رتبة و ظفيرة - الحَلقة 1 ⚜️ -
هيَ حيرة !
وحيرة النثية چبيرة
من تشوف الحيل راخي
بلا وعي تگص الظفيرة

ياسَمين

.. اليوم اول يوم بالدوام صرت ثاني متوسط لبست الجنطة و طلعت حتى اروح لبيت دُرة

زَهرة : ما عبالچ ترحين و تهدين هاي الهوسة وروح ابوي اعوفها لحد ما تجين تنضفيها

ياسمين : اي من اجي

.. حطيت ظفيرتي صَفح و طلعت وصلت لبيت دُرة حضنتها و طلعنة للمدرسة مشي المدرسة بعيدة بس مرت عمي متقبل عمي يسجلني خط

و دُرة يتيمة و بس هي و امها عايشات و حالتهم مو كلش بس امهة متطمنة علينة لان سوة نروح و نجي من الاول متوسط

دُرة : اهووو هم اجوي

علي : لك يابة بدة الدوام و بدت نعمة الله تتجول بالشوارع

دُرة : ترى والله نلم عليك المنطقة

علي : هسة انتي ياهو يمچ اني اقصد هاي الغزالة

محمد : عوفهن يمعود يستشرفن ذني و هن مربعات الدنيا

ياسمين : لازم اختك ويانة

علي : اخخخخ يابة لك شني هاي







... لزمت ايد دُرة وركضنة بالشارع لحد ما شفناهم صارو بعيدين رجعنة نمشي اعتيادي

وصلنة للمدرسة استلمت كتب و شفت صديقاتي القديمات انتهى الدوام و رجعنة هم اثنينهم واگفين هذولة عمال بفرن مال صمون

علي : لك يابة ادري اليرجعون من المدرسة مخربطين الا البالي دومة مرتب

.. دخلت درة لبيتهم احنة فرق بيناتنة 3 بيوت جان دوامنة ظهري لگيت الباب مفتوح ما دگيت الجرس دخلت لگيت الهوسة مال المطبخ على حطتهة

نزعت ملابسي و رفعت شعري و نضفت المطبخ اكيد عمي و مرتة نايمين خلصت التنضيف رحت سبحت و تغديت
بعدها بداية دوام ما نطونة واجب بس جنت فرحانة بالكتب اقرا بيهن كتاب كتاب

طلعت مرت عمي من غرفتها باوعت للمطبخ
زهرة : اي عفية چان كسرت راسچ

ياسمين : ترى ممسويتلچ شي شنو هالعداوة

زهرة : وجودچ ببيتي يعقدني

ياسمين : ترى هوَ حصة بابا يعني مالتي

زهرة : چا منين جاي تاكلين و تشربين و تنامين غير من حصتة البابا چا تردين اگعدچ ببلاش يا مَشؤومة

.. سكتت ما جاوبتها

رحت للغرفة وگفت گبال المرايا
صدگ ليش أني مشؤومة شنو سويت بحياتي
حتى أمي و ابوية يتركوني بنفس اليوم !







اتبنت تَربيتي بيبي
وصلتني للعشر سنوات و هم عافتني
بيد منو أمنتوني و هيچ رحتو مطمئنين ؟

عادت بية الذاكرة هذاك اليوم الي ما چنت اعرف
شگاعد يصير و اني عُمري 8 سنوات
شفت بيبي تلطم و الدنيا مخبوصة

أتدمرت بعد ما عرفت الي صار
باليوم الي أبوية اخذ امي حتى تتصالح وي اخوتها
الي چانو متبرين منها بعد ما أسلمت
تركت دين المسيح

حبتة حُب نظيف تركت الدنيا وراها علمودة
بعد ما نولدت ما صار عدهم اي اطفال بَعد

چانو يگولون لأمي هاذي بيضة عُقر
يعني هي عاقر بس رَب العالمين لطف بيها
حتى متنحرم من شعور الامومة
چنت اسمعها بس ما اعرف اذا چانت حقيقة
او خرافة النسوان الكبار

هواي هي طلبت من ابوية يتزوج بس هو ما قبل
گاللها الموت والله و صدگ وفة بكلامة

اني كل الطلعات مچلبة بيهم الا هاي
ما قبلت اروح لان عدنا احتفال بالمدرسة و ممصدگة
خلوني يم بيبي

بعدها صارو ميردون على المكالمات و جهازهم
خارج التغطية اشوف بيبي تلوب كأنو گلبها علمها

لحد ما وصلنة خبر وفاتهم ولازم احد يروح لاربيل يستلم الجثث
جان من اصعب ايام حياتي لكن بيبي چانت معوضتني







ربتني ما خلتني احتاج شي وصدگ من بعدها عرفت معنى الذلة
چانت متخلي شي بنفسي تاخذني للسوگ وياها و تشتريلي و تگعدني بالمطعم حتى ما احس محد الي

الى ان اجة يومي المشؤوم الثاني
چنت صف سادس بيبي چانت تصلي
اجانة خبر عن اخوها مَذبوح من جهة مجهولة
و شمرو على اهلة الراس وحد و الجسم وحد

ع اثرها صارت بية جلطة ما طول شهر و هم راحت
بيومها متت صدگ و تأثرت اكثر من اهلي
عاد من راحو اهلي هي الي هسة منو ؟

مرت الايام
و خوالي گالو لعمي انطيها حصة ابوها من الورث و خلي تعيش يمنة

ما قبل گاللهم بت اخوية تبقى يمي و حصة ماكو اني اتكفلها
چان صاحب رتبة بالاتحادية
بس شالفايدة و غيرة على عرضة ماكو !

و اكثر شي اكرها بالدنيا اصدقائة الضباط فد مكروهين اذا يجون للبيت يهتز البيت بس كفران و سب و فشار هذا اسلوبهم
و حتى أكو نظراتهم مو راحة اذا افتحلهم الباب

....
اندگ الباب رحت فتحتة

عُصام : هلا يابة طَرشيلي فؤاد منتظرة هينا گوليلة عصام التكريتي طالبك







ياسمين : نايم
عصام : عجل يابة النايم ما يگعد ؟
ياسمين : هسة اصيحلة
زهرة : هذا ياهو
ياسمين : صديق عمو اسمة عصام التكريتي
زهرة : ياا هسة اكعدة

.. راحت كعدتة و اني رحت يم علي و فرح العب وياهم

.. ثاني يوم كعدت نضفت البيت و بدلت و ضفرت شعري و طلعت لبيت درة سلمت على امها و طلعنة

علي : لك يابة باع الگصيبة تخط وراها
شني انتي اهلچ ليش هيچ يبذرون بنعمة الله

- لك شني هاي

علي : باع هذا غير من العام ناصبلها سيطرة اني

.. هذا الثاني چبير بالعمر ما شايفتة قبل

درة : اكلج هذولة يخوفون
ياسمين : يعني شيسوون ؟
درة : امشي لامي تاخذنة
.. رجعنة گلنة لام درة لبست عبايتها و اجتي ويانة هم ما نطقو ولا حرف

مر اسبوعين على الدارسة يلا بدو ينطونة دروس شوية

.. البيت بس طابق واحد بي صالة و استقبال و 3 غرف وحدة لعمو و مرتة و الثانية الي وينام وياي علاوي ابنهم و الثالثة مال گعدة

جنت كاعدة بالغرفة اخطط الدفاتر مالتي و اجلد الكتب دخل عمو و مرتة







فؤاد : شلونها ياسة
ياسمين : هلو عمو زينة
فؤاد : شلونها دراستج
ياسمين : بعدهم مينطونة هواي

فؤاد : باعي يابة احنة الوضع هنا بعد ميصرفلنة و اني كثرت التهديدات علية راح اطلع للخارج تجين ويانة

ياسمين : طبعاً عمو لعد وين ابقة

فؤاد : خوش يابة و اكيد اني ما ابقيچ وحدچ بس لان انتي مو بعائلتي راح اخذ مرتي و الجهال اسبوع و اسحبچ يمنة

ياسمين : شلون و ابقة هنا وحدي

فؤاد : لا يابة اني البيت راح ابيعة راح اخذچ لبيت صديقي اني واثق بي هو خوش رجال يخلص الاسبوع و ياخذج للمطار حتى انا استلمچ
ياسمين : ووين نعيش
فؤاد : بالسويد حبيبتي

ياسمين : بس اخاف وحدي والله
فؤاد : اسبوع واحد بس
ياسمين : و المدرسة

فؤاد : هناك اسجلج مدارس احسن من هاي بألف مرة
ياسمين : بس اسبوع مو اكثر

فؤاد : وداعتچ بس اسبوع

.. بعد ما داومت رحت لبيت درة كتلها راح نسافر گامت تبچي و اني ابچي وياها

عمي جاب سيارات اخذت الاثاث گال حتى ابيعة

ورا خمس ايام ..

فؤاد : يابة ياسة حضري روحچ باچر الصبح يجي صديقي ياخذچ
و احنة العصر نسافر حتى ورا الاسبوع تجين يمنة







ياسمين : و ملابسي و غراضي
فؤاد: اخذي بس المهمات اني مناك عود اشتريلچ

.. اخذت 3 تراكات و صورة امي وابوية و حضرتهن بجنطة ثاني يوم بثمانية گعدتني زَهرة

زَهرة : يلا كومي صديق عمچ اجة

.. غسلت وجهي و ظفرت شعري و طلعت

فؤاد : اخذها و خليها يمك انا اسبوع و عود اسحبها ويانة بس خل اتأكد من الوضع ...

- عَجل نفس ما فهمتك

فؤاد :اي هايهية و ما انسالك هاي الوگفة طول العمر

ياسمين : چنت احس بكلامهم بي الغاز بس ما توقعت عمي الي رباني ينطي گلبة يسويلي شي

الطريق كَلش طويل و اكثر شي نمشي بأماكن عبارة عن تراب

ياسمين : عمو هسة احنة وين

- دحكي گبالچ هاي الغربية

نزلنة بمنطقة بناء عالي بيوت كبار

- ذاك البيت ابو الباب الاسود روحي طرگي الباب وطبي جوة ما بين اجيب العيال

.. نزلت من السيارة و الجو چان ترااب وصلت للباب الاسود دگيتة طلعلي رجال

فراس : امري خوية

ياسمين : هذاك الرجال گلي روحي يم الباب الاسود







فراس : يا رجال هذا بوية

... هو طلع بالباب يباوع جنت واكفة و من كل جهة كامو يطلعون مجموعة اخذت نفس قوي و گمت اطگطگ اصابيعي

ارشد : ياهي هاي

فراس : علمي علمك خوية تگول ذاك الرجال كلي روحي للباب الاسود
ارشد : ول بوية انتي ياهو الدازچ علينة

ياسمين : هذاك الرجال كلي دكي الباب الاسود
ارشد : نعاااال هذا يا نعااال

امشن لا ضلن دحكن وحدة خل تاخذها تفحصها

.. كلهن كالن والله انا مالي دخل
درت وجهي اريد اطلع من البيت

ارشد : حدچ حدچ وين رايحة هسة الگ**يد كلها دحكتچ طبيتي بيتي
امششن وحدة منچن تفحصها

من گد الفشلة الصرت بيها كمت ابچي ..
ياسمين : والله مو مفخخة اني

سحبتني بنية و طببتني للمطبخ فتشتني ولزمتني من ايدي و طلعت
- لا يابة البت ما بيها شي

ابو ارشد : يا بوي الحرمة خطار يمنة خلونة نفتهم سالفتها منا الوادم لا ينسمع حسنة

طبو جوة كاعدة مرة چبيرة لابسة شيلة جوزية و على متونها شماغ اخضر .. كالت .. ولكم صار ساعة انشد ولا طير اجاني

ارشد : دحگي هالطرگاعة الطاحت على روسنة

ابو ارشد : بالهين يابوية شجاك اليوم
.. بوية انتي وين جاعدة

ياسمين : اباوعلهم فوگ ال 30 واحد نصهم گاعدين و نصهم واگفين كتلة .. عمو عايشة ببغداد

ابو ارشد : عجل بوية عش اجيتي للفلوجة
ياسمين : عمي اخو ابوية دزني بيد صديقة لان راح يسافر للخارج كلة اسبوع و اسحبها يمي
ارشد : الله معلومة والله استفادينة بوية عمج يصير اخو ابوج

.. نصهم كامو يضحكون

ابو ارشد اي بوية و صديق عمج وينة

ياسمين : هو نزلني هنا و گلي روحي دكي الباب الاسود بين ما اجيب العيال و اجي
ابو ارشد : ياهو هاذ
ارشد : ول يابة چنك صدگتها دخيل ربك فلم هندي هذا

ابو ارشد : عجل شسوي احجي

ارشد : جيبها اسلمها للمركز ناگصين وجع راس احنة
ابو ارشد : بهداي يابة ما هيچ تنحل المشاچل
ارشد : هيرنيّ بساع وحدة تجيبلها حجاب

.. انطتني بنية شال حطيتة على راسي
كلهم واگفين يباوعولي حَرك السويچ بيدة
ارشد : امشي

.. هو مشة و اني مشيت ورا صعد بالسيارة
و صعدت ليورة و هو يسوق و يغلط

ارشد : شلووون ما نرتاح نطم سالفة تنفتگ الاكبر منها
ادري الدنيا تتگاون وياي

ياسمين : وين موديني

ارشد : انتي بالطلاااااك اذا سمعتلچ حس اشمرچ من الشباچ

.........
يتبع

رتبة و ظفيرة - الحَلقة 2 ⚜️ -
شگد چبيرة
من تشوف الدنيا ضدك
كلشي ضدك
حتى گلبك صار ضدك
عافك لخاطر ظفيرة !
..

في اركان تلك المنطقة هناك ثأراً نائماً
من الذي سيقوم بأيقاضهِ
قلوب النساء لو أرادت أن تنتقم
تصمت أفواه الرجال
فالكيد يغلب القوة

في مكان اخر

- يولي بغير ثار ابو ما اريدو يفكر
- يا خانم هازا اتفاقنا من زمان كتير

- غَلطة وحدة تكلفچ حياتچ و عُمر أبنچ
- لا دخيلك من ايمتى نحنا بينا تهديد
- لان گرب اليوم المنتضرتو من 13 سنة

- كلشي يصير مثل ما انتي بدك وتطفى نار ئلبك
- الا براسو
- اكتر ما من مرة اجتنا الفرصة بس انتي ما وافئتي
- احرگ گلبو اول

معقول ازا تزوج مرتو توافق تعطيكي ابنااا
- غصبااااا عنهاااا لا تحرگين دمي هم عطونا چلمة ما يردون بيها
- لا تعصبي خانم هيك عم حاكي حالي
صايرة كتير بهلوس

- لا تضلين تهترين حتى ما ازت لحمچ للچلاب
- لا دخيلك منك الو انا بدي عيش لأبني و اولادو

..
يَاسمين

- انتي بالطلاگ اذا سمعتلچ حس ازتچ من الشباچ
.. عفتة ضليت ساكتة هو نزل و نزلت ورا

ارشد : نزلي راسج لا دحكين منا و منا

.. باوعت المكان اول مرة اشوفة زلم لابسين عسكري و اكو مثل ملابس اصدقاء عمي و العالم بس تباوع طب هو لغرفة و طبيت ويا كامو اثنين سلمو عليه و هو هم







ملازم ضرغام : ها نقيب ارشد جايبلنة هدية
ملازم محمد : هههههههه اي صدك سيدي شنو هالبت

ارشد : اخذوها لسيدكم ضايعة مدري شامريهة
بعدني كبل ساعتين نزلت و دحكتهة بحوشنة

ملازم ضرغام : صار صار نقيب ارشد
وياك ملازم اول ضرغام
يحلها روح و الهوى بظهرك

ارشد : اشكو لحلكك اذا تجيسها ادبسسز انا يم اخوتي ما امنتها
ملازم محمد : لا ابو شاهين صدك تحجي انا يمة يابة سدك امين

ارشد : حي الله العمارة بوية يلة اترخص
ملازم ضرغام : لتصير شريف براسي ابن وداد
هو اذا مو حصتنة حصة الرائد عاد احنة اولى

ملازم محمد : خلي احسن ما ندمر البنية احنة هو و ربة يتحاسبون

ارشد : يا هو منهم كاعد هساع
ملازم محمد : الرائد عمر
ارشد: حِلووو

ملازم ضرغام : اي وحق الله و طلعنة كلب جديد
ابن الطركة ايدة و العلابية شاديلة نسر والله دجاجة هواي عليه

ملازم محمد : هههههههههههه اشتعلو اهلك
ارشد : عجل و البت وين اوديها

ملازم محمد : سيدي نخليها ملة تقرالنة و نگعد نلطم وياها
خل نشوف قضيتها چا شنو شغلنة

ارشد : جيبلي كرسي

ملازم ضرغام : اني احقق شبيكم بعدين انتة نقيب ارشد
شغلك ببغداد وجاي تعبان روح بوية ارتاح

ارشد: حقق گدامي

ملازم ضرغام : اتقشمر والله شبيك هيج اني مو راحة
راح استجوبها بدون اي اعراض جانبية هههههه

.. جنت واكفة و منزلة راسي محد منهم شافني
و رجلي كامت توجعني من الوكفة واحد منهم طلع

ارشد : تاشوف قصتها و اولي

ملازم ضرغام : هسة دوخري الشال من وجهج
مناكلج احنة مطلعة الشعر و مغطية الوجه والله حجاب هذا
تعالي هينا

.. وخرت الشال من وجهي و كعدت اكو كراسي اثنين كدام الميز واحد كاعد بي هذاك الرجال الجابني و الثاني اني كعدت بي و مقابيلي الضابط

ملازم ضرغام: بوية شني هاي
ارشد : فضني ضرغاااااااام اريد اولي

ملازم ضرغام : تكدر تروح سيدي اني اكتب القضية و اصورها الك
ارشد : كاعدلك هينا

ملازم ضرغام : اي احجيلي عنج منو انتي وين عايشة بالتفصيل
ياسمين : اسمي ياسمين و عمري 14 جنت عايشة ببغداد وي عمي و مرتة

ملازم ضرغام :اهلج وين
ياسمين : اهلي ماتو بالسيارة من جنت صغيرة
ملازم ضرغام : هي ياهي التجي للمركز تكول اهلي ميتين
هاي منتهين منها

ياسمين : بس اني والله صدك اهلي ميتين
ارشد : دكملي هسة عجل عمج وين

ياسمين : عمي ضابط بس عليه تهديدات كلي راح نسافر للسويد و اسبوع و ناخذج ويانة و دزني وي صديقة
ارشد : شسم صديقة
ياسمين : عصام التكريتي
- اسم ابو
- ماعرفة







ارشد : كملي اشوف

ياسمين : صديقة اخذني اليوم الصبح من بيت عمي و الظهر كتلة وين وصلنة كال بالفلوجة و بعدين كال دكي الباب الاسود ما بين اجيب العيال بعدين طلعولي بيت هذا الرجال

-اسم عمج الثلاثي
ياسمين : فؤاد علي معصوم
ارشد : خوال عمام ناس تكربلج تعرفين

ياسمين : ماعندي عمام عندي بس خوال و ما اندلهم لان بأربيل

- ابو شاهين خليها هينا انا راح ادز اسم عمها لو عنوانة لبغداد و يشوفون اكو هيج حجي لو لا

ارشد : لا ما خليها هينا ترد وياي للبيت و انتة خبرني بالجديد اذا شارد صدك اخذها لاربيل نشوف خوالها هي طايحة براسي طايحة
- واذا اقوالها مو صحيحة

ارشد : اتأكدلي من عمها و ساعتها يبين الجذب من الصدك
- ترخصلك عيوني بعد
- سالمات

- مشتهي دليمية من ايد سهولة
- ههههه هي تسئل عنك

ارشد : كومي انتي
.. رحت ويا نزلنة گبال البيت كبل صار وجهي اصفر ولا حبيتهم ماعرف ليش طب هوَ للبيت و طبيت ورا

ابو ارشد : ها يبوي

ارشد : بين ما يتأكدون من حجيها تضل هينا
ام ارشد : عجل ما عفتها يمهم

ارشد : يمة دخيل ربج مادكليلي شعوفها
بعدني هناك و يتقاسمون بالبت خليها هينا أأمن هي براسي براسي

سميحة : حضرتلك الحمام
ارشد : اي والله بازع روحي العزيزة

سهلة : حدري حبوبة حدري گُربي
.. رحت كعدت يمها و افرك بأيدي

سهلة : لا تخافين التردينو يصير ابو شاهين يوديج لاميمتج
ياسمين : اهلي ميتين

سهلة : صخم الله وجهي وهلج وين عمام خوال اخوتج
ابو ارشد : حجية هدي البت فرشلهة خلها تنام

سهلة : مكيريدة اهلها ميتين
فرحة : كلنة يتامى جدة كلنة

سهلة : انتي ابوج شرد برويحتة وخلص منج وامج لفتلها زلمة و شردت
ارشد : لا اله الا الله ردينة

فراس : يمعودات كتلنة الجوع وين الاجل ضالات بس دحكن دكومن
.. ضليت كاعدة يمهم بس الجهال و النسوان
كلها صافنة علية حتى استحيت من روحي

جابو الاكل صواني تلاثة الزلم گعدو ياكلون بوحدة ووياهم سهلة
و النسوان بوحدة و الجهال وحدهم بصينية صغيرة
اول مرة اشوف هيج

سهلة : حدري الاجل جثير يحبوبة مدي ايدج لا تستحين
ياسمين : لا ما اشتهي خالة

ابو ارشد : سميحة يابة اخذيها لغرفتج و صبيلها

اجتي البنية ابتسمت واني هم ابتسمتلهة
رحت وياها لغرفتهة جوة
راحت و اجتي جابتلي اكل وكعدت يمي







ورا شوية اجتي الحجية الحبابة
تسولف وياي
: شسمج يجدة
- ياسمين
-ها كدج وين مدولبتچ الدنيا
ابتسمتلها ودنگت راسي ي

صدگ وين رايحة اني وين گاعدة منو ذولة
شجابني الهم ؟ عمي وين اختفى ؟ وليش هيج سوة و
معقولة هلگد ثكيلة عليه !

يَاسمين شراح تشوفين بَعد ؟
و شعندچ عايشة اساساً !

باوعت داير مدايري
لغرفة جبيرة بيها كنتور جوزي ضخم و ميز عليه فراشات
واصلة للسگف

سهلة : وين البنوات وحدة تزكح تجر فراش من النضيدة
.. اجتي وحدة فرشتلي و فرشت للحجية بصفي
و صعدن البنات كلهن بس سميحة چانت تصلي

كملت صلاة گعدت على الچرباية و اشرتلي تعاي
كعدت يمها

- شنو قصتچ الله عليچ

تعبت من گد ما حچيت سالفتي اليوم
سولفتلهة گامت جابت القرآن فتحتة قرت سورة من القرآن
و مسحت على راسي صابني شعور حلو

- كل ما تهجسين كلها تركتچ تذكري رب العالمين
هزيت راسي و أبتسمتلها

.. رحت لفراشي ردت انام ما اكدر خايفة هذا الرجال ليش هنا شمرني خاف جذب على عمي زين هسة عمو فؤاد وين يلكاني و شلون اروح وياهم للسويد
و خوالي خاف بعد ميودوني لعمي

كعدت الصبح على حركة
- تصلين ؟
- لا
- عش اكو احلا من الحچي وي رب العالمين
- تعلميني
- گومي

رحت وياها واني النعاس مسيطر على عيوني
علمتني على الوضوء و لبستني احرام الصلاة
فرشت السجادات رادت تبدي

- و تُربة ؟

ضحكت .. انتظري هينا اجيبلج من الديوان
عندنا لانو رفجان ابو شاهين مرات يصلون هينا
جابتلي و بدت تعلمني صليت و حسيت براحة
احتلت كُل جسمي

كالت تعالي نتريگ
طلعت وياها چانو گاعدين يتريگون كلهم
بَس هَو گاعد على القنفة يشرب چاي
رحنة للمطبخ هي تسوي و اني اباوعلها

- عجل يابة شسويت بسالفة البت
ارشد : خَلصانة

- يول شو ثردتو تهيرو بساع

- ييمة والله مانا بعازة هالشغل والموت يتحجج

- هلا بي و احنا اهل كرم

ابو ارشد : عش هو العمر يسوة بلياك ؟

فراس : ها يابة عجل واحنك مو بعينك
ابو ارشد : كلكم عزاز ول يابة غير كلكم من ظهري طالعين
بس هذا الجبير معزتو طاغية ع الگلب

ابتسم و مسح شواربة وهم يتناقشون بموضوع شغلهم
- هَيرو الوجبة القديمة لا تگربون صوب الجديد







انفتح باب الشارع و دخلو بَعد زلم مسلحين
و لافين الغتر على وجوههم عبالي حرامية
وگفو بباب المطبخ صاحو

- يا الله

ارشد : هلا بالشوارب
و طلعلهم وبعدها طلعو البقية شيسوون بهالوقت ؟


رجعت نمت كعدت بعدهم تقريباً الساعة ب 12 و نص الظهر
دخلو بالاستقبال التعب ماخذهم عجيب وين راحو ؟
بدن يصبن اكل و هم ياخذون

چنت گاعدة يم سَهلة اجة هو من المطبخ بأيدة صابون
و رافع ردن الدشداشة الغترة شامرها على كتفة
باوعلي و هَز راسة

- ابشرج عمج الكو** شارررد حتى بدون جواز
- صدگ ؟
هَز أيدة وراح يغسل

معقولة گدر هيچ يسوي عمي عمي ؟
دخيلك يا رَبي

ام ارشد : مبارك و ان اشاء الله تضل هينا
سَهلة : گولي يا الله يا مَرة البت يتيمة
- عجل وانا فاتحة دار لليتامة ؟

اشرتلي سميحة باب غرفتها و رحت يمها
- تركچ من امي هي قاسية حتى ويانة
- لعد وهاي المرة الحبابة منو ؟
- اثنينهن امهاتي

ورة ساعتين يمكن
گالتلي يگول أبو شاهين يالله راح ياخذج لاهلج
- اهلي ميتين
- خوالچ

هي حچتها بس گلبي عصرني خوالي من شوكت اني اعرف خوال
و منو يگول يردوني يارب ساعدني ماشية بدرب مجهول
وماكو غيرك مرافقني

طلعت لگيتة واگف يحچي بالتليفون أشرلي بأيدة يالله
و طلع سلمت على سميحة و وطلعت
لحگتني للباب

- لتنسين صلاتچ و اني راح ادعيلچ لتخافين

هالبنية وجهة نوراني و شكلها وحدة راحة من گد الايمان
طلعت ويا بس احس عيوني مغوشة اريد أبجي
بس مادري عليمن عمي وينة ذولة الناس شنو

يا اللهي راح يموتني التفكير
وصلنة لنفس المركز كال ضلي هنا لتتحركين
نزل هو و ضليت اني بالسيارة تقريباً ساعتين متت بالحر و شمس الظهر راسي احس راح ينفجر

ما صحيت الا ع رشة مي بوجهي
شفتة هو وواگف يمة ضابط البارحة چان موجود

- يول انتي مريضة ؟
- ما حچيت نزلت راسي و لميت شعري

فؤاد : انت سيدي لوتي لو تلوتها علينة
شمس الانبار الظهر و عايفهة بالسيارة و مقفولة

- نسيتها تدري ؟

صعدو اثنينهم و رحنة لمركز ثاني و نزلو
و هم بقيت بالحر بس صارت العصر و هم ماكو
و كل شوي اشوف واحد منهم يلقي نظرة ع السيارة و يرجع يدخل







تالي ورا هالهوسة كلها رجعني للبيت
هذا صدگ يحچي ؟
مابية حتى اناقش شافتني سميحة
- يول شصاير بيچ وين چنتي دحكي حالج

- اريد انام راح اتخربط
اخذتني لغرفتها رحت نمت كعدت بالوحدة بالليل
بس ما أگدر احچي من العطش و الجوع
اخاف اروح للمطبخ خاف ميقبلون طلعت من الغرفة
اكو مغسلة بالممر غسلت وجهي و شربت مي من المغسلة
سمعت باب انسد ..

- شعندچ هينا
.. هااا درت وجهي شفتة هوَ بس لابس كلة اسود

- شهالتملعب ؟
- اشرب مي والله
- واليشرب مي من الحنفية !!! جاهلة ؟
- نسيت

فتح التليفون همس .. تأخرنة اليوم والله
صعد الدرج

- عمو
دار وجهة
.. رفع حواجبة اثنينهن بـ معنى كملي

- جوعانة
- عجل يابة و انا طباخة البيت ؟

كعدي سميحة و گليلها
و صعد .. ما گعدتها عزت علية نفسي
انتظرت وكت الصلاة يالله اكلت

ورا ما طلعت الشمس چنت گاعدة اعض بأصابيع ايدي
الحالة الي ما أكدر اتركها

- يلا خية منتظرچ ابو شاهين تهيري
- خاف نفس البارحة
- لا امس طلعتلو شغلة صفح

طلعت غسلت وجهي و عدلت ملابسي لگيتة كاعد بالمطبخ ياكل شافني شرب من الاستكان شوية چاي
- أودعناكم يُبة

سَهلة : محروس يـ بعد الزلم تروح و ترد سالم

.. طلعنة من البيت كاعدة بالسيارة بالمكان الي يصير ورا الصدر
عيني بس ع الشباك وگفنة يم بيت صعد رجال لابس دشداشة رصاصي و لاف الغترة بيضة

ابو قيصر : حياهم الله
- هلا بحامي العرض

ابو قيصر : العَضيد
.. دار وجهة عَلية وگال

- هاي اليتيمة الشامرها عمها ؟
- نعم
- زين الدزلك عنوان خوالها ما عرفتة ؟

- أگلة گاعد آمس انا و الرَبع بالبستان مال قائد
و اجاني ابنو الصغير گال دحگ عمي هذا رجال راكب دراجة
گال عطيها لابو شاهين

- بالكاميرات ؟
- ملَثم
.. و طلع الورقة من الچَكمچمة مال السيارة دحگ هاية

أرشد : انا هسة تيقنت هي حچيهة صدگ
و الزتها بحوشنة عرف و الو علاقة بعمها
ضنتو ما اكضبو والمسكتة الزلم ازوعو حليب امو النَجس

- سالفة چايدة
- شَربة مَي و الحَط هالشوارب

.. باوعلي و گال ..
و هذا عمچ الگو ... هو لو مو مُنحط و گو
ما شُمر عَرضو هيچ شمرة

المال چثير بس الغيرة ما تنشرى

اخخخ لو اكضبو .. فَشر بَكلمة
لحد ما كبرت هي براسي اريد اعرفها

أبو قيصر : ها ها يول جاهلة منين يطفوك انتَ

.. اخذ الورقة و گال
خوالها ب قضاء عقرة بدهوك اذا متخوني ذاكرتي صايرة بشمال دهوك
أرشد : اي رايحيلها قبل

.. ضلو هم يحچون و يطلعون أغاني و يضحكون
زين ليش عمي هيج سوة ؟
شمرني هاي الشمرة عند ناس غُربة شگد أحس نفسي رخيصة بيناتهم بالله اني لو أمي أبوية عدلين هيچ يصير بية ما قاومت دموعي و لا صوت شهگتي الي يسمعة يگول صوت طفلة عمرها ٨ سنوات

طَفة الاغاني
ابو قيصر : لتبچين يابة خوالچ ان شاء خوش اوادم
احسن من عمچ السگط

.. نمت بالطريق و گعدت باوعت اكو وقت بالسيارة الساعة ب 2 ونص بس المنطقة حلوة يعني تختلف عن بغداد حيل و حتى عن الفلوجة
عرفت احنة وصلنة لدهوك

أرشد : دحك نروح لمنتجع كوريك
عبد القادر يشتغل هناك نجيبو يدلينة لان اذا نضل نسئل سالفتنة طويلة
ابو قيصر : الترتاحلو

.. راحو لمكان يجننن يجنن
نزل هوَ و بقة الگاعد بالصدر

اجة وويا رجال ثاني سلم ع ابو قيصر
أرشد : ابو النَسب سوق انتَ انا مليت

.. گعد ليورة بصفي گلبي يدگ سريع يُمة منو ذولي الناس
الراح اروحلهم اني لا اعرفهم و لا شايفتهم
شي بداخلي يگول بلكي ميندلوهم كلش كارهة هاي الروحة

عبد القادر : هاي المنطقة صايرة قريبة ع السوگ
هي شنو هاي البنية ضايعة
ارشد : اي
- گلت هم شسمهم
ابو قيصر : بيت أبو آرميا و ابنهم صاحب محل اقمشة

- هاي وصلنة للمنطقة...

ياسمين .. يُمة گلبي راح يوگف ماعرف ليش ..

..
يتبع

رتبة و ظفيرة - الحَلقة 3 ⚜️ -

انا الما فهمو الـ بيّه
كل قوتي اذا مَرة كرهت انسان
أمسح كل اغانيه
و ما أوصل أبد حَده
حقي من أبتعد
مرتاح بالوحده
أموت من القلق لو شفت آي انسان
(( الماله احد يحس كل البشر ضده ))

..
في مكان أخر

- غفران رحتي لأبن اخوچ صارلو چثير ما شايفچ
- يُمة منين اروحلة عجل ما تدرين بحكمنة

- و زلامچن هيج مخنثة ومالها چلمة ؟
- يگدرون يفكون حلوگهم

- راح الچثير و اجة الشوية
- و ادحك بي يوم افيشششش يا نار گلبي
- عَجل انا امچ ما أخذ ثارة ؟

- بس يمة لا تحچين گبال الجهال بعد
ملعبين على عمهم

...

يَاسمين

نزل أبو قيصر يم صاحب اسواق سئلة و صعد
- يگول ماعرف
سئلو كم بيت ميعرفوهم

- دحك نروح للسوگ ونسئل اهل الاقمشة اذا ع الحال بعد سنة ما ينوجدون
.. نزلو هُم بقةً بس ابو قيصر بالسيارة

دَگ جهازة .. باوعلي وبعدها جاوب
ابو قيصر : هاااااا ... أي احسن ضلي جوعانة .. بعدها سكت و مسح وجهة .. ولي هسة .. وسد الجهاز

گلت بگلبي .. هلو دادة ذولة بس لا عصابچية
چنت أكول هو احسن من الي يسمو ابو شاهين
بس بعد هالمكالمة لا هذاك احسن

شوية و شفتهم يتقدمون من بعيد ووياهم شاب
يمة بس لا لگوهم

: مَرحبا
ياسمين : ضليت بس اباوعلهم حتى ما جاوبتة
ابو قيصر : اهلا
صعدو بالسيارة كلهم اني حصرت نفسي وي الشباك







صار يدليهم و بس يباوعلي مثل المستغرب من الموضوع
وصلنة للبيت و دخلو لغرفة الاستقبال و اني وياهم
يابة شعور الرُخص لمن الانسان يكون ماعندة احد و كلها غُربة
ناس تجيبة و ناس تودي

اجة رجال كبير بالعمر بس المرض ماخذة و مرة اعتقد زوجتة باوعولي بنضرة غريبة كال الولد الي ع اساس ابن خالي

عيسى : يا يابة هذا الغجيل يقول هاذي البنت من اصلنا و انا ماعغفت اتصرف كلت اجيبهم للبيت ..

ابو آرميا : انتي بنت مَريم ؟
.. هزيت راسي بدون حچي و بچيت
فتحلي أيدة أستحيت أفشلة گدامهم و إلا اني ممتعودة
رحت حضنتة و هوَ گام يبچي

بدة يحچي الرجال ابو شاهين ..
أرشد : السلام عليكم عمي وياك النقيب أرشد
بـ جهاز مُكافحة ألارهاب بنت رضيعتك وصلتني لباب بيتي
شلون ما لون اني ما اعرف

بس توضحلي البنت يتيمة و أمانة عند عمها بس عمها الخسيس
تحول هروب لأي دولة بعدنا ما تأكدنا

المهم عليه أوراق تزوير و فساد مَمُنفذ عليه
أي حكم الى أن يُمسك مسك يَد و أخذ عائلتو ما عدا هالطفلة
و بأيادي مجهولة وصلنة عنوانكم و هاي كل القُصة

و إن شاء الله هسة أكدر اطمئن عليها

أبو آرميا : مشكور كثيغ يا أبني الرب يحميك
..تسالمو و راحو ذولاك الناس

كعدت خجلانة من الوضع خاف ميردوني خاف ثگيلة عليهم
ليش يا رب سلمت ع المرة الكبيرة الي موجودة
بس هم مو اهل امي ليش اني ما احجي مثلهم ؟ عجيب !
يلا يجوز اني ما ورثت هاي اللهجة من امي

بديت اسولفلهم كلشي بس هم يعرفون شلون امي ماتت
و همزين ما فتحو شي من الماضي القديم و حسيتهم
مستعطفين وياي حيل

نمت كعدت بالليل حچيت وي المرة أم آرميا
گالت ناديني خالتي جديتي ام آرميا الي يعجبج
صرت اناديها خالتي

بعدين گلت اذا انادي خالي بـ خالي و زوجتة بـ خالتي
خاف الناس عبالهم اخوان متزوجين ياا استغفر الله
گبر لفني ..

اجتي خالتي و انطتني اثنين دشداشة و تراك
گالت هاذي و بچت ..

ام آرميا : هاكي يا أمي هاذي ملابس حفيدتي الي عطتكي عمرها
ياسمين: الله يرحمها

انقهرت عليها بس حجيت بگلبي يمة النوب البس ملابس موتة
و بعدين أموت .. ديلا دادة هَسة انتي شلون حياة عايشة سلام الله عليها

لكيت الاكل حاظر وبس اني ووياهم اكلنة ابنهم ما اجة

ياسمين : خالتي انتو مثل اهلي عندكم بس طفل واحد
أبو آرميا : ههههه يا خالي غجيل هذا مو طفل
لا عندنا بعد بنت و متزوجة بعيد البلد
و غجيل ثاني الي هو آرميا حالياً هو باليابان صارلو سنتين
راح علمود شغلو بعد ما طلق زوجتة و موت بنتو أرجوان







بعدين دمعت عيونة و گال ..
ااااه يا حبيبتي و حفيدتي والرب كثيغ مشتاقيلك انا و جديتك

.. خطية لعد شگد يحبوها
- زين هي ليش ماتت ؟
- هي كانت تعاني من كثيغ امراض من يوم الولادة
وبعدها سوا الها والدها عملية فتحة بالقلب و ماقدرو ينقذوها
و عطتكي عمرها ..

كملو واني غسلت المواعين خطية خالتي مَر على عيشتي وياهم أسبوع صح هم ما مأذيني بس العيشة تخنگ مدرستي من أذكرها أموت و ما حبيت اضايقهم بعد و أفتح موضوع الدراسة صارت خالتي تاخذني وياها العصر للسوگ

وهي ما شاء الله عرف بالسوگ اي واحد او وحدة تسلم عليه يأشرون علية و يحجون كردي وهي تجاوبهم بعدين دگولي جانو
يسئلون عليج هاي البنت منو

بس الي لاحضتة عليهم انو هم شوية بيهم نوع من البُخل يعني خالتي
بعد بس باقي تتعارك وي ابو المحل علمود ينطيها السعر الي حددتة
وهو اصلا بعد ميبيعلها و الناس تباوع و ملابسها حييييل قديمة وهم عندهم محل مال اقمشة

و الاكل احنة 3 بس ع مقدار شخص بس و الريوگ چان بس چاي
و العشا يوم اكو يوم يغلسون و ينامون اني هم استحي احجي
هي من تفتح جوزدانها بي هواي فلوس زين ليش متصرف
بعدين أگول هسة فوك ما معيشيچ تحچين

...

السلام عليكم

ابو أرشد : هلا يابة بشر
أرشد : الحمدلله لگينة خوالها و أخذوها
- الف الحمدلله بس هي شسالفتها

أرشد : يتيمة و بس عم عدها عليه اوراق تزوير و فساد طفر هو وعائلتة و عافها الوصلها النة مادري منو بعدين اندزلي عنوان خوالها ووديتها

سهلة : يا مگرودة يا بنتي عجل ذاك الجمال ماضنتي يرتاح
يولي احنا الحلوات حض ما عندنا

عصام : أي يـ كونداليزا رايس

ارشد : تقلد ؟

- لا يابة يا كونداليزا تروحلچ فدوة
سهلة : عجل انا غير چنت اذا امشي بشارع الزلم كلها أتراجف
هسع صرت ما أخوف

عُدي : هيَ مال تخوفين صدگ تخوفين بس
أبو أرشد: يولو لا تخلوني أگوم هسع بالقرعان اخلي الفروخ أتفرج عليكم

أرشد :سميحة يابة هيري الحمام
سميحة : صار بعد عيوني
.. أبتسم

.. حضرتلة الحمام و كملت رحت اصبلة اكل ووديتو بغرفتو
أرشد : اگلچ
- ها أبو شاهين
- هم حجتلج شي البت الراحت
- لا والله أبد
- ماشي
- عجل خوية ليش اكو شي
- لا يولي حسبالي اكو معلومة تفيدني بقضيتها







...

ياسمين

.. بديت اتعود ع الوضع يعني عادي اذا اطلع بالشارع بس أگوللها خالتي راح اشتم هوى شوية مو مثل بيت عمي

و يومية العصر يگعدون هي و خالي يحطون كراسي
و يگعدون و اكو هم بيوت طالعة منها اشخاص كبار بالعمر
و جهال تلعب بالشارع ووزلم يسولفون
أو يغسلون سياراتهم يعني أجواء تجنن

چنت يومية اشوف بنية حلوة طويلة كاشخة و حاطة مكياج هيچ كل ما تجي اباوعلها و أبتسم و هي هَم تطلع من بيتهم المغرب

فــ بيوم من الايام من طلعت من بيتها أجتي يمي بَعد الابتسامة
رِهام : شسمها ام شعر الحلو
- ياسمين
- شايفة نفسج شگد حلوة ؟
- شُكراً انتي هم حلوة
- منين انتي ؟
- بغداد

- قُربان لوجهج تعالي يمي بالنهار
ماعندي احد بس اختي

- ان شاء الله
... گرصت خدي و راحت

ثاني يوم گلت لخالتي گالت روحي
رحت الهم طلعلتي بنية سلمت عليها شگدد حلو بيتهم
ما شاء الله بعدين أجتي هي رهام

- هاي منيلچ رهام ؟
- هههههه .. ارتبكت .. بنت الجيران شبيج

..ضربتها بالشقة
تعرفنة بس حياتهم حلوة بس ضحك
اني خالي و خالتي حتى مابيهم حيل يضحكون

شهرين صارلي عايشة وياهم تأقلمت ع الوضع و أبنهم عيسى الي يشتغل بالاقمشة ما اشوفة بالليل احنة ننام ب 9 بس الصبح من نگعد ب 8 يگعد من النوم يسلم و يروح

بيوم من الايام اجة ب الستة المغرب چنة هستونة نريد ندخل للبيت و دخل ويانة گال اليوم عازمكم ع عشا

أم آرميا : لا عليش يا أمي اني و ياسمين هسة نسوي مقالي
عيسى : لا يا أمي المطلوب منك اليوم تقعدي و ترتاحي
.. گلت يا الله و أخيراً راح نشبع

راح جابلنا اكل و خالتي كلساع تگول هذا كثيييغ الاكل يا أمي
خالتي رحمة لربج خل ناكل وبعدها سويتلهم چاي و ضلو يسولفون

عيسى : ياسمين شنو رأيك تشتغلي عندي يكون
افضل الك من القعدة بالبيت
- أني ؟ بس ششتغل ؟
عيسى : يعني تساعديني او تتعاملي وي البنات الي بعمرك
هاالشكل يعني

- مادري بكيفكم
أم آرميا : اي يا خالتي غوحي اشتغلي لاتقعدي بالبيت
دام ما عندكي احد خلي الشغل سندك

.. وورا يومين باشرت أشتغل من 8 الصبح بالسوگ و العصر گال خلي نروح للمحل الي بالمول جنط و أحذية و انتي بعد يومية بكييفچ تطلعين العصر او الصبح لو اثنينهم







بس ما تعبت يعني هو چان بس يعلمني وحبيت الجو و الناس يعني حياة جديدة بس الشغلة الي لاحضتها اكو زلم اصدقاء عيسى من يحچون ويا يتغزلون بية لو واحد يحرك ظفيرتي ويضحك لو يگرصني بخدي أحس عيب اني ممتعودة ع هيچ شغلات
وجسمي يقشعر

بس أني صرت أخزرهم بعد ما عادو هالحركات
الله هيج اني أخوف والله مادري بروحي

صرت أشتغل مرات الصبح بس بالسوگ و مرات من العصر
لـ 11 بالليل بالمول بس بالمول احلا لان اكثر شي بنات شابات و الاجواء احلا

صار ينطيني اذا بس الصبح لو العصر عَشرة واذا يوم كامل خمسة و عشرين بس اذا يجيبلي لفة يگطع الفلوس من اليومية
نوب گام من يگلي أكلة ماريد أخاف على فلوسي
حتى اني صرت بخيلة مثلهم

مَر اسبوع أشغل ويا و حبيت الشغل حيل
و گمت أشتري حلويات بالليل وأخيرا بعد ما اخاف اذا ماكو عشة

مَرن شهرين و صارت عندي هواي فلوس
أشتريت ثوب لخالتي و ملابس جديدة الي مال بيت
و مال طلعة حتى أكشخ من أروح
لان چنت البس من ملابس المرحومة

و أشتريت منة اثنين أحذية حتى ما گال خليها علية گال
قطعت مصرفكِ مال اليوم گلت تمام

و بيوم من الايام چنت طالعة الصبح
ف العصر گاعدين بالشارع اني و خالي و خالتي
وگفت سيارة بيضة بس مو عالية
نزل منها رجال هيچ يطلع عمرة بالثلاثينات وگفو اثنينهم و هو أبتسم
وحضنهم أثنينهم شكيت هذا أبنهم المسافر و طلع صح
بس هو مو متزوج وين زوجتة ؟

باوع علية و حرك حواجبة كأن مستغرب
من دخلت للبيت لان يجوز عبالة من البداية اني بنت الجيران

أبو آرميا : اعرفك يا أبني هاذي بنتها لخالتك مريم
آرميا : يشفعلا الرب و تسامحا القديسة
.. وگعد ع القنفة أستغربت هذا شبي اسم الله
خالي و خالتي نزلو روسهم
و اني طلعت من المكان لان الجو ميساعد

كعدت بالمطبخ بس أسمعلهم گاللهم خلصت الدراسة ونجحت وگلت خلي اجيكم مفاجأة و ناوي أتزوج مهندسة وياي جانت طول الرحلة
وهم ممصدگين من الفرح يا لعد هو مو متزوج

بعدين اجتي خالتي للمطبخ كالت جيبيلنة عصير من المحل ورجعت للاستقبال يعني دتقصد جيبي من فلوسج رحت جبتلهم و اجيت
هو قدمتلة ما اخذ خليتة ع الطبلة و طلعت لا والله هذا شبي

بعدين طلعت خالتي دكول شكرا يا قديسة شُكراً يا مريم العذراء
عطيتني مُناي و تباوع للصليب و الشموع الي مخليهم بباب الكليدور و تشعل الشموع و تأدي الصلاة المسيحية

بعدها نمت وكعدت الصبح كشخت ورحت للمحل وعيسى مبين فرحان لان اخو رجع گتلة هو مو متزوج شلون يتزوج بعد
گالي .. لا طلگها من بعد وفاة بنتة لانو هم ما توافقو ابد
كتلة و هو شيشتغل گال مهندس

ورا أسبوع بدو يطلعون عُمال يرممون الطابق الثاني حتى يصير سويت الة و أثثو صار يجنن حيييل بس حتى مطبخ يعني متنزل ويانة الطابق الاول بي استقبال و مطبخ و غرفتين وحدة ل عيسى و وحدة لخالي و خالتي
اني انام بالاستقبال

بس هذا آرميا شگد مكروه حتى ميباوع بوجهي خطية ما شايف روحة بالمرايا بيوم سمعتة يگول لامة انا ماطايق بنتها لمريم تسكن عندنا امها و ابوها ماتو لانو اللعنة ملاحقتهم بس خالتي دگلة بس البنت مالة ذنب وهي كثيييغ حبابة

آرميا : العرق دساس يا أمي دساس

..وهي تسكت بي علمود لا خالي يسمع شگد كرهتة
بعدها حددو يوم الخطوبة و گالتلي خالتي ترحين گتلها لا
انطاني عيسى المفاتيح و أخذت الشغل وحدي بيومها
وورا اسبوعين حددو موعد العرس گلت لخالتي
يعني زفة و رگص وحنة مو ؟

ما عنا حنا
نتزوج بالكنيسة يروحون العروس و العريس
و المعازيم من العائلتين و يبدي الكاهن يقرا وبعدها يعقدون
ويتم الزواج شرعاً و تباركهم مريم العذراء
بعدها يحتفلون بالقاعة
و بعدها العرسان يروحون للفندق و المعازيم كلمن يرجع لبيتة


و حتى بيوم العرس ما رحت هم اخذت الشغل وحدي طلبو مني خالتي و خالي اروح بس ماقبلت

..

أرشد : سميحة هاچ يُبة صعدي الغراض و هيري الاچل
جثير مستعجل
سميحة : تااامر
أرشد : السلام
سهلة : هلا يبعد اميمتك

أرشد : أبنچ تعبان چثير تعبان و عفت أمي و أجيتچ
سهلة : شيوجعك يا ضناي الماهو من بطني

أرشد :يُمة أكو مرة تعبتني بنومي
هاي صارلي فوگ الشهرين متلوع

- عش متحچي ؟

- شتعرفين بية عندي مجال لهالسوالف ؟

- شنو طيفك ؟

- اول مَرة گبل جثير دحكت مرة
الهندام اللابستو كلة ابيض و حجابها ابيض
بس وجها ما دحكتو

سهلة : خير ان شاء الله

- و امس نفس المَرة بس دحكت وجها
عطتني سلاح و گالت

...
يتبع

رتبة و ظفيرة - الحَلقة 4 ⚜️ -

المغرب يريد انكتل مافضت بخنكة
مو مثلك انت حلو وحليان بالفركة
چان انسحابك مثل :
( محبس زغيْر أنسحب من أيد محتركَة )

..
في مكان أخر ..

- يكتل وحيدي بدم بارد وهوَ يشتم الهوى حَسافة

- يامَرة ضنچ نسيتي أبنچ شعمل ؟
- شما عمل مو حق يچتلو جاب دايحة نَغلة ما ينعرف
مرضع اهلها منين تدحك للزلم وهي على ذمتو

-عجل هو تركها تشتم هوى ؟

- يا رجال ترى المچتول ضناك
و انتَ هينا گاعد تدافع للچتال ؟

- أنا لو منة أسوي سوايتو
عش مسوية أبنچ بريء ؟

- لا انت غاسل عقلك هالمجرم
اوووف محد حليبو طاهر و يروح يخبر عنو

- دحكي زين ذاك الباب و ذيچ السَيطرة
روحي ان چان حليبچ طاهر
...

- و امس نفس المَرة بس دحكت وجها
عطتني سلاح و گالت
اني الامانة حطيتها ب أيدك ليش ما صنتها ؟

سهلة : كزبر جلدي يُمة

أرشد : وانا مدولب هسع فهميني وين اودي وجهي

- خافنك تنام مَهموم ؟

- شتدرين شوكت غَمضت مرتاح ؟

- عمن عيوني خمن حساباتك ييمة بيمن أمئمنيك و ما صاين الامانة ؟
تراها الجبال ما شالتها
وصلي صلاة أستخارة كلشي يفض

.. قبل لا يطلع من الغرفة
سهلة : خاف البت مامرتاحة ؟

أرشد : نفس ضنتي من يوم الطيف و ما اجة ع البال
غيرها بس اجذب نفسي وما دحكت شنو السبب

سهلة : ما اعرف شنو سر هالطفلة
من اليوم الي دحكتهت فاتت عتبةّ البيت علمت سالفتها ما تخلص







أرشد : هسع اخابر صاحبنة و يشوفلي الوضع
بس ماريد يطلع حرف من الحچيتة وياچ

- أنا أمك

...

ياسمين ..

صار الشغل مُتعب عيسى لمن شافني
أكدر الزم الشغل و الفلوس تجي كاملة أعتمد علية
صرت اني اتناقش وي اهل البضاعة بس اغلبهم مو مريحين
بالكلام و النظرات ف گلتلة لعيسى هيج و هيج و انطيتهم الة بالاسم

گالي اي هو الشغل هيج الانسان لازم يواجه هالاشياء
و يتلافاها حتى محد يتقربلة حسيت كلامة صح يمكن

تعرفت ع زوجة آرميا اسمها اسمهان سُبحان الله
صدگ لو گالو الطيور على اشكالها تقع فد وحدة متنطاااق
و حتى حسيتهة تشبها من گد ما اثنينهم مكروهين

بيوم من الايام اخذت استراحة يوم و گلت لخالتي نروح للسوگ
و اشتريت كم شغلة بس احس حتى خالتي متغيرة علية
شنو السالفة بالليل خالتي فاتحتني بموضوع

آم آرميا : دحقي ياسمين من راس الشهر
هذا تقومين تدفعين ايجار للبيت لان اني و خالك ما عندنا
و آرميا عندة زوجة و مسؤولية
و عيسى ما يطلع منو الدينار
عاد انتي عينينا

ياسمين: ان شاء الله خالتي بس شكد تردين

آم آرميا : ١٥٠
- هواي هو مرات ينطيني ١٠
- منين اجيب كل شي بهالبيت من عندي

ياسمين : تمام راح انطيج يومية خمسة و انتي اجمعيهن

ورا اسبوع چنت طالعة وحدي من الصبح لليل
وجبت فلوس الشغل وياي لعيسى 400 الف
اني بية طبع ما اخذ يوميتي
الا هو ينطيني ف بدون نقاش انطاني 25 ورحت سبحت
اول ما طلعت لاگتني اسمهان

اسمهان : ممكن تدحقين منشفة آرميا لون ازرق بغرفة عيسى
ما غيرو ياخذا ع ما اسوي الكوفي الغاز عندنا خُلص

ياسمين .. دگيت الباب ما سمعت صوتة
يعني طلع فتحت الباب و فعلاً ما هوَ
و لگيت المنشفة ع الجرباية اخذتها و انطيتهة الها
و لگيت خالتي كاعدة بالمطبخ هم يسولفن
سلمت عليها و انطيتها خمسة رحت نمت

ورا ساعة
و ما اسمع بس الصياح
طلعت لكيت اسمهان و رجلها ع الدرج
و عيسى يصيح وين الفلوس الي كانت بغرفتي
و آرميا يگولة هو منو داخل غرفتك
و خالي گام يصيح عن الفضيحة الجيران عيب منهم

و مستمرين بالصياح اني بس أباوع
الى إن سمعت جُملة خلتني أدير وجهي على الي حچت :

اسمهان : الصراحة و خالة شاهدة نحنا غشعنا ياسمين
طالعة من الغُرْفة انا ما عَتهمها بس احكي الي شافتو
عيوني







صار هدوء و الانضار تحولت علية

آرميا : انا كنت شاك وهاللحظة تأكدت
عيسى : انتي ؟؟؟؟
ياسمين : يا عزا دادة والقران جذابة هي كالتلي جيبي المنشفة
مال آرميا عند عيسى و حتى انطيتها الها كدام خالتي

اسمهان : لا تشهد علية القديسة مريم العذراء
انا ما قلتلها دخلي على غُرْفة عيسى بس سئلتا ع المنشفة و وكنت
عسوي الكوفي و خالتي طمش فيلم بالمطبخ

.. تقرب علية عيسى گال
- تسرقيني ؟
يا كلبة دحقي اذا ما تسلمت الفلوس بأيدي
والي اسمها مريم العذرا اقوم قيامتكِ

ياسمين : و الله والحُسين ما عندي وهذا الكلام كلة كذب
هاي وحدة كذابة تريد توكعها براسي

.. ما حسيت الا آرميا ضربني راشدي صحت بصوت
عالي ههههههههههيييييييي انتَ منو سمحلك تمد ايدك علية ؟
والله اروح اشتكيك عند الشرطة انت و هاي مرتك الحرامية ..

هجم علية صار يضربني ضرب قوي اول مرة انضرب هيج
صرت اناشد بيهم بس محد اجة خالي يريد يلزمة بس ميكدر
عجيبة خالتي شغيرها

ياسمين : والله ما ابقة هنا و لا دقيقة بعد و ان شاء الله رب العالمين يطلع حقي حسبي الله و نعم الوكيل عليكم

اني كلت هيج لو أستلمني عيسى بالضرب
عيسى : تغيدين تشغدين وين خليتي فلوسي يا كلبة يا بنت الكلاب
الا ان وگعت و ما شفت احد منهم اتقرب علية و ساعدني

آم آرميا : بعد كل الي عملو الك ابني عيسى و تخوني
كانو يقولولي ديري بالكي منها وماكنت اخذ الكلام
بس هو العرق دساس

.. خالي هز راسة و دخل لغرفتة رحت لفلوسي الي مجمعتهم
گمت أبچي والله تعبت يلا حصلتهن
سحبت 400 بقن بس شوية عندي لگيتة كاعد ع الدرج بعدة
شمرتهن بوجه و طلعت من البيت حتى محد صاحني

ضليت افتر بالشوارع و اكو سوبر ماركتات مفتحة و الاضوية تارسة الشوارع رحت لبيت رهام استغربت من شافتني و سولفلتلها كلشي وتعاطفت وياي هي و أختها بديت احقد على عمي بشكل مو طبيعي مذلةّ مرتة و لا هالعيشة

گعدت الصبح طَبت رِهام من المطبخ
هاي وين چانت ؟ بس شكلها مو طبيعي
لزمتها أختها و دخلتها للغرفة و هي راحت
ضليت خايفة ذني شيشتغلن ؟
گعدت المغرب

- لعد شتشتغلين
- ع باب الله رزق
- اشتغل وياچ ؟
- ههههههه غير تموتين .. بس اكيف
- ليش اموت ؟

- ههههه اتشاقة وياچ بس باعي شغل تعب
واجور هواي يفيدچ
- شنو ؟

- اذا متردين تشتغلين بكيفچ بس من تطلعين تنسين
كل الي راح احچي
- اوكِ .. اني ارتبكت







- اكو شَفت ليلي و اكو شَفت نهاري و بكيفچ
اذا تعرفين ترگصين بالليل اخذچ وياي بَس ترگصين
وينطوچ راتب

- يُمة بالملاهي ؟ مثل ذني الرقاصات
- بالضبط

- لا عيني حَرام مو عيب انتِ شون تشتغلين هيچ
- يولي اكو احلا منة ؟ راحة و فلوس وونسة

- و تخسرين سمعتچ قحط!

- كش عبالي مَتفتهمين طلعتي ملعبة
بَس اكو شَفت صباحي يفيدچ
- شنو ؟

- جداوة مثل هالة

- أگدي ؟ بشرفچ ؟
حسافة و اني بنتچ يا مَريم

- يبوو گمتي تبيعين شرفيات هي هاي الدنيا
احنة مجبورين شنسوي

- ترى عادي الانسان يبيع مي
و لا يبيع شرفة

- كومي كومي طلعي برة صوچي اني لفيتچ
صايرة شريفة و هو انتِ بواگة

خفت منها لتسويلي شي
طلعت اركض و عيني تباوع وراي
خاف تلحگني كلشي تسوي

فتحت الباب و طلعت من وگفت بالشارع ارتاح گلبي
يمة هاي الناس معقولة مابيهم الزين ؟
لو الله كاتبلي اشوف كل هالنماذچ

جانت بيبي بكُل ليلة تگعد تسولفلي قُصص بنات
لو ما هنَ چان رحت بداهية

چانت بكُل قصة توضحلي انُ " الصبر بطل كُل القصص "

و فَرق الانسان و الحيوان بالدُنيا ليسَ العقل
و انما الكرامة " يا سهولة الدنيا لو كانت بلا كرامة ! "

لكن " خَسارة الكرامة أهون من خَسارة الشرف "

و المرأة سُمعتها اغلى شي تملكة بالحياة
و البَطلة التي تُحافظ عليها حتى الممات

بس چانت السُمعة بنظري و بحسب عقلي الصغير
الي چنت اتلقى بي هذيچ القصص
هيَ بس انُ ما اخلي احد يذب حچي ما اسكتة
و بَس بنات الملاهي مو خوش بنات و سمعتهن زفت

ما چنت اعرف انُ عند كل مرأة شي مُرتبط بالشرف
اذا ما خسرت حياتها فـ أكيد راح تخسر مُستقبلها

و انُ فئة من النَاس تذبح بناتها تعويضاً للخسارة

و الاقوى من هذا ما توقعت بيوم
اصير بوسط هالفئة من الناس

نقذتني قُصص بيبي بهواي مواقف
بس عدم تعمقي هم چان خَسرني مُستقبلي

رجعت لبيت خالي
بس كلت اقاطعهم لان السوو بية مو قليل
احسن من ما رِهام تسويني رقاصة







رجعت للبيت ما احجي وي الكل وهم هَم ميحجون وياي
وتركت الشغل و الصدمني خالتي هم تريد يومية خمسة

ام ارميا : الايجار مينقطع
ياسمين: بس اني منين اجيب خالتي ؟

أم آرميا: مو شغلتي نحنا هم ماعندنا
ياسمين: والله مادري شكلج
أم آرميا: يلا اعطيني الي تقدري عليه مليح
ياسمين: ان شاء الله

بَس خالي بيهم چان متعاطف وياي
لكن امرة مو بيدة مستضعفي بسبب مَرضة

ورا اسبوع تقريباً العصر چنة كاعدين بالشارع اني و خالي و خالتي
من بعيد و شفت سيارة دخلت بفرعنة و متوجهة علينة ماعرف شنو
الفضول الي مخليني بس اريد اعرف منو حينزل منها ..

..

أرشد :شلونة النسيب
- هلا برفعة راس آل ...

ارشد : شلونها اختي و ابن اختي
ابو قيصر : يبوسون ايدك

- حبيبي ، والله يا خوية
- خير خوية

ارشد : ابو قيصر روحي معلعلة بالله بشرفك انا وين و الطيوف وين ؟
هاي صار تلاث شهور على نفس المنام حرمة مشيّلة بأبيض
تگول بالمنام اني الامانة حطيتها بأيدك ليش ماصنتها ؟

و انا ببالي ما تجي غير الطفلة اليتيمة غير افتهم شتصرف
هسع بالدوام ما شايفين الراحة هنوب بالنومة هم ما انشوفها

گلت راح أخابر فؤاد يدحكلي الوضع
ابو قيصر: انا رايح هاليومين هير نفسك خاطر نمشي
ارشد : تعبان يول

ابو قيصر : هناك تنسى التعب
ارشد : يولي انت متكبر و انا ما أگ** على حساب أختي
ابو قيصر : ششايفني يول زاني بس ندحك

ارشد : بالحرام اذا ترف العين على نثية
چزت الروح چزت

ابو قيصر : ابو شاهين هسع لو تخطبني ارضى
هههههه
...
سَميحة

أرشد : سميحححة وينچ بوية
سميحة : ها يابة
ارشد : هيريلي الجنطة باجر طالعين لأربيل
- امممم شتسوي رايح
- من شوكت تسئلين انتي ؟

هاااا .. بالغلط والله .. بس جيبلي كرزات
- صار

يوم السبت ..

ابو قيصر : عليهم ؟
أرشد : عليهم
- دحگ علية يبو شاهين نخمن البت ما مرتاحة
بهالحال أشتعمل ؟

أرشد : نوصل والله كريم

..

ياسمين..
وگفت السيارة گبال بيتنة و نزلو منها تلث زلم
باوعت زيين هذولي شايفتهم اي هذولي الجابوني
ابو قيصر و ابو شاهين
الجيران تباوع







الي لفت انتباهي هوَ
چان لابس دشداشة بيضة و لاف الغترة
بشكل حلو اول مرة اشوفة لابس هيج و السبحة بأيدة

أرشد : السلام عليكم
.. و هوَ يحط طرف اصابيعة ع جبهتة
، وحدة من اشارات السلام

أبو آرميا : و عليكم السلام تفضلو يا أبني البيت بيتكم
- الله يزيد فضلك يابة

.. دخلو و خالتي گالت روحي جيبي عصير من الاسواق
رحت اخذ فلوس من خانتي
و اني دا أطلع سمعت صوت وگفني

- تعالي ووين ؟
ياسمين : ها خالي رايحة للاسواق
بعدها ضربت المسافة الي بين عيوني .. اقصد عمو

أرشد : فوتي للبيت ما عاتبين عليچ
ياسمين : و انتَ شبيك ؟

رفع حواجبة اثنينهم بمعنى اي كملي
سكتتت

- شبيها أيدچ
ماعرف شنو الي خلاني احچي الحقيقية
- غير سووني بواگة و ماخذة منهم أربعمية الف
من ورا هاي الحية مرت اخوهم ان شاء الله سرطان بدمها

ابتسم النوب مسح شواربة بأيدة وسوة روحة مصدوم
- و انتِ عَش تاخذين هالمبلغ يولي ؟

ياسمين: باع اني المن احچي
هو انت اكلكم يتيمة ما صدگتوني
تصدگني على الفلوس و بعدين اني ترى معايزة
هو لو مو اثول ميصدگ بالحية

مسلم محلاتة بأيدي صار أربع أشهر ما اخذت ربع
اجي أبوكة من البيت شنو هيج حيوانة وما افتهم ؟

- عَش ماكو زلم تاتشتغلين انتِ ؟
- لا هم گالولي سندي نَفسچ احسن

أرشد : و هذا أثر أيدچ ضرب !
ياسمين : ههه لا وشم

ما ضحك بس اتقرب علية ولزمني من طرف الردن

أرشد : من أحچي وياچ لتستهزئين بكلامي يا مُحترمة

اول ما دار وجهة طلع صديقة
أبو آرميا: ما شربتو شي يا أبني
ابو قيصر : لا عمي عجل جايين نجربك ؟
دحك نحنا جايين نشوفك و نطمن
على هاذي اليتيمة ها يابة شخبارج ؟

ياسمين: الحمدلله
أبو قيصر: ها ابو شاهين نمشي
- نمشي

.. حسيت بتأنيب الضمير من گالي لتستهزئين
بعدين اني ليش هيچ احاچي ؟ عمچ عافچ و هو ما عافچ







صعدو بالسيارة يريدون يرحون رحت من جهة الصدر مال السيارة
ياسمين: اني اسفة عمو .. إبتسم
أرشد : گولي خالي يالله اقبلها

ياسمين : ههه اني اسفة خالي .. وحطيت
ايدي ع حلگي اضم ضحكتي
- كضبي

باوعت لايدة بيها ورقة .. رفعت حاجبي
أرشد : يول شو عايشة اللحظة ؟
اذا مالت الدنيا بيچ من اي نقال حاچيني على هالرقم

ياسمين : ماشي بيباي .. و لوحتلهم بيدي
ابتسموا و هو لوحلي بأيدة عود ادخلي للبيت

ام آرميا : وركي اني مو قلتلك جيبي عصير
- هو الرجال كال لتروحين
ابو آرميا : انا بحياتي مادحقت هيك غجاجيل شُغفاء
ام آرميا : اي كثيغ

اخذت الورقة و ضميتهها بنص غراضي
هالمرة تعاملة احلا من ما چنت عدهم ضليت بس افكر بيهم
احسهم احن من ولد خالي علية و اتذكر من گالي گولي خالي
و ابتسم و يصيب جسمي شعور حلو ...

بعدين گلت اني ليش ما اشتري بفلوسي تليفون
زين ليش من انطاني الرقم يالله اجتي براسي فكرت التليفون
شنو شبيج ياسمين ما صدگتي ! شگد خفيفة

بعد فترة .. الدنيا كلششش ضوجة چان الشُغل ساتر علية
عيسى ميحچي وياي بس نضرتة الي مدري شلونها
بيوم من الايام الصبح حسيت بأحد يگعدني فتحت عيوني

عيسى : يلا قومي للشغل
.. انصدمت گتلة لا ما اروح .. ما لح علية عافني وراح
بعدين خالتي گالت

ام آرميا : وركي شنو مستفادة من قعدة البيت
ترى ماكو احد يتحمل احد ابني مستقبلك لوحدكي
باجر اني و خالك راح نودع هالحياة
انتي وين تروحي

- اي حتى اشتغل و المهن و تطلعوني بواگة
و تاخذوهن

-نحنا ما نتبلا اسمهان شاهدة

اسمهان : يا امي انتِ صدق تحكي و تأمني مقصوفة الرقبة هاذي
- افضل من القعدة بالبيت و بالتالي هي اعطت فلوس لعيسى

ياسمين: والله اكص ايدي اذا ما طلعتي انتي الخماطة
- شنو خماطة ؟
-يعني بواگة

- بواكة ؟ ما عفهم شنو تحكين بس اكيد عتجاوزين
- اي عفية يعني دا اكول انتي السرقتي الفلوس انتي الاخذتيهن
و شمرتيهن براسي

شو هاي كامت تبچي وصعدت فوك خالتي رزلتني
و ما نزلت لليل اجة رجلها شوية و نزل يركض
لزمني من تيشيرتي و ضربني راشدي

خالتي ما قبلت
و اني صرت اعيط فضحتهم بصوتي والله تعمدت
دخل عيسى سحبني منة
- شعتعمل انتَ

أرميا : هالكلبة الحقيغة الي ما متغباية ما اريد اشوف خلقتا
بالبيت عَشوف مريم بيها
عيسى : شنو سوت
آرميا: عتتهم زوجتي هي الي اخذت فلوسك

ياسمين : والله مثل ما هي تتهمني اتهمها مو بنت البطة السودة اني
آرميا : لا انتِ بنت مريم .. و ضحك ضحكة استهزاء و راح

رحت نمت بالاستقبال اتظاهر القوة گدامهم
غطيت راسي و گمت ابچي الى ان ارتاح گلبي شوية

راحح ارجع اطلع وي عيسى احسن شي
عاد اخلص من هاي المَسمومة و اجي انام گُبل
و بلكي الگة غير شغل

من ثاني يوم رجعت اشتغل وي عيسى
بس شرطت عليه ما اطلع وحدي و لا امد ايدي
على اي فلس يخصة
هوَ گال تمام

اذا تهموني بالسرقة ليش رجع يشغلني ؟

رجعت لحياتي القديمة و كُل الناس الاعرفهم گالو
شنو هالغيبة گلتلهم مريضة رجعت اجمع فلوسي

و صار عيسى ينطيني حتى إكراميات ومرات يطلعني للمول
نتعشى ماعرف ليش سُبحان مُغير الاحوال
بس الشي الي مضوجني
نضراتة صارت مو راحة

بيوم من الايام جنت طالعة يوم كامل و هو طلع بس الصبح
ماقبلت الزم الشغل وحدي گالي شوية و اجي
بس چذب ما اجة

رجعت
للبيت ما لگيتة سبحت و بدلت
و جنت واگفة يم المرايا مال السنك
امشط هو دخل و باوعلي وعض شفتة أستغربت !
- شبيك ؟
- لا ماكو ... ودخل للغرفة

اخذت الفلوس و دگيت الباب وانطيتهن الة
عيسى : اقعدي ياسمين
ياسمين: ها
عيسى : راح اقولك شي بس مو تعصبي و لا تفهمين غلط

- شنو
- شنو رأيك و كل يوم لما ينامون أهلي تجي لغرفتي و اعطيكي 25
- و يعني شسوي ؟
- تساعديني بالحسابات

- وليش الا خالي و خالتي نايمين ؟ عادي اساعدك ماريد فلوس
- براحتك اني قلت افيدك
- لا شكرا ... عفواً

يُمة كلامة مو مريححح ما فاهمة
شنو يريد بس شكلة صار يخوف


بعد خمس ايام .. چنت نايمة بالاستقبال
.. فزيت على ايد تتحرك ع جسمي
درت وجهي بسرعة ايدة على حلگي و همس
- اشششششش اني عيسى

... صَدمة .. شراح يسوي ؟ شنو ميخاف ؟ وشيريد مني ؟
و بسرعة گام و طلع من الغرفة ضليت بصدمتي لمن طلع الصبح
وما نمت

كعدني على الشغل وگمت رحت للمغسلة غسلت وجهي
و تذكرت الصار اباوع لملامح وجهة عادي معقولة جنت احلم ؟

رجعت اشتغل و الوضع عادي بس المشهد ما راح من بالي
الى ان اجة اليوم الي ثبتلي
انُ الشفتة مو حلم وانو مرحلة حياتي بهالمكان بلشت تنتهي

يوم الخميس
رجعت من الشغل بالليل ...

___
يتبع

رتبة و ظفيرة - الحَلقة 5 ⚜️ -
اتمنى أردلك بَس صَعب
منتهية اكيد السلعة إذا رجعت على الباعوها
و البوگة زحمة من الاهل
محتار تبقة بفشلتك
لو تلزم الباگوها ؟
-رُسل فهد

..
في مكان اخر ..

- يُمة تعبنا و ثارنة ما اخذنا
انتي مصدگة يعطيچ ضنا هذا النفس اليشمو
ما يرضى واحد يشمو ورا

- و أنا اتركو يرتاح ما عيب والله
لو ما ثابت على حچايتو عجل ليش لهساع ماتزوج ؟
بس اولو و تاليو يتزوج

- صابرين تريدو و موافقة تعطي كل خلفتها
بس هو عش مايرضى مانعرف
يربي معقولة ؟

- معقولة ما يخلف ؟ ويروح تعبنا بلاش ؟

- ما ضنتي هيبتو كلها و تاليتو ما يخلف
اكلنا هوى معناها
- اخخخخ ولكم اريد افرفح گلبو
ضاعت كل الحيّل

- دزي زلامنا يچتلو و يشمرو انگس شَمرة
- ما صبرت كل هالسنين حتى بس اچتلو
اريدو يعرف الضامتو انا شنو

اريدو يواجهو و يگلو انا ابن الچتلتة جيت اخذ ثار ابوي

- و احنة ييمة نضل هالعمر كلو ندحك
وهو يتأمر علينة ؟ نفرض تزوج بزرتو شگد
ينراد يالله تكبر ؟ وهوَ شغلو خطر يجوز يموت بي
ساعتها لا حضت برجيلها و لا خذت سيد علي







- اششش الاريدو يصير ان چنت عايشة
لو بعد مماتي دم باسم برگابچن

...
يَاسمين

يوم الخميس
رجعت من الشغل بالليل ...
بدلت و دگيت الباب ع عيسى گال دخلي
انطيتة الفلوس ..

عيسى : عندي جرد حسابات تساعديني
ياسمين : هااا .. تمام بس بسرعة اريد انام

بدينة بالبداية نجرد و هو يعلمني و يعزل فلوس
لكل بضاعة لان قرب العيد
و گال لازم نجيب بضاعة جديدة
و اني اكتب الالوان الي خلصت بالمحل
من جنط و أحذية شفتة خانس رفعت راسي
لگيتة صافن علية گتلة هااااا ؟

تقرب يمي دفعتة رجع تقرب صيحت و دفعتة سد حلگي
صرت اقاومة ما چنت اعرفة شيريد بس معاني وجهة تغيرت
گلبي يگلي اكو شي غلط

و لا چان تفكيري بيوم يروح لهيچ شغلات اقوة شي
عندي اذا احد ذب حچي بالشارع كون افشلة حتى ميعيدها

مد ايدة لظهري جسمي قشعر و صَابتني رَجفة

ما أتذكر شلون شلت مزهرية
الي چانت على الكومدي وضربتها براسة ..
معقولة أني ضربتة بس والله ما ادري شلون هيچ سويت !

چنت اريد اخلص نفسي بشراسة رغم بنفس الوقت ما ادري اكو شي
اذا اخسرة حياتي تنتهي بس احس رب العالمين وگف وياي
بهذيچ اللحظة

قطع تفكيري و اني اشوفة فاقد الوعي و الدم ينزل من راسة
عزا مااات ؟ شلون ضربتة ؟

ركضت فتحت الغرفة وين اروح يربي ؟
عزا خاف مات ويجون يكتلوني شلون بية

أدية صارت ترجف وحرارة صابت جسمي
غمضت عيوني و حرارة الدموع احتلت خَدي

اشرد ؟؟
اي احسن شي اشردد !!

رحت للخانة مالتي و اني امشي على اطراف اصابيعي
طلعت فلوسي شفت ورقة الرقم مَشمورة بَعيد
مادري ليش اخذتها
وطلعت من البيت ركض

صرت امشي و مادري رجلي وين توديني
بَس الرجفة ما فارگت جسمي ربي و التالي ؟
ربچ شعلي هو انتِ مَوتي الرجال

يعني مقسوملي
اضل اخدم طول عمري حتى اعيش عند العالم
وتالي لو ضالة تخدمين ولا هالمصيبة

وين اروح !
وين انطي وجهي عساها بحضك
و بختك يا عمي على هاي الدگة
عاد جنت انظف مواعين وكاعدة و ساكتة

اشتري تليفون و اخابر هذاك الضابط ؟
زين اني ليش ما افكر بغيرة ؟

لا يُمة النَوب يشمروني بالسجن
هي خاف عايزة بقى بس السجن ما طبيتيلة ..







تعبت و اني أندب حضي و افكر بصعوبة المُستقبل
التزمت الصَمت و مشيت

تعبت من المَشي گعدت على مَسطبة
بـ حَديقة مَچان بيها أحد فارغة .. ظلام
و بَس صوت الصراصر مسيطر على المكان
ما حَسيت شلون نمت ..

گعدت على صوت ضحك و چفوف تتلمس بشعري
فتحت عيوني اثنين شَباب سكرانين
و ريحتهم تكتل من هَمشت روحي عيطت و ركضت
گامو يركضون وراي بس مو مثل سرعتي

الشارع بي سيارات بَس الموقف مُرعب
چان اصعب موقف عندي
اذا تطفى الكهرباء و اني بالحَمام أتخيل الاشباح بكل مكان

و هَسة !
أفتر بشوارع و حتى ما أدري الساعة بيش
و اولاد الحرام تارسة الشوارع
و التالي ؟ مو كل مرة تگدرين تخلصين يَاسمين

ما خُطر ببالي غير بيت دُرة
بَس شلون أروح ؟
اي بَس هيَ تضمني يمها

وگفت إنتظر تكسي
مَحد يقبل يروح واحد منهم هَز ايدة و حرك السيارة
اكيد بنص الليل ووحدچ و تردين ترحين لبغداد
منو ميشك بيچ من الملاهي !

تعبت و اني أوگفهم و محد يقبل
اروح لرهام بين ما يطلع الصبح ؟
صار شطولة هذا اليوم الي صُبحة ميقبل يطلع
اجرت واحد و رجعت للمنطقة

باوعت الباب مَفتوح مال البيت
و سيارة ارشد موجودة ؟ يمة شجابة ؟
يبو يبو

ختلت ورا حاوية مال نفايات براس الشارع
شفتة طلع وگف بالباب و لازم خاصرتة من الجهتين
گلبي دگاتة مو طبيعية
شفايفي يابسات من الخوف ..

هَستوة بدة الصُبح يطلع
والله هاليوم مَر علية كأنما سَنة
باوعت مرة ثانية ما هيَ السيارة

ما بطلت أأجر سيارات الا ان وگفلي واحد
- بغداد
- بَعيدة تدرين المسافة شگد
- ادري تروح لو لا
- صعدي

صعدت و اني أمثل القوة
بَس عمري و ملامح وجهي مو مال هيچ اشياء
البنات بهالعمر مَتطلع اذا مو چبير وياها
لذلك ما الوم نَظرة أحد الي

ما أتوقع أحد مكسور بگدي بهذيچ اللحظة
اليتيم اذا أهلة مَاتو يلمونة البقية اني كلها نافرتني ليش ؟

طريق طويل و أزدحامات و جوع
و ڤوبيا من ريحة البانزين و الخوف
و منظر السكارى البارحة الي چان ذبحوني و اني نايمة
و عيسى هسة سوولة فاتحة لو لا !

نمت ..
گعدت على صوت الرجال موگف السيارة
- بابا وصلنة بغداد وين أوديچ ؟

- الغَزالية

-اقرب نقطة دالة
- يعني شنو ؟
- مستشفى ، مدرسة ، جامع قريب عليكم
- اي مدرستي اسمها ....







الرجال چان مو كلش يندل خابر واحد
و ضل يدلي بي كل شوية يفصلة و يرجع يگلة ها منين اطلع ؟
بالشَافعات يالله وصلنة لمنطقتنا

ما ضل واحد يعتب علينا ما سئلنا ع اسم المدرسة
اني ما أتذكر غير درب البيت و المدرسة
ماچنت اروح لغير مكان

من وصلت المَدرسة احس الهوى كفخني
ماعندي ذكريات حلوة غير بيبي و دلالها
بس ع الاقل چنت عايشة بأمان

دليتة على البيت وصلنة
نزلت اريد ادگ الباب الرجال صافن علية

- عمي الكروة اريد اروح عندي عائلة
ضربت راسي .. اجيت يمة انطيتة

حرك سيارتة و راح
دگيت الباب و اني الخوف محتلني ماعرف ليش
تلاشى خوفي من سمعت صوت ام دُرة
- منو
- أني خالة
فتحت الباب

شافتني و شهگت حضنتني
- ولچ دادة شرجعچ الشرطة طوقو حتى بيتكم
معقولة طلع عمچ هيج عليه فساد ؟

- خالة هو يمتى اخذني دزني بأيد صديقة
للفلوجة و صديقة شمرني عد عالم اخذوني لخوالي

بعدني كاعد احچي و طلعت دُرة
- يااااااسمين
حضنتها و دموعنا نزلت سوة
دخلت جوة گعدت اسولفلهن كلشي
لحد ما گلتلهن على عيسى ام دُرة لطمت على خدودها

- خالة ضميني يمچ عليچ الله
هذا الضابط يريد يسجني لان لگيتة البارحة واكف بباب البيت
اكيد هسة درة

- و شمدري اذا انتي دگولين بيتهم بالفلوجة
- والله مادري حتى اني انصدمت
- احد بالبيت عندة رقمة خاف خابرو ؟
- مادري والله يجوز خالي عندة

جابتلي اكل و انطتني دُرة ملابس
شوية ارتاحيت بس من تذكرت منظر عيسى احتلني الخوف

ام دُرة : عمچ من يا طينة الله خالقة و هيچ زايح الغيرة منة
لچ عيني ماكو هيچ
دُرة : والله من زمان اني اكرهة هو و مرتة هاي كلها سوالفها
- عمت عينة اي والله اذا مرتة تخلي يشمر بزر اخو عند الغربة

يَاسمين: خالة والله تعبت اني شمسوية و هيچ ديصير بية ؟
- خلي عينچ بعين الله الخلقچ ما ينساچ

راحت أم دُرة و گعدت أسولف لدُرة
شلون من اجانة لهناك و انطاني رقمة

- ولچ شو هايمة بي ؟ رحتي لاربيل و طلعت عينچ
- عود احبة ؟ اييييييع اني اخذ ضابط عيونة زايغة
كلهم مو راحة من عمي و شيلي ايدچ

مَرن يومين واحنة حاطات دمنة بشيشة
كل ما يدگ الباب عبالنة الشرطة
ام دُرة حتى ما طلعت و لا خلت دُرة تروح للمدرسة
عَدن اربع ايام گالت يجوز ما مات ؟







رجعلي الامل بالحياة
- زين شلون ندري ؟
دُرة : مو عندچ رقم الضابط نخابرة
ام دُرة : اشششش لچ النوب علية ضباط

- خالة انتي خابري مو احنة
- انچبن يجوز صدگ مات حتى نروح بالهاوية
- يُمة لعد نبقة مَحبوسين بالبيت
- لا باچر انتي داومي بس ياسة متطلع
لا يلچحها واحد

دُرة : نگول لعمي ؟
- ولچ دررررة عقلچ طفي لان مامنة فايدة
- مو صوچچ يمة

ثاني يوم دُرة داومت و اني لا
بعد ما چنة نروح و نجي سوة
بعد حتى نصف السنة امتحنو وين ارجع
گلت لأم دُرة اريد تليفون گالت
خل نشوف شلون تصفة و اجيبلج

مِشت الايام بـ بيت دُرة لا حِس و لا خَبر
عم دُرة مرات يجي بَس امها تختلني دگول هذا مكروه
هسة يگول احنة مَنبتلي بيها و يشمرچ

..
سَميحة

بيوم چان باچر نزول أرشد و منتضرينة
بَس ما اجة گال عندي واجب وشغل ماگدر اعوفة
وراها بيومين أجة

بَس مو مثل كل مَرة
اتوقعتة مَهموم من الشغل الى ان تصنتت عليه
هوَ و امي سَهلة

- يُمة أختفت طرگاعتي

- يع يُمة وين راحت البت ؟
- الكلب إبن الكلب متحارش بيها ابن خالها
و ضاربتو الذيبة مخلية دمو بطولو ومنهزمة

- يمكسور الرگبة شلة على هاليتيمة
الفَقير على الجبل و الچلب عضو

- فُص ملح و ذاب أسبوعين صار
خَميت كل دهوك و ما دحكت الها ضِل

- لا گالها الله خاف ...
- ياريتها كاتلة نَفسها أرتاح

- يَع ؟

- و لا تتقشمر و يزتوها بدرب مو زين
-دامها كتلتو خاطر شَرفها ما تبيعو بالرخيص

- مَتدرين بولد الحَرام غادي شكثر
يبيعوها ، يسووها بنت ليل ، يتاجرون بأعضاها







- دخيلك يربي احميها هاليتيمة
دولبتها دنياها وهي هاگدها چنها فَرخة

.. طَبيت و هم ما فتحو موضوع بَعد
بالليل گال رايح هم واجب ابوية ما قبل گالة شنو السالفة
عجل ما نشوفك

انقهرت عليها ضليت بكل صلاة ادعيلها يلگاها
أول مَرة أشوف أرشد هيچ مَهموم على شي
غير اذا خسر وجبة

...
يَاسمين

أجتي أم دُرة گالت شدگولن راح انخة ابن جيرانة
خوش ولد بس هوَ نگدر نسرة
و اگلة يروح يسئل عنهم و يشوف ؟

- عشتي ماما والله خوش فكرة بس
شلون يدگ الباب و يگلهم ابنكم الضربتة ياسمين
مات لو بعدة ؟
- لا أكلة ونشوفلنا صورة حل اذا قبل يروح

كَيفنة راحت و اني دُرة بقينة منتظرين
بالگراج ندعي يوافق أجتي گالتلنا قبل الحَمدلله
باچر راح يجي حتى تنطي عنوانهم

و اجة باچر
أندگ الباب و هو ضل واگف برة سئلني كم سؤال
و گال چان عيطتي صحتي الي موجودين مو الا تموتي
ويروح حقچ
- مادري
ام دُرة : ابو مراد صدگ تحچي حتى لو مات
هي ما متقصدة طفلة وحاول يعتدي عليها
لعد تنطي مجال والله خاف يموت طبة مرض

- لا يابة مو هيچ هوچلب و حقير
بس هي وينها ووين السجون
- بلكي ما ميت عاد تخلص منهم

كمية التناقضات بينهم دوختني
گال اني رايح و راح اضل وياكم على اتصال

سدينة الباب و گعدنة نفكر اذا ميت شلون ؟

گالت راح اروح للسوگ اجيبلچ تليفون
چلبنة الا نروح وياها اني و دُرة

ام دُرة:ديلا بدلن خل نروح للسوگ
نضيع وكت بين ما يوصل هي لو بالهدف لو بالنجف
بَس اذا لچحچ واحد شون دادة

دُرة : عادي تلبس عباية و تدنگ راسها محد يعرفها
- اوك البس عادي

لبست عباية دُرة مال الزيارات تسحل وراي
شهالذة من هالفگر مادري

رحنة للسوگ گلتلها اشتري تليفون ما قبلت گالت بعدين
اشتريت MB3 و سماعات و دُرة عدها رام ثاني
لان يومية أسمع وياها
بالليل اني سماعة و هي سماعة
لَطميات باسم وحدة چانت منزلتها دُرة اسمها هضموني

خاصتاً المقطع الي ما أگدر اتخطى چنت
دائماً احسة يمثل حالتي

هضموني هضموني
يا بوية هضموني
يا بوية شحچيلك شصار بحالي ؟ من ودعتني
لا محنة و اثنين التمر ببالي ؟ يالدللتني
حال اليتيمة الضَلت بلا والي ! ياليتمتني
ليش انحرم من شوفتك ؟ يا بوية هضموني







اشتريت ملابس و كم شغلة و اخذنة
اكل جاهز و رجعنة للبيت كاعد احس نفسي
واحد باجر يموت و اليوم يدللو

اني و دُرة الطريق كلة نتمضحك على شكلي
و امها تريد تكتلها بنص الشارع

رجعنة و كلساع ام دُرة تدگ على الرجال
و يگلها بعدني تالي گالت بس ما اخابر الا هو يتصل

توضيت و فرشت السجادة و گعدت ادعي
دُرة اجتي وياي ما خلينا شي ما سوينا بهذاك اليوم
وما خلص

صار الليل و ماكو اتصال
رجعت اتصلت خالتي ما جاوب
الخوف زاد
روحي راحت

شوية و هو اتصل هيَ هم أيدها ترجف
جاوبت و فتحت سبيكر

- الو
- ها بشر الو
- ما ميت بس متأذي براسة شوية

- الفففف الحمدلله يربي الف الحمدلله
يتيمة و ما قصرت وياها ولو هو يستاهل الموت
بس منريد ايدها تتلطخ بدمة الوسخ

- اي الحمدلله .. سكت و بعدها گال يلا
اني مسافة الطريق و جايكم

دموعي نزلت و حضنت دُرة الحمدلله ما صرت مجرمة
هيَ بس الحُرية بقت و انحرم منها و أنسجن !

لو أدري هيچ يصير بية
من زمان اجيت يم دُرة و لا ذيچ المذلة الشفتها
حتى بالمدرسة چان بقيت
بس أوگفي ياسمين !
هم تضلين عالة ع العالم هي مرت خالچ وچانت
تاخذ منچ راتب ....

چانت الساعة ب 11 بالليل
وام دُرة منتظرة الرجال دگول لا يصير بي شي
بهالطريق الخطر و يروح ابن العالم

أني گاعدة بالگاع و دُرة على القنفة
تظفرلي ظفيرة فَرنسية
كملتها و گعدت تتغزل بية يمكن لو اتزوج رجلي ميتغزل
بية هيچ

- بشرفي لو رجال ما أفوتچ
- ههههههه لچ ويني چلحة ملحة
- بَس العيون دباعي رموشچ يشگن
نحچي و وگفت سيارة بالباب سكتنة

ام دُرة لبست شالها و وگفت بباب المطبخ
اندگ الباب طلعت فتحتة واحنة واگفات

الرجال ابو مراد
- يابة سوي طريق اكو رجال وياي

- غدرت بينة يدادة ؟
- ام دُرة مو عيب تطلع مني بشرفج ؟
رجال يمكن يعرف البنية

مَدت راسها و ضربت خدها
- راح يسجنوها ؟

تقربت يمها خلتني وراها
- والله ما اطيها حتى لو مات مامتقصدة شمعلمها بالسجون !
يطيحون حظها







بعدها تحچي و اجة صوت

- السلام عليكم

- وعليكم السلام سيدي والله البنية يتيمة و متدري
هو حقير و تحارش بيها من همشة روحها و النفس عزيزة

- يَابة منو گالچ هو مات ؟ عار ما يصيرلو شي
بَس هي وينها هالطرگاعة !

سمعت صوتة هذا هوَ مديت راسي من وراها
بملابسة السود و سلاحة بخُصرة شافني

- شلونها المجرمة ؟
- هااا

- تزكحي تاريد احچي وياچ
معاني وجهة مو مال اني مسوية جريمة
طَمني لمن غَمض عيونة و أشر بأيدة تعاي
بَس ام دُرة ما قبلت
- اسمعچ صوتو ؟

- انا شمعرفني بصوتة بس خايفة عليها
وهي امانة

- برگبتي لا تديرين بال

دار وجهة و راح صعد السَيارة حَركها و راح
اني أنقهرت بَس خالتي تطمنت من راح
أشرتلنة طبن جوة و ضلت تحچي وي ابو مراد

طبينة اني و دُرة
- هسة ما أفتهمت ميت لو لا ؟
- حتى اني بس لو ميت چان ما عافچ الضابط
هو هذا الانطاچ رقمة
- أييي

- حلو بَس مو راحة
- هوَ وين اكو ضابط راحة ؟

ورا شگد يالله دخلت امها
- وينچن الحَمدلله عايش و اني طحت للزلم دگ
يگول من وصلت سئلت عنة جماعة واگفة بالركن
گالو شتصير منة گلتلهم صديق العائلة
دلوني ع البيت و رحت

طلعتلي مرة چبيرة بالعمر يگول بعدني ما مسلم
طببوني للگراچ و گالو صيحي طلع شاب رايح وجهة من الضرب
گالو تعرفو ؟ گاللهم لا ماعرفة

تالي غاصري المگرود گايليلة انتَ منين
و گايللهم الاكو و الماكو يگول انا عمي براسي عائلة
مرة و جهال گلت لا يذبحوني شَحصل

بعدين الجماعة مخابرين هذا الاجة ويا
و جايبة و جاي گايلة هاي المدة كلها ندور عليها
شوداها لبغداد هو هذا يعرفچ ؟

- اي خالة هو هذا الوداني لخوالي
- خطية بس يالله اهمشي خلصتي
- اي الحَمدلله







هيَ تحچي و اني بالي يَمة خطية
ليش ما حچيت ويا هوَ ليش هيچ مهتم بأمري ؟
سَوتلي دُرة الـ MB3 و خلت الرام بتليفون امها
و نقلتلي القرايات

الليل كلة اسمع هو اني مو المفروض هسة فرحانة
هوَ فرحانة بس اكو قهر بداخلي
ماعرف ليش

گمت يومية أمد راسي من الباب
بلكي يرجع و أشوفة
دُرة حست بية گالت اجيبلچ تليفون امي ؟
- خاف متقبل
- بالليل من تنام متدري

حسيت فراشات ببطني
ضليت منتظرة الليل شوكت يصير
و امها كلساع دگول اليوم شعدچن گبر شگد مفضوحات

بالوحدة اچتي دُرة التليفون بأيدها و تهوس
اخذنا و صعدنا بالسطح اذا درت بينة امها تذبحنا
رديتلها الرقم
صوتي و ايدها يرچفن

انطتني التليفون و راحت تراقبلي الوضع
اول مرة بحياتي اخطي هيچ خطوة
اجاني صوت ضحكتة و اصوات زلم يمة

- منو
- أني

- ها يطرگاعة ؟

- شلون عرفت صوتي ؟
- اعرف اصوات المُجرمين

سكتت..
- شردت تحچي وياي ؟
- هيچ راحت بوكتها

- اممم يالله باي و لتتصل ترى مو تليفوني
- يولي عايشة اللحظة أشو ؟

- اهوو يلا باي باي
- روحي
- شنووو ؟
- يولي روحي روحي يعني سدي المكالمة

- تمام يلا
-و بَعد لتمدين راسچ لا أگصو

سديتة گُبل يمة هذا شَبح
انطيت التليفون لدرة راحت حذفت المكالمة ورجعتة

دُرة : بشري
- لج يدري امد راسي
- عزا شمدري ؟ يمة
- شمدريني
- خاف مراقب البيت
- شنو ما عندة شغل و عمل

- وبعد شكال
- لج گبل عرفني يگلي اعرف اصوات المجرمين
- اكلج شو هذا يخوف عفية عوفي
امي بس تدري تطين عيشتنة خليها الله هاديها
حتى السنة الجاية تكملين مدرسة

- لا والله هاهية راح اعوفة

تمددت اسمع قرايات و افكر بكلامة
دُرة ممنزلة اغاني لان امها متقبل و دگول تعودت
هسة أكدر انزل بس بعد ما اريد
و اني هم اريد اتعود احسن

ثاني يوم الظهر اجتني دُرة وجها مخطوف
- لج هذااا داز رسالة ع رقم امي كاتب طلعيلي الظهر
- يُمة







- وحق الله بيچ بخت امي متعرف تقرة چان اليوم
رحنة بيها وعلي
- صخام الصخمني شيريد
- بس لا تطلعيلة ياسمين ستري علينة
- عليچ الله بس هالمرة

- لا والله ما اكدر دادة ًشايفة امي اذا درت
اولشي دگلج اطلعي من البيت وين ترحين
هي اغاني متخلينة نسمع

- تمام تمام يلا ما اطلعلة

- مو تضوجين مني بس والله علمودجً
- ادري حبيتي والله

هيَ ام دُرة بيها طبع تنام ورا الغدة و تگعد العصر
بس دُرة حيل تخاف منها
يجوز عدها وجه ثاني اني مشايفتة
وحقها كل ام اخاف بهالعمر ع بنتها

چان جو شتاء شافتني دُرة الوب
صعدت بالسطح و اچتي گالت واگف برة هذا شيريد
- مادري

- تطلعيلة؟
- و امچ ؟
- يلا بس لتتأخرين ربع ساعة واگفتلچ بالگراج
- يلا يلا بسرعة .. خليت شعري الزايد ورا اذاني
و فتحت الباب على كيف

دُرة تأشرلي بسرعة طلعت لگيتة واگف بعيد عن بيتنة
بكم بيت رحتلة ركض فتحت الصدر و گعدت

- بيچ يول ؟

- يمعود ام دُرة اذا گعدت تشحتني من البيت
- عَجل شموازيچ ؟
- حضي

أبتسم .. و بتها وين ؟
- هيَ واگفتلي منتظرتني
- حلو خوش گوا**

- هسة انتَ شردت
- عش ضربتي ؟

- هو العال بية
- له له شسوة ؟

- مَدري بس ماعرف شيريد يريد يمد ايدة وسكتت ..
تغيرت ملامح وجهة باوعلي وين يمد ايدو ؟
-جوة التيشيرت و ..
- دحكي دحكي علية احجي عدل لا تهترين يول اتقربلچ ؟
- اييي وكمت ابچي

ضرب الستيرن حيل و لزم راسة
عفية عليچ والله عفية و عش منهزمة بوية و المن ضاربتو
ماهو مكمل كلشي بعد !

- وشسويلة يعني بأيدي ؟ غير انتَ اخذتني الهم !
ما جاوبني خلة ايدة على حواجبة يمسد بيهن

- يول بَس أفهميني هو گال ما تقربت ! بيسو بي
الجماعة ما گال غير هالحچي

- لا والله هو تقربلي چذاب
- لا وفرحانة ؟
- شسوي يعني !

- يول اذا ما تصمينو هالحلگ
وتضلين تهترين اورچ وصلتين
وتاشوف منو يتشفعلچ

- هو اني هسة شفهمت ؟

راد يكفخني بس لم ايدة ومسح وجهة و حرك السيارة
- ووووين ماخذني يمعوددد
فتحت باب السيارة مينفتح

- عليك الله رجعني ام دُرة والله تطردني
ما جاوب ..

...
يتبع

رتبة و ظفيرة - الحَلقة 6 ⚜️ -

و بقت قصةّ الحزن وياي
مثل مشاور العرسان
كلها تريد تسمعها
يما تدرون ؟
مَر ريح الندم بالروح
خلص كل أصابعها
رُسُل فهد

...
في مكان آخر ..
- وينو تاشوف طولو وينو
- هلا جدة
- هلا يبعد چتال أبوك
- ما ضَل صبر جدة دليني مچانو تا أبرد نارچ

- لا يجدة ما تگدرلو هساع
خل عودك يضب أكثر و ساعتها أكلك ذاك
روح جيبلي راسو

- و انا أكثر منچ منتظر عَش بيمن ضارينو
امي و أبوي ؟ و يچتلهم ؟

- عبنو خسيس و ما الو صرماية حتى بنفسو
نَفس ما علمتك ما ناسي ؟

- إن چانت بت أكسر ظهرو بيها و أچتلو
و ان چان ولد ضنا يچتلو بأيدو

- بَعد امك و اسمها
..
يَاسمين

- عليك الله رجعني ام دُرة والله تطردني
ما جاوب ..

انتَ شبيككك شبيكككك ؟ شو باوعلي !
بَاوعلي بطرف عينة و رجع يباوع للطريق
اباوع للساعة كلما تزيد دقيقة
تزيد دگات گلبي

هسة دُرة اكيد كعدت امها
من شافتة حرك السيارة
عليك القُرآن رَجعني بعدين اجي وياك والله
مو هسة لتگعد ام دُرة

- يعني عادي عندچ ياهو اليريد تطلعين ويا ، يا حَبيبي
- لا ، بَس انتَ

اخذ تليفونة كتب رسالة ورا شوية دگ تليفونة
الوو .. مية هلا .. راح اصعدها انتي فوتيها شوية خوثة ..
لا متأكد بس أگطع الشك باليقين .. في امان الله







يسوق سَريع ماكو براسي غير ام دُرة اذا گعدت
وصلنة گبال عيادات مال اطباء هذا شيريد ؟

- نزلي و من هذاك الدرج دكتورة أسماء مَيثم
گولي للسكرتيرة دزني ابو شاهين

- و اني مو مريضة ترى

- مَتردين ترجعين بسرعة ؟
فضيني قبل لا تگعد
خطية حتى هو شايل همها

رحت للدرج هو يباوع ويأشرلي ع الساعة
حتى اجي بسرعة صعدت لگيت هواي عالم
شفت اسم الدكتورة گاعدة بصف الباب مَرة چبيرة
بدون ما اجيها هي عرفتني

- جابج ابو شاهين والله يستنگي المَلعون
- شنو ؟
فوتتني للدكتورة گالتلها فَحص عُذرية دكتورة هاي گرايبي
- استفتاح خير

يمة الدكتورة ما تنبلع شنو فحص شنو عذرية
اني مادري بالي مابي غير ام دُرة
نَيمتني ع السَدية هاي شدتسوي لَميت نفسي
عَيطت ضربتني السكرتيرة على حلگي و لزمت ايدي
يمة ذني شنو ؟؟؟؟؟

گمت ابچي حَسيت بألم و و الدكتورة وخرت
- أشرف من شكولهم شنو شوكت نخلص من الهَمجية !

طلعتني السكرتيرة گالت گوليلة ام عدنان
نَظيفة بَس انتَ گلبك وسخ

من الخوفة بس شفت الباب ركضت حتى ردت اوگع
من الدرج لگيتة كاعد بسرعة و اني دموعي ما نشفت
يعني يدري اكيد هي شسوتلي !!

فتحت باب السيارة
- رررررجعني بسااااع راح تدمر حياتي
ما عولت احد يلفيني الله ينتقم منك

- شگالت ؟
- نظيفة بَس انتَ گلبك وسسسسسسخ

دگ تليفونة.. هههههه لا أعجبچ
.. دزيلي عدنان باچر .. لا تدللين

سَد التليفون و شمرة گدامة
- غَبرة الدنيا توازينة على هيچ شكول

- عَش ليش گلتي تقربلي ؟
ما جاوبتة ضليت أبچي بصوت عالي و أشهك
من شفتة دخل بالشارع شوية ارتاح گلبي

قبل لا انزل خَلة بأيدي فلوس
- أشتري بيهن تليفون عندي حچي وياچ
نزلت من السيارة و شمرتهن من الجامة من تذكرت
السوتة بية الدكتورة تفلت ع السيارة







المعجبني هوَ كاتم ضحكتة ليششش مادري !!

ركضت للباب لگيت درة أجتي تركض من الدرج
يعني چانت بالسطح تلطم

- كعدت ؟
- لچ وين أخذچ يمكن صار بية سكر من الهبطة
- گعدت ؟
- لا بس هسة گلت بعد دقيقتين أكعدها و أكلها
سحبت نفس طويل
خل نطب لتشوفنة هي نايمة بالاستقبال
رحنة گعدنة بالغرفة

- لچ اخذني للدكتورة

لطمت خدهااا
- يُمة شسوتلچ ؟؟
- لچ مادري مادري شسوت ....
- ليششش ؟
- شمدريني !
- هو شنو شراد ؟
- و العباس ابو فاضل ما أدري

رجعت ضربت خدها
- و شگالت الدكتورة ؟
گالت اشرف من شكولهم لان هاي السكرتيرة
تعرفة و مسوية روحها كدام الدكتورة تعرفني

- و شگلچ ؟
- گالي ليش گلتي تقربلي ؟
و انطاني فلوس كالي اشتري بيهن تليفون
شمرتهن عليه و تفلت على سيارتة

- عفيةةةةة النذل شون هيچ يسوي !
چان گلنة لأمي بَس تذبحنة
- لا دخيلچ

من الخوفة نِمت
هذا چان اخر موقف يجمعني بي بهاي الفَترة
عَدت الايام اني حيل مرتاحة بـ بيت دُرة بس گلبي ما مرتاح

مَرة چانت دنيا الظُهر
چنة ضايجين اني و دُرة گلنة نروح للاسواق امها متخلينة
لو نموت انتظرناها تنام عدلنة شكلنة و طلعنة
دُرة شوية و بعد تتخربط اني شوية متعودة

رحنة اشترينة و رجعنة بالفرع نتمشى
و الگاع مشايلتنة سَيارة تقربت لزمت ايدي قوي دُرة
- لچججج عمي
-يُمة
دَگ هورن و اشرلها تعاي ركن السيارة گبال البيت
من وصلنة للباب جرها من شعرها طبيت
وياهم للكراچ
- يلااااا انتي لبيت اهلچ و انتي تعاي
كامت تعيط و تبچي طَبو للمطبخ

- شعندجججج ادبسزز طالعة بهالظهاري
فرقاااااااااان .. اجتي امها تركض حتى بدون حجاب

- شكو شكو عيني دخيلك عوفها
- مسربتة بنتچ بهالظهاري والله عشتي خوش تربية
- يمةةة شعندج من شوكت انتي تطلعين ؟؟؟
-والله بس اليوم يمة والله اني وياسمين مو وحدي
- و ذيچ منو ماعدها اهل وين بيتها
اذا وصلت للبيت اثنينهن اذبحهن

- ابو علي جاهلات و غلطن ميعيدنها والله
كسر راسها حيل بيها بس والله اول مرة تسويها
والله سلطك عليها







.. ضربها راشدي و شمرها على امها و طلعلي
- شوووو انتي لسة هنا ؟؟؟
- هسة راح اروح
- يلاااا و عوفي بتنا بعد لتتقربين يمها
.. شفت ام دُرة معصبة گطعت دُرة گلت خل اطلع لا انكتل

طلعت من البيت بَس وين اروح ؟؟
مشيت يم بيتنة مَقفول الشوارع فَارغة
بَس البزازين تفتر

عندي الحُرية اروح شوكت مايعجبني بكيفي
و محد يحاسبني بَس اني ما اريد
اقصى احلامي بيت اعيش بي و بالي مرتاح

هسة أني المن عايشة أريد اعرف ؟
خطواتي بَطيئة لان متعرف وين رايحة
اوصل يم المدرسة و ارجع ما اريد امشي اكثر

لمن شفت سيارتة راحت رجعت دگيت الباب
محد فتحة ضليت گاعدة على الصَبة
تَچيت راسي على الحايط الرايح و الجاي يباوعلي

فوگ الساعتين يالله انفتح الباب مَدت راسها ام دُرة
- دفوتي فوتي
طَبيت و شعور الذِل واصل لخشمي
صوچي اني قنعتها نطلع على آمل اشوفة

هوَ ليش هيچ مطبوع براسي !!

لگيت دُرة بالهول متغطية و نايمة
خَليت راسي يمها و نمت ما گعدت لحد ثاني يوم
گعدت ام دُرة بَس تخوزر بينة متحچي

و دُرة حيل ضايجة متتاحچة حقها هم غير گطعوها
- مَتحاچيني ؟
- لا قابل شعليچ بس گتلچ منروح احسن
- شمدريني ع حضنا راح يجي عمچ ع گولت بيبي
" احنة گملتنة شگرة "

- بيچ گمل ؟
- دنجبي هذا مثل چانت دگولة بيبتي اذا
اسوي شي و تكشفني

عَدة أسبوع يلا شوية رجعت تحاچينة
بس هم مو مثل قبل و گامت تقفل الباب
وتخلي المفتاح يمها و متنام الظهر

ما بقة شي و تخلص المدارس و اني راح عمري هيچ
احلامي كلها متعلقة بالمدرسة و اني خسرت المدرسة
بسبب عمي يعني راحت كل احلامي

چانت دُرة بين فترة و فترة تگعد بالسطح
تبچي على ابوها من تنام امها و أني أبچي وياها

بَس بكل يوم اصعد اضل اباوع
بلكي يجي مَعقولة نساني ؟
يَاسمين شبيچ !!! مادري بَس اكو وجع بداخلي
ما ادري شلون أوخرة

بيوم و احنة صعدنة بالسطح
دُرة گاعدة تسمع قرايات و اني اباوع من الحايط

- ما مليتي ؟ شيجيبة من الفَلوجة ؟
- و اني بحالة دا اباوع العالم
- وين اكو عالم بنص الليل
- اووووو دُرة عوفيني

نزلنة نمنة ورا يومين يالله صعدنة الجو ثلچ
گبل اني رحت يم الحايط و دُرة گعدت بالگاع
لمحت هذيچ السَيارة العالية البيضة بنفس المكان الي وگفلي بي
و أيد شايلة جگارة طالعة من الجامة و ضوة شاشة الجهاز مبين
هذا هوَ ؟؟؟







- لج دُرة هذا هذا
- منو شبيج
اجتي تباوع وياي
- عَزا دادة شجابة ؟
- شمدريني !! اصيحلة ؟؟

- لا والله شبيج بابا شبيج عوفي ترى مصختيها
مبين مو راحة و صايع امي لتصعد ياسة عليج الله
امشي ننزل
سويتلة باي و نزلت ما باوعتلة
بَس انقهرت

صارلي شگد انتظرة تالي هيچ كلشي ما أفتهمت
نِمت بس دموعي بعيني
يارب شيلة من گلبي مابية اشيل هَم بعد

- زين هو شيريد مني ؟
ضميت هَمي بگلبي بَس عيوني فَاضحتني

بعد أبد ما لِمحتة كل ما أنوي باچر انسى
اگعد اتمنى اشوفة اليوم

دُرة بدت تروح للامتحانات راح تخلص السنة
الي كبرتني عَشر سنين و أبد ما ارتاحيت بيها
حتى من أستقريت گلبي عذبني

قَبل اخر امتحان دُرة اجتي وجهة مخطوف
گالت هذا العَسكري يحچي وي ابن جيرانة الي بصفنة
منين يعرفة ؟
- يُمة شمدريني
- لَتشوفة امي و تشك

رِجعلي الامل يعني ما عافني !
خَلصت امتحانات و رجعت گعداتنة بالسطح
الناس تحير وين تروح و احنة اقوى شي عندنا السطح
چانت تقرة و اني مَحبوسة وياها

صرنة يومية نسهر نص الليل يالله ننزل
الجَو يجنن چان يريد يجي الصيف هستوة
والهَوى بارد
تجيبلنة امها حلويات هيَ تدري نصعد
بس تغشم نفسها حتى مترخيلنا الحَبل

أحمد ربي الي سخرها الي چان صفيت
بالشوارع كُل هالفترة دائماً الفضول ياخذني
سَفينة الحياة بأي مرسى راح تنزلني ؟

كل التوقعات الي أجتي براسي
نُقطة ب بحر من الي مَريت بي

مرات اكو مَشاكل تصير بين دُرة و امها
تگعد درة الليل كلة تبچي بشكل مو طبيعي
و امها بعدين تراضيها

- دُرة شبيچ ؟
- لچ امي تريد تزوج عمي
- ياااا شلون مو حرام ؟
- لا مو حرام عادي و هو من يوم الشافني بالشارع لزمها
حجة عليها بَس هي شبه الموافقة
- خليها واذا

- شنوووو و اذا شنووو تتزوج غير ابوية
ماتستحي !!! هذا ابوية ابوية عمي يصير بمكانة

- الله يرحمة بَس باعي يجوز هي اريدة
- ياسسسمين اسكتي اني روحححي مفرفحة
والله اني هددتها گلتلها اخذ ياسمين و أشرددد بس تسويها

- لا لچ خطية امچ
- امي التزوج غير ابوية ماريدها