ذبيته بسرعة على الميز ودرت عيوني على فراشهه قطعة بيضة موجودة بجانب مخدتهه على السرير، تقربت اجرهه ماعرف ليش تدخلت وليش جريتهه واني منو واكعد ادور بغرفتهه وشلون اجتني الجرأة بس ماعرف سويتهه بعد..

رفعت القطعة البيضة ونشرتهه كدامي واكتشفت هاي فانيلة داخلية رجالية بيهه علامة خضرة من عند الرقبة، توترت وشمرتهه نفس مكانهه من سمعت قفل باب الحمام ينفتح اللتفتت بسرعة عليهه وجفلت من شفتهه واكفة ولافة شعرهه بالمنشفة..

-غدير: شتسوين بغرفتي؟

-اجيت اصيحلج غديره

-ليش چنتي شايله هاي بيدج

تأشر على الفانيلة ابتسمت متوترة شنو اكول تصرفي غلط بس حتى ماعندي مبرر..

-غدير: شتردين مني مريم؟

-ولشي والله بس اجيت اصيحلج

-غدير: اني مو مريضة والله

-ادري حبي ادري

عبس فمهه وعيونهه غركت بالدموع حجت بغصة..

-غدير: اني بس احبه واحب اشم ريحته

ربطت فوراً هاي فانيلة حمزة ماخذتهه، هزيت راسي ساكتة وتوجهت للباب اريد اطلع ووكفني صوتهه يكول..

-غدير: عادي كوليلهم ما يهمني

-مريم: شنو؟

-على السوار والفانيله ما يهمني

-السوار مال سارة هذا مو؟

-اممم

-ليش عندج؟

-ردت اسوي لسارة سحر وبطلت

-شنوو

وجهت عيونهه على الميز المحطوط عليه السوار ورجعت تباوعلي..

-غدير شنو سحر صدك تحجين؟

-اي

-شلون!!

-الموضوع براسي صارله سنين اخططله وكلما اريد ابدي بي اجمد واوكف ماكدر

-انتِ الاخذتي سوار سارة بعرس علي ودعاء؟ شلون سارة ما حست؟

-خرطته من ايدهه من جانت ملتهية ردت انطي لفاهد بس بطلت

-ليش بطلتي

-مادري

تحجي بدون نفس روحهه رايحة كعدت على فراشهه وسردت الاول والتالي يائسة بائسة..







-غدير: ماعرف ليش فاهد هيج يحبهه غريب

-ليش مانطيتي السوار؟

-ما شفته يستحق انطي شي يخص اختي هو يكره حمزة ويحاول يأذي

-ليش تعاونتي وياه من البداية؟

-ما تعاونت ويه احد مالي علاقة بفاهد لا من قريب ولا بعيد بس اعرفه مهووس بأختي وهذا كلشي

-والسحر؟

-ما سويته

-ليش

-مادري

-يمكن لان اقتنعتي لازم تتركيهم يعيشون حياتهم

-لا

-لعد؟

-يوسف مله حياتي مكفيني حبه

-تحبين يوسف ابنهم

-كلش

-غدير صدكيني الله راح يعوضج عن كلشي عشتي لا تفقدين الامل

-ما فاقدة الامل وشكراً لنصيحتج، اخذي السوار وياچ

-والفانيله؟

-لاااا هاي عوفيهه

خزرتني ونترت بوجهي خفت منهه تتغير مية وثمانين درجة ويه العلاج، تركتهه وطلعت من الغرفة بيدي سوار سارة رحت انطي الهه وقبل لا احجي أي شي كالت..

-سارة: چان عند غدير صح؟

-مريم: شمعنه اجت ببالج؟

-سارة: لان هذا السوار هدية من حمزة لخبر حملي بيوسف وتشوف نفسهه اولى بي وهي الي تستحقه

-مكسور گلبي عليهه رغم شكد اذتنه بس سارة محد يستحق يعيش الوحدة

هزت راسهه سارة ساكتة سكتت مثلهه ماعرف شحجي واحد يحير شنو يعبر، اجاني اتصال من امي رحت للاستقبال اسولف وياهه وانصدمت من كالت..

-مرايم روحي شوفي بسملة وين

-مريم: شبيهه بسملة؟؟

-روحي شوفيهه وين مريم اكيد كاعدة تترعن ويه خطيبهه

-ماما خطية خليهم براحتهم اليوم عمة زهراء اصرت تجي تتغده ويانه بسملة

-اي لان عمر رادهه تجي امشييي روحي شوفيهه وين بالخنسة روحي شوفي

-هاي شبيچ ماما صدك جذب ترديني اصير جاسوسة







-امشي مريم لا تشلعين گلبي تره اكول لدعاء بس خاف تفضحنه هاي

-خوش خوش ماشي

-ابقي وياي على الخط وروحي مريم!!

-اي ماما شبيچ

رحت ادور عليهم وكالعادة واكفين بالمطبخ عفية هالمطبخ كله مصايب، وكفت بالباب اباوعلهم من بعيد يسولفون عمر واكف كبالهه وهي منزلة راسهه تلعب بأظافرهه، رحت اريد اعوفهم وتقرب منهه يحاوطهه من خصرهه ابتسمت والضحكة حصرتني لا البيه اعوفهم ولا البيه اضحك..

تركتهم وصعدت لغرفتي طمنت امي كلشي بخير وسديت الموبايل، دكيت على الاطلس ما جاوب رجعت دكيت هم ميجاوب دزيتله رسالة هم ماكو، دكيت على المكتب وجاوبوني بـ رسالة..

"Busy"

ذبيت الموبايل مطنگرة وكعدت وحدي اتصفن شوية واجاني آدم يحوص..

-شبيك ماما

-ادم: غيث غثيث

-مريم: عيب ادم شهالحجي

-ادم: يعيب على اسمييي

صار يعيط ويبجي انصدمت من عصبيته الغريبة كمت عليه اشوف شبي وميخليني اللزمه..

-شبيك ادم حبيبي ماما ولك اوكف شبيك

-يكول عني مااااايئ

-مايئ شنو؟

-هو هو يكول هو

يبجي ويفرك بعيونه مهضوم لزمت ايده اهدأه ويشهگ متت من القهر شنو موصله لهاي الحالة..

-تعال حبيبي اكعد يمي نسولف سوه، يله ماماتي تعال هنا نلعب

مسح عيونه بسرعة وابتسم مدلي ايده حتى اللزمهه كزكزت عليه شلته بسرعة ابوس واجعص بي وادغدغه يضحك وگلبي يضحك وياه..

-ماما ماما ماما ماما ماما

-ها ها ها ها ها

-تعالي اشاورچ تعالي

ضحكت ومديتله اذاني لسانه شطوله همس بأذني واكيد ترسني تفال..

-اني احبج

-واني احبك حبيبي

-لا تعالي بعد شي اكول

-ها كول

بعده ما حاچي ودك الاطلس عليه تركته بسرعة وكمت فتحت الخط بعدني دا احجي وصدمني ادم من كال بعصبية وهو عاكد حاجبه..







-ادم: مرمر مرمرتي گلبي

-مريم: ولكك ابو لساان

فتح عيونه وكال وهو يرفع اكتافه..

-ادم: بااابا يكول اني شعليه

-اني اعلمك انتَ وابوك

-الاطلس: رحم الله والديج

غلست اسوي روحي مادري فاتحة الخط وكملت..

-مريم: ابوك شلع گلبي شلععع

-ادم: وكح زاعلي لو بس اني تزاعليني

-مريم: هو لازم ازاعله

-الاطلس: لا يا ابن الكلب

-مريم: تعال ماما معلينه بأبوك ما راح نجاوبه خلينه نتونس سوه

-ادم: اي اي راح اجيب كرزات

-مريم: شتسوي بيهن؟

-ادم: حتى نتونس مو كلتي انتِ

-مريم: وابوك؟

-ادم: مو زاعلتي ماما

-الاطلس: واني اكول منو ينحشهه عليه طلع هذا السربـ*** السبب انعل ابوك لابو الجابك

-مريم: ادددددم

-ادم: ها

-صيح نانا هم والبنات حتى نتونس كلنه سوه

-ادم: ونعصب بابا؟

-الاطلس: تفيييي عليك ابن المطي هو صوچي اسافر واعوف امك وياك

-مريم: لا ماما عيب تحجي على ابوك

-ادم: بس هو يزعلچ يخليچ تبچين قبل لا تنامين

-الاطلس: ايا چذاااب هاي شوكت خليني ارجع ادم والعباس الا اشلع اذاناتك

-مريم: صدك يبچيني؟

-ادم: اي اني اتذكر

-مريم: شوكت صارت؟

-ادم: جنت نايم يمج ماما شبيچ تنسين

-مريم: ولك ماتذكر شو تعال شنو چنت لابسة بوقتهه؟

-ادم: امممم يمكن الدشادشة الحمرة هاي البيهه ورد ابيض

-الاطلس: ابن النععااال حتى اللبس يتذكره ولج مريمممم

-مريم: يااا اي صدك تذكرت بس عيب ابني شنو هالحجي ميصير تسولف هالشكل

تخصر ووكف كدامي عاكد حاجبه ومعصب..







-ادم: بس بابا عادي من يزعلج مووووو

-الاطلس: عار ابن عار حفيد عار شكول عليك

راح انفجر من الضحك ماتحملت وغلقت التلفون كوة لزمت روحي ما اضحك حتى ارزل ادم هاي مو اول مرة يسويهه ينحشني على ابوه تصرفاته متعجبني من يسويهه شكد يحب ابوه بس يغار منه عليه..

-ادم: بعد ماعيدهه

-اذا عدتهه ازعل عليك واكول لأبوك ادم ميحبك

-ادم: لا لا احبه والله احبه اكثر منج

-شنووو ولكككك

-لا احبه احبكم انتو الثنين

-تحب منو اكثر اني لو بابا؟

حط اصبعه بحلگه ويدور بعيونه الحلوة المكان برطم شفايفه وكال بحيرة ممزوجة بالجدية..

-احب نانا..

كالهه وفلت ينزل جوه رحت وراه اركض وشفته يروح لـ نانا يحضنهه ويكعد بحضنهه سويتله بيدي اني اعلمك ابتسملي واشر على نانا يكول..

-ادم: نانا ما تخليچ

-بلقيس: شنو ماخليهه؟ ولج مرايم شبيچ ويه وليدي الحلو

-مريم: كلشي مابيه ناناا ووليدج الحلو اليوم مينام ويايه بالغرفة اخذي يمج

طفر من حضنهه حاير عيونه مدمعة واجاني حضن رجليه ورفع راسه وكال بطفولية..

-يمج انام

-ماكو يمي مو تحب نانا اكثر

رجع يباوع لـ نانا محتار ميتات ضحك عليه احنه وانضمت ويانه خالة حصة تتفرج علينه واحنه نداهره..

-نانا: تحبني اني لو مريم اكثر؟

-ادم: ثنينكم

-نانا: لا لازم وحدة

-ادم: انتِ ومريم

-مريم: لازم وحدة اختار

-حصة: وااااي شفيكم على الصبي عذبتو حاله

-نانا: لا اوكفي حصة يله ادم جاوب

-ادم: اني.. اني احبكم كلكم

-نانا: لا لا ميصير وحدة بس

-حصة: گطيعة شفيچ بلقيس وانا ويني ليش مو معاكم ادم اختار تحبني انا لو بلقيس لو مريم يلاا







-نانا: هاي شبيچ حصة دوختو الولد

-مريم: اتفق خالة ليش هيج تضغطين عليه

-حصة: هاااااو انا شعلي

ماقبل يجاوب عافنه وراح مطنگر للحديقة محد يمل وهو يلعب هاللعبة وياه وكل البيت يحبه ومتعلق بي بسبب لسانه وسوالفه..

رجعت لغرفتي اخذت موبايلي وتذكرت طفيته، فتحته وانتظرته يضوي ودخلت عليه دعاء منفسة ذبت روحهه على السرير ونفخت بقوة..

-شبيچ دعيوة

-دعاء: راح يجلطني هالرجال راح انجلط

-شمسوي؟

-دعاء: مريم اني حامل

-مريم: شنوووو

-اي حامل لج حامل خررب بعدهه زوزة عمرهه كم شهر شبسااع

-مريم: وشبيج انتِ ثولة

-دعاء: لا تره مو اني السبب على كيفج ويايه عيني باعي اني متعودة كل يوم اخذ......

-سارة: عجيببببب

-مريم: يا ستار شبيجن ولجن

دخلت سارة بدون لا تدك الباب الحاجب معكود وراح تنفجر كعدت على الچرباية وتربعت، نفخت هوا ووخرت الكذلة من وجهها..

-مريم: اي سولفي خية سولفي شبيچ انتِ الثانية

-سارة: بكلشي حاطة روحهه تره طكت روحي مريم لشوكت ابقى عايشة بهاللعبان نفس!!

-دعاء: اكيد غدير وياچ مو

-سارة: مستحوذة على ابني ماكدر اشوفه ممنوع اللمسه نومة لازم يمهه اكله لازم يمهه كلشي يمهه كلشيي ومن اكول لحمزة اريد ابني يكول خطية سارة عوفي ويه غدير

-مريم: وانتِ ضايجة لان يوسف مو يمچ لو لان حمزة يريده يربى عند غدير؟

-سارة: الثنين مريم تره اني مو بس لعابة وكاعدة عنده يتفرج عليه شوكت ميريد ويبوسني شوكت ميريد ويحضني ويشمشم بيه تره اني بني ادم!! اني ام!! اريد ابني اريد اربي واشبع منه مو نحاسة بس اريد ابني ولجن حتى دينساني ويستغرب مني غدير تزرع بعقله افكار غريبة

-دعاء: يستغرب منج شنو تره ابنج جبير ويعرف انتِ امه

-سارة: يا ولج هي تكوله اني امك سارة معليهه اني جبتك تأشرله على صرتهه وتكوله منا جابوك شگوهه وطلعوك مني

شهكت متفاجأة دا اجاوبهه واندكت الباب سمحتلهن بالدخول واجن الثلاثي المرح..







-اسيل: صرصور جيبيلي مي

-رقية: مو چنه جوه سوه

-اسيل: عطشت من صعدنه شبيچ

-رقية: وانتِ ماعندج رجلين؟

-اسيل: مو حامل اخاف على الببو

-سارة: رقية ولي جيبيلهه مي مالنه خلگ

-رقية: شنو هاي خدامة الكم خدااامة

-اسيل: كعدي ماريد، مريم دعاء شوفن اختچن عجزت واني افهم شبيهه ضايجة

-مريم: شبيچ بسملة شصاير ليش ضايجة؟

-بسملة: مابيه شي بنات

-سارة: لا مبين بيج عموري ضوجچ بشي؟

-بسملة: لا

-رقية: لعد منين المشكلة؟

-دعاء: يمكن زعلانة من سكرتيرة عمر المايعة مو؟

-بسملة: لا بنات ماكو شي

-مريم: على طاري المياعة اسيل ليش ابنج يصيح لابني "المايع"؟!!

-اسيل: شنو يعني مايئ؟

-رقية: تره اسيل متعرف لهاي المصطلحات مو زين من تحجي عراقي، لازم متعلمهه من مسلم هذا المسلوع غيث

-اسيل: اي شنو معناهه؟

-مريم: كلمة معناهه مو حلو تنگال للولد خطية كسر بخاطره منين متعلمهه غيث

-اسيل: والله علمي علمج هذا مسلم يومية مكعد الولد يسولف وياه ويعلمه على سوالفه المكسرة

-سارة: وانتِ يالفاهية ليش تقبلين؟

-اسيل: عمي يريده يربى مثل تربيتهم حسرة عليه افك حلگي

-رقية: اوووع هذا العجوز بعده

-سارة: صاير اتعس حبي

-مريم: خطية وليدي زعلان ومهضوم ليش شبي اسم ادم عليجن الله شنو الاسم مال مايعين كولن الصراحة؟

-دعاء: لا حلو لطيف

-اسيل: الغريب بالموضوع ليش غيرتوا الاسم بآخر لحظة مريم؟

-بسملة: فاتتچ ولادة مريم اسيل شجاچ وسافرتي

-اسيل: واللهِ متندمة لليوم بلقيسه تحجي بولادة مريم

ضحكت ضحكة عالية وغطيت وجهي استرجع يوم ولادتي بـ ادم حرفياً يوم مينسي ولا يروح من البال..







رجع بيه الزمن لـ قبل اربع سنوات وثمانية اشهر اجه آدم للدنيا، چنت انتظر يوم ولادتي دقيقة دقيقة الاطلس مكابلني وكاعد ميخليني حتى امشي على رجليه يشيلني ويفتر بيه ونانا تصيح..

-نانا: ماما ما يصير لازم تمشي شلون راح يجيهه الطلق اذا هي كاعدة وساكتة

-مريم: نانا ماكدر امشي باعيلي مورمة

جاوبتهه واني اكل باللفة، درت عيوني على الاطلس ساكت باله سارح ماعرف بشنو يفكر ربتت على كتفه وهمستله..

-اخذني للغرفة طوطي

هز راسه ساكت واخذني للغرفة نيمني على الفراش وگام يريد يبتعد عني، سحبته من ياخته وكعدت عدل مستغربة..

-اطلس شبيك؟

-الاطلس: مابيه شي

-مو على بعضك صاير شي؟

-لا ماكو شي بس تعبان كلش

شلت هم وكلت بگلبي الا الچان راح تجيله النوبة بس ليش تزوره وقبل اسبوعين اجت؟

-النوبة راح تزورك اطلوس؟

-لا، نامي حبيبي اني عندي شغل مهم

-يااااااا

-ها

-وين تروح وين اطلس راح اجيب تدري

-صدك؟؟؟؟

-احم اي بس قبلهه لازم تسولفلي شبيك

-راح تجيبين مريم؟؟؟

-اي اوكف بس لحظة شوية ينرادلي بعد

-طبخة وينرادلج بعد شوية مرمر لا تلعبين بأعصابي!

-هسة شبيك دسولف يا عيني

-خسرنه مشروع مهم كلش اليوم ومتضايق بسببه

-يااااا شجاكم

-بعد صارت

-ياااااا شجاكم غير تنتبهون

-شسوي بعد كلمن ياكل رزقه

-شجاكم اطلس والله حرامات

-اي والله

-اكيد يسوه ملايين شجاكم

-اي صح

-تؤ والله ضجت متكولي شجاكم

-دكااافي افتهمناا الا تفحطينه وتزوديهه عليه

-هاي شبيك تعيط بوجهي شجاك







-من وراج مريم اني طايح حظي وانتِ گضيتيهه عليه شجاك وشجاك

-اسفة بس هاي اثار الولادة

-صدك؟؟؟

-اي چنهه يمكن اجيب اليوم

-مريم اذا ما جبتي اليوم والعباس اشك بطنج واطلع حمزة

-هاي شبيك شجاك

-نامي نااامي

يغطي بوجهي بالمخدة وينومني متت ضحك صايرة فد تافهه وسخيفة ماعرف شبيه يمكن اثار ولادة، نام بصفي يمسح على ظهري ويدلكه بأيده يخفف من اوجاعي اللتفتت عليه وابتسمت..

-شكراً حبيبي

-تدلل مرمرتي

-كلش دا اتوجع تدري؟

-ادري حبيبتي الله يساعدج

-عود ليش مو انتو تحملون؟

-مادري حبي بعد ارادة الله

-هو انتو الزلم بس ضيم نشوف منكم گبررر

-شنوووو

-هاي اثار حمل اطلس احسني جاي امسلت هواي

-صح كلش هواي

-اطلس احس راح اجيب

-جيبي ولج بس جيبي مو فحطتينا

-وانتَ شعليك تفحط تره اني الحامل!

-انتِ الحامل واني الماكلهه

-نعم؟؟؟؟ لا لا لا خو ماكو شي شو مسوي عليه منيه هاي لان تفركلي ظهري كل يوم بالليل وتسويلي عشه وتشيلني وتفتر من اريد اتحرك؟؟ قحطططط

-لا حبي ابد

-لا لا جاوبني قحططططط

-صح قحط

-اي مو اكول هه عشتو عود مسوي عليه فضل هسة هو هه هه

-هه هه نامي مريم

-اكلك شو انتَ صاير هواي تتأمر ممنتبه لروحك؟؟؟

-مريم

-ها

-خلصنه اشهر الهرمونات فـ انچبي ونامي

-فوكاهه تتجاوز عليه؟ والله فلا انام يمك بعد اصلاً ما اجيك ولا اوصلك ولا اخليك تشوف حمزة العنوني اضمه وما انطي الك







-ليش تبجين مريم؟

-اسكت عني اطلس احسني موجوعة

-من شنو عيوني شبيچ جاي اشاقيچ يا حبيبتي

-مادري احس وجع وجع وجع

-قوي؟

-لا يعني هيج مادري

-اخذج للدكتور حبيبتي؟ كولي احجي لا تبجين ولج

-اريد اروح للحمام اخذني

-يله

كام بسرعة يريد ياخذني للحمام وحسيت بشي غريب كأني تدررت على الفراش، فكيت عيوني وهو وياي حتى نسيت الوجع الدا احس بي واحد صفن على الثاني..

-مريم: والعبااااس ما سويتهه على نفسي

-الاطلس: مريم شجاچ

-مريم: والله العظيم شالني الله وسطرني لو سويتهه ما سويت ما سويييت

-شجاچ يا حبيبتي

-اطلسس اخخ احس وجع

-ديلا يلا ميخالف عود تغير الموضوع اسوي روحي ما شفت

-ولك اطلللس وجعععع

-خلص حبي نسيت السالفة لا تلحين

-ولك عمت عيناااااييي وجعععع اااااخخخ

-صدك جذب شجاچ مرمر

گرصته بأيده حيل شعوطت روحه فتح عيونه مصدوم من غمضت عيوني بقوة احس روحي تريد تطلع راح اموت، انخبص بيه خبص صار يركض منا ومناك بالغرفة واني اعيط، يروح ويجي يروح ويجي يروح ويجي واني اعيط واملخ بروحي..

-اخذني للمستشفااااااا

-شلووون ويننن يا مستشفى؟؟؟

-يبوووووو على عمررررري

اضحك وابجي بنفس الوقت ماعرف شسوي بسبب وضعه ميعرف شيسوي كام يفتح الكنتور ويسده يروح للحمام ويرجع، طلعلي شال وشمره على وجهي وصاح..

-لبسي بسااااع

-مااااكدر متوجعة يمممماااا

عافني وراح يركض بره فكيت حلگي ما مصدكة هذا وين راح عزه بعيني صخام ولطام بوجهج يمريم راح تموتين ورجلج الفاهي يطارد هنا وهناك..

-ولكككك طااااااسةةةة

رجع ويه نانا المخبوصة وبعيونهه النوم اجولي ثنينهم تكابلو عليه ونانا تكول لازم ناخذهه للمستشفى الطفل راح يجي..







-الاطلس: يله نانا يللله شيليهه واني اجيب السيارة

-نانا: ولك وييين شلون اشيلهه انيي

-الاطلس: وخري شكد فاهية

دفعهه ونانا صافنة وتضحك عليه، شالني ياخذني للسيارة هدأت شوية دقايق ورجع عندي الوجع، وصلنه للمستشفى وشفت الامة العربية مگلوبة الكل موجود ماهتميت لشي روحي رايحة ممرودة مرد بس اريد اخلص..

ماتذكر شسويت بعد من اكشن خواتي سولفولي، يكولن لزمتي اطلس وطيحتي حظه بالغلط والسب لزمت ايده وملختهه بالعض والخراميش واعيط..

-يبووووووو عليج يمريم يبوووو كله من وراك اطللللس الله يااااخذك واخلص منك ابو ريحححة

-عمر: ميخالف خوية ميخالف تحمل

-حمزة: كلنه عشنه هذا الشعور الخايس ميخالف

-مريم: راح اموووووووت اريد اميييييي وينج ماما عمت عينيييي سودة بوجهههي باليوم الكتلت روحي على المحيططط وردته

لحدما دخلوني الغرفة اني اشيل روحي وارگعهه كمت اللطم وابجي وافرفح بألف واه ويلاه ياله جبت بالسلامة اخيرراً ونور وليدي الحلو للدنيا..

شعور ما اجمله من شعور، احساس اشبه بالفراشات تدغدغ قلبي من حطو على صدري، ملاك شديد البياض بشعر اسود كثيف نايم على صدري ويبجي بجيت لحدما شبعت ضحكت من گلبي من شفت هذا النتفه والسواه بيه..

شوية ودخل الاطلس عندي دخل عليه والدموع كامت تنزل سيل من عيونه اني شفته هيج وگابلته ابچي وياه، حط راسه على صدري يبجي ويحضن بيه ويحمد الله على سلامتي ويعتذرلي على تصرفاته قبل شوية..

وخر وجهه من صدري ومسح عيونه باس راسي وخدودي مسح على شعري بهدوء، استحيت من نظراته وكسرت عيوني عنه من دخلت الممرضة وبيدهه الطفل..

-مريم: متريد تشوف حمزاوي؟

هز راسه متلهف وفرحاان كلش فرحان طاير والدنيا ما سايعته اخذ الطفل من الممرضة يبوس بي ويقربه من صدره يباوعله ويخطف نظرات الي..

-الاطلس: ابيض ثلج وليدي

-عليه طالع عيني

-طبعاً عليج چا عليه الاچلح

ضحكت بصوت عالي رغم وجعي بس نسيت كلشي بوجودهم، الاحبهم يمي وبخير احس بسعادة مالهه حدود..

-اسيل: اووي يا عمري حتى عيونج دمعو

رجعت للواقع ومسحت عيوني ابتسمت انعاد عندي الشعور اول مرة شفت بي ابني، حسيت على دعاء وهي تكول بضحكة كلش عالية..







-دعاء: ماكو فلم احلى من فلم اطلس ونانا وهمه يختارون الاسم يابة شسووا

-مريم: اني مادري بشي انتو سولفتولي بوكتهه

-رقية: لسه اتذكر من كالو لاطلس مرايم ولدت اووف شسوه كام يبجي ويضحك ما مصدك كل الولد باركوله واكيد عمر ما خلاه بحاله كام يطك اصبع بالخنسة ويهزله رگبة يگله..

-عمر: لك هلاا بأبو حميزة بعد شيخلصنه منه هذا الخايس صار ابو وراح يكوم يفيك بروسنه

-علي: الف مبروك خوية يتربى بعزكم ودلالكم

-حمزة: ابو حمزة الغالي الف مبروك

باركوله وسلمو عليه وتحاضنو وكلشي حلو وتمام قبل لا تطلع نانا وهي حاطة ايدهه جوه حنچهه صافنة عليهم..

-نانا: حمزة منو؟ حمزة شنو؟ حمزة وين؟؟

-الاطلس: ابني اسمه حمزة نانا

-نانا: لا صدك تريد تسمي الولد حمزة؟؟

-الاطلس: اي طبعاً

-نانا: لو تموووووت حصة سمعي ابنج

-حصة: واااي حااامض على بوزك حمزة شنووو

-نانا: تسمو ادم ماكو غيره

-الاطلس: ادم شنو؟؟ ابني انييي اسمي ادم؟؟؟!

-نانا: اي نعم شنو رأيج حصة حلو مو؟

-حصة: يهههبل

-محمد: حلو ادم حبيته

-عمر بهمسة: هه حبيته لو حبيت بيبيته

-حمزة: حبه على حب بيبيته ميخالف ميخالف

-علي: ادم الفااهي هه هه يطلع زاهي هه هه

-عمر: ادم المكتول هه هه طول عمره منتول هه هه

-حمزة: ادم الاطلس لا لا ما حبيت كلش سمپل

-مسلم: ادم؟ هههههههههههههههه شتحسوون لخاطر الكعبة

-سارة: تره اسم نبي شلون تستهزأون هيج انتو

-الاطلس: لا اكيد ما نستهزأ بأسم النبي بس ما يرهم لابني يسمو ادم يابة اسمه حمزة وانتهى ما يصير تغيرون بكيفكم

-نانا: ادم يعني ادم!

-علي: لازم ادم چان حب حياتچ نانا

-محمد: شنو؟؟ منو حب حياتهه؟!!

-نانا: افففف







-الاطلس: اني مسمي حمزة حتى قبل لا ينولد

-نانا: ادمممم كلت اطلس وبلا عناد

-الاطلس: تره اني الحملت بي تسع اشهههر مو انتِ

-علي: شني

-عمر: عقلي صار ايررور

-الاطلس: اقصد اني التحملت امه تسع اشهر چا هذا مو بالحسبان!

-رقية: الا اكول لمريم هيج كلت

-الاطلس: لا ولج مو هيج اقصد بالعكس بعيوني ام حمزة احطهه

-علي: هههههههاااي صاگرته

-عمر: وانتَ حبيبي عليوي شنو ملاحظاتك على دعاء؟

-علي: شنو اني شعليه اصلاً ليش يكون عندي ملاحظات عليهه بالعكس اكو احسن من دعاء زوجة ونعم الزوجة اي وعلي

-سارة: وليش هيج متوتر؟

-عمر: جيد وبعد شنو خليني اسجل چان متوتر من يحجي

-علي: اكلو نععل شنو متوتر وليش اتوتر؟؟

-حمزة: ولك هاي المن توكل نعل؟؟!

-علي: لعمر لعمر وعلي لعمر

-عمر: اممم جيد ويوكلني نعل لانه متوتر خوش ملاحظات انطيتني اشكر جهودك

-علي: عمييير اكل خـ.........

-الاطلس: خلص انچبو خلوني حاير بأسم ابني ورضا امي

-نانا: رضا امك اكيد لازم تدوره

-الاطلس: نانا هذا اول ولد عندي بداعة كل عزيز عندج الثاني سمي ادم والثالث نوح

-نانا: حضرتك تستهزأ!!

-الاطلس: ابد حشى ولا استهزأ هذا هو الثاني ادم والثالث نوح اتفقنا هاا شباب انتو شهود هنا مو؟؟

-حمزة: سمي ادم اطلس حلو شبيك

-نانا: لا يمة سمي الي يعجبك اشاقيك

-الاطلس: نانا

-نانا: اتشاقى وياك حبيبي وليدي الحلو يله روح شوف حمزاوي وامه

ظل حاير ويتصفن ميعرف شيسوي نانا اصرت ان يسمي حمزة وعود چانت تتشاقى وياه بس مبين عليهه تريده ادم وبنفسهه الاسم تركهه ودخل لغرفة مريم شوية وطلع كال يروح يسوي اوراق الخروجية..

طلعنه من المستشفى وتوجهنه لبيتهم واكيد ابوية سوه وليمة غداء وذبح ذبايح على ولادة الوريث الجديد والصدمة هي من سماه الاطلس "آدم" وهيج صار الكل ينتظر الموسيو الصغير "آدم" يكبر ويستلم مكان ابوه..







-سارة: just like a fairy tale

-دعاء: هم رطنت علينه انكليزي اكلج حبي تره اني بعدني ثولة وكلشي ماعرف

-مريم: ما انسى من اطلس اجاني خجلان يريدنه نغير اسمه لـ آدم بس لان نانا تحب هالاسم عباله راح اعارض واعصب بس بالعكس حبيته اكثر

سولفنه شوية وتفرقنه بسملة بقت ضايجة ماعرفنه السبب شنو شكد بقينه نحاول وياهه بس خلص طنكرت شيفكهه بعد رجعت للدار واني نزلت لـ نانا اسوي وياهه عصرونية وانتظر استاذ اطلس يحن علينه ويتصل..

-نانا: شبيچ مطنكرة مرايم؟

-مريم: من وره الاستاذ طبعاً

-نانا: سولفي كولي شبي

-ماعندي سوالف بس مليت كلش احس بوحشة

-ميخالف امي تحملي هذا شغـ....

سكتت من دخل عمو محمد للمطبخ تقرب من الطاولة الي دنشتغل عليهه ووكف ينقر بأصبعه على الكرسي..

-محمد: بلقيس يمنه اليوم

-نانا: اجيت اعاون حصة

-محمد: بخصوص؟

-نانا: تريد تغير اثاث البيت وطلبت رأيي

تحجي وياه ومنزلة عيونهه تلف بالمعجنات بينما هو عيونه اكلتهه اكل ما شالهم واتوقع حتى ما رمش..

-مريم: من رخصتكم

-نانا: مرايم شوفي الفرن لا تروحين

هزيت راسي اي وكمت للفرن بعدني هستوني واكفة واجه عمو محمد وبسرعة كعد بمكاني واخذ التمر الي چنت افلسه وكمل يشتغل بدالي..

ابتسمت واني اسمعه يبسبس وياهه يمكن عبالهم ديتهامسون بس الصوت واصلني اسمعه يغازلهه وهي تجاوبه ببرود بينما هو محترگ على نظرة منهه..

-محمد: شميت ريحتح من باب البيت ورجليه جابتني للمطبخ اجيت امشي على دگات گلبي

-بلقيس: شدعوة

-محمد: واكثر، مشتاقلچ بلقيستي ليش كل هالبعد ليش تعذبيني

-بلقيس: محمد مو وكتهه

-چا شوكت وكتهه؟ ابقي اليوم لا تروحين

-اكيد تمزح؟

-بداعة اطلس تبقين بلقيس گلبي يريدج مشتاقلج محتاجچ لا تكسريني

-محمد

-عيونه وروحه وراحته واميرته وسلطانة گلبه

-محمد كافي لا تسمع مريم

-خلي الكل يسمع ما يهمني راح تبقين بلقيس؟؟ تبقين مو؟ عليج الله بداعة ابنج بداعة ادم ابقي بس اليوم

-ما اكدر محمد ما اكدر اطلس يزعل

-ما يصير شي مو زين انتِ تنامين بغرفة واني بغرفة بس نسهر ويه بعض سوالف بس

-ماكدر ماكدر

-اني احجي ويه الاطلس؟ هاا شگلتي؟

-محمد صوتك الله يخليك لا تفضحنه

اسمعهم وكاتمة الضحكة لزكت يم الفرن لا البيه اطلع ولا البيه ابقى واكفة، بقى يحجي وياهه هوايه ويتوسل بيهه اسمع نبرتهه الخجولة وهي بهالعمر تستحي من عنده وتتوتر اعرفهه تحبه وتنخبص من تشوفه بس تحارب حبهه ومتقبل تميل..

اخيراً اتفقو عمو يتصل بالاطلس ويطلب اذنه نانا تبقى واكيد راح يجي يتوسط عندي حتى اقنعه وصار مثل ميردون بدون لا احتاج اقنع الاطلس قبل من وحده بعدما نانا حچت وياه..

يمكن ما اشوف ضحكة وسعادة عمو محمد بس من يكون ويه بلقيسته، يتغير مية وثمانين درجة يتحول لطفل يداهر ويضحك ويشاقيهه بعيوني اشوفه كل شوية جارهه بمكان ويحارشهه..

اوقات اصفن على قابلية خالة حصة وشلون گلبهه متحمل واعجز افهم وجهة نظرهه بس هي متفهمة هي الزوجة الثانية وبلقيس حب حياته..

**

"بسملة"
رجعت للدار تعبانة كلش دخلت للحمام اسبح وذبيت ملابسي بالكاع ممهتمة، صفيت وحدي بالغرفة وره ما تخرجت فاتن قسمهه يختلف عني وتخرجهه صار قبلي..

طلعت من الحمام بدلت ملابسي وتركت شعري على اكتافي بدون لا امشط، رفعت ايدي اليمنى وركزت انظاري على حلقتي اخذتلي صفنة مرتبة عليهه وابتسمت مقهورة..

كعدت على حيلي اهدأ من نفسي واقنع روحي ميخالف ما صار شي عادي صارلنه فترة قليلة مخطوبين نتعود على بعض من خلال الايام..

ذبيت نفس مخنوكة ماتحملت ما ابجي شكد حاولت اسكت بس ماكو عيوني انفتحن گبر اني تاليتي تهمني هاي الشغلات وابجي عليهه جنت اعيب على مريم ودعاء ونور واكول غبيات وتافهات طلعت اتفه منهن..

شتت بكائي وقاطعه صوت طرق الباب، كمت لبست شال على راسي ووكفت وره الباب اصيح..

-منو؟؟؟

رجعت اندكت بطريقة اقوى قلقت وخفت افتحهه بس بعدين تذكرت اني كاعدة بدار وعدنه حرس بالباب..







فتحت الباب على كيف ومديت بس راسي وچان اشوفه واگف بالباب وبيده بوكيه ورد احمر چبير ياخذ العقل، شهگت ما مصدكة عيوني ولا مصدكة وجوده، رجعت لوعيي من دفع الباب بخفة ودخل مبتسم..

-كل عام وانتِ الخير بسمتي

-ما نسيت؟؟؟؟

-عمر: شلون انسى وتاريخ ميلادج داگه وشم على صدري

-چذاب

-صح جاي اجذب

-مو اكول متطلع منك تدكلي وشم

-مو ما احب الوشم

-ليش تجذب؟

-صح جاي اجذب

-عندك وشم برجلك اليسره

-وهيج مركزة برجلي اليسره انتِ؟

-اطلع بره

-ما اطلع وعلي

-تطلع عمر اني زعلانة عليك

-ليش ولج شصخمت

-هيج اني بس زعلانة احس مادري شعور يلعب النفس

-معقولة بسبب الورد؟ يمكن عندج حساسية منه

مجاوبته ورحت اكعد على الفراش راح اموت من الفرحة بس كالعادة الغبارة تشتغل عندي من اشوفه واكوم اچفص واللوص..

-عمر: ما جنت اعرف وجودي هيج يزعجچ اني اسف

-كلش يزعجني

-اعتذر اني رايح اعوفچ براحتج

-ليييش

-مو ما ترديني

-اي ماريدك

-خوش يله مع السلامة قفلي الباب ولا تفتحيهه لاحد عود

-اممم

-هاج هاي هديتج هم واسفين آنستي ضوجناچ

-عمر

-نعم

-طلگني

-بسملة

-ها

-انتِ طالقة

-اني طالقة شنو؟؟

-اي مو كلتي طلگني

-وتطلگ بهالسهولة؟؟؟

كمت اوكف بوجهه مخصرة باوع بعيوني وضحك..







-اي چا مو ترديني اطلگچ والله حرت وياچ

-امدانيي الف مرة خوش مو عيد ميلاد عزه صار عليه گبر لفنيي

-ولفني وياچ، ولفنه بفد گبر ونظل نتسامر سويه

ضحك وهو يكولهه وحاوط خصري بيده درت وجهي اضم ضحكتي عود بعدني ضايجة بس مستحيل يخليني اذا ميذبله قنبلة يخليني افطس..

-عمر: شحسيت من كلت طالقة؟ اكلج خاف انحسبت وتطلگنه

-يمكن انحسبت

-صدك تحجين؟

-اي يجوز عزه بعيني طلگتني عميرران!

-انشگيت شگ ياله اخذتج تالي اطلگج بهالبساطة شنو هالغباء كله من وراج طاح حظج

-اهوو شعليه اني عمر شعليه انتَ كلت انتِ طالقة بس احس متنحسب

-راح نغلس يله يله غلسي

-شلووون حرام ميصير وخر لازم اللبس منك حجاب

-اشگه والله بسملة لا تكرهيني الدنيا

-ونحصل حرام من وره تهورك؟

-برگبتي معليج

سكتت بدون لا اطولهه نزلت راسي كلش مستحية من لا سبب بس اتوتر من وجوده واكوم امعلس بالحجي والافعال، شد على خصري بقوة وقرب وجهي من وجهه بلعت ريك منزلة عيوني تنفسي زاد من حسيت بأنفاسه تضرب خدودي..

-بسملة

-همم

-باعيلي

-اكلك

-كولي

-لا بطلت ماكول

-رفعي عيونج

-ماكدر خرب وخر عمر حباب

دفعته مني ارجف رحت اوكف بزاوية الغرفة اهفي وجهي وامثل اني بخير، ضحك من گلبه وكال بطريقة مشاكسة كالعادة..

-بعدج ما تعودتي عليه وتستحين؟

-ما استحي تره اني

-ادري بيج

يحجي ويتقدم عليه توترت ورحت احول مكاني كعدت على السرير وسويت روحي طبيعية حطيت رجل على رجل وعدلت شعري المنفوش..

اجه كعد بصفي ومد ايده يتمطى درت وجهي اباوعله وبحركة سريعة لزمني وقضى عليه، معت سحت تسرسحت سلمتهه لا عاندت ولا رافست ولا فكيت حلگي وحچيت..







ابتعد عني يمسح على خدودي ويوخر شعري من وجهي باس خدي بقوة وكام يوكف يعدل سترته..

انتبهت لروحي وشفت كتفي طالع عدلت القميص بسرعة وكلت وبعدني ارجف..

-بسملة: قليل ادب

-اي ادري

-متستحي

-حقچ

-عيب عليك عيب!!

-اي يابة افتهمنه ما تتكرر بعد اسفين بس انتِ هم على كيفچ ويانه شبيچ خربتي عليه

مجاوبته كمت من مكاني ورحت للكنتور اللهي روحي، حسيت بي يوكف ورايه ارتبكت من صار بظهري مباشرة ولف ذراعاته على رقبتي نزلت عيوني اشوف واذا اللگاه ديلبسني كلادة..

دارني عليه ببطئ قابلته بأبتسامة خجولة باس خدي وايدي وحضن كف ايدي بـ كفه وكال بصوت هادئ راخي مليان حنية..

-كل سنة وانتِ حبيبتي وصديقتي وشريكة عمري واجمل شي صار بحياتي بسملة

-عمر

-عيوني

-راح اكول شي بس لا تعيب عليه حباب

-كولي

-احبك هوايه

زادت ابتسامته وحضني لصدره بقوة باس راسي وخدودي احمريت واصفريت من الخجل انخبص وياه مستسلمة لحبي..

-واني عاشگچ بسملة مو اليوم ولا البارحة من اربعة سنوات

-عبالي نسيت عيد ميلادي اليوم

-ما نسيت وادري بيج ضايجة لان محد ذكرچ اليوم ومحد عايدچ بس جانت وصية مني ردت افاجأچ واجيچ هنا نحتفل وحدنه بدون ازعاج من احد وتلطلط علي وتنمر حمزة وسخافة مسلم وزواع الاطلس

-ههههههه وشلون دخلت هنا ممنوع رجال يفوت؟

-عانيت صح بس شحلاتهه المعاناة لو الج

-احم ها زين حلو اكلك

-بس سكتي ادري بيج خجلانة لا تچفصين

هزيت راسي ساكتة واجه ببالي سؤال فضولي تافه..

-عمر شخبار صديقكم ظافر؟

عكد حاجبه وعبست ملامحه، گز على اسنانه وجاوب يمثل البرود..

-ليش تسألين عنه؟

-لان استحي اسأل فاتن عنه صراحة خاف تفهمني غلط

-اها؟ واني افهمج غلط عادي؟







-يعني انتَ فهمتني غلط عمير؟

-لو فاهمچ غلط اللزگچ بالگاع بس اعرف فضولچ الخايس

-اخخ با لسانك شطوله

-اخخ يا صلافتچ ووكاحتچ

-ديلا عمر هسة شگلنه دجاوب وين راح الرجال

-تزوج ظافر وسافر لاوربا ويه زوجته وهسة عنده طفل لا لا يجوز حامل بعدهه ما جابت

ضحك فطست ماتحملت اوكف ردت اوكع بالكاع من وره الچذب مالته، اعرف ظافر بعده هنا وبعده يشتغل وياهم بالشركة ولا متزوج ولا ابد اعرف اخباره من فاتن بس غيرة عمر سوته متزوج ومسافر ومرته حامل هم..

-شبيچ تضحكين؟

-سلامتك عموري سلامتك

قضينه الليلة سوه تحشيش وضحك ووناسة، حياتي كلهه تغيرت وره خطوبتي من عمر حسيت الدنيا وردية وكلشي حلو ومثالي صح شخصياتنه تتضارب احياناً بس هو واعي اكثر مني ويتنازل عن هواي امور بس حتى ميسبب مشكلة..

-عمر: اني اروح بعد حبي لا تتصل امج وتعاتبني

-تعاتبك؟

صفن وسوه حركة واحد حاير بوجهه ميل زاوية فمه وفر بيده..

-امي تعاتبك؟

-اي وتحلفني احافظ عليج وماخليج تستهرين

-صدك تحجي عزه امي خزتني عود صدك هيج كلتلك عمر؟؟

-اي شبيچ اتصلي بيهه وتأكدي بنفسج

-استهتر شنو اني شمسوية قابل هاي شبيچ يماااا

-استهتارج بالدراسة وحايرة بالزواج تردين تعرسين اليوم قبل باجر ليش ماعرفج اني

-لاااا انتَ منيلك هالحجي عمررر

-بسملة من الاخير اريد نهاية الشهر نتزوج فهمتي لو لا!

-هاا

-ماكو هاا اريد زواج لا تعلين گلبي

-اي هذا هو صار بس قنع اهلي

-انچبيييي

-هاي شبييك

-هذا الاستهتار التحجي عليه امج انجبي وحطي كتبج ودرسي تخرجي خلينه نتزوج مو عجزناا نريد نلحك نشوف فروخنه نفرح بيهم

-عمر شبيك وياي والله ازعل وانقهر تره

-بسملة شايفة لو اجيتي وگلتي راح أجل سنة بعد ماكو؟؟ اطلگچ وخلينه نشوف يا ابن الكلب يتزوجج







-ديلا طلگ علساس كاتلة روحي عليه اني بعيد ميلادي ويزعلني

-اوووف بسملة المشكلة احبههاا ماكدر ازعلهه

-اي بس زعلت شنو تهددني بالطلاق

-ماقصد وروح ابوي، بس أجلتي فترة من مرضت امج كافي غيرج هالسنة تخرجهن الا انتِ سويتي دراستج ثمان سنين

-سبع سنين عموري

-اني رايح باي

-لا لا اسفة شبيك متتحمل يا عيني

كعد على السرير بصفي معصب كلش ضحكت على وجهه وملامحه العابسة صح اني اجلت سنتين من مرضت امي وكعدت يمهه ما انطاني گلبي اعوفهه..

-عمر: باجر معزومين ببيت خالي محمد

-كل يومية عزيمة شسالفة ماروح عندي امتحان

-ترحين غصباً عليج

-ماروح

-عيب من امي حبيبتي منتظرة جيتچ على نار

-اتصل واعتذر منهه صدگني ماكدر

-عوفي امي واني شنو ما تردين تشوفيني

-مو اليوم تشاوفنه عمير

-اريد كل يوم ماشبع منج، شيصير لو نتزوج ونضرب دراستج بعرض الحايط؟

-ايييي يله

-اااااااخ گلبي

-لا لا اسفة لا ماكو زواج الا اتخرج ماكو

-لا ختولي الدراسة شبيچ اتشاقة وياچ اريد اتزوج اني

-ودراستي عمر لا مستحيل ماقبل

-تكمليهه ببيتنه واني اساعدج عود

-صدك؟

-اي

-يله لعد موافقة

-بسسمممللللة

-لا لا صدك جذب ولك اتشاقة وياك ههه ههه

ضحك من گلبه ولزمني ملخني بالتكرص والعض جعصني جعص وحركاته يتعمد يحرجني ويخجلني ما وخر الا من طردته من الغرفة وقفلت عليه الباب..

ظل يدك هوايه حتى افتحهه واني بس اضحك بسفاهه خفت لا يتهور الزلمة ويسويلنه مصيبة، خنس صوته وره فترة فتحت الباب شفته ماكو رجعت للغرفة وابتسمت من شفت اشعار منه كاتب..







"لو الف باب تقفليهه على روحچ تبقين الي، احبچ موت بسمك اللهم"

نمت والضحكة تارسة وجهي واتلمس القلادة الي لبسهه الي، ثاني يوم مرني للجامعة يباوعلي من بعيد وميجوز من سوالفه يشمرلي بوسة بالهوا عباله محد يشوفه بس صديقاتي عيونهن عليه ويخليهن يطافرن..

اخذني لبيت عيال مريم معزومين على الغده كل يوم عدهم عزيمة عجيبين، الطريق كله يغازلني ويسولف ويايه اباوع لعيونه تلمع حب ولهفة ولازم ايدي بقوة عبالك راح اطير من عنده، يرفعهه بين حينة واخرى يبوسهم بهدوء ويسولفلي على يومه..

وصلنه للبيت نزلت اشوف خواتي تسالمنه وكعدنه نسولف كالعادة بس حسيت دعاء مو على بعضهه ضايجة ومقهورة، سألتهه شبيچ بس تتهرب مريم هم مو على بعضهه قلقت كلش بس محد تحجي شبيهه..

انتبهت على حركة عمر يأشرلي على الاستقبال اروح وراه، كمت بسرعة اشوف شيريد دخلتلهه ظلمة كالعادة فتحت الاضوية وعمر دزلي رسالة عوفيهن مطفيات گلبي رعد بخوف وطفيت الضوه بس ممرتاحة..

رحت اكعد بالركن صايرة ختلة متعودين نكعد هنا ونسولف على راحتنه مننشاف بسهولة، افرك بيدي وگلبي يدك حيل ديصير شي واني ماعرف؟

فزيت على صوت قوي يضرب باب الاستقبال كمت بسرعة من مكاني وشهكت بخنسة من شفت علي ودعاء يدخلون بس مو دخولية عادية جانت دخولية خلتني اللطم بمكاني من الفسوق..

لا البيه احجي ولا البيه ابقى اكمل المشهد الحامي الديصير، فكيت عيوني على وسعهن ودرت وجهي اللطم احاا احوو احوووي شديصير ولك عمررر ليش جبتني هنا..

الغزل والسوالف صارت بفلس هو يعتذر منهه وهي تضحك بغنج من يلاطفهه شديصير ولكم لزكت روحي بالحايط ماريدهم يشوفوني واتفشل اكثر واسمع لسوالفهم..

-علي: اني اسف يروحي مو قصدي

-دعاء: وخر علوش زعلانة عليك اني شلون تعيط بوجهي

ضيكت عيوني ومديتهن اشوف شمصخم هذا ويه اختي! بس من شفت منظرهم رجعت ادور وجهي واللطم..

-علي: حقچ عليه، بس ضجت من گلتي تردين تشتغلين

-اي اريد اشتغل

-صار وتدللين وبعيوني اخذج وارجعج بيدي

-تضحك عليه

-وروح ابوي وتشتغلين وياي بعد شتردين

-علاوي صدك راح تقبل اشتغل؟

-اني ماقبل لان ماريدج تتعبين انتِ حامل وزهورة تتبهذل بس اذا رغبتج تدللين







-لا بطلت ماريد

-هههههههههههه ولج دمرتيني دمار انتِ خرب......

ايععععع يبووو عمر وينك، ثواني وكامو يكعدون سوه يسولفون عادي همزين ارتاحيت، كتبت رسالة بعدني ما دزيتهه لعمر وچفت واحد بالاستقبال شهك شهكة ردت اغيب من الوعي على الفشلة..

طفرو علي ودعاء ثنينهم وعمر يصيح..

-عمر: شنو هااي ايم سوري اسف اعتذر، اكزكيوزز موااا..

-علي: شبيك كاعدين وساكتين ليش محسسني شايف شي

-عمر: احم اي صح اي

-علي: عمرر بس انجب واطلععع

-عمر: بسملة وين؟؟ وخر عن وجهي انتَ

-علي: بسملة؟ مو هنا

صرت ازلغ بخدودي واعضعض بأصابعي لا تفضحني عمر لا تخزيني، بعدهم واكفين ودخلو حمزة وسارة ووياهم مريم، اباوع لدعاء ارتبكت وعلي كام يكمز ويعيط..

-علي: شكوووو امة محمد كلهه اجت شتردووون

-مريم: شنو شبيكم شصاير؟ بسملة وين دا ادور عليهه

-دعاء: مو هنا والله

-حمزة: ليش الكل متوتر صاير شي؟

-علي: والعباس ابو فاضل ماكو شي بس طلعو

-دعاء: احم من رخصتكم

طلعت تركض بره والباقين هم طلعو وعلي راح بقيت وحدي، شوية وطلعت اتراكض لغرفة مريم فوك شفت دعاء كاعدة تسولف وياهه ومنطلقات..

-بسملة: دعاء انتِ ورجلج عميااان؟؟؟

-دعاء: ياا ولج شنو عميان متستحين

سولفتلهن الصار ودعاء فاكة عيونهه حارت شتسوي تنصدم لو تضحك لو تضم وجهها لو تبرر، استلمتهه مريم تنمر وضحك واني وياهه وهي منطلقة تضحك الفطيرة..

-دعاء: بنات عوفوني هسة شلطشتو اوي، يله نطلع نحتفل بعيد ميلاد بسملة

-مريم: دعاااء ليش خربتي الموضوع عمر رادهه مفاجأة

-بسملة: صددددك هيج يريد يسويليي

-دعاء: اي صح

-مريم: اوووف دعاء بعدهه چماله شبيچ مستثولة انتِ

-دعاء: لج حتى اني حاسة على روحي من حملت بزوزة لسه فد ثولة صايرة وغبية الله يساعد علي عليه







-بسملة: ولجن صدك راد يفاجأني يمة بعد عمري حبيبي گلبي فدوووة لوجهه يممممااي

-مريم: وهاي انخطبت واستخفت

ضحكن ويه بعض واني بس اضحك ممصدكة دخلن سارة وبقية البنات واني اوزع ابتسامت لحدما طلعنه واحتفلنه سوه والكشرة ما فارقتني، اباوعله وروحي تغلي فرح وسعادة وحب وعشق..

تقربت مني مرايم وهمستلي بغمزة..

-تحبي بسوم مووو

-بسملة بهمس: احبه واموت عليه من زمان من اول مرة شفته گلبي دگ وحسيت بشعور عجيب توقعته شعور نفور وكره او ضوجة بس بمرور الايام اكتشفت مشاعري مرايم واكتشفت شكد اغار عليه وشكد احترك حرك من يذكرون اسيل كدامه لدرجة اوصل اريد ابجي بكل غباء

-مريم: ليش انتظرتي كل هالسنين تعذبتي وعذبتي وياچ

-لان جنت عبالي كل عقلي راح انساه اضحك على عقلي وگلبي اني نسيته وماحبه بس كلما يذكرون اسمه گلبي يفز واتوتر ههههه طلعت عاشگته للمصلبخ ولج مرايم...

**

"مريم"
اسمع لبسملة الجدية الي جانت تضحك على مشاعر الحب والعشق وتستهزأ بيهن وهسة هي كدامي تنتفض وعيونهه تلمع من تحجي بحبهه وكل لحظة تاخذلهه نظرة لعمر تباوعله وهو نفس الشي ومن تلتقي عيونهم يضحكون لو يغمزلهه..

ابتسمت واني ادور بعيوني بين العشاق حتى عمو محمد ما بطلت عيونه تراقب بلقيس وبقى على امل تحبه بينما خالة حصة متقبلة الفكرة وماشوفهه تغار مثل قبل..

الا اني كاعدة وبصفي ابني ادم شريكي وحبيبي مسافر صارله 37 يوم يتصل مرتين باليوم بس ومشغول بقية اليوم، احس بملل وفراغ عجيب اوقات ادم يمل وهو يسأل على ابوه ويبجي يريده اكعد ابجي وياه وانوح مثل الاطفال..

كملنه الاحتفال البسيط وكالو خلونه نروح لمتنزه نونس الجهال يلعبون، لبينه الفكرة والكبار رجعو للبيت بقينه الشباب، كعدت ادم على المرجوحة واللاعبه اباوع للمكان فارغ نوعاً ما بس احنه وكم عائلة موجودة ايام مدارس ومحد يجي..

-ادم: ماما وينه بابا

-مريم: مسافر بابا حبيبي ان شاء الله كم يوم ويجي

رجع يهذي بأبوه ويباوع لحمزة ومسلم وعلي وهمه يلاعبون اولادهم بس هو ابوه مموجود، انعصر گلبي عليه وحاولت اللاعبه كل الالعاب بس بقى يريد الاطلس..

مليت والحسرة ترست گلبي كعدت على مسطبة واتصلت عليه كام، جاوبني بس مبين عليه كاعد بسيارة سولفت وياه شوية وصورتله ادم وهو يلعب شوية حچينه وراح..







-حمزة: يله بنات راح نرجع

-سارة: ليش بعد وكت الاطفال يلعبون

-حمزة: لا يله عدنه شغل

جان يحجي وعبالك ممرتاح باوعنه وحدة للثانية مستغربات وكمنه كلمن بسيارته صعدنه، اني ويه عمر وبسملة وعمر من اتصال لاتصال ما هد الموبايل..

-مريم: عمر صاير شي؟

-عمر: لا ابد

-بسملة: شبيك متوتر عيني؟

-عمر: شفنه مالك بالحديقة الچنه بيهه

-مريم: مالك شمسون؟!!

-عمر: اي وجان بيده طفل ما شفتو انتو؟

-مريم: لا ما شفته مانتبهت بسملة شفتي انتِ؟

-بسملة: لا، هذا الطفل ابنه؟

-عمر: لا ما متزوج هو

-بسملة: زين عمر ليش متوترين انتو؟

-عمر: ما متوترين بس مانريد نتواجد وياهم بمكان واحد بعد، ماعرف تصادفنه لو همه يعرفون راح نكون بهاي الحديقة بكل الاحوال ما يهمنه نعوف المكان ونطلع

-مريم: بس همه تغيرو صار سنين مندري عنهم شي

ضحك عمر مستهزأ وكمل طريقه لدار بسملة وصلهه واني وداني لبيتنه، تعشينه وگبل سبحت ادم ونيمته واني هم نمت بفراشي انتظرت اطلس يتصل بس ماكو اليوم دكيت عليه ميجاوب انقهرت ونمت..

حسيت على شي يلعب بخشمي يدغدغني احك خشمي متوجعة وبقيت بين النايمة والكاعدة..

-مرمر.. مرمرتي بشبش.. ام العطوب.. ولج مرايم

-دوخرررر

-ام لسان كومي

-دوخر شكد لزكة

-ها هيج صارت مريم هذا استقبالج لـ بعلچ

فتحت عيوني على وسعهه من استوعبت اني مدا احلم وهذا الصوت حقيقة! درت عيوني عليه اشوفه بصفي متمدد وساند راسه على ايده ويباوعلي مبتسم..

-ابو رييييحة

-رحم الله والديج

-اطلس هذا انتَ؟؟ كول والله انتَ

-لا حبي خيالي هذا

-اي مو اكول

-مريم اويلي يا مرريم







-يمممة عزه بعيني صخام لطام بوجهج يمريم اطلسسس انتَ جااااي

-اذني اريدهه حبيبتي يا گلبي وروحي انتِ، اني هنا بس اصحي

-صحيت محيطي صحيتتت ولك يبوووووو

-يبوو على عمري وعمر الخلفني مريم التوبة اجيچ وانتِ نايمة بعد

-وانتَ شكو جاي هيج وقت عيونيييي

-كلت اجي واصحيچ على لمساتي وصوتي شوية رومانسية ومن هالسوالف

-اني شكول رومانسية يا اطلس شبيك انتَ شتحس

-والله صح شحس مادري دكومي كومي خليني احضنج واطيح حظج

-شنووووو

-تعااالي

-اوكف لحظة احتاج استوعب وجودك شبيك

-اخليج تستوعبين بس انطيني مجال..........

عشر دقايق واندكت الباب..

-ماما

-الاطلس: يبووووووو

-مريم: يا اطلس ادم بالباب شوفه حبيبي

-هو هذا هم حظي من نعله على حظي الخايس

-اكلك شو انتَ فد مرة صاير وين الكلاااس عيني موسيووو

-الاطلس: خليني اشوف الطفل واجي اعلمج منو الموسيووو

كام بسرعة شاف ادم يبجي بالباب شاله يبوس بي ويسولف وياه يهدأه، ادري بي سلم عليه وشافه قبل لا يجيني بس ادم هو شاف ابوه ودك رجل الا ينام بنصنه اليوم..

-الاطلس: تنام بغرفة نانا؟ نروح لنانا حلو حلو وننام يمهه وتقرالنه قصة ادومي بابا

-ادم: لا اريد ماما

-الاطلس: مو نانا هم ماما نفس الشي بس شكلهن يختلف

-ادم: شلون

-الاطلس: يعني ماما بيضة وعيونهه سود ونانا سمرة وعيونهه خضر عادي

-ادم: اي بس نانا مو ماما ونانا يجيهه جدو بالليل

-الاطلس: شلووووووون

-مريم: لا لا والله ميروحلهه اصلاً على مرتين صارت ونانا ماقبلت، تعال ماما ادم تعال نام يمي

اجه مكيف دحس روحه يمي فرد ايده ورجله مثل عادته واخذ السرير كله، الاطلس باوعلنه ورافع حاجبه..







-الاطلس: واني وين اروح؟

-ادم: هناك

يأشر على القنفة ويباوعلي ويرجع يباوع لابوه..

-ادم: بابا هاي نام عليهه حلو حلو تشبه الجرباية

-الاطلس: شلون

-ادم: الجرباية جبيرة ولونهه ابيض والقنفة صغيرة ولونهه بني عادي

طكينه ضحك عليه لسانه شطوله، راح اطلس ينام على القنفة وادم يباوعله مقهور، رفع عيونه عليه وهمسلي بأذني..

-ادم: يصير بابا ينام ويانه حبابة

-مريم: اي يصير بس شلون وانتَ الا تفتح ايدك ورجليك من تنام

كلب عيونه فوك شلون الديفكر ويسوي حركات بوجهه ورجع يهمسلي..

-ادم: اممممم راح اسدهن بس اليوم

-مريم: اتفقنا

راحله يتلوگله ويبوس بي وجابه ويانه على السرير، شوية وادم غفى رفعت عيوني على الاطلس اباوعله مركز نظراته علينه ومبتسم، همستله..

-مريم: مشتاقتلك

جاوبني بنفس الهمسة..

-الاطلس: مو بگدي، روحي مفرفحة عليكم

-مريم: شلونه شغلك؟

-ممتاز

-اسفة لان ادم اجه متعود من تسافر ينام يمي حتى لو اودي لفراشه يكعد ويريد يجيني

-على شنو تعتذرين ابني مثلما هو ابنج، بعيوني احطه هو وامه

-اني زعلانة عليك واريد انكد بس ادم شفعلك هالمرة

-اروح فدوة لادم وام ادم شتكولين حقج اني مقصر وياكم

-تخيلت راح تجي لعيد ميلاد بسملة اليوم وكل عقلي راح تفاجأني حتى كشخت على اخر حبابة

-مو زعلانة لشنو كاشخة

-لروحيييييي

خزرني وضحك بالخنسة اشرلي على ادم نايم عود نصي صوتج، درت وجهي عنه اللزم ضحكتي لتروح الهيبة بس مخلاني لزم حنچي من جوه وداره عليه..

رفع نفسه تقرب مني اكثر وطبع قبلة على گصتي وخدودي ونزل لاماكن اخرى..

-اطلس

-روحه وعمره وكل حياته، مريم احبج.. وعلي احبج

-هههههههه نام انت تعبان







-هو اني مو تعبان حظي التعبان، كلتها احبج تضحك البطرانه

-الله

ضحكت ورجع لمكانه مبتسم بس يتحسر لزم كف ايدي حطه بين كف ايده وضغط عليهه بقوة وهو يباوع للدمليج الاسود بيدي (السوار)..

-مريم: اعرف شكد دتتعب حبيبي ومقدرة هالشي صح صعبة عليه غيابك ودائماً مشغول بس اعرف گلبك وروحك ويايه

-كلشي الج ووياچ مرمر اغلط بأسمج من اسولف تدرين؟

-اي اي اضحك عليه بهالسوالف

-والله العظيم سكرتيرتي منار كله اصيحلهه مريم والفشلة البنية تستحي تعدل اسمهه ومشيتهه مريم

-هههههه اطلس صدك تحجي خو منار قديمة

-اي والله ماعرف شبيه كلهن مريم صارن وغصباً عليهن يتقبلن چا اكو احلى من مرمرتي

سحت من الخجل صرت امعمع ماعرف شجاوب وهو بس يضحك..

-الاطلس: سولفي بعد لا تسكتين

-شسولف

-أي شي، صوتچ طرب لأذني ام العطوب

-اتعبك بسوالفي انتَ تعبان نام حبيبي

-اني تعبان ويمچ راحتي، انتِ لگلبي ضماد ولروحي التعبانة دوه، شحلاته التعب لو منج ويا خسارة الوكت اليمضي واني مو يمج مرمر

-احبك

-حبيني مريم ولا تبطلين تحبيني بيوم لا تملين انتظاري من اسافر ولا تطول زعلتچ من نتزاعل، حبيني بكل روحچ وجروحچ وكد حبچ الي بگلبچ احبچ اضعاف اضعافه تبقين انتِ الاولى والثانية والاخيرة وكلشي املكه يروحلج فدوة

-ادم: بابااااا

-الاطلس بهمس: اشتعل ابوك، ها بابا

-ادم: اكلت اكلي ماما ونانا

ضحك الاطلس بقوة واني وياه ادم يحجي من ينام يذكرني بنور وبسملة خواتي قبل، نيمته وما خليت اطلس يحجي شي بعد اصلاً ميحتاج يسولف عيونه تحجي عن حبه واشتياقه ولهفته، بعد مرور دقايق همستله بمشاكسة خليته يضحك بقوة..

-مريم: وانتَ هم لتمشي هالسوالف عليه وتخليني ابقى احبك واملخ روحي عليك وانتَ تروح تصول وتجول ما نسيت نورسينن يالاطلسس

-الاطلس: يااابة ردينه على نورسين.......


النهاية ♥️

#الاطلس "دمليج اسود" ♠️💸


• ━━━━━━❪♣❫━━━━━━ •

أتمنىٰ إستمتعو بقراءة قصتي وأشكر وجودكم الطيب 💙
The End
............................
اخوكم الناشر ܓܛܟكرارﮩ₰ﮩ✍
الكاتبة  : زهراء السالمي
🍀🍀🍀🍀🍀🍀🍀
أينما كان محلي في قلوبكم لا تنسوني من دعائكم
@krarhaeder
…………………………………………………………………

لماذا طفولتي سُلبت
لماذا حرمتي انتُهكت
لماذا والدتي عُذبت
لماذا ثم لماذا ثم لماذا
من انا ، لم انا ، الى متى
كل هذه الاسئلة وغيرها تتساقط على انثى كسقوط ماء الشلال على قاع هش لا يستطيع التحمل ولا يملك اجابة
كونوا معي ❤

النشر غدا
@krarhaeder

#هل_كنت_فصلية

البارت_1
.
.
عند الله سيكون الملتقى
وكل ساق سيسقى بما سقى
.
فلا تطلبو مني رحمة ابدا
فالرحمة ذهبت مع من كانت لي مأوى
.
.
السلام عليكم ورحمة الله وبركاته
خلوني ابلش وياكم قصتي بالتعريف عن اهلي الي هم بابا وماما وشلون التقو ببعض ونكول بسم الله ونبدا
.
.
بابا جان طالب طب ومن عائلة غنية كلش وجانت كثرة الفلوس عندو مخليتو متكبر عالناس وما يحترم لا صغير ولا جبير والي ببالو يسويه
.
.
الشي الي جان مانعو من استخدام هالشي هو وجود جدي على قيد الحياة وهو لان يخاف من جدي جان تصرفاتو تكون اكثر عقلانية واقل تكبر
.
.
ومن خلص السادس وطلع معدل طب جدي جان فرحان بيه كلش وتثمينا لجهودو قدملو على طب بجامعة كامبرج بلندن وبصراحة الذكاء الي جان عند بابا يستاهل هالتثمين
.
.
بس جانت هاي اكبر اخطأ جدي الي ماعرف اكول الله يرحمو او الله يذكرو بالخير المهم قدم بابا عالجامعة ودخل اختبار وبعد مدة انقبل بالجامعة
.
.
وتعرف على شباب عراقيين هم مقدمين بنفس الجامعة اجرو بيت مع بعض واستقرو هناك وجان جدي مو مقصر ويا بابا بشعرة بحيث موفرلو كلشي يحتاجو
.
.
الى ان تعاركو بابا وواحد من اصدقائو ومن وصل الخبر لجدي كلو تروح تأجرلك شقة لحالك ولا تجيب وياك احد وفعلا سوا هالشي بابا واجر شقة وبدا يداوم
.
.
ومن يبلش دوامو يبقى ببريطانيا الى ان يخلص العام الدراسي ويرجع للعراق ووجودو بشقة لحالو جان يعتبرها فرصة الو
.
.
فجان يتعرف على بنات ومن تثق بيه البنية يجيبها للشقة وينام وياها ومن يمل منها يعوفها ولان موضوع العذرية فدشي ما الو اهمية عند الغرب فجان الموضوع عادي للبنات ولبابا بنفس الوقت
.
.
الى ان اجى يوم من الايام بوقتها بابا جان بالمرحلة الثالثة اجت عالجامعة بنت منقولة من غير جامعة وبنفس مرحلة بابا وبنفس القاعة والي هي ماما
.
.
خلوني اوصف بابا بالاول وبعدو ماما علمود تكدرون تتخيلون شكلهم بابا جان طولو 180 شعرو اسود كلش كأنو مصبوغ بشرتو بيضة وبيها شوية سمار
.
.
عيونو عسليات بس لونهن اقرب للاصفر لحيتو خفيفة وجسمو رياضي لان جان يسجل باندية رياضية ببغداد
.
.
وهسا نجي لماما الطول 160 الشعر اصفر فاتح لدرجة تحسو ابيض من بعيد والسبب بلون شعرها هو ادمان جدتي عالكحول من جانت حامل (حسب كلام ماما)
.
.
عيونها زرك وزنها 50 يعني رشيقة كلش بشرتها بيضة كلش مثل الكطن وشفايفها ورديات بدون حمرة نظرة عيونها تحس بيها جمال لا يوصف وهذا الشي الي خلى بابا يتخبل عليها
.
.
ولان جانت خجولة وبنت جديدة بالجامعة جانت شبه انعزالية تجي تكمل محاظراتها وتروح ومدخلها بغير شي وفد يوم من الايام جانت جاية للجامعة
.
.
وقبل ما توصل القاعة تعرضولها شباب ثنين بالجامعة وجانو باقي الطلاب بس يباوعون ولا يتدخلون الى ان واحد حاول يمسكها من صدرها وضربتو راشدي كل قوتها ورجع هو ضربها راشدي الى ان وكعت بالكاع
.
.
وكل هالشي كدام الطلاب ومحد تدخل والي ضربتو مسكها من شعرها قبل ما يرفعها اجى صوت ضربة ووكع يمها اندارت شافت بابا ماسك الثاني ويضرب بيه
.
.
ورجع على الي ضربها كسرو تكسير واجى الامن اخذوهم كلهم ومن ضمنهم ماما علمود يحققون وياهم وبعد التحقيق واعترافات بعض الطلاب عرفو الامن انهم تعرضو لماما وبابا دافع عنها
.
.
بس لان غريب حذروه ان اي مشكلة ثانية راح يطردوه من الجامعة ومن ذاك اليوم بدت النظرات كرسائل اعجاب بين بابا وماما
.
.
هي جانت تشوفو كأمان الها وهو يشوفها كبنت لازم يحصلها لان ما اعتقد جان يحبها والسبب انو اكثر من مرة حاول يقنع ماما تروح وياه للشقة بس ماما جانت ترفض بسبب خوفها وخجلها
.
.
جانت تكتفي بكم كلمة وياه بالجامعة وهاي هي الى ان بابا تزوجها ببريطانيا بدون علم اهلو من جانو هو وماما بالمرحلة قبل الاخيرة
.
.
وجانو هو وماما عايشين الحياة باجمل صورة وبسبب حبها الو وتعلقو بيها ماكدر يعوفها او يطلكها بس جان لابد انو يرجع للعراق من يخلص
.
.
فمن اجت العطلة رجع هو للعراق وبقت هي ببريطانيا وبقو شهور متفاركين الى ان امها كدرت تتواصل ويا بابا وكلتلو لو تلحك عليها لو لا
.
.
حاول يعرف منها كالت من رحت انت بدت تذبل شوية شوية واليوم نقلناها للمستشفى وحاليا حالتها حرجة وبابا من سمع هيج فورا قرر يسافر
.
.
وكال لاهلو ان واحد من اصدقائو مسوي حادث ولازم يروح يزورو وهم ما جان باقي هواي للجامعة وتبلش وثاني يوم سافر لبريطانيا
.
.
ومجرد نزل جنطتو بالشقى وراح لماما بالمستشفى ومن شافتو هي انفجرت بالبجي كد مو مشتاقتلو وبقى وياها يومين الى ان تحسنت حالتها
.
.
واخذها وياه لشقتو علمود هو بنفسو يهتم بيها وشوية شوية رجعتلها صحتها الى ان رجعت مثل قبل ومن بلشت السنة الدراسية والي جانت الاخيرة الهم رجعو يداومون

.
.
بس بابا جان مشغول بالو بانو شلون ينطي خبر لاهلو الموضوع جان صعب كلش لا يكدر يعوف ماما وهو يعرف موتها بفراكو ولا يكدر ينطي خبر لاهلو لان اكيد ماراح يتقبلون هالشي
.
.
وبسبب كثرة التفكير جان دائما راسو يوجعو فواحد من جماعتو البريطانيين كالو الحل عندي من نخلص دوام دز الكتب ويا زوجتك ونروح سوا
.
.
وفعلا من طلعو بابا راح وياه ودز كتبو ويا ماما واخذو الشاب لملهى عبارة عن شرب ودعا..رة وركص وبابا ما كال لا شرب وياه الى ان انسطر وصار بدنيا ثانية
.
.
ورجعو صاحبو للبيت وهو ما يكدر يوكف وبعد ذاك اليوم صار الملهى من ضمن روتين بابا كل ما يطلع من الجامعة يروح عليه وجانت ماما تحاول بكل ما تكدر انها تقنعو يعوف الملهى وهو ما يقتنع
.
.
وبسبب تعويدو عالشرب صار ما يسكر بسرعة وصار من يشرب ويخلص يشوفلو وحدة من الي يركصن ينطيها فلوس وينام وياها
.
.
وجان يشوف اشكال والوان من البنات بس ما شاف احلى من ماما لهذا ما كدر يتخلى عنها وهي المسكينة بسبب حبها الو صابرة عليه
.
.
ولان حاجيلها عن العراق جانت تعرف انو ممنوع الشرب بالعراق فجانت تنتظر هالسنة تخلص علمود يسافرون للعراق وتخلص من سالفة الشرب هاي
.
.
وبقى الوضع كما هو الى ان قربو يخلصون جامعة وجدي اتصل على بابا كالو خلص جامعة علمود ازوجك وهنا خاف بابا ان جدي يخطبلو قبل ما يجي ويتورط فانجبر يحجي لجدي
.
.
ومن حجى انكلبت الدنيا على راسو وجدي ما خلى مسبة ما سمعها لبابا وجان يتوعد لبابا بس يرجع للعراق الا ينتقم منو ومن ذاك اليوم انقطع تواصل بابا بجدي
.
.
بس جان ويا بابا فلوس تكفيه لنهاية السنة وعلمود ما تخلص الفلوس ترك الملهى وكملو هو وماما السنة الاخيرة وباخر يوم الهم ببريطانيا ودعت اهلها ماما وسافرت ويا بابا للعراق
.
.
تخلت عن اهلها وبلدها علمود بابا من وصلو للعراق خلاها بابا بفندق وراح علمود يقابل اهلو ومن شافو جدي تخبل واذا قبل جان يكرهو شوية هسا صار حاقد عليه مو بس كارهو
.
.
وكوة كدرو عمامي يبعدوه عن بابا علمود ما يضربو وجانت اكثر كلمة يرددها جدي هو الكافرة الي جان يقصد بيها ماما رغم انو ماما جانت مسيحية وحلال المسلم يتزوج مسيحية
.
.
وبالمختصر المفيد بابا انطرد من البيت وجدي كلو لو اني لو هالكافرة ووكع بابا بنارين ما يكدر يطلع منهن وجان واحد من عمامي يشفق على بابا ويوصلو فلوس بدون ما يعرف جدي
.
.
وبقى واكف وياه الى ان كدر بابا يوكف على رجليه ويفتحلو عيادة ويمارس مهنتو كدكتور واجر بيت الو ولماما الي صارت محجبة علمود بابا وبقت هي بالبيت وهو الي يشتغل
.
.
بس جدي ما وكف عند هذا الحد وصلت بيه انو يتهجم على البيت الي اجرو بابا وبوقتها جان بابا بالعيادة وجانت ماما بالبيت لحالها
.
.
ما حست الا الباب يريد يتكسر وبسبب صوت جدي خافت وما فتحت الباب ولان ما متعودة على هيج شي ومن هول الموقف عليها صارت بيها خوفة
.
.
وكوة كدر بابا يلحك عليها ويجي قبل ما يدخل جدي للبيت ومن دخل وشاف وضعها بسبب الخوفة تخبل على اهلو وطردهم حتى جدي ما احترمو وطردو
.
.
وبصراحة اعتقد جدي يستاهل ماطول بابا عافلك البيت واستقر بحياتو اتركو يعيش ويا الي هو اختارها ليش تخرب حياتو
.
.
مثل ما انت عشت حياتك خليه هو هم يعيش حياتو المهم بقى بابا ويا ماما وعاف العيادة الى ان تحسنت حالتها وبعدها رجع لعيادتو ومن ذاك اليوم جدي تبرى من بابا وبابا هم تركو وما راح عليه بعد
.
.
جانت حياة بابا وماما هادئة وماما يوم عن يوم يزيد حبها لبابا صارت تعشق التراب الي يمشي عليه لان تخلى عن اهلو علمودها وفوك هاي طردهم بس لان خوفوها
.
.
فجانت تسوي اي شي علمود تشوفو سعيد لدرجة تركت الديانة المسيحية واسلمت علمود بابا وصحيح الدين لازم الواحد ما يخلطو بالمشاعر بس هي سوت هالشي علمود بابا
.
.
بس بعدين فهمت منها انها بعد ما تعمقت بالدين الاسلامي عرفت انو ما يصير تسوي هالشي علمود احد ولازم يكون ايمانها مقترن بالله فقط
.
.
وما يصير يكون شخص بينها وبين الله لذلك تابت واستغفرت الله وإن شاء الله ربي يقبل توبتها ويغفرلها هالخطأ الي ما جانت على علم بيه
.
.
وجانت سعيدة كلش لان بابا ما جان يشرب كحول بالعراق بس مثل ما يكول المثال دوام الحال من المحال وهذا الشي انطبق على بابا
.
.
بدا يتغير شوية شوية بالبداية صار اغلب اوقاتو عصبي بالبيت وتحسو ما يحب يتواجد بالبيت وماما خطية ماتعرف شنو السبب وتحاول دائما تخليه مرتاح وتلبي كل طلباتو علمود ما يضوج
.
.
الى ان حملت ماما هنا بابا رجع لطبيعتو تقريبا وصار شوية احسن من قبل ورغم هو دارس وعلى اساس من الطبقة المثقفة بس جان يكول لماما ما اريد بنت وغصب عنج تجيبيلي ولد وكأنو هي بكيفها تحدد جنس الجنين

.
.
وهالشي خلى ماما تعيش بحالة نفسية لان خايفة يكون الطفل بنت وتتورط ويا بابا فبقت بهاي الحالة 9 اشهر
.
.
تخيلو تعيش انسانة وحيدة وما عدها بس هالرجال بهيج شعور كل هالمدة وهالرجال سبب شعورها هذا الى ان خلفت وهنا كانت القشة التي قسمت ضهر البعير
.
.
من اجيت اني للدنيا وخيبت امل بابا وورطت ماما بيه ورغم اني جنت سبب خلافهم بس ماما حبتني حب لا يمكن وصفو عكس بابا الي من سمع اجتو بنت كلب المستشفى بالعياط وحجى وسب الا مل
.
.
وصار دائما معصب ووجهو ما يكصو السيف وكأنو الو ثار وياي اني وماما وبسبب هالشي صار اسوء من قبل صار يرجع من العيادة وعليه علامات بوس لو كرص على ركبتو
.
.
ومرات يتعمدن النسوان الي وياه يبوسن قميصو علمود يبقى اثر الحمرة عليه وجانت ماما تشوف هالشي وتسكت لان ماتكدر تحجي من تحجي يتخبل عليها
.
.
ومن يتعشى ويخلص يبدل ويطلع ما يرجع لاخر الليل ويرجع سكران وكوة يوصل لفراشو وينام ويوم عن يوم يسيئ الوضع الى درجة انو ماما ماكدرت تتحمل اكثر وانفجرت عليه وتورطت
.
.
نزع الحزام وسوا جلدها ازرك من الضرب والكتل جان عمري بوقتها 3 سنين ومن كد ما ضربها صرت من اشوفها اخاف منها وجنت ادفن وجهي بحضنها علمود ما اخاف منها وابقى اشم عطرها لحد ما انام بحضنها
.
.
اكيد كلكم تكولون راح يكمل البارت بدون ذكر اسماء الشخصيات لذلك راح اذكر اسماء بابا وماما وبقية الشخصيات تتعرفون عليهم بالايام الجاية
.
.
بابا جان اسمو رضى وماما جان اسمها سالين ولان بابا ما جان مهتم الي اول ما اجيت للدنيا ماما سمتني سالي يعني حذفت اخر حرف من اسمها
.
.
وجان بابا رافض فكرة انو اتسجل باسمو بالهوية وبقت ماما تترجاه الى ان وافق بالاخير وسجلني والحمدلله الله هداه وسجلني ولا جان ضاع حقي اكثر ما هو ضايع
.
.
اهل ماما انقطع تواصلهم مع ماما بشكل كامل ولا كأنو الهم وجود وماما لان ممنوع تطلع من البيت بدون علم بابا خلاها مثل العصفور الي عايش بقفص لا يكدر ينهزم ولا الحابسو يحس بمشاعرو
.
.
وتخاف انو تحاول تنهزم وتوكع بايد الي اسوء من بابا وبالاخص انو هي جانت حلوة فمستحيل يشوفها واحد وما يطمع بيها والشيطان شاطر وممكن تتورط
.
.
تخيلو وصلت ماما عمر ال 30 سنة والي يشوفها يكول عمرها يادوب 20 بقت رشيقة مثل ما هي لا سمنت ولا خرب شكلها بتقدم العمر او يمكن اني اشوفها هيج لان اكثر انسانة حبيتها بعمري
.
.
ونسيت اكللكم اني طلعت نسخة مصغرة من ماما شكل وطول ووزن وملامح وحتى لون شعري طلع مثل لون شعرها
.
.
وبصراحة نسيت اسألها عن سبب لون شعري لان هي صار اصفر بسبب جدتي من جانت تشرب كحول بس امي ما جانت تشرب ماما فما اجى ببالي اسألها هيج سؤال
.
.
بس من فكرت بالموضوع كلت يجوز ما دخلو الكحول بلون الشعر ويجوز هاي بسبب الجينات الوراثية لان هي تتحكم بهيج اشياء
.
.
جان الفرق بيني اني وماما هو حجم العيون اني طلع لون عيوني على لون عيون ماما بس حجمهن على حجم عيون بابا
.
.
وجانت دائما ماما واني صغيرة تحط اصبعها على عيني وتكول هذا البحر الي والبحر الثاني لكلبي اريدج من تكبرين تشيليني بالبحر هذا وتعوضيني عن التعب والقهر الي شفتو علمودج
.
.
اريد كلبج يكون ابيض واريدج تحتويني بكلبج وما تخليني ابقى اعاني بعمري الي باقي جنت اني صغيرة وعبالي تلاعبني ابقى اضحك وابعد ايدها علمود ما تلمس وجهي واخسر
.
.
وهي من تشوفني اضحك تبتسملي وتبني امالها على هالطفلة الي لحد الان ما تعرف بس تلعب وتاكل وتنام
.
.
......... يتبع

#هل_كنت_فصلية

#البارت_2
.
.
سالي: جانت دائما ماما واني صغيرة تحط اصبعها على عيني وتكول هذا البحر الي والبحر الثاني لكلبي اريدج من تكبرين تشيليني بالبحر هذا وتعوضيني عن التعب والقهر الي شفتو علمودج
.
.
اريد كلبج يكون ابيض واريدج تحتويني بكلبج وما تخليني ابقى اعاني بعمري الي باقي جنت اني صغيرة وعبالي تلاعبني ابقى اضحك وابعد ايدها علمود ما تلمس وجهي واخسر
.
.
وهي من تشوفني اضحك تبتسملي وتبني امالها على هالطفلة الي لحد الان ما تعرف بس تلعب وتاكل وتنام
.
.
من صار عمري 6 سنين طلبت ماما من بابا يسجلني بالمدرسة ورفض وترجتو هواي علمود ما يضيع مستقبلي وبالاخير وافق
.
.
بس جان عندو شرط وهو انو ما يتدخل بدراستي مهما كان السبب واي سنة ارسب بيها راح يبطلني من المدرسة ومن اخلص السادس اكعد بالبيت ومستحيل اكمل بعد
.
.
وانجبرت ماما توافق على هالشرط في امل انو يتغير هالحجي منا ل 6 سنين وجان اكو وحدة من جيرانا تعرفت على امي وصارت كل مدة تجي تزور امي وتكعد شوية وتروح
.
.
وامي ارتاحتلها وصارن صديقات ورغم امي لغتها العربية ضعيفة بس جانت تحجي وتفهم طبيعي لان بابا ما يقبل تحجي انكليزي
.
.
وجانت شوية صعبة عليها لفظ الكلمات وجانت جارتنا عدها ابنها يشتغل تكسي فمن اجت علينا طلبت ماما منها انو تكول لابنها ياخذنا اني وياها علمود تسجلني بالمدرسة لان ما تندل
.
.
وثاني يوم كعدت من الصبح وكعدتني وبدلتلي وجهزتني ومن سمعت صوت السيارة قفلت البيت واخذنا الولد سجلتني بمدرسة قريبة
.
.
وكالت للولد يدليها علمود تاخذني وترجعني ومن رجعنا ما قبل ياخذ الكروة وكال لان جيراني واول مرة احسبوها على حسابي وشكد حاولت وياه ماما وما وافق ياخذ وتشكرتو ورجعنا
.
.
جنت اني بذاك اليوم طايرة من الفرح لان اول مرة اطلع من البيت عمري 6 سنين وما طلعت ابد لا بعيد ولا بمناسبة ولا غيرو
.
.
وثاني يوم اخذتني ماما وياها وجانت دائما تعلمني شسوي وشتصرف علمود لا يضربني المعلم واني احاول اطبق كلامها لحد ما وصلنا للمدرسة
.
.
(راح احجي بلهجة طبيعية واغض البصر عن الاخطأ بلفظ ام سالي علمود يكون الكلام واضح)
.
.
سالين: يلا ماما روحي لمدرستج
سالي: تعالي وياي ماما
سالين: لا ماما مايصير بس البنات الصغيرات يدخلن
.
.
سالي: لا ماما شوفي ذيج المرة داخل المدرسة
سالين: ذيج معلمة ماما هي الي تعلمكم يلا روحي
سالي: ما اروح
.
.
سالين: يلا حبيبتي لا تتعبيني
سالي: فدوة ماما تعالي وياي خايفة
سالين: بس بشرط
.
.
سالي: شنو هو
سالين: ابقى انتظرج خارج الصف
سالي: ماشي ماما
.
.
جنت مجبورة اوافق لان وجودها داخل المدرسة افضل من وجودها خارجها سوو اصطفاف للطلاب وكفتني ويا الصف الاول وراح بزاوية حديقة المدرسة كعدت
.
.
واجت المديرة وحجت كلام هواي مافهمت منو كلشي لان جان تركيزي ويا ماما علمود ما تروح وتعوفني بعدها دخلونا للصف وبدا البجي والمصايح من البنات
.
.
واني بدون كلشي خايفة واشوف البنات يبجن تخبلت رسمي وصرت ابجي وياهن وما خلص الدرس الا اني كاتلة نفسي بالبجي
.
.
واول ما صارت الفرصة طلعت ركض على ماما وهي من شافتني فتحتلي حضنها وزتيت نفسي بحضنها ورفعت وجهي تباوعلي اذا احد ضاربني لو لا
.
.
سالين: ليش تبجين حبيبتي
سالي: ماما خايفة وكل البنات يبجن
سالين: يعني محد ضربج
.
.
سالي: لا ماما محد ضربني
سالين: اششش كافي لا تبجين
سالي: ماما لا تروحين وتعوفيني
.
.
سالين: لا يا روحي ما اعوفج بس اسكتي ولا تبجين اذا بجيتي راح اروح للبيت
سالي: لا ماما هاي هي ما ابجي بعد
.
.
باستني بكصتي ومسحت دموعي واجت مرة سلمت وكعدت يم ماما كالت مشاء الله بنتج تشبهج كلش حلوة كالتلها ماما شكرا حبيبتي والمرة لاحظت انو لهجة امي غريبة
.
.
كالتلها انتي مو من بغداد مو كالتلها ماما لا انا بريطانية بس زوجي عراقي قبل ما يكملن دك الجرس ودزتني ماما عالصف وكالت راح ابقى انتظرج هنا
.
.
وعفتها ورجعت للصف وخليتها تحجي ويا المرة جنت بكل درس اطلع عند ماما لحد ما تخلص الفرصة والمرة طلعت هم جاية ويا بنتها لان خايفة مثلي
.
.
بنهاية الدوام سلموني كتب ومن رجعنا ماما شالتهن بدالي علمود ما اتعب ورجعنا للبيت ومن اجى بابا كالتلو ماما المعلمة اليوم تكول لازم اشتري لسالي زي مدرسي
.
.
ورزلها كاللها ما اوديج لو تموتين انتي وبنتج كالت اني اروح اشتريلها بس اريد موافقتك كاللها انكلعي عسى لا رديتي لا انتي ولا هي عافتو ماما واجت لغرفتي
.
.
وجانت ماما متعودة على هالكلام من بابا ومن طلع هو بعد العشى حطلتي عشى اني وياها
.
.
جنت اللاحظ ماما من بابا يكمل اكل تذب التمن الي حول المكان الي جان ياكلو وتغير الصحن وما جنت اعرف السبب بس من كبرت عرفت انها جانت تتنجس (تقرف) من بابا لان يشرب

.
.
وجان بابا يروح الصبح للعيادة ما يرجع للمغرب لهذا جانت ماما تبقى وياي بالمدرسة ومن نرجع تسوي الغدا
.
.
ثاني يوم اخذتني للمدرسة وطلبت اجازة من المديرة علمود تشتريلي ملابس ورجعنا اخذنا ابن جيرانا ورحنا للسوك هو نزلنا ببداية السوك وكال اذا ضيعتو الطريق بس اسألو على (المجمع الفلاني) والناس يدلوكم
.
.
اني جنت بدنيا ثانية متعجبة عالسوك وكأنو بحلم اي شي اشوفو اتعجب عليه جنت صدك مو شايفة شي بحياتي ولاول مرة اطب سوك او بالاحرى اطبو واني واعية
.
.
بدت ماما تفتر هالمحلات وماسكتني من ايدي علمود ما اضيع جنت اي شي اشوفو اكول لماما باوعي شكد حلو حتى الكراتين الكبار الفارغات اتعجب عليهن لان كبار هيج
.
.
جانت ماما بوقتها مو لابسة خمار بس مغطية وجهها بالشال ومطلعة بس عيونها علمود الزلم الموجودين بالسوك بس برايي جانت غلطانة لان جانن عيونها قصة جمال لا تنتهي
.
.
والي يشوفني يعرف ملامح ماما لان مبين الشبه بيناتنا من العيون ولون البشرة
.
.
وجانت ماما تخاف لان بابا جان قبل يحجيلها عن العراق ويكول الشباب العراقيين من يشوفون بنت حلوة يتخبلون عليها
.
.
وهي لهذا السبب صارت تحاول ما تضهر جمالها وتختار المحلات الي بيها ناس وتشتري منهن علمود ما تكون لحالها ويا صاحب المحل
.
.
واختارتلي ملابس على كدي واخذتلي حذاء وجنطة وبعدها رحنا لمحل قرطاسية اخذتلي منو قرطاسية كاملة ومن كلشي اخذتلي عدد معين علمود يكفيني فترة طويلة
.
.
ومن خلصنا ضيعت الطريق ماما وسألت عالمجمع والناس دلوها لحد ما وصلنا لكينا ابن جيرانا ينتظرنا ورجعنا للبيت اول ما دخلنا ارتاحت ماما شوية
.
.
وبعدها لبستني الملابس علمود تتأكد من حجمهن وطلعن على قياسي بالضبط وشالتهن وحطتلي كتبي ودفاتري بالجنطة وحطتلي قلم رصاص وقلم جاف ومساحة وقطاطة بمحفظة
.
.
وكالت ذني لا تنطينهن لاحد ابد وعلمتني ايمتى استخدم القلم الجاف وايمتى الرصاص وبعدها شالت كلشي ومر اليوم طبيعي
.
.
بابا جان سيئ واعترف بهالشي بكل وضوح وبيه هواي اشياء سيئة بس الشي الحلو بيه انو مو بخيل وممكن يسوي اي شي بس بالنسبة للفلوس مستحيل يخلي ماما تحتاج وما ينطيها
.
.
ورغم رزلها من جانت تريد تاخذني للسوك بس قبل ما يطلع تركلها فلوس تكفيها وزيادة علمود ما تحتاج من غيرو فهاي تنحسب نقطة جيدة لبابا مقابل هواي من النقاط السيئة
.
.
وجان ما يمانع انو ماما تجي وياي للمدرسة ماطول هو خارج البيت ثاني يوم ماما جهزتني وشفت نفسي بالمراية طالعة كلش حلوة وتريكنا اني وماما ورحنا للمدرسة سوا
.
.
وجانت هي شايلة الجنطة علمود ما اتعب وبقيت الح عليها علمود اشيل الجنطة لان اول مرة تكون عندي جنطة واخير شي ماما استسلمت لتوسلاتي ولبستني الجنطة
.
.
ومسكتني من ايدي وكملنا طريقنا واني اكمز من الفرح لان شايلة الجنطة وماما تباوعلي وتضحك لان تشوفني فرحانة من وصلنا المدرسة خلتني ويا الطالبات بالاصطفاف وراحت لمكانها
.
.
وقبل ما ندخل شفت المرة الي اجت البارحة كعدت يمها من دخلنا للصف اجت علينا معلمة مبينة صغيرة بالعمر ومن اول ما شفتها حبيتها لان مبينة حبابة
.
.
بلشت توكف الطالبات وحدة وحدة وتسألهن عن اسمائهن علمود تتعرف علينا اني جنت متوترة لان ما اعرف اتعامل ويا الناس الوحيدات الي حجيت وياهن بحياتي ماما وجارتنا وبس
.
.
وجنت كاعدة بالوسط ثاني رحلة من وصلني السرة وكفت وبقيت ساكتة كالتلي شنو اسمج كوة كلتلها سالي كالتلي شنو وكأنها ما سمعت زين كلتلها سالي
.
.
كالت اسمج غريب وحلو منو سماج كلتلها ماما سالين ضحكت واستغربت كالت ماما اسمها سالين كلتلها اي كالت اكعدي وكعدت وكملت ويا البنات وكل شوية تباوعلي وترجع تباوع للبنات
.
.
ومن خلص الدرس رحت لماما وحجيتلها الي صار بالدرس وبقيت على هالحالة يوميا اروح وياها وكل ما يخلص الدرس اروح عليها واحجيلها الي صار بالدرس
.
.
والمعلمة الي ذكرتها جانت معلمة قراءة وصارت كلش محبوبة عند الطالبات كلهن لان جان اسلوبها وياهن كلش حلو وجانت دائما تحاول تتقرب مني
.
.
ولاحظت انو لهجتي مختلفة عن باقي الطالبات فمرة من المرات جان درس القراءة اخر درس عندنا ومن خلصت كالت يلا اطلعن للبيت
.
.
من كمت كالت ابقي سالي اريدج بموضوع بقيت كاعدة وتوترت عبالي مسوية شي ومن طلعن البنات كلهن حجت وياي
.
.
المعلمة: من وين انتي
سالي: بقيت ساكتة ماعرف شجاوب
المعلمة: انتي من بغداد
.
.
سالي: هزيتلها راسي بمعنى اي
المعلمة: عندج خوات
سالي: لا
.
.
دا نحجي واجت معلمة كالت لست ريم (معلمتي) يلا خلي نروح كالت هسا بس فد شوية ونطلع وكعدت المعلمة الثانية على وحدة من الرحلات

.
.
جانت معلمة الخامس للانكليزي ووياها كتاب انكليزي وجانت تقرا الكلمات الي بيه وسمعتها لفظت كلمة نجوم وقمر من ضمن الي تقراها
.
.
وكلتلها I like the moon (انا احب القمر) باوعن علي ثنينهن باستغراب وكالت ست ريم شنو كلتي رجعت عدت الجملة ورفعت صوتي علمود تسمعني زين كالت شنو معناها وجاوبتها كالت منين تعلمتيها كلتلها من ماما كالت وشتعرفين بعد
.
.
سالين: تعرف كلشي باللغة الانكليزية
ريم: عفوا بس منو انتي
سالين: اني والدتها
.
.
ريم: هلا بيج عيوني واسفة اخرتكم بس حبيت اعرف عنها شوية تفاصيل لان لاحظت لهجتها مختلفة عن باقي البنات وصار عندي فضول
.
.
سالين: اي صحيح واني السبب لان اني من بريطانيا وزوجي عراقي وكثرة اختلاطها وياي عدا باقي الناس خلى لهجتها شوية مختلفة
.
.
ريم: انتي مسلمة
سالين: اي
ريم: نصيحة اقري اية الكرسي على بنتج
.
.
سالين: باستغراب .. شلون يعني
ريم: اقري اية الكرسي علمود ما تصيبها عين
سالين: اسفة بس ما فهمت
.
.
سالي: رغم جانت ماما مسلمة بس ما جانت تعرف اية الكرسي ياهي وماتعرف شنو رقية او عين وهالاشياء لان محد علمها هالاشياء هاي
.
.
وست ريم عرفت انها اسلمت من فترة صغيرة فعلمتها عالرقية وشلون تطبقها وكالتلها الرسول (ﷺ) وصى بيها علمود تطمن ماما بعدها ترخصت منها ماما ورجعنا سوا للبيت
.
.
بس ماما ما طبقت هالشي وبدال هالشي حطت ايدها على راسي وكالت استودعتك عن الله الذي لا تضيع عنده الودائع وباستني وكالت الله يحفظج الي ويفرحني بيج
.
.
ابتسمتلها رغم ماعرف شنو جان قصدها ورحت ابدل ملابسي وهي حظرتلنا الغدا ومن خلصت غدا كالعادة نمنا شوية اني وماما
.
.
ومن كعدنا العصر صلت ماما واني انتظرتها لان ما جنت اصلي بحكم انو صغيرة وبعدها بلشت تدرسني كالعادة لحد ما قرب يجي بابا وراحت تسوي العشى وبقيت اني اراجع
.
.
مرات من اتذكر هاي الاشياء اتعجب شلون ماما كدرت تسوي هالشي معقولة تكدر تكون ام وزوجة وسند لبنتها بدون مساعدة احد
.
.
شلون تحملت شلون عرفت شيحتاج الطفل وشلون تهتم بيه وشلون تعرف اذا جاع لو مريض لو غير شي بس اكيد ربنا ساعدها لان جانت وحيدة وموكلة امرها لله
.
.
مرت الايام وبابا صار مرات بدال ما يشرب بالخارج بالليل يجيب شرب ويشرب بالبيت وجانت ماما كل ما تعرف ان بابا يريد يشرب تاخذني للغرفة وتقفل الباب
.
.
واسمع بابا خارج الغرفة يغني ويحجي وكلامو مو مفهوم ومن اسأل ماما تكول ماكو شي ماما بابا فرحان ودا يغني وتسحب راسي لحضنها وابقى بحضنها الى ان تكعدني هي علمود اكوم للمدرسة
.
.
وجانت دائما قبل ما تكعدني تكوم تشوف بابا وين وتشيل الكلاص وكزازات الكحول وتذبهن علمود ما اشوفهن واطلبهن عبالي عصير لو شي
.
.
ومن بابا يتريك ويروح للعيادة تكعدني وتريكني وتجي وياي وجانت حتى لو مطر او باردة تجي وياي لان جانت تخاف تدزني لحالي
.
.
ومن تمطر الدنيا ناخذ ابن جيرانا يوصلنا للمدرسة وتبقى هي اما بالادارة او بشي مكان مابيه مطر والي ريحها وجود المرة الي تعرفت عليها جانت تبقى تحجي وياها وتكضي وقتها وياها
.
.
من اجت امتحانات نص السنة صارت ماما شغلها الشاغل دراستي تخاف ان ارسب وبابا يبطلني فصارت مجرد تحط العشى لبابا وباقي اليوم تكضيه وياي تدرسني
.
.
وجانت تدرسني باسلوب حلو علمود ما اكره الدراسة ومن يسكر بابا خارج تكول عوفج منو وركزي بدراستج واني اطبق كلامها وابقى ادرس لحد ما يجي وقت النوم وانام
.
.
وثاني يوم نروح للمدرسة امتحن ونرجع ونبلش ندرس اني وياها المادة البعدها وجانت تواجه صعوبة لان الكتب باللغة العربية بس جانت تضغط على نفسها علمودي
.
.
واني ما جنت اعرف معاناتها مجرد استمتع بتدريسها وجانت توعدني اذا نجحت تجيبلي هدية و وتسويلي كيك واني اتشجع كلش بكلامها واحب الدراسة بعد اكثر
.
.
من صار وقت نتائج نصف السنة رحنا اني وياها وجانت المدرسة عبارة عن فوضى وجانو بعض اولياء الامور جايين يستلمون نتائج بناتهم
.
.
ولان بعضهم زلم ماما اخذتني بزاوية الحديقة وكالت من يروحون نروح نستلم النتيجة واحنا واكفين شفت ست ريم جاية باتجاهنا وبايدها ورقة
.
.
من وصلت سلمت على ماما وبوستني وكالت شفتج هنا تنتظرين وجبتلج نتيجة سالي تشكرتها ماما واخذتها وشفت امي فرحت فرحة مو طبيعية يمكن اول مرة بحياتي اشوفها فرحانة هيج
.
.
ست ريم تباوعلها ومبتسمة على فرحة ماما كالتلها ماما ممكن تبقين سالي يمج فد نص ساعة كالتلها اي عادي ودنكت علي ماما
.
.
كالتلي بنيتي ابقي ويا ست ريم اني هسا ارجع كلتلها تمام واخذتني ست ريم للادارة واجت معلمة الانكليزي جان اسمها نارين شافتني وحجيت وياي انكليزي

.
.
نارين: مرحبا سالي
سالي: اهلا وسهلا
نارين: شلونج
.
.
سالي: زينة وانتي
نارين: اني زينة شكرا .. وابتسمتلي
ريم: ترا هاي خيانة ههههههه
.
.
نارين: دسكتي يمعودة خليني متونسة وربي الانكليزي يطلع من لسانها مثل العسل
ريم: اي والله الله يحفظها لاهلها
.
.
نارين: ليش جايبتها هنا
ريم: امها راحت وكالتلي عوفيها يمج نص ساعة
نارين: ايوا .. وربي راسي حينفجر
.
.
ريم: كلو بسبب ست سارة (المديرة)
نارين: اي والله كلنالها نوزع النتائج بعد العطلة بس ما يفيد الا توزعهن قبل العطلة
.
.
ريم: همزين بس اول 3 صفوف لو كلهن جان تورطنا
نارين: جان تخبلت عليها هههههه
ريم: اي والله وبالاخص الرابع والخامس والسادس كلها تصليح اوراق يعني هوسة
.
.
سالي: جانن يحجن واني بس اباوعلهن وشوية واجت ماما بايدها علاكة وتشكرت من ست ريم واخذتني للبيت وكالت راح اسويلج كيكة مثل ما وعدتج
.
.
............. يتبع

#هل_كنت_فصلية

البارت_3
.
.
سالي: جانن يحجن واني بس اباوعلهن وشوية واجت ماما بايدها علاكة وتشكرت من ست ريم واخذتني للبيت وكالت راح اسويلج كيكة مثل ما وعدتج
.
.
رجعنا للبيت وكل الي ببالي انو العلاكة بيها مواد الكيكة الي تريد تسويها اول ما وصلنا بلشت بالغدا ومن خلصنا غدا رحت اني نمت بغرفتي كعدتني العصر وكعدنا اني وياها نلعب
.
.
جانت لعبتنا المفضلة انو نكعد مقابيل بعض واحط ايديني على رجلين ماما وافتحهن وهي تمسك اذانها من تحت بايديها ثنينهن وتكول اممممممم وتحاول تضرب ايديني
.
.
واني احاول اسحبهن قبل ما تضربهن واذا طختهن يصير دورها هي تحط ايديها على رجليني وجنا من صدك نشبع ضحك على هاللعبة
.
.
جان وجود ماما احلى شي بحياتي كلها من صارت الدنيا مغرب راحت تسوي العشى لبابا قبل ما يجي واني بقيت بالغرفة علمود ما يشوفني بابا ويحجي علي لحد ما اجى وتعشى وبعدها طلع
.
.
واني وماما تعشينا وبقينا ويا بعض بال 9 ماما خلتني اغمض عيوني وراحت شوية واجت كالتلي فتحي عيونج من فتحتها لكيت كدامي كيكة حلوة كلش
.
.
جانت دائرية ومن فوك مخططة بكاكاو وكريمة ومكتوب عليها سالي بالعربي والانكليزي ومن داخل عجينتها مخلوطة مع كاكاو من شفتها ضحكت وصرت اصفك بقوة من الفرح
.
.
انطتني السجينة ماما ومسكت ايدي وكصت منها قطعتين وحدة الها ووحدة الي وجانت جايبة عصير كلاصين وبعد ما اكلنا وكملنا سحبت علاكة من وراها وفتحتها
.
.
جانت بيها عاجة (دمية) شعرها اصفر وطولها تقريبا شبر وجانت كلش حلوة من الفرحة صرت اكمز وهي تضحك على ردة فعلي
.
.
فتحتلي الجيس مالها وكالتلي لا تخربيها حافظي عليها وخليها بالغرفة دائما كلتلها هاي بنتي ضحكت وكالت اي انتي بنتي وهي بنتج
.
.
وعافتني متخبلة عليها وشالت الي بقى من الكيك والعصير ورجعت علمتني شلون العب ويا العاجة بدون ما اخربها وهم كضت وياي وقت لحد ما اجى وقت النوم
.
.
نومتني بحضنها وحطيت العاجة بيناتنا وغمضت عيوني ونمت جانت عطلة نصف السنة احلى ايام اقضيها بعد ما بلشت دراسة لان نكضيها اني وماما لعب
.
.
بحيث تلعب وياي وكأنها طفلة مثلي مو ام وجبيرة بالعمر واكيد جانت تسوي هالشي لخاطري علمود ما اضوج وتصرفاتها هاي جانت تخليني اعشقها عشق مو بس احبها
.
.
ولحد الان امنيتي الوحيدة انو اعرف سبب تعامل بابا وياها بهالشكل اذا علمود الجمال فهي حلوة واذا علمود الاخلاق فجانت مستحيل تحجي عليه لا كدامو ولا بضهرو
.
.
ومن يحجي ما ترد عليه ابد وما بدر منها شي يخليه يكرهها واهلو هم الي رفضوها مو هي جبرتو يعوفهم فجان سبب تصرفاتو هاي غامض
.
.
من خلصت عطلة نصف السنة رجعت للمدرسة وجان احلى درس عندي درس القراءة من تجينا ست ريم بحيث جنت اشطر وحدة بالقراءة
.
.
وهي كلش حبتني لان مجتهدة ودائما حافظة دروسي بيوم من الايام طلعت بفرصة الدرس الرابع وما لكيت ماما بالحديقة ودورتلها بكل المدرسة وماكو
.
.
وشفت المرة الي جانت تكعد وياها سألتها عن ماما كالت اجى ابوج واخذها بقيت واكفة ماعرف شسوي اخير شي رحت على ست ريم وكلتلها بابا وماما راحو وعافوني لحالي
.
.
كالت مو مشكلة روحي كملي الدرس الاخير واذا ما اجو اخذج اني للبيت ورحت كملت الدرس الاخير وطلعت على امل اشوف ماما وما شفتها
.
.
ورجعت على ست ريم وانتظرتها لحد ما خلصت الاوراق الي بايدها ومسكتني من ايدي ورحنا سوا جنت اني ادليها عالطريق لان حفظتو لحد ما وصلنا بيتنا وعافتني وراحت
.
.
واني دكيت الباب لحد ما فتحت ماما اول ما شفتها اخترعت وخفت كلش جانت خدودها حمر وعينها اليسار زركة وكد مو وارمة صايرة ما تشوف بيها
.
.
حضنتها وانفجرت بالبجي وهي هم كأنها تنتظر هاللحضة علمود تبجي دخلتني داخل كلتلها بابا ضربج مو كالت لا بنيتي جنت فوك السطح ومن نزلت وكعت عالدرج
.
.
واخذت جنطتي حطتها بالغرفة وكالتلي ابدل ملابسي وراحت تسوي الغدا وسألتني شلون رجعت كلتلها ست ريم رجعتني كالتلي شنو كلتيلها كلتلها ما كلت شي
.
.
كالت مرة ثانية من تجيبج كوليلها شكرا ولا تجين ويا احد غيرها حتى لو ابوج كلتلها ليش عفتيني كالت جنت اريد ارجع للمدرسة علمود اخذج وما لحكت
.
.
والغريب ان بذك النهار حتى المغرب بابا ما اجى واني لان طفلة ماعرف شنو جان صاير وعقلي مو حبير لدرجة يحلل كل هالامور ويوصل لنتيجة مضمونة
.
.
من خلصنا عشى اني وماما بلشت تحط الملابس بجنط وتجمع غراض البيت ومن سألتها كالت راح ننتقل لبيت ثاني وحاولت تجمع الي تكدر عليه لحد ما نمنا
.
.
بابا ما اجى كعدت ثاني يوم تريكت وماما غطت وجها ووصلتني للمدرسة وجانت خطية مستحية من وجها لان صايرة عبارة عن ورم