هرم:شوف ذيج الشمعة مالتي
ابان:لعد شوفي ذول شلون حلوين

اشرلي ع اطفال يلعبون وي البط
كلت

هرم:شمعنى الأطفال
ابان:مدري شو حبيتهم شنو شعورج اذا الله رزقنا بطفل؟

ابتسمت ووكعت دموعي

ابان:ها ها صايرة هواي حساسة يلا اكلي وعوفي البجي

صرت اكل واباوع الة
بهاليوم هذا حسيت نصيبي من السعادة اضعاف..
رجعنا للفندق واحنا فرحانين..

صرنا نرتب الملابس
اخذت فستان ودخلت للحمام
لبستة وطلعت وانا فرحانة

هرم:هااااا شلونه علية

باوع الي بدهشة
ابتسم

ابان:طالعة تخبلين

وكفت كدام المراية
كان فستان ناعم قصير لونة ماروني
فتحت شعري وخليت كحلة وحمرة
التفتت علية

هرم:وهسة؟؟؟

كام من مكانة اجة يمي
لزم طرف شعري وهو يباوعلي بتأمل
همس

ابان:حلوة هواي حلوة
هرم:يعني حبيت شكلي؟
ابان:لا حبيتج

خلة راسة ع راسي وحوط خصري
تنهد وكال

ابان:تحبيني مو؟
هرم:كنت حلمانة
ابان:مو حلم هاي الحقيقة
هرم:وانت؟
ابان: من شفتج حسيت اكو شي مختلف وشوي شوي الاختلاف بدا يعيش وياية لحد ما وكعت... اي اعترف احبج

دمعت عيوني
اخذني لحضنة وصار يبوس بية
كلت بخنكة

هرم:احس يأست من كلشي وبس انت املي ومااريد هالأمل بيوم يروح

لزمت وجهة
كلت

هرم:تكدر؟

هز راسة بمعنى اي
ورفعني من الأرض وهو يكول

ابان:ولج سمنااانة
هرم:ههههه لا تخرب اللحظات الحلوة
ابان:يعني حابة هاي المشاعر؟

هزيت راسي بمعنى اي
همس

ابان:وراح تحبيها اكثر...

واخذني لعالمك طفلة ودربها عيونك الحلوة...

........

البصرة
الساعة ال2 ليلا
براء

ايدي وسط ايدها وانا اكول

براء:عمة لا تخافين كلشي راح يكون بخير

تباوعلي بتعب
اجة رزاق يركض والدكتور خلفة
صار يفحص بيها وانا ابتعدت

لميت ايدي لصدري
دموعي تجري
ومحتارة بروحي

شدولها مغذي وضربوها ابر
وانا اباوع الها
العمة تعبانة مو مثل قبل

تخربطت وجبناها للمستشفى
ومااعرف شنو تاليتها..
كعدت يمها
كلت بخنكة

براء:شلون صرتي احسن؟

هزت راسها بمعنى اي
لكن كلبي ما مطمن لحالتها
اخيرا كملت علاجها ورجعنا للبيت

شفتها تخزر برزاق!
مااعرف ليش
اخذتها لغرفتها حتى تنام
لزمت ايدي وكالت

:خليج اليوم يمي

هزيت راسي بمعنى اي
وبقيت يمها
كالت

:الصندوك ذاك بي ورقة بيها عنوان نزيهة

صفنت وتذكرت
نزيهة خوش مرة وهي وحدانية
وجيراننا سابقا

براء:اي؟
:اذا صارلي شي ما تبقين هنا ابد تروحيلها
براء:عمة مراح يصيرلج شي
:انا احس نفسي تعبانة اسمعيني هي بيتها مو بعيد وكوليلها العمة دزتني عليج وهي مراح تقصر

دمعت عيوني ونصيت راسي
كالت

:الاغبر هذا ما بي امل؟
براء:قصدج ياسر؟
:جا منو غيرة

ماعرفت شرد
كالت

:كومي نامي هذا علاجة يمي

خفت من كلامها لكن كنت تعبانة
وفعلا نمت..
ثاني يوم تحسنت حالة العمة

كعدت كدام بخورها وصارت تشتغل
عرفت اكو شي ببالها راح تسوي
وبداخلي خفت ع ياسر
رحت الها

براء:عمة هالشغل لياسر؟

باوعتلي بعدم قناعة

:وشبيج خايفة علية؟
براء:مو قصة خوف بس ليش اجيبة بالسحورة؟
:لان انتي تحتاجين تتزوجين ووضعج ميسمح وللضرورة احكام.. راح يجي

بهالاثناء اندكت الباب
باوعت بخوف
اجيت اروح افتحها منعتني
بعدها قدمتلي كوب ماي
كالت

:هذا الماي خليه يشربة كلة مفهوم؟ كلللة

اخذت الكوب منها
ايدي ترتجف
طلعت لبرا وانا خايفة
عيوني ع الكوب واتذكر المرة اللي اجت تبجي
وهي تكول

:دخييلج رجلي راح يروح من ايدي دخيلج

وتردها العمة

:ويطبج مرض يالثولة ليش انتي ما تدرين السگوة (سحر مشروب) تسوي امراض مو زينة وسرطانية اذا تكررت؟

فتحت عيوني ع الواقع
لكيت الكوب يهتز بأيدي ع كد رجفتي
مستحيل اخلي ياسر يتمرض بسببي

شربت الماي كلة
وخليت الكوب ع جهة
وفتحت الباب..

ابتسم الي
تنهدت بتعب
كال

ياسر:شلونج
براء:ما عليك بية انت شلونك؟
ياسر:شبيج؟ ليش تعبانة
براء:عمتي مريضة وخايفة عليها
ياسر:مابيها غير العافية انتبهي لنفسج براء حبيت اجي واسلم عليج واشوفج

همست

براء:انا بخير اذا انت بخير

ابتسم الي
بعدها ودعني وراح
كنت قادرة ع اذيتك
بس احس كلبي ما يطاوعني..
.........

البصرة
دُرر

سلم رماح علية
ورغم صدمتي رديت علية بثقل
بهالاثناء دخل صكر
باوع لرماح بأنزعاج واجة يمي
عدل شالي وكال

صكر:محتاجة شي؟
درر:لا عاشت ايدك

رماح واكف بمكامة ما تحرك
بكل صلافة يباوع علينة
التفت علية صكر وكال

صكر:تكدر تدخل يم الزلم جوة محتاج شي هنا؟
رماح:لالا مشكورين

ودخل جوة
صكر لزم زندي بقوة وغمض عيونة
كال وهو صاك اسنانة

صكر:درر لا تحجين وي هذا ابد ترا ما اطيقو
درر:بس سلم ترا وانا رديت
صكر:حتى رد بعد ما ترديلو درر حذرتج هذا ما اطيقو

شفت سهير من بعيد تباوع علينة
خليت ايدي ع كتفة وكلت بهدوء

درر:هاهية حبيبي اللي تريدة يصير
صكر:شش عيب مو وقتج هسة

ضحكت وهو دخل لجوة
سحبت نفس بقوة
سهلة سهلة

بدينا نودي الاكل للصالة
بوسط الهوسة رماح اكلني بعيونة
اباوع لسهير تخزر بي
شكلها ما طايقتة
شصاير؟

كعدوا ياكلون
صكر سوالي مكان يمة وكعدت
لكن كلبي مقبوض وقلقة ما اعرف شبية
اكلت شوي واحس لعبت نفسي
كمت ركض للمطبخ وصرت اتقيأ

لحكني صكر وهو قلقان
صار يغسل الي
طلعني برا وهو يكول

صكر:ارتاحي ارتاحي

حسيت بدوخة ولزمتة

صكر:اخذج للدكتور هسة؟ امشي بدلي امشي

هزيت راسي بمعنى لا
وكلت

درر:راح اكون احسن لا تقلق

بقيت كاعدة برا
بس صدري كلش مقبوض
يا ربي شصاير وشبية..

رجعنة لجوة
وهمة يكولولي

:اخاف حبلة؟

اباوع لسهير وجهه احتقن
ما اهتميت الها كنت تعبانة
سمعت فوني يرن فوك
صعدت وانا تعبانة
اباوع 5 مكالمات من خنساء
شصاير!!

فتحت باب الغرفة وعيوني بالفون
اجيت حتى اطلع
انطخيت بشخص
رفعت راسي مصدومة اباوع رماح

شهكت بخوف
ابتعدت وكلت بنترة

درر:شتسوي هنااا؟؟؟؟
رماح:حبيت اتطمن عليج لا تفهميني غلط

كان يباوع الي بنظرات حقيرة
نترت

درر:ابتعدددد عن طريييقي لا تشوف شي ما يعجبببك

دفعتة ونزلت بسرعة
احس الارض مفترة بية
وكلبي يدك بسرعة
هذا شلون صعد وراي!؟
معقولة محد انتبه علية

دخيلك يا علي استرني..

ايدي ترتجف وانا اتصل
خليت الفون ع اذني
بلعت ريك احس بلعومي مجرح

اجاني صوت خنساء
وهي تبجي وتكول

خنساء: درر ويننج
درر:شبيج خنساء شكو
خنساء: درر الحكيلنا وسماء بالعمليات راااح تمووووت

ضربت خدي بقوة
ودموعي صارت توكع
صرخت وانا اكول

درر:ليييش شبيييهااا انتووو وييين

صارت تحجي وانا ادور بعيوني ع صكر
والكل يسألني شبيج
اجيت اصعد لفوك صار بوجهي رماح
كال

رماح:درر شبيج

دفعتة وركضت لفوك
خليت العباية ع كتفي ونزلت
شفت صكر من بعيد
صحت الة

درر:صقققررر الحكلييي

لزمتني عمتي وكالت

:شبيج يمة شصاير

كلت بخنكة

درر:يمة اختي مدري شبيها بالعمليات

اجة صكر لزم ايدي

صكر:شبيج درر شصاير
درر:صقر اختي اختي راح تموت
صكر:شصاييير امشي تعالي

جرني وطلعنا
احس روحي تتسحب مني بهدوء
وكلبي يركض ركض

رجعت اتصلت بخنساء
ونطتني عنوان المستشفى
وصلت هناك بالباب وكعت
لزمني من ايدي

صكر:درررر ع كيفج

بجيت بغصة
وانا اكول

درر:اختييي حتمووت

سندني وصرنا نمشي
من بعيد اباوع لامي تضرب وجهها
وساهر لازم راسة
ومرج وخنساء يبجون
وياسر يفتر ما يعرف شيسوي

لزمتني خنساء وهي تبجي
وتكول

خنساء: درررر ولج وسماء مجاااي تصحى درررر
درر:شبيهاااا احجييي
خنساء: ولج اندعمتتت ومضروبة براسها عدها نزييف درر

ضربت وجهي
رحت ع امي وكلت

درر:شلووون فهموووني شلووون

اباوع لساهر راح ينفجر
ضيقت عيوني وكلت

درر:انت كنت موجود من اندعمت مو؟؟ انت السبب موو؟

لزمتني مرج وكالت

مرج:كافي درر اسكتيي
درر:هو كان موجود مو؟ مبين من سكوتة اكيد هو السبب

سحبني صكر ع صفحة
وهو يكول

صكر:اهدي درر كافي

احس الارض افترت بية
خليت راسي ع كتفة
مو كادرة استوعب حالة وسماء
خايفة نفقدها

بهالاثناء اجة حسن يركض
لزم ايد خنساء وهو يكول

حسن:خنساء شصاير شلون صارت ؟؟

خنساء كوة ترد علية
حسيت ع شي حار نزل مني
ووجع قوي ببطني
اجيت اوكع لزمني صكر

صكر:درر شبيج درر
درر:صقر مدري شبية

اجت مرج لزمتني

مرج:وجهج اصفر شصايرلج شبييج؟
درر:اكو شي دينزل مررج...
مرج:تعالي تعالي

سندتني عليها اخذتني جوة
نومتني ع السرير وصكر صاح للدكتورة
اجت تركض
بعدها صارت تفحص بية
كالت

:بسرعة تحتاجين ابر نزيف
درر:نزيف شنو دكتورة انا مابية شي
:ماما جنينج بخطر راح تسقطين نبضة ضعيف
درر:شنوو!!

بقيت صافنة ومصدومة
انا حامل!؟
طلعت مرج تركض ع صكر
وانخبصوا بية

مااعرف افرح او احزن
افكر بحالتي او حالة اختي
غمضت عيوني
وسلمت امري لله

بعد فترة فزيت من غفوتي
مخليلي مغذي بأيدي
ومرج يمي

مرج:هاا درر شلون صرتي
درر:بخير وسماء شنو وضعها؟
مرج:طلعوها من العمليات وبعدها ما صحت

غمضت عيوني

درر:وشكال الدكتور
مرج:كال تعبانة حالتها والمصيبة..

سكتت
كلت بقلق

درر:شبيها؟
مرج:نص وجهها متأثر بالعملية يعني تشوه

دمعت عيوني

درر:ليش احس ساهر السبب؟
مرج:اسكتي ساهر حالتة تصعب ع الكافر ضغطة ارتفع وخشمة نزف دم
درر:الله كريم

اجت امي علية تبجي

ام خنساء: ها يمة بشري شلونج
درر:بخير يمة بخير اسأل عن وسماء
ام خنساء: ادعيلها يمة

بهالاثناء دخل صكر
باوعلي وابتسم

صكر:ها يا عيوني سلامات
درر:الله يسلمك

اقترب الي ولزم ايدي

صكر:يابة مبروك
درر:الله يبارك بيك
صكر:راح يجيني منج احلى ولد
درر:وشمدريك ولد؟
صكر:احساس يابة
ام خنساء: يمة الله يمهللكم
صكر:الله يسلمج عمة وان شاء الله وسماء تكوم بالسلامة

راحت امي ع وسماء
اجيت اكوم ما قبلوا

مرج:ابقي نايمة ميصير تتحركين وضعج ميسمح
درر:وين خنساء؟
مرج:برا اصيحها الج؟
درر:وحسن وين؟
مرج:مااعرف يمكن راح

راحت مرج
شوي واجت خنساء

خنساء: ها يا امي الحمد الله ع سلامتج
درر:الله يسلمج

خلت ايدها ع راسي

درر:حسن وين؟

كالت بأنزعاج

خنساء :راح
درر:وين وليش؟
خنساء: عندة شغل
درر:ليش احسج تكذبين؟

كالت بعصبية

خنساء: انا كتلة يروح
درر:لييش؟
خنساء: وليش يبقى؟
درر:غير انتي مرتة ولازم يكون يمج بهالحالة؟ خصوصا بعدكم عرسان
خنساء: وانا مااريد
درر:صاير شي بينكم؟ ليش احس وضعكم مو تمام حسن مو زين وياج؟

دمعت عيونها

خنساء: ماكوو شي ماكو شي لا تقلقين

طلعت وعافتني
وانتي يا خنساء شبيج!؟
لليل اخذني صكر للبيت
وامي ومرج بالمستشفى يم وسماء
والغريب ان خنساء رفضت ترجع للبيت وي حسن
واصرت تبقى

وحسن ما جبرها
حسيت اكو شي صاير
واحنة ما ندري بي

يا ترى شنو هو!؟

رجعت للبيت
واللي خلاني استغرب اكثر ان صكر نبهني

صكر:درر عيوني لا تكولين لاحد انتي حامل بس امي وابوية يدرون بهالشي تمام؟
درر:ليش؟
صكر:خلي يمر ع حملج كم شهر مااريدهم يحسدوج
درر:واذا سألوا ليش نايمة ع ظهري
صكر:كولي انزلاق

وفعلا هذا اللي صار
وحتى امة باركت الي بالخفية
اباوع لسهير ما مقتنعة
وراحت لغرفتها وهي تكول

سهير:انزلاقيش يابا اليسمعكم يكول شايلة البيت ع ظهرها ولا تبطل عيارة هالصفرة

ما اهتميت الها
كان تعبي اكبر من رغبتي بافتعال المشاكل
صعدت نمت كبل
احس نفسي حيل تعبانة ومنتهية

ومرت الايام
كنت اروح كل يوم للمستشفى اتطمن ع حالة وسماء
بدت تصحى شوي شوي
لكن ما كدرت تنطق بحرف
راسها ملفوف وصحتها مو مستقرة

اخيرا وبعد ايام
طلعناها للبيت
والتمينا كلنا فرحانين بيها
اباوع الها ما تباوع لساهر
وحسيت ساهر منحرج
وكبل طلع

وهذا لغز غريب يضاف للقائمة
وصيت ع اكل من برا
وكلت الهم

درر:هذي ع سلامة وسمة

وتغدينا كلنا
وبعد الاكل حسن راد يروح
الغريب خنساء ما راحت وياه
وقررت تبقى

عيونة كانت عليها
احسة يباوع الها بقهر
وهي منصية راسها متباوع الة

يا ترى شنو اللي صاير!؟
.......

خنساء

رجعت خنساء القديمة
وماكو شي يضاف لحياتي
ووجود حسن ما احدث فارق
مجرد تغيير مكان

بكل ليلة كنت انام بالارض
وهو ينام ع التخم
والسرير فارغ

كان منظر مربك
ومتعب بنفس الوقت
اجمل ايام بحياتنا تمر بهالطريقة

تأذيت هواي ع وسماء
وقررت ابقى يمها
احس حسن يريد يعترض
لكن فضل السكوت..

مايكدر يكلي ارجعي وياية
ليش رجوعي شراح يغير!؟
وجودي وعدمة واحد..

طلعت خنساء من المستشفى
وبقيت رافضة رجوعي للبيت
وقررت ابقى هنا يمهم

درر كانت منتبهة
مرج كذلك
وامي ملتهية بوسماء

بأخر اليوم رجعت لفراشي
الدمعة بعيوني
حتى ما اكدر اشتاق الك حالي حال الباقين
ليش انا شنو اللي شفتة منك؟

وبعد ما مرت يومين
اجانة حسن وكان جايب اكسسوارات لوسماء
كان يباوع الي كأنما يريدني اروح وياه
قررت اروح
الى متى اتهرب

رتبت اغراضي وطلعت وياه
وصلني للبيت وراح لشغلة
البيت كان مرتب مو هواي هوسة

نظفتة وعطرتة
ورتبت الغرفة
اجيت احضر عشة لكن اتصل علية

حسن:راح اجيب اكل من برا
خنساء: تمام

ما حبيت اجادل
وفعلا اجة وجايب اكل من برا
رتبتة وكعدنة ناكل
ساكتين..
ماكو بينة اي سالفة
ماكو بينة حياة

صبيتلة جاي
بعدها كعدت اعدل البهارات
ماعندي سالفة اسويها

بدل مااكون كاعدة يمة
كاعدة بوسط المطبخ
اسجل ع العلبة فلفل اسود..

مسحت دمعة عابرة من عيوني
رفعت راسي شفتة يباوع الي
كبل صرف نظر وطلع للطارمة

دخلت للحمام سبحت
بعدها طفيت الضوة ورحت لفراشي
حسيت بي من اجة للغرفة
ووصلتني ريحة الجكاير

لا انا اللي اكدر احاول وياك
احس نفسي فشلت
ولو شما اسوي راح تبقى هاي الفكرة ببالك

مشكلة اغلبية الناس من ياخذون فكرة ع شخص
ما يغيروها..

ثاني يوم طلع لشغلة
ما حبيت يبقى الوضع هيج
ع شنو يجيب اكل من برا؟
بس بالاسم عرسان

دخلت للمطبخ
طلعت قهري هناك
وكعدت اسوي اكل

سويت برياني ودجاح مشوي
وتشريب وزلاطة
كعدت اعدل وارتب
اتصلت علية

خنساء: شوكت تجي
حسن:بعد ساعة ليش؟
خنساء: مو حتى اعرف شوكت اطفي الاكل
حسن: ليش طبختي؟
خنساء: اي
حسن:عاشت ايدج
خنساء: تسلم

سكتنا
كلت

خنساء: يلا انتظرك
حسن:تمام ان شاء الله ما اتأخر

غلقت الخط
سبحت ولبست دشداشة خفيفة لون ماروني
خليت مكياج بسيط
اتصلت ع امي حتى اتطمن ع وسماء
وهو اجة

شفتة يباوع الي
لهيت نفسي بالاتصال
بعدها سديتة وهو كان يبدل
كلت

خنساء: اصب اكل لو تصلي؟
حسن:صبي بين ما اصلي

مريت من يمة
انتبهت الة يباوع لجسمي
تعمدت افتح شعري بحجة اعدل القراصة

دخلت للمطبخ وهو عيونة تلاحكني
سويت نفسي ما منتبهة الة
بس بداخلي فرحانة بنظراتة

صبيت الاكل
خليتة ع الطاولة بالصالة
هالمرة عجبني اغير المكان

صار يباوع للاكل متعجب
يمكن عبالة ما اعرف اطبخ
بدينة ناكل
كال

حسن: كلش طيب
خنساء: ليش تحسسني ان انت عبالك مااعرف اطبخ
حسن:بالعكس ادري بيج تطبخين هواي واعرف اكلج طيب
خنساء: شمدريك

ابتسم

حسن:مرة سمعت امج تصيحج خنسااااء طبخيلنا بامية يمةةة

ضحكت

خنساء: عزاا شلون عيب
حسن:لا ليش عيب بوقتها ضحكت ع بساطتكم
خنساء: ايي وشمدريك بي طيب
حسن: مو عجبتني الدولمة هههه بوقتها عرفتج انتي نفسج خوخ اللي احاجيها ومن ضكت الدولمة فرحت بداخلي كلت مرتي تعرف تطبخ
خنساء: هههههه من ذاك الوقت مسويني مرتك

ابتسم

حسن: نيتي وياج زواج وما اشوفج غير مرتي
خنساء: هاي سابقا وهسة؟
حسن:بعدج مرتي

نصيت راسي
كال

حسن: صدك وسماء شلونها
خنساء: زينة الحمد الله
حسن:خطية اخر مرة شفتها حسيتها مقهورة ع روحها
خنساء: حقها انت شفت وجهها شلون متأثر خطية وسمة حلوة متستاهل

صفن
بعدها كال

حسن:خواتج حلوات بس انتي احلاهن

باوعت علية

خنساء: ها؟
حسن:اي شبيج
خنساء: عيونك الحلوة يابة

ابتسم الي
صرت اشيل الصحون
وهو يساعدني

اجة وراية بالمطبخ
صار قريب مني وطخني
سويت الوضع طبيعي رغم ارتبكت..

طلع من المطبخ بسرعة
صحت الة

خنساء: تريد جاي؟
حسن:لالا

غسلت الصحون بعدها رحت للغرفة
لكيتة مطفي الاضوية ومتمدد ع السرير
لاول مرة ينام هنا
غريبة!

خنساء: راح تنام هنا؟
حسن: اي ليش؟
خنساء: حتى انام ع التخم مابية حيل افرش بالكاع
حسن: تكدرين تنامين ع السرير

ابتسمت الة

خنساء: ميحتاج خليك مرتاح بوحدك

تمددت ع التخم
كلت

خنساء: تكدر توديني العصر لبيت اهلي
حسن:بس متبقين ع العشة
خنساء: تمام
حسن: خلي انام فد ساعة واوديج

وللعصر بدلت واخذني
احسة مرتبك ومن نظراتة يحاول يكول شي
لكن يبقى ساكت
وانا استعملت اسلوب التغليس
خلي يبقى الوضع هيج احسن

نزلت لبيتنا
واتفقت ويا ع وقت الرجوع
دخلت لبيتنا والغريب بابنا مفتوحة

سمعت صوت صياح امي
شصاير!؟
دخلت جوة اباوع امي تصيح
ومرج وجهها يضرب الوان
كلت

خنساء: شبيكم شصاير؟
ام خنساء :ما صاير شي
خنساء: احجي يمة شكو

راحت ع مرج
لزمتها وكلت

خنساء: يمة شكوو
ام خنساء: ارييييد افهم وليم شيسوووي جاي وررراااج
خنساء: يا وليم؟

صاحت

ام خنساء: اللي اشتغل ببيته ولج اجةةة وراها بسيارتة احجيييي شعندج وياه

التفتت ع مرج خزرتها

خنساء:احجي منو هذا؟

بهالاثناء اندكت الباب
طلعت و فتحها
صار كدامي شاب بنهاية العشرينات

عقدت حاجبي
هذا وين شايفتة

معقولة ...!؟

......
يتبع

#قرار_العُهر

..........#بارت٥٤

موطن الخيبة هُنا
تحديدا في منتصف قلبي
........

مرج

طلعت للطارمة
اباوع لخنساء واكفة بالباب
التفتت علية ورجعت باوعت للخارج
مشيت الها
صار كدامي وليم

ضربت خدي
وكلت بعصبية

مرج:شجااابك؟؟؟!!

التفتت الي خنساء
خزرتني وكالت

خنساء: معناها توقعي صح وكلام امي صح

اجيت اسد الباب دفعتني
و وليم كال

وليم:اعتذر اذا سببت ازعاج بس هو هيج يستقبلون الضيف؟
خنساء: ليش انت ضيف؟
وليم:ليش انتي عندج رأي ثاني؟ خالة شيماء موجودة هنا عندي كلام وياها
مرج:وليم روووح
خنساء: ليش تطردين الولد عندج شي وضامتة عنة؟؟

خزرت خنساء
اجت امي من جوة
باوعت لوليم وصارت تتبلعم
سلم عليها وليم وكال

وليم:ابقى واكف بالباب خالة؟

كالت امي بأنحراج

ام خنساء: لالا تفضل ابني تفضل

ودخلتة للبيت وانا كوة لازمة اعصابي
جرتني خنساء من زندي
وكالت بعصبية

خنساء: شبييج فهميني شبيج؟
مرج:انتي الللي شبيييج
خنساء: هذا الرايدج مو؟

دمعت عيوني

مرج:ايي
خنساء: وشبيج وياه؟
مرج:مابية
خنساء:لشنو جاي؟
مرج:يخطب
خنساء: وليش تطرديه؟
مرج: لان ما اريدة

ابتسمت بعدم فهم

خنساء: متريديه؟
مرج:اذا مو كادرة تكونين وياية لا تكونين ضدي

دفعت ايدها ومشيت
فترة طويلة هواي ووليم يريد يتقدم الي
لكن انا ما اكدر
بعد اللي صار وياية مااكدر اعيش تجربة الزواج
ولا اكدر اسوي الوضع طبيعي

احس وضعي هيج افضل..

دخلت لجوة
اسمع امي تكول لوليم

ام خنساء:بس انا شفتك واكف تحاجيها
وليم:صح كلامج خالة وانا اعتذر لان غلطت بس انا رايدها ع سنة الله ورسولة وجاي حتى اطلبها منج

اجيت احجي جرتني خنساء
ورفعت حاجبها بمعنى اسكتي
وامي باوعتلي بعدها كالت

ام خنساء: والله يا ابني ما اعرف شكول بس صراحة ماكو هيج خطوبة يعني جاييني بوحدك
وليم: خالة اعذريني واقدر كلامج بس سبق وكتلج انا يتيم لكن ان شاء الله بالمرة الجاية اجيكم بمشية زلم واللي تطلبوه انا حاضر الة
ام خنساء: يصير خير ان شاء الله
وليم:اريد منج الموافقة حتى يتم كلشي ع خير وان شاء الله انا اكون كد كلمتي وبنتج اخليها بعيوني

خلة ايدة ع صدرة
باوعت لتفاصيلة ودمعت عيوني
سرعان ما تشكلت امامي صورة ابهر
غمضت عيوني بقوة

احاول انسى
احاول اتجاوز
احاول اتخطى

فتحت عيوني لكيت وليم واصل للباب
وامي وراه تودعة
رجعت وباوعتلي بحيرة
خنساء كالت

خنساء: مبين علية خوش ولد
ام خنساء: اكول لساهر يسأل عنة

اباوع لوسماء ضربت ايدها بالكاع منزعجة
ما تكدر تحجي وتتحرك لان تتوجع اثر الحادث

حل السكوت
لليل اجة ساهر يتطمن ع وسماء
وجايب وياه كومة اغراض
اباوع ع وسماء تخزر بي
وهو مرة يخزرها مرة يضحك ع وضعها
لان ما تكدر تحجي

ساهر:تدرين هالوضع لايك الج لان مسكت حلكج عني
مرج:وتدري هي هسة تريد تقتلك لان تستفزها
ساهر:واضح من نظراتها بس لالا بعد ماكو بينة حرب تصير زينة وتروح تجهز لعرسها شنو نسيتوا هي مخطوبة

اباوع لوسماء كلبت عينها بأشمازاز

ساهر:يلا انا لازم اروح
ام خنساء: مو تنسى تسأل عن وليم
ساهر:يعني ام ياسر راح تزوجيهم كلهم وتبقين وحدج

ضحكت امي ونصت راسها

ام خنساء: الله يهنيهم هذا كل اللي اريدة
ساهر:يلا ان شاء الله تصير عندج جنة مو ياسر؟
ياسر:ان شاء الله

تفاجئنا من رد ياسر
كل مرة يسكت لكن هالمرة احسة فرحان

ساهر:ها ها معناها اكو وحدة موو؟

ضحك ياسر ونصة راسة
التفت ساهر ع وسماء وكال

ساهر:شوفي الحب شلون يبين ع البشر

وخرت اللفاف وكالت بصعوبة

وسماء:م.ما تشوفة ش.شلون مبين عليةة

ضحكنا كلنا وساهر فشل
بعدها ودعنا وراح
ثاني يوم داومت
تمنيت يجي وليم واحاجيه وانهي كلشي

انا ما اكدر استمر وياه
هو صح يدري باللي بية
بس ما يدري ان انا مذنبة بهالشي
وان انا نسيتة وغركت بعالم ابهر..

مرت ايام ووليم ماكو
وساهر سأل عنة واجة يحمد بأخلاقة
الكل مقتنعين وانا ساكتة

ساعات اكول اللي صار صار وكافي مو لازم اتذمر
لازم اعيش حياتي وانسى
ومرات اكول لا
الذنب والعار راح يبقى ملاحقني طول حياتي
وما بين هاي وهاي احتاريت

وبيوم..
لكيت نفسي واكفة امام وليم
واكول الة

مرج:وليم اللي سويتة غلط
وليم:شنو الصح؟
مرج:وليم مااريد اتزوج
وليم:ما تحبيني؟

دمعت عيوني

مرج:وليم انت تعرف اللي صار بية..

قاطعني

وليم:ومو ذنبج وانا متقبل يعني شخص مجهول اغتصبج وغصبا عنج ومو بأرادتج تموتين؟

دمعت عيوني

وليم:شبيج ضامة شي؟

كلت بأرتباك

مرج:لالا مو هيج بس..

قاطعني

وليم:مرج ترا اللي انا بي محد يتحملة انا حبيتج وكبرتي كدام عيني صعب علية اتحمل اللي صاير بيج بس انا متحمل لان احبج ولان بعدني اشوفج ذيج مرج البريئة ورغم كلشي صار بينة انا نفسي وليم ابن الاصل والعز اللي ما يتخلى عن محبوبتة وانا اريد انسى الفات واعيش وياج لان تعبت

وكعت دموعي
مسحتها وسحبت نفس بقوة
احس كلبي ينعصر حب وندم
انا شلون كدرت انساك واقتنع بأبهر
كلت برجفة

مرج:راح تقتنع بحالتي وتسامحني..

قاطعني

وليم:سدي الموضوع كافي انا حبيت روحج ما حبيت جسمج او اي شي وكتلج انتي نفسج مرج البريئة اللي بكلبها ع لسانها واللي كانت كدامي دائما ع حقيقتها وما ضمت عني شي

احس كلامة الاخير قسم كلبي نصين
ضغطت ع اعصابي وكلت

مرج:هاهية وليم يصير خير
وليم:تحبيني؟
مرج:ايي
وليم:واهلج شنو رأيهم
مرج:سألوا عنك وطلعت شريف

ضحكنا ثنينا
بعدها رجعت للبيت
شايلة بداخلي هم
بس اكو امل يقنعني ان الحياة ممكن تبتسم الي

كعدت بيني وبين روحي افكر
واكول لنفسي
وليم ابن عائلة وابن اصل فعلا
رغم كل اللي صار بينا ما تخلى عني

وتفاجات ان اهل وليم كلهم من عائلة راقية
واختلاف شاسع بينا بالطبقات
لكن وليم ليش كانت حياتة بائسة لهالدرجة!؟
ليش كان فقير..!؟

مؤخرا عرفت المشاكل عائلية
امي كلش فرحت بي
ورجعوا الهم خبر الموافقة
وتحددت يوم المشية

المفاجأة ساهر قرر المشية تكون ببيتة
وحتى العرس
ودرر ايدتة بهالموضوع
والسبب ان بيتنا كلش قديم ومو مناسب
وحسيت ساهر يريد وسماء تتعود ع وضعها وياه

وفعلا رحنا لبيتة ونظفناه
بنتة كلش فقيرة وحبابة ومتعاونة
وسماء كاعدة ع جهة تباوع بعدم قناعة
وانا كنت كلش مرتبكة

اخذتني درر للغرفة
لبستني فستان كريمي ناعم
وسرحت شعري
خليت كحلة وماسكارة وحمرة لون ماروني
وشوي مورد خدود

شكلي صار بسيط وناعم
خليت عطر ودرر صارت تهلهل
اجت امي فرحانة دمعت عيونها من شافتني

صارت تبوس بية
خنساء تبخر وتبتسم
بعدها سمعنا اصوات الزلم برا
طلعوا خواتي يباوعون
وانا كاعدة احس كلش مرتبكة
كانوا يتهامسون

خنساء: والله هالوليم حلو

ابتسمت وانا اهدأ من ارتباكي
سمعت صوتهم يصلون ع النبي
بعدها ساهر صاح لأمي
كعدوني ورا الباب

وخليت رجلي بالمي والياس
وبدت مراسيم العقد
كنت اباوع لامي وخواتي فوك راسي
وهاجر اجت وكانت فرحانة
وعمة درر وبنتها

كلت نعم واحس كلبي طاير
وبنفس الوقت انقهرت
هونت ع نفسي وكلت لروحي
هذا وليم اللي يحبني من كل كلبة
اللي راح يضمني بعيونة..

كمل العقد وانخبصوا خواتي لان راح يدخل يلبسني الحلقة
وفعلا دخل وانا كلبي يدك بسرعة
كان لابس قاط اسود والقميص رصاصي
شكلة حلو هواي
رؤيتي غوشت وصرت مااشوف زين

باسني براسي
وكعد يمي حسيت بوجودة وشميت عطرة
مااعرف شهمس الي
كنت فاصلة عن العالم

لبسني الحلقة ولبستة
وايدينا ثنينا ترجف
بعدها قطعنا الكيك
كانت مراسيم ولحظات حلوة هواي..

بعدها طلع
خليت الشال ع راسي ووكفت خلف الشباك
وصرت اباوع علية
انتبهت الة طلع ووياه شخص يمشي ومخلي الفون ع اذنة يتصل

عقدت حاجبي مستغربة
واحس كلبي زادت دكاتة
هذا منو!؟

بلعت ريك بخوف
وخليت ايدي ع صدري
لحظات والتفت
واحس كلشي بية توقف
صرت اسمع دقات قلبي الخايفة فقط

ابهر شيسوي هنا!؟
ابهر و وليم!؟؟
........

وسماء

كانت ايام صعبة
عشتها بتفاصيل مؤلمة
تمنيت لو اكون ميتة بلحظتها
ولا واصلة لهذي المرحلة

وفوك كل هذا
كل المطلوب مني ان استمر
بهذا الطريق ماكو تراجع
ابدا..

كان اكو استفزاز من ساهر
لكن تعبي ووجعي اكبر
وبالنهاية كلامي ما راح يغير شي

بديت اتحسن
وصارت خطوبة مرج
ماعجبني تكون ببيت ساهر لكن
شنو اللي اكدر اغيرة؟

اول ما دخلت للبيت انقبض قلبي
بيت كبير خالي من الحياة
يحتاج هواي تعب
وانا ماعندي قدرة حتى اكمل يومي
شلون راح اكدر اكمل حياتي هنا؟

كل شوي ساهر يدخل
عينة علية وانا اتجاهل
بس لشوكت؟

خلصت خطوبة مرج
وقررنا نروح
دخل ساهر للمطبخ واجة كعد كدامي
خواتي جوة يبدلون وانا انتظرهم
كال

ساهر:محتاجة شي؟
وسماء:لا بس انتظرهم حتى نروح
ساهر:خو ما تضايقتي من البيت او احد ضوجج؟
وسماء: لا ابد
ساهر:يعني الوضع تمام؟

دمعت عيوني

وسماء: كلش

كام من مكانة واقترب الي
كعد يم رجلي ولزم ايدي
رجفت اطرافي وانا اشوف حركتة
حاولت اسحب ايدي من ايدة
ما كدرت

كال

ساهر:وسمة انتي مو بوحدج انا وياج

تربط لساني
سكتت
رجع كال

ساهر:وراح يكون كلشي بخير

ميلت راسي وكلت

وسماء: وليش تكول هالكلام؟
ساهر:لان لازم تعرفين

هزيت راسي بمعنى اي
بهالاثناء دخل عامر
باوع ع ايدينا وتغيرت ملامح وجهة
عامر يحبني!

سلم ببرود ودخل جوة
ساهر ابتعد لكن بقت عيونة علية
هو يحاول يوصل الي فد فكرة معينة

اما مجاي توصل الي
او انا تعبت من استقبال الافكار
رجعنا للبيت
ع طول الطريق صافنة وسارحة بعالمي
واسأل نفسي

انا ليش هيج!؟
يا ترى ليش وصلت لهالمرحلة
وشلون راح تكون ايامي القادمة؟

قبل ما ننزل للبيت
سمعت ساهر يكول لأمي

ساهر:ام ياسر بما ان وسماء تحسنت صار لازم نحدد موعد العرس

وامي ترد علية

ام خنساء: اللي تشوفوه مناسب سووه

نزلت من السيارة
ودمعة حائرة وكعت من عيوني
احنا اللي شتتنا الايام
وضيعت الواننا

احنة اللي ما نعرف ولا عرفنا مصيرنا
ولا لوين ماخذتنا الدنيا
يا ترى بهالسهولة تستسلم وسماء العنيدة لقدرها!؟

حسافة!
........

درر

التفتت الة وانا ابتسم
كان تعبان
بادلني الابتسامة وكال

صكر:خو ما تعبتي نفسج؟
درر:لالا كلشي ما سويت بس رتبت مرج
صكر:اهلج كلش بسطاء وخوش اوادم وخواتج الله يهنيهم
درر:وانا؟
صكر:الله يخليج الي

خليت ايدي ع ايدة
وهو يسوق
كلت بهدوء

درر:مضوجك شي؟
صكر:لالا كلشي تمام لتفكرين
درر:ليش احسك ضايج؟
صكر:تعبان

سكتت
باوع الي واحس عندة كلام
شوي وكال

صكر:درر راح اوصيج بشي
درر:خير؟
صكر:هالفترة حاولي تلزمين حذرج من الكل وما تشربين ولو كلاص ماي من احد
درر:ليش؟
صكر:خوفا ع اللي ببطنج

كال هالكلام وكلبي انعصر
احسة خجلان يكولها الي
همست بتعجب

درر:قصدك راح يحاولون يوكعوه؟
صكر:لالا مو هيج بس للامان

سكتت والدمعة تعلقت بعيوني
عرفت اكو شي صاير
قبل ما ننزل كلت

درر: همة عدهم علم بية انا حامل؟
صكر:شاكين ع العموم مو مهم احذري من الكل وبس
درر:تمام

دخلت للبيت
عمتي كانت جاية قبلي
اباوع اشكالهم مكلوبة
وشفت اثار تكسير صحون
صايرة مشكلة اكيد!

صعدت فوك
والغريب صكر ما دخل للبيت
بقيت محتارة شصاير؟
ارتاحيت شوي بعدها نزلت جوة
شفت ابتهال تنظف

كانت تذب كزاز كومة
رحت الها وكلت

درر:ابتهال صاير شي؟

باوعت علية وبقت ساكتة
حسيتها ضايجة مني
كلت

درر:مضوجتج بشي انا؟

ذبت مكناستها وكالت

ابتهال:قبل ما تفوتين لهالبيت ما كان الوضع هيج

رفعت حاجبي متعجبة

درر:شلون كان؟
ابتهال:صكر ما كان يتجاهل الكل هيج ولا تعود يمشي ومايلتفت ع بناتو كلام سهير صح انتي بكتي من اهلو وناسو انتي بكتي صكر من نفسو اصلا

ابتسمت ودمعت عيوني

درر:قصدج انا جاي احرض صكر حتى ما يلتفت عليكم مو؟

حست ع نفسها وكالت

ابتهال:انا اعتذر لا تفهميني غلط بس صكر من يوم الهواج ماعاد صكر الاولي
درر:مقصر بحق ابو وامة؟
ابتهال:مقصر بحق نسوانو وبناتو
درر:نسوانو؟

ارتبكت لان حسبت نفسها زوجة الة

ابتهال:اقصد سهير
درر:وانا اللي حرضتة او هو اللي مو عاجبة يلتفت

سكتت
كلت بهدوء

درر:خليها ببالج صكر مو طفل حتى مرة تتحكم بي وانا مركزة ع نفسي وبعيدة كل البعد عنكم ياريت تفهمون هالشي وتقدروه

اجيت اكوم
كالت

ابتهال:لا تكولين لصكر هالكلام
درر:شبيج خايفة مني لهالدرجة انا سيئة بنظركم؟
ابتهال:لا بس انا زودتها بالكلام عذريني لان انقهرت صارت مشكلة جبيرة وانكلب البيت
درر:بين منو ومنو؟
ابتهال:صكر وسهير
درر:وليش؟

كالت بأرتباك

ابتهال:سهير عرفت انتي حامل
درر:ومنين عرفت؟
ابتهال: تحليلج

كلت بتعجب

درر:تحليلي؟ شوصلة الها؟

انكلب لونها
حسيت اكو كارثة صايرة
مشيت بسرعة لفوك
باوعت لباب الغرفة القفل متغير
وكأن ذاك مكسور!

سهير مستغلة عدم وجودي
وداخلة للغرفة ومفتشة بأغراضي
والله اليعلم شمسوية بعد!!
بأي حق؟؟

احس نار وشاعلة بية
نزلت بسرعة ودون ما احس رحت لغرفتها
فتحت الباب ودخلت عليها
لكيتها كاعدة ع سريرها تبجي
كلت بصياح

درر:انتي بأي حق تدخلين لغرفتي بدون علمي وتفتشين بأغراضي؟؟

مسحت دموعها وابتسمت

سهير:وانتي شبيج مثل ال... هاجمة علية؟
درر:احترمي نفسج
سهير:لا تخافين انا مو مثلج ابوك الزلم بالسحورة
درر:انا ما بكت احد ولا سويت سحر
سهير:وهسة لازم اصدكج؟ انتي انسانة نكسة

صحت

درر:خليج محترمة نفسج لا اخليه يطلكج والله

بهالاثناء دخلت عمتي للغرفة
صاحت بية

:درر شهالكلااام؟
سهير:عوفيها عوفيها حكها تكول هيج عجل ممشية ابنج ع اوامرها
:ابني زلمة ما تمشيه مرة اكضبي لسانج سهير
سهير:ابنج زلمة من يوم شاف هالصفرة نسة مسؤلياتو

طلعت من الغرفة واعصابي ترجف
اسمع ام صكر تصيح

:جوعانةةة عريانة انتي وبناتج؟؟؟ وين تقصيرو عليكم؟؟

وسهير تردها بصوت مقهور

سهير:خليه يلتفت علينة ويكول محتاجين شي؟ انا ما محتاجة شي بكد ما محتاجة هالكلمةةة

رغم عصبيتي دمعت عيوني
صعدت فوك
معقولة انا لهالدرجة ظالمة؟

عم الهدوء بالبيت
وبعد فترة اجة صكر
دخل للغرفة وانا كاعدة بمكاني
ما كمت
كال

صكر: درر شبيج؟

باوعت الة ما اعرف شكول
وكفت كدامة وكلت

درر:انت ليش سويت كل هذا؟
صكر:شسويت؟
درر:ليش حبيتني وانت بهالوضع ليش حاربت الدنيا حتى تاخذني ليش عاندت كلشي؟

عقد حاجبة

صكر:ليش تسألين هالاسئلة وليش بكل مرة ترجعين للمربع الاول

كلت بعصبية والدموع بعيوني

درر:لان احنا بعدنا نسكن بالمربع الاول وعمرنا ماراح نتقدم واللي يصير كلة وهم
صكر:الطفل اللي ببطنج وهم؟
درر:ليش وصلتتي لهالمواصيل ليش تعيشني ابشع شعور بالعالم؟ انا شنو اللي سويتة حتى اتخلى بهالموقف؟

كال وهو مستغرب

صكر:موقف شنو؟ احد اذاج بشي؟

اشرت ع قفل الغرفة وكلت

درر:لو ما اصرارك ع دخولي لحياتك ما كان انكسر هذا وانكسرت ويا هواي قلوب

صفن ع الباب

درر:انت شنو ظنك انا ما راح انتبه او ماراح ادري ؟
صكر:ليش تكبرين المواضيع ؟
درر:لان لازم تكبر
صكر:من يوم الجبتج لهنا محافظ عليج من الكلمة ومخلي نفسي ساتر صد كدامج كل هذا وبعدج تكولين ليش وليش عجل لو مأذيج شتسوين؟

وكعت دموعي وكلت

درر:اكو اكبر من حجم اذيتك هاي؟ تجيبني وتعيشني حياة وكلة جبر بجبر؟!

عروقة برزت
كال بهدوء

صكر:متندمة درر؟

ما رديت
ابتعد عني وهو يفتح ويسد بقبضة ايدة
احسة يتمالك اعصابة
اخذ مفاتيح سيارتة وطلع..

طلعت وراه
صعد سيارتة وراح
وبقيت واكفة اباوع ودموعي توكع

انا ليش وصلت لهالمواصيل
انا ليش هيج صار بية!
التفتت حتى ادخل جو
صار بوجهي رماح!!
كال

رماح:خير درر عيني صاير شي!؟
........

بغداد
الساعة ال5 عصرا
هرم

كاعدة بوسط الحديقة
اقلم اغصان الورد
وع وجهي ابتسامة

هل ياترى انا سعيدة فعلا
ام هذا شعور وقتي
واللي امر بي سعادة وقتية
حتما تزول!؟

رن فوني
نفضت ايدي وكمت
هذا ابان
فتحتة وخليتة ع اذني
واجاني صوتة

ابان:يابة شلونهم الجماعة
هرم:مشتاقيلك
ابان:يكدرون ينتظرون يومين بعد؟
هرم:ليش مو ع اساس اليوم تجي؟
ابان:اجلوا نزولي بسبب العمليات

سكتت
كال

ابان:ضاج حبيبي مو

رجعت اقلم الورد واكول

هرم:حضرتلك حلويات
ابان:ميخالف ضميها
هرم:تصير مو طيبة
ابان:ارجع سويلي جديدة
هرم:هو هم هيج
ابان:والله وصار اكو من ينتظرني

ابتسمت

هرم:ترا خالة تنتظرك قبلي
ابان:وخالتج راح تنومني بحضنها؟ انا اقصد حضن حضن

ضحكت

هرم:عزا بعينك ابان
ابان:شعبالج لعد
هرم:شداتسوي؟
ابان:متمدد وداتخيلج
هرم:تحبني؟
ابان:اكيد
هرم:تكدر تبتعد عني؟
ابان:لا
هرم:الله يخليك الي
ابان:ويخليج يا فرحتي

كملنا كلامنا وراح
سديت الفون وانا اكول لنفسي
اخيرا ابتسمت الحياة الج يا هرم

هاي الايام اللي تمر
حسيت نفسي بيها بشر
كانت ايام من العمر
نسيت الدنيا كلها وركزت ع ابان
نسيت حياتي وطموحي واهلي
وعشت لنفسي ولأبان..

دخلت شوكة بأيدي
الدم صار ينزل وحسيت بوجع قوي
ما اعرف ليش حسيت الوجع مو بأيدي
انما بقلبي

غسلت ايدي ولفيتها
بلغت عمتي بعدم جية ابان
وصعدت للغرفة صرت ارتبها

مرت يومين
واليوم واكفة اسوي بسبوسة
انتظر جية ابان

فجأة اندكت الباب
معقولة ابان اجة!؟
بس هو ما يوصل بهالوقت
ولا يدك الباب!

خليت الشال ع راسي وطلعت
فتحت الباب وانا متلهفة
سرعان ما تلاشت الابتسامة عن وجهي
وانا اشوف الذيب!

فتحت عيوني مصدومة
كلت بأرتباك

هرم:اجيت!؟

ابتسم الي
وقدم قصاصة صغيرة
كال

:هذا العنوان ومن تروحين اخذي الاجراس وامج راح تعرفج

اخذت الورقة منة
وايدي ترتجف والدمعة بعيوني
صرت اتهجى المكتوب

البصرة_ كرمة علي
___

وتفاصيل هواي
رجعت باوعت الة
لكيتة رايح..

سديت الباب واعصابي ترتجف
ليش من ماتت رغبتي بلقاء اهلي حصلت عنوانهم!
تمشيت للداخل ودموعي توكع
لكيت بان تصب البسبوسة بالقالب وتكول

بان:هرم مدري شصاير بيج مستحيل تكملين شغلة

صعدت لفوك وانا ارجف
وكل مواقف الطفولة انعادت بذاكرتي
سديت الباب وكعدت بالكاع
لميت رجلي لصدري وصرت ابجي

انا هرم التائهة بوسط زحمة الحياة
اللي مو كادرة تنسى جرح اهلها
ولا راح تنساه

عيوني تتأمل حروف العنوان
ودموعي توكع واخاطب روحي
اللي سعيت الة صار بين ايدي
ليش رغبتي معدومة

ليش احسني هونت
مااريد التقي بأمي
مااريد اعيش جوهم من جديد
تعبت من التأقلم..

كمت ووكفت كدام المراية
رفعت المزهرية وخليت العنوان جواها
مسحت دموعي

انا بديت حياة جديدة
انا سعيدة
مستحيل ارجع للماضي

دخلت سبحت
نزعت كل ذكرياتي
وكنت اصبر روحي واكول

عشت بوحدي وراح اكمل وحدي
لكن هالمرة بوجود ابان
ووجود امي مو ضروري ابد

عشت معاناة الانسان
وهو يبرد تجاه الاشياء اللي حرق نفسة علمودها
وعشت شعور فقدان الرغبة بعد الالحاح القوي
كان شعور مميت..

مر الوقت بسرعة
واجة ابان
لكيت نفسي مثل الطفلة ومتلهفة لحضنة
لكيت نفسي متشبثة بي ومتمسكة
لحد قطع النفس..

لكيت نفسي ما اسوى شي بدونة
وهو كان يضحك ويكول

ابان:يربي هرم شبيج هالمرة راح تاكليني

وانا ابجي بهدوء
واهمس الة

هرم:مشتاقة

عشت هالليلة بكل تفاصيلها
وكانت من اجمل الليالي
وكنت احس بمرور الوقت قربي من ابان
يزيدني احساس بالحياة

كنت ما امل منة
ولا احس يومي يكمل بدونة
تعلق غريب
تعلق انسان فاقد للاحتواء ولكاه

وصارت تمر الليالي
وكل ليلة الكة روحي ضايعة بعالم ابان اكثر
واحبة اكثر

ما كنت ادري اليحب هواي يتدمر..
وكلشي هواي راح يأذي هواي..

بعد ليلة حلوة قضيتها ويا
كعدت اعدل شعري ولا ازال نعسانة
وهو كان يبدل امام المراية
صار يمشط شعرة

كمت من مكاني ورحت يمة
كلت

هرم:تحبني؟
ابان:متملين من هالسؤال
هرم:زين عندي سؤال ثاني
ابان:وهو؟
هرم:تتخلى عني؟

صفن
عقدت حاجبي وكلت بزعل

هرم:هاااي شنو شو السالفة بيها تفكير؟
ابان:ماكو تفكير
هرم:لعد

ذب المشط ع الميز
باوع ع المزهرية وكال

ابان:هاي شنو؟

سحب القصاصة اللي بيها العنوان
ابتعدت عنة وانا اعدل الفراش واكول

هرم:عنوان اهلي جابة الة الذيب

كال بصدمة

ابان:وليش ما كلتي؟

ابتسمت

هرم:احسة مو مهم وو..

قاطعني وكال بسرعة

ابان:انا طالع شوي وارجع حضري نفسج بسرعة

كلت بأرتباك

هرم:وين!؟

كال وهو يلبس حذائة
وما باوع الي ابد

ابان:اوديج

رفعت حاجبي متعجبة
واحس كلبي انعصر
طلع بسرعة من الغرفة

شوي وصعدت بان
كعدت يمي وكالت بنبرة حزينة

بان:هرم صدك السمعتة!؟

باوعت الها وعيوني مدمعة
مصدومة من ردة فعل ابان
مدري مصدومة من الواقع!
يمكن ظلمتة

يمكن يريد ياخذني حتى التقي بيهم وبس
يعني ما راح ينتهي كلشي بينة

لليل ما اجة
وانا الحيرة والقلق لعب بروحي لعب..
وكل شوي اسأل نفسي

شنو اللي صار!؟

مرت يومين
وابان ما اجة للبيت
اخيرا قررت اتصل علية
ورد الي

ابان:الو
هرم:وينك؟
ابان:كملت كنت بس اتأكد
هرم:تتأكد من شنو؟
ابان:عنوان اهلج ووضعهم وسمعتهم
هرم:بس انا...

قاطعني

ابان:حضري نفسج راح اجي اوديج

وانغلق الخط!!
دمعتي وكعت
وبعدني اكذب نفسي
لا لا راح اروح التقي بأهلي مجرد زيارة

كمت وصرت البس
دموعي توكع واباوع لكل تفاصيل المكان
مااعرف ليش احس اكو خنكة بروحي

ومو كادرة افهم شنو اللي صاير!
لحد ما اجة ابان
باوعت الة كان منصي راسة
يتجنب النظر لعيوني

شال جنطي ونزلها جوة
اخذت اجراسي وتبعتة
شفت الخالة مقهورة وبان تبجي

مااعرف شلون ودعتهم
بس عيني ع ابان
اللي كان ساكت ومتجاهل

مشيت وياه وطلعت من بيتهم
وانا اسأل نفسي
معقولة هذا اللقاء الأخير!؟

وصعدت السيارة
وبداخلي ضجة جبيرة
روحي تعلقت هنا
ليش يصير كل هذا بعد ما عشت وتعايشت ونسيت!؟

وتوجهنا للبصرة
السكوت كان سيد الموقف
وابان ما باوع الي بنظرة

طريق طويل
وخنكة لا متناهية
وجع عميق بروحي
ودمعة محبوسة

"البصرة ترحب بكم"

جا ليش طردتني من سنين وما رحبت بية!

"هلي"
"وشما يمركم بشر متعوب"
"هذا انه"

بدت تتسارع دقات قلبي واحنة ندخل بين الافرع
وبديت احس بالخنكة اكثر واكثر
انا صح راح التقي بأهلي
بس راح افارق قلبي..

انا شراح يصير بية!؟

وتوقفت السيارة
وتوقف كلشي
ولعبة اقداري انتهت

باوعت لأبان اشرلي ع باب
واكف يمها رجال ما فسرت ملامحة
كال بهمس كأنما ما يكدر يحجي

ابان:هذا بيت اهلج..

كانت عيوني علية
تاكل تفاصيلة
وبكد تركيزي هو متجاهل

بقيت اباوع الة دون كلام
كال بخنكة

ابان:اي شي تحتاجي انا موجود وشوكت ما تحتاجيني رقمي يمج انا اتمنى الج حياة جديدة حلوة وخالية من التعب ويارب تتعوضين عن كل فترة سيئة عشتيها

سحب ايدي وخلاها بوسط ايدة
وكال

ابان:واعذريني عن كل شي بدر مني وان شاء الله ما قصرت وياج انتي تستاهلين كل خير وانا سألت وتأكدت اهلج ناس طيبين

ميلت راسي
دموعي توكع
كنت انتظر نظرة منة ترجعني للحياة
كنت انتظر كلمة تحسسني بوجودي بكلبة وحياتة
لكن سكت

بلحظتها انا متت
فتحت باب السيارة ونزلت
ما تزال عيوني علية

رفع راسة وباوعلي
وسرعان ما دار وجهة
مشيت مسافة
بيت اهلي امامي
وابان خلفي

والخنكة بروحي جبيرة
مشيت ببطئ
كنت منتظرة اسمع صوتة وهو يكلي "تعالي"
"ارجعي الي"

لكن..
التفتت وشفت سيارتة تبتعد..!!
هنا كلشي انتهى

ليش لازم بكل مرة انترك!؟
ليش نصيبي من السعادة ناقص
ليش وليش!؟

وكعت دموعي وانا اشوف سيارتة تختفي من انظاري
وعم سؤال بروحي
يدك بكلبي

لهالدرجة هرم رخيصة وما اخذت مكان بكلبك!؟
وبعد كل العشتة وياك
لهالدرجة فراقي سهل!؟

فزيت من خيباتي ع صوت مرة جبيرة
وهي تكول

:هُرم يُمة..

يُمة!!!!؟
..........
يتبع

#قرار_العًهر

........#بارت٥٥

شتگولين؟
بيه من العذاب أشكال
وبيج من الضياع سنين

شتگولين؟
اسم الله لگلبي المتعوب
اسم الله لـ دمعة العينين

شتگولين؟
يُمة هواي گالوها
يُمة هواي عاشوها
يُمة هواي انكسر گلبي
وفواتير الزمن كثرن
شتوفين أي دين!؟

مسافة بيني وبينچ
وكلها تروح فدوة لدمعة من عينچ
بس منهو اليطفي الغل البروحي
منهو اليقتنع بالشين صاير زين..

وبعدين؟
شتگولين؟!

تمشيت كم خطوة
رجلي تدك بالارض والصوت محسوس
نبض قلبي يتباطأ

احس الكون من حولي غواش
وهاي ساحة بسيطة
حلبة صغيرة
جمعتني بأنسانة مهزوزة!

انسانة واضح عليها ملامح التعب
وواضح ع وجهها ملامح الكبر
جسد مرتجف
ظهر محني
بدن نحيل..

هيئة تكاد ان تكون منتهية
متعبة من دمار السنين

اقتربت الها دون شعور
وقفت امامها
هذي هي اللحظة المنتظرة..

كانت تباوع لعيوني بدهشة
والدمعة محبوسة بعينها
وانا اباوع لتفاصيلها

ضيعت هواي نظرات بتجاعيد بشرتها
واطلقت هواي حسرات
دموعي مستمرة بالنزول
والكلام عالق بحنجرتي

شنو اللي لازم اسوي هسة؟!
اللي بوضعي شتسوي؟

انا واقفة امام املي البعيد
امام امنيتي اللي سعيت لتحقيقها
اخيرا..

رفعت ايدي بتعب
خليت الاجراس بينة
صرت اباوع للأجراس والها
دموعي تنزل ووجهي خالي من التعابير

اتسعت عيونها وهي تباوع للاجراس
والتفتت بسرعة ع بنية جبيرة
اجت تركض الها وبيدها اجراس تشبه العندي
والبنية كانت تشبهني..

سحبت الاجراس من ايدي
وصارت تقارن بيها وايدها ترجف
وتكول بخنكة

ام خنساء:هيي والله هييي

ذبت الاجراس بالكاع
جرتني من كتفي وتباوع لوجهي
وتصيح

ام خنساء: خنساااء شوفيها تشبهج عيونهااا مثلج هذي اختج اختج ه.هرم

سحبتني بقوة لحضنها
احس مشاعري متجمدة!
صارت تبجي بصوت مسموع
كانت تنحب
حسيت برجفتها ودقات كلبها
حسيت بوجعها..
بس كنت فاقدة الاحساس بنفسي..

راسي ع كتفها
هاي امي..
امي اللي شمرتني بعيد
اللي قاسيت انواع العذاب بسببها..

هاي امي..

غمضت عيوني
صغيرة واركض بدرابين الغجر
لبستني الدنيا ثوب العهر..
كان قرار مفروض
ما كان قراري ابدا..

رجلي اللي تدب على الارض بوقت الفجرية
السيارة الصفرة اللي صعدت بيها
الطريق الطويل الوعر اللي عبرتة
الخنكة العشتها

عيونة السرقتني من عالمي
ايدة القوية اللي هشمت عظامي..
صفعاتة المجنونة
الدم اللي نزف من راسي

ذاك البيت الخالي من الحياة
وحدتي..
كعدتي الطويلة وحدي

ترددة علية
زياراتة المفاجأة الي
قربة مني
اول بوسة..

الندم
هروبي لعالم اخر
الليل وغربة الشوارع
نحيب روحي
لسعات البرد

رجوعي الة
مثل رجوع الناعور للماي من جديد
خيبتي بخطوبتة
ضياعي..
الكلام الخادش من امة

احكام المجتمع
العادات والتقاليد
دماري ومحاولاتي للتأقلم

شيرين و المشاعر
عقدنا..
نظراتنا
مشاعرنا اللي انحكم عليها بالموت..

هروبي ورجوعي للغجر
الالم اللي عانيتة
الوجع العشتة
الضرب اللي طبع جسمي
الحزام اللي اكل مني جزء

صوتة من جديد
وجودة من جديد
عطرة مرة ثانية
دفو صدرة
احتواءة الزائف

صدي عنة
تجاهلي الة
جنونة
خضوعي من جديد
محاولات تأقلمي المالانهاية

تقبلي الة
الذيب
عناوين اهلي
اخ يا اهلي

اول ليلة
اول شعور
والضياع للمرة الالف

وبعد كل هالطرق اللي سلكتها
وبعد ما قلبي اصبح باب مرجية
ارجع غريبة مثل ما كنت غريبة

اخر نظرة بينة
صوت سيارتة وهو يبتعد
و امي..

فتحت عيوني ولا يزال راسي ع كتفها
صاروا امامي بنات 4 بنات
يباوعون الي والدموع بعيونهم
كأنما يخبروني انا الخامسة اللي انحكم علية ان اكون بعيدة عنهم
اقاسي مر الشعور

وكعت دمعة من عيني
ابتعدت عن امي
باوعت للشارع
هذا مو مكاني..

ابان وين!؟
وانكسر واهس كلبي من شفت كل الاماكن فارغة منك
احس رجلي صارت كـ خيط الحرير
ما حملتني

وكعت بالارض
امي وكعت وياية وصارت تمسح بوجهي
وهي تبجي وتكول

ام خنساء: احجي شي يمة كولي شي

قواي خارت
سندت راسي ع صدرها
غمضت عيوني من جديد
وانرسمت كبالي عيونة

اخ يا عيونة..

هذا الشعور اكبر مني
انا ما اكدر اواجه هالعالم بوحدي
انا تعبت..

فزيت ع صوت شخص يكول

ساهر:ام ياسر امشوا ادخلوا جوة لا تبقون هنا الناس تباوع

وامي تكول بخوف

ام خنساء: دشوفوها شبيها راحت لا ايد ولا رجل
ساهر:ميخالف البنية مصدومة كوميها تعالووووا

صاح ع البنات
اجو يركضون الي
رفعت راسي اباوعلهم
الدموع مالية عيوني

سندوني وكوموني من الارض
عيوني عليهم وذاكرتي عند الغجر
كنت اسأل روحي وكت الفجر

هم عندي خوات!؟

مشيت وياهم
اتلفت ماادري لوين
انا اعاني
انا اعيش اكثر من خيبة بوقت واحد
انا ماادري لمنو..

دخلنة من باب البيت
وي دخولي طلع شاب عمرة بالعشرين
باوع الي وبعيونة دمعة
هذا منو!؟

انا منو!؟
وشنو هذا العالم؟
انا لمنو؟

مشيت مسافة وسمعت رنة الاجراس بأذني
وعج بأذني صوت ابان وهو يكول
"عاهر"

انهد حيلي ووكعت
وصرت ما اسمع غير صراخهم
غمضت عيوني ورحت لعالم اخر

هذا العالم ما لكيت بي غير نفسي
وحدتي واجراسي وخيباتي
لكيت هرم كما خلقها الله
تائهة ضائعة بلا مستقر..

وبعد مرور وقت طويل
فتحت عيوني
لكيت نفسي بغرفة صغيرة دافية
امي تحوم بالغرفة قلقة
واسمع صياح بنات برا

خنساء: كلتلكم كااافي عاااد
درر:شنووو هو الكااافي هااا؟ انا هسة شكول لصكر؟ طلعت عدنة اخت فجأة؟!
مرج:درررر شكد حجيتيييي
درر:امي شلون تضم عنة هيج موضوع
وسماء:احس راسي راح ينفجررر مجاي استوعب

خنساء: كافي كافي البنية حتموت من صدمتها وامي حالتها تعبانة وانتو بعدكم تتناقشون؟؟
درر:اذا انتي حسن مايكول شي ويعبر السالفة فأني صكر مستحيل يقتنع خاصة اذا عرف وين كانت عايشة محلاها والله اختي تطلع ..... ودايحة بالغجر
مرج:دررررر الزمييي حدوووودج

وعم الصراخ بينهم
عصرت ايدي بقوة
هذول الخوات يحجون بشرف اختهم
ليش اعتب ع ابان!؟
سمعت وحدة بيهم صاحت

مرج:كااافي كل وحدة بيكم تفكر بنفسهااا خلونا نفكر بأمي وبالنايمة جوة وماتعرف شنوو وضعهااا
درر:انتي عندج كلشي عادي لانج من زمان تدرين
مرج:انا ما ادري بس انا مو انانيية مثلج كنت اشوف الضياع بعيون امي يعني البشر ميحس؟
وسماء:انا اكول بدل هالكلام هذا المالة داعي خلو ساهر يشوف حل للبلوة اللي جابها علينة
خنساء:مووو بلوة وهي اختنا وهذا الموجود

درر:وليش ذبتها امي؟ ووين ذبتها بالغجر؟ شمعنى هي الوحيدة بينة هيج صار الها؟
وسماء:زين فهموني ياسر منو احنة منو هالبلوة هرم منوو؟؟
مرج:اسكتوا كافي امي راح تنفجر
خنساء: اكيد راح تكعد وتفهمكم كلشي
درر:ما تفهمينا انتي بما انج تعرفين بالعهر وساكتة

صاحت بصوت رج البيت

خنساء: بالعباااااس ابو فاضل اذا مااااا سكتتي اوكع سنونج بحلكج كاااافي احنةةة مو صكر ونسكتلج لا تتطاولييين

وكعت دموعي
نهضت نفسي
امي اجت تركض الي
كعدت كدامي وصارت تتلمس وجهي
والدموع بعيونها
وهي تكول

ام خنساء: انتي بخير!؟

همست واحس حنجرتي مجروحة

هرم:انتي منو؟

بجت وهي تكول برجفة

ام خنساء: امج

خلت ايدها عن وجهي
همست بخنكة

هرم: اي شعور ما عندي تجاهج كل المشاعر مطفية انا انتظرتج هواي بس فات الأوان

وكعت دموعي

هرم: انا اشبه بالشمعة اللي استمرت بالذوبان لحد ما غرقت بنفسها وانطفت وجودج هسة ما الة داعي ولا عاد مهم

لزمت ايدي حتى تبوسها
سحبتها منها وكلت بأشمازاز

هرم: ابتعدي عني وجهج اللي تشوقت حتى اشوفة صرت اشوفة هسة بملامح شيطان
ام خنساء: كولي اللي تكولي شكو ببالج قهر فرغي انا امج اسمع الج واستاهل انا استاهل والله

بعدتها عني
سندت نفسي وكمت

هرم:اساسا انا شنو اللي مبقيني هنا؟ انتي تخليتي عني من زمان ابقي ع تخليج حتى لهفة السؤال ماتت بروحي كنت محضرة كومة اسئلة ومن شفتج انهارت ظنوني وادركت عذابي العشتة بسبب ضعفج انتي انسانة هزيلة

مشيت حتى اطلع
فجأة وكفت ودمعت عيوني
وتذكرت..
لوين اروح؟!
ابان تركني..

لحكتني امي ولزمت ايدي
وهي تبجي وتكول

ام خنساء: فدوة يمة بس افهميني

بعدت ايدي عنها وكلت

هرم: شنو فرقي عن ذول ال4 اللي ربيتيهم وصرتي مسؤلة عنهم ليش انا مشردة وليش همة يمج؟

ضربت وجهها وكالت

ام خنساء: حكم القوي ع الضعيف والزمن غداار يا يمة والدنيا حقيرة وانا انا ما بيدي شي والله

مدت ايدها كدامي
كانت ترتجف
كالت

ام خنساء: شوفي ايدي خالية من الحياة شوفيني كلي ضايعة وتايهة ومجبورة ع الدنيا يمة الدنيا ظلمتني وظلمتج وظلمت خواتج وياج

دمعت عيني
همست

هرم: خواتي؟ اي خوات تقصدين؟ اللي وصفوني بالعاهر والحقيقة الانسانة اللي ربتهم وكبرتهم وتعبت عليهم هي العاااهر

فقدت اعصابي للحظة
رفعت اصبعي بوجهها وصحت

هرم: انتييي العاااهر وانا اجيت لهنا حتى اعرفج بقيمتج واسلمج الاسم اللي حملتة سنيين وانا مالي ذنب

صارت تبجي
التموا البنات
كلت بخنكة

هرم: من قررتي تشمريني عند الغجر ما فكرتي بسلبيات قرارج؟ ما فكرتي بقرار العهر؟! ما فكرتي بأحكام الناس وليالي الغنى والسهر؟

ضربت زندي وصرخت

هرم: ما فكرتي هالترافة تضيع بأيد البشر؟ شلون تنامين ليلج وتاركتني اعيش ببشاعة قرارج شلوون؟

اقتربت الي وحدة منهم
تشبهني هواي
لزمت ايدي وكالت

خنساء:هرم اهدي مو هيج التفاهم

دفعت ايدها وكلت

هرم: انتي منو؟

دمعت عيونها

خنساء: اختج خنساء

هزيت راسي بمعنى لا

هرم: فاهمة غلط كلش غلط انا مو اختج تعرفين ليش؟
خنساء: ليش؟
هرم:انتي تربيتي بهذا البيت لانج بنتهم بينما اني شمرتني بالغجر لاني بنت حرام وهذا الفرق

صاحت بية وحدة
وجهها كان ملفوف اثر عملية

وسماء: احترررمي نفسسج ولا تكولين هالكلام ع امي فاااهمة؟

ابتسمت بحزن
وانا اشوفها تدافع لامي اللي مااكدر ادافع الها ولا اكدر اطلع الها مبرر
قهرني الفرق

هرم: تعرفين شنو الفرق بيني وبينج؟ انتي تكدرين تدافعين الها لانها صاينتج بس انا ضيعتني وهانتني
درر: وهسة شنو راح نبقى نحجي بالضياع لو راح نفهم السالفة؟

باوعت ع امي ورجعت باوعت الها

هرم: لهالدرجة انا سر محد يدري بي
خنساء: اهدي وراح نكعد كعدة حبايب وتفتهمين كلشي
هرم: كعدة حبايب؟ انا اكعد وياكم؟

ردت الي وحدة منهم
كانت حلوة هواي
وبكد جمالها مليانة حقارة

درر: طبعا تستغربين اللي متعود ع كعدات الغجر ما تلوكلة كعدات العائلة

دون ما احس هجمت عليها
كفختها ع وجهها بقوة
امي صرخت وصاروا يبعدوني عنها
تدخلت وحدة بيهم ودفعتني
وصارت تصرخ

مرج: انتييييي ما تبطلين من حقااارتج هاااي الى متى تبقين هيييج هاااي اختج مو ضرة من ضرايرج
درر: شووفي كلامهااا شلون تحجي
خنساء: وبعد كل الصاير بيها ترديها تسكت؟؟

باوعت لامي تبجي وساكتة
حتى هسة ما تكدر تدافع الي..
وكعت دموعي بأسف
واجيت اطلع
بس تذكرت وين اروح؟!

اقتربت الي اللي اسمها خنساء
لزمت وجهي وصارت تمسح بدموعي
وتحجي وتتلمس وجهي

خنساء: انا اختج الحبيرة انا خنساء ومااستعير منج وما اضوج وانا من زمان ادري بيج انا شلت سرج من طفولتي وماعندي شك ببرائتج ولا الومج بس بنفس الوقت امنا مسكينة

صارت تشهك وتكول

خنساء: لو عايشة حياتنا راح تعرفين شكد امي مسكينة انا انا اعرف مرارة العشتي اعرف التعب الشفتي بس وحق عيونج احنا هم عانينا وتعبنا وكلنا ما مرتاحين

اخذتني من ايدي ومشت

خنساء: تعالي تعالي اكعدي هنا يمي تعالي وخلي امي تسولفلج وتسولف الهم وتفهمون

كعدت يمها
وخرت شعري عن وجهي

خنساء: كل حرف راح تسمعي راح تفهمي صح انتي عكسنا كلنا انتي من كد ما الحياة اذتج تعرفين شنو يعني الاذية

همست بخنكة

هرم: المواساة ما تحرر وطن
خنساء: بس تهود وجع الروح

باوعت لامي وكالت

خنساء: اكعدي كبالها واحجيلها كفري عن ذنبج ولو شوي لا تخليها تاكل بروحها اكثر واكثر

اجت امي تمشي وترتجف
كعدت كدامي
رفعت الاجراس وكالت

ام خنساء: كان عندي امل هالاجراس تكون دليل بيوم من الايام بس ماعندي امل اشوفج
خنساء: وهسة؟
ام خنساء: شفتها

كلتها بخنكة

هرم: شنو المبرر اللي يخلي انسانة تشمر قطعة منها عند الغجر؟

مسحت دموعها بشيلتها
وكالت

ام خنساء:
بعمر ال13 سنة
طفلة صغيرة لكن عقلها جبير
مسؤلياتها هواي
يتيمة وعايشة عند خالتها

تجيب منا تودي هنا
مسؤليات الحياة اكبر مني
اكبر من طاقتي
مسؤليات الحياة كبرنّي
وضيعن سنيني
ونسنّي

تقدم الي رجل فقط بالاسم
وتزوجتة بهدف الخلاص
والبدء بحياة جديدة

صرت اعيش انواع الذل والاهانة
وباليوم انكتل 3 مرات
عشت وياه ملتزمة بوصفة طبيب

كتلة بعد الريوك
كتلة بعد الغدة
كتلة بعد العشا

يمر الليل بقساوتة
وانا بوحدي
انا شنو ذنبي؟
لليوم ما اعرف شنو ذنبي
وليش قاسيت انواع العذاب
دون رحمة..

زالت وحدتي بطفلة صغيرة
كانت خنساء..
رغم المعاناة العشتها
بس وجودها سلوتي
وفرحني هواي

عكس ابوها
اللي كان يكره البنات لدرجة
خنساء طفلة ما يتجاوز عمرها السنة
ويضربها بوحشية حتى تموت..

كان دائما يكلي البنية عار
انتي عار
كل مرة بالكون هي عار
والشرف الوحيد ع الارض هو الذكر

ع الرغم تصرفة ما يمت صلة للبشر
فما حال الرجولة؟!

رزقني الله بدرر
كانت فلعة كمر
بس اشبه بالقرد بنظر ابوها
وصارت تعاني معاناة اختها وتنضرب
وادافعلهم وننضرب احنا ال3

ومن جديد رزقني الله بمرج
وزاد عذابي اضعاف
بقدوم مرج صرت اميز بين الالم الخفيف
والالم القوي
بين موت المشاعر او احياؤها

لهذا كانت مرج
جمعت بين شيئين متناقضين..

تمنيت لو عندي رفاهية الاختيار
واتوقف عن الولادة
كنت اتعذب واكو ارواح تتعذب وياية
لكن ما اكدر
كنت مجبرة بكلشي

حملت
ومن عرف ابوكم بخبر حملي
اخذني من ايدي وذبني بالشارع
دنيا شتا والليل ظالم
وشمركم علية وكال

: اللي ببطنج اذا ما يطلع ولد اذبج بالشارع انتي وبناتج وهذا يكون مصيرج

وسد الباب بوجهي
لميتهم بحضني وكعدت
كل شوي اكول لروحي

هسة يطلع ويرجعنا للبيت
مايسويها ويخلي عرضة بالشارع
طلع الفجر
وابوكم نايم ومتنعم بالدفو
وما طلع الي..

خلص ليل الشتا
روحي خلصانة والف حسبة ببالي
برد الجو مرضكم وبرد المشاعر مرضني

رجعني للبيت
بعد ليلة عشتها وي كلاب الشوارع
وهو يكول الي

: ميخالف هاي گرصة اذن حتى اللي ببطنج يطلع ولد لان اذا بنية اذبكم كلكم بالشارع وانا حذرتج وانتي تعرفيني

وبدت معاناة جديدة
وخوف جديد
تعذبت وتعذبتوا وياية

وصلتوا للموت اثر البرد
واحتاريت بيكم
بكل مرة ارفع راسي للسما
اريد اعرف انا ليش هيج من دون البشر؟

ما الكة جواب
الكة عذاب..

خالتي مرة جبيرة
زوجها متزوج عليها لان ما تخلف
اروح الها وتهون علية وجعي
لكن هيهات

يمة ما يحمل همج غير كلبج
والباقي سراب..

تقدمت اشهر الحمل
اللي ساكنة ببطني عكس كل خواتها
ما عذبتني ابد
ما تأذيت بحملها
كانت رحمة الي
بس انا كنت عذاب

التحق ابوكم للعسكرية
تمرضت خالتي ووصفولها معشب عند الغجر
ماعدها احد يروح وياها
اخذتني..

تركتكم يم ضرة خالتي
كانت خوش مرة وفقيرة
وصغيرة بالعمر
ومن اول حملها مات رجلها وعاشت هي وخالتي بالقهر

وخالتي خلصت عدتها بالمرض
الى ان لكت هذا المعشب
واخذتني الة رغم تطور اشهر حملي

استقبلونا الغجر
واحترموا خالتي لكونها مرة جبيرة ووقورة
وبقينة هناك يومين
خالتي اخذت علاجها
وبقت تباوع علية

اذكر كلت الها

: خالة خلي نرجع ما مرتاحة للمكان وبنفس الوقت البنوات اخاف عليهم

كالتلي بنبرة لليوم ما انساها

: اخذت علاجي وبقة علاجج يمة اللي ببطنج بنية وشوفي جارة لروحج وين تروحين ورجلج جلب انا مواتة ما دايمة الج وماعندي شي يسندج

دموعي صارت توكع
وصرت اسأل نفسي
شنو الحل اللي لازم اسويه؟

من خوفي ورهبتي
بدت علية اعراض الولادة
الحرمة تصرخ يا رب من تولد
انا اصرخ كونك ولد مو بنية..

وانتهت معاناة الولادة
وبدت معاناة جديدة
وهي ولادة هُرم

يمة انا من يوم الولدتج للان أطلگ

وبقيت اباوع عليج
واباوع لروحي
شنو اليجبر مرة تذب بزرها

الحرام؟!
لالا اكو شي اقوى من الحرام
هو موت الضمير

مو ضميري الميت
ضمير ابوج
وبعد ما سلمتج بأيدهم انا كلي متت

وراح عقلي
وتشتت تفكيري
وصرت اسم بشر يمشي ع الكاع

كان لازم اختار
اخذج ونغرك كلنة
لو اضحي بيج لخاطر الباقين؟!

وضحيت بروحي وبيج بيوم واحد
بالوقت اللي خليتج بأيدهم
خليت روحي وياج

ومن مشيت وشايلة الاجراس
شلت نعشي
انا وانتي متنا بيوم واحد..

كومة سلاسل انقطعت
هذا الج وهذا الها
عسى ولعل تجمعكم الحياة
ولو ما اظن

هذا كان كلام الرجال اللي اخذج
كان يشتري خاطري ودموعي بكومة سلاسل..

امشي ودموعي ع خدي
وخالتي تسحب بأيدي
اتلفت واحس روحي محتركة

وارفع ايدي بحركات واهية
كأنما نادمة ع ضياع حلمي
واتمنى لو ارجع
لكن القرار مو قراري!!
ولا بيدي

دمعة حارة حركت خدي
وشعلت احاسيس مطفية بروحي
كلت واتنهد اثر الوجع والقهر

: خالة شلون اعوفها هنا خالة هايه قطعة منييي

وترد خالتي بصوت متعب

: ولج يمة الله يعرف حالتج انتي مجبورة

وتسحب بية واني اتلفت
الى ان عبرنة هالمنطقة المشؤومة
وصعدنة بسيارة بيهه عالم هواي

بوقتها كعدت وخليت ايدي ع راسي
وصرت اون
اني هم انحسب بشر بعد اللي سويتة؟؟

هم عندي كلب ودم ومشاعر واحس؟؟
ماعندي خيار ثاني امامي
بس شلون كلبي نطاني وفضلت روحي ع روحي

تحركت بينة السيارة
وصوت صراخ عج بأذني
باوعت بنظرة شاحبة لذاك المكان

ودموع الم تكورت بعيوني
ضغطت ع الاجراس بأيدي بقوة
الى ان بعدت المسافة

حسيت ع قطرات حارة توكع ع رجلي
باوعت وشفت دم
رخيت ايدي وشفت الاجراس ملطخة بدمي

رجفت شفافي
راح يجي يوم وتكون هالاجراس دليل؟؟
لو راح ابقى مضيعة روحي؟

ووصلت لهنا
منتهية وتعبانة
طلعت مليانة ورجعت فارغة

وكلت من يجي ابوكم اتحجج
واكلة ولدت بنية وماتت..

ماكان عندي احد اشكيلة ويحس بية
شكيت لخنساء وحجيت الها كلشي
ورغم صغر عمرها وعدتني يبقى سر

ضمت راسي الها وصارت تربت ع كتفي
بأيدها الصغيرة
كأنما تكول الي ان الدنيا بخير
ع الرغم الدنيا ابد ما كانت بخير..

سمعت صراخ بيت خالتي
رحت الهم وانصدمت
ضرة خالتي توفت ع الولادة

بعد ما جابت ولد
باوعت لتفاصيل الولد
وتذكرت هُرمي التركتها

ودموعي صارت توكع عشرة عشرة
لكن شيفيد؟
تمنيت لو اكدر ارجع واخذها
لكن خوف وضعف
وقلة حيلة

لزمتني خالتي من ايدي
كالت الي

: يمة هالولد اخذي وربي وكولي لرجلج هذا ابنكم

فتحت عيوني مصدومة
وكلت الها بهاي العبارة

: اربي طفل مو طفلي واذب اللي طلعتها من بطني؟ هاي عدالة؟؟

لزمت ايدي وكالت

: سكتي الشيطان العندج لان مايرحم وانتي يمة جاي تحبلين اذا ولدتي بنية ثانية هم تذبيها؟!

وهنا ادركت
وجعي لا متناهي
ولازم الكة حل لروحي
بوقتها سألتها

: خالة هذا ماعندة اهل يسألون عنة؟

كان ردها

: المقطوع من شجرة مو شرط يكون ما عندة اهل بس يمكن اهلة ما عدهم رحمة وخوال هالطفل اول ما ماتت اختهم كالوا ما نريدة

شلتة بأيدي
وباوعت لتفاصيل وجهة
يمكن من اربي انساج؟

يمكن الله يرحمني لان تكفلت بيتيم
ويرحمج لان انا رحمت بأبن العالم
مبدأ غريب

سميتة "ياسر"
عسى الله ييسر اموري
وكل ما اصيح الة اتأمل اسمة حتى ما انسى السويتة
واصيحلة بشكل منفصل

"يا سر"
وكان فعلا سر اخاف لا بيوم ينكشف
واليوم انكشف وظهر كلشي..

ما حصلت جائزة لان جبت الولد
وبقى ابوكم نفسة ع حقارتة ما تغير
بس كدرت ابقى بالبيت وما اتشرد
وكدرت احافظ ع مصير وسماء
وامنعة من الاندثار

والضحية كانت هُرم
....

كانت تحجي
والدمعة تلالي بعيوني
اسوء اكتشاف يكتشفة الانسان

ان يكن وجودة غلطة
ان يكن وجودة والعدم واحد
يعيش عمرة كلة وهو زلة

خليت ايدي ع راسي
اذا اعذرج راح اكون مذنبة بحق نفسي
واذا القيت اللوم عليج ماراح اطلع بنتيجة

انا كلبي ملچوم
جرحة ما يطيب ابد..

حسيت عليها اقتربت الي
سحبت راسي لصدرها
وصارت تبجي وتكول

ام خنساء: لا تلوومينيي وتكولين حاربي ودافعي عني وعيشيني ووو يمة انا بوحدي وسجاجين الحياة هواي..

هنا صرت ابجي بقوة
بجيت هواي
كأنما بكاء شخص محروم
شخص اول مرة يجرب نزول دموعة

بجيت وجع كل المواقف العشتها
وكل الاذى اللي تأذيتة
صرت احس الشهكة تطلع من كل جسمي

صرت احس كلبي ينازع ويرفس
من قوة الوجع العشتة
حسيت هاي النهاية
وانا خلاص راح اموت..

شميت بحضنها ريحة كنت مفتقدتها من زمان..
بس مو كادرة احس بيها
مو كادرة اعيش الشعور

او يمكن خايفة احس بالامان
وافتقدة من جديد..

كنت انازع بحضنها
وهي تلمني من كل مكان
وانا ابجي واشهك واصرخ بوقت واحد..

الى ان غفيت
اخر عيون تذكرتها هي عيون ابان
ووعدة الي ان ما يعوفني

كان وعد كاذب
كان وعد حقير..
كانت مشاعري عبارة عن لعبة
للاسف..

معاناة
انتهت معاناة روحي
لكيت نفسي مثل الطفل الغافي
اللي يشهك بحضن امة

وصرت اسمع صوت بكائهم
وحواراتهم اللي ما الها نهاية

خنساء: شكد هالبنية شايفة ضيم بحياتها وبجت هيج؟
درر: جاي افكر بشعور ياسر
وسماء: ساهركم يحل الموضوع
مرج: وليش مو ساهرج؟
وسماء: اسكتي انتي

خنساء: اشش اسكتوا خلوها غافية
مرج: مااحسها غافية احسها تسمع
درر: خلي تسمع اساسا هي سمعت هواي ايا كان اللي راح تسمعة ماراح يخفف من معاناتها
وسماء: بس ممكن يزيدها تدرون الانسان هش لدرجة كلمة تكسرة

درر: لفت نظري شي
مرج: شعجب نظرتج الحقيرة تلتفت
درر: لا تخيلني براسج البية كافيني
خنساء: احجي درر شبيج
درر: الشخص الاجة هنا وكعد من عرف عن نفسة كال انا زوجها بس الغريب من ذبها هنا ما دخل وياها احسة تركها

وسماء: صح صح حتى انا انتبهت عيونها ع الشارع يمكن تنتظرة يرجع
خنساء: بعدنة مانعرف شنو حياتها
درر: ما نعرف شيعني الها يمكن تحبة
مرج: وممكن مأذيها

ناشغت مثل الطفل
وامي كالت الهم

ام خنساء: ششش كافي ولا حرف اطلعوا برا يلا

طلعتهم من الغرفة
واسمعهم يتهامسون

: يمكن تحبة ومأذيها من جبنة سيرتة صارت تناشغ...

بقيت بعالمي التايه
احس كلبي متقطع
احس روحي منتهكة

لهالدرجة انا نكرة وتخلوا عني؟
لهالدرجة انا لا اساوي شيء حتى اعيش حياة حقيرة..

ابوية اول المتخلين
امي ثانيهم
ابان ثالثهم..

انا خايفة لا روحي تتخلى عني
خايفة..

فزيت من نومي
واسمع امي تكول

ام خنساء: اسم الله يمة

باوعت الها
ابتعدت عنها ومسحت عيوني
كالت

ام خنساء: شلونج يمة بعدج تعبانة

كلت بأنزعاج

ام خنساء: اريد اروح للمغاسل

اخذتني من ايدي مثل الطفلة
طلعت وشفتهم برا
دخلت للمغاسل وغسلت وجهي
باوعت لعيوني متورمة من البجي..

من طلعت لكيت امي تنتظرني
اقتربت الي ومسحت وجهي
دمعت عيني
كالت

ام خنساء: خو ما بيج شي

ابتسمت بحزن
لان اهتمامها متأخر
هي فهمت وكالت الي

ام خنساء: تعالي نتعشة ما اكلتي شي تعالي

اخذتني من ايدي
البنات يباوعون علينة
خنساء تحركت من مكانها وسوتلي مكان

خنساء: تعالي كعدي هنا

كعدت بينهم
وحسيت نفسي غريبة
هم لازم اتأقلم؟؟
انا تعبت من شعور التأقلم
تعبت من محاولاتي المستمرة حتى الكة الي مكان ثابت بين هالبشر

وما الكة...

صارت امي تقدم الي الاكل
وانا صافنة
يمكن رجعتني الحياة طفلة
لكن الوقت كلش تأخر حتى احضى بالاهتمام..

بقيت اباوع والدموع بعيوني
وع وجهي ابتسامة حزن
وبداخلي الف حسرة والف سؤال

لهالدرجة كان فراقي سهل يا ابان؟!
لهالدرجة التخلي عني ما كلفك وقت؟
ممكن كنت ثكيلة عليك
ممكن كنت هم فوك كتفك

ماراح اسامح نفسي لان اذيتك بثقلي
لدرجة ما صدكت تلكة فرصة حتى ترميني برا حياتك..

انتبهت الهم يباوعون الي
نصيت راسي ووكعت دموعي
مسحتها وخنساء كالت

خنساء: ما اكلتي شي يلا اخذي هاي مني

قدمتلي لفة
اخذتها منها

مرج: اكلي اذا تبقين تستحين راح تضعفين وانتي اصلا ضعيفة
ام خنساء: اخاف ما عاجبج الاكل اسويلج غير شي؟

كلت بأرتباك

هرم: لالا عاشت ايدج

ابتسمت الي
نصيت راسي واكلت شوي
كالت درر

درر: اللي اجة هنا زوجج؟

غصيت بالاكل وصرت اكح

ام خنساء: مو وقت اسئلتكمم هسة

كلت ببرود

هرم: من انهزمت من الغجر بقيت عدهم اقصد عند اهلة وتزوجنا
وسماء: ليش انهزمتي؟
هرم: ما تحملت الحياة هناك
وسماء: شبيها؟

امي كالت بعصبية

ام خنساء: خليي اختكم تاكل

بهالاثناء اندكت الباب
كامت خنساء حتى تفتحها
وهي تكول

خنساء: يمكن اجة ياسر

وراحت فتحت الباب
شوي واجت تركض وتكول

خنساء: هذا ساهر

اجيت اكوم امي لزمت ايدي وكالت

ام خنساء: مو غريب خلي شال ع راسج وابقي كاعدة

جابت مرج شال
خليتة ع راسي
دخل ساهر سلم عليهم
بعدها باوع علية وكال

ساهر: شلونج ان شاء الله بخير

كلت ببرود

هرم: الحمد الله
ساهر: دوم ان شاء الله.. ام خنساء عندي كلام وياج

دخلنة جوة
اباوع للمكان بغرابة
شوي وسمعت امي تكول

ام خنساء: كتلك انا متأكدة منها بنتي شنو DNA
ساهر: ام ياسر هالشي يصير للأطمئنان اكثر

البنات باوعوا الي
كمت من مكاني وطلعت
ساهر باوعلي
كلت ببرود

هرم: انا موافقة ع التحليل انا اريد اتأكد من نسبي
ام خنساء: بس يمة انا ما عندي شك
هرم: بس انا عندي شك

تركتهم ورجعت للغرفة
استندت بالحايط اثر دوخة قوية
انا شتحمل حتى اتحمل؟

المصايب انتهكت روحي
الحياة اقتصت مني
ولا تزال برحلة اقتصاصها..

قبل ما يطلع اسمعة يكول

ساهر: هالفترة ياسر تعبانة نفسيتة خليه يمي بين ما يتقبل الوضع وبعيني انا اجيبة الج

بعدها راح
وثاني يوم اخذوا العينات للتحليل
ومرت الايام ومرت

كنت ساكتة تماما
مكتفية بالنظر
كنت تعبانة ومجهدة..

عايشة ع خيالي
الم بروحي عميق
وكسرة كلبي كبيرة

وسؤال ما يغادر ذهني
لهالدرجة فراقي سهل؟

وعيني ع الباب
كل ما تندك الباب اكول اجة
واصاب بالخيبة من الكاه ماكو

صرت اكره البيبان اللي ما تكون انت واقف خلفها
واكره الطرق اللي ما تجيبك..

فزيت من نومي
بعد ليل طويل خلصتة دموع
وكنت انازع الموت والشوق والخيبة
بوقت واحد..

تمشيت بتعب
روحي مثقلة بالكثير
دوخة ملازمتني

حاولت اتشبث بالحايط
ما كدرت..
لكيت نفسي واكعة ع الارض

وامي ووسماء يحاولون يصحوني..
كنت افتح عيني واغلقها
راسي ثكيل واحس بشعور غريب

كل اللي اتذكرة
اخذوني للمستشفى
كنت بعالم اخر

فزيت ع صحوة الواقع
ولكيت الدكتورة تسولف وي امي
وتكول

: لازم تنتبهون الها لان وضع الجنين مو مستقر..

فتحت عيوني مصدومة
جنين؟!
انا حامل؟؟!!

وبعدين؟؟
.........
يتبع

#قرار_العُهر_ج٢
بارت٥٦

.....

كالولي راح تتغير كتاباتج..
و الكل راح يلاحظ الفرح والحُب بسردج
وراح يكون اكو اختلاف بين البارت السابق
والبارت الجديد..
واليوم اجيت أكتب و أني اشعر باللاشيء
وما راح اعكس سوى الضياع..
اهرب من الواقع الكم لان هذا واقعي
هذا مكاني..
اعبر عن كم من المشاعر الهائلة بكلمات هواي
على أمل أن ينتهي اللاشيء..
ومجدداً اگولها:
الكتابة هي المكان الوحيد اللي يحتضنني
والعالم الوحيد اللي مهما أتركة أرجع الة

"كانت هاي العبارات هي أفضل عبارات أبتدي بيها تكملة روايتي، اوصف شعوري بجمل مبهمة لكن معناها عميق بداخلي، شكراً لقلوبكم الصاغية"

قراءة مُمتعة..
....

مشيت بخطوات بطيئة
سمعت الباب انسدت خلفي
صارت بوجهي وسماء
اسمع امي تكول من خلفي

ام خنساء:ع كيفج بروحج يمة

التفتت الها
الدموع مالية عيوني
كلت بصوت مرتجف اثر القهر

هرم:ليش انا شسويت بعد؟؟ ها؟

اقتربت الي وهي تكول بهدوء

ام خنساء:اقصد اهدي لا تتعصبين

وكعت دموعي
ابتعدت عنها وانا اكول

هرم:هاي مشكلتي وانا احلها
وسماء:شكوو

تركتهم ودخلت جوة
ادور ع فوني
لكيتة مشمور ع جهة ومقفول
فتحتة ما فتح

خليتة ع الشحن وايدي ترجف
دموعي مستمرة بالنزول
وسماء ومرج يباوعولي من بعيد
يخافون يقتربون

امي كانت ما تعرف شتسوي
اجت يمي وهي تكول

ام خنساء: ارتاحي يمة علمود اللي ببطنج

باوعت الها
وكلت بعصبية

هرم:علمود منو؟ علمود اللي ببطني؟

امي سكتت
فتحت الفون ودخلت لجهات الاتصال
اسمة كان اول اسم
رجف كلبي..

مو وكتك ترجف
ولا وكتك تفز
هذا الشخص غلط
وعمرة ما يصير صح

اتصلت علية
فتحت سبيكر وانا اكول

هرم:هو يجي ويتكفل بأبنة انا مو مسؤل...

قاطع كلامي
صوت يكول

:الجهاز مغلق او خارج منطقة التغطية

حسيت روحي تأكلت من جوة
الجهاز مغلق؟!
اجة ببالي كلامة

"بأي وقت تحتاجيني راح اكون موجود"

انا هسة احتاجك
انت وينك!؟
باوعت لامي ولخواتي
احس بخيبة عظيمة

لحد قبل شوي احجي بفخر
وهسة زال فخري..

خليت الفون ع جهة
انا ليش مو راضية اقتنع ان كلشي انتهى!؟
ابان نهى كلشي من يوم اللي تركني هنا
وما سأل عني

سحبني من ايدي وطلعني من حياتة
انا ليش مو راضية اقتنع!؟

كعدت ولميت رجلي لصدري
دموعي توكع وما اعرف شسوي
اقتربت امي
كعدت كدامي ولزمت ايدي

صارت تهود علية وتكول

ام خنساء:هالطفل ابنج ولازم ترتاحين علمودة
هرم:تريدين اجيبة للدنيا؟
ام خنساء: هذا روح خو ما تقتلين روح؟
هرم:اقتل روح من هسة وذنبي عند الله عظيم احسن ما اشرد هالروح وذنبي يصير اعظم

دمعت عيونها
سحبت ايدي منها وكلت

هرم:مستحيل اكون ظالمة واولد طفل دون ما اوفر الة حياة ترحمة بس انتي حقج ماتعرفين الرحمة اللي تترك طفلتها وسط الغجر شتوقع يكون رأيها؟

كالت وسماء بنترة

وسماء: نقدر حالتج بس لا تحجين هالكلام ع امي
هرم:احسدج لان عندج اسباب تخليج تدافعين عنها

اجت مرج وكومت امي
وكالت

مرج:ارتاحي هرم وانتي امي تعالي نطلع برا ونخليها ترتاح هسة هي تعبانة

امي صارت تمسح بدموعها
طلعوا من الغرفة وسدوا الباب
وبقيت بوحدي..

ما كنت اريد اكعد بوحدي
احس الوحدة تاكل روحي

الى متى راح تبقى حالتي هيج؟
لشوكت ابقى اتعذب
انا شنو ذنبي؟!

احس مااريد انام
احس نمت هواي
اريد الكة حل لروحي

صرت الوب بالغرفة
الدموع تحرك عيوني
انا شجابني لحياتك ابان لولا امي

شي مربوط بشي
وهاي هي نهايتي
انا المذنبة!؟
لا
كلهم مذنبين..

ليش عفتني وانا بهالحالة
مو حبيتني؟
هذا حب لو وهم!؟

وكفت كدام المراية
سندت نفسي ع الميز
اباوع لروحي ولشكلي

هم راح اكول
ليت الزمان يعود يوما
ع شنو يعود!؟

انا انباعيت من الكل
ومحد وفة نص ديني..

اخر مرة زرت بيها وي ابان
من كل قلبي طلبت يكون عندي طفل
انا هسة اعيش شعور تحقيق الامنية..

انا هسة المفروض اكون فرحانة
هذا الفرح الدااعيشة؟!

اكو سبب لكل هذا!

غمضت عيوني بقوة
اكيد اكو سبب
ورب العالمين هو اعلم
يا ترى شنو الحكمة! ؟

احس الغرفة راح تاكلني
طلعت برا وانا امسح بركبتي
اعصابي ترجف
اجيت اطلع للطارمة

صار بوجهي شاب
نفسة الشفتة اول يوم
وتذكرت كلام امي وهي تكول

"يا سر"

باوع بعيوني بعمق
اجة يدخل
جريت ساعد ايدة
التفت علية منصدم
كلت وانا مستغربة

هرم:انت شلون كدرت تعيش كل هالسنين بمكان مو مكانك؟

ابتسم ووخر ايدي
وكال ببرود

ياسر:الفرق بيني وبينج انتي تعرفين ذاك المكان مو مكانج اما انا ما اعرف
هرم:بس انت عشت بظل عائلة تحميك وتأويك

باوع لامي اللي كانت واكفة ع جهة
تباوع علينة بقهر
كال

ياسر:ما اعرف شنو تصورج عن العائلة بس احب اكلج كلنا عشنا اللي عشتيه والفرق الوحيد انتي متتي برا بس احنا متنا بداخل العائلة

مشة مسافة
بعدها التفت وكال

ياسر:الوجع ما يقتصر ع التشرد وغياب العائلة هواي ناس كاعدين بقصور لكن روحهم مشردة

اشر ع كلبة وكال

ياسر:الوجع هنا

دخل للغرفة وسد الباب
التفتت ع امي كانت تبجي
اقتربت الها وكلت ببرود

هرم:لشوكت راح تبقين عايشة بدور الضحية؟ لشوكت راح تبقين اسيرة ضعفج
وكفت وسماء بيني وبينها
وكالت بهدوء

وسماء:رجاءً هرم امي اللي بيها كافيها

ابتسمت
رفعت حاجبي وكلت

هرم:من جديد احسدكم لان عدكم مبرر حتى تدافعون الها
وسماء:ما اعرف منو مصورلج حياتنا جنة

طلعت برا
كعدت بالكاع فتحت الماي
صرت اغسل وجهي

اجت وسماء وكفت كدامي
كالت

وسماء:اسمعي
هرم:احس ما اريد اسمع
وسماء:اللي بالبيت هنا كلهم يعانون انتي اجيتي متأخرة
هرم:عرفت هالشي وبعد؟

كعدت كدامي

وسماء:اكبر وحدة بينا هي خنساء شبعت خدامة وشبعت مذلة وعيونها راحت وهي تخيط وظهرها راح وهي تشتغل عبي وجهها تحرك اثر تنور الطين حتى تخبز وتشبعنا رغم هالشي بقت ساكتة

هزيت راسي بمعنى اي

وسماء: اما درر خلصت عمرها تخاف وتركض ورا طوحها وساكتة بس من شدة السكوت فلتت وصارت انسانة حتى هي ما تعرف روحها

اشرت ع مرج الكاعدة بعيد

وسماء: هاي شبعت خدامة ببيوت العالم لدرجة صارت ما تنام بس تبجي ومحد يعرف شكو بروحه وشنو المكسور بداخلها اما ياسر المفروض يكون مميز عند ابوية لكن كان متعوب حالة حالنا خلصها هنا وهنا يدور شغل والحياة جابت اخرتة ودمرتة

ابتسمت ولاحت الدموع بعيونها

وسماء: وانا اللي حاسدتني لان ادافع لامي المفروض انا احسدج لان ما تدافعيلها بس اكو شي هنا يحركني

اشرت ع صدرها

وسماء: هاي امي تعرفين شنو امي؟ الانسانة اللي افتريت وياها ببيوت العالم واللي شاركتها بكل خيباتها واللي شفت ذلتها بعيني

وكعت دموعها ومسحتها

وسماء: انا تعبانة هواي واحس احتاج حضن اتكأ علية بس ماكو انا مستقبلي مهدور بسبب ضعف امي بس ما اكدر احجي انا احلامي تموت كدام عيني بس مااكدر انقذها ونهايتي يم رجال ما اربدة وبحياة مو حياتي

هزت راسها وكالت

وسماء: وهالكلام كلة قطرة بنص بحر .. بعدج حاسدتنا؟

اندكت الباب
فتحتها مرج ودخلت درر
كانت كالبة وجهها
سلمت بطارف خشمها ودخلت جوة

احس لعبت نفسي من شفتها
يا ربي هالدرر ولا تنطاق
اجت مرج وكومتني وهي تكول

مرج:لا تعزلين نفسج تعالي ويانة

دخلنا جوة
اباوع درر متمددة وتسولف لامي

درر:كلت اجيكم حتى ارتاح
ام خنساء: متعاركة وي رجلج؟
درر:لا ماكو مشكلة بس ضايجة من نسوانة لان عكارب
مرج: نزلتي عليهم ضرة شيسوولج يقدسوج؟
درر:اكرمينا بسكوتج ذول ميستحقون انقهر عليهم ع الحقد والغل الشايلي

كالت وسماء بهدوء

وسماء: صكر خوش رجال وعيالج هم بس انتي تدورين الزلة
درر:وساهر هم خوش رجال

وسماء ضاجت وكامت
ودرر غمضت عيونها حتى تنام
كالت

درر:شوكت عرس وسماء؟
ام خنساء: اول شي مرج ان شاء الله اسبوع اليجي
درر:وليش مو وسماء ؟
ام خنساء: مرج اكبر
درر:بس ساهر مستحق الزواج اكثر
ام خنساء: واختج مو جاهزة بعدها تعبانة اثر العملية

كالت مرج بأنزعاج

مرج:والغاثج شنو سواء انا اول او وسماء؟ لو بس تردين تعلقين؟
درر:مو خوات حياية
مرج: اخذنا من سمج
ام خنساء: عيب يمة شهالكلام

كمت لان اختنكت من احاديثهم
كالت امي

ام خنساء: وين رايحة يمة؟
هرم: اريد ارتاح
ام خنساء: روحي ارتاحي لازم تنامين ع ظهرج
درر:خير حامل ؟
مرج:اي وانتي شكو تسألين؟
درر:عبالك مو اختها يهودية وشكو اذا سألت؟
مرج:احس حتى سؤالج مليان سم..

دخلت جوة وتركتهم
احس ما عندي قابلية للنقاش
بس اللي لفت انتباهي مرج هواي تتعارك وي درر

يا ترى شنو اللي راح اكتشفة بعد؟؟
.......

ياسر

سنين طويلة تعيشها بمكان
بعدها تكتشف هالمكان مو مكانك
هذا موت لكن ع البطيء..

يصعب على المرء ان يفقد الأمان
في وسط كان يظنُ نفسه انه مرتاحً به..

وطلعت من البيت غريب
ولا كأن انا ياسر ابنهم
وصرت امشي بالشوارع
واسأل نفسي الف سؤال
انا منو؟

لكيت الاجابة سهلة وبسيطة
وموجودة بأسمي
يا سر..
انا السر المضموم من سنين
واليوم انفضح
ونهاية كل سر لازم ينكشف..

وانكشفت..

سمعت صوت سيارة خلفي
نزل شخص منها واحتضني
هذا ساهر..

ما يقربلي شي
دمة مو من دمي
لكن روحة ارتبطت بية

سحبني من ايدي واخذني للسيارة
ع طول الطريق كنت ساكت
وهو يسولف
ما دققت بسوالفة
ولا سمعتها
كنت تعبان..

نزلني يم بيتهم
رفضت ادخل
لكن اصر علية

هناك لكيت عامر
وبقيت ايام هناك..
احس نفسي ضايع
لكن اخيرا استوعبت روحي..

بيوم اللي اجة وسولف الي ساهر عن كلشي
تجردت من شعور الرجولة
واصبحت مثل الطفل
ابجي واناشغ

كانت اكبر لحظات انكساري
ولحظة من لحظات ضياعي
اللي ما اكدر انساها ابد

رحت للبيت
بعد محاولات هواي
اقنعت نفسي ان لازم اروح
لازم ارجع اعيش حياتي
مصير وانكتب ماكو مفر

شفت هرم..
الانسانة اللي مااعرف شنو شعوري تجاهها
بس كانت اشبه بالقرين

عاشت حياة التشرد بدالي
حياة الضياع والدمار
اخذت مكاني واخذت مكانها
هذا الفرق بينا..

تمددت بفراشي
وع طول الليل افكر ببراء
احسها ما غادرت مخيلتي ابد
احس اكو شوق بداخلي الها

صارلي فترة ما شايفها
واحسها داتضيع مني ما اعرف ليش

ثاني يوم من الصبح طلعت
وببالي هي
شكلها وصوتها وتفاصيلها

احس كلبي يغلي عليها
لمن وصلت للبيت
صادفتني جارهم مرة كبيرة
باوعتلي وانا غلست
دكيت الباب دون تفكير
سمعت صوت ركضتها
احس دكات كلبي تسارعت
انا احبها..

فتحتلي الباب
اول ما شفتها رد الدم بوجهي
واول ما شافتني دمعت عينها
كانت تعبانة..

كلت بصوت مرتجف

ياسر:شلونج؟

ردتلي بخنكة

براء:وينك؟

ما عرفت شكول الها
كالت

براء:بعدك تحب تشوفني؟
ياسر:اعرف مبتعد وجابني الشوق

وكعت دموعها
مسحتها بردانها وباوعت لداخل البيت
كلت

ياسر:رزاق وين؟
براء:طالع
ياسر:والعمة؟
براء:جوة ما تكدر تطلع تريد تروح؟
ياسر:احس اريد احجي وياج او اخذ وقت طويل وانا اباوعلج

استمرت دموعها بالنزول
وصارت تمسحها

ياسر:شبيج؟ مريضة؟

كان وجهها شاحب وملامحها تعبانة

براء:انتظرتك هواي وظنيت بعد ما تجي
ياسر:وهسة اجيت
براء:ليش غبت كل هالفترة؟

بهالاثناء صاحت العمة

:براءةة منو ع الباب؟

كالت براء بأرتباك

براء:انتظر شوي واجي
ياسر:لازم اروح راح ينتبهون الجيران
براء:خليك بمكانك محد موجود والدربونة فارغة هسة اجي

ركنت الباب
وراحت تركض لجوة
بقت ببالي ملامحها مطبوعة
ليش هيج تعبانة؟
معقولة تحبني مثل مااحبها؟
وممكن مأذيها غيابي..

تقريبا 10 دقائق واجت
بيدها كلاص ماي وكانت ترتجف
كلت

ياسر:براء شبيج تعبانة؟
براء:مرض بسيط
ياسر:اجيبلج علاج؟

ابتسمت وعيونها مدمعة

براء:احس من شفتك بعد ما يحتاج
ياسر:هذا كلاص الماي شنو الي؟

بقت تباوعلي
كالت مترددة

براء:ها اي

مديت ايدي حتى اخذة منها
سحبتة بسرعة
وكع منة الماي وبقى نص
بسرعة شربتة وهي ترجف

بقيت مصدوم من حركتها
كلت بدهشة

ياسر:براء شبيج؟
براء:م.ما بية حسيت نفسي عطشانة وو ش.شربتة
ياسر:ع كيفج ليش ترجفين؟
براء:م.ماكو شي
ياسر:براء

كالت بتعب

براء:روح هسة وبعدين نتفاهم
ياسر:شبيج؟
براء:احتاج ارتاح لا تخاف بس انت لا تغيب

دخلت للبيت
وسدت الباب
احس هواي ابواب انسدت بوجهي
بس تراجعت للخلف
وهواي تعب بروحي

يا ترى براء شبيها؟
معقولة فترة غيابي اثرت عليها؟
.....

خنساء

الايام تمر على نفس البرود والهدوء
ماكو شي جديد يذكر
حياة خالية من كل شيء

ومن السعادة ماكو لخنساء نصيب
انا بجهة وحسن بجهة
عايشين مثل الاخوة
نقاشات بسيطة
اكل وصفنات ووقت النوم كل شخص بينا بجهة

حسيت نفسي الها حق علية
وتعبت هواي..

صار لازم اتفرغ لنفسي واعيش
صرت احضر لعرس مرج
طلعت انا وياه للسوك
اشتريت فستان بسيط ع ذوقي
ما عجبة لكن اصريت علية

مو بالضروري كل شيء يعجب ادم
نفس حواء هم تريد..

رجعنا للبيت وهو ضايج
لان ما اشتريت ع ذوقة
واخيرا لميت اغراضي
وطلبت منة يوديني لاهلي قبل يوم من العرس

رفض وضاج
لكن بقيت مصرة ع قراري
ووداني وهو كالب خلقتة
وانا بداخلي احس بانتصار عظيم

احس ضعفت هواي
وهسة ماعندي شي اخسرة
يريد يروح؟
ليش انا شباقي بحياتي؟

دخلت لبيت اهلي فرحانة
وكعدت اصفك واهلهل
حبيت احيي الاجواء

تقربت هواي لهرم
ردتها تعيش اجوائنا
رغم هالشي بقت متقيدة وبعيدة

مرج كانت خايفة
ورغم هوسة العرس احسها تعبانة
ماكو بوجهها فرحة عروس
ع الرغم وليم كان يحبها
والحب واضح بعيونة

رحنا للصالون
وبدت الحنة
فرحت هواي وركصت هواي وتعبت..

فوني كان بعيد عني
انتهت الحفلة وقبل ما اغير ملابسي
اجة ياسر من برا يصيحني

خنساء: شكو ؟
ياسر:حسن برا ينتظرج
خنساء: حسن؟

طلعت بسرعة
مديت راسي من الباب
اول ما شافني خزرني
كال بعصبية

حسن:تلفونج وين؟

صفت
ع طول الحفلة انا تاركتة بالجنطة
فزيت من صفنتي ع صوتة وهو يكول بعصبية

حسن:عباااتج ع راسج وركض كدامي للبيت

من شدة غضبة ما كدرت اناقشة
دخلت بسرعة للبيت
لميت غراضي وحطيت عباتي ع راسي
امي تركض وراية بالكيك والعصاير
تحججت ان حسن مريض

صعدت بالسيارة
جر الشال وخلاه ع وجهي بعصبية
وصار يسوق بسرعة دون كلام

وصلنا للبيت وفتح الباب ونزلني
دخلت للبيت وذبيت عباتي
هو كان وراية
التفتت علية اباوعلة بخوف
رفع حاجبة

حسن: خافت نصرة

بلعت ريك
كلت بهدوء

خنساء: حسن شبيك؟
حسن:فوتي كدامي

جرني من ايدي للداخل
وكعت الاغراض مني وانا اكول

خنساء: خلييي الم الاغراض

اخذني للغرفة وسد الباب
حصرني ورا الباب يباوع بعيوني
كلت بأرتباك

خنساء: صاير شي؟
حسن: ليش تحركين اعصابي ها؟
خنساء: ليش تسوي كل هذا ؟ عود مهتم؟
حسن: وليش ما اهتم مو مرتي انتي؟
خنساء: مرتك؟
حسن:ليش عندج شك؟

ابتسمت
ومديت ايدي ع لحيتة
وكلت بهدوء

خنساء: ليش وين الحقيقة؟
حسن:تريدين تشوفيها بعينج؟

سحبني بقوة الة وحضني
دموعي صارت توكع
كلت بخنكة

خنساء: ليش يصير هيج؟
حسن: ششش لا تحجين حتى لا تخربيها

صار يبوس بية
وصرت اتذكر علاقتنا بكل تفاصيلها
اخذني لعالمة
وبين لحظة ولحظة
لكيت نفسي بين ايدة ضايعة

ما اعرف اوصف الشعور
لكن
لاول مرة بعمري احس بطعم السعادة..
كان ملخص السعادة هو حسن..

مرت الليلة
وعشناها بكل تفاصيلها
ما كدرت ولا راح اكدر انسى العشتة

وثاني يوم ما رحت لزفة مرج
ع الرغم كانت زفة اختي
لكن..

شغلي الشاغل كان حسن
عالمي الوحيد اللي ضعت بي..

وما اعرف نهاية هذا العالم وين؟!
.....

مرج
كان شعوري يختلف عن شعور اي عروس
المفروض افرح
بالوقت اللي عشتة بحزن

المفروض ارتبك
بالوقت اللي عشتة بخوف

المفروض اطمح لحياة سعيدة
لكن خيمت على روحي الكئابة

ليش هيج حظي؟
وليش هذا الخوف؟

وليم اثبت الي ان هو ابن عالم وناس
ابن خير وعز
ويختلف عني هواي
وليم ما كان نفسة العرفتة
كان شخص مختلف..

خواتي فرحوا بحنتي هواي
كانت الاجواء بسيطة
لكن انا كنت بغير عالم

من شدة خوفي نسيت تفاصيل الفرح
وصرت ما اتذكر غير خوفي ورهبتي بوقتها..

اجة وليم وركصنا سوة
عشت سعادة بسيطة وانا اشوف حبي بعينة
لكن بعد ما راح
وبعد ما عم الهدوء ببيتنا
اجتني رسالة

كانت عبارة عن خوف..
مكتوب بيها

"سعيت هواي حتى اوصل الج لكن انتي رفضتي وعرفت هسة سبب رفضج.. انتي كل ظنج اخليج تروحين لغيري بسعادة؟"

بلحظتها رجفت
وتذكرت ابهر
الى متى يا ابهر؟

دون ما احس اتصلت ع وليم
وحسيت لازم اسولف الة الجزء المفقود
لكن ما رد..

كان نايم
كان تعبان ودايحلم
كان فرحان راح ياخذ اللي يحبها
ومتناسي ان اللي يحبها كذبت علية

ما نمت ليلي
عشت بخوف رهيب
وللصبح تقيأت كل اللي عشتة

باوعت لروحي بالمراية
وصرت اهدا من روعي واكول

انتي مرج القوية لا تضعفين ابد

استجمعت قوتي ورحت للصالون
اتصلت بوليم جاوبني وهو مخبوص
كان يسولف بسيارات الزفة

وهنا سألت نفسي سؤال
هذا وقت مناسب حتى اكول الة الحقيقة ؟
الوقت فات يا مرج
وكل اللي عليج تعيشين الواقع وبس..

تمت مراسيم الزفة
وسط دموع امي وخواتي
استسلمت للواقع وحبيت اعيش السعادة
وركزت ع وليم
وع سعادتي وياه

اخذني من ايدي وطلعنا
لعالم اخر
لعالم مختلف
وصعدنا بالسيارة بعد ما ودعت اهلي
ومشينا مسافة
وليم كان يمي

وانا استجمع فرحتي وقوتي بوقت واحد
واخاطب روحي حتى ازيد من قوتي
وليم من شدة اللي قدمة الي صرت احس بالفرق
وليم يحبني

وكفوا بالشارع حتى يركصون
هاي عادات الزفة العراقية
لكن اني كنت مرتبكة

ايدي ترتجف
واباوع ع خيوط البدلة الناعمة
هذي البدلة البيضة حلم كل بنية

اي يا مرج ضحكتلج الدنيا
ولكيتي اللي يعزچ ويصونچ
لكيتي اللي فرحان بوجودچ
ويعتبرچ انجاز بحياتة

طلعتي من فقرچ وعوز اهلچ
لانسان يختلف عنج بالطبقات
بس ما حسسج ابد

رفعت اطراف البرگع
وباوعت من جامة السيارة
اشوف حبيب عمري وروحي مكيف وفرحان

وواگف بكل رزانة
وكلهه ترگص وتهوس
كان شمعة ويضوي بينهم

لو انطي عمري گلة
مااوفي لو موقف واحد من مواقفة
اني بديت حياة جديدة

سحبت نفس بقوة
ان شاء الله اگدر اسعدك مثل ماسعدتني
وتقبلتني بكل اغلاطي

ابتسمتلة من بعيد
بعد ما شفت عيونة علية
كانت نظراتة مليانة حنان وحب

تلقائيا دمعت
وتذكرت غصة من غصات الماضي
هاهية اليوم انسى كلشي

ماكو شي يسوى التعب
دام لكيت اللي يعوضني عن كل الم مريت بي
جريت نفس بقوة

ورجعت اباوع من الجامة
وينة وليم ليش ماكو؟؟
دخل القلق لگلبي

صرت اتلفت
الى ان شفتة واكف يم ابهر!!!
خليت ايدي ع گلبي وشهكت

واني اباوع وليم واكف يم ابهر وملامحة مگلوبة
ضربت خدي واحس الدنيا صغرت بعيني

انتهى الحوار و وليم دفعة بقوة
ورجع متوجه للزفة
شاور السايق واجة للسيارة صعد

وكل اصدقاءة صعدوا بسياراتهم
باوعت علية كانت عروقة بارزة
ويباوع تجاه الشارع
كان يتفادى النظر بعيوني

مديت ايدي وخليتهه ع ايدة
همست

مرج:شبيك؟؟

باوعلي وعيونة حمرة
كان مخنوك وع وجهه ابتسامة الم
كال

وليم:طلع ماخذ كل شي حلو بيج وهو الغالي ع گلبي ليش كذبتي؟؟

فتحت عيوني مصدومة
شهكت ودموعي وكعت
ردت احجي رفع ايدة
كال

وليم:شششش ولا حرف كافي سمعت هواي

نصيت راسي
وصرت اشهك شهكات متوالية
هي الدنيا دمرت احلامي
ولاحقني دمارهه ليوم عرسي
ولبسني ثوب العهر!!

وهذا اللي كنت خايفة منة صار
وابهر دمرني..
لكن؟
وبعدين! ؟
.........
يتبع

#قرار_العُهر_ج٢

....#بارت٥٧

لا تأمل ان يكن الفرح حليفك
ان كنت تعاني من جروح عميقة..
لا يمكن ان يمحى اثرها ابدا
فأنت ابن الضيم
اياك ان تنسى ذلك..
.....

مرج

صرت اسمع صوت دقات قلبي
دكة دكة
وصرت احس الكون من حولي خالي
رغم الضجيج..

بالغرفة بوحدي
وهوسة برا
مااعرف شلون وصلت لهنا
كل اللي اعرفة انا انتهيت..

بديت اسمع صوت الابواب تتقفل
وصولا لباب الغرفة اللي انا بيها
احس جمدت بمكاني

الدم جمد بجسمي
وما اعرف شنو اللي اسوي
لحظات وصار وليم كدامي

رفعت راسي بخوف
باوعت الة
كان انسان مختلف
انسان ميت لكن يقاوم

اول ما شفت عيونة الحمرة
نظرتة المميتة
رجفت كل اجزائي ووكعت

كعد كدامي
وخر البركع عن وجهي
بقى يباوع بعيوني
كال بغضب مدفون

وليم:عندج شي تكولي؟

صفنت بوجهة
كال

وليم:عندج كذبة اضافية تريدين تكذبيها ع وليم الغبي؟

وكعت دموعي
من خوفي هزيت راسي بمعنى لا
رفعني من كتفي بقوة
صرخت
صاح بية

وليم:صوتج ما اسمعة اشششش

اقترب الي
همس بأذني ولوهلة
حسيتة مو بشر
جمرة!!

وليم:انجبرتي مو؟ وكلشي تم بغصب و وليم الغبي صدكج لان كال بنتة الربت كدامة ما تكذب صدكج لان يحبج بس انتي باوعتي بعيونة وكذبتي

وكعت دموعي
باوع بوجهي
كانت نظراتة خالية من الحب
كال

وليم:ما طلعتي عن بالي لحظة بموت امي وبالي يمج صح ابتعدت بس روحي بقت تعافر يم مرج بالوقت اللي مرج كانت تعيش قصة غرامها وي ابن القاضييييي
ما
صاح بقوة وصرخت

وليم:وعااايفةةةةة وليم يعاااااااني وعايش ع ذكرياتهااااا

جرني بقوة وصار يهز بية
وانا ارجف بخوف

وليم: عبالج تكمل كذبتج؟ عشتي هالشعور وبكل حب مرة اليوم راح اكرهج بشي اسمة حب اليوم راح اطلع روحج بأيدي بس راح ابقيج عايشة المثلج خانت وكذبت وباعت تستحق تموت لكن ع البطيء

هجم علية مثل الوحش
كنت بين ايدة فريسة ضعيفة الارادة
مزق بدلتي بكل وحشية

انا وبين ايدة عشت نفس الشعور
لكن هالمرة وليم مو ابهر..

انتهت المعركة
معركة الحب الموجع
ومن مخلفاتها ارواح مهجورة متعبة..

ارواح اوشكت ع الموت
تنازع بكل ما بيها من حياة..

ابتعد وليم بعد ما تركني جثة
اجلب بالنفس كوة
كل جزء بجسمي يوجعني
وكل خلجات روحي توجعني

كعد ع الارض
خلة ايدة ع راسة وصار يلطم اشبه بالنسوان
يبجي بصوت مسموع
كان يعاني!!
ولكل منا معاناة مختلفة

مرت ساعات الليل
الدقيقة سنة
كنت مستلقية وسط الاشياء
لا ارض ولا سماء

ما اعرف شوكت طلع الصبح
ما اعرف شلون انتهى الليل
اندكت الباب
محد فتحها

وليم كان كاعد ومنطيني ظهرة
ويمة كومة جكاير
كان تعبان كان منتهي
وانا مو كادرة اوصف شعوري

تمنيت الموت بوقتها
بس ما متت
حاولت اكوم
ما كدرت

كنت دائما اكول ع نفسي قوية
ما انغلب..
محد يكدرلي..
اليوم انكسرت
اليوم كسرتي صعبة ومختلفة

هالمرة انتهيت
وهاي هي..

الساعات تمر وانا مشمورة
وهو يدخن
الغرفة عبارة عن دخان
وارواحنا بيوت مهجورة

كان كل شيء ميت
ليش النفس بعدة موجود؟

رن فوني هواي
بعدها فونة
مرة مرتين بالثالثة فتح
اسمعة يكول

وليم:اخذتها لكربلاء نزور وكلت نبقى هناك فترة نغير جو.. هسة هي بالمغاسل كلشي تمام وهي بخير ان شاء الله اخليها تحاجيكم بعدين..

وختم الاتصال
التفت الي وباوعلي
كام من مكانة واجة يمي
كال

وليم:منتظرج تموتين ما متتي؟

وكعت دموعي

وليم:شكد عينج صلفة لعد؟ مرة ابهر مرة وليم وبكل الاحوال بعدج عايشة اظنج متعودة

غمضت عيوني بقوة
كلامة كان مؤذي وجارح
انا مو هيج!

وليم: انا شلون وثقت ببنت فكر؟ اكو فقراء عدهم عزة نفس بس انتي لو تنصبين ذهب تبقين بنت فكر انا شلون حبيتج وانتي عينج فارغة كلبة عند الاغنياء تدورين ع الفلوس هنا وهنا تبيعين نفسج شرفج كرامتج علمود كم فلس

ابتسم

وليم:كم ورقة نطاج ابهر؟ بشنو قنعج؟ شحصلتي منة وسلمتي الة كلبج ونفسج وكلشي؟ كم مرة مسويتها ووي كم شخص انا قيمتج هواي بهالزواج انتي كلج ع بعضج بنت ليل لالا عذرا من بنت الليل انتي بنص النهار مستعدة تنطين كلشي الليل ستر وانتي ما مستورة

كلماتة كانت مثل المتفجرات
تدخل بداخلي وتنحبس جوة روحي
ع اي لحظة ممكن انفجر
واتلاشى..

سحبني بقوة من السرير
سحلني بالغرفة
لزمني من كتفي وصاح بوجهي

وليم: كمممم مرررة فهمنينييي كم مرررة؟؟ امج ال.... شلون قبلتها ع روحها تطلعج تشتغلين وياها لو ما ..... اناااا شنو بنظركم؟؟ انا مضحكة وضحكتوا علييية؟ باوعتي بعيوني وكذبتيي

ضربني بقوة ع وجهي
صرت ما اصدر اي ردة فعل
جسمي جمد وتشنجت

دفعني ووكعت ع الارض
وهو طلع من الغرفة
صرت اسمع صوت التكسير
وصوت صياحة

كان يفرغ غضبة بأي شي يشوفة كدامة!

ما اعرف شصار بعدها
ما اعرف شلون مرت ايام
نمت صحيت ع كابوس مرعب

ونفس مشهد الاغتصاب
لكن هالمرة مو كابوس
هالمرة حقيقة
ومن جديد كان وليم

اصبح يتفنن بوجعي وعذابي
ويبحث بكل جزء بية
عن روح مرج القديمة
ويزداد جنون من ما يلكاها

كانت تتصل امي ويحاجيها
وبكل مرة يطلع الها عذر شكل
الى ان جبرني انطق
ومااعرف شكلت بوقتها