ومن رجعت للبيت هو وياي يغسلي ويظفرلي شعري ويسالني شتريدين شمحتاجه اجيبلج واني كلتله كلشي مااريد بس احضنك وانام
ماامحتاجه بس ارجع للامان الي بحضنه
وضل منومني على ايده حتى الجهال ماراح جابهم .. والصبح ماراح للشغل
والجهال اجوي وهو يسألهم متريكين
ويكللوه اي ...
بس حسين كل شويه متعوده اوكله شي
واني ضاله كل شويه اوصي ينطيه شي ياكله ..
بهالموقف صدك تحققت حجايته الي دائماً يكولي اياهه ان ..
هو وياي خالد مو الشيخ
جان لابس بجامته النيلي وبلوزها وكاف ردانه ومهتم بامور البيت ..
غاليه تريد تبدل يوكف وياهه يم الكنتور
ويطلعلهه ملابس وهي تتنعوص عليه
وهو يضحك لحجيهه ومن تقتنع وتاخذ ملابسها تبدل وتجي تريد تسوي شعرها
وتجيبلي المشط ياخذه مني وهو يمشطلها
ويمدح بجمال شعرها وينفخ بريشاتهه
وبعدين يختمها ...
بس تضل امج احلى منج

و اني باقيه متمدده بفراشي ويمي ع الجربايه حسين وهو بالمطبخ اسمعه يطكطك ...
اسأله شمحتاج يكولي ادور السيخ
اريد اشوي ..
ويجي يسد الباب ويروح يشوي وبعدها
يرجع وشايل صينيه الاكل ويحطها ع الجربايه وياخذ حسين بحضنه ويوكلني ويوكله قبل ما هو ياكل ..
اتشكرته على الاكل واكوله اكعد يمي كلشي ماريد بس هو كل شويه يذكر شغله ويروح يسويهه ويكولي ..
يولي خفايف هاذي اكضي بيهن الوكت
ومن حسين يبلل ملابسه ولازم اكوم اغسله يضل واكفه يمي اغسله ع المغسله والفه بالخاولي وهو يشيله ويحاوطني بايده الثانيه ونرجع للغرفه اكعد البسه واعوفه يفتر وهو وراه وراه واني نايمه
للمغرب بدل ملابسه وطلع وبرجعته جايب العشه وصار ينبه على غاليه ماتحجي لاحد امهه مريضه وتعبانه
ضل مداريني لحد مارجعلي حيلي ورجعت اخذ اعشاب تنشط الكلى
مشت الايام وصار باقي على دخولنا لرمضان اسبوعين وبيوم الجمعه صادف احنه ملتمين كلنه على الغده بيت الشيخه
والشيخ كال ..
- يمه ان شاء الله رمضان هالسنه نحييه بمكه عند بيت الله
- بعون الله يابني بعون الله
- اييه انا ناوي اخذكم كلكم للعمره ان شاء الله
- حتى الولاد؟
- ايييه وكاد الولاد معنا واولهم جراح ولدي العود
- ابو جراح انا مكدر امشي للعمره هالسنه
كلنا باوعنا لام جراح وهي كملت حجيها وكالت ..
- خلي التوم هين عندي واخذو جراح ورماح يعتمرو بدالي
- هاا خير ؟ ليه ماتكدري
- انا حامل
وكفت اللكمه بحلكي وبالكوه نبلعت
باوعتله وهو يباوعلي ورافع حاجبه
بعدين باوعلهه وكال ...
- يازين هالخبر تكومين بالسلامه ان شاء الله وعسى هالمره تولدين بنت اخيه لغاليه تصير
- ان شاء الله

باركتلهه واني بالكوه مسيطره على دمعتي لا تنزل ومدنكه اوكل حسين
وبعدين اخذته وكمت اغسل وره ماشربنه الجاي اخذت جهالي ورجعت للبيت وبس ذبيت عبايتي دخل الشيخ ..
هنا اني انهاريت بعد .. ضليت واكفه كدامه واباوعله بعصبيه والدموع تجري
وهو بس يفرك بكصته و ميباوعلي
كلتله ..
- لييش يعني لييييش !! هي تفرحلهه بهالخبر واني تجبرنننني   انزله و ارل ماسمعت بالخبر تلكيته بالصياح والعصبيه ومافرحك ولا لحظه مافرحك
- حبيبتي انتتتي تختلفين كم مره انا احكيلك هالشي هالحمل كان ممكن يخسرني اياكي يولووو
- ماااجنت راااح اموووت خالد ما جان راح يموتني هالطفل ليييش حرمتني منه
- يولي صحتك اهم من الطفل ول لا تشلعين كلبي تين
- جان بهالوكت اني اجهز لولادته ويكبر ويه حسين ويمكن هالبنيه الي تتمناهه تجي من هالحمل
- تينتي اهدي برضاي عليكي اهدي حبيبتي
- محرووك كلببببي خااالد محروك كلببببي تمنيته هالحمل والله تمنيته ولليوم روحي لايبه عليه ... اني المفروض ابني يجي قبل ابنهه ليش ما همك مثله لييش
لو مبقي ومفرحني بي شراح يصير ليش كرهته من اول ماانخلق
- استغفر الله يولي انا اكره ابني انااا!!!
-اييي اييي كرهته لو ماكارهه ماجان سويت هالهوسه كلهه عليه وجان هو بعد كم يوم بينه وماتخليني اتحصر على الولد واحسد التحمل
جنت احجي بعصبيه طلعت كل الي كاتمته بصدري من ذاك اليوم لليوم
وهو ساكت وكاعد يباوعلي .. عفته ورحت لغرفتي قفلت الباب وضليت بفراشي ابجي ...
موقفه وياهه رجع فتح هالجرح وذكرني اني بعد مستحيل اكدر احجيله هيج خبر واشوف هالفرحه منه والغيره اكلت كلبي اكل ...
ابني المفروض يجي قبل ابنهه ليش اني تخليت عنه ورضيته ...
ضل هالندم بروحي وشكد مااحاول يحاجيني مارديت عليه ولا تحركت من مكاني ... جنت تعبانه وبس اريد ابقى وحدي ...
وضليت هيج لحد المغرب على الصلاه طلعت غسلت وصليت ورحت احضر العشه والجهال اثنينهم ماكو للساعه سبعه ونص  اجوي ويه ابوهم ..
هو بس يباوعلي ومايحجي شي وخليت الصينيه واخذت حسين بحضني واوكله
واباوعله بس لازم الخبزه بيده وصافن عليه ... اني ماكدرت اخلي لكمه بحلكي
وهو كضاهه بس صفنه ..
اخذت الصينيه ورحت اغسل المواعين
وهو اجاني وضل واكف ورايه ويكولي
- يولي عدنا حسين وغاليه ولادنا ما محرومين الخلفه احنه ياعيني لاتكبرين السالفه وتضيكين خلكك
ما رديت عليه وهو جر نفس قوي وكالي ..
- فهميني وش الي بالك وش الي مضيك خاطرك هالشكل
سديت البوري ونشفت ايدي وب

اوعتله
وكلتله ..

- راح انسأل هواي ليش ماجبتي اخ لحسين ؟ وراح هي تتعمد بكل مره تحجي بحملهه كدامي واني ماكدر ارد
بس بكل مره اشوفهه اتذكر اني ما تمرني بعد هالفرحه
عفته صافن ورحت لغرفتي تمددت وشويه واجتني غاليه تسألني شبيه
ونامت بحضني وحسين هم كل واحد من جهه وهو ادري بي موجود بس ضل بره
فرشتلهم ونومتهم وتمددت وهو اجه نام بصفي ولاول مره انام منطيته ظهري ومااحاجيه ..
والصبح كعدت تعبانه وخشمي مسدود
وما شفته يمي .. رحت احضر الريوك
وهو اجه ومن دون مااساله شي هو كال
- صليت بالجامع ودعيتلك
- تقبل الله صلاتك
كعدت غاليه وضلت يم ابوهه يمشطلهه
واني جبتلهم الريوك وهو مااكل بس يشرب جاي .. عاد كلبي ماانطاني اعوفه
سويتله لفه وخليتهه بايده يلا اكل
ومن رحت اغسل مواعين اجاني وضل واكف بس يباوعلي ومتجتف .. كملت وكلتله ..
- اذا تكدر توصي احد يشويلنه سمج للغده
و خضورات هم ماعدنه
حجيتهه ورحت امسح الكاونتر وهو كالي
- كان ثمن حمايتك لي كبير دفعو ياتين
رأساً نزلت دمعتي وعفت الي بيدي وهو
رجع كالي ..
- داري انك تدفعي ثمن حياتي صحتك وضناكِ وفرحتك ... انا اسف تين اسف والله خجلان منك بسببي انا انتي تجمعي الحسره بكلبك على الضنى
انا لو ماغفلت عنو وما كنت ضعيف بهذيك الساعه وخليتو ياخذني غدر
ماكان صار الي صار وماكنت دحكت دمعتك ووكفت عاجز كدامها
رحت حضنته وهو خله راسه بركبتي ويكولي ...
- اسف سامحيني تين سامحيني
- ياعيني انته اغلى من صحتي واغلى من الضنى ولو ينعاد بيه الوكت هم ارجع واسوي نفس الي سويته ومااتندم اني عمري ماتندم على شي بذلته الك حبيبي
لتكول جنت ضعيف لتكول سامحيني انته ماغلطت لتحجي هيج تاذيني بهالحجي
رفعت راسه وشفت دمعته على خده
تخبلت .. كبل مسحتهه وبوست عيونه وخده وضليت لازمه وجهه وهو عيونه حمر وباهته ...
- خالد شلون تنزل دمعتك واني عندك
حبيبي فدا لعينك اروح اني وصحتي وابني وكلشي املكه يرخص لتراب رجليك .. كسرت كلبي والله ليش هيج يعيوني انته لييش
- يولي ماتهونين عندي ول انا عاجز اسوي شي كدام حزنك داري انك تضلي العمر كلو تتمني لو انك ماطاوعتيني
وتحمليني ذنب هالطفل الي راح
- من عمت عيني لو عاتبتك على هالشي بعد .. اسفه حبيبي اني من عصبيتي هيج حجيت بس والله ماعندي اغلى منك ولا اريد شي بعد والله وعيونك مااريد بس وجودك وياي
حضني بكل قوته  ويكولي ..
- تينتي ماتصدي عني ول انا مادحك الدنيا الا من عينك
- ماتنعاد حبيبي اني وين اكدر بدونك
ياعيني
لزمت وجهه وتلمست طرف رموشه وابتسمتله وهو كالي ..
- احبك والله اعشكك انتي اغلى من كل ولد عندي لا تعتبي علي تين لكن انا فيكي مااجازف
- انسدت هالسالفه بعد عوفهه هاي الله انطاني حبك وعافيتك وهذني العيون يستاهلن اضحيلهن بروحي لا تهتم لهذاك حجيي تعرفني مزاجي من يُخرب يخَرب
كلشي بس بعد ماينعاد هالحجي وعيونك
- راضي انا بكل شي تحكيه وفاهم انه بعصبيه لكن ما ودي تحزني
- ماكو بعد لا حزن ولا اي شي هاهيه عمري انسى
- وشووو؟
- عمرري عمرري
-ههههههه يااااحلاااات حروفك والله انك المي الي يسكي عروكي ويحييني
غيرت دمعته كل تفكيري وشوفتني ان تعبه عندي اكبر واكثر من قهري على الحمل ... كدرت اتحمل فكره ماكو جهال بعد بس ماكدرت اتحمل اشوف دمعته وحزنه هنا نقطه ضعفي ...
ومن بعد هالموقف تغيرت وكلت الحمدلله
عندي هو يعوضني وجوده وحبه عن كل شي ..
دخلنا رمضان والشيخه كالت ..
كل يوميه الفطور نتقاسم تحضيره اني وام جراح ونسوي سفره وحده بيتهه ..
ومشينا بالكلام اني احضر من العصر الاكل الي عليه واحضر حلويات واخذهن واروح يمهم وهي تصب اكلهه واني اصب اكلي وصفيه عليهه المواعين
واني عليه التحليه وام جراح الجاي
وهيج بقينا لحد ما صار وكت سفرنا
للعمره ...
رحنا بثاني عشره من رمضان سنه
٩٨ ...
ويانه الشيخه وصفيه  وجراح وغاليه ورماح ...
وام جراح اخذت التوم وراحت لاهلهه
هناك اول ما دخلنا المدينه المنوره
الشيخ محاوط امه وعينه عليه ويبتسم
والجهال يتمشون كدامنه
وقبل ما نبدأ بالاحرام اخذني على جهه وكالي ..
- دحكي الحين انا مايجوزلي المسك من بعد اليوم هاذي راح نعاود كأننا عزابيه
وما يحلي لمسك الا بعد مااوفيكي مهرك
- رجعنا للبدايه ههه
- ايييه نعاود هالمره احباب ونعاود ان شاء الله لزواجنا بمرضاه الله ونبيو
- عرفت ليش ردت مهري عمره
حتى اجدد العهد وياك من بيت الله حبيبي
- ول عكل حبيبك انتي نعمتي وهدايتي
عسى ربي يكمل عمري ويه عمرك
ابتسمتله وكلتله ..
- بس دنك شويه
- امري
دنكلي شويه واني قربت راسي كأني اشاوره بس اني شميته ومليت ريتي من ريحته ووخرت وهو يبتسم .. كلتله ..
- لا تنسى تره احبك اني
- ههههه يولوو تره يجوزلنا الحكي
- اييي ميخالف بس حبيت اكولها الك بصفتي زوجتك هسه
- كل يوم تسمعيني هالكلمه يولو ماتنسي
- انته سمعنياهه وتدلل
-هااا تساومي فيها !
- لعد بس انته تريد تسمع اني هم اريد
- والراء واللعد هم لا تنسيهم حبيبتي مااكدر بدونهم انا
ضحكت ورجعنا للشيخه وافترقنا هنا
حتى نبدا بالاحرا

م ...
كلنه لبسنه الابيض وحتى الجهال جانت الشيخه مخيطتلهم دشاديش بيض
همه ماتجوزلهم العمره لانهم مو بالغين بعدهم بس احنه ردنا نزورهم ونشوفهم بيت الله ومثل ماكال الشيخ ..
حتى يكبرون ويكبر حب الله ومخافتو بكلوبهم ...
بكل مناسك العمره اوكف محتاره شلون
اشكر كل هالنعم واني بيت الله ؟!
الصلاه التسبيح الدموع والادعيه كلها
قليله تصير بلحظه وكفتي ويه احبابي
كدام الحجر الاسود وهيبه المكان وانشراحه صدري بي ...
جنت اجيب كتاب الادعيه واكعد يم نسوان اثنين كبار ومايعرفن يقرن
واحنه صارت كعدتنا ومشيتنا سوه
واصير اقرا بصوت عالي جمله جمله
وهنه يرددن ورايه لحد ما يخلص الدعاء
وغاليه تكعد بصفي وتستمع وياهن وتردد
ورافعه ايديهه الصغيرونه بالدعاء مثلهن
اشتريتلهه لباس صلاه  من هذا ابو التنوره ويه مصلايه وحافظه للقران قماش  كلهن نفس اللون ابيض ومطرزات بالوردي بالاطراف ...
والشيخ مره اجانه وجايب لكل واحد منهم سبحه لون ووصاهم يحافظون عليهه
ويسبحون بيهه بكل صلاه ..

اخذنا صور جماعيه بكل مكان وصور النه بس اني وياه بالاحرام الابيض
وشبعنا من مي زمزم ..
ووكت الطواف هو مخلي الشيخه كدامه واني بصفه والجهال وصفيه كدام الشيخه
من قبل اني يجذبني صوته الثابت والعالي بوكت الصلاه او التلاوه وهسه زادني انصات اله وكت ماايردد
لبيك اللهم لبيك ... يخلي جسمي يقشعر
يمكن من هيبه الاجواء او يمكن من كثر مااحبه يتخلل كلشي منه لاعماق اعماقي
رجعنا بثاني يوم عمرنا لامواتنا
وهو بحيله ماشاء الله يسوي السعي بين الصفا والمروه شبختين واني مايصير اهرول مثله وهو يكولي انتظريني اكمل وارجعلج اخذج تسعين بينهن ..
واضل انتظره يرجع ويرتاح شويه ونمشي نسعي بينهن ...
وعيدنا بجبل عرفات وعشنه اجواء العيد الاسلاميه بمكه ورجعنا من بعد طواف النساء الي رجعه حلال عليه وهو بساعتهه كالي ...
- الحين تم مهرك يا يابه وبدينا زواجنه من جديد
- عشت ياروحي والله كفيت ووفيت وكد كلمتك وياي
- عند عينك يالحبيبه .. بخاطرك شي بعد ضل هين ؟
- لا عندي انته كل شي اريده هو بس انته
اني طلبت من ربي مايعيشني يوم بدونك
- وانا بعد طلبت من ربي يرحمني فيكي
ولا يخليني اكصر معك بشي وطلبتك زوجتي بالجنه لو دخلناها ان شاء الله
- يابعد عمري ان شاء الله ندخلها سوه
ونعيش هناك راضين مرضيين
- بأذن الله ياعيني بأذن الله
رجعنا محملين بالهدايا للعراق واني مانسيت اخوتي ذكرتهم بالدعاء وبالهدايا
وره رجعتنا بيومين خابرت مصطفى وطلبت منه يجي حتى انطيه هداياهم
وهو كالي ..
ان دعاء انخطبت ثاني يوم العيد وعرسهه
بعد اسبوعين ...
هنا صدك بجيت وانقهرت شلون اختي تكبر وتتزوج واني ماشفتهه من سنين
ولا عشت وياهه شي ..
كل يوميه مصطفى يكولي هاليومين اجي ومايصحله مجال لحد ما مشت عشر ايام ا وصار وكت زواجهه قريب
واني حسيت نار وشابه بضلوعي شلون مااشوفهه .. اختي هالوحيده تتزوج ومااوكفلهه  عمت عيني
حجيت للشيخ اريد احضر زواجهه
وهو وافق وشجعني على هالخطوه
وكلتله اريد اخذلهه كم شغله لجهازهه
كالي اخذي الي تريدي .. انطاني فلوس
ورحت اني والشيخه للسوك اريد اخذلهه
ملابس ماعرف قياسهه مادري بيهه سمينه لو ضعيفه وشتحب يالون
وهالشي يجرح بكلبي وخلاني مثل المخبله افتر بالمحلات ومااعرف  شاخذ ما اعرف عنها شي !!!!
تالي الشيخه اقترحت اخذلهه ذهب يفيدهه وهيبه كدام عيالهه ..
ورحنا للصايغ اخذتلهه تراجي وكلاده خفيفه .. والشيخه جملتني فلوس ويه العندي ومن رجعت طلعت الفلوس المجمعتهن ورجعتهن الهه ..
حضرت احلى ملابسي وملابس الجهال وبيوم حنتهه من الصبح راح هو وصى الولد يحملون الفواكه والمخضر بالسياره
واني بقيت اسبح الجهال وابدللهم وغاليه لبستهه ذهبهه تراجيهه والشباحيه وشعرها عفته مفتوح على طوله بس خليتلهه طباكات ولبستهه ثوب ماروني كصير وكالون ابيض وحذاء اسود
وحسين لبسته اوفر نيلي ومنقط بابيض
وحذاء ابيض وهو دب طلع هالكبره بالكوه يمشي هو وشعره الاشكر مسويته اله ذيل حصان ...
واني لبست ثوب طويل سمائي ساده وكلوش ولبست سوار وكلادتي بكلمه الله الذهب ومحبسي وحلقتي هنه دائماً بايدي
وشال كريمي ومكيجت وحضرت ملابس الشيخ . اختاريتله الدشداشه النيلي والعباه الكريمي ورتبته بايدي وعطرته مثل كل مره ختمتهه اله ببوسه وضحكه وطلعنه
هالمره لبغداد بعد غياب ٨ سنين ...
اول ما دخلنا بغداد خنكتني العبره
يضل الانسان يحن لديرته وناسه واصله لو مهما عاش بعيد يضل الاصل هو الموطن ..
بعدهه بغداد حلوه وهواها مثل ماحفظته ريتي وشوارعها مشرعه ابتسامتهه للرايح والجاي وبعده صوت الكهاوي
يضج باغاني الراديو والدلعب اغاتي
اغاتي وعيني ولكنه بغدادي باصوات الرياجيل الكبار الي يرحبون بيهه بصدر منشرح من بعيد بمعارفهم وشوفه البنات يتمشن باثوابتهن الثلاث ارباع والشعر المنثور والكعب الناصي تذكرني بايام كليتي وسنين عشريني ...
وصلنه لمنطقتي باب الشيخ العصر وكلبي يدك سريع ومجلبه بايد الشيخ وهو يضحك ويكولي ..
- هااا يولو مااطاير انا
- عفييه
- ماتخافي يو

لي شيختهم انتي وبحمايه شيخك تدخلين بزودك  وتمشين بزودك
- تبقى وياي مو ماترجع !
- وكاد اضل معك عجل انا اخليكي وحدك هين !! وش عندي اهم منك وامشيلو
- اوووف ريحت كلبي
- ادخلي بزودك حبيبتي عندك بظهرك من يسندك لاتنسي
- ياروحي انته قوتي والله
ضحك وبوس ايدي وطبك السياره ببدايه الدربونه لانها متدخل الفرع ضيك
ونزلنا وهو اخذ حسين شاله وغاليه ضلت ايدهه بايدي وهنا سألتني ..
- ماما احنه وين يابيت نوح؟
- بيت جدو حبيبتي
- عندي جدو هين !
- لا جدو مات بس هنا خالو وخاله العروسه
- اكعد يم خاله العنوسه
-اي اكعدي هي تكيف بيج وتحبج
ضلت تباوعلي كل شويه وتضحك واحنه نمشي بداخل الفرع واشوف شلون هوسه الجهال بالباب ومصطفى مخبوص ويه كم ولد مدري شيحجون ويأشرون على الكهرباء ..
ومامنتبه علينه عاد شاورت غاليه ..
- صيحي على خالو وروحيله يلا
هي فلتت ايدي وصاحتله ..
- خالوووو مصطفى

وراحت تركض وتصيحله خالو وهو التفت وضل صافن هو والولد عليهه
وبعدين ركض شالهه وحضنهه واجاني
بسرعه وحضن راسي وباسه والشيخ جرني منه وكال ..
- هااا خويي خير بنص الشارع !
- ههههه نعتذر عيوني بس اللهفه عليهه غلبت الفكر .. ياااهلااً وسهلاً بيكم نورت بغداد بجيتكم
-منوره باهلها
- تفضل اغاتي تفضل .. عليييي تعال هنا
من صاح علي كلبي فز من مكانه وضلت عيني على الولد ياهو منهم راح يجي
وشفته جان شايل صندوك بطاله الببسي
وذبه من ايده واجه بسرعه ويباوعلي
عينه بعيني واول ماوصلنه كال ..
- اخيتي زهراء
ماكدرت احجي شي من عبرتي بس هزيتله راسي وهو حضني ووخر بسرعه واباوع لملامحه الي متغيره وماحيه الطفوله من وجهه واثار الشباب هي الظاهره عمره هنا ٢٣ وشاب مرتب وهيئته رزنه ..
اخذني مصطفى للبيت ويه جهالي وضل الشيخ ويه علي واكف ويباوعلي
اول مادخلت اسمع اصوات الهلاهل والضحك وهوسه الحجي ومجلبه بايد مصطفى وهو ضاغط على ايدي وموكفني وراه ويصيح على مرته
اجتي مرته بطنهه كدامهه وهي ناعمه وحلوه وهو يباوعلهه ويضحك ورأساً كالهه ..
- اريدج تاخذين هاي المريه لدعاء
-ومنو هاي وشكو لازم ايدهه ؟!
- شعليج هسه دروحي يلا اخذيهه ودخلو جوه يلا غلو عود اطلعيلي من تضوجين
عافنه وطلع وهي مشت كدامي واني اضحك بحسره .. تدليني على بيتي  !
اباوع البيت مجدد صبغه وكلشي باقي على حطته .. دخلت الهول وجهالي كل واحد من جهه لازمتهم واول ماصارت عيني بعين دعاء هي وكفت وشالت بدلتهه ومشت الي وحضنتني وهي تصيح
- اختي حبيبتي اختتتي اختتتتي اجيتيني تمنيتج تجيني والله تمنيت اشوفج
ضليت بس ابجي واني حاضنتهه ماعرفت احجي شي واجتي وحده سحبتهه مني باوعتلهه هاي امي
.
.
يتبع

✨ حديثتي الشقراء ✨
🔹🔹
البارت 3
بعدهه بنفس الابهه والخشم العالي
كالتلي ..
- هليتي ونورتي عيني هذول جهالج منين بله !
- من تاج راسج
درت وجهي عنهه وجريت ايد دعاء واخذتهه كعدتهه وضليت بصفهه كاعده
واعدل بدلتهه وامسح بدموعهه وكل شويه ابوس بيهه وعرفتهه على غاليه وحسين وضلت تحضن بيهم وتبوس ومكعده غاليه بصفهه وفارشه البدله بحضنهه وغاليه تضحك مكيفه بيهه
وحسين مكعدته بحضنهه وتسألني
- منو رجلج ؟ شوكت تزوجتي ليش ماندري احنه فهميني احجيلي شي
- تكمل الحنه و نحجي براحتنه
شفت نسوان اثنين عينهن متركزه علينه
اشرتلهه بعيني عليهن وسألتهه..
- هذني منو ؟
- هذني خالاتنه شبيج
-هااا راجعه بينكم العلاقات
- اي من زمان يجونا ونروحلهم بس مصطفى ميروح وخوالي دائماً يجون يمنه يباتون اذا عدهم شغله هنا
وحتى امي رادت تزوج مصطفى وحده من بنات خالي الجبير وهو ماقبل وراح اختار مياده
- هاا وهسسه هذني البنات الصغار بنات خالاتي يعني
-اي هذني اثنين منهن بمعهد معلمات واثنين بعدهن بالمتوسطه واكو مزوجات مااجني بيوتهن بعيده
- زين اكلج هالفتره امج شلون تعاملهه ويه عماتنه
- ليش متكولين امي ؟ انتو شنو الي بينكم
- معليج بهالشي حبيبتي سوالف قديمه
هسه احجيلي
- ما مندكه بيهن وعماتنه مو دائماً يجن هنا احنه نروحلهم كل جمعه للبيت الجبير نلتم على الغدا ونقرا الفاتحه ولليل نتعلل ونرجع ومرات نلتم ونروح للنجف وامي تجي ويانه هم ،يعني ماشفتهه فد يوم متعاركه ويه احد منهم زينه علاقتهم
- اي الحمدلله
- شكد عندي حجي وياج وبنفسي اعرف كلشي صار وياج اليوم تبقين تباتين مو
- اي ابقى لعد شلون اعوفج بيوم عرسج
- لعد ليش مااجيتي بعرس مصطفى
- بوكت خطوبته ماجنت مستعده للرجعه هنا ووكت عرسه جنت مريضه
- خير شنو شصارلج
- هيج شويه تعب هسه احجيلي خطيبج شلونه حلو ؟مقتنعه بي ؟
- اي حلو زين وحباب كلش ويايه وعمتي صارلها سنين كل ماتشوفني تكعد تقنعني بي وتحجيلي شيسوي ميسوي
- هم ملتقين قبل الخطوبه
- لا هيج كم مره شفته من بعيد ببيت عمي وبالخطوبه مصطفى ميقبل يجي لبيتنه بس شفته مره وحده من طلعنه نشتري ذهب وحتى عمتي عزمتنا يمهم مره ومصطفى مقبل نروح
- عفيه عليه خوش يسمع الوصيه
- كلش حريص والله مرات احس شخصيته اقوى من شخصيه ابويه
متحكم بكل شي هذا الدينار اذا ينصرف بالبيت لازم يعرف المن وشلون انصرف
امي كلش تخاف منه وما تخطي خطوه بدون علمه
- هو الاحسن .. ياريته جان جبير بذاك الوكت وياي جنت مااعتازيت لاحد
- منو الاذاج بس فهميني شو كل واحد يحجي شكل عليج ولحد هسه مامفتهمه شنو سالفتج
- سالفتي طويله بعدين نحجيهه
ضليت اباوع لوجوه الكاعدين واحاول اتذكرهم منو وعرفت كم وحده منهن والي ماعرفهه اسأل دعاء عليهه
امي اشوفهه واكفه من بعيد تباوعلي وعاوجه حلكهه وتتبسبس ويه وحده من خواتهه ...
غاليه رادت تروح لابوهه اخذتهه وبقيت حسين بحضن دعاء وطلعت وصلتهه للباب وضليت واكفه اباوعلهه لحد ماراحتله ورجعت امشي واباوع لكل ركن بيتنه ..
رحت لحب المي تلمسته وشربت منه
وضليت واكفه بنص الطرمه واباوع لفوك وسمعت صوت يكولي ...
- تره البيت مو بيتج وشوكت مايعجبج تجين وترحين
باوعتلهه وابتسمت بحزن هاي امي الي تحجيلي هالحجي ..!
- ولا هو بيتج هم هذا بيت ابويه والي هنا اخوتي بكيفي اجي واكعد شوكت مايعجبني
- نايمه بالعسل انتي ..عيني هالبيت تسجل باسمي واني الوصيه على اخوتج من جانو قاصرين واني الي بمزاجي مبقيتج هنا ولا انتي ماتشرفيني
-هاااا ياسبحان الله دائماً عدنا نفس الشعور انتي هم ماتشريفني وهم اني باقيه بمزاجي هنا وحجيج هذا خليه الج وصيه ماوصيه هاي سوالف متهمني اني جايه احضر عرس اختي وارجع لبيتي
- ومنيلج هالبيت عيني جبتيه من ورث ابوج لو بتلال الذهب العندج لما طلعتي بطرك ثوبج شارده ياهو هذا اللفاج وضحكتي عليه بدموعج هذا يا اغم
- والله لو ماعمرج وشيبتج جان عرفت شلون اردج بس مخليتج للايام هي كفيله ترجعلج الصاع صاعين
عفتهه ورحت للهول طبيت ووكفتني وحده من خالاتي لزمت ايدي .. باوعتلهه
وهي كالتلي ...
- اوكفي خلي نشوفج نسلم عليج وين جنتي غاطه ؟شبيج مابيج سولفيلنه
- تريدين اخباري لو تريدين تسلمين؟
-اثنينهن
- اعتبري السلام بينه وصل واخباري زينه وتسر الخاطر من رخصتج اشوف ابني
عفتهه ورحت لدعاء اخذت منهه حسين وبوسته وضليت مكعدته بحضني واطلعله ككو من الجنطه واوكله وشويه وسمعنه صوت الهلاهل من بره عرفت اهل العريس اجوي .. يعني هسه راح اتلاكى ويه عماتي ...
وكفت رأساً ورحت لاخر الهول ضليت واكفه هناك حتى مااصير بوجهم واخليهم يكملون هوساتهم ويحنوهه براحتهم
ضليت اباوعلهم شلون يهوسن ويهلهن وشفت العريس طويل واسمراني وجسمه زين بس دعاء احلى منه .. دعاء مربربه وبشرتهه بيضه وملامحه حلوه ..
اشوفه شلون يستحي يباوعلهه وبالكوه يلبسهه ذهبهه حتى عينه ميحطهه بعينهه
ام العريس الي هي عمتي الجبيره هي حنتهم وضلت تهوسلهم وتدبج ويه بقيه النسوان ..
اني هنا تذكرت الذهب الي جبته الهه
وكلت خلي البسهه كد

ام عيالهه احسن
خليت حسين بحضن بنيه صغيره ورحت وبيدي علبتين الذهب الصغار ..
وصلت يمهم وصرت من جهه دعاء وهي تباوعلي وتضحك .. سلمت على العريس وهي كالتله ..
- هاي اختي زهراء
ضل صافن بوجهنه وبعدين كال ..
- اهلاً وسهلاً
ابتسمتله وفتحت علبه الكلاده ودنكت لبستهه وهي تتشكرني وفتحت علبه التراجي شوفتهه الهه وضحكت وكلتلهه
- هاي خليهه بعدين البسيهن رجلج هسه لبسج تراجي بعد وين احطهن
ضحكت و شاورتني ..
-مالاتج احلى باجر البسهن وانزع هذني
ضحكت وبوستهه وضليت واكفه يمهه واباوع لعماتي الي كل وحده صفنتهه
شكل .. عاد اني ضحكت وكلتلهم بصوت عالي شويه ...
-هاا  شلونكم
اباوع لدعاء حاطه ايدهه على حلكهه وكاتمه ضحكتهه .. واجتي هاي البنيه الصغيره تتدافع من بين النسوان وشايله حسين وهو يبجي .. رحت اخذته منهه
وطلعت بي بره ولحكني عماتي ..
بوستهن وهنه ماانطن اي رده فعل بس كالن ..
- ليش رحتي ؟ وين جنتي كل هالسنين
- سوالف طويله بعدين خلونه هسه فرحانين شكو مرجعينا للماضي
- هذا ابنج ؟
-اي ابني حسين
- شوكت تزوجتي يامعزايه ولج وين جنتي
- اي عمه كلتلج بعدين نحجي هالشي
- رجلج وياج ؟
- اي وياي بره هو وبنتي يم مصطفى
-عندج بنيه هم !
- اي عندي بنيه عمرها ٨ سنين
- يااااه من ذاك الوكت انتي متزوجه ولج شلون
- عمه الحجي هواي مو مال هيج وكفه
خليهه بعدين

جانت عمتي الجبيره هي الي تحجي
وعمتي الصغيره تباوعلي وعيونهه تدمع
اجتي حضنتني وكالت ..
- والله بهذاك اليوم عرفت صايرلج شي
ليش محجيتيلي شصارلج ليش مااجيتي لبيتي ليش خليتيني عايشه بذنب كل هالسنين
- لااا عمه لااا شكو تلومين نفسج
- والله مارتاحلي كلب دايماً اكول بنت اخويه وروحه ماحميتهه ماداريتهه ومافهمت شبيهه ..اني شفتج بعيني شلون تعبانه وماسويتلج شي ضلت تدك بكلبي والله مارتاحيت واحس اخويه يلومني عليج
- لاا عمه الحمدلله اني عايشه ومرتاحه
وانتي مو ذنبج بشي هو ابو الذنب راح لدار حقه انتي شعليج تصرفتي على لاهيتج
- لو بس افهم شجان صاير بينكم
- بعدين عمه بعدين
جنت اسكتهم بكلمه بعدين واني مادري شراح احجي بهاي البعدين ؟
عماتي بقن بس دزن بناتهن وجناينهن
وخالاتي بقن بايتات هنا وشفتهم ديحطون العشه رحت طلعت للباب وادور بعيني على الشيخ او واحد من اخوتي وشفت علي رأساً من اشرتله اجاني يركض
- ها خيتي محتاجه شي
- اريد الشيخ وين راح؟
- هو مصطفى كاعدين بالكهوه براس الشارع
- هاا زين تكدر تروحلهم وتكوله اريد ينزلي الغراض والجنطه اريد ابدل للجهال وهم اريد احاجي
- صار هسه اروحله
راح واني طبيت ورديت الباب وشفت دعاء طلعت من الهول رحتلهه .. وكالتلي
- امشي وياي خلي نصعد اريد ابدل
-يلا امشي
صعدت وياهه ويانه بنات خالاتي اثنين
ضليت اني وياهه وحدنا بغرفتهه الي هي غرفتي قبل ..
عفتهه تبدل ووكفت يم الشباك تلمست البرده وباوعت للجربايه نفسها جربايتي
شكد جنت ارتاح من انام بيهه انسى كل الدنيا .. جانت هالغرفه محتويتني بكل تعبي وهمي وسعادتي كلشي شاركته وياهه ...
شفتهه لبست دشداشتهه ووكفت يم المرايه تفتح شعرهه واني فتحت البرده شويه وضليت اباوع من الشباك وبيدي حسين يضرب على الجامه ..
شفت الشيخ ومصطفى اجوي وشايلين الغراض وعلي شايل صناديك الفواكه
وراهم هو وصديقه .. حسيت هنا عائلتي من شفته هنا امنت .. رأساً رحت خليت حسين بحضن دعاء ونزلت ركض
فتحتله الباب ..
من شافني هيج الهث ضحك ومصطفى دخل الغراض وراح للمطبخ ..
وعلي هم حط الصناديك بالطرمه وطلع
بقينا واكفين اني وياه يم الباب ..كلتله..
- اشتاقيتلك حبيبي
- وانا اشتكتلك ياعيني ..ايييه احكيلي كيفو اللقاء
- يعني زين .. عماتي هنا وخالاتي بقن كاعدات جوه بالهول
- هاا صار حكي بينكم
- كلهم يسألوني ليش رحتي وين جنتي
ومجاوبتهم شي بس كلتلهم بعدين
-اييه وناويه تحكيلهم كلشي
-مادري هو ردت اسألك شنو احجيلهم
صفن شويه وباوع لداخل البيت ورجع باوعلي وكال ...
- انا تذكرت الحين سالفه
-شنو
- انته ليه حدرتي على حديثه مو غيرها؟
كبل اسألك ماتجاوبي واحترمت رغبتك لكن  الحين تذكرتها وابغي الجواب
بلعت ريكي وضليت صافنه مادري شحجي !؟ ماحب اجذب عليه بس شلون احجيهه !!
-هاا وش مصفنك
- عوفهه بعدين
- ليه ؟ اختصريها بكلمتين انا ماودي افتح دفاتر كديمه لكن لزوم افهم وش عرفك فيها ؟
- احم هو
-احكي تين وش مخوفك هيك ؟!
-ما خايفه لا
-عجل احكي وشو
- قبل بالكليه جان عدنا زميل يحجي بيهه هواي هو من الانبار واهله انتقلو لبغداد
وجان دائماً من نلتم يحجي على منطقته ويعرفنا على عاداتهم وهالاشياء فضلت طابعه بالي
- هااا ووين صفى حالو
- مادري بعد وين راح
- ايييه كثر الله خيرو دلاكِ دربي وجابك لكلبي
ضحك وهو يباوعلي واني احس حتى الضحكه بهتت بوجهي مادري بس محلو هالشعور من احجيله على هيج اشياء
نص منهه مخفي ..
- ايييه الحين انا وين ابات هالليله ؟ اخيك اخذني بالحكي والسياسه وضيعنا بالحكي
- حبيبي غير هنا تبات يمي
- وين يولي مالبيت مليان حريم
- شفت عمامي ؟
- ايييه دحكتهم وسلمت عليهم
-عرف

وك منو  ؟
- اييه حكالهم مصطفى وهمه تصفنو وبلشو اسئله
- ياا شسألوك؟
- من وين وشجابك وشعرفك ببنتنا وهالحكي و واحد منهم كان ودو يدخل يحكي معك ماخليتو وحكيتلو ..
لو عندك حكي انا زوجها احكيه بوجهي هين مالك دخل فيها
عاد حكالي .. عايله معو انتي ومع اهلو  و يريد ياخذ حكو ..
حكيتلو .. لو انك طلاب حك ديواني مفتحلك ابوابو احدر علينا واخذ حكك من هالعين لكن هين حرمتي ما يحدر صوبها بشر
عاد خذوه بعيد عنا لحين مامشو
دمعت عيني من موقفه القوي الي حسيت رجعلي بي هيبتي بين اهلي ..
ابتسمت ودمعت عيني وتقربت بوست خده وهو ضحك وكالي ..
- يولي لا يحدر اخيك
- حبيبي شكراً
- اسكتي بالله عليكي اسكتي عجل انا ان مادافعت لحرمتي لمن ادافع ؟ هذا واجبي يولو
- خااالد احبك والله
- هههه وانا احب اسمي منك واحبك ضعفين حبك لي
جان واكف قريب مني ويعدل بشالي من يم خدي ويبتسملي واني اكوله ..
- عادي اعرف عماتي عليك ؟
-اييه عادي وش فيها
- اروح اصيحلهم لعد
- لاا مايلزم تروحي بس دحكي وراكي
انداريت بسرعه وشفتهن واكفات ووياهن امي ويباوعن علينه .. رجعت باوعتله وهو كالي ..
- تشبهي عماتك يولو
ضحكت وهو مشى كدامي باتجاهن
وكفنا كدامهن واني كلتلهم ..
- اعرفكم برجلي الشيخ ابو جراح
عمتي الصغيره رأساً كالت ..
- حياه الله الشيخ الف هلا ومرحبا عيوني
- الله يحي اصلك ...زادنا شرف بملاگاتكم
تقربت يمه وكلتله ..
- شيخ هاذي امي
باوعلهه وهي رافعه الحاجب وتباوعله بطرف عينهه .. رجع باوعل وفر سبحته وكال ...
- دمك ونفسك الطيبه وجمالك  على عماتك مالك شبه من امك
ضحكت وهو يباوع لعماتي وحجالهم ..
- ول يابه واحد من خويكم نطلبو زياره لديرتنا احدرو معو بحينها حياكم الله مضايفنا بوابها مشرعه للكريب والغريب
وحياكم الله بكل وكت

عمتي الجبيره سألته ..
- ديرتكم الانبار؟
- اييه الانبار قضاء حديثه اسألو عن مضيف الشيخ ابو جراح وياخذوكم لحدر الباب
- ان شاء الله نضيف عدكم فد يوم
- كل الهلا يابه كل الهلا
باوعلي وكالي ..
- ما تعشيتي للحين ؟
-اي بعدني
- زين عجل وش رايك نطلع نتعشى على دجله صار زمان مامشينالها
- اي ياعيني صار هواي
- عجل احكي لخويك يمشو معنا وودعو خيتكم بكعده طيبه
- يابعد عمري
- ادري انك هين ماتاخذي راحتك معها
يلا تعجلي انا سابكك للسياره واحكي لمصطفى لو ودو يمشي معنا هو وحرمتو حياهم
- ماشي ياعيني هسه اكوله
- انا اخذ علي وسابكك اخذي بساط معك لاتنسي
- اي عيوني صار
- يلا تعجلي
راح واني باوعت لعماتي كلهن مصفنات علينه كلت لعمتي الجبيره ..
- عمه راح اخذ دعاء ونطلع من رخصتج يعني ..اخيتي واريد اشبع منهه هالليله
- اذا مصطفى يروح اخذيهه
- اي اكيد يروح .. يلا من رخصتكم
عفتهن ورحت صعدت لغرفه مصطفى
ودكيت الباب طلعتلي مرته .. وهو من شافني راساً اجاني .. كلتله ..
- مصطفى الشيخ عازمنا على العشه بره
وكالي نطلع كلنه هو هسه اخذ علي وينتظرونا بالسياره
- هاا خير ان شاء الله شعجب ؟
- علمود نكعد براحتنا يلا بدلو بسرعه دينتظرونا
- يلا ماشي هسه مانتاخر
رحت لدعاء وخبصتهه حتى تبدل وطلعت هم خبصت مصطفى ومرته
واخذنا فرشه وطلعنا ..
مصطفى ومرته يمي وره وعلي ليكدام ومكعد بحضنه غاليه
رحنا على شواطي دجله الجو بي بروده حلوه بنهايه الثاني وهناك الولد جابو منقله جبيره ومكسرين بيهه الخشب وشعلو النار وصارت بالنص تدفينا بين ماجابولنا العشه .. سمج مشوي وصرنا ناكل ونسولف ..
علي متكفل بغاليه يفلس ويوكلهه واني اوكل بحسين واباوع لمتهم وضحكتهم
وارجع اباوع للشيخ الي عينه ماشالهه عني .. كل شويه ابتسمله بامتنان
بكلبي شُكر اله جبير لو كضيت عمري اداري واهتم بي مقابل هالفرحه مااوفي
اضل ممنونه اله كل حياتي ..
وره العشه والجاي راح مصطفى ومرته
يتمشون وضلينه اني ودعاء نسولف شويه وخليت حسين بحضن الشيخ واخذتهه ورحنا تمشينه شويه بعيد عنهم بس بعدنا كدام عينهم ..
صرت انصحهه شلون تتعامل ويه رجلهه وعيالهه وحجيتلهه كم شغله على ليلتهه باجر وشلون تهدأ نفسهه وتتهيء
وهي جانت كلش خجوله وكل شويه تكولي كافي اسكتي واني اضحك عليهه
كل شويه احضنهه وهي تكولي اني اكبر منج ..
هي اسمن مني وملامحهه اخشن مني
واني رغم بالثلاثينات عمري بس بعدني رشيقه و ناعمه ..
رجع مصطفى ومرته وصاحولنا من بعيد
رحنه كعدنا وياهم وهمه جايبين جيس حب شمسي خليناه بالنص وكعدنا نكرز
جان دعاء تسأل ...
- اكولج انتو شلون تعرفتو شلون صار زواجكم ماحجيتي
ضحكت وباوعتله وهو هم ضحك كلتله
- شيخ شتكول منين ابدأ
- هههههههه هنه كثر يابه براحتك
ضليت اضحك واباوع لمصطفى وهو هم
يبتسملي ورجعت دعاء تكولي احجي
عاد كلتلهه ..
- اني جنت ضيفه بيتهم وتعرفنا هناك
وبعدين صرنا نشتغل بمعمل سوه وبعدين خطبني وصار الزواج
-بس هيج. ! تفاصيل خيتي تفاصيل
-يعني ياتفاصيل
-شوداج لبيتهم وليش خطبج ليش قبلتي
-هههههههه عوفيهن هذني اسرار
- مو كلتيلي تحجين شو كلشي ماكو
-شلون ورطه هاي هسه شي صار وراح شكو تلحين بي
-ازعل عليج والله يضل كاتلني الفضول
- ول

يابه انا احكيها الك
باوعت للشيخ وهو فر سبحته وكال ..
- بيني وبين والدك الله يرحمو عهد وهالعهد كان يلزمني بحمايه اخيتك وحفظها وبهذيك السنين الفاتت انا تكفلت فيها على اساسو للحين زين !
- زين من شوكت تعرفه لابويه
-من زمان بينه معرفه
- زين وبعد
- اييه اخذتها بيتنا وصرنا اصحاب سرنا وشغلنا واحد وهي كل يومها حدر امي
-اي
- اييه بعدين حبيتها
-هههههه يااا
- اي بالله حبيتها  وصيت امي طلبتها للزواج رفضت ماحكينا شي وعاودت بعد فتره هم طلبتها ورفضت وبالثالثه حكتلي
اسأل خويي وسألتو لمصطفى بحينها
ساعه الي وافق وافقت وهيك تزوجنا
- يعني مصطفى تدري بكل شي ومحاجيلنا !؟؟
مصطفى كام يحك بكصته ويكول ..
-اي يعني شويه هيج مرات قبل هاي قبل
ضل يتعاتب هو وعلي واني اباوع للشيخ وابتسم ودعاء تكرص بايدي وتشاورني
- تحبيه هاا بينكم قصه حب وماحاجيه
- ههههه ولج عيب
ضحكت وعلت صوتهه وحجت ..
- شيخ زين اختي خوش مره  لو متعبتك
-لااااه مالها مثيل اخيتك معيشتني ملك
- هههههههههه الله يحفظكم
باوعتله ورجعت لزمت ايد دعاء وكلتلهه
- هو معيشني ملكه ماكو رجال مثله
- شمسويلج وهالكد تحبيه
-ههههه هوااااي هوااي ماينحجن بس مدللني هواي
- يعني شلون كوليلي حبابه
-هههه يعني مثلاً اخذني سفره لتونس
واخذني عمره وزيارات كل فتره
من غير تعامله الحلو واسلوبه
- صدددك !! صددك لو تشاقون وياي
- صدك شبيج
- بالعافيه عليج خيتي بس اريد اسأله سؤال للشيخ
- اسألي يابه
- يعني انته تداريهه هيج وتسفرهه وزين وياهه لانها زينه وياك لو لان انته تحب هالشي لو شنو فهمني الله عليك
- هههههههه دحكي العمره كانت مهرها
-مهر ؟
-اييه من ساعه الي خطبتها هي طلبت مهرها عمره وانا وعدتها وكت الي ارتب اموري اخذها واخذتها مع الاهل برمضان هذا
- هااا ماصار هواي
- لاا .. وسفره تونس هاذي كانت مطلبي
انا احب السفر ودايماً كل سنه اطلع للشام للاردن وشابع منهم حكيتلها اختاري وين نسافر وهي اختارت تونس واخذتها
- يعني كلهن علمودها
- عجل يابه رد الزين وش يكون ؟ لزوم يكون بالزين
- ههههه هسه لازم ارجع اسألج انتي شمسويه للشيخ وهيج مدللج هههههه
- ههههه شمسويه يعني مداريته وطايعته
اكو غيرهن
باوعت للشيخ وهو رافع حاجبه ويبتسم
ويفر بسبحته جان علي يكول ..
- لااا مبين اكثر من هذني لا تقشمرج هيج دعاء
- ههههههه عفيييه شبيكم وياي
- الله عليج احجيلي بس فهميني حتى استفاد بزواجي شبيج
- ولج خيه هي مو خطوات واعلمهه
هي مشاعر مشاااعر
كلهه ضحكت وجان هو يكول ..
- خيتي دحكي الحين هاذي جملتها فيها شغلتين هنه رباط كل الحكي لو عرفتيهم تعرفي وش صار بحالي حينها
ضحكت لان عرفتهن وهي صفنت وتباوعلي وتعيد بالجمله جان تضربني على رجلي حيل وتكول ..
- لكيتهه المشاعر يعني لان تحبك مو
- اييه هاذي وحده
- والثانيه شنو
- الثانيه الحين لو عرفتيها وش تطلبي اعطيكي

علي كال ..
- هسه مافهمنا ليش يسمون جنابك ابو جراح مو ابو غاليه
غاليه رأساً نطت وكالتله ...
- خالو جناح اكبر مايصين اني كبلو
-هاا؟؟
- خويي انا عندي حرمه كبلها وولدي الكبير اسمو جراح
- هاااا !!!
- وهاي عايشات سوه انتن !؟
- لاا اني عندي بيت وحدي وهي بيتها وحدها
ضل رافع حاجبه ويباوعلنه ودعاء نفس الشي بس مصطفى منتجي ويكرز حب ويباوعلهم .. جان يكول ..
- هسه شكو تصفنون ماسمعتو الرجال حاطهه بعينه وشكو بيهه عنده نسوان اثنين هذا شرع وحق
مياده شمرت الحب الي بيدهه ودارت وجهه عنه وهو كال ..
- يعني للي يريد بس الي مكتفي بمرته هاي بعد مو حق
- ايييه خويي حكيك عدل هذا شرع ما به عيبه ... انا  حرمتي الاولى عندي منها
اربع ولد والخامس بالطريق ومتزوجها من كبل ماادحك اخيتكم باربع سنين لكن انا روحي ماتهوى غير دارها
علي اخذ نفس وكال ..
- المهم متصافين ومرتاحين بعيشتكم الله يهنيكم
- ويهنيك ياخوي
شاورتني دعاء .
- هاي كل شويه مكتشفين شغله خاف النوب يطلع جد ومندري
-هههه مو هيجي عاد تره ولده صغار بعدهم اصغر من غاليه وحسين
-هااا زين هاي شلون يجي يمج ويمهه
- يوم يمي ويوم يمهه
-وهي زينه وياج لو وكحه
-لا حبابه
لمينه غراضنا ورجعنا للبيت وغاليه نامت بنص الطريق وضل شايلهه علي
من نزلنا ..
كلهم دخلو وضلينه اني وياه بالطرمه واكفين كلتله ...
- تعبان حبيبي
- لااه زين اليوم كان حلو الكعده مع خوانك طيبه ومريحه
- اي همه حبابين .. خاالد تدري تفاجأت من حجيت كدام اخوتي على حبك
- هههه يولي حبك مو عيبه وينضم
حبك شي افاخر فيه
-يابعد عمري
- دحكي هاذي انا اول مره احكي فيه كدام بشر غيرك لانهم طيبين وخوانك انا حكيتو
- ايي احسن بس تدري شغله
- وش هي ياعيني
رفعت رجلي شويه وشاورته ..
- اليوم اني احبك اكثر من الي قبله
- ههه يابختي والله
نزل علي واني وخرت من يمه واجه يمنه وكال ..
- خيه اني اخذ الشيخ ونام بيت صاحبي اتفقت وياه من العصر
- هاا ماشي
- يلا اني طالع كدامك شيخ
طلع واني لزمت ايده وكلتله ..
- حبيبي الصبح خليني اشوفك
- كيف احدر هين يولي والبيت كلو حريم
- اوكف بره كدام البيت

واني اشوفك من الشباك ههه
-هااا سوالف المراهقين هاذي يولي كبرنا عليها
- لا لا بعدنا شباب
-يلا تآمرين
طلع وقفلت الباب وراه وصعدت لغرفه دعاء شفتهه فارشه للجهال ومنومتهم
وفارشتلي بصفهه .. بدلت وحضنتهه ونمت براحه ومبتسمه وتمنيت هالليله اطول واضل اختي بحضني ..

حضرنا العرس وشفت اختي ببدلتها البيضه وشاركتها فرحتها وودعتها
ووصيت عمتي عليهه و ودعت اخوتي
ورجعنا لبيتنه ..
رجع روتين ايامنا بين تربيه الجهال ومداراه الشيخ وترتيب البيت ..
ام جراح ولدت توم ولد سماهم الشيخ
حُر و آسر ..
من سألناه عن سبب هالاسامي كال ..
- حُر هو نوع من الجوارح و مكمل لاسماء اخوتو
وآسر هو القوي الي يغلب ويأسر خصمو
وانا ودي ولدي كلمن يحمل صفات اسمو
ولد خالد جوارح ما ينكدر عليهم
الولد اثنينهم بيض وناعمين وبدت ملامحهم تبين مختلفه من عبرت الاربعين مالهم ..
وبوكتها اخذنا كُلنا ويه بيت ابو حسن
زياره لكربلاء وزور الجهال كلهم وبالاسم يودعهم عند الامام ...
وهيج صار عند الشيخ ٧ ولد وبنيه وحده
بس بنتي غاليه صارت نصيبه من رباه البنات ..
دخلنا سنه ٩٩ و الشيخ صار يبني غرف للولد بالطابق الثاني بيتهم يحضرهن الهم من يكبرون ..
وغير ترتيب الديوان وفرشه .. وصاهم بالمعمل يسون اله تخم على طول الديوان وطبلات  خشب وفر الديوان كله بيهن
وبنهايه السنه اشترى سياره ثانيه وبقى هاي المرسيدس البيضه ماقبل يبيعهه
يكول هاي انتيكى  ابقى محتفظ بيها كل العمر ...
عباس وصكر صارو همه ولدي
اكلهم نومهم كله يمي ..
هو صار يجيبهم وياه من يجي عليه العصر ويبقيهم يمي لحد ماتعودو وصارو مايفاركوني ودائماً يكولي هذولي ولدج
انهي وامري بكيفج عليهم ..
واني مكيفه بيهم العبهم ويه حسين واعلمهم يرسمون وماحسيتهم يفرقون عن حسين مدللين ومحبوبين مثله ..
ملابس من اشتري لجهالي اشتري الهم هم واذا اخذت فد لعبه لغاليه لازم اذكر جراح ورماح هم وبعدنا مستمرين على عزايم الجمعه والسبت ..
بشهر الرابع من سنه ٩٩ الشيخ وامه
راحو لبيت عم الشيخ الجبير جان راجع من العمره وراحو يسلمون عليه واخذو وياهم غاليه وجراح ورماح وعباس وصكر يمي اعمارهم ٣ سنين وهمه حركين صايرين مايكعدون ولا رجليهم تتعب من الفره .. واني عيني بس عليهم
و همه وحسين شكو شي كدامهم يجروه واني الملم وراهم ...
والساعه ١٢الظهر اندكت الباب
جريت شالي لبسته وطلعت فتحت الباب
واشوف رجال شايب سمين شويه وبيده
عصا  رفيعه ولبسه مو نظيف و وراه كومه طليان كالي ..
- السلام عليكم يا يابه
- عليكم السلام عمي تفضل ؟
- يابه انا رايد شربه مي لي وللشياه
حدرت على ديوان الشيخ وما استضافوني
- ماضيفوك !! معقول ليش !؟
- الله العالم يا يابه باب الديوان مكفل وناحيه البيت اهلو ما خلوني ادخل لكاعهم انا والشياه وانا ردت شربه مي وانا رجال شيبه ومتعني الدرب هذا من فجر الله وتعبان

والناس هينه مايرحمو
- لااا ياعمي اهل هالبيت طيبين وكريمين
بس يجوز لان صاحب البيت ماموجود
تصرفو هيج وان همه ما ضيفوك اني احطك على راسي تفضل البيت بيتك
دخل للطرمه وكالي ..
- جزاكِ الله خير يا يابه انا هين اكعد
يكثر خيرك
- لااا ياعيبه العيبه هذا البيت شكبره وتكعد هنا بالطرمه بهالظهريه !
لا والله ماتصير تفضل جوه عمي الغدا حاضر
- لاا يابنيتي باين ان زلمه بيتك ماهو هين وجايز مايرضى ادخلو خليني هين انا ارتاح وامشي
- عمي زلمه بيتي لو رجل مضياف
وبيته مفتح ابوابه للبعيد والقريب
وان درى مبقيتك بره مايرضاهه والله
تفضل وارتاح اكل وغسل على راحتك
ابتسملي واني اشرتله يدخل ورحت كدامه
مشيت وفتحتله باب الاستقبال وخليته يكعد ورحت للمطبخ اخذت سراحيه المي والكلاص واجيت قدمتله وكلتله ..
- كل الهلا عمي زارتنا البركه
- البركه بيكم يابه
- عمي اترس سطل مي حتى يشربن الحلال
- لو ما يتعبك
- لاا من عيني ادلل ، من رخصتك شويه واجي اخذ راحتك
رحت للحمام واخذت السطل وطلعت بره ترسته وخليته يم الباب واخذت طشت هم ترسته مي وجريته يم الباب ورحت صحته حتى يطلعهن ..
وضليت واكفه اني والجهال بالباب نباوع للطليان شلون اجني على المي وشلون هو يجمعهن ..
مديت راسي وباوعت لجهه الديوان
وماشفت احد من الولد هناك ..
واستغربت هالمره شعجب الديوان مقفول ؟
الشيخ كل عمره عايف ابوابه مفتحه
حتى بالليل مايقفله ويخلي الكهوجي هناك ينام خاف احد يجي بالليل محتاج شي
شعجب هالمره مقفول ؟

يتبع

✨ حديثتي الشقراء ✨
🔹🔹
البارت 4
رجع الحجي يمنا وباوع للجهال وكالي ..
- ولادك ماشاء الله كلهم نفس الكصه الله يحفظهم
- الله يخليك عمي تفضل الغدا حاضر
دخل للاستقبال وبقو الجهال يمه واني رحت حطيت الصينيه وصرت احطله من كل شي عندي .. تمن والمركه وحميتله الخبز وشيفت زلاطه وخضورات وحطيتله ماعون بي لالنكي وليمون
وخبطتله سراحيه لبن واخذتهن اله
واخذت الجهال للهول وهو يصيحلي
- خليهم هين حدري يا يابه خلهم ياكلون من هالزاد
رجعتله وكلتله ..
- عمي هذا الاكل خاص بيك اكل واشبع الف عافيه ..الجهال اني اوكلهم هسه لا يضل بالك عدنا خير من الله
- عساه يارب يكثر ويدوم هالخير على هالبيت
- ان شاء الله النه والكم
خليته ياكل براحته واخذت الجهال بالمطبخ وكلتهم وغسلتلهم ورحت عليه
شفته مكمل اكل وصافن على صوره الشيخ الي معلكه بنص الحايط ..
جانت هالصوره بالعمره ..
دنكت اخذت الصينيه وهو كالي ..
- تسلم ايدك يا يابه
- الله يسلمك عمي هسه اجيبلك الجاي شلون تحبه عمي حلو نص حلاه
- لا يا يابه بدون حلا
- صار تدلل
اخذت الصينيه ورحت صبيتله الجاي واخذته اله ورجعت خليت كم قطعه كيك و جان عدنا تفاح اخضر صغار هم خليت بماعون واخذت هالصينيه خليتهه يمه
وهو يرفع عينه يباوعلي ويبتسم بوجهه البشوش ويرجع يدنك ويكولي ...
- يحفظك الله جزاكِ الله خير
- الله يخليك عمي ويطول بعمرك
ان شاء الله مرتاح هنا
- الحمدلله  الحمدلله
- راح اجيبلك فراش حتى تتمدد وترتاح عمي من رخصتك
- لاا يابه لااا مااطول هينه
- لاا والله مايصير عمي شلون تطلع بهالظهريه خلي يصير العصر واطلع براحتك ولو تبات عدنا هالليله بعد احسن
الشيخ يكيف بشوفتك
- جزاكِ الله خير .. زلمتك هو الشيخ ؟
- اي عيني
- عجل ذاك البيت الي تعنيتو لمن ؟
- هذاك هم بيته . هذاك البيت بي الشيخه امه وزوجته الاولى اني اصير زوجته الثانيه
- هااا يا محاسن الصدف .. انا كل ظني هذا بيت واحد من الجيره
- عمي انته تعرفه للشيخ ؟ عندك شي يمه ؟
- اييه اعرفو وعندي امانه طلب اسلمها الو لكن تعنيت الدرب واثاريه مكفل ابوابه بوجهي
- لاا الشيخ ابواب مضيفه مشرعه دومها
بس يجوز هالمره صار شي ماندري عنه
لا تسيء الظن بالشيخ واهله تراهم ناس طيبين واهل ضيافه وكريمين و يهلون بالرايح والجاي
- مادحكتهم هالشكل جايز لانو زلمتك تمدحيه وتمدحي اهلو
- ههههه لاا عمي يشهد الله ماامدح بي جذب هاي صفاته وصفات اهله
واحد يحجي الحق ، همه ناس خيرين
وحديثه كلها تشهدلهم وان شاء الله يرجع الشيخ ويعوضك عن سوء التفاهم الي صار
- كيف يعوضني ؟
- هو رجل كريم والكريم من ينطي يغني
ان شاء الله ماتطلع منا الا وخاطرك طيب
- وان دحكت منو غير شي ؟
- ولو انها ماتصير بس لو صارت اني اعوضك والباب الي لكيته مسدود بوجهك افتحلك عليه باب رزق ان شاء الله ينفعك
وتاخذ حقك ومطلبك من هالعين
- يسلم عينك يا يابه .. عجل انتظرو لزلمتك وندحك خيرو
- ارتاح عمي واعذرنا على هالتقصير
مو من قصدنا والله
- انتي ماكصرتي يا يابه لاتتعذري
- لا هذوله هم اهل بيتي والي النه وعلينه واحد واني اتعذرلك نيابه عنهم
- معذورين يابه معذورين
- من رخصتك شويه عمي
-مرخوصه يابه
رحت للبيتونه نزلت فراش واخذته فرشتله وجبتله دشداشه من مالات الشيخ
بيضه وانطيتهه اله وكلتله ...
- عمي اذا تريد تسبح تبدل هاي ملابس واخذ راحتك
- ماتكصرين يا يابه ، انا مرتاح بلبسي هذا تسلمي
- على راحتك .. عمي عندك بنات ولد صغار ؟
- اييه عندي احفادي جهال ابني بنات وصبيان بعمر ولدك واكبر بسنتين ثلاث
- الله يخليهم الكم ،، نام عمي اخذ راحتك
واي شي تحتاج بس صيحني
- ماعرفت اسمك يا يابه
- هه اني ام غاليه عمي
ركز بوجهي وابتسم وهز براسه وتمدد
واني سديت الباب ورحت اخذت الجهال للغرفه واحاول وياهم حتى ينامون
السيطره عليهم تلاثتهم صعبه بنفس الوكت .. الزم هذا يكوم هذاك
كمت اسوي نفسي زعلانه منهم وابجي
لان يضلون ميسمعون الكلام ويهوسون
وهمه هيج يرجعون يمي ويضلون يحضنون بيه لو يكعدون عقال وحسين يجر بايدي من وجهي ويصيحلي ماما
كعدت كعدت ..
عاد هيج اكدر اخليهم ينامون واحد بصف الثاني بدون ما يسولهم سالفه ..
نومتهم ورحت الملم غراض لاحفاد الحجي ... لميت قراصات على العاب
وقماصل وشيش ريحه ورحت للمطبخ هم
لميت علاكه من التفاح الاخضر الصغار
وعلاكه ترستها لوبيه وفلفل واخذتهن فتحت الباب بهدوء وخليتهن يم رجله وهو فتح عينه وباوعلي .. كلتله ...
- اعذرني عمي ماردت اكعدك
- خير يا يابه ؟
- ماكو شي عمي هذني شويه غراض للاهل ردت اخليهن هنا خاف يكعدون الجهال ويطشروهن واتعذر مره ثانيه لان كعدتك ماقصدي والله
- لا تكلفي نفسك يا يابه كافي هالخير كلو
الي كدمتيه
-ما سويت شي عمي هذا واجبي
- تعبتك هاليوم
- لاا عمي جيتك بركه علينا اني احب الخطار بيتي يجيب البركه
- الله يحيي اصلك يا يابه
- ارتاح عمي كمل نومتك
طلعت و دااروح للغرفه جان اسمع صوت الشيخ يصيحلي ...
- تيين يولو وينك
رحتله ركض وهو اول ماشافني كالي
- حبيبتي كنتي نايمه ؟
-

لاا ياعمري كاعده .. هسه وصلت
- اييه هاذي جيتي وصلت امي وحدرت هين
دخل وكرص زندي وهو يضحك ويكولي
-اشتكتلك يولو
- ههههه واني اشتاقيتلك حبيبي
- دحكت بالباب شياه كثر ومالهن راعي
عجب ؟
- ياعيني راعيهن ضيفنا هنا نايم بالاستقبال
-هااه
-اي والله كال انه جايبلك امانه ولاكي باب الديوان مقفل وجاي على بيتنه راد مي
- ضيفتيه تين ! تغدا ؟!
- اي ياعيوني تغدا
-زين خلني ادحكو
راح دك الباب ودخل واني وراه ورأساً
ضحك الشيخ ودنك عليه بوسه ويكوله
- ياااهلا والله يااهلا بالخال ياهلاا
خليت ايدي على حلكي واباوعله معقول هذا خاله ؟!
كعد الشيخ بصفه ويباوعلي وكال ..
- يولي هذا خالي الوسطاني هذا خالي دحام
- اهلاً وسهلاً بيك خالي اعذرني ماعرفتك
- معذوره يا يابه عجل من وين تعرفيني
- وشلونك خال وشلون الاهل
- الحمدلله بخير وعافيه
- يااحياك الله والله ياااحياك عليم الله فرحت بجيتك هاذي عجل هاليوم الي انا طالع فيه تحدر علينا ومادري عنك !
- وان كنت هين مااحدر عليك انا
-هااه ليه خااال !
- انا مامتعني لعينك
-هااه عجل لمن متعني ! من تعرف هين غيري
- انا متعني لادحك بنت بغداد الخذت رجاجيح عكلك
ضحكت وباوعت للشيخ وهو باوعلي بنفس النظره ويضحك وكال ...
- اييه خال وكيف دحكتها ؟
- دحكت منها كل خير حرمه كريمه اصل
وعركها طيب ، مضيافه كأنها بنت شيوخ
تستاهل كل الغلا والمعزه
-الحمدلله من انها بيضت وجهي كدامك خال
- الا انها بيضت وعزت ورفعت من شأنها وشأنك واهل بيتك بعد

دنكت خجلانه واسمع طكه السبحه مال الشيخ وضحكته ... رجع الحجي كال ..
- انا من ساعه الي خبرتني انك عاشك لبنت بغداديه وتزوجتها ظنيت ان الي اخذتها بتهجم بيتك وماتتوالم مع عيشتك
واصلك و الصراحه انا ظنيتها اخذتك بالاعيبها
-هههههههههههه خاااال بالله ضحكتني
- اييه بالله انا هالشكل ظنيت عجل وش بلاها تعشك هالوليد وتترك ديره اهلها وتكعد معك هين بطوارف البلد
- اييييه وظنيت انا وكعت بشباكها على عمى عيني
- ظنيت عاد وربك ذاكر بعض الظن اثم
-ههههههههه الحين كيف توكدت ان هالظن آثم
- ياشيخ يامشيخ عجب تسأل سؤال ماهو بالمكام
- هههههههههه السموحه خال لكن من زود فرحتي ودي اخبر كل شي
- ايييه .. انا بهالساعتين ثلاث دحكت وفهمت عنها مايرضيني ويآمن
عكلي عليك وعلى حلالك بعد هالعمر كلو
- هالله هالله وش الي سويتي للخال يولو
وكسبتي محبتو ورضاه
ضحكت وباوعت للخال وهو كال ..
- على الفطره كسبتو
- هههههه كأنها نفس الفطره الي خذت فيها عكلي من زمان
- النفس الطيبه تشع محبه لكل من يناظرها
- اييه والله يازين ما رزقني ربي فيها
ضحكت وباوعت للخال وكلتله ..
-  يعني هسه راضي بينا ماعندك عتاب علينه ؟
- هههه لااه لاااه كلو كان اختبار يا يابه لا تهمي .. انا تعنيت ادحك معدنك وادحك كيف نفسك مع الغريب الفقير ويا زين مادحكت والله يازين .. يستاهل ابو جراح حرمه مضيافه وكريمه نفس مثلك وانا اشهد انك حصلتها سند وربحت فيها
- ايييه بالله انا ربحان فيها من ساعه ماعتبت رجولها ديارنا
خجلت من حجيهم ترخصت وطلعت
وضليت افتر بالمطبخ واهفي على وجهي
هالشعور يخجل ويفرح ..
ضليت احمد ربي واشكره خلاني بالوجه الابيض كدام الشيخ ..
وره شويه اجاني الشيخ ويباوعلي مبتسم
واني بعده الخجل بيه ..
اول ما وكف كدامي باس راسي وحضني
وكال ..
- انا ربي وش كثر يحبني وخلاكِ بدربي
يولي رفعتي راسي هالمره بعد كدام خوالي وفرحتي كلبي والله
- اهم شي عندي فرحتك
- تدرين تين من ساعه ماحكيت لخوالي تزوجت بغداديه واخذتها عن عشك كلها
تخوفت وحكتلي بنت المدينه ماتعشك البدوي ما تحسبو كد مكامها وان رضت بك تلاكي اهلها يعلمون بكثر حلالك ومالك ... اااخ مايدرون انا حرمتي ما مثلها حرمه بكل هالخلايك
- خالد اني احب مواقفك شهامتك شخصيتك احبك لانك بدوي والله هالشي فخر لكلبي ان حبيبي ورجلي انباري بدوي معيشني اميره
- يفداكِ هالبدوي ياكل اهلو انتي ياكيفي
وراحتي والله انك كنز بحياتي كنز
بوسته وهو يضحك ويكولي بعد وارجع ابوسه وبعدين كالي ..
- راح امشي الحين انا وخالي لعند امي
وماتحضري عشى اليوم احدري لبيتنا
نتعشى
- ماشي عيني
طلع ووره شويه رجع وصاحني رحتله و كالي  ..
- تين راح اخليي اغراض هين تكفلي هالباب وماتفتحي بعد
- اي ماشي بس شنو هالغراض
- سلاح وذخيره
- عزاا تخليهن هنا !
- انا ارتبها ياعيني  لا تخافي
ضليت واكفه باب الاستقبال وهو وخاله
يدخلون بالطليان ومن جوه يفتحون الفروه ويطلعون اسلحه وشواجير مليانه طلق
ويشيلون بيهن ويحطون بالاستقبال
وقفله وطلعوهن وراحو ..
طلع الخال شاد فوك كل طلي نفس الفروه مالته ومعبيهه من جوه اسلحه ..
اني ضليت ارجف هالسلاح كُله بيتي طب علينه احد شلون ! لو عرفت بي الحكومه شنسوي !!؟

لليل اخذت الجهال ورحت لبيت الشيخه
كعدنا تعشينه سوه ومن كملنا العشى ودنشرب جاي الخال كال ...
- ابو جراح عندي طلبتين منك
- على هالراس خال آمر واعتبره تلبى
- يسلم راسك  .. ولدي  عبد الرحمن رجال مصيت باصالتو بديرتو لكن بنفسو الشهاده وعل

ى بالو يطلع للشام هنيك يدرس وانا  مارضيتها روحتو
- اييه خال حك والله عجل هالبلد وكبرو مالو مكان يدرس الا بالشام  !
- ايييه تعرف طيش الشباب .. الحين انا طلبتي منك تأمنلو بيت هين بالانبار وفلوسو واصله اعتبرها
- مايلزم الفلوس خال هين ابنالو بديرتنا
- انته تخير المكان الي يناسبك لكن بالاول اسمع طلبتي الثانيه
- آمر  خال
- اخيتك صفيه لولدي الصغير  عبد الرحمن ودي منك حرمه وتأمن البيت وسياكها
٥٠ ناكه وهالشياه كلها ثمنها وبيعها وكم يطلع ثمنها عطها تشتري فيه الي يحلالها
والنوك زياده فوكهم والبيت من فلوسي انا هديه لهالاثنين العزاز
صفن الشيخ شويه وكال ...
- والله ياخال انته وولدك اعزاز وماردلكم طلب لكن انا خياتي ماجبرهن بزواج لو تأذنلي اسألها وان رفضت لا تحگني عليها ياخال .. الزواج بالكيف
- اسألها اييه لكن خلني احكيلك عنو
ولدي هذا عمرو ٢٩ سنه هو ابن حرمتي الرابعه
-اييه خال اعرفو
-اييه وخلها تسمع هالحكي الها .. انا ولدي رجال فارس ومكدام وعينو عين العكاب نيشانها مايخطأ وهو عندو شهاه الثانويه ونفسو يدرس هين بالجامعات
لكن امو تخاف بعدو كانت وماخلتو يمشي
والحين ودو يمشي للشام ودكت هالسالفه براسو وانا ادحك ان الزواج والبيت هين جايز تشيل هالفكره من راسو وتخله يعاود عنها
- يا زين مافكرت خال ،،ان شاء الله انا اردلك جوابها لبكرا
-اييه ردلي جوابها حتى لو حصل النصيب حنا نزوركم عكب هالاسبوع
ونكرا الفاتحه

- ان شاء الله خير ان شاء الله
الشيخه اباوعلها وجهه ورد وتتبسم وكامت راحت لصفيه واخذتها لغرفتهه وسدت الباب .. ومن راح الشيخ وسأل صفيه كلتله بكيفك وكيف امي رجع سألهه ترضين بي اذا احنه رضينا كالت اي
وهيج الخال فرح وكاللهم الاسبوع الجاي
نجي الجمعه نقرا الفاتحه وحسب ماعرفت من الشيخه ان تقاليدهم هناك بالاعراس بس يكطعون مهر سيد ويزفون البنيه بنفس اليوم لرجلها بس
الشيخ كال لخاله ان يسوون عقد سيد وعقد محكمه بين مايلكون بيت ..
وثاني يوم راح الخال وعاف الحلال كُله للشيخ .. وكاله اعتبر انضافت على النوك الي عندك هناك بديرتنا ٥٠ ناكه ..
و السلاح اخذه ضمه فوك بالغرفه وكالي هاي الغرفه اعتبريها من اليوم صارت مخزن للسلاح بعد لا تتقربيلها ..
حجيت ردت منه يطلعهن لغير مكان ما قبل يكولي انتي تعرفين شي واني اعرف شي ..
صارت الشيخه تحضر لجيه اهلها وخطوبه بنتها هالاسبوع وبيوم الجمعه من اجوي كلها سيارات بيكم ورجال طول بعرض .. كلهم لحايه ومحزمين والخناجر بنص الحزام ..
احنه صاعدين فوك سطح بيت الشيخه ونباوعلهم ترسو الديوان بالعكل ..
والنسوان بس اربعه جايات ..
ام الولد و ٣ نسوان عمه الي هنه نسوان خوال الشيخ ..
مناسك جانت حاضره هالمناسبه هي وبنتها ورده وابنها جمال وجانت حامل بشهرها الرابع ..
نشوف صفيه متوتره من نسألها شبيج تكول احس استعجلت كولو لاخوي ماريد بطلت وخلت الشيخه تتخبل وضلت هي تبجي والنسوان صافنات عليها ..
عاد اخذتها مناسك لغرفه الشيخه وضلت يمها واني اجتني غاليه تكولي ابويه يكول راح يجي السيد ..
كلتلها روحي شاوري وكوليله ماما تريدك لازم نحجي ..
ضليت واكفه يم الباب الورانيه وهو اجاني مستعجل وحاط ايده على عكاله ويكولي ..
- هاا يولو خيرك
- صفيه دتبجي وتكول احس استعجلت ماريد وكالبه الدنيا
- لاااه وش جرالها هاذي الحين
الرجال هين واكفه حدر الباب وش احكيلهم الحين بطلنا !! امشي سوي درب خلي ادحكها
رحت ركض لغرفه الشيخه وكلتلها ..
- صفيه الشيخ يريد يحاجيج
اشرتلي اي وصحتله اجاهه وراح حضنهه وكالهه ...
- اخيتي ماظني هيك فيكي عجل ساعه ماحدرو الرجال هين تتراجعي ليه يولي
- رجالهم تخوف ياخوي كلهم مسلحين هذا على ساعه الساعه يذبحني ماريد اتزوجو ماريد
- هههههه يولي لا يخوفك مظهرو هالرجل كلبو ذهب و رجالهم يولي ما يتطالو على حرمه عجل انتي ماتعرفين رباتي كيف ؟! هي نفسها رباتهم !؟
تهدي وسمي باسم الله وامشي معي وخلي ثقتك بخويك يلاا يالعزيزه يلاا
اخذها ووصلها لباب الهول وراح للزلم الي ضلو واكفين بره ..
وعقدلهم السيد من وره الباب وصارت الكل تهلهل بس هي مدلغمه والشيخه تغطي عليها بالحجي ويه النسوان
بعدين اجتني مناسك تكولي الشيخ يريدج يم الدرج ...
طلعت من الهول ورحتله جان يكولي ..
- حضريها واخذيها هين بغرفه امي واطلعي .. الرجل هين بالباب واكف
ودو يدخل يدحكها
- زين عيني وصيه يهديها شويه يحاجيها خطيه خايفه
- يولو وش احكيلو يعني لا تخليني انفجر الحين
- شبيك عيني هسه شحجيت
- ايييه انا بعمى عيني جايبو لهين اتركيني تين اعصابي تلفانه الحين امشي سوي الي وصيتك عليه يلا تعجلي
- صار عيني صار
رحت اخذتهه للغرفه وطلعت وسمعته من دخل يصيح يالله ..
الشيخ عافهم واجه يمنه بالمطبخ ويفتر ويتأفف .. انطيته مي رجعه ماشرب
شلت  قطعه كيك انطيته وهو بعصبيه اخذهه كلهه وحطهه بحلكه ومتخوصر وياكل وعاكد حواجبه من بلعها كال ..
- لو ماانه ولد خالي كان فرغت البرنو براسو الحين وش عندو بطى هي نظرتين يالله
- خالد اتهدا ياعيني
-اييه اي

ييه
عافنه وراح وكف يم الباب ويحمحم وهذاك جوه ولا يمه ..
راح للمغسله فتحها ويغسل ويكح بصوت عالي ويصيح على جراح و يفتر يم الغرفه واحنه نباوع وخربانين ضحك
وهو يفتر ووجهه احمر وتالي وين يلا طلع عبد الرحمن وضل واكف وحاط ايده وره ظهره ويباوع للشيخ والشيخ يباوعله بغضب ..
عاد عبد الرحمن كال ...
- والنعم يابن عمتي من رباك
- اييه ايييه امشي الحين امش

اخذه وطلع بسرعه والرجال مبتسم وهو مخنزر ..
رحنا لصفيه ولكيناهه على كعدتها ولازمه ركبتها وصافنه ..
كعدنا اني ومناسك يمهه ونهز بيهه ونضحك وهي تكول ..
- يولن هذا فارس احلامي يولن كأنه صابني بخنجرو ساعه الي ناظر عيني
وش هالعين يالله عين عكاب والله مثل ماسماهه خالي مرمشه هيك على طولها ثخينه رمشها
ضلينه اني ومناسك بس نضحك وهي تحجي وعلى صفنتها جان مناسك تجر شعرها حيل وخلتها تعيط يلا صحت
وشفنه بركبتها كلاده فضيه وبيهه ٣ شناشيل وبنهايه كل واحد منهن فص احمر .. ضحكت  وكلتلهه ...
- منين اجتي هالكلاده عيني
- حطت بركبتي من يدو لولد خالي هالفارس المصيت لبسها لي بايدو البارده ياويل حالي ياووويلي
ضلينه نضحك وجريناهه كومناهه واخذناهه للهول وحتى وهي كاعده صافنه وتتلمس بكلادتهه وتبتسم
والشيخه رجع الدم بوجهه من شافتهه تضحك ...
ولليل رجعت لبيتي بعد ماخلصنه تنظيف وعشه هناك .. رحت سبحت واخذت حسين نومته وتمددت اريد انام الشيخ اليوم يم ام جراح  جان اسمع الباب مال الكليدور تندك ..
رحت فتحتهه وشفت الشيخ هنا كلتله ..
- هلا حبيبي شعجب جاي بهالوكت
- تعبانه اعصابي وماارتاح الا هين
- اسم الله عليك ياعمري تعال ياعيني
اخذته ورحنه للغرفه وكفت يمه واخذت عكاله والشماغ علكتهن وجبتله بجامه بدل ملابسه واجه تمدد ونام على ايدي
ضليت العب بشعره وهو يكولي ..
- انا مااتحمل احد يدحك اخياتي تين
عند حريمي انا مااتفاهم واليوم بعد ما مشينا تكاونت معو
- يااا ليش تعاركت
- حكالي يأجر بيت هين صغير ويتزوج هالشهر وبعدها يدور بيت كبير على راحتو وينتقل وانا حكيتلو ما مستعجلين على شي رتب امور بيتك وجهزو يلا تاخذ اخيتي وهو حكالي انا ودي العرس هالشهر وهي الحين حرمتي زين مني مخليها عندكم هالشهر المفروض امشي فيها الحين
وانا هين انهديت عليه ضربتو بنص فكو وتالي مشى زعلان
- ياعيني هو هيج مو خطيه خربت فرحته بهاليوم
- يستاهل عجل انا يحكيلي زين منو مخلي اخيتي عندي ! ويشمر علي بحكيو
لانها صارت حرمتو ول انا الي داريتها كل هالسنين يجي هو الحين ياخذها هيك ويتشرط !!! والله لو ما وكفه خالي بعيني كنت كسرت عظامو لكن خالي تدخل والرجال التمت وهديتو
- انته كل اليوم عصبي شو ماجنت هيج بخطوبه مناسك
- لااا كنت هيك لكن زلمتها كان يعرف حدو وكريب لكلبي هذا انا ماهويتو
- بس صفيه فرحانه بي
وخر من حضني وضل يباوعلي وكال
- وش حكتلك عنو ! وش سوى معها !!
- اهدأ عيوني ماسوالها شي بس هي الظاهر نعجبت بشكله وشخصيته
ومبين محاجيهه باسلوب هادىء وحلو
وماخذ عقلها وهداها كلاده فضه يعني
الولد عرف يكسبها ويهديها شجاك عليه ياعمري خطيه هسه لو تدري متعاركين تخرب فرحتهه
-ايييييه ماتحملتو انا بخياتي مااتفاهم
وهذا الي عندي ان ماعجبو يعاود هو وسياكو ما ضلت عليه
تقربت منه وحضنته وضليت اتلمس بشعره واكوله ..
- حلو الرجال من يريد مرته يمه بسرعه هذا يعني متلهف عليها وحبهه وعجبته
والبنيه تحب تشوف لهفه رجلها عليها
هسه انته مو خطبتني اسبوع وتزوجنا
- اييه وشستفدت انا عشت من بعدها سنه تكميل خطوبه
-ههههههههه هاااا هسه بين الصدك
- اييه عجل انا جاذب ! ما عشنا سنه كاننا مخطوبين ! هو هالمصكوع يكدر يتحمل مثل ماانا تحملت !!
- لاااا انته وحد عنهم حبيبي انته ماكو منك ...رجال صبور بس مو عوضتك على هالسنه لو لا
-لاا بعد ماتعوضت زين
- يااا صدك والله
- اييه جبتيلنا هالدب واخذك مني
-ههههههه شسالفتك وياه خالد متحبه ؟
-لاا احبو لكن ماتحملو بصراحه ماتحمل كل من يكربك وهذا احسو شايلني من كلبك ومتربع فيه وحدو
- يمه حبيبي ضايج من ابنه !!
ياعمري انته الكل بالكل انته روحي وحبيبي هذا محبته تختلف عنك محبه طفل وشعور امومه انته دنيتي كلها
بوست وجهه وهو كالي ..
- وحتى شعور الامومه هذا انا ودي يكون لي منو نصيب ..كُلك لي تين كُلك باسمي انا لا ولدك ولا عشره مثلو يحكلهم ياخذو حبك انا وحدي الي املكو
- هو الك حبيبي بس الك كل العمر حبي يبقى بس الك واني كلي الك ياروحي
- دام هيك عوضيني عجل
-هااا
- اييه الحين عوضيني هذيك السنه يلا خليني ادحك شطارتك بالتعويض اليوم
ضحكت وهو تمدد وجرني عليه وبديت بتعويضه حسب مايحب ويرضى
ثاني يوم اجاني على العشه وكالي
دز خبر لخواله انهم يحضرون البيت وياخذون المره وغير هالحجي مايصير
وهو مكفل جماعه يدورن بيت قريب هنا
وبعد شهر لكو بيت مناسب سعره بس يصبغون ويشترون الغراض ..
والولد جاي لحديثه حتى يشتري غراض البيت ويرتبه ويبات بالديوان وماخلاه يعتب باب البيت ويشوف صفيه بس الشيخه راحت سلمت عليه بالحديقه
وصفيه تصعد للسطح ب

الختله دتباوع عليه من بعيد وتنزل بسرعه حتى لا امهه تدري بيهه ...
وتزوجو بشهر السادس وهم رجع بيوم العرس الشيخ متكئب وعصبي ومحد يوصله بس اني اشاقي واتحارش بي
واتغزل بجماله لحد ماضحك وفك الكئابه
بسنه ال ٢٠٠٠ مصطفى صار عنده ولد وبنيه سماهم اسلام ورؤى
و دعاء صار عدها ولد سمته سرمد
جراح  صار عمره ١٤ سنه وغاليه ٩ سنوات والشيخ صار ياخذهم لصلاه الفجر بالجامع كل يوم ..
يجي يكعد غاليه ويكعدني ويخليني اوكف اتوضى اني وياهه والبسهه ملابس الصلاه وياخذهه ويروح على جراح الي لازم يطلع ينتظره بره واذا لكاه متاخر
يرجع مترزل ..
حسين وعباس وصكر عمرهم اربع سنين
وكحين وروحهم بالشارع وجراح مبتلي بيهم يضل واكف يمهم هو وحسن ابن صياح يضلون يمهم لحد مايشبعون لعب ويرجعوهم ..
والتوم حُر و آسر اعمارهم سنه حلوين
بس ناعمين وهم شُكر بس حر عيونه خضر واسر عيونه عسليه ..
حر عنده وحمه بزنده صغيرونه واسر عنده بدالهه شامه ..
بشهر الثالث كاعده اني والجهال بالهول
نتفرج تلفزيون ودخل الشيخ مخبوص
وكالي ..
- تين اخذي الجهال وادخلي الغرفه وكفلي الباب ومااسمع حس لاحد بالعجل يلا
.
يتبع

✨ حديثتي الشقراء ✨
🔹🔹
البارت 5
بشهر الثالث كاعده اني والجهال بالهول
نتفرج تلفزيون ودخل الشيخ مخبوص
وكالي ..
- تين اخذي الجهال وادخلي الغرفه وكفلي الباب ومااسمع حس لاحد بالعجل يلا
من شفته مخبوص ومستعجل ماسألت شي كبل اخذت الجهال ورحت للغرفه وقفلت الباب وضليت وره الباب اتسمع ..
صوت رياجيل يصعدون الدرج وهو صوته بس يصيح يلا يارجال بالعجل
وره ماراحو صاحلي حتى افتح الباب
فتحته وسألته ..
- شكو شنو الصاير خالد خير !!
- هيك شغل يابه لا تخافي
- شغل شنو هذا الي بنص بيتنا هالرياجيل شجانو يسون هنا شعدهم !!!؟
- يولو هالرجال صعدو السلاح مع البقيه هذيك
- عزا العزاني !!! خالد مسوي بيتي مخزن اسلحه !!! كل يوم جايبلي وجبه
- تهدي يابه ماعليهن شي
- شلون ماعليهن شي !!  طبت علينه الشرطه وفتشت البيت شنكول شنحجي
- يولو لا تثبرينا .. انا اخذهن بعد كم يوم
لحين ماادبر المخزن الجديد اخذهن
- وانته وين جنت حاطهن ! وشعندك بهالكد سلاح تجمع
- هذا ماهو لي يولي هذا سلاح عشيره
كلنه مشتركين به ولزوم عندنا سلاح لوكت الشده  نخزنو وانا عندي مخزن مصرح عند الحكومه خازن فيه كل السلاح المرخص ماعليه شي
- يعني عندك بعد سلاح فوك هذا الي هنا مكوم بالغرفه !!!
- اييه هذا جديد موصي عليهم من زمان والحين وصلو بوجبتين غير الي وصلها خالي
- ياربي سترك خالد ياعيني ديربالك لا تجينه مصيبه مامحسبيلها على هالسلاح
- ما تخافي يابه بعون الله حنا بامان
ودحكي هين بره تلاكي اطوال قماش
خذي منهم الي يكفيكِ وارسلي على الجيره هين ياخذو منو ،، هذا كثير ويكفي الكل
- وهاي شنو النوب شجابهن !!؟
- هههههه نهرب فيهن السلاح يووولي
عجل ينزلن من السما
- دخليك ربي الصبر استر علينه خالد الله يخليك
- ماتخافي يولو انا عارف وش اسوي
يلاا انا امشي الحين
-وين تروح
- لديواني عجل وش عندي غيرو
- زين ارجع من وكت فدوه لا تتاخر
- ان شاء الله وانتي لا تكربي الغرفه ولا تخلي جاهل يصلها زين
- اي عيني صار
بوس خدي وطلع ... رحت  اشوف
الطول مال القماش وجان الكاهن عشر
رولات عراض كل وحده لون وبيهن من فوك وجوه على الفتحه خشبه دائريه وحده مكسوره والثانيه لا ..
عرفت جانو داحسين السلاح بنص الكارتونه مال القماش ..
خفت من شغلهم هذا وافكارهم الي ماتخطر على بال احد مره بالطليان مره بالقماش الله يستر الجاي شيسون ..
ضليت هالاسبوع كل شويه وحده داكه الباب وجايه تشوف القماش وتاخذ الي تريده بلاش الهه ولاقاربهه ..واني اقيس واكصلهن ... وضميت قطع لصفيه ومناسك وحمواتهه وهيج خلصناهن
وخلصت من همهن ...
من هذا القماش خيطت اثواب لغاليه وبجايم وهي كل يوميه نازعه واحد لابسه واحد بكيفهه تلبس واطشر ..
لحد شهر السادس هم رجع جاب وجبه اسلحه جديده وهالمره بصناديك المخضر
ترس بيهن الطرمه كلهه وطلعو مصفطين الاسلحه جوه المخضر وضلو ينبشون بيهن ويطلعون ويصعدون وهم
اخذنا كفايتنا من المخضر ودزيت على الجيران يجون ياخذون شكد مايريدون
وكل وحده ترست علاليك ونجاين وشبعنا المنطقه كلهه منهن ...
صح طرقهم ذكيه وغطو على السالفه بس البيت ضل وضعه خطر واني الخوف كاتلني بالاخص بعد ماصعدت وشفت الغرفه مفروشه فرش بالسلاح والشواجير مليانه طلق مصفطه وحده بصف الثانيه
لاظمهه للغرفه لظم بالسلاح ويجي ينام يمي مرتاح ويضحك ولا كأن اكو مصيبه فوك روسنه ساعه الساعه توكع علينه
بهاي الفتره جراح صار يتعلم سياقه وياخذ سياره ابو القديمه ويطلع بيهه بدون ميدري ولليل مانسمع الا صياح خالد عليه لان يسوقهه بدون علمه بنص الظهريه وكل مره يعتذر ويرجع ياخذله يومين ويخمط السويج ويطلع بيهه
وخالد يكوله اخذ هاي الجديده هذيج مستعز بيهه ماامن عليهه بيدك بس هو ماتعجبه الا هذيج وخالد يحبهه حيل وضلو يتعاركون لحد ما راح خالد
فتح التايرات وكعدهه على طوابيك
يلا ارتاح من جراح وطلعاته بيهه
النوب صار يوكف فوك راسه الظهريه اول مايرجع من الشغل يحصره الا ينطي السويج حتى يطلع بهاي السياره وياخذ غاليه ويروح يفر بيهه لراس الشارع ويرجع وهو خالد يحسبله عشر دقايق اذا زادت يحرمه منهه ... وهو يجي مضبوط بالموعد بس حتى يضل يسوق ..
من اسأل جراح منو علمك تسوق يكولي اني تعلمت اباوعلهم واجرب وتعلمت
كل مايكبرون تكبر عركاتهم وقساوه الشيخ عليهم ..
جراح على ابو يحب السباحه واغلب اوقات العصريه او الصبح هو على الشط ويه حسن ورماح وكل مايجيت يسبح رماح يضل يبجي يريد ينزل وياه وهو بعده عمره ٨ سنين ويخلي يطلع من المي
ويضل كاعد يمه حتى يسكت وكل مره هيج يسوي الى ان بزعت روحه وكام مياخذه وياه ومانحس الا جايه ام جراح تدور على رماح وينه مو يمج ؟ هالسؤال صار كل يوميه ينسأل الصبح ومن اكوللهه لا تروح ادز واحد من ولد الجيران يروح للشط ديكول لجراح يرجع ويجيب اخوه وياه ..
وضلينه على هالرنه الى ان الشيخ حرم على جراح الشط ...
وكاله ماتصله الا يصير اخوك بعمرك
ومن يومها جراح متكئب وغاليه هم متكئبه لان جراح متكئب هذا جوابهه من اسالهه شبيج ..
بعد ما حاولنا ويه الش

يخ يخلي يروح مره بالاسبوع يسبح ويه اصدقائه ويطلعهه من نفسه قبل بس شرط عليه مايروح الا وياه
يعني يروحون اثنينهم ويه ابوهم يسبحون
وهيج رجعت نفسيه جراح زينه ..
من طلعت نتائج البكلوريا مال ثالث ونجح جراح بدرجات عاليه  اشتراله الشيخ
بايسكل جبير وملون وبي سلات كيف عليه جراح وصار يركب مره رماح ومره غاليه ويفرهم بالمنطقه واي شي نريد اندزه يروح بالبايسكل ..
وغاليه تريد تتعلم تركب مثله وهو يمشيهه بي بس ميعوفهه لان متسيطر عليه جبير وعالي وضلت تبجي وطنكرت الا اريد مثل جراح بس هو تجيبوله مال نجاح ..
واشترينالهه واحد صغيرون على كدهه
وواحد لرماح وشوكت مايلتمون نسمع واحد منهم يكول .. ها نسوي سباق هسه؟
ويطلعون ركض كلمن يجر بايسكله ويتسابقون ...
ضلو عباس وصكر شغلتهم الختيله
طلعو بهالسالفه الجديده وخبلونه بيهه
نشوفهم تبسبسو وشردو وكل واحد يختل بمكان ونضل ندور وندور عليهم وتطلع روحنه من الفره وراهم وين مانلكاهم ونجيبهم يرجعون يختلون ..
والاماكن مدري منين يلكطوهه
بنص التانكي المزروف لو يم الصوبات بالمخزن لو وره الزوالي ، جوه الكرويته ويغطون  نفسهم بالمخاد ، وهاي بنص الكنتور مال شيخه كل مانضيعهم نلكاهم هناك ..
تالي كامت الشيخه بالنهار اطلعهم بره بالحديقه وتسد البوب مال البيت وتضل مكابلتهم وكاعده حتى مايطبون ويختلون
حياتنا حلوه بيهم وبطلباتهم وتعبنا عليهم
كل واحد من هذوله السبعه اله معزته الخاصه بكلوبنا وغاليه مترأسه القائمه بالمعزه عدنا لانها البنيه الوحيده بينهم
كلهم مدلليهه حتى عباس وصكر يميلون الهه ويحبوهه ودائماً بالليل يحبون يكعدون يمهه من تكتب لو من تلعب بلعباتهه يجون يلعبون وياهه ويلبسون اللعابه وياهه ويمشوهه ويحجون مثلهه
وجراح هسه اذا نريد ننطي فد تسميه بهالعمر فهو لعباتهه الاولى ..
كل شيطنتهه ودلعهه وطلباتهه وهوستهه كلها تطلعهه عليه .. الولد تحرم عليه النومه وحده اذا مااجتي فوك راسه وتكعده حتى تكوله ليش تنام واني مانايمه ؟!
اذا يريد يطلع يلعب طوبه ويه جماعته تنغصهه عليه ليش يروح يلعب وياهم مو وياهه !! وتالي من يرجع خسران ويطلع عصبيته عليهه تضل تبجي وتصعد لغرفتهه وتسد الباب وتعاند متحجي وياه
وهو يجيب ويراضي بيهه ويتعذرلهه
بس هي تضل اطلع روحه يلا تتصالح وياه وتخلي الشغله السواهه بدونهه يرجع يسويهه وياهه ..
شكد مااحجي واعلم بيهه مايفيد تكولي
ماما اني احبه جراح ماتعبه بس اني احبه
واكوللهه .. اذا هيج المحبه عندج شسويلج بعد ضلي بخبالج وياه ..

اذا تجوع العصريه ماتجي تكولي جوعانه
لا تروح عليه تاخذه لنص البستان حتى يكطعلهه برتقال لو رمان لو عرموط وتاكل وترجع تكولي اكلت من الشجره واجيت ..
وصارت بعمر عشر سنين ومن البسهه فد ترجيه ذهب لو حجل اجيبلهه هي تحب الحجول واني اكضي السنه كلهه اجمعلهه
حتى اشتريلهه حجل من البسهه تضل كاعده تنتظر جراح يجي حتى تمد رجلهه على بطنه وتكوله .. حلو ؟ يكوللهه اي حلو ..ترجع تصعد رجلهه على جتفه وتفر بيهه وتكوله ..تسمعه هسه حلو ؟
وهو يعض رجلهه ويكوللهه ..
وحك شيباتي التاليهن يطلعن من وراج حلووو
هيج تكيف وترتاح نفسيتهه من تعرف الشغله التلبسهه حلوه وعجبت جراح
الحياه ماشيه طبيعي وامان لحد نهايه
٢٠٠٢ بدا خالد يختفي وكعداته قليله ويانه
يطلع من الفجر ومايكول وين رايح ومايرجع للعشره بالليل ودائماً اعصابه متوتره وساكت مايحجي شي
وبعد مالحيت عليه كعد حجالي ان بلدنا
راح يدخل بمعارك ويه امريكا وضل يحجيلي شلون جان يطلع لبغداد ويكعد
بمجالس شيوخ ويتناقلون اخبار البلد
ويحضرون للدفاع اذا صار الهجوم
ومن بعدها بدات الاخبار تكثر ودخلنا ٢٠٠٣ وبدا المعارك والقصف على المطار وعلى البنى التحتيه بغداد
واني لازمه كلبي وكل شويه اخابر مصطفى ويطمني الوضع زين يمهم
لحد ما صارت معركه الي بالاعظميه
وصارت المجزره هناك يلا طلعو اهلي من بغداد وراحو لبيت خوالي على اطراف بغداد ..
وراها صار ضرب الصواريخ على تكريت وانثبرت الامه .. وسقوط تمثال صدام حسين بساحه الفردوس بغداد
علن عن سقوط النظام وصارت البوك والنهب بالوزارات والدوائر والمدارس
والهضيمه من نسمع ان الي يبوك هو ابن البلد هو عراقي يفرهد بلده ..
خالد جان يكول ..
هذا كله من الجوع الي ضلت بي العالم
مو غريب الي يصير هذا ناتج الحرمان
مصطفى من عرف هيج الوضع صاير رجع للبيت يخاف لا هم يبوكوه وضل وحده هناك ومن بعدها انكطعت اخباره
وضليت بقلق عليه وابجي خايفه على اخويه لان القصف كل يوم بمكان والتلفونات انكطعت مااحصله ابد
من شافني هيج خالد راح دز اثنين من جماعته حتى يجيبون مصطفى هنا يمنه
ويوم ثاني يوم المغربيه اجاني خالد وكالي
- تين اهلك وصلو بسلامه هين
- الحمد والشكر الك ربي وينه مصطفى
- مصطفى واهلك كلهم هين عندي بالديوان ،، الي عرفتو ان امك معاوده
لبغداد كبل كم يوم وضاله معو والحين
هي هين معو
- شجابهه مابقت يم اهلهه
- ماعرف والله الحين ارسلهم لك
- خالد يعني اضيفهه بيتي !!! هاي الي عمري عشته بالعذاب بسببهه اكعدهه

وياي !
- ول تين هاذي امك وش هالحكي
- مو امي هي متبريه مني واني كاطعه الصله وياهه شجابهه هسه
- يولو عيب هالفعل الحين وكت شده كلنا نكف يد وحده ما هو وكت احقاد
-مااريد اشوفها لا تجيبها يمي اني بيتي يتعذرها هالمره اني جارعه المر من وراهه
- يولي الحرمه مريضه وكبيره وين اخليها الحين !
- شبيها مريضه النوب
- من كثر الخوف من القصف صار عندها سكر وحالها يكسر الخاطر ما هيك ظني بام كلب الكبير والمضيافه الكريمه الاصل تطرد امها الحين وهي حرمه كبيره !! وان كانت ظالمتك عندك رب الي يحاسبها انتي عليكي بر الوالدين يا يابه لا تظلمي نفسك وتظلميها هالشكل
خجلت بهاللحظه من تصرفي ودنكت
وهو جر راسي لصدره وطبطب على ظهري  .. كلتله ..
- اني اسفه تصرفي مال جهال اعتذر
دزهم كلهم هنا ومااقصر ويه احد منهم ان شاء الله
- ماتكصري انتي ياعيني ولا يهمك الي صار انتي هالايام انفعاليه زياده هههه
- من وره هالحبوب مخليتني اعصاب ولا تعرف طبعي هادئه
- ههههه عجل يابه دوريلك حل غيرها لا تطلعين اعصابك علينا مالنا حيل يابه
- عوف اعصابي هسه جيبهم يلا حباب
طلع واني ضليت واكفه وره الباب انتظر جيتهم .. واول مااسمعت صوتهم فتحت الباب ودخل مصطفى رأساً حضنته الله وحده يعلم شكد جنت خايفه عليه
وعلي شايل الغراض وياه وامي مجلبه بردانه وتمشي ...
بوست علي وباوعتلهه ..سلمت عليهه عادي ومشيت كدامهم ..
ضليت استفسر منهم شصار وياهم هناك ومياده والجهال وينهم .. كالي بقاهم يم اهلهه وهمه راحو لخوالنه يعني منطقه اهل محمد من وصلو لهالموضوع رأساً
ترخصت منهم ورحت اسويلهم عشه
فرشتلهم بالاستقبال هالليله وحجيت ويه الشيخ بالليل علمود يطلع هالاسلحه منا
خاف ساعه الساعه يداهمونا وتصيرلنا بلوه وهو ماقبل وكالي ..
مايعتب حديثه محتل وهالراس يشم الهوا
ومشت الايام واحنه نراقب الاخبار وايدنا على كلوبنا لحد ما بيوم قبل صلاه الظهر
دخل الشيخ للبيت مثل الاعصار ماحسيت بي شوكت اجه وشوكت صعد
رأساً صاح من فوك على مصطفى وعلي وركضوله وصارو ينزلون وياه بالاسلحه
ودخل جراح يركض ويصيح ...
- ياابه عمي مشى بسيارتو كبلك وقلي اوصيك على كل الذخيره لاتخلي شي
-فهمت يابه فهمت احدر عاونا يلاا بالعجل
صعد جراح يمهم وصار ينزل وياهم بالاسلحه واخذو بطانيات لفوهن بيهن
وشالوهن للسياره .. اريد اخلي يوكف احاجي افهم منه شي ماينطي مجال بس يصيح حتى يستعجلون بشيله السلاح
من اخذهن كلهن للسياره رجع عليه ولزم راسي بقوه وكالي ...
- رايح احامي عن ديرتي ياتينه وانتي حامي عايلتي
- دخيل الله خالد لا تروح لا تفجع كلبي بيك دخيلك
- يولو ترضين لي العار ! ترضين اهلنا يكشف عليهم اجنبي !
-لااا لااا
- عجل لا تحاولي تمنعيني انا اوكل رجال هالديره ماشين لمعبر رفح نحامي عن حديثتنا ومااعاود الا ناصر او شهيد
ضليت ابجي واني لازمه ايده وعاصرتهه
وهو ركز بعيني شويه وبعدين جر راسي باسني وكالي ..
- اهلي ومالي امانه بركبتك تين
- امانه عليك خالد ارجعلي سالم حبيبي
-بعون الله ادعيلنا انا اتفائل بدعائك لا توكفي عن الدعاء ولا تضعفي كوي كلبك
وبالك على اهلي ياتين مااوصيكي بعد
- بعيني اخليهم لا توصي .. روح وانته مطمن وديربالك على نفسك ياروحي
لاتنسى اني انتظرك مااسامحك اذا ماترجعلي وتطمن كلبي عليك
حضني بسرعه وخر وكالي ان شاء الله وطلع ...
مسحت دموعي ورفعت ايدي قريت ايه الكرسي وحصنته بيهه ودعيت ربي ينصرهم ويخلصنا من هالمحتل ..
جنت اطلع كل شويه للطرمه وبس اسمع صوت هوسه الرياجيل واحد يستعجل الثاني حتى يطلع يواجه ويه البقيه
ادخل للبيت بس انتخي وادعي والشغله بايدي اشيلها منا وارجعها منا ومادري شسوي ..
امي بس تباوعلي وساكته وغاليه كل شويه تسالني شنو الي ديصير واكوللهه حرب صارت بلدنا ادعيلهم ينتصرون

للعصر رجعو اخواني وركضت عليهم اسألهم شصار وكالولي الوضع خطر هناك جبهه ومفتوحه وهواي انكتلو
من الامريكان بس اجاهم هسه دعم ثاني بالدبابات والولد هناك ماارضو نبقى
خافو لايصير عليهم شي هناك وتبقى البيوت والنسوان وحدهه كالو احمولنه
اهلنه مايصير تضل البيوت بلا محرم
ضل جسمي يرجف رجف من سمعت جاييهم بالدبابات كلت مايضلون هالليله
اخذنا غراضنا ورحنه لبيت الشيخه لكيتهه لازمه القران وتقرا وام جراح
مكابله الشباك وتدعي ..
كعدنا ويمنه الجهال وضلينه ملتمين كلنه سوه بس اخوتي بره يفترون بالمنطقه يشوفون الوضع ويتناقلون الاخبار
وضل هالحال اربع ايام ضبط لا نعرف منو الي انكتل منو الي عاش واي ضربه او صوت كلنه طبولنه الامريكان وكمزنا من مكانه ..
ذهبنا والفلوس كلهن لميناهن وخليناهن
بجيس قماش ولبسناه بركبتنه ..
والعبايات يمنه محضريهه والحجابات
خاف ساعه الساعه يطبولنه نلبسهن ..
لليوم الخامس وره صلاه الفجر سمعنه باب الهول تندك وراح مصطفى ركض يباوع من الشباك منو وراساً فتحهه
ودخل الشيخ شامر شماغه على جتفه
ودشداشته كلها ماطخه دم وتراب
ركضت عليه ووراي الشيخه وحضناه
وهو ساكت ..
دخل كعد بينه والشيخه تسأل بي شلون الوضع شصار ببقي

ه الولد جان يكول
- ديرتنا ضلت حره بدمهم .. هاذي جيتي من دفنه خمس عزاز من رجال ديرتي
وهذا دمهم وترابهم بثيابي
كدام نبره الحزن الي يحجي بيهه كلنا سكتنه وهو كمل حجيه ...
- عدد كبير منهم كدرنا على كتلو ومنهم نص انسحبو وضل الحين كم سياره على بعد واكفه والله العالم بعد هالصباح وش تنزللهم اوامر
مصطفى كال ..
- ان شاء الله ينسحبون كلهم هالمره
- ان شاء الله .. تين
- ياعيني كول
- حضريلي الحمام يابه
-صار عيني
رحت ركض لغرفه ام جراح دكيت بابهه
وهي اجتني مفزوعه وقبل متحجي شي كلتلهه ..
- خيه رجع الشيخ جوه
- يبشرك الله بخير مابه شي
- اي الحمدلله بخير وعافيه بس اريدله ملابس يريد يسبح
- اييه احدري اخذي انا نازله اسلم عليه
نزلت هي واني اخذت الملابس ونزلت حطيتهن بالحمام ورجعت صحتله
وهو كام وتمشى بناحيتي واشرلي امشي كدامه ..
رحت ووكفت يم باب الحمام وكلتله ..
- حبيبي تريد ادخل وياك
- ايييييه ياريت والله
ابتسمت ودخلت وراه واول مانزع دشداشته حضني وهمسلي ..
- انتي حدر عيني ساعه الي اكنصلي واحد منهم
- ياروحي مااسوى شي بدونك كلبي نار عليك ومارتاحيت ولا دقيقه بهالايام كل فكري يمك
- هذا انا حدرك سالم معافى وعاودت لاطمن كلبك
بوست وجهه وابتسمت واخذته للدوش
ضل هو واكف ومغمض واني اغسل جسمه وشعره الي جان كله تراب
نشفتله وصار هو يلبس ،.
من كمل لبس حضنته حيل وكلتله ..
- مشتاقه انومك على ايدي
- عجل تفرغي لي الحين لاني مو نايم غير ساعتين كل يوم ومشتاك لراحتي حدرك
- يابعد عمري ادلل
بوست شفته وطلعنه .. رحت للمطبخ لكيت ام جراح تحضر الريوك وشكلهه
ضايجه تجنبتهه بهاللحظه لاني افهم الي هي بي وحاسه باحساسهه ..
تريكنا كلنه سوه وبعدين هو كال اريد انام
وراح لغرفه الشيخه ضليت اني حايره شلون اروحله واخاف ام جراح هناك
وصدك رحت يم الدرج واشوفهه يمه بالغرفه راساً رجعت للهول وكلت همزين
مارحت ..
اني دائماً اتجنب موقف يخلي بينه غيره
او يبين الشيخ مفضل وحده على الثانيه
حتى تضل عشرتنه طيبه وبدون مشاكل
من طلعت وره شويه هو ضل يصيح تين
عاد رحتله .. سديت الباب وباوعتله وضحكت وهو كالي ..
-عرفتك يولو منتظرتلك فرصه حتى تحدري
-ايييي يعمري زين من صحتني
- ول مشتاكلك احدري هيين احدري
فتحلي ايده ورحت تمددت وحضنته وهو يبوس بركبتي ويشمشم وبعدين حط وجهه على وجهي وضل مغمض ويتنفس بهدوء
جان يكولي ....
- هين عندنا ٧ارامل تين احدري بكرا انتي وامي وخذو بخاطرهم واحكيلهم
هنه واولادهن تحت وصايتي لا يهمن للعيشه دام الله كاتبلي عمر اضل حامل همهم بهالركبه واكبر ولادهم على يدي
- الله يطول بعمرك ويحفظك النه يارووحي انته .. ان شاء الله باجر اروحلهم واقوم بواجبهن
- دحكي بيت كل وحده منهن وش لازمو
واصرفي من الي تحت يدك لاجل تأمينو
ولو عوزتي خذي من الي جامعهن عندك
لا تنكصي عليهم شي تين هذول ايتام
والد كل منهم انا الي سلمتو السلاح بيدي وانا الي عينت مركزو على الساتر كانو رجال نشامى ما هابو الموت اكتلو بالخمسين جندي امريكي وحمو ظهورنا
و عيالهم بذمتي يضلون هذا حك طاعتهم لي ووكفتهم لديرتنا
- الله يرحمهم ويصبر اهلهم ويرحم هالامه ويخلصنا من هالشده والله خلصت كلوبنا من الخوف والقلق بجيتهم

- الله كريم
- نام هسه ارتاح لاتفكر بشي حبيبي
نزل راسه لصدري وضل مغمض واني العب بشعره وامشي ايدي على ظهره
لحد ماحسيته غفى .. خليت ايدي على جتفه وغمضت وهم اخذتني النومه وياه
لحد ما حسيت على صوت حسين يمي
كعدني يريد اكل ..
باوعتله بعده نايم ، سحبت نفسي بهدوء
وخليت راسه ع المخده وهو جر الغطى
على راسه وكمل نومته ..
ضل هاليوم نايم للظهر كعدناه على الغده
وهو اخذ الولد سبعتهم بوسهم وبعدين من كعد على السفره طلب بس غاليه تكعد بصفه .. وقبل ما ياكل وكلهه ويكول للولد
- دحكو يابه اخيتكم اميره البيت الي يزعلها يزعلني والي يرضيها يرضيني
وهالحكي عايش انا ولا ميت يمشي وما يجرى غيرو
غاليه نفخت ريشاتها عليهم بهالحجي وصارت تباوعلهم واحد واحد وتعوج بحلكها وتعدل بشعرها ومن كملنا اكل وهي راحت غسلت واجتي كعدت بصفه وتكوله ..
- يابه انته حبيبي حبيبيي
وتبوس بي وهو مكيف عليهه يضحكلهه وهي تعدل بياخته وتشاوره وهو يخرب ضحك .. وضلت هيج تحرك بكلوب اخوتهه لحد ما شبعت وكامت حولت على جراح وتكوله ...
- جناح اذا انا امينه انتو شو
- يولو احنه هم امراء عجل وحدك اميره
- لاااا ابوي خصصني انا وحدي امينه ماحكى جناح امين
- اييه انا وحدي اخصص روحي امير ماخصك انتي زين
- اممم صح صح انته هم امين لان انا امينه لزوم انته امين عجل وحدي اصين
- هم خلف الله حصلت كلمتين زينه منك
- جنااااااح
- هاا يولو ودك شي لو نعويصه
- هههه نعويصه
ضلت تضحك وتجر بخشمه وهو يدفع بيهه واني منتبهه عليهم وعايفه البقيه
لحد ماسمعت الشيخ كال ...
- يلاا انا الحين اترخص لزوم اعاود وادحك وش الحال عندهم
وكف وكلنه وكفنا وياه ودعوه الجهال بالاول وهو يوصي بيهم يضلون عقال ويديرون بالهم على اختهم ومن ديلبس شحاطته كلتله ..
-

شييخ الله يخليك لا تنسى
- بعون الله
ابتسملي وطلع ولاكوه بره اخوتي راحو وياه ورجعنا للقلق مره ثانيه ..
امي احسها صدك تغيرت بعد هالاوضاع
صارت منعزله مالها دخل بيه ولا بجهالي كأنها ماتشوفنا بس تسولف ويه الشيخه وكعدتها كلها وياهه وحتى من تنام هم بغرفتها وجراح ينام يم اخوتي ورماح بالهول واني وغاليه وحسين وصكر وعباس بالاستقبال وام جراح فوك هي والتوم حر واسر ..
ايام ثانيه مرت والشيخ بعيد عنا
يروحله مصطفى كل ليله يشوف شنو الاخبار وياخذلهم اكل وملابس ويرجع
رحنا اني والشيخه لبيوت الشهداء واخذنا
مسواك لكل عائله وكل وحده من هذني النسوان كعدت حجيت وياهه ووصلتهه حجي الشيخ وكلتلهن باب بيتنه مفتوح
بكل صغيره وجبيره تمر بحياتكم
تلكونه واكفين وياكم ...
كل الكلام لو مهما جان مؤثر وتعويض جبير مايسد الفراغ الي دخل بحياتهم
الي كدرنا عليه بس نسد احتياجاتهم
خلال شهر ونص كدرو رجال حديثه يصدون الامريكان عن مدينتهم وانسحبو كلهم وعلى كد كلمتهم ماخلو اجنبي يعتب حديثه ..
من يومها صار الشيخ يقسم رجاله بمناوبات على اطراف حديثه حتى يحرسوهه ويه رجال الشيوخ البقيه
رجعت الحياه طبيعيه .. الجهال بمدارسهم
واحنه كلمن عينهه على بيتهه ورجلهه
ونتابع الاخبار بالتلفزيون ونسمع الي يصير من كوارث بغداد ..
اهلي رجعو لبيتهم رغم الشيخ راد منهم يبقون يمنه ويبيعلهم هذاك البيت ويعيشون هنا بامان بس مصطفى ماقبل
كال بدون بغداد احنه مانكدر حديثه حديثتكم وبغداد بغدادنا ..
على هالكلام هذا يلا عفناهم يرجعون
وماكدرنا نعرف اخبارهم لان ماكو خط اتصال بينه كلهه مكطوعه ..
وبنهايه شهر الواحد ٢٠٠٤ بالليل وكت مارجع الشيخ جان جايب علاكه وياه
متعوده عليه يجيب حلويات وشغلات ويوزعهم رأساً للجهال بس هالمره لا
ضل مخليهه يمه ومن تعشينه وكعدنا نشرب جاي كالي ....
- تينه دحكي هاليوم وش جبتلك
- شنو ياعيوني
طلع من العلاكه كارتونتين وفتح وحده منهن وشال جهاز صغيروني اسود وكالي ..
- دحكي هذا تلفون نقال
- هااه صدك يعني مثل الثريا
- اييه لكن هذا احسن منو وبكل مكان تكدري تستخدميه وتتصلي على اهلك
منو براحتك
- اييي والله همزين جبته مشكور يابعد عمري
- تدللي ياعيني انتي .. دحكي هين اعلمك كيف يتشغل ..احفظي هين الخضره تفتحي الاتصال والحمره تسدينه
-اي زين سهله
- اكضبي خلي افتح هالسيمكارت
- شنو هذا
-هيك شريحه اسمها عراقنا هاذي حتى يشتغل النقال ونتصل فيه
- هاا زين
- دحكي انا اختاريت ارقامنا متشابهه اخر رقمين مختلف بس
-هههه حلو عود اكتبلياه بورقه حتى احفظه لرقمك
-لاااه ما يلزم يولو هين احفظه لك بهالنقال وايمتى ما ودك طلعيه واتصلي علي
- هاااا والله عمي زين لعد وين جانن هذني قبل ماجبلتنه واحد منه
- يولو هالحين يلا دخلن لبلادنا
- ياا هم جنه محرومين منهن
- ايييه عجل شو
حط سيمكارت بتلفون الاول وفتح الثاني هم حط بي وجان يكولي ..
- دحكي هين انا اسجللك رقمي لكن وش ودك تكتبي عليه
- ههه اكتبلي الشيخ ابو جراح
-هههههه يولو مايكفي وش هالطول
- لاا عمري اشاقه اكتبلي حبيبي
- ايييه هيك عدل الحين اكتبو
ضل يدوس بالدكم ويكتب وبعدين من كتب رقمي بتلفونه ضل صافن

كلتله
- شنو راح تكتب
- مادري والله
-اكتب حبيبتي اكتب يلا
-هههه لاااا يولوو
-هاا شنو تستحي تكتب حبيبتي !
- لااا بالله ما هيك الكصد لكن هيك ودي اكتب شي كل ماادحكو باتصالك افرح هيك شي مميز خليني افكر فيه بعدين
- اييي يلا على راحتك عمرري عمرري
- هاا يولو بدينا بالحرشه
- لاا عيني كاعده وساكته شمسويه
- لا لاا تحرشي تحرشي هالليله انا استاهل دلال شاريلك هالنقال  ب ٦٠ دولار وكارتو ب عشر دولارات فوك هالشريحه ب ٦٥ دولار
- حيييل شدعوه هالكد سعره
- عجل اول نزلتو ليه مايغلى
- لا عيني على هالصرف تستاهل الدلال والله
-ايييه داريني هالليله زين طلعي هالدب نوميه عند اختو
- هههه يبوو ياخالد حاط كورتك من كورته هالولد
-عجل هالحين اخيتو شحلاتهه بغرفتها نايمه وساكته الا هالدب فوك راسي يكمز الليل كلو هو انا مامحصلك غير بالليل ويشاركني فيه
- ههههه عيني اصعده لاخته خاف لا ساعه النوب تلزمه تكتله
- تخافي على ابنك مو علي انا
- عمري عليك عليك غير اريد راحتك
-ايييييه باين عددل
- هسه ماعلمتني شلون اخابر
- دحكي من هين ومن بكرا احاول ادبرلك رقم اخوتك
-اييي والله ياعمري لاتنسى فدوه رحتلك
- مانسى ان شاء الله .. هاا نسيت شغله
ماحكيتها لك
-شنو عيني
- هذا النقال يسموه موبااايل اييه الحين تذكرتو لاسمو
- شنو يعني هذا نوعه لو شنو
- مادري هيك سماه ابو المحل حكالي هذا موبايل بدل مانحكي تلفون نقال
- موبايل مو
-اييه وحكالي تكدر تكتب رساله وتبعثها
لكن ماعلمني كيف ارسلها ..يلا انكلب به ونتعلم من حالنا
- ايي نضل ندوس وهي تصفى
- امشي يلا نومي ابنك ماتطيرين الليل علي يولو يلا
- هههه صاار عيني ادلل
رحت اخذت حسين وصعدت لغرفه غاليه
وهي تضوج متقبل احد ينام يمهه وبالكوه قنعتهه ونومته ونزلت للحمام غسلت واني مخل

يه عطر للاحتياط هنا تعطرت منه ورحتله ..
كالعاده يحب يخليني نايمه على ايده وشعري مفتوح على جهه يشيله يخليه
على طول جسمي ويضل يتبسم بوجهي
ويتلمس شعري من راسي لحد نهايته ووياهه يتلمس جسمي بنفس الهداوه هاي
لحد مااني ابادر وابوس شفته يلا يعوفه
ويندمج وياي ...
بوجود هالتلفون صرت اخابره واتطمن عليه كل ساعتين وهو هم من يروح يم
ام جراح قبل ماينام يخابرني شويه ويروح ومن يكعد الصبح للصلاه هم يخابر ويكولي كعدي غاليه حتى اجي اخذهه للجامع ...
وكل هاي اسأله شنو كاتب على اسمي يكولي مكاتب شي بعدني مالاكي الكلمه
الي اريدهه ..
عرفته مشتري واحد لام جراح هم والشيخه هم اشترالها وجابلي رقم اخوتي
صرت اخابرهم واعرف اخبارهم
وضلينه هالشهر فرحانين بهالتلفون لحد
ما هالتوم عباس وصكر اشتغلت خباثتهم
عليهن ..
تلفوني وتلفون ام جراح اثنينهن ماخذيهن غاسليهن بالطشت بالحمام وشايليهن بالخاولي وطالعين على الشمس ينشفون بيهن ولاكطتهم غاليه ..
اني من اخذت تلفوني ضليت صافنه هاي شسويله هسه !! وام جراح تصيح عليهم
وهمه ركضو ويضحكون وراحو للحديقه
شوفناهن للشيخ بالليل ضل يضحك وكال
كل وحده تنطي تلفونها لواحد منهم واجيبلكم غيرهن ...
وره كم يوم اشترالنا غيرهن بس هالمره مالتي رصاصي وابيض ومال ام جراح
اسود ...
دائماً اشوف الشيخ يلزم تلفونه واستكان الجاي ويضل صافن عليه من اسأله يكولي داافكر بشغله ..
ومن وحده بيوم كاعدين وكالي اتصلي عليه .. اتصلت عليه وهو قرب التلفون مني وباوعت الاسم مكتوب ...
' وطني '
رأساً سديت الاتصال وضحكت كلتله ...
- شعجب مو تينه ؟
- التينه جايز اأجل اتصالها لكن الوطن لزوم يتلبى بنفس الوكت .. انا كان ودي ساعه الي ادحك اتصالك اتبسم واسمو هيك ينبض بكلبي وكان ودي هيك شي مميز تالي لكيت الوطن هو الاعز على كلبي وانتي وطني وسجلتك هين وطني
حتى دايم افرح ساعه يطلبني الوطن والبيه
- يابعد عمري انته راح اضل لعد كل شويه اخابرك حتى تلبي وطنك ههه
- ايييه اهجمي بيتي خلصي الرصيد وابتلي ياخالد عبيلها
ضحكت بعلو صوتي وميلت راسي على جتفه وضلينه نتشاقه بس زادت فرحتي اكثر من قريت الاسم هذا .. صار كأنه
اثبات الي ان الحب بكلبه باقي نفسه ماغيرته السنين ..
من شهر الخامس ب ٢٠٠٤ بدا خالد يدور على كاع يبنيهه محل حلويات جبير
وكدر يحصل بيت قديم بمكان زين وعلى الشارع صاير فلش البيت للكاع وبناه محل جبير بمساحه ١٨٠م سلمه لمهندس
رتبه اله بقسم للمطبخ وقسم للعرض ومكان للكعده كراسي وميز وتلفزيون ورتبهن بشكل حلو ..
و هو بقاه مقفل وماقبل يشغل احد بي الا من اهل النجف .. حلف يمين محد يسوي حلويات بهالمحل غير نجفي ...
وكدر بعد فتره يحصل اثنين اخوان من النجف شغلتهم الدهينه والبقلاوه وهالسوالف واجوي هنا يشتغلون وعلى ايدهم يلا سوى افتتاح للمحل وضل مخلي جراح هناك يكعد ويه العمال العصريه
وجراح كل ما يرجع جايب علاكتين من هالحلويات النه ..
الحمدلله هالمحل صار شغله زين وحصل ارباح منه و صار بسنه ٢٠٠٥ يتساوم ويه صاحب بيت قريب على هذا المحل
وكدر يقنعه واشتراه منه وهم فلشه وبناه هالمره فرن صمون وشغل بي ولد ابو حسن اثنين ووياهم ولد جبير بالعشرينات
و لحد شهر السادس صار وكت سفره للشام ومن رجع اشترك بسلفه ويه واحد من معارفه بالمنطقه واستلمها ثاني اسم
وضمهه يمي وهم وره فتره استلم اسم ثاني من غير سلفه وجمعهن وراح اشترى بيهن محلين من السوك قديمات
فتحهن وسواهن محل واحد جبير وهم رممه وسواه اسواق وشغل بي اثنين من ولد العوائل الي متكفلهم واثنين هم دزهم للفرن ...
ولسنه ٢٠٠٦ اشترى المحلات الي فوك الاسواق وسوه درج من نص الاسواق لفوك المحلات و قسم الفوك صار مكتبه
استنساخ وقرطاسيه وهالاشياء وهم شغل بي ولد عوائل الشهداء ..
لسنه ٢٠٠٧ اشترى بغداد كاع بمساحه
٤٠٠م وسحب عليهه قرض من البنك
وبناهه معرض اثاث وضل حاير منو يشغل بيهه ...
راد جراح يروح هناك بس خاف عليه من الطائفيه الي صايره هناك والاوضاع خطره واخر شي صفت لعلي اخويه واثنين من اصدقاء مصطفى موثوقين
شغلهم هناك والعمال البقيه همه اجوي يدورون شغل ولد صغار بعدهم بال ١٥،١٦ سنه خلاهم بس للتنظيف ...
جراح بهالسنه عمره ٢١ بالمرحله الثانيه
بكليه هندسه السدود والموارد المائيه
بجامعه الانبار ...
غاليه ١٦ سنه وهالسنه راحت للرابع الادبي لانها متحب تدرس والف مره رادت تبطل من المدرسه وتضل نايمه ومرتاحه بالبيت واحنه نجبرها على الدوام
تغيرت هواي من متوسطه صارت كلش كسلانه وماتدرس ولا تشتغل بالبيت اي شي .. واذا احد يصخرهه تكوله ..
اني اميره مااشتغل انتو تشتغلولي
هواي مغروره بنفسها والاحظها تستصغر الناس بعينها والشيخ واخوتهه مدلليهه دلال مخليهه تتمشيخ علينه
والكل تصيحلهه تم وامر وطاعه اميرتنا
عدا حسين الوحيد الي يتناكر وياهه على الصغيره والجبيره ويخليها تصيح وتتزعل ويجي جراح يراضيهه نيابه عن حسين الي زعلها ..
ومن سوينالهه العمليه لخشمهه ضلت الشهر كله هي تد