رتبة و ظفيرة - الحَلقة 46 ⚜️ -
...

ما مشتاكلك عطشــان !
سيّـر يا هوى الله صويحبك غركان
...

يَاسمين
مَد ايدة فتح الباب و هو يصرخ
- اييييي افتهمنااااااا
و انفتح الباب ...
طبو عصام و محمد و شَاب شايلين هيثم كل ضني متخربط
سميحة لطمت خدها دفعتنا و طلعت و اخذة منهم ارشد وهو شايلة بأثنين اديه و مصدوم
عصام : غرگ غرگ كلنالة لا تسبح اليوم المي عالي

سميحة الي حتى صياحها هَمس صرخت بصوت رَج الدنيا و هي تريد تاخذة من ارشد و تشيلة ارشد ما قاوم ضَمة لصدرة و كعد بالكاع ويمسد صدرة بلكي اكو امل
نَفس يصعد لو ينزل هيثم حبيبي هيثم گوم يولي

كعدت سميحة بچادر صلاتها الما يوكع منها اول ما نزعت عبايتها لبستة
انتقدناها وهي دكول ارتاح من البسة مو قصة احتشام عادي هم اخوتي
شالت راسة وحضنتة وهي تمسح وجهة
سميحة : گوم هيثم لا تمثل اني يمكن حامل لا تهبطني هساع اموت

تفتح بعيونة و تحچي
- كوم يالله حتى اهلي ما اريدهم يالله امشي نرجع للبيت
اجتي جارتهم الي متعلق بيها و تكفلت بكل خطوبتة تركض بطرگ الدشداشة
تريد تحجي و شافت هيثم ممدد بالكاع لطمت على خدها و تلطم بهستيرية
كلها واكفة تبچي لرعُب المنظر

سميحة تاركة الهوسة و تحجي ويا تريدة يكوم
- هيثمم لا هَيثم صدك تحجي تعوفني هيثم ؟ ولك اني سميحة كوم
اني الصبرت عليها سبع سنين كوم بعدني ما تهنيت بيك شو كوم يروحي

تباوعلنة و ترجع تهز بي تشوفة ما يستجيب انهارت
- ولككككك هيثممم ولكككككككك كوم لا تسويها صدك حاربت الدنيا و اجيت يمك هاي امي والله امي ما تحجي وياي من وراك كوم لا تفشل گلبي
كوم اليوم اني فرحانة لا تطلعها من خشمي







كام ارشد كاعد يباوع حتى بدون ميرمش
راد يسحبها صرخت بصوت تركها
سميحة : كلةةةة خلي يكوووم كلة هو يخاف منك هيثم بداعت امك لا
كوم يحبيبي كوم يعمري هيثم الزلم تباوعلي كوم انت مو ماتقبل راسي امدة ؟

نهارت بالصراخ و الضرب تريدة يكوم
اجني اخواتها يوخرنها ضربنها تقربو ارشد و فراس لطمت على خدها
و نزعت الچادر صارو يصرخون اخوتها و يسدون الباب المفتوح من الصدمة طول
عتابها و محد ايدة تعينة يروح يسدة و الناس واكفة تباوع

سميحة : كوم هذا شعري المحد دحكو غيرك هساع افرع كدام الغرفة و افضحك
ولكككككككك هيثممم لا تكسرني شلون تعوفني وحدي شلون ولك اني سميحة
تعبت من العتاب حضنتة و شمرت راسها عليه
هدأت وكلها تبجي على حالها لزمها ارشد من كتفها خايف عليها
لكاها متحرك ساكن تخبل و احتارو ناس بسميحة و ناس بهيثم

فراس و عصام و ابو قيصر اخذو هيثم و طلعوه و ارشد ملتهي بسميحة يكعد بيها اول ما صحت صارت تعيط و تريد هيثم لزمنها اخواتها يهدن بيها
هذيج سميحة الفراشة الي متأذيلها احد و لا احد سامع صوتها صارت تشيل و تكسر شكو شيء يصير كبالها
ملخت شعرها اذت كل وحدة تريد تهدأها ، الله يعين كلبج يا سميحة

تريد تطلع للشارع و قافلات الباب لازماتها افتر بالكراج و تلطم كل قوتها مثل المجنونة صارت الناس تجي تريد تواسيهم و هي تطردهن من الباب دكلهن لا هَيثم عدل هساع يجي ياخذني اني كتلة ما اطول جثير العصر تعال اخذني
سميحة : و لكـم هو ما ينام الا الوليلو على رجلي الا هيج احجي ؟
اتركني خل اطلع

للمغرب و الحزن سَيد الموقف و كلها شايلة هم سميحة الي صارت مجنونة
تمشي و تلطم على وجهة
سميحة : كتلو خايفة من الشط ما سمعني لالا مايزعلني و يروح
دخيلك ربي لا تختبرني بي انتَ اكثر واحد يدري شكد احبو لا تكسر خاطري و تاخذو دخيلك اروحلك فدوة

اني كاعدة بباب المطبخ رجلي متعيني اوكف اباوع لسميحة وًدموعي تجري اتذكر كل تابوت طلع من حياتي و خَبر موت ارشد الدمر روحي و اني ما شايفة تابوتة هي شلون حاضنتة و هو ميت ، من بين الهدوء كله و صوت سميحة لازمة التليفون و تخابر بأرشد دكلة جيبة وياك منتظرتكم ، لا مامات ابو شاهين لا تحرك كلبي
اني عزيزتك







صارت هوسة بالشارع و صوت زِلم طغى على المكان صوت حديد ينشمر
و صياح الى إن نُطقت الشهادة بصوت عالي و اندگ الباب
لا اله الا الله
مُحمد رَسول الله
كلها تغطت و شمرن عباية على راس سميحة و طببو التابوت للكراج


ركضت سميحة بخيبة آمل تعاتب بأرشد
سميحة : كتلك جيبة وياك عايش مو نايم بالتابوت يابة شبيك شبيك
ارشد : ودعي سَميحة راح هيثم شَهيد طاهر الغرگان شهيد ينتظرج بالجنة

دفعت ارشد و ركضت للتابوت تريد ترفع القبق ما خلوها المرة الي تحبة كتلت روحها و ولدها لازميها يهدأون بيها مَحد بقة فوگ تابوتة غير سميحة اشرلهم ارشد اتركوها
فتحت قبق التابوت و شهگت لطمت صَدرها سدت القبق و حضنت التابوت

سميحة : لـيش يا حبيب روحي ليش ؟ هاي جزاتي تعبي وياك هيثم ؟
تتركني بعد كل هالصبر الصبرتو الي ؟ غدرتني رحت للجنة و تركتني هينا وحدي مو دكلي تموت وياي ؟ شو رحت واحنة باول الطريق
رحت لامك ؟ ليش اني مو الوليلك ، والله احبك اكثر منها

باوعت لارشد بتعب
سميحة: هساع الشط وگف عليه تا ياخذو ؟ شلون گلبو انطى يتركني
ارشد : يلا حبيبتي ادعيلو بالرحمة
سميحة : لالا دخيلكم چذبو عليه كولولي المچفن هذا مو هو بلكي مثلك يابة من رحت و رديت ابوس ايدك يابة سوي شيء كلة خل يكعد والله هو يخاف منك

ارشد: كومي سميحة حبيبتي رجلج شهيد
سميحة: مو رجلي هذا ابني ابن گلبي هذا من ازعل يصيحلي يمة تاينكسر كلبي عليه و اصالحو شدحك من عمرو تايموت هساع الگبر ما استعجل الا عليه







كان كلة كلامها هدوء الا لحظة الرادو يرفعون التابوت انهارت
سميحة : يمةةةةةةة لااااااا تاخذون حبيبي ما شبعانة منة والله ما شبعانة
ولكككككك هيثم يحبيبي كووووملي يصيحلي يُمة
يُمة يبعد امك و اسمها ولك شلون انام و انتَ يغطيك التراااب
سودة بوجهي يمةةةةةةةةة ولج يمةةةةةةةةةةة سَهلة تعاليلي

انهارت و صارت تأذي نفسها بالضرب
منظرها يقطع انياط قلوب الكُفار
عروس الوشـاح الابيـض الطـاهر ، طغى السواد حياتهـا
رُحمـاك يـا الله

حضنها ارشد و لازم اديها حتى تهدأ و يحاجيها
سميحة : يـابة مكسور عاش و مات مكسووور حتى خوات ماعندة يگابلني
اعرف الصبر والله بس الا موتو ما هجستو يجي اكلك گلبي لاچمني من طلعتو
گرصة گلبي من يطلع هاي نتيجتها ، ولككككك هيثممممم يا صااااارت صدككك

ارشد : كافي يابة هاي انتِ العاقلة المؤمنة الموت بيد ربج
سميحة : عجل هيججج ؟؟؟ صبرت عمر على شوفتو بالحلال
تالي بلمح البصر يروح مني و اني شعندي من الدنيا غيرك انتَ ويا
هو هو ماعندو غيري شلون يتركني غدرني هيثم غدرني

بعدنا نباوع و وكفت السيارة و طبو يركضون عصام و جماعتة الجايين ويا
عصام يسحل بيهم يكلهم ما مصدكين دحكو والله غرگ دار وجهة و شاف التابوت
شك قَميصة و انهار هوَ مو الجماعة الجايبهم طبو يركضون يشبكون بالتابوت
و عصام عصام
سوة المامسوي اخ على اخو محمد واكف بعيد و حاط ايدة على عيونة

عصام : ولككككككك هيثممممم صاحب روحححي كوم ولك مو تناسبنة عيب عليك تعوف اختي عييييييب على شواربك فرطنة بيها و دزيناها الك عجل هيج تعوفنة
هيثممممم ولك لو مو ابوي اطببك للمضيف تترك صاحبك و لك الجكارة
نشربها سوة ويامن اطلع يولي كوم انتَ الگولچي ياهو اليصدلنة الطوبة بعد







احتار ارشد يلزم منو هَد سميحة الرجعت ركضت على التابوت و ما شالت هم جماعتة هم رُغم البجي بس كامو بسرعة وكفو يم الباب و تكابلو سميحة و عصام
حتى الحيطان بِچت من عَتب عصام و سميحة لهيثم
و مــات هَيـثم
و إنـتهت قُصة ذلك المُلحـد ، شهيـداً طاهـراً مُصلياً صائماً
و الفَضل يَعود الى إنثى صغيرة

- جيبو فَرشة عرسة يتغطى بيها التابوت راح عريس الله يرحمو
كلمات خلت سميحة تنجن لاقصى حد حاوطها ارشد يهز بيها بلكي تصحى على نفسها
دخلها للبيت و هي تبوس بأيدة ياخذها ويا كالن اله النسوان اخذها كاللهن لا تموت ادري بيها تموت
تركنة و طلع و اني كاعدة على عتبة الباب من باب الشارع و اجة علية
- فوتي جوة انتِ بهذلتن حالي بهذلتني

تركتة وطبيت كعدت على الدرج اباوع لسميحة و دموعي تجري
جابتلها اختها اكل و مي شالت الگلاص و شمرتة بالگاع
سميحة : أخذ حبيبي و اشربو ؟ سم يفوت ببطني ان شاء الله

سَهلة تبجي على حال سميحة الي التزمت الصَمت بَعد ما شمرت المي
ما نطقت اي حرف و كلها خايفة من سكوتها تباوع بالوجوه و دموعها ما وكفت بس متحجي شيء اجوي من المقبرة و يحاول ارشد يحچيها ماكو
هو اني بنفسي اريد احجي ما اكدر من الصدمة مو النوب هي فقدت اعز انسان على كلبها

ثاني يوم ارشد سوالة فاتحة طَــر رُغم هو حتى ابو سألو عنة كالو مطلوب فلوس و مهدور دمة شارد صارلة سنتين شخص مكطوع من شَجرة و فاز بسميحة و تركها
كامن النسوان يتناقشن بينهن سميحة يجوز حامل وامها تصيح عليهن
لااااا مو حامل

حاولن وياها اسوي اختبار بالبيت بس هي لا تحرك ايد و لا رجل بس الدموع
البيت مخبوص طَبت دُرة الظهر تباوع لسميحة بقهر الي ميفيد وياها اي كلام
ركضت عليه وانتِ شبيج النوب ؟؟ يَاسمين !!
سَهلة : هاي الحبلة من امس على كعدتها ماترضى تكوم
ماتهنن هالعرايس كلهة نافستهن







طلعت دُرة و طَبو ارشد و منصور و هي تحاجيهم على وضع سميحة خاف حامل و الطفل لا سامح الله ميت تتسمم و اشرتلة عليه وهاي مدري شبيها متحجي

ارشد كعد كبال سميحة يبوس بيها و يقنعها تسوي تحليل متحجي لَمها بحُضنة و دزهن على چادر لبسها و اخذها دُرة تركتهم و اجتي كعدت يمي
دُرة : شبيج يروحي ما تهنيتي لا انتِ و لا سميحة كلة من ورا امة
يَاسمين: سميحة خطية لَتموت
- لا ما تموت هي عدها ايمان برب العالمين الله يرحمة
خليت راسي على متنها و ابچي

سمر كاعدة بصفي من الجهة الثانية تبجي رغم كلنة منعرف هيثم
بس نعرف حُبة لسميحة و حُب سميحة اله اصعب شيء من انتَ تكون شاهد على قصة حُب اشبه بالخيال و انجمعوا رُغم انف الاعداء تالي ما تهنوو
مَرت صابرين متخوصرة
- يلا يلا كومن ويانا مو عايشات الدور هو هذا الزواج الي الام ما ترضى بي
سمر : تتشمتين ؟ الحية تتشمتين بخالتي مو اجي اشك حلگج بالنص والله

اجتي ام صابرين و ام قيصر و صار ملاسن بالحجي و ام صابرين تريد تطلع زعلانة و ام ارشد مچلبة بيها بعد ما ضربت سمر دارت وجها علية ام صابرين
ام صابرين : هاي هاي جنتج الجبيرة من يوم الچهبتنة و احنة انفرثنا
عساها بحضها و بختها

وكفت دُرة بأنتفاضة و هي تحرك بأيدها
دُرة : عفواً خالة ؟ هاي انتِ تاركة التجاوز عليج وعلى بنتج و المصيبة الانتو بيها و جاية على ياسة مو زين قابلة بعيشتكم و هي تريدكم ! بس غير رجلها مجلب بيها
هسة اخذها واخلي يگلب عاليها واطيها على روسكم

صعدتني سمر و جرت دُرة لان راح يكتلنها شوية و انفتح الباب ارشد شايل سميحة خلاها على مكانة بصفي و باوع لـسمر كاللها ديري بالج عليهن
سميحة سميحة لا تخليها تأذي نفسها حامل بالج من امي لتخليها تفوت للغرفة
و خلصت ايام الفاتحة و كل الي ضنينا سَميحة من تعرف بروحها حامل راح تهدأ شوية

الـ تلث ايام هوسة الشارع ما هدأت و فاتحة النسوان صارت بـ بيت المرة الي تحبة
لان ارشد كال سميحة گلبها واكف على شعرة بس تگابلها وحدة بالبچي تموت بگاعها
مرات افتح عيوني الگا منتچي و لازم خاصرتة صافن على سميحة و يهز راسة
بأسف مَرة جانت سميحة نايمة
اجة عَلية

رَجع شعري ليورة و مسح جبيني
ارشد : عجل و انتِ شبيج لا تكسرني يـا عزيزات روحي
يَاسمين: شلون راح تعيش سميحة هَـيـثمها مات
ارشد : انزرع ببطنها هيثم ثاني ربچ مياخذ شيء اذا مينطي بدالو







يَاسمين: و دكلي انتِ مخبلة بية و تاخذني للطبيب مو هاي سميحة العاقلة شفت شسوت ؟ ارشد لا تخليني بيوم اعيش العاشتة سميحة اذا هي تبقى عدلة اني اموت لو مو طفل منك محد يجي مثلك و لا راح احب احد بكدك
سحبت ايدة و بستها بداعت شاهين ابقى يمي والله اكوم احبة و ما اغار منة

سحبني لحضنة بقوة و هو يبوس براسي
ارشد : اه يا روحي شلون بيچ شلون يولي الموت بيد الله مو بيد احد
الرگبة غير الحطها ما يشيلها ، عجل منو كال بيوم هيثم يروح للشط و يغرگ
اول تالي ؟ وهم كلهم نازلين يطبشون شمعنى الا هو بس هي منيتو

لمن خلصت الايام و أنتهت الهوسة كعدت لكيتها واكفة يم الشباك تباوع و لازمة بطنها
وصلت يمها و مديت ايدي على جتفها
يَاسمين: سميحة لا تموتين اموت ، الموت مو حلو يقهر
سميحة : راح حَبيبي راح ابني

يَاسمين: بطنج بيها ولد من عندة مو زين ؟
سميحة : شالفايدة وهو راح حتى مايدري بأبنو موجود حتى ما فرح بي
لو الشط الغرگو يخلو على گلبي ما تطفى ناري
ولج عطشانة و استنكف اشرب المي

دك الباب و دخل ارشد شافها متحركة من مكانها تنفس براحة و هي درات وجهة عليه
سميحة : عَش يابة شلتو الچادر ؟ هَيثم ما تنتهي فاتحتو
ارشد : هيثم الصغير ببطنچ احسبي ما مات

كعدت بالكاع وتضرب رجلها بقوة
سميحة : عـجل الشط جان منتظرني اتزوجو تاياخذو
هاي جزاة صبري هاية ؟ يتركني اني و ابنو رحت للامام الكاظم ويا
اريدو ينهدي مو يموت
ارشد : انتِ المؤمنة الراضية بكُل الي كاتبة ربج هيثم غَلط و انتِ صححتي و من دحكو ربج راجع للغلط اخذو تا متتأذين انتِ







كلشي بهالدنيا يگول انتِ و هيثم ما تتجمعون بَس اتجمعتوا
تا كُل الدنيا تعرف و بالاخص هيثم و الملحدين الي ويا ربج شنو عَظمتو
ولو هي متحتاج بُرهان جمعج ويا و زرع ببطنچ طفل منو يالله اخذو
عَش ما سألتي نفسج ؟

يدري بيج ما تتزوجين غيرو اذا ما صرتي الو و يدري هيثم نصيبو بالدنيا قليل
بس ما اخذو اذا ما جمعج بي و خلالج منو ريحة و بنفس الوقت اخذو و هو طاهر مُسلم قبل لا ترجع توسخو افكار الملحدين و حتى لا تعبج يروح هباءً منثوراً

سميحة : ما اكدر بدونو و حتى هذا ابني ما اريدو اريد هيثم يابة جيبليا
ارشد : دحكي يا روحي كل شيء بهاي الدنيا قابل للفناء الا رب العالمين
هساع اني احجي وياج يجوز باجر يجيج تابوتي
هي مدت ايدها على حلگة و اني لطمت صدري و شهگت
يَاسمين: اسم الله عليك ارشد شبيك هو احـنة شعندنا غيرك

ارشد : سِمعن كل مصيبة احنة نطبلها نكول ما نطلع منها و هاي نهاية حياتنة
و حتى نتمنى الموت في سبيل نخلص بس شنو بعدين ؟ نتخلص منها و ندخل بالاكبر و يرجع نفس الشعور و هم نخلص هنا شنو الموضوع
رب العالمين لا يُكلف الله نفساً الا وسعها
كل مصيبة تنشمر علينة احنة راح نتعداها لان هو يعرف احنة كدها لو مو كدها
ميكلفنا بيها

سميحة : الا هاي يابة ما اكدرلها
ارشد : اكو مقولة للامام علي (ع)
سُأل ماهو الشيء الذي اشد من الموت ؟ قال فراق الاحبة
هو من الاساس اذا تصفنين الموت شيء حلو انتَ رايح لعالم جديد و اول و تالي احنة راح نلحگك و المن رايح ؟ رايح للي خلقك و تعب عليك رايح للي تصليلو و تتمنى
تدحك شكلو و هيئتو شنو ؟ رايح تلتقي وي رب العالمين ذو الجلال وًالاكرام
الي بأيدة الدنيا و الاخرة ، اكو احلى من هالشيء ؟







بس هو اليوجع فراگو عند احبابو هساع هيثم روح طاهرة صعدت بيد الي خلقها
بس گلبچ لان يحبو ما يكدر على فراكو الا هو احسن من عندنا كلنة خلص من حمل الدنيا الصعب هذا

سميحة مسحت دموعها و نزلت ردت انزل وراها لزمني
- اتركيها خلي تختلي بنفسها ، اذا ضلت ساكتة تتخبل
فاقدة عزيزها هساع لو ينزل الوحي يطمنها ما تبرد نارها

نزع ملابسة و سحب باكيت الجكاير و ضل يجر وحدة ورة الثانية
كعدت يمة مديت ايدي على الجكارة الي بحلكة اخذتها جريت نفس و رجعتها
بأيدة ورجعت لفراشي تغطيت و نمت هو ضل صافن

مَرت الايام و موت هيثم جان صدمة بنت مسافات بين الكُل
حتى بيني و بين ارشد الي كعدت ما لكيتة عرفتة راح للدوام نزلت اتمشى احس روحي مخنوكة اسمع صوت بالمطبخ و مَي يجري تقربت بهدوء و اباوع سميحة
فاتحة اديها جوه البوري و تعاتب المي الينزل
سميحة : لحگتني عليه ؟ ضمتو التربان الجان مينام اذا ما الوليلة ؟
دِللول الولد يَبني دِللول ،

عطشـانة و شلون اشرب چتال ابني ؟

اني سميحة يا هيثم يا حبيب روحي و عمري هذا ابنك ببطني تعال نرجع لبيتنة الصغير هذا بيت اهلي الچبير ما اريدو ما احبو تعال ولك لهساع ما مصلية
عناد بيك حتى صلاة الوحشة ما صليتلك
سدت البوري و طلعت للكراج باب المطبخ مفتوح
وصلت لباب الشارع مدت راسها و سدتة دارت وجهة وشافتني
سميحة : ميقبل امد راسي گلت بلكي تهتز غيرتو و يطلع من گبرة

يَاسمين: كل الي ديصير بيج صار وياي قبل
سميحة : بس انتِ رجعلج اني ما يرجعلي دحكتو مچفن و گلبي يفور عليه
من كالو ابو شاهين مات اني گلبي بارد هجستو عايش
- الله يرحمة
سميحة : لا خلي يرحمني اني و يخفف وجع گلبي هيثم ارتاح و اني التعذبت







عِصام صار بشر متوحد ميقل حزنه عن سميحة و اي هوسة تصير يطلع حركة گلبة بالجهال صارت حتى الجهال تخاف تطلع من الغرف مَرت علي
ابنها صغير ومن يبجي صوته يهرج البيت يطلع عصام من الغرفة يصرخ
- سكتتيييييييي لا وروح هيثم اذبحو
رُغم هم يسولفون جان يموت على الاطفال

ما يحجي وي امة و كل ما يشتد الحزن بي ينزل لابو يتعارك ويا
عصام : انتَ انتَ شديت ويا حرمت عليه طبت البيت شسوالك فهمني
خليتو يجي يدك الباب عليه بالختلات تا اطلعلو
هساع منو يدك الباب علية ؟؟؟ ولك يا كسرتي ظهري وينك
ارجع مثل ما رجع ارشد ارجع نتركهمممم و نهاجر والله اهاجر وياك

سميحة : بلكي من نروح لگبرو يگوم هساع يجوز ما يسمعنا
ام ارشد: كاااااافي ايمتى كتلكم هالزواج من اساسو غلط
راح ارشد هداليها للملحد هاي نتيجة الكفار يموتون انكس موتة

سميحة : لاااااااااااا مو ملحد لاااااا هيثم مسلم و لاخر يوم هو صله يالله راح
كلةةةةة منج يمة انتي انتي ما خليتيني ارتاح ويا دمرتي حياتي و حياة ارشد
باوعتلي و سكتت الله يسامحج يمة احنة مو بزرج ما يحن كلبج علينة
لوعتينا و هجمتي حياتنا دعاويج يا يمة اخذتو مني كسرتي بنتج كسرتيها
انوخذ عزيز روحي من بين اديه

هذا الـ يحبني اكثر منج و من ابوي هذا النافس ابو شاهين بالمحبة
هذا روحي و دوة جروحي مريضة و بس شوفتو التطيبني ياهو اليطلعليا من كبرو يدحك مرتو شصاير بيها بفراكو باوعت لسهلة و لزمت اديها
يُمة يناديني يُمة من يجي محل مسواگ البيت تا ميحس روحو يتيم
يناديني يمة يبعد امهاتي وينـك تعال لحبيبتك ولك هيثممممممم







صرخ بيها ابوها
- هاي امج يولي شلون دكولين يا بعد امهاتج اكو اعز من الام من ايمتى تعرفي
وصار اعز من امهاتج
سميحة : اي هو اعز من امهاتي هو بس ابو شاهين فوگ معزتو
اعز منك و من اخوتي و من الـ بطني لا تصدك اني هدية اني حبيبتة من سبع سنين ينتظرني هذا عمري هذا روحي هذا ابني الچبير

كُل يوم يمر على سميحة و علينا اصعب من الثاني
كأن صابت حياتنا لَعنة ارشد اخذ اعتزالي حجة حتى يبقى بالشغل و يكمل التراكمات الي عليه صار يبقى هناك اسبوعين و يجي يمنا اسبوع و هذا الاسبوع
يخلصة اعصاب و امة من يداوم صاحية و من يرجع تتخربط و يضلون حايرين
بيها ماجنت اعرف السبب شنو

سميحة بغرفة سَهلة تنام و تصحى على السجادة
لا كَلت و لا مَلت الى ان اجتي ايام الاربعين و هُنا تَسكُن العبرات
ارشد جان بالدوام و اجة ماخذ اجازة يوم حَضرو التجهيزات و السيارات
ام ارشد و صابرين و شروق ما راحن و اني هم ما قبلو اروح
احس روحي مخنوكة اريد اشوف كبور عمري كلة شايفة قبر اهلي مرة وحدة
و جنت صغيرة و قبر بيبي بغير مكان عن قبر اهلي و هم مرة وحدة

هو اعصاب و اني مبتعدة عنة حتى كلام بالغرفة بينا ماكو
دزيتلة واحد من ولد علي يكلة اريد اروح سمعتة صرخ من الصالة
- لاااااااا
طَبيت للغرفة و طبگت الباب قوي أباوعلهم بالكراج بدو يطلعون
و هو يمشي و يرفع عينة على الغرفة دخل للبيت عرفتة راح يصعد
تمددت و تغطيت دخل و كال يلا كومي بساع
- ماروح

فتح الكنتور و سحب صاية و شـال
ياسمين: روح ما اروح بطلت
ارشد : دگـومي هساع والله اعصابي تلفانة لا تزيديها عليه
انقهرت على موجة صوتة و لبست طلع و طلعت ورا قفل الغرفة
وصل للدرج لزمت ايدة
- گـودني
ما حچة بس لزم ايدي بقوة و نزلنا سوة طب لغرفة سَهلة گال يالله يابة
صعدنة ويا اني و سَهلة و سميحة

اتذكر اني مقابر النَجف عبالي هم راح نروح للنجف بس طلعت مقبرتهم
بالمحافظة نفسها جانت دنيا العَصر و الشمس عالية و المكان اشبه بالصحراء
الي مزينتها هامات القبور وكفت السيارة و سميحة الظاهر تعرف شكل المقبرة
من بعيد شافت الگبر الجديد الخَيم عليه عصام بصراخ

بَعدة ارشد ما نازل هي فتحت الباب بسرعة وركضت فاتحة ايد
و ضامة بالايد الثانية شيء جوه عبايتها وصلت للقبر و صرخت صوت
إمرأة صغيرة ذات حُنجرة مَذبوحة بسبب البكاء على عزيز روحها
مشيت وراها بهدوء و هي بچيها بصوت يهز البدن
مدري شلون ما انفطرت القبور الموجودة من شدة الحزن







مبين اسمة على القبر وهيَ تمسح بي و تبوس بأسمة
سميحة : ليش يحبيبي مو حلو اسمك على الگبر اسمك مكانو بگلبي
و بالساني من اصلي و اني اطلبك من رَبي
ليش يا عزيز عمري تكسر گلبي مو جنت دگول خايف تِهديني و تهّديني
لا ما اهدك إنتَ هديتني

هذا ابنك لو كبر شكلو ؟ ابوك غرگ اخذو الشط منا و حرمنا منو و من طولو الحلو
لـيش يا عيني و نَظرها يا دمع عيوني گوم اجيتك اربعين يوم و اني انتظر هاليوم ادري بيك ما تتحمل عليه هلكد اني مو امك ؟ اكو واحد يترك امة ؟
لا تسويها صدك و تخليني ارجع وحدي

زين اطلع طببني وياك معليك بعصام ينسى بعدين عصام مو مثلي
هَـيثمي يـحبيبي گلبي ما يتحمل بعد ولك عيب فضحتني كدام اخوتي كلهم درو عاشگتك گبل گوم انتَ مو هيج تموت الماي اخذك مني شلون ابنك ياخذ ثارك
ما خليتك تحس باليتم ليش يتمتني ؟

رحت لامك و تركتني ولك والله ما تعبت عليك بگدي هيثم
اني بايعة امهاتي لخاطرك كوم يبعد سميحة و اسمها
اه يـ إبني يـ طالع مُـن رَحـــم گــلبـي

عِصام : يا غدار هيثم هيج تترك صاحبك اخذت اختي و رگصت بعرسي عجل بعرسي منو اليرگص گوم يا خوية والله عيب عليك هاي السوالف مو كلنة من زمان صرنة زِلم وراح نترك المقالب بعدك عريس يولي وينك وين الموت







وكفت سيارة ولد المرة الي متعلقة بهيثم و هم ماقصرت جانت ماخذة دور الام بكُل جدارة وولدها يبچون اني لازمة ايد ارشد بأثنين ادية و افرفح وهو يگلي
يولي انتِ شبيج هساع هي رجلها ميت انتِ شبلاج ترديلج حجة تاتبچين مو راح تموتن

فتحت عبايتها و طلعت وشاح عرسها الي كلها نافستها عليه و ما رادو قسمتها تصير
فرشتة على قَبرة و تعدل بي منا و منا
سميحة : مو دگول محد يدفيني غيرو چنة عباة امك ؟
يالله جبتة اذا ماتگوم اخذة و اخليك بردان

ترك ايدي ارشد و راح الها يواسي بيها گالو يالله و هي انهارت
- كوووووم هيثم كووووم راح نرجع للبيت لا دكول ارجع بدونك
هذا ابنك المن مخلي ليش تعيشو اليتم مثلك شنو تريد تعاقبو ؟
شنو ذنبو يفتح عيونو بلا اب
انهارت بشكل مو طبيعي لـِما ضُربت راسها بحافة القَبر
صرخ عليها ارشد بعصبية هَز كتفها بعصبية
واشوف الدم انطبع بوشاحها الابيض و اختل توازنها ، طاحت على القبر

صار صراخ و كلها رجعت و هوسة ارشد تركنا و اخذ سميحة هم وفراس
رجعنا وي عصام بعدين يالله جابوها الكانولة بأيدها وًهم يرزلون بيها ميصير
ارشد : كل حبج الو چذب عجل ابنو ما دايرتلو بال
و مـن هاليوم صَدگت سميحة موت هيثم و لازم تتقبلة
مِشت الايام وهيَ حالتها الصحية تدهورت
صارت مثل الخرسة تريد تحجي بس متكدر
سميحة المُلتزمة صارت ما تنام اذا ما تسمع اغنية هيثم الها
اني و انتِ يا حيـاتي

ارشد صار يترك دوامة و يجي ياخذها للطبيب و ما فادت لا علاجات
و لا كلام الدكتور كاللهم الا تتعرض لصدمة ثانية يالله تستعيد النَطق
حامل هي ثلاث اشهر و اني اربع اشهر بعد الاربعين رجعت حياة البيت طبيعية
الا سَميحة و عصام

بسبب سوء وضعي و حملي الي هسة يالله بديت احس بأعراضة
عطر ارشد الي اعشقه تلعب نفسي منة صرت اريد اشمة بدون عُطر
بيوم رجوعة من الدوام كاتبلي ما اشتاقيتي تنتظريني ؟
سمعت هورن سيارتة و نزلت من طلعت صابرين و شروق يبسبسن بالمطبخ
من طلعت ضحكن و هزن اديهن بأستهزاء تركتهن و وگفتلة دخل و فتحلي ايدة

حضنتة و استنشق ريحة التَعب الي بي
ارشد : حتى بهاي تختلفين عن البنوات ؟ ادري الحوامل يتنسن على عطرو
مو ريحة العرگ و قذارة الشغل طاح حضچ
يَاسمين: ارشد شوكت يخلص بيتنا ما احب الوجوه هنا
- جيبي يالله لان اكيد سميحة اخذها ويانة متعيش هينا و انتن اثنينچن مريضات
و سَهلة ماتكدر تعين نفسها قابل اترك الواجب و اكعد انضفلچن ؟







دخلت لازمة ايدة قبل لا يدخل للصالة هَد ايدي سَلم و كعد
صابرين : اكو نات خطية حيل
شروق : چثير خطية
كل ضني يردن مشكلة لان هستوة اجة من الشغل تركتهن و كعدت يمة
صابرين واكفة بعيد متخوصرة و مبتسمة مديت ايدي على ايدة
خزرني وراد يسحبها غرزت اظافيري بقوة

باوعلي بعصبية و هِمس
- شــبيـچ ؟
- معليك مريضة عوفني

هَز راسة وهو يسألهن عن حال سميحة و امة تخوزر بية لان لازمتة
سَهلة : اصعد ارتاح نام صبيلو اكل
- لا حضريلي الحمام و بعدها اتغدة
صعدت اجيبلة ملابس اريد انزل هو صعد اشرلي رجعي رجعت للغرفة
دخل و سَد الباب
- شلون صرتي ؟
- زينة بس ليش متخليني الزم ايدك ؟ ترى مو قحط

ارشد : مو قحط طبعاً ، بس عيب يولي من امي ماتعرفيها انتِ شنو
يَاسمين : اني ردت اضوج صابرين و شروق يباوعلي و يضحكن
حتى اتعارك وياهن .. صفن و مسح شواربة هَز راسة بصبر
- خلي يولن اتركيهن

يَاسمين: احس حتى من اريد ابوسك بالغرفة استحي من سميحة
ارشد : لان انتِ ماكو منچ اثنين انتِ احلى و انظف طرگاعة بهالدنيا
- لو ما ميت هيثم جان هسة حياتنا تخبل
- ترجع تخبل هيثم مرتاح يم الي احسن مني و منج و من سميحة

مديت ايدي افتح دُگم البدلة دخلت ايدي تحت ذراعة احاوطة و اشتم بصدرة
هو مَد ايدة بشعري يمسد بي
ارشـد : ياسمين
رفعت راسي اباوعلة عاقدة حواجبي
- ياسمين ؟ شعجب

ارشد : اذا غلطت بحقچ مَرة تسامحيني ؟
يَاسمين : يعني شنو ارشد ؟ لا تخوفني
- اتشاقة وياج يولي شبيج
- لا ما تتشاقة شوف معاني وجهك
- وداعتج اتشاقة حجاها و اخذ الملابس و نزل

نزلت ورا بس كلبي بي نار احمـي بالاكل و هو طلع صبيتلة اكل بالصالة
اباوعلة بأستغراب وهو يطمني بأبتسامة جانت كلها بغرفها كعدت بصفة
و عاقدة حواجبي مَد ايدة سوالي لفة صغيرة وقربها الي
- ما اريد اني مو مضحك ارشد احجي شكو
- يولي ماكو طاح حظج عبالي كبرتي تتناقشين

- لا تسوي ذني ترى اني حافظتك من تحجي صدك يفرق عن الشقة
سكت فترة و بعدها تكلم
ارشد : عَـمـچ طلع من السجن
يَاسمين : صدگ ! و طبة مرض شسويلة هو باعني متأكد بس هاي ؟
- اي بس يول هيج جنت اكول خاف ترجعيلو بيوم و تتركيني
يَاسمين : اني اتركك ؟ اعـوف الدنيا والله و مـا اعوفك معقولة لهساع مادريت
شكد احبك ؟ جثير والله جثير دحك حتى مثلك صرت احجي







ابتسم
ارشد : اه يا طرگاعتي الحلوةً
يَاسمين : اني طرگاعتك و تربيتك ما ابيع الاشتراني و لا ارجع للباعني
- الله حَيـو يـاب شيخة الغربية والله

بعدها تذكرت حجاية ابو
- ارشد صدك المكار هم طلع ؟ يمة خاف يكتلك
ارشد : يولي المكار ما يغدرني بس اني عاقبتو على دگتو الناقصة وياي
استخدم عرضي علمود الفلوس وهو اني العلت بي لو مقصدهن هم جان خلصتهن
خليتو يسحبلي بالفايز وغلست هم صارو يهددو لان المبلغ جثير
اضطر يلزمني من ايدي التوجعني

يَاسمين : الحقير الجلب الله لا يوفقة
ارشد : هو و عمچ اعداء للقُندرة
- طبهم سطعش الف مرض انت بس اطلع منهم معليك
ضحك وصعدنا بعدها اخذ سميحة لاربيل ثلاث ايام و رجعو كايليلة الا تتم الولادة يالله
وصـارت تمشي الايام و الروتين ينعاد على آمل يجي اليوم الي نطلع بي و نخلص

صار غدة انجمعت بي العشاير مالتهم حتى يتم اعلان مَنصور شيخ العشيرة رَسمياً
من بعد والدة و ابو ارشد ما يقبل يستلم الشيخة لكن كفلة منصور بغيابه هو الي يقيم
بشؤون العشيرة جنت واكفة بالمطبخ وياهن
فرح : باعتبار هساع جدي شيخ العشيرة لان عمي منصور مو دوم هينا
كلة بـبغداد
يَاسمين : هو دخلي جدج يكدر للبيت مو للعشيرة
ضلن صافنات بوجهي و اني هم ارتبكت چفصت بالمكان الغلط

من خوفي صعدت ركض وكت عشه و باجر ارشد يروح للدوام
و طول الوقت اني افتر بالغرفة متاكدة راح يكولن الهم و يسون من الحباية كباية
و كل احساسي صحيح بساعة السمعت صياحهم جوه و ارشد صاح
بأسمي بصوت عالي
حسيت راح يختل توازني نزلت على كيف و بتعب هم حاطين الصواني بالكاع
ومحد ماد ايدة ابوهم مخنزر بوجهي و ارشد عصبي و كل الوجوه مگلوبة
ارشد : صحيح السمعتووووو يوليييييي ؟

يَاسمين : شنو شسمعت ؟
هو باوع لفرح و كال شكالت عيدي
فرح : كتلها جدي راح يصير شيخ العشيرة دكلي دخلي يكدر البيتة جدج
وينة ووين الشيخة منو معترف بي

عضيت شفتي وانصدمت من سمهن
ضربت خدي بقوة وباوعت لارشد
يَاسمين: عزا العزاچن اني اكول هيج ؟ عمو اني يا يوم متجاوزة عليك ؟
هو اني بيا حال نزلت اشرب مي و صعدت هن من زمان يردن مشكلة و اني تاركتهن حتى متحجون عليه مسحت دموعي تردون اطلع من البيت ؟
عادي والله هسة اطلع







سَهلة : تموتن على المصايب مستهترات احنة صگعات البين كافي علينا
ما تتركن اليتيمة هساع شو جنها فارة يمجن كرباجن مو من زمان كفت عنجن
تنظيف و تنظف حامل و مريضة ما تبطلن من عمت عيونجن الصلفة هاي

هن ضلن صافنات على تمثيلي و مرت علي حاصرتها الضحكة
ارشد : تعاي بوسي ابوي يالله
تقربت بستة و امسح بدموعي لتصدگ بيهن عمو ترى هنَ يكرهني
ما حجة بس هَز راسة تركتهم و صعدت كعدت بالغرفة ميتة ضحك على
شطارتي و تمثيلي لو ضالة فقيرة جان اليوم كتلتي عمل شعبي

وكفت كبال المرايا اقلد تمثيلي و اضحك انفتح الباب بسرعة جفلت دخل هوَ رافع حواجبة
ارشد : لا استاذة بالتمثيل عشتي والله
- ما سويت شيء بس شربتهن سِمهن
ارشد : وصلتي مَرحلة الچنة الحية ؟ يا حبيبي

ضحكت و استغربت شعجب هو كاشف الحقيقة بس ما عاقبني
سميحة الوحيدة تباوعلي بقَهـر عكس نظرات حزنها لهيثم و اني اكعد يمها اواسيها
و اسولف وياها حتى ترتاح
يَاسمين : سميحة ترى كلام ارشد صحيح والله
هَيثم مات مُسلم و نظيف لان رب العالمين يدري راح يرجعون يوسخو الملحدين و انت هواي تعبتي حتى يلتزم و انتِ متدينة اكثر من عندنا يعني تعرفين

اخذت التليفون من ايدي و كتبت
سميحة : طلبت من الامام السولفتيلي عنو من دحكت هيثم يتزحزح بألتزامو
كتلو بجاهك عند الله لا تخلون تعبي يروح هباءً منثوراً ، بس مادري راح يموت

يَاسمين : يكول ارشد يجوز هو عمرة اقصر بس لخاطرج الله ما اخذة
الا بعد ما جمعكم و خلاج حامل بأبنة تخيلي يجيج طفل يشبه هيثم تربي و تكبري
مو احسن من ما ميبقى اله اثر
سميحة : لو حامل بَعـشرة ما يوصلون لربع معزتو
كتبتها و مسحت دموعها

مِشت الايام و دخلت الشهر الخامس رحت ويا بعد ما اني لحيت اريد اشوف شنو بية و سميحة بالكوة قنعتها تروح وياي دخلنة سوة و الا سوتلنة اثنينة يالله كالت
- اثنينچن بيچن ولِد







انصدمنة لان سميحة جاية بس علمود سلامة الطفل ما توقعنة راح يبين بهالسرعة
اني مبتسمة شوية عكس سميحة الي ابد ارشد من عُرف الگاع ما شالتة و باس راس سميحة و يمسح بدموعها رجعنة و كالعادة ام ارشد من سمعت هم تخربطت
و اخذها ارشد للمستشفى و من رجع اعصابة منهارة

جان منطيني ظهرة مديت ايدي على ظهرة بهدوء
- شبيك ارشد ؟
- ابتعدي عني يَاسمين
- شبيها امك ؟ ليش تضوجك !
حجيتها و هو ترك الغرفة كلها و طلع اباوع لمكانة شفت الباكيت و الجداحة
جريتلي جكارة شغلتها و كمت حتى اسد الباب ... انفتح و هو بأيدة شاحنة
باوعلي بصَدمة شمرتها بالگاع

ارشد : و رجعتي تدخنين يعني ؟
- لا والله بس هسة ضايجة شسوي
شُمر الشاحنة على الميز و طَفة الضوة عَـت ايدي
كانت اعصابة نار مو من الجگارة اني متأكدة اول مَرة تعاملني ايدة بقَسوة
مِن يوم الي تزوجتة إبد ما خَلة اثر برگبتي لان هو من الاساس يستحي من هالحركات
ويحسب حساب خاف اخوانة لو نسوانهم يشوفون

بالبداية جنت ماخذة الموضوع شَقة بس شفتة ميقبل شَقة نزلت دمعتي
ابتعد عني و گال مو زين الجگاير يا قرچ تردين تكتلين أبنچ
ركضت على المرايا و اني اشوف رگبتي تخوف
- هاي ليش ارشد ؟
ارشد : احسن من ما امد ايدي عليج

يَاسمين: اني مو حيوانة حتى تطلع ضيم امك بية
ارشد : نامي ياسمين
درت وجهي عنة و نمت حزت بخاطري لان هو معلمني على شيء و فجأة ينگلب وحش ، اساساً من موت هيثم كل حياتنة خربت شوكت تطلع الشمس علينا
و نرجع مثل قبل ما ادري شوكت

و الصدمة من گالو راح ترجع سحر نزلت على صراخ ارشد
ارشد : والله اذبحها هينا اذبحها و ما تفوت
....

دُرة
حياتي خالية من كًل شيء بس الي يأثر بية كل شيء يصير وي يَاسمين
رحت وياهم لفاتحة انتهاء إطهر قُصة حُب سمعتها بحياتي

يَاسمين بدون شيء حساسة مو النوب سميحة هي جانت خابصتني بحبها لهيثم خلتني اني احبهم و اني مشايفتهم وشلت هم يَاسمين على الي حواليها احزاب و قبائل
صاير البيت ضليت وياها على اتصال هي و سمر و نيران صرنة
صديقات كلش

و اكثر شيء متحمستلة ابن ياسة و ادعي يارب تطلع عيونة زرگ حتى اخذة لبنتي
طَبيت لغرفة الاستاذ منصور لگيت وحدة واكفة يمة تحجي سلمت و بديت افتح الدولاب و اسحب بالسجلات الجديدة
- اانتِ شعندج لازگة هنا ؟
درت وجهي بصَدمة هو ما موجود اباوع للبنية حلوة تجنن شعرها و ملابسها
بأخر شياكة عقدت وجهة
- وياي ؟
- اي انتِ يبدي و يخلص الدوام لازكة هنا حتى منكدر ندخل







دُرة : يا قليلة الاحترام لو الموضوع الي جاية بي مُحترم ما جان اثر عليج وجودي
سكتت و هي خازرتني تدور رد على كلامي
- كل عقلچ يگلبچ ؟ يا دُرة الرخيصة

دُرة : عندما يفقد الرديء قوة الحوار يلتجأ الى الكلمات الخادشة للشرف
التي تُمثله من الاساس

- اذا بيج خير اتركي المكتب
دُرة : لو طالبة مني هالشيء بأحترام تشلعين عيوني
لكن الان وصل الموضوع للكرامة و اذا انسحبت فـ معناها اني تأثرت بكلامچ
وكرامة ماعندي واني ويَ الكرامة قصة حُب لا تنتهي

سمعت گحة الاستاذ و دخولة انطاها الاوراق وطلعت لبس السماعات لاول مرة
يوقع و يهز راسة بأبتسامة التهيت بالاوراق
منصور : دُرة لو جاء احدهم لخطوبتكِ ماذا يكون الرد ؟

دُرة : حسب المواصفات
حجيتها و ابتسمت هو هم رفع حاجبة مبتسم
هيج يعني شخص شكلة مقبول مُحترم مُتمكن اهم شيء مايحرمني من وظيفتي
وعملي و الطلعة لان بدون سيابة ماكدر ههههههً
- ههههه انتِ اضرب من ذيج بس محد مستكشفچ

دُرة : اني وياسة ؟ ههههه لا استاذ فرق بين السماء و الارض
هي حساسة اني لا كلبي بدون احساس
هي تهتم للحب اني اهتم للفلوس
هي تريد تعيش وي زوجها بعالم خاص وتتنازل عن كلشي مستعدة لخاطرة
اني لا والله اذا ما اطلع و اطب واشتري سيارة و الناس تحسبلي حساب ما يعجبني

منصور : اول مرة ادحك تمرة مُتكلمة
دُرة : ها استاذ صاير مُتنمر
منصور : ول يـابـة عجل هو اكو احلى من السُـمر ؟
دُرة : اي والله نشك شك







ضحك و رجعت يكتب بعدها تكلم
منصور : يُـقال هُنالك سَمراء أصبحت مُمرضة
يخرُج صاحياً كُل من يدخل مشفانا مُهلك صحياً

باوعتلة مبتسمة بصَدمة رجع يكمل شُغل واني حتى صخنت كملت الشغل بسرعة
و طلعت كل ما اتذكر الكلام ابتسم خابرت ياسة تحجيلي انجازاتها
بالصح و الغلط اكللها عفية لان شسوي هي منا شاخطة النوب حامل
يا حبيبي على گولت رجلها
.....

سميحة
مــن بيـن الجميع لم تَهُب ريح الموت الا ديـاري
يـا واقد النـيران إطـفئ نـاري
فقدت عزيز روحي و إسراري
غَرقاً لقد مات الحبيب من أين إأخـذ ثاري ؟

كل العملتو بساعة خبرو ما ادري بي من يسولفولي انصدم
الا يوم الاربعين من گلبي و عقلي كلشي بدر و اخر ضربة
جنت ناوية اكتل روحي وسوس الشيطان بأذني تالي فقدت النطق
اهجسو عقاب من ربي تاينبهني على الردت اعملو

رغم كل ايماني برب العالمين و قدرتو و نعمتو
بس اهجس روحي اكثر بشر بهالدنيا مكسورة كسرة الها اول مالها تالي
اقرب المي لشفتي و اكول شلون اشربك ؟ وانتَ ماخذ روحي مني

صرت اهجس الطفل وجهو شووم على حياتي و بعدها يصحى ضميري
و اسكت الحزن فقدني كُل صبري هذا هيثمي هذا ابن روحي
هذا حبيب عمري و حياتي الصبرتلو عمر و ما تهنيت بي
صرت وره كل شربة مَي اكول سِم ان شاء الله

فاتحة صورتو الضامتها بالقرآن نسيتها هينا و بعد ما اجيت هينا و اخذتها
جنها تدري راح ارد هينا فتحت الصورة الجنت ابوسها و اطلب من رب العالمين يجمعني بي فد يوم هساع ادحك صورتو و اعاتبو
سويتها يا هيثمي و تركتني ؟ شسويت بية بفرگتك ؟

غرگان و اني بغرفتي و الماي ما طخ ثوبي
ما اختلف ع البـجُرف بس هو مخنوگ بنهر و اني بصور محبوبي

لزمت بطني و احاجي الروح المزروعة بداخلي رُغم المفروض اضمو بروحي لانُ من ريحتو بس گلبي بارد اهجسو هو الحاجز بيني و بينو
سميحة : ابوك تركك وحيد تدري ؟ راح تنولد يتيم !
ابوك ما يحبنا جذب علينا تركنا وحدنا

كلو ارجعلنا مو عندنا بيت صغير دافي تگعدون انتَ ويا تا اسويلكم الاكل التحبو
انتو اثنينكم ولدي تنامون سوة و اني الوليلكم و اغطيكم
كلو ارجع تاتاخذني للمدرسة و للملعب من تلعب انت و خوالي
حتى تصفگلهم ، لا تفرح ذني كلهن ما تدحكهن كلهن ما راح تعيشهن
ابوك حرمك منهن
.....

يَاسمين
ارشد : والله اذبحها هينا اذبحها و ما تفوت
فراس : جهالها هينا مسربتين شلون فهمني
- عجل وهاي مرتك المن جايبها والله ما تدخل هينا صدك تحجي عود
شروق : هذا كلو لخاطر ست الحسن و الجمال والله متندمة
ارشد : عادي جيبها لهينا بس بشرط

- شنو ؟
ارشد : الا تموت ام باسم ول يابة ترجع هينا تتملعب على شواربنة سحر وامها
ازينهن والله و لا اطلع بيهن
محمد : عجل اذا بزرتك مسربتة وديهم لامهم السوتو سحر مو هين تا ترجع
ارشد : و اذا كلش تريدها اطلع فلوس و خير من الله لو تعلموتو على التچخي

شمر كلاص المي بأيدة و صعد بعصبية
صعدت ورا
يَاسمين: ارشد شنو يرجعون سحر ؟ يمة تهجم حياتنة بالسحورة والله
- لا ما ارجع انتِ بس اسكتي و معليچ لا تتدخلين
ضليت ساكتة لان هو عصبي

بعدها انسد موضوعها و محد فتحــة مِشت الايام عادية
جنت نايمة و هستوني كاعدة احس بطني تحركت يمة صرخت بفزع
و هو نايم بصفي گعد رفع الغطى
- هاااااااا نزفتي ؟؟؟؟؟؟
يَاسمين : شو هاي بطني تتحرك يمة يا

تچة راسة على تاج الجرباية و غص من الضحك اول مرة
اشوفة هيج يضحك من وفاة هيثم لليوم مـد ايدة على بطني وهو تهتز اكتافة
شو بالله تعاي
رجعت تحركت واني حضنتة
- ارشد شبيك ادري الجهال تتحرك بس شو هذا يخوف

ارشد : عجل هذا ابن الطرگاعة مو حي الله

يَاسمين : راح اعترفلك ارشد
ارشد : كولي حبيبي
يَاسمين : اني حتى من هذا الولد الي ببطني اغار عليك لان من يجي اكيد راح تضل تبوس بي و تشبگ و تشمشم و تنساني اني ماريدك تلتهي بغيري حتى لو ابني
باوعلي بنظرة ماعرفت شلون افسرها بَس ضم راسي بصدرة و حاوطني بين اديه

صافن عـالوكت ضحك بنات الليل والزينات بچاهن

...
يتبع

رتبة و ظفيرة - الحَلقة 47 ⚜️ -


هواي آثار ضَلن بس إلم لا ، المخَطط يسموني لكِثـرهن
عندي جروح من التفت تلتاف ، لان واحد بواحد صرت اشدهن
- صباح الهلالي
...

يَاسمين
باوعلي بنظرة ماعرفت شلون افسرها بَس ضم راسي بصدرة و حاوطني بين اديه
يَاسمين : شبيك ارشد ؟
ارشد : شبية حبيبي ؟
- احسك متغير مدري شبيك شو گلبي لاچمني و اني اخاف من گلبي
- إمـي ياسمين كسرة ظهري

يَاسمين : شتريد منك ؟
ارشد : دحكي لو سولفت وياج هيج كلام عادي مو تصيرين جاهلة و تفضحين الامة
يعني هيج اناقشج عتفهمين علية ؟
لزمت كلبي احسة يريد يخترق صدري بلعت ريگي وهزيت راسي
ارشد : لا البسي تانطلع و نسولف
ما حجيت بس افتح بـ باب الكنتور و ايدي ترجف هو يطمني بأبتسامة
يَاسمين: ارشد شبيك عليك الله شبيها امك شنو مريضة ؟

هَز راسة بـ لا عدل شعرة و فتح الباب كال لـحگيني
نزل و قفلت الغرفة و نزلت ورا جنت من اطلع ويا يخوزرون هسة حتى محد يباوع
طلعت صعدت ويا و اني منتظرة يحچي احك بأيدي من التوتر
أرشد : ترى ماكو شيء شبيج ؟
- يالله احجي ارشد عاد

ارشد : دحكي قبل لا تتزوج سميحة امي شرطت علية شرط لو سميحة تتزوج لو انتِ اتزوجج اني ادري امي ما تحبني و اهم شيء ترضي اخواتها بس لان مريضة اماشيها ابقى امي و رضاتها واجب مو صحيح
- اي صحيح هو حتى هي من كد متكره هيثم مات
ارشد : دحكتي الام نَفسها و عدم رضاها شيسوي ؟
هساع لو مخلية سميحة تروح بفالها و ترتاح ؟ خلت بنتها تموت بالحياة

يَاسمين: اي وليش يعني هسة تحجي وياي هيج ؟ سميحة تزوجت و اني تزوجت !
ارشد : المهم سمعي خو ما اختار روحي ؟ و اترك اختي تتعذب ! امي و الوكت يعاقبني بيجن لان انتن اعز ما املك من بعد سَهلة شرطت عليه شرط وافقت عليه
حتى اخذج و زوجت سميحة عبالي تتهنى و بعدها اخذتج
سميحة رجعت و انتِ خايف اخسرج بوكتها يموت ارشد والله







يَاسمين : شنو الشرط ارشد ليش تحجي وياي بالالغاز ؟
ارشد : انتِ تتوقعين بيوم احب غيرج اني ؟
عقدت حواجبي و لزمت بطني لان الطفل رجع يتحرك صرخت بوجهة
يَاسمين : ارشد شبيك ؟ تحب لو تتزوج غيري و ابقى وياك من أوهمداني
اذا انحسب على النسوان ، تعال اوكف شو انتَ تحجي صدك !!!

ارشد : و دكولين عَش متناقشني ؟ اتركي الموضوع يالله
مسحت وجهي احاول اهدأ نَفسي باوعتلة و ابتسمت بخوف
- لا احجي والله جبيرة عادي اسمع ، انتَ طبعاً متحب غيري كلشي اصدك الا هاي
هذا حبك الي كلة و دلالك و تحب غيري لا ما اصدك
ترى ادري مشتاق لكلامي الحلو كول تغزلي بية مو الا تسوي هيج
سكت ثواني و اني نظري على شفتة منتظرة ينطق و يخلصني بدون ميباوعلي حجة
ارشد : أمــي شارطة عليه اتزوج غيرچ

ما جانت خمس كلمات جانن خمس سچاچين نبتن بگلبي
يا آدب ، يا اخلاق ، يا تفاهم ، يا ثقافة مـن يوصل الموضوع للمشاركة
لا و بأغلى الاشياء و اثمنها عندك !!!
و ينعتوني بالجنون !! اي اني مجنونة بالتملك
هو الي عدم شخصيتي و سواها متملكة لهذا الحَد فسد شخصيتي لدرجة محد
يتحملني بهالدنيا غيرة ولو تركتة مستحيل أتأقلم وي غيرة

صفنت ثواني و ضربتة بقوة بصدرة
يَاسمين : وشنو مطلعني تقنعني مو ؟؟؟ والله اذبحك ارشد والله انت وياها و امك
يا حقراء لك والله هيج اذبحك و اشرب دمك و ميرفلي جفن لا عبالك
النوب عليه زواج النوب وحق العباس ابو فاضل احرك البيت و احرك روحي
و تدري يالطركاعة تسويها

اكول امك تاركتني طلعت تريد تزوجك ، ياااااا عود صدك يحجون
و انت شو عايش اللحظة اسويكم فرجة للغربية كلها والله مو تغار من ابوك و اخوتك
عود ، لالا اوكف شنو تغار يعني انتَ تكدر تتزوج غيري ؟
مسح وجهة ويزفر نَفس قوي
ارشد : اهدي شبيج يولي هو اني اكدر بدونج انتِ روحي والله

بجيت و مسحت دموعي
يَاسمين: شلون تنطقها ارشد انتَ امك هي متحبني طبعاً تريدك تتزوج غيري
ياااا و اكول ليش يباوعلي و يضحكن عبالهن راح تتزوج ؟؟ تخططون من وراي !
ضربتة بقوة بزندة صَف السيارة و طفاها
اندار علية و لزم زندي بأبتسامة
- اهدي يولي شبيج مو زين عليج







يَاسمين: لا ما اهدأ و انعلبوكم لابو شنو يردون يزوجوك
عض شفتة بمعنى عيب ، استغربت ما ضربني حتى
ارشد : يالله كافي سدي الموضوع ولدي بالسلامة تانطلع من كُل الغربية

امسح بدموعي و ما ترضى توگف گلبي لسة محروك
يَاسمين: يُمة يردن يزوجنك ؟ و انتَ وين تكدر تنيم على صدرك وحدة غيري ؟
يا ابو شاهين ترى اني الطرگاعة دكيت على صدرة و حچيت
هذا هَم مثل التابوت الي يخلي صدرة عليه يطلع منة للگبر

غَمض عيونة و ضحك بتعب
ارشد : والله احلى تابوت و اني اول بشر راضي اخلص عمري نايم بتابوتچ
ضربتة بقوة
يَاسمين: ديالله اششش مو كيفت اعرفك تموت على ذني

ارشد : ههههههه ، قرج احبچ و خدر المسكتة زِلم

يَاسمين: اسكت شو بديت اتخيل ؟ يمة تجي من الدوام و توكفلك وحدة غيري بالباب لا والله السچينة بيمن مقصرة لو تصير مثل علي يوم لهاي و يوم لهاي ؟
وحق المسكتة الزلم التحلف بيها يا ارشد انهيكم
هو اني من ابنك اغار

سحب راسي و طُبع بوسة براسي
ارشد : والله غير شفتچ ما تطبع بوسات على صَدري
- و غصباً عليك و على امك

ارشد : هههههه زين عادي يولي شكو بيها تساعدج مثل اختج
هو حجاها بالشقة بس عقلي استوعبها صِدگ
ضربت رجلي بقوة بالسيارة و بجيت بصوت عالي
يَاسمين: لكككككك بابا لا تحرك دمي لا تحركة شنو تتزوج وحدة تشاركني بيك
شنو تبوس غيري و تشبكها يمة و تحاجيها مثلي و اني اضل اباوع
ارشددددد شبيك ترى اني مريضة لاتتعببني
الله ينتقم منك و انعل ابوكم لابو

ارشد : لا تسبين ادبسز شبيج اتشاقة طاح حظج
يَاسمين: هو اني شعندي من الدنيا غيرك و لاحگيني عليك
اترك امك ارشد تريد تخربنة هي تضوج لان انت تحبني هواي ، يمة ياخذنك مني غير اموت هو اني انام اذا ما اشم عطرك ؟
انام اذا ما ابوس مخدتك ؟
انتَ شايف من دكلي جاي ؟ والله لو امي دكلي جاية ما افرح هلكد







ضمني بقوة لصدرة و يمسح دموعي
ارشد : كافي يولي .. لزم شاربة و أردف
وداعتچ يا قرچ غير إسمج بجنسيتي ما ينحط
اني افرط بيج ؟ شبية تسودنت ؟ انتِ متجي وحدة مثلچ انتِ طرگاعة

يَاسمين: النوب عليه الزواج بطرانات هن مايدرن هو يمي حتى سَهلة ينساها
ارشد : قرچ ادري شنو لازمتها عليه لزمة

يَاسمين: والله عبالهن مثلهن اني ارضى بين يوم و يوم
ارشد : طبعاً انتِ العشر ايام كلها و ما تشبعين مو النوب يصيرن خمسة
عضيتة بأيدة بقوة
- النوب حاسب حاسب

ضحك و گال لا عمي ما نفرط بالـعُمر
- منو ؟
- انتِ غير
- لعد ليش هيج شكلك مو مريح
ضحك بقوة شغل السيـارة
ارشد : وشرفي كل عمري ما دحكت قرچ مثلچ تلكفها و هي طايرة

اشترالي و ضل الطريق كلة يتغزل بية اضحك بس لسة كلبي لاچمني
رجعت للبيت و اباوعلهن بخَزرة مِشت الايام و هو راح للدوام نزلت الدرج
و هم تحركت بطني كعدت على الدرج اخاف احس اذا امشي يطلع من بطني
ضرباتة قوية الكاعدين بالصالة استغربوني
ابو ارشد: شبيها مرت ارشد دحكنها شبيج بابا وينجن هي شسمها
يَاسمين: لا ماكو شيء عمو بس الطفل جاي يتحرك

جانت جملة خلت حتى الجهال تضحك
سَهلة : يُمة بعد امة السبع من هساع صاگرها
- منو يصرگني بطرانة سهولة هو ابو ما صگرني
سكتو و بَعد محد حچة

اخذت ملابسة و ملابسي اغسلهن و خليت مرت علي تعلمني الكَوي حتى ميكول الطركاعة مو نادرة اريد اشوف حجتة شنو كل ما اتذكر فكرة امة اخزرها و هي ترجع تخزرني تالي من اجة كالتلة و ما فوتتها

لابسة الاسود و لفيت الربطة مِثل التركيات الريفيات
راح ادخل الشهر السادس بس بطني مو كلش جبير بطن سميحة اكبر
رشيت عُطر و رَمش تليفوني بـ معنى اجة







نزلت و الضحكة تارسة وجهي صاحت وراي صابرين
صابرين : اليدري يدري و المايدري مرگة عَدت
يَاسمين: شهيتيني ما تسوولنة مركة عدت

فتح الباب ابن سحر دخل بسيارتة و اول ما باوع لباب المطبخ يشوفني واكفة لو لا
و لمن شافني ابتسم صَف السيارة و اتقدمتلة فتح الباب و هو كاعد بمكانة بَعدة
مَد ايدة حاوطني و طُبع بوسة بكتفي وهو يسوي المدالية مال السويچ
ارشد : شلونها الحَبيبة
- زينة اذا انتَ زين
- مسودن ؟ ادحك هالملگة و ماصير زين ؟

ابتسمت و دخلت ويا لازمة ايدة دخلنة للمطبخ كال السلام عليكم
بعدها دخل للصالة بس ما بعد ايدي و لا بعدني سلم على امه و طلعت سَهلة شبگتة
سَهلة : چلبي بي بعد چلبي
يَاسمين: طبعًا اچلب رجلي و عمري هذا لو تردن تزوجنة يالله ترتاحن
حجيتها و باوعت لامة

هديت ايدة وهو راح لغرفة سَهلة دخل لسميحة الي كاعدة على السجادة تصلي و القران كبالها مفتوح على صورة هيثم من شافت ارشد هزت راسها بَتعب
بوكت جانت تركضلة بجادرها و تحضنة
ارشد : ها يا روحي ؟ شلون صرتي
كامت تبجي كعد بالكاع حضنها و يمسح راسها حتى تهدأ

ارشد : و داعت الي تصليلو هَيثم مـات حُباً بيج من رب العالمين
قبل لا يرجع لبؤرة الملحدين و الكفرة و تضيعين الاول و التالي
خلي نترك اني وياج العاطفة و حبج الو استوعبي ربج اخذو بس حتى ميرجع للمعاصي
تركلج ابنو تامتتخبلين ورا صعب هالامتحان صحيح
بس هو يعرف انتِ من الشطار العندو وراح تنجحين

ولدي بالسلامة تانطلع منا و تبدين حياة جديدة هَيثم ما يموت يالله اعتبري مسافر
اول و تالي انتو تلتقون و رب العالمين شاهد على حبكم مو احسن من ما تجين هينا
خسرانة و هيثم راجع للعربدة و خاسر الدنيا و الاخرة ؟
هساع هو رابحهن اثنينهن منو يحصل هالنعمة ؟

ردت الطف الجو كتلهم
يَاسمين : اني ادري ليش تبجي تغار لان هو طب للجنة و هي لا

ارشد و سَهلة غصو من الضحك حتى سميحة ابتسمت بتعب
صعدت و هوَ بقه شوية بالصالة باوع الغرفة مرتبة و ملابسة محضرتهم على الچرباية
ابتسم
ارشد : له له شنو هالندارة
- حتى متضل كلساع دكول .. فتحت الكنتور
شوف شوف حتى ملابسك كويتهن
ارشد : اه ؟
تقرب يگلب بالقمصان و البدلة
- والله خوش كوي حي الله ام شاهين







نزل يسبح و صعد ميحجي شيء عرفت سامع فد كلمة راسلت سمر كلتلها تعاي
مشتاقيلج هو تمدد و يلعب بالتليفون رفعت الـغطة و درت وجهي عَنة
صح مشتاقتلة بَس ماحبة من هو ضايج
شوية و مَـد ايدة على بطني و طُبع بوسة بكتفي
ارشد : الـى متى ؟ تضوجنا و احنة نراضيك ؟

يَاسمين : انت تدور زعلات ساعة تضحك ساعة ضايج
ارشد : مو منبه اتركي امي ؟ يَاسمين النوب تخزرين بيها ؟
اتركيها رَحمة لمريم

يَاسمين : يعني هي لا تحبني و لا تحبك كاعدين يمها ليش ؟
ارشد : لان اكو جثير امور اكبر منچ ما لازم تعرفيها اريد انهيها بأرضها حتى ما تلوحچ ياسمين امي ماكدرلها لو حطتچ براسها ، تتذكرين شسوت ؟
مو هينا خلتني ازفج بيدي و ما رفلها جفن امي الماتگدرلو بيدها تستخدم السحر
و اني خايف عليج و على الي ببطنچ يولي بعدو ما جاي و تدعي عليه
كليلي شسوي اكتلها قابل ؟ امي يا ناس كسرت ظهري والله كسرتو

يَاسمين: يالله خلي نطلع اني اشتغل عادي معليك بالتنظيف
ارشد : يولي كل عقلچ ؟ اني تصعب عليه عاملة اجيبها انظف و تروح
بس الموضوع يا طرگاعة اكبر من كل التفكرين بي
خليني اصفي الوضع على ايدي ونطلع

يَاسمين : بس مو تغدرني و تتزوج
ارشد : تزينين شاربي بيدچ والله اني اتزوج على الطرگاعة ؟
يولي والله لو هينا يسطروهن ما يرف الگلب غير عليچ

يَاسمين: آه يالحَبيب آه يولوموني بحُبك ، مايدرون انتَ شنو
ارشد : انجبي انتِ تدرين كل هذا حبج و ثقة بية متثقين يا قرچ

يَاسمين: لا اني اثق بس اغار يعني ما اتحمل
ارشد : خليچ طرگاعة ماخذة لقبها بجدارة لو يگلولچ مرت زفت رجلج من هينا
كليلهم مالكم دخل انا اعرفو شنو
- اي حتى اركع راسك بالستيرن انت وياها
- ههههههه قرچ شيجرعچ







مَد أيدة يحرك اصبعة السَبابة على كُل انحاء وجهي غَمضت عيوني بخُفة
طُبع بوسات خفيفة ورجـع كسر الحاجز الي انبِنه بينة من يوم موت هيثم
بس كنت بوقتها اعبرله عن غيرتي و تملكي اله وهو يضحك بقوة
على جرئتي بالكلام
ارشد : شيخة الـبرابيك و شَرفي يولي انتِ صايرة فد مرة
- رباتك سَيدي

ارشد : والله لو تدرين سيدچ شمفين تاتفرغين الشاجور براسو
يَاسمين: شمفين عيني ؟ شو صاير تخوف
ارشد : لتشتد عُقبات الطرق نحن هَدفنا النهاية
- اخ اخ عداك ابو الفصحة

حجيتها و گمت اخذ ملابس هو كال صدك صارلي جثير ما مخابرو
خابرة و فتح سبيكر تسالمو ومنصور كالة
- اكووولً ابو شاهين نريد نسرك
ارشد : خَندق مو بير يولي احجي

ضليت واكفة فضولي ما خلاني انزل منتچية على الميز و اسمع و انصدمت من گلة
منصور : احم والله يا ابن عمي الگلب هاوي تَـك مرتك
ارشد : هههههههههههههه ، ادري سَهلة كالتلي

ضليت واكفة بمكاني فاتحة عيوني بصدمة وهو يأشرلي على حلگة اش خاف احجي شيء سَد السبيكر و قربة على اذنة تقربت عليه اسمع خزرني ما وخرت تالي رجع فتح سبيكر
ارشد : ما سمعتك شگلت عيد النت ضعيف
منصور : صار چثير هاويها من ايام دوامها يمي
هساع تركت الدنيا كلها عشكتلي وحدة بطول زري سالفتي مثل سالفتك

رفعت راسي ليفوگ عود احنة شخصيات قوية
مَد ايدة يأشرلي على المكان الجنت نايمة بي ضربتة بوكس و طلعت وهو ضحك بقوة

نزلت لكيتهن بالمطبخ صوتهن يلعلع يسولفن طلعت اني اعدل الخاولي طَبيت للمطبخ
شروق : ينراد هلهولة انفكت الجبسة
يَاسمين: شنو يعني ست شوشة ما افهم كل كلماتكم اوكفي خل اصعد اسأل ارشد
اسماء : لا يولي عيب لا تفضحنة
صابرين : هِي ما غلطت ترى يعني كالتلها و اخيرا صالحج
تحجي و تضحك

يَاسمين: هاااااا يعني قصدج لان سبحت ؟ غير شخصيات قوية احنة اذا مراقبات حتى هاي السالفة ، فديتنا والله
شروق : هساع عليمن اراقب شو هو حمام واحد و كلشي مبين
يَاسمين: يا اختيييي بكيفنا بمزاجنه باليعجبنا لو انتِ هم تحبي ؟
احجي حتى اضيفج بالقائمة السوداء







شروق : هههههه ندحك هالنفخة هاي تاليها وين
يَاسمين : ليفوگ وداعتچ اني تحت ذراع فَحل الغربية معروفة تاليتي وين
ضحكن كلهن بكتم الا اسماء هزت راسها ما قابلة عليهن
تركتهن و طلعت متنرفزة العصر هو طلع اندك الباب فتحتة طلعت سَمر
سمر : لكككككك هلا تعاي يولي مادريتي

- شكو
- عمي منصور عاشك دُرة ابشرج راسمين صورتها و مخليها بكنتورو
امس اني و نِيران سوينة حملة تفتيش و لگفناها
يَاسمين : صدك ؟ لج اي اليوم ارشد خابرة و كلة بس مادري بي هيج طايح
سمر : راح الشيخ

اخذت التليفون و اتصلنة بدُرة كاميرة و كعدنا نسولفلها انصدمت
دُرة : صدگ ، اسكتن لا تسمع امي هسة تطگني بهلهولة
يَاسمين: يالله وافقي حتى تجين يمنة
- لا والله شبيچن ما اعتقد اوافق و هو مو ابو ما صارلة هواي
سمر : جدة ذاك الاسبوع تخربطت و امنتو يتزوج خايفة تموت و ما تدحكو عريس
يَاسمين : و هيثم ؟
سمر : يمكن عرس بالسكتة

دُرة : شو بكيفچن تخططن بابا روحن ترى اني شاكة بي
بس يعني معاملتة الي خلتني استبعد الموضوع
كعدنا نسولف شوية تغيرت نفسيتنا
يَاسمين: سمر لج هذني راح يخبلني كل ما يشوفني يضحكن بشماتة مدري
حتى صرت احتقر نفسي و بالكوة لازمتها عنهن
سمر : و داعت شوارب الضباط الما احلف بيها چذب من الدودة

يَاسمين: بيبيتچ لج تريد تزوج ارشد شكد حية
سمر : خالي ارشد يتزوج بُعدها والله هي غير رونق تراسلني مرات تخابر امي دكلها اريد اروح لام باسم بس هذا ارشد محرم علينة الطلعة و عصام متسودن عليه
و امي دكلهة اكعدي يمة تركي هالدجالة تضحك عليج
ابوي اذا سمع







يَاسمين : هي غير ام باسم الجزء الثاني ما شايفة هيج ام بحياتي
لج شالعة گلب ارشد شلع
سمر : لج بابًا خالي يخاف من دروب سحرهن لان بس هو يگدرلهن ذوله
خوالي البقية خيخات هو ينلام من محرم عليهن الطلعة
جانن ميگدرلة هسة جدتي لازمتة بيج انتي ليش ثولة
- هسة اكلة خلي نطلع شنو مجبورين

سمر : بابا انتِ بطرانة دحكي راح اكلج كالتلي نِيران لان تتصنت عليهم
عمج ترى متحلف بأرشد و المكار و هساع داري من بيت خالج ارشد متزوجج
و صايرة بينهم وعود و ثارات
و جثير امور بخصوص شغل خالي لان يريد يترك التسليم علمود ابنج و ابن سميحة
و ولد عمي سامعين و يومية صايرة عركة اول امس ابوي و خالي ارشد
كتلو اخوة صابرين بمضيفنا

يَاسمين: يُمة ؟ لعد و منصور شو ميتدخل
سمر : ياااا عمي منصور و لا يمهم مايدخل بالتسليم و لا يحبو هذا جوو غير شكل
من الاساس هو خلص عمرو سفر بعد ما ماتت خطيبتو لهساع غرفة عرسها فوگ تدرين مقفولة انصدمنا من درينة يحب بالجديد
بس لا دكوليلها يجوز هو يتزوجون صدك خطية تنقهر اكيد

يَاسمين: شلون ماتت يمة صدك شنو هالصدمات
سمر : و الله شبيج جان يحبها امي تسولفلنة هي جانت توها عروس و حامل بقيصر الله يرحمو اخوي اول واحد عمي منصور جاي كايللهم احب وحدة ايام الكلية و واعدها بالزواج ما قبل جدي و كالب الدنيا تالي عمي متمرض واصل الموت
حتى مرارتو شالوها انجبر جدي يوافق و راحو خطبوها من بغداد هم
اسم الله زلمنة شامرين سرهم بـ بغداد

و تمت الخطوبة و بوكتها صارت مصيبة خالي ارشد و هو صار يخاف عليها من الهوى و من ولد عمه بالاخص يومية عركة يتعاركون بالاتصال و يروحلها
دكول امي و عود امة اذا طال الزعل و تدحكو شكد مقهور تخابرها تعزمها هي و اهلها
حتى تصالحهم هي تحبو و تجي وينهار بالزايد يضل كلساع يا رايح معدل حجابها
يــا يضم بأيدها حتى اهلها تنرفزو لان هي تحجبت لخاطرو

النوب شرط عليها عَباية و هم لبست بس دكول امي دمرها بعصبيتو
و كلامو القاسي بوكت العصبية و بدو يجهزون عرسهم ورا ثمن اشهر من الخطوبة
و بأيام العرس تمرضت اجلو العرس و هو عاف الدنيا و گابلها
دكول امي بيوم كاعدين و سمعنه صريخ جدتي دكول راح ابني
هجسنا منصور المات بس طلعت خطيبتو و جدتي تعلم لو راحت خطيبتو
هو هم ينتهي







و من يومها هو ترك الدنيا جانت خطيبتو معلمة روضة
و جان حلمها دكتورة بس الظروف ما سمحتلها
ماتت بمرض التكسر بالدم و امها منهارة دگلو كله منك بنتي دمرتها بغيرتك
جانت مثل الوردة المفتحة بس حزنو عليها خلاها تسكت و هو انتهى انتهى
على فراگها و ضل سنة كاملة مشتري بيت بالنجف تا كُل لليلة يروح ينام يمها
يكلهم ادري بيها تخاف من الظـلام

بعدها صحى على نفسو وصار يجي للغربية يلتزم بشغل ابو و يرجع لبغداد
لما بعد اربع سنين انصدمنا من وصلت الاخبار ابن ابو منصور عندو مستشفى
ببغداد مرت السنين يالله شوية بدة يتماشى وي الوضع
بس بقت روحو بـ بغداد

يَاسمين : يُمة خطية قهرني الله يرحم خطيبتة دُرة اذا سمعت متوافق اكيد
نزلنا جوه نقنع بسميحة تسويلنة كَبسة بس نريدها تخلص من الوحدة هزت راسها
بـ لا ما قبلت تالي احنة كعدنا نسوي صوص ككو
يَاسمين: نشاء و ككو و حليب
- ماكو حليب خل نحط مي

حطت الجدر و اني ابحث باليوتيوب المقادير
سمر: طفي يولي هساع اسوي ع طريقتي الخاصة مال عمك ما يهمك
اني أدحك رونق حتى زيت تخليلو
يَاسمين: ايع زيت و ككو شبيج
- باع هاي عود تفتهم يولي شمعرفج بمهارات سمورة الامورة

حطت زيت و الجدر شعوط من الدخان احتارت
سمر : هساع احط الككو لو المي شو دخت دخلي احطهن اثنيهن احسن
اني كاعدة على الميز الجدر احترك و هي تفرغ الككو بالطاسة و كلاص المي بيدها

بعدها اول ما دارت اشتعل الجدر نار صرخنة اثنينه و هي شمرت البيدها و وكعدت بالكاع انفتح الباب وطبو ارشد و محمد يركضون اني مدري شطلعني من المطبخ
صدك الروح عزيزة
لزم وجهي و بطني
ارشد : ها يولي خو ما بيج شيءٍ يَاسمين
هزيت راسي بـ لا

و محمد يگوم بسمر تبجي و تمسح بدموعها بأيدها الي كلها ككو طوز
و ايدها مچوية لزم ايدها ارشد يگلب بيها
- بس هاي ؟؟؟حرامات والله لج بابا انتِ شالعة شالعة
كلهن نزلن يباوعن لحال المطبخ و سمر
سمر : شبيك خالي غير ابنك يتشهى و كلت ما اخليها بنفسة

ارشد : انعل ابوج لابو ابني لو محترگات مستهتراااااات
سمر: مادري والله كلت احط الككو لو المي تالي حطيتهن اثنينهن
تقرب للجدر يكلب بي كاللها هاي زيت حامي يولي
- اي هو على الزيت اقصد
ارشد : مي على الزيت ؟ سحب اذانها و هَز راسها
عًـش متبطلين هالخفة هاي ؟







فتح باب الكاونتر طلع علبه يدور بالعصارات فتح وحده و خلالها
و ام ارشد طاحتلها دك دكول امينة ما صارت عدها هيج بنية شالعة
كل بناتها ما ينسمع الها حٍس
بس هي ويامن مِشت وي الما يستحن
ارشد : ما عندي بنوات ما تستحي كلهن رباتـي
سكتت

مسح راسي و ابتسم
- ديري بالج على نفسج يولي
حجاها و طلع و صابرين و فرح تخوصرن
صابرين: و ان شاء الله منو ينظف هاي الخيتة يالله اثنينجن لا اصيح خالتي
يَاسمين: اني معليه والله
راحت للصالة دكول لام ارشد و ام ارشد كامت تصيح والله اذا ماينظفن هساع اكوم

افين حظهن صاحت سمر بصوت من المطبخ
سمر : اي اي يالله راح ننظفها الخيتة بت اتكتن

ضحكت و دخل ارشد متجه على سمر من وره صوتها عصبي هي وكفت خايفة
سمر : والله خالي بدون قصد
طبت امة لازمة العكازة بيدها و صابرين تبجي و هو استغرب
رادت تضرب سمر ما خلاها
- عيب من ابوها اتركيها اني أدبها
صابرين : يقلدن عليه هي و مرتك لان كتلهن خالتي دكول نظفن المطبخ

باوعلي بخَزرة و اني الضحكة لسة ما هادتني حطيت ايدي على حلكي و هزيت راسي اريد احجي ما اكدر سنكرت من الضحك و هو هم حصرتة الضحكة و لام شفتة لداخل حلكة حتى يلزم نفسة و يأشرلي بعيونة كافي
لزمت الباب صرت اسحب النفس بصعوبة من ورة شهكة الضحك

تالي سحب ايدي للكراج و ترك سمر تتعارك وي بيبيتها
مسح وجهة و هو منتهي من الضحك وصلنة يم الباب
ارشد : اشتلعو بنت الاوادم الله يفشلچ
يَاسمين: ههههههه والله ما اكدر اعذرني
ارشد : اني مو كايلج لا تقلدين عليها هساع يطلع ابنج مثلها و الله يعابيچ
يَاسمين : ترى والله مو اني هاي سمر من كالت اتكتن اني ما تحملت
كفخ راسي و كال صعدي يطركاعة لا تنزلين
فتح الباب و طلع وهم مبتسم و يهز راسة بقلة حيلة

طَبيت لكيت سمر تنظف ساعدتها و احنة نضحك صعدنة
يَاسمين: كبر لو ضالين فوك احسن النة نزلنة لا اكلنة بس ترزلنة و انكربنا و صعدنا
سمر : دسكتي اني انجويت فوكاها والله اني ضد التنمر بس اكو كائنات
تكلك يابة تعال تنمر بية

شوية و نزلت لمحمد خالها رجعها دخل بالليل هو حتى على العشا ما اجة
جنت كاعدة ارتب بالملابس الدتجيبهم الخياطة من ورا سَهلة
عبالك راح يجي امبراطور الدولة العباسية

وشنو تخيطلة تخيط لابن سميحة بس سميحة مكاعد تقبل تاخذهم تاركتهم بمكانهم
تالي سَهلة شالتهن ضمتهن ، سَد الباب وبده ينزع بالقميص باوع للملابس ابتسم بتَعب
ارشد : ايمتى يجي اليوم الادحكچ شايلتو
يَاسمين : انتَ مو كلت نشمرة على سَهلة ؟







ارشد : يولي ترى بعدچ ما هاجسة الامومة شنو بس تدحكي يصير اعز من روحچ
يَاسمين : يا اعز من روحي هو انتَ الاحبك هم مو اعز من روحي
ضحك وهو يورث جكارة
- لج بابا انتِ قـرچ والله

يَاسمين : ومن اجيب ارجع للمعهد خاف عبالك تريد تسويني مرة نادرة
لا نادرة و لا بطيخ بس هيج مجبورة
ارشد : شسوين بالمعهد يولي غير لخاطر الراتب ؟ و اني انطيج ضعفو كل شهر
و ابقي ادحك وجهج بس اني
يَاسمين: لا تغريني هسة اوافق

رتبت الملابس و سديت الجرارة
يَاسمين: وجه الصخل من هسة نرتب بهدومة هو اني هدومي ممرتبتهن
ارشد : امهات تالي وكت

ما جاوبتة سحبت ملابس خفيفة لان من يوم الي بدت بطني تكبر اختنگ بالليل
رفعت الغطى و خليت راسي على زَندة
- شبينة عيني ؟ ع الاقل ما نريد نزوج ولدنا لان مرتاحين
طُبع بوسة بشعري و مَد ايدة قربني اله
ارشد : اخ من هالسان أخ

بسته برگبتة ورجعت اباوع ويا
يَاسمين: شبي يا الحَبيب شبي
ارشد : ناوية تصعدين السكر اليوم ؟
ياسمين: هو صاعد من الاساس شلون جارع جمالك ؟
ضحك بقوة و سَد التليفون
- امووووت ع القرچ التتحارش

يَاسمين: لا افتح التليفون خل اباوع وياك
رجع فتحة وبدة يگلب بالمنشورات طلع فيديو ابو فزعة هو ويا
و ابو فزعة يصيح عمي ابو شاهين العلم قائد فريق ..
- روح گل للراهنونة الفوز بس النة ترى
والله من طبكم فَحلها شيخكم سوا مَرة

و ارشد يضحك بعدها تقرب يمة على الكاميرة گال
- كُن قائداً فالتـاريخ لا يُخلـد الجنود

كان الفيديو ستوري مديت ايدي دخلت على صفحتة
ما جان ناشر من يوم زواجنا رحت لاول منشور لسة موجودة نفسة الي كاتب عليه
الشجرة الخانت الفلاح سوتها البـلابُل بيت دعارة
ياسمين : من اول ما حبيتك دخلت ع حسابك شفت هالبيت و لسة ما نسيتة ، شتقصد ؟
ارشد : هه ، اقصد عمي ابو منصور چان يدري بعملة باسم و ساكت
تالي كسرت عينو بنتو و ضوگتو هـزةّ شارب الزلم شكبرها
مديت ايدي على شواربة و بِستهـن
يَاسمين : مــاعـاش اليهزهن يا ابو شاهين







ضمني قوي لصدرة كان يشمني بقوة كأني رِبحة الوحيد بهالدنيا
كانت علاقتنة علاقة مُختلفة عن نمطهم اني اتغير لخاطرة و هو يتحمل لخاطري
ما اشوف ضحكتة بس يمي وهو ميشوف كلامي الحلو بس يمة
بس مادري و اني بهاللحضات الي احس بيها فوگ الكُل
اكو شيء صاير بدون علمي يا بطولة الحاقدين بالتمثيل
لو كان الامر يضُرنا
.....

دُرة
راجعة من الدوام و امي بحلگها حجي صبتلي عشى بدون ما اكللها
ضحكت و بديت اكل و اني بملابس الدوام كعدت يمي اول بداية تحجي على البنية
و محد يفيدها غير رجلها و من هالسوالف
- غردي يمة
ام دُرة : بيت ام سلمان اجتي سئلتني عليج تريدج لابنها صحيح اني ردت الشيخ
بس يالله يجوز ما مقسوم هذا هم خوش ولد
دُرة : لا حُبي لا الشيخ و لا ابن ام سلمان اذا جان سلمان او غيرة

ام دُرة : من عابت لهالخلقة صوچي اني اصبلج
بيج بلة ضالة ترفضين بهالزلم
- بَعدة الي على المزاج ما اجة من يجي اجيبلچيا
ام دُرة : ضلي ضلي لـما يفوتچ القطار تجيني تبجين يمة اريد رجل
دُرة : اني السـچة يُمة القطار ما يفوتني

ام دُرة: اي يدوس عليج
دُرة : ذكورية شسويلج هيج هيج تستنشقن زِلم عبالك قحط
ام دُرة: اللهي و جاهي اريدها كون برجال من ذولي الما ينهضمون
ولو زعل تحتار شلون ترضي
- ايييييع اني ؟ والله لو يموت عابت حتى عابت

ثاني يوم جنـه مسوين حفلة لزميلتنة بالمستشفى سوت عملية شالت رحمها و هي صغيرة بالعُمر فـ اتفقو البنات نسويلها شيء يفرحها فـ اني الي اتبرعت بالكيكة
بعثت لاستاذ منصور رسالة
- لتجوني استاذ اليوم اجي وحدي
بعثلي بنفس الدقايق
- لـماذا ؟
ضحكت و كتبتلة
- أود شراء كيكة لحفل احـد زميلات العمل
- ههههههه لا اشكال نَجُلبها معاً

ابتسمت و عدلت شكلي بمكياج خفيف رغم ادري يحبني
و بعد كل كلام البنات من خابروني حاولت حاولت اتأثر بس ماكدرت
ابد مو جوي سوالف الحُب و احب معاملتة الي ما اريدها تتغير
خاف النوب يعاملني كـ حَبيبة و اكوم اكرهة

دك هورن سيارتة و طلعت امي قبلي تهف اجاها الشيخ جانت تسمي استاذ منصور
هسة ما يعجبهة غير الشيخ طلعت و هم مبتسمين صعدت ويا و عود ادلي على محل الكيك ما سمع غير اتجاه السيارة باوعتلة بأستغراب
منصور : شبيج ؟
- غير ذلك المحل عبرنا ترى
- ويعني انتِ تدليني ؟
- لا ، بَس .. حجيتها و سكتت







اخذنا لمكان حلو بـ بغداد اباوع و مبتسمة وگفنة گبال محل حلو
ابتسمت و نزلت ويا دخلت للمحل جمـال اباوع الاشكال تجنن دافنة روحي بالحياة
الله يطيح حظي اختاريت كيكة من المعروضات
بدو يغلفوها مَد ايدة فوگاي انطا الحساب ضليت مصدومة بالسعر
و ليش هو دفع قبل لا نصعد باوعتلة
- استاذ بس ليش تدفع
- مقطوع من الراتب ولا يهمج
سكتت يا راح من راتبي هلكد صدك حياة الاغنياء سَهلة

وصلنة و رتبنة الاحتفال و اجتي البنية كدرنة نخليها تبتسم شوية
تعجبو البنات بالكيكة كلت بگلبي اكلو عيني راح الراتب اخذت قطعة و رحت لغرفتة
كلت خاف شاف شكلها و تضل بنفسة عيب قدمتلة الماعون
اخذة من ايدي و خلا على الميز
كعدت بمكاني و بديت بالشغل المعتاد

هسة يالله صار يرن بأذني كلام سمر و ياسمين معقولة يحبني لدرجة راسمني
شو ممبين خلص الدوام و طلعت ويا صعدنة بالسيارة انضار البعض اليه
مو مريحة لكن يبقى داخلي يكول ما دام تعرفين بنضافتچ لتهمچ وساخة تفكيرهم
كُل الطريق خلص هدوء الا باللحظة الي دخلنة الفرع
وعدلت كعدتي و الجنطة حتى انزل

فتحت الباب و هوَ تكلم
منصور : دُرة
- نعم استاذ
منصور : نتشرف بقدومنا لزيارتكم تُفتح لنا الابواب ؟

دُرة : أهلاً و سهلاً استاذ
- غــداً
ابتسمت و هزيت راسي
نزلت و اني متأكدة من الموضوع الجايين بي طبيت لامي خجلانة
اول مرة بحياتي اخجل لهالحد خابرت يَاسمين فَرحانة و تهلهل
ضليت محتارة على موافقتي و ما اريد اكول لامي لان هسة
تروح تفتر على الجوارين تهلهل

ضليت الليل كلة افكر اوافق لو لا عكس خطوبتي من حبيب وافقت بدون تفكير لان
جنت اعرفة بس صدمني فعلة الاخير تعب عقلي من التفكير نمت
كعدت الصُبح متوترة حيل و حايرة انجبرت اكول لامي
و مثل ما توقعت اول ما حجيت هلهلت
دُرة : يُمة بس ترى مو اكيد اوافق
ام دُرة: طبج مرض بالحالتين ازوجج اله وين تلكين مثله بعد
ذني يسموهن صيدات العُمر افتهمي عاد يالفهيمة

سكتت و اني افكر لو وافقت
فعـلاً هو رزانتة و اسلوبة و ثقافتة الشخص المثالي لشخصيتي
هو اجة على گد مخططاتي اني فعلاً اريد زواج تقليدي
و فعلاً اريد شخص جدي بالكلام و الفعل
" التفاهم اولى من الحُب "







و الاهم اهلة والدته فقيرة و نِيران صرت اعرفها حق المعرفة
و يبقى العُمر و البَحث خلاني اتفوق على كثير امور اني جنت متوقعتها صعبة
راسلتني يَاسمين كالت راح نجيكم فرحت حيل و حضرت فستان بسيط
حتى ميكولون متحضرة للخطوبة

العصر صارت هوسة بشارعنا ركضت للغرفة الفوك اباوع
و من لمحت زوج ياسمين نزلت اركض ووجهي اصفر تلگتني امي
كتلها ذولة كومة ترسو الشارع
- اي طلع عمج هسة نشوف عمامج يجوز هم يجون
دخلو الزلم و يمنة دخلت ياسمين و ام قيصر و بناتها

سمر : ها ها يالمدبرة ما تطني الخلطة بلكي اصيدلي ضابط
ضربتها امها بخِفة
و كعدت ام قيصر تسولف وي امي و دخلو عمامي
كعدو يتناقشون و احس گلبي دَمام دَمام اول مرة
يَاسمين : الله نصير جيران بعد حتى اذا مالي خلك تجين تنظفين بدالي
دُرة : اني صديقتج الا بالتنظيف هو غير من هسة شايلة هم

سمر : شو جنچ مفلحمة ست دُرة هاي عود انتِ المثغفة
دُرة : انجبي يعني اقصد اذا تمت
ما تأخرو شوية و اترخصو اباوع الهم زِلم كبار مابيهم و لا اي شاب
اصغر واحد بيهم زوج ياسمين طلعن البنات
و كلبي تزيد دكاته مَتقل

و بدة عمي يسولف لامي كلامهم
- ناس محترمة ذاك الحجي المرتب يردون يتقدمون لدُرة
اني هذا منصور مراقبة كل خير ما شفت منة و هو هسة شيخ عشيرة فلان فُخذ
وبعد الباقي يم بتج بس عمها فلاح ما راضي يكول مو اريدها لابني
دُرة : و اني ماريد ولدكم هسة لو تموتون
ام دُرة : لا دخيلك ابو عدنان شنو هالزعطوط هذا هي هاي وين تركد وياهم

ابو عدنان : والله هي صلافة بتج يريدلها هيج ناس شيوخ يخليها راسها ما تكدر تحكة من التعب و الطبخ و الهُرفة
عوجت حلگي و دخلت للغرفة والله يا الله
الي عرفتة عمامي كايليلهم فترة و ندزلكم خبر صار يجيني السايق
و ولا اني رحت لغرفتة بَعد

اسبوع و امي خابرت ام قيصر انطتها الموافقة كالتلها
ان شاء الله جيتنا الجاية نِعـقد و حفلة لان امة مريضة ومحتارين بيها
بدلت و عدلت الحجاب و طلعت اوكف انتظر السايق
انطاني الراتب كامل گلت يالله راح يصير خطيبج غصبا عنة يدفعلج

مشاعر مُتلاطخة لكن الخجل كان سيد الموقف
الى يوم العقد و اني بَعد ما طخ لساني على لسانه حتى بالرسائل
كُل ما اصفن و اكول معقول اليوم راح يدخل و يلبسني الحلقة الاستاذ الي
ميناديني غير بِـ بنتي

الصُبح جابو النيشان و گالت ام قيصر من عاداتنة العروس بملچتهة تلبس الثوب
اليجيبونة اهل العريس و اذا ما عجبج هسة اروح اجيب غيرة
فتحتة كان جمال و اكيد مستحيل افشلها و اخليها ترجع
كعدن البنات و الي جايين وياهم بـ بيت ابو شاهين الي بصفنة
جانت امي قايمة بكُل المراسيم بحُب اكيد هدا النسيب الي صارلها قـرن







اخذت مرت عمي وياي للصالون لان امي متكدر تترك البيت
تمكيجني و اني مية الف فكرة دخلت دماغي شعجب اني دُرة ام خشم اليابس وافقت بهالسرعة بس اتطمنت و اني اردد كل شيء بيد رب العالمين
وهو الي يسهل

كملت المكياج و لبست الفستان و بدت بالتسريحة
اجة عمي اخذنة بس انصدمت بكُل الي جايين من طرفهم لابسين اسود توقعت بيوم
الخطوبة ينزعو و ما ركزت بهالموضوع من الاساس
تلگتني ياستي الجميلة هي و بطنها تطش عليه چكليت
ابتسمت و كعدت و انعاد عليه مشهد حبيب و كسرتي ذيچ
يا رب اجعل العوض جَبـر

ما كانو يشغلون اي شيء و امي ما قبلت كالت عيني لعد شكو جايين تخطبون
احنة مندري بيكم لسة حزانة شَغلـت مَولد و شوية و كالو خلي تتحضر العروس
كعدت ورا الباب و نفس مراسيم الخطوبات العراقية المُعتادة
الى إن سئلني ثلاث مرات يالله نطقت الموافقة

و اني شايلة هَم قراري الصعب هذا
و كذلك هوَ اسمع صوتة و هو يردد الموافقة
صَلو على مُحمد و ال مُحمد

زواجاً تقليدياً من جانب الانثى
و حُباً من جانب الرجُل
صغيرة عُمراً و كبيرة عقلاً
على كبير عُمراً و نَسباً وشديد غيرتاً مُتعب
اشدهم قسوةً و اكثرهم غُموضاً

جنت كاعدة و ياسة يمي تنتظر دخولة اكثر مني بس ما دخل و گالو يالله تحضرو نرجع راحت ياسمين لباب المطبخ دگتة و مدت راسها تحجي
لـ لحضة تندمت على هالقرار اذا من اوله هيج
اباوع لامي بعصبية و هي تهدأ بية
تالي طبت ياسة كالت عيني يالله صعدن بالسيارات ابو الفصحى يستحي
يلبسها الذهب كدامجن كلهن صافنات عليها بتعجب

بدت الزلم تطلع وهن يلبسن بعبيهن و الجهال تتباجة
طلعن بقت بس يَاسمين و سمر ما يقبلن يرحن صاحلها ارشد
و هي تهز جتفها بـ ما اشرلها بأيدة راحتلة و اني انقهرت بس ما اريد
ابين لاقاربنة و نسوان عمي الحيايا جماعة العريس كلهم راحو
طبت سمر كالت عمي راح يطب وهي لازمة كاميرتها تجهز بيها

دخل و هو مرتدي الزَي العَربي انرهبت بمنظرةً كل عمري ما شايفتة بهالشكل
دخل مبتسم و هي گامت فتحتلة سمر علب الذهب اخذ الحلقة و سحب
و اني اجر النفس بصعوبة
منصور : يا جَميلة قَومِـها

ابتسمت و ايدي ترجف اني اخلي الحلقة بأيدة
مَد ايدة على شعري و تقرب باس جبيني
رجف كل جسمي و سمر منطلقة تصور اترخص و راح
ارشد من برة صار يصيح على ياسمين و هي واكفة تعدل بروحها و سمر تسد العلب و تنطيها لامي خو امي الضحكة ما فاركتهة







اجتي تبوسني يَاسمين حتى تروح
- لتضوجين حياتي بس هو عود شيخ شخصية تعاي هناك حتى نلعب بيهم جولة

ابتسمت و راحن دخلت للغرفة اخذ صور بتليفوني
بس مدري احس بروحي مقهورة صارت خطوبتي مو مثل ما اريد
لليل انبعثتلي رسالة منه
- مرحباً يا صغيرتي اعلم ان كُل ما حدث اليوم مُخالفاً لما تتمنين
لكن اصرار والدتي سبق الاحداث ، اعلمي فقط ان العوض آتِ
فـ أنتِ من ايقض المشاعر النائمة

ابتسمت لا ارادي واني اكول يارب لا تفشلني بأختياري
ثاني يوم وكفت انتظر السايق تالي اجة هوَ ارتبكت حيل بالسلام
قبل لَتحرك السيارة لزم فكي وطُبع بوسة بخدي حركة خلتني
الطريق كله اضل ساكتة و افرك بأيدي

صار يطلب مني اروح لمكتبة و اني ارفض الخوف و الخجل متغلب عليه
و مادري شنو اسوي انصدمت من سألوني البنات
- صدكككككك خطبج الاستاذ منصور
- نعم ، صارت فجأة و بسرعة
اكو الي عذرتني و توعدت اذا بالحنة ما اعزمها تزعل و اكو الي باركت
و اكو من الاساس صارو حتى سلام مايسلمون عليه

يسألني و اجاوبة لو بكم كلمة لو اهز راسي
الى ان گال
- عجل وين شخصيتچ البارزة ؟ هيج الخطوبة تاكل الالسُن ؟
- لا بس خجلانة استاذ
منصور : ديري بالج التمرة من تخجل تصير دبس و تخلص
باوعتلة بصَدمة ابتسم

دُرة : استاذ لتحاجيني هيج
- فصيح تردين ؟
- لا بس يعني اقصد هذا الاسلوب
منصور : نزلي يا تمرة نزلي
...

سميحةً
يا عزيز الروح و أبنها انا انام على الوسادة و انتَ يُغطيك التراب
تباً لقلبي كم هوّ قاسي

لازمة صورتة و ومغطية راسي و اشهگ
وين انتَ يا حبيب روحي و ابنها منو يبيعك تا اروح اشتريك
والله ابيع الدنيا و اشتريك والله
مسحت وجهة بچف ايدي الرطب من الدموع
مافكرت بية شلون راح اخلص حياتي وراك ؟







ترى ادري اني مؤمنة و صبورة بس فراغك جبير و محد يسدة
هذا ابنك لو كبر اول ما يكول بابا منين اجيبك الو
تعال هَيثمي حتى النطق فقدتو من وراك تعال بس عيوني تحچي
و ترسم فراگك بالدموع

تنتظرني سبع سنين و بـ ثلاث اشهر تملني و تتركني
هيج اني مو حلوة ؟ ، لا بس انتَ مو تسميني ام وجه النوراني ؟ تتذكر
ولك اني ام وجه النوراني الي طفيتها انتَ بغيابك

مو گتللك كلبي عليك و الشط خايفة منو ؟ مو اكلك كلبي گلب امك عليك
اهجس خوفي ورا شيء و يكلولي اتركي هو مو جاهل
ليش عجل تتركني وحيدة ؟ بيتنا تركنا المن
ارجع ابجي على امك و اني امسح دموعك
ارجع شغل اغنيتك عادي اسمعها وياك بس ارجع

نايم وحدك بالگبر يحياتي ، تخاف وحدك مو ؟ اي والله هو الگبر يخوف
و ظلام تركت وشاحي يمك تا تغطى بي من يجيسك البرد احسبني يمك
و ابقى تنتظرني لِما اجيك
يا روح امك و عُمرها

المي غدار يا هيثمي غدرك مثل ما انتَ غدرت بية
اش اش يالله ادري قسيت وياك بالعتب نـام نام بس والله من گد شوگي الك
يأذيك عتابي ؟ سم بگلبي ان شاء الله
ضـل نايم يَبعد اليوجعني
....

يَاسمين
ما صدگت تتم خطوبة دُرة على خير لان هنا كلها مقابلة
حتى ابو ارشد و اخوانة و من بيتنة بس اني رحت و ارشد ما قبل الا اترخص من سميحة و هزتلي راسها بأبتسامة

من رجعنة ويانة ابو فزعة بالطريق باوعلنة و گال لارشد
ابو فزعة: اكلك ذني عدكم لا تجمعوهن سوة يخوفن النوب اجتهن هاي
المتكلمة سلام الله ع الغربية ادري شبيكم شو شامريها على الزعاطيط
ارشد : اسكت يولي ادري بيك چفاص اگشر

ابو فزعة : يا يابة لو يدري شحصل يخلينة نمشي نهلهل
ارشد : ابو فزززززززعة

سكتنة طول الطريق و لمن رجعنة هن ثاني يوم راح للدوام
و يومية اني وياهن عركة و احترك دمي من كامت سحر تتردد للبيت
من يداوم و مسوية روحها فقيرة تقري جهالها و تنظف البيت و تروح
بس رجلها متتقربلة عبالك مكيفة خلصت منة

رجع من الدوام و كالعادة نزلت انتظرة لازم بأيدة شَعر بنات
ارشد : ادري اكو زعطوطة تنتضرني تحب هالسووالف
بستة و اني مبتسمة
- يحياااااتي
- انتِ حياتي والله

طَبيت للبيت و صوت سحر يلعلع تقري بأبنها هو باوعلهم عاقد حواجبة
ام ارشد: جهالو مسربتين بس تقريهم و تروح
حتى ما سلم و لا كعد صعد فوگ و صعدت ورا واكل بالشعر بنات
و بنت علي تبجي وراي

طبگ باب الغُرفة قوي وهو كاعد يدخن انتبه لشكله من يوم وفاة هيثم
صار كل ما يجي ضعفان و تعبان اكثر
مديت ايدي افتح دُگم البدلة مالتة والوچ بالشعر بنات
سحبتها منة و طبعت بوسة بخدة

يَاسمين : لا تضوج يالحبيب اطلع اطردها و ختولي
- نزلي صبيلي اكل يَاسمين
نزلت و اني اتمخطر حميت الاكل حتى اصبلة جهزت الصينية و اخذتها حتى اصعدها
اول مرة لان هو كله ياكل بالصالة الجوه
صعدت على كيف خاف توكع و يا ريتيني ما صعدت

بـ باب غُرفة سحر هوَ واگف و ظهرة عليه ينبه عليها تحذيرك
تقدمت عليه مدت ايدها على رگبتة
سحر : دطاوعني مرة و اخلصك من هالحمل كلة يا ابو شاهين

واحــد انتَ و كلـهـا لحگـتني عَليـك ..

....
يتبع

رتبة و ظفيرة - الحَلقة 48 ⚜️ -
....

تدري إنـي معتبرك شمس ڪدما تغيب وتختفي ؟
ڪالولي رآيد يبتعد ڪلتلهم يضويني
...

يَاسمين
تقدمت عليه مدت ايدها على رگبتة
سحر : دطاوعني مرة و اخلصك من هالحمل كلة يا ابو شاهين
بِعـد ايدها بقوة و ضربها راشدي

باوعتلي و هي مبتسمة هو دار وجهة شافني شمرت الصينية بالگاع تركها اجاني
وهَو أعصاب هي وگفت يم الباب متخوصرة ولا انكسرت عينها
اسمع رَكضة الدرج و اني لسة ممستوعبة لَزمتها هِمس من شافهم صعدو
ارشد : لتحچين شيء عيب من فراس هي قرچ شسويلها

يَاسمين : لجججج انتِ شنوووو شنوووو تلزمي انتي مو متزووووجة
يا جلبة يا بنت الجلبة انعل ابوج لابو الخلفووووووج هو خَلة ايدة على حلگي و سحبني للغرفة و كلها تسأل شكو

انهاريت و كسرت شكو شيء يصير كبالي اخر شيء شلت اخر عطر عندة
ضربتة بي طاح بچتفة غَمض عيونة و تقرب يهـدأني
ارشد : لج والله هي تعمدت تسويها لان عرفتچ جاية
- خررررررب لكككك ارشد الله ياخذكم و يخلصني منكم يا حقراء
والله الا اكتللل ابنك اوكفلي انتو لازم ما تتكاثرون
الا انتقم منك والله

ارشد : كافي اهدي عااااااااااااد
باوعت لشكلة و نَبرة صوتة سكتت و اني نفسي سريع
تركني و راح يفتح الجرارة خلة حباية بحلگة كعد و تَچة راسة على تاج الجرباية
اندك الباب بقوة و اسمع صوت فراس يصيح ارشد

باوعلي و كام يفتح الباب
ارشد : لا تحچين ياسمين تصير مصيبة
فتح الباب و هو يگله شكو شصاير فهمني
ارشد : ماكو
يَاسمين : لا اكو مرتك تتحارش برجلي وهو ضربها

باوعلي بعَتب وغَمض عيونة بتَعب و فراس يهز بچتف ارشد
- ابو شاااااهين هاي شتحجي
ارشد : چـذب يولي هاي مريضة ما تعرف شتهتر

ما جاوبة و راح لسحر يصيح بعالي صوتة و هي تصيح
وگع ارشد من طولة صرخت و طبو محمد و عصام يركضون على صوت
وگعتة سَهلة من جوه تصيح هاااا وكع ابني موتتنة







عين عليهم و عين على طولة المتمدد رَشو عليه مي و ماكدرو يشيلو
وصراخ سحر و رجلها ما هدأ شوية و سمعت صوت منصور يصعد الدرج و يكلهم شكو صوتكم فضحتوناااا شاف ارشد واكع ركض للغرفة يسألهم شكو وكلها دكول مندري

سِنده و كعد على الچرباية صاح جيبن انسولين من عمي جابن اله و اني على وگفتي
ضربَة و راح يهدأ بفراس باوعت لارشد بعصبية
ارشد : لـ ايمتى تضلين جاهلة لـ ايمتى
- للاااااااابد
حجيتها و اني افتح بيبان الكنتو طلعت شال و صاية البس بعصبية و اندب حضي
يَاسمين: اني عار اني قبلت بيك بحلوك و مُرك
كلها تريدك شسوي بيك ابقى لاهلك هم يردوك جبت عمري مكسورة
انتظر الراحة عليمن

ارشد : يولي تعالي لا تطلعيني من طوري
ردت انزل الدرج صاح منصور بصوت
- ووووووين ؟؟؟

يَاسمين : لجهنم ان شاء الله اني هنا ما ابقى بعد رايحة يم ابو قيصر
و شوكت ما يسوي ابن عمك حل لحياتة خل يرجعني لو ارجع يم دُرة
و لا ابقى بهذا البيت الي كلة حياية
منصور : محمد روح وياها

نزلت امشي بسرعة و سَهلة تصيح وراي على كيف يولي ابني
لا يصير بي شيء افين حضچ ديري بالج عليه درت وجهي عليها بنرفَزة
يَاسمين : انتي ضلي ضلي النسوان تخلف وانتي تصيحين ابني
و احنة طايحين بيها

امشي و محمد يمشي وراي و اتذكر شكلها من تلزم ركبتة و امسح بدموعي
ادري هو ماله ذنب بس اني تعبانة منهم لا ناسي و لا جوي امشي بنصهم
و خايفة على نفسي ما الي ذكرى حلوة بهالبيت غيرة هوَ
و هم يكرهوني لان هو يحبني

دكيت الباب فتحته رونق و طَبيت ابجي ام قيصر سألت محمد و هو يجاوبها والله مندري گبت العيطة و محد يقبل يكول شكو صعدت و تمددت تغطيت و اني ابجي
حتى سمر ما موجودة شوية و صعدتلي ام قيصر تواسي بية ما جاوبتها
نمت بتعب و عيوني مورمة من الدموع

كعدت و البنات كاعدات يسولفن و سمر وياهن رفعت الغطى وضليت صافنة بالفراغ
سمر : صح النوم يالاميرة النائمة عالكة بيت جدي و نايمة والله كفو
يَاسمين : الله يهجمة فوك ما هو مهجوم
- ابوي كال اذا كعدت خل تنزلي
- لا استحي عوفوني رجاءً

نزلت ملاك و شوية و سمعت صوت ابو قيصر زفرت نفس و نزلت و هن نزلن وراي
درت وجهي عليهن
- وانتن شكو شنو حماية
سمر : لا بس نحب الگالات و المصايب حتى نِيران عفتها و اجيت من سمعت
اكو مشكلة بس وداعت شوارب الضباط كفو من شاربچ سحر طلگوها رسمي
سابة خالي







ضليت مصدومة و نزلت
للاستقبال بس هو و زوجتة كاعدين اشر لبناتة بره
سلمت عليه و كعدت
ابو قيصر : شونج يابة ؟ شخبارج
- مو زينة عمو اني تعبت ..
حجيتها و سمعت صفگة خد سمر ورا الباب و اخواتها يكللها اششش

صاح ابوهن و رونق كالتلة لا يابة ماكو شيء صعدن
و هو خزرهن ركضن دار وجهة عَليه و تكلم
ابو قيصر: يا بنتي هي هاي الحياة عجل مو كلها راحة چثير نتعب و نعيش امور ما نريدها و ندحك وجوه ما نحبها بس المرة الزينة تتحمل زلمها مو صحيح
يَاسمين: لا عمو اني تعبت صارلي خمس سنين اني اتحمل لخاطرة
وهو تصعب عليه راحتي بس لان يدري احبة ما شايل همي
تصدكني لو اكلك حتى الجهال بذاك البيت متطيقني ؟

ابو قيصر: طبهم سطعش الف مرض الجهال بابا انتِ اهم شيء
عندج رجلج شعليج بيهم
مسحت دموعي و حجيت
- عمو افهمني افهمني يعني ما كلولك والله بعيوني شفت سحر تلزم ركبته
منو تقبلها و حتى صابرين تحبة و امة تريد تزوجة
باوع لام قيصر بأستغراب

ام قيصر : مادري والله بصابرين بس سحر هااا والله هم مادري
عضتله شفتها تنبهة
ابو قيصر : عيب بابا هالحجي ميصير تحجين هيج هاي وراها ذبح و هجمان بيوت
شنو حب شنو هالتخربط يولي كل وحدة عدها سرب اخوة و جهال انتي عَش تجيبين المصايب لروحج و انتي وحدج لا تتلاوين وي جيش
يَاسمين : عمو لزمت رگبتة

ابو قيصر : يولي لا تضلين تعيدين هساع هي تطلگت وطاح حظها
ام قيصر: گشـرة منها و من امها امهات السحورة هجمن البيوت
يَاسمين : ارشد شلون صار

ابو قيصر : رجلج منتهي يولي شلچن عليه رجال بي سُكر جاي من داومو
تتلگا المصايب و هو شارد منها الله يساعدو عبن لهساع متحمل
ام قيصر: سوده بوجهي مدري منين يتلگاها
يَاسمين: اخذني اله عمو
- ابقي الليلة هينا و الصبح اخذج
- لا هسة
- امشي يالله .. اخذني و الطريق كله رزايل بطعم النصايح

طَبيت للبيت و هو دك باب المطبخ وصاح يالله ردت اصعد صاح محمد
- رجلج هينا بغرفة سَهلة
درت وجهي و فتحت الباب لكيتها لازمة القرآن و تقرا على راسة
و سميحة كاعدة بالزواية تباوعلهم و بيدها صورة هيثم

تقربت عليه حيلة رايح و مغمض عيونه مديت ايدي على وجهة
بـ لَحظة خفت اخسرة و يروح من ايدي نزلت دموعي و همست بصوت
- أرشــد فتح عيونك
فتحهن على كيف و دار وجهة عَني

يَاسمين: لعد هي تلزمك انتَ شتدري بية
سَهلة : دعوفي مو طيحتي حضو يولي كبري لـ ايمتى تفشلينو كدام اليسوة و الميسوة
- لا والله و تذبون الصوچ بية والله اذا انتن متغارن على رجولتجن اني غير
و اني شمسوية مو زين متحملة ضيمكم و قهركم سَهلة لا تخليني اطلع
حرگة گلبي بيج مو ابچيچ والله ابچيچ
حچيتها و مسحت دموعي هو ابتسم و مَدلي ايدة







سكتت و كعدت يم راسة نزعت الشال و اهدأ بنفسي حچه بصوت تعبان
ارشد : و التـالي وياچ ياسمين
يَاسمين: ارشد و التالي وياك انتَ والتالي يالله عاد خلي نطلع و حتى سَهلة ما اريدها عوفها هنا صايرة مثل امك ناخذ بس سميحة الحبيبة
حجيتها و سويتلها بوسة بالهوى ابتسمت بتَعب

رجع نام و ضليت كاعدة يمي وسهلة زعلت عليه تمددت بفراشها اجيت يمها
يَاسمين: يعني انتو تجفصون ببطني و تتزعلون يالله لا تضوجين اخذج لبيتي
ما اخلي يشمرج بدار المسنين

رفعت راسها رادت تكفخني تالي مدت ايدها على بطني
سَهلة : وللك اطلع اصگرها شلون راكد ببطنها لهساع فهمني
يَاسمين: نعال على راسة مو زين شايلتة ببطني

سَهلة: عمت عينج ترحيلو فدوة
- عييييع هو بس خل يجي وعلي الا اكطعة اطلع ضيمكم بي لان من ريحتكم
سَهلة : والله الا يصكرج والله
- اني وياج و الزمن طويل

طب ابو قيصر شافة نايم راح كال لا تكعدو نمت يم سَهلة و كعدت الصبح على صوتة
كعدت افرك بعيوني
ارشد : جيبيلي هدوم تا اسبح بساع
- شـو تتأمر ؟

خزرني صعدت اجيبلة كلها نايمة بعدها دخل للحمام و طلع گال ريوگ
عوجت حلگي و رحت اسويلة خليت الصينية كدامة
- ترى المفروض اني ازعل مو انت شو عايش اللحظة
ارشد : يـاسمين الروح بينها و بين الموت هاه شَعرة والله شَعرة
لو رحت تضيعين انتِ و الـ بطنج و بـ بطن سميحة خليهم بعينچ
سكتتت

يَاسمين: وجه الصخلة الحية السحارة تلزمة كدامي
ارشد : و المفروض الاگولو ما ينكسر يا قرچ شلون تگليلو تتحرش برجلي ؟
- و مچذبة اني ؟
- لا ما مچذبة بس يا مسهلها بحلگچ و يا صعوبتها على شواربو و رجولتو
يولي اروح اكول لاخوية مرتك تحبني وين صايرة ؟؟؟؟؟
- لعد هو ميتزوج بس اليحبـنك
ارشد : اششششششش لججججج

فزت سميحة و سَهلة على صوتة مخروعات شرب الجاي و صعد
صعدت ورا جان يبدل يريد يطلع
- وين ؟
- دحكي ياسمين دلالي الچ الظاهر حسبتي من غير جهة ترى اني من ما احاسب
لان ما اريد أذيچ عَش تخلين اسلوبي وياج يتغير وصلتي لأخر مراحل الفالتو
صارت چلمتي و القندرة عندچ
يَاسمين: لا مو هيج







ارشد : لا هيج و نُص تعب لساني و هو يعلم يولي كبري كبري
لا تصلحين الغلط بالغلط لاتصيرين انتِ و الزمن عليه اني مخلي الدنيا بجهة و انتِ بجهة لا تفشليني بتصرفاتچ ماكو فايدة
ياسمين: خاف ضايج لان تطلگت سحر السحارة ؟؟