لحد ما فتحوا النا الباب وطلعت صديقتها گعدن يسلمن على بعض ويسولفن بالباب ..
- اگلچ احنا ليش واگفات بالباب تعالن اتفضلن
ودق:: لا اني هسه رايحه ابوي گلي لا تتأخرين مو مال اگعد واسولف
.. صلاوات صار الها ساعه تسولف وهسه تگول مو مال اسولف
- هاا ، بس ولله مشتاقه الچ يعني ما يصير هيچ ما تجين
ودق:: لچ تعرفيني مالي خلگ اطلع گاضيتها نوم بهل عطله اريد اطلع تعب الدوام كله واشحن طاقتي من جديد
- حقچ
ضي:: ودق شنو ما كملتي تره تعبت
ودق:: اي اصبري
- مو داگول الچن خل ندخل جوه بس الله يسلمچن تعاندن ، تره ماكو احد جوه غيري اني وامي واختي ، اخوي طالع
ضي:: لا حبيبتي عذرينا بس مستعجلين لازم نرجع لان عدنا ضيوف بالبيت مو مال نعوفهم ونبقه
- على راحتچن
ودق:: يلاا باااي اشوفچ بغير مره
- الله وياچ حبي
ترخصنا من البنيه
وصرنا نمشي راجعين للبيت
وتقريباً وصلنا لمكان قريب من البيت يعني ما باقي غير ثلاث افرع وشارع وراح نوصل
داحچي ويه ودق وسمعت صوت من ورانا ..
- اكو گمر يطلع بالنهار؟!
سحبت ودق الي ودرت وچهي واشوف واحد دايمشي ورانا گبل خليت عيني بالگاع ولزمت ب ايد ودق قوي ..
ودق:: اخخ ايديي
ضي .. اششش خلي عينچ بالگاع وامشي سريع
ودق:: وشبيچ تحچين بصوت ناصي
ضي .. ودق تره اكو واحد ما يستحي ورانا ودايذب حچي
ودق .. يمه من يمته
ضي .. دوري وجهچ ولا تباوعين ليوره وابداً لا تنطي اهتمام خلي يولي
ودق .. گبر دخلينيي اهد عليه
ضي .. ودق امشي وانتي ساكته
صرنا نمشي وحيل انزعجت صراحه انسان بالصدگ قليل ادب وكل شوي يشمر حچي واحنا ما انطينا وجه يعني لهل درجه ماكو كرامه؟ ، وكل شوي ودق تريد تهد عليه بس اني الزمها ولله هاي لو صدگ هدت عليها راح تخلينا مضحكه گدام العالم
لحد ما عبرنا فرع كامل وصلنا للشارع وهذا بعده يلحگنا ، مستحيل!!!
ودق .. شگد شفت ناس ماعدهم كرامه بس مثله ما شفت مو داگلچ خلينيي اهجم عليه شبيچ
وگفت بمكاني وحيل ضجت صراحه گلت نتجاهله وهو راح يحس على روحه ويولي بس هذا صدگ قليل ادب ولازم اربيه
درت وجهي اله وگلت ..
ضي:: صارلك ساعه تمشي ورانا شكو؟!
- اني؟!
ضي:: لا اني ، طبعاً انت
حسيت ب ودق تلزم ب أيدي وكأنما تريد تگلي شي بس ما اهتميت واستمريت احچي وياه لان كلش متنرفزه من عنده ..
- على كيفچ عيني هسه شسوينالچ
ضي:: شسويت؟! ، تقبل هسه اختك تمشي بالشارع ويلحگها واحد ويذب الها كلام بذيء
- ما اسمحلچ تجيبين سيره اختي على لسانچ
ضي:: لا ولله؟!!! ، يعني تقبلها علينا بس على اختك خط احمر ولله لو اخوي هنا تدري چان شسوه بيك چان طيحه لحظك
- تره اني اول ما شفتچ عرفتچ ما تتحاچين مبينه متكبره وبعدين انتي رافعه خشمچ على شنو
ضي:: استغفر الله ، امشي ودق خل نروح هيچ نماذج ما يتحاچون
ردت امشي واشوف ودق ماكو
هاي وين راحت!
- عافتچ؟!
ضي:: تروح منا لا الم الناس عليك
- دنطيها هل رقم ، اروح فدوه لعيونها اول مره اشوف هيچ عيون تجذب الواحد لونها لون البحر
ضي:: قليل ااددددب
دامشي وشفته يلحگني هنا صدگ فار دمي
ياربي هذا منين اجاني بلوه!!!!
شفت سياره واگفه على صفحه ونزل منها شخص وچانت ودق واگفه هناك
هاي شنو تسوي هناك وشلون راحت
ما گدرت اميز شكله كلش زين لان چان لابس مناظر شمسيه وبعيد دققت بشكله وچنه هذا وضاح؟ ، بس شعنده هنا؟!
صار يمشي وچانت تمشي ودق وراه
واني واگفه بمكاني وما تحركت والولد چان واگف مسافه بعيده عني بس كل ما اتحرك چان يتحرك وراي
لحد ما وصل وضاح قريب من يمنا ووگف
بعد النظاره عن عينه وباوع للولد وگال ..
وضاح:: خير اخي؟ ، مضيع شي هنا؟!
- اني
وضاح:: اي منو غيرك
- لا واگف هنا شنو الشارع مسجل بأسمك؟!
وضاح:: لا طبعاً ما مسجل ب أسمي بس اني اعرف ابن الاصول ما يلحگ بنات الناس ويزعجهن
- احترم نفسك ، انت منو وجاي تحچي هيچ؟!
وضاح:: يعني تنكر
- انكر شنو ، اگول خويه اتوكل ما اريد اهينك هنا
وضاح:: لا الواضح انت التريد تنهان
تقدم خطوات اله ومبين على وضاح عصب گبل ركضت ودق ووگفت گبال وضاح وگالت ..
ودق:: لاااا وضااح اني ما طلبت مساعدتك حته هيچ تسوي ، خلينا نمشي
ما حچه شي الولد مشه من يمنا وراد يروح
وهو دايمشي شمر ورقه صغيره بالگاع
انتبه الها وضاح وگبل بدون تفاهم جره من ملابسه وسحبه اله وضربه وهذا بس ضربه گبل رد الضربه وصاروا يتعاركون بنص الشارع واني ضليت صافنه
هو اني بالاول خل استوعب وضاح شجابه هنا وودق شتسوي يمه يلا استوعب الدايصير ، انتبهوا لعركتهم العالم ولتموا علينا وصاروا يفاككون بين وضاح وبين الولد لحد ما هدئوهم بصعوبه وخلوا الولد يروح وصاروا يرحون العالم وهدئت السالفه اجه وضاح يمنا وانتبهت اله يتنفس سريع من الغضب وقابض ايده ..
ودق:: اا ا اسفه
باوع لودق ورخه قبضته وحچه ببرود ..
وضاح:: على شنو؟
ودق:: على الصار وبالصدگ اني كلش اسفه ما چنت ادري هيچ راح يصير اني من شفتك حسيت مي بارد ونزل على گلبي وبدون وعي رحت لسيارتك وگلت الك عن الصار
وضاح:: مداعي تتأسفين مو ذنبچ والسويتي صح

ضي:: امشي ودق
وضاح:: وين رايحات؟
ضي:: للبيت
وضاح:: وحدچن؟
ضي:: اي ليش؟
وضاح:: بعد الصار وياچن اكيد ما اخليچن ترجعن وحدچن وتره اني جاي على ايهاب وصدفه شفت ودق ف تعالوا اوصلكم بطريقي
ضي:: تره مداعي هياته البيت مو بعيد ما يحتاج سياره
وضاح:: حته لو ، امشوا گدامي
ودق:: اي ماشي يلا ضي
ضليت اباوع الها ، هاي صدگ تحچي گبل تگول يلا وويه منو تصعد ويه وضاح!
خزرتها وگلت ..
ضي:: ودق
ودق:: شنو
ضي:: امشي گدامي خل نروح
ودق:: يمه ليش تباوعيلي هيچ راح تاكليني ما گلت شي
ضي:: من رخصتك ، يلا تعالي
وضاح:: على فكره ما يحتاج تتصرفين وياها هيچ يعني ذيچ المره چان اسلوبچ وياها مدري شلون وهسه كذلك
ضي:: ليش انت منو حته تحاسبني؟! ، واني بكيفي شلون اتصرف ويه اختي اتصرف ما يحقلك تدخل
ودق:: ضي لچ عيب
ضي:: انتي التحچين بالعيب؟ ، اني اگول لو تمشين افضل
وضاح:: اول شي عدلي اسلوبچ وثاني شي ما راح ترحون وحدچن مو بكيفچ هل شي ويلا تره ما عندي وكت راح اجيب السياره لهنا حته خاف تتعاجزين ست ضي
باوعتله ببرود وهو مشه
واول ما مشه جريت ودق من ايدها وگلت ..
ضي:: انتي ليش كلما تشوفين وضاح لازم تتعمدين تسوين روحچ غبيه وتفشلين بيه وتخليني بمواقف كلش بايخه
ودق:: عوفي ايدي وحته وضاح شاف اسلوبچ شگد سخيف وياي مادري شبيچ من تطلعين وياي لازم تسوين روحچ المسيطره والمسؤله وانتي بوخه تره مو فخر ولله داتطلعين روحچ بصوره مو حلوه
ضي:: واني ما رايده اصعد بسيارته
ودق:: عشتوو عود كبرياء؟! ، استقري شوي وامشينا نصعد هل موقف يمكن يتكرر مره ومرتين هل نماذج ماكو منهم واحد لا اكو الف واحد ما يستحي ووضاح تره لان شايل غيره وخالتي خوش ربته جاي يساعدنا مو لسواد عيونچ
ضي:: لا ولله خالتي خوش ربته؟!!! ، مع احتراماتي لتربيه خالتي بس لو صدگ چان صار مثل دريد مو يكون خريج سجون
ودق:: على كيفچ تره هي كم سنه وبعدين چان مراهق من ارتكب الجريمه وبالغلط هم ف كافي تحاسبين الناس على اغلاط سووها بالماضي
ضي:: تره اكو ذنوب صعب تنغفر
ودق:: دمشيي يلا اجه وخل نصعد وفضي السالفه ما رايحات ويه غريب كافي لواگه
ضي:: خلص فهمنا
رحنا للسياره وصعدنا وبده يسوق وضاح واحنا ساكتين وهدوء ما حچينا أي شي
لحد ما نطقت ودق وگالت ..
ودق:: اا ا وضاح
وضاح:: نعم
ودق:: اني حابه اشكرك
وضاح:: على شنو
ودق:: على الصار يعني لو ما انت چان ذاك الشخص لحد هسه بعده يلحگ ورانا
وضاح:: هذا واجبي
ودق:: مادري ليش تذكرت مواقفي وياك قبل حسيت استرجعت الماضي تذكرت من چنت تساعدني اني وصغيره مادري شنو صار من شفتك وگبل رحت الك اطلب المساعده منك رغم مادري انت اصلاً شتسوي هنا
گرصت ودق وصارت تباوعلي وهمست ..
ودق .. شبيچ
ضي .. لا تچفصين
ودق .. ما چفصت اني
وضاح:: حته تعرفين من چنتي صغيره اني ما حاقد عليچ ولا اكرهچ كل الچنت اسوي علمودچ بس مادري شنو التغير حالياً شو صارت بدال كلمه حقير شكراً معقوله تعدل اسلوبچ
ودق:: هههه شذكرك بيها تره سالفه قديمه وچنت صغيره وما اعرف مصلحتي
وگف يم باب بيتنا وگال ..
وضاح:: تأمرون على شي ثاني؟!
ودق:: لا ، شكراً على التوصيل
وضاح:: اذا ما تصير زحمه رايد ايهاب
سكتت ودق وباوعتله وعرفت شنو رايده تسئل گبل جريتها وگلت ..
ضي:: نزلي
نزلنا من السياره ورحنا دخلنا جوه ووگفنا بالطرمه باوعت لودق وگلت ..
ضي:: انتي شبيچ اليوم؟!!
ودق:: اني الشبيه لو انتي
ضي:: وبعدين هذا وين شفتي وشلون جبتي
ودق:: مو چنتي تتعاركين ويه الولد ف اني شفت وضاح طابگ سيارته على صفحه وچان يخابر ف اني استغربت هو شيسوي بمنطقتنا بس ما ترددت بروحتي اله رحت بسرعه وگلت اله يساعدني وخطيه هو ما قصر
ضي:: ما قصر مو؟! ، لو مخليتنا بهل وضع احسن بهواي بدال ما يجي
ودق:: انتي شبيچ هيچ تكرهي شمسوي الچ
ضي:: خريج سجون شنو تردين اتصرف وياه
ودق:: خريج سجون! ، تره ما انسجن هواي وهو اكيد متندم على غلطه كافي تكررين بهل سالفه رجائاً وكلش عيب هيچ تتصرفين وياه وانتي حته شكراً ما گلتي اله
ضي:: بكيفي ما عاجبني اشكره وبعدين هو الجبرني نروح وياه على شنو اشكره؟!
ودق:: اني عن نفسي اشوفه خوش ولد وحباب
ضي:: لا تخليني اذكرچ ب ايام قبل
ودق:: دخلينا ندخل وبلا سوالف تافهه وعيب الرجال بره منتظر خل نصيحله ايهاب
ضي:: اني الكاتلني ايهاب شعنده ويه وضاح سالفتهم ما مرتاحه الها ابد
ودق:: انتي كل العالم ما مرتاحه الهم وتره اني ردت اسئل بس انتي سكتيني
ضي:: صحيح نريد نعرف بس مو معناها ترحين تگليله شنو السالفه
سكتت وما حچت شي وراحت دخلت جوه لحگتها ودخلت جوه للصاله لگيت خالتي رباب جايه وداتسولف ويه خالتي رهام وايهاب بالصاله ومبين عليه رايد يطلع
رحت اسلم على خالتي رباب ووگفت وصرت اباوع لأيهاب واريد اگله بس خالتي گاعده شلون راح احچي ..
ودق:: صدگ ايهاب تره وض..
لا هاي مصختها كل شوي تچفص
گبل قاطعت كلامها بصوت عالي ..
ضي:: ايهااب تره اكو واحد بره يريدك
ايهاب:: شنو؟!
ضي:: مثل ما سمعت
ايهاب:: منو

ضي:: مادري اطلع وشوف شعرفني منو
رباب:: ولچ طرشتيها لأذني على شنو تصيحين
ضي:: هههه اسفه خاله بس عبالي ما سمع ودق
ايهاب:: من رخصتچ خالتي بس اني لازم اطلع عذريني
رباب:: اخذ راحتك حبيبي
طلع ايهاب وگعدت يم خالتي باوعت الها وگلت ..
ضي:: اليوم البيت منور بوجودچ
رباب:: البيت منور بأهله
ضي:: خاله حبيبتي اني رايحه ابدل واجيچ ماشي
رباب:: اخذي راحتچ يا گلبي ، ودق شبيچ واگفه دتعالي گعدي سولفيلي حلوتنا شلون چنتي بالامتحانات زينه لو لا؟!
ودق:: كلش زينه
رباب:: عفيه من يومچ شاطره انتي اريدچ تبقين هيچ
ودق:: تدللين خاله
عفت خالتي وودق يسولفن وصعدت فوگ ابدل غيرت ملابسي ورحت نزلت جوه لگيتهم على نفس الگعده ومستمرات يسولفن وگعدت يمهم وشاركت حديثهم
مر هذا اليوم اعتيادي وللعصر خالتي راحت
ومن بعد هل يوم مرن عدة ايام بشكل جداً عادي
وبيوم من الايام گعدت متأخر ويه اذان الظهر
گمت من مكاني وبديت بيومي مثل كل يوم
چنت بالمطبخ داسوي بالريوگ بس البيت كلش هادء
صحيح بيتنا هادء بس مو لهل درجه يعني لو اشمر ابره بالگاع چان سمعت صوتها
بالعاده اگعد الگه خالتي متريگه من وكت وگاعده تباوع تلفزيون لو تخابر بالصاله
هاي كل مره هيچ اشوفها واذا ما چانت بالصاله تكون بالغرفه
ستغربت من الوضع عفت البيدي وطلعت من المطبخ
من نزلت ما شفتها بالصاله يمكن تكون بالغرفه
رحت متوجهه لغرفتها هي وابوي دگيت الباب قبل دخولي بس ما سمعت أي رد
معقوله طالعه؟!
دفعت الباب بيدي واول ما فتحت الباب توسعت عيني بصدمه واحس گلبي راح يوگف ..
#يــــتبـع ...

البارت الثامن
\ ضــــ{٨}ــــــي /
•
•
رحت متوجهه لغرفتها هي وابوي دگيت الباب قبل دخولي بس ما سمعت أي رد
معقوله طالعه؟!
دفعت الباب بيدي واول ما فتحت الباب توسعت عيني بصدمه واحس گلبي راح يوگف ، اباوع لابوي واگع بالگاع ومغمي عليه گبل ركضت اله ووگعت يم راسه ..
ضي:: بابا؟!!! ، ليش هيچ بالگااع وااگع يااابه داحاچيك جاوبني
صرت احاول اگعد بي وهو ابد ما جاوبني لگيت بطل مي على الميز گبل اخذته وذبيته على وجهه وما تحرگ ولا انطه أي ردة فعل بديت اخاف عليه وجسمي كله يرجف بخوف
خليت راسه بحضني ومستمره احاچي وعندي أمل يرد عليه
خليت راسي على گلبه ورايده اسمع صوت نبض گلبه
ومداسمع صوت نبض ابد
.. شنو دايصير؟! ، ليش مداسمع صوت النبض!
تخبلت وماعرف شسوي وخصوصاً اني وخواتي وحدنا بالبيت وما اعرف وين انطي وجهي
رحت اخذت التلفون واتصلت على خالتي وايدي ترجف بلگوه دگيت عليها وتلفونها مغلق
اتصلت على ايهاب بفارغ الصبر وهذا تلفونه دايدگ وما يجاوبني ضليت اتصل لحد ما رد عليه بسرعه صحت ..
📞.. مااا عندييي وقت اعااتبك بس اريدك هسه تجيي للبيت بسرررعه
📞.. شكوو شصاااير؟!!
📞.. ابووي ماادرييي شبيي مدايتحرك ولا يجاوبنييي بسرررررعه تعااال
📞.. ماااشي هسه جااي
سديت الخط وعفت التلفون وصرت افتر يم ابوي وحايره وماعرف شنو اسوي وماريد اگعد خواتي وارعبهن وياي
نحطيت بموقف لا يحسد عليه من اسوء المواقف المريت بيها كأنما داموت على البطيء
ضليت على هل حال لحد ما اجه ايهاب من شفته اجه حسيت مي بارد ونزل على گلبي رغم خوفي
بسرعه نقل ابوي للسياره اخذت عبايتي ولبستها وبسرعه طلعت اركض لسياره ايهاب صعدت وگلت ..
ضي:: امشييي شكووو واگف
بسرعه مشه ايهاب وبده يسوق ب أسرع ما عنده
واتجه لأقرب مستشفى لبيتنا
اول ما وصلنا للمستشفى بسرعه نقلوا ابوي للطوارئ
ضليت بالممر افتر وادعي يكون ابوي بخير ..
ايهاب:: كاافي تفتررين دخوتينيي
ضي:: عوووفني بحااالييي
مر وقت واحنا منتظرين على نار وفرغ صبرنا
لحد ما طلع الدكتور ووگفه ايهاب وگال ..
ايهاب:: دكتووور شنوو صار؟!
صار يباوع النا وساكت واحسه متردد يحچي ..
ايهاب:: جاااوبنييي لاا تسكت
الدكتور:: الصراحه
ايهاب:: شنووو؟!!!
الدكتور:: احنا حاولنا وبذلنا كل جهدنا وردنا نسوي غسيل معده و..
ايهاب:: غسيل معده؟! ، ليش؟!!
الدكتور:: لان الصراحه المريض متسمم
ضي:: متسمم؟!! ، شلووون!
الدكتور:: انتو تأخرتوا هواي كلش تأخرتوا وچان المفروض تجون من وكت لان هسه السم منتشر بجسمه كله و..
ضي:: ان شاء الله يكون بخير ، گلي دكتور ابوي يحتاج غسيل معده اكيد مو؟!
الدكتور:: هو چان مفروض هيچ يصير بس ..
ايهاب:: موو حرگت اعصاابي حرگ دحچيييي وفضهااا
الدكتور:: اني اعتذر منكم بس البقيه بحياتكم
ايهاب:: شنو البقيه بحياتكم ، اوووگف وين رااايح شنووو داتحچي انت؟
ضي:: شلوون يعني ، شنوو قصدك؟!!
الدكتور:: ادري هل شي صعب عليكم بس هذا يومه
ضي:: شنووو داتحچيييي روووح سووييي اله غسيييل معده ابوووي ماابيي شي فاااهم
ضل الدكتور ساكت وما حچه شي واني من صدمتي ضليت واگفه بمكاني واحس الدموع متجمعه بعيني بس ما ناويه تنزل ، مداگدر اصدگ كلامه عندي احساس ابوي بعده عايش لان هو بالصدگ بعده عايش شلون مات! ، البارحه چنه نحچي سوه ونسولف وما بي شي وما يعاني من أي مرض ولا اشتكى من شي شلون صار كل هذا!!!!
غمضت عيني بهدوء واحاول اهدء نفسي
شگد ما چنت هادئه من الخارج وشگد مبين عليه القوه والصمود وما مبين عليه منكسره بس بداخلي احس بضجيج وهوسه واحس گلبي كلش ديأذيني مداعرف شلون اوصف شعوري لا اني الاگدر اصدگ السمعته ولا اگدر انكر الصار
............... وين رحت؟!
محمد .. هياتني موجود
ضي .. بس دايگولون الي ميت؟!
محمد .. هههه ميت؟!!
ضي .. اي هيچ سمعت
محمد .. بنتي شبيچ هياتني اني يمچ
ضي .. بس انت عفتني
محمد .. ما عفتچ واني وعدتچ ابقه وياكم وما اخليكم وحدكم
ضي .. انت صدگ موجود
محمد .. اي موجود ، ضي بابا شبيچ ليش هيچ تتصرفين بغرابه
ضي .. لا مداگدر اصدگ وجودك
محمد .. ضي بيچ شي؟!
ضي .. لا تعوفني
محمد .. ليش داتبچين! ، واني ما عايفچ لا اني ولا امچ
ضي .. خايفه ، كلش خايفه اني بس اسمع كلامهم اخاف لو چان حقيقه شلون
محمد .. ضي لا تخافين
ضي .. خايفه
محمد .. داگلچ لا تخافين
ضي .. كلش خاايفه دااحس بشعوور دايرعبني ، لا لااا تعووفني اوگف
فزيت وشهگت شهگه عبالك داتطلع روحي
وگلبي يدگ سريع ..
ضي:: لا تعوفني خاايفه ، لاا تخلينيي وحدي ولله خاايفه مدااچذب انييي ، صدگني موو قووويه ما اگدر ابقه وحدييي
نتبهت على نفسي وصرت اباوع للناس الگاعده
والبيت كئيب ومدري شدايصير الكل لابس اسود
اجت عيني بعين ودق الچانت بحضن خالتي ترجف رجف ودرت وجهي لليان اشوفها گاعده على صفحه وساكته
ونظراتي تتنقل من شخص لشخص
لحد ما اجت عيني بعين خالتي الچانت هادئه كلش وكأنما يوم عادي مثل أي يوم بس مجرد لابسه اسود وتباوع للمكان ببرود وهدوئها جداً بارد

گمت من مكاني واحس روحي گوه شايلتها
باوعتلي خالتي رباب وگالت ..
رباب:: خاله ضي وين رايحه؟!
باوعتلها وماحچيت أي شي عقلي رفض يرد ، اصلاً بشنو ارد واني بهل صدمه؟! ، طلعت من المكان ورحت لغرفه ابويه فتحت الباب مال غرفه وانا لازمه بچيتي گوه دخلت للغرفه ورفعت راسي لگيت صورة ابوي اختلطت مشاعري ماعرف بشنو اعبر ابتسم واني ابچي ، جريت نفس عميق وحچيت بصوت مخنوگ ..
ضي:: شفت امي لو بعدك
رحت اخذت الصوره بين ايدي واتجهت للچربايه واحس رجلي ما تشيلني وگوه دامشي نمت على الچربايه وخليت صوره ابوي بحضني وصرت احچي وي واحد ميت وانتظر احصل جواب من عنده بس چنت احس دايسمعني وراح يگدر يرد عليه ..
ضي:: گلت الك لا تعوفني وگلت الي اي ما اعوفچ بس انت چذبت عليه ورحت وعفتني وتگلي اني قويه بس وين القوه؟! ، تره اني ما اعرف اصير قويه ولا اگدر اهتم بودق وليان بعدني صغيره بابا وينك گلت الي راح ابقه وياچ دائماً شو رحت ، وينك شنو امي اخذتك وياها ماگدرت تتحمل تبقه وحدها؟! ، زين واني؟ مو اني بنتك! وتگلي صيري قويه واني ذرة حيل ما بيه نهد حيلي بغيابك
صفنت شوي واحس گلبي يوجعني وعيوني تجمعت بيها الدموع وصرت حتى ما شوف بوضوح من كثر دموعي ، ابتسمت وبداخلي غصه واحس روحي كلش تعبانه ..
ضي:: بابا اني مو گدها احتاجك ولحد هسه مداگدر استوعب الصار ، امي راحت وانت تروح وراها ليش؟! ، زين مافكرت عندك ثلاث بنات صغار بعدهن ويحتاجن الك؟! ، وتره اني ماگدر اشيل مسؤليه اكثر من هيچ حاولت اعبي الفراغ الخلته امي بس فشلت نوبه انت تروح! ، حس بيه تره اني داحس بضغط كلش چبير عليه وفوگاها تريدني اخذ مسؤليتك؟؟ ، انت مو اب مو حرام عليك تعوفنا هيچ؟ ، مو حرام عليك تعوف بناتك؟ ، لهل درجه تفضل امي علينا امي عافتنه وما تحملت مسؤليتنا تقلدها وتروح! ، وتريدني استوعب فقدانك وفقدانها ليش؟! ، لعد اني اريد تاخذني وياك ما اريد ابقه هنا وتره حرام عليكم واني حيل ضايجه على السويتوا بيه بس گلبي ما ينطيني ما اسامحكم
ختنگت حيل ولزمت صدري بوجع واحس روحي كلش تعبت ..
ضي:: بابا تدري چانو ينتظرون تروح حتى يأذوني اني وخواتي وهسه انت سويت اليردونه گلي شلون راح ادافع عن نفسي وعن خواتي؟! ، راح يستغلون غيابك تقبل تصير بنتك ذليله؟!
مسحت دموعي وصرت اباوع الايدي ترجف رجفه مو طبيعيه
.. يارب ساعدني وافرج عليه وعلى خواتي بعدني هسه يلا دخلت مرحله الشباب وفقدت امي وابوي مداگدر اتخيل شنو راح يصير النا من بعدهم احس بخوف وما ضل الي سند ولو اجي على ايهاب واريده يكون الي سند ف هو أول الناس الراح يكسرني ويخذلني
نفتح باب الغرفه فزيت وصرت اعدل بگعدتي ..
- گاعده هنا؟
رفعت راسي وشفت خالتي جايه للغرفه وداتمشي بتجاهي
وصلت لعندي ودفعتني وگعدت بمكاني ..
رهام:: مفروض تگومين وتحترميني مو تنتظريني اگلچ گومي ، وبعدين شتسوين بغرفتي
ضي:: غرفه ابوي
رهام:: وغرفه ابوچ نفسها غرفتي
ضي:: ليش ..
رهام:: ما فهمت ، ليش شنو؟!
ضي:: ليش هيچ سويتي
رهام:: شنو سويت
ضي:: عبالچ اني ما اعرف
رهام:: مدافهم منچ شي اني مقدره ظروفچ لان تعبانه ومصدومه من الصار ف عادي تحچين كلام ما مفهوم كلش عادي
ضي:: انتي ليش هيچ داتتصرفين وياي
رهام:: شسويت؟!
ضي:: اريد اگلچ شي
رهام:: اسمعچ
ضي:: انتي شنو خليتي لأبوي
رهام:: شنو قصدچ؟!
ضي:: تعرفين شنو قصدي كلش زين
رهام:: لا ما اعرف
ضي:: انتي كلش بارده وما انطيتي أي ردة فعل وما چنتي بالبيت بذاك اليوم
رهام:: اي چنت يم صديقتي وانتي شنو تردين اسوي اللطم واصرخ واملخ بروحي خلص راح وهذا يومه
ضي:: ليش ما متأثره؟!
رهام:: باعي حبيبتي اني ما احب اصير ام وجهين ومنافقه اگعد ابچي واسوي روحي الحبيبه الوفيه كلش زين تدرين اني تزوجت غصب وما عندي أي مشاعر تجاه ابوچ وكل الصار بسبب امچ
ضي:: هه عبالچ اصدگچ
رهام:: اگول يلا طلعي بره غرفتي اريد انام
ضي:: تنامين!
رهام:: اي انام شبيچ منصدمه؟ ، شنو اول مره تشوفين شخص ينام
ضي:: لا بس ..
رهام:: بس شنو ترديني اصير بومه ما انام لچ نعسانه ما نايمه عدل بهل ايام الفاتحه لعبت بيه لعب هوسه يمته تخلص
وگفت وهي صارت تعدل بالمخده وتريد تنام ضليت صافنه عليها وصافنه على برودها
حته لو چانت متزوجه غصب ما معقوله ما تنطي أي ردة فعل لهل درجه ولو چانت ما حاسبته رجلها ف هو رجل اختها وابوي علاقته زينه وياهم
احسها شيطانه على هيئه بشر
احس موت ابوي چان بسببها هي
ماكو غير تفسير
اباوع الها بكل حقد واحس اريد اموتها هسه وبهل لحظه بس متردده
صرت امشي خطوات بتجاها وهي داتعدل نومتها وتريد تنام واني امشي وساكته باوعت الي بستغراب وگالت ..
رهام:: خير شكو؟ ، مضيعه شي يمي

جريت المخده وبدون ما احچي ولا شي گبل خليتها على وجها وضغطت عليها ب اقوى ما عندي وصرت اخنگ بيها واريدها تموت ما چنت افكر بشي ثاني غير انو انهي حياتها ولا فكرت بالعواقب ولا فكرت بأي شي احس گدامي عدو مو خالتي ، صوتها ما مسموع ومحد يگدر يفلتها مني وترافس برجلها لحد ما دفرتني بنص بطني ووگعتني بالگاع
لزمت بطني بوجع ضربتني بأقوى ما عدها
شمرت المخده واباوع الها وجها مخطوف لونه وتتنفس سريع وصارت تباوع الي بنظرات بين الخوف والحقد گمت من مكاني وردت اكمل عليها بسرعه گامت وجرتني من شعري وصارت تسحل بيه واني احاول افتك منها عضيتها بيدها هي دفعتني حيل على الشباك ونركع راسي بحافه الشباك
حسيت بمكان الضربه خدر ما حسيت بوجع
خليت ايدي على گصتي واشوف ايدي نترست دم
والدم صار ينزل على وجهي واني واگفه مثل الصنم ما تحركت ولا انطيت ردة فعل ، صرخت رهام بصوت عالي وعلى صوتها التموا
اباوع الهم صارت نظراتهم تتناقل بيني وبينها وواضح عليها منصدمين من الدايشوفوا
چانت خالتي رباب واگفه والنسوان يحچن بينهن
ركضت الي خالتي رباب وصارت تباوعلي بقلق ولزمت ايدي الملطخه دم ..
رباب:: هااااي شنوووو ، شنووو صااار!!!
اني اباوع الها وساكته وما نطقت بأي حرف
باوعت لرهام وگبل گالت ..
رهام:: هييي ، هييي حااولت تموووتنييي رباااب بعدييي هل مجرمه عنييي
رباب:: شنوو داتحچين
رهام:: شنوو داحچي لچ دااااحچي هندديي اني؟!!! ، هااااي خطيرره وخريهااا عني انيي اريد حياااتي طلعيهااااا
خالتي رباب ضلت ساكته وكلشي ما مفتهمه من السالفه
واني مادري ليش مداگدر احچي
احس روحي مخنوگه ولا اگدر انطق ..
رباب:: حبيبتي ضي احچي شنوو صاار ليش هيچ ساكته
رهام:: لااا انتي وبنت اختچ مخبلااات لچ اگلچ راادت تموتنييي انتي شنو ما تفهمين
داليا:: ماماا تره ضيي داتنزف
رباب:: امشيي ضيي شووفي حالچ شصاار بييي خل اداويلچ جرحچ ياربي ليش المصايب تمطر علينا مطر
اخذتني من ايدي وراحت تداويلي جرحي وهي داتداوي الي احس روحي كلش دايخه من كثر الدم الفقدته اباوع لخالتي اشوفها بنظر مشوش
گوه مفتحه عيوني وبدون ما احس گبل وگعت واشوف الدنيا سوده وكلشي مداسمع
لحد ما حسيت بمي بارد نزل على وجهي فزيت بسرعه وصرت اشهگ وصرت اباوع الهم بخوف ..
رباب:: اهدئي حبيبتييي اهدئيي عمرري ماا صار شيي
بدون ما احچي شي گبل شمرت روحي بحضن خالتي ونفجرت بچي احس روحي شايله جبل هموم واريد افرغ البداخلي بس مداگدر
.. هسه يلا صرت استوعب الموضوع ، واستوعب الصار ، هاي هي لازم اكمل طريقي وحدي بدون ام ولا اب وصار بدال الفراغ فراغين واني چنت فارغ واحد اريد املي ما گدرت شلون راح اكمل مسيرتي ويه خواتي بهل دنيا الصعبه وهي بيها اشكال وانواع من الناس لدرجه ممكن اقرب شخص الك ممكن يأذيك
مر على الصار اكثر من اسبوع
وخلصت عطله نصف السنه واني بعدني ما مداومه
وحابسه روحي بالبيت واكلي كلش قليل ودائماً اتخربط بسبب سوء التغذيه
الساعه ب٧:٠٠ صباحاً ، يوم الاحد ..
واگفه گبال المرايه وداعدل بشالي
صفنت على نفسي واشوف روحي شلون متغيره
اني جسمي رشيق بس بعد الصار صار ضعيف حته عظام ايدي بارز واختفن خدودي كلش ضعيفه صايره حته صدريتي داحس بيها عريضه عليه
معقوله كل هل وزن فقدته بكم اسبوع؟!
كملت واخذت جنطتي ونزلت جوه
خليت الجنطه على التخم وصرت اطلع الكتب الما احتاجها وقاطعني صوت رهام وهي تگول ..
رهام:: راح تداومين؟!
درت وجهي الها وضليت ساكته ..
رهام:: غريب ، صارلچ هواي ما مداومه وهسه فجأة تقررين ترحين حته خواتچ داومن وانتي بعدچ
ما حچيت ولا شي شلت جنطتي على چتف واحد وردت اطلع ووگفتني بكلامها وهي تگول ..
رهام:: مالها داعي حركاتچ من تضلين ساكته وتباوعيلي بنظرات مدري شلونها وها نسيت اگلچ تره سويت ريوگ يعني اذا رايده تتريگين وياي ف هو جاهز
وگفت بمكاني وچتفت ايدي وصرت اباوع الها ببرود
وحچيت وصوتي مبحوح وتعبان ..
ضي:: من يمته انتي تهتمين الي
رهام:: اني ما اهتم لا الچ ولا لخواتچ الصراحه بس شسوي وصيه اختي هاي لازم ادير بالي عليچن وانتي وضعچ حيل يرثى اليه
ضي:: مشكوره ما اريد اكلي وحدچ
رهام:: ليش؟!
ضي:: لو وثقت بيچ راح تكون نهايتي بالمستشفى ومادري لو اموت لو اعيش مثل ما صار ب ابوي
رهام:: شنو تقصدين بكلامچ
ضي:: انتي فهميها ، على فكره حمرتچ لونها مو حلو وشنو من خلگ عندچ تحطين مكياچ من الصباحيات وفوگاها رجلچ ميت
رهام:: عندي طلعه ف مجبوره
ضي:: مجبوره؟! ، ليش لهل درجه ما واثقه بروحچ
رهام:: ليش ما اثق بروحي حبيبتي لعلمچ اني جمالي رباني وبدون مكياج احلا بس احب اخلي مكياج بكيفي
ضي:: خلي منو لازمچ بس لا تكثرين لان راح تكشفين روحچ
رهام:: هييي انتيي اوگفي وين رايحه ليش داتحچين بالالغاز
ما رديت عليها ومشيت وطلعت من البيت وعفتها
صرت اتمشى لمدرستي لحد ما وصلت
وبديت بدوامي وطول الوقت وبكل الدروس صافنه واحاول اركز ويه شرح المدرسه بس مداگدر
بقه النا درسين ونطلع

ودخلت علينا ام الرياضيات وأول ما اجتي گبل بدت تشرح وترست السبوره ترس شرح
چنت صافنه على السبوره بس بالي ابد مو يم المدرسه ولا يم شرحها
باوعت لست دنيا صارت تتقرب لرحلتي ضليت اباوع الها لحد ما وصلت خلت ايدها على رحلتي وگالت ب استغراب ..
دنيا:: وينچ طول هل فتره شو بس غياب مداتداومين
ضي:: ظروف
دنيا:: اهاا ، ركزي تره انتي متأخره علينا واحنا ماشين بالشرح
ضي:: ان شاء الله
دنيا:: شبي صوتچ هيچ تعبان وليش وچهچ اصفر وضعفانه اتذكر قبل العطله ما بيچ اله العافيه شصاير
ضي:: ما بيه شي ست بس شوي مريضه
دنيا:: اي الله يشفيچ صحيح انتي هارجه الصف بس افتقدنا هوستچ والصف چان هادء بدونچ وما لاحظت وجودچ عبالي ماكو لان وضعچ غريب اليوم كلش هادئه لدرجه ما گدرت اتعرف عليچ ، ونسيت اگلچ هاي صديقتچ اليمچ وين تره غياباتها كثرت هواي واذا غابت اكثر راح تنفصل
ضي:: مادري عنها
دنيا:: ما تدرين؟! ، صديقتچ وما تعرفين وين؟!
ضليت ساكته وما جاوبتها
اني كلش تعبانه وهاي جايه تسئل وشايفه وضعي شلون تعبان ومصره تكمل ..
دنيا:: صحيح نسيت احاسبچ ، انتي شكو مخالفه اليوم؟
ضي:: بشنو مخالفه
دنيا:: مسويه روحچ ما تدرين؟! ، لابستلي كله اسود بأسود شكو
ضي:: ا ان....
دنيا:: ما عندي وقت حته اضيعه وياچ روحي للمديره
ضي:: ليش
دنيا:: شنو ليش فوگ شينچ گوات عينچ! ، امشييي يلااا
ضي:: اني ما خالفت بس ..
دنيا:: لاااا بس ولاااا شيي طلعييي بره الصف وروحي للمديره وگولي الها ست دنيا دزتني لان اني مخالفه
اريد اكمل كلامي واني گوه داحچي وهاي بس تقاطع بيه وقبل شوي تحچي وياي بهدوء ومادري شنو ما عرفتها هسه يلا رجعت دنيا الاعرفها
حيل ضجت فوگ الغصه البداخلي والقهر هاي جايه تكمل فوگي
طگت روحي وحابسه دموعي گوه وقاطعت كلامها بسرعه وگلت ..
دنيا:: شكووو واگفه صاافنه بوچهي ي...
ضي:: انيي عنديييي حالة وفااة ابوويي مات تردينيي البس ابيض؟!!!
ضلت ساكته وحيل حترگ دمي بسببها تجمعت الدموع بطرف عيني وحچيت بتعب وما اگدر اعلي صوتي ..
ضي:: مفروض تقدرين ظروفي وانتي شايفه حالي شلونه يعني وضعي مال وحده طبيعيه من شايفتني لابسه اسود وحته كلام مداگدر احچي گوه تطلع الكلمه من عندي وبس احچي أتاذى وانتي استلمتيني رزايل وما تخليني ابرر الچ واحچيلچ شكو
دنيا:: هسه گلت هاي هادئه مو من عوايدها بس هسه يلا تأكدت انتي بعدچ مثل ما چنتي لا تغيرتي ولا هدئتي وحته بأسوء حالاتچ الچ خلگ تجادلين وترفعين صوتچ على مدرستچ بس اني هسه مستخطيتچ وحالتچ ما تسمح اوديچ للاداره بس مو معناها راح اسكت الچ على هذا كلامچ وعدم احترامچ الي ناقص درجتين وهاي گدامچ هسه انقصچ
بعدت عن رحلتي وراحت تاخذ دفتر الدرجات
فتحت الدفتر وصارت تدور عن اسمي وگالت ..
دنيا:: هياته اسمچ ، ضي محمد عبدالله ولله لخلي هل سنه السجل مالتچ كله صفاره ونشوف شلون تنجحين
ضليت صافنه على تصرفها
مو طبيعيه ، مفروض هاي المدرسه تكون قدوه ونتعلم من عندها بس هاي هم حاسبه روحها مدرسه ومفروض تكون قدوه وهي هيچ تتصرف ويه طالبه ضاغطه على روحها وجايه تداوم رغم ظروفها ونفسيتها المتدمره؟
شنو ذنبي اخلص من هل مدرسه من الخامس تجي تلحگني بالسادس هم؟!
دنيا:: هاي ناقص درجتين ولا تستغلين الوضع الانتي بي للتعاطف تره الطالبه الما تحترمني اعرف شلون اتصرف وياها ، وانتن شكو صافنات بوچهي مو گلت حلن السؤال هذا تره السؤال على السبوره ما مكتوب بوچهي
شلت الكتاب من الرحله وضميته بالجنطه وطلعت من الرحله وردت اطلع من الصف وصاحت ..
دنيا:: ويييين شنو وين گاعدين احنا حته تطلعين على راحتچ بكليه احنا حته تقررين تبقين بالمحاضره لو لا ، لا والنوبه مستمره تمشي والله ناقص عشر درجات واسجلچ غياب بدرسي وبطريقچ مري على مكتب المديره
اخذت دفتر الدرجات مره ثانيه ولا اهتميت
ما صرت اهتم لدرجاتي مثل قبل
طلعت من الصف بكل برود وما همتني
من زمان متعلمه اليغلط بحقي اردها اله ، لو مهما كان
صرت اتمشى بالساحه
وادري بعد العطله ما راح اكون متفوقه مثل قبل
اصلا هواي دروس مرت ومدالحگ وياهم
ولا اگدر اداوم واني بهل وضع
وحته لو چنت بكامل صحتي النفسيه والبدنيه ما راح اگدر استمر اكون طالبه عند هاي المدرسه .....
ضليت افتر وراسي يوجعني ما ماكله شي من الصبح
وحته البارحه نمت بدون عشه
گاضيتها الايام على وجبه وحده ومي وشلون عايشه مادري
وگفت على صفحه واريد اگعد احس روحي كلش تعبت وراسي حيل صار يوجعني
لزمت راسي بوجع واحاول اسيطر على روحي
غمضت عيني بقوه من الوجع وفتحت عيني واحس الدنيا تفتر بيه ومداگدر اسيطر على روحي
داحاول اثبت توازني وما گدرت اوگف اكثر من هيچ وگبل وگعت على وجهي وصرت اشوف ظلام ، واسمع صوت غريب عليه صوت مره داتحچي وياي بس مداگدر اعرف منين هذا الصوت ومنو صاحب هل صوت ، حسيت ب ايد تضرب على خدي ونزل مي على وجهي ، صرت افتح عيني واحس بدوخه ..
- انتي زينه؟!
اباوع للمره واريد اتعرف عليها من الدوخه مداگدر اميز عدل ..
- انتي زينه؟! ، جاوبيني

باوعتلها وهزيت براسي بمعنى اي
صرت ادور وجهي يمنى ويسرى
واشوف روحي بالحانوت وام الحانوت خطيه مخبوصه بيه ومتوتره ..
- شجاچ صارلي ساعه اباوع الچ الگاچ تفترين رحت اجيب شغله ورجعت لگيتچ واگعه
ضي:: خاله ما بيه شي بس شوي چان راسي يوجعني
- شنو ما متريگه؟!
ضي:: ها ، اا لاا متريگه اني بس مادري شنو صار
- انتي شنو تسوين بالساحه وهسه عندچ درس
ضي:: اني طلعت
- طلعتي؟! ، ليش عدكم درس شاغر؟!
ضي:: لا المدرسه موجوده
- وشلون طلعتي
ضي:: صارت مشكله بيني وبين المدرسه وطلعت
- وهيچ عندچ عادي تطلعين من درسها
ضي:: خاله اني عندي ظروف وهاي جايه تحاسب بيه وما قدرت ظروفي وهانتني گدام الطالبات وما تنطيني مجال احچي الها السبب ومن حچيت نقصتني واني صراحه ما گدرت ابقه بدرسها وطلعت ونقصتني فوگاها بعد
- بنتي ليش هيچ المدرسه الها احترامها مهما سوت ما يصير تتجاوزين
ضي:: بس اني ما تجاوزت عليها ولا شي كل الحچيته حقي وحته لو مدرسه ما يحق الها تهين وترزل هل شي ما يصير حته لو چنت طالبتها يعني شنو صارت مدرسه يعني خلص تهيني براحتها واسكت؟
- مادري الصار بالضبط شنو بس اني اگول لو تعتذرين منها وبلكت تسامحچ وما تنقصچ وترجعچ للدرس
ضي:: اني اصلاً ما اريد درسها هذا وياريت تفهم كلشي ما افهم منها واني لو اموت ما راح اعتذر لان ما غلطت بحقها هي الغلطت بحقي وبعد نقصتني وراحت وما عايزه على درجاتها خل تنقص لان ادري هل سنه اني ما راح اگدر امتحن بهل مستوى ويمكن أجل السنه
- ليش تأجلين
ضي:: اني حلمي طب ترديني بهل ظروف اگدر اجيب معدل يقبلني طب؟! ، خاله اني عندي ظروف هواي بالبيت وفوگ هل ظروف ابوي توفى ما صار اله هواي
- الله يرحمه ، حبيبتي البقيه بحياتچ اگول ليش هيچ ذبلانه ، حقچ يا يمه الاب سند للظهر اذا راح ف روحته تكسر الظهر وخاصتاً البنيه لان سندها ابوها
ضي:: صحيح خاله
گمت من مكاني وگالت ..
- وين
ضي:: اعتقد هسه راح يدگ الجرس بين ما اصعد داگ
- اي بس انتي تعبانه ، تردين اوديچ للاداره حته يتصلون ب امچ تاخذچ؟!
صفنت بوجها وصرت افرك ايدي بتوتر وابتسمت ابتسامه مزيفه واحس بداخلي داتعذب ..
- اوديچ خاف ما تگدرين
ضي:: لا مداعي واني ما احتاج الاداره لان خلص صرت زينه وهم ما راح يفيدوني بشي ولو رايدين يتصلون ب امي اذا لگوا جواب منها خل يگلولي لان مشتاقه لصوتها
باوعتلي بستغراب وما حچت شي ..
ضي:: شكراً خاله لان ساعدتيني ، من رخصتچ
- ديري بالچ على نفسچ
ضي:: تمام
مشيت ورحت للممر مال صفوف وصعدت فوگ لصفي ولگيت المدرسه طالعه وهسه اول ما اجيت دگ الجرس ..... حضرت الدرس الاخير گوه وبعد وقت طويل وشرح ممل واخيراً دگ الجرس وطلعت أول الناس اريد بس ارجع لان حيل تعبانه رايده اروح انام وياريت من بعدها ما اگعد ابد
لحد ما كملت طريقي للبيت وصلت لباب بيتنا
فتحته ودخلت وأول ما دخلت گبل رحت فوگ بدون ما اشوف أي احد
دخلت لغرفتنا وخليت جنطتي على صفحه ونزعت شالي
وطلعت الي ملابس ورحت اسبح
طلعت من الحمام وشعري كله مي لفيته بالمنشفه ورجعت لغرفتنا اخذت تلفوني من الكنتور ورحت گعدت على چربايتي وصرت اشوف بالتلفون شنو عندي من اتصالات أو رسائل لان صارلي فتره تاركته بالكنتور وما فاتحته ابداً
جذبني من بين الرسائل والاتصالات رقم مجهول
غريب ، اول مره اشوفه بتلفوني
وچان هل رقم متصل عليه كومه اتصالات ما معقوله هل شخص ما يعرفني ومتصل بالغلط لان لو بالغلط ما راح يتصل هلگد ، بس هو منو هل شخص واعرفه لو لا وهل شخص بنيه لو ولد وشنو يريد من عندي
ضليت صافنه على الرقم ومتردده اتصل عليه لو لا
بس بنفس الوكت فضولي يگلي اتصلي
جذبني عدد المكالمات وخاصتاً الشخص هذا متصل بأستمرار يعني اليوم والبارحه والقبلها
اكيد هل شخص رايد شي لو صدگ يعرفني
تشجعت وگبل راحت ايدي على الاتصال واتصلت عليه وصرت انتظر من عند هل شخص الرد وخايفه بنفس الوقت بس ليش مداعرف ............
#يــــتبـع ...

البارت التاسع
\ ضــــ{٩}ــــــي /
•
تشجعت وگبل راحت ايدي على الاتصال واتصلت عليه وصرت انتظر من عند هل شخص الرد وخايفه بنفس الوقت بس ليش مداعرف
لحد ما حصلت الجواب واول ما حصلت رد گبل فزيت
اجاني گبل صوت رجال
فزعني ..
📞.. الووو
📞.. اا ا الوو
📞.. منوو
📞.. ها؟! ، منو اني
📞.. منووو انتيي
📞.. اا ا اني
📞.. دحچي
📞.. اني الاريد اعرف منو انت
📞.. متصله عليه وما تعرفين منو اني؟!!!!
📞.. اني؟!
📞.. انتي شلزگتيليي بكلمه انيي ، تالي عمري يلعبون عليه زعاطيط
📞.. لا لا حشاك بس اني ..
📞.. انتي شنو؟!
📞.. الصراحه ما اتصلت عليك هيچ انت متصل عليه من قبل وجيت اعرف شنو تريد مني
📞.. اني؟!
📞.. ها شو انت الاخذت كلمه اني بدالي
📞.. تستهزئين حضرتچ؟! ، عمو شو انطيني بابا لو ماما اني ما اتعامل ويه اطفال
📞.. اطفال؟!!! ، ليش صوتي موضح الك بأنو اني طفله!
چان يحچي وسكت وسمعت صوت من التلفون جاي من عنده صوت بنيه داتحچي وياه
ركزت بهل صوت ، هل صوت سامعته من قبل ومئلوف الي
.. بس هذا مو صوت رسل؟! ، ايي هذا صوت رسل شلون ما اعرف صوت صديقتي
عرفت تلقائياً هي الچانت تتصل عليه مستحيل يكون هل شخص ، بالاضافه هل رقم غريب ومتصل عليه هواي
حاولت انقذ الموقف لان اعرف هذا ممكن يأذي رسل لو عرف هي المتصله بيه ..
📞.. اا ا ايي نسيت اگلك شي
📞.. انطيني شخص اكبر منچ حته اعرف شلون اتفاهم وياه
📞.. شتحچي انت تره عمري ١٨ سنه وانت ما انطيتني مجال اكمل خل افهمك تره هسه يلا تذكرت اني اتصلت عليك بالغلط عبالي انت صديقتي يعني غلطت شسوي تاهت عليه رقمك يشبه رقمها شوي
📞.. وصارلچ ساعه تگليلي انت المتصل ، دروووحي شگد صلفه وما تستحين
وسد الخط بوجهي
وضليت صافنه
.. لا هذا مو طبيعي ، شبي لهل درجه متعصب شسويت اني
گبل رحت للرقم وحفظته عندي بأسم رسل
وبلكت رسل تتصل عليه مره ثانيه
حته اعرفها ، شگد مشتاقه الها
صحيح اني بعدني خايفه عليها بس هسه شوي هدئت احسن من قبل على الاقل سمعت صوتها
نفتح باب الغرفه رفعت راسي من التلفون وشفت ودق اجتي باوعت الي وگالت ..
ودق:: الغده جاهز اذا تردين تعالي اكلي
گالت هل كم كلمه وطلعت بدون ما تحچي شي ثاني
عفت تلفوني والصراحه ما انكر چنت حيل جوعانه ضاله على لحم بطني واحس روحي راح اموت من الجوع اول مره اجوع بهل شكل
طلعت من الغرفه ونزلت جوه لگيتهم گاعدين على سفره الغده وملتمين گعدت
ورغم الاكل المسوي مو اكلتي المفضله وما احبه كلش بس بديت اكل من جوعي ..
رهام:: غريب اكلتي
ضي:: شنو
رهام:: لا بس الايام هاي كلها ما تاكلين من طبخي اله من خواتچ لو من ايدچ وهاي اذا اكلتي اصلاً لان اكلچ اقصى شي وجبه وحده
ضي:: هذا انتي طبختي؟!
رهام:: اي لعد منو
عفت الخاشوگه من ايدي
وصرت اباوع الها ببرود وگلت ..
ضي:: چنت حيل جوعانه ومادري ليش فجأة نفتحت نفسي للاكل رغم طول هل ايام واني اكل بكميات قليله واشبع بيهم بس هسه شكثر ما چنت جوعانه احس روحي شبعت بهل كم لگمه أو الاصح نسدت نفسي مو شبعت
رهام:: ليش؟
ضي:: مادري يجوز نكون احنا الضحايا القادمه ، لو يصير اشرب قاصر لو ديتول چان شربت حته اعقم معدتي من الاكلته
رهام:: انتي صدگ ما تستحين هاي فوگ ما تشكريني على التعب التعبته ، لهذا السبب اني ما اريد اطبخ الكم
ضي:: ولا تطبخين بعد احسن تره اني اخاف على صحتي وعلى صحه خواتي خاف نتسمم
رهام:: شنوو داتحچين ، ايهاااب ليش ساكت احچييي ويه اختك شويي وگول الهاا تحترم مو مفروض تعلمهن الادب بما انو ابوك ماكو؟!!!
ايهاب:: شنو تردين اگول الها خليها تحچي براحتها ما تعرفين وضعها شلونه من بعد الصار لأبوي صارت تشك بالكل لا تهتمين الها
رهام:: واني شنو ذنبي تشك بيه يعني ابوها تسمم مادري شجاه ومات انيي شعليه!
ضي:: شنو شعليچ؟!
گمت من مكاني بغضب وصحت عليها وحيل ضايجه ، شلون تنكر! ..
ضي:: شعليچ!!! ، كل السويتي وشعليچ؟!! ، انتي مفروض مو هنااا انتيي ليش گاعده بيناتنا وانتييي مجرمه انتي القتلتييي ابويي بالسم الخليتي بأكله تردين تنكرين هل شي؟!! ، لو مستغله الوضع لان ماكو دليل قاطع يثبت عليچ هل تهمه
رهام:: هيييي انتيي احترمييي شنوو قاتله شسووويت انييي تره اني لا سويت اكل ولا شي طلعت گبل
ضي:: اي چذبي براحتچ بس اني ما مصدگه چذبچ وگدامكم كلكم هااي القتلت ابوناا صدگوني خلت شي بالاكل اني متأكده من هل شي
ليان:: ضي كافي
گالت الي كافي واني صفنت بوجها
هاي صدگ تحچي! ، شلون تحچي هيچ ببرود؟! ..
ليان:: مصختيها
ضي:: شنو؟
ليان:: تره عيب عليچ تتهمين ناس مالهم دخل
ضي:: معقوله انتي ليان؟!! ، شجاچ؟
ليان:: اي اني ليان ليش مستغربه؟ ، صحيح اني ما اطيقها لهاي بس اني اوگف ويه الداشوفه صح ماكو شي يثبت هي سوت هل شي وبعدين اكو اكثر من طريقه ممكن الشخص يتسمم بيها مو اله يكون بداخل الاكل سم
ضي:: ليان انتي واگفه وياها؟!
ليان:: لا وياها ولا وياچ
رهام:: سمعتي اختچ؟! ، يلا كافي گعدي
ضي:: لا مو كافي اذا ما اخذوا حق ابوي اني الراح اخذه بيدي

رهام:: اخذي حقه منو لازمچ بس مو مني اني لو شايفته مقتول وبيدي السلاح ف بذاك الوكت تعالي احچي هل حچي ، انتي ليش هيچ منفعله يعني هل انفعال ما اله داعي اله اذا چان انتي الچ ايد بالصار
ضي:: ما فهمت شنو قصدچ
رهام:: يعني اني دائماً اشوف المجرم يحاول يبعد التهم عنه ويشمرها على غيره لو ينفعل بزياده حته يبعد الشبهات عنه
ضي:: يعني تقصدين بكلامچ هذا اني سممت ابوي؟!!!!
رهام:: اني گلت هيچ؟! ، شوفوا داتحچيني كلام اني اصلاً ما گلته
ايهاب:: اگول تره مداعي تحچين هيچ واضح شنو تقصدين بكلامچ ومعليچ بأي وحده من خواتي مفهوم؟
رهام:: لا ما مفهوم تره خواتك مو ملكات حته ممنوع احاچيهن صارلها ساعه هاي اختك تذب عليه حچي وانت ساكت بس من حچيت اني ووجهت الها نفس الكلام حچيت
ايهاب:: بكيفها وخلص سدوا السالفه وتعالي ضي كملي اكلچ
ضي:: ما اريد شكراً
عفتهم وطلعت
.. هين يا رهام هيچ تنكرين وكل تصرفاتچ تدل على انو انتي السويتي هل شي؟ ، اذا ما صدگوا وما رادوا ياخذون حق ابوي ف اني موجوده واعرف شلون اتصرف وياها بس الشغله يراد الها وقت
صعدت فوگ واول ما صعدت رحت لغرفتنا وگعدت على چربايتي وضايجه
اخذت جنطتي يمي چانت بصف الچربايه
صعدتها وخليتها بحضني وصرت اطلع الكتب واريد احضر دروسي
فتحت كتبي وصرت اباوع للكتاب احس داشوف طلاسم وكلشي مدافتهم گعدت احاول اقره بس كلش مالي واهس ولا داگدر استوعب وافهم الموضوع
مستواي الدراسي حيل نازل ومو مثل قبل
قبل چانت الدراسه بالنسبه الي استمتع بيها وما عندي أي مشكله اذا گعدت اقره
بس هسه احس روحي كارهتها گوه فاتحه الكتاب وگوه داحاول اقره وما طايقته ابد بس من لا چاره داحاول اقره لان مستقبلي
سمعت صوت الباب الغرفه انفتح ورفعت راسي من الكتاب
وشفت ودق جايه
سدت الباب وراها وصارت تمشي بتجاهي لحد ما وصلت لعندي بعدت الكتب على جهه حته تگعد وگعدت وصارت تباوعلي وما حچت شي ..
ضي:: انتي جايه حته تباوعين بوجهي؟
ودق:: طبعاً لا
ضي:: لعد شكو جايه
ودق:: اني اجيت اواسيچ
ضي:: تواسيني على شنو
ودق:: على الصار ، ادري بيچ متأثره بسبب وفاة ابوي وهل شي صعب ومو بس عليچ علينا كلنا بس احنا دانحاول نتجاوز هل فتره ونرجع نعيش طبيعي بالرغم هل شي كلش صعب وما راح نگدر نرجع مثل قبل ابد خصوصاً احنا فاقدين مو بس ابوي ، الاثنين فاقدينهم يعني صرنا يتامه من الابوين
ضي:: اي؟
ودق:: شنو اي؟ ، صارلي ساعه احچي وتگليلي اي؟!
ضي:: لعد شنو تردين اجاوبچ
ودق:: باعي ضي انتي هل ايام صايره كلش بارده وكلش ما عاجبني وضعچ اريدچ ترجعين مثل قبل تنطين جو وحركه للبيت البيت حالياً كلش كئيب وصار كئيب اكثر من انتي بهل حال ف طلعي من هل حاله اترجاچ ، ما نگدر نعيش طبيعي اني وليان وانتي هيچ وضعچ
ضي:: شنو ترديني اسوي؟
ودق:: اريدچ ترجعين تاكلين وتهتمين لصحتچ وتهتمين لنفسچ ودروسچ ، احنا مثلچ حيل متأذين بسبب الصاير بس دانمشي الدنيا لان اذا بقينا مثلچ ما راح نستفاد شي وراح نضيع وكت هواي واتمنى هم تبطلين شكوكچ هاي
ضي:: عن أي شكوك تحچين؟!
ودق:: انتي داتشكين بخالتي هي الكتلت ابوي بس الصراحه هي خالتي حقيره بس ما توصل لهل حقاره ولا تنسين خالتي ما صار الها هواي من تزوجت حته سنه بعدها ما عبرت ف ليش تسوي هيچ شي وتخلي روحها ارمله وتره هي من زمان چانت تريد تزوج بس مداتلگه نصيبها لحد ما لگت ابوي واستقرت وياه
ضي:: اني حيل مستغربه من وضعكم ، ليش تدافعون الها شنو گايله الكم حته تدافعون الها هيچ؟!!!
ودق:: ما گايله شي بس من تتهمين شخص اتهمي بدليل مو هيچ لان الله باچر عگبه راح يوگعچ بهيچ موقف
ضي:: شنو قصدچ؟!!! ، يعني اني ممكن اكون انسانه متهمه! ، ليش اني شمسويه
ودق:: داضرب الچ مثال ، وبالوكت التحصلين بي على دليل اني راح اوگف وياچ
ضي:: عن أي دليل تحچين ، اني شلون راح اجيب دليل بهيچ وضع؟! ، تره ابوي متسمم مو مقتول حته اگدر اجيب دليل
ودق:: يعني كلامچ هذا دايروح على الفاضي ف كافي تتهمين الناس
ضي:: روووحي ، انتي جايه تردين تغثين بيه!
ودق:: لا بس ..
ضي:: طلعييي بره مااا اريد احااچيچ ولاا احاچي أي شخص منكم
ودق:: تمام طالعه بس اهدئي
ضي:: طلعيييي هسه
سكتت وما حچت شي ومثل ما گلت الها سمعت كلامي وطلعت
أول ما طلعت لزمت راسي بوجع وغمضت عيني بقوه
.. شنو دايصير؟!! ، هذوله مو يكرهوها!! ، شنوو الخلاهم يتعاطفون ويه هل انسانه ويحموها!!!
فتحت عيني وجريت الكتاب ورگعته بالحايط بنرفزه وصرت اشمر بكتبي وما داسيطر على روحي
وصرخت بصوت عالي وصحت ..
ضي:: اكرررهااااا ، اكرررررهاااا مو بيديييي هل حقيررره الحيييه ليش اجتييي لبيتنااااا
گمت من مكاني بسرعه وطلعت من الغرفه وانزل من الدرج ركض
صار بوجهي ايهاب اول ما شافني باوعلي بستغراب وگال ..
ايهاب:: شبيچ؟
ضي:: وخر
دفعته عن طريقي ورحت متوجهه للصاله لگيت رهام گاعده وتتصفح بالتلفون والابتسامه مرسومه على وجها ..
ضي:: رهاااام
فزت من مكانها وصارت تباوع الي

واختفت ابتسامتها بسرعه أول ما شافتني ..
ضي:: شنووو گايله الهم حته تخليهم يوووگفوون ضدي علموودچ
رهام:: يمه هاي شبيها ، شنو دخل بيچ جني وهيچ نگلبتي عليه بسرعه؟!
ردت اهجم عليها وحسيت ب ايد جرتني من كتفي وندفعت على شخص رفعت راسي واشوف ايهاب قيد ايدي وصرت ما اگدر اتحرك ..
ضي:: شدااتسوووي وخر
ايهاب:: لچ مخبله انتي؟!!! ، شبيچ!
ضي:: ماا اريدهاا تبقه بالبيت ماااا اريدهااا
رهام:: ليش هو بكيفچ ، اني اگول ودي اختك لمصحه نفسيه احسن لان بعد ما مات ابوها تخبلت وفقدت عقلها صارت فجأة تعصب وفجأة تجيها الحاله مال خبال يعني كلش عادي گاعده وهادئه وتجي تموتك كتل وتره هاي الها مستقبل اجرامي لان بذيچ المره حاولت تكتلني الغبيه وعبالها تنجح بمحاولتها
ضي:: غبيه؟!! ، لا اني ما خطئت بقراري بس شسوي العار ما يموت بس حته لو ما نجحت هل مره راح تنجح بغير مره صدگينيي
رهام:: يمه هاي اختك تخوف مفروض هاي التطلعوها من البيت لان الصراحه ما مرتاحه لوضعها گلت الك مخبله يعني تكتلني وتاليها يودوها مصحه نفسيه ما ياخذون حقي لا عيني اني ما اقبل بهيچ شي
ايهاب:: رهاام عوفي خواتي بحالهن ولا تدخلين بأي وحده منهن وسكتي
رهام:: هسه هو ياهو يم خواتك شو هاي المخبله اجت بدون سبب ورايده تهجم عليه وبعدين انت من يمته تهتم الهن
ايهاب:: اهتم الهن بالوكت اليعجبني ، وحذرتچ رهام انتبهي لكلامچ
رهام:: هل عائله غريبه ماكو شخص بيكم صاحي ولا تصيحلي رهام احترمني على الاقل شو بعد ما مات ابوكم كلش ماكو احترام ، خير؟!
ايهاب:: مو هذا اسمچ لو اني غلطان؟ ، وانتي الثانيه گدامي رجعي لغرفتچ لا ادفنچ هنا
ضي:: الظاهر مو اني الازم اروح لمصحه نفسيه مفروض انت التروح لان عندك انفصام بالشخصيه قبل شوي مهتم الي وما تقبل رهام تحچي عليه وهسه تريد تدفني؟
ايهاب:: بكيفييي ويلاا امشيي
ضي:: فهمت عوف ايدي
ايهاب:: مو تهجمين عليها
ضي:: لا ما اهجم ما عدنا حرب
عاف ايدي ومشيت وطلعت من عندهم
مادري شصار ولا اعرف ليش هيچ سويت
بس هل انسانه داتدمرني بتصرفاتها وحيل تستفزني
لدرجه ما اگدر اسيطر على اعصابي بسببها
واخر شي تسوي تسمم ابوي وتسوي روحها بريئه
معقوله هي ممثله بارعه حته تخليهم يصدگون
لو هم دايغبون بنفسهم ويسوون روحهم ما يعرفون شي
رغم السالفه واضحه وضوح الشمس
بس ما اگول غير حسبي الله ونعم الوكيل دخلت بيتنا بكم يوم خربته وگلبته گلاب
لليل چنت گاعده بچربايتي وضايجه وبيدي تلفوني وصافنه ..
- وين صافنه
درت وجهي وشفت ليان گاعده وودق يمها ..
ليان:: شبيچ صفنتي بوجهي
ضي:: شنو تردين
ليان:: ردت اگ...
داتكمل كلامها ودگ تلفوني گبل اشرت الها بمعنى سكتي وبسرعه باوعت للرقم وشفت نفس الرقم الاتصلت بي الصبح
جاوبت بدون أي تردد وبسرعه گلت ..
📞.. منووو
📞.. ا اني ر رسل
📞.. رسل!!! ، مشتااااقه الچ ما تتوقعين شگد معقووله داسمع صوتچ
📞.. اني اكثر
📞.. شبي صوتچ
📞.. لا تسئليني عن صوتي لان اني بالگوه حابسه دموعي ورايده ابچي بس ..
📞.. يا عمري كلشي ولا دموعچ تنزل
📞.. ضي ما تتوقعين شگد اني تعبانه ومذلوله واحس روحي خسرت كلشي ، امي ومستقبلي ودراستي وحياتي كلها خسرتها
📞.. اني اعرف الصار بس ما اعرف بالضبط شنو صاير الچ
📞.. انتي تعرفين اهل ابوي اخذوني وراح يجبروني اتزوج
📞.. اي
📞.. باچر عقد القران مالتي واني كلش خايفه
📞.. عقد القران!
📞.. ضي اريد مساعده اريد أي شخص يساعدني بس محد يگدر يساعدني وكل اهل ابوي موافقين على هل شي وماكو ولا واحد واگف وياي
📞.. انتي شفتي الولد؟
📞.. اي بس ما گعدت وياه
📞.. شگد عمره
📞.. ٢٥ سنه
📞.. اي زين
📞.. يا زين تره عمري ١٨ اني
📞.. رسل ممكن هل شخص راح يغير حياتچ
📞.. للاسوء
📞.. بس ممكن يغيرها للافضل ، انتي ما تتوقعين شگد اني منقهره وضايجه على الدايصير وياچ بس مداعرف شلون اواسيچ غير بهل كم كلمه وتره كلامي صحيح يعني تفائلي بالخير لان اول وتالي راح تتزوجين هل شخص
📞.. اني دافكر اهرب من هل زواج بس اذا هربت صدگيني بس يلگوني ما راح يخلوني عايشه وحته لو ما لگوني ما راح يعوفون امي بحالها وراح يأذوها اني خايفه عليها
📞.. هروب؟ ، مخبله انتي شنو هروب! ، لچ لو صدگ هربتي راح تدمريها الحياتچ من صدگ ، گعدي راحه وبدون هل سوالف رجائاً
📞.. گلت مجرد تفكير بس لو ما امي صدگيني اهرب ، صدگ ضي اريد اطلب منچ طلب عفيه شوفيلي امي ووصليلي اخبارها
📞.. اني صارلي فتره من شفتها بس فتره طويله رحت لأمچ حته اسئلها عنچ وخطيه حالتها حاله وحيل متأذيه بفراگچ
📞.. شبيدي عليها عليچ الله ضي مري عليها بين فتره وفتره لا تعوفيها
📞.. تدللين تره امچ كلش عزيزه وحيل احبها ما راح اعوفها بس هل فتره دامر بظروف ف ما گدرت اشوفها
📞.. ظروف شنو؟
📞.. ابوي تزوج وصارت مشاكل وهوسه
📞.. تزوج؟!!! ، ليش
📞.. چانت وصيه امي ، للاسف جاب النا حيه للبيت وراح
📞.. وين راح ، معقوله عافكم تره عمي محمد اعرفه وانسان زين وحباب وحيل يحبكم مستحيل يعوفكم
📞.. اي عافنا رغم حبه النا بس عافنا
📞.. مستحيل

📞.. ليش مستحيل؟ ، هو صحيح يحبنا بس حبه لأمي اقوى لدرجه تخلى عنا بس علمود يروح الها
📞.. ضي شنو داتحچين ، يعني عمي م...
📞.. توفى
ضلت ساكته لفتره واني حاولت قدر الامكان اخبي حزني واحبس دموعي
حاولت اغير السالفه وقاطعتني ..
📞.. الله يرحمه والله اسفه ضي ما چنت ادري بالصاير ولو ادري چان ما فتحت الموضوع ولا حچيت بي البقيه بحياتچ صدگيني اسفه
📞.. مداعي تتأسفين اصلاً عادي تعودت على الحزن وتعودت على فراگ ابوي ، گليلي انتي راح تحضرين بالمحكمه
📞.. ليش تغيرين بالموضوع
📞.. جاوبيني وبس
📞.. عن أي محكمه تحچين
📞.. المحكمه الراح تختارين بيها منو تردين امچ لو ابوچ ، للعلم هذا كلام امچ مو كلامي
📞.. امي راح ترفع دعوه قضائيه على ابوي؟!
📞.. اي
📞.. امي صدگ تحچي شنو ما تخاف على روحها
📞.. ليش
📞.. لچ هذوله ناس ما يخافون الله راح ينتقمون منها انتقام
📞.. زين انتي جاوبي منو تختارين
الاجابه كلش زين اعرفها بس داسئلها للتأكد
حته اطمن خالتي رغم هي تدري بأجابتها شنو راح تكون
واني وواثقه من روحي بالاجابه الراح اسامعها گبل بدون مقدمات تفاجئني بغير اجابه لدرجه حته كلام صرت ما اعرف شلون احچي ..
📞.. ابوي
📞.. اي عرفت ، ها لاا شنوو گلتي؟!!! ، ابوچ!!!
📞.. شبيچ
📞.. مخبله انتييي لووو صاااحيه
📞.. لا صاحيه لو چنت مخبله چان اختاريت امي
📞.. مستحيل رسل شداتحچين انتي
📞.. لا تنصدمين جوابي كلش عادي لان لو اختاريت امي لا اني الراح اعيش بسلام ولا امي وراح اتعبها اكثر واخليها تمرض وتتأذى بسبب جيتي الها تره رجوعي بعد اسوء من الهروب وصحيح اني عايشه بجحيم هسه بس هل جحيم اهون بهواي من الجحيم الراح اعيشه ويه امي بسبب هذوله
📞.. زين اني شگول لأمچ
📞.. گولي الها كل كلامي
📞.. بس راح تنقهر هواي وتره امچ بس تنقهر تتأذى
📞.. اهون من الاذيه الراح تحصلها بسببهم ، اا ا ضي اني راح اسد الخط لا تتصلين اله اني اتصل ماشي
وگبل سدت الخط بوجهي بعد ما گالت كلامها
عفت التلفون من ايدي وتمددت على الچربايه ..
ليان:: شنو راح تنامين تره بعد وكت
ودق:: دجاجه
ضي:: اششش سكتن وخلني انام
غمضت عيني وصرت افكر برسل
ياربي هاي البنيه يمته ترتاح
شگد ما اشوف حياتي متدمره بس اباوع لرسل احسني عايشه بنعيم
اني فقدت امي وابوي وتدمرت
وهي خطيه بالنسبه الها مثل اليتيمه لو يتيمه احسن من ما عدها هيچ اب
بس معقوله بيوم من الايام اكون بمكان رسل؟
لو امر بمثل ما تمر وممكن يكون اسوء؟
.. لا ما اتوقع ، صحيح اني بوضع سيء بس ما اعتقد يكون بهل سوء
ضليت افكر واني مغمضه عيوني
لحد ما غفيت لان چنت حيل تعبانه ونعسانه ......
.. ساعديني ضي ما اريده صدگينيي ما اريده دايجبروني
ضليت اباوع الها واجه شخص وجهه ما مبين ولا داگدر اكشف هويته
چان لابس قاط وبأيده حلقه جر رسل من ايدها ومشاها غصب وكل شوي توگع بالگاع ويگومها ويجرجر بيها
حته بدلتها صارت كلها تراب من كثر مداتوگع
دايره وجها الي وتحاول تمد ايدها الي وتطلب المساعده
بس مداعرف ليش اني جامده بمكاني
كأنما صرت صنم ولا داگدر اتحرك
درت وجهي وچان ابوي واگف يمي
حچيت والدموع بعيني وگلت ..
ضي .. راح يجي يوم تجبرني اتزوج مثل رسل؟
محمد .. لا
ضي .. يمته ترجع
محمد .. اني موجود يمچ
ضي .. انت تجي فجأة وتروح فجأة ، شلون راح تگدر تحميني؟!
محمد .. حته لو چنت ما موجود راح احميچ
رجعت اباوع لرسل وصاروا يبتعدون عنا
بس هي تصرخ بصوت عالي ب اسمي
وصوتها واضح رغم هم ابتعدوا ..
رسل .. ضييي ساعدييينييي لا تخلييينييي ، ضييييي سووويييي شييي ، ضيي
.... ضي ، ضييي گعديي شبيچ ، ضييي
فزيت بسرعه من نومي
وگبل اشوف بوجهي ليان
لزمت گلبي بخوف وصرت اتنفس سريع ..
ليان:: شبيچ؟!
ضي:: ما بيه شي بس حلمت بكابوس
ليان:: اهاا
ضي:: شنو تردين مني
ليان:: اني ما رايده شي بس ايهاب الرايد
ضي:: شنو يريد؟!
ليان:: مادري صراحه بس هو گال صيحي الي ضي
ضي:: ما سئلتي شكو؟
ليان:: سئلته بس صاح بوجهي وگلت اله ضي نايمه بس گال حته لو نايمه گعديها من نومها وخل تجي هسه بسرعه
ضي:: يا ستار شكو
ليان:: روحي شوفي وان شاء الله ماكو شي ولو ايهاب ماكو وراه غير المصايب
ضي:: اي هسه رايحتله
گمت من الچربايه وبعدت شعري عن رگبتي ولميته باوعت الها وگلت ..
ضي:: ما تنزلين
ليان:: ما يقبل احد يجي غيرچ حته ودق طردها يگول موضوع بيني وبينها لحد يتدخل
ضي:: لا تخوفيني ليان شكو
ليان:: هسه انتي ضاله تسئلين شكو وشكو دروحي وفضيها ومن تكملين تعالي وگليلي
سكتت وعفتها ومشيت
طلعت من الغرفه ونزلت جوه رحت للصاله
ولگيت خالتي گاعده وايهاب كذلك موجود بس دايفتر بالصاله
اول ما اجيت وگف بمكانه وخالتي گامت من مكانها ..
ضي:: ليان گالت الي تريدني
ايهاب:: اي
ضي:: شنو الموضوع اليخليك تگعدني من نومي وما تصبر شوي؟!
ايهاب:: هل موضوع اهم من نومچ ، تگلي نوم يا نوم انتي هو وكت نوم هسه
ضي:: دحچي وفضني تره قلقتني .....
#يــــتبـع ...

البارت العاشر
#
\ ضــــ{١٠}ــــــي /
•
•
ضي:: شنو الموضوع اليخليك تگعدني من نومي وما تصبر شوي؟!
ايهاب:: هل موضوع اهم من نومچ ، تگلي نوم يا نوم انتي هو وكت نوم هسه
ضي:: دحچي وفضني تره قلقتني شكوو
ايهاب:: هسه اگلچ شكو ، ضي الصراحه جايتچ قسمه وخوش قسمه ما لازم نضيعها
ضي:: قسمه؟!
ايهاب:: اي ، السالفه مو مال نحچيها احنا وواگفين گعدي وخل احچيلچ
گعد ايهاب واشر الي بمعنى گعدي
گعدت وصرت اباوع اله ومنتظره يحچي ..
ايهاب:: يعني هو خوش ولد وزين احسكم راح تتراهمون ويه بعض
ضي:: بس هو منو ومنين يعرفني
ايهاب:: من طرف رهام
باوعت الها وابتسمتلي وچان بيدها گلاص مي
مدت ايدها الي وانطتنيا وگالت ..
رهام:: لمصحلتچ ، وشربي مي وهدئي شوي تره ما جايبيچ لحبل المشنقه
ضي:: مادام من وراچ ف ماكو أي مصلحه الي بالموضوع ، بس ما گلت الي هو منو
ايهاب:: ما تعرفي بس بمرور الايام راح تعرفي وتتعودين عليه
ضي:: اي دحچيلي منو هو شنو اسمه شگد عمره شنو يشتغل تره اني داسئل هيچ مو لان رايده اتزوج لا رايده اكمل دراستي بس رايده اشوف بالمستقبل من اكمل راح تكون قسمتي زينه لو زفت مثلكم
ايهاب:: لچ احترمي لا اگصه للسانچ اني هسه ساكت لان رايد افهمچ وتره الدراسه ما راح تفيدچ بشي هل قسمه ما راح تجيچ مثلها ابداً
ضي:: هسه دجاوب على اسئلتي وفضني
ايهاب:: هو اسمه عبدالرحمن
ضي:: أي؟ ، وعمره؟
ايهاب:: عمره ٥٠ سنه
گال خمسين واني من الصدمه ذبيت المي بوجهه بدون وعي وغصيت ..
ايهاب:: الله يااخذچ يااا قليله الاااادببب شنوو هل طيحااان حظ
صرت اگح وركضت الي رهام تطبطب على ظهري دفعتها وحچيت گوه ومصدومه وگلت ..
ضي:: شگد!!!!
ايهاب:: ٥٠ شبيچ تره عادي بعده شباب هستوه دخل خمسين
ضي:: خمسين وبعده شباب! ، وبلا شنو گلت قبلها
ايهاب:: شنو
ضي:: خوش ولد گلت مو؟!!
ايهاب:: اي صدگيني كلش خلوق وحباب وخوش ولد
ضي:: قصدك خوش شايب
ايهاب:: لا تبالغين عاد تره روحه خضره وهو مو شايب
ضي:: صخاام الصخمچ ضي هو هذا هم حظچ فوگ انتي ما تردين تتزوجين جايبين الچ واحد بگد ابوچ
ايهاب:: انتي ليش مكبره السالفه؟
ضي:: اني مكبره السالفه! ، انت تعرف عمري شگد لو لااا
ايهاب:: اي ١٧ مو؟!
ضي:: هنيالي اختك وما تعرف عمرها لك اني عمري ١٨ سنه
ايهاب:: اي زين طلعتي اكبر
ضي:: خرب حظييي اييي ولله اسوود مصخم ملطم
ايهاب:: لچ شبيچ
رهام:: اختك هواي تتعيقل هاي فوگاها
ضي:: تدرون شگد الفرق بينااا
رهام:: شگد
ضي:: ٣٢ سنه! ، مستووعبييين شگد!!!
ايهاب:: باعي انتي كبرتي السالفه هواي واني ما جاي اخذ رأيچ لو منتظر موافقتچ ، اني جاي دانطيچ علم وافقتي لو رفضتي راح تتزوجين وغصب عنچ
گمت من مكاني بسرعه وهو گام وجر ايدي ..
ايهاب:: وين رايحه
ضي:: للگبور ، اكمل نومي افضل الي بلكت انام وما اگعد واشوف شكولاتكم
ايهاب:: لچ اسمعينيي الرجال منتظر الجواب وبعد فتره طويله يلا يجي يتقدم بس تكونين محجوزه اله حته ما تتزوجين غيره واني راح اگول اله موافقين واذا حاولتي تلعبين الاعيبچ القذره ف عرفي راح يكون هذا اخر يوم بحياتچ
ضي:: انت تجبرني؟!!
ايهاب:: اجبرچ وغصب عنچ تسمعين كلامي
ضي:: ليش منو انت؟!! ، انت مو ولي أمري وحته لو چنت ولي أمري ما يصير تجبرني على الزواج كلشي ولا الزواج ما يصير تجبرني عليه
ايهاب:: لا يصير
ضي:: تريدني ارجع الك مطلگه؟!
ايهاب:: وشحدچ ، وكافي لغوه ويلا هوسه ما اريد
ضي:: اسمعني ايهاب والله افشلك وافشل هذا المايستحي وياك من كل عقله جاي يتقدم لبنيه بگد بنته واصغر ويمكن بگد حفيدته اكون شنو هل تخلف العايشين بي لك انت شلون ترضى اختك تتزوج واحد اكبر من عدها بسنين حته اكثر من ١٠ سنوات ، حسافه طلعت مو رجال ذكر
چنت احچي واشوفه گوه لازم اعصابه ووده يهجم عليه
أول ما كملت كلامي گبل ضربني براشدي ووگعني بالگاع
دفرني بخاصرتي ولزمت خاصرتي بوجع
ودنگ الي وصار يجر بشعري وكل شوي يضربني راشدي ويحچي عليه ويغلط ..
ايهاب:: ادبسزز منووو المووو رجااال! ، تردييين اشوفچ الرجااال شنووو يسوووي
ضي:: وحاسب هاي رجوله
جرني حيل من شعري ورگع راسي بالحايط
من قوه الضربه حسيت بدوخه كلش قويه
انسطرت اريد اركز مداگدر
وگعت بالگاع ورجع جرني من شعري وراد يرگعني مره ثانيه وسمعت صوت عالي من ورانا ..
- عوووفهااا يل نذل
عاف شعري واباوع لأيده بيها شعر وگع من شعري
لزمت راسي واحس روحي راح اموت من الوجع
ومغمضه عيني حيل ..
- اني الراح اتزوجه
بس سمعت هل جمله گبل فتحت عيني واشوف ليان واگفه گبال ايهاب وتحچي وياه ..
ليان:: لا تضل تباوعلي هيچ ، اي اني الراح اتزوجه شنو گلت فد شي غلط؟!!
ايهاب:: شنو داتحچين؟!
ليان:: داحچي عربي
ضي:: شنوو
ودق چانت واگفه يم الباب وأول ما حچيت اجت الي ركض وصارت تحاول تگومني ..
ليان:: شبيكم تباوعولي هيچ
ايهاب:: انتي شمدريچ بالسالفه
ليان:: چنه اني وودق هنا وره الباب
ايهاب:: واني مو گلت ما اريد وحده منچن تجي؟!!

ليان:: گلت بس ما مفروض علينا كلشي تحچي لازم نطبقه وهسه اني داگلك رايده اتزوجه مو ضي ما تريد خلص اني رايده هل شي بس عوف ضي
ايهاب:: ليان ...
ليان:: هو حدد منو يريد لو شايف ضي؟!
ايهاب:: لا بس يعرف عدنا بنات ثلاثه وهو رايد وحده منچن واني گلت ضي لان هي اكبرچن
ليان:: حلو الاستاذ جاي لسوگ ويتسوگ حضرته بس مو مهم اهم شي انتهت السالفه وگلت الك اني راح اكون بدال ضي
ضي:: لياااان شنووو هذااا الداااسمعه
ليان:: ليش تصيحين عليه؟
ضي:: انتي صاحيه!!! ، هل شخص عمره ٥٠ سنه وانتي ١٦ يعني الفرق بينكم ٣٤ سنه
ليان:: مو مهم
اباوع لأيهاب شو هذا هدء وابد ما ناقشها ولا حچه وياها واحسه مكيف بهل سالفه ومرتاح ..
ايهاب:: تعلمن منها بس هاي المريحه گلبي
ليان:: مو علمودك وافقت
گالت كلامها ومشت الي وصارت تساعدني ويه ودق دفعت ليان عني وگلت ..
ضي:: ودق اخذيني للغرفه وما اريد اشوف وجه هاي
ليان:: شدعوه هل حقد كله لان اخذت قسمتج تره انتي اصلاً ما رايدتها
تجاهلتها وودق اخذتني وطلعتني من الصاله
وصعدنا فوگ للغرفه
گعدت على چربايتي وتمددت بتعب وحيل متوجعه من الضرب الحصلته
گعدت يمي ودق وتطمئن عني وقاطعتنا ليان بدخولها ..
ودق:: من شنو متوجعه احچيليي
ضي:: من كل شي
ودق:: اسفه ما گدرت اساعدچ
ضي:: ما صار شي ، بس هاي شتسوي هنا؟!
ودق:: منو
ضي:: منو غيرها ، ليان
دارت وجها لليان وليان اجتي تتقرب من يمنا
لحد ما وصلت رادت تگعد ومديت ايدي امنعها ..
ليان:: شنو ترديني ابقه واگفه
اشرت الها بمعنى طلعي وصارت تباوعلي وسكتت ..
ودق:: تره ضي ما تريد تشوفچ ولا تسمع صوتچ
ليان:: يعني سوي زين وذب بالشط مو؟
ودق:: ليش يا زين سويتي؟
ليان:: هاي فوگ ما وگفت هل زواج
ضي:: هههههه
ليان:: شنو اليضحك؟
ضي:: كلامچ اليضحك
ليان:: ليش گلت فد شي يضحك ومادري بروحي
ضي:: اي ، حضرتچ تگولين وگفت هل زواج بس انتي ما وگفتي
ليان:: شلون ما وگفته لو ما تدخلت چان هسه ايهاب موتچ ونلگاچ بقسم الكسور وبعدين يطلعچ من المستشفى ويوديچ غصب يزوجچ من هل شخص
ضي:: وانتي فرحانه لان راح تكونين بمكاني؟!
ليان:: لا طبعاً ماكو وحده تقبل تزوج واحد اكبر منها بهوااااايييي
ضي:: اي لعد ليش هيچ سويتي؟
ليان:: باعي هو لمصلحتچ ولمصلحتي اول شي ما خليتچ تنجبرين وثاني شي اني راح اروح واخلص من ايهاب
ضي:: يا سلام
ليان:: اي شبيچ تستهزئين ، راح اخلص من عنده تره ايهاب مسببلي عقده نفسيه من كلشي حارمنا ومصروف ما عدنا ومن نجي نطلب من عنده عبالك دانجدي ويتدخل بكلشي بلبسنا وبتصرفاتنا وبروحاتنا وبجياتنا و٢٤ ساعه يخطأ بس اذا احنا خطأنه راح يصير براسنه الملاك الطاهر الشريف العفيف
ضي:: وشمدريچ هل شخص راح يعيشچ بنعيم يمكن يكون اسوء من ايهاب
ليان:: تفائلوا بالخير تجدوا
ضي:: لا ولله؟!!
ليان:: اي ولله ، مفروض هسه تشكريني على موقفي البطولي هذا
ضي:: بطولي؟
ليان:: اني مفروض يسموني سوبرمان اقصد سوبرومين
ودق:: لا سوبر ليان مو احسن؟
ليان:: اي سوبر ليان ، ولكم عمي اني المنقذه
ضي:: كملتي كلامچ؟
ليان:: مادري ، اعتقد اي
ضي:: اي ماشي يلا امشي من گدامي وروحي انطمري
ليان:: افاا هاي بدال تصبحين على خير هيچ تگليلي
ضي:: ما اكرر كلامي
ليان:: خلص راح انطمر ، وانتي من اهله
عافتني ومشت هزيت ايدي
وصرت اباوع الها
لبست البطانيه مثل العبايه وشمرت روحها على الچربايه ..
ضي:: هاي اختچ مالها حل
ودق:: اكو خلل بعقلها عوفيها عود بعدين تصحى على نفسها وتعرف شلون ذبت روحها بمصيبه شكبرها
ضي:: اي ولله ، المهم تصبحين على خير يلا روحي نامي لا تسهرين باچر وراچ دوام
ودق:: تمام وانتي من اهل الخير
داتگوم من مكانها ودق وليان گبل تصيح فزيت وودق نخلست من صوتها ولزمت ب ايدي قوي ، حقها عبالك واحد دچها سچينه ..
ليان:: هااااا خيرر شكوووو
ضي:: شبيچ انتييي فزعتينااا
ليان:: تگولين الها تصبحين على خير والي انطمري؟
اباوع لودق صارت تضحك وعافتني وگامت
ما اهتميت لليان ودرت وچهي
خبال ، يمته تصحى هل بنيه مادري
غمضت عيني هستوني وداحاول انام وما احس اله ضربه اجتي براسي فتحت عيني على السريع واشوف ليان شامره المخده مالتها عليه ..
ضي:: يعنييي شلووون ما ننام اليووووم
ليان:: يمه هاي عصبت ، لا حقچ علينا اسفين اصلاً بالغلط ما چنت اقصد
ضي:: استغفر الله
ليان:: ااا ا بس ممكن ترجعيلي مخدتي
ضي:: ترديها تعالي اخذيها ، ما اشتغل خدامه عندچ
عفتها ورجعت تمددت
يعني هاي ناويه رسمي ما تخليني انام اليوم
فوگ قرارها الغبي الاخذته اليوم
يعني هاي حته لو حاولت ترجع بقرارها
ايهاب ما راح يخليها
راح يكون يوم القيامه بالنسبه الها اليوم الترفض بي
.. يارب اهدي هل بنيه وعقلها شلون جابتلنا بلوه شكبرها وايهاب بعد شينسي السالفه هاي اذا صحت اصلاً
مر على هذا اليوم اسبوع
لحد ما اجه يوم الجمعه
چانت الدنيا صبح الساعه ب١٠:٠٠
وگاعده انظف كالعاده
سمعت صوت خطوات شخص من وراي
وشفت ظل دايتقرب مني
رفعت راسي وشفت رهام جايه

وگفت يمي وچتفت ايدها وگالت ..
رهام:: اگلچ
ضي:: نعم
رهام:: شو هل ايام مداتداومين
ضي:: اليوم جمعه
رهام:: اي ادري جمعه بس الايام الفاتت ولا يوم داومتي بس يوم واحد
ضي:: بكيفي
رهام:: هو هم صحيح بكيفچ شدخلني بيچ ، اني هسه رايده اگلچ عن شي ثاني
ضي:: شنو؟
رهام:: ب١١ اريدچن تكونن جاهزات
ضي:: ليش
رهام:: خالتچن عازمتنا على الغده صارلها يومين من گايله الي وعيب ما نروح
ضي:: اي بس ليش ما گلتي الي
رهام:: وهسه گلت الچ وعوفي البيدچ ومن ترجعين كملي تنظيف وروحي بدلي وگولي لخواتچ هم واذا ما تردن ف بعد احسن
ضي:: لا ليش ما نروح ، هسه رايحه ابدل
عفت البيدي ورحت صعدت فوگ لگيت ودق گاعده تدرس وليان گاعده تمشط بشعرها باوعت الهن وگلت ..
ضي:: كل وحده تعوف البيدها وتروح تبدل
ودق:: وين رايحين
ضي:: لبيت خالتي وب١١ لازم نطلع من البيت
ليان:: وانتي هسه جايه تگولين النا شتكفي ساعه
ضي:: حالي من حالچن هسه يلا دريت وخالتچن صارلها يومين من تدري وما حچت اله هسه
ليان:: اي ماشي ما عندي شي هسه ابدل بسرعه
ضي:: تمام ، خفن ايدچن
كل وحده اخذت ملابسها وراحت تبدل
واني كذلك لحد ما كملت كلشي ونزلت
وهن بعدهن
گعدت بالصاله ومنتظرتهن يخلصن
وشوي ودخلت خالتي للصاله
چانت لابسه كعب وصوت الكعب عالي بسبب هدوء الصاله
ولابسه فستان اسود وبي لون ذهبي عود علساس لابسه اسود حزينه وهو لون الذهبي اكثر من الاسود اصلاً
اباوع لوجها تارسته ترس مكياج ما مخليه لون يعتب عليها شنو لاگيه گبالها مخليته بوجها ولابسه العدسات والشال ذابته على شعرها ونص شعرها طالع وحته لون الشال شفاف يعني شعرها كله مبين وفوگاها طالع من بره الحجاب وفاتحته
ضليت صافنه عليها
.. صدگ تحچي؟!
اجتي گعدت يمي وحطت رجل على رجل وصرت اباوع لأيدها لابسه كل الاكسسوارات والذهب ومصبغه اظافرها بلون اسود
.. مو طبيعيه هاي!
ضليت بس صافنه عليها
لا مو من جمالها الخلاب
من تصرفاتها المدري شلونها
كأنما ما شايفه وشافت وفوگاها رجلها ميت وما عبرت السنه مالته
ضليت اباوع الها ومنصدمه لحد ما فززني صوتها وقاطعت صفنتي ..
رهام:: شبيچ تباوعيلي ، شنو هاي اول مره اكشخ بيها حته تتفاجئين؟
ضي:: مداعي لابسه بملابسچ لون اسود لو لبستي غير شي افضل
رهام:: يا شلون ، ما يصير
ضي:: لا يصير ، لابستلي كل هذا وحاطه كل هل مكياج وتگولين ما يصير؟!
رهام:: انتي شعليچ تره الحزن بالگلب مو بالمظاهر
ضي:: وبعدين هذا شعرچ شنو موقعه من الاعراب
رهام:: شنو
ضي:: انتي معتبره روحچ محجبه؟!
رهام:: اي ، ليش؟!
ضي:: حبيبتي تره هذا مو حجاب يعني نص الردان شفافه والشال شفاف ونص رجلچ طالعه وشعرچ فاتحته ومطلعته من الحجاب ، بربچ هذا حجاب؟
رهام:: بكيفي لا تدخلين عود الله بعدين يهديني والتزم بي
ضي:: اي بلكت الله يهديچ مو بس بالحجاب بالتصرفات هم
رهام:: انتي شنو تقصدين ولچ
ضي:: ما اقصد شي
رهام:: والله انتن مو مال عيني واغاتي اله ما اطلع الچن العين الحمره هاي لان زينه وياچن هيچ تتصرفن وياي لو اصير مثل الباقي چان هسه ترجفن مني رجف
ضي:: زينه ويانا؟!!
رهام:: اي شنو كل هذا ومو زينه! ، اخليچن تنامن للظاهري ومخليتچن تكملن دراسه والشغل نتقاسمه اني وياچن ومدللتچن واطبخلچن بعد شتردن؟ ، ولو حقچ ما شايفه غيري شلون تتصرف ويه ابناء رجلها
ضي:: تره انتي من ضمنهن لا تسوين روحچ زينه اكو كم وحده زينه وبالصدگ بنت اوادم واهلها تعبانين عليها وتخاف الله ب ابناء زوجها بس انتي مو من ضمن هل نسبه الزينه
رهام:: اششش شو اسكتي
ضي:: لان كلامي صحيح ف داتگليلي سكتي
رهام:: كااافيي
عفتها وسكتت وگعدت انتظر خواتي يجن
لحد ما كملن بعد قرن
ومن بعدها طلعنا
وايهاب الوصلنا بعد تواسيل
وصلنا لبيت خالتي ودخلنا ومن بعد سوالف السلام گعدنا ..
رباب:: والله حيل فرحانه بشوفتكم ، مختفين شسالفه
رهام:: تعرفين ظروف شنو نسوي
رباب:: اي ، الله يساعدكم
اجتي داليا دخلت للاستقبال وصارت تضيفنا وگعدت يمي ..
داليا:: شلونچ ضي ، متغيره حيل
ضي:: الحمد لله ، شسوي تعرفين وفاة ابوي هي الخلتني اتغير
داليا:: الله يساعدچ والله يرحمه المهم گليلي دراستچ شلونها
ضي:: الصراحه صارلي فتره ما مداومه
داليا:: ليش؟!
ضي:: رايده أجل هل سنه
داليا:: تأجلين!
رباب:: ليش تأجلين يا يمه هذا مستقبلچ
ضي:: خاله شسوي مستواي بعد نصف السنه حيل تعبان ولا الي واهس اقره اريد أجل حته السنه الجايه اشد حيلي واگدر اطلع معدل زين
رباب:: انتي تردين طب مو
ضي:: اي خاله
مرام:: تگدرين انتي گدها ، حرامات تضيعين هل سنه
ضي:: لا صدگيني ما اگدر بهل ظروف
رباب:: حبيبتي براحتچ التشوفي صح واليريحچ سوي مادام انتي واثقه السنه الجايه تگدرين تطلعين معدل ف أجلي احسن الچ
ضي:: اي خاله هو هذا الراح اسوي
رباب:: اي زين تسوين
گعدنا نسولف حوالي ساعه
وبعدين اجتمعنا على سفره الغده
من كملنا صرت اساعد البنات بنقل الماعين
ورحت للمطبخ اساعدهم ..
رباب:: ماما مرام نگعي للجدر مو هيچ تخلي
انتبهت لوجودي خالتي

وباوعت الي وگالت ..
رباب:: ضي؟ ، من يمته انتي هنا
ضي:: اجيت اساعد البنات
رباب:: لا حبيبتي روحي ارتاحي شنو تساعديهم جايه تشوفينا لو تشتغلين
ضي:: خاله مو تگولين احنا اهل واني مثل امچن؟
رباب:: اي
ضي:: لعد خليني اساعد خواتي وين المشكله بالموضوع
رباب:: بس ..
ضي:: خاله رجائاً خليني اساعدهن وصدگ رايده اگلچ شي
رباب:: شنو
رحت الها ولزمت ب ايدها وگلت ..
ضي:: يصير تجين وياي؟
رباب:: وين؟
ضي:: بس تعالي وياي وراح تعرفين
اخذت خالتي من ايدها وطلعنا من المطبخ ووگفت بنص الممر باوعت الي وگالت ..
رباب:: شنو ما فهمت ضي شنو تردين؟
ضي:: الصراحه خاله رايده احاچيچ بموضوع
رباب:: وشنو هل موضوع؟!
ضي:: خاله الموضوع يخص ليان واني مداگدر احل السالفه احس ..
رباب:: شنو ، كملي كلامچ
ضي:: اا ا الصراحه يا خاله ليان راح تتزوج
رباب:: شنووووو!
ضي:: اي خاله مثل ما سمعتي و..
رباب:: ثوااني يا زوااج تره ليان صغيره ١٦ سنه بعدها بگد داليا ومرام البگدها هسه يدرسن مو يتزوجن
ضي:: خاله اني بس گلت تتزوج وهيچ نصدمتي لعد لو اكمل شنو تسوين
رباب:: يا ستار ، كملي
ضي:: هي راح تتزوج شخص اكبر من عدها
رباب:: يعني بشگد ، شگد عمره
ضي:: بهواي
رباب:: ٣٠
صفنت بوجها وهي كررت نفس كلامها وگالت ..
رباب:: ٣٠ عمره؟ ، لا تصفنين بوجهي جاوبي
ضي:: اكبر
رباب:: ٣١؟
ضي:: خاله انتي داتنطين ارقام صغيره تره ٥٠ بس ما اريد اصدمچ
رباب:: ٥٠ هذا عمره لو شنو
ضي:: اي خاله عمره
رباب:: باعي اني من الصدمه مداگدر انطيچ ردة فعلي ، شنو ٥٠ انتي متأكده؟
ضي:: اي
رباب:: يعني ما سمعتي غلط؟!
ضي:: لا
رباب:: دخيلك ربي
ضي:: والصراحه هل شخص مفروض اني الاتزوجه
رباب:: وشصار؟
ضي:: هو ايهاب الجبرني بس بعدين اجت ليان وگالت اني الراح اتزوجه وصار كل هذا واني مداعرف شلون اتعامل ويه هل موقف يعني حته لو قنعت ليان تسحب كلامها ف ايهاب ما راح يسحب كلامه واني رايده مساعدتچ تحاچين ليان وبعدين اذا اقتنعت تحاچين ايهاب اذا ماكو زحمه
رباب:: اكيد ماكو زحمه وهذا واجبي بس صدمتيني ضي ، مفروض تخابريني وتگليلي
ضي:: خاله السالفه مو مال اخابرچ مال احاچيچ وجه لوجه
رباب:: ان شاء الله راح احچيها
ضي:: شكراً خاله ، راح اروح يم البنات
رباب:: تدللين
عفت خالتي ورجعت يم البنات
گعدنا نشتغل ونسولف سوه ..
داليا:: صدگ ضي
ضي:: ها
داليا:: ما فد يوم حچيتي النا عن فارس احلامچ يعني مواصفاته شكله شخصيته
ضي:: وليش جايبه سيره هل موضوع هسه
داليا:: هيچ تگدرين تسمي فضول
ضي:: مممم الصراحه ما مفكره بهل شي من قبل
مرام:: معقوله؟! ، لچ اني وداليا ٢٤ ساعه نفكر شلون راح يكون شكله ومواصفاته
ضي:: والله فارغات انتبهن لدراستچن احسن
مرام:: اي قابل ما منتبهات بس دانسئلچ يعني ، المهم جاوبي
ضي:: ما يهمني الشكل صراحه بس اهم شي اخلاقه وشخصيته تعرفون كل بنيه تتمنى تتزوج شخص يحترمها ويحبها ويعيشها مثل الملكه
مرام:: هاي ياهي اسئلها تگلي هيچ
ضي:: اي لعد شنو نريد؟! ، مثلاً شخص ما يحبنا؟
مرام:: زين انتي تتوقعين راح تزوجين عن حب لو تقليدي
صفنت بوجها وسكتت
وقاطع صفنتي صوت شهد وهي تگول ..
شهد:: تخيريها بين الحب والتقليدي وهي ما عدها غير الاجبار
مرام:: انتي منو يمچ اصلاً وبعدين مو گلت الچ تطلعين اشو گاعده ومدا تساعدينا شنو فايدتچ
شهد:: شگلت اني؟ ، يعني الحقيقه تضوجكم بس هو صوچي الجايه اشاركم الحديث خليچ زينه ويه هل داليا الما عدها اهل اصلاً واني اختچ من لحمچ ودمچ تعامليني بهل معامله
گالت كلامها وطلعت من المطبخ
اباوع لمرام مبين عليها متنرفزه وضايجه من شهد ..
مرام:: معليچن بيها بنات ، هي دائماً هيچ تذب سم مادري شبيها وداليا لا تزعلين
داليا:: على شنو ازعل ، تعودت
ضي:: هاي ليش هيچ تتصرف
مرام:: ضي خوما زعلتي من كلامها
ضي:: لا ليش ازعل ، تره هي بالصدگ ما حچت غير الحقيقه
مرام:: باعي تره ايهاب صحيح عنده سوالف مدري شلونها بس مو لهل درجه
ضي:: شلون يعني مو لهل درجه؟
مرام:: ما اعتقد يجبركم على الزواج لان هذا بالنهايه قرارچن وقرار مصيري مو مال احد يتدخل بي
ضي:: ههههههه
مرام:: شنو اليضحك
ضي:: كلامچ اليضحك ، صدگ تحچين مرام؟ ، لچ هذا اسهل شي يجبرنا عليه شتحچين انتي
داليا:: اني متخيله الچ قصه حب اسطوريه
ضي:: گلتيها متخيله واسطوريه يعني شنو يعني خياال چذب
داليا:: لچ اسطوريه من كثر ماهي حلوه
ضي:: اي بلا اسمعچ
داليا:: يعني احس راح تحبين شخص يدللچ ويحبچ موت لدرجه يأذي روحه بس ما يأذيچ
ضي:: اي؟
داليا:: احس بالجامعه راح تحبين هل شخص وراح تتزوجون وتجيبون ثنين ابناء كيوت مثلكم
ضي:: ما شاء الله ، تعلمين الغيب؟
داليا:: لچ داگلچ متخيله هل شي يعني شمدريني اذا صدگ راح يصير أو لا
ضي:: ولله يا داليا لو على تخيلچ هذا ف هنيالي
مرام:: ههههه ، ان شاء الله يكون صدگ مثل ما گالت داليا علمود هنيالچ ونرگص بعرسچ
ضي:: اي عود هاي اذا ضلينا عايشين
كملنا الماعين ورحنا للصاله نگعد
اباوع لليان ضايجه

.. هاي شبيها؟
ضلت تباوعلي لحد ما گامت واجت يمي وگالت ..
ليان:: گومي اريد احاچيچ
ضي:: شنو
ليان:: داگلچ گومي
مرام:: شبيچ ليان خليها گاعده واذا تردين تحچين فد شي ف احنا مو غربه
ليان:: اكيد مو غربه بس اني عندي موضوع وياها
ضي:: اي ماشي هسه گايمه
ليان:: دگومييي شگد بطيئه
گمت من مكاني وهي طلعت ولحگتها لحد ما وگفت على صفحه وگفت يمها وبدت بكلامها وگالت ..
ليان:: ليش هيچ سويتي؟
ضي:: شنو سويت
ليان:: لا تسوين روحچ غبيه وگولي ليش
ضي:: ليش خالتي حچت وياچ؟
ليان:: وتگليلي شنو سويت ، ضي انتي مالچ دخل بقراراتي وهاي حياتي الشخصيه وشنو اتصرف وشنو اسوي بكيفي
ضي:: اني گلت الها لان خايفه عليچ
ليان:: بلا تمثيل رجائاً واني اعرف شنو داسوي واذا يضرني لو ينفعني ف هل شي راجع الي مو الچ بذاك الوكت الراح تضررين بسبب قراراتي تگدرين تحچين وتدخلين
ضي:: اي بس ..
ليان:: لا بس ولا شي اني ما راح اتراجع عن قراري وراح اتزوج وغصب عنچ فاهمه؟
ضي:: ليان ليش هيچ تحچين وياي؟!
ليان:: خليچ بحياتچ ولا تدخلين بحياة غيرچ وراح ارجع مثل قبل اما اذا ضليتي هيچ ف راح تتندمين
ضي:: شنوو هل كلاام لياان من يمته انتي تحاچينيي هيچ ليش هيچ فجأة تغيرتيي وبعدين هل زواج المفروض الي مو الچ
ليان:: يعني بكلامچ هذا تقصدين اني اخذت رجلچ؟
ضي:: لا ما قصدي هيچ
ليان:: لا گوليها عادي لو ميته على هل زواج ليش رفضتي تره اني مو حباً بهل شخص وافقت ، اصلاً ما اعرفه ولا شايفته بس علمودچ هيچ سويت
ضي:: راح تذليني علمودچ وعلمودچ وتره اني ما جبرتچ هيچ تسوين وتعالي بما انو هل شي سويتي علمودي ليش ما ترفضين؟
ليان:: لا حبيبتي اني من أخذ قرار ما اتراجع بي وبعدين هاي فرصه ذهبيه شلون افوتها من ايدي
ضي:: فرصه ذهبيه؟!!
ليان:: اي ، راح اخلص من اخوچ ومن ذيچ الحيه على الاقل اشوف وجوه جديده
ضي:: تره الصبر حلو اذا تردين تخلصين منهم ف هاي الطريقه ما راح تخلصين بيها منهم ولو صبرتي لحد ما تكبرين شوي چان لگيتي قسمه براسها حظ وشاب ويحبچ ويدللچ بدال هل قسمه التعبانه
ليان:: تره العمر مجرد رقم
ضي:: ياااربييي راح تجلطنيي هل بنيه
ليان:: المهم نسيت اگلچ شي ايهاب البارحه گلي بأنو بعد كم يوم ويجون يخطبوني يعني الخطبه مال نسوان مادري منو يجي صراحه من اهله وبعدين يتفقون يمته الخطبه مال زلم ويحددون العقد ومن هل سوالف
ضي:: انتي راضيه على روحچ تتزوجين واحد بگد ابوچ ويمكن ابوي اصغر من عنده
ليان:: اي راضيه ، ولا تدخلين مره ثانيه ولا تدزين ناس عليه عود يقنعوني دازتلي خالتي عبالها راح اقتنع
سكتت وحيل نقهرت بسببها
تجمعت الدموع بعيني شلون تحچي وياي بهل اسلوب
اول مره اشوف ليان تحچي بجديه وياي بهل طريقه ولا تاخذ برأيي بهيچ قرار
سمعت صوت رهام تصيح علينا وتگول ..
رهام .. وين رااحن هذنيي ، ضيييي لياااان وين رحتن
لحد ما وصلت لعدنا باوعت النا وگالت ..
رهام:: صارلي ساعه ادور تاليها انتن هنا؟!
ليان:: شنو تردين؟
رهام:: سلامتچ بس لازم نروح
ليان:: اي خوش اني جاهزه ما عندي شي
رهام:: هاي شبيها داتبچي
حچيت بصوت واضح عليه مخنوگه وگلت ..
ضي:: لا مدابچي
رهام:: عيونچ مغورگه وتگولين لا؟!
ليان:: دعوفيها لواگه شبيچ اول مره تشوفين وحده تتلوگ وانتي الواگه كلها يمچ؟
رهام:: اگول احترمي افضل الچ لا اهينچ هسه
ليان:: اي وعود منو يرجعنا ، ايهاب مو ونگعد نتوسل بي؟
رهام:: حبيبتي التواسيل بعد ما تفيد گلي ما اوصلكم وسد الخط بوجهي
ليان:: لا خوش بشاره ، وشنو نسوي هسه نرجع بتكسي؟
رهام:: لا ، رباب اتصلت بدريد وهسه جاي وراح يوصلنا
ليان:: مو عيب؟
رهام:: شنو وين العيب؟ ، ابن اختي وبنفس الوكت ابن خالتچن مو غريب تره وانتن شلون ميانه ذاباتها وياه هسه يلا عرفتن العيب
ليان:: بكيفنا لا تدخلين
رهام:: ديلا اني رايحه ، اله تتعبني وتخلني اجيچن راح صوتي واني اصيح
صارت تمشي وبس تحچي علينا لحد ما راحت
ليان باوعت الي بطرف عينها ولا اهتمت الي ومشت
ولحگت رهام
ضليت بمكاني وبديت امسح بدموعي
ورحت طلعت من الباب الخلفي حته محد يشوفني بهل وضع
ورحت للمغسله مال حوش وچانت اكو مرايه يمها
اباوع لعيوني صايره حمر
غسلت وجهي وسمعت صوت الباب نفتح
رفعت راسي ودرت وجهي شفت دريد اجه
ابتعدت عن المغسله وهو انتبه لوجودي
باوع الي وگال ..
دريد:: يااا هلاا بضي
ضي:: قبل مدري كم ساعه شفتني
دريد:: اي واذا ، وتعالي شبي صوتچ
سكتت وما حچيت شي صار يمشي خطوات بتجاهي لحد ما وگف گبالي وصار يباوع لعيوني بستغراب ..
ضي:: شنو؟
دريد:: شبيها عيونچ؟
درت وجهي عنه وگال ..
دريد:: باوعيلي وگليلي شبيها عيونچ شصااير
ضي:: ما بيها شي وما صاير شي
دريد:: ما بيها شي؟!! ، لچ عيونچ حمره وصوتچ مدري شبي وگوه تحچين وتگولين ما صاير شي؟!
ضي:: دريد هسه شنو تريد مني عوفني
دريد:: احچيلي شنو صاير منو مزعلچ
ضي:: محد
دريد:: من يمته انتي تضمين عليه؟!
ضي:: يووووه دريد تره صرت كلش مزعج عووفني
دريد:: اي اضل اكون مزعج لحد ما اعرف شكو

ضي:: يگلولي فضوليه بس شكلهم بعدهم ما شافوك
دريد:: فضولي ويريد يعرف شكو
ضي:: ماكو شي بس چنت اشوف فيلم
دريد:: اي؟
ضي:: والبطل حيل احبه و..
دريد:: و شنو؟
ضي:: مات ، قهرني
دريد:: تشاقين مو؟
ضي:: مداشاقه وياك داگلك ماات البطل شنوو ما تفهم
دريد:: اي بعد لطمي على البطل شنو رأيچ نسويله فاتحه خطيه ، يلا رفعي ايدچ خل نقره الفاتحه على روح المرحوم ، بلا زحمه شسمه حته نقراله الفاتحه
اني بيا حال وهذا گاعد يصنف
تنرفزت من عنده وضربته بوكس على كتفه
لزم كتفه وگال ..
دريد:: خرب يومچ ضييي ايد لو حجاره ، لچ بابا كم مره گايل الچ لا تضربين ضربتچ قويه اني مداصدگ شلون هيچ ايد ناعمه تأذي
ضي:: تستاهل
دريد:: اعتقد من فشختچ بالطابوگه وخليت دمچ بطولچ ما تبتي يراد الچ طابوگه ثانيه
ضي:: لا تذكرني بالماضي الأليم رجائاً ، كل ما اتذكر طفولتي اتذكر هل حادثه المؤلمه
دريد:: اوي عيني مؤلمه ، النازوكيه دخلي جوه بين ما اجيب السويچ ، شلون وگعت گلبي تاليها تبچي الخاتون على البطل
ضي:: دريد كااافي
دريد:: اعصابچ عيني ضيونه ، ويلا اتفضلي وكملي بچيچ على المسعد جوه
چتفت ايدي ومشيت
اريد اعرف هذا دريد يمته يبطل تفاهته مادري
يعني حته واني حالتي حاله يصنف عليه
استغغر الله
گعدت بالصاله يمهم وانتظر دريد يجي
لحد ما اجه وودعنا خالتي ورحت اودع البنات وحده وحده
ووراها طلعنا لسياره دريد
طول الطريق ساكتين لحد ما حچه دريد ..
دريد:: هاي شنو خالتي ما انتبهت الچ كلش زين ، اليوم طالعه صاروخ
رهام:: صدگ
ليان:: لا مو صدگ تره دريد ياهو يشوفه يصبغ بي لو يشوف فاره يگول فدوه لسنانچ التجنن
رهام:: وانتي على شنو مضغوطه ، شفت دريد شلون بنات احلام تعاملهن وياي شلونه ، كلش متعباتني
ليان:: شو دايصحيلچ خالتي وانتي ساكته هاي لو احنا چان گلبتي الدنيا
رهام:: اي صدگ ذكرتني
دريد:: لعد شنو نصيحلچ
ليان:: حيره والله نصيح الها بأسمها تطلعنا مو خوش اوادم نصيح الها خالتي تگلب الدنيا
دريد:: اني اگول صيحي الها مرة ابوي افضل
ليان:: يا يابه ، دريد انت بعدك تذب نكت ومحد يضحك عليها
دريد:: دعبريني شبيچ
ليان:: اسفه بس ما اگدر
دريد:: وهاي وصلنا ، خلصت كروتكم
رهام:: مشكور دريد ما قصرت
دريد:: تدللون
ودق:: تعبناك
دريد:: لا تعبكم راحه ، بس ما عرفتچ ودق شنو هاي صايره تعرفين تحچين
ودق:: لو ادري طفولتي راح تأثر على سمعتي المستقبليه چان صار لساني ينگط عسل ولو من زمان لساني حلوو هيچ
دريد:: اشو الدنيا صارت حاره ، شغلوا السبالت من تنزلون لان حاره عليكم خطيه واذا ايهاب موجود صيحوا الي اريد اسلم عليه
ضي:: ليش هو لو موجود چان هو الوصلنا
دريد:: يلا مو فد مشكله خاف مشغول خطيه
رهام:: اتفضل دريد ارتاح شوي
دريد:: لا مشكوره مستعجل وعندي شغله لازم اروحلها
رهام:: على راحتك
نزلنا من السياره وراح دريد وأول ما دخلت للبيت كالعاده گبل اتوجه للغرفه
بدلت وبعد ما كملت گبل بديت بالشغل اكمل التنظيف مال صبح
مر اليوم وابد ما حچيت ويه ليان
تصرفها اليوم كلش ما عجبني وفوگاها ما كلفت روحها تجي تعتذر فوگ غلطها
....... صرت افتح عيني بهدوء واحسني بعدني نعسانه وما اريد اگوم من الچربايه بس ريگي ناشف وحيل عطشانه
بعدت البطانيه عني وگمت من الچربايه
وطلعت من الغرفه ونزلت جوه رايده اروح للمطبخ
وسمعت صوت بچي جاي من الصاله
ستغربت من الصوت وغيرت اتجاهي
وصرت امشي بهدوء بتجاه الصاله
لحد ما وصلت يم الباب باوعت لرهام چانت گاعده على التخم وبيدها تلفونها وشكلها داتحاول تتصل بشخص
بس وضعها غريب واباوع الها ومصدومه
ليش هيچ مدمايه؟!
وجها كله كدمات وخشمها ينزف دم
واكو اثار على ايدها وبأيدها اليسار جرح داينزف
ضليت صافنه عليها لحد ما انتبهت لوجودي بسرعه تغيرت تعابير وجها وبدت تمسح بدموعها واباوع لأيدها ترجف
توترت ونخطف لونها واني زاد فضولي شنو دايصير؟ .......
#يــــتبـع ...

البارت الحادي عشر
\ ضــــ{١١}ــــــي /
•
بعدت البطانيه عني وگمت من الچربايه
وطلعت من الغرفه ونزلت جوه رايده اروح للمطبخ
وسمعت صوت بچي جاي من الصاله
ستغربت من الصوت وغيرت اتجاهي
وصرت امشي بهدوء بتجاه الصاله
لحد ما وصلت يم الباب باوعت لرهام چانت گاعده على التخم وبيدها تلفونها وشكلها داتحاول تتصل بشخص
بس وضعها غريب واباوع الها ومصدومه
ليش هيچ مدمايه؟!
وجها كله كدمات وخشمها ينزف دم
واكو اثار على ايدها وبأيدها اليسار جرح داينزف
ضليت صافنه عليها لحد ما انتبهت لوجودي بسرعه تغيرت تعابير وجها وبدت تمسح بدموعها واباوع لأيدها ترجف
توترت ونخطف لونها واني زاد فضولي شنو دايصير؟ ، وگع التلفون من ايدها من كثر ما چانت ترجف وگامت من مكانها بسرعه وما حچت شي وضلت تباوعلي
دخلت للصاله ورحت اتمشى بتجاها لحد ما وصلت الها وگفت وسئلتها بأستغراب ومصدومه من الداشوفه ..
ضي:: شنو صاير؟!
رفعت راسي للساعه لگيتها ب٨:٠٠ الصبح
اباوع الها مبدله وواضح عليها هسه راجعه
بس وين چانت؟ ، ومن يمته طالعه؟ ، وشنو الدايصير؟ ..
ضي:: ليش ساكته ، احچي شنو صاير
عدلت وگفتها وصارت تباوعلي ببرود رغم قبل شوي چانت تبچي وحالتها حاله
خلت عينها بعيني وحچت بحده وگالت ..
رهام:: اني راح اروح ارتاح
ضي:: رايده اعرف شنوو صااير وانتي ليش هيچ وضعچ
رادت تمشي ولزمت بمعصم ايدها ..
رهام:: اخخخ ، شبيچ انتييي ما شااايفه ايديي مجروحه
وخرت ايدي عنها واباوع لكف ايدي تلطخ بدمها
ضليت صافنه بوجها وسكتت ..
رهام:: غبيه ..
ضي:: ا ا اساعدچ؟!
رهام:: بشنو؟
ضي:: ايدچ داتنزف
رهام:: ادري
ضي:: ولازم تداويها وتعقمين الجرح ما يصير تبقه هيچ تتلوث
رهام:: اني اعرف اداويها شكراً ما احتاج مساعدتچ ومداعي تسوين روحچ طيبه رجعي لأصلچ
ضي:: هاي فوگاها ، بس انتي ما گلتي الي شنو صار ..
قاطع كلامي صوت تلفونها يدگ
أول ما دگ تلفونها بسرعه ركضت اله وشالته بثنين ايدها وصارت تباوع لشاشه تلفونها وتباوعلي وگالت ..
رهام:: اني رايحه
وبسرعه طلعت من الصاله ضليت واگفه بمكاني وما تحركت
اريد استوعب شنو الداشوفه
احس روحي داحلم
الوضع كلش غريب مو طبيعي اكيد داحلم!
رحت للمطبخ غسلت ايدي وشربت مي
واني وطالعه رحت توجهت لغرفتها ردت ادخل ولگيتها قافله باب الغرفه
ما ردت اكون مزعجه لو اضغط عليها صحيح اني فضوليه وفضولي ما راح يسكت بس لازم اخليها لحد ما تهدء يلا اعرف شنو صاير بالضبط
صعدت فوگ ورجعت للغرفه ورجعت تمددت بچربايتي وحاولت ارجع انام وداعاني عبالك النوم ما رايدني
..... ضي ، ضي ، گعدي ضي
صرت افتح عيوني بهدوء
ورايده اكمل نومي بس مادري شلون نمت ويمته؟ ..
رهام:: ما ناويه تگعدين؟
صرت اباوع الها بستغراب وبسرعه گعدت ..
رهام:: بسم الله الرحمن الرحيم ، شبيچ؟
ضي:: أول مره تگعديني
رهام:: اي واذا ، اني جايه اگلچ الريوگ جاهز
ضي:: ومن يمته انتي تسوين ريوگ وتگعدينا!
رهام:: شنو يعني حرام؟! ، هو هم صوچي اروح اتريگ وحدي افضل وعود اذا ردتي تعالي ما امانع وگعدي خواتچ وياچ
كملت كلامها وطلعت ضليت بمكاني لثواني اريد استوعب الصار ، شنو الله هداها لو شسالفه
گمت من مكاني وگعدت خواتي ونزلت
غسلت ورحت گعدت يمها شوي واجن خواتي ..
ودق:: يمه
ليان:: اعوووذ بالله شنووو هاااي
ضي:: شبيچن شايفات جني؟!
ليان:: خااالتچ شبيهاا
ودق:: هااي شنو صاير عليچ الله گليلي داخله للحلبه ويه جونسينا
رهام:: مسويه روحچ دمچ خفيف ، گعدن اكلن الاكل برد
ليان:: ما اگول لا
گعدن البنات يمي وضلن صافنات على رهام ..
رهام:: شبيچن اكلن لا تباوعن بوجهي
ودق:: عليچ الله احچي شكو
ليان:: هاي منو ضاربچ
رهام:: ماكو شي بس وگعت من الدرج
ودق:: وگعه من الدرج هيچ تسوي؟!
رهام:: اي عادي
ضي:: انتي چنتي طالعه مو
رهام:: ها
ضي:: گعدت ولگيتچ مبدله وبهل وضع يعني معناها راجعه من مكان وهل مكان خلاچ تكونين هيچ
رهام:: اي چنت طالعه
ضي:: وين
رهام:: معليچ
ليان:: عود ليش معليها ، هاي اذا چان اكو فد شي
رهام:: اا ا چنت يم صديقتي شبيچن يعني وين
ضي:: يم صديقتچ؟ ، شو كل مره تگولين النا چنتي يم صديقتچ بس ما اقتنع مادري ليش
رهام:: كااافي تدخلن گلت الچن چنت يم صديقتي واما عن الاثار هاي ف هي من الوگعه لا اكثر
ضي:: بس انتي من يمته چنتي يم صديقتچ معقوله رايحتلها بنص الليل لو الفجر لان من شفتچ چانت الساعه ب٨
رهام:: انتن شنووو تحققن وياااي بكيفيي انتن شعليچن والله مادري شلونچن ، حشريات
ليان:: شكلچ تعاركتي ويه صديقتچ واجيتي
ودق:: ههههههههههههه
رهام:: وجع شنو هل ضحكه عبالك بنت شارع ، وتعالي گليلي شنو اليضحك
ودق:: لا هيچ هههه
رهام:: اگول تسكتين اختچ لا اموتها
ضي:: معليچ بيها
ليان:: هسه عوفونا منها عساها بالموت وگعت نكتلت شعلينا ، ضي اني رايده ..
ضي:: رايده شنو؟
ليان:: ناقصتني كم شغله ورايده فلوس
ودق:: اييي صحيح حته اني
ليان:: گبل لزگت روحهااا وياااي شلوون لزگه

ودق:: هييي انتي تره اني هم محتاجه فلوس ورايده اروح للسوگ ناقصتني هوااااي اشياء
رهام:: وانتن جايات تگولن لضي هي منيلها؟!
ودق:: انتي شعليچ
ضي:: تره صدگ ، منين اجيب؟ ، جايات تطلبن مني شنو شايفاتني بنك
ليان:: لعد شنو نبوگ؟!
ضي:: روحي لأيهاب وگولي اله اريد فلوس من يرجع
ليان:: لا عفيه گولي اله انتي
ضي:: تردين يرزلني؟!
ليان:: حبابه حبابه
ضي:: استغفر الله ، ما احچي وياه اني اذا تردين عندي كم فلس بكنتوري روحي اخذيهم وخلصيني
ليان:: شلون ما يصير فلوسچ
ودق:: راح اخذهم اني
ليان:: هي انتي جاملي شوي شبيچ
ودق:: لچ هي مال مجامله گاعدات على الحديده اني وياچ وتردينا نجامل
ليان:: لا خطيه فلوسچ ما نريد
ودق:: لا اني اريد
ليان:: ودق گااالت اليي اخذهم مو الچ
ودق:: مو گلتي ما تردين ضلي جاملي حبيبتي اني ما اگعد افيك
گامت من مكانها ودق وركضت ووراها لحكتها ليان ..
رهام:: انتي راضيه هيچ؟!
ضي:: شنو
رهام:: لا هيچ ماكو شي بس اني اعتقد ايهاب هو المسئول عنكم يعني لازم يصرف عليكم وشنو تحتاجن يجيب هو ملتهي يجيب بس احتياجات البيت وبالتواسيل
ضي:: لان هذا واجبه
رهام:: يعني ما مفكره تشتغلين؟ ، اذا رايده ف اني راح ادورلچ على شغل يناسبچ بدون ما تتعبين
ضي:: لا شكراً
رهام:: يعني انتي راضيه هيچ تضلين؟
ضي:: الشغل اليجي من وراچ ما اريده وراضيه على المذله هاي انتي شعليچ
رهام:: بكيفچ اني ردت اساعدچ
ضي:: صدگ شو ما شفتچ بيوم محتاجه فلوس لو شي وانتي كل يوم بلبس جديد ، شنو السالفه؟
رهام:: انتي شنو حاطه عينچ على فلوسي
ضي:: ديلا هي شلون فلوس ، عيني تره ما حاسده املاكچ التارسه الدنيا بس اني مستغربه من الوضع يعني غريب منين تحصلين فلوس
رهام:: اا ا عندي ذهب بايعته وهاي فلوسه واشتري بيهم
ضي:: اي خوش
رهام:: شبيچ تحچين هيچ وچنچ ما مقتنعه
ضي:: لا ليش ما اقتنع ، مقتنعه
گمت من مكاني وگلت ..
ضي:: تسوين فضل لو تغسلين الماعين
دامشي وصارت تصيح عليه ما اهتميت الها وكملت مشيي
صعدت فوگ ورحت للغرفه
دخلت ولگيت ليان وودق دايتعاركن ..
ليان:: مداااعي تحشرين رووحچ وياااي بكل مكاان ، زعطوطه انتيي!
ودق:: معليه اررووح
ليان:: لااا
ضي:: وين ترحن؟
سكتن وصارن يباوعن الي ..
ضي:: شبيچن تتعاركن
ودق:: ليان ما تقبل اروح وياها
ضي:: ليش هي وين راح تروح
ودق:: تريد تروح للسوگ
ضي:: للسوگ؟!
ليان:: اي لعد اني ما طلبت منچ فلوس هيچ ، مو گلت محتاجه كم شغله ولازم اروح
ضي:: اي بس مو وحدچ
ودق:: بااعي يعني راح اروح وياچ وعلى عنادچ
ليان:: گبررر
ضي:: لا انتي ولا هي ترحن وحدچن
ودق:: لعد شنو؟
ضي:: انتن من كل عقلچن تردن تروحن للسوگ وحدچن شبيچن
ودق:: اي عادي ما بيها شي
ضي:: تره احنا ما گاعدين بتركيا حته مثل قبل نروح وحدنا وعادي قبل چان السوگ يمنا وصغير اما هسه الوضع يختلف
ودق:: عليچ الله ضي تره هنا هم قريب صحيح هناك چان اقرب بس مو معناها ما نروح واحنا كبار ما ينخاف علينا
ضي:: كبار؟! ، وحده ١٥ سنه والثانيه ١٦ وتگولين كبار؟!
ليان:: ضي والله هاي اول مره واخر مره ومادام ايهاب ماكو
ضي:: تره اني لان خايفه عليچن ما اقبل
ودق:: تره هو يم بيت صديقتي ومو رحنا لبيت صديقتي وحدنا عادي وما راح ندخل جوه بس بالمقدمه مال سوگ ونرجع
ضي:: شگد تلحن
ليان:: يلا حبابه والله ما راح ننخطف
ضي:: الچن نص ساعه
ودق:: ياا هاي اخذت طبايع امي
ليان:: هنيالي
ضي:: تصنفن؟! ، لعد روحه ماكو
ودق:: لاا لااااا اصلاً نص ساعه كلش هواي ربع ساعه واحنا يمچ تأمرين أمر ضوضيي الجميله ، وهذا قلب الچ
ضي:: وانتي الثانيه شداتسوين
ليان:: هذا سهم للقلب
ضي:: لوگيات
ليان:: عسل منچ عسل ، وهاي مادام وافقتي وانطيتيني فلوس اني راح اسامحچ
ضي:: على شنو؟!
ليان:: على الصار
ضي:: ليش هو اني المفروض ازعل لو انتي؟
ليان:: طبعاً اني
ضي:: لا حقچ اكيد لازم تزعلين انتي ، اني اروح ابدي بالشغل افضل من ما مگابلتچن
ليان:: دسوووي بعد قلوب
ودق:: راحت ايدي
ليان:: فديناااچ
ودق:: نحبچ ضووووضيي
طلعت واسمع صوتهن يوزعن حب وطاقات ايجابيه
هاي لان وافقت لو رفضت ف راح يمطر عليه مطر الغلط واطلع مو خوش انسانه
رحت ابدي بالشغل وبديت انظف
وره كم دقيقه ونزلن ركض ومكملات تبديل
.. ما شاء الله سريعات ، هاي لو اني وياهن چان كبرت وشيبت ومتت وهن بعدهن
سمعت صوت تلفون يدگ گمت من مكاني وبسرعه ودق اخذته ..
ضي:: هذا تلفون منو؟
ودق:: تلفون ايهاب
ضي:: شنو ناسي؟!
ودق:: اي
ضي:: عوفي عود هو يرجع ويجاوب
ودق:: اجاوب اني
ضي:: لچ عووفي شنو تجاوبين انتي
ما سمعتني وطلعت تركض من الصاله وبيدها التلفون ..
ضي:: شلون ويه هل مخبله ، بس ايهاب يعرف راح يجنزها جنازه
ليان:: خل تولي بكيفها ، مشتاقه تنكتل
ضي:: عود مو تتأخرن تره گلبي ناغزني
ليان:: ما راح يصير شي لا تخافين ما رايحين ننطلق للفضاء والله
ضي:: مو تتأخرن
ليان:: يبووو فهمت ، خل اشوف هذيچ وين راحت
عافتني ومشت واني رجعت انظف
شوي ورجعن للصاله وليان گالت ..