#هل_كنت_فصلية

البارت_84

سالي .. شوية واجت ماما كالت دخلي لا تبقين خارج واخذت الستكانات الي جانن بالحديقة واخذتني وياها للبيت وجانت مكعدة النسوان بالصالة

رحت فورا للمطبخ واني مخطوف لوني وكوة واكفة على رجليني اخذت تيلفون ماما وخابرت صكر ومارد وبقيت اتصل الى ان جاوب

صكر .. شبيج سالي مكلوبة الدنيا يمي

سالي .. غير تفهمني شصاير كوة واكفة على رجليني من الخوف

صكر .. ماكو شي الناس الي يمنا صايرة وياهم مشكلة وداخلين يمنا لحد ما تفض مشكلتهم انتي اهتمي بيهم ولا تقصرين وياهم

سالي .. امانة ماكو غير شي

صكر .. لا والله ماكو وهسا لازم اسكر ماكدر ابقى احجي

سالي .. تمام براحتك

سكرت منو وسحبت نفس بقوة احس جنت مختنكة وهسا رجعلي النفس حطيت كلاصات ماي بصينية واخذتهن ورحت للصالة

اول ما وصلت يمهن كلتلهن حياكم الله وزارتنا البركة وقدمتلهن الماي وبعدها صبيتلهن جاي وماما جانت تساعدني علمود ما اتعب لحالي

بعدها خابرت عبدالله علمود يجيبلنا احتياجات العشى بما انهم موجودين لازم نسويلهم عشى جان يريد يأجلها بس اصريت عليه علمود ما نتأخر عليهم

راحت ماما كعدت يمهن لان ما يصير يبقن لحالهن لحد ما اجى عبدالله اخذت الاغراض منو وشفت الحجية جاية باتجاهنا ودخلت الاغراض للمطبخ

اجت الحجية ورحبت بيهن وكعدت وياهن وماما عافت الحجية يمهن واجت علي وصارت تساعدني بالعشى والزلم تطبخلهم ام بارق ببيت الحجي

وشوية وانقذتنا سهى من اجت رحبت بيهن واجت علينا اني وماما وصارت تساعدنا وتحجي ويانا وهمزين اجت لان جنا من صدك بحاجتها

سالين .. ما عرفتي شنو موضوعهم

سهى .. ابنهم داعم واحد بالغلط ومتوفي الولد وهو خايف ومنهزم ومحد يعرف وينو

سالين .. وشراح يسوون هسا

سهى .. هسا يحاولون هم وابوي يلكون حل

سالين .. الله كريم

سالين .. كضينا الوقت كلو بالمطبخ واني جان علي تقطيع الزلاطة علمود ما اتعب وماما وسهى يطبخن سوا لحد ما كملنا العشى

صبيناه وصارن ينقلنو ماما وسهى واني اسفط الصحون بالصياني ومن كملن حطينا النا عشى بالمطبخ علمود نتعشى بسرعة قبل ما يبرد الاكل

تعشينل وكملنا وقدمنا الهن جاي وقبل ما تروح ام بارق راحت سهى وماما على بيت الحجي جابن فرش لان الي عندنا ما يكفن وساعدنهن ام بارق وخواتها

اني ما اختلطت بالضيوف جنت ملتهية بالمطبخ ومن صار وقت النوم فرشن الفرش سهى وماما والحجية راحت على بيتها وسهى كالت باجر اجي

ومن نامو الضيوف خابر صكر كال راح ابقى بالمضيف انام عيب ارجع للبيت وبيه نسوان واني صعدت لغرفتي متكسرة من التعب

اخذت ملابس واخذتلي دوش وبعدها رحت لفراشي اول ما حطيت راسي عالمخدة نمت ما كعدت لثاني يوم صليت الفجر وكعدت ماما ونزلت

بعد الريوك كالو الحجي وابو الولد رايحين يطلب عطوة (مهلة) من اهل المتوفي علمود يسوون كعدة ويحلوها بالتفاهم واتفقو بعد 3 ايام تصير الكعدة

خلال هال 3 ايام ما قصرنا ويا الضيوف ابد ودائما نحجي وياهم بابتسامة ونطمنهم ان راح تنحل الامور إن شاء الله وما يصير شي سيئ

هم بقت بيهم الخوفة ويتصلون على ابنهم رقمو مغلق ومحد يعرف شي عنو الحجية وسهى جانن يوميا يجن بعد الريوك ويروحن بعد العشى

الي عجبني بالحجية انو ما جانت تدخل بي اني وماما ولا حاولت تسمعنا كلمة لو شي بالعكس تتصرف ويانا طبيعي والضيوف ما حسو انو متخالفات احنا وياها

طبعا هاي العائلة الها عشيرة ومستعدين يوكفون وياهم بكل صغيرة وجبيرة بس مو موجودين بالبصرة عايشين بواسط لذلك اجو علينا

والحجي طمنهم ان هاي العائلة بحمايتو وما يطلعون من يمو قبل ما تنحل المشكلة وهم احترمو رايو ومشو بامرو لان يعرفوه كدها وعند كلمتو

باليوم الثالث اجو شيخ عشيرتهم ووياه زلم وراحو ويا الحجي وابو الولد ووياهم صكر بعتبارو الشيخ المستقبلي للعشيرة فلازم يكون حاضر

من وصلو جانت عشيرة المتوفي منتظرينهم واستقبلوهم وبدت المناقشات بينهم وكالعادة بقو ساعات يتناقشون على حل يرضي الجميع

اخير شي اتفقو على فصل 50 مليون ولازم اهل المتوفي يطلعون من البصرة واكثر شي اصرو على طلعتهم من البصرة وماكو مجال يغيرون رايهم

ابو القاتل وافق فورا والحجي طلب منهم ينطوه مهلة لحد ما يبيع بيتو وينقل غراضو لواسط يعني يرجع يعيش قريب من عشيرتو

شيخ العشيرة تكفل بالفصل وراح يدفعو هو لان ابو القاتل حالتو المادية ما تسمحلو يدفع فصل بهالكمية هاي فهو دفعها عنهم

من اجو بشرونا انها انحلت ولاول مرة نشوف النسوان وجيهن بينت عليهن الراحة وطول الوقت يتشكرونا ويدعولنا والعصر قررو يروحون

ودعناهم ودعينالهم بالتوفيق وراحو وقتها جنت ميتة من التعب 3 ايام مو مرتاحة بنومتي اول شي صكر مو وياي ثاني شي انام متأخرة واكعد من وقت

رحت على غرفتي تمددت وفورا نمت شوية واجى صكر تمدد وياي ونام وبقينا نايمين لليل من كعدت شفت الساعة 10:30 بالليل

من تحركت كعد صكر ابتسم وكال شبيج تتحركين مثل الفارة ما تعرفين تبقين بمكانج كلتلو وليدي جوعان اريد اروح اكل بدالو ورفع ايدو عني علمود اروح

رحت احط عشى وماما جانت نايمة فتحت الثلاجة مابيها شي جاهز جنت دائما اوصي صكر يجيبلي اندومي فطلعت جيسين وقوطي سمك

بين ما كملت اجى صكر كعد بالمطبخ طلعت خبز وحميتو وحطيت الصينية وكعدت يمو وبلشنا ناكل هو اكثر شي اكل سمك واني اكلت اندومي

جانت الدنيا ليل وبوقتها جانت تمطر الدنيا كمت غسلت المواعين وصكر بقى يمي من كملت كلتلو يلا خلي نرجع نصعد سكر تيلفونو وكام

مشيت خطوتين وفاجئني من شالني بحضنو كال لا تتعبين بنيتي خليها مرتاحة كلتلو هي اصلا مرتاحة قابل هي شايلتني لو اني شايلتها

كال ماعرف بس المهم هسا اني شايلكن ثنينكن لفيت ايدي على ركبتو وهو استغل الوضع وصار يبوسني ويصعد الدرج وما قطع البوسة لحد ما دخلنا للغرفة

جنت اريد اروح اخذلي دوش وما خلاني بقى يبوس بي ورحنا لعالمنا الخاص والحمدلله ماما ما شافتنا من جان شايلني ويبوسني

رغم انو ما احب انو احد يشوفنا من نبوس بعض حتى لو ماما بس ماعرف ليش من اكون وياه اتصرف بلى عقل وانسى حتى ان ماما موجودة

صار صكر اكثر من انو زوجي لا صرت اشوفو دنيا محاوطتني ال 3 ايام ما حسيت بطعمتهن ابد لان هو مو موجود وما يكدر يجي

صرت من صدك اعشقو عشق مو طبيعي مرات من يحجي ويا احد ويضحك بدون وعي اصفن عليه واضحك ويا ضحكتو وكأنو دا يحجي وياي

مرت الايام ويوم بعد يوم اسمن اكثر صرت على كولة ام زكي برميل مخللة ههههههههه اخير شي صرت اتعب كلش من اصعد عالدرج كأنو صارلي ساعة اركض

ولهالسبب جهزت غرفة تحت الي ولصكر لان ماكدر اصعد وانزل كل شوية بس مرات صكر يشيلني ويصعد بي للغرفة ورغم امتنع علمود لا يتعب بس ما يفيد وياه

مرت الايام بهدوء كضيت اغلب وقتي بدراستي علمود انجح وما يصير عندي نسيان واعيد السنة وجنا على تواصل دائما ويا حسن وحسين

مرة من المرات جنا دا نتابع مسلسل اني وماما وصكر وحسيت بوجع ببطني بس مو قوي حطيت ايدي على بطني وتحرك الطفل وحسيت بحركتو

صرخت صرخة مو طبيعي بس صرخة فرح خطية ماما وصكر كمزو غير كمزة من الخوف اخذت ايد صكر وحطيتها على بطني وتحرك مرة ثانية وضحك صكر

وماما انخطف لونها من الخوف كالت شبيكم كال صكر بربج سالي هاي دكة تسويها بينا اندار على ماما كال هاي تحرك الطفل وهيج كمزتنا

ماما رجعت كعدت كالت وربي حستوي بي سكري هالبنت رحت ركض عليها كعدت يمها وحطيت ايدها على بطني واني اضحك

تحرك الطفل وضحكت ماما كالت اي منا ورايح يبقى يتحرك الى ان يجي للدنيا صكر كاللها جيبي سدادة اذن علمود من تصرخ مرة ثانية ما تكمزين

عفتهم يحجون وحطيت ايدي على بطني واتخيل شلون دا يتحرك بس جان شعور مستحيل توصف جمالو كلمات ربي يزرق كل محروم هالفرحة

من ذاك اليوم صار وقت ضحكي وفرحي هو تحركو بس الخبيث مرات يضربني برجلو يخليني اتلوى من الوجع وماما تكول هاي حركتو الي مكيفة عليها

بس رغم هذا من يتحرك حركة خفيفة يرجعلي احساس الفرح وابقى حاطة ايدي على بطني علمود احس بحركتو وبطني صارت بكد البطيخة

ايديني ووجهي انتفخن الى درجة من وصلت الشهر السادس صار صكر بكل قوتو ما يكدر يشيلني مثل قبل واذا يشيلني ما يصعد الدرج الا ينكطع نفسو

واني لان اخاف لا يتأذة ضهرو صرت حتى لو يحاول يشيلني امتنع وما اخليه لان اذا لا قدر الله وشالني وزلت عندو فقرة يتورط باقي عمرو

صار وقت دراستي نص ادرس بيه ونص اتأمل حركة الطفل ومرات انسى الدراسة واتخيل شلون هسا شكلو وشلون عايش داخل جسمي

صرت افكر بابداع الخالق شلون تكون روح داخل روح من صدك خلق فابدع وتذكرت الاية الي تكول (مَا جَعَلَ اللَّهُ لِرَجُلٍ مِّن قَلْبَيْنِ فِى جَوْفِهِ) الاحزاب بداية الاية (4)

واجى ببالي الاعجاز العلمي من ذكر الرجل بهاي الاية لان المرة ما تدخل بنفس السياق فمن تكون حامل يكون داخلها قلبين قلبها وقلب الجنين

وابقى ابحر بعالم الافكار الى ان تنبهني ماما او يروح علي وقت الدراسة بس الحمدلله ما جان يأثر علي لان مجرد مراجعة ماكو شي صعب بالمواد

بقيت على هاي الحالة ايام واسابيع وجانت دائما تخابر حبوبة على ماما وصكر وتسأل عني وعن الحمل وجنت اطلب منها تجي تكول من يصيرلج اجي

جنت كلش مشتاقتلها واتمنى جيتها بس ماكو سبب يجبرها تجي وما جنت الح عليها هواي علمود لا تكول لزكة وتنحرج مني

صكر بكل التحاق يزيد الخطر عليه وكل كم يوم نسمع انو انقتل شخص او اختفى عسكري ومحد يعرف الي يختفون وين يروحون لو منو ياخذهم

يعرفون اكو تنظيم دا يخطفهم بس مايعرفون اسمو مجرد يكولون تنظيم وبعض الناس يكولون ثوار وبعضهم مجاهدين يعني كل واحد يسميهم شكل

جنا كلنا نطلب من صكر يعوف دوامو لان الوضع صار لا يحتمل بس ما يفيد وياه مستعد يعوف الدنيا كلها ولا يعوف دوامو وماعرف ليش هيج متمسك بيه

اني جنت من يروح للدوام يبقى كلبي مقبوض وخايفة الى ان يرجع وقتها احس رجعتلي روحي ومن يرجع يداوم ارجع لنفس الحالة يعني عايشة على اعصابي

بتاريخ 1/6/2014 بدت امتحاناتي وجان عبدالله ياخذني ويرجعني بس الامتحان هالمرة تغير علي بسبب حملي لان ماكدر اكعد بالرحلة

المعلمات جانن متفهمات وضعي فجابن كرسي وفرن الرحلة بالعكس وصرت اجاوب بالامتحان

راح صكر لدوامو وكالعادة ودعتو ورجعت نمت ثاني يوم خابرتو وتطمنت انو وصل بخير وسلامة وسكرت منو علمود ينام

جان من يوصل المقر اتطمن عليه لان شغلو كلو داخل المقر قليل كلش يطلع وما يطلع واجبات مثل الجنود فيكون مكانو احس بهواي من الجنود

وصحيح الجنود هم الهم اهل وعوائل بس تعرفون بهيج وضع كل واحد يفكر بالشخص الي يخصو ومعليه بالبقية وبنفس الوقت من يتأذة شخص ما يعرفو يحزن عليه

من سكرت الاتصال من صكر تريكت ويا ماما وبلشت دراسة ومر اليوم طبيعي وجنت مكيفة لان بلشت الامتحانات يعني راح امتحن واخلص

صكر .. كل يوم جان يقرب مننا الخطر ونعرف ان التنظيم راح يتحرك للموصل بس ما نعرف ايمتى وجنا نعرف ان الموصل راح يسقط بكل سهولة

جانت توصل اخبار ان التنظيم دا يتقدم بمناطق سوريا وانتشر ان اسمو الدولة الاسلامية في العراق والشام وجان الهم قوة رهيبة محد يكدر يوكفهم

وجان الشي الغريب انهم يمتلكون اسلحة بشكل فضيع بعض اسلحتهم طول خدمتي بالجيش مو شايف مثلهن يعني عدهم فد دعم ما ينوصف

جانو الجنود الي وياي مبين عليهم الخوف والتوتر وجان الي يطلع بيهم واجب ما يعرف يا لحضة تجيه طلقة من حيث لا يعلم ويستشهد

بس الحمدلله ما صارت عدنا هيج حالة بس صارت بغير اماكن من الموصل الي تصوبو والي استشهدو بالواجب غير التفجيرات الي ما يمر يوم بدونها

بتاريخ 9/6/2014 وصلنا خبر ان التنظيم تقدم باتجاه الموصل وصار وصولهم مجرد وقت لا اكثر وما جنت منطي خبر لاهلي علمود لا يخافون

واكثر شي جان مخوفني ان تسمع سالي لان حالتها النفسية بدون كلشي متخربطة بسبب دوامي وتسمع ان بيني وبين الموت ممكن ليلة وحدة

وطبعا اسم داعش مشتق من جملة دولة الاسلام في العراق والشام ( د_دولة /ا_اسلام/ع_عراق_/ش_شام) وامريكا اطلقت عليهم هذا الاسم

الساعة 5 الفجر صارو على مشارف الموصل بس احنا جنا بعيدين عنهم فما نسمع صوت الاطلاقات للساعة 7 الفجر ماكو شي والوضع طبيعي

وسمعنا صوت واحد باللاسلكي يطلب دعم جان جندي فوك معمل طحين لحالو موكف داعش الي جنا نشوفهم محد يكدر يوكفهم وجان الجندي من كيارة

جنت اريد ادزلو دعم بس المشكلة ماعندي اي تصريح ان ادزلو دعم واذا يموتون الي ادزهم خطيتهم بركبتي لذلك ماكدرت اتصرف

جان الجندي فوك المعمل والجنود الي وياه كلهم منسحبين وباقي لحالو حاط البيكسي فوك السطح ومستلم داعش دك

الساعة صارت 10:30 الجندي جان يحجي باللاسلكي وكال اذا اكو احد يسمعني فانا محتاج طلق الذخيرة عندي راح تخلص ما اريد منكم بس طلق

جنت اسمعو واني دمي محترك كلت للجنود جهزولي الطلق اني راح اخذو واخذت اللاسلكي واحجي وياه بس ما يرد

جان يحجي هو بس صوتي ما يوصلو المقر انكلب من سمعو اريد اخذ ذخيرة واروحلو والضباط يحاولون يمنعوني بس ماكدرت اتحمل

بين ما جهزو الذخيرة علمود اخذها حجى الجندي باللاسلكي كال الذخيرة خلصت واني طالع من المعمل وراح يدخلون عليه داعش

وسكر اللاسلكي وماعرف شنو صار وياه بعدها وقتها من صدك عقل ما بقى براسي واكول كلو بسببي تأخرت عليه بالدعم والذخيرة وانجبر ينسحب

سالي .. يوم 10/6 جنت انتظر صكر يجي بالليل لان صار وقت اجازتو وما جنت اعرف شصاير بالموصل الساعة 8 بالليل اتصل على ماما وجاوبتو اني

صكر .. شلونج سالي

سالي .. هلا صكر ها اجيت

صكر .. شوفي سالي الحجي ما اريدو يطلع لاحد

سالي .. شنو

يريد يحجي وصار صوت انفجار يمو احس حتى اذني صارت توجعني وصحتو بكل صوتي رجع بسرعة كال لازم اسكر هسا التنظيم احتل الموصل

........... يتبع

#هل_كنت_فصلية

#البارت_85

(( بما انو جنت تعبان وكتبتلكم البارت كثرولي من تعليقاتكم الحلوة))

سالي .. يريد يحجي صكر وصار صوت انفجار يمو احس حتى اذني صارت توجعني وصحتو بكل صوتي رجع بسرعة كال لازم اسكر هسا التنظيم احتل الموصل

جنت اريد احجي وسكر التيلفون وصرت ابجي واجت ماما ركض على صرختي كالت شبيج ما جاوبتها واتصلت عليه مرة ثانية ما يريد

سالين .. احجي شصاير

سالي .. ص ص.. صكر

سالين .. احجي شبيه صكر

سالي .. صك .. ر صصار عليه ا ا انفجار

سالين .. شنوووو

سالي .. ما ماما ف فد فدوة لا.....

اريد اكمل كلامي وفقدت الوعي وماعرف شصار بعد من كعدت لكيت نفسي بالصالة عالقنفة واخوان صكر كلهم موجودين اول ما شافني الحجي كعدت اجى علي

غانم .. سالي احجي شبيه صكر علمود نعرف نتصرف

سالي .. جان يحجي وياي وقبل ما يكمل صار انفجار قريب عليه وكال التنظيم احتل الموصل

غانم .. بس هيج

سالي .. اي وسكر الاتصال قبل ما اكمل كلامي وياه

غانم .. تمام

سالي .. عافنا وطلع ولحكوه ولدو واني احس كلبي انعصر اخذت تيلفون ماما واتصلت عليه خطو مغلق والله لا يشوف بشر احساسي بذيج اللحضة

بقيت اتصل على امل ان احصلو وماكو شغلنا التلفزيون وحطيناه عالاخبار الدنيا مكلوبة بالموصل والناس دا تنهزم منها يروحون لغير مناطق

بقيت ابجي الى ان انسطرت وطول الوقت اتصل عليه وخطو مغلق لحد ما صارت الساعة 12 بالليل اتصلت وحصلتو وعدلت كعدتي كأنو دا اشوفو

شخص .. الو

سالي .. الو منو وياي

شخص .. انتي منو

سالي .. اني زوجة صاحب التيلفون انت منو

شخص .. احنا الدولة الاسلامية

سالي .. من كال هيج انخطف لوني وصارت ايدي ترجف ووكع التيلفون من ايدي وعلى صوت وكعت التيلفون اجت ماما من المطبخ

من شافتني بهاي الحالة مسكتني من وجهي كالت شبيج شصار باوعت عليه وضحكت كلتلها مات هاي هي صكر مات وبعد ما يرجع

سالي .. ههههههههههه مات صكر

سالين .. بس اهدي بنيتي الله يخليج

سالي .. هههههههه اهدى .. ضربت نفسي راشدي كل قوتي .. شلون اهدى بس فهميني شلوووووون صكر ماااااات .. وضربت نفسي .. مااااات .. وضربت نفسي

عوفينيييي عوفينيييي راح صكررررررر عوفينيييييييي اني قتلتو كلو بسببي اني الفكر وين ما اروح ما يجي الخير وين ما اروح اقتل الناس

ماما فدوة كلبي ماما .. ماما كلبي محترك نار فدوة مو كادرة اتحمل .. ماما صكر راح بسببي اني قتلتو ماما

ماما شنو اكول لابني من يسأل على ابوه من يكول وين بابا شنو اجاوبو بعدو ما اجى للدنيا ليش مكتوبلو يعيش طفولتو مثلي بدون اب

ماما شنو ذنبو يجي للدنيا ما يلكي ابوه

جانت ماما تحجي وياي وتحاول تهديني بس ماكو فايدة تخبلت عالاخر صرت اصرخ واضرب نفسي وتحاول بس تمنعني وما تكدر

اخير شي اتذكرو ضربت وجهي ومع الضربة فقدت الوعي وماعرف شصار بعدها كعدت لكيت نفسي بالمستشفى واكو ممرضة دا تحطلي مرهم على خدي

خلصت وراحت ودخلو علي ماما والحجي جانت ماما دا تبجي واجت ركض حضنتني والحجي مهموم وكأنو شايل جبل فوك كتوفو جانو يحجون وياي وما اجاوب

جان جسدي وياهم بس عقلي وكلبي عند صكر وافكر هسا وين جثتو شلون قتلوه دفنوه لو لا شنو كال قبل ما يموت شصار بالضبط وياه

جان الحجي يحجي وياي يريد يفهم شنو سمعت بس ما جنت كادرة انطق احس لساني انربط وهم رجعو اتصلو وانقفل التيلفون مرة ثانية

الحجي من شاف وضعي عرف انو ماراح احجي شي وعافني وراح سجلي خروج ورجعني اني وماما على البيت وطول الطريق يتأفف

من وصلت بدون وعي ركضت وصعدت الدرج ونسيت حتى التعب الي جنت اتعبو من جان موجود صكر رحت على غرفتي وقفلت الباب علي

سندت ظهري عالباب وباوعت عالغرفة وبكل شبر اشوف بيها صكر جانت ماما تدك الباب علمود افتحلها بس اني احس نفسي بعالم ثاني لحالي

حطيت ايدي على حلكي ودموعي تجري مثل النهر صرخت صرخة طلعت من اعماق كلبي بس كتمتها بايدي واحس حلكي صار يوجعني منها

بقيت كاعدة وابجي بمكاني الى ان غفيت واني بمكاني حسيت اجى احد شالني وحطني عالسرير وابتسمت لان اعرف محد يشيلني غير صكر

بس تلاشت ضحكتي واختفت من فتحت عيوني لكيت نفسي بنفس المكان وجان ذاك مجرد حلم جميل استمر ثواني واختفى بس جان كفيل انو يسعدني

اندك الباب واسمع صوت سهى خارج تترجاني افتحلها الباب مسحت دموعي وكمت فتحتو وباوعت عليها وبجيت مرة ثانية وهي حضنتني

هدأتني واخذتني عالسرير كعدتني وانطتني كلينكس كالتلي امسحي دموعج واسمعيني زين ابوي يريد يعرف شنو سمعتي بالاتصال علمود يعرف يتصرف

سالي .. حجيتلها الكلام كلو

سهى .. زين هو كالج انو قتلوه لو شي

سالي .. شنو جاب التيلفون عليه لعد

سهى .. يجوز صكر تارك التيلفون بالمقر

سالي .. لا اول ما دخلو للموصل اتصل علي وكلي

سهى .. ياربي سترك انتي ابقي هنا بس لا تقفلين الباب

سالي .. عافتني وطلعت تمددت بالفراش بس هالمرة ما بجيت ابحرت بعالم افكاري والذكريات الي عشتها ويا صكر من اول ما اجيت هنا لحد ما داوم ذاك النهار

جنت تعبانة كلش واخير شي نمت ماعرف شكد مر وقت بس من كعدت جانت الدنيا عصر واحس مسطورة سطر كمت غسلت وجهي ونزلت

جانت سهى بالصالة وماما بالمطبخ اول ما شافتني سهى ابتسمت وكالت تعالي احجيلج من الصبح انتظرج تكعدين علمود ابشرج

سالي .. كعدت يمها .. شنو

سهى .. صكر اتصل على بابا

سالي .. بفرح .. صدك والله

سهى .. اي ومثل ما كلتلج عايف تيلفونو بالمقر وطالع ومو راجعين بعد وكال لبابا ان هو حاليا ببغداد بس مايكدر يجي هسا ما يسمحولو

سالي .. وايمتى يجي

سهى .. ماعرف بس الي اعرفو ان هو هسا بخير

سالي .. الف حمد وشكر الك ياربي

سهى .. يلا هسا ماطول تطمنتي عليه كومي اكلي الطفل هسا كتلو الجوع وهم ادرسي علمود تكملين امتحاناتج وتتفضين لصكر من يجي

سالي .. تمام

سهى .. صدك ايمتى تدخلين بشهرج

سالي .. بعد 5 ايام

سهى .. تمام يلا كومي اكلي واني اروح لبيتي

سالي .. ابقي هنا ليش تروحين

سهى .. جهالي عند اهلي اريد اخذهم اسبحهم قبل المغرب

سالي .. براحتج لعد

سهى .. يلا مع السلامة

سالي .. الله يسلمج

من راحت سهى رحت للمطبخ واني فرحانة فرح مو طبيعي لكيت ماما دا تسوي العشى ابتسمتلي كالت شلون صرتي كلتلها كلش زينة

شربت ماي وتذكرت صلاتي مو مصليتها رحت فورا صليت وكعدت ادعي لصكر ان ربي يحفظو ويرجعو سالم وبين ما كملت صارت صلاة المغرب وهم صليتها

بعدها رجعت على ماما لكيتها مكملة العشى وكعدت تعشيت وياها لحد ما شبعت وجنت جوعانة جوع مو طبيعي وبعد العشى بلشت بالدراسة

وقتها اجتني طاقة ايجابية مو طبيعية من سمعت بالخبر ورغم جنت مشتهية اسمع صوتو بس يكفي ان هو بخير ومو ميت مثل ما توقعت

بقيت ادرس الى ان اجى وقت النوم ونمت ثاني يوم امتحنت عربي والحمدلله جوابي كلش زين لان الاسئلة اجت سهلة واني ضابطة المادة

ومن طلعت جان عبدالله ينتظرني كالعادة ركبت وياه ومن مشى كلتلو صكر ليش ما اتصل على ماما

عبدالله .. ماعندو تيلفون هسا اتصل من صاحبو ومو حافظ رقم امج

سالي .. زين ما يصير يطلب اجازة ويجي

عبدالله .. اني ما حجيت وياه بس بهيج حالة ما يكدر لان عندهم محافظات سقطت مو شغلة سهلة

سالي .. هي بس الموصل

عبدالله .. لا سقطت صلاح الدين والانبار

سالي .. عزااااا لعد شبقى

عبدالله .. والله ماعرف بس الوضع ابد ما يطمن

سالي .. ياربي استرنا بسترك

عبدالله .. آمين بس انتي عوفي هالموضوع وركزي بامتحاناتج والامانة الي يمج والباقي ربج يدبرو

سالي .. شنو من امانة

عبدالله .. اقصد الطفل هذا يعتبر امانة

سالي .. إن شاء الله

وصلنا البيت وتشكرتو ورجعت للبيت وكالعادة ماما بلشت تحقق وياي واني اجاوبها وطلع عندي خطأ بفرعين بس ما حجت هي لان تعرف وضعي

بس نبهتني ان انتبه بباقي المواد وهذا الي سويتو صرت اركز عالمواضيع الي مو متأكدة منهن اكثر شي علمود ما اتوهم بيهن واجاوب جواب اكيد

المعلمات الي بالامتحان جانن كلش معجبات بشطارتي وكل ما اسلم الدفتر وتشوفو المعلمة يعجبها اسلوبي بترتيب الجواب وخطي بالكتابة

وجانن دائما يشجعني انو ابقى على اصراري وما اخلي الحمل والاطفال يكونن حاجز كدام نجاحي وتفوقي بالدراسة ويدعلي ان الله يتمملي على خير

رغم ما يعرفني معرفة شخصية بس عجبهن اجتهادي وانو دا امتحن واريد انجح رغم اني حامل ومو باقيلي كم يوم ادخل شهري

من دخلت شهري تغير الوضع جانت ماما محظرتلي جنطة حاطة بيها ملابس واحتياجات للطفل وجنت من اروح للمدرسة اخذها وياي

جانت تكول احتمال يجيج الطلق وانتي بالامتحان فتكون الجنطة جاهزة والمعلمات جانن يكللي من يصير عندي اي وجع فورا كوليلنا لا تبقين تمتحنين

بس الحمدلله ماصار عندي اي وجع بس بعد ما دخلت شهري بكم يوم صار عندي وجع بس ما استمر دقايق واختفى وماما تكول مجرد تقلصات ماكو شي مهم

وجود ماما وياي جان بيه فائدة تفتقدها هواي اذا مو كل البنات الي يعزلن ببيت لحالهن لان اي وجع يصير عندي لو احتاج اجابة لسؤال تكون هي اول شخص اسألو

بامتحان الفيزياء وحدة من المعلمات كالت التربية راح تسوي امتحان الفنية امتحان رسمي مثلو مثل باقي الامتحانات وراح يكون اخر امتحان

بوقتها استغربت معقولة كل هالسنين عايفيها وهسا من تخربط الوضع سووه رسمي بس يلا هو يوم واحد ماراح يأثر والمعلمة كالت مو اكيد حسب قرار التربية

رجعت للبيت وانطيت عبدالله خبر علمود ما يعوفني ويروح بيوم الامتحان وانطيت ماما خبر هم كالت ذول هم يفطنون على شغلات مالها داعي

كلتلها هاي هي بعد صارت المهم راح اروح ارسملي اي رسمة وارجع كالت تمام وعفتها ورحت انام علمود ارتاح ومكيفة لان الفنية ما يحتاج ادرسها لو اراجعها

كعدت العصر وطلعت من الغرفة جانت ماما بالصالة عفتها ورحت للمطبخ حطيتلي غدا وكعدت اتغدى واكلت لحد ما شبعت ورجعت كعدت يمها

سالين .. ارتاحيتي

سالي .. اي الحمدلله صدك ماما صكر ما خابر

سالين .. لا بعد

سالي .. مو تأخر هواي

سالين .. ماعرف الغايب عذرو وياه

سالي .. الله كريم بس المفروض يخابر يطمنا عنو اقل شي

سالين .. لعد مو خابر الحجي وانطاه خبر

سالي .. اقصد يخابرنا احنا

سالين .. مو حافظ رقمي

سالي .. يكدر ياخذو من سهى

سالين .. لج شبيج منيلو رقم سهى

سالي .. صحيح نسيت

سالين .. الله كريم بنيتي إن شاء الله يرجع وتكحلين عيونج بشوفتو اهم شي هسا اهتمي بطفلج علمود يجي للدنيا بصحة زينة

سالي .. صدك ماما شكد يرادلي بعد ما ادخل شهري

سالين .. مو شرط بعض نسوان اول ما تدخل شهرها بعضهن بنص الشهر بعضهن بنهايتو وبعض نسوان يخلصن الشهر يلا يصيرلهن

سالي .. اوووف والله تعبت صايرة حركتي كلش صعبة اذا امشي شوية رجليني يوجعني

سالين .. ما بقى شي بنيتي كم يوم إن شاء الله ويجي ابنج للدنيا وتفرحين بيه

سالي .. من افكر بجيتو وشلون اهتم بيه اتوتر

سالين .. اي طبعا لان اول طفل واول تجربة الج بس اني موجودة وراح اساعدج

سالي .. ربي يحفظج الي ولا يحرمني منج

سالين .. ولا يحرمني منج

سالي .. حضنتها وبقيت بحضنها الى ان قرب المغرب وراحت تسوي العشى واني بقيت كاعدة بالصالة وافكر باجر شنو راح ارسم بامتحان الفنية

من صار المغرب صليت وتعشينا اني وماما وبعد العشى بشوية اجت سهى وجانت ماما بالمطبخ تغسل مواعين العشى

سهى .. هلو سالي

سالي .. هلا سهى حياج

سهى .. وين امج

سالي .. بالمطبخ

سهى .. لعد عن اذنج

سالي .. مأذونة

راحت على ماما وبقن شوية بالمطبخ وجانت اكو مراية صايرة كدامي ويبين بيها باب المطبخ جانت سهى تباوع علي من باب المطبخ وتحجي ويا ماما

كمت ورحت عليهن قبل ما اوصل كالت لماما باجر اجيج كلتلها شكو كالت ماكو شي بس دا اخذ راي امج بسالفة كلتلها وماراح تسأليني على رايي كالت بعدين تعرفيها

بصراحة ما ارتاحيت لجوابها بس ما لحيت عليها كلت بعدين يبين كلشي وعفتهن ورجعت للصالة وهي هم ودعت ماما وراحت لبيتها طلبت منها تبقى ورفضت

شوية واجت ماما كلتلها صاير بينكن اسرار انتي وسهى كالت مو اسرار موضوع خاص ما يصير تحجيلج عنو كلتلها تمام لعد ماطول موضوع خاص

كلام ماما مقنع اكثر لان ماما دكتورة فممكن اجت سهى تسألها عن شي وما تريدني اعرف شنو هالشي فسكتت وتركت الموضوع لان مالي دخل بيه

من اجى وقت النوم رحت نمت وثاني يوم كعدت تريكت وتوجهنا للامتحان اني وعبدالله والحلو بعبدالله ولا يحسسني انو ضايج لان يوديني ويرجعني

من وصلنا عند المدرسة جانت اكو وحدة من المدرسات واكفة كدام المدرسة والمدرسة مقفولة كالت ماكو امتحان فنية ارجعن لاهلكن وفورا فر السيارة عبدالله ورجعنا

بس شفتو مثل الي ضاج بس مو مني ضاج منهم لان خلونا نكعد من الصبح ونجي للامتحان واخير شي ماكو لا امتحان ولا شي

من وصلنا البيت تشكرتو وكلتلو هسا اخيرا خلصت مني ضحك وكال لا يمعودة واعذريني ما جنت ضايج بسببج ضايج بسبب قراراتهم العفطية (قرارات سيئة)

ضحكت من كل كلبي على كلمة العفطية واخذت الجنطة الي مجهزتها ماما للطفل ولان خفيفة جنت اشيلها وتوجهت للبيت

من وصلت جانت سهى موجودة وكاعدة هي وماما بالصالة وجانن متوقعات انو اتأخر بالامتحان وما توقعن الامتحان ينلغي وسهى جاية هسا لان اني بالامتحان يعني يحجن براحتهن

من وصلت عند باب الصالة سمعتها تكول لامي اني انجبرت اكذب عليها علمود ما تخسر مستقبلها وطفلها وهي اكيد راح تتفهم الموضوع

ماما كالتلها اني خايفة عليها لا يصير بيها شي من ينكشف الموضوع ذيج المرة الله ستر وما صار بيها شي هاي المرة بس الله يعلم شراح يصير

وكعت الجنطة من ايدي وعرفت انهن كذبن علي بموضوع صكر يعني كلهم متفقين عالكذبة ومرتبينها الا اني يا غافل الك الله

دخلت عليهن وانصدمن بي جنت اباوعلهن ومو مصدكة انو ماما تكذب علي صارن دموعي يجرن مثل الشال

وخلال وكفتي حسيت كأنو سجين انغرست ببطني مسكت بطني وصرخت صرخة سمعوها اهل البصرة كلها وركضن علي سهى وماما

.......... يتبع

#هل_كنت_فصلية

#البارت_86

(( السلام عليكم اعرف اليوم بارت قصير بس هاليومين مشغول بسبب مراجعة الدروس ويرادلي تركيز لذلك كتبتلكم بارت قصير علمود ما اقطع عنكم ))

دخلت عليهن وانصدمن بي جنت اباوعلهن ومو مصدكة انو ماما تكذب علي صارن دموعي يجرن مثل الشال

وخلال وكفتي حسيت كأنو سجين انغرست ببطني مسكت بطني وصرخت صرخة سمعوها اهل البصرة كلها وركضن علي سهى وماما

جان الوجع فضيع بشكل لا يوصف اندارت ماما على سهى كالت روحي بسرعة خلي يشغلون السيارة راح تولد وعلى صوت صرختي اجى عبدالله يركض

كالتلها سهى بسرعة شغل السيارة اجاها الطلق وراح ركض وماما شالت الجنطة وسندتني هي وسهى واخذني ركض عالسيارة

اول ما ركبنا شخطها عبدالله بسرعة وانطلق عالمستشفى بس مثل ما يكولون شفت عظام ميتيني من الوجع من صدك لا يحتمل

سهى كل شوية تكول لعبدالله استعجل وهو يكول هسا راح اسوي حادث بسبب سرعتي تخيلو اذا الشارع طولو كيلو واحد بهالكيلو توصل سرعة السيارة 100k/h

قبل ما تجيه طسة لو تصير كدامو سيارة ويخفف وبسرعة وصلنا المستشفى وسندني ماما وسهى واخذني داخل المستشفى

وبوجهي لصالة الولادة بوقتها نسيت صكر ونسيت الدنيا بسبب الوجع والدكتورات والممرضات تجمعن علي ويحجن ويا بعض بس ماعرف شنو يحجن

جانت ولادتي من اصعب حالات الولادة اني شخصيا ما اتذكر شكد المدة الي كضيتها بصالة الولادة بس حسب كلام ماما كانت ما بين 4 ساعات او 4 ونص

جانت نسبة الخطورة كلش عالية علي اني والجنين وجان نسبة انو يروح واحد من يمنا او نروح ثنينا سوا كلش مرتفعة

ولهذا السبب الدكتورات اخذن تعهد من ماما علمود اي شي يصير ما يتحملون المسؤولية وماما خلت الاولوية لحياتي يعني المهم ينقذوني اذا كدرو حتى لو اجهظت

اخر شي اتذكرو وجوه الدكتورات وبعدها فقدت الوعي وماعرف شصار وياي واجاني حلم ان صكر واكف كدام السرير ابتسمت وكلتلو همزين اجيت

جانت كلماتي كلش ثكيلة ومو مفهومة بس لان اني حجيتهن جنت فاهمتهن وبعدها رجع عم السواد علي الى ان صارت الساعة 8 بالليل وكعدت

فتحت عيوني واجت ماما تركض علي وتبجي وتبوس بي واني لان هسا كاعدة بعدني مو مستوعبة شصاير ورجعتلي ذاكرتي والاحداث الي صارت

للحضة زعلت من ماما لان كذبت علي وياهم واريد ارفع ايديني علمود ابعدها عني وقطع الموقف صوت الباب واندارينا عليه اني وماما

انفتح الباب ودخل صكر بملابسو العسكرية وبايدو الطفل صرت ابجي من الفرح ومو مصدكة عيوني مديت ايديني عليه علمود يحضني

اجى انطى الطفل لماما وحضني وهو يضحك ويكول عفتج صغيرة وام دميعة وصرتي ام وبعدج ام دميعة والي موجودين ضحكو على كلامو

صارو يباركون النا ويتحمدولي بالسلامة وماما كالت لصكر انطيني مجال خلي تشوف ابنها وترضعو كتلو الجوع وكام وانتنطياه

بوية من شفتو الابتسامة من الاذن للاذن جان صغير كلش ومغمض عيونو ومو طالع منو بس وجهو الابيض مثل نور البدر بوسط الليل

كال صكر تطمني فزتي علي واجاج ولد بس نتفاهم عليها بعدين هاي طلعتلو لساني وضحك وطلع علمود ارضع الطفل وساعدتني ماما

رضعتو وبقيتو يمي وحجتلي ماما عن صعوبة الولادة والي صار وياي والمدة وبقيت ذيج الليلة بالمستشفى وماما بقت وياي طول الوقت

ثاني يوم طلعت من المستشفى وجانو محضرين فراش الي بالصالة وحاطين سرير هزاز صغير عند فراشي يحطون بيه الطفل وجانو كلهم متجمعين

حتى حسن وحسين جايين والطفل راح بجولة من ايد لايد وكل ما واحد ياخذو يبوسو حسين اخذو كل حسافة بيك البوسة راسك مدوحس مثل ابوك

وقتها من صدك ضحكت من كل كلبي بقى يتذكر السالفة وما نساها وباسو وكال يلا انكلع وانطاه لحسن وبعدها حطوه بالسرير

جانو كل ما واحد ياخذو يحط فلوس بكماطو من حطوه بالسرير حسين كال سالي ترا الفلوس للطفل مو تبوكوهن انتي وصكر والعيلة صارو يضحكون على كلامو

من طلعو ارتاحيت لوقت الغدا وبعدها بلشن يجن النسوان اول شي اجن جناينهم باركن الي بوجيه ثكيلة كالعادة ههههههههه وبعدها رجعن

اكثر وحدة شفتها فرحانة من شالت الطفل هي رانيا ماعرف شنو السبب بس شفتها كلش فرحت من شالتو وباستو اكثر منهن كلهن

واجن نسوان عمام صكر الي قريبين كل وحدة تكعد نص ساعة وتروح وبيهن الي تجيب هدية وبيهن الي تحط فلوس بكماط الطفل

لحد ما صارت الساعة 9 بالليل ما بقى احد واجى صكر من المضيف كعد يمنا جنت اني هسا مرضعة الطفل ومنومتو وجانت ماما مبدلتلو ملابسو

صكر .. ها بوية شلون صرتي

سالي .. الحمدلله بس تعال احجيلي كلشي صار وياك

صكر .. هسا ارتاحي بعدين نحجي

سالي .. لا والله الا تحجيلي هسا

صكر .. من خابرتج وصار انفجار وكع على مقرنا هاون بس الحمدلله وكع بغرفة فارغة ومحد تأذة جانو الجنود كلش خايفين ويعرفون ماراح نكدر نقاوم

طلعت عليهم كلتلهم اجى امر انسحاب فالي يكدر يوصل اهلو خلي يتوكل على الله ويروح والي ما يكدر يوصلهم يبقى ويانا راح نطلع سوا

بين ما كملو الجنود صارو داعش كلش قريبين علينا ومن طلعنا صارت مواجهات بيناتنا والحمدلله كدرنا نبتعد عنهم بدون ما ننطي خسائر

تفاجأنا ان طريق بغداد مسيطرين عليه وماكدرنا نطلع من الموصل من الطريق الرئيسي فاخذنا طرق ثاني لحد ما وصلنا الحويجة منها طلعنا لكركوك فورا

انطينا خبر للقيادات وانطو امر انو نسلم السيارات والاسلحة الي ويانا للبيشمركة بعد ما سلمناهن جنت اريد اتصل عليكم وتفاجأت بتيلفوني ماكو

جنت متأكد حطيتو بجيبي قبل ما نطلع بس ماعرف شلون واكع مني واني مو منتبه عليه وبعدها توجهنا لاربيل ومن هناك اخذتنا طيارة رجعتنا لبغداد

من طبينا بغداد بقينا كم يوم هناك بين ما شرحنا الهم الوضع وكملو التقارير وهاي السوالف واول ما سمحولنا نجي اجيت كالولي بالمستشفى انتي ولحكتج

سهى .. لو شايفها من رد عليها الداعشي شسوت

صكر .. والله ما الومها اني لحد الان مستغرب شلون طلعت عايش الوضع كلش صعب سهى راحو جنود بس الله يعلم بعددهم

سهى .. الله يرحمهم

صكر .. شفتو سبايكر شنو صار بيها

سهى .. اي شفنا

سالي .. شنو صار

صكر .. احتلوها هي هم

سالي .. بوقتها ما حجالي عن كمية الشباب الي انقتلو بيها ظلم وطغيان علمود حالتي النفسية جانت ذيج يمكن اكبر فاجعة حلت عالعراق على مر العصور

تخيلو 1700 شاب بعمر الورد الي انقتل منهم رمي بالرصاص والي تعذب منهم والي اندفن وهو حي يعني من صدك موقف مستحيل ينساه اي عراقي

كعد يمنا صكر شوية وبعدها راح نام واني بقيت بالصالة وبقى الطفل يمي وبعدنا ما اتفقنا عالاسم وبصراحة ما جان اكو اسم محدد ببالي

........... يتبع

#هل_كنت_فصلية

البارت_87

حطولنا كم لايك الله يسعدكم

سالي .. كعد يمنا صكر شوية وبعدها راح نام واني بقيت بالصالة وبقى الطفل يمي وبعدنا ما اتفقنا عالاسم وبصراحة ما جان اكو اسم محدد ببالي

الساعة 2 بالليل كعدت على صوت الطفل دا يبجي وجانت ماما نايمة يمي وهم كعدت على صوتو كالتلي جوعان رضعيه كلتلها تمام

خلال الرضاعة كلتلها ما صار هواي من رضعتو كالت بعدو طفل ويحتاج حليب كل كم ساعة علمود يصير بيه طاقة ونشاط مو مثل الجبير 3 وجبات باليوم

من شبع اخذتو هي حطتو على كتفها لحد ما طلع الهوا الي داخل معدتو ماعرف شنو تسمون العملية هاي عندكم اكتبوها بتعليق علمود نعرفها

بعدها رجعتو لسريرو ورجعنا كلنا نمنا ثاني يوم الحجي طلع مسوي غدا بمناسبة رجوع صكر بالسلامة وولادتي هم وجان اكثر سؤال ينطرح هو شنو اسم الطفل

وكل الناس تستغرب من اكللهم ما سميناه والبعض ينطي اسماء كتعبير عن رايو بس ما حبيت اخذ القرار اني وكلت بالليل نتفق كلنا على اسم

سهى وماما جانن هن يهتمن بالخطار الي يجون وجنت فعليا لحد الان مو شايفة لا ايدين ولا رجلين الطفل لان مكمط ومن ينفتح كماطو تاخذو ماما تبدلو وترجعو

واني لان ما اعرف اكمطو لحد الان فما جنت افتح كماطو وجانت مهمتي تجاهو الرضاعة فقط ومن يشبع انومو والحلو بيه انو هادئ ما يبقى يبجي

بالليل الساعة صارت 10 ما بقى احد ابد جنا كاعدين اني وماما وصكر وكم واحد من اهلو من ضمنهم الحجي والحجية باوعت لماما كلتلها افتح كماطو كالت افتحيه

فتحت كماطو ومن تحركن ايديه رفعهن ومط جسمو (نكول عليه تمرخ) وجانن ايديه ورجليه بكد الاصبع جنت اباوع عليه واضحك على حجمهن

ضحكتي جانت عفوية من رفعت راسي شفتهم صافنين علي كلهم واختفت ضحكتي وقتها حسين وحسن شبعو ضحك على موقفي واهلهم صارو يضحكون وياهم

سالين .. صكر بما انو موجودين انت واهلك اتفقو على اسم للطفل

صكر .. والله يا ام سالي اني بالنسبة الي ما يفرق يمي الاسم فبالنسبة الي اني ما اتدخل بالاسم فاتفقو انتي وسالي واهلي

حسين .. سموه حسين

حسن .. لا حسن

عبدالله .. شرايكم بحسنين يجمعكم ثنينكم باسم واحد

حسين .. بشرف هيلة انت شريف

حسن .. بشرف غانم انت شريف

صكر .. بشرف سالي تنجبون ثلاثتكم

عبدالله .. ههههههههه اني شعلية جنت افض الخلاف

غانم .. سالي بوية اكو براسج اسم

سالي .. بصراحة ماكو ببالي اسم بس الرسول ﷺ قال احب الاسماء الى الله ما حمد وعبد وانتو بكيفكم

غانم .. لعد راح يكون الاختيار يا اما احمد او محمد او عبد وشوفو انتو بعد عبد اي اسم من اسماء الله الحسنى تختارون فكلهن جميلات

سالي .. صكر شنو رايك انت

صكر .. المشكلة ان اذا سميناه محمد لو احمد راح يدلعوه حمودي ويخربون اسمو واذا سميناه عبدالله مثلا راح يدلعوه عبودي وهم يخربون اسمو

سالي .. لعد شنو نسميه

صكر .. شنو رايكم ب عبدالهادي

حسين .. ولك ابو راس مدوحس مو هسا دا تكول راح نخرب اسمو ونسميه عبودي

صكر .. اعرف ولك قشمر بس هي تريد تسميه اسم يحبو الله عز وجل

امينة .. خالو خالو

صكر .. ها يا بعد خالج

امينة .. هذا اسمو عرموطي

حسين .. هههههههههههههه (ضحك لحد ما صار وجهو ازرك) اي خالي هذا اسمو عرموطي

امينة .. بفرح .. ماما ماما هذا عرموطي خالو يكول

سهى .. ههههههههه اي ماما هاي هي اسمو عرموطي

صكر .. ولج بنت الاوادم من دون كل الاسماء الي بالدنيا لكيتي اسم محد مسميه

حسين .. احسن اسم سمعتو بحياتي ههههههههه ويرهم لطفل راسو مدوحس مثل ابوه ههههههه

سهى .. ماما امينة هذا البيبي اسمو عبدالهادي

امينة .. اوووووع مو حلو

سهى .. ههههه لج كولي استغفر الله

حسين .. قسم بالله هاي بس تكبر الا تلعب على شباب البصرة كلهم

صكر .. تربيتك غير

حسين .. ونعم التربية

سالي .. صكر انت جنت موجود وياي بالغرفة قبل ما اكعد

صكر .. اي موجود من صرتي تحجين بس ما لحكت اجاوبج ورجعتي نمتي بس ما فهمت شحجيتي

سالي .. كلت همزين اجيت

صكر .. الحمدلله الله خلاني اكحل عيوني بشوفتج انتي والطفل

غانم .. يلا احنا نترخص تصبحون على خير

صكر .. وين يابة كاعدين

غانم .. ما بقى وقت وصدك حبوبة باجر راح تجي

صكر .. حياها الله

سهى .. اني هم اترخص

صكر .. درجعي انتي ماعندج كلشي بالبيت حطيلج فراش الج انتي وجلاعيطج (اطفالج-جلاعيط هم صغار العصفور) ونامو هنا ماكو روحة

سهى .. شعندنا نبقى

صكر .. اني شنو كلت

سهى .. هههههههههه خلص هاي هي

سالي .. اخذت ماما عبدالهادي كمطتو وانطتنياه ارضعو وصكر راح ينام وسهى راحت تجيب فرش لجهالها ومن شبع عبدالهادي نمنا كلنا بالصالة

جان بالليل يكعد مرتين وبس يرضع ويشبع يرجع ينام وهذا جان بالنسبة الي نعمة لان ما يحتاج ابقى كاعدة بالليل علمود اسكتو

خلوني اوصفو الكم علمود تتخيلوه عيونو عسليات مايلات للسواد بشرتو حنطية فاتحة يعني الي يشوفو يكول ابيض وشعرو اشكر

ملامحو مبين عليهن ناعمات ووجهو ضعيف بس بيه خدود مليانات بس مو بارزات ومبين انو بيهن غمازة بس لان بعدو ما ضحك مو مبينات

ثاني يوم بعد الريوك بشوية اجت نعمة (ام الي حاول يقتل صكر) هي وبنتها وجنتها واحفادها باركولي وتحمدولي بالسلامة ومن شافت الطفل فورا كالت بسم الله مشاء الله

بعدها بنص ساعة تقريبا اجت حبوبة اول ما دخلت للصالة كالت والله يولي يرادلج دكة بهالعصى انتي وصكير وما اروح اذا ما اسويها

ضحكت على كلامها واجت سلمت عالكل وكعدت يمي كالت ها ولج تسموه قبل ما تاخذون رايي (جانت تتشاقى وياي)

سالي .. حبوبة اني ما دخلني صكر سماه

حبوبة .. وينو هذا صكير

سالي .. بالمضيف

حسين .. من الخارج .. يمة صكر يكول انطو خبر للحجية نعمة غداهم هنا ويكول اذا راحو اتعارك ويا حبوبة

حبوبة .. شو دنعل ابوك لابو اخوك

سالي .. كامت وراحت خارج على حسين من طلعت سمعناها تكول تعال ولك لا تنهزم جان حسين من يمو يكول صكر يتعارك ويا حبوبة

بعدها رجعت كعدت يمي وماما وسهى سون الغدا واني خلتني حبوبة اتمشى شوية بالصالة لان تفيدني الحركة ومن تعبت رجعت لفراشي ومن كعد الطفل اخذتو هي

سمت بالله وشالتو باوعت عليه كالت الطفل هذا خالط الشبه بينج انتي وابوه كلتلها بعدو ما يبين كالت بلى واضح كلش الشبه

شعرو وتراسيمو (ملامحو) عليج والباقي على ابوه وبالنسبة لاسم عبدالهادي فكلش حلو عاشت الاسامي ويتربى بعزكم ودلالكم وحطت بكماطو 100 الف

ورجعتو لمكانو وبعد الغدا بشوية راحت نعمة والي وياها والحجية هيلة هم استأذنت وراحت لبيتها تكول تعبانة وتريد تنام واجو صكر وحسن وحسين

صكر .. السلام عليكم

الكل .. عليكم السلام

حبوبة .. ها ولك صكير

صكر .. هلا حبوبة امري

حبوبة .. شلون تسمي ابنك واني ماعندي خبر

صكر .. والله يا حبوبة اني مجرد اختاريت اسم

حبوبة .. اني مو عاجبني اسمو

صكر .. لعد شنسميه حبوبة

حسين .. مدوحس

حبوبة .. جدع

حسين .. اييييع حبوبة ذوقج وين لكيتيه

سالي .. اني جنت كاتمة ضحكتي لان ادري بيها تتشاقة

صكر .. حبوبة بشرفج هو هذا هم اسم

حبوبة .. ليش شبيه

حسن .. يشبه حبوبة

حبوبة .. جيبو ولك حسين

كام حسين وسحلو لعند حبوبة ومسكتو حبوبة من اذانو وهو وجهو احمر من الضحك

حسن .. هاي هي حبوبة التوبة

حبوبة .. يشبهني مو

حسن .. لا حبوبة يشبه حسين

حبوبة .. شوف حسين كلب عليك

حسين .. تخسى يالخايس اني شدخلني

حسن .. غير انت سلمتني الها

حسين .. غير انت حجيت عليها

حسن .. حبوبة لا صدك شنو هالاسم

حبوبة .. اتشاقى وليدي بالعكس اسمو يخبل مو معقولة ما يعجبني اسم من اسماء الله الحسنى

حسن .. اي والله حبوبة عاش لسانج

سالي .. بقو يتناقشون لحد ما اجن نسوان وعافونا وراحو ودخلن النسوان جانن ثنين من معارفهم كعدن نص ساعة وباركن وراحن وبعد ما راحن رجعو صكر واخوانو

حسن .. حبوبة بالله عليج انتي احجي

حبوبة .. شنو احجي

حسن .. اذا يطهرون عبدالهادي هسا مو احسن

حبوبة .. اي صحيح

صكر .. حبوبة بعدو صغير

حبوبة .. هو لان صغير احسن

صكر .. والله ماعرف

حبوبة .. انت بعدك ما تممتلو مو

صكر .. لا حبوبة بعد

حبوبة .. لعد اشتريلك ذبيحتين وطهرو بنفس اليوم

صكر .. يعني انتي هيج رايج حبوبة

حبوبة .. اي

صكر .. وانتي سالي

سالي .. شنو اني

صكر .. شنو رايج

سالي .. الراي رايكم اني ماعرف بهاي الاشياء

صكر .. تمام لعد

سالي .. مر اليوم طبيعي اني عجبتني فتحة الكماط كمت كل شوية افتح كماطو وامسك ايديه ورجليه واضحك على حجمهن جانن من صدك صغار

جان عبدالهادي هو اصغر طفل شلتو او مسكتو بحياتي كل الاطفال الي شفتهم اكبر منو بالليل كالعادة نمت وهو يمي وتجمعن سهى وحبوبة وماما يمي

ثاني يوم صكر سوا مثل ما كالتلو حبوبة وراح اشترى ذبيحتين تميمة لعبدالهادي لان تعرفون ان الولد لازم ذبيحتين والبنت ذبيحة وحدة

وانطى خبر لعمامو ان الغدا عندو وعلمود الهوسة سوا الطبخ خارج البيت وجاب مطهر واخذو عبدالهادي طهروه بحضن منير ورجعوه

جنت متمددة بالصالة انتظرهم ورن باذني صوت بجيتو ومبين دا يبجي لان متوجع احس حتى كلبي انعصر وصار يوجعني وكمت علي حيلي ورحت ركض عليه

اخذتو وهو يبجي واريدو يسكت ما يسكت صرت اتمشى بالصالة واهزو علمود يسكت ونسيت حتى التعب وحبوبة تكول هو يسكت

اخير شي صرت ابجي وياه وحبوبة حطت شيلتها على وجهها وتضحك على موقفي بس اني ما جنت ادري بيها بوقتها لو ادري بيها يمكن اتعارك وياها ههههههه

بقى عبدالهادي يبجى الى ان تعب وخدر جرحو ونام وحطيتو بفراشو وشوية وجابو الغدا والحمدلله طهورو ما صارت بيه هوسة وخلص بكل هدوء

وطبعا العزيمة سووها للزلم بس والنسوان محد اجى وما اتوقع اجى احد منهن على الحجية هيلة لان حبوبة هنا اذا يجن يجن عليها مو على الحجية

وهم مر اليوم طبيعي وبالليل جنا كاعدين دا نتعلل وعبدالهادي جان تعبان من البجي ونايم وحبوبة كالت لان طفل راح يطيب بسرعة

فجأة طب بابا وكلنا استغربنا من دخلتو بهاي الطريقة حتى عبالنا صاير شي باوع عليهم بعصبية كال ليش ما كلتولي ان سالي جابت طفل

ليش لحد الان تحسسوني انكم دا تحاسبوني عل ذنبي سالين ليش هيح تسوين بي مو اعتذرت منج كدامهم كلهم بنتي توصل للموت واني ما ادري

صكر .. تفضل ابو سالي ارتاح ارتاح

رضى .. مع الاسف عليك صكر الناس كلها تعرف الا اني

صكر .. بس تعال هسا اكعد ارتاح

سالي .. عافهم كلهم واجى علي مسكن من خدودي وباسني براسي كال شلون صرتي بوية خوما موجوعة لو بيج شي كلتلو لا بابا تطمن مابي شي

حبوبة .. تفضل ابو سالي ارتاح

رضى .. حجية بالله عليج الي سووه يصير

حبوبة .. لا والله واني لو ادري مو موصليلك خبر جان كلتلهم يخابروك

صكر .. والله حقك ابو سالي بس يشهد الله من اجيت واني مشغول الى الان

سالي .. بابا شلون عرفت لعد

رضى .. اتصلت على الشيخ غانم وهو حجالي

سالي .. تطمن بابا الحمدلله اني كلش زينة هاك حفيدك شيلو بايدك

فتحت كماط عبدالهادي وانطيتو لبابا اخذو بايدو ويسمي بالله ومسك ايديه ويفرك بيهن ويضحك وكعد عالقنفة وحاطو بحضنو

انتبهت لماما جانت تباوعلو من عند المطبخ وصافنة على بابا ومو منتبهة علي واني بعدت نظري عنها بس اباوعلها بطرف عيني ومبتسمة على حركتها

بعدها راحت ماما جهزتلو العشى وسهى بحكم ان بابا غريب عنها ما جانت تكدر تطلع كدامو فبقت بالمطبخ وماما جابتلو العشى بنفسها

حطتو كدامو باوع عليها وكاللها بابتسامة عاشت ايدج كالتلو وانت عايش ورجعت للمطبخ وصكر يباوعلي ويغمز واني ابتسم على تصرفاتو

تعللنا تعليلة حلوة وبابا مبين عليه سعيد كلش ومندمج بالتعليلة وكال الحمدلله من تاب لله واصلح نفسو صار شغلو احسن من قبل وربي رزقو من واسع ابوابه

جنت سعيدة انو اسمع هالكلام هذا واتطمن انو بخير ومشاء الله وجهو متغير هواي عن اخر مرة شفتو وراجع لستايلو المرتب القديم ومرتب نفسو

رغم اجى مستعجل علمودي بس كأنو مرتب نفسو على اخر حبة قبل ما يجي وبقينا نتعلل ويا بعض الى ان اجى وقت النوم وراحو حسن وحسين

حبوبة راحت وياهم وسهى هم وبقى بس بابا يمنا حطتلو ماما فراش بوحدة من الغرف ومن راح نام جابت فراشها يمي مثل كل يوم ونمنا

بالليل الساعة 2:30 كعد عبدالهادي ورضعتو بس جان يبجي وماعرف متوجع من جرحو لو بيه شي ونريدو يسكت اني وماما وما يسكت

اخير شي كعد بابا واجى علينا سأل شبيه كلتلو ماعرف رضعتو ودا يبجي ما يقبل يسكت كالت انطينياه وانطتو ماما واخذو بحضنو

كعد عالقنفة ومدد عبدالهادي على بطنو ومسك رجلو اليمين وايدو اليسار وقربهن على بعض وبعدها رجلو اليسار وايدو اليمين وفركلو ضهرو شوية

شفت عبدالهادي هدأ وبدا يسكت وبعدها رجع طبيعي رجع عدلو بابا وكلو بعدك بطول الشبر ومكعدنا كلنا بنص الليل ويضحك وياه

وقرب وجهو لعبد الهادي ومسكو من لحيتو ومن وجهو وكأنو دا يستكشف وجه بابا بايديه وبعدها رجعو لماما ورجع نام لان بعد مو صاير وقت الصلاة

كمطتو ماما وحطتو بفراشو وشوية وراح بسابع نومة ورجعنا اني وماما نمنا وما كعد للصبح وبابا من كعد الصبح تريك ورجع لبغداد

طلبنا منو يبقى بس ما قبل وراح ومن راح اجت حبوبة ولان ماكو ناس يجون سهى ما اجت ومر اليوم طبيعي مابيه اي احداث تذكر

بالليل سبحت اني وماما وحبوبة سبحن عبدالهادي ولاول مرة رجعت نمت بحضن صكر بعد فراق طويل وسرير عبدالهادي حطتلياه ماما عند سريري

قبل ما ننام حطيت عبدالهادي بيناتنا كلتلو تشوف هذا الي طولو شبر هذا راح ياخذني منك

صكر .. شرايج اضربو جلاق اطلعو من الشباك

سالي .. هههههههه لا لا سكتت

صكر .. شرايج نتبرع بيه

سالي .. ههههههههه ليش نتبرع بيه

صكر .. ما اريدج تكبرين اريدج تبقين طفلة بعيني

سالي .. لا بالعكس اريد اكبر احسن

صكر .. هاي هي براحتج

............ يتبع

#هل_كنت_فصلية

البارت_88

صكر .. ما اريدج تكبرين اريدج تبقين طفلة بعيني

سالي .. لا بالعكس اريد اكبر احسن

صكر .. هاي هي براحتج

سالي .. خوما هم ترجع لدوامك

صكر .. سالي لازم تعرفين شغلة وحدة وهي انو الدوام ما اتركو حتى لو سقط العراق كلو

سالي .. واني شنو ذنبي اعيش بخوف من تروح لحد ما ترجع

صكر .. طيب سؤال

سالي .. اسأل

صكر .. لو اني تركت وذاك ترك وغيرو ترك بس كليلي منو يبقى يدافع عن العراق

سالي .. ماعرف

صكر .. ماكو احد يدافع عنو وبالتالي يسقط العراق كلو ويجون يحطون شروط علينا مثل حمد (الي حاول يقتلو) واذا ما ننفذ نتورط وياهم

سالي .. تمام

صكر .. وثانيا مستعد اموت بابشع طريقة ولا اعيش يوم واحد وتلحكني كلمة جبان

سالي .. الله يطول بعمرك ولا يحرمنا منك

صكر .. ولا يحرمني منكم

سالي .. شوف شلون يباوع عليك عبدالهادي

صار يلاعبو بس تعرفون بعدو صغير وما يضحك بس صافن على صكر ولان مكمط ما يكدر يتحرك من نعس اخذتو حطيتو بفراشو ونمنا كلنا

بالليل كعدت رضعتو ورجعت نمت وما كعدت لثاني يوم اخذتو ورحت للصالة لكيت حبوبة موجودة وبعد الريوك اجو حسن وحسين عندنا وحسين اخذ عبدالهادي

حسين .. شلون صار جرحو

سالي .. كلش زين بسرعة طاب

حسين .. يول عمو كطمو عزيزك هههههههه

حسن .. صار اكطم

حسين .. هههههههههه هو من الاول راسو مدوحس هسا صار اكطم هم كملت

سالي .. دجيب جيب وليدي فرحان بنفسو العتوي (القط)

صكر .. ههههههههه لك هلا بام عبدالهادي صايرة تقصف

سالي .. لعد شعبالك

بقينا نحجي وناس تقصف ناس وشبعنا ضحك على بعض ومر باقي اليوم طبيعي وصرت امشي واتحرك طبيعي بس ماكدر اشتغل هواي

وتعلمت من ماما وحبوبة شلون اكمط الطفل وشلون اهتم بيه وابدلو وكلشي يخص الطفل خليتهن يعلمني عليه علمود اني اهتم بيه بنفسي

تفجأنا كلنا من اجى امر بنقل صكر ووياه كم واحد من الضباط الي يشتغلون وياه للبصرة ويا الامن الوطني يعني صار باكثر مكان امن بالعراق

وقتها عمت الفرحة عالعشيرة كلها مو بس احنا لان كلهم يحبون صكر ويحترموه والحمدلله بهالايام ربي فرحني ثلاث مرات برجعة صكر وعبدالهادي وبانتقال صكر

وبعدها طلعت النتائج وكملت الفرحة الرابع من طلعت ناجحة بمعدل 98 بس بوقتها فرحتي ما جانت كبيرة كلش لان سبق وان نجحت من الثالث

بعد فترة راحت حبوبة واستقر وضعنا وصكر بحكم انو قريب فصار مرات يجي علينا يكضيلو كم ساعة ويرجع لدوامو ومرات يجي قبل اجازتو بيوم ويبقى بالبيت

عبدالهادي من وصل عمرو 37 يوم صار يوزع ابتسامات بس الخبيث اول واحد ضحكلو صكر رغم ان صكر ما يكضي وياه وقت بكدي

مرة من المرات جنت كاعدة بالصالة وبحضني عبدالهادي دا العب وياه وهو يضحك ويطلع اصوات مثل الكلام بس ما جنت اعرف شنو يحجي

اجى صكر وجان مبين عليه مرتبك ويريد يحجي شي بس خايف او متراجع سألت اكثر من مرة يكول ماكو شي ويرجع يصفن اخير شي كلتلو احجي ترا قلقتني

صكر .. مهدي ابو غازي

سالي .. شبيه

صكر .. توفى قبل مدة

سالي .. شنووووووو

صكر .. صاير انفجار وهو جان قريب منو واكو شضية ضاربتو براسو

سالي .. ودنيا وبناتها وين صارن

صكر .. ابنها غازي متوظف ودا يهتم بيهم

سالي .. لازم اروح عليها

صكر .. وهو كذلك بس ماعرف وينها

سالي .. ليش

صكر .. منتقلين عند عمامو وسألت عليهم ولحد الان ما عرفت مكانهم

سالي .. امانة من تعرف كلي فورا علمود نروحلها

صكر .. إن شاء الله

سالي .. عافني صكر وراح ونزلت دموعي من قهري على دنيا وبناتها خطية بعدهن صغار ما لحكن يشبعن من ابوهن ودنيا خطية الله يعلم بحالها هسا

بذاك اليوم شكد ما انقهرت حتى راسي صار يوجعني وعبدالهادي بقى عند ماما اغلب الوقت لان كلش تأذيت من وجع راسي حتى صوت عبدالهادي مو متحملتو

وقتها عرفت ليش مختفين صار مدري شكد بس اني هم قصرت وياهم لا سألت عنهم لا عرفت اخبارهم ولولا صكر عرف الخبر كان الله يعلم ايمتى اعرف

بقى صكر يسأل يومين كاملات لحد ما عرف مكانهم واجى فورا كلي واتفقنا ثاني يوم نروح نزور دنيا ونعزيها وماما ما قبلت تروح بقت بالبيت

رغم ان صكر مو حاب روحتي بسبب غازي بس بهيج موقف لازم اروح مهدي جان نعم الرجل وحافظ علي من جنت عايشة ببيتو فالو معزة خاصة

من كعدنا الصبح تريكنا وتجهزنا وجهزت جنطة لعبد الهادي بيها ملابس وحفاظات وتوكلنا على الله وجان الطريق بعيد ساعتين لحد ما وصلنا

دخلنا على منطقة شعبية وصغيرة وسأل صكر الناس الي بالطريق لحد ما وصلنا فرعهم وشفنا سيارتو واكفة وعرفنا البيت ونزلنا ودك الباب صكر

شوية وفتح الباب غازي اول ما شافنا صار وجهو احمر ومبين عليه ارتبك وخجل ورحب بينا ترحيب حار واخذ صكر للاستقبال واني دخلت داخل

وبصراحة استغربت من ارتباكو وخجلو لان لا هو ولا اهلو يعرفون ان اني سمعت كلامو ويا صديقو فليش هيج ارتبك وخجل بس يجوز لان اعترفلي بحبو المزيف من قبل لهذا خجل

دخلت داخل اول ما شافتني دنيا نزلن دموعنا ويا بعض وركضنا على بعض وحضنتها وبجينا سوا بوستني وتفاجأت كلش بعبدالهادي

اخذتو وهي تسمي بالله والحلو بيه ما استغرب ورغم انو ما ضحكلها بس ساكت ويباوعلها ومن فتحت كماطو مد ايدينو يريد يمسك وجهها

شوية واجن سوسو ولولو من شافني ركضن علي ثنينهن وزتن نفسهن بحضني وتخبلن على عبدالهادي وهو هم كيف عليهن فورا صار يضحكلهن

عزيتها بوفاة مهدي واعتذرت منها لان تأخرت وكلتلها من عرفت وصيت صكر يندل مكانكم والبارحة عرفو وما تحملت اصبر اكثر

سألتها عن الحجية ام علي وبناتها اذا اجن عليها كالت من اجيتي علينا جانت اخر مرة نسمع بيها عنهم ولحد الان ما نعرف اخبارهن كلهن

فرحت كلش من حجيتلها ان ماما طلعت عايشة وهسا موجودة يمي وان بابا طلع من السجن واجى اعتذر مني وسامحتو

ما جنا نريد نتأخر علمود ماما بس حلفت ما نمشي الا نتغدا يمها وبعد الغدا بشوية ودعناهم ومشينا وصور علي سبحان الله راحن من بالي وما سألتها

من طلعنا اني وياها شافت صكر وسلمت عليه وطلعنا اني وياه ومشينا بعد ما وصلنا مسافة بعيدة تذكرت صور علي كلت لصكر اكدر احجي وياك موضوع

صكر .. اي احجي

سالي .. قبل ما اجي يمكم فصلية جان اكو صور لعلي زوجي السابق تركتهن يم دنيا

صكر .. اي شبيهن

سالي .. لو جايبتهن وياي جان زعلت مني

صكر .. وليش تجيبيهن

سالي .. جنت اريد اشوفهن لماما وحبوبة

صكر .. الخلاصة جبتيهن لو لا

سالي .. لا ما جبتهن اصلا نسيتهن

صكر .. تمام

سالي .. ما جاوبني وشفت كأنو انزعج من الموضوع وسكرت عليه اعرف حقو وممكن سؤالي غلط بس الله يشهد مجرد اشوفهن لماما وحبوبة

وهو يعرفني شكد احبو وحتى علي الله يرحمو ما حبيتو بكد صكر بس غيرتو علي خلتو يضوج من الموضوع فبلا الصور احسن شي

صكر .. انتي تاركة ذهب يمهم

سالي .. اي شعرفك

صكر .. حجالي غازي

سالي .. الذهب جانن ويا الصور

صكر .. ما جاب طاري الصور بس كال الذهب ماخذو قبل وفاة ابوه وبايعو وهسا دا يجمع بدالو علمود يرجعلج حقهن وكلتلو ما نريد شي

سالي .. ليش بايع الذهب من الاساس

صكر .. يكول طيشة شاب ما جان حاس بالمسؤولية والشيطان وسوسلو يعني بايكهن

سالي .. اها الله يسامحو يعني كلتلو ما نريد بدالهن شي

صكر .. اي

سالي .. خير ما سويت

صكر .. جانن محطوطات بصنودق ويا الصور

سالي .. اي صحيح

صكر .. ايوا لعد كلي زت الصنودق علمود ما يشوفوه اهلو ويعرفون انو اخذ الذهب

سالي .. لعد همزين ما سألت دنيا عنهن جان سببتلها احراج بسبب غازي وهسا عرفت ليش ارتبك اول ما فتحلنا الباب

صكر .. بس مشاء الله صاير خوش رجال وكلامو كلش حلو

سالي .. يجوز حس بالمسؤولية بعد وفاة ابوه

صكر .. اي اكيد يحس بالمسؤولية

سالي .. بس شلون موظف وهو يمكن بعدو مو مكمل جامعة

صكر .. طلع محاظر بالمدرسة لان معلمينهم قليلين

سالي .. ايوا

صكر .. اي فالي كالي موظف طلع متوهم

سالي .. شلون عرف انو موظف وما يعرف مكانهم

صكر .. بعض مرات تنتقل هيج اخبار بدون ما يدقق السائل عن المكان

سالي .. ايوا

بقينا نتناقش بالطريق من وصلنا جان حسين بالحديقة مالت اهلو واجى بسرعة باتجاهنا وكف السيارة صكر واجى حسين اخذ عبدالهادي

حسين .. ابوج اجى

سالي .. وينو

حسين .. دا يحجي هو وامج ببيتكم الحكي اسمعي شيحجون هههههه

سالي .. رحت باتجاه البيت وكفت عند باب الصالة وسمعتهم جانو يحجون

رضى .. هسا فهميني انتي مسامحتني لو لا

سالين .. وليش مهتم لاجابتي وحتى لو سامحتك شيتغير

رضى .. شوفي سالين دا اكلج اني اعترفت بغلطي والعمر دا يمشي فانطيني فرصة اصلح غلطي

سالين .. ومنو يكول ما ارجع اعيش وياك نفس المعاناة ونفس الضيم والقهر واني تعودت على سالي وابنها ماكدر اعوفهم

رضى .. اذا علمود سالي اني مستعد انتقل للبصرة ومستعد يوميا اجيبج تشوفيها واذا شفتي مني اي شي ما عجبج اتصلي على صكر يجي ياخذج مني

سالين .. حاليا ماكدر انطيك جواب

رضى .. فكري براحتج واي شي تأمرين بيه اني مستعد انفذو مهما كان

سالين .. الله كريم

سالي .. باوعت وراي لكيت حسين وصكر واكفين يمي يستمعون للمناقشة اخذت عبدالهادي ودخلت للبيت وطكيتها بهلهولة وبابا وماما يباوعولي باستغراب

رضى .. ايمتى اجيتو

سالي .. من قبل ما تقنع ماما

رضى .. هههههههه بس امج بعدها ما اقتنعت

سالي .. يلا بابا حظر نفسك وانتقل للبصرة وتعال اخذ ماما

سالين .. اني بعدني مو موافقة

سالي .. غمزتلها .. ماما قابل ما اعرفج

صكر .. السلام عليكم

الكل .. عليكم السلام

صكر .. راح نشتاقلج ام سالي ههههههه

سالين .. هاي شبيكم

صكر .. كعدو كعدو

رضى .. وين جنتو

صكر .. الناس الي جانت عندهم سالي توفى صاحب البيت ورحنا نعزيهم

رضى .. الله يرحمو

صكر .. اي هسا احجولي شنو اتفقتو

سالين .. ما اتفقنا

رضى .. مثل مو شايف مدا تنطيني فرصة

صكر .. ام سالي كلامج متأكدة منو لو لا

سالين .. اي متأكدة منو

صكر .. لعد ما الج حق على ابو سالي وهو رجال ومحتاج مرة ولازم يتزوج

سالين .. خلي يطلقني ويتزوج

صكر .. انتي لا راح ترجعيلو ولا راح تتزوجين غيرو فليش مهتمة للطلاق

سالي .. باوعت عليهم ماما بقهر وعافتهم وراحت وانتبهت عليها قبل ما تصعد الدرج مسحت دمعتها وصكر كال لبابا انتقل للبصرة وتعال اخذها

رغم انو بذاك الموقف ماما بجت واني ما احب اشوفها حزينة بس الشي الي جان مريحني انو ماما راح ترجع تعيش ويا بابا وتستقر بحياتها

حطيت عبدالهادي بايد حسين ولحكت ماما دكيت الباب وصاحت بصوت مخنوك منو كلتلها اني ماما كالت شتريدين وفتحت الباب ودخلت عليها

سالين .. عوفيني لحالي سالي

سالي .. ماما اريد احجي وياج شوية واروح ما اتأخر

سالين .. شتريدين

سالي .. امانة الله جاوبي يرضيج بابا يتزوج مرة غيرج ويعيش وياها باقي عمرو

سالين .. شدخلني بيه

سالي .. ماما اني حلفتج

سالين .. بقت ساكتة

سالي .. شوفي ماما مثل ما انتي تحبيني وتحبين تشوفيني سعيدة بحياتي اني هم احب اشوفج سعيدة بحياتج واعرف انو سعادتج ويا بابا

سالين .. واذا تحولت سعادتي لتعاسة مثل المرة الماضية

سالي .. المرة الماضية جنتي مجبورة تبقين وياه اما هسا هو عرف غلطو واذا حاول مجرد محاولة انو يزعجج باتصال واحد نجي ناخذج اني وصكر

سالين .. ما اريد

سالي .. لا تريدين بس ما تريدين تتنازلين عن كبريائج وهسا اني رايحة اكول لبابا انج وافقتي ترجعيلو

سالين .. لا ولج تعالي لا تروحين

سالي .. عفتها ورحت وقبل ما انزل باوعت عليها وزتيتلها بوسة مع ضحكة خباثة ونزلت لكيتهم دا يحجون باوع علي صكر كال دايمة الضحكة

سالي .. يدوم نبضك

صكر .. ضحكينا وياج

سالي .. بابا ماما تكول خلي ينتقل للبصرة ويجي ياخذني

رضى .. صدك والله

سالي .. اي والله

جان مو مصدك وعافنا وراح على ماما وصكر وحسين كاتمين ضحكتهم ما يريدون يخجلون بابا من راح كال صكر شلون قنعتيها كلتلو هذا اختصاصي

شوية ونزل بابا والضحكة من الاذن للاذن كال يلا استرخص اني كمنا كلنا كلنالو وين كال اروح ارتب وضعي علمود اجي هنا ما اريد اتأخر

حاولنا وياه ورفض رفض قاطع يكول كل ثانية اتأخر بيها خسارة من عمري وعافنا وراح وصكر وحسين شبعو ضحك على كلامو

شوية واجى حسن ونزلت ماما راحت للمطبخ تسوي العشى حسين من شافها كال صكر فهمني هسا انت ليش زعلان من سالي ترا مسكينة

ماما بهاي الفترة صارت ميانتها قوية ويا حسن وحسين واكثر شي حسين جابت الماسحة واجت عليه وهو ختل ورا صكر ويكول داخل عليك انقذني

كامو عليه صكر وحسن ومسكوه لماما ورفعو رجليه وسوتلو فلقة مثل ابو جودت بس جانت تضربو على كيفها وعبدالهادي يباوع عليهم ويضحك

بعدها راحت تسوي العشى ومر اليوم بين ضحكة وسالفة وجانت رجعة ماما لبابا مسوية اجواء فرح بالبيت واجواء حزن بنفس الوقت

فرحانين لان راح تستقر بحياتها إن شاء الله وبنفس الوقت ضايجين لان راح نفتقدها عاشت ويانا مدة طويلة وتعودنا على وجودها بالاخص اني

جنت شايلة هم شلون راح اصبر بدونها وشلون ارجع ارتب وضعي بس جان وجود عبدالهادي شوية مخفف عني الموضوع لان راح التهي بيه

مرت كم يوم واجى بابا يدور على بيت وعيادة علمود بين ما يبيع بيتو وعيادتو الي ببغداد يشتري هنا فورا وينتقل ما يتأخر وراحو يدورون هو صكر

راحو الظهر واجو المغرب كالو شفنا كم بيت بس لازم تجي سالين تشوفهن وتنطينا رايها وثاني يوم راحت وياهم وافترو عالبيوت الي شافوهن

واختارت واحد من البيوت تصميمو حلو وبنائو حديث وسعرو مقارب لبيتنا الي ببغداد ومن اتفقو عليه انطى بابا مليون مقدمة للبيت كحجز علمود ما يبيعو لغير شخص

ورجع لبغداد وبعدها بكم يوم انباع البيت ولان مستعجل على بيعتو ما طلب مبلغ غالي كلش مجرد المبلغ يكفيه يشتري البيت الي هنا

ومن باع البيت باع العيادة هم وبقن يمو الاجهزة الي يحتاجهن للعيادة وغراض البيت اخذ المهم وترك الباقي للي اشترى البيت لان نقلو للبصرة اكثر من حقو

............. يتبع

#هل_كنت_فصلية

#البارت_89

سالي .. ومن باع البيت باع العيادة هم وبقن يمو الاجهزة الي يحتاجهن للعيادة وغراض البيت اخذ المهم وترك الباقي للي اشترى البيت لان نقلو للبصرة اكثر من حقو

جان صكر مداوم وخابر على ماما كاللها انو بابا جاي بالطريق اليوم يبقى يرتاح يمنا وباجر حسين ياخذني اني وياها ننظف البيت قبل ما ينتقلون عليه

سكرت منو وبلشت تسوي الغدا لان مو باقي هواي ويوصل بابا واني ساعدتها وعبدالهادي تركتو نايم بالصالة وجانت ماما مرتبكة من الموضوع

بقيت احجي وياها واقنعها ورغم انو زوجها وعاشت وياه وخلفت بس بسبب سنين الفراق وخوفتها من انو يرجع مثل قبل صار عدها ارتباك

الساعة صارت 1 كملنا الغدا وبقيناه عالطباخ علمود من يجي بابا بس نغرفو وبال 1:30 اجى بابا وحطينا الغدا اني وياها ولاول مرة ماما تكعد ويا بابا على سفرة وحدة

تغدينا وكملنا واجو حسن وحسين ومر اليوم طبيعي وبابا كلش حب حسن وحسين لان اخلاقهم حلوة وكعدتنا كلها ضحك وشقى

ثاني يوم الصبح تريكنا وجهزت عبدالهادي وبال 8 اجى حسين كال اذا جاهزين خلي نروح وطلعنا وياه وبابا جان يدليه عالبيت لحد ما وصلناه

جان بيت حلو ومساحتو على كد ماما وبابا جان 100 متر وطابقين وبيه تحت غرفة وفوك غرفتين وصالة يعني زايد على ماما وبابا

نزلنا غراض التنظيف وبابا وحسين راحو يجيبون اغراض من السوك وعبدالهادي بقى عند حسين لان البيت كلو تراب واذا يبقى يتبهدل واني دا اشتغل

بلشنا اول شي بالغرف الي فوك نظفناهن تنظيف من هذا التمام بحيث حتى السكف جلفناه طلعناه ابيض يلمع والحايط والارضية نفس الشي

بعدها الصالة والصحيات الي فوك هم نظفناهن ونزلنا تحت عالغرفة والصالة والصحيات وبعدها المطبخ واخير شي الاستقبال

بين ما خلصنا اجو بابا وحسين وياهم غراض اني تركت كلشي ورحت للصالة كعدت عالكاع وسندت ظهري عالحايط واحس نفسي مكطوع من التعب

اجى حسين جابلي عبدالهادي من شافني ضحكلي احس كل التعب راح مني اخذتو وبوستو وصرت العب وياه وعفت البقية يلتهون بالغراض

وبعدها اخذتو للغرفة رضعتو لحد ما شبع ورجعت عليهم لكيت بابا جايب غراض خفيفة للبيت مثلا مواعين وسلات للملابس مؤقتة بين ما يرتب الوضع وجايب فرش للنوم

واهم شي جايبين غدا لان كتلنا الجوع شفت عبدالهادي نعس حطيتلو فراش من الي جابهن بابا وخليتو ينام وتغديت وياهم لحد ما انتفخت

بعدها قفلنا البيت ورجعنا على بيتنا بس ما وصلت الا انتي منتهية فورا اخذت عبدالهادي لفراشي ودخلت اخذتلي دوش من هذا المرتب

بعدها طلعت لفيت شعري حتى ما بي حيل امشطو وزتيت نفسي عالفراش ونمت جانت الساعة 4 العصر وما كاعدت للساعة 8 بالليل

من كعدت شفت عبدالهادي كاعد ويباوع بعيونو ويحرك بايديه ويطلع اصوات بلعبو اخذتو وياي ونزلت تحت لكيت ماما وبابا كاعدين يحجون بالصالة

كعدت وياهم وماما اخذت عبدالهادي وصارت تلاعبو وبعدها تعشينا وبقينا نحجي لحد ما صار وقت النومة ورحنا نمنا وكالعادة نومت عبدالهادي بعدين نمت

ثاني يوم جان لازم ناخذ عبدالهادي نلقحو اني وحسين واخذنا بابا ويانا لان جان يريد يروح عالعيادة يبلش يرتبها علمود يفتح ويبلش يشتغل بيها

واجى حسن علمود يساعد بابا نزلناهم عند العيادة وكملنا طريقنا للمستوصف وجان ازدحام وطلعت روحنا لحد ما لقحنا عبدالهادي وطلعنا

من خلصنا اتصل حسين على بابا وحسن جانو بعدهم مو مخلصين فرجعنا عالبيت وماعرف حسين وين راح وعبدالهادي لليل ارتفعت حرارتو بسبب اللقاح

وبقى الليل كلو ينام ويكعد وماما وبابا كالو طبيعي لان جسمو دا يقاوم المرض الي باللقاح لذلك ترتفع حرارتو وتصير عليه صخونة يومين هيج وتروح

وطبعا للي ما يعرف شنو اللقاح هو انو يجيبون الفايروس او الكائن الي يتسبب بالمرض وبطريقة ما يطلعون منو السم الي يفرزو بالجسم

وببعض اللقاحات يقتلون الكائن هذا ويحطونو بجسم الطفل فجهاز المناعة يكون كريات دم بيض تكون قادرة على قتل والتهام هاي الكائنات وبهالطريقة يصير عندو مناعة ضدها طول العمر

مرن كم يوم جان بابا يوميا تقريبا يروح للعيادة يرتب بيها وبالاجهزة مالتها ويشتري غراض للبيت وما جان يريد يحط اي شي مستعمل بالبيت كلو جديد

ويوم بعد يوم بدا يكمل بيتهم والعيادة ومن نزل صكر جان اخر يوم الهم ببيتنا جانت ماما كلش حزينة علي اني وعبدالهادي وكأنو راح تروح لغير دولة مو غير بيت

ثاني يوم توكلو على الله ومن طلعو من البيت اريد امسك دموعي ماكدر كوة مسكتهن لحد ما طلعت ماما علمود ما ابجي كدامها

من طلعت انفجرت بالبجي وحضني صكر وهو يضحك ويكول تبقين ام دميعة هي قابل وين رايحة وباجر نروح عليهم وتشوفيها خلص اسكتي

بعدها رجعت للبيت بس من صدك احس البيت موحش وكل شوية اتخيل ماما تطلع من المطبخ وتحجي وياي بس المهم هسا انو استقرت بحياتها

بذاك اليوم كلش انقهرت واحس حياتي كلها صارت مخربطة كضيت اليوم كوة وثاني يوم العصر رحنا اني وصكر للسوك نشتريلهم هدية

دورنا هدية مناسبة وما لكينا شي يعجبنا اخير شي كلتلو ناخذلهم غسالة لان بعد بابا ما اشترى غسالة ورحنا على محل اجهزة كهربائية

لكينا غسالات مختلفة بس عجبتني نوعية منهن اخذناها وكال صكر هاي هديتج واني اخذلهم هدية لحالي واخذلهم سبلت للغرفة مالتهم

وجاب سيارة وحملوهن واخذناهن للبيت قبل ما نوصل وصى حسين وحسن وعبدالله يكونون موجودين علمود ينزلوهن وياه ومن وصلنا اني رحت للبيت وعفتو

وشفتهم من الشباك نزلوهن وحطوهن بالحديقة مالت البيت وراح صاحب السيارة واجى صكر دخل عالبيت كلتلو صدك شلون راح ناخذهن

كال معليج اني حاسب حسابي حسن (واحد من كرايبهم هم اسمو حسن) عندو سيارة حمل راح اجيبها منو وناخذهن ويانا ونرجعلو سيارتو

وفعلا بالليل بعد العشى راح حسين جاب سيارة كرايبهم وحملو الغسالة والسبلت بيهن واجو حسن وعبدالله ويانا وحسين بسيارة كرايبهم

من وصلنا نزلوهن وعبدالله ما بقى بس نزلهن وهو رجع سيارة كرايبهم جان وجه بابا يشرح سعادتو الي ما شفتها بحياتي كلها من قبل

ماما جانت مرتبة الغراض بالبيت وبعد ناقصهم هواي غراض بس مثل ما يكول المثل العافية درجات وهم دا يصعدون هاي الدرجات وحدة وحدة والاهم مع بعض

كضينا تعليلة كلش حلوة عندهم بس جان اكو مشكلة صغيرة وهي انو بابا فتح العيادة جديد ومحد يعرفو فشغلو حاليا ميت لان محد يجيه

وصكر من عرف بالموضوع كال خليها علي وإن شاء الله سهلة وصار عندي فضول اعرف شنو راح يسوي بس كال دا افكر هسا ما عندي قرار ثابت

وحسين وحسن وصو بابا اي شي يريد يجيبو يخابرهم لان يعرفون بيه ما يكدر يشيل غراض ثكيلة وبالاخص ان لحالو ما وياه احد يساعدو

صحيح بابا رجعتلو عافيتو وصار احسن من قبل بس تأثير الحزن الي عاشو لحد الان موجود وما اعتقد يروح مهما طال الوقت عليه

لحد الان تحس قوتو القديمة انتهت بالسجن ولهذا السبب هو وافق على كلام حسين وحسن وكاللهم اذا احتاجيت احد انتو اول ناس اخابرهم

من خلصت التعليلة رجعنا للبيت وعبدالهادي طول الطريق يهوس ويلعب وجان حسين كاعد من كدام واني صايرة وراه وحسن ورا صكر

جنت احط عبدالهادي عند راس حسين وهو يمسك شعر حسين ويسحبو ويخلي حسين يصيح وحسن ياخذو ويخليه يسحب شعر صكر

بس صكر لان عسكري جان شعرو خفيف فما جان يكدر يمسكو عبدالهادي بس هالطفل هذا حبوه حب حسن وحسين مو طبيعي

شكد شفت شباب يحبون اطفال بس مثل حبهم لعبدالهادي ما شفت واعتقد بسبب حبهم لصكر صار حبهم لعبدالهادي اكثر من بقية الاطفال

ثاني يوم اجت علينا سهى وجنا كاعدين بالصالة اني وياها وصكر وحسين وحسن وكاللها صكر سهى اريد اخذ رايج بموضوع

سهى .. شنو هو

صكر .. ابو سالي مثل ما تعرفين فتح العيادة جديد ومحد يعرفو فحاب اعرف الناس عليه بس ماعرف شلون

سهى .. اكثر شي تكدر تسويه تحجي للناس عنو والي يحتاج دكتور يروح عليه

صكر .. ماعرف شلون اسوي هالشي

حسين .. معليك اني ادبرها بس انتي سهى وصي النسوان اي وحدة تحتاج دكتور تروح عليه عالاقل نسيبنا ونعرفو احسن من الغريب

سهى .. تمام

حسين .. يلا صكر خلي نروح للمضيف

صكر .. تمام

سالي .. راحو للمضيف وبقينا اني وسهى وجانت امينة تلعب ويا عبدالهادي وتضحك واحنا نضحك على ضحكتهم وامين جان يلعب ويا ولد عمامو

حسين من رايحين للمضيف جانو عمامو متجمعين كالعادة يكضون وقت ويا بعض وبحكم انو ماكو احد غريب فجان يكدر يحجي وياهم عادي

كاللهم مثل ما تعرفون نسيب صكر اجى للبصرة وهو دكتور فالي عندو مريض يروح عليه واذا جانت معاملتو زينة وعلاجاتو مضبوطة وصو الناس تروحلو احسن من الغريب

فمن خلال كلام حسين عمامو اقتنعو ومن بعد كلامو من احتاجو دكتور راحو على بابا وبابا لانهم كرايب صكر فجان تعاملو وياهم احسن من البقية

رغم انو ما فد يوم احد اشتكى من معاملة بابا لان بابا حتى من جان يرتكب اخطأ جانت اخطائو خارج مصدر رزقو لهذا اي شخص يجي عليه يرتاح لمعاملتو

وعمام صكر من شافوه ذكي والعلاج الي يوصفو فورا يفيد المريض صارو يوصون اي شخص يحتاج دكتور يروح عليه هم فائدة الو وهم فائدة للمريض

ويوم بعد يوم شغل بابا صار احسن وصارو يجونو ناس من كرايب صكر ومن ناس غربة يوصلهم الكلام ان الدكتور رضى خوش دكتور فيجون عليه

ومن صار شوية ازدحام عليه جاب شخص يكتب الاسماء وينظم سرا الناس والحمدلله رب العالمين رزقو رزق احسن حتى من رزقو ببغداد

صارت تمشي الايام بروتين عادي اني رجعت اشتغل بالبيت اطبخ وانظف واكنس واغسل ملابس يعني الشغل القديم وشغل ماما صرت اشتغلو

بالاضافة لعبدالهادي (عرموطي) على كولة امينة لحد الان تسميه عرموطي وصكر من يسمعها يسوي نفسو يلحكها وهي تركض وتختل عند امها

جنا كل فترة نروح على ماما وبابا ومرات هم يجونا بيتهم كملو اثاثو وصار كامل مكمل والكمال لله وجانت ماما مهتمة بيه اهتمام كلش حلو

ومنها شالت فكرة الوضيفة من بالها رغم انو تبقى بالبيت لحالها وتضوج بس من يجي بابا لا تتونس وياه وما تبقى ساكتة طول الوقت

وتسريعا للاحداث صكر بقى بدوامو ما انتقل بعد ونسمع عن اخبار الموصل بس ما نعرف شي عنها وندعي ربنا انو دائما ينصر الجيش عالتنظيم

من قربت المدارس حسن وحسين جبرهم ابوهم يأجلون لان وضع بغداد متخربط وما لكو نقل علمود يداومون بالبصرة لذلك انجبرو يأجلون هالسنة

ورغم انو التنظيم ما دخل لبغداد بس لان قريبة من صلاح الدين فجان الحجي خايف انو لا قدر الله يدخلون داعش عليها ويتورطون حسن وحسين

اني نصحتني ماما انو اكمل دراستي بس جنت محتارة بعبدالهادي وين اوديه كالت جيبيه يمي من تروحين للدوام ومن تخلصين تعالي اخذيه

فكرت بكلامها وكلت لصكر كال خلي اشوف اذا لكينا معهد قريب عليهم تدرسين بالمعهد وبطريقكم تودون عبدالهادي او تجيبوه واذا ماكو نشوف غير حل

جنا مقررين نسوي مثل نظام علي الله يرحمو ادرس رابع وخامس بالمعهد اساس للسادس ومن اخلص الخامس اقدم خارجي للسادس

سأل صكر ولكى معهد بس مو قريب كلش على بيت بابا بس يعتبر اقرب معهد والحلو بيه بس بنات لهذا اختارو ونفذنا كلام ماما

بديت ادرس بيه جان ياخذني حسين من يداوم صكر ينزلني بالمعهد وياخذ عبدالهادي ووياه جنطة ملابس لماما من اخلص يجيبو ويجي ياخذني

ومن يكون صكر موجود مرات يبقى عبدالهادي عندو وياخذو ويروح مرات على سهى ومرات على اهلو واذا يحتاج تبديل سهى تبدلو او رانيا

جانت الحجية والحجي مرات يدزون عليه فابدلو وارتبو وياخذونو حسن او حسين يبقى هناك ساعة تقريبا ويرجعونو الي من ينعس او يجوع

رغم المشاكل الي صارت بيني اني والحجية وبين صكر والحجية بس جانت كلش تحب عبدالهادي وتدز عليه علمود بس تشوفو وتلاعبو

والحلو بيها ما فرقتو عن باقي احفادها تحبو وتهتم بيه مثلهم ومرات من احتاجها ابد ما تقصر او ترفض مساعدتي لان تكرهني تحط عبدالهادي ضمن اولوياتها

جان حسين مرات ياخذو ويروح يفتر بالسوك وما يوديه لماما الا تتصل عليه لدرجة مرة ما اخذو الها لحد ما طلعت من المدرسة وهو وياه

مرة من المرات اخذو وياه للسوك ولاكي مناظر صغار مشتريهن وملبسهن الو بوية من شفتو لابسهن الا بطني صارت توجعني من الضحك منظرو مضحك كلش

ومرة هم رايح للسوك وعايفو بالسيارة ونازل يشتري لفة لان جوعان وشايفاتو بنات وعبالهن ناسيه بالسيارة وباقيات يمو لحد ما رجع حسين

يكول من رجعت سألتهن اذا اكو شي كالن لا بس ابنك باقي لحالو كايللهن اي صحيح من عافتو امو وطلبت الطلاك ما بقو يمو بس اني

يكول انصدمن ووحدة تكول للثانية شلون ينطيها كلبها تعوفو جان يحجيلي واني اضحك على جذبو كلتلو الله لا يكول اطلك وابتعد عنو الا اموت

والحمدلله رغم الصعوبات الي واجهتها باهتمامي بعبدالهادي والبيت ودراستي بس كدرت انجح وبدرجات عالية وجانت فرحة النجاح لا توصف

وبيوم تسليم النتائج اخذت عبدالهادي وياي المدرسات والطالبات تخبلن عليه وشكو وحدة جايبة تيلفون وياها تصور وياه حتى الطالبات

جنت ملبستو برمودة وقميص ازرك وطالع ويا بياض بشرتو فدشي مو طبيعي وكضيت وقتي بالمدرسة اخذو من وحدة وانطيه للثانية

صكر جان هو جايبني ومن استلمت النتيجة وطلعت انطيتها الو اول ما شافها انرسمت ابتسامة على وجهو وصار يمدحني ويشعجني علمود استمر بهالتفوق هذا

اخذني للسوك اشترالي كلادة ذهب هدية واخذنا لعبدالهادي ملابس واخذنا حلويات ورجعنا للبيت والعصر عزمنا سهى وحسن وحسين عالحلويات

كضينا وقت كلش حلو وياهم وحسين يكول المفروض اني احصل هدية اني اخذتها هي وعرموطي يوميا بالبرد وبالحر وبالمطر وبكل الضروف

كالو صكر انجب دوختنا لا بارك الله بيك ولا بفزعتك وحسن وكع بالكاع من الضحك وحسين رغم ترزل بس شبع ضحك ومن صارت الدنيا مغرب راحو

وبذاك اليوم سمعت اغرب خبر بحياتي الشي الي حتى ما كدرت اتخيلو يصير صار حقيقة مو خيال ورغم هذا بس جان من ضمن احلى الاخبار بحياتي

............ يتبع

#هل_كنت_فصلية

#البارت_90 الاخير

سالي .. وبذاك اليوم سمعت اغرب خبر بحياتي الشي الي حتى ما كدرت اتخيلو يصير صار حقيقة مو خيال ورغم هذا بس جان من ضمن احلى الاخبار بحياتي

بالليل بعد العشى اجو بابا وماما رحبنا بيهم ودخلو كعدو وبدو يحجون ويا صكر واني رحت سويتلهم جاي ورجعت صبيتلهم

لاحظت ماما متضايقة عكس بابا كلتلها بصوت ناصي شكو كالت كومي نحجي بغير مكان ورحنا اني وياها للمطبخ كلتلها احجي شكو قلقتيني

سالين .. فضيحة

سالي .. يا ساتر شكو

سالين .. طلعت حامل

سالي .. باستغراب وفرح .. بربج

سالين .. اي والله

سالي .. بس لحضة شنو الفضيحة بالموضوع

سالين .. لج بهالعمر هذا ويني وين الحمل

سالي .. ماما استغفر الله شنو حاملة بيهم بدون زواج ترا عادي الموضوع وانتي هسا عمرج 41 يعني بعدج صغيرة

سالين .. يا صغيرة يمعودة صرت جدة

سالي .. يعني هسا كل عقلج ضايجة لان حامل

سالين .. اي

سالي .. سوي اجهاض

سالين .. بصدمة .. شتحجين انتي

سالي . اي سوي اجهاض علمود ترتاحين منو

سالين .. لازم شايفتني ما بكلبي رحمة

سالي .. لعد تعودي عالموضوع صرتي حامل اشكري ربي واحمديه يجوز الله يرزقكم بولد يحمل اسم بابا ويكون سند الكم من بعد الله من تكبرون

سالين .. بس اني ما بي حيل للحمل والولادة وهالخبصة هاي

سالي .. من تجيبين انطينياه اني وصكر هههههههه

سالين .. شكد بطرانة انتي

سالي .. بابا شنو رايو بالموضوع

سالين .. ابوج مكيف وطاير من الفرح

سالي .. ما الومو

سالين .. ياربي

سالي .. ماما شبيج هذا رزق من ربي واكو ناس تتمنى ريحة الجاهل وانتي زعلانة ترا حتى حرام عليج تسوين هيج وتضوجين من الرزق الي ربنا كتبو الج

سالين .. لج اني مو ضايجة من الرزق اني ضايجة لان بهالعمر هذا لج عمري مو عمر حمل وولادة

سالي .. لا لا حمل وولادة لذلك توكلي بالله واحمديه

سالين .. ونعم الوكيل

سالي .. جنت احاول استفزها من كلتلها عالاجهاض لان اعرفها مستحيل تسويها ومستحيل اني اشجعها على شي بهالبشاعة هاي بس علمود تتقبل فكرة الحمل

رجعنا عند بابا وصكر وماما ما جانت تريدني احجي كدام صكر لان مفتشلة واني هم ما حبيت احرجها لان بعدها مو متقبلة الموضوع فبقيت ساكتة

من راحو حجيت لصكر وكلش فرحلهم بس نبهتو ما يحجي بالموضوع وبالاخص كدام ماما بالوقت الحالي وهو استجاب لطلبي

مرت الايام وبدت الاراضي العراقية تتحرر شوية شوية وكل يوم نسمع خبر انتصار الجيش بمكان ما وبنفس الوقت يروحون ضحايا هواي نتيجة التحرير

جان اصعب خبر نسمعو من يكولون ان داعش محاصر منطقة ومانع اهلها يطلعون علمود الجيش ما يقصف المنطقة ومن اتخيل وضعهم اتخبل من الخوف

جنا دائما نشغل برنامج الرد السريع الي تابعوه يمكن كل العراقيين وجان المراسل ويا الحشد والحلو بيه رغم خطورة الوضع بس يصور بخط الصد

يعني ينقل الخبر والوضع كما هو صوت وصورة اي شي يصير فورا يطلع بالتصوير وجان يوضح خطورة الوضع الي جان يواجهونو الحشد الشعبي

مرة من المرات طلع بالتصوير سيارة مصفحة انطلقت من جهة داعش وجاية على اتجاه الحشد والحشد يضربون عليها طلق وما يفيد

بنص الطريق وكفت ماعرف ليش ونزل منها السايق وقبل ما يبتعد انفجرت انفجار مو طبيعي من صدك مرعب الى ابعد الحدود

ومرة بلقاء ويا الحشد جان داعش محاصرين ناس بمنطقة والضابط كال اجانا امر نقصف المنطقة حتى لو بيها ناس بس ما نفذنا الامر لان بيها ابرياء

جنا دائما اني وصكر نشوف البرنامج من يطلع وصكر جنت احس نظراتو توضح شكد هو يتمنى يكون وياهم ويدافع عن بلدو بس ما يكدر يسوي شي

مجبور يلتزم بدوامو هنا وهذا اكثر شي جان مفرحني لان الوضع هناك مو سهل والي يروح مو معلوم اذا يرجع لو لا لان رايح لساحة موت

عبدالهادي صار وضعو احسن من قبل ياكل اكل خفيف وما يكعد نص الليل ومن اكعد الصبح الكيه يهوس بفراشو ويلعب واشبع ضحك على افعالو

ماما يوم بعد بدت تتعود عالموضوع والحمدلله تقبلتو وصارت تهتم بنفسها وباكلها وبابا دائما يساعدها بالبيت علمود ما تتعب من يرجع من الشغل

حسين وحسن من بلشت جامعتهم رجعو لدوامهم لان صار الخطر بعيد كلش عن بغداد واني داومت خامس ومثل الرابع هم عبدالهادي اخذو على ماما

بس هاي المرة جان عبدالله يوصلني وعبدالله مالو خلك للجهال مثل حسين فجان مجرد يوصلني للمدرسة وياخذو فورا لماما ويرجع للبيت

ومن صكر يكون موجود يوصلني هو ويرجع عبدالهادي وياه للبيت ومرات من يجي ياخذني اول ما اطلع يأشر لعبدالهادي علي وعبدالهادي اول ما يشوفني يرفع ايديه

جانت احلى لحظات حياتي واكثرهن فرح وسعادة من اجي اتمشى عليهم وعبدالهادي يرفع ايديه الي من صدك فرحة ما تنحجي بحروف الدنيا كلهن

حبوبة من راحت بعد ولادة عبدالهادي ما رجعت بعد لان ما كو شي مهم صاير بس نتواصل وياها عالتيلفون دائما واكيد ست نارين وست ريم ما انساهن بالتواصل

بس جان تواصلي وياهن قليل لان لازم اخابرهن من تيلفون صكر وهو يا اما بالدوام يا اما خارج البيت ومرات من يكون موجود انسى اتصل

بالشتاء وصلنا خبر وفاة جدتي ام ماما الله يرحمها جدي جان حزين كلش عليها ومنكسر انكسار مو طبيعي وهالشي مو غريب شريكة حياتو مو يوم ويومين

ماما كلش انقهرت عليها وهواي بجت عليها حتى جنا خايفين يصير عليها شي لان مو زين الها البجي بس الحمدلله كدرت تتحمل الخبر

والشي الي ساعد ماما انها تتخطى الموضوع هو انو صارلها مدة طويلة ما شافتها فالفراق هذا شوية هون عليها الموضوع وخلاها تتجاوزو

اما اني فزعلت بس مو زعل قوي والسبب انو ما متعودة على جدتي وحتى ما انجمعنا وياها من جانت على حيلها فلذلك زعلي جان كلش خفيف

اهل صكر عرفو بخبر حمل ماما بيهم الي فرح وبيهم الي صار يسمع كلام بحجة انو جانت رافضة وهيج لعد لو مو رافضة جان من اول شهر حملت

اني اعرف كلامهم هذا فتجاهلتهم والحلو بماما ضربت حجيهم بعرض الحايط وجان اهم شي عدها صحتها وصحة الجنين والباقي تاركتو

وجانت مثلي ما تريد تعرف جنس الجنين لحد ما يجي وهاي المرة بابا لا كاللها اريد ولد ولا شي يكول الي يجي من الله يا محلاه واذا بنت مثل سالي ما اريد غير شي

بس الغريب ان ماما انتفخت انتفاخ مو طبيعي صارت كوة تمشي اصابعها صارت ماتكدر تسكرهن من السمن وكل ما نحجي تبقى تلوم بابا ههههههههه

بالشهر الرابع دخلت بشهرها ووصيت بابا اذا صار شي فورا يخابر صكر علمود يجيبني ومرة من المرات جنا بالمعهد واجتني وحدة من المدرسات

طلعت وياها كالت زوجج اجى اخذلج اجازة رحت عالادارة وتشكر منهم صكر وطلعنا كال امج بالمستشفى وابوج خابرني قبل شوية ورحنا فورا عليهم

لكينا بابا بالمستشفى دا ينتظر كال دخلوها لصالة الولادة ولحد الان ما بين احد منهم بقينا نتتظر وياها وندعي ربنا انو يتمملها على خير

الشي الي جان منطينا شوية راحة هو انو ما تحتاج عملية قيصرية لان العملية بيها نسبة خطورة عالمريضة وتبقى فترة طويلة لحد ما تتحسن

بقيت انتظر على نار وكل ثانية احسها سنة اخير شي طلعت الدكتورة ووياها ممرضة بس الممرضة جانت شايلة طفلين وباوعت عليها باستغراب

الدكتور .. مبروك اجاك توأم ولد وبنت

رضى .. الحمدلله الف حمد وشكر الك ياربي

الدكتورة .. هسا راح تبقى المريضة لحد ما ترتاح وبعدها تكدرون تأخذوها والف مبروك مرة ثانية

رضى .. الله يبارك بيج

صكر .. الف مبروك ويتربون بعزكم ودلالكم

سالي .. الف مبروك بابا إن شاء الله تشوف اولادهم

رضى .. الله يبارك بيكم ويخليلكم ابنكم

سالي .. جانت فرحة لا توصف اخذو الاطفال وكالو من تكعد المريضة نجيبهم وقتها بابا جان كلش فرحان اتصل الحجي على صكر وبشرو صكر

بعدها اخذو ماما لغرفة خاصة وبقينا ننتظرها لحد ما كعدت دخلنا عدها وبين ما صحصحت جابولها الاطفال جانت تباوع عليهم ومستغربة انهم توم

هي جانت محتارة بواحد واجوها ثنين دفعة وحدة ههههه باوعت علينا وخنكتها العبرة يعني الي يشوفها يكول هاي طفلة مو مرة عمرها 41

صكر من شافها حبس ضحكتو وطلع خارج الغرفة باركنالها وبقيت وياها لحد ما رضعتهم وجانو كلش حلوين يمكن احلى من عبدالهادي بس تعرفون القرد بعين امو غزال هههههه

جان الولد يشبه بابا والبنت تشبه ماما يعني سالي صغيرة لان اني طالعة على ماما وصكر يكول لبابا شتريد بعد حصلتلك سالين ورضى صغار

من ارتاحت ماما اخذناها عالبيت واني بقيت عدها واجو اهل صكر وسهى وحتى حبوبة اجت بس هالمرة حبوبة ما تأخرت بقت يوم واحد ورجعت

جان عدها عرس لحفيدتها وما كدرت تبقى وتعوف حفيدتها لذلك اجت باركت لماما وتطمنت عليها وادت الواجب وبعدها رجعت لبيتها

اني بقيت يم ماما لحد ما تحسنت وصارت تمشي وتشتغل مثل قبل وبعدها رجعت للبيت وجان صكر بدوامو لان تأخرت كم يوم عند ماما

خليت عبدالله يخابر صكر وكال ماطول اني مو موجود روحي ابقي عند امج ومن هناك يجي عبدالله يوديج للمدرسة ومن اجي ارجعج للبيت

وبصراحة كلامو قنعني واخذت ملابسي وكتبي والاشياء الي احتاجهن وملابس لعبدالهادي ووصلنا عبدالله على بيت بابا وجان يوم سبت

من اجى بابا حجيتلو عن كلام صكر كال ما يحتاج يجي عبدالله ياخذج معهدج على طريقي اخذج وياي واتصل على صكر وكلو انطي خبر لعبدالله لا يجي

ثاني يوم كعدت شويت ريوك الي والو ووكلت عبدالهادي علمود ما يجوع وبدلتلو ملابسو ورحت ويا بابا طلعنا نمشي ولاول مرة اروح للمعهد مشي

جانت الدنيا صبح والجو بيه برودة كلش حلوة واتخيل نفسي بعدني طفلة وبابا ياخذني للمدرسة من وصلني انتظر لحد ما دخلت للمعهد وراح هو للعيادة

كملت دوامي وتذكرت انو من اطلع شلون ارجع للبيت واني اعرف ان بابا يتأخر لحد ما يرجع للبيت من خلصت طلعت لكيتو دا ينتظرني ورحت عليه

رضى .. ها شلون دوامج

سالي .. الحمدلله زين بس ما توقعتك تجي

رضى .. لعد شلون اعوفج لحالج

سالي .. عبالي تتأخر بالعيادة

رضى .. بعد عندي مراجعين بس اجيت اخذج للبيت واتغدى وارجع

سالي .. بس مايصير تعوف الناس مريضين علمودي

رضى .. انطيت خبر للكاتب ان ما ينطي اي موعد من الساعة 12 لل 1:30 فالي يجي اذا مريض كلش راح يروح لغير دكتور او من ارجع يكون هو اول واحد واذا مراجع فعادي ينتظر

سالي .. ماعرف انت ادرى بشغلك

رضى .. معليج شغلة ما الها داعي بس تدوخين نفسج بيها

سالي .. اني غير مساعدة على اساس باقية اساعد ماما وعفت يمها 3 جهال وانهزمت للمعهد

رضى .. هههههههه الله يعينها هسا نلكيها دا تبجي

سالي .. ما الومها والله

رجعت للبيت جانت ماما منومة هدى واحمد وجانت مكعدة عبدالهادي بالصالة وحاطة يمو لعبات وهو ملتهي يلعب ويهوس ومبين من هسا راعي هوسة

من دخلت سلمت على ماما واندار علي وضحك وجان يحاول يكوم صرت اشجعو وكام ورجع وكع ورحت شلتو وابوس بيه وهو كلش فرحان

ومن وصلت البيت صار دوري بالشغل وماما ارتاحت وحطيت الغدا وتغدينا وبعدها بابا رجع لشغلو وماما جانت تعبانة ونامت واني راجعت دروسي

بقيت على هالوضع لحد ما اجى صكر بذاك اليوم جنت اعرف انو راح يجي فبالليل حظرت كلشي يخصني ويخص عبدالهادي علمود ما اتأخر ثاني يوم

ومن رحت للمدرسة كملت دوامي وطلعت لكيتو ينتظرني ركبت وياه وسألتو اذا انطى خبر لبابا وكال خابرتو ورحنا تغدينا واخذنا عبدالهادي ورجعنا للبيت

جنت مشتاقتلو اشتياق مو طبيعي وهو كذلك بس لان جان تعبان من وصلنا فورا نام واني نظفت البيت من التراب الي صار بيه خلال هالكم يوم

وبعدها رجعنا للروتين الطبيعي وبصراحة ماكو احداث تذكر مجرد نقاشات وتعالليل وسوالف مو مهمة وذكرها مجرد اطالة بدون اي فائدة

عبدالهادي كبر شوية وصار يمشي وجان صكر من يخليه عندو وارجع من المدرسة يجيني يركض وجانت خطواتو باتجاهي كأنو حياة دا تتقدملي مو طفل

ومن قبل ما يكبر صرت احجي وياه انكليزي مثل ما جانت تسوي وياي ماما علمود يكبر وهو مسيطر عاللغتين وجنت مرات احجي وياه عربي فصيح

وجنت اعلمو شلون يرد بالعربي الفصيح جانت اول كلمة ينطقها بحياتو بابا لان اسهل كلمة على لسانو وبعدها ماما ودادا وكذا الى ان تعلم الكلام

من خلصت الخامس نجحت بتفوق كالعادة وقدمت عالسادس وجانت ذيج اصعب سنة علي كضيت وقتي كلو بالدراسة ليل ونهار

هواي اهملت صكر بذيج الفترة وهواي اهملت عبدالهادي بس صكر جان سند الي وجان دائما يشجعني انو اثابر واتعب علمود احصل الشي الي يرضيني

بقيت هيج لحد مل خلصت السادس وجانت اعظم فرحة هي حصولي على معدل 99,86 بيومها فقدت الوعي من الفرح هههههههه

الناس تفقد الوعي بالحزن اني بالعكس صرت بس قررت قرار نهائي وهو انو ما اداوم جامعة ماعرف اذا قراري خطأ بس اني اشوف نفسي ما احتاجها

كرست حياتي لزوجي وابني ولبنتي الي بالطريق اي مثل ما قريتو بنتي الي ما جنت اعرف جنسها بالبداية بس بعد الولادة عرفت انها بنت ولله الحمد

سميتها سالين على اسم ماما وجانت هي روحي من الدنيا هي واخوها وابوها ودائما ادعي ربي انو يحفظهم الي ويديمهم فرحة الي طول العمر

من خلال اسألة صكر كدرت اعرف بيت زينا وقتها الله لا يشوفكم التوتر والارتباك الي عشتو واني متجهة على بيتها ووياي زوجي واطفالي

جنت خايفة انو تكول عاشت ونست علي الي تعب لاجلها هواي وما قصر وياها بشي بس جان الواقع عكس ما تخيلتو اني

من وصلنا دكينا الباب وفتحتلنا بنت صغيرة كاللها صكر صيحي ابوج وشوية واجى مهيب سلم على صكر وباوع علي صفن شوية وبعدها انصدم

جان كأنو شايف شبح ويباوع علي باستغراب كلتلو شلونك مهيب

مهيب .. سالي

سالي .. اي سالي بشحمها ولحمها

مهيب .. وين جنتي شلون اجيتي

سالي .. نحجي هنا

مهيب .. لا لا العفو بس ماعرف اتصرف من الصدمة حياكم الله تفضلو

سالي .. دخلنا اني وصكر ودخلني فورا عالبيت وراح ويا صكر عالاستقبال دخلت للمطبخ جان فارغ كملت طريقي للصالة واحس جسمي كلو يرجف

اول ما دخلت جانت كاعدة زينا وعمتها ووياهن لينا من شافني انصدمن صدمة عمرهن وصارن يتراكضن علي واول ما حضنني انفجرن بالبجي

وسمعت منهن انو الحجية ام علي متوفية بعد زواج لينا بفترة لذلك انقطعت اخبارهم وهن ما يعرفن مهدي لذلك ما جان عندهن اي دليل يبحثن عن طريقو

هواي تأثرت بوفاة الحجية وبجيت عليها بكد ما بجيت على ماما من سمعت انها متوفية بس ماكول غير الله يرحمها ويغفرلها ويجمعنا بيها بالجنة

لينا صايرلها ولدين وبنت وزينا ولدين وبنتين والحمدلله حياتهن هادئة وما بيها اي مشاكل بقيت يمهن ذاك اليوم للعصر وبعدها رجعنا للبيت

حجن وياي علمود الورث ورفضت رفض قاطع لان صكر نبهني انو ما اخذ دينار واحد من الورث وبدون ما هو يوصيني اني ما جنت اريد اخذ

عبدالهادي من وصل عمر ال 6 سنين صار يدرس وكل سنة تكون درجاتو كلها 10 و 100 يعني شاطر مثلي وجان كلش ذكي وكل نجاح يحصل هدايا من الكل