اندگ الـباب الخارجي
عفت البيـدي و ذبيت شال على راسـي، صحت منوو
محد رد

فتحت البـاب و تفاجئت بصدمة من لگـيتو علي
رفعت حاجبي و هو ابتسم و گال

- السلام عليكم

- و عليكم السلام

رديت برود و اني متعجبة من تواجدو هيـن
سمعت صوت جـدة تصيح منو
و علي رد عليها و هـو يتعـداني و يفوت و اني مصنمـة بالباب

- اني عليوي حبوبة فطـم

هي طلعت بضحكة على وجـهها
تلگتو و تحظن بـي، فاتو للصالة..وديتلو مـي و ما راد
حطيت الـدولكة و الگلاص على الطبلة بقوة
عود شنو يستحرم يشـرب يمنا مي

عجـل عليش دايس بساطنا

جـوي ابويـة و صهيب و همين تفاجـئو من وجودو
ابوية فات و هو يرحـب بي..اصلاً ابوية رغم ما يحب خوالو بي معجب باولادهم يگول سبـاع و اصحاب مسؤولية

و هيّن يطفر صهيب و هو يگـول يابه اعرفك گاعد تبسمـرني

چـنت مسوية مرگة بـامية على لحم و تـمن
و ابوية دز صهيب جـاب دجاجة مشوية
صبيتلـهم الغدا و اني ما فتت..ظليت بالمـطبخ
اسمع سوالفهم..عود هو عبالك حتـى بسوالفو متكاون
يحچي بصياح
لدرجة كل شوية اجـفل

صـار العصر و هو موجود..بس طلع گال عندي شـغل
و ما رجع لـورا العشا
ابوية سألو متعشي و گـال لا..

و رجعت سويتلو عشا..چان اكو سم فار بالكـاونتر
دحگت عليه و اني افكر بلـه احطلو كم رشة؟

جفلـت على صوت صهيب الگال بضحكة

- هيي شبيچ صافنة على السم بس لا تريد تسممين الرجـال

- غير لو ما السجن چان سويتها

ضحك و رجـع گال

- خطار عدنا عيب هيچ تسولفين

تـخصرت و اني اگول

- عجل من نروح عليـهم ليش يحچي علينا و ما يگـول عيب؟

- كل واحـد و تربيتو
بعدين لا تنكرين اهلو زينين يقيمون بالواجب

ما رديـت عليه و اني احط الاكل بالصينية و هـو اخذو و طلع

نص ساعـة و جاب صهيب الصينية عود ما مخلي بيها شي..عبالك جاي من مجاعة
اكـيد حچيت هيچ گدام صهيب و رزلني

دگ تلفونو و گال رفيجي ينتظرني
ابوية ما يـدري بي..غير لو يعرف چان حچه عليه لأن عاف الخطـار و مشى

صارت بالـ11 و ابوية جا اخذ فراش لـعلي و هو يحچي على صهيب
و اني ببرود گلت

- حقو ينهزم هالوجـة يجيب الهم

دحگلي ابوية بعتب و اني فشـلت

گال بس يجي الا ارزلو
اني ما انام من وكت..جدة نامت و ابوية همين..و ظليت عبالك ططوه افتـر بالغرفة
و رجعت افتر بالحوش و كل شوية اخابرو من تـلفون جدتي و هو يرفض..

بالـ12 و 40 دقـيقة صارت و هـو ماكو
چنت افتر بالحوش و ادگ و اني احلف مو ابوية الي يصلخ جلـدو اني الي اصلخو على هاي الغطة الغطها لا يگول اهل يسألون لا يگول يتوجـل

انداريـت على باب الكليدور الطـلع منو علي و هو يضيق بعينو شكلو چـان نايم
صديت عنـو لما گال

- عبالك بومـة تفترين شبيچ

غمضت عيوني و اني اتمـتم ميخالف خطار باچر يولي

كتـفت ايديه لمن حدر من الـطرمة و گال

- شنو صهيب ما رجع

هـزيت راسي بأي بدون ما انطق كلمة
و هو بسخرية گال بس واضح النغزة و شنو معنى كلامو

- خاف اخوچ من جماعة ابو مصعب الزرقاوي
و گاعد يـاخذ دروس

ما ردت احچي و لا ردت اتـجادل وياه و هو دايس بيتـنا..بس جبرني و بالاخص لان اعرف علي شنو و اعرف كلمة يحچـيها يقصد بيها شـي

صديـت عليه و گـلت بتهـكم

- اي گاعد ياخذ دروس على الذبـح گال ما طول ما اليوم عـندي ضيف نجرب بي

- شنو اني فـار تجارب؟

تمتمت و اني اندار عنو
لا والله چـلب عار

انفتح الباب الخارجي و صوت سيارة مشت
تنهدت براحة من فـات صهيب
ظل يدحگلي باستغراي و يدحگ لعلي النسيـت امرو
علي مسى و فات
و اني فتت من بـاب المطبخ و اني اگول

- مديتلك فراش بالصالة يم علي

فـجاة حسيت ايد كمشت زندي انداريت عـلية
چان يدحگلي بعصبية..رفع حاجـبو و گال

- شعنـدچ برا وي علي؟؟

- شعندي چنت انتظرك و هو طلع للتواليت

گوه حچيتها و بينت الوضع طبيعي
ضيق عيونو و اني سحبت ايدي منو و اردفـت

- شبيك صهيب؟ شنو ما مصدگني

ذب حسرة و گال

- فوتـي جوه..و ايـاچ تطلعين گدامو

- خوش

حچيتها و فتت و اني اتنفس بعمق
يمعودة صهيب والله خبل من تطبگ عـندو يگوم يشطح بالتفكير
مددت بـفراشي و بسرعة نـمت لأن صدگ چنت تعبانة

گعدت على اذان الفجر
گعدت جدة و توضت و صـلت بغرفتها..توضيت و كمـلت و جدة صاحتلي اجيبلها مـي

بالمطبخ چنت اخليلها من البـراد بس مي مكاسر على دافي لأن ما تشرب بارد

سمعت همس يم شباك المـطبخ
عگدت حاجبي و گلت شنو معقولة صهيب
عفت الگلاص عـلى الكاونتر

و رحت صوب الشباك مديت رگـبتي و رفعت تك حاجب بتعجب من شفتو علي گاعد جوه الشباك و تلفون على اذنو
لزگت اذني على الجام و انـي اسمعو يگـول

- نادين والله العظيم ما بيـني و بينها شي مجرد خطار و اروح !
و بعدين شبيه انه احط عيني على هيچ شكول ؟

يتبع

#ذبول الاقحوان
#البارت الرابع
.
صفاء..
ظـليت اسمعو و احـس گلبي احترگ
عضيت على شفتي و هو گـعد يحچي وياها بهـمس
رجعت ليورا و ضـيقت عيوني ادور شي اضـرب بي الباب و اخلي يجفل و ما ينـدل طريقو
بس اذا ضربـت باب المطبخ الكـل راح يگعد
زفـرت بعصبية و رجعت لغرفتي و اني ادردم و احس عيوني صـارن بگصتي
بنص بيتـنا و يذمني شگـد ما عندو احترام و لا اخـلاق
اكـيد حچـه علينا و ذمنا گدامها
تأففت و اني بفراشي و ظـليت اتگلب..ضجت منـو اكثر من گـبل
فوگ ما ملفينو بيتنا و اكل من زادنـا..
جنت اشك عـندو علاقات بس هسا تأكـدت..عود ابن شيوخ روح و تعال..يتختل بالحوش و يخـابر و يبرر
گـبر على هيچ نماذج من الـزلم ما يحطون الله بين عيونهم و يگـولون مثل ما عدنا خوات يدور الزمن و يصير بنفس وضـع النحچي ويـاهن
گـعدت الصبح السـاعة بالـ9
طلعت من الغرفة و البـيت هدوء اليـوم سبـت
اذا حـيل ارجع لـبغداد العـصر لو الظهر
لگيت صهـيب گاعد يتريگ بالمطبخ
گعدت يمو و گـلت بضوجة
- شو ماكو احـد؟
- ابوية طلع للمحـل و جدة بالحمام تسبح
و علي رجع لأهـلو
- گـلعه
تمتمت بيها و انـي اصبلي چاي و صهيب يدحگلي بعين ضيقـة
كملت ريوگ و گمت انظـف بالبيت
طبيت للصالة و لمـيت الفراش و نظفت كل البيت
و بـديت اسوي بالغـدا
صح مو حـيل مضبوطة بالطـبخ بس جدة تگـف يمي و تعلمني و گمت شـوية شوية اضبط رغم مرات تخـرب و يطلع الـطعم مو حيل طيب
ابوية جا وكـت الغدا و گال تحظري نتـغدا و نطلع لبغداد..اكـلت شوية لأن بيه طبع من اريد اطلع لمكـان بعيد ما احب اكل
لميت غراضي و ملابـسي، و جدة گعدت توصي بـيه
و لا تطـلعين وحدچ و ديري بالچ من الشباب
صفـنت بكلامها و شكـيت بعلي حـاچيلها انو شافني بالمستشفى..بس اني ما سويت شي غلط ابـوية و اخوية يعرفون
طـلعنا لبغداد و وصلنا للسكـن
و ابوية رجـع ورا ما حط بيدي مصرف و خلى رصيد بتفـلوني، وصاني على نفسي و رجع
صعـدت فوگ للشقـة مالتنا
فتحت الباب بالمـفتاح..اول ما فـتت لگيت لانا باب الحمام المسدود
ادگ بي و تصيح افتحي
صدت عليه..و جرت حسرة تقربت يمي و سلمـت
و بهدوء و عيوني تمشط انـحاء الغرفة ادور لـ مهرة
- ويـن مهرة
- بالحمام..من اجت من اهلها حابسـة نفسها و تبچي
عفت جنطتي على الـتخت
و رحت صوب الحمام دگـيت الباب و صحتها بأسمها و هي ما تـرد
رجعت دگـيت الباب و گلت
- مهرة افتحـي الباب انـي صفاء
ما ردت بـس صوت بچيها يصلني
تنهدت و رجعت ناديتها
- مهرة افـتحي الباب مو زين حبسة الحـمام و البچي بي
- صارلي سـاعة احچي و متجاوبني
حچـتها لانا، و اني بقسوة ضربت البـاب و عطت بيها
- مهرة بالقـران اذا ما فتحتي الباب اكسـرو
- صفاء روحي عوفيني بحالي
- لا ما اعـوفچ تريدين تموتين نفسچ هاا
شنـو تستفادين من حبستچ و بچـيچ..عندچ مشكلة واجهـيها و دوريلها حل
لحـظات و انفتح الباب..طلعت و عيونها صايرات طبب مـن الورم و وجهها احمر
اول مـرة اشوفها هيچ تبچي
- الأهل مشكلة مـاكو الها حـل
صدت عليه لانا و دحگتلي بنـظرة مستغربة
رجعت دحگـت لـ مهرة الگعدت تمسح وجهها
تخطـتني و گـعدت على التخت مالها
رجعت ليورا و سندت نفسها على الحـايط
حاوطت رجليها بيدها و كمـلت بغصة
- الله يخليچـن عوفني وحدي
تجاهلتها و رحـت گعدت يمها و لانا همين
حطيت ايدي على خدها الچـان بي وروم
- ضـربوچ؟
شهگـت و نزلت راسها و على صـوتها بكاء حاد
لانا عيونهـا غوغورقت و هي اتمتم مهرة كـافي بچي
تقربت عليها و سحـبتها لـ حظني
ظـلت تبچي بخـنيگ
عـفتها تبچي و اطـلع كل قـهرها و بچيها
لحظات طويلة يلا سكتت..ابتعـدت عني و مسحت وجهها بردانها و انفها..و بصوت مخنوگ گـالت
- مو بس ضربـوني..دفنـوني و انـي عايشة
اكـرهم كـلش..ما اصدگ تخـلص الجمعة حتى ارجع للسكـن
و بغصة حچـت لانا و هي تمسح على شعـر مهرة
- كل بيـت بي مشاكل مهرة
- بس مو مثـل اهلي..شايفة اب و اخوان يكرهون بنتـهم؟ و لا تگولين احنا هواي حتى شايلين همـنا
بس اني و يتيمـة
- و امـچ وين؟
- متـوفية
سألتها اني و هي ردت بصوت ناصي..رفعت راسها مانعة نفسـها من البكـاء و اردفت بحزن واضح
- ابـوية متزوج بنـت عمـه..و مخلف منـها اربع ولد
وراهـا تزوج امي..الي هي اخت صـديقة
تزوجها بموافقة زوجـته..و حملت بولد و توفى ثاني يوم ولدته
وراها حملت بيـة و جـيت اني على الدنيا، عمري سنتين و توفت امي
و ظليت تحت رحـمة مرت ابوية و عماتي..بالاول اخواني چـانوا حنين عليه بس من صرت 10 سنين تغيرت معـاملتهم
صارلي سنين عايشة..شبعت انواع الضرب و الأهانات
ابوية الي لازم يكون سند و عـز الي..الي يدافعلـي و يحط الله بين عيونـة لأن يتيمه و وحيدة ما خاف ربه بيه
گـوه كملت الدراسة..و خالي هو الي جبر ابوية انو اكمل

و كل مصاريفي مـن عند خالي ملبس و مأكـل و حتى فلوس الدراسة
سكتت و اني و لانا اندحگـلها بشفقة و حزن
من كملت بنبرة اشبـه بالسخرية
- ما اريد ارجعلهم بالعطلة
بس انتن تنزلن لأهلچـن و اني ما يظل عندي احد هنا
فـ اضطر انزل و اضطـر اسكت من انضرب و انهـان و ارجع وجهي مصبـوغ
- ليش ما تحچـين لخـالچ؟
زين عمامچ اجدادچ؟
سألتها لانا و هي ردت
- عندي بس هالخال..و عمامي و جدي ما يدخلون اصلاً هما و ابـوية نفس التفكير و الطينة..هماتين دافنين بناتهم بالبيوت و شابعات ضرب و اهانه
كتفت ايديـة من گالت لانا بهدوء و عيونها ادمـع
- اني بعد ما انزل لبيتنـا اظل عـندچ
ابتسمت مهرة بخفوت سرعان ما مسـحتها
تنهدت لانا و گـالت بشبح ابتسامـة
- و اني اشكـي من اهمال والدي الـي
- يـا ريتهم مهملين
يا ريت ما يهتمون الي و ما يشوفوني
ما عرفت شـنو احچي ظليت ساكته و اني ادحگ للبنات
لانا گعدت تحچي على والدها و شلون مهمل و ما حـيل علاقتهم قوية
و من هين مهـرة التشكي من اهلها..من شفت مهرة شوية احـسن، استـأذنت منهن
و گمت للحمام غسلت و دحگت لنفسي بالمراية
صح علاقتي وي اهلـي زينة. بس ما يمنع انو اشكي منهم
يمكن لان عصبيين مرات و ابـوية يدقق بكلشي و خوفو عليـنا مرات مبالغ بي
بس مهما يكونون اشوف رب العالمـين منعم عليه انو هما اهلي
من شفت وضع مهرة و حـال لانا
شفت عائلتي كنـز ما يصيـر افرط بي
الاحد طلعت للجـامعة، اخـذت محاضرات و چنت حرفياً غرقانة بين الملازم و الكتب..الا ان راسي بـدا يوجعني
دايماً اشيل بالجنطـة بنـدول يفيد وقت وجع راسي
اخـذت مي من الكافتيريا و مع ما طـلعت قابلني
أمـجد بابتسامـتو الناعمة المعهـودة
- مرحبا
- اهلاً
رديت عليه برود و كملت طريقي و هو مشى وياي
دحگ لمي و البندول بيدي و گـال بهدوء
- سلامتـچ شبيچ
- راسي يوجعني
حچيتها و هو تنهد و گال
- انـي هماتين ابقى اعانـي من وجع راسي
گـعدت على المصطبة و هو شاركني الگعدة
رجعت العلاج للجنـطة و شوية و حچه بهدوء
- اليوم عدكم امتحان
- باچر
- هاا..حسبالي اشرح الچ
دحگـتلو باستغراي و اني اگول
- شكرا بس اني فاهمه كلشي
ابتسـم و هو يگول
- يعني فاهمه حبي الچ؟
انتفضت مـن مكاني و گلت بعصبية
- لا تـفر الموضوع أمجد
- ما فريت اي شي..اني داضـغط على نفسي بس لأجل ما اضوجچ
جريت حسرة و اخذت ملازمتي و اني اگـول بدون ما احط عيني بعينو
دل ما انسى سالفتو يـرجع يذكرني
- ما اعرف انت ليش هـلگد متمسك بشخص ما يشيل الك اي مشـاعر، و اني انطيتك رايي ليش ترجع تفتح الموضوع
- لأن احبچ، لأن رايدچ بالحلال
والله العظيم نيتي وياچ نية بيضة لا لعب و لا تضـييع وقت
سكتت و گوه ضغطت على ملازمتي تا ما تگع من ايدي
كلماتو ظلت تـرن بأذني عبالك جـرس صوتو مزعج
وگف و صار بصفي و اردف بنبرة هادية
- عندي استعداد من هسا اروح لأهلچ و افاتحهـم بالموضوع..اني اريدچ و شفتچ مناسبـة الي
انداريـت عليه و صرت مقابل الو
بلعت ريگي من شفتو بهالقرب مـني..رجعت خطوة ليورا و هو گـال بهدوء يشبة نظراتو الي ادحـگلي
- صفاء انتي مثـل اسمچ كلش صافية
رغم كلامچ و لسانچ..اعرف من داخـلچ مو مثل ظاهرچ
- ليش انت دكتور علم نفس تا تـعرفني هلگد
حچيتها بجدية متغطية بالسخرية..رغم دگـات گلبي الرتفعت و حسيتها راح تفضحـني بأي للحظـة
و بابتسامـة هادئة گال
- لا والله بس گلبي دليلي مو هيچ يگولون؟
صديت عنـو و گـلت
- مقدره مشاعـرك بس ان شاء الله تلگه الأحسن منـي
- بس اني ما اريد الأحسن منچ ! اني اريدچ
- و اني لا
حچـيتها بعصبية و هـو رد فوراً
- اصبر
سنـة سنتين ان شاء الله عشرة الا ان تقتنعين
- اقتنع بخصوص شنو؟
حچـيتها و اني ارفع تك حـاجب و هو اردف بابتسامة
- تقتنعين بيـة..و بحبي الچ
ضميت كـتبي اكثر و گلت بسخرية
رغم ظـاهري قوي و كانو كلامو ما يأثر بيـة..بس بالحقيقة كل كـلمة يگولها احس گلبي يحبس نفسـو و يرجع يتنفس بقوة..الگلب بي انف ترا؟ هيچ اني افـسر گلبي من ينقبض بسبب هيچ كلام
- و عقيدتـك
دنگ و هو يخـلي ايـدية ورا ظهرو و گال و عيـنو بعيوني
- الحب ما بي عقـيدة !
سكتت و ما عرفت شـنو ارد، ظليت ساكته و عقلي يگلي انهـزمي يولي كافي اخذ و عطـى ويا
تنهدت من هو ظل ساكت حالو حالي
من رفعت راسي شـفتو يدحگلي بابتسامة، استأذنت بصوت ناصي و مشيـت و اني احس نظراتو لحد هسـا علـية
خـلص الدوام و رجعت للسكـن حسيت نفسي ضايعة بالحقيقة كلامو ما يطـلع من بالي
فاتت لانا و مهرة وراية
و لانا تـحچي بس بانفعال و شكلها متعصبة حيل..فاتت للمطبخ و هي تحچي
اول مرة اشوفها هيچ، دايما تفوت تضحك و تـسولف اول ما تفوت
بس هسا لا..يمكن صاير عدها مشكلة
جفـلت اني و مهرة بسبب صوتها الـرتفع و هي تصيح راح يذبحونك اذا يعرفون مـكانك

اني فتت للحمام و سـبحت و طلعت
لگيتها گاعدة بمكانها على التخت و تهز رجليهـا بتوتر
عيونها تتحـرك هيچ و هيچ و اتمتم
مهرة سألـتها شبيچ؟
و ردت لا ماكو شي
ظلت طـول اليوم هيچ و بقت متكتمه و ما حچت شي
ثـاني يوم بالـدوام لمحت يسرى تتقدم باتـجاهي
سلمت و گـعدت يمي و هي تسألني شلونچ و شنو اخبـارچ
تحمحمت و دحگت عليه ابتسمتلها من حچـت
- باعي راح اسألچ سؤال بس لا تفهميـني خطا
- لا اسألي
سحبت نفس و گـالت
- انتي و أمجـد بعلاقة؟
و بانـدفاع گلت انكر قولها
- لا منينلچ هالحچـي
- مـو مني
انما من بنية زميلة ويانا اني و أمجد
اسمعي الله شـاهد عليه أمجد احسه اخوية و اريد مصـلحته قبل كل شي، هو يريدچ و دائماً يحچيلي عنچ و حابچ من صدگ
بس هاي البنية مخـليه عينها عليه، و حچت گدامي و هي تگول دائماً من تمشي ورا امجد تـشوفكم سوية
و هاي لسانها مزروف تمشي و تحچي
و بقهر گلت
- اني ما بينا شي..هو اعتـرفلي و اني رفضت
احنا ما متوالمين
- بالعكس والله كلش حـلوين وي بعض
و بعدين ترا هو مو صغير حتـى تگولين يمكن اول مرة يجرب هيچ مشاعر..هو عمره 25 سنـة بس ترك الدراسة كم سنة و رجعلها چان هسا متخرج لو على ابواب التخرج
المهم هذا مو مـوضوعنا
اني رغم ما احب احد يحچي عليكم..هماتين ما يهون اشوف أمـجد متعذب و انتي تصـدينه
انطي فرصة
- اني من اجيـت من الانبار لبغداد
شايلة تعب والدي و ثقـته بيـة لأن دزني لهين، اني جاية ادرس و ارفع راسو مو ادور علاقات لو انطـي فرص
و بابتسامـة حچـت
- و هو هذا الخلاه يتعـلق و يحبچ اكـثر
شخصيتچ و اختلافچ..صفاء مو لأن أمـجد صديقي امدحـه گدامچ بس هاي الحقيقـة، انسان متفهـم محترم ما عنده سالفة طالعة عن الطريق
ظـليت اسمعلها و اني منزلة راسي
و كملت بهـمس
- ما احـب احچي بهاي الطـريقة
بس هو لمحلي مرة انو انتي شويـة حساسة بسبب اختلاف المذاهب
اني ترا هماتين سنية..و الله ولا مرة حچـة أمجد كلمة تغثني و هو من الناس المبتعـدين عن هاي السوالف الي دمـرت البلد
دحگتلها متفاجئة و هي اردفت
- فـ لا تشيلين هم و تتحسسين من الموضوع
عادي اخذي بروح حـلوة، سوالف الطائفية و المعتقدات الدينية و الطبقية انتهت
هسا الكل يتعامل هو و اخلاقة و تربيتـة و انو احـنا كلنا اولاد بلد واحد
شگـد احچي و الگه رد لـكل كلمة تنگالي
بس هسا عبالك تبخـرت الكلمات رفعت راسي من وگفت و دنگت عليه..حطت ايدها على چتفي و حچت بنبرة هادية و ابتسامة
- الحب مو اجـبار و لا غصب
بس مرات ننطي فرص و نشوف گـلبنا يگدر لو لا !
صدگيني ما راح تلگيـن شخص مثل أمجد بحنيته و حبه لا تضـيعينه من ايدچ
حچت كلامهـا و مشت و اني ظليت ادحگلها و كلامـها ما اگول أثر بيه
انمـا خلاني اصفن و افكر بي چـثير
رجعت للسكـن و چانت مهرة و لانا مو موجودات
بدلت و ظليت افكـر بحچيها..و ظل كلام أمجد بالي
كـل ما اتذكرو احـس بخجل من نفسي
شعـور صعب الوصف لأن اول مرة احـس هيچ احساس
ادحگ للغرفة و كأنـي اول مرة ادخلها..كلشي تقريباً
عني
جني البنـات و لانا بعدها على حالها ضايجة و القهـر واضح بملامـحها
لليل چنا گاعدين سوية
زفرت مهرة و گالتلها بنفاذ صبر
- شبيـچ لانا صارلچ يوميـن واضح عليچ ضايجة
- اي صح لانا خوما اكو شي
حچيتها و هي تنهدت و گعدت بالگاع بصفنا
تربعت و مرة ادحگ عليه و مـرة على مهرة و گالت
- انتوا عدكم المـراة ميصير تتزوج مسيحي او من اي ديانة مو صح؟
و باستغراب گلت بسبب سؤالها
- اي محرم هالشي
- و هماتين عـدكم الي يترك دينه يعتبر مـرتد مو صح
- اي صح
جاوبتها مهرة و اني رديت
- شـصاير لانا؟ شنو سبب هاي الاسئلة
تنهدت و حچت عيونها مدمعـة
- ابن عمي يحـب بنية
و يريد يتزوجها..بس هي مسلمة و انتوا عدكم ميصير تتزوج غير مسلم
فـ هو غير دينة و اعتنق الاسلام، و هسا بـابا و عمامي يدورن عليه و هو انهزم و منعرف مكانه
و خابرني البارحة راح يسافر خارج العـراق ورا ما يتزوجون
ختمت كلامها و هي تـرجع شعرها ليورا
و اني ظليت صافـنة..عود صدگ اكو هيچ حب؟
يغيـر دينو علمود شخص بس تـا يحصل عليه
لانا ما چانت مهتـمه لتغيير دينة بـگد ما خايفة عليه من اهلو
طـمناها ان شاء الله ما بي شي و اهلچ يقتنعون
اني سكتت و رحت تا انام لأن نعست..هي شوية و مددت بفراشها و كـل شوية تتصل و ماكو رد مـنو
صفنت و بيـني و بين نفسي فكرت عـود هلـگد يحبها لدرجة ترك كلشي علمودها
هو اكو هيچ حب لو نـادر؟ و صعب الوجـود
مرت ايام و راحت ايـام و نفس الحال
ابن عمهـا مسـافر بس قبلها متزوج البنية، استغربت شلون اهلها انطوها
و من حچـيت هالشي گدام مهرة
دحگتلي و گـالت بسمار
- خوما كلها تفكر مـثلچ..اكو عدهم اهـم شي الشخص يرتاح و ياخذ الي يريده
بوقتها لأول مرة احس نفسي صدگ عندي نزعة طـائفية يمكن لأن اجت من شخص قـريب مني
أمجد اشوفو من بعيد..يدحگلي و يبتسم
مرات يجي يسلم و يمشي..ما ظل يحچي وياي مثل گبل
بصراحة بداخلي افتقـدت هالشي..كلامـو نظراتو
ما توقعت نفسي بيوم راح استفـقد وجودو

چنت وحدي كالعادة گاعدة بالحديقة، فـجاة بعفوية رفعت راسي و صار گدامـي
شلون ابتسامة تلقـائية انرسمت على ثغـري من شفتو و هو بادلني هالابتسـامة

گعد يمي و همس اول انـدار عليه

- هيچ شوفتي تفرح

مـا رديت عليه و صديت عنو
سحب دفتر مال ملاحظـات مني و طلع قـلم جيـبو
جيت اخذ الدفتر بس هو مـنعني
قطبت حـواجبي و كتب و سد الدفتر و ناوشنيا

- شنو معنى تصرفك

- احسبي شـلون ما تريدين صفـاء
اني احبچ افهميها

سحـبت نفس بقوة و گلت

- انت دزيت يسرى ذاك اليوم

- لا والله ما دزيـتها
يعني انتي لحد هسا ما عرفتـيني؟ من اريد احاچيچ اواجهچ ما ادز احد

مسحت على گصتي و هو گال

- متوترة و عندچ سؤال صح

تفاجئت لأن صدگ ردت اسألو ما راح تمل؟ لو شنو نهاية حبك الي
بس هيچ سألني بغتـة خلاني انسى شردت اگول للحظات قبل لا اتـدارك نفسي و اسألو

- انت وين راح تـوصل؟ شوكت ناوي تفهم و تعرف انو اني ويـاك ما نتراهم

- ليش رحتي لكشافة لو قـريتي فنجان و عرفتي ما نتراهم ؟
انتي انطيـتيني فرصة افرغ كلشي بگلبي و احچيلچ

حچاها بجدية و اني جاوبـتو

- لأن ما يهمني؟

- يعني ابد ما فكرتي بيـه للـحظة؟

حچـاها و اني گمت ادحگ لكلشي بس الو لا
تصرفـي يمكن چان واضح انو بدا كانو لشخص متوتر او يحاول يضيع شي
و هـو گبل فهم و گال

- يعني اي

سكت و تقرب شوية و حچـة بهمس و اني ادحگ ليگـدام

- صفاء انطيـني فرصة وحده
و اوعدچ ما اخذلچ..لا تفكرين اني شنو و شنو بينا من اختلافات
باوعيـلي مثل ما اني اباوعلچ بدون مذهب و لا تعصب
ما يهمني انتي من وين او اي مكان والله، الي يهمني انتي و بس..انتي اسم على مـسمى و رايدچ بكل جوارحـي

حچـاها و استأذن
ظـليت بمكاني گاعدة و اني امسح على گصتي
وجـع راسي زاد و ردت بـس ارجع للسـكن على الأقل ابتعد و ارتـاح من تفكيري

لمـيت كـتبي و اني مقررة اضرب المحاضرات..لأن حتلو فتت للمحاضرة ما راح افهـم شي و حـچي أمجد يرن براسي

ابتـعدت شوية عن الحديقة و ما اعرف شـصارلي عيوني غـوشت و راسي طنين عالي صـار بي
ما حسـيت الا ايد تكـمشني من زندي
فقـدت السيطرة على نفسي و ما ادري بعد شصـار

.

أمجد..

چـنت يم الردهه الي بيها صفـاء..مكـتف ايدية لصـدري و نظراتي تروح و ترجع بكل مكان
احس وجع مو طبيعي بگـلبي عليها

صفـاء حسيتها من اول يوم شفتها انزرعـت بگلبي، من اجت تسأل عن قاعتها ظليت اتـبعها بعيوني
شي غريب بيـة خلاني انجذب الـها

حاولت مـراراً و تكراراً اتقرب الها بس تنطيـني فرصة بس ماكو نتـيجة
و هالشـي خلاني اتعلق بيـها اكثر و اكثر

من شفـتها من بعيد و تـوزانها تخلل ركضت عليها..وگعـت فاقدة الوعي و حسيت نفسي گوه تماسكـت علمودها
اتصلت بـ يسرى و اجت تـركض و اخذنـاها للطبيب
طلع عدها فقـر دم و ضغـطها هابط
خلولـها مغذي و هسا جوا و يمـها يسرى

بتـردد گمـت و اني اعدل بقميصي لحد هسا ما شفتها
دگـيت الباب و فتت للغرفة
چـانت متمددة على السرير ابتسمت و گلت

- الحمدلله على السلامة

و بهـون ردت

- الله يسلـمك

گعدت على السدية البصـفها و رجعت گلت

- شلون صرتي هسا

- احسن شكراً الك

دايما چانت تتعامل وياي بـ رسمية اكرهه
اريد ما تكون بينا حواجـز..رغم هي تشوف جدران عاليـة بينا بسبب نظرتها الي و لمـذهبي بس صدقاً اني ما اهـتم و لا اهتم لـ هاي الأمور الي ما اعتـبرها مهمـا

چانت ما تـباوعلي و تسولف وي يسـرى
التفتت يسرى عليه و گـالت

- هسا اجي

و انطتني ابتسامة يعـني استغل الفرصة و احچي وياها
طلعت يسرى و اني ظليت يمها
تنهدت و گلت

- عندچ فقر دم حـاد

- ما ادري ما حسيت

- الـمهم هسا انـتي بخير و كتـبلچ على علاج
يخـلص المغذي و نطلع

هزت راسهـا باي و رجعـته ليورا و اردفت اني بهـدوء

- راسچ يوجعچ

- مو حـيل

سكتت و هي كـذلك
چان الصمت سيد الموقف للحـظات طويلة
خلص المغذي و فاتت يسـرى، اجا الدكـتور و كتبلها خروج
سـاعدتها يسرى بانو تگوم على حـيلها و طلعنا..چانت بعـدها دايخة تقريباً ملامحها شاحبة صارت
چان اكو علاج گال اخذوا من الصيدلية..فـ يسرى تبرعت و گالت اني اجيبه انت اخذها للسيـارة

بعدنـا نمشي بالممر و فجـاة صار گـدامنا شاب
بطـبيعتي ما انسى الوجوه..حتلو ورا مدة طويلة بس اشوفة بسرعة اتـذكرة
و وجه هذا الشـاب ما نسيته..نفسيته الي بيوم انحرقت صديقتـها چان متواجد
ويا شاب ثاني..هو من شاف صفاء قطـب حواجبة باستغراب
سلم و گال متجاهل وجودي

- خـير صفاء صاير شي

باوعتله صفاء بطـرف عينها و ردت

- ما بيـة شي تسلم

نبرتهـا چانت حادة و بقسوة حچت
هو هز راسه بأي و بدا يباوعـلي مرة و مرة يباوع لـ صفاء بنظرات عرفت افسـرهن نظرات شك

بس صفاء ما اهتمت اله..مشـت گدامي و اني جـيت امشي وراها بس الرجال لزم ايدي و بفحيـح گال

- لا تظل خفيف ترا الثگل زين
مو كل ما اشوفها الگاك تركض وراها عبالك طلي

و ترك ايدي جيت ارد عليـة بس صديقة طبطب على كـتفي و گال بغمزة

- اسمع كلام علاوي يريد مصلحتك

- و انت شعليك؟ ابـن خال ابن عم

حچـيتها و اني المح صفاء و يسرى واگفات سويـة
باوعلهن الرجال الاول و ابتـسم رجع خطوة ليورا و صار گدامـي
چان اسمر و شعره اسود و لحيـته عالية نوعاً ما

- الحمدلله مو ابن خالها و لا ابن عمها چـان وجهتها على القبلة و ذبحتها لأن تمشـي وي هيچ شكول

و مشى انتبـهت لأيدة ملفوفة بشاش
التفتت على يسرى و صفاء و مشيت الهن

ما حچيت شي و صفاء بقت ساكته..
وصلتها للسكن اني و يسرى

انتهى الدوام و رجـعت للبيت
من فتت لگـيت عمي مـاهر گاعد بالصالة
و كالعادة بيدة جـگارته سلمت علية و گعدت

و هو باوعلي و گال بسخرية معهودة منه

- ها هماتين مضروب بوري؟

مسحت على وجهي و گلت

- اليوم تمرضت و اخـذتها للطبيب اني و يسرى

تعـدل بگعدته و ضيق عيونه و هو يحچي

- بعدك وي هاي يسرى؟

- مـاهر شبيك ليش هلـگد تكرهه؟
ترا والله حبابة و بنية مؤدبة

ضحك و هو يطفي جگارته
عمي ماهر اكبر مني بـخمس سنـين..عمرة بال30 سنة و هو منتسب بالجيش برتبـة ضابط
انسان عصامي كلش احبه و احترمـة

تزوج و توفت زوجته بـ حادث سيارة قبل 7 سنين..و من هذاك اليوم حـلف ما تدخل مراة لا لقلبه و لا لبيـته..

- ما ارتاحلهـا..

حچاها و اني ما جادلته بشيء
هو هذا عمي ماهـر..من اول نظرة يگول اعرف الناس شنو من شـي

- اي حچت وياك شي ؟ انطتك وجهه

- على الاقل تشكرتني

- والله طريقك صعب أمجـد..اني انصحك تتركها

- بس لا تگول ما ارتاحيت الها ؟؟

حچـيتها بسخط و هو رد

- لا مو هيچ السـالفة، بس لأن على حسب كلامـك هي متعصبة مذهبياً

- ههه حلوة هاي مذهبياً

- لعد مو صدگ

حچاها و اني جاوبته

- بس هاي الأيام تحچي وياي على الاقل بطلت تفتح هذا الموضوع

سكتت و تقـربت عليه و بهدوء گلت

- عمي ماهر اذا ردت اخطبها تروح وياي

ضحك و گال

- اخطبها الك منو عندي غيرك..اروح من هنا للانبار اخطبلك باكبر مشـية

ابتسمت و تشكـرته..اني والدي متوفي و عندي اخوان اثنين اكبر مني و اخت وحدة عمرها 17 سنة
بيتنا ملك الحمدلله
ساكنين كلنا بس اخوية الاوسطاني متزوج و عازل وحـدة
و عمامي اثنين ساكنيـن قريبين منا
بيبيتي الحمدلله موجودة..انسانه تشبة ماهر كلش
بس عصبية و كـلمتها ما تصير اثنين

اخواني زوجتـهم باختيارها..و هسا تركض ورايـة تريد تزوجنـي حسب اختيارهـا

- بس المهم أمـجد انت تقنعها و تعرف مشاعرها ناحيتك
مو گـبل تعالوا اخطبولي و نروح و نرجع بالوجه الأسود..بعدين اخاف اهلها نفسها طائفيين

سكتت من حچه مـاهر
مع دخول بيبي..عكازتها تـضرب بالارض باوعتـلي و گالت بلهجة اقرب لتحقيق

- منو هاي الي تريـد تخطبها؟
و شنو سالفة طائفيين

تمتم ماهـر و هو يوگف على حيـلة

- خلص نفسك بنفسك مع السـلامة

طلع و ظلت بيبي فوگ راسي
و قبل لا ارد گـالت بقساوة

- اسـمع أمـجد مال تروح تجيب عروستك من الجامعة هاي قطـنه و شيلها من اذنك
تخرج و شيل شهادتك بيـدك و اني اجيلك عروستك لـغرفتك

هزيت راسي و ما جاوبتها..اصلاً حتلو رديت عليها راح اطلع بدون تربية و ارد عليها

طلعت من الصالة و لگيت امي واگفة
امي مثل النسمة الباردة ما عليها بأحد..صح احنا ولـدها بس عبالك اولاد بيبي كلشي بيـدها
و ما تـگدر امي تنطي رايها حتلو بصحن گـزاز

بـاختصار بيبي بهذا البيت هي الأامر النـاهي

.

صفاء..

ورا يومين من سالفة وگـعتي بالجامعة
چانت كلشي هادية..شافني أمجد و جتي علية يسرى تسأل عني و عـن وضعي

ما اعرف بس حبيت حيل مـوقفهم
و كبر أمجد بعيني لمـا تجاهل علي و ما رد عليه
من جهه بصراحة خفت لا علي يوصل حچـي لأهلي و خصوصا جـدة

لأن هاي ثاني مرة يـشوفنا سوية

دنيا ليل و الـساعة بالـ11 تقريباً
مددت بفراشـي تا انام..فجاة دگ تلفوني

شفتو صهيب گلبي انقبض و خفت لا جدة لو ابويـة بيهم شي
گبل فتحت الخط و جاني صوتو بعصبيـة و صياح

- صفـاء وين انتي

- يعني وين؟ غير بالسكن

زفـر بعصبية و گال بحدة

- صفاء منو أمـجد؟ و شعندچ ويا بالمستشفى ؟؟

.يتبع

#ذبول الاقحوان
#البارت الخامس
.
گـعدت على حيلي و گلت بعصبية
- يعني تشك بيه صهـيب
- عجل شنو مبـرر روحتچ و رجعتچ وياه للمستشفى؟ و وگفتچ و وگعدتج ويا بنص الجامعة
چـان يصيح و واضح متعصب لدرجة
غـمضت عيوني و سحبت نفس مهرة و لانا چـانن يدحگن عليه باستغراب
گمت و طبيت للمطبخ و هو گال
- هو نـفسيتو موو
- ايي
جاوبتو بهالكلمـة لو نار و شعـلت بي
گام يصيح و يسـب و اني بس اسمعلو..اخر شي من شـفتو سكت گلت
- هاا كملت؟
- صفـاء شنو علاقتچ
- و روح امـي ما عندي ويا شي
اقسلملك بالله تخربطت ضغطي هبط و هو و بنية زميلتو اخذوني للطبيب
- و وگعدتـچ ويا بنص الجامعة
تنكرينـها
- منو قليل شرف گالك هـالشي؟
- رقم غريب خابرني..چان ولد و گالي اختك عدها علاقة بشخص بالجامعة
- والله العظيم ماكو شـي بينا
صهيب اني تربية ابوية تتوقع انزل راسـو؟ و اي مرة مرتين گعدنا بس الله شاهد عليه مرة تعاركت ويا و مرة چان عندي امتحان و شرحلي و مرة ثالثة نسيت شنو حچيت بس ما گعدت ويا بعد
گعدت بالگاع و اني اتـنهد
ادحگ ايدي تـرجف و گبل جا بالي علي
اكيد هو الي گالو من الله لا ينطـي اذا صـدگ
- تدرين لو ابوية عرف شـنو چان سوه
- اعرف شيسوي..صهيـب اني صفاء تتوقع انزل راسكم بهالتصرفات؟ و انت تعرفني حق المعرفة
- عقل ما ظل براسي والله اريد ارد عليه سدو و انطاني حظر
- زين الصوت مت عرفتو
- لا و بعدين ليش
صفاء اني ما اريد اظلمچ احچيلي
- والله ما عندي..انت تعرفني من السكن للجامعة و ما اختلط وي احد بس مهرة و لانا
سـحب نفس و اني ظليت ساكتـة، شـوية و رجع گال
- صفاء انتي ما تكذبين عليه؟
- اقسملك بالله و روح امي صهيب تعرفني ما احلف كذب ؟؟
- خوش خوش لا تصيـحين
هاي الجمعة تعاي و نتفاهم
- خوش
و سد الخط بدون ما يسـلم عليه
ضجت حيـل و انقهرت..جيت ابچي لأن ظميت عليه
بس اعرفو خبل اذا اگلو هذا ابدا اعجابـو بيه يشد وياي
رجعت مددت بفراشي و غطيت راسي و ما حچـيت وي البنوات شي
ثـاني يوم الصبح طلعت من المحاضرة..چنت امشي و انـي اعدل بالملازم بالجنطة مالتي
جا على بالي گلاص چـاي و اريد اگعد بالحديقة شوية هدوء عكس الكافـتيريا
- المعذرة بس ممكن سؤال
انداريـت على الصوت الجا من وراية..عـگدت حاجبي من لگـيتو ضابط حواجبـو معقودة و عندو شوارب مايلات للشقار
- اني ؟
هز راسو بأي و طلع هـويتو اني هين على گولتهم تصنمت..هذا شبي و لـيش جاي عليه بالذات
- انـي ماهر اسماعيل
- اهـلا
- اسف على الازعـاج بس تعرفين طالب بأسـم أمجد ايوب
- ماكو بقسمنا..بالمرحلة الثالثة
حچيتها بهدوء و هو تعدل بوگفتو و حچـة
- اذا ماكو زحمة ممكن ادليني القـاعة
يمكن لو ما ضابط چـان اعتذرت
بس بصراحة خفت منـو و هو نظراتو ما عرفت اوصفـها..يصفن بالـوجة
مشيت و هو مشى ويـاي و كلمة ما نطق، وصلتو يم القاعة و تشكر مـني و رحـت
طلعت للحـديقة و گعدت على المسطـبة
حتى نسيت ما اشتريـت چاي..دقايق و جتي يسرى
شگـد انيقة و بس تشوف ملامحها تهدأ..صدگ حلوة طبع و شكل
سـلمت و گعدت يمـي
- ها شلون صرتي
- لا الحمـدلله زينه
شكراً لوگفتچ وياي
خلت ايدها على ايدي و گالـت بابتسامة
- ولو عمري ما سويت شي هذا واجبي
رجعت كتفت ايديهـا و حچت بتساؤل
- صدگ شفتي أمجد اليوم؟؟
رمشت بعيـوني
و حسيت دگات گـبلي الرتفعت راح تفضحني..تمالكّت نفسي و گلت
- لا والله
- اوفف اليوم ماكو..گلت يجوز ضرب المحاضرة و اجا يشوفچ
سكتت و كملت كلامهـا و صدت عليه
- صدگ شنو صار بوضعكـم؟
بلعت ريگي و حچيت بدون ما ادحگـلها
- ماكو بينا شي تا يصـير
- يعـني بعدچ ميبسه راسچ
- مو قصة راس يابس يسرى ؟؟ اني هاي تربيتـي
ما اريد اخون ثقة ابوية و اخوية
سكـتت هي و اني اردفت بـبرود
- ما احب علاقـات الحب الي مو من ظمن حـدود الحلال !! يمكن عندي ذنوب و ما اعرفهن يمكن اذا قبلت بي يزيدن ذنـوبي
مـا اعرف يمكن حچيت شي يضحك..او ما عرفت اشرح وجهة نظري
لأن فجاة گعدت تضـحك..
- يعني الحب بمنـظورچ حرام اذا ما چان بالحلال؟
- هاي وجهة نظري و هـذا المقتنعة بي
جاوبتني بنبرة اقرب للسخـط و هي ترفع تك حاجـب
- زين شلون الشخص يرتبط باخر بدون علاقة حـب؟؟
- عجل ليش اكو فترة خطوبة
حچيتها ببسـاطة و هي ردت فوراً
- اوكي فترة الخطوبة اشبة بالتعـارف..بس هنا بمجتمعنا الي تنخطب و تفسـخ اكيد العريس شايف عليها شي و تركها مـو
ابتـسمت و اني ارد عليها
- تعـرفين شنو مشكلتنا و مشكلة مـجتمعنا
نشوف الشي الحلال صعـب حيل !! يعني عادي اثنين يدخـلون بعلاقة حب محد راح يحچي عـليهم
بس اذا ارتبـطوا و ما تفاهموا راح يگولون لا اكيد واحد منـهم بي شي..اكيد واحد منهم خايـن و يضحك على الاخـر
- تفكيرچ غـريب

حچـتها يسرى و هي تضيق عيونها و بهدوء رديت عليـها
- مـاكو تفكير غريب بهالدنيا ابد..كل شخص الـو تفكـير و كل مجموعة و اشخاص الهم تفكير مخـتلف
شغلة تشوفينها غريبة المقابل يشوفها عـادية حيـل
رفعت اكتافـها بعدم اهتمام و گالت ببرود
- كلامچ صح..بس لأن اني عشت بيئة ذات تفكير واحد يمكن بديت اشوف كل تفكير مناقض شي غريب
- اني من حالچ
همين تربيـة بيئة محافظة متشابة بالتفكير و المنطق..بس تواجدي بالجامعة خلال هالكم شـهر خلتني اعرف انو مو كلنا نفس الشي
و بغمزة گالت
- بالضبط مو كلنا نفـس الشي..نختلف بالدين بالمذهب و بالعقيدة
ابتسمت و رديـت بثفة
- نختلف اي..بس اني هين عندي وجهة نظـر !
- زين شنو السبب لهذا الكرهه؟ حسب كلام أمجد ماكو شي يستعدي لكرهچ المو مبرر
سكتت و اني اصـد ليگدام
من داخـلي ضجت يمكن بدون سبب..و يمكن بسبب قوي
أمـجد يعني يحچيلها كل كلـمة اگولها؟
- همم شو سكتي
همهمت و اني صديت عليهـا و گلت بجواب قاطـع
- انـتي تحبيهم بدون سبب و هالشي محد يدخـل بي
و اني همين اضـوج منهم بدون سبب و هالشي راجع الي
كتفت ايديها و گـالت
- بس الي انتبـهت عليه بديتي تستلطفين أمجـد..
لـو هو حالة خاصـة؟
ما رديت عليها..و ظليت ساكتـة
و هي ضحكت..طبطبت على چـتفي و گالت بغمزة
- شكل السنـارة غمزت
و سلمت و مشت من چـدامي
ما عرفت مشاعري بهذيچ اللحظة بالضبط..
فـ تجاهلة الصار
جـا يوم الخميس و جا ابويـة اخذني
چنت طول الطريق افكر شلون راح اواجـه صهيب
وصلنا للبيت و تلـگتني جدة و هي تحظن بيه و تبوسني لأن هذيچ الجمعة ما جيـت
صهيب چان بالسـوگ..من جا سلم عليه
و نظراتو چان تگول لازم نحچي..
سويت عشا و تعيشنا و گـعدت وي ابوية و جدة شوية، بالليل من ناموا
طلعت مـن غرفتي و دگيت باب غرفة صهيب
صاح فوتـي
طبيت و سديـت الباب وراية
دحگـتلو چان گاعد على التخت مالتو، تنهد و جيت گعدتو بصفو..مرت لحظات صمـت و گلت بهدوء قاطعة السـكون
- صهيب بعدك ضايـج مني؟
تأفف و هو يمسح على راسـو..دحگلي صفح و حچـة بهدوء
- صفاء لو ما ثقـتي بيچ اقسم بالله چان شفتي مني غير تصرف
- لأن انتوا تثقون بيه مستحيل انزل راسكـم
اذا ما تصدگني روح وياي للجـامعة و قابل يسرى الراحت ويايه
- زين منوو؟ منو عندو مصلحة يشوه سمعتچ چـدامي
عندچ عداوة وي احدد
- لا والله العظيم ما عندي وي احـد شي
حتى ما حاچية وي احد بالقسم
سكـتت و هو رد و عيونو يضيق بيهن بتسـاؤل
- اگلـچ اخاف هوو؟
ترا اكو زلم بهالدناء و الحـقارة
بلعت ريگـي و نـزلت راسي، طگطگت اصابعي
و بذرة شـك انزرعت بداخلـي..غمضت عيوني بقوة و صهيب يكمـل كلامو
- كلشي يـصير صفاء
يجوز هو؟ انتي شوكت متكـاونه ويا
رفعت راسي عـلية و گلت
- مـو كونه..هو حچه وياي و اني تگدر تگول حچيت ويا بطائفية و صار بيـنا حچي
زفر و هو يهـز راسو و يگول اوف منـچ صفاء اوف
صد عليه و كمل
- هذا السـانچ اگدريلو
ما عرفت شنو ارد علـية
من داخلي شي يگلي دافعي عنو..أمجد ما يسويها
بس اكيد اذا حچيت راح يشك لو يفهم غلط صهيب
ظليت شوية و طلعت من الغرفـة
بس ما اعرف ليش ضايجة و مختنـگة بس افكر أمجد سوو هيچ
خلصـت العطلة و رجعت للدوام..اول محاضرة ما شفتو لـ أمجد
من طلعت من المحاضرة الثانية و گعدت بالحـديقة، جفلت من شفتو جـاية يمشي من بعيد
و هو يرتچي على عكـازة و بصفو يسرى
تفاجئت و حسيت گلبي انقبض بس شفتو بهالحـالة
ابتسم و هو يتقدم ناحيتي، گمت و صرت گدامو و گبل لا اسلم و بدون وعي مني گـلت
- شبيهاا رجلك
دحگ لـ يسرى الي ابتسمت و رجع دحگلي و هو يگول بهدوء كعادتو
- كسر بـسيط
- و شلونك هسا
حچيتها و اني ادحگ لرجلو المجـبسة من عند القدم
- لا زيـن الحمدلله
هزيت راسي باي و هو دحـگ لـ يسرى و يمكن هي فهمت نـظراتو
استأذنت و مشت..
تنهدت و هو ابتسمت و گعد على المسطبـة
ظليت واگفة و هو گال و عينو بعيـني
- الخميس بالليل عثرت و وگعت يم باب الحمـام
الحمدلله عدت سلامات
- الحمدلله
جيتو اسألو انت خابرت
بس سكتت..دنگت اخـذت ملازمي تا اروح بس هو گال گبل
- صفاء اني اريد اخطبچ
صنمت بمكاني و حسيت ظهري يبس على هاي الوگـفة
حرفياً گمت اسمع طنين بأذني و هو جر نفس و كمل
- مادري كم مرة لازم اگـلچ احبچ حتى تقتنعين
بس الي اعرفة هسا لازم اگـلچ اريد اخطبچ حتى تتأكدين من حبي الچ
انداريت علية و اخيراً گدرت اجمع كم كلمة
- انت أثرت على عقلك الوگعة
- كلشي ما أثـر
من اول يوم شفتچ ردتچ تصيرين الـي !! صفاء انطيني رقم اخوچ ابوچ اتفاهم ويا
هزيت راسـي بلأ
و ما چـان بالي اي جـواب غير كلمة لا..
كملت لم اغـراضي و گلت بهدوء عكس داخلي الي نيران و حـروب گبت بي
- انسى الموضوع أمجـد
اني وياك مو متراهمين

- والله اذا گلتي سالفة سنة شيعة الا اضربچ بهاي العكازة افرمت عقـلچ
بابا داگـلچ اريدچ احبچ افهـميهاا
ما اعـرف ليش ضحكت، بس تخيلت الموقف گبل جتني الضحكة
هو ضحك و گال بانفعـال
- ايي هيچ اضحكـي
والله متت على ما اشوف هالضحكة الحلوة
غـمضت عيوني و حچيت و اني أنب نفسي
ميصير تحچين ويـا صفاء
حرام عليچ هاي خلوة
- أمجـد انت تعرفني شنو من شي، ليش من الاول فكرت بيه
- مـثل ما انتي تفكرين بيه ؟
صفاء ايـاچ تنكرين لو تكذبين على نفسچ قبل لا تكذبين عليه
ادري شغلة بالچ و ادري بديتي تتقبليني مو مثل اول
ظليت ادحگلو و هو ابتسم..شحيت نظري عنـو
و جتني البچية من الـموقف،عقلي و گلبي بعراك دائـم
گلبي يحچي و عقلي ينكر..اعرف و ما اخاف من اگـول أمـجد غير بداخلي شي بس مو متـأكدة منو
- خوش ما اخطب گبل..ننطي فرصـة للثنـينة
شوفي نفسچ تگـدرين تتأقلمين وياي
اذا تريديني ابتعد حتى تفكـرين ابتعد
اذا ردتـي ابقى بقربچ ابقى الي يريحچ
- مـا اريد اگع بالحرام لو يلحگني ذنب بس لأن احچي وياك
حچيتها بتعب و صوتي ناصي
نهض من مكانو و وگف گدامي و گال
- خوش ابتعد.. بس اسمعي صفاء والله رايدچ بالحلال..اعرف طبيعتچ و اعرف نوع تفكيرچ و خوفچ و اني احتـرمو..و هالشي زادني تمسك بيـچ
هزيت راسي بدون ما ارد..و استأذنت منو
بهذاك اليوم ما گـدرت اغفي و رحت للمحاضرات بتعب و ارهـاق
حسيت بخنگة اريد احـچي و افضفض لأحد
و ما لگـيت اقرب عليه من مهرة و لانـا
من جينا نام گعدت بالگاع و گتلهن
- اريد اگوللـچن شي
صدت علية لانا الحچت و هي تنفض بفراشها
- گولي
سحبت نفس و گـمت اسولف الهن
ما ظمـيت شي حچيت من اول لقاء النـا و كل كلمة..حسيت نفسي ما اگدر اظم بگـلبي اكثر
من سكتت وحدة گامت ادحگ على الأخـر، جتي مهرة گعدت بصفي و لانا من الجهة الثانية
و بتعجب گـالت مهرة
- انتي تحبيـنو
- اكـيد لاا
حچـيتها بانـفعال و لانا گالت و ايدها جوه حنچي تا ادحـگ عليـها
- و مريم العذرا تحبيـة
دباعي عيونچ تلمع من تحچـين بي
- يمعوده شنـو تلمع شنو حچـيچ هذاا
رجعت مهرة خلتني اصد عليه و حچـت
- انتي ما تنتبيهن بس المقابل ينـتبه
گعدتي تحچين كُـل ايجابياتـه و اذا گلتي كلمة حچاها بسرعة تبررينهـا
صفاء انتي معجبة بـي بس ما تعرفين بنفسچ
وخرت ايدها و انتفـضت من مكاني
كرهت هالفكرة و حچـيهن..ظلن يدحگلي بابتسامـات على وجوهن
صديت عليهن و گـلت بعصبية
- مـا احبو
- اوكـي
حچتها لانا الضحكـت بغمزة
خزرتهن و هـنا ما سكـتن
مددت بـفراشي و گلت بصياح
- مو صـوچن صوچي اني الحچـيتلچن
غطيت راسي و انـي اعصر عيوني و اكرر چـذب ما احبو
حچـيهن كلو مجرد شقة و كذب مو صدگ
الصبح داومـت و مـا شفتو..بس همين لمحـت نفس الضابط
البـارحة نسيت ما گلتلو ضابط سأل عـليك
ورا ما خلصت المحاضرة الثـانية
قابلني عند الكافتيريـا..ابتسم و هو سلم عليه و تعداني..استغربت شعجب ما وگـف
طلعت للحـديقة و اني قاطبة حواجبي و انـافخ
عود ليش ما حچـه وياي؟ عبالك اي شخص اني
تأففت و اني اگول
- و انتي ليش مهتمه ست صفـاء ؟؟
خلص اليوم و ما قابلـتو وراها
مـن طلعت من الكلية لمحتو هـو و يسرى يصعدون بسيارتـو و يسرى الي تسوق
رجعت للسـكن ضايجة، حـتى البنات انتـبهن عليه بس تحججت تعـبانة
مرت اربعـة ايام نفس حال من يـشوفني بس يسلم من بعيد و يروح
گمت اضـوج و انقهر لأن يحچي وي يسرى..مو قصة حب اكيد
بـس هو چان مهتم بيه و يقطع هيچ فجاة
ثاني يـوم چنت بالحديقة..شفتو گاعد و تلفونو على اذنو
تنـهدت و اني اقرر اروح احچـي ويا علمود الضابط السأل عـلية

اخذت ملازمي و گـمت تقدمت خطوات بس سـرعان ما رجعت من جتي عليه و گام مـشوا ليغـاد

هين نـار و اشتعلت بقلبي..ما توقعت راح اضوج هلـگد و انقهـر
كتمت بگلبي و رجعت لمكاني..طـبو مرض لا اروح و لا اجي

نزلت لأهـلي و ما دريت انو مبين عليه القهـر و الضوجـة
جدة گعدت تسأل بيـة شبيچ و ليش هيچ تعبانة

سكتت و مـا حچـيت لأن ما عرفت شـنو اجاوبـها..
شگوللها و اني نفسي ما اعرف شچـاني و شصار بيـة

رجعت للدوام و هيچ مرت ايام..اشوفو من بعيد و هو مبتعـد بس السلام بينـا
بالليل شگد ما انقهـرت بسبب هالجـفاء المفاجئ بچيت و اني اقنع نفسي بدون سبب

و من سألتني مهرة گـلتلها تذكرت عمي و بچـيت

الصبح ما عرفت انو وجهي واضح عليه انو قضيـت ليلة طويلة بالبچي
مهرة گالت حطي شي يخفي ورم عيونچ
بس سكتت ورا ما انطـيتها نظرة يعني اسكتي

تـعرفني بعيدة عن المكياج..لحد هسا من دخلت للـجامعة كحلة ما خليت بعيني

اول محاضرة فتتها بدون نفس حتى كلشي ما فهـمت
و الثانية ضربتها و گعدت بالحديقة، چنت احچـي وي ميساء
صح صارلنا فترة طويلة ما مسولفين..بس هي انخطبت
و سبحان الله البنية من تنخطب اكو بعضـهن يختفن من حـياتچ
و مع الاسف ميساء چـانت هيچ
تگول خطيبها متشدد و ما يحب سوالف الصداقات..گـتلها عوفي ما يفيدچ
و هي تگول لا والله احـبو ما اگـدر بدونو

سديت الخط منـها..و تحسرت شگد مفتقدة وجودها
چانت تگول اني ويـاچ ندرس بنفس الكلية..اني جيت لبغداد و هي تركت الدراسة بسبب خطيبـها

رفعت راسي و قطـبت حاجبي من صار گدامي أمجد
ابتسم و گعد على بعد مسافة قصيرة مني
دحگـتلو ببرود من گـال

- شلـونچ؟

- زينة

رديت بهدوء و هو سحـب نفس و حچـة

- مو على بعضـچ اليوم ؟ شبيچ

- ما بيـة

حچيتها و اني اكتف ايديـة و اصد عنو
لحظات صمـت مرت گـبل لا يگول بصوت نـاصي عبالك يحاچـي نفسو

- طـول هذيچ الأيام تجاهلتچ مو بيدي والله
بـس ردت اشوف شراح يصير بيه من ابتعد عنچ

صديت عـلية بسرعة و هو چان يبتسم بهدوء
بلـعت ريگي من كمل و هو يجـر حسرة

- صفـاء ما اگدر بدونچ والله

رمشـت بعيوني و صديت عنو..حسيت كلامـو شلون الهوا البـارد الضرب گلبي..ردت ابتعـد و اگوم
بس شي ثبتـني ما اريد اروح گبل لا اسمع باقي حچـيو

- حچيت وي عمـي و گال نروح نخطبهـا بس انطيني عنوان رقم اهلـها

- أمجـد ليش مستعجل؟

حچيتها بهدوء و اني اضيق عيوني و هو بسرعه رد

- انتي ما تريـدنا ندخل بأي علاقة و اني مـا الومچ حقچ هالشي
اريد اخطبچ لأن اني متـأكد من مشاعري ناحيتـچ..و اعرف مشاعرچ ناحيتـي

- شتعرف؟ انـي حچيت گتلك عن مشاعري

ابتسم و رد و هو يكتف ايدية

- مـو شرط تحچين عيونچ حراكاتچ

و تا اضيـع توتري من نظراتو و حچيو و ما افضح نـفسي
گلت و اني اصد عنـو

- هلگـد تعرف بلغة الجسد و النظرات

- و اكـثر !! اعرفچ ضايجة لأن اتجـاهلچ
و اعرف ضوجتچ لأن اگعد وي يسرى و ما احچي وياچ

عيوني گبل دمعة و هو تنهد
اخذ عكازتو و گـال بهدوء

- انطيني رقـم ابوچ و اني لو عمي نحچـي ويا

- ما اگـدر

- ليش

وگـفت و اني اطگطگ اصابعي و بنبرة اشبة بالبكاء بسبب ضياع و تشتت مشاعري بهاللحظة

- شنو يگـلو؟ لازم اني احچي وي ابوية

ابتسم و قطع الخطـوة البينا
ركز بعيوني و اني تحـاشيت ادحگـلو و هو گال

- انتـي تحچين وي ابوچ
يعني راضية

ما عرفت شنو ابرر..شايفين من تضيع بنص مكان مليان ناس غرباء و ما تعرفو ويـن
هيچ احس نفسي بالضبـط..احس بالضياع
گمت اشعر انو گلبي هو المتحكم الوحيد
حـتى هو النطاني ايعاز انو اگـلو احچي وي ابوية مو عقـلي

- خـوش صفاء..من تروحين لأهلـچ فاتحيهم بالموضوع

ما رديت و هو استـأذن
مسـحت على وجهي الي تعـرق، ما صدگـت ارجع للسـكن
و حچيت ويا البنـات..ظلن گـاعدات گبالي

مهرة تنهدت و گالـت

- موضوع صعـب ! اخاف ابوچ يعصب و يشك

- لا لا ابداً مو صعب اگـعدي و احچـيله گـوليله
اكو زمـيل الي يريد يتقدمـلي

- لانا هذا مو ابوچ تا هيچ راح يتفهـم
احنا مجتمع عشـاير و گبل راح يفكر اكو شي بينا

و ببساطة گالت مهرة و هي تاكـل چبس

- لعد على اساس ماكو بينكم شي؟
ليـش يريد يخطبچ اذا ما اكـو مشاعر ناحيتچ بداخلو

- بس اني ما احبـو

طگـتها لانا ضحـكة و شاركتها مهرة
قطبت حـواجبي و گّلت بعصبيـة و اني اضرب مهرة بالكتاب

- لا تضحـكن بله مـا حچيت شي يضحك

- اذا ما تحبينـة ليش تاخذين رايينـا و تريدين تحچين لأبوچ عنه ؟
يعني بالچ يجي يتقـدملچ و ترفضية ؟؟

حچـتها لانا و اني تنهدت نزلت راسـي و حاوطتو بـيدية و حچيت

- ما اعرف والله..بس احس گلبي مرتاح !
يريد هالخطوة رغم عقلي رافض

تقربـت مهرة و گالت بهدوء و ايدها تلزم ايدي

- ما طول گلبـچ مرتاح استجمعي قوتچ و احچـي لأبوچ او اخوچ لأن قريب منـچ

- خايفة من ردة فعلهم

- من تريدين تخطين هيچ خطوة لازم عندچ گلب قوي..من ترجعـين اگعدي وي اخوچ و احچي كيت و كيت

- مهـرة والله محتارة
ما اعرف شنو اريد

سكتت و انـي اتأفف
لانا ردت

- حـقچ صفـاوي والله..بس انـتي ما طول بالچ الموافقة لا تخافين احچي وي اخوچ اكيد يفهمچ هو

- زين ليش ما تگولين لـ جدتچ

حچـتها مهرة..و اني هين طخت بالي جدة
ابتسمت و حسيت عبالك الفـرج اجاني و بضحـكة گلت

- ايي والله جـدة !! اكيد راح تفهمني و تحچي وي ابوية

و بغمزة گالت مهرة موجة كلامهـا لـ لانا

- لانا ترا ابد ما تحـبه

- اكيد ما تحبـه اكيد

عضيت على شفـتي و اني اگول

- عابت

گـعدت على التخت و هـنا يضحكن بيناتهن
مرت ايام و اني يوميا اجمع قوتي و ادرب بيني و بين نفسي شلون اگـول لجـدة
و جا الخميس و نزلت لأهلي..چنت خجـلانه حتى گبل لا اگول لجدة

بس هيچ احس انو خـاينة ثقة اهلي استحي
بس ارجع اگـول احنا ما بيـنا شي..و أمجد يريدني بالحلال
اول يوم ما حچـيت..مددت بفراشي و اني صافنة بالسـگف
و افكـر اني احب أمـجد؟ لو بس شعور انو شخص يحبني و يريدني شعور حـلو و اريد اظل مجـربتو

يمكن اول مرة انسى مذهـبو و ما افكر هو منين..كـل الچنت افكر بي بوقتهـا انو أمـجد اخذ مكـانه بگلـبي محد اخذها مـن قبل

ثاني يوم بالليل..طبيت لغرفة جدة
ابتسمتلي لما گلت

- خوما تريدين تنامين

- لا بنيتي تعالي

رحـت گعدت بصفها و هي مسـحت على شعري و گالت

- صار شگد ما گاعـدين و متحاچين

- غير الدراسة اخـذتني منكم

- ميخالف صفـاوي

تحمحمت و ما اعرف شلـون ابلش بالحچي
هي چانت ادحگـلي بنظرة انو احچي
جدة تعرفني من نظرة عيوني

- جـدة اريد اگلچ على شـي

- احچي

جريت نفس و كمشت ايدها و حچيت بدون ما ادحگـلها

- جدة اكو واحد وياي بالجامعة يريد يخطبني

رفعت راسي الهـا لگيتها تبتسم
و هـي تگول

- گلبي چان حاس احد شاغل بالچ

- لا جدة والله مو هيچ..

سكتت من هي حچت و ايدها الثانية تمسح على خـدي

- يمه اذا رايـدچ بالحلال ما بيها شي
انتي شنو رايچ بي؟

- جدة هو خوش رجال..و الله شاهد مو مثل ما تتخيلين علاقة حب و من هاي السوالف

حچيتها بترجي و كانـو اريد ابين للكـل عكس تفكيرهم

- واثقة منچ صفاء
ميخالف تصير هيچ سوالف شخص ينعجب بشخص واحد يحب الاخـر

بلعت ريگي و اني اگول بخجل

- اريدچ تحچين وي ابوية..اني استحـي

ابتسمت جدة و هي ترد

- ميخالف يمة..زين هو منين؟ شكـبره

- من بغداد و عمرو بالـ25 سنة

سكتت لحظات و رفعت راسي الها و اني اگـول بتردد

- هـو شيعي

هزت راسها بدون ما تحچـي شي..لحظات و گالت

- ميخالف يمه اني احچـي ويا و ان شاء الله خير

ظلت جدة تسألني شسمو و شنو يدرس
چنت خجلانه و مستحـية منها حيل
ثاني يـوم على ورا ما كملـنا الغدا..چنت اغسل بالمواعين
صاحلي ابوية..تركت البيـدي و انـي احس گلبي يدگ بحنجرتي
خوف و خجـل متوترة كل المشاعر اجتمعـت لحظتها
تمنيت اختفي من القلق

طبيت للـصالة و چانوا مجتمعين

- هـا يابة

- گعدي بنتي

گعـدت يم جدة و هو گال

- اكو واحد وياچ بالجامعة يريد يتـقدملچ..و حچتلي عنو جـدتچ

نزات راسي و گلت

- اي يابـة

- و انـتي شنو رايچ؟

و بصدق رديت و اني ادحـگلو

- اكـيد الرأي الاول و الأخير الك

سكـت ثوانـي و اني اشوفو يحرك بالسبحة مالتو
رفع ايدو و مسح على لحيـتو و گال ببرود

- مـا طول الرأي الـي
فـ گوليلو ماكو نصيب ابوية ما يريـد يزوجني هسـا

يتبع

شلــونكم 😍
طبعاً ندخل بالموضوع گبل
من هـسا هذولة مو كل الابطال بعد اكو شخصيات بس من يجي دورهم راح اضيف صورهم
صافي
تنطيها شبـة چبير لكن لون العيون مختلف لون عيون صفاء اسود طوخ
بس صفاء شوية عدها خدود

مهرة
گالت صفاء گوة لگيت الها شبية ملامحها صح عادية بس مميزة مادري شلون
شعر مهرة اسود و ناعم مو هيچ

لانا
بعد مسيحية و المسيح يجننون

أمجد
حسب كلام صفاء يشبه حـيل بس امجد لحيته مو هيچ شوية انصى گتلها من الاخير اللحية گوه مربيها و طالعه كالت يعني هيج شي

عليوي
نفس رسمة الوجه و الملامح و الكفشة
بس عيون علي كبار

#ذبول الاقحوان
#البارت السادس
.
صفاء..
حچـه ابوية كلامو و اني هـزيت راسي بأي
رغـم عيوني غورقـت و غصة وگفت بحنجرتـي..بس هذا قرار ابـوية و ما اگدر ارفضـو
دحگت لـ جدة الفجاة گالت و هي تحط ايد على ايـد
- انت شعـرفت عنه حتى ترفضة
- يـمه البنية بعدها اول سنة الها !
هـي رايحة تدرس ما رايحة تنخطب
- چـا ابوك مو جا على صـاحبه بحجه مشتـاگله و خطبني
ضحك ابوية و هو يجـاوبها
- يا يمـه انتي گلتيها صاحبو و تعرفونو حق المـعرفة، مو مثل هالولد لا نعرف لا اصلـو و لا فصلو
- الي يسأل ما يخيب
سكت ابوية و اني ادحگـلو
من نظراتو عرفـت انو هو حـاسم الموضوع و ما يريد يخوض بي اكـثر
كمشت ايد جدة و گـلت بهمس
- جدة كلشي قسمة و نصـيب..و اني اريد اكمل دراستي
دحـگت عليه و تنهدت..اني ابتسمتلها اطمن بيها
رجـعت للمطبخ اكمل شغلي بفكـر غائب، ما توقعت هيچ راح اضوج و انـقهر
بس ذكرت نفسي المكتوبلـك ما يصير لغيرك
انداريـت على صوت صهيب..جا وگف يمي و دحگلي لثواني
عرفتـو راح يحچي فـ تحظرت و گلت گبل
- اي هـو نفسيتو
- يعني صدگ رايدچ؟
هزيت راسي بأي و هو اردف بنبرة واضح عليها السخـط
- و انتي شنو رايچ؟
- الرأي الاول و الأخير لأبوية
- يعني عادي الوضع عندچ
تركت الصحن و صديت عليه..و گلت بعصبية مكتومه
- لا تگعد صهيب تستدرج بيـه
لو صدگ رايدتو چان گعدت ابچي و اقنع بأبوية..هو جا عليه و گال اريد اتقـدملچ و اني حچيت لجـدة
ابتعد و هو يگـول
- هسا اني شحچيت ما تگـوليلي؟؟
ذبيت حسرة و دحگتلو و اني اگول
- مو اني اعرفك صهيب..حافظة كل تصرف منـك
سكت و طلع من المطـبخ
بدون نفس كملت شغلي..و بالـ2 الظهر طلعنا لبغداد اني و ابـوية
من حدرت من السيارة گال
- نفس ما اتفقـنا..گوليلو ماكو نصيب
هزيت راسي باي سلمت و صعدت للسكـن
و اني افكر بكلمة اتفقـنا..بس احنا ما اتفقـنا و لا تحـاورنا بهالموضوع
حچيت لمهرة و لانا و بين عليهن القهـر
لانا بدون حچي تقدمت و حظنتني و هي تگول لا تسكتيـن دافعي عن حبـچ و وضحي انچ رايـدتو
ثاني يوم اول ما طـلعت من المحاضرة لگيتو گبالي
ابتسم و اني بهدوء بـادلتو الابتسامة
طلعت للحديقة و هو وياي..طول الطريق ساكتـين
بس وصلت يم مسطـبة گلت
- أمـجد..ابوية يگول ماكو نصيب
توقعت راح ينصدم لو يضوج..بس بالعكس ملامحو چانت ثابته عبالك شي متوقع
- ليش ساكت؟
حچـيتها من طال صمتـو، گعد على المسطبة و اني گـعدت و هو گال بدون ما يدحگـلي
- توقعت هالـشي ! انتي اول كم مرة همين رفضـتيني
فـ توقعت ابوچ همين يرفضني
صد عليه و كـمل
- شنو السبب؟ ما ننطي للغربة
لو تكملين دراستچ..لو لان شيعي
- ابوية مو طائفي..هو گال رايحة تدرس مو تا تنخطب
ضـحك و اني عقدت حواجبي بتعجب من گـال
- هو گالها عمي مـاهر ما يوافقون من اول مرة لازم تنسحل ذهاباً و اياباً يلا تحصل الموافقة
- و عمك يقـرا الطالع لو يعرف المستقبل تا يگول هيچ؟
- عمي ماهر مو دجال ههه بس هو عنده نظرة بعيدة للمستقبل
ما رديت عليه كتفت ايديـة و گلت بهدوء بدون ما ادحگـلو
- و اني نفس حچي ابوية..ماكو نصيب
- هالگـد التخلي عندچ سهل؟
صديت علية فجـاة
چان يدحگلي بنظرة هادئة متسائلـة..بلعت ريگي و ما عرفت شنو ارد
جيـت اگلو اني من الناس الما اعرف اتمسـك بأحد
من اول محطـة اعوف
- اذا انتي عنـدچ فـ أني لا !
انطيني عنوانكم و عليه البـاقي
- مـا اگدر أمجد افهمنـي ؟؟
ابوية گال ماكو نصيب اذا انطيتك العنوان و جيت راح يعـرفني رايدتك
و بابتسامة گال
- و تنكرين انچ ما تريدين ؟ و هياتچ بعظمة لسانچ اعترفتي
انداريـت عنو و اني اعض على شفتي
شلون زلگت بالحچـي..هو ضحك ضحكة قصـيرة و اني گلت
- السـان ما بي عظم
- صفـاء شو باوعيلي
نادانـي و بتردد صـديت عليه
بس صارت عيني بعيـنو گال بصوت نـاصي
- راح ادز عمامي
نزلت راسـي و تنهدت
و بذات النبرة گـلت
- خوش
- عنوانكم لو اگـلچ رقم تلفون ابوچ
رفعت راسي و گلت
- رقم التلفون احـسن
ابتسم و گال يلا
رديـتلو رقم تلفون ابوية و هو بضحكة گال
- ترا سجـلتو بأسم عمي
بس ابتسمت بدون ما ارد
چنـت ادحگلو و بگـلبي اگول يمكنچ يا صفاء و اخيراً اختاريتي شي صح
اختيارچ لـ أمجد صحيح..و الي يأكـدلچ تمسكو بيچ و اصرارو عـليچ
سحبت نفس و من هـسا شلت هـم لمواجهة ابوية ورا اتصال أمـجد بي
.
أمجد..
باللـيل ورا العشـا گعدت اني و عمي مـاهر بالصالة
تكفل هو يـخابر والد صفاء و يحچي ويا..بعد ما عمي عيسى و ابراهيم رفضـوا رفض قاطع
حالهم حـال البقية
اتذكر من جيت و حچيـت بحظورهم..مثل النار و شعتلها بنصهم..ناس تكبس و ناس ترفـع
بيبي چانت اكثر وحـدة رافضة الفكرة
حسستني رايح اخطب مـن الشارع، چـان عمي ماهر ساكت و هادئ

بس بالأخير گاللهم اذا وگـفتو ضده كلكم
اني ويـا، اعرف الكل مو راضي و كلهم رافضين و گعدوا يقنعون بيـة نلگالك احسن مـنها
بس اني محد بـالي غيرهـا..ما صدگت على الله من شـوية لأنت و قبلت تنطيني فرصة، رغم ما حچت و لا اعترفت بمـشاعرها ناحيتي الا انو تصرفها و نظراتهـا چانت تحچي
دگ عمي مـن تلفونه و انتظر لحـظات
مسـحت على حنچي من سلم و گعد عمي يعرف بنفسـة..نهض من مكـانة و طلع للحديقة و اني ورا امشـي
اسمعو يحچي ويا و يگـله اني فلان من طرف أمـجد
التفتت على بيبي الزمتني من زندي و هي تگول
- عمك شنو ديسوي
حچتها بصوت شوية عالي..خفت لا ابوها يسمعها
فوتتها للصالة و تنهدت لزمت ايـدها و گلت
- بيبي الله يخليچ افهمي
اني رايدها
- ديحچي وي ابوها ؟
هزيت راسي بأي..هي ضربت العكازة بالگاع و حچت بقسوة و عصبية
- يعني سويتو الـي بالكم ؟؟ و راح تجيبها لبـيتي
ما جـاوبتها و هي كررت سؤالها بصياح
و اني بنفاذ صبر گلت
- اي لأن اني مو اخواني و لا عمامي حتى تـزوجيني على كيفچ
- مثل عمك ماهر راح تزوجها غصب عني و ربك اخذها مـن عندة لان گلبي مو راضي عليه
- بس ليش ما حچيتي ويا؟ ليش ما وگفتي ضدة لو بس انيي
حچيت كلامي و مشيت و اني اسمـعها تگول تزوجها بس والله ما ارضى عليك والله
تمتمت و اني افوت لغرفتـي و اطبگ الباب
- هو انـتي شوكت رضيتي على احد
ماكو ربع ساعة و فـات ماهر
ضيق عيونه و گـال
- ابوها راسه يابس يگـول ما عدنا نسوان للزواج
تأففت و اني امسح على شعري
گعد بصفي ماهر و گال
- بس عدهم ولد اروح اخطبه الك
التفـت عليه و گلت بعصبية
- عمـي رحمة لهذاك الاب الطيب اسكت
- فـوگ ما امشيلك بهالخطبة المباركـة تحچي هيچ؟
يلا لعد روح اخطبها وحدك اني اطلع من الموضوع
- عمي انت ما شفت بيبي و كلامها؟
- اعـرف امي و كلامها و حچـيها !! بس صدگني اخوانك ما چنت بهذا العمر و زوجتهم على بالها بس انت لا..ما اريدها تظلمك
تنهدت و گلت بهدوء و اني اتذكر كلام ابوها
- بس ابوها رفض
- مرة مرتـين يمل و يگول اخذوها
ابتـسمت و اني اگول
- تعرف ما چنت خايف من بيبي شگد ما خايف منك و ترفض انت والله شنو ما ارتاحيت للموضوع
ضحك و هو يضرب على فخذه
- لعـد التطقس بالجامعة شنو فائدته؟
رفعت تك حاجب و گلت بتعجب
- يعـني چنت مراقبها
- لا مو لهاي الدرجة..مرتين او تلاثة رحت
و مرة حچيت وياها و سألتها على اساس علمودك..مبينة البنية اخلاق
ابتسمت و عبالك مدحني مـا مدحها
تنهدت براحة الحمدلله ما جفصت و حچـت شي ويا
- زين هي تعرفك تقربلي
- لا ما گـلتلها هيچ حچيت وياها على اساس ادور للقاعة مالتك
- و انـت شلون عرفتها
- النجمات الي على كتفي مـو بعينك
ابتسمت و اني اهز راسي بلا..والله ماهـر يطلع الجني الازرق من حفـرته
ثاني يوم بالجـامعة شفتها و گتلها على موضوع الاتصال
جرت حسـرة و ردت
- اعرف..خابرني ابوية
- حچـة عليچ
باوعتلي و گالت بخنگة
- حصلت رزالـة ناشفة
ضجت بوقـتها و هي ما حچت شي..بقت ساكته شوية و راحت
و ظليت بتفكري ياخذني و يجـيبني
رجعت للبيـت و عمي ماهـر گال لا تخاف ما تصـير لـغيرك
ورا يومين رجع اتصـل عمي..و بقوا يحچون لفـوگ الربع ساعة..عمي حچـه اله كلشي بالتفصيل عني و عن دراستي و منو هـو و شـغلة
چـنت گاعد و اني اسمعلة..سد التلفون و التفت عليه بابتسامة و هـو يگول
- خوما تمل من الطـرق الخارجية؟
- شنـو
رفع تلفونه و گال بضحكة
- گال تعالوا الجمعة نتفـاهم
- لا بربك
حچيتها و اني اوگـف على حيلي
ما ادري ليش گلت عمي يتشاقة بس هو حچه بجدية
رجعت گعدت من ضحك و هو يگول والله العـظيم
ضحكت و اني افرك ايـدية بعضهن
و هنا حسيت خلصت من مـوضوع ابوها ما طول گـال تعالوا فـ يعني الموافقة راح توصل
بس بقت سالفة عمامي و جـدتي و اخواني
بالليل اجتمع الكـل و حچه عمي ماهر
عمـامي عيسى و ابراهيـم چانو نفس رايي بيبـي..هماتين رفعوا حربتهم و گالوا ما تاخذها
بس ماهر صح اصغرهم بس اكثر واحـد شخصيته مفروضة على الكـل..گاللهم لا تروحون اني اروح
اخواني اثنين جـلال و احمد نفس عمامي رفضوا و حچـوا و سكتهم عمي ماهر
بيبي ساكـتة بس بالاخير گامت و هي تگول لا گلبي و لا ربي راح يرضى عليك لان راح تخطـبها
امي چانت كالعادة ساكته و بس تباوعلنا بعيون دامعـة..ردتها تحچي تبين ردة فعلها
بس السنين العـاشتها يم بيبي خلتها تبلع لسانها و ما تبدي اي رأي
.
صفاء..
الخمـيس اجـا ابوية العصر اخذني
چـان ساكت و ما حچه شي..حتى سلم عليه ببـرود
من وصلنـا هناك تلگتني جدة
سبحت و گعدت وياها و تفـاجئت من گالت بـاچر اهل الولد يجون
أمجـد ما حچـالي و لا نطق..ردت اروح لأبوية و ابرر انو اني ما عليه بس خـفت لا احصل رزالـة مـثل هذيچ..

سويت عشا و انفتح الموضـوع
ابوية گال
- عمـو لطش و اصر على الموضوع..ما چـان بيدي شي غير اگلو تعالوا
- و راح ترفضهم؟
سألتو جـدة و هو دحگلي
بعدت نظراتي عنـو و هو حچه برود
- نگعد و نحچي ان ما عجبـوني اعتذر
گوة بـلعت الگمة بسبب نظرات ابوية
حسيتها توجـهلي اصابع الاتهام..بهذاك اليـوم ما ادري شـلون نمت
ظليت افكر و اخترع سيناريوهات عن الراح يصير..
و ارجع اگـول شلون دنيا غريـبة اني نفسي الچـنت كارهتو و كارهه كـلشي متعلق بي باچر يجي يتقـدملي و اني راضية؟
الصبح جدة گـعدتني گمت انظف و سويت الغـدا
اشتغل بس بالي مو يـمي..شگد ما خجلانه عبالك مسوية شي مو زين ما حـطيت عيني بعين صهيب و ابـوية..
بالـ10 اندگ الباب مال البيت..طلع ابوية فتحـو اسمعو يگول يا هلا تفضـلو
دحگـت من الشباك و شفتـو..ابتسامة انرسمت على وجهـي چان لابس قميص ابيض و بنطرون اسود..حيل بسيط بس مـرتب و راهملو
بس الفاجـئني وجود نفس الضابط ويا..چان يبتسم و هو يرد السلام لابوية الرحب بيهم..چـان ويا اثنين لابسين عسكـري
استغربت من جهة شنو معقولة هذولة عمامو لو اخـوانو؟
گـعدوا و جا صهيب اخذ الضيـافة..گعدت بغرفتي و اني اهـز رجلي بتوتر..صوتهم ناصي ما ينسـمع
و جدة يمي گـاعدة و هي تكرر اذا مكتوبلچ يصيرلچ..
ساعة و طـلعوا..اسمع ابوية يگـوللهم ظلوا على الغـدا
بس الضابط يگلـو تسلم ما تقصر
اول ما سـد الباب فات ابوية..واضحه عليه العصـبية
جدة تلگتو و حچت ويا و هو فات للصـالة يحچي
وگفت يم بابها و اني اسمـعو يگول
- يعني گتلهم ماكو نصيب ما افتهـمو و جوي و على عيني و راسـي..بس يجي هو و عمو و ربع عمو گلت ميخالف
بس يطگـها عمو بوجهي والله اخـوانو و عمامو الباقيين ما راضيين اني من كل عقلي اوافق؟؟
والله او يصبو ذهب ما اقبل بـي
دحگت لـ صهيب التأفف..عفتهم و طبيت للمـطبخ كملت شغلي و اني حابـسة دمعتي بعيني
اذا اهـلو ما قابلين  ليش من الاول خلاني اتعلـق بي ؟
ما ادري شلون خلـصت العطلة ورجعت للدوام
شفتو اول مـا طلعت من المحاضرة
تنهد و هو حاط ايديـة يجيب بنطـرونو
- شلونچ
- زينه
رديـت عليه برود و اردفت و اني احط عيني بعينـو
- ليش ما گلتلي اهلك رافضين فكرة ارتبـاطنا
- گلت موضوع مو مهم
- شنوو مو مهـم؟؟ أمجد اذا اهلك رفضوني شلون تگدر ترتبط بيه؟
- اني الي راح اتـزوجچ مو هما
حچاها بعصبية مشيت خطوات و اني اگول باسنـان مصرورة
- لا تصيح الطـلبة ادحگ
رحنا گعدنا بالحديقة و هو ظل واگف گـدامي
و بهدوء گال و هو يخزر بيـة
- و ابوچ شدعوه هيچ سوو بينا؟ شنو اني و عمي مو بعينه
- ابوية ما حچـة عليكم
حچه لأن عمك چان صريح و گال من الأول الكل رافض
- يعـني المفروض ننكر؟
- اكيد لا بس مو بهالطريقة
تأفف و هو يگول
- عمي صريح ما يعرف يلف و يدور
سكتت لحـظات و اني ادحگـلو
كتفت ايدية و گلت بهدوء و بداخلي رافضـة كلامي
- اهلـك رافضين و ابوية ما مقتنـع بالموضوع كل واحد يروح بطـريقو
- انـتي ما عندچ غير هالحچـاية؟؟ كل واحد بطريقة
صفاء افهمـي مو اني الي اتخـلى عن شغلة احبها
- و اذا كلشي واگـف ضدك؟ راح تبقى متمسك بي
ابتسم و هـو يدنگ عليه عيونو چـانت تنطق بكلمات ترجمتها نظـراتو
- اي لـو الكل وگف ضدي
هالفترة راح اسكـت لأن قربت الامتحانـات و العطلة بس تخلص العطلة و كـلشي يصير حسب ما اريـد
ما رديت عليه..نزلت راسي و شبح ضحكة على ملامحـي..و صدگ جتي الامتحانات
هو چان ملتهي بيـها و اني همين..گمت اقرا اضعاف و اركـز اكثـر
ما ردت شي يلهيني عن مستقـبلي
بـدت الامتحانات و بدأ الارق و التعـب و الارهاق
الغرفة بالسـكن من ادخلها هـدوء تام مهرة و لانا مخليات كتبهن بـراسهن و وحدة تساعد الثانية

كملت امتحانات و الحمدلله چنت متأكدة من نفسي..بدت العطلة و رجعت لبيـتنا
ابوية تقريباً ناسي السـالفة..اول اسبوع چـانت اشبه بالاستراحة
الجمعة قررنا نروح للحـبانية
حيل تونسـنا و ريحنا عن انفسـنا..بخضم الونسة تذكرت أمـجد بس سرعان ما بعـدتو من تفكيري
بس يرجع يستحـل عقلي

ثاني يوم الظهر گاعد اسوي غـدا و جدة بالصالة يم ابوية..وگعت من ايدي الخاشـوكة من سمعت بچي جدتي

خفـت و گلبي گام يوجعني خفت لا صهيب بي شي لأن طلع معزوم يـم صديقـو

عفت المطبخ و طلعت للصـالة ابوية گاعد بالگاع و يسكـت بجدة

و برجـفة گلت و اني افوت للصـالة

- شكـو شبيها جدة

ابوية دحگلي و جر حسـرة و گال

- حجي علي ابو حسين تـوفى

حطيت ايدي على شفتي و اني اشهگ..
ادحگ لجدة تبچي و تنعي باخوها ..و دمـوعي گبل حدرت
دگ ابوية على صهيب و گالو تعال

احس بيتنا انگلب فجـاة..جدة بالگاع تبچي و تگول اخوية و ابني بسنة وحدة

گعدت يمها و اني اقيسلها ضغطها الصعـد
جا صهيب و بعيونو القهـر واضح

شيخ او حجي علـي چان انسان محترم و شگد يفرح من نجي عليهـم و لا كانو علي و البقية اولاد اولادة
يشبة تصرفات و اطباع جـدة

على السريع حطيتلهم غدا بس تا تاكل جدة لگمه تا تاخذ علاجها و طـلعوا للبصرة ابوية و هـي
ظلينا اني و صهيب وحـدنا..البيت صـار وحشة فارغ علينـا

يومين و جا ابوية و جدة هـناك..گال اخذكم تسلمون..صح ما ردنـا نروح بس عيب منهم و شيـخ علي يستاهل واحد يبچي و يوگف بفاتحته
طلعنا الصبـح و طول الطريق نايمة..و كـل شوية صهيب يگعدني يگول نيالچ عينچ تغفى
هـو چـان عكسي تماماً

وصلنا البصرة وكت الغدا..هوسة و صياح
عبالك امـة لا اله الا الله كلها يمهم..

شـگد جيت عليهم بس اليوم عبالك اول مرة ادوس عتبة بابهم شگد ما متغير البيت صاير كلو حزن و هـم

جدة گاعدة وي النسوان..گوه فتت يمها حظنتها و هي تشهگ و تبچي و تشكيـلي
شگد انكسرت بوفاة اخـوها

طلعت يم البنات للمطبخ..كلهن ما تجمعني علاقة ويـاهن بـس مرت حسن شوية
فـ ظليت يمها اروح و اجي..الظـهر ورا ما فض الغـدا يلا صار فراغ و فتت للحمام اتوضى اريد اصـلي صلاة الظهر

من طلعت شفت رضا طـلع من غرفتو
مبين عليه الحزن لابس دشداشـة سودة و لاف اشمـغ
چان بحچي بالتلفون..اول ما شفتو عبالي علي لأن هما يتشابهون بس مو حـيل
سد التلفون و صد علية
تفاجئ من شافني..اني تحمحمت و گلت بهدوء

- البقية بحياتك..خـاتمة الاحزان ان شاء الله

- حـياتچ الباقية

حچاها و استأذن..طلع من باب المطبخ
و اني طبيت للغرفة الي ماخذتها جدة الها..محد چان بيها بس جـواد الملقب بـ كعبول
چان گاعد و جهال اثنين يمو و يلعـبون بسيارات

وگفت ليغاد عنهم و هما بالزاوية صليت و من كملت
طبگـت السجادة و انـداريت على كعبول الگال

- شو انتي هيچ تصلين؟

حچاها و هو يقلد حركتي و يحط ايد على ايد
مـا عرفت شنو ارد عليه..ابتسمت و گلت بهدوء

- اني هيچ اصلي

ظل يـدحگلي و هو يضيق بعينو، فجاة انتفض من مكانو و طلع يركـض من الغرفة..دحگت للطفل يطلع عمرو بالـ3 سنين يبتسـملي
بـادلتو الابتسامة و طلعت..اول مـا فتت للمطبخ
صار بوجهي كعبول واگـف گدام امو و المطبخ مليـان نساوين
و هو يحچي لأمو ماما هاي هيچ تصلي

خزرتو امـو و كمشتو من فانيلتو من ورا و هو عبالك بريعصي يريد يتفلت منها و يصيح والله ما اچـذب يمكن بيدها شـي
و هي تگول اسكت ما عليك

بوقـتها ما اعرف ليش اجتني الضحـكة بس گوة بلعتها عيب شيگولون عليه
زوجة حسن فاتت و تعذرت مني و اني گـلت

- لا عادي ما صـار شي طفل

حچيتها و التفتت على مراة تطـلع بالـ35 سنة
سألتني بابتسامة

- انـتي حفيدة جدة فطم

- اي

- ما شاء الله عليچ..بس انتي؟

- عندي اخ تؤم

- ربي يحفظكم..امچ ما شفتها؟

تحمحمت و اني ارد عليها بصوت هـادي

- امي متوفيـة

- الله يرحمها ما ادري اعذريني

- لا عادي حياتي

حچـيتها و تلحفت الصمت
چان ثالث يوم فاتحة..سوو عشا و وزعوا
شي بداخلي چـان منتظر شوفـت علي..يمكن فضول تا اشوف حالتو بعد رحيـل جـدو بس ما شفـتو و لا لمحتـو
سمعت ريـم اختو مواليد 98 تحچي وي فاطمة بنت عمتها انعام
انـو صارلّو 3 ايام ما فات للبيت ينام بالچـادر

اضطرينا نبات و نمت بغرفة جدة..و ثاني يـوم رجعنا احنا و ابوية و جـدة ظلت اسبوعين يلا رجعت الا فضت الناس

تعبانه و مقهورة و حيلها مـو مثل گـبل، اشوف بعيونها لمعت الحزن
اول ما فاتت البيت رجعت تبچي و تنوح
ابوية گعد گبالها و يسـكت بيها

گـاللها الشباب يوميا بالجملة يموتون و ينقتلون..هو شايب و نهكه المرض ربچ ررحـم
شوية اقتنعت بس شيـقنع الگلب بروحة احبابـو

خلصت العطلة و كلشي ما افتهمت منـها..وفاة شيخ علي أثـرت على جدة حيل و اثرت علينا من نـشوف جدة بهالحزن

رجعت للـدوام من شفت مهرة و لانا حـظنتهن شگد اشـتاقيتلهن و حسيت بفراغ بحياتي بعدم وجودهن وياي

من داومت بـالكلية گمت اعد ثانيه ثانيه تا اشـوف أمجد
اول يوم ما شفـتو..انقهرت حيل
گلت هسا الگـا ينتظرني اكيد اشتاقلي..ثاني يوم من طلعت مـن المحاضرة و رحت للحديقة
لگـيتو گاعد بنفس المـكان الي دائمـاً اگعد بي

بس شفتو عبالك طير و فكو اسرو شگـد ما فرحت و الضحكة انرسمت على وجـهي..مشيت باتجاهو و هو وگف بضحكتو المعتـادة

دگات گلبي حسيتها ارتفعت و حتى ايديـة باطن كفهن تعـرق ما ادري توتر مادري شوق

سحـبت نفس و انـي اصير گدامو
ابتسم و هو يگـول

- اشـتاگيتلچ

و لأول مرة اتجرا و احچي البـداخلي بدون ما افكـر مرتين

- حتى اني

- حتى انتي شنـو؟؟

حچـاها أمجد باستغراب و ضحكتـو تريد تفضحو
هزيت راسي بأي و اني اكرر بنفس مشدوه

- حتى اني مشتـاگتلك

ضحك و هو يرفع تك حـاجب
گعدت و هو گعد و گـال

- گـلت يمكن الخلل بإذني

دحگـتلز بطرف عيني و ضحك..كتف ايدية و حچـة بهدوء ورا ما اخذ نفس

- هسا رجعـتلي الروح والله
گمت احسب للعطلة يوم يوم بس حتى اشوفچ

- بس البـارحة ما اجيت؟ گلت راح الگـاك

ذب حسرة و گـال

- شوية الحجـية تخربطت

- ما بيها غير العافية

- الله يعافيچ..اي شنو سويتي بالعطلة؟

تحمحمت و گـلت و اني اصد عليه
شعرو شوية طـولان عن گبل..و يمكن تهيلي صاير حلو
ما ادري الـي نحبهم دائمـاً نشوفهم حلوين و كل ما يكبر حبهم بداخلهم يزيدون حلاة

- رحنا للحبانية مرة
و للبصـرة

رفع حاجبو و هو يگـول

- للبـصرة

- اي اخو جدة توفى و رحنـا

- الله يرحمه..يعـني جدتچ اصلها بصرة

- اي بصراوية

حچيتها بابتسامة و هو رد بضحكة

- صرتي عراق مصغر..انبارية و بيچ عرق بصراوي و رجـلچ المستقبلي بغدادي

ضحكت بخجل و اني اصد عنو و هـو كمل بضحكة

- ها استحيتي؟

- لا مـنو گـالك

حچيتها و اني ابرر..رغـم كلمة رجلـچ شگد حسيتها حلوة و تخجل

لحـظات صمت مرت قبل لا يـگول

- الجمعة الجايه راح نجي عليكم

صديت بسرعة و بانـدفاع حچيت

- أمجد ابوية رفض و ما بالو يغير هالموقف

- مو بـس اني و عمي ماهر راح نجي
عمي عيسـى و شيخ عشيـرتنا و من اعمامنا

- و اهلك البـاقيين؟؟

- مـو مهميت المهم ابوچ يوافق

- زين لازم اكون متواجدة

غمز و هو يگول

- اي حتى ابوچ يسألچ و يرجعلنا الخبر بنفس الوقت

- ليش واثق هلگـد؟

حچيتها بصوت ناصـي و هو جاوبني بثقة

- لأن ما راح اجيب واحد لو اثنين وياي شيخنا و من عمامنا..ابوچ مـا راح يفشلهم و يرفض

بداخلي گـلت ان شاء الله ما يرفض
مع هذا اعـرف ابوية الي بالو يسوي..

- انتي تستحين لا تگـولين اله..عمي يخابره و يتفـاهمون

هـزيت راسي بأي و هو دگ تلفونه
فتح الخط و گـعد يحچي..من خلال كلامو عرفتها هاي يسـرى

سد الخط و انـدار عليه و گال

- يسرى تسلم عليچ

- و عليكم السلام..ما شفتها شو ماكو

- موجودة هي اتصلت ادورلي

ابتسمت و ما رديت..و هو اردف

- يسـرى اعرفها من اول سنة كلية
بنية كلش حبابة و لطـيفة

- صح حبابة و عفوية

- كـلش احسها اخت مو صديقة

- الله يحفظها

گام و رفعت راسي من وگـف
سحب نفس و گال

- نتقابل بعدين

- خوش

سلم و مـشى..و اني ظليت بمكاني
الحلـو بي يعرفني ما احب انجمع ويا چثير رغم گلبي يريد هالـشي..بس ما اريد حديث يجمعنا يغضب رب العالمين و يخون ثقـة اهلي

خـلصت العطلة و رجعت لأهلي
ما حچيت اول يوم و لا شكل عم أمجـد اتصل بأبوية، بس ثاني يوم الجمعة
دگ تلفـونو و طلع برا
ربع ساعة هيچ و فـات بس طب للصالة ذب التلفون و گـال برود

- اهل هذا الطـالب وياچ جايين باچر و وياهم شيخ عشيرتهم

دحگـت لـ صهيب الحچه

- انت مو رفضـتهم؟

گعد ابوية و حچه بنفاذ صبر

- ايي بس مصرين و عم الولد گال احنا شارينكم

اسـتأذنت منهم و فتت للغرفة..سويت نفسي گاعد اقرا..طلعت ملازم و كتب و گمت اشغل بالي بيهن

اندگ الـباب و فات ابوية

- اگـدر افوت ؟؟

- فوت يابـة ما عندي شي

طبگت الكتاب و جا گـعد يمي
حاط ايـدية على افخاذو و گال

- طول عمـري صرتلكم صديق..عمركم ما ضمـيتو عليه شي شيصرلكم تجـون و تحچولي و اسمـعلكم

نزلت راسي و هـو كمل بهدوء

- و هسا اريدچ تكـونين صريحة وياي مثل گبل و تحچيلي..هالولد عندچ معرفة شخصية بي؟

رفعت راسي و احس جسمـي صار ثلجه
رجفت شفايفي و اني اجـمع كلامي

- يابه والله ما عنـدي شي ويا

- صفاء

- ها يابه

- احچيلي اعتبرينـي صديق و سولفيلي..الولـد واضح عليه نيته بيضة و جاي مـن الباب و رايد بالحـلال

ضغـطت على ايـدية و اني اگول بتردد

- يـابة والله ما بينا شي..هو مرة حچه و گال اني معجب بيچ..بس والله و روح امي صديـتو و حتى حچـيت حچي طائفي ويا و ما قبلت بس هو ظل يلح و گال رايدچ بالحلال

بلعت ريگي و سكتت..و هـو يدحگلي بتركيز
گـوه كملت و اني اطگطك اصابع ايديـة الا ان صارن حـمر

- و گلتلو احچي وي ابوية و انطـيتو رقمك و انت تعرف الباقي

ظـل ساكت و عينو بالگـاع
رفع راسو و گـال

- زين انتـي شنو رأيـچ؟

- الرأي رأيك يابه و القرار الك

ابتسم بهدوء و هـز راسو بأي و گـام
طلع من الغرفة و اني تنفست الصـعداء..حطيـت ايدي على گلبي و اني اهدي نبـضاتو

ثاني يوم الصبـح بيتنا انگلب
گمنا نسوي بالغـدا و جاب ابوية لحم و دجاج گال ما نقصر بـشي.و خطية صهيب يركض هيـچ و هيچ
مع هذا كلو ما حـچيت ويا كلمة

ابوية عنـدو ابن عم قريب علينا جا هـو و اولادة
تـوقعت يجي أمجـد و شيخهم و عمامه الثـنين
بس من طبگـت السيارات و بدوا يفـوتون ظليت ادحگلهم من الشباك الي يعكس الضو من برا فـ ما يبين الي بالـداخل و جدة تصلي على النبي
بالعـشرين رجال تقريباً اجوا وياهم

فات صهيب ورا شوية و گـال

- اگـلچ هذا جايب العشيرة و جـاي

جدة حطت ايدها على چـتفي و هي تگول

- تستاهل صفـاوي

ابتسمت بـتوتر و اني شايلة هم
هـمين ابوية راح يرفض؟جدة راح صاحـت مرة جارنا مرة يطلع عمرها بالـ40 سنة
خطية ما قصـرت و سـاعدتني هي و بنتها..و طبخن ويايه و الحمدلله كلـشي صار مثل ما نريد

من انفتح المـوضوع..صار هـدوء نسبي
وراهـا صار حچي..اني بالممـر واگفة و ايدي على گـلبي

كل ما يرتفع صوتهم اگول ها هـي ابويـة رفض و راح تصير هـوسة

ربع ساعة و انفتح الباب..بالمطبخ چنت ويمنا جـوارينة
ابوية يم الباب و صاحلي..دحگـت لـجدتي عبالك استنتجد بيها
طبيت لغرفـة جدة و ابوية ويايه و وي جدة

گـال بابتسامة و بهـدوء

- جايب وياه شيوخ مو شيخ

- ما شاء الله

حچتها جدة و اني منزله راسي..بس رفعـتو متفاجئ من گال

- اي صفاء شنو رايچ

بلعت ريگي و گلت بهمس

- يابة الراي رايـك و شلون ما كان اني راضيـة عنو

- بس اني اريد اسمعها منچ ؟
الولد خوش ولـد و شيـخهم يحمد بي و يحمد بعائـلتو

ما رديت و هو كرر

- گولي صفاء؟ اني لا تتوقعين اظلمـچ
كل الچنت افكر بي تكملين دراستچ..بس الولـد و اهلو شاريچ

دحگت لـ جدة البتسمت و گلت بخجل

- جدة شتگـولين؟

- يا يمه انتي الـراح تتزوجين مو انـه

حچتها جدة بضحـكة..صديت على ابوية لگيتو يبتسم بانشراح
الوجه المقتبـض و الضايج قبل لا يجـون اختفى  و حـل محلو الضحكة و الراحة

- يابة بكيفك

- گولي صفاء اي لو لا
مو بكـيفك

- موافقـة

حچيتها بسرعة و نزلت راسي

- ان شاء الله خير

حچـاها ابوية..سحب راسي و باسني من گصتي
و رجع للـزلم..شوية و جا صهيب گال راح يقرون الفاتحة بنية التوفيق

طول الـوكت چنت متوترة بس ضحكة على وجـهي
راحوا و ابوية فات و گعد يسولف عن الحچوا
الاسبوع الجاي راح يجـون يـگطعون المهر و يتفقون على كلشي

بالليل ظليت اتگـلب بمكاني..يمكن من الغبطة و الفرحة الي اعترمت گلبي عيني مـا جاها النوم

رحت لجدة لأن هيچ وكت لو نايمة لو گـاعد تقرا قرآن
فتت لگيتها تقرا..ابتسمت و طبيت للغرفة

گعدت بصفها و اني اسمعها تقرا بخشوع..ربع ساعة و سدت القرآن و تصدقـت

حطت المـصحف بمكانو و گالت

- سو ما نمتي

- مو نعسانه..جيت يمچ اريد اسولف وياچ

- صدگ باچـر تروحين؟

- اي الصبح..اصلاً باچر ما عندي محاضرات مهمه

تنهدت و اني خليت راسي بحظنها مسحت على شعري و گلت بصوت ناصي

- جدة تدرين اني اصدگ كل كلمة تگوليها؟
و اريد اسمع رأيچ بالخطـبة

ابتسمت و ردت

- ان شاء الله خيـر يا يمة ربي يكتبلچ البي خير
>ضحكت و اني  اخلي كف ايدي على كفها


- ما تخيلت راح رب العالمين يكتبـلي هيچ قسمة؟


- محد يعرف شنو مقـسوم اله..


حچتها و سكتت..عگدت حاجبي و حسيت جدة مو طبيعية گعدت على حيلي و گـلت بتساؤل


- جدة انتي مو راضية


- لا يـمة ليش مو راضية..والله فرحـانة الچ


و سكتت جرت حسـرة و اني حچيت باهتمام


- جـدة اكو حچي بالچ؟ گوليلي


- بس يا يمة لا تفهـميني غلط


- شنوو جدة


- تدرين بيه دايماً احلم..و مرات اشوف رؤيات و كلشي يصير
عمچ وليد شفت جدچ اخذة..و مات
و اخوية علي شفـت طيف اسود اخذه و همين توفى ورا الحلم بنهار


- الله يرحمهم


حچيتها و نبضات گلبي زادت..جدة دائماً من تحلم يتحقق التشوفة
تنهدت و رفعت ايدها و خلت اصـبعها على گصتي بين حواجبي و حچت
و خلتني اصفن بيـها و نفسي ينحبس بصـدري
مادري شعور مخيف بسبب كلامها لـو لأن اغلب احلامها تتحق


- هواي اشوفچ بالحلم و بيـن حواجبچ اسم علي
لا مرة و لا مرتين يا يمة..لـدرجة گلت هذا نصيبچ


.يتبع

#ذبول الاقحوان
#البارت السابع

صفاء..

شعـور غريب داهمني و اني اسمع لكـلام جدة
الي انتفضت و هي تگـول و ايـديها تتحرك بفوضـوية

- لا تهتـمين لكـلامي اني مرات اخربـط

سكـتت و كانو كل الكلام تبخر..جدة من تحـچي مرات اصـفن بكلامها لأن اغلب المرات يتحقق

- شبيچ صفاء؟
انسي الحچـيته

هزيـت راسي بفكـر غائب..مسيت عليها وطلعت من الغـرفة
تنسايـت الحچتو و اني اصب كل تفكـير ناحيـة أمجد و ابتسامة تنرسم على شفـايفي

الصبح گـعدت و لميت غراضـي تا ارجع لبغداد
ابويـة اخذني على صفحة و حـط فلوس بيدي و گـعد يوصي بيه
بس حچـة كلمة و حيـل تأثرت بيها
گـالي يا بنتي اريدچ مثـل گبل..مو لأن حچينا بموضوعكم و صارت المـوافقة يعني عادي تحچين و تسولفين تـذكري هذا بعـدو اجنبي

حطـيت هالشي بـالي و وعدت نفسي قبل لا اوعـدو اخذ بنصيـحتو

رحت للسـكن و حچيت للبنات...شگـد فرحن و هـنا يباركن الـي، داومت و ما شفتو لأمـجد فرد نـوب

ثاني يوم جـتي يسرى من شافتني ضحكت
باعتياديـة و ضحكة منها باركـتلي و هي تگول تستاهلين امـجد..الي وراها جا

بكـل صراحة و وضوح حچـيتلو و گتلو عن نـصيحة ابوية و هو بالعكس تقـبل الموضوع
بس يسرى علقـت و هي تقطب حواجبها

- ترا هسا انتـوا بحساب المخطوبيـن !! عادي تراا

- حتلو الا يصير بينا رابط رسـمي يلا نگـدر ناخذ راحتنا
مو أمـجد؟

ابتسم و هو يـگول

- اكـيد صفاء

كتفت يسـرى ايديها و گالت و هي مرة ادحگلي و مرة لأمجـد

- تدرون انتوا اثنينكم معقدين و متوالمين كُلـش

و كملت بسخرية

- جـدرية و لگت غطاها..يلا چـاوو محاضرتي راح تبدي

و مشت من گـدامنا، بيني و بين نفسي ضجت
من حچـيها..صديت على أمـجد الگال بهدوء

- لا تزعليـن هي هاي سوالفها

- ما ازعـل عادي، بس ضجـت

ابتسم و رجـع حچه

- ميخالف تـرا گلبها طيب

مـا عقبت على شـي، و هو راح گال المحاضرة راح تفـوتني

مرت ايام و جتي العـطلة..نزلت لأهلي و اني متوترة..الجـمعة راح يجون و يحددون كلشـي و يگطـعون المهر..

بس شـفت جـدة تذكرت حچيها و احـلامها
بس سرعان ما وخرت هالشي مـن بالي
وجتي الجمعة..ميساء جتي علـية و جوارينـة

لبسـت هاشمـي ابيض و شال بنفـس الون
و ميساء حطلـتلي شوية مكياج يبرز ملامحـي..جـوي أمجـد و اهلـو

چـانت امو و نسوان عمـامو اثنين و الجـدة
سلمت عليهم و بست ايد جـدتو..الچانت شكلها ابداً مو راضية و هي تخزر بيـة..بس امو مبين عليها حبابـة و فقيرة

شوية و صاحـلي ابوية عبالي تا نـگطع المهر
لگيتو هو و صهيب بالممـر واگفين

- ها يابـة

تنهد و دحگ لغرفة جدة بيها النساوين
اخذني لغرفـتي، و گـال

- هما جـايبين سيد وياهم تا يگطـعولچ مهر

عگدت حاجـبي و گلت باستغراب

- ايي عادي شنو المشكلة

- يريدون يكتبون العقد على المـذهب الجعفري

ما چـنت اعرف اكو فرق بين كتابة العقد
فـ گلت لأبوية

- يابه هو خوما بينهن فرق

- فرق بسيط يا يابه..بس اني اريد على المـذهب الحنفي و عمام الولد يگولون لا على المذهب الجعفري

سكـت و رجع گال

- اذا على مذهبـهم فـ المؤجل شوكت ما تريدينو تاخذينو..يصير شلون الدين على الرجال
و انتي تعرفين بمذهبنا شلون

- بس يابة اني ما يهمني لا المؤجل و لا نوع العقد

- حتى اني بنـتي..بس اني اريد على المـذهب الحنفي

دحگت على صهيب الگـال

- ترا بالحالتين تاخذين فلوس

خزرو ابوية و هو كمل بضحكة

- شبيكم والله اتشـاقة

سكـت صهيب و اني صدگ بهذا الوكت ما اهتمـيت على اي مذهب يتم العقـد
بس بالاخير گلت

- خلو على مذهبهم..اصلاً واضح على جدتو حادة سنونهـا

- مو بس جـدتو عمـامو عبالك جايـين فصل

حچاها ابوية و اردف

- على مـذهبهم و امرنا لله

طلع و صهيب طلع وراه بس قبلهـا گال بسخرية

- ما تگولين خطابة حشى عبالك هما اهل العروس

طلع صهيب و انـي ظليت واگفة شوية و طلعت لغرفة جـدة
و مر الوكت و الحمدلله كلشي تمـام و تم عقـد المهر
علت الهلاهل و التبـريكات
باركلي و رحـت سلمت على جدتـو الچانت على غفلة تنفجر من عصبيـتها
الوضع ابد مو عاجبهـا..

عرفتها مو راضـية على موضوعنا..
اتفقوا على انو الخطـوبة بعد شهـر و عـقد المحكمة قبل الزواج

راحوا المـعازيم و ما صارت فرصة اگـعد اني و أمجـد..صح ضجت بس گـلت بالجامعة نتقـابل

الاحد ما داومـت و لا رحت لبغداد لأن گضيتها ارتب بالبيت و ارتاح من الهوسـة..فـ رحت الأثنين

بالسكن شوفت صوري للبنـات و لانا كل شوية تگول

- ليش يا ربي ما نسوي هيچ احناا بس بالكنيسة

و مهـرة تصد عليها و تگول

- اصلاً اموت على مراسم الزواج مالتكم

ابتسم على سوالفـهن و كواناتهن الحلوة
ثاني يوم داومـت..لگيت أمـجد ينتظرني بمكانا المعتادة
اول ما گعـدنا سحب ايدي و خلاها بيدو

شگـد خجلت و حاولت اسحبها بس هو تمسـك بيها قوي..و بهدوء گال

- بالمهر ما سوولنا مجال نحچي..هسا هماتين تشردين؟

ابتسمت بحياء و هو سحب نفس
غمض عيونو و حچـة

- شگد حلمت بهالحـظة؟ الزم ايدچ و محد يعترض لو يباوعـلچ بنظرة شك

كمل و هو يرسم دائرة وهمية بنص كف ايدي

- ها هي صرتي حلالـي

چنت ادحگـلو بعيون مغورگـة..و هو يدحگلي و كانو انتصـار انتصرو بعد وقت
ما عرفت انـو حصولو عليـة كلفو چثير اشياء و اهمها جدتو الي قطـعت صلتها بي

رفعت راسي فجاة لمـا تقدمت يسرى و هي تبتسم..وگـفت و حظنتني و هي تباركلـنا
و گعدت يمنا تحچيلنا شگد فرحت لمن تم كلشي بخـير

و مـرت ايـام و صار شهر كامل و اليـوم الخطوبة
من گعدت احس مـثل الجبل و على صدري ما اعـرف مخنـوگة بسبب انو فراقي لأهلي بدا يقترب
لأن حدد ورا الخطبة بشهرين يتم كلشي..گال قبل محرم نتزوج

ميساء يـمي و هي تروح منا و تجي مـنا
رغـم خطيبها كل شوية يدگ عليها و يحچـي..بس تفاجئت من گالتلو بعدني عنـد اهـلي من اصير يمك بهـذاك الوكت تگدر تسـيطر عليه تماماً

رحـت للصالون..ما حطيت مكيـاج چـثير بس رهملي
البـدلة اخذتها بصليـة و مو حيل منفوشة..حبيتها تكـون بسيطة و التسريحـة بس شعري من فوگ باڤ و تركت الباقـي مفتوح

رجعت من الصالون گرايبـنا جايات
بنات و نسوان خطية ما قصـرن..چانت مشاعري متذذبـة فرح على توتر و قلق

خفت حـيل لا تخرب السالفـة..و خصوصاً واضح الرفض مـن جانب اهـلو
على اساس الخطوبـة تبدي بالـ3
لأن وراهم رجـعة، بالصالة گـاعدة اطگطك اصـابع ايـدية من تعـدت الساعة الـ3 و ربع

اتصلت بـي مرتين بدون رد..من شفت المعـازيم دخل فرح لگـلبي و تشوقت اشوفو لأمـجد
بس مع كل دقيقة تمـر بدون قدومـهم

ميساء كـل شوية تجي و تگول خابري
دگيت ثالث مـرة و أجـاني الرفض، غمـضت عيوني بقوة و اني الزم اعصـابي
و اگول كل غايب و عـذرو معاه

لحظات مرت و قطـعت الأمـل بجيتهم
السـاعة صارت بالأربـعة و نص..اكو معازيم راحـوا

ابويـة صاحلي ورا ما فات للبيت
شلت بدلتي و فتت للهول و دمعتي بعيني و گـوة كاتمتها
بالهـول وگف و جيت يمو
و هو تنهد و حچـة بشبة عصبية

- شوو ما جوي

رفعـت اكتافي بـ ما ادري و هو مسـح على لحـيتو و حچه

- ما خـابرتي؟

- خابرتـو بس ما يرد

قهـري من تأخرهم صار لا شي گدام نظرات ابويـة و قهري عليه لأن ضاج

- راح اخـابر عمو ماهر

هـزيت راسي بأي و سكتت
رجعت لـلصالة و ميساء يمي تهدا بي و اطمني

بس چنت هادية و مـا ابـديت ردة فعل
خمس دقايق و گـالوا اجو..ما ادري ليـش صار الموضوع عادي
هـذيچ اللهفة طفت..فـات هو و چان لابـس قاط اسود
امـو و نسوان عـمو اثنين الجني بالمـهر يهلهلن و يطشـن چكليت

وگـفت برود و بدون اي ردة فعل و لا اهتمـيت..شگد چنت منتظرة هـاي اللحظة و گعدت اتخيل شلون راح يفـوت و شلون راح يدحگلي و ادحگـلو
بس كل هذا ما صـار..فعلاً الاشياء اذا اجـت متأخرة تبـرد المشاعر

وگـف گدامي و بـاسني من راسي و هو يهمس

- اسـف

مـا رديت عليه.. و گعـدنا
محد جا منهـم بس امـو و نسوان عمـو..جتي مرت عمـو و شاورتـو
سمعتها تگـلو الحجـية تگول ساعة و تعالـوا

و هو رد عليها ميخـالف..اني صديت عليه و گلت بسخرية

- لا والله

هو انـدار عليه و رفع تك حاجب
ضحكت باستهزاء و صديت عـنو..و مرت عمو رجعت يم المعازيـم

دنگ عليه و گال بهـمس و ابتسامة على ثغـرو

- اعرف تأخرت بس والله صارت امور و تعرقلـنا

و بذات النبرة حچيت بدون ما اصـد عليه

- اكـيد هالأمـور جدتك !

- صـفاء ؟؟

حچـاها و هو يخزر بية
صديت عليه و حچيت و اني اصـر على اسنـاني

- لا تنكر أمجـد..ساعة و نص مشتـولين هين و انتوا محد منكم كلف يخابـر و يتعذر

- اسكتي هـسا تفض الهـوسة و نحچي

ما جابـتو سكتت و اني ارسم ابتسامة مزيفة على وجهـي على الأقل تا محد يشك و يبدي القيـل و القـال

لبـسني الذهب و قطعنا الكيـك كل هذا و اني امثل الفـرح الي بمجرد تأخيرهم احسـها انكسرت
خلصت الحفلة ورا ساعـة و ربع فقـط

فضت المـعازيم و طبينـا للهول اني و أمـجد..على الأقل نحچي كلمة و يبرر تأخرهم

سد الباب و اني واگـفة بنص الغرفة..ذب حسرة و مسح على گـصتو و گـال بهدوء

- والله اعتذر على التأخر مو بيـدي

عبالك بهـدوءو ذب بانزين على النـار..و اني مثل النـار و اشتعلت تقدمـت عليه و گلت بعصبية و اني اشر على السـاعة

- ساعة و نص..ساعة و نص و محد كلف يخابر و يگول والله يابه اعـذرونا صارلنا ضرف الطرق مسـدده..بس لا شلـون مقامكم العالي ما يسمحـلكم

- اشش اشش شبيچ انهديتي فرد مرة

حچـاها و هو يحط ايدو على شفـتي
غمضت عيوني من تنهد و هـو يسند گـصتو على گـصتي و يردف بهمس شجـي

- ما صـدگت على الله اوصل و اشوفچ
بس خليني اباوعلچ و اشبع منچ

- ليش ما خابرت..تعرف شگـد انقهرت و ضجت؟
گـلت شنو عافني

- احـد يعوف روحة؟ بس والله صارت مشكلة ما صدگت تخلص

فتحت عيـوني و صرت ادحگلو و هو بهذا القـرب مـني
انفاسة تضرب بوجهي..شعرو مصففـة بطريقة مرتبة
أمـجد حيل انيـق و يحب يكون دائماً باحلـى حلى

ابتـسم و هو يگول

- لا تحسـديني

- لا تخـاف ما احسد

ذب حسرة و گال و ايدو تمتد و تمسح عـلى خدي بأبـهامو

- بـس تعرفين تـفوتين للگلب بدون استأذان