاچ ترفعين صوتچ عليه وما تحترميني
ودق:: انتي ضايجه من كلامي قبل شوي؟
ضي:: ضايجه منچ ، شفتي شلون رفع صوته عليه وسحبها لأيدي وشوفي ايدي شلون صارت حمره بسببه ولحد هسه تأذيني و..
داكمل كلامي وگبل قاطعتني بكلمه تستاهلين
سكتت وضليت صافنه بوجها ..
ودق:: لا تباوعيلي هيچ اي تستاهلين
ضي:: استاهل؟ ، انتيي اصلاً مفرووض تعتذرييين الييي شنوو هل كلااام
ودق:: اعتذر على شنو؟ ، انتي اجيتي وردتي تمدين ايدچ هم وتعرفين اني مريضه ووضاح ما سوه شي غير سحبچ عني لا تسوين دراما
ضليت اباوع الها ومنصدمه منها ومن كلامها
لا هاي مو ودق ، ودق اختي وين؟
هاي بنيه تشبه ودق بس الروح البداخلها مو ودق
ودق ما تحاچيني هيچ ولا ودق التفضل شخص مثل وضاح عليه
ودق التعتبرني امها وكل ما ضوجها شي تجي تشكيلي عنه وتحچيلي شنو صار بيومها
وما تقبل شخص يأذيني لو يجرحني
ودق العدها اهلها اهم من كل شخص بهل دنيا
ما اگدر اصدگ الگدامي تكون ودق .....
ما گدرت ارد عليها ولا اگدر استحمل اضل يم ودق واسمع كلامها المثل السم
اخذت تلفوني ورحت على رقم رهام واتصلت بيها
وگعدت انتظر منها الجواب لحد ما اجاني صوتها ..
📞.. ضيي!
📞.. اي ضي ، ايهاب موجود؟
📞.. لا ماكو طلع يدور عليچن ولچن انتن وييين رحتن
📞.. راح احچيلچ بس رجائاً حقارتچ هاي خليها على صفحه وساعدينا شوي
📞.. دحچييي وين انتوو
📞.. احنا بالمستشفى بس لا تحچين لأيهاب وتعالي للمستشفى ---------- انتي تندليها ، اريدچ تبقين يم ودق اني راجعه
📞.. اي ماشي هسه اجي
📞.. ونبهتچ لا تحچين لأيهاب شي
📞.. ايهاب ماكو شلون احچيله ولا تخافين ما راح يعرف هسه جايه
📞.. ماشي ...
سديت الخط وعفت تلفوني
جريت حسره وحچيت ..
ضي:: راح تعرفين بيوم من الايام اني سويت هواي اشياء علمودچ وضحيت حته بنفسي حته ما توصل الچ اذيه من الناس الچانوا منتظرين انكسارنا
ودق:: قبل چنت احس صدگ انتي داتحميني بس هسه اكتشفت هذا مجرد احساس واذيتي جايه كلها منچ
ضي:: ما راح اناقشچ بعد خلص انتهت وياچ محاولاتي ودق سوي التردي ولو عسى اشوفچ بنص الهلاك ما راح اتدخل راح اشيل ايدي عنچ وعن حياتچ ، انتي حره بقراراتچ وهسه راح تجي رهام هي الراح تبقه يمچ بدالي
درت وجهي ودامشي للباب ووگفتني بصوتها وهي تگول ..
ودق:: راح تعوفيني؟
ضي:: يمچ الممرضات وانتي بأمان هنا ما يحتاج ابقه ومثل ما گلت الچ رهام جايه
ودق:: بس اني ما اريد رهام
ضي:: ولا ترديني
كملت طريقي وطلعت
ما اگدر اعوف ودق
بس هي الجبرتني اعوفها
ومجبوره اخلي رهام يمها بعد ما اگدر ابقه يمها اكثر
طلعت من المستشفى وگضيت الطريق كله مشي
لأن ما چنت شايله فلوس وياي والحمد لله اندل البيت هاي مو أول مره اروح بيها لهل مستشفى
رايحتلها من قبل وبالنسبه الي هل مستشفى مشؤمه لأن توفوا بيها امي وابوي ....
وصلت للبيت بعد الطريق المتعب هذا
فتحت الباب ودخلت ورحت دخلت جوه للصاله
أول ما دخلت شفت ليان گاعده بالصاله وحدها ..
ضي:: ليان؟
وصلت للبيت بعد الطريق المتعب هذا
فتحت الباب ودخلت ورحت دخلت جوه للصاله
أول ما دخلت شفت ليان گاعده بالصاله وحدها ..
ضي:: ليان؟
ليان:: يمعوده تأخرتي
ضي:: شتسوين هنا وليش منتظرتني
ليان:: شبيچ كلما تشوفيني تگليلي شتسوين هنا تره والله مثل ماهو بيت ابوچ يصير بنفس الوقت بيت ابوي واني گلت الچ البارحه عندي انشغالات وما گدرت ابات بس اليوم اجيت من الصبح حته اطمئن على ودق وانتي خوش سمعتي كلامي لا اتصلتي ولا طمنتيني
ضي:: اني بيا حال حته اگعد اطمن بيچ
ليان:: زين گليلي شصار على ودق ومنو اخذكم؟
ضي:: ودق ما بيها شي زينه كم يوم وتطلع من المستشفى والوصلنا دريد اني اتصلت بيه وگلت اله يجي وخطيه ما قصر
مشيت بتجاه ليان وگعدت يمها وميته تعب من المشي ..
ضي:: متت تعب رجلي راحت من المشي
ليان:: ليش رجعتي مشي؟!
ضي:: اي حبيبتي ما شايله فلوس وياي ولا اكو شخص يوصلني
ليان:: لعد مو گلتي دريد وصلكم
ضي:: ابشرچ حبيبتي انكشفت قصه حب روميو وجوليت وخالتي عود جايه تشوف اختچ العوبه ومن عرفت بالسالفه أصرت على دريد يرجعها بنفس اللحظه الأجت بيها
ليان:: وشلووون عرفت!
ضي:: اني حچيت
گلت الها اني الحچيت وما احس اله ضربه قويه براسي وصارت تضرب بيها وتكفخ
لزمت ايدها ودفعتها عني ..
ضي:: شبييييچ
ليان:: غبيييه انتيييي لووو شنوو
ضي:: لا موو غبيه اختچ الغبيه گالت راح اتصل بصديقتي انطيتها تلفوني واتصلت بوضاح وصارت تحچي وياه عود هو صديقتها واني صدگت وبعدين اجه هل حقير ويه جيه خالتي ودريد وانجبرت احچي
ليان:: لا الظاهر صاير اكشن هناك
ضي:: دروووحي انتي ام الاكشن مادري شلونچ وتعالي البومه مال بيت وين طلعت لو بعدها

ليان:: طلعت وراحت وعلى گولتچ صدگ بومه اتوسلت بيها اروح وياها ما تقبل تگلي ايهاب راح يسوي مشكله من ما يلگانا ثنينا على الاقل تكونين انتي بالبيت حته تگليله رهام طلعت بس ما تعرفين وين
ضي:: اي زين تسوي لأن ايهاب يعرف رهام تطلع هواي ف ما راح يحچي بس اذا انتي رحتي وياها راح يعرف بيكم تعرفون بمكان ودق وندخل بمشكله جديده
ليان:: هسه شنو نگول لأيهاب تره بعده يدور عليچن وبس يرجع صدگيني راح يموتچ هنا واذا حچيتي هم راح يموتچ بس بالأضافه تموت وياچ ودق
ضي:: خل يجي والله كريم لأن ما اعرف شنو من عذر اطلعه اله
ليان:: تعالي خل احچيلچ شنو صار وياي البارحه
ضي:: اختچ بالمستشفى وانتي الچ خلگ تسولفين؟
ليان:: لعد صار النا ساعه شنو نسوي نلعب؟
ضي:: احچي وخلصيني شكو
ليان:: هاي العگربه العجوز
ضي:: منو؟
ليان:: ضرتي منو غيرها البارحه كمشتني وضربتني بالچفچير الحقيره ووين اليوجع ما رحمتني زورگتني تزورگ
ضي:: واني اگول ليش مزورگه
ليان:: وليش ما سئلتي
ضي:: عبالي عبدالرحمن چان گلت تستاهلين بس ميخالف مرته الضاربتچ ماكو فرق هم تستاهلين
ليان:: يا ضي هاي شبيچ عليه
ضي:: حبيبتي اني هل ايام متنرفزه منچ ومن اختچ ف كلشي يصير الچن عادي وتستاهلن حته هاي ودق المشعوذه هم تستاهل الصار الها ومتندمه لأن انقهرت عليها بالبدايه
ليان:: عشتوو هاي شغيرچ علينا
ضي:: هسه دكملي سالفتچ اريد اضحك عليچ
ليان:: ضي شبيچ انتييي
ضي:: دكمليي
ليان:: اي اكمل هاي اجتي مثل المخبله تضرب بيه وبناتها چانن جايات ومحد تدخلت وتدرين ليش ضربتني
ضي:: ليش؟
ليان:: عبالها اني حامل تگلي ما اريد يصير عند ابنائي اخو منچ بلا هاي شتحچين وياها؟ ، على كيفها سوتني حامل هاي لأن لعبت نفسي
ضي:: لعبت نفسچ؟
ليان:: اي وراسي صار يوجعني شوي بس ما چنت نايمه عدل لهذا السبب راسي صار يوجعني ولعبت نفسي لأن اكلت بيض خربان هاي الحقيره تگلي سويتلچ ريوگ عبالي اعتبرتني وحده من بناتها والله هداها تاليتها مسويتلي بيض خربان تفف عليهاا وجه البومه
ضي:: هسه عوفينا من وجه البومه هاي واحچيلي وين المشكله من راسچ يوجعچ وتلعب نفسچ
ليان:: ماكو مشكله حبيبتي بس تعرفين هاي اعراض الحمل وياها تقلبات مزاج ومن هل سوالف
ضي:: ليش التدوخ وتلعب نفسها هاي حامل؟
ليان:: ٩٠% تگدرين تگولين اي بس تعالي ضي ما تصورتچ هلگد غبيه اعراض الحمل ما تعرفيها
ضي:: احترمي نفسچ غبيه شنو تره اني اعرف بس داريد اسئلچ اذا اكو اعراض غيرهن
ليان:: شمدريني هن هذني الاعرفهن والشسمها
ضي:: شنو الشسمها
ليان:: دسكتيي شگد تسئلين انتي واصلاً شكو تسئلين عن اعراض الحمل شعندچ
ضي:: ها ، لا ماكو شي بس هيچ فضول
صارت تباوعلي وسكتت
واني كذلك سكتت وكلام ليان قلقني صراحه
اني اعرف هل اعراض من اعراض الحمل
بس ابد ما اجه ببالي هل تفسير للأعراض الداتصير الي
معقوله يكون البالي صحيح؟ ، لا ياربي ان شاء الله ماكو أي شي حقيقي من الدافكر بي مستحيل يصير هل شي ومستحيل احمل من قيس اني داشرب مانع بس مره ما اخذته وما معقوله بسبب مره وحده يصير هل شي
ضليت افكر وانزرع الخوف بداخلي
وغرگت ببحر التفكير وما يقاطعني غير صوت ليان وهي تگول ..
ليان:: اي وبعدين ، هييي انتييي اني ويااامن داحچي
ضي:: بسم الله شبيييچ انتييي فزعتينيي
ليان:: داحچي وياچ وانتي ما معبرتني
ضي:: شگد تسولفين انتي گليلي شنو تريگتي اليوم وبس تلغين
ليان:: مو البيض الخربان مال بارحه مأثر عليه
گمت من مكاني ومنزعجه
اني وين افكر وهي وين تفكر
طلعت من الصاله ورحت صعدت لغرفتنا
دخلت وبدلت ملابسي وخليت تلفوني على الشحن
وگعدت ارتاح وكل شوي بالي يروح واگعد بس افكر
ياربي شنو هل سالفه الطلعت الي صفح
بلا شي اني ٢٤ ساعه افكر ورايده اريح بالي من التفكير وما اگدر نوبه طلعتلي هل سالفه مادري منين
صار عندي مثل الهوس وخايفه من هل شي
لو بالصدگ طلعت حامل هاي بحد ذاتها كارثه
شلون راح اتصرف؟
وشلون راح اضم السالفه؟
وشلون افاتح قيس بهل موضوع؟
.. هسه شبيه اني دافكر شنو اسوي واني اصلاً ماعرف اذا صدگ لو لا ، بس ياربي شسوي الاعراض الداتصير الي مو طبيعيه
المرض محد يتمناه بس اني هسه اتمنى اطلع مريضه وداتصير وياي هل اعراض بسبب أي مرض بس ما يكون حمل لو صار معناها راح اروح بستين الف داهيه
عبر من الوقت ساعتين بالضبط
واني ضاله بغرفتي وما طلعت منها طول هل وقت
وبس صافنه لحد ما سمعت صوت التلفون يدگ
عفت تفكيري على صفحه واخذت تلفوني وشفت دريد دايتصل عليه
رديت عليه بتردد واجاني صوته ..
📞.. الوو
📞.. اا ا الو
📞.. ضي شلونه الوضع يمكم؟
📞.. اني مو بالمستشفى ، رجعت
📞.. رجعتييي؟! ، واختچ شلووون عفتيهاا وحدهاا
📞.. مو وحدها رهام يمها ورجعت
📞.. وشلون ترجعين للبيت تره خطر عليچ
📞.. ايهاب بعده ما راجع
📞.. ضي حته لو خالتي چانت يمها لازم ترجعين وتبقين يم اختچ ما يصير هيچ تعوفيها وترجعين واني العصر راجع للمستشفى بس خل يهدء الوضع
📞.. ليش شنو صاير حته يهدء الوضع؟

📞.. شنو تتوقعين يصير بعد السمعته امي؟ ، ضي امي منصدمه من الصار ومو بس هي حته اني ما توقعنا هل شي يصير ابد تدرين السوته ودق بالنسبه لأمي مثل الغدر عدها لو طاعنتها بظهرها ولا مسويه هل سوايه
📞.. دريد اني اسفه لا تزعلون مني وگول لخالتي اني مالي دخل بالصار ما اگدر استحمل زعل خالتي
📞.. على شنو تتأسفين؟ ، ضي انتي مالچ دخل وامي ما زعلانه منچ بس هي من الصدمه هيچ اتصرفت وتره الذنب مو ذنبچ
📞.. لا ذنبي لأن اني ما گدرت اوگف ودق عند حدها بس صدگني دريد حاولت وعجزت من المحاوله وودق ما تسمعلي ومن يوم ما دخل بحياتها وضاح صارت حته احترام ما تحترمني وتغيرت عليه صارت تحسسني اني عدوتها مو اختها
📞.. استغفر الله ، مادري شنو احچي ولا اعرف شنو اعلق على هل موضوع ، هل نذل شلون گدر يتجرء ويدخل بحياتكم
📞.. دريد اني اريد اگلك شي بس مو تزعل
📞.. شنو احچي
📞.. وضاح من زمان عنده تواصل ويانا
📞.. شنووو؟!!
📞.. بس ويه ايهاب احنا ما نحچي ويه ولا نشوفه وحته اني ما شايفته غير كم مره وبالصدفه
📞.. يمته صااار هل حچي؟
📞.. گلت الك من زمان حته قبل لا يتوفى ابوي الله يرحمه وعلاقه ايهاب ووضاح بذيچ الفتره چانت زينه واكو تواصل بينهم بس ما اعرف شنو السبب الخلاهم فجأه يتواصلون ويه بعض
📞.. الظاهر اكو هواي اشياء ضاميها علينا ، ضي انتي من يمته تضمين عليه؟ ، چان المفروض تحچيلي
📞.. كلشي چان مستور حچيته الك وانكشف هاي كل ما بالسالفه ماكو شي بعد واني هسه محتاجه مساعدتك وياي ساعدني عفيه تره ودق بعد ما اگدر الها وماكو شخص يساعدني وچنت بالعه الموس وساكته لأن اعرف بس احچي لأيهاب يموتها وهاي بدون ما احچيله ودخلها مستشفى لو حاچيه چان شصار
📞.. لا تشيلين هم خليها عليه اني الراح اتصرف ، ولو ما اطيق اشوف وضاح بس لخاطرچ راح اقابله وراح احچي وياه واعرف شلون اتصرف وياه
📞.. بس بدون مشاكل عفيه
📞.. تعرفيني اني ما احب المشاكل ولا احب اتعارك اله اذا الشخص تجاوز حدوده
📞.. شكراً دريد ما اعرف شلون اشكرك تعبتك وياي بالمستشفى وفوگاها صار هل موقف گدامك وبعدك داتساعدنا
📞.. ما اريد اسمع هل حچي مره ثانيه گلت الچ هذا واجبي والصار ما يمنعني اساعدكم انتي مالچ ذنب بالصار وودق مثل اختي الصغيره اعتبرها مثل شهد مو معناها غلطت لازم ادور وجهي وامشي لا ابقه واگف وياها واساعدها واعلمها الصح من الخطأ
📞.. ياريت كل الناس مثل طيبه گلبك
📞.. شدعوه عاد مو لهل درجه
📞.. لا والله لهل درجه
📞.. يلا ضي اني هسه اترخص محتاجه شي ثاني؟
📞.. لا سلامتك الله وياك ..
سد الخط وعفت تلفوني
ما حسيت روحي وحدي بهل مره لا داحس دريد وياي وراح يگدر يساعدني ....
نزلت جوه بعد ما خلصت المكالمه
وأول ما نزلت لگيت ليان بالمطبخ داتحمي الاكل
اتجهت للمغسله وچان اكو كم ماعون گعدت اغسل بيهم وحچيت ..
ضي:: الچ نفس تاكلين
ليان:: حبيبتي قابل شسوي ادري اختي بالمستشفى بس شنو احرم نفسي من الاكل جوعانه
ضي:: لا اكلي ما حچيت شي
ليان:: چنه احد اجه ، سمعتي؟
ضي:: لا ما سمعت شنو الباب انفتح؟
ليان:: اي
ضي:: لياان شسووي خاف هذا ايهااب
ليان:: انتي شكو نزلتي چان بقيتي فوگ
ضي:: شمدريني راح يجي هسه لو ادري چان حبست روحي فوگ بس شسوي بعد حظي اغبر
ليان:: دروحي شردي فوگ قبل لا يدفنچ
عفت البيدي وبسرعه طلعت من المطبخ اركض
رحت للممر ورايده اصعد وسمعت صوت باب الصاله انفتح
ما اهتميت واستمريت بس اركض لحد ما حچه ايهاب وگال ..
ايهاب:: ماكو جني وراچ يركض
وگفت بمكاني ويمكن لو يذبحوني ما راح يلگون بيه قطره دم ..
ايهاب:: تردين توگعين من الدرج حته تتكسرين مثل اختچ؟
درت وجهي اله واتنفس سريع من الركض
اباوع اله ومستغربه من وضعه
خشمه طاگ دم وحالته حاله ومبين عليه متعارك لأن وضعه مو طبيعي
بس الاستغربت منه اكثر ليش دايحچي وياي بهدوء؟ ، معقوله هذا ايهاب؟
طلعت ليان من المطبخ ووگفت يم الباب وصارت تباوع النا وساكته ومبين من وجها متوتره ..
ضي:: شش ش شبيك
ايهاب:: شنو شبيه؟
ضي:: ليش هيچ وضعك شنو متعارك؟
ايهاب:: معليچ وروحي منا
ضي:: اا ا..
ايهاب:: انتي شنو تعودتي على الضرب ما ترتاحين اله تنكتلين؟ ، داااگلچ روووحي
ضي:: اي رايحه ..
ايهاب:: قبل لا ترحين هاي اختچ وين
ضي:: ايهاب اني طلعتها لأن ..
ايهاب:: وشبيچ هيچ متوتره احچيلي بيا مستشفى بالضبط
ضي:: شعرفك هي بالمستشفى
ايهاب:: عرفت
ضي:: اني ما رايده اگلك هي وين لأن اعرف انت راح تأذيها
ايهاب:: لا تسون روحچن خايفات ومادري شنو لأن انتن ما تخافن من شي وما رايد أذيها ولا شي بس رايد احچي وياها كم كلمه
سكتت وضليت ساكته وواگفه بمكاني
أشر الي بمعنى روحي وبسرعه رحت وصعدت لغرفتنا
دخلت للغرفه ومصدومه من تصرف ايهاب
مستحيل شنو هاي من يمته ايهاب يتصرف وياي هيچ
ايهاب اذا ما رفع صوته وما مد ايده ما يطلع ايهاب
وخصوصاً السويته اني بالنسبه لأيهاب جريمه

توقعت اليوم جنازتي بس مادري شنو صار الله هداه لو شنو؟ ..... حسيت بأيد على كتفي وفزيت بخوف واباوع لليان واگفه ..
ضي:: شبيييچ فزعتينييي يمته اجيتيي ويمته دخلتيي؟
ليان:: شبيچ تره دخلت من الباب ما عندي قدره خارقه خلتني اخترق الحايط بس انتي السرحانه شسوي الچ اكيد ما تنتبهين اذا اجيت أو لا
ضي:: وهسه شتردين
ليان:: هذا اخوچ شبي ما احسه طبيعي والصار قبل شوي اساساً مو طبيعي شو ما سوه هوسه مثل كل مره
ضي:: مصدومه مثلچ بس بعد احسن لأن مالي خلگ مشاكل وجسمي يوجعني مو مال ضرب
سكتت وما حچت شي واني گعدت ارتاح
ومر هذا اليوم بدون ما اروح لودق ولا اسئل عنها حته بأتصال
ثاني يوم مر وثالث يوم هم مر لحد ما اجه رابع يوم ....... سمعت صوت جاي من الصاله واني چنت بالمطبخ امسح بالگاع
عفت الماسحه من ايدي ورحت اشوف شكو
دخلت للصاله وأول ما دخلت شفت رهام جايه وودق مرخصيها من المستشفى ..
رهام:: گعدي ارتاحي
ودق:: اريد اروح لغرفتي
رهام:: اي هسه گعديلچ شوي وبعدين روحي
ضي:: شنو رجعتوا؟
رهام:: اي رجعنا شنو عميه ما تشوفين؟
ليان:: منو وصلكم
رهام:: دريد وصلنا وراح خطيه مشغول بس رغم انشغاله بقه يمنا وما عافنا مو مثل اخوچن ٢٤ ساعه بس يتحجج ب انشغالاته المادري شنو هي اصلاً
ليان:: ودق جوعانه حته اگوم اسويلچ اكل
ودق:: لا والله كلشي ما اشتهي هناك گوه اكل وغصب هم ، نفسي مسدوده
ليان:: بس ما يصير ، ضي روحي سويلها اكل اكيد جوعانه
ضي:: حبيبتي هذاك المطبخ وخل تسوي الروحها مو خدامه الخلفچن اني وتره انتي الگلتي اسويلچ اكل مو اني الحچيت
ليان:: هاي شبيچ ضي واني اتصورت راح تاخذين ودق بالاحضان
ضي:: لا احضان ولا شي ولو بيدي اخذها بالدفرات بس ايهاب ما مقصر وياها
ليان:: ضييي
ضي:: وجع شكو؟
رهام:: هاي اختچن صارلها قرن تمثل دور الحنيه هسه انگلبت عليچن امداچن وتستاهلن الف مره اگول الچن سمعن كلامي ولا تمشن وراها چنچن قطيع
ليان:: رهام احترمي نفسچ شوي تره ما متجاوزين عليچ
ودق:: لا صحيح كلامها من صدگ امدانا بس خل اگلچ شغله ضي الچنتي خايفه من عنده راح يصير وغصب عنچ هم
ضي:: وبلا شنو هل شي الچنت خايفه من عنده
ودق:: انتي اكبر مخاوفچ اكون من نصيب وضاح بس للأسف خابت ظنونچ وراح اتزوجه
ضي:: هه هاي اذا ايهاب خلاچ
ودق:: وشنو رأيچ لو اگلچ ايهاب دايجبرني على هل شي ومايدري اني من ذاتي موافقه؟
صفنت بوجها ومصدومه وودق صارت تباوعلي بكل برود وگالت للرهام تاخذها لغرفتها
اخذتها وعافني واگفه
مستحيل ، شلون ايهاب وافق بهل سهوله؟
اني اتوقعت بعد الصار مستحيل ايهاب يوافق على وضاح لو اجه بدون حب چان جبرها لودق عليه بس السالفه الصارت بينهم تمنعه يوافق شلون گدر يوافق بهل سهوله؟
ايهاب شنو دايصيرله هل ايام ليش اتغير فجأه!
واتغير بالوقت الاني اريده يكون بي ايهاب النعرفه
بس ما اگول غير امده حظي عمره ما اتعدل هل حظ بكل مره ما يحالفني الحظ ....
بعد ما ودتها رهام للغرفه رجعت الي واخذتني من ايدي وگالت تريد تحاچيني ما عاندتها ورحت وراها وودتني لغرفتها
أشرت الي بمعنى دخلي ودخلت واجت دخلت وراي وسدت الباب ..
ضي:: اذا چان الموضوع يخص قيس ف من هسه اني طالعه
رهام:: ليش بشنو ترديني احاچيچ؟
ضي:: اوووف تره مليييت من عندچ ومن عنده ومنكم كلكم
رهام:: انتي تدرين هذا رجلچ ولازم تسمعين كلامه ولازم تنطي حقوقه
ضي:: عن أي حقوق تحچين؟ ، هو بالبدايه خل ينطيني حقوقي ويحترمني يلا احترم حقوقه تره هذا ماخذني بس علمود يتونس بيه
رهام:: لعد على شنو علمود جمال عيونچ
ضي:: رهام اني زين مني دامر عليه كل اسبوع بهل فتره لأن تعرفين هل فتره شگد مريت بضغوطات ولحد هسه دانضغط اكثر وكل شوي تطلع الي سالفه صفح وهسه استلمي طلعت الي سالفه ودق
رهام:: هسه انتي شعليچ بودق ايهاب وموافق انتي شكو
ضي:: لا اني مزهريه هنا ، لچ غييير امييي وصتني عليهن
رهام:: وصتچ عليهن وهيچ داتسوين
ضي:: مثلچ غير وبعدين لا تدخلين بيني وبين خواتي اني اعرف بمصلحتهن
رهام:: اگول احترمي نفسچ لا اطلعچ بره غرفتي تسحل
ضي:: تره اني ما ميته على جيتي بغرفتچ هي كلها غرفه خايسه حته تنظيف گوه تنظفيها بس غير انتي گلتي الي رايدتچ وهسه مادام كملتي من موضوعچ التافه ، اني هم رايده احاچيچ بشغله وهم تتعلق بهذا
رهام:: ياهو قيس؟
ضي:: لا العفريت طبعاً قيس ، اسمعيني زين واني مداشاقه وياچ بهل موضوع اريدچ تاخذي بكل جديه لأن اني راح اتخبل من كثر التفكير وميته خوف من هل موضوع
رهام:: اي دحچي شكوو
ضي:: رهام اني داشك بروحي حامل
رهام:: حااامل؟!!!
ضي:: نصيييي صوتچ راااح تفضحينيي
رهام:: لچ شلوون
ضي:: اگول الها نصي صوتچ تعلي
رهام:: عزه بعينيي
ضي:: لا توتريني وگليلي شسوي
رهام:: يعني شنو تسوين؟ ، غير تتأكدين بس ادعي هل شي مو صحيح لأن تعرفين شنو راح يصير
ضي:: بلا شي اني خايفه كافي تخوفين بيه

رهام:: ما اخوفچ ولا شي بس لازم تدبرين حل شنو الداسمعه انيي هاي مصيبه بحد ذاتها تدرين لو يدرون شنو راح يسوون بيه راح يطردوني
ضي:: وانتي هذاا الهمچ!!! ، يطردوچ! ، زييين وانيي شنوو ما تفكرييين بيه شنو راح يصيررليي
رهام:: شنو يصيرلچ ما يهمني لأن بكل الاحوال تستاهلين بس اني لا تدخليني بالسالفه
ضي:: شنوو ما ادخلچ بالساالفه وكل الصار بيه بسببچ
رهام:: لچ نصي صوتچ ادبسزز جايه تگلي اني حامل جايبتلي مصيبه وفرحانه بيها
ضي:: فرحانه بيها؟!!! ، افرح بشنوو بحظييي؟!!!
رهام:: اششش كافي اني اعرف شلون اتصرف اصبري عليه منا للعصر واجيبلچ اختبار للحمل وشوفي وبعدين نتأكد عند الدكتوره حته نطمئن فرد مره
ضي:: رهام ساعدينيي عفيه طلعينيي من هل بلوه
رهام:: هسه شبيچ انتيي شصاار تره بعدچ ما تعرفين بروحچ حامل لو لا من يمچ تحچين
ضي:: اعراض الحمل داتطلع عليه شنو داحچي من يمي ما ملاحظه اني هل فتره شلونه وضعي؟
رهام:: كافي وطلعي بره وخلي السالفه عليه
ضي:: واذا طلعت صدگ حامل؟
رهام:: شبيچ انتي ترحين للاحتمال الاسوء يمكن مو حامل وعود اذا طلعتي حامل بعدين نشوف شنو يصير
ضي:: رهام وعديني ما تعوفيني بهل بلوه وحدي
رهام:: ما اعوفچ ويلا طلعي بره ولا تحچين هل شي لأي احد حته لو خواتچ بقي هل سر بيني وبينچ
ضي:: محد يعرف بسالفه قيس بس وعديني
رهام:: شلزگتييي الي بالوووعد طلعييي لاا هسه اني الافضحچ مو غيريي
ضي:: لاا خلص طالعه طالعه ..
طلعت بسرعه من غرفتها وما احچي عن خوفي
اتمنى من كل گلبي لا من اعماق گلبي ما اطلع حامل
اذا طلعت حامل شنو اسوي وشلون اتصرف؟
واني متأكده رهام أول شخص راح تعوفني بس مادري شلون متأمله بيها تساعدني ....
وضليت على هل حال قلق وخوف للعصر
حته واضح عليه الخوف وكل شوي تجي ليان تسئلني واطلع الها عذر
جابتلي رهام اختبار حمل ورحت اسوي وايدي بس ترجف خايفه ياربي شسوي لو طلعت السالفه صدگ .... اباوع اله وما اعرف شنو هذا الطلع الي اني حامل لو لا؟
طلعت من الحمام ولگيت رهام منتظرتني قريب من الباب
وأول ما شافتني اجت ركض الي وگالت بفارغ الصبر ..
رهام:: بشريي مو حااامل مو؟!!
ضي:: اا ا اني ماعرف شي ومداعرف شنو هذا الطلع الي شنو يعني؟
اخذته من ايدي بسرعه وصفنت بيه واني اباوع عليها وگلبي دگاته سريعه واريدها بس تنطق وتگلي شكو
تعابير وجها انگلبت فجأه وانخطف لون وجها
واباوع لأيدها ترجف رجفه مو طبيعيه
وحچت بصوت متوتر وگالت ..
رهام:: اا ا انتي حح ح حامل ضي
ضي:: شنو داتحچين؟
تقربت من يمي وجرت نفس عميق وكأنما مقطوع عنها الاوكسجين لمده طويله ..
رهام:: شايفه هل خطين؟
ضي:: اا ا ايي؟
رهام:: معناها انتي حامل
حسيت روحي راح اوگع وبسرعه لزمت بأيدها
ومداگدر اسيطر على روحي واريد احچي ما اگدر ..
رهام:: اهدئي ضي اهدئييي سيطريي على نفسچ لا تضعفييين بس يشوفوچ هيچ راح يعرفون بالسالفه تمااسكيي نفسچ
وگعت بالگاع واحس روحي مختنگه
واشهگ واريد بس اجر الي نفس والدموع اجتمعت بطرف عيني ..
رهام:: ضييي لاا تفضحينااا گومييي لااا تسوووين هيچ يمكن يطلع غلط وانتي ما بيچ شيي تره هم مرات يخطأ اني باچر ادبر الچ موعد عند الدكتوره ونشوف اذا صدگ لو چذب
اباوع الها والدموع صارت تنزل من عيني عشره عشره واحس بكتمه وگلبي يوجعني ما حسيت على روحي وصرخت صرخه بوجع رجت البيت رج
ما احسه خبر
لا احسه خنجر وطعن بگلبي ..... بسرعه خلت ايدها على حلگي واني ابچي بحرگه گلب اليشوفني عبالك فاقده الي عزيز بس اني ما فاقده عزيز لا اني فقدت روحي بأكملها .....
سمعت صوت جاي من ورانا ورهام تحاول تهدء بيه ومتوتره ..
رهام:: لچ گومييي
ايهاب:: شصااير؟!!! ، شنووو هل ازعاااج
رهام:: هاا لا ولا شي روح انت مو گلت رايد تطلع ما ترووح؟!!
ايهاب:: هاي شبيهااا احچييي
رهام:: مااا بيهااا شيي روووح
ايهاب:: احچيييي شبيهااا ضيي
رهام:: يمعووود مااا بيهااا شييي بس رووووح
ايهاب:: ما دام مصره عليه اروح معناها صاااير شيي
سحبني من رهام بكل قسوه وهو شايف حالتي شلونها
گومني من الگاع تجرجر وباوع بعيني بكل غضب وحچه ..
ايهاب:: احچيليي شنوو صااير لا وروح ابوي اخلي دمچ مطشر هنا
رهام:: ايهااااب عوفهااا شااايف شلوون حالتهاا انت شلوون تحاچيهااا هيچ
ايهاب:: عاجبچ تموتين وياها؟!! ، وانتييي احچييييي شنووو انخرستييي
#يــــتبـع ...

البارت العشروون
\ ضــــ{٢٠}ــــــي /
•
•
•
رهام:: ايهااااب عوفهااا شااايف شلوون حالتهاا انت شلوون تحاچيهااا هيچ
ايهاب:: عاجبچ تموتين وياها؟!! ، وانتييي احچييييي شنووو انخرستييي
ضي:: اا ا..
راد يمد ايده عليه ورهام دفعته عني بسرعه
ووگفت گباله وصاحت بوجهه ..
رهام:: عوووفهاااا ومعليييك بيهااا البنيه مااتت صديقتهااا وانت تعااملهاا هيچ صدگ گلبك قاااسي شلون تتصرف ويه اختك هيچ وهييي منهاااره هاي بداال ما تطبطب عليهاا وتهدئهاا وتعرف شنوو المبچيهاا
ايهاب:: تردين اتعاامل ويه هذنيي بأحتراام؟!! ، انيي من ودق وغسلت ايديي من عدهن صرت كل ماا اشوف دمعه نازله من عينهن معناها اكو ورااهاا مصيبه
رهام:: ضي مو مثل ودق ما تبچي على سوالف تافهه على حب ومادري شنو لا ضي دموعها ما نزلت هيچ عبث
هدء ايهاب وصار يباوعلي ببرود ومن بعدها دار وجهه وراد يمشي ..
رهام:: عادي عندك تعوف اختك منكسره وتمشي وتروح؟
ايهاب:: صارلچ ساعه تلحين عليه اروح وهسه تگليلي لا تروح ، عندچ انفصام انتي؟
رهام:: قبل شوي خفت على ضي لأن انت اجيت وناوي تضربها وهي ما مسويه شي بس هسه عرفت شنو سبب بچيها ليش ما تگعد تواسيها
ايهاب:: ما فارغلچن بس ما گلتي الي شنو هل اهتمام النازل عليچ فجأة
رهام:: مجرد انكسر خاطري عليها صحيح اني ما اهتم الهن هواي بس على الاقل گلبي هم يحن عليهن خوما مثلك
ايهاب:: ماكو سبب يخليني اسكت الچ غير انتي خالتي ، من رخصتچ
مشه وعافنا وابد ما اهتم لحالتي بعد ما عرف السبب أو العذر اگدر اسمي
باوعتلي رهام ودنگت الي وساعدتني اگوم من الگاع
وصرت امشي وعيوني بالگاع ابد ما صعدتها واباوع مغوش من كثر الدموع
صعدنا الدرج وسمعت صوت ليان من يمي
الظاهر چانت موجوده بس ما انتبهت الها ..
ليان:: ضي
رهام:: اسكتي انتي مو بحالچ هي
دخلتني للغرفه وودتني لچربايتي
گعدت وصرت امسح بدموعي وامسح بيهم ويرجعن يغورگن عيني
ما اعرف شلون اوصف شعوري
بس كل الاگدر اگوله داحس بغصه بگلبي ..
ليان:: رهاام السمعته صحيح؟
رهام:: وشنووو السمعتييي؟!!
ليان:: صديقتها ماتت
رهام:: ااا ا ايي صح
ليان:: سوده عليه ، الله يرحمها ضي كافي تبچين گطعتي گلبي
سحبت البطانيه وتغطيت بيها وصرت ابچي جوه البطانيه
رهام بقت شوي يمي وراحت وليان ضلت گاعده يمي
واما عن ودق ابد ما اجت سئلت ولا حاچتني ولا شي
مر الوقت لليل واني حابسه روحي بالغرفه وابد ما طلعت من عدها
مادري الساعه بيش بس كل الاعرفه حالياً وقت ليل
سمعت صوت باب الغرفه انفتح
گعدت ورفعت راسي للباب
وشفت ليان داخله للغرفه وبيدها صينيه
تقربت من چربايتي وخلت الصينيه على الچربايه
وراحت لودق تساعدها تگوم ..
ليان:: جبت الاكل الچ ولودق لهنا لأن ودق ما تگدر تنزل وانتي حابسه روحچ
ضي:: خلي الصينيه يم ودق ولا تتعبيها حته تجي يمي لأن اني ماريد اكل
ليان:: مو بكيفچ
ودق:: اذا ما رايدتني يمچ عادي ، ليان روحي سويلي لفه خليني بمكاني
ليان:: شهل عداوه الصايره بينچن شنو الغيرچن
ودق:: ماكو عداوه ولا شي بس انتي شايفه اختچ شلون تتصرف وياي بالبدايه چانت تگول اني خايفه عليچ خاف يضحك عليچ وهسه من اتقدم الي گلبت خلقتها عليه وضاجت طلع كله حقد مو خوف
ضي:: أول شي اني ما رايده اكل لأن مالي نفس وثاني شي ماكو أي حقد وعيب هل حچي بس اني اعرف شي انتي ما تعرفي
ودق:: وشنو هل شي التعرفي انتي وما اعرفه
ضي:: ما تفهمين بعدچ زعطوطه ياهو يگلچ احبچ راح تصدگي بغضاً عن تصرفاته
ودق:: وشبيها تصرفات وضاح شنو ما عاجبتچ؟
ليان:: دكافي وضاح ووضاح هل وضاح مو هين گدر يشعل النار بين الخوات بدون ما يسعى وهسه عوفن هل حچي وغصب عنچن ثنينچن تاكلن سوه
ودق:: يمعوده على كيفچ مو راح اوگع على وجهي شبيچ هيچ تجرجرين بيه وبعدين اني ما رايده اگعد يمها
ليان:: لا حبيبتي تگعدين وتاكلين وغصب عنچ هم
گعدتها يمي غصب وودق گوه تمشي وتريد تگوم رغم صعوبه حركتها وتتأذى بس تمشي بس هي مصره ما تريد تگعد يمي
عبالك الگاعده يمها كاتله ابوها مو اختها ..
ليان:: گعديي بمكانچ اله توگعين يلا ترتاحين؟ ، هسه اني طالعه اروح اكل مو تتكافشن تره اني ما عايفه بيت رجلي وجايه لهنا حته اگعد واسكت لا جايه علمودچن ولحد ما تهدء الأمور اروح
ودق:: ليان كافي فهمنا بس ولي
ليان:: اي راح اولي بس داوصيچن
دارت وجها ليان وطلعت وسدت الباب وراها
درت وجهي عن ودق واباوع للحايط ..
ودق:: شبيچ
ضي:: سلامتچ ما بيه شي
ودق:: ماكو احد هنا غيري وغيرچ تگدرين تحچيلي وتصارحيني بالشي المضوجچ مني
ضي:: انتي بأكملچ مضوجتني ، اريد ترجعلي ودق الاعرفها
ودق:: ودق موجوده گبالچ بس انتي الخليتي وجها الثاني يطلع غصب
ضي:: وجهين عندچ؟
ودق:: وجه ووجهين وثلاثه والى لا نهايه ، تره مو غلطه هاي مال عندچ وجهين لأن كل انسان عنده اكثر من وجه ويطلعه على حسب تعامل الشخص وياه وانتي تعاملتي وياي بطريقه مو زينه ف طلع الچ وجهي المو زين
ضي:: صايره تحبين تتفلسفين هواي

ودق:: مو فلسفه بس هذا واقع وهسه اكلي واذا ما رايدتني ماشي حته اكل ما رايدته
ضي:: اكلي محد لازمچ
ودق:: ما راح اكل قبل لا تمدين ايدچ
ضي:: ما عرفتچ منين نزل عليچ كل هل احترام شو ما شفته بالمستشفى
ودق:: ضي اني اوگف ويه الحق ما اتحيز لشخص معين وگدامچ انتي اختي ووگفت ويه الحق لأن انتي تجاوزتي على وضاح وهنتي وهنتيني شنو منتظره تكون ردة فعلي؟
سكتت وما جاوبتها لحد ما گالت ..
ودق:: باوعيلي ليش دايره وجهچ عني
ضي:: لأن بس اشوف وجهچ وانتي داتحچين وياي احس روحي داتعذب
ودق:: ليش؟
ضي:: لأن چنت كلما اشوفچ اشوف بيچ ودق الحنينه بس هسه ما اگدر اباوع الچ والبداخلچ مو ودق
مدت ايدها الي ودارت وجهي الها وخلت عينها بعيني وحچت ..
ودق:: ودق ما اتغيرت بس حاچيها عدل حته ما تذب عليچ سمومها لأن اكو بداخلها سم محبوس صنعه القهر
ضي:: قهر؟ ، المريتي بي تسمي قهر؟! ، لعد اني شگول؟
ودق:: المريتي بي مرينا بي كلنا بس لكل وحده اسرار محتفظه بيها بنفسها لأن بس تحچيها الغيرها راح تزيدها قهر
ضي:: ما فهمت كلامچ
ودق:: مو شرط تفهمي
ضليت ساكته وودق گعدت تسوي لفه
كملتها ومدتها الي وگالت ..
ودق:: ايدي توجعني بس جبرت روحي اسويها الچ لا ترديني
ضي:: ما اشتهي
ودق:: لا ترديني ..
اخذتها من ايدها وگعدت تاكل واني ساكته واكل على كيفي ومالي نفس اكل بس مجامله الها ..
ودق:: شبيچ تاكلين هيچ جنچ عصفور
ضي:: ما حبيت اردچ
ودق:: مستغربه ما رديتيني ، المهم اني هسه رايده اسئلچ كم سؤال حته ارضي فضولي
ضي:: شنو؟
ودق:: اني طول هل فتره كاتمه اسئلتي بخصوص سالفتي ويه وضاح وشنو السبب اليخليچ تمنعيني عنه وچنت دائماً اجاوب نفسي على اسئلتي حته ما اضل افكر بس بعد ما اگدر اجاوب لأن الاجابه صارت صعبه خصوصاً بعد ما عرفت خالتي وعرف الكل بسالفتي ووضاح اتقدم الي ، ماكو فد شي حالياً يمنعچ توافقين
ضي:: بس ما سئلتي شلون راح تعيشين وياه؟
ودق:: وضاح حالته الماديه ممتازه ويشتغل بشركه وتره وضاح خريج رغم الظروف المر بيها بس هو كمل دراسته واتخرج واشتغل وبما انو هو خريج عنده مكان بالشركه كلش زين والحمد لله وهو ساكن حالياً بشقه ايجار لأن تعرفين وضاح وحده ما يحتاج بيت كامل بس اله وعنده قطعه ارض ب اسمه بس لحد هسه ما بانيها سئلته عن السبب وگال يحتاجله وقت وحالياً هو ما فارغ وحاط فكره بباله بعد ما يتزوج راح يبني هل قطعه ويسكن بيها هو ومرته يلي هي اني ومن راح نتزوج راح نسكن بهل شقه لأيام معدوده لحد ما يكمل البيت وننقل ونعيش هناك
ضي:: هو وين ساكن بالضبط؟ ، شقته وين؟
ودق:: مو خارج المحافظه بس بعيد عن منطقتنا لأن تعرفين بيت خالتي بمنطقه قريبه من منطقتنا واكيد هو راح ياخذ شقه بعيده عنهم حته يتجنب المشاكل
ضي:: ايي ، بس اني ما اقصد شلون راح تعيشين وياه من ناحيه السكن لا من ناحيه التصرفات
ودق:: تصرفات؟!
ضي:: اتذكر مره گلتي الي هو عصبي بس يهدء بسرعه هيچ يمكن گايله؟!
ودق:: اي صحيح اتذكر من گلتها الچ گلت صحيح مرات يعصب عليه بس بعدين يهدء ويعتذر الي
ضي:: شلون راح تگدرين تعاشرين شخص عصبي
ودق:: اكيد ما راح يكون عصبي بدون سبب اله اذا اتصرفت بتصرف ما يعجبه وبعدين حته لو صارت مشكله بيناتنا لا سامح الله اني متأكده راح تنحل بسهوله وضاح ما يهون عليه زعلي اليشوفه هسه يگول هذا قاسي واربعه عشرين ساعه عصبي وما يتفاهم بس العكس من راح تعرفي راح تتغير وجهه نظرچ عنه ، ضي صيري لطيفه وياه واحترمي وشوفي وضاح البنظري شنو
ضي:: ودق تره زواجچ من وضاح هو لحظه انقطاع التواصل بينا وبين خالتي
ودق:: خالتي شنو ما تتمنى الي الخير؟
ضي:: هاي خالتي رباب مو رهام حته تحچين هيچ خالتي رباب طول عمرها حنينه علينا وتنطي وما تنتظر من عدنا المقابل والأيام هي الثبتت النا هل شي وخالتي انطتچ شعور الامومه وما خلتچ تفقدين حنان الام حاولت قدر الامكان تحسسنا هي امنا بس انتي جازيتيها بحبچ من وضاح وهي ما زعلت عليچ لا زعلت علمودچ لأن داتشوف بنت اختها داتضيع گدامها ، محد يعرف وضاح بكثر ما تعرفه خالتي ف لازم تسمعين كلامها وما تعانديها

ودق:: ادري خالتي قدمت النا هواي اشياء وبدون ما تطلب من عدنا شي بس مو معناها كلشي تسوي لمصلحتنا وانتي غلطتي خالتي ما تعرف وضاح عدل صحيح هي امه بس هي عافته سنين بدون ما تسئل عنه وبهل سنين وضاح اتغير مو مثل ما چان يمها ، اني احب خالتي بس هي ارتكبت غلط كلش چبير من اتبرت من ابنها ضيعته لوضاح ، تصدگين كل ما امر بمصيبه اتذكر وضاح وتهون عليه مصيبتي اتذكر شلون حارب وحده والكل چان ضده وشلون گدر يحاول ياخذ حق ابوه والكل يكذبه وشلون گدر يبني حياته من أول وجديد ويكون نفسه وحده بدون أي مساعده وشلون گدر يمتلك هل قوه حته يستمر بطريقه ، وضاح علمني القوه اهم شي بالحياة حته نگدر نستمر ويگلي حته لو چنتي مكسوره لازم تبينين للكل انتي قويه حته ما تنهدمين وچان دائماً يگلي اذا ما چانت عندچ شجاعه راح تخسرين دائماً وهل شي صحيح بس امتلكت الشجاعه وصرت اتظاهر القوه حته لو چنت منكسره بداخلي لاحظت داگدر اعيش حياتي
ضي:: ودق بكلامچ هذا ما راح تقنعيني بي
ودق:: ادري انتي طول عمرچ راح تضلين معاندتني بس رايده اگلچ شغله لو صدگ رايدتني اكون سعيده واتوفق بحياتي خليني اتزوج وضاح وانتي راضيه
ضي:: موافقتي مو مهمه موافقه ايهاب هي المهمه ومادام وافق ايهاب خلص بس اني ما راح ارضى حته لو شفتيني موافقه ف موافقتي غصب مو برضاتي
ودق:: لأول مره راح ارفضلچ طلب ، اسفه وسامحيني
ضي:: ما اقبل اعتذارچ ولا مسامحتچ وروحي الله يوفقچ وياه ما يهمني بعد
ودق:: هسه هاي شنو اعتبرها
ضي:: اعتبريها باليعجبچ
عفتها وگمت من مكاني وطلعت من الغرفه
تعبت حيل ونفذت طاقتي بعد ما اگدر
ليان وودق كل ما يكبرن دايتعبني بالبدايه ما اتصورت وصيه امي صعبه اتصورتها كلش سهله بس الحقيقه لا ، بوجود امي وابوي كلش طبيعي اشوف الوصيه سهله لأن ما راح اشيل كل هل مسؤليه
بس هسه المسؤليه كلها عليه
وليان وودق مو مثل قبل لا تغيرن ......
مر هذا اليوم واجه ثاني يوم
للعصر الساعه ب٤:٣٠ چنت داحضر روحي حته اروح للدكتوره واتأكد من حملي وبدلت ملابسي ولبست اسود
لازم البس اسود گدامهم بهل ايام لأن هم يعتقدون صديقتي ماتت
بس الحقيقه لا
وخصوصاً اني گلت الهم رايحه لفاتحتها
ولهذا السبب ايهاب ما ناقشني ولا سوه الي هوسه مثل كل مره من اريد اطلع ..
ليان:: ضي كملتي؟
ضي:: شجابچ انتي شو الگاچ بالغرفه فجأه
ليان:: انتي تصفنين هواي شسوي الچ وتره رهام تگول يلا تأخرنا
ضي:: اي هسه كملت بس داعدل شالي
ليان:: ضي اني البارحه ما گدرت اسئلچ لأن چنتي تعبانه ومو مال اسئلچ هيچ سؤال
ضي:: يا سؤال؟
ليان:: منو الماتت؟ ، اني الاعرفه ما عندچ غير رسل معقوله هي!
ليان:: لعد منو
ضي:: وحده غيرها ما تعرفيها اتعرفت عليها بذيچ السنه
ليان:: سنه وحده اتعرفتي عليها وهيچ سويتي بروحچ!
ضي:: الصداقه ما تتحدد بالمده الزمنيه الصداقه بالأفعال
ليان:: اي صحيح بس ضي ليش ما تقبلين اجي وياچ خليني اجي وأواسي اهلها خطيه هسه اكيد حالتهم حاله بغياب بنتهم وبعدين اني اختچ ليش تاخذين رهام هاي
ضي:: ما رايحين لعزيمه ليان ورهام من يمها رادت تجي لأن هم يعرفوها لو ما يعرفوها چان ما اجت
ليان:: بكيفچ بس اني گلت علمودچ
ضي:: لا ما يحتاج ، اني طالعه هسه محتاجه شي؟!
ليان:: لا سلامتچ
طلعت من الغرفه وعفتها ونزلت جوه رحت لغرفه رهام
دگيت الباب وسمعتها تگلي دخلي
دخلت ولگيتها مكمله والحمد لله ما مخليه مكياج ولا لابستلي الوان لأن اعرف رهام ما ترتاح اله تصبغ وجها صبغ وتكشخ وچنها رايحه لعرس
زين ما سوتها چان رحت بيها هسه وراح يشكون بالسالفه
طلعنا من البيت ورحنا متوجهين لعياده الدكتوره
واني طول الطريق ساكته واباوع من الجامه وصافنه على الطريق وحايره بهمومي
لحد ما وصلنا نزلنا من التكسي ورحنا للعياده ودخلنا جوه وگعدنا ننتظر بالانتظار لحد ما يجي دوري
لحد ما سمعت اسمي گمت اني ورهام ورحنا دخلنا جوه للدكتوره
گالت الي اتمدد على السديه تمددت وگعدت تسويلي سونار واني ارجف رجف من الخوف بطني صارت توجعني من خوفي وضليت بس ادعي بگلبي ..
الدكتوره:: مبروك حبيبتي ، حامل شوفي طفلچ
باوعت لجهاز السونار والجنين دايتحرك
حبست دموعي گوه والعبره خانگتني ..
رهام:: حامل!
الدكتوره:: اي
گمت من السديه واني حالي حال الجثه
بس مجرد امشي وساكته ..
رهام:: بيا شهر وشنو هي حامل بولد؟
الدكتوره:: هي حالياً بالشهر الثاني من حملها وتگدر تعرف جنس الجنين بالشهر الرابع ان شاء الله خليها تجي ونشوف اذا چانت بنيه أو ولد
گعدت رهام تحچي ويه الدكتوره بخصوص حملي
واني ساكته وبالي منفصل عنهم حته مداعرف شنو دايحچون
شمعه الأمل الچانت مشتعله بداخلي انطفت
ولهنا وحياتي صارت شبه منتهيه أو هي اصلاً انتهت
طلعنا من العياده بعد ما خلصنا وصرنا نتمشى للشارع حته ناخذ تكسي ونرجع
واني طول هل وقت ساكته لأن اعرف بس راح احچي راح انفجر بچي هاي اذا گدرت ..
رهام:: لا تسكتين احچيلچ شي
جريت حسره بتعب ونطقت بصعوبه وجاوبتها ..
ضي:: شنو ترديني ارد على هل مصيبه؟

رهام:: مادري بس لازم نشوف حل اني برأيي لازم تنزلين هل طفل قبل لا تكبر بطنچ مادام هسه الامور تمام خلي يمشي كلشي بهدوء وخل ننزله ونخلص بدون ما أحد يدري
ضي:: اعرف بيچ ما تخافين من الله من يوم ما ورطتيني ويه قيس بس ما اتصورتچ لهل درجه ما تخافين تردين تقتلين روح؟
رهام:: هل روح التحچين عنها لو بقت ببطنچ راح يكون مقابلها روحچ هاي اذا چان بي روح اني اگول خلصي من عنده من هسه وفضي السالفه
ضي:: وبعدين؟
رهام:: شنو وبعدين؟
ضي:: مات وراح ابقه ويه قيس وما اعرف شنو مصيري وبعدين تجي الي قسمه وايهاب راح يجبرني اوافق وراح يسوء الوضع اكثر
رهام:: خليچ هيچ لحد ما تكبر بطنچ ويكشفوچ وحته لو ما كشفوچ وصاروا عميان شلون راح تولدين؟
ضي:: رهاام كاافييي كاافييي بلاا شيي رااسيي رااح ينفجر من كثر التفكييير
رهام:: لچ صوتچ
ضي:: لا ترجعيني للبيت
رهام:: وين اوديچ
ضي:: وديني القيس
رهام:: قيس؟ ، انتي تتخبلين من عنده ترديني اوديچ اله!
ضي:: اريد احاچي
رهام:: ولا تگليلي تحاچي بهل موضوع!
ضي:: اي لعد شنوو
رهام:: بس ..
ضي:: أول وتالي راح يعرف وديني اله بلكت الگه الي حل حته اخلص من هل مصيبه
رهام:: متأكده؟! ، بس منو يگول هو موجود
ضي:: اتصلي عليه ما يراد الها شي
رهام:: ماشي على راحتچ راح اخابره هسه واشوف اذا يگدر يشوفنا
طلعت تلفونها من الجنطه وگعدت تدور عن رقمه
لحد ما لگته واتصلت عليه
وگعدت تنتظر الرد واني واگفه ومنتظرته وياها
لحد ما رد وحچت وصارت تحچي وياه
واني بس استمع الهم ومنتظره تخلص ..
رهام📞 .. كلش ضروري نشوفك ، ضي تريد تشوفك بعد شسوي حاول تجي هسه مادام انت قريب من يم -------- ، اي ماشي لعد نلتقي هناك يم هناء ، لا ما اعرف شنو تريد بس هي گالت ضروري تحاچيك ، ماشي اسفه ازعجتك ، من رخصتك ...
سدت الخط وگالت ..
رهام:: امشي خل نروح لبيت هناء بين ما يجي احنا واصلين
مشت رهام ومشيت وراها ورحنا صعدنا تكسي
وانطته العنوان واني ضليت طول الطريق ساكته
ومنتظره على جمر بس رايده اوصل واحاچي ورايده احل السالفه وكون اگدر ...
وصلنا بعد طريق طويل نزلت من السياره وانتظرت رهام تدفع لأبو التكسي على صفحه
لحد ما اجتي ومشينا للباب فتحته رهام
ودخلنا جوه ورحنا للساحه الچبيره وما چان بيها غير سلوى وكالعاده لبسها كله ضيگ وقصير لابسه تيشيرت قصير وبجامه حصر وتتمشى وتخابر
انتبهت لوجودنا وصارت تباوعلنا وتگول ..
سلوى📞 .. اي ماشي ، مو وعدتك خلص ، يلا بااييي
ياربي هاي شگد تتنعوص فوگ ما هي غثيثه صوتها اغث
غلقت تلفونها وخلته بجيبها وصارت تمشي بتجاهنا ..
سلوى:: هلا برهام
رهام:: انتي شنو ما تتوبين مو گايله الچ لا تذبين ميانه
سلوى:: يا شبيچ غير احبچ
رهام:: هسه گليلي وين هذا قيس
سلوى:: شبيچ اليوم معصبه
رهام:: جاوبي سلوى
سلوى:: بعده ما جاي بس انتو شنو تردون من عنده
رهام:: ما يخصچ
ضي:: اا اني راح انتظره فوگ بنفس الغرفه النلتقي بيها
رهام:: اي لعد روحي صعدي واني رايحه اشوف هناء
سلوى:: اوگفي وين رايحه غير اجي وياچ حته افتحلچ باب الغرفه تره مقفول
رهام:: امشي وديها اني رايحه
سلوى:: تمام
راحت رهام وعافتنا وسلوى مشت گدامي ورحت امشي وراها
صعدنا فوگ وودتني للغرفه طلعت مفتاح من جيبها وفتحت الباب ودخلت وهي ضلت واگفه بره ومتچيه على الباب ..
سلوى:: شعندچ ويه قيس
ضي:: معليچ
سلوى:: صديقتچ ورايده تعرف
وطگتها بضحكه استهزاء
هاي شبيها؟ ..
سلوى:: مو صحيح؟ ، بس ضي رايده اذكرچ بشي
سكتت وما رديت عليها وكررت نفس كلامها ..
سلوى:: رايده اذكرچ بشي شنو ما رايده اذكرچ بي؟
ضي:: لا يكون سالفه الامتحانات
سلوى:: عفيه عليچ طلعت ذاكرتچ قويه ما تنسين بس خل اختبر قوه ذاكرتچ اكثر ، تذكرين شنو گلت الچ؟
ضي:: لا ما اتذكر لأن ما اركز بكلام الاطفال اغلبه يكون تمسلت
سلوى:: لا حبيبتي مو كلام اطفال راح تعرفين بعدين كلام الاطفال شلونه بس رايده اذكرچ اني راح اردلچ السويتي بيه عن قريب وبطريقتي الخاصه
ضي:: هه وشنو راح تسوين؟
سلوى:: خليها مفاجئه احسن
ضي:: سلوى طلعي مالي خلگچ
سلوى:: چنت ضايجه واحس بملل وهسه انتي اجيتي ليش اروح خليني اسولف وياچ
ضي:: سلوى طلعي بره
سلوى:: زين خلص اخر سالفه واطلع
ضي:: شگد لزگه
سلوى:: مو لزگه بس رايده اتأكد انتي عندچ خوات اثنين مو؟
ضي:: معليچ بخواتي
سلوى:: رايده اتعرف عليهن
ضي:: لا تتعرفين عليهن لأن هن ارقى بهواي منچ وما يتعرفن على هيچ نماذج
سلوى:: هسه عوفينا من هل سوالف اني ما گلت شي بس ردت اتعرف شنو حرام؟
ضي:: اي حرام
سلوى:: ممممم اني اعتقد عندچ اخت اسمها ممم يمكن على ما اعتقد هو ودق؟
ضي:: ودق؟!!
سلوى:: شبيچ انصدمتي
ضي:: انتيي شعرفچ بودق!
سلوى:: لا لا تخافين عيني تره ما تعرفني ولا شايفتني بس مجرد اعرف اسمها والثانيه مادري شسمها صراحه ناسيته بس رايده اگلچ حته لو ما حچيتي الي عن حياتچ راح اعرفها بطريقتي ، ويلا بايي
مشت وصارت تضحك
غثيثه ، يمته افتك منها؟
ضليت بالغرفه ومنتظره قيس يجي