ان حظي كدقيق فوك شوك نثروه
ثم قالو لحف يوم ريح اجمعوه
صعب الامر عليهم فقالو اتركوه
ان من اشقاه ربي كيف انتم تسعدوه
فراشات تخشى الاحتراق
الجزء السابع

اشر لامه بايده تنتظر..هي ضحكت وانطته
الكلينس اللازمته بيدها..
عزاا شبيك يوم هالكد خجلان امسح امسح..
مسح وجهه وضحك..
شبيج مستعجلة ماما انطي صبر..
غير انت ماما اختفيت من مستحاك هذا عود
مرتك لابسة ردان ومستورة
لو تشوفها مشلتحة شسوي...
هو جر العلبة من ايدها وسكت حتى ماجاوبها
اندار عليه وبلش يلبسني
ويباوعلي بعيون فرحانة عبالك اول مرة يشوفني
ولو فعلا اول مرة نكون هالقرب..
هو يلبس بيه ومايعرف واخته الصغيرة اسمها
غدير هي تساعده
وهو يكلها غدورة انت كملي وهي تكله ولك
خزيتنا ايادو كمل..
عاد لحد ماخلص انشلع كلبي انوب الذهب جنه
شيلمان ثكييل
احس ركبتي راح تدندل
واجت فقرة الكيك وكوة ضبطها من خجله
وماطول بس كصينا كم صورة طلع ..
وبدت الحفلة والبنات يركصون بس اقاربه
حبابين وماعدهم التكبر الي
شفناه بامه سابقاً
بس هسه امه اسلوبها وتعاملها حلوو ومختلف
ولا جنها نفسها الشفناها اول مرة..
ورا ساعة راحو والاقارب هم وصديقاتي
بدو يطلعون لان وكت اذان
من طلعو كلهم دخل ابوي واجاني بوجه ضاحك
مبروك ياتاج ابوج انت
حضني وباسني براسي حيل
وانة ابوس بايده ومايخليني..وكعد وكعدني يمه
وامي واخواتي واخواني كلنا ملتمين..
الولد يباوكولي ويسولفون وياي والبنات يمدحن
باهلهم
ابوي كل لريان روح جيب عشا زين خل يتعشن
البنات قبل لا يرحن..
لان اخواتي ماقبلو ازواجهن يباتن
صدك راح وانة رحت سبحت وخلصت من المكياج
اول مرة احط احس بروحي متحنطة
بعدها صليت وخلصت و كعدنا كلنا ملتمين بالهول
احنا مابينا واحد يصنف او فكاهي
كلهم جديين بس انة وماابين هالشي ع طول
اليشوفني مايتوفع عندي حس فكاهة ..
لهذا الكعدة مالتنا ولمتنا حلوة بس مابيها ضحك
وانة عروس عيب احشش
رغم ببالي كم شغلة بس سكتت عيب شيكولون خفيفة..
تعشينا سوا والبنات اخذوهم ازواجهم وطبعا خلود
راحت وي امها واختها من اجو
هي معين هم مايخليها تطول هواي عدهم
بس راحت لان هوسة المهر خافت تشتغل ..
بس انة وعمة والبنات ويانا كملنا كلشي ورجع
كما كان
ومن بعد يوم حافل ومتعب رحت لفراشي
هلكانة تعب
انة وعمة نحجي بالحفلة واخذت جهازي فتحته
لكيت اياد دازلي رسالة
كاتب هلو اني اياد وهذا رقمي رح اتصل عليج
ومتصل شكد بس ولا ادري
شفت الوكت متاخر عيب اخابر خليها لباجر..
سديته ونمت لان كلش تعبانة
فزيت الفجر على ندهة عمة تكعدني للصلاة
كمت توضيت وصليت
وطلعت نظفت حتى اكعد براحتي بعدين
خلصت تنظيف وبخرت البيت ونمت
يمكن بالستة ونص
وكعدت بالتسعة..
فتحت الجهاز لكيت صباحية من اياد
والبنات حاركان الجو بالرسايل
ومكالمات هم من اياد..
عدلت كعدتي وخابرت عليه بسرعة
جاوب..
صباح الخير جمان..
صباح الخير..اسفة البارحة ترى ملتهية وشفت المكالمات
متاخر..
معذورة اكيد عندج انشغال بس حبيت نسولف
ولو عدنا العمر كدامنا كله نسولف بي..
الله كريم ..
شنو شعجب كاعدة من وكت..
لا هذا وكتي متعودة اكعد بهالساعة..
يابة انت نادرة احنا اختي تكعد ب٣ لو بالاربعة ..
ههه بعد كلمن وتعويده ..
اي صح بسانت ماكو منج..
بس شفتج بعرس ايمن كلت ماكو هيج وحدة مستورة
وحلوة وهادئة ورزنة
بصراحة اول مرة اباوع لوحدة مستورة وتعجبني
الاسوفها مستورة مااباوعلها هههه..
يلا منا ورايح ماحاجة تباوع بعد..
لا تنعمي عيوني اذا شفت غيرج انة احلم اعام
اتزوج وحدة مثلج...
سمعت صوت ولد يحاجو كتله روح كمل شغلك
صدك هو ترخص وراح
امبين كلش يحب شغله اذا البارحة
خاطب اليوم يطلع للشغل
بس اسلوبه اريحي ومثل ماكال ابوي
كلش عفوي مايتصنع..
طلعت انة تريكت وكالعادة الروتين اليومي
من بعد الغدا كامت امي وبقينا انة وحنة
نباوع فلم مدام الحكومة كامت
جان فلم حزين بس كلش حلو وعجبني
اسمه سويت نوفمبر يمكن
بس حسيته لامس احساسي وصافنة ومندمجة بي..
فززني صوت الجهاز يدك
باوعت رقم غريب مارديت
رجع ثلث مرات دك كلت اجاوب وعمة كالت
جاوبي مابيها شي..
فتحت خط وسمعت صوت بنية تبجي وكوة
كلامها ينفهم بسافهم اسمي..

كمت على حيلي وكفت خايفة شنو هالصوت
حاجيتها بصوت مرتعب
شبيج منو انت شصاير ؟؟
ردت وتشهك حيل..جمانة جمانة اياد اياد تسلب..
شنووو؟؟وتالي غدير هسه وينه؟؟
بالمستشفى ولج جمانة البارحة جان فرحان ومتخبل
بيج بس لا يموت ولج يبووووو...
صرخت وبعد ماسمعت صوتها انوب خفت بالزايد
يمكن فقدت الوعي استر يارب
شنو هالمصيبة بس لا رامينه لو بي شي
عمتي تهز بيه وتسالني ماعرفت شجاوبتها
بس كعدت بالكاع وادعي
يولي الفلوس وكلشي يهون بس يسلم ..
اجاني ابوي كعدته عمة وحجيتله برعبه
مادري شبيه انصدمت اكثر من ما خايفة
سالني ابوي وجاوبته
كال امشي نروحلهم وامي صعدت تصيح
لمعين يجي ويانا..
دخلت بدلت ومسباحي بيدي اسبح
سبحان الله شعوري مختلف
امس جان مايعتيني واليوم مجرد عقدنا
صرت اخاف افقده رغم بعدنا ابد
مامتحاور

ين ولو مرة
يعني نعتبر غرباء لهسه
بس صدك المودة والرحمة شي لا ارادي بالزواج...
رحنا انة وامي وابوي ومعين لبيتهم لان يندلو
من راحو سالو عنهم
جان البيت فخم كلش بس لكينا الباب مسدود وهدوء كلش
بس لا محد هنا انوب
نزل معين دك الباب الباب مرتين وثلاثة
انة اخابر غدير ماتجاوب
اخر شي طلعت مرت اخو انة شفتها ونزلت بسرعة
هي سلمت عليه بس ملامحها توحي بالخطر
والخوف ..
رادتني ادخل بس كتلها فهميني شصار بيا مستشفى
كالت كلشي ماندري بس الندري تسلب هو و
ابن خاله وهسه بالمستشفى
انطتني اسم المشتفى وتشكرتها ورحنا انا واهلي
اول مافتنا وشفنا اهلهم اللطم والصريخ
انة وامي وكفنا وابوي ومعين ركضو ..

انة ادعي ودموعي نزلت بس لا مات
وامي حاطتني بحضها وتدعي وياي
اباوع وماعرف احد منهم منو ابو منو اخو
حتى اعرف شصاير
دقايق واجه معين كال تطمني خوية رجلج مابي شي
بس ابن خاله توفه
مسحت دموعي وبقيت اردد الحمد والرحمة للولد..
اخذنا معين ورجعنا لان ماكدر ادخل هسه
كلش الوضع مايناسب
رجعني معين وراحو هو وابوي
وانة الحمدلله شوي ارتاحيت بس انقهرت ع ابن
خاله
يصير اخو الطالب اليدرسه ابوي
وهم علاقتهم كلش قوية بيهم..
بقت امي وعمتي يمي ويحجون وياي
بس انة احس كللبي معصور
مثل الشي وجاي ينضغط فوك طاقته
كعدت صليت صلاة الحاجة ودعيت بس اريد
صدري يفك ماكو ..
امي وعمتي ماعافوني لحظة يحاولون يخلوني
مااتقوقع
صح انة لا لطمت لا صرخت بس جانت عندي صدمة
بحيث بس اصقن
اتصرف وياهم طبيعي بس كل صفنة تاخذني ليم
اياد وترحعني..،
من بعد انتظار اجه معين وابوي..
شفتهم وكمت بسرعة..
ها بابا شنو طمني شفت اياد شلون وضعه؟
كلشي مابي بابا بس منهار وبصدمة
حقه الشافه مو شوية..
سالته امي بقلق..عرفتو الصار وشلون متسلبين..
اي برجعهتم من المعمل والدنيا ظهر وتدرين
ظهر الصيف محد ولا طير برا
هادين عليهم مسلحين ورايدين السيارة
والظاهر مقاومين وذاك خطية المات
ورامينه خرط براسه
بحيث مطشرين راسه ..بس اياد مابي اصابة
بعد هذا العرفو من التقرير والناس الموديتهم
للمستشفى لاكينهم مشمرين بالطريق ..
طبعا ابوي يحجي وانة عصرة كلبي تزيد وتزيد
بحيث بقيت افرك بصدري خفت لا انجلط
امي بقت تبجي وتنحب وعمتي تناشغ
ع الحجي السمعو
وانة صافنة وكرهت روحي حسيت شكد نحس
فكرت الناس ونكبتهم..
كمت لغرفتي وتمددت اسبح
مغمضة عيوني واسبح
وتجي لقطات كدام عيني ماصايرة قبل احس
مثل الصورة التخطف خطف
هالحالة تتكرر عندي هواااي
وحدة من الصور المرت كدامي اركض
ووحدة كاعدة بيت مو بيتنا..
شوية شوية غفيت واحلامي كلها مزعجة
ومخربطة ..
كعدت ع صوت الاذان واول مرة هيج من
افز من نومي ماودي اكوم او
اشوف احد
تعوذت من الشيطان وكمت عمتي كاعدة
تصلي
باوعتلي بحيرة وقلقل هزيتلها راسي وضعي
احسن..
صليت ودعيت هواي وبقيت متمددة ع سجادتي
الى ان صار الصبح وانة بس
متمددة ع السجادة واسبح
كمت نظفت وامي ماقبلت كتلها مابيه شي
لا تقلقين بعد قدر وصار
والحمدلله اياد ماصار بي شي
هي شجعتني بكلامها وكالت الله يكملج بعقلج
ويحفظج..
ورا ماتريكنا كال ابوي نروح الهم لان
طلعو اياد للبيت
لبسنا اسود انة وامي ورحنا ..
معين ماخذ اجازة هم اجه ويانا
من وصلنا شفنا الشارع مالتهم ماينشاف من السيارات
ورياجيل واكفة برا ..
بس الظاهر عرفو اهلي لان اجه ولد يم ابوي
سلم عليهم وكال تفضلو جوا وسوالنا طريق
دخلنا انة وامي وابوي ومعين بقو برا
شفنا البيت كله نسوان ولابسات اسود
خالته عرفتنا واجت تلكتنا وشبكتني وبقت تبجي
وتحمد الله سبحانه على نجاة اياد..
كالت تعالو جوا خل يشوفج بلكي نفسيته تتعدل
دخلنا والببت ماينشاف بس نسوان
هي صاحت غدورة تعاي يوم تعاي
اجت مرت اخوج اخذيهم لامج
اجت غدير بس ماسلمت علينا كبل كالت امشو
وجهها ازرك وعيونها صايرات كتلة
حمرة ...
مشت كدامنا واكو مثل الديوانية ثانية غير
الكاعدين بيها اول مادخلنا
دخلنا بيها ونسوان ملتمات ويبجن وام اياد بنصهن
شالها ذابته ع نص شعرها وكاعدة
صافنة ودموعها تنزل
شكلها مصدوم كلش انة من شفتهم هيج بقت دموعي
تصب
اجيت تقربت يمها وعزيتها وهي تهز براسها ..
كعدنا انة وامي شوية واجت اخته الكبيرة
منار
بوستني وكالت همزين اجيتي وكلت لامي..
خالة حبابة فدوة لعينج
بس تروح تشوف اياد حالته حاله ترى..
جاوبتها امي اي يمة جا شلون رجلها هذا
ختروح وبعدين انة هم اشوفه ..
كمت وياها اخذتني للطابق الثاني
من جهة اليسار اكو درج ومن جهة اليمين
احنا صعدنا من اليسار واكو ممر وبي غرف
دخلنا اول غرفة
اول مافتحت الباب شفت اياد نايم ومتغطي
على صوت الباب فتح عيونه بانزعاج
من شافني عدل نظرته وكعد ..
اخته باوعتله وباوعتلي..اياد اجت جمانة تطمن عليك..
جمانة فدوة لعينج انت بت اصلا لا
تخيبين امله..
ودمعت عينها وطلعت استغربت شنو
اخيب امله ليش...
تقربت كعدت ع طرف الجرباية يمه هو
مدنك راسه ويبجي
حاجيته بهدوء..البقاء بحياتك اياد الله يرحمه ويغفرل

ه
مايدوم الا الحي القيوم كلنا على
هذا الطريق ..
هو يهز براسه ويبجي...
قوي نفسك اهلك كلهم منهارين عليك ترى
وانة وياك ومااعوفك واذا تريد
من باجر اجيب كلشي واجي اعيش
وياك لان انة مرتك
المهم اكدر اساعدك وتتقوى من جديد...
هو رفع راسه ليفوك  ولزم صفحته
ودموعه تصب..
شبيك اياد شي ياذيك؟؟
هز راسه لا...
كوم بدل ماتبجي كوم انة وياك
نصليله صلاة الوحشة مدام اليوم
اليوم اندفن ..
اياد تسمعني؟؟؟
باوعلي وعيونه حمر ودموعه تنزل..
ما ما مااا اري ي ي د اني ما ما ما ما اص ص ص صلي...
فتحت عيوني فجأة احس كعدت من حلم مزعج...
للحكلية بقية

فراشات تخشى الاحتراق
الجزء الثامن

طريقة حجي اياد جفلتني مثل الفزيت من حلم
مزعج وابقى اهز راسي
حتى اتاكد كعدت لو بعدني..
عرفت هو بتأثير صدمة واكيد هذا رد فعل
وبمرور الوقت يروح
لان هو جان حجيه طبيعي مستحيل تبقى ويا
التأتأة للابد
ممكن تبقى عند الجان اخرس بس هو لا
جان لسانه طليق ...
قويت نفسي حتى احاجيه ..ابتسمتله ولزمت
ايده..
اياد يا عزيزي حرام تقنط ترى المؤمن مبتلى
مو من اول مصيبة تكول مااصلي..
باوع هسه انة يمك اذا تريد سولفلي الصار
صدكني من تسولف يخف همك
وصدمتك تقل كل ماتعود الشي الصار وياك ..
انة مجربتها الشي الياذيني
ابقى كلساع استرجعه وي نفسي لحد مااحسه يتفه
ويصير بلا معنى..
عصر ايدي حيل وباوع بعيني ..نظرته مردت
گلبي مرد ..
اري اري اري اريد اح ح حجي ب ب ب بس
ما ما ما ما اكددددر ...
ان ن ن ن ت راااااح تعوو فيييني ص ص ص ص ح؟
ابتسمتله ومسحت دمعته..لو يذبحوني مااعوفك
انت مابيك شي وراح اساعدك وترجع
مثل قبل
وهذا حجيك مجرد رد فعل ..
صدكني فترة وتعدي وترجع احسن من اول ..
صد د دك؟
هزيت راسي مبتسمة ..وداعة هالعيون الحلوات الصاكات ..
يلا ا ا ..راااح ..اح حجي ..
اي بس رجع ظهرك ع الجرباية حتى تسترخي ..
حطيتله المخدة ورا ظهره ومدد رجليه
راسه رفعه ليفوك وايد حطها ع عيونه
وايد لازمة بيدي قوي كلش ..
بدا يحجي من طلعو من المعمل ملاحكتهم سيارتين
ومغيرين طريقهم بس كاطعين عليهم
الطريق ابن خاله موكف السيارة
ونازل الهم وهم ساحبين سلاح ومهددي
يترك سيارته
ومن مقاومهم رامينه خرط براسه
اياد من شايفه هيجي منهار وفاقد الوعي
يكول ركضت عليه وصرخت وطحت يمه
يمكن عبالهم متت
اسمعهم يحجون يكولون هذا مابي نبض
لهذا عافو ماكتلوه
ورا ماسولف انهار كلش ذبه نفسه بحضني
ويبجي كل قوته
بقيت امسح ع ظهره واقرا وادعي
وهو يحجي ويبجيوكل صعب افهم منه
بس العرفته التوفى جان صديقه روح
بروح
لان امهم ميتة ومتربين ببيت اهل اياد اكثر من
بيتهم
ومن تهجرو بالاول كعدو وياهم الى ان رجعت احوالهم
تعدلت وجابو املاكهم واستقرو
وهم بس اولاد ثنين وبنية متزوجة
وهو هذا خطية جان يريد يخطب ورا اياد
بس توفى
واخوهم الصغير العايش تقريبا ببيت اهل اياد...

بعد ماهدا شوية كتله لازم اروح ..لزم بيدي قوي
وكال بتوسل..
ر ر راح ..ت ت تطلك ي ي ن..
لا مستحيل اياد انة وياك شما يصير
انت زوجي ونصفي الثاني
وواجب النصف يكمل الاخر مو؟؟؟
هز راسه وباس ايدي حيل ..
وكام وياي طلعنا سوا ..من نزلنا اجو يمه نسوان
ماعرفهم
وخالته بس الاعرفها وامي هم سلمت عليه
وطلعنا
محد يعرف بالصار باياد بس انة لان امي
من عازته بس هسه راسه
وماطلع اصلا يم معين وابوي
انة قررت مااحجي ..
طول الطريق يحجون بالولد التوفى خطية شاب
واخو الصغير كلش متأثر عليه
ومن سائلين عن اياد كلولهم ماخذ مسكن ونايم
وهم عاذري لان شافو وضعه امس..
رجعت احس ثقل الدنيا على جتافي احس
بعبرة مخنوكة
انة مو ضايجة من وضعه بس ضايجة
عليه
حسيته كلش هش من الداخل والجان يتقوى بي
راح
بحيث الوضع الي هو بي مثل الميت ابوه لو
امه ...
من شافتني عمتي مصفنة كعدت يمي وحاولت
تفهم مني بس ماحجيت
هي عبالها صاير بي شي نفسي مو تسمعهم
يكولون مصدوم
لهذا حاولت تخفف عني من هالناحية وبمرور
الوقت  يتحسن ..
حمدت ربي وشكرته ع كل حال وقررت
اساعده واقوي ثقته بنفسه
بقيت كل يوم اراسله لان صعبه عليه يحجي
ويتضايق مايقبل
كتله براحتك تريد اكتب عادي
وهو صارت روحه بيه طول اليوم يحجي
ويراسل..
حاجتني رجاء خطية وكتلها بقت تبجي
وتكلي ماعندج حظ
بيومها العصر اجت لبيتنا حتى تشوفني
حجيتلها ع الحادث والصار
وهي بس تسويلها بز تبجي
كتلها كافي ماتصدكين تطلعين دموعج..
ضحكت كالت دومج نفسج راضية حتى وانت
بمحنة..
الحمدلله والشكر هذا الحال ولا غيره..
تعاي خل احجيلج غير اشتغلت ببيت سيدي تحسين ..
هههه اي مو كلتي بس مافرغت اسالج..
ياخية شحجي وشحجي بس اريد اعرف شلون
صبر على مرته هلكد مادري
ولج ياجمانة البيت وصخ وصخ تعجزين وتكولين
وصخ
ولج الحمام الكاع جهة سودة جهة صفرا
بحيث نكعته بفلاش من الصبح للعصر
صدري تنك من وراه
البانيو بي هدومها وصخة مكومات وميبسات..
رغم لو تشوفينه يجنن خمس نجوم وجديد بس
الوصخ ماكله
بحيث من دخل ورا مانظفته بيومها يكلي
تستاهلين ادكلج تحية هههه...
ياا وانة اكول شلون يستخدمه هيجي شنو
جا يسبح بالحديقة...
ههه لا بالحمام البرا ذاك نظيف صح صغير
لا بس يلمع
وحتى غرفته مو نفسها الاولى هو جايبله
اخشاب جديدة
وماخذ الغرفة اليم غرفته القديمة..
لان من اول مادخلت نظفتها كلش مرتبة لكيتها
ونظيفة
هو كال من تخلصين نظفي القديمة
وكلشي بيها ذبي
خلي بس الاخشاب ..
انة دخلت للقديمة واشوفها تكولين غرفة تعذيب
الريحة تكتل
الكاع متكعة مدري دم مدري شنو
وتكع صفر هذا المرمر فركته طلع يلمع
لو شايفته قبل يخوف
ملابس مشمرة حافظات اكل زبالة خبز معفن
بحيث يوم كامل من الصبح م

ن اجيت للمغرب يلا
كملتها ...
سودة عليه الله يساعدج ولج تعب عليج..
لا خية بس اول ايام هسه البيت
صار ع ايدي بعد مايلم وصخ
اروح انظف واطبخ ساعتين ماياخذ مني..
وهو كلش خوش انسان وابن حلال ومامخليني
بعازة..
الله يهدي عليج انت تستاهلين بس الخير
وهذا الخنزير العندج شخباره..

سكتي هالايام متخبل لان يريد فلوس
يشرب السم وماجاي انطي
خطية مها كالت خلي فلوسج يمي
ادخلج بيهن سلفة
لان هو يدور ويلكاهن وياخذهن..
اي زين سويتي يولي تنطي وجع بگلبه...
لا وسمعي هددته كتله الاشتغل عنده عقيد
بس يشوفني مزوركة
يجي يعتقلك وهو ضل يخاف يمد ايده..
هههه عشتي زين تسوين ..
يلا اكوم انة عفت الولد بالبيت ..
هسه لو جايبتهم وباقين ومتعشين على واهسنا..
جاي اجربج انة خية ماتقصرين يلا دربالج
ع روحج..
وانت هم...
ورا ماراحت رجاء لكيت اياد مراسلني هواي
جاوبته جانت صديقتي يمي بس
ضايج ويكول مليتي جنج
حجيت ويا شوية شوية يلا قنع..
وبقى متعلق بيه مثل الطفل اليتعلق بامه
يوم عن يوم اكتشف شكد هو فقير
ومثل ماكال ابوي نفسه طيبة وخدوم
وشكد جان المرحوم يفهمه وهسه صفى
بلا صديق
وحسيت ثقته بنفسه صفر كلش
حاولت وحاولت هواي حتى اخلي يستعيد
قوته ويوكف من جديد..
ومرت خمس اشهر واحنا نتراسل بس
مكالمات قليلة
امي خلتني ع راحتي وتشحعني اسانده رغم
اهلي كلهم محد عرف بوضعه
سافر خلال هالفترة كال اريد اروح اتعالج
كتله براحتك اذا هالشي انت راغبه سوي...
راح وسوا فحص شامل وتخطيط لكلشي حتى
يعرفون شنو الخلل الصار
رغم الدكتور اول ماشافه كله كل خلل ماكو حالة
نفسه وبس..
وبعد الفحوصات تبين فعلا حالة نفسية مو اكثر
علاجها نفسي ولازم يداوم عليه
وراح والتزم هناك بس تقريبا صار حجيه مفهوم
جان كلش ماينفهم
بس منعه من العصبية لان تزيد وتفاقم الحالة...
خلصت الخمس اشهر وهو نفس درجة التحسن
ماكو تقدم
كتله ارجع وهنا نفسيتك وياي تتعدل وتتحسن
اكثر..
من رجع من السفر كال راح اجي لبيتكم
كتله تعال شوكت ماتريد..
بس جنت خايفة من رد فعل اهلي اكيد ماراح
يجرحونه بس ينصدمون
مثل ماانة انصدمت...
اجه المغرب وانة بيومها كلت لابوي راح يجي
راح ابوي واستقبله وامي
هم طلعت تشوفه لان امي تكول كلش احبه
طيب..
انة جنت البس بحجابي وهم طلعو استقبلو
خلصت ورحت للدوانية
قبل لا ادخل وكفت اسمع ابوي يسولف ويا
بس يعني ابوي ماجنه سامع اياد
من يحجي ..
دخلت وسلمت هو اول ماشافني حرك جتفه بفرح
وابتسم ..
الحمدلله ع سلامة اياد شلونك..
هو بلع ريك بصعوبة وهز راسه..ال حم د الحمد لله..
حمدت ربي لان يعني احسن بهواي اشوفه ..
امي وابوي ماجنهم سمعو شي مبتسمين وابوي
يسولف عادي..
كعدت انة وحطيت الصينية وقربتله الماي
شربه بسرعه..
هو باوع لابوي وابتسم ..
م م م ن.. رخ صصتك عمو..ا ا اني ..اجي ي ي يت..
اري اري اري د..نح ح ح ح دد.. ز ز زوااجنا..
هز راسه ابوي وباوعلي ..بعد بكيف جمانة
يناسبها هسه لو يمته..
كلتله امي..خل تشوف جمانة وضعها وحاجاتها
ويصير خير..
امي تباوعلي وعيونها مغوركة...
هو ماطول كام واانطاني علاكة كال هاي
هديتج
وانطه لاهلي هم وترخص وراح
رغم بابا كلش حاول ويا يبقى للعشى بس ماقبل ..
ورا ماطلع بابا سد الباب واندار جر كرسي بالحديقة
وكعد
امي واكفة ع جهة ومخليه ايدها ع خدها
باوعلي ابوي بحيرة...
شعجب ماكلتي بحالة اياد..
هزيت راسي وغمضت عيوني وجريت نفس..ورجعت
باوعتله..
وعدته مااحجي شي وهو مستحي حتى ماخابرك
بعد بس يرسل ويدز بيدي سلام..
زين شنو رايج بموضوعه الجاي بي..
هو حجه بالزواج كدامكم حتى يبين احنا متفاهمين
وانة قابلة بوضعه
انة من حركاته عرفته جان يراقب وجهك
يتصورله باي لحظة
تكله توكل ماعندك مرة يمي...
حجت امي..زين انت مقتنعة يعني انة اعرفج عقلج
راكز
بس اذا خوفج من الطلاك لو العنوسة يمه معليج
طز بكلشي ولا تفكرين
انت درة واكيد مثل مااجاج هذا يجيج غيره..
لا يمه صدك جذب هذا رجلي واوكف وياه بالحلوة
والمرة
باجر يمكن انحط بنفس موقفه ويصير بيه عاهة لو عوق
اكيد واجبه يسندني
ومايتركني ولو تركني اكرهه واحقد عليه لان رادني
وانة بصحتي وباول محنة عافني...
كشفت امي  صدرها للسما ونشغت..
ربي هالبنية انت رزقتني بيها تزيد حسناتي
بجاهك اريدها تستقر وترتاح وماتلوعها
بيوم
اريد من احط راسي بكبري اروح متطمنة...
ذبيت نفسها بحضنها وهي شبكتني حيل
اسم الله عليج بعد عمري يمه
ابوي وانة بحضنها مسح ع راسي وباسني
درت عليه كتله
بابا خل نحدد موعد زواج احسن..
وجودي يمه يحسن حالته..
صار بابا باجر اخابره ونتفق..
روحي هسه صبيلنا العشا عمتج سوت
وجيبي وتعاي
الجو هنا يفك النفس وحلو دافي
خل نتعشى انة وياج وامج وحنة..
صار بعيني هسه اجيبه واجي..
يلا احنا راح نفرش واتانيج..
دخلت جوا لاكيت عمة جاي تصب وخلود
بالمطبخ وسنا يمها تصيح جوعانة..
ها سنا تعاي عمة راح نتعشى برة تاكلين ويانا...
اي اي فدوة جمانة اخذيها وياكم تاكل انة جاي
اغسل ملابس ..
اي يلا عمة اخذي وياي سلة ال

خضرا وامشي..
اخذت السلة سنا وطلعت كدامي وامها ركضت
للدرج
عمة تباوع وراها تكلها دربالج لا يخلص
الباتري مالج
درت عليها ضحكت..تعاي ناكل برة خليها
غايصة بالعسل...
دكولي غايصة بالجييير بالزفتتت ولج مو مرة
تكول هذا الحبوان الكسلان ...
هههههه تعاي ناكل تعاي اكو اخبار جديدة...
اخذنا الصينية وطلعنا بالحديقة
تعشينا واخلي سولفو لعمة
باوعتلي وكالت حسيت بيج..
كتلها الله يحل اكبر عقدة مايحل لسان عبد صغير من عبيده..
طبطبت ع رجلي وابتسمت بوجع...
واحنا نحجي دخل ريان..
سالته امي ها يمه تتعشى؟
لا متعشي بس اريد جاي خوش كعدة كاعدين..
انة هسه اجيبلك تعال اكعد لمكاني..
كمت اخذت الصينية وديتها مالت العشا للمطبخ
حميت الجاي وجلفت المواعين
على ماحمى صبيته واخذته
وصلت يمهم واشوف ريان يصيح ووجهه يريد يطك
من العصبية..
بقيت اباوع بالوجوه اريد اعرف شنو صار
باوعلي بعتب كال..
مع الاسف عليج شنو مجبورة ساكتة ع هالوضع؟
سكتت وجريت نفس
كال خابري هسه كدامي...
للحكاية بقية

فراشات تخشى الاحتراق
الجزء التاسع


خابري اياد وانطيني التلفون..
هزيت راسي لا..
انت اخوي وعلى راسي ووكفتك وياي
تفرحني
بس هاي حياتي
والقرار الي
مو طفلة انة واعرف شلون اتصرف...
بس مامجبورة تبقين ويا وانتو توكم انخطبتو
والحادث صار يعني حتى مو العشرة
توكف بعينج..
ريان لا تصير اناني وحب لاخيك
ماتحب لنفسك
نفرض باجر تعرضت لمثل وضعه وانت
خاطب
شنو راح يكون همك الوحيد الي حتى اهم
من صحتك؟؟؟
همك يكون مرتك تبقى وياك لو تعوفك
واذا عافتك وكتها كلي شنو احساسك؟؟
كال بابا..احنا الولد ماحسسنا حتى من حجه
رغم صدمتنا انة وامك
بس مابينا اله حتى لا نجرحه ..
وباجر ادز عليه ويجي ونكعد انة وانت واخوك
حتى نحدد زواجهم
اي حجاية زايدة ماريد ..صار؟؟؟
صار حجي..
كام باس راس ابوي وراسي ودخل جوا
اهلي كلولي لا تضوجين
كتلهم لا هو من حرصه عليه يحجي..
بعدها دخلنا جوا اهلي راحو نامو وانة وعمة
رحنا لغرفتنا..
انة تمددت بفراشي وهي كعدت كعدة وحطت المخدة
بحضنها..
باوعتلها وانة عاقدة حواجبي..كعدتج مريبة..
محد مريب غيرج يجمينة
طول الفترة ساكته وماكلتي
ومن اكلج بيج شي تكولين بسيطة تنحل..باوعتلها
من جوا حواجبي
هسه انت ضايجة لان ماحجيت لو لان راح اعوفج؟
دنكت راسها بقهر وذراعاتها
مثبتتها ع المخدة
ضمت وجهها بيديها ونحبت..
كمت يمها بسرعة وحضنتها..
سودة علية تدرين فراگج مر وراح اشتاقلج ..
شبكتني حيل وبقت تبوس بيه..
راح تكسرين ظهري نونو فراكج صعب...
شلون ابطل يعني يلا ابطل لخاطرج..
دكومي كومي تبطل ههه روحي نامي
باجر وراج دوام..
كمت لفراشي وانة كئيبة فتحت الجهاز
وراسلت اياد
لان ورا ماطلع طمنته اهل وردة فعلهم
بالعكس شجعوني اساعده
لان جان خايف من ردة فعلهم..
راسلته شوية ونمت..
يوم ثاني الصبح كعدت نظفت وخلصت
اجاني ابو منذر ورحت للدوام
بنزلتي من السيارة لاكيت مها
نازلة من سيارة تحسين..
اجت سلمت عليه وهو بلحظة نزل
واجه يمنا..
صباح الخير ..ست جمانة..
صباح الخير ..اترخص انة..حجيتها ومشيت خطوة
ووكفتني حجايته من كال..
ع الخير يوم الولد ..ولو العندج بزونة مايحبل..
يلا عود انة برسم الخدمة بس اشري ..
مها وجهها كام ينطي الوان ضربت خدها وكالت
عزا تحسين تخبلت..
انة عفته ومشيت كلت مااجاوبه الظاهر هذا
شايل بكلبه كلش
وبس راد يجرحني
لان هو اعرفه طبعه مو خسيس ولا يتجاوز
بس يحس رجولته مجروحه
لان تركته واخذت غيره ...يمكن انة غلطانة
بحقه
بس انة هذا طبعي اذا قفلت على شي مااغير
رايي ..
دخلت جوا ومها وراي اجت تركض..
مسحيها بوجهي جمانة اروحلج فدة
وتبوس بيه وتعتذر..
البنات اجن يمنا مستغربات..
شبيكم شبيكم شكووو؟؟؟
نازك دخلت من الباب صاحت..
يمكن اخو مها صجمها هههه...
باوعتلها بابتسامة..لا انة اصجم مااتصجم
ضحكو البنات وهنادي بقت تصفر
هي فلت وجهه
وانة اكول بكلبي طاح حظك تحسين
ماطيحتني الا بحلك نازك
لان امبينه بجيتها شايفتنا والا شعرفها
بي موجود اليوم ..
رحت اخذت كم درس ورجعت عندي
الدرسين الاخيرات شاغر
صحت لرجاء وكعدنا نسولف وهي تحجيلي
عن شغلها وشلون تحسين
يتسوكلها خطية ومستلمة السلفة مليونين
وضامتهن يم مها ..
سالتها خو ما يضايقج لو عنده عين زايغة؟
لا بالعكس كلش ثكيل خية بس انة اكلج كل نهاية
اسبوع يمكن يجيب وحدة للبيت..
شلون؟؟
لان الجمعة ماروح انة السبت من اروح
الكى ع اكثر من مرة بدلة نوم
ومرة لكيت ..تقربت مني وشاورتني  ****
شنو بي ؟يعني فتحتي ولكيتي تصوير بي؟
ولج ياتصوير جمانة ولج منيله تصوير هو نايلونه
ههههههه...
اي بس يخزنون بي معلومات وملفات شبيج
ولج عندي واحد بجنطتي هسه اجيبه الج..
هههههههه ولج دمعت من الضحك ولج جمانة
مو نفسه هذا مووو نفسه ..
غير انت تكولين...هيج اسمه!
اي الاسم بس يتشابه بس الشغل لا هههههه
طبعا صدك ضحكتيني...
هسه كافي نصبة سويتيني چيس..كليلي شيسوون بي..
يستخدمونه مانع حمل يعني الهم
فهمتي؟؟؟؟
هو فهمت شغله بس ماشايفته شمدريني خية
عيع لعبتي نفسي
مو اكلج هذا مستهتر الظاهر مرته خبلته وضرب
فيوز براسه..
ههههه لا عدا هيج ماطلع منه اي تصرف وياي
مو حلو ابد
بس خية طبعا رجال ومطلك ويلعب بالفلوس لعب
وشيطانه قوي
لا تقيسين الناس كلها ع اخوانج ترى..
هم صحيح يلا الله يهدي ويرزقه مرة تبعده
عن الحرام..
امين خية امين خليني اروح اليوم ارجع وياهم
من يجي على مها...
الله يساعدج حبيبة مع السلامة...
راحت وانة بقيت مصفنة وكأن رجاء
فطنتني انة راح اتزوج
صح واعية وفاهمة كلشي بس اكو
امور اجهلها ..
طبعا امنيتي قبل جانت مااتزوج بس يصير عندي
اطفال
اموت عليهم واتمنى اخلف هواي..
جنت اكل لمهجة يصير اخلف بلا زواج
هيج انام واكعد الكى عندي طفل
هي تكلي اي وتلكين وي الطفل ست نهلة لازمتلها
منجل وتحش ركبتج وركبة الخلفج
وتبقى تحش عليه وتضحك...
صدك يعني جنت اتمنى الطفل يصير هيج شي
رباني ههه تفكير غريب
والاغرب منه وضعي هسه...
يلا الحمدلله ع كل حال...
انتظرت رجاء ومها يطلعون يلا طلعت
ماريد اتصادف

بتحسين بعد
ورا طلعتهم بهواي طلعت خطية ابو منذر ينتظرني..
ها بنيتي اليوم كلش متاخرة
اكيد ذني المكاميع شلعن كلبج..
هههه لا عمي بس جان عندي شغل وخلصته..
الله يعينج بنيتي ويستر عليج وع الرباج...
صعدت وجردت الطالبات وطلعنا
وصلت للبيت ودخلت
امي بالمطبخ سلمت ودخلت..
ابوي كاعد يصلي بالهول...
ها تقبل الله..
منا ومنج والله يساعدج بوية شعجب وحدة ونص وخمسة
اليوم..؟
اي بابا اخر شي طلعت انة يمكن اخر نفر بالمدرسة
ههه..
الله يعينج..
شعجب امبين توك جاي؟
اي جبت امج للبيت ورحت لاياد بالمعمل..
ها ...
كعدت ويا وحاجيته كتله لا تخجل ولا تنحرج
واليوم تعال انت واهلك حتى نتفق
ع الزواج
واخوانها موجودين وانت ابنا وخليك ع طبيعتك
ماريدك تتجبجب من عدنا..
هو ارتاح خطية جان شايل هم امبين..
اي صح بابا الله يخليك ويطول بعمرك...
ويسعدج بعد ابوج روحي ذبي هدومج
وتعاي ساعدي امج بالغدا
عمتج اليوم تعبانة شوية..
اي سودة علية من الفجر مخنجرة..
رحت للغرفة لكيت عمة متمددة ومتغطية
اكثر شي تتعب بالشتا
لان رئتينها تعبانات وتصير عدها كحة مزمنة
خصوصا من تضوج تزيد عدها..
كعدت يمها وتلمست كصتها زين مامصخنة..
حجيت بنبرة تشجيعية وياها
هااا حنينو جنج انمطلتي قبل عرسي
ترى اريد ركضة مو تنامين وتخليني محتارة
بحدي..
ذبت الغطا وكعذت كحت شوية ومسحت على
بلعومها..
لا طبعا وياج وياج بس غير تحددون حتى
نتحضر..
اي اليوم انشالله يجون ونحدد ..
اي بيها الخير جا كملي وتعاي تغدي
اروح اصب..
كعدي انة اصب تعبانة كوة تحوسين..
خليني اتحرك ماريد اكعد انتكس..
طلعت من الغرفة اباوعلها ضعفانة اكثر
وتعبانة
اموت قهر عليها..

بيومها العصر اجو ام اياد وابو وهو حتى يتفقون
وي اهلي ع الزواج
ابو كلش خوش انسان هواي يشبهه
شخصية وشكل هواي بينهم شبه
طول الكعدة امه اكثر شي حجت
وصار الاتفاق الزواج بعد ١٢ يوم
على مااكمل وهم هم يكملون امورهم
بس الزواج مجرد وجبة وبالبيت
ماكو لا حفله ولا مراسيم احتراما
لابن خالهم...
انة اخذت اجازة شهر من المدرسة حتى
اكدر اطلع واجهز
عمتي وامي واختي افنان تجي ويانا
ويبقون الجهال يم اديان
ساعدوني بالتجهيز والحجوزات وكلشي
امي كالت اسويلج حنة بقاعة
كتلها ماريد عيب من اياد
اخاف يسمع وعيب من عنده ..
مرت الايام سريعة ومن كثر انشغالي
جنت ملتهية عن الكل
الا اياد لازم ماقلل اهتمامي بي حتى لا يتحسس..
اجه اليوم الي راح ادخل بي لحياة جديدة
متخوفة كلش هواي
كلبي مامرتاح بس ماانطيت لنفسي مجال
احزن
لان كل البنات بهيجي يوم يقلقون
دخول بيت جديد وناس جديدة
ابدا مو سهل والله يساعد البنات
تترك بيت اهلها وتعاشر غرب
والغريب ماتدري يودها لو يضدها...
سمعت صوت البنات يكولون اجو
تحضرت وغطتني مهجة وافنان ونزلت
البرنص ع وجهي
لزمت مسباحي بيدي واردد ..
اللهم يا ملين الحديد لداوود سهل لي امري يا رب..
صعدنا واحد يسوق ويمه عمي بالصدر
واياد كاعد يمي ولازم ايدي حيل..
طول الطريق المسجل مخلين اغنية قديمة
بيها ردح بس ماعرفها المن لان مااسمع
بس طورها قديم..
ابو حجه وي السايق..ادري حاطلهم اغنية
تعصر الكلب دشوف واحد يفتح النفس..
جاوبه..حجي خلينا طاريين هم نفسهم مفتوحة
احنا المن فاتحها متكلي....
ضحت ابوه وبقى ذاك يضحك ويا
لحد ماوصلنا للبيت..
ذبحو جوا رجلينا خروف ودخلنا جوا
كعدت بمكان واسع مثل القاعة
مو نفسها الكعدنا بيها من اجيت ذيك
المرة..
اقاربهم بنات وولد موجودين جانو
والغريبة عادي شي مشتحة كدام شي
مدري الناس شبيها بالمناسبات
تنسى روحها..
انة رفعت البرنص بس عن وجهي ومو كله
والبنات وياي اخواتي ومهجة
بس المدرسات ماقبلو يجون عدا رند اجت
ورجاء هم ماقبلت ماتكدر...
البنات يسولفن وياي وذولا شابعين ركص
سوا
تقرب يمنا ولد يشبه اياد امبين اخو..
شلونج عروسة.. مبروك...
اني بشار اخو اياد..
تسلم يوم الالك وتشرفت بيك...
اني اشرف هههه ..مادري شيردون مالكيت
غير هالرد
هههه عادي كلشي يمشي...
رجع يركص وي خالته الاجت النا
ووياهم بعد بنات ورلد ماعرفهم
وشوية وبلشو بالعشا وراحو الولد بقو بس البنات
كملو العشا وتوزيعه
وكالت امه حضروها راحنزفهم ...
عدلن البنات ملابسي وتغطيت عدل
ودخلو هواي شباب
يهوسون ويهلهلون وابوهم يصيح لحد يهلهل
بس عاد هلهولة الشاب
اقو من المرة..
لزم ايدي اياد وكمت ويا ومشينا للدرج وهم ورانا
ويصيحون شيلها وهو بس يضحك
وعلى وطول صعدتنا للدرج منار تذب
علينا جكليت
لحد ماوصلنا لغرفتنا..
هم نزلو بسرعة مابقو خفت يبقون
يذبون حجي لاياد مثل ماسامعة
هواي بس زين ماصارت...
دخلنا للغرفة واانة كعدت ع الجرباية
غير ظهري انعوج من الكعدة..
كعد يمي من الجهة الثانية ورجع ظهره
ع القنفة..
ت ت ت عباان..
انة فتحت البرنص هو ابتسم ..اي هسه نسبح
ونرتاح حتى انة تعبت..
ب ب ب بعديين نسسبح..
لا عفية اياد بس عاد نصلي ركعتين نبدي
بيها حياتنا الجديدة..
ج ج ج مانة ت ت ت ردين ..يكو يكو يكولون ..
ت ت ت أخرر..
ل ل لان ما ما

ما يعرف..
فهمت ليش يريد بسرعة يمكن
يحس بنقص وعباله الناس تكول مو رجال
خليته براحته..
كلي نزعي البدلة انة اضوج من سالفة
انزعها..
كتله افتح الزنجيل وانة انزع
بس فتحه ونزعتها بالحمام وطلعت لابسة
السيت وفوكه الروب
هو جان كاعد بس بالشورت..
من شافني تقرب يمي تلمسني
اخذني ويمشي بيه للجرباية
باس كتفي بوسة خاطفة
وبقى يتلمس بوجهي ويباوعلي
انة غمضت لان استحي صح الضوا
خافت
بس صعبة اول مرة رجال يشوفني هيجي
بس قويت نفسي لخاطره ماريد احبطه..
باسني بخدي وبكصتي شعري كلي
ليش فاتحته اضوج من هيج شعر طويل..
انقهرت كلش من حجايته بس عبرتها
بعدين اعاتبه بيها
ماتقرب لشفتي او باسني ابد ولا حتى جسمي
باسه بوسه رومانسية
بوساته جانت خاطفة وسطحية..
بعدين بلا اي مقدمات او حتى اهيأ نفسي
راد ياخذني
ماقبلت وكتله اصبر مو هيج بس هو ابد ولا
يسمع..
بدون اي اهتمام لحجيي او طلبي
يتوقف لان كلش اذاني ..
اخذني...الالم الكاتمته كله ماكدرت اكتمه بعد
طلعت صرخة عالية كلش...
دفعته كتله كافي بس اخذ النيشان ووخر لان
تاذيت
وامي نبهتني اول مايطلع النيشان اخذه
حتى لا يخف اللون او بعدين ماكدر..
وادفع بي واحجي وماكو
وهو عبالك رجل الي مااهتم ابدااا
الى ان..ارتاح ..
عطت بي ..انت شسويت؟؟؟
للحكاية بقية

فراشات تخشى الاحتراق
الجزء العاشر

دفعته بسرعة وعطت بي..ايااد
شصخمت ولك انت شسويت؟؟؟
هو حس ع نفسه وكام بسرعة يباوعلي وانة كمت
مثل المخبلة نسيت حتى الوجع ..
وهو يباوعلي مستغرب ..
ش ش ش بييج؟
اباوع لا بقى نيشان ولا شي احتاريت امتزج كلشي
والفراش وكلشي تدمر
رجع كال ه ه هو ..من من منو ..ي ي ي يسأل ..
عن عنه..
جاوبته وانة احاول اكتم غضبي...
تحجي صدك بهذا برودك؟؟
مايهمني منو يسال عنه بس هذا شي غالي
بالنسبة الي واريده ..
وافرض اهلك رادو مو يمكن يشكون بيه؟؟
م م محد ..يسسسال ..ع ع دنا.. به ه ه ه سوالف..
استغفر الله اعوذ بالله من الشيطان
لفيت نفسي وكمت للحمام همزين
بالغرفة جان انحجت حجايتي..
دخلت جوا الماي الدافي احس متت برد
جانت بداية شهر كانون وجاية موجة برد
قوية
اكو هيتر بالحمام فتحته
ووكثرت الماي الحار ع البخار
بس ردت جسمي يدفى..
جريت طبلة بلاستك وكعدت عليها جوا
الماي خليته يصب
شوية شوية جسمي فك ودفى
سبحت وخلصت صحت على اياد..
كتله جيبلي الخاولي والروب بكنتوري
راح شوية جابهن واجه ..
لبست وطلعت ..هو كاعد ع الجرباية
ينتظرني..
لفيت الروب عدل ومشيت اريد انظف
الجرباية
هو كام ويباوعلي بخجل..
ا ا ا اسف ...ح ح حبيب تي..
ب ب ب س ..ما ما ما ..س س س يطرت..
ع ع على ..اعص ص ص ابي..
صار كدامي ورفع راسه لفوك بحسره ..
ح بي ..ه ه ه واي ..س س معت .. ح ح حجي...
مايهم بعدين نحجي روح هسه
ادخل اسبح وارتاح على مااحضر
الجرباية حتى ننام..
راح للحمام وانة عدلت الجرباية وطلعت
جرجف جديد فرشته
طلعت تلفوني واباوع مكالمات من امي
ومن عمة ومن ابوي
عددهن هائل
واخر مكالمة قبل دقيقتين
بادن رجليه ياستار شنو الصاير
كعدت وانة اردد يارب دخيلك يارب..
اريد ادك ورجعت خابرت امي
اول ماجاوبت
امي حاجتني برعب..
جمانة يمة خذاج رجلج لو لو بعده احجييي؟؟؟
كوة كدرت انطق واجاوبها..
اي يمه اخذني ليش !
صخام بوجهي يمه ولج عليج انطاره
سودة بوجهي راحت البنية...
صفني حجي امي انة منا محتارة وقلقلة
بسبب النيشان ومنا امي
مدري شجاي تحجي..
يمه فدوة شتحجين فهميني..
يمه كله مني انة مافهمتج انة سليمة
اعتمدت على افنان وتكول ناسية
يمه شسوي هسه يمه...
استغفر الله يمه لخاطر الله فهميني شجاي
تنطقين مو انة اليوم مابقالي
صبر رحموني شوية فهموني؟؟؟
اخذت التلفون عمة وامي اسمعها تبجي..
حاجتني عمة بهدوء..
جمانة حبيبة هاي خرافات بس هي امج تصدك
باعي انت يوم ثاني ودلاتج نزل
عليج دم
شنو؟؟حجيتها باستغراب وطلع اياد ينشف
بسعره صفن عليه اشر بيده شكو؟
جاوبته ..لا احاجي عمة..
هز راسه وطلع ..عمه من سمعتني حاجيته
سكتت
كتلها راح ورجعت كملت...
من شافت بيبيتج الدم كالت هاي الينزل عليها
دم باول ايام ولادتها
لازم رجلها ماياخذها الا ورا اذان الفجر..
ضحكت بسخرية وهزيت راسي..ههه وليش عود
صدك تحجون ؟هسه امي تلوم
بروحها على هذا الشي؟
واذا قبل الفجر عاد شيصير؟
اسم الله على اسمج اسم الله ع اساس اسم الله تموتين...
بلة حنة تامنين بهالسوالف ؟
لا وكلت لامج ذني خرافات بس هي من كالت
افنان ماكلت لجمانة تنتظر للفجر
امج انخبصت وبقت تلوب
هم حقها ام وتخاف حتى من الخرافات مو بيدها..
ادري بيها بعد كلب والدة بس انت حاجيها
بس منج تاخذ حجاية هي
لا يضل بالج انت روحي مدام شغلتج خلصت
هذا هو نعمة..
الحمدلله يلا سلميلي..
يوصل ..
سديته من عمة وانة مسطورة احس راسي
صدع كلش
طلعت مو ليلة العمر ليلة الصدمات هاي
انوب البدعة هاي مالت ورا الفجر
الله يرحمجن عجايز قبل عدجن سوالف
ماتنحجي وتنكال..
رحت طلعتلي سيت نوم طويل ومستور
لبسته ورحت للثلاجة بلكي الكى بندول
صدك لكيت اخذتلي وحدة شربت
وتمددت وتغطيت
الغرفة دافية حيل حسيت روحي منهكة
وبس اريد ارتاح ..
اياد طلع مارجع وين راح مادري..
اخذت التلفون خابرته كطع الخط
وراها دخل للغرفة..
ها ها ها ..خ خ خو...
ما ما ...بي بيهم ..ش ش ي اه ه لج؟
لا بس يتطمنون عليه...
ز ز ين ..ما ما ما..ت ت تعشششين..
لا ابد مااشتهي نعسانة ومصدعة كلش
جان اكلت انت..
اي اك ك ك لت  ..م م منار.. م م محضرته..
ف ف فوك..
بل بل بل ..م م م طبخ...
عاشت ايدها بس ماكدر اكل اريد انام حيل تعبانة..
ح ح حتى..ا ا ني....
يلا جا تعال نام وارتاح اهلك خو ماسالو؟
للللا...ما ما ..نز ززلت..
اها..الله كريم ..
اجه تمدد يمي وشال راسي خلاه ع ايده
حضني حيل بحضنه عصرني عصر...
اح ح ح بج...
ان ن نت..ك ك كل ع مري...
بسته بصدره وكتله ربي يحفظك الي..
غفيت من تعبي ودوختي بس ردت اختم
هذا اليوم بسلام
يوم ثاني الفجر كعدت ع المنبه
كمت توضيت واجيت كعدت اياد
حاولت ويا حتى مليت ماقبل يكعد
عبالك داخل بغيبوبة
خليته براحته لان البارحة تعب..
صليت ورجعت نظفت الغرفة وشغلت الغسالة
مابية نومة بعد لان نمنا من وكت
خلصت واخذت سلة الملابس وطلعت
البيت هدوء واظلم...
سميت بسم الله وسلمت لان امي تكول اذا
دخلتو مكان اظلم
سمو بسم الله وكولو السلام عليكم..
اخذت ا

لملابس صعدت فوك الباب مطبوك قوي
ترددت افتحه خاف افززهم بهالفجر
جريت السركي على كييف ماكو
جريته قوي صارت صوت عالي
كلت لا هسه عبالهم حرامي
ويصكوني..
تصنتت لجوا محد زين الظاهر نومهم ثكيل
طلعت بالسطح لا حبل لا شي
شسوي وين اودي ملابسي والجرجف
والسطح بي طبقة تراب تعادل
صحراء الانبار ..
اخذت سلتي ونزلت رجعت للغرفة
اياد بعده نايم
كلت اسبح وابدل واخذهن اشرهن جوا بس
اكعد اياد يجي وياي..

دخلت للحمام سبحت وطلعت جاي امشط
كعد اياد...
ص ص صبااح ..ال ال الخيير..
صباح الخيرات عيني صح النوم ..
ش ش كرا..
خ خ خو ...ما ما ما ..زععع لانة..
مممن ..ال ال بارحة؟
لا بس لازم نكعد نحجي شوية لان السويته غلط
صح انة عديتها لان شي وصار
وما ممكن يتصلح
بس انت غلطان هواي...
ص ص ح..ب ب بس..س س سمعت ..
ه ه هواي...ح ح حجي...
يخسى اليجيب سيرتك انت رجال بالف رجال
لا تتاثر بكلام احد
ترى مقهورين منك لان حلو ولازم الشغل كله
بشطارتك..
ص ص دك؟؟ي ي يعني.. ه ه هم ..اكوو..
اح ح د..يغ يغ يغاار..م م مني؟
جاي شلون مايغارون يا ايو بس عيونك
الحلوة تضغطهم..
ههههه ..ا ا ا عششق..تتترابج ..ا ا اني...
فداك انة ايو ..يلا كوم اسبح وصحصح
حتى تدليني وين اشر ملابس...
خ خ خوش..رااايح...
راح للحمام وانة رتبت الجرباية وطلعتله ملابس
خليتهم ع الجرباية وكعدت انتظره..
طلع بدل ونزلنا البيت هدوء بعده
الساعة ستة وربع..
سالته شو محد كال يبقون نايمين كلهم
بس ايهم ابن خاله الي هالسنة طالب مرحلة
اولى نفس السنة هو وريان ..
بس هو وابو اياد يكعدون من وكت
بس غدير دوامها عصري..
وايثار اخوهم الجبير يطلع بالتسعة للشغل
هم عدهم
بالاضافة للمعمل مالت الماي
مخازن مال مشروبات غازية
وعصائر
هذا الشغل لازمه ايثار وابوهم
وبشار
بس بشار مو دائماً لان طالب مرحلة اخيرة
جامعة..
طلعنا برا اكو حديقة خلفية بيها منشر وحبلين
كال هنا شريهن
شريت وخلصت واخذت السلة ودخلنا
ماعبالك عرسان طالعين بالبيت من الصبح
نفتر والجماعة كلها نايمة..
رجعنا لغرفتنا سالت اياد اسويلك ريوك
كال لا ماشتهي بعدني توه كاعد..
دك التلفون امي خطية تخابر طبعا بقى
بالها يمي لو تشيل من راسها
هالامور الي مالها صحة ولا الها اصل..
حاجيتها وطمنتها وهي تسال خو مابيج شي
كتلها لا مامتت تطمني بسبع ارواح
مو تكولين من جنت ببطنج بطلة وقاومت
لازلت صامدة واقاوم..
شوية حسيتها فكت وضحكت..كالت نجيج بالعشرة
كتلها هلا بيكم عاد صدك اشتاقيتلهم..
ورا ماخلصت مكالمة كعدت اسولف وي اياد
كال ماردت اذيج او اضيع النيشان
بس جنت معصب كلش وهم
احنا بعائلتنا ابد محد يسال عنه ..
وحجالي شلون سامع حجي من اولاد عمه
يضحكون ويستهزأون بي
ع اساس مايكدر وبالتحديد
حاجين كلمة معينة اياد
صار *** ..
بقينا نسولف لحد مادكو الباب علينا
كام هو فتحه دخلت امه..
هلهلت وكالت..صباح الخير عرسان..
شلونكم عاد خلصت مووو...
طبعا امه من تحجي انة حلكي يضل يوجعني
هواي تفر حلكها...
جاوبها هو خلصت وكلشي تمام وبوسته
وباركتله..
انة بوستني وانطتني علاكة كالت
هاج هاي دراعة جبتها
الج من بغداد البسيها وتعالو نزلو تريكو..
شكرا خالة هسه نبدل وننزل..
يلا مو تتاخرون ترى لاحكين ميطير هههه...
طلعت وسدت الباب وراها واياد كام للكنتور
اخذله تراك لبسه وراح يمشط
انة اخذت الكلابية الجايبتها امه كلت عيب
افشلها رغم انة اشتريت ثوب ابيض
منقوش باطرافه فضي ونازك حيل
بس ماردت ارد هديتها..
طلعتها من العلاكة لونها احمر يدوخ وبيها
شغل كله لمع!!يبووي انة البس هيج
احس روحي فنانة قديمة من الفلكلور
وانوب شعرضها عليه..
عفتها ورحت اخذت مالتي لبستها كاعدة
فيت عليه
خليت مكياج خفيف ووطلعت انة وياد
هو عجبته ملابسي كال حلو هذا خوش
مختارته امي كتله بكلبي لو تدري بامك
شجايبتلي
بس جاوبته ذاك قياسه جبير ومارهملي...
نزلنا ولكينا خالاته من شافونا هلهلو
وسوولهم اجواء
امبينين كلش عدهم حس موسيقي
لان شي تغني شي تركص عبالك فرقة
متكاملة...
امه كدامهم كالت..ياااا جومانة ليش ملبستي
الجبتها الج؟؟؟
هي تسميني جومانة لان الواو عدها بكلشي تحطه...
جاوبتها..عمة مو قياسي كلش جبير عليه...
سكتت ماصدكت جنها
وكعدنا تريكنا وخلصنا ورحنا جوا
متحمعين خالات وخوال وولد ووبنات..
هم عدهم خمس خالات واربع خوال
واحد ميت وثلاثة موجودين
ومستقرين هنا بالبصرة
والخالات ثنين هنا وثلاثة ببغداد..
بس ع مود العرس كلها جاية
وعمامهم هم ببغداد بس واحد هنا ..
جانو كلش هواي بس هو البيت واسع واكثر
من ديوانية بي لهذا متوزعين
انة كاعدة ويمي خالته تسولف وياي عن البارحة
كتلها الحمدلله كلشي تمام
وهي هم خوش مرة من اول ماخطبوني اسلوبها
حلو وياي
واحنا نسولف دكت تلفوني اجو اهلي..
كلت لاياد وراح هو وامه استقبلوهم
وانة انتظرت بالدوانية التصير يم الباب الخارجي
اجت بس امي وعمة حنة
وامي كدام ام اياد بس تنفخ بيه وتكلي
البيت اظلم جنتي تلمعين بي مثل الثريا
وطلعت علبة بيها سوارات لبستني
حسيتها تريد تبين

لامه معزتي عدها
لان حسيت امي وام اياد بينهن فد موقف
رغم تعاملها بمنتهى اللطف جان
بس اليوم حسيتها متغيرة اسلوبها وياي بز
بالحجي..
بس بقت طول الكعدة يمنا ماكدرت اسولف وي عمة
بس كتلها نتخابر ونسولف
وهم ماطول حكم ربع ساعة وكامو
ورا ماراحو انة رجعت جوا
وامه راح للمطبخ لان جانو يحضرون للغدا
سالتني خالته..
لعد انعام وينها ..
راحت للمطبخ يم البنات..
اي بعد ماضل شي للغدا ب١١ خو مامشتهية
شي نسويلج..
جاوبها واحد يعني شكله نهاية ثلاثينات
اذا مو اكثر
ام سلوان شلج بالسؤال مو عييب...هههه
وردت عليهم خالته الثانية
قصدها شريب عيني حيااوي..
وبقو يصنفون وانة وجهي مدنكة الم براغيه من الكاع
مو بس فلت تفلش..
غير ميانة زفرة هاي عدهم..
بقينا كاعدين لحد ماصار اذان الظهر
ترخصت منهم كتلهم اروح اصلي
بت خالته كالت..عااا بشار واخيراً دخل
لبيتكم فرد يهديكم للاسلام...
جاوبها بشار..
اي وانة اول المهتدين كولي امين..واندارلي
جمانة اريد تشجيع بشرفج
اريد تدخليني للاسلام حتى لو دفر..
ضحكت عبالي جاي يتشاقون وسالتهم
جا كومو صلو من هسه بس اياد
وين خل نصعد نصلي سوا..
سالت بت خالته بفضول..يااا يعني بدا يصلي
خوووش تاثيرج قوي جوجه
سالتها ببلاهة..
شون يعني مافهمت؟؟
يعني قصدي اياد الطول عمره ماواكف
ع سجادة ومصلي
انت غيرتي عفية عليج...

للحكاية بقية

فراشات تخشى الاحتراق
الجزء الحادي عشر

حجي بت خالته حسيته راشدي وسطرني
ع عيوني
للحظة كلت يمكن تريد تغثني او جذب 
الحجته
بس نظرات بشار ثبتت صحة كلامها
حاولت اتلافى الموضوع ماردت ابيت شي
كدامهم..
ترخصت وصعدت بلا مااحسسهم بحجم 
النار التسعر بداخلي..
اول مادخلت للغرفة انهاريت 
احس تحملت هواي او ..بمعنى اصح
تحملت كلشي
بس اتحمل بعده عن رب العالمين وجهله
للصلاة !!
لا لا مستحيل هذا الشي فجعني ..
زين هو ليش جذب عليه وكال يصلي
بلة الناس من واخد يسال 
يمكن ينزهون الشخص وهو سيء
بس هو حجاها بلسانه هو يصلي
يعني جذب عليه...
حسيت بوقتها غضبي سيطر عليه
كمت تعوذت من الشيطان
توضيت واجيت فرشت سجادتي 
صلاتي ودعائي كله بس اطلب من ربي
يرشدني شنو اتصرف 
لان عقلي قفل ومايعرف شيقرر..
بعد ماكملت صلاة كعدت اسبح 
احس هدأت وسيطرت على غضبي
قررت احاجيه وافهم منه ليش مايصلي
يمكن يجذبون وهو يصلي صدك
واذا مايصلي اخيره بيني
وبين صلاته..
لان مامستعده اعاشر انسان بعيد عن اتصاله
بربه...
بقيت كاعدة هواي ع السجادة اردد ادعية
وابجي واناجي ربي يفرجها..
جنت منتچية ع الكنتور وسبحتي بيدي وراسي
مخليته ع باب الكنتور..
دخل هو باوعلي ونزل راسه بسرعة
واضح بتصرفاته واصله الحديث 
الصار بيني وبين بسار وبت خالته...
بقيت اباوعله طولت نظرتي بي
هو يباوع بالغرفة بس مو بوجهي 
لحد مااجه كعد كدام السجادة...
انة ماخليته يشوفني ابجي ماردت اضعف
لان اذا شافني ضعيفة 
مايتقبل اي شي اكوله ..راح يستضعفني ويكول
ماعدها اصرار 
لهذا بينت كدامه قوية وماايكدر يهزمني...
دنك راسه يباو لايديه شلون اسبح..
حجيت بهدوء وياه..بس بصيغة امر..
يلا كوم صلي حتى تكون اول صلاة تجمعنا سوا
وندعي من ربي السعادة...
رفع راسه كال..
ما ما ..اصصصصلي..
ليش؟؟؟
كگلج...ب ب بشار ..
صح كال بس انة مايهمني السمعته من بشار..
اليهمني زوجي ونصفي الثاني يكون مناظر الي
يكون مكمل الي بكلشي
مثل ماكتلك قبل...
راح تكدر تكون هيج؟؟
لو انسحب من حياتك لان ماكدر اكمل حياتي
وي شخص مو مثلي...
مد ايده لزم ايدي حيل..للللا..ت ت تعوفيني...
مسدت على ايده وباوعت بعيونه..
اذا تريدني وياك دوم لا تجذب عليه...
ليش ماكلت من اول يوم انت ماتصلي؟؟؟
ليش كتلي اصلي واصوم؟؟؟
اييي..ا ص ص صوووم... ب ب س..مااا..
اصصصصلي...
و و و و كتلج..ا ص ص صلي..
ح ح تى...ت ت ت توافقين
لاااان...ا ا اول ...ما ما شفففففتج...
ح ح ح بيتج....
ب ب بس ..ت ت تعرفين..
ما ما..ا ص ص صلي..ت ت ترفضين...
ويييي..يعني اياد خفت مني ارفض وجذبت
وكلت تصلي
وماخفت من ربك وانت مالازم سجادة ومتوجه
لربك يوم!!
انة شنو مقابل رضا ربك ..
اياد اليبدي حياته بجذب يتعب 
رجاءاً اذا ضام عليه شي بعد احجي لا تخليني
كل يوم انصدم بشي 
احجيلي واساندك واساعدك بكلشي
بس لا تخلي الغير يقلل منك 
او يحجي عليك...
تقرب وذب روحه بحضني وبقى يتنفس
حيل 
ودافن راسه بحضني ومجلب بالاحرام قوي 
خليته براحته واستمريت ادعي 
وهو بحضني..
شوية وكام كال تعاي علميني اتوضى 
وبقى يعتذر لان جذب عليه
كال اذا عرفتي ماصلي ماتقبلين لان ايمن
رجل رند من ردت اخطبج
مدح بيج وكال مؤمنة وملتزمة 
عاتبته لان جذب بس مالحيت مدام 
راد يصلي هسه ورادني اعلمه..
رحنا للحمام وعلمته الوضوء ..توضى 
واشوفه متحمس ويباوعلي بحب
سكتت مالحيت عليه بعد 
اخذته للسجادة مفروشة وكتله اوكف صلي 
كدامي 
وانة وراك لان لازم الرجال يتقدم المرة بالصلاة
صدك وكف ع السجادة وبقيت 
وراه واحجي وهو يردد ..
خلص اول فرض وكعد يسبح واندار عليه
مبتسم يكول جاي احس نفسي
مسافر مدري طاير 
بس احس روحي فووك..
شجعته وكتله هذا يدل على طيب نفسك
رب العالمين تقبل منك 
وكملنا الفرض الثاني وهو خلص واخذ ايدي
ورحنا للجرباية...
باسني بخدي وبكصتي وهم تقربلي بدون 
اي تمهيدات
احسه يريد هالشي ويحبني 
بس مادري مايعرف مادري يتملل 
اياد لغز صعب كلش
وكل يوم لازم احل منه شوية ..
ورا شوية تمدد بصفي وجرني لحضنه
بس انة كمت للحمام بسرعة
غسلت ورجعت هو متمدد ع ظهره..
باوعلي من طلعت من الحمام وفتح ايده
وميل راسه ..
اجيت تمددت ع ايده وبقى حاضني حيل 
يحاول يحجي بس يضوج
ويتعب من كلامه 
بس مع هذا يحجيلي شكد حبني من اول 
ماشافني وكانه لاكي كنز 
وابن خاله المرحوم هو المشجعة يكول
لامه وهي امه هم كايلتله 
عجبتني وحطيتها ببالي الك...
بس جان كل كلامه بي قهر من امه بالذات 
ووصلي فكرة هي تفرق بينه
وبينه اخوانه 
وتستهزأ بي او معتبرته حمل ثقيل
من قبل الحادث هالحجي هي تصرفاتها..
انة ماردت اجرحه ولا حجيت بس 
فهمت شيقصد..
امه ماتريده لان مو مشيطن ولان هي تحب
المظاهر 
وهو مايعرف شنو مظاهر...
بيومها نسولف وغفينا شوية وفزينا ع دكة 
الباب..
اجو صاحولنا نتغدا 
بس جنا نعسانين ورجعنا نمنا وهم مارجعو هم 
ووللعصر يلا كعدنا..
سبحنا ورتبت الغرفة وذبيت الملابس بالغسالة
طبعي اغسل ملابس يوم بيومه
وخصوصا الجرجف 
ورا مالبسنا كال خل ننزل جوا يمهم..
انة لبست وا

خذت السلة ونزلنا..
باوعت بالهول كاعد بشار يباوع فلم
وهدووء ماكو بس
صوت الفلم عالي..
من شافنا سوا ومبتسمين استغرب حسيته
يمكن توقع بعد السمعته راح نتخارب..

كعد لحيله وكال هلا بالعرسان عمي 
صح النوم..
ههه شكرا متغدي لو تتغدا ويانا..؟
مااكلت هواي اذا تصبون اكل..
يلا اخلص ملابس واصب..
ماشي جايين وراج..
طلعت شريت الملابس وعفت السلة برا حتى
المهن فد مرا بيها واخذهن بعدين
ورجعت للمطبخ اكو جدورة ع الطباخ
اخذتلي صفنة بالطباخ 
اسود بي هواي بقيت اتفحص بالمطبخ 
الكاونتر بي خرايط 
بقيت احوس بودي هسه اكنف واجلفه..
حميت الاكل جان سوب لحم والجدر الثاني
تمن وحشو 
كملت وصبيت ثلث مواعين وفتحت الثلاجة
لكيت خضرا اكو وطاسة طرشي جبيرة
طلعتها اخذت منها واخطط ببالي 
لازم تنحط بدبة مو طاسة حتى لتطلع ريحة
بقيت اصحح للوضع الاشوفه ببالي 
بصراحة مارتاااحيت ...
صحت عليهم اجو اكلو ..وسالت بشار اشو هدوء؟
بعد كلمن راح لبيته طاحت عليه جكليته...
هههه شعجب من وكت رايحين..
بعد محافظات لازم يطلعون من وكت 
اي صح يوصلون بالسلامة...
خلي انطيج نظامنا حتى ماتدوخين..
امي وابوي ينامون يكعدون العصر كلش
وايثار يروح للشغل بالاربعة يرجع ب٨ 
مرته بغرفتها هي وبتها 
غدورة ماتشوفيها لا تحسبيها موجودة 
معلكة مثل القرد بغرفتها..
وايهم لازم التلفون بغرفتنا ذاناته راح يموعن
من كد مايخابر..
هههه خوش موجز هذا كون مانسيت احد..
اذا انسى ذكريني عود الله يكطعهم هواي
ينسون..
هههه اسم الله...
ارتاحيت لبشار ولطبعه واشوف اياد هم انطلق
ويانا رغم جان ملتهي يراسل
بس شوي شاركنا بالحجي..
ورا ماخلصنا كعدنا بالهول صارت خمسة الا ثلث مابقى شي
للاذان لان شتا 
كتلهم راح ياذن خل نكوم..
اياد ابتسم وكام قبلي 
بشار باوعلنا بنظرات مبهمة...وكال
..طيب اگي معاكو..
هههه هلا بيك بس بشرط تصلي ..
اي عاد علموني..
ياريت اتونس انة ..تعال لغرفتنا ..
ها عادي ادخل؟؟
اي شكو بيها غرفة اخوك وانة هم اختك 
امشي لا تستحي..
صعدنا وووكفو هو واياد بعد توضو 
وانة وراهم احجي وهم كدامي يرددون
من خلصنا الفرض الاول 
بشار مد لسانه كال تعبببت..
ضحك عليه اياد كله انجب كوم
ماتتعب....
صدك كملو صلاتهم واباوعلهم مثل المتعلمين
شي عجيب..
سالتهم انتو محد علمكم صلاة
كال بشار..
جانو يحجون علينا حتى نصلي..
بس مالحو والشي الماتتعلمه
من الصغر صعب هسه تتعلمه
امي مو دائما تصلي كله تكول رجليه 
بس ابوي يصلي
وايثار من تزوج بقى يصلي ..
يلا المهم هسه بعد عرفتوها وما تتركونها 
لان راحة نفسية ولله..
خلصنا صلاة وكتلهم روحو انة اصلي وحدي لان
صلاتي جانت تعليم الهم
نزلو قبلي وانة وراهم بشوية نزلت
امهم متمددة بالهول لابسة
برمودا كابوي وتشيرت ابيض
ربع ردن 
منظرها صدمني ههه لان هي سمينة 
واللبس طبقات صاير...
ضبطت ضحكتي وسلمت وهي كالت 
ها توج كعدتي؟
الظاهر ماشايفة اياد جوا مدري توها كاعدة
من النوم..
لا عمة من مساع بس خلصت صلاة
ونزلت 
ها زين بس لويش تكولين عمة؟كولي خالة
احلى..
ماكو فرق بعد لساني اخذ ع هالكلمة..
اي صح موانتو متعودين ع هالكلمات 
الم...وكطعت الحجاية ماكملتها...
اسلوبها خباثة مبطنة واستهزاء واضح
انة بينتلها انه ماحسيت بقصدها وكلش 
عادي عبرتها 
سالتها عن اياد كالت ماشفت احد
كالت رغد مرت ايثار بالمطبخ تسوي
العشا
كمت انة يمها لان امبينة رغد البيت براسها
غدير حسب حجي بشار ماتنزل من غرفتها
والام واضح ما تجيس شي..
دخلت للمطبخ رغد واكفة ع الطباخ والمطبخ
معفوس 
كتلها اساعدج بالاول رفضت
بس لحيت قبلت لان امبينة طاكة روحها خطية..
ساعدتها وكملنا عشا كالت فرشي الميز اذا تكدرين
اخذت السفرة فرشتها وسمعنا صوت رجال
بالهول ..
اكلج رغد صوت رجال منو اجه؟
مدت راسها ورجعت..
لا هذا مو غريب قرايب خالتي بيتهم هنا
كدامنا ودائماً يجي..
بس جان مسافر ماحضر عرسكم امبين هسه 
جاي
امشي سلمي عليه عيب خوش ولد..
يلا امشي وهم نكلهم ع العشا
عدلت حجابي نريد نطلع وطفت الكهرباء..
اخذت الجداحة لان جانت قريبة مني فتحتها..
خليتها بوجه رغد واحاجيها..
شعجب ماكو لايت؟
يو يمعودة عطلن ومحد يقبل ينزلهن ويركب جدد
خررب بيها من عائلة
انة ابتسمت كتلها اعصابج خية..
شمعة ماكو؟
اي هو انة حاطتلي شمعة للطوارئ يمج بصف 
الخواشيك..
يتبع

فراشات تخشى الاحتراق
الجزء الثاني عشر

جانت الدنيا ظلمة من انجريت انرعبت
بس همس باذني..ح ح حبي ..لا لا تخخافين...
واخذني ركض للغرفة وهو يضحك..
طفى اللايت وجانت الغرفة
داافية وظلمة
اخذني بحضنه يشمشم
ذبيت الحجاب وكال لتفتحين شعرج
بس مستمر يشم بركبتي
لحد مااخذني للجرباية وصرت بحضنه
بعدها تمددنا سوا
متغطين ووهدوء ودفو..
هو خله راسه ع صدري وهمس..
للاا .. تتتتخلين ..ع ع عني...
اكيد لا ايو مستحيل اتركك..
هههه.. اح ح بج..مممن..تكليلي..ا ا ايو...
وبعد ايو هم تدلل هههه..
واحنا جاي نسولف اجت الكهرباء
بس جان اصلا ضوا الغرفة مطفي
بي ضوا النوم مفتوح..
كال الجو مال نوم نعسان اني كتله اذا تريد
ابقى نام انة مانعسانة..
صدك شوية وغفى..
كمت للحمام اسبح جانت ساعة ب٨ تقريبا
فتحت الدوش
وكفت جوا ونزل الماي فاتر طفيت البارت خليت
بس الحار اشو هذا نزل بااارد
انوب تورطت وانة جوا وكملت سبحاتي
بماي مثلج
كوة خلصت طلعت ارجف..
طلعت التفيت بالروب وطلعتلي
دشداشة ثخينة كلش
ولبست فوكها كب شتوي
شعري شسورته بس ردت ادفى
حسيت البرودة اخترقت عظمي..
مشطت واستقريت شوية دفيت بس استحيت
انزل بعد ..
خابرت على عمة اكثر من مرة ماجاوبت
اكيد هسه كاعدة ع التلفزيون
وتلفونها بالمطبخ لو بالغرفة
ماتبطل عادتها تذبه بكل مكان..
شكد اشتاقيتلها واشتاقيت
لابوي خابرني الصبح بس صوته مقهور
سودة عليه ..
جاوبت رسايل البنات ومهجة دزيتلها مسج
بسرعة جاوبت..
سالتها باستغراب..شعجب سي السيد
مخليج براحتج اليوم؟
هههه تخيلي هو كلي جاوبيها تطمني عليها..
الله يهدي هو يحبني ها..
اي انت غير شكل عنده عشتو..شلونه رجلج
بعده نفس الشي؟
اي بعد مثل ماكتلج بس يمكن نفسياً تعبان لهذا
مايعرف يعبر عن مشاعره..
هو صح اليتعب نفسياً تاثر بي بس مو ع البوس
هههه...
هسه انت ليش مصرة ع البوس متكليلي..
وج اكو واحد لحد هسه مابايس مرته والاضرب
مرته الحمارة من اسالها شلونه رومانسي؟؟
تكلي اييي..
ههههه اي شمدريني بس هو حباب وتعامله
بلطف..
غير لطف هذا مابي بوس وج انة رجلي يوم
ثاني الخطوبة اجه طالب شفتي ثار ..
هههه انتو منحرفين احنا مؤدبين ..
خلصت مراسلة وي مهجة ورحت للفراش
جو يساعد ع النوم بس المشكلة
جعت واستحي انزل..
خليت ورحت نمت ..حسيت ع صلاة الفجر ..
بس احس حرارة نار تطلع مني
كلش مصخنة..
باوعت اياد مو بفراشه
صوت ماي بالحمام..
كمت بالكوة من فراشي وملتفة باللحاف
طلع هو من الحمام
وبس شافني كال كلش مصخنة
وخفت اكعدج
كتله ع الماي كال لان طفت الكهرباء
بس همزين لكيت حار هسه..
دخلت توضيت بالكوة احس مكسرة
وطلعت صليت انة ويا
ورا اماخلصنا كال متت جوع امشي
ناكل وشربي دوا..
طلعنا كال يولي هذا المطبخ امشي
نروح للجوا..
صدك نزلنا جوا هدوء كلش
فتح هو ضوا الهول وانة رحت للمطبخ
شفت الثلاجة مفتوحة
ماميزت منو بيها
من فتحت الضوا شفت واحد فز وبقى يركض
احتار وين يروح لان لابس بس
شورت
درت وطلعت بسرعة..
انضربت باياد وضحكت..ههه هذا يمكن ايهم
خطية اقتحمته بالمطبخ ..
ششششعنده.. ك ك اعد ..ه ه هسه هذا ال***
انصدمت يااا وانة اكول اياد عاقل
ذبله حجاية هلكدها..
راح للمطبخ ورجع كال تعاي صعد
رحت للمطبخ وحضرت ريوك
كعدنا تريكنا وكملنا ونظفت المطبخ
شربت دوا همزين لكيت عدهم بندول
فلاونزا قوي..
ورا شوية اجه بشار كال ..
صباح الخير ياانشط ثنائي
بالعالم..
ههه صباح الخير تعال تريك..
اي اذا اكو ليش لا..دخل وصاح وراه..
ابوو الهيم تعال ترى هاي مو استاذ عبد النبي
هي صح انضباط
بس مو هو..
دخل ايهم مبتسم كال ..عذريني
ماخذ راحتي عبالي
محد ينزل
متعودين محد يكعد هيج وكت..
لا بسيطة ماصار شي..
تعالو تريكو حتى تلحكون تبدلون..
سويتلهم ريوك وكملو وراحو وكعد
عمي وايثار وصبيتلهم
وخطية عمي شكد شكرني وحسيته فرحان
بيه ويشكرني هم ويوصيني باياد
ورا ماخلصو وطلعو كلهم للدوام
بس اياد بقى كاعد ع التلفزيون بالهول
واخذ لابتوبه كال عندي شغل..
تقريبا ساعة  تسعة انة صعدت للغرفة
اجيت انظف كلشي مالكيت
لا مكناسة لا فرشة لا ماسحة
ومو كلش اندل البيت..
صعدت بقيت بالغرفة شوية تمددت
همزين خفت صخونتي وحسيت روحي
احسن
ورا شوية واجت رغد دكت الباب
دخلت وابتسمت..
صباح الخير عرووس..
صباح الخيرات تعاي دخلي..
لا اريد انزل وراي جهاد بس كلت اشوفج
البارحة نمتو من وكت وعمي
ماقبل نكعدكم..
اي بعد اياد كال نعسان وانة استحيت انزل..
المن مستحية راسليني
واجيلج ونزلي لا تبقين ترى يكتلج
الجوع والقوم في غفلة ههههه...
هههه يلا خلينا ننزل حتى تدليني وين اشياء
التنظيف..
دكومي كومي لاحكة ع الكراب تعاي تريكي..
طلعت وياها ونسولف وكتلها تريكت وريكتهم
خطية حسيتها فرحت كالت ايثار مايكعدني
لان يشوفني تعبانة هو يتريك
كتلها ريكته وياهم ..
ونزلنا سوا نظفنا وكلشي تسوي اساعدها
لان البيت كلللش جبير
تصميم البيت يكون باب خارجي واسع سحب
وباب جانبي صغير
اول ماتدخل ممر واسع ارضيته كرانيت وع الجانب
اكو حديقة كلش وا

سعة
مكتضة بهواي اشجار وحلوة فرهة..
وداير مداير البيت اكو طارمة بحيث ورا البيت مجال واسع
يكفي فد غرفتين
الي هو المكان نشر بي الملابس ..
واول مدخل البيت باب المطبخ ع جهة
ومدخل ثاني باب يدخل على
هول واسع وبي درجين متجاورات
كل درج يصعدك لجناح
جناحنا الايسر بي اربع غرف وداخلها حمام
وحمام خارجي موجود
والحناح الايمن بي بيت ايثار هم نفس الفصال
وبالنص هول جبير مفروش
وبنهايته مطبخ
اما الطابق الجوا بي ثلث
ديوانيات كبار وحدة
بصف الثانية
بحيث اذا انفتحتن الابواب مالتهن
تصير قاعة جبيرة..
وجوا كل درج اكو غرفتين وحمام
والمطبخ بابه ع الهول
هم واسع حيل
واكو ديوانية خارجية كلش واسعة تصير ببداية البيت
معزولة بس بيها
باب ينفتح ع الديوانية الداخل البيت..
وحمامين خارجيات كبار ..
طبعا تصميمه يجنن بس يرادله اعتناء
ومستحيل يكدر شخص واحد بالاضافة هي عدها
طفلة عمرها اربع سنوات
حسيتها طاكة روحها منهم وبالذات من عمتي
يعني تحجي عليها بحركة كلب
كتلها ميخالف واحد يسوي لله
كالت من تشوفين بعينج ماراح تلوميني..
كلت بكلبي الله يستر..
ومشى الاسبوع ع هالحال اياد ماراح للشغل بعد
بس يخلص كم شغلة بالبيت
باللابتوب
وبقية الوقت وياي مرات يجي يمي بالمطبخ
لان انة دخلت المطبخ ومحد كلي بعدج
عروس او منعني
بالاصح هم تمنو ادخل للمطبخ
وانة ماعجبني وضع كاعدة ورغد صايرة دوامة
طول اليوم تفتر حرام عليه
وهم الوصخ مااتحمله كلش ..
ابوي بين كل يومين يخابرني بس صوته
تعبان ومن اساله
يكلي فراكج مو هين احسه يختنك بعبرته
ماصدكت وسالت عمة تكول كلشي مابي
وصحته زينة بس ياجمينة
فراكج هد حيلنا
جنتي مغيرة جو البيت وامج تعبانة
تفكر بيج ومقهورة تكول خاف ماتنسعد..رغم كل ماتخابرني
اطمنها بس بعد كلب الام..

خلصت عطلتي واليوم لازم اداوم واياد هم
يروح للمعمل
كعدت من الفجر صليت ونزلت
نظفت الطابق الجوا كله
لان رغد كالت الفوك من يكعدون انة انظفه
انت عليج الجوا
عاد بلشت بي تنظيف وطلعت غسلت الحمامات
واستغلها فرصة لان فجر وهم نايمين
اكدر اكنف رداني او ارفع دشداشتي
ولله تنظيف الفجر حلووو شكد احبه..
خلصت وسويت الريوك تسع بيضات
عيون
واجبان ومربى وخيار وطماطة وحضرت السفرة
وصعدت بدلت لكيت اياد جاي يبدل
من شافني ابدل ابتسم..
باوعتله مبتسمة..ها مو عيب تباوع؟
لااا ..مو مو ..ع ع عيب..لللان ..
ج ج سم ..ط ط طفلة..
ههه لا عاد هذا قصف..
ب ب بس..ط ط طفلة..
نا ا ا ضجة..ت ت تشهي..
اممم يعني امكانياتي حلوة..؟
ت ت تخببل..
ههه كافي عيونك خليني اكمل
تبديل لا نتاخر ويبرد البيض..
ي ي يلا..ناازل..ق ق قبلج..
اوكي مااتاخر..
كملت لبس واخذت جنطتي وحذائي بيدي
ونزلت..
رحت للمطبخ لكيت بشار وايهم كاعدين..
صباح الخير شباب..
صباح الخير ست جمانة ننتظركم هسة وكتها
تتاخرون هلكد..
اشو صاير خفيف بشار بس لا عداك ايهم؟
باوعلي ايهم بضحكة..
مقبولة منج بس ترى بشار هو منحط بلادي..
باوعتلهم بطرف عيني..يلا تريكو حتى الحك
اكف واروح لدوامي...

خليتهم يتريكون واخذتلي لفة واكل وارتب
بالمطبخ
واجه عمي وايثار هم كعدو تريكو
ع ماكامو ونظفت وراهم كال اياد انتظرج
بالحديقة
خلصت شغلي واخذت جنطتي وطلعت ماهو
بالحديقة والسيارة ماكو
تمشيت للباب لكيته برا جاي ينتظرني
فتحت الباب وصعدت..
ها تاخرت عليك؟
للال..ب ببس..ح ح حميت..ال ال السييارة...
ع على..ما ما..خ خ لصتي..
اي الجو اليوم كلش مثلج بس جنها بيها مطر؟
ك ك كالو ..بل بل بلاخببار ..مممطر...
يلا زين ماعندي ملابس ع الحبل
مطر خير انشالله..
واستمرينا نسولف طول الطريق
حجيتله عن ابو منذر قبل من جان يجيني
ونفتر كم منطقة ناخذ الطالبات
ومن كتله عمو بعد ماروح وياك لان تغير
طريقي شكد ضاج خطية..
لحد ماوصلنا للمدرسة قبل لا انزل
سالني شوكت يجيلي
كتله انة اخابرك شوكت مااخلص..
ونزلت من السيارة ..سديت الباب وانداريت
تحسين منتجي ع سيارته
ومكتف ايده يباوع بنظرات
فوق الاستهزاء او عدم التصديق
عبرت من يمه لان قريب الباب مالت
المدرسة واكف
ضحك باستهزاء ومشى لسيارته..
مشيت وتصرفت كاني ماشفت احد
واول دخلتي للمدرسة
لاكيت رجاء..شافتني واجتني ركض..
يااابعد عمري ياهلا بالحنينة شكد مشتاقتلج..
حضنتني وتبوس بيه وترجع تحضن
وتكول ولج وحشة كلش بدونج..
اخذتها ورحنا جوا اول مادكيت باب المدير
سلمت عليه وباركلي
والمعاونة هم باركتلي وكلولي لو ماخذة
اجازة ..
مابقى بس اسبوع لامتحانات نصف السنة
وراها نكعد ..
ههه باوع استاذ للمدرسة المجدة هسه لو هنادي
جانت اخذت حتى امومة هم..
ههههه لا تشجعوني اجدد اجازتي..
لا ماتسويها..
ههه يلا عن اذنكم..
طلعت رجاء كالت رايحة اكمل شغلي
بعدين نتشاوف..
دخلت لغرفة المدرسات وهجمن عليه
صار غزو مغولي ماشفت دربي
بعد السلام والضحك ووكاحتهم
اجت المعاونة كالت يابه ست جمانة
اليوم ع شرفج انطيت الطالبات اول
درسين استراحة..
والبنات محضريلج مفاجأة وهدية زواجج
اخذو وقتكم هسه
حتى الدرس الثالث نكمل دروسنا ..
شكرا ست جا

ي تخجلوني كلش..
تستاهلين كل خير ست انت وردة..
الله يخليج ست..
طلعت هي والبنات حضرو الميز وجايبين
كيكة وطابعير بيها صورتي وياهم بزواجي
يخببل شكلها
وعصير وكرزات وصارت كعدة توب
اجيت اخابر رجاء كالت زمن خابرتها
هسه تجي..
تجمعنا كلنا بسوالف ولمة حلوة وكصيتنا الكيكة
كلنا متجمعين والبنات
وحدة مادة ايدها من فوك وحدة من الطرف
صدك لحظات حلوة وتفرحنا
وراها كعدنا ناكل وهم ودو للمدير والمعاونة
وبقية الكادر
وانطوني علبة كالو فتحيها..
فتحتها لكيت مشتريلي سوار ناعم وبنصه
عين زركة..
حيل عجبني ورغم بقيت احجي عليهم لان جايبيلي
ذهب
كالو الكل شارك بيها ورجاء هي الراحت جابتها..
باوعتلها وضحكت..
ها ولج صايرة تشترين ذهب..
غمزتلي وحجت بهدوء..
شبكنا الحكومة وصرنا
ارايب..
ههههه عمي الحكومة خوش خرستلج البغل
العندج..
اوف سكتي هذا مايخرس الا ينكص لسانه..
شبي بعد؟
بعدين اسولفلج البي صاير البيت جحيم
بس ادعيلي الله يخلصني..
دحجي شبيج؟
بعدين احسن..
دسولفي عاد فتيتي مرارتي...
خية البيك مصاحبلة وحدة جبيرة اكبر منه..
يا!!!وتالي؟
اااه ياجمانة شحجي ..يريد يتزوجها وهي
ارملة وعدها ولد واحد متزوج
وهي حالتها زينة وهالايام تصرف
عليه صرف ماصاير
وهو تعدل وصاير اللبس والعطور والكشخة..
استغفر الله اكلج هذا رجلج هم اكو وحدة تباوعله..
لا حبيبة تعاي شوفي هسه ما يكل لفلك ولك..
زين عركته هسه وياج ع شنو؟
يكلي روحي لاهلج ماريدج بعد اريد اتزوجها
واروح اكعد ببيتها..
استغفر الله وانت شتكولين؟
انة مخليته براحته يحجي لان ماضل شي
لامتحانات الجهال
وماريد وضعهم يتخربط ويرسبون
خل يخلصون امتحانات واشوفله حل..
الله يساعدج ويشيل عنج...
ورا ماخلصنا حفلتنا الصغيرة رحنا لدروسنا
والطالبات شكد جايبيلي هدايا
وانة انحرجت اخذهن بس كالو استأذنا من
المعاونة وجبنا لان فرحانين بيج
بيومها جمعت ثلث علاكات كبار مليانة
مغلفات مال هدايا..
قبل لا نخلص خابرت اياد حتى مايتاخر عليه
صدك ع ماكملت درسي
وجاي اجمع اغراضي دك عليه..
طلعت وشايلة العلاكات شافني ابو منذر
باركلي ويكلي شكد مكانج فارغ
واخذ مني العلاكات خطية رغم ماقبلت
وصلهن للسيارة وسلم ع اياد من الجامة
بس اياد بقى يكلب الوان خطية مايكدر
يحجي وينحرج
حرك شفايف ع كيف ع اساس جاوب
هاي الحيلة علمتها اله من ينحرج
وبقى يسويها وتنجح..
ورا ماراح ابو منذر باوعلي وابتسم..
ه ه هذا ..ال ال حجي..م م مو..ر راحة..هههه...
هههه هو شباقي بي مسكين..
ههه..ش ش نو..ه ه العلاكات؟
ذولي هدايا من طالباتي خطية
وهذا السوار من الكادر التدريسي متشاركين..
ح ح حقهم..ي ي يحبوج..
ان ان انت..ت ت تسكنين..بل بل بلكلب...
اروح فدوة لكلبك..
مد ايده لزم ايدي حيل وبقى يسوق
لحد ماوصلنا للبيت خله السيارة برا
مادخلها..
دخلنا جوا شفت بباب المطبخ احذية نسائية
التفتت لاياد سالته منو عدنا
كال مادري ماجيت للبيت بعد من الشغل
الج كبل..
دخلنا جوا هو مشى كدامي دخل وانة
دخلت وراه
الهول فارغ محد بي
خليت وصعدت للغرفة بدلت وغسلت
هو كال بس صلى كال
نعسان كلش راح انام وكعديني
بتلاثة كتله تمام..
اخذت تلفوني وطلعت..خابرت رغد
ماكو ماجاوبت
رحت تمشيت ليم غرفتها دكيت الباب
محد
هي هيج وقت رجلها بالشغل يعني وحدها
بس استحيت افتح الباب
رجعت دكيت محد..
لفت نظري صوت !!مريب و..صوت مو طبيعي
خليت اذني ع بابهم هدوء..
مشيت للغرف البقية
قبل لا اوصل لاخر غرفة وكفت وبصراحة
حيلي كله رجف
معقولة الجاي اسمعه حقيقي!!!
صوت تأوهات يخززي بس لا هذا
مو حقيقي !!

للحكاية بقية

فراشات تخشى الاحتراق
الجزء الثالث عشر

بقيت اتسمع هذا الصوت مو حقيقة
ويا كلمات اجنبية؟
يمكن فلم هذا واحد مشغلة لان صوت البنية
ولغتها انكليزي
بس انة مدري شبيه كمت ارجف ولعبت نفسي
رحت نزلت بسرعة
دخلت للمطبخ شفت رغد طابخة فتحت
الثلاجة حضرت مواد الزلاطة
وعزلت الجدوره ع جهة ونكعت الطباخ
بمزيل دهون
كل يومية انكع شوية وجاي يجيب نتيجة زين..
وانة اثرم بالزلاطة وافكر بالصوت واتعوذ
من الشيطان
منو هذا المشغلة وبصوت عالي معناها يعرف
بينا ماكو ورغد يم الخطار
استغفر الله ياربي شلون يتحملون ذنب زنا العين
ذول
لازم اسال رغد منو غرفته يم
غرفتهم ..
توني كمت اغسل ايدي ودخلت عمتي ورغد
سلمت عليهم وعمتي كالت..
هاي شوكت اجيتي ..
ماصارلي نص ساعة ..
اي جان اجيتي سلمتي ع جارتنا اجت تبارك
وماشافتج
يا شكد عيب ..مو انة من اجيت مالكيت
احد ودكيت على رغد ماكو..
عاد بيش دكيتي ع رغد بصوندة ههه
عيني كولي خابرت دكيت شنووو..
انة استغربت هاي شبيها !!حجت رغد
بسرعة وبقصد..
ياا صدك هذا تلفوني شكد داكه ولا ادري
هي خلصت وراحت جوا..
بس طلعت من الطبخ رغد رفعت ايدها ودعت
ربي جليطة صغيرة وخلصنا منها..
نزلت ايدها وكتلها حراام ولج مو زين واحد
يدعي..
وداعتج ربل لا ياثر بيها دعاء ولا بهاء..
هههه كليلي وين جنتو بيا ديوانية؟
الاولى خية بس الباب مسدود وماينسمع الصوت
بس شبيج وجهج اصفر جنج
مريضة؟؟
لزمت خدي وتلمسته..هيج امبين عليه؟
كلش وجهج شبيج ولج شصاير؟
باوعت للباب ورجعت باوعتلها..اذا احجي
خو محد يسمع؟
لا محد نعامة راحت لغرفتها وعمي بالغرفة
والولد بعدهم بالكلية..
ا..باعي ماردت احجي لان واجبي استر
بس هذا شي هين يعني..
شبيج ولج؟؟
باعي الغرفة اليمكم غرفة منو؟
غدير غدرتها الوجعة..
ههه لسانج يكنس ويرش ..حجيتها وانة
اخبط الوان..
باوعتلي رغد بخوف..شبيها جمانة
شنو شفتي؟؟
بصراحة...ماشفت بس سمعت..
يو عادي اذا سمعتي دوم اسمعها تحاجي ولد
بالتلفون وكم مرة حذرتها
تالي كلت يطبها حريشي..
يااا عزااا صدك؟؟الله يستر الله يستر
مو خطية اهلها واخوانها تنزل راسهم..
لا تخافين تطيح وهي واكفة خافي
ع راسج انت
هذا كلبج الطيب راح يفين حظج
دحجي شبيها عاد؟؟
ا..شسمه سمعت صوت وحدة اجنبية ووواستغفر الله..
دحجي يحظي راح تموتين عليه وابتلي
بيج كملي..
استغفر الله سمعت من غرفتها صوت تأوهات
يمكن فلم مو زين..
يو صدك ع نياتج وخايفة ومرعوبة وجهج
اصفر
خايبة هاي لاكفتها بالمية مرة بالجرم المشهود
والفلم مشتغل..
لا تكولين!!
لا خية هذا الصدك هي الصبح لان محد
هنا تاخذ راحتها
وانة الصدك لو شتسوي كلت مالي علاقة
هسه حتى من اشوفها تخابر
لو شما تسوي شعليه..
تشوفينها يومية غايبة عن دوامها والام ملتهية
ولا تدري بيها وين ..
بس ترى مراهقة هي وتحتاج النصح
بهيج فترة خصوصا..
نصحت بس شدت وياي وبقت توز بنعامة
هي نعامة ترى بس ماعدها رگبة..
هههه عاد عوفيها بحالها احنا وين نحجي
وانت طفرتيلها..
طلرت للكبر كولي امين ..
كافي رغد حملتيني غيبة حمال ولج حرام..
لا مو حرام بيهم ذولي
تعاي انة رجلي هسه على جية خل نصب
فد مرة وناكل..
لا مو اياد نام كال كعديني بثلاثة انة كلت
انتظرك ونتغدا سوا..
اذا هيج روحي ارتاحي بغرفتج..
انة راح اغدي عمي وعمتي ورجلي وبتي
واغسل مواعينه واروح ارتاحلي شوية..
خوش اذا تحتاجين شي راسليني انة رايحة
اتمدد..
ماتقصرين حبيبة اخذي راحتج..
صدك بتج وين؟
بتي النقال بيدها ومكابلة جدها وكاعدة
مادري بيها ولا اسمع حسها اذا لزمته..
يااا ليش تخليها هيج ولج مو زين..
سكتي خية قابل بيدي نعامة الفكر حطته
بيدها وخربتها..
هم رجعنا لنعامة اروح احسن هههه...
خليتها بالمطبخ وطلعت البيت هدوء
صعدت الدرج وعيني ع الجهة اليمنى
مدري شبيه رجفت من باوعت لجهة
غرفة غدير..
فتت للغرفة ظلمة لان الجو مغيم كلش
ومنا مطفي الضوا ودافية حيل
كلت اخذلي غفة شوية لان متعودة ع نومة الظهر..
بدلت ملابسي بدشداشة خفيفة قصيرة
للركبة وجواريب صوف حاكتهن
الي عمة حنة ..
واجيت للفراش
اياد نايم وناطي ظهر..
تمددت يمه اريد احضنه ورعدت الدنيا
شكد احب صوت الرعيد
خل اكوم اباوع هسه تمطر وانة احب
اباوع للمطر وادعي..
كمت شلت البردة اريد اردها ماتنرد
مشكلة من فوك بقراصات
رحت جبتلي شريط ولفيتها كلها ورفعتها
الشباك واسع تقريبا ماخذ اغلب الحايط
باوعت للمنظر يجنن
البيوت الكدامنا كلها بيها اشجار عالية
وحديقتنا واشجارها صاير منظر مريح
للاعصاب
بعد يوميه افتحها حتى تتهوى الغرفة وهم
منظر حلوو وهمزين الجام مضلل مايبين..
جبت الكرسي وخليته يم الشباك وصافنة ع
الدنيا تبرق وترعد
الشجر ينحني ويكوم وي كل هبة هوى عالية..
بالضبط مثل النشر من يتعرض لبلاء
يحني بس يرجع يستقيم ويوكف
ع رجليه وكله بمشيئة رب العالمين..
بدت الدنيا تمطر ناعم والشارع هدووء
منظر يريح النفس فعلا ونعسني
بالزايد
كمت جبت مخدة وخليتها ع ذراع الكرسي
وخليت راسي عليها
يرادلي كرسي هزاز وي هذا المنظر يصير
خوش جو مال ا

ستراحة..
بقيت اباوع وغلبني النعاس واجت لقطات
واحداث ماصايرة بين عيوني
هالمرة شفت نفسي شايلة طفل
خطفت صورة ثانية اياد وجهه حيل مريض
هزيت راسي حتى تروح هاللقطة
ماردت خيالي يصورها ..
بعدها غفيت...
فززني اياد ايده ع جتفي ينده بيه..
ج ج جمانة..ل يش..م م مكسرة ..ررروحج..هنا..
باوعتله مغوش شوية ركزت بي وكعدت..
ها هنا المنظر حلو بقيت اباوع وغفيت ..
ههه ..ا ا اصلا..ج جو..ك ك كئيب..حجاها وعقج
نونته..
كمت من الكرسي وسالته..ليش مامنشف وجهك
باردة لا تتمرض..
هو عصر عيونه حيل ورفع راسه ..
لزم صفحته قوي وطاح بالكاع..
كعدت يمه واباوع بوجهه خايفة..شبييك اياد؟؟
شنو يوجعك..
ب بعد..م م م اكدر..حجاها وصرخ بصوت عالي
تمدد بالكاع ..
باوعتله وجهه صار اصفر ويصب عرك
غاب عن الوعي بين ايدي
العرك اخذه وشفايفه ابيضت..
اضرب خدوده اريده يجاوب ماكو
عفته بالكاع وكمت لبست عبايتي
وطلعت اركض لرغد..
دكيت الباب حيل بسرعة طلعت تركض
وايثار اجه يصيح من جوا شكوو شبييكم؟؟
جريت نفس بالكوة وكتلها..
اياد تخربط مدري شبي عرك ووجهه شحب..
صاح ايثار اجيته لا تخافين..
على صوتنا اجو ايهم وبشار وغدير
كلهم اجو وياي للغرفة..
لبسو تشيرته وبنطرونه كوة وشالو
بس طلعو من الغرفة لبست جبتي وحجابي
وركضت وراهم
اجه ايثار ويانا وطلعنا بي للمستشفى
اباوع لايثار ساكت ماحجه..
بس بشار كال كله منه ماياخذ دواه..

سالته وانة حاسة اياد ضام شي..
يادوا بشار اياد شبي؟؟؟
جاوبني ايثار بتنهيدة..
كلياته من ورا الحادث تعبن ووحدة منهن
على وشك توكف..
انعصر كلبي وانة اسمع حجي ايثار
هذا كله واياد ماكلي
ليش ماحجه واشوفه موجوع مرات
اسأله يكول مابيه شي..
على ماوصلنا للمستشفى وانة اتحسس
نبضه ضعيف
نزلو الولد ثلاثتهم وسندو واخذو جوا
بقيت برا انتظر
مسباحي بجيبي واردد ..امن يجيب المضطر
اذا دعاه ويكشف السوء..
بعد وقت طويل مر والولد يمي كاعدين
اجه ايثار كال الكلية واكفة لازم تنشال
هنا احسها ضاكت عليه الدنيا
شبيها وي هذا الولد
مارتاح من يوم العرفته..
حاجاني ايثار ويخفف عني ..كولي ياالله
جمانة انت مؤمنة وادعيله
هو ضم عليج وماقبل نحجي يكول كافي
يومية ماذيها بامراضي
مارادج تعرفين حتى لا تقلقين..
بس انة مرته اذا مااوكفله منو اله ..
الله يوكفله انشالله ويطلع بسلامة..حجاها وكال لبشار..
بشار انت ابقى هنا اني اخذ جمانة للبيت
واجيب المستمسكات والفلوس واجي..
انة كمت ويا وسالته..يعني ماكدر اشوفه هسه؟
لا ماتكدرين ولا يضل بالج ..
امشينا هسه انطيني مستمسكاته حتى
انطي اهلي خبر وننقله للخاص ونسوي العملية
ويطلع سلامات لا تخافين عليه..
الله يسهل انشالله..
رجعت وي بشار للبيت وانة اطلب من ربي
الصبر
هذا ابتلاء ولازم اصبر مو اجزع من اول اختبار
الحمدلله ع كل حال...
رجعنا للبيت وكت غروب ..دخلنا رغد كاعدة
بالمطبخ من شافتنا كامت واجت يمي ..
الله يشافيه ويرجعه الج جمونة انشالله
شدة وتزول ..
الله ارحم الراحمين ادعيله فدوة..
حاجاها ايثار..
رغد تعاي للغرفة وجمانة عفية بس
طلعي مستمسكاته..
صعدت للغرفة طلعت جنطة المستمسكات
واستغفر ربي وادعي
يعني ام وكت غروب وابنج بين الحياة
والموت ونايمة لهسه ولا اصلا درت بي
استغفر الله ربي شنو من كلب
معقولة ماحست..
اخذت اوراقه انطيتها لايثار وكال انة اطمنج
انت صلي وادعيله يكوم بسلامة
ومن يكعد الحجي كلوله
ماكدرت اكعده لان هو ماله خلك اليوم..
كتله انشالله ..
ومر ع دخلة اياد للمستشفى فترة طويلة
من بعد فحوصات واجراءات
صارت العملية
ابوي ومعين بيومها اجو وياي
بس ابوي وضعه زاد همي
وجهه ذابل واصفر وضعفان
ومن اساله شبيك يكول كلشي مابيه..
روح افحص ..
فحصت وصحتي احسن منج..
حسيت نفسي مجهدة هاي الايام وحتى الدوام
اخذت اجازة
مرن شهرين ع عمليته شفت بيهن الويل
جانت مناعته صفر
اكله لازم نظام معين وهو كلش قل اكله
اجبره ياكل بالكوة...
من بين الركضة والتعب والقلق
عرفت نفسي حامل
خبر زيد املي وثبت ثقتي بربي شما ضاكت
تفرج
اياد من بعد الخبر كلش فرح وحسيت صحته
تحسنت اكثر..
جان الكل فرحان بهذا الخبر..
بس خلال هالاشهر معاملة امه تعتبتني كلش
تنتقد كل تصرف وكل حجاية
مني واسمعها  اكثر من مرة تكول معيدية
بس ردت تحجيها كدامي حتى افهمها
المعيدي يعني الاصلي ..مو اللفو مثلها
واشرحلها كلمةمعيدي
حتى مرة ثانية تحترمها من تلفظها
بس ماتحجيها كدامي..
اليوم دخلت بشهري الرابع ..واياد الحمدلله
صحته تحسنت وكام ع حيله..
الي ساعده هالقترة وخصوصا بشغله
لان عمي ورا مرض اياد زاد مرضه
عنده انسداد بالشرايين
وبشار مرحلة اخيرة والتهى بدراسته
لان مابقاله بس شهرين للامتحانات..
بهاي الفترة طول ماهو كاعد بالبيت اقاربهم
الي يصير جيرانه هو ساعده
ولزم مكانه بالمعمل العصر
لان الصبح يداوم ..
جان كلش خوش انسان ومحترم ومثقف
ابد مايشبههم ولا جنه
اقارب عمتي ...
وحتى بتعامله وياي رسمي حيل
رغم وي رغد اشوف بينهم ميانة
بس انة يمكن لان جديدة ..
وبعده مامتعود عليه..
جا

نت الساعة بالسبعة المغرب موعد
رجعة اياد من الشغل
لان راح لشغله بعد غياب طويل..
كاعدة اسوي عشا ورغد اليوم عيد زواجهم
ودت بتها لاهلها وطلعو هي وايثار..
دخلت عمتي للمطبخ ..ها جومانة عشاج
خلص بعده؟
ها عمة جاي اكلي مابقىشيويكمل..
يلا استعجلي نريد نطلع انة وعمج..
اي عشر دقايق ويكمل..
اي عفية خالة..طبعا لازم تكول خالة
حتى تذكرني اكلها خالة مو عمة
بس انة مااكلها..
حضرت السفرة وخابرت ايهم وبشار
نزلو وصبيت العشا وكعدو..
كال عمي..ها بابا كعدي تعشي
ويانا..
لا عمو بالعافية ناكل سوا انة واياد..
بارك الله بيج بنتي..
مشكور عمو..
عمتي باعتلي بخزرة وكلتله ..يلاا خف ايدك
خنروح ..
ورا شوية خلصو والولد كامو هم انة جاي انظف
المطبخ ودخل اياد..
ه ه لاو..
الله يساعدك هلا بيك..تاخرت؟
اي اي اي..ص ص صارلي..ف ف فترة..
ع ع عايف ..ال ال الشششغل..
ه ه هواي ..اش ش ياء..مت مت متوقفة...
ولوو.. ج ج ياد..ما ما ما ..ق ق قصر..
اي صحيح الله يوفقه ذيك الفترة
شال عنك حمل..
اكعد خل نتعشى انة جعت وابنك هم جاع..
هههه..ا ح ح حبكم..ث ث ثنينكم..
غير احنا نموت عليك وماناكل الا وياك..
واحنا نحجي اجه بشار مبدل ويريد يطلع..
اني طالع جامخانة محتاجة شي؟
اي محتاجة تعدد اسمي يااخي شوهتة..
اي مو انت هسه بيج طفل يعني صدك
جامخانة ومضموم ببطنها طفل..
باوعتله بنظرات مستهزاة..الله يهديك وين مولي؟
رايح اشوف الفرخة..طبعا هو عنده علاقة بجيرانه
كله يسميها الفرخة..
اصغر منه بسنة وحدة ومامكملة دراسة
اسمها طيبة بس كلش وكحة ولسان
اكثر من مرة محاجيتها هو يطلب مني
لان رغد متعاركة وياها..
بس حيل لسان هي وهو عنده علاقه بيها صارلهم سنتين
وناوي يخطبها ورا مايتخرج..
صدك وشلون تشوفها بهالليل؟
طالعين للبصرة العائلي هي وبيت خالتها وهناك
يتم التنسيق..
اي زين مكان عام احسن..
لا تشيلين هم سيارة موجودة..
باوعله اياد وحاجاه..
و ولي يلااا...د د دوختنا..
هو ضحك وطلع...
وانة واياد كملنا عشانا صعدنا لان اهله
طلعو
انطيته علاجه وسويتله عصير شربه وتمدد..
عصرتله راسه وكصته شوية وغفى
الحمدلله شوية متحسن وجهه هالاته قلت ..
كمت طفيت الضوا ورديت البردة وفتحت الشباك
لان هوا كلش حلو
طلعت من الغرفة اريد اخابر عمة مشتاقة احاجيها
جانت الاضوية الفوك مطفية..
وانة صارت بيه سولة بس اطلع افتحها..
كلت انزل للحديقة اكعد هم اغير مزاجي وهم اخابر..
فتحت ضوا الهول جان مسدود..
انتبهت للغرفة الي تصير بصف
غرفة عمتي ضواها مفتوح..
احنا حاطين بيها فراش وبيها
بوفية جبيرة بيها الاغراض
محد يدخللها هواي واصلا صايرة بالنهاية
جوا الدرج..
رحت اريد اسد ضواها كلش وصلت
اريد افتح الباب
واسمع صوت بوس بس هالمرة الصوت
حقيقي!!

للحكاية بقية