تقرب عليه بصدمه وصوت يرجف كال
جراح: نفس الشكل نفس الصوت بس موو نفس النضرات لااا نضراتج غامضه

"ضحكت باستهزاء واني اكله "
لتين: بهل شيء صدقت كلش أشبه ماما رهف بسس النضرات نضرات منوو يا ترى أشبه هل أشبه نضرات بابا راجح؟

اباوع عليه ضل يتنفس سريع وراد يوكع بس ابنه سنده وصاح

_يابببه

واني كملت كلامي بحقد متساهله وضعه

لتين: اني هسه رايحه بس راجعه الكم هل مره ردت بس اتعرف على الي عذب ماما بسس المره الجايه راح تشوفون شنوو اسوي

تركته واكع وابنه يصيح ويحاول يصحي والناس تجمعت عليهم ، نزلت دموعي وانتهى وقت القوه صعدت للسيارة واني اكله

لتين: بسرعه تحرك بسرعه

بدون اي كلام تحرك واني ابجي بقوه نهاريت انتهى وقت الصمود مثل فصول السنه شكد ما يكون الجو مشمس بس يجي يوم وتمطر السماء واني نزلن دموعي هسه ..

بعد موجه بكاء طويله رفعت راسي واني اكله
لتين: اريد ارجع لبيتنه اريد انام بحضن بابا اريد اشكي اله من الدنيه ليش ما خلت امي عايشه ليش عشت هل شيء اريد ارجع طفله ما يهمها بس انو تشتري بيت باربي لوو تشتري لعابه وتنتظر ابوها يجمع الها فلوسهن

حذيفه: تعاي يا بعد خالج تعاي

سحبني لحضنه واني نهاريت صرت اشهك بقوه وعيوني يحركني احس شكد ما ابجي عندي دموع أضعاف ، سكتت بس الشهكه بعدها مجلبه بيه

حجى خالو حتى يضحكني

حذيفه: هاي شنوو ولججج لتين العوبه سبلتي عليه ايععع يا يا ولجج شهل حاله هاي خشمج يجري ولجج

ضحكت واني بعز انهياري مسحت عيوني واني اكله

لتين: ههههه ، شبيك خليني اعيش الدوره وابجي اله تخربها عليه


حذيفه: ياا دور ولجج غير كحلتج صايره لعوسه هسه اذا أنزلج عبالهم مكديه

لتين: ياااا قفصو عليه كالو هاي ضد المي

"ضرب ايد بأيد وكال "
حذيفه : ايا قشمر وبيش جبتيها بله

لتين: بعشره جبتها

حذيفه: طاح حضج اي والله لوو مشتريه بيها نص دجاجه موو احسن من هل خرط

لتين: اي والله على طاري الاكل شوو جعت وكلني

حذيفه: يااا يمه لحكيلي شلون بيها هايييي

لتين:ههههههههههه







طول الطريق يحاول يغير اليه المود واني كل عاده اضهر شكل الي ما مهتمه واضحك بس داخلي شيء ثاني تغدينه وانطلقنه لبغداد بعد ما اخذنه اغراضنه وسلمنه المفاتيح

لتين بفزعه: عزززززااا

حذيفه: ولججج ميت مره كتلججج لا تفززيني هيجججج طايحه الحضضضض

لتين: ههههههه يمه شكلك هههههه غيررر ذكرت شغله

حذيفه: شنو هيه هل شغله ؟

لتين: موو احنه على اساس باربيل شلون نرجع بدون هدايه ؟

حذيفه: وان شاء الله اني ادفع هم

لتين:yes

حذيفه: يااااااا بوووويه ننقطييييت

لتين: ههههههههه

نزلته نتسوق واكيد مع تذمر خالوو طول الوقت

بعد ساعات تعب قريت لافته بغداد ترحب بكم واني لمعت عيوني بفرح لان مشتاقه للكل احس نفسي لا شيء بدونهم

دخلت للبيت واني اصيح
لتين: ولكمممم انييييي اجيبييت

طلعو اخواني من الصاله وهمه فرحانين

سائد: ولججج يااا هلاااا بكلبييي ، تقدم وهوه يحضني بقوه

سادن : حبيبه اخوها اجتتت هله هله ، سحبني من حضن سائد وشالني وهوه حاضني بقوه

اريان : هله هله وين الهدايه

ضربته واني احضنه
لتين: عابتلك سلم اول

حذيفه: احلف عليكم انتوو كواويد ولكمم خالكم جاي صالي ساعه منتضر شوكت تسلمون عليه وانتو مطنشيني هتليه

الكل راح يسلم عليه وهوه يضرب بيهم كانت علاقتهم كانو اصدقاء

لتين: اييي وين بابا وماما

اريان: نايمين ، شعجب رجعتو قبل لا يخلص الاسبوع

"صرت ابلعم واني اكله "
لتين: احممم، موو خلصت الندوه واني اشتاقيت الكم ، يله اني رايحه اصيح لبابا وماما مشتاقه الهم

كمت واني ادك الباب حيل واصيح

لتين: انييييييي اجيتتت طلعووو بابا ماماااا وينكم

طلعو بفزع من الغرفه
ابو سائد: باباتي لتين بيج شيء شجابج

لتين: شنوو هل استقبال معقول جنتو خلصانين منيي
منووو الاشوفه يكلي هل كلام ليشششش

ام سائد : ماماتي حبيبتي شلونجج يا روحي

حضنتني ماما واني اكول الها
لتين: بعد كلبي بس انتِ تحبيني

سحبني من حضنها بابا وهوه حاضني بقوه ويشم بشعري ويبوس راسي

ابو سائد: شلون ما افرح بيججج وانتِ فرحتي وعافيتي وضحكتي

لتين: حبيبي بابا احبك هواي ، ماما جوعانه اخوج ما وكلني شيء حتى نمنميات ما جابلي جلف جلف اخوج

اجاني صوت خالوو من الصاله يصيح
حذيفه: ياا ناكره المعروفف ولججج اعلف عليججج صالي خمس ايام

راحو يسلمون على خالو واني صعدت بدلت بملابس مريحه ونزلت اتغده وياهم

راح خالو واني نمت نومه أهل الكهف ما كعدت اله ثاني يوم ما داومت خلصت اجازتي ياله داومت وهيج خلص هذا الأسبوع

رجعت من الجامعه واني تعبانه شفت بابا كاعد على الكرسي مقابيل الباب بس سمع صوت الباب رفع راسه والشرار يطاير من عيونه تقدم عليه وبحركه سريعه

ضربني راجدي واني بحياتي محد ضاربني بحياتي عشت عمري مدلله

رفعت راسي بصدمه واني اكله
لتين: بابا ليشش ضر....

ابو سائد: اشششششش ولججج شلون هيجج سوين بدون علمييي شلووون تجارئين سوين هيجج بدون علميييي.....

يتــبـ؏

البارت العاشر

#انتقامك_وانتقامي_(رد_الدين )

احتاج فتره انعِزال عن العَالم الخارجي تماماً.

لتين

........................................................

صدمه ، خوف ، ترقب

اباوع على الكل عيوني تستنجد بأحد بس الكل ساكت كأني خيبت ضنهم ماما واكفه تراقب من بعيد ودمعتها على خدها اخواني يخافون يحجون بحضور بابا لان كلش عصبي بهل دقايق راقبت الكل قريت وجوه الكل فزيت من صفنتي ورجعت لواقعي

واني لازمه خدي ومرميه على الأرض

لتين: ب باا بباابا ل لليش ضرر...

ابو سائد: اشششش ولا كلمه ولججج ليششش هيججج سوينننن شلووون

لتين: شسوو وويت

ابو سائد: شووداججج للعمارررره ولجججج شلوووون ترحينننن هنااااك وتلتقين بجراححح هاييي تالي ثقتي بيججج ولججج دللتج اكثرر وحده فضلتج على البقيه وانتِ تتمردين واكول ميخالف ، شسوين اكوللل ميخالف واسكت تاليييي يوصل تمردج ترحين من وراي لجراح ليشششش ولججج

لتين: بابا

ابو سائد: اشششش مااا اسمع صوتجج ولا اشوف شكلج وجامعه بعددد ماكوووو ، وهسه ما أريد أشوفج كباليييي يللللله

سحبني سادن صعدني لغرفتي واني مصدومه بكلامه دمعه وحده ما نزلت من عيني اريد ابجي احس نفسي اختنكت بس بدون جدوى الدموع تحجرت بعيني

كعدت على السرير واني صافنه بالفراغ

كعد كبالي سادن ولزم ايدي وحجى بصوته الي يدخل الطمأنينه لكلبي

سادن: لتين ليش هيج سويتي شلون تعرضين حياة الكل للخطر وترحين لجراح ؟

لتين: بابا شلون عرف ؟

سادن: ما اعرف رجع من السوبر ماركت عصبي وما قبل يحجي ويه احد بينه

لتين: اريد انام .

" تنهد بقهر وجاوبني"
سادن: تمام

طلع سادن واني صافنه بالفراغ كمت اخذت ملابس ودخلت اسبح احس نار مشتعله بداخلي وزعل بابا اخذ من حيلي حيل مستحيل أكدر على زعله

طلعت من الحمام رأسن نمت كأني اهرب من واقعي

كعدت على وجع راسي واحس حرارتي مرتفعه بس جاهلت هل شيء وأخذت جهازي اشوف الساعه

لتين: معقول كل هل نوم نايمه

كنت نايمه من ساعه ٢:٠٠ الضهر للساعه ٤:٠٠الفجر
نزلت شربت مي وصعدت احس نفسي بهتانه







صعدت للسطح احس هواء ماكو بقيت كاعده
إلى أن سمعت صوت المؤذن يكول

الله اكبر الله اكبر
حي على الصلاة حي على الصلاة
حي على خير العمل
نزلت توضيت كان هاي اشاره حتى اتجه لربي

فرشت سجادتي وصرت اصلي بدون اي توقف

واخيرا بجيت واني اصلي نفجرت بالبجي كأني اشكي لربي عن الي سوو وياي

لتين: ياا ربيي برد كلبي طفي النار الي بكلبي احس نفسي تايها بدون هويه اريد اعرف منوو انييي ياا رب اني يتيمه ، يااا علي يا كافل الأيتام اكفلني اني من ايتامك اكشف الحقيقه اريد برائه امي تضهر اريد اوكف كبال الي حجو على امي واكول امي اشرف من الشرف

سجدت على التربه وصرت ابجي بصوت عالي واشهك
حسيت ايد تخلت على راسي وصارت تمسد عليه
عرفت هل ايد المن يا ما نمت عليها

رفعت راسي عليه وكلت

لتين: بابا سامحني الله يخليك ردت اشوف الإنسان الي ضلم امي وضلمك ردت اكله ليشش هيججج سويتتت وياهم بس بس ما كدرت تدري شحسيت من شفته ويه ابنه يضحك لووو من سنده احس صدوك اني بنت زنه اريد اثبت برائتكم اريد اكول للكل راجح ورهف اشرف من الشرف راحج ما يغدر اخووو ولا رهف تخون زوجها .

سكت وطال سكوته تنهد بقهر وكام بدون لا يجاوبني ولا يحجي وياي كلمه
زدت بالبجي احس عقابه حيل صعب عليه

ثاني يوم نزلت بوقت الريوك بس لمحني كام من مكانه وكال

ابو سائد: الحمدلله وشكر ، نيفين اني موو منبه على بنتج ما تضهر كدامي وما المح خيالها الضاهر ما فهمت كلامي حاولي انتِ تفهمي الها ، اني طالع للشغل في امان الله

ام سائد:الله وياك عيني ، لتونه ماما تعاي تريكي

هزيت راسي برفض وصعدت واني ابجي

مرت الايام وبابا مقاطعني حاولو اخواني يحجون وياه وتد اجت وخالو حذيفه يحجون وياه وهم رفض

إلى أن بيوم اجه جدو سامي النه
وبعد السلام والكلام كال

ابو حذيفه: وينها حبيبه جدها لتونه

ابو سائد: اريان روح صيح اختك تجي سلم على جدها

سمعت كلام بابا ونزلت بسرعه

" رحت حضنت جدو واني اكله "
لتين: جدووو حبيبي شلونك

ابو حذيفه: هله هله بحبيبه جدها شلونج

لتين: زينه انتِ شلونك

ابو حذيفه: بخير بعد روحي

حذيفه: واني حقيره ما تعرفين تسلمين عليه لوو من شاف احبابه نسه أصحابه

لتين: ههههههه شلونك خالوو

حذيفه: بخير بخير مادام انتِ موو يمي بالجامعه







لتين: جدوو شووو شيكول

ابو حذيفه: خلي يولي معليج بي غير انتِ الخير والبركه

صدك ابو سائد سمعت بيك مزعل شريان كلبك ليشش موو هاي العزيزه بنت العزيزه

ابو سائد: والله يا ابو حذيفه الي يسوي الغلط لازم يتعاقب

ابو حذيفه: بس من الصغار تغلط واجب الكبار يعلموهم غلطهم موو يعاقبوهم هيج

ابو سائد: جا شتكول على الجبير الي يمشي بشور طفله

حذيفه: كأنو هذا بسمار مبطن عليه ؟

ابو سائد: زين وعرفت روحك والله

حذيفه: حقك والله بس تعرف بنتك بعد رأسها يابس اذا ما امشي وياها تسوي بدون علمي واني وياها وياها

ابو سائد: لتين غلطت ولازم تتعاقب

ابو حذيفه: زين واذا اكلك لخاطري سامحها هل مره

ابو سائد: هاي هيه خاطرك طيب وهل مره سماح بس المره الثانيه العقاب يكون عسير

ابو حذيفه: هاي هيه وليدي كومي جدو روحي بوسي ابوج وعتذري منه

كمت بتردد واني اعرف كلش زين بابا سامحني بس كدام جدو تقدمت سحبت ايده ابوسها وهوه خله ايده على راسي

لتين: اسفه بابا سامحني هل مره

هز راسه وهوه ساكت حصرتني البجيه بس قاومت
رجعت لمكاني واني منزله راسي من دون العاده من نجتمع لو يجون بيت جدو ما اسكت ابقه اسولف واحشش واضحك واطفر من مكان لمكان بدون توقف

بس هسه ما الي واهس اتنفس احس زعل بابا عليه كاسرني

الكل لاحظ بس سكوتو ما يكدرون يحجون

اول ما راحو طفرت لغرفتي ابجي حسيت نفسي كلش تعبت
وهيج مرت الايام بابا بعده ما يحجي وياي والجامعة ما مداومه لان كان رافض دوامي واني هم ما اليه خلك اروح

إلى أن بيوم اكتفيت ما كدرت بعد اصبر على زعله
نزلت من غرفتي بهمه شفت ماما تسوي چاي

لتين: ماما المن هذا الچاي ؟

ام سائد: لابوج

لتين: اممم ، انطي اليه اني اودي اله

ام سائد: متأكده ، تره ابوج بعده ضايج منج خاف يسمعج حجايه

لتين: قابله المهم يسامحني ، مشيت باتجاه الغرفه واني رجل تقدم ورجل تأخر اخذت نفس قوي واني ادخل للغرفة رفع راسه بعد ما كان يباوع اخبار جاهلني ورجع يتابع بصمت تقدمت عليه خليت الچاي بصفه
ونزلت كعدت كدامه وخليت راسي على رجله صرت ابجي بهدوء

لتين: بابا ما كافي عقابك كسر ضهري اشتاقيت الك هواي مشتاقه تصيحلي شريان كلبي مشتاقه اشم عطرك مشتاقه لحنانك مشتاقه تحضني ما أريد شيء بس حضنك يلمني بابا كافي عقابك حيل قاسي عليه
معقول ما تنقهر عليه وانتَ شوفني الوب عليك
اعرف السويته غلط بس بابا اريد ارتاح اريد احسسهم بغلطهم اريد اثبت انتَ وماما أطهر من أن تزنون وتغدرون جراح ردت اشوف الشخص النبذ امي
اريده يعرف بوجودي ، ما تعرف شنو شعوري من شفته احس نفسي نهاريت بابا تعرف شنو نهاريت نار بكلبي محد يطفي غير كشف الحقيقه اريد اثبت نسبي بابا اريد أواجه الكل واني اعرف ان انتَ وماما مظلومين







حسيت قطعت الأمل أن يسامحني
شهكت ويا شهكه طلعت من نص روحي واني احس بأيد بابا على راسي

ابو سائد: بابا اني اخاف عليج انتِ امانه رهف اليه انتِ اخر ما تبقى منها ذكره مستحيل اخاطر بحياتج واعرضها للخطر اني خافي هاي الحقيقه من سنين بس من سنه واني احس لازم احجي كلشي ومن وكعت مريض حسيت قربت نهايتي وحجيت الكم

لتين: اسم الله عليك بابا يومي قبل يومك

ابو سائد: حبيبتي بنيتي شووو تعاي مشتاق الجج هواي

لتين: اذا مشتاق اليه ليش ما تجي تحضني هااا ليشش حتى كلبي يوجعني من القهر والله ، صدوك بابا انتَ عرفت اني التقيت بجراح

ابو سائد: أسرار دوله بابا أسرار دوله

لتين: وينطيك كلبك ضم على شريان كلبك

ابو سائد: هههههه ملعونه ما اكدرلج ، شوفي حبيبتي عندي صديق هناك من ايام الشباب مكلفه من سنوات يجيب اليه اخبار اهلي واحد واحد

لتين: امممم ، زين واني شلون عرفت بيه قابلت جراح

ابو سائد: ما يراد الها شيء جراح من شافج وعرف انتِ بنت رهف صار يدور عليج اول ما صحى لان كان بالمستشفى ونتشر الخبر وعرفت.

لتين: بابا الله يخليك خليني امشي على الخطه الي رسمتها

ابو سائد: لتين سدي الموضوع

لتين: بس بابا

ابو سائد: اني شكلت لتين سدي الموضوع

لتين: تمام بابا ، تصبح على خير

كمت واني منزله راسي بخيبه بس وقفني كلام بابا وهوه يكول

ابو سائد: لتين

لتين: ها بابا

ابو سائد:وين حضنتي

،، ضحكت واني اروح احضنه حيل "
لتين: احبك بابا

ابو سائد: وانه اموت عليج يا بعد كلب كلبي

طلعت واني الفرح غامرني لان بابا سامحني
صعدت نمت براحه بعد ايام من القهر والقلق

ثاني يوم كعدت على صياح اريان

اريان: لتييين لتييين يله كعدي ولججج تأخرتي على جامعتج يله

كعدت بفزه واني اسمع اسم جامعه

لتين: شنووو يا جامعه موو بابا منعني منها

اريان : هاي شكد قديمه انتِ غير خلص عقابج واصلا كان ماخذلج اجازه موو غياب

كمت بكل نشاط بدلت ونزلت تريكت وانطلقت للجامعه

واكفه اشوف الجدول حتى اعرف ياا محاضرة عدنه هسه وسمعت صوت وراي يكول

ساره: هاي منوو منور الجامعه يابه







لتين: ههههه هلووو حبيبي

ساره: هلوو بيج ولج وين جنتي ليش هل غيبه تدرين خفت عليجج ونوب حتى جهازج مغلق

لتين: سكتي وخليها غيررر بابا عاقبني

ساره : شمسويه هل مره

لتين: كسرت كلمته وعاقبني هههههه

ساره: شوف الفطيره تضحك

جانت ساره صديقتي الوحيده بس علاقتي بيها سطحية ما اسولف الها كلشي عكسها دائمن شارك
كلشي يصير وياها

كنت من النوع الكتومه كلش ما احب افتح كلبي لاحد غير وتد وبابا وخالو حذيفه والبقيه مستحيل اسولف وياهم أسراري

دائمن اسمع من الزملاء من افوت منهم
اجت المغروره ، الغثه ، الرافعه خشمها لان خالها استاذ هناه ووووووو كومه حجي بس اني عندي قانون بحياتي

طنش تعيش تنتعش ما اهتم لكلامهم ابد

خلص اليوم ورجعت للبيت تعبانه

وهيج مرن يومين هدوء باليوم الثالث
قررت احجي ويه بابا

لتين : هلووو باباتي ادخل ؟

ابو سائد: هله بروحي تعاي دخلي

لتين: شلونك حبيبي

ابو سائد: بخير انتِ شلونج بعد ابوج

لتين: بخير

ابو سائد: احجي اكو كلام بحلكج

لتين: امم ، احم بابا اني اريد التقي بجراح

ابو سائد بعصبيه: اني شكتلج لتين هااا شنوو حجيت موو كلت هل سالفه تنسد

لتين: اسمعني بابا الله يخليك شوف وجها نضري وبعدين انتَ قرر

ابو سائد نتر : احجي فضيني

لتين: شنوف بابا اني اريد اكشف الحقيقه عشرين سنه والحقيقه ما ضهرت ليشش ما اني اسعه حتى ينكشف كلشي وبهل شيء راح ترجع انتَ لاهلك واني اثبت نسبي وبراءه امي
انتَ ما مشتاق لابنك امك ابوك اخوانك خواتك

ابو سائد: خايف عليج اني ولجج تخسرين هواي اذا دخلين بهل موضوع اني جاي اسعه حتى ينكشف كلشي

لتين: شكد محتاج وقت شهر شهرين سنه سنتين بابا صار الك عشرين سنه ومحد كشف الك الحقيقه
اني راح اكشفها الك انطيني بس فرصه وحده الله يخليك
اذا فشلت ما ارجع اطلب منك مره ثانيه ولا افتح هل موضوع

تنهد بحيره واخذ فتره تفكير بعد مده كال بتردد وحيره

ابو سائد: موافق بس بشرط كلشي اعرف عن خطواتج وخالج حذيفه وياج خطوه بخطوه

"كمت ابوس بي بفرح واني اكله "
لتين: شكرا بابا شكرا احبك احبك يا احله اب

بقى بابا يضحك وبعدها اتفقت ويه خالو حذيفه
على كلشي وبعد اسبوع من التخطيط







كاعده هسه بالسيارة منطلقين واني كلي امل تنكشف الحقيقه

حذيفه: والله سويتيها ياا ذيبه وخليتي ابوج يوافق

لتين: غير اني لتين اكيد أقنعه

حذيفه: وهسه يا ست لتين شنوو خططتج؟

لتين: اروح لبيت ال عكَاب

حذيفه: وتالي شنوو غايتج من دخولج لبيتهم ؟

لتين: تعرف بعدين هسه كل الاريده منك تدعي اليه انو تمشي الخطه مثل ما أريد

حذيفه: ان شاء الله تضهر برائه رهف وترتاح بقبرها

لتين: امين يا رب

غفيت والسيارة تمشي بينه ما حسيت إلى من خالو كعدني وصلنه قريب لبيتهم

نزلت الجامه من جهتي واني اشوف الطريق عباره عن خضار شيء أغرب من الخيال

لتين: هاييي شنووو معقول اني بالجنه

فززني صوت خالو المستهزء
حذيفه : كلش واثقه من نفسج دخلين الجنه اصحي بابا اصحي بساتين ال عكَاب ترحب بكم

لتين: واوو كل هل خير عند ابوي جراح خوش عمي من يموت اخذ ورث تمام اعيش بي اني واحفاد احفادي
جيد جيد حبيت

حذيفه: ههههه شكد عار من هسه تفكر بالورث

لتين: هههههه غير اضمن مستقبلي يا عيني

وكفت السياره بينه واني اشوف قصور موو بيوت صارن كبالنه شكد ما اكول ابداع قليل بحقهن

لتين: خالوو اريد انزل لوحدي

حذيفه: متأكده ؟

لتين: اي متأكده اريد اعتمد على نفسي بهل شيء

حذيفه: براحتج حبيبتي بس تحتاجيني دكي عليه واني اجيج

لتين: تمام

نزلت من السياره اني كلي ثقه وقوه
وكفت كبال حارس بالباب واني اكله

لتين: السلام عليكم عموو

_ وعليكم السلام ورحمة، تفضلي بنيتي

لتين:عموو اريد الشيخ عكَاب موجود

_اي موجود رايده منه شيء لو من الحريم

لتين: عمو اني جايه دخيله عند الشيخ عكَاب كالو عنه انسان حقاني وما يضلم احد

_وصلتي عمي وصلتي تفضلي دشي داخل وانه هسه انطي خبر

لتين: لاا عموو انتضر هناه اذا استقبلني ادخل لديوانه واذا ما استقبلني ارجع منين ما اجيت

راح يركض حتى ينطي خبر الهم
وره شوي طلع وهوه يسمحلي بالدخول

كنت لابسه زي رسمي اسود بس هل مره ضبطت الشال بطلب من بابا







دخلت بكل ثقه رفعت راسي ودخلت
توجهت الانضار عليه
باوعت بمقدمه الديوان واني اشوف شخص كبير بالعمر بس فارض هيبته بين الكل

قريت وجوه الكل من الشيخ عكَاب إلى أصغر واحد

قسم ينضر اليه بصدمه قريت بملامحهم كانو يكولون رهف رجعت والقسم الثاني بانبهار من شكلي وقوتي وقسم ثالث ينضرون بفضول

كسرت الصمت واني اكول
لتين: السلام عليكم شيخ

الشيخ عكَاب: وعليكم السلام

لتين: اضن انك عرفتني يا شيخ

الشيخ عكَاب: وشنهو الرايدته من هل جيه

لتين: يا شيخ اني اليوم دخيله عندك وسامعه عنك ما ترد الدخيل وخاصه ان كانت مره

الشيخ عكَاب: وصلتي ، شنهي قضيتج؟

لتين: اول شيء يا شيخ أريدك تجمعلي كل ولدك واحفادك

"حجى لحد الكاعدين "
_ اضنن السالفه خاصه يا شيخ احنى نترخص

الشيخ عكَاب: مرخوص شيخ مرخوص ، فهد روح اجمع كل عمامك وولدهم

فهد : تامر شيخ

طلع الي اسمه فهد وعلامات الحيره باينه على وجهة

كعدت كباله وهوه يباوع عليه بريبه واني ارجع اله النضره بس نضره ثقه وإصرار

بعد نص ساعه دخلو مجموعه شباب ونصدمو بوجودي بس ما حجو سلمو وكعدو

وبده الديوان ينترس واني منتضره دخول شخص واحد بس معقول ما يجي

دخل واخيرا بعد انتضار طويل باوع عليه بصدمه واني قابلته بنضره كره

الشيخ عكَاب ما قبل أحد يحجي من الموجودين

إلى أن يحضر الكل

الشيخ عكَاب: وهاي اجتمع الكل شنهي التردين تكولي

لتين: اول شيء اعرفكم عن نفسي لتين رافع محسن
هذا هوه اسمي المزيف اما الحقيقي اسمي جمار جراح عكَاب

الكل انتفض من مكانه وهمه يسمعون اسمي شتت انضاري عن الكل واني اكمل كلامي

قبل عشرين سنه تم اتهام رهف وراجح بالزنا واني اليوم بنتهم جايه اكشف الحقيقه وان راجح ورهف بريئين من هل تهمه

حجى واحد من الكاعدين
_ اذا رهف وراجح ما زانين انتي شلون اجيتي

لتين: اني بنت اشرف الشرف بنت رهف وراجح الي ما طمسو شرفكم بالأرض

اليوم جايه واني دخيله الشيخ عكَاب
اطلب منه يسمحلي اكشف الحقيقه وابري امي وابوي من كل الاتهامات

الكل ساكت بأمر من الشيخ عكَاب حتى جراح عجيب هل شيخ شهل سيطره والإحترام الفارضه عليهم

الشيخ عكَاب: وشنهو الدليل الي يبري راجح ورهف؟

لتين: تحليل ال DNA إثبات نسب
اريد اسوي هذا الفحص ويه ابنك جراح

وإذا ثبت هوه ابوي الحقيقي معناها كل تهمه توجهت الهم كذب

الشيخ عكَاب: واذا طلع التحليل سلبي وانتِ موش بنت جراح

لتين: بوقتها اني مستعده لأي شيء تقرره انتَ

الشيخ عكَاب: تم ، صخر بويه

صخر: امر جدي

الشيخ عكَاب: تروح لمستشفى بي معارفك وتتفق وياهم حتى نسوي الفحص بأقرب وكت

صخر : تامر شيخ

طلع صخر وعيون الكل كانت متوجها اليه

حجى الشيخ عكَاب: شاهين اخذ البت لداخل ووصي الشيخة عليها اليوم البت صيفتنا

لتين: لا اني لازم اروح خالو منتضرني بره هذا رقم تلفوني واي شيء يصير اني موجوده وهذا عنوان الفندق الي نازلين بي

الشيخ عكَاب: ما يصير الضيف ما ينزل بفندق وبيوتنه عامره

لتين: شكرا شيخ بس لازم اروح

ما أصر عليه لان الوضع متوتر طلعت واني الراحه تارستني

احس وصلت لمبتغاي وهاي هيه كلشي راح ينكشف

بعد مرور شهر

الكل واكف منتضرين النتيجه بعد ما خضعنه لتحليل DNA اني وجراح

حجى الدكتور: هاي ورقه التحليل والنتيجه هيه ......


يتــبـ؏

البارت الحادي عشر

#انتقامك_وانتقامي_(رد_الدين )

هل تعرف ماذا يعني أن يكون الأنسان من الداخل مُكتئبًا ومن الخارج بشوش جدًا،تعلم مدى الأذيه هنا؟

........................................................

"فلاش باك قبل شهر "

لتين....

رجعت لبغداد بعد ما فجرت القنبله متأكده انو راح يخابرون عليه على مود الفحص
بدون ما أواجه احد او احجي وياهم صعدت لغرفتي نمت بلبسي

كعدت بعد مده احس راسي راح ينفجر بسبب الضغط الي جاي اعيشه

وهيج مرت الأيام وماكو اي خبر عنهم فقدت الأمل وبيوم كاعدين وحجى بابا

ابو سائد: بابا عوفي الموضوع لا ضوجين اذا يردون التحليل واذا ما يردوها ما يهمني يكفي اني اعرف انتِ بنت رهف وجراح

لتين: اكيد بابا ما يهمني غيرك بس....

ابو سائد: بس شنوو باباتي كولي انتِ كتاب مفتوح كدامي لوو الحجي تغير من كبرتي ؟!!

لتين: هههههه وابقى لتين الي شاركك كلشي حتى اعترافات الشباب الها بالجامعه

ابو سائد: هههههه ، وهسه كليلي منوو مضوج شريان كلبي

لتين: بابا اريد اثبت رهف ما خانت جراح ولا انتَ طعنته بضهره ولا خنت بلبل أريدك ترجع لابنك الي عفته على مودنه اني وماما رهف اريد اوفيك ولو شوي من الأشياء القدمتها النه .

ابو سائد: بس بس بس شنوو هل كلام اول شيء ربج يمهل ولا يهمل اكيد اكو يوم يكشف بي الحقيقه وعلى بلبل طلعت من كلبي وابني زعبان صار رجال وهسه هوه ساند ابوي وكدر يعتمد على نفسه

"ميلت راسي وجاوبته "
لتين: بس ما جاي اشوف هيج بعيونك جاي اشوف اشتياق لابنك جاي اشوف لهفه وحزن على فراقه

ابو سائد: يا بنتي هذا الشيء اكيد مشتاق اله ابني الجبير وأول فرحتي

"حاولت اغير الموضوع لان شفته كلش تأثر"

لتين: اكول بابا عليك الله ما لكيت غير اسم زعبان تسمي وبعدين شنوو معناه ؟؟

ابو سائد: معناه الشجاع او المحارب الذي لا يهزم .

لتين: امممم واسمي ليش سميتني بهل اسم ؟

ابو سائد: لتين يعني لمعان النجوم

لتين: امممم حلوووو يعني اني نجمتك الامعه

ابو سائد: انتِ نجومي موو بس نجمعه وحده تعاي يا روح ابوج

كمت بفرحه حضنته ، بابا كدر يغير مزاجي بدقائق .

كمت ساعدت ماما بالبيت وكعدت ادرس
العصر الكل كاعد بالحديقة
كان بابا مسوي النه حديقة كلش حلوه الورد مزروع بطريقه جنن والثيل مقلم ومخلي مرجوحه وكراسي وطبله .







"حجى سائد بمراوغه "
سائد: اكوول اريان اليوم شفت أصدقائك مستلمين اوراق مال شنوو ؟

اريان: ها لااا ءءء هوه شسمه

لتين بخبث: شنوو الشسمه؟

اريان: لا ماكو هيج شيء هذول المؤجلين ، اي المؤجلين امتحنو هسه وستلمو الدرجات

سادن : هااا يا ماده ممتحنين؟

سمعنه الباب يندك كال وهوه يحاول يشرد من الموضوع

اريان: الباب يندك رايح اشوف منووو .

لتين بضحكه: ههههههه منوو هذا الي يفتح الباب انتَ معقول ، لعد منوو الي يتعارك اذا ندك الباب وهوه يفتحه

ابو سائد: عوفو اخوكم ولكم اني ادري بي راسب بالامتحان بس ساكت بمزاجي

سائد: اي هذا اريان بزر الكعده وتغلس عليه ، وهاي شريان كلبك تسوي كل الي تريده واني ابن البطه السوده مضلوم محروم

"ضربته ماما وحجت "
ام سائد: وولك منوو هاي البطه السوده؟

سادن: انتِ ماما

صرنه نضحك على سائد الي نحصر بالزاوية ما عرف شلون يشرد واريان بعد ما بين

كان سائد أصغر مني بسنه يعني عمره ١٩ سنه وسادن عمره ١٧ واريان الصغير عمره ١٣ سنه اما وتد كانت أكبر مني بسن ٢١ عمرها

وهيج خلص اليوم

مرت الأيام عاديه بدون شيء يذكر إلى أن كنت راجعه من الجامعه دخلت للبيت بمناضري الشمسيه

دخلت من باب المطبخ واني اصيح
كل عاده

لتين: ولكممم انييي اجيتتتت ياااا قوووم جوووعانه اييين الغداء يااا كفاره قريششش

دخل سادن يهز جتف باوعت عليه وصرت اهز وياه على الواهس

"حجيت واني مستمره هز "

لتين: شكووو شبيك منووو زوجج ؟

سادن: ولججج اقوه اقوه

لتين: ماما حامل ؟

سادن: لااا لاا ولجج اقوه

لتين: لا تكول لكيت كنز

سادن: لاا لا ياريت الكة فلوس

لتين: ولكك احجي مووو تعبت من الهز شكووو

سادن: بيت ال عكَاب اجوووو

وكفت بصدمه بعد ما جنت ماخذه الوضع بضحك
حجيت بتمته

لتين: من منوو اجج اجه؟

"سادن عدل وكفته وحجه "

سادن: احم ، بيت ال عكَاب اجوو علمود الفحص

لتين: وبابا شنوو رد فعله

سادن: شنو ضنين رد فعله غيرر انه نهار







لتين: وهسه شلونه

سادن: زين ما بي شيء

لتين: منو ومنو جاي منهم

سادن: الجد جاي بنفسه بس خرب شهل تجبر العنده ولا نهزت منه شعره ولج يشوف بابا يبجي ويبوس بيده وهوه ولا كانو ، ولا عبالج شاف ابنه الي من ٢٠ سنه ما شايفه

تجدد الكره والغل بكلبي اتجاهم بعد كلام سادن

توجهت للبراد شربت مي اخذت نفس قوي ودخلت للديوان بكل ثقه وقوه

شفت كدامي ثلاث اشخاص الشيخ عكَاب وثنين شباب

لتين: ياا اهلاُ وسهلا بيكم بيت ال عكَاب
شنوو هل مفاجأه الحلوه كان انطيتونه خبرر حتى نستقبلكم استقبال يليق بحضراتكم

ابو سائد: لتييين

لتين: هاا بابا

ابو سائد: روحي جهزي الغداء ويه امج يله بابا

لتين: اوو بابا موو تدري بيه ما اليه بالمطبخ ولا الطبخ حابه اكعد يمكم
واتعرف على اهلنه

وأخير حجى الشيخ عكَاب من بعد صمت وهوه يدرس شخصيه لتين

الشيخ عكَاب: احنه ما جايين نتغدا بدارك كل الي جاين عليه هوه ان نسوي الفحص وبعدها لكل حادث حديث

ابو سائد: بس يابه ما يصير هيج ابقه تغد...

قطع كلام بابا وكال
الشيخ عكَاب: يله بويه امشي نكمل الجايين عليه ونرد الديرتنه

لتين: واني مستعده وهسه نسوي التحليل هسه وبهاي اللحظه هم

الشيخ عكَاب: جا يله امشينه

كام نكت عباته وعدل عكاله الي لابسه
والشباب الوياه هم كامو

رحت باتجاه بابا بست راسه وايده وهمست
لتين: بابا ادعيلي اكون قويه لوو تروح وياي استمد القوه منك .

ابو سائد : ان شاء الله يا بنتي انتِ قويه وراح تبقين هيج قويه بيه وبلايه

عدلت وكفتي وتوجهت عليهم طلعنه واني الدنيه طالعه من عيني احس نفسي بأي ساعه انفجر

صرت اذكر كلشي عشنا وكل الكلام البابا وماما كالو بخصوص ماما رهف والكل العاشته

والي عشنا من جوع وحرمان كام بابا عنده عزت نفس مستحيل يقبل ياخذ من جدو سامي فلوس أو يقبل بمساعدة وكف على حيله بدون اي مساعده وفتح السوبر ماركت وعشنه براحه على حساب صحته بس حتى يوفر النه العيشه الزينه وما نكون اقل من غيرنا

فزيت من صفنتي على السياره وهيه توكف
رفعت عيني واني اشوف المستشفى كبالي

نزلت من السيارة بعد ما همه نزلو
عدلت الجاكيت مالتي ندار واحد من الشباب باوع عليه وعلى لبسي وهز راسه بمعنى ما فهمته وباوع على الشاب الثاني







توجهنا لداخل المستشفى كنت امشي بمستواهم

وصلنه لغرفه التحاليل كعدت على الكرسي
توجه ناحيتي دكتور حتى يسحب الدم

_رفعي الجاكيت حتى نسحب دم

جاي ارفع الجاكيت وفقنه صوت
_ماكو دكتورة هني تسحب دم

_عادي اخي لا حياة في الطب

_لا خويه شوفلنه دكتورة احنه ما نعرف هل سوالف

_تمام

راح الدكتور واني باوعت عليه وصغرت عيوني وعوجت حلكي وهزيت راسي بمعنى عجبني تصرفه

راح فتره ودخلت دكتوره
سحبت دم مني باوعت على الشيخ وكتله

لتين: موو المفروض يجي جراح هم يسحب دم للتحليل؟

الشيخ عكَاب: اول شيء أحترمي وكولي ابو صخر موش جراح والشيء الثاني راح يجي بعد شوي عنده شغل بغداد يكضي ويجي

لتين: بصراحه يا شيخ ما عرفت شنوو اوصفه ولا اعرف اسماء أولاده هل هوه عمي لوو ابوي
ويجوز غريب

ويه كلمتي دخل جراح باوعت عليه وكلبت عيوني
سلم وعيونه عليه

باوعت على ساعتي واني اكول

لتين: شوكت نروح تره اجيت من الجامعه للمستشفى وتعبانه

الشيخ عكَاب: ما ضل شيء ، صخر شوكت تطلع النتيجه

صخر: جدي بعد شهر

الشيخ عكَاب: موش هواي الوكت

صخر: جدي هذا أقرب وكت

رفعت عيني على الي جاوب الشيخ يعني هذا اخوي الجبير

دك جهازي وقطع عليه صفنتي

رفعته ونرسمت الابتسامه على محياي

كمت طلعت من الغرفه تحت انضارهم وجاوبت بفرح

لتين: يااا هلا والله هاي منوو داك عليه شعجب
شنوو جاي تموت كل مره اني اتصل عليك لوو ما تتصل

حذيفه: ولج شوي شوي سكتي خلي احجي اوف من لسانج

لتين: هههههه يله احجي

حذيفه: دريت بيج اليوم اسوين التحليل وكلت على هذا الانتصار عازمج على غداء

لتين: اوف اوف شهل الخبر هذا انتَ وتعزمني بدون ما اني اعزم نفسي تره هواي عليه من بعد صدمه ال عكَاب

حذيفه: لازم صاير شيء اقوه من الكلته

لتين: ايييي من أجي اسولفلك

حذيفه: تمام اني بالطريق جايج دزيلي موقعج

لتين : تمام حب

رجعت للغرفة وحجيت موجه الكلام الصخر

لتين: خلصنه كلشي أكدر اروح هسه

صخر : وين ترحين ؟

لتين: اريد ارجع للبيت







صخر: احنى نوصلج

لتين: لا اني...

قطع كلامي الشيخ

الشيخ عكَاب: مثل ما جبناج نردج انتِ امانه عدنه

كلبت عيوني وكعدت منتضره شوكت تخلص هل دراما

"حجيت بذهن شارد "

لتين:شتكولون لربكم من تضهر الحقيقه ورهف وراجح بريئين

الكل سكت بدون كلام ما كان عدهم جواب

صخر: احمم ، يله نروح خلصت الإجراءات

توجهنا للخارج واني اسوف سياره خالوو حذيفه موجود ضحكت بشر وهمست

لتين: هسه بلش الاكشن

نزل خالو من السياره وصار وجه بوجه ويه جراح
كانت النضرات بينهم تحدي وحقد

رفعت راسي واني اكول

لتين: هلوو حبيبي شلونج

حذيفه: هلو بيج حبيبتي، يله نروح

لتين: اي ، احم اني رايحه وياه هوه راح يوصلني للبيت

جراح: مثل ما جيتي ويانه تردين ويانه جمار

لتين: بس بابا يقبل اطلع ويه خالو حذيفه

جراح: كلت تردين ويانه

حذيفه : يله لتين امشي

تقدم جراح وسحبني من ايدي بقوه وكال

جراح: جمارررر امشي

دفعه من صدره خالو حذيفه
وبسرعه تقدمو صخر والي وياه دفعو خالو حذيفه
حسيت الوضع راح يتازم حجيت حتى انهي هذا النقاش

نداريت على خالو حذيفه ومسكت ايده وكلت

لتين : خالووو حباب بلا مشاكل اني رايحه وياهم وبعدين نطلع نتغدا تمام ، باوعت عليه بنضرات ترجي وكملت ، الله يخليك خالوو ما عندي طاقه بعد

حذيفه: تمام بابا روحي

صعدت واني الغضب يطاير من عيوني صعدو للسيارة وخالو حذيفه هم صعد

باوعت على جراح الي كاعد بصفي كنت كاعده بالنص وجراح من جها وصخر من جها ثانيه

لتين: انتَ باي حق تسوي هيج وتتحكم بيه

جراح: حكي انج بنتي واذا موش بنتي فبنت اخوي يعني عرضنه ما يمشي ويه الغرب

لتين بعصبيه : خالوو حذيفه موو غريب

جراح ببرود : لا غريب ، وهسه سكتي خلي نوصل صدعت من نكج فوك راسي

لتين: اكرهك وكأني ما كارها بشر قبل

باوع عليه بنضرات ما عرفت شنو افسرها بس سكتت وعيونه حجت بشيء مجهول بالنسبه اليه

سكتت ودرت وجهي على صخر الي على اساس اخوي باوعت عليه واني اكله







لتين: وانتَ ليشش دفعت خالووو من صدررره

باوع عليه بنفاذ صبر وسكتت
بقيت الغي والغي إلى أن وصلنه

ويه نزلتنه من السيارة طبكت سياره خالو حذيفه
باوعت عليه وباوعت عليهم

لتين: اوفف ياا ربييي جعت غيرر تخلص هل سالفه

سمعت صوت ضحكه قريبه عليه
باوع لكيت الشاب الي عرفت بعدين اسمه جاسر

طلع بابا بعد ما دكيت الباب

ابو سائد: ها باباتي خلصتي التحليل

لتين: بابا اني داخله اصرف

عفته بصدمته وخلت ركضت للمطبخ واني اكل اي شيء كدامي

شوي ودخل خالو حذيفه يكول
حذيفه: يله أخذت اذن ابوج امشي نتغدا

لتين: وجراح راح؟

حذيفه: ما ادري ومعلينه بي

لتين: تمام لعد يله بس هاا اني اسوق

حذيفه: دسكتي سكتي تردينه نموت جوعانين

لتين: والله ما يصير هيج ، هسه رايحه ابدل لبس مريح اختنكت من هل لبس

صعدت بدلت بلبس سبورت مريح ونزلت

لتين: بيت الشيخ طلعوو؟

ابو سائد: اي بابا طلعوو شصاير

لتين: شيصير يعني شافو خالوو حذيفه وجراح تخبل

ابو سائد: امممم ، الله كريم ، يله روحي ويه خالج

طلعنه اني وخالو للمطعم حجى خالو

حذيفه: شنوو تحبين تاكلين

لتين: اريد كلشي صالح للأكل

حذيفه: هز راسه واصل السياقه

باوعت عليه وحجيت

لتين: شبيك ضايج

حذيفه: من شفته ذكرت اول لقاء بينه

لتين: اممم ، تدري اليوم سوينه الفحص احس راح اوصل للحقيقة عن قريب

حذيفه: وشنو إلي راح تستفيدي بس جراح عرف بوجودج وراح يزعزع استقرار حياتج

لتين: ماما ترتاح بقبرها هذا الاريده

هز راسه وسكتنه إلى أن وصلنه للمطعم

كعدنه على طاوله معزوله كالعاده حتى نسولف براحتنه

حذيفه: ايي لتون شلون تطلبين

لتين: امم اريد دولمه ومقلوبه

حذيفه: لا حبيبتي انتِ اطلبي بس لنفسج اني اطلب اليه

لتين: لا حبيبي اطلب هذن بس اليه

حذيفه: ولجج هذا كله انتِ تاكلي ولو موو جديده عليج

لتين: اهوو راح يمن عليه بهل اكل







رفع أيدي بحركه استسلام وكال

حذيفه : لا حبيبتي طلبي براحتج

هزيت راسي واني اضحك وصل الطلب وبدينه ناكل
احس نفسي انتخمت شربت لبن وكلت

لتين : هسه مال اتمدد هناه نعست

حذيفه: اي والله اني هم بس هسه خلي نشرب جاي

بعد ما خلصنه الجاي رجعت للبيت بدلت ونمت وهيج خلصن الأيام بين جامعتي وأهلي والتفكير بالنتيجه

العوده للحاضر

الدكتور: نتيجه التحليل تكول ان النتيجه إيجابية
لتين رافع هيه بنت جراح عكَاب

باوعت لبابا بصدمه كأني ما مستوعبه الجاي اسمعه
حجيت بوجع

لتين: بابا هاي هيه طلعت برأتكم

ابو سائد: اي يا روح ابوج تعاي تعاي

رميت نفسي بحضن بابا وضميت وجهي بصدره احس ما أريد اشوف بشر اريد البد بحضن بابا مثل قبل من ماما تريد تعاقبني وبابا يحميني

جراح : جمار بنيتي

قطعت حجياته وكلت

لتين : بابا ما أريد اسمع احد الله يخليك طلعني منا راح اموت الوجع ذبحني

ابو سائد: بابا شنوو اليوجعج كليلي

صرت اهلوس ما اعرف شنو احجي احس هسه بينت رد فعلي على الموضوع هسه نصدمت كأني اليوم سمعت الخبر واليوم عرفت الحقيقه

باوعت عليه بترجي

لتين: بااباا الله يخليك طلعني منا احس راسي راح ينفجر

ابو سائد: لتين بااابااا لتين ولك سائد اختك راحت منيييي

هذا اخر شيء سمعته واغمى عليه

بعد مده كعدت حيلي مهدود احس نفسي بحلم بس من شفت نفسي بالمستشفى عرف الصار حقيقه وضهرت الحقيقه

باوعت على. بابا وكلت اله بصوت مبحوح أثر النوم

لتين: بابا نكشف كلشي كدرت اثبت الحقيقه ماما هسه رتاحت موو

ابو سائد: اي يا روح ابوج ارتاحت ، شلون تحسين نفسج

لتين: زينه اريد ارجع للبيت

ابو سائد: اي بابا هسه اشوف الدكتور ونطلع

فتح الباب واسمعه يحجي وياهم

ابو سائد: رجاء جراح روح منا هسه لتين مريضه ما مستعد اخسرها كافي عليه الي خسرته من عشرين سنه

جراح: راجح شلون صارت جمار

ابو سائد: زينه راح اطلعها هسه

عافهم وراح يدفع الحساب وبعدها طلعنه تقابلت وياهم
بباب المستشفى ضميت راسي بحضن بابا وكملت طريقي

صعدت للسياره حجى سائد

سائد: تعاي يا روح اخوج نامي على كتفي

لتين: حضنت ايده وخليت راسي على كتفه ونمت

وصلنه للبيت صعدت للغرفة بدون كلام نمت

وهيج مرت الايام رافضه اشوف جراح الكل حاول
بس حتى بابا رافض ان نلتقى بهل وقت بسبب وضعي

إلى أن بيوم كنت كاعده واباوع من الشباك واشوف جراح والشيخ وكم شخص ما اعرفهم ما ركزت بيهم

دكوو الباب فتحه الهم سادن ودخلهم للصاله
كعدت على الدرج واني اسمع كلامهم

الشيخ عكَاب: احنه اليوم اجينه حتى نرد الماي لمجاريها وحتى تأخذ جمار كل حقوقها نريد نسجلها باسم جراح ورهف

ابو سائد: شنو هذا الحجي بويه لتين مستحيل اتخلى عنها لوو بعد الف سنه هاي بنتي

الشيخ عكَاب: بس ما تكدر تنكر هيه موش بنتك ولدك محللين عليها

سائد: العفوو منك شيخ بس لتين اختنا ومستحيل نقبل بغير هل شيء

جراح : بس هيه الها أهلها عدها اخوه وأب واني ما اقبل بنتي تربه بعيد عني

سادن: لعدد وين كنت من تربت عدنه تعرف شتحب شتكره شنو تلبس زين أسألك سؤال هيه اي مرحله شنوو تخصصها تعرف ، سهرت عليها الليل من تمرضت

لا كلشي ما تعرف وهسه جاي طالب بلتين مستحيل نقبل تروح وياكم

الشيخ عكَاب: من تحجي الكبار تسكت الصغار لووو ما معلمك ابوك

ما كدرت بعد اسكت وهوه جاي يهين بابا سحبت
شال شمرته على راسي ونزلت بتراكي الهم
دخلت عليهم بعصبيه وكلت

لتين: انتم باي حق جاي طالبون بيه هااا باي حققق سمعوني زززين اني من طلبت اثبت نسبي مو حتى اعيش يمكم ولا حتى تنسبني الك ، اسمعوني زين راجح هوه ابوي ونيفين هيه امي وسائد وسادن واريان همه هذول اخواني مستحيل اقبل بغير هل كلام

وهسه بدون مطرود امشووو طلعووو بره بيتنه

ابو سائد: لتييييين تأدبي

ضربني كف وصار يصيح بقوه

ابو سائد: ميت مره كتلج لا تحجين لا تحجين شلون تجرئين تطردين ابوي من البيت ولججج مووو هيججج ربيتجج انيييي ، سادن اخذها منااا بسرعه

تقدم سادن رفعني وخلاني تحت اجناحه وهوه يطلعني من الصاله وصلت قريب على جراح ورفعت راسي باتجاه وكلت بحقد

لتين: للمره الثانيه بابا يضربني بسببك اكرهك جراح اكرهك للموت مستحيل اسامحك لووو اشوفك تشهك انفاسك الاخيره اتمنالك الموت بكل دقيقة بحياتي اكرهك جراح الله ياخذك

وهناه كانت الضربه القاضيه لجراح
لزم صدره ووكع من طوله
الكل تجمع حولنه واني مشيت لغرفتي بدون ما اهتم لأمره

واني اردد

لتين: مات جراح مات...........


يتــبـ؏

البارت الثاني عشر

#انتقامك_وانتقامي_(رد_الدين )

لنا حياة بداخلنا ، تختلف تماماً عن الحياه التي يرانا فيها الأخرون

........................................................

لتين...

اسمع صياح وشخطه سيارة واني هادئه ما بدر مني اي تصرف احس بوكعه جراح انتصاري هيج حاقده عليه

والى هنا احس هاي هيه لازم ارجع لتين رافع القويه
نمت وما كعدت غير بليل جوعانه
نزلت اكل واشوف ماما كاعده على القنفه
توجهت على وكلت باستغراب

لتين: ماما شنو مكعدج هناه صاير شيء ؟

ام سائد: منتضرة ابوج واخوتج بعدهم ما راجعين

لتين: ليش همه وين ؟

ام سائد: راحو ويه عمامج للمستشفى لان جراح نجلط

لتين بلا مبالاه: وهمه شعدهم راحوو

ام سائد: اوفف منج اوفف لتين عليمن طلعتي هيج حقوده ولج مستحيل تكونين على رهف جانت كلش فطيره وسامح بسرعه

لتين باستهزاء: اي صح طالعه على بيت ال عكَاب حقوده

ام سائد: امشي من يمي يله امشي موتيني بسوالفج الله يساعد الياخذج

لتين: اصلا هنياله عليه

رحت سويت لفه جبن اليه وصعدت بقى بالي يم بابا واخواني والساعه عدت ١٢:٠٠ بقيت منتضرتهم للساعه ب١:٠٠ رجعو طمنت عليهم ونمت

كعدت ثاني يوم عطله والكل نايم
صرت افتر بالبيت
بعدها سويت اكل وصعدت لغرفه سائد فتحت الباب على كيف باوعت عليه نايم
احتاريت شلون اكعده وبأي طريقه

ضحكت بشر واني اسحب بطل مي وذبيته عليه بقوه

كعد مخروع باوع عليه بصدمه وبعدها صاح بعصبيه

سائد: ولججججج لتتتتين العووووبه انييييي الججججج تعااااي

لتين: ضحكت وكلت اله ، جوعانه يله تعال اكل وياي تدري بيه ما احب اكل وحدي

ونزلت ركض بلشت احضر الريوك نزل سائد يباوع عليه بتك عين

لتين: صباح الخير حبيبي

سائد: صباح النور

لتين : شنوو ضايج مني تره اشاقه وياك وداعه بابا

باوع عليه ودار وجها حسيته هل مره صدك زعل

حجيت بخوف وترجي عندي بالدنيا كلشي ولا زعل اهلي

لتين: سائد زعلت مني ليش ما جاي تجاوبيني
اسفه والنبي هاي هيه بعد ما اشاقه وياك هيج شقه
بس لان جوعانه وانتَ تعرف ما احب اكل وحدي كعدتك .







باوع عليه وبعدها ضحك هوه ضحك واني نزلت دموعي صرت ابجي نصدم من رد فعلي

سائد: لا لا لا لتين ليش تبجين كنت اشاقه وياج
تعاي تعاي احضنج

سحبني لحضنه واني بجيت اكثر وحجيت

لتين: عبالي زعلت مني والله اني احبكم لا زعلون مني
وضوجون مني

سائد: ولجج شلون ازعل منج غير انتِ حبيبتي وصديقتي واختي وبير أسراري ولج انتِ عزيزه روحي
ليش هيج بجيتي هاا معقول تبجين على هيج شيء تافه شوو صايره رقيقه هل فتره شكوو

لتين: احس انوو صرت ثقيله عليكم بعد ما عرفتو اني موو اختكم وو....

سائد: اش اش شهل كلام هاا شوو صايره كلش فيطيه شنو هل كلام انتِ اختنه غصبا على اليرضه والمايرضه
الي ما يعجبه الكلام اكوو هواي حياطين يختار واحد ويركع راسه بي ، لا تفكرين بعد ما عرفنه الحقيقه ممكن نتغير عليج تمام لتين انتِ اختنه

رفع راسي ومسح دموعي وباسني من راسي

سمعنه صوت تحمحم باوعنه باتجاه الصوت
جان بابا واكف يم الباب
ذكرت الكف الي ضربنياه نزلت راسي واني مقهوره من تصرفه كدامهم

"حجى سائد وكسر السكوت "

سائد:صباح الخير بابا تفضل ويانه تريك

ابو سائد: صباح النور بابا لا اني طالع للسوبر ماركت
يله في امان الله

سائد: الله وياك

باوع عليه وكال

سائد: انتِ وبابا متعاركين ليش موو مثل كل صباح

لتين: بابا هاني كدام الكل وضربني ، اعترف اني غلطت من طردتهم بس بابا ضربني كدامهم تعرف شلون نكسرت بهل ضربه حسيت نفسي مسنوده من قبل بابا ومن ضربني ما الي سند بعد وهاي ثاني مره انضرب والسبب جراح

سائد: اوفف لتين ما اعرف شكول الج الوضع كلش يحير حقج بكل الي سوي بس كان لازم تحترمين وجود بابا وما تصرفين من كيفج

لتين: يعني قابل بالي يحجونه يردون ياخذوني من بابا ويسجلوني على اسم جراح واني مستحيل أوافق

سائد: وبابا هم ما وافق لا تنسين

لتين: ما اعرف بعد سائد ما اعرف احس نفسي بمتاها

اني رايحه انضف غرفتي

سائد: تعاي ما اكلتي

لتين: نسدت نفسي بالعافيه حبيبي اكل انتَ

صعدت لغرفتي واني اكتم دموعي باوعت على نفسي بانعكاس المراية وكلت

لتين: كافي تبجين من شوكت لتين تبجي على أقل شيء وين راحت لتين القويه الي ما تنزل دمعتها
انتِ قويه ، نزلت دموعي واني اهمس ، اني قويه مستحيل انكسر اني قويه انيي ق قو يه







ما كدرت اتحمل كعدت على الأرض ورجيت نفسي على الحايط وصرت ابجي ضميت وجهي بيدي وبجيت

بعد مده انتهت نوبه البجي وكمت سبحت وتعطرت ونزلت واني ارسم الابتسامة

شفت ماما كبالي تقدمت بستها واني اكول

لتين: صباححح الخيررر ماماتي

ام سائد: صباحج ورد حبيبتي

لتين: ايي شكوو ماكوو شوكت اجه بابا بليل

ام سائد: شعجب ما شفتي من اجه

لتين: اممم ، رجعت نمت ما لحكت عليهم من اجوو

ام سائد: هاا ، اي رجعو ساعه ب ١:٠٠

لتين: اهاا ، وشصار هناك؟

ام سائد: ابوج جراح نصاب بجلطه

لتين: جراح مو ابوي ماما ومستحيل انسب هل صفه لجراح

ام سائد: الله يهديج ماما

لتين: شبيج يا حبيبتي كل هل هدوء والرقه وتدعيلي بالهدايه

ام سائد: هههههههه منو يكدر للسانج بعد

لتين: اي ماما كملي طلع جراح لو بعده

ام سائد: على حسب علمي باجر يطلع لان الجلطه عاوجه ايده وشوي حلكه

لتين: هاا يعني صار معاق

ام سائد : طاح حضج لا يرجع بالعلاج الطبيعي

لتين: اممم ، تمام اني رايحه اجيب موبايلي اخابر وتد مختفيه

ام سائد: تعاي تعاي وين رايحه المخزن صار شهرين اكولج تنضفي وانتِ مغلسه

لتين: ماما والله تعبانه

ام سائد: لتتتين

لتين: رايحه رايحه اوفف ربييي

ام سائد: يله روحي لا تتئففين طيرتي الملائكة

صعدت بكل كسل انضف الشغله ابقه بيها ساعه
جانت ماما كلش مدللتنا بس ندرس والشغل كله عليها
وتد كانت تنضف ويا ماما بس أني كلش كسوله

نضفت المخزن من التراب ورتبت الأغراض كلمن المكانه
ومستحه ونزلت واني اصيح

لتين: مامااا خلصت المخزن بعد شهرين ياله تكولين اليه نضفي خووووش

حذيفه: اي موو خايسه ولجج ليشش ما ساعدين امجج

لتين: ههههه هاي انتَ اجيت يا هله

حذيفه: هههههه اي اجيت اطمن عليكم واشوفج

لتين: شكول الك حياتي كلها اكشن صايره هههههه

وهيج خلص اليوم بين الضحك والسوالف بعدها اجه بابا وراح خالو حذيفه وبعد العشاء
حجه كلام صدم الكل بي

ابو سائد: اني قررت قرار

سادن: شنو بابا شصاير

ابو سائد: احنه راح نرجع للعماره







ام سائد: رافع شجاي تكول احنه حياتنه هناه بيتنه اهلنه معارفنا جامعات و مدارس اولادنه كلها هنا

ابو سائد: ننقل كلشي ونعيش بالعمارة خلص ما اتحمل بعد اريد ارجع لأهلي وكاعي وناسي

سائد: بابا شنو هل كلام مستحيل نروح هناك وانتَ حسب كلامك مجتمع عشائري يعني مستحيل نتأقلم وياهم

ابو سائد بعصبيه: كلت راح نرجع للديره وانتهى النقاش ما اسمع اي كلمه بعد

فقدت اعصابي واني عارفه سبب رجوعنه هناك

لتين: بابا انتَ شجاي تكول مستحيل ادخل هل محافظة بعد ما نبذت امي منها وجراح عايش بيها

ابو سائد: لتين اني ما ماخذ رأي احد اني جاي انطيكم علم حتى جهزون نفسكم

لتين: وين نعيش لا تكول نعيش وياهم بنفس البيت

ابو سائد: لا نعيش ببيتي اني عندي بيت هناك

لتين: بابا الله يخليك غير قرارك مستحيل نكدر نعيش هناك انتَ تعرف كلش زين احنه عاداتنا غير عنهم
حياتنا كلش تختلف عن نمط حياتهم

ابو سائد: نيفين اني رايح انام لحد يزعجني

تركنه بحاله صدمه ودخل للغرفة
كعدت على الكرسي بقله حيله حجى سادن

سادن: صاير شيء والا ليش بابا مصر انو نرجع

لتين: يا ربييي مستحيل اروح هناك مستحيل اكيد الشيخ قنعه يرجع للعمارة

سائد: باجر نحجي وياه بلكي يقتنع منا ويترك سالفه النقله

لتين: ما اضن هل شيء كلامه كان بحزم يعني مستحيل يقنع ، ماما ليش ما حجيتي شيء

ام سائد: ابوج مصر وإصراره وراه شيء أكيد موو عبث

اريان: خلي نروح هناك اكيد راح تتغير نضرتج عليهم من تعيشين وياهم

لتين: انتَ عبالك سياحه رايحين لا حبيبي هناك عاداتهم وتقاليدهم غير عناا راح نتعب بالعيشه هناك

ام سائد: هسه طشرو كلمن يروح لغرفته ابوكم عصبي باجر تناقشو بهل موضوع

صعدت للغرفة خابرت وتد

لتين: هلوو وتدي

وتد: هلوو قلبي شلونج

لتين: موو زينه ابد ابد احس كلبي راح ينفجر

وتد: ياا ساتر شصاير

لتين : بابا يريدنه ننتقل نعيش بالعمارة

وتد: شنووو واني ما فكر بيه

لتين: ولجج اليوم وره العشاء فجر القنبله وراح نام

وتد: وهسه شنوو مستحيل هل شيء بابا ما فكر بيه منوو اليه بعدكم

لتين: شسوي وتد شسوي تعبت من هل موضوع احس اكبر غلط سويته من ضهرت نفسي لجراح ومتيقنه ان جراح هوه الي اقنع بابا يرجع للعمارة







وتد : ما ادري شنو اكول بعد غير الله كريم

لتين: اي صح ، شخبار عيالج وياج

وتد: سكتي وخليها الكل شاد وياي واني ساكته منتضره تكمل فلوسنه ونشتري بيت واخلص منهم

لتين: الله كريم ان شاء الله تشترون بيت

وتد: لتين اني رايحه اسوي عشاء لساهر وانوم إيليا

لتين: تمام قلبي باي

وتد: بيباي

كمت فرشت اسناني وخليت المرطب السحري مالتي
ولبست لبس مريح ونمت

وهيج مرت الايام بابا رافض نحجي بهل موضوع
واحنى رافضين ننتقل

مجتمعين اني واخوتي بغرفتي نحجي بخصوص النقله

سادن: هسه لو بس اعرف شنوو نستفاد من النقله لغير محافظة

سائد: حتى لتين تسامح جراح

لتين: اووع مستحيل اسامحهم وجراح يبقى غريب عليه لا يمكن اتقبله

اريان: هسه خلي نشوف العيشه هناك شلونها يجوز تعجبنه

لتين: اي واحنه نبقه نفترض

سادن: شباب سكوت خلي نفكر بحل

سائد: انتَ من رحتي للعمارة شلون شفتيها

لتين: اممم بصراحه حلوه بس موو مثل بغداد
هناك البس مختلف العيشه هم مختلفه اكيد لان بغداد بيها تحرر اكثر والأهم بيت ال عكَاب بمنطقة زراعيه
يعني بساتين وبوابه جبيره مثل باب الحاره هذا أقرب وصف.

سائد: زين خلي نقترح انو ننتقل بعد الامتحانات ومنا لهذاك الوقت نكدر نفكر بسالفه تلغي الشيله كلها

لتين: خوش فكره ، وهسه روحو اريد انام يله يله

سائد: واني اكول شعجب لحد هسه ما طاردتنه

لتين: هههههه اشاقه وياكم ابقو اني رايحه بالحديقة شوي اكعد

نزلت للحديقة كاعده ساعه افكر بالي صار ساعه اراقب النجوم واذكر كلام بابا من جان يكول اليه انتِ نجمتي وشريان كلبي معقول هيج زعلي عادي عندك

صعدت لكيت الولد كلمن بغرفته قريت كتاب ونمت

بعد مرور إيام

بابا اقتنع بالكلام واجل النقله بعد الامتحانات
بهذا الوكت بلشنه نقره جانت المواد صعبه بالنسبه النه

واليوم آخر امتحان عندي رجعت ويه الخط تعبانه
شفت سيارة حديثه بباب بيتنه

عرفت اكيد هاي لواحد من بيت ال عكَاب

دكيت الباب ونداريت واشوف صخر بمقعد السايق
وبصفه شخص غريب ما عرفته منوو

تقدمت باتجاهم بفضول دكيت الجامه وهوه نزلها







لتين: هلوو شعدكم هناه

صخر: وعليكم السلام جايين على عمي راجح

لتين: عوجت حلكي على طريقه سلامه كانو استهزاء بيه ، اممم لعد ما دخلون جوه تنتضرو لان بابا اليوم عنده شغل

صخر: البيت الما بي رجال عيب ندشله وهوه بي بس حريم

لتين: اممم ، جيد ، هسه تكدر تدخل بما اني اعتبر اختك يعني موو غريب

"باوع عليه بنضرات غريبه وحجه"
صخر: لا بويه ننتضر هني واحد من الولد يجي وندش

لتين: تمام براحتك

عفتهم ودخلت

لتين: هلوو ماما

ام سائد: هلوو حبيبتي

لتين: ماما هذول شعدهم هناه

ام سائد: والله ما اعرف رادو ابوج وما يقبلون يدخلون

لتين: اممم ، اني رايحه انطيهم مي الجو بره حار

ام سائد: اي ماما براحتج

طلعت بطالعه مي جاهزة وفتحت الباب وتقدمت عليهم شافني صخر ونزل من السياره

لتين: هذا مي الجو حار

صخر: مشكوره

لتين: العفوو مسويت شيء ، تردون شيء

صخر: لا هاي هيه

لتين:تمام

دخلت واني اسمع موبايلي يدك بالجنطه باوعت على المتصل وتد
ضحكت وجاوبتها

لتين: يا هلا اليوم شعجب متصله بيه

وتد ببجي : لتين تعاي اخذيني ادك على بابا والولد ما يجاوبون

لتين بخوف: وتد شبيج منوو وياج

وتد: هاا هااي ععم عمتيي وو حم اتي وحماتي ك كتتلنني

لتين: شنووو انتِ شجاي تحجين انتِ وين هسه
وتد جاوبيني بلا بجي خلي افهم

وتد: هسه انني ببا بالغرفة

لتين: سمعيني زين وتد تسكتين من البجي وتكومين تلمين ملابسج وملابس بنتج وذهبج وشكو فلس بغرفتج اني جايتج ديري بالج تنزلين

وتد: تمام

سديت الخط بدون ما انطي خبر لماما طلعت اركض

نزلو من السياره صخر والوياه بعد ما شافوني اركض طالعه من البيت

صخر : شكوو شبيجج

لتين: موو وكتك صخر خلي اشوف سياره اريد اروح لوتد

صخر : صاير شيء شبيها اني اخذج امشي ركبي بالسيارة

لتين: صعدت بدون كلام واني اوصف اله العنوان اول ما وصلت نزلت بسرعه بدون اي كلام







دفعت الباب ودخلت شفت عمة وتد وحماتها وزوجه حماها كاعدت بالمطبخ باوعت عليهن بدون كلام صعدت لغرفه وتد
دكيت الباب واني احجي

لتين: وتددد فتح الباب اجيت

فتحت الباب وجان انصدم بوجها كله شخوط اضافر بوجها وشفتها تنزف وشوي زراك يم عينها

احس نفسي شطت حضنتها واني اكول

لتين: والله اخذلج حقج منهن مربع هسه سكتي وشيلي بنتج خلي اشيل الجنط سويتي مثل ماا كتلج

وتد ببجي : اي

لتين: تعاي يله

نزلنه واني اشوف كبالي صارن ضلن يحجن شنوو تاخذين إيليا وبأي حق وكومه حجي وغلط

باوعت على وتد ذبيت الجنط بالگاع ورفعت ردان القميص
وكلت

لتين: شوو تتعالن اليوم اطلع حركه كلبي بيجن

تقدمت على حماتها وصرت اضرب بيها اجت عمتها من وره تضرب بيه واني اضرب اجت مرت حماها عود تفزع لعمتها وحماتها وطبكتها وياهن حسيت نفسي ما اسيطر هنه ثلاثه واني وحده باوعت بعيوني على شيء اضربهن بي لكيت طاوع والنار مشتعله جواها

ركضت عليها وسحبتها ووين اليوجع صرت اضرب بيهن وهنه يضربن بيه حجابي نزع مني وتد تريد تسحبني ما تكدر طلعت تركض تصيح لشخص حتى يطلعني واني اصيح

لتين: ولججن حقرررات تضربن اختيييييي انيييي اختييي تنضرب بسيطه اذا مااا كسرت اديجن ما اكع بنت ابوي

عمه وتد: امشي لجج لقيطه بنت الزنا مدري من ياا رجال امج خلفتج

لتين: مادام اني لقيطه شوو تتعاي اعرفج بنت الشوارع شسوي

طفرت عليها اضرب بوجها واخرمشها بضافري سحبت شعرها بيدي وحسيت شخص سحبني من خصري قوي وشالني شيول منها

صرت اصرخ واحجي

لتين: عوووفني اموتها لهاي بنت الكلب ولججج اشرف منججح ياا عارر النسوان ولججج الخايسه انيييي الججج

طلعني من البيت باوعت طلع صخر شايلني دخلني للسيارة باوعت عليه واني اكله الجنط جيبهن

صخر: عوفيهن هسه

لتين: كلت الجنط اريدهن

صخر: ولجججج جماااار

لتين: جيبهن لوو انزل انيييييي

صخر : الصبررررر

نزل والتقه بالباب ويه ابنهم جاي يركض
اضن شخص منطي خبر حتى يجي بسبب الصياح
تسألم ويه صخر واسمع صخر يكله

صخر: النه لقاء ثاني هسه الوضع متوتر وبتنه تنطك ببيتكم ومن نسوانكم

_ما اعرف بالصاير هسه اجيت وما يكون خاطركم اله طيب







صخر: هسه ما نحجي شيء اله نعرف شمسوي ببتنه بس انطيني الجنط من الداخل خلي نروح

جان صخر يحجي بحركه كلب خلا الولد يرجف
طلع الجنط وصعد للسياره

حضنت وتد الي تبجي بدون توقف باوع عليه صخر وكال

صخر: ربطتج وينن

خليت ايدي على راسي وهسه ياله انتبهت على شعري طالع والشال ماكو

لتين: يااا وين شالي

صخر : استغفر الله العظيم

باوعت عليه واني امثل عدم الاهتمام همست لوتد

لتين : جايبه شال وياج

وتد: اي شوفي بالجنط

دورت بالجنط ولكيت شال شمرته على راسي وسحبت وتد لحضني وايليا هم حضنتهن واني اكول

لتين: لا ضوجين حبيبتي لا ضوجين اخذت حقج ما اسكت عن حقج والله لاخليهم يتوسلون بيج سامحيهم

رفعت عيني وجان تلتقي بالامرايه الاماميه ويه عيون غامضه حواجبه المعكوده ويه طبره حاجبه وعيونه السود شيء غريب حسيت بيه غير اتجاه عينه بعدم مبالاه

واني نخبصت نزلت عيني وخليت إيليا كدامي تغطي عليه

وصلنه للبيت دفعت الباب ودخلت وفتحت الباب الصاله لصخر والوياه

شافتنه ماما صرخت بفزع

ام سائد: يمه بناتي شبيجن

ركضت وتد بحضن ماما تبجي
وماما تحاول تعرف شبيها على صوت البجي وصياح ماما طلعو بابا واخواني مفزوعين وهناه صار الصياح ويردون يعرفون شنوو صاير

تقدم باتجاهي باب وهوه يحجي

ابو سائد: لتتتين شبي وجهجج شنوو هذاا الدم
مسويات حادث احجن

لتين: بابا صخر بالباب دخله هوه يسولف كلشي ما أكدر احجي الله يخليك حلكي يوجعني

راح سادن دخل صخر واني رحت غسلت وجهي باوعت للمرايه وانصدم بشخط كلش جبير بادي من تحت عيني لحد نص خدي وجهي مدمه واكو شك جوه حاجبي مبين يراد اله خياط احس وجهي كله يوجعني ويحركني بس جاهلت الموضوع.

طلعت كعدت بالصالة وياهم واني اسمع صخر يسولف الهم الصار هناك

باوع عليه بابا وهيه ياله انتبه لوجهي كام بفزع عليه وهوه يحجي بخوف

ابو سائد: لتين بابا هاي شصاير بيجج كومي اخذج للمستشفى وانتِ واختج

لتين: ما بيه شيء بابا هسه اضمدهن وهاي هيج

سادن: ياا ما بيج شيء وجهج مشوهينه الجج

لتين: بابا خلي نرفع عليهم دعوه لهل حقراء شوف شلون ضاربين وتد







ابو سائد: وتد كوليلي ليش ضارباتج هيجج

وتد ببجي: والله بابا كلشي ما مسويه الهن هنه شادات وياي لان ساهر يحبني ويحترمني واليوم لان كعدت متاخره عمتي صارت تحجي عليه واني نترت بيها لان حتى صارت تغلط عليه اجت حماتي وسحبتني من شالي وتضرب بيه واجت عمتي هم صارت تضرب بيه
واني خابرت عليكم محد يجاوب خابرت على لتين وهيه اجت تعاركت وياهن وكتلتهن بالطاوه

جان بابا كلش عصبي تقدم سادن كعد بصفي وهوه يضمد جروحي وحجى

سادن: هسه راح اعقمه الج بس تخلص السالفه نروح للمستشفى لان يراد خياط لحاجبج

سكتت ما بيه حيل اجادله

مرت ساعه ودخلو خالو حذيفه وجدو سامي

تقدم عليه خالو حذيفه بخوف وكال

حذيفه: لتين بابا هاي شنوو شصاير امشي نروح للمستشفى ليش لحد هسه محد ماخذها

سادن: خالوو ما تقبل عندت

حذيفه: وانتِ الثانيه هم تعاي ويانه ، هاي شصاير فهمونه

دخل سائد مجان يعرف بهل مشكله باوع علينه وصاح

سائد: هاي شصاير منوو وياجن

سادن: اهداء سائد تعال اسولف الك اني

وبده يعيد الكلام الحجيناه اله

سائد بغضب كام سحب سلاحه وهوه يكول

سائد: وانتم كاعدين اليوم انعل والديهم يتعدون على خواتي

لتين: وطيح حضهم هم الحقراء اني يكلولي بنت زنا ولقيطه

ندار عليه بابا عليه وكال

ابو سائد: منوو كال هيج

حجيت بصوت مكتومه بيه العبره احس جابتها بالصميم كلمتها

لتين: ام ساهر عجوز البين

هناه الكل ثار وصار يصيح وهمه يعرفون شكد هل موضوع حساس بالنسبه اليه

ابو سائد: اليوم انعل والديهم

صخر: عمي انه خابرت عمامي والشيخ عكَاب وهمه بالطريق جايين

الكل كعد على اعصابه وره ساعات سمعنه شخطه سيارت

طلعنه وبقو بس الزلم بالصالة صعدت لغرفتي يطل شباكها على الشارع أكدر اشوف كلشي

باوعت وجان اشوف سيارت كلش هواي وزلم وشباب
الكبار معكلين والشباب لابسين دشاديش وكلمن لازم سلاحه
نزلت ركض واني احجي

لتين: ماما وتد جايبين جيوش وجايين بيت ال عكَاب

ام سائد: يا ساتر شكوو شصاير

لتين: اجوو كومه زلم وكلمن وسلاحه

ام سائد: يا رب لطف بحالنا

بقت امي تلوب واحنه نسمع الصياح بعد مده دزو ناس عليهم حتى يجون يحولون

هواي حجو ونهلكنه واحنه نسوي جاي وننطي مي احس وجهي خدر بس قاومت

اسمع بابا بده يسولف الهم كل الصار

ابو سائد: اريد حق بناتي اطلعه من عيونهم اني بناتي اشرف من الشرف يطعنون بشرفهن

جراح: منوو طعن بشرف بناتنه

ابو سائد: راحت لتين تجيب وتد بعد ما خابرتها
وعمتها تكول للتين القيطه

هناه نتفض الكل وصار صياح حجه الشيخ عكَاب

الشيخ عكَاب: على هل جلمه ناخذ حكنه مربع موش احنه التطلع منه العيبه وبنواته اشرف من الشرف

صار حجي وما انتهت إلى ودزو خبر عيال وتد ان ياخذون عطوه عشر ايام

صعدت صورت آثار الضرب الي بجسم وتد وجسمي

بعد مده صاحو علينه يردون يشوفونه بعد ما بقو بس عمامي وولدهم والشيخ

لبست عبايتها ماما واحنه وراها لبسنه بشتتات بعد ما بابا انطه خبر ان نلبسهن

دخلنه وره ماما سلمت عليهم بخجل وتد هم سلمت بخجل اله اني صلفه ما أخجل منهم مدري لان شايفتهم

جراح: شنو هاي الجروح الي بوجهج رحتي للمستشفى

لتين: لا اخوي سادن عقمهن اليه ما يحتاج دكتور

جراح: ما يصير بابا امشي اخذج انتِ واختج

لتين: بس .....

ابو سائد: لتتتين روحي ويه ابوج وسمعي كلامه

باوعت عليه بمعنى لا والله وهوه خزرني طلعت اني وتد وجراح وصخر يسوق

صعدنه بالسيارة والوضع هدوء باوعت على وتد تبجي بهدوء همست الها

لتين: عليمن تبجين هسه موجوعه

وتد: ابجي هلى حضي وساهر الي ما سأل عليه

لتين: الغايب عذره وياه يا وتد

هزت رأسها وسكتت وكفت السياره ونزلنه للمستشفى وبده الدكتور يكشف عن جروحي باوع عليه وبعدها ندار على جراح وكال

الدكتور: بنتك حاجبها راح اخيطه ثلاث خياطات
وخدها اكتفي بتعقيمه وتضميده حتى لا يجرثم


سكتت وبده يخيط الدكتور بحاجبي رغم مخدر بس احس الوجع ينهش بيه

بسبب الوجع ردت اذب حركتي بشيء حسيت بأيد يمي سحبتها قوي وضغطت عليها واني مغمضه عيوني

خلص الدكتور حاولت اكوم باوعت على ايدي لكيتها لازم ايد جراح وهوه يباوع عليه بحنيه

سحبت ايدي بسرعه وكمت دخت ورجعت كعدت







حجى بخوف
جراح: ها بابا دختي

لتين: اممم ، خلي نطلع ، وتد وين شافو جروحها

جراح: اي عقموهن الها ما بيها شيء

سكتت وطلعنه رجعنه للبيت واني صعدت نمت كعدت ثاني يوم كمت غسلت واني اشوف الشاش على وجهي تنهدت بتعب ونزلت البيت اليوم بي روح بسبب إيليا تلعب وتضحك مونستنه

وهيج مرت الايام جر وعر ويه عيال وتد إلى أن خلصن ال عشر ايام وصارت الكعدت والصدمه جانت بيوم ساهر تخله عن وتد وكال انو مستعد يطلكها بس إيليا اله ياخذ حضانتها

انتهت الكعده وتد نهارت بعد الخبر السمعته

سائد: يابه كافي هسه خليني أني اصرف حتى يتنازلون عن إيليا

سادن: اني ويه سائد بهل كلام بالقانون كلشي نسوي

الشيخ عكَاب: وشنهو التريد تسوي

سائد: لتين مصوره كل آثار الضرب نكدر نهددهم بيه يتنازلون عن الحضانه

الشيخ عكَاب: صح لسانك وهذا الراح يصير

سائد: بابا اني رايح للدوام هسه مرخصتكم

الكل : مرخوص

الشيخ عكَاب: وليدك شنو يدرس

جاوبه بابا بصوت كله فخر

ابو سائد: سائد يدرس كليه ضباط

الشيخ عكَاب: ما شاء الله

وهيج انتهى الموضوع رفعنه دعوه عليهم وصار الموضوع عند الدوله

وطلكت وتد مع الحضانه والغايب والحاضر

وبيوم بابا اجه وكال

ابو سائد: خلص البيت من ترميم وتصليح وبعد يومين ننتقل للعمارة

ام سائد: شوكت لحكت ترمم البيت ما كتلي اول تالي تضم عليه رافع

ابو سائد : يا الغاليه والله رايح عن بالي هيه حجايه صارت بيني وبين الشيخ و جراح كتله البيت يراد اله ترميم وهوه تكفل بكل شيء ومن صارت سالفه وتد راح عن بالي ما عبالي جراح ماشي بالترميم

لتين: الله يضخن لبنكم وانتَ من شوكت صالحت ويه جراح

ابو سائد: لتيننن لا تدخلين ، وامشي صعدي لغرفتج

صعدت واني شايطه بابا من يوم ما طردت اهله وهوه تغير عليه بعده زعلان مني واني اذا ما اقتنع مسويه غلط ما اعترف بي

سكتت وبلشنه نلم الأغراض ونجمعهن يومين كلشي اكتمل والاغراض نشحنن للعمارة
وهسه احنه بطريقنه للعمارة جاهلين شنوو ينتضرنه هناك

وصلنه بعد تعب اخواني نصدمو بالبساتين بس اني شايفتهن ما اهتميت
دخلنه واني اشوف مره جبيره بالعمر بابا راح عليها يحضن بيها ويبوس بيدها هيه تبجي وتحضن بي الكل صار يبجي على بجيهم راحت ماما سلمت على الكل واحنه وياها بعدها بابا راح للديوان يم الزلم واحنه يم النسوان صرت اباوع عليهم جانن بجميع الأعمار والكل يشتغل بدون توقف
باوعت عليه الشيخة وكالت

الشيخة جمار: انتِ بنيه جراح ورهف تعاي حبيبه تعاي تشبهين امج

تقدمت بثكل بوستها وهيه تحضن بيه وتبوس

بعدين تقدمت وتد سلمت عليها وعيونها تفتر دور على شيء اعرف كلش عدها فضول تعرف منو بلبل

بعدها صبو الغداء وبعدها كمت اغسل اباوع على المغسلة سره حتى يغسلن باوعت عليهن وزفرت بملل

باوعت بعيوني على مغسله جانت بره البيت توجهت
عليها طلعت من باب المطبخ غسلت ورجعت بالرجعة طلع شخص من باب المطبخ نضربت بي اجيت اوكع تلاحكت نفسي ووكفت عدل رفعت عيني بعصبيه

باوعت عليه وملامحي تحولت لصدمه واني اشوف عيونه نفس العيون

يتــبـ؏

البارت الثالث عشر

#انتقامك_وانتقامي_(رد_الدين )

" أنما لم تخلق الأحلام لكي تموت يوماً ،خلقت تتحقق ونزهو بها فرحين ."

........................................................

لتين......

بدون ما يعرف منوو اني كال بعجرفه

_مره ثانيه من تمشين لا تردمين بالوادم خوش عايني زين

باوعت عليه بصدمه فتحت حلكي اجاوبه ما لحكت
عافني وراح

باوعت عليه بنرفزه ضربت رجل بلكاع ودخلت واني شايطه منو هوه حتى هيج يحجي وياي

دخلت للصاله الكل مجموع يشرب جاي باوعت على ماما وكلت

لتين: ماما شوكت نروح لبيتنه تعبانه وايلو هم تعبت

ام سائد: هسه اخابر رافع واشوفه

هزيت راسي واني اباوع عليهن شلون يباوعن علينه ويتبسبسن حجت وحده منهن ومبينه حقيره من وجها

_اي وريد صدك طلكتي

باوعت وتد بستغراب وهيه تكول

وتد: تحجين وياي ؟

_جا منو هناه غيرج اسمها وريد ومطلكه هم

لتين: بس هيه اسمها وتد هاي اول شيء ثاني شيء الطلاق لا هوه عيب ولا حرام شخص ما كدرت تعيش وياه وهوه موو كفو يكون زوجها بكل بساطه نفصلت عنه

_جا اذا هيج الطلاك سهل عدجن عمي خوش ولو منيه امها بلبل العافت رجلها وبيتها وطلكت

وتد: خاله الطلاق موو مقياس للشريفه والموزينه شخص ما كدر يصون وصيه الرسول (ص)
اكيد راح تطلك منه لأنها تستحق شخص احسن منه

"باوعت عليها بابتسامه وحجيت اني وراها "
لتين: وبعدين اذا تحجين عن بابا ف هوه نفصل عن بلبل وزوج ماما نيفين وعوضته عن كل شيء عاشه سيء بحياته

باوعت علينه ودارت وجها لان الكلام ما عجبها
باوعت عليهن وضحكنه

بعد فتره بابا نطانه خبر حتى نروح وياه للبيت

شلت إيليا وطلعنه دخلنه للبيت جان كلش حلوو اكبر من بيتنه والتعديلات الي مسويهن كلش حلوات من كلشي باوعت على اخوتي وكلت بسرعه

لتين: اكبر غرفه بالبيت اليه معليه حجزتها اني اول وحده

سادن: دسكتي سكتي اكبر غرفه اليه اني طالب مقبل على السادس لازم اكعد بغرفه جبيره حتى اخذ راحتي بالدراسه

اريان: لا غلطان المفروض تكعد باصغر غرفه حتى المعلومات ما تطلع من دماغك تبقه محصوره

وتد: ههههههه اي عفيه اريان ، وبعدين الغرفه راح تكون النه اني ولتين وايليا يعني نستحق اكبر غرفه لوو شتكول بابا







ابو سائد: الكل يسكت اني اوزع الغرف ، وتد وايليا بالغرفه الجبيره الجوه اني وامكم بالغرفه الي بصفها
سائد وسادن واريان الغرف الفوك كلمن ياخذ وحده لان كلهن نفس الحجم انتهى النقاش..

بقيت واكفه اباوع على بابا واحس نفسي منبوذه معقول ما حسبني منهم يعني بهذا تصرفه يكول انو انتِ ما مرحب بيج بيناتنه باوعت عليه بعيون دامعه
نزلت راسي وكعدت بالمطبخ اباوع على المطبخ كلش هوسه ما مرتب بعدنه ما مكملين البيت ، باوعت عليه وطلعت سحبت برموده وتيشيرت مريحات بالشغل بدلت وفتت للمطبخ صرت انضف بحركه كلب
الكل دخل ينام لان تعبانين من الطريق اله اني عيني ما اخذت النوم
طلعت وتد دور عليه

وتد: لتين هاي شسوين موو كلنه من باجر نبلش ترتيب البيت تعاي نامي

لتين: ما جايني نوم انتِ روحي كملي نومتج ليش كعدتي

وتد: ما لكيتج بالغرفه ضل بالي يمج ، لتين ادري بيج نقهرتي من تصرف بابا بس هوه لان زعلان منج وهيج حجى

لتين: لا غلطانه بابا حجى هيج لان اني صدك ما الي مكان بينكم ابقه غريبه عنكم عندي اب وأخوه غصب عنهم يتكفلون بيه

وتد: هاي شتكولين ولج شنو هل كلام ليش احنه يا يوم حسبناج بنت عمه صار خمس أشهر نعرف انتِ موو اختنه شفتي تصرفاتنه تغيرت شفتينه ابتعدنا عنج

لتين: لا بس بابا

وتد: لابس ولا شيء تدرين بابا من يضوج من شخص يعاقبه بالتجاهل

لتين: جان لازم يعذرني وتد اني تعبت خمس أشهر اني اعاني لوحدي تدرين شنو حسيت من عرفت بالحقيقه تعرفين امسح دمعتي وانزل اضحك بس حتى أبين اني ما مهتمه ولج تعبت واني امثل وامثل طاقتي خلصت

وتد: لا لا لا لتون هاي انتِ القويه تبجين لعد شتكولين عليه اني الضعيفه ام دميعه

لتين: طاقتي خلصت

بقت حاضنتي واني ابجي احس سحبت كل الطاقه السلبيه مني
باوعت عليها وكلت

لتين: ولجج جعت شوو كل ما ابجي اجوع شهل أحاسيس العندي

وتد: ههههههه خربتي ابو الجو ، خلي نسوي اكل اني هم جوعانه

بلشت وتد تسوي اكل واني انضف خلصت كعدنه اكلنه وكملنا تنضيف واحنه متكسرين ، بده الكل يكعد وصار وكت صلاة المغرب دخلت للغرفة غسلت وصليت
وطلعت لكيت سادن جايب عشاء من بره
خلت وتد الاكل على ميز الطعام اني باوعت عليهم ورجعت ادراجي احس نفسي وحيده الخنكه مرافقتني دائمن شعور الوحده قاتل
سمعت صوت ماما صيحني

ان سائد: لتيننن ماما تعاي اكلي

لتين: الف عافيه شبعانه

ام سائد: ولج يا شبعانه خليت اخوج يجيب كباب دجاج لان اعرف بيج تحبي







لتين: تعبانه حبيبتي وما اشتهي بعدين اكل اني

سادن: شوو تعاي اكلي يله

سحبني باتجاه الميز سحبت نفس وكعدت صرت اباوع بصحني بدون واهس باوعت على إيليا سحبتها اوكل بيها

وبعدها خلصنه العشاء كمت غسلت ماعين بهدوء
وبعدين دخلت للغرفة سفطت ملابسي بالكنتور
غير عن العاده جانت ماما تصيح عليه وترزل ياله اقبل اسوي شغله هسه راح شغفي بالحياة

وبلش اليوم الثاني والثالث والرابع والخامس وهيج خلصت الايام مرت على حالتي وانعزالي عشرة أيام

الكل لاحظ ابتعادي عنهم والكل بلش يسئل عن السبب اكتفيت بجمله

لتين: ما مرتاحه هناه مشتاقه لبيتنه القديم

الكل سكت بس ما مقتنعين بالسبب
وبيوم جنت كاعده بالمطبخ وماما اسوي غداء
دخل بابا بدون ما يباوع عليه
جان لحد هسه زعلان من تصرفي مع العلم مر عليه ثلاث اشهر .

باوعت عليه ودخلت لغرفتي خفت يضوج من يشوفني

الكل راح يكول شدعوه هيج سوين وشنو لزوم هل تصرفات بس محد يعرف شنو جنت احس بهل فتره

الانتقال وزعل بابا وتصرفه من وزع الغرف وما وجه الكلام اليه حسيت نفسي عاله عليهم

صليت وطلعت صبيت ويه ماما وتد الاكل اخذت صمونه وسويت لفه اليه جان الغداء برياني دجاج

بطلعتي صادفت بابا داخل باوع على ايدي وعليه صفن
واني انسحبت بهدوء بدون اي كلام

كملت اكل ونمت الروتين قاتل تمنيت يجي الدوام حتى اطلع من البيت

للعصر ودزت علينه الشيخة

ام سائد: لتين لا تعبيني كومي لبسي خلي نروح عيب من الشيخة

لتين: يعني يا ماما شسوي اروح وياكم بس اشوف ناس اكرهم وانغث منهم روحو انتم واني ابقه بالبيت شعليه

وتد: ولجج موو بيبي أكدت علينه كلنه نجي

لتين: اهوووو تره كلت ما اروح شهل لزكه كفو منيييي

ابو سائد: لتتتين امشي بدلي بسرعه يله بدون صوت ومره الثانيه اذا عليتي صوتج على امج لو اختج اطيح حضج كافي دلع

لتين: اني ما ادلع بس اكرهم ما أريد أشوف أحد منهم تتعب نفسيتي

ابو سائد: الج خمس دقايق اذا ما كملتي لبس وطلعتي يا لتين راح تشوفين وجهي الثاني ، مفهوووم

كال اخر كلمه بصرخه كمزت من صياحه
دخلت للغرفة واني دمعتي معلكه برمشي لبست بشت وشبشب وشمرت الشال على راسي وأخذت جهازي وطلعت شفته يباوع على ساعته اكيد يحسب الوقت
اليه

بابا شخصيته من النوع الكلش صارمه بس ويانه يختلف حنون وماكو مثله جان بس الي يسوي غلط يتعاقب اسوء عقاب يخلي يكره حياته







باوع عليه وعلى لبسي هز راسه بيأس وسكت

طلعنه نتمشى جان الفرق بينه بستان ملكهم مشينه مسافه وكفنه كبال قصر ال عكَاب هيج جنت اسمي

جنه كلش مبتعدين ما نحب نطلع او نصادق الجوارين بابا من النوع الي ما يحب هل سوالف ، المهم دخلنه للقصر وصادفنه غيث باوع علينه وضحك

غيث: هله عمي هله بأهل بغداد

ابو سائد: هله بيك بعد عمك شلونك

غيث : بخير تفضلو تفصلو

دخلنه واني اضم نفسي منه لانه لحد هسه ما يعرف اني نفسي الي اجيتهم للمحل

راحو بابا واخواني للديوان واني وماما وتد دخلنه ويه دخلتنه صادفنه وحده من شفتها احس كلبي دك سريع وهيه مبين عليها الخبث هيج من الله مبينه سمهم في وجوههم

باوعت علينه واحد واحد واستقرت انضارها عليه احس عيونها طلعن من مكانهن من الصدمه وهيه تباوع عليه

سمعنه صوت الشيخة وهيه تهلي بينه وترحب دخلنه لغرفتها لكينه واحد منطينه ضهره وكاعد يم الشيخة

سلمت عليها ماما وبوستها وتد هم نفس الشيء باوع عليه وحجت

الشيخة جمار: وانتِ يجمار ما ناويه سلمين على جدتج

ويه ما كالت اسمي التفت الكاعد يمها واني اشوفه نفس الي صادفت وياه بالباب باوعت عليه بحقد وهوه باوع عليه بغموض

لتين: لا شيخة شلون ما اسلم عليج شلونج شنو اخبارج

الشيخة جمار: تعاي يا مكصوفه الركبه تعاي احبج

لتين: لا تسلمين حبيني من بعيد

ضحكت وتد وماما تعضلي شفه وتخزر وتغمز
باوعت عليه وهزيت راسي بمعنى شنوو

الشيخة جمار: خايب شيكولون اهل بغداد من يردون يحبون بعض

حجى بصوت كلش خشن بحيث نصدمنه من خشونته ما جاي ابالغ بس صوته كلش خشن هيج مثل المبحوح

_تبوس جده تبوس

الشيخة جمار: اي تعاي ابوسنج خايبه بس شكل بدون اخلاق

لتين: لا لا شكرا شيخة من بعيد احسن

ام سائد: لتتتين

لتين: جايتج شيخة اني ابوسج ، دنكت بستها وهيه سحبتني تبوس بيه احس هيج دخلت كلبي بدون استئذان بقت حاضنتني واني هم حبيت الشعور واني بحضنها .

تقدم باسها من راسها الي جان كاعد يمها من دنك صار قريب عليه احس نفسي رتبكت من قربه دفنت راسي بصدر الشيخة وهو وطلع بدون كلام

الشيخة جمار: اي ام سائد ليش ما تمرين علينه هاي صالج عشر ايام من شلتي

ام سائد: والله يا شيخة تعرفين بعد تعب والشغل منا يوميه نسوي شغله ما نلحك اني والبنات







الشيخة جمار: جا ما نطيتي خبر وادز البنوات عليكم يحوفنكم حوف

ام سائد: تسلمين شيخة ما تقصرين كملنه كلشي

الشيخة جمار: صيحيلي عمه بعد عمتج موش غريبه انتِ

سكتت ماما وصارن يسولفن سوالف عاديه وبعدها دخلن بنات هواي بعمرنا وأصغر واجت المره الي لتقينه بيها بالباب

باوعت عليه وكالت

_هاي بنت رهف

لتين: اي اني بنت رهف ليش متفاجئه

_لا ليش اتفاجئ بس ذكرت من غوت جراح وخلته يستر عليها

لتين: وليش يستر عليها تره حسب السمعته جراح كتل نفسه حتى ياخذها وعاف العمارة وسكن بغداد بس حتى توافق عليه

_لا لو ما سحوره امج ما خذاها

الشيخة جمار: إبتهال كافي

باوعت عليها وعرفتها هاي ضره امي باوعت عليها بضحكه وكلت

لتين: يااا هااي انتِ زوجه بابا الي كسرها بضره بنت ال١٥ سنه بس تدرين حقه ينغرم بماما على حسب علمي اني اشبها واني صلاوات اجنن يعني آكيد طالعه على ماما رهف حلوة

باوعت عليه بغضب وكامت ضحكت واني اباوع على وتد تأشر لي بمعنى ماتت وتضحك

صار المغرب والكل بده يجتمعون بالغرفه والنسوان مثل الدود يفترن ولا يكعدن دخل الجد وعمامي ومن ضمنهم جان بابا واخواني

كمنه سلمنه عليهم دتد تقربت بوستهم واني من بعيد اسلم الكل يضحك ويسولف واني اشوف بابا منطلق وياهم صفنت عليه ونزلت راسي

وبعد مده نصب العشه جان اكل كلش دسم بالنسبه النه ما متعودين عليه

خلصنه الاكل والكل كعد يشرب جاي
ودخل عليهم نفس الشخص الي لكيناه يم الشيخة

نصدمت من بابا وكف يباوع عليه بحنيه

ابو سائد: زعبان !!

زعبان: اي زعبان الي عفته واختاريت ناس ما تسوه اضفر رجلي الصغير

كلامه جان بالنسبه اليه جان ضربه انتفضت واني اباوع عليه بحده وجاوبته

لتين: احترم نفسك ومن تحجي علينه تحجي باحترام فهمت كلامك زين يا زعبان

ابو سائد: لتين كافي

لتين: لا موو كااافي من يجي يحجي على ماما الي ما رتاحت بحياتها ويسبها وهيه بقبرها هناه راح احجي
ارجع واكولك يا زعبان من تحجي على ماما احجي بأدب

زعبان: والله وكت بنات الزنا يحجن بتكبر وثقه

لتين: اني موو بنت زنا اني بنت اشرف وحده اني بنت الي ماتت مضلومه والضالمين انتووو بيت ال عكَاب







جراح: زعببان ما اسمحلك تحجي على بنتي جمارر بنتي والي يطعن بشرفها يعني يطعن شرفي

ابو سائد: لتتين كافي روحي للبيت ، سائد اخذ لتين للبيت

سائد: لا بابا عندي كلام ويه زعبان قبل ما اروح ، اسمعني زين صح انتِ ما عشت ويانه ولا عدنه علم بوجودك بس تبقى اخونه الجبير والك احترامك ومثل ما احنه نحترمك انتِ لازم تحترم لتين

زعبان: بالنسبه اليه ما اعترف بيكم بقند*** اني وحيد عشت وحدي وابقى وحدي ما اعترف بيكم ولا اعترف بهذا اب اليه

هناه الكل نتفض على كلامه وما قبلو عليه

صار يصيح بقوه وحقد

زعبان: اسمعني راجح اني ما اعترف لا بيك ولا بولدك اخوه الي فهمت لو لا انتِ ميت بالنسبه اليه ما عندي اب ولا اخوه دير بالك بيوم تحجي وتكول عندي ولد الي عفته عشرين سنه بدون ما تسئل عليه وانتِ عايش حياتك ومربي ولدك وهاي بنت الزنا ما اعترف بي للموت


خلص كلامه وطفرو عليه سائد وسادن صارو يضربون بي وهوه يضرب بيهم الجو نخبص والكل ما قابل على كلام زعبان وصارو يهدون بيهم ويبعدوهم عن بعض بس جانو كانو أعداء والتقو .

لهنا ونسمع صرخه وتد وهيه تصرخ

وتد: باباااا لااااااا باااااباااا سائد بابااا سادن شووووفوو باباااااا

الكل ركض باتجاه بابا المرمي على الأرض
اخذو وراحو للمستشفى ردت اروح وياهم بس محد سمعني طلعت بنص الكراج ابجي واصرخ اريد اروح وياهم

حسيت ايد صارت على راسي رفعت راسي واني اشوفه جراح بجيت ودفعت ايده

لتين: كل الصار بسببك انتَ اكرهك

جراح: اكرهيني قابل بس سكتي بسج بجي عيونج راحن

لتين: ما اخذوني وياهم اريد اشوف بابا ليششش اريد اروح الله يخليك احجي ويه واحد ياخذني الهم

جراح: تردين ترحين للمستشفى موو

لتين: ايي

جراح: انه اخذج رايح اشوف واحد من الولد بلكي موجود

راح وره مده رجع ، ما لكيت احد ياخذنه وانه ايدي عايبه ما أكدر اسوق

باوعت على ايده الي بسبب الجلطه لا زالت معووجه

لتين: اني اسوق بس دليني

باوع عليه بحيره وبعدها كال

جراح: يله امشي

لتين: دقيقه لروح اصيح ماما وتد يرحن ويانه

هز راسه واني دخلت اركض
لكيت ماما تبجي وتد كل عاده كاعده بزاويه وتبجي

لتين: ماما وتد يله نروح لبابا جراح راح ياخذنه

طلعنه واني اخذت السويج وجراح بصفي يدليني على موقع المستشفى شكرت بكلبي خالو حذيفه الي علمني السياقه







وصلنه صفيت السياره ودخلنه دك جراح على واحد نزل يدلينه على غرفه بابا جان مخلي بالانعاش

باوعت عليه من الجامه وبجيت صرت اهمس بقهر

لتين: بابا كوم حباب مالي غيرك بهل دنيه انتَ سندي وحياتي معليك بحجي زعبان لان ضايج هيج يحجي بس يهدء اني اروح اعتذر منه بس انتَ اصحى حباب بابا

رجعت اكعد يم ماما حسيت نفسي ختنكت بعد ما أكدر اتنفس طلعت اركض واني اسحب النفس بالكوه كعدت بالحديقة ابجي بدون توقف حسيت شخص كعد يمي ما هتميت كسر السكوت وحجى

_راح يطيب ويرجع مثل قبل واحسن صدكي

حسيت بكلامه مثل الواحد غركان وجلب بقشه
باوعت عليه والدمع مغوشه الروئيه عندي

لتين: يعني بابا راح يطيب صدوك يعني راح يرجعلي

"ابتسم بقهر وجاوبني "
_صدكي هسه حجيت ويه الدكتور وكال انو راح يستعيد وعيه الصبح ونكدر نطلعه من الإنعاش

لتين: والله راح اصير عاقله وما اسوي مشاكل ولا اتعارك ويه جراح ولا زعلان مدري زعبان ولا راح اكسر كلمته

سكت واني هم سكتت بعدها كسر الصمت وكال

_ما عرفتيني صح؟

لتين: ركزت بوجها تحس شايفته بس ما اعرف وين ، احس اعرفك اكيد انتَ واحد من اولاد عمامي صحح

"ضحك بقهر وجاوبني"

_اني أسر اصير اخوج ابن جراح نفسه الي التقيتي بي بالمحل بيوم الي جبتي القلاده وفجرتي القنبله

"باوعت عليه بصدمه"
لتين:اسفه بس ما ركزت زين يعني هسه انتَ اخوي

أسر: اي اخوج ، تدرين جنت اتمنى عندي اخت

لتين : وطلعت عندك اخت لا وجبيره هم هههه

سكتنه وبعدها اجه سادن باوع علينه وتقدم بثكل كمت عليه وحضنته خلا ايده على ضهري وحضني

لتين: بابا شلون صار

سادن: زين لا يضل بالج باجر يصحى ويرجع للبيت

باوعت عليه وبجيت

لتين: بسببي كل الي صار ما جان لازم اتعارك ويه زعلان

سادن: زعلان منوو

لتين: هوه زعبان

سادن: هههههه حلوو هل اسم وبعدين هوه زعلان على كولتج الي بده ما الج دخل انتِ

هزيت راسي وسكتت تقدم سادن باتجاه أسر سلم عليه جان يعرفه بعدها رجعنه للبيت بوقت متأخر نمنه بس كم ساعه وبعدها كعدنه نضفنه وحضرنه كلشي لاستقبال بابا واخيرا رجع نباوع عليه نزلو من السياره سائد وسادن ما خلو واحد يشيله غيرهم واريان لازم الكرسي المتحرك الهم فعلا حسيتهم سند اله وبعدها دخلوو للبيت الكل استقبله اله اني واكفه بعيد وابجي احس نفسي اني السبب بالي صار وأخذت عهد على نفسي ان ابتعد حتى ما يتأذى بسببي







ذبح الشيخ على سلامته خرفان ثنين ودخلو للديوان مالتنه جانو جايبين طباخ احنه علينه بس الأشياء الخفيفه

خلصنه كلشي وبدينه نغسل ماعين البنات جانن ويانه ويانه ما خلنه لوحدنه احنه نسوي شغله وهنه عشرة
نشيطات بسرعه يشتغلن

خلصنه كلشي وكعدنه لليل الكل راح

لتين: اني ادري زياره المريض قصيره شوو هذول من الصبح لليل ما يحسون خرب

وتد: سكتي ولجج نهد حيلي واني انضف

ام سائد: كافي حجي وشتغلن نضفن البيت باجر ما نلحك

وتد: هممم اكووو باجرر ولججج لتتين اموتج وما ارتاح

لتين: يبووو يا طلابه لتين شمسويه هسه اني غير افهم

وتد:لوو ما انتِ دورين عليهم ما جان عرفناهم ونكربنه بهل ضيم

لتين: اي والله كله بسببي صرت ادور بالماضي وخربت استقراركم

"تقدمت حضنتني وحجت"

وتد: تره اشاقه وياج شبيج ولج صايره حساسه من شوكت

لتين: امشي ولي يله خلي نكمل ونام

كملنه كلشي ودخلنه ننام ضليت اتكلب ما كدرت انام
سمعت صوت سياره باوعت من الشباك مالتنه ما يبين بس ضهره
المحقق الي بداخلي شتغل طلعت على أطراف اصابيعي بهدوء
فتحت الباب باوعت عليه وبديت اتقرب وبده يبين عندي منوو هوه زعبان اجيت ارجع ادراجي بهدوء بس حسيت بشخص يسحبني بقوه ويسد حلكي بيده ويقيد حركتي

باوع عليه برعب شفته يباوع عليه بشر واضح بعيونه

صرت اتنفس سريع واني اشوف ايده توخر الشعر الي على وجهي بهدوء بعدها بأطراف أصابعه صار يتحسس وجهي حسيت نفسي بخطر حاولت أفلت نفسي بس جان اقوه مني
بلعت ريكي وكلت بخوف كل قوتي تبخرت يم ضخامته وصوته والرعب الي عيشنياه بهل لحضه

لتين: ش ششتتر يد مم منيي ي

زعبان:اريد اخذ روحج بهل لحضة........

يتــبـ؏
.
.
.
.
.
.
.
.
.
.

من البارت القادم

_انه اسف

_على شنوو

_على الي سويته وياج

_من شوكت تعتذر من واحد انتَ

_ما معتذر من احد هاي اول مره اعتذر وراح سامحيني

_يعني السالفه غصب

_اي غصب ، لوو تحبين اسوي بيج مثل المره المسابقه

رجف كلبي برعب واني اذكر الي صار وياي


قراءة ممتعة، دمتم برعاية الرحمن وحفظة