!
سجى:هسه صرت هاي موو؟ اني اشرف منك ومنها! سكيييير!
ردت الزمها.. صارت وره ابويه..
-اني اعلمج.. !
خليت وطلعت..
ابوي ظل يصيح:اطلع بره ادبسز! اطلع!
ظليت افتر بالسياره.. رحت للمجمع شويه وطلعت..
صارت ليل..
ماكو وقت بعد.. هسه لازم اطلب اسيل.
خابرت ع هيثم..
بعد السلام..
كال:منك من الشيطان! اول تالي تخابر؟
-لا عندي موضوع وياك..اكدر اشوفك؟
كال:اي تعال.. اني بالبيت..
-اوكي.. مع السلامة..
وصلت الهم.. دخلت الاستقبال..
تلكاني وسلم عليه..
كعدنا..
هيثم:خير كلت عندك موضوع؟
-اي.. راح احجي الك كبل.. رايد اخطب اسيل..
هيثم:هله! شتحجي انته؟
-موعيب ولاحرام! طلبتهه منك بالحلال!
هيثم:بس انته متزوج؟!
-وشنو يعني؟ من عين باجر اطلك!
هيثم:ابوك يدري؟ اهلك يدرون؟
-لا.. وشعليك بيهم! اني رايدها ع سنه الله ورسوله.. وميهمني الحجي..
هيثم:اكلك شو انته تحجي معلك! شنو كوتره انطيها الك هيج! هاي سالفه احجيها وي روحك!
-ليش؟ شنو الي يمنعك!
هيثم:روح تصافه وي اهلك وجيبهم وتعال!  وانطيهه الك! واله اني شعندي بوحده مطلكه!
-خوش.. واني هم اكلك.. اذا ماقبلو اهلي واذا انت ماقبلت راح اخذها! هااا داكلك بس حتى يصير عندك علم!
هيثم:ههههه.. كوم يابه كوم! روح جيب ابوك وتعال اخطب مو هيج الخطبه تصير!
-ماشي.. مع السلامة..
خليت وطلعت..
افترت بيه الدنيا.. وين اروح.. رجعت للبيت..
ماردت اصعد الغرفه واشوف سجى..
لان كرهتها وطلعت من عيني من حجت ع اسيل..
ظليت امدد بالصاله واتفرج تلفزيون..
طلع ابوي بالليل..:هاي شعدك هنا! ولك انته مو بشر؟! كوم روح لغرفتك!
-اهووووو..
ابوي:وجعو! كوم يله! مرتك حامل ومتخربطه !
حسيت ضربه واجت بنص كلبي..
حامل؟!
ابوي:اي! وكعت وراك وتخربطت! واخذناهه للمستشفى وطلعت حامل!
صفنت
ليش يارب! مكافي اني متعذب راح يجي طفل ماله ذنب!
ابوي:كوم روح الها!
كلت :راح اطلكها! مااريدها.!
ابوي:شنوو؟
-راح اطلك! مااريدها! ملييييت!
ابوي:شارب مو؟
-لا.. واعي كلش زين..
ابوي:شوف.. فكرة وشيلها من راسك! مال طلاك ماكووو! تبقى وياهه.. واذا ماعجبك انت تطلع من البيت وهي تبقى هنا!
-اخ لو اعرف شمسويتلكم هل سجى هاي؟
ابوي:ممسويه شي! ولان هي ممسويه شي حبيناهه وبنت اوادم!
-يابه.. راح اتزوج اسيل!
ابوي:اكلك شو ماتعرف تحجي! تعوف مرتك وتاخذ المطلكه! ضارب عقلك لو شارب كلي؟!
صحت:ادري وهي بنيه ماقبلتو! وهي مطلكه ماقبلتو! لاتجبروني اخذها غصبا عليكم!
ابوي:والله متفيدك! وحرام عليك سجى شنو ذنبهه!
طلعت امي..
امي:شعدكم! ليش تصيحون؟!
ابوي:ابنج يريد يتزوج !
امي:اي مو مرتك عميه لو عوجه لو ماتخلف حتى تروح تزوج!
صفنت بامي..:تدرين كله منج؟! دمرتينا! حسبي الله عليكم!
امي:ليش تدعي علينا! شبيييك! اسيل شمسويتلك! مشربتك شي؟ لالا اني باجر اروح للشيخ واشوف شمسويتلك!
ابوي:اي والله روحي.. ابنج مو طبيعي كلش..
امي:اي عاد اسويله حرز شي؟!
عفتهم وصعدت..
فتحت باب الغرفه.. شفت سجى نايمه.. شابكه بطنها ونايمه. تذكرت المصيبه الي جابتها الي..
ليش صار هل طفل.. اخخ ليش كلشي عكس وياي!
حظي هذا لو حظج يااسيل..
كلما اقرب خطوه منج نبتعد الف..
شمرت الي مخده بالكاع ونمت..
ثاني يوم كعدت متأخر..
بقيت امدد.. اخخ.. شمحلى هاي النومة لو اسيل يمي..
شمحلاهه لو هي يمي.. وكعدنا هل كعده المتأخره..
اباوع بعيونها.. اشبع شوف منها.. احضنها.. ابوسها..
اخ.. كضيتها اتحسر بيج.. ولشوووكت..
وره شوي..
انفتح الباب ودخلت امي.. بيدها مبخره والدخان يفتر وياهه..
امي:بسم الله الرحمن الرحيم.. اللهم صل ع محمد..
بسم الله الرحمن الرحيم..
-خير شكو؟
ظلت مستمره تبخر بالغرفه.. اجت يم راسي وبدت تقره ايات..
-صدك جذب! كافي عاد اختنكت!
اصيح وهي ولا كأن.. مستمره تبخر وتفتر..
خليت وكمت من مكاني..
ظليت اصيح:مو حاله هاي! اختنكنا كافي!
دخلت حمام.. سبحت وطلعت..
همزين راحت امي..
لبست ونزلت..
العجيب سجى ماكو اليوم.. الله ياخذها..
امي:يمه ترى سجى راحت يم امها.. ترتاح كم يوم وترجع..
-ولاتجي احسن!
امي:كش ! شنو هل فال! تعبانه وخلها ترتاح كم يوم.. وين الله وتجيب النا ولد..!
-الي يسمعج يكول مشايفه احفاد! مو ذاك ابن فلاح!
امي:يمه جهالك غير شكل عندي..
-ههه والله ياالله..
تريكت وطلعت للمجمع..
ساعات واني افكر.. باسيل.. بمصير الطفل الي جاي..
بسجى.. مالكيت حل يرضي الكل..
وماكو غيرها.. اتزوج اسيل بدون علمهم..
بس جيب الي يقنع اسيل..
لازم ارجع ازورهم .. عسى ولعل اكدر اقنعها..
ومرت ايام..
مابيهه جديد..
سجى يم اهلها.. وكلش ارتاحيت من هل ناحيه..
ادخل الغرفه راسي بارد.. ماكو احد يلغي.. ولااحد يغث..
واهلي مكيفين بيه ساكت ومجايب اسم اسيل ومنا سجى حامل ومخبوصين.. بين يوم والثاني رايحين الها..
واكثر من مره رادو اروح وياهم..
واني الماصدكت اخلص منها يردون اروح الها..
وهي كانت تتصل بيه.. وع المزاج..
مرات اجاوبهه.. تسألني شلونك؟ اخبارك؟مشتاقه ! ليش ماتجي..
وكنت اطلع الها الف عذر..
وبيوم من الايام كالت اريد تجي

ني.. كافي بعد مااتحمل بعدك..
كلت الها بعد مو هسه .. ابقي ارتاحي..
ظلت تبجي وتتوسل تعال ماتعال..
كوه صرفتها وسديت الخط..
بليلتها اتصلت بفيصل.. بعد السلام .. كلت اله راح اجي يمكم..
رحب بيه وكال هلا بيك منتظرك..
الشوك واللهفه هي الاخذتني..
وصلت هناك.. كعدت يمهم ساعات..
سولفنا وشربنا جاي وخلصنا جكاير .. وبعدني مشايفها..
وشلون راح اشوفها اذا هي مخليها بقفص..
فيصل كام يثاوب .. وقبلها هيثم راح جوه..
ترخصت منه وطلعت..
بطرف لساني الكلمة.. بس مكدرت اطلعها..
ردت اكوله اريد اشوف اسيل..
مادري شلون سلمت وطلعت بدون مااشوفهه..
سويت نفسي راح اروح.. وبس دخل فيصل .. بقيت كاعد بالسياره.. اراقب من بعيد..
تأخر الوقت.. تقريبا..2 بليل..
بعد كلبي ميتحمل.. نزلت من السياره..
بقيت اتلفت.. لااحد يشوف واعم ع اسيل..
انداريت ع شباك غرفتها..
دكيت ع كيف.. همست..اسيييل..
حبيبتي ..
اكثر من مره دكيت..
وايست ردت اروح..
تالي كعدت بالكاع.. يم الشباك..
اسيل..
بعد ماكالو ع الخطبه.. ظليت ايام منتظره .. ماكو خبر..
وبالبيت ماكو شي جديد.. الوضع ع حاله..
مابين عليهم شي..
تكطعت تكطع.. كأنو اني عايزه وجابولي طاري الخطبه..
ياما انتظرت.. وكل شي ماكو.. مااعرف ليش هيج صار..
وبليله.. كلي فيصل سوي جاي..
وبالعاده محد يجي خطار غير الاقارب..
سويت.. اصب واكول هذا مأمون الهنا؟ زين اذا هو صدك من ياواحد راح يشرب.. من هذا لو هذا لو هذا..
راح يعرف اني السويت الجاي؟
اخ شكد مشتاقه اشوف عيونك الحلوه..
بس لااا.. مراح انطي مجال لنفسي..
هو متزوج.. مو الي .. ولا يمكن يصير الي..
راح ادوس ع نفسي.. وراح اتحمل.. مااريد ادمر احد..
لان اني اكثر الناس اعرف شنو الدمار..
وشنو الوجع..
سويته الهم.. غسلت وجهي واسناني ورحت للغرفه نمت..
فزيت ع صوت.. تهيأ لي صوت مأمون .. صحيت اكثر.. وصلت يم الشباك.. تأكدت هو.. يصيح اسيل.. حبيبتي..
حسيت كلبي ورم..
ظليت اسمعه.. متردده افتح لو لا..
لا ماافتح.. وعدت نفسي .. وراح ادوس ع هذا الحب الي ماعاد يخليني ارتاح.. بس تعب وقهر..
كعدت يم الشباك.. اسمع يدك ويصيح اسمي.. واحس العبره اكلت كلبي.. شبعت بجي واني يم الحايط.. كوه كنت اكتم صوتي لايطلع وانفضح.. بكلبي اكله روح..
روح مو هذا مكانك.. روح مرتك تنتظرك.. نيالها ونيال اليشوف عيونك.. نيالها يوميه تصبح بيك.. وتمسي..
واني الخلصتها اتحسر!
ظليت مقرفصه يم الحايط ودموعي ماسكتت..

يتبع...

#شُتات_انثى
الخامس والعشرون

اسيل..
مر وقت واني ع نفس حالي.. مقرفصه وبس ابجي..
شلون بيه منك مأمون .. صرت الهوى الاتنفسه.
شلون اكدر اعوفك شلون؟!
اسمع صوته تحرك.. وكف يم الشباك وكال..
مأمون:حبيبتي اني رايح.. لتخافين من شي.. كل مخفتي اتذكري اني موجود مااعوفج..
انعصرت عصر بحجايته.. بكلبي اكله ولك روح كافي تعذب بيه..
تالي خله وراح.. شبعت بجي وقهر ورا..
لحد ماكالت عيوني بس يله سكتت ونمت..
ومرت ايام.. ماشفته ..
بس اجاني شر هوااااي..
كنت دامسح البيت.. اجه هيثم كاب نار..
جر السطل وشمره من ايدي..
كال:ولج شعندج وي مأمون أنتِ؟ شضامه عليناااا!
صفنت بوجهه.. شعرف وهيج يسوي..
زين شحجي؟ عزا بس لا شافه ذاك اليوم من اجه يم الغرفه!
رجع عاط بيه.. حتى دمي نشف بعروكي..
هيثم:ولج احجيييي! بنت الكواد احجي لااطيح حظج هسه!
اجت حنان تركض من المطبخ:ها شكو؟!
صفنت بوجه حنان.. توسلتها بنظرتي عسى ولعل تنقذني..
هيثم:ليش تباوعين الها؟ تعرف شي؟
-هيثم ماعندي شي والله!
هيثم كبل نط:اكلي خرااا! ادبسز!
ضربني طراك وراهه.. تعودت ايده عليه بعد ميكدر ميضربني..
صرخت ودموعي اطشرت ع وجهي:واني شسويت وهيج تسوي بيه؟!
حنان:شكو؟ شبيك؟
هيثم:هاي الادبسز! اذا بعد شفتها كبالي قسما بالله اعدمهه! سمعتي! اعدمهه! طايحه الحظ! ولج اني تجي الناس تكلي اختك عاشكه ابن عمها المتزوج ومخربه كل حياته ومطمعته بيهه بزواج!
بلعت ريك.. حتى عيني سكتت من الدمع.. ظليت بس ارجف..
منين عرف ومنو الي اجه وحاجاه..
حنان:استهدي بالله! منو الي كالك هل حجي؟!
هيثم:اخو مرت مأمون ! اجه يشكيلي ويكلي اختنا زعلانه من هل سالفه! ولج متت بدمي! واني صوجي مخليهه عدله لهسه! اخ يابه ..
حنان اشرتلي روحي لغرفتج.. كبل درت وجهي ورحت..
ظل هو يعيط.. وحجه عن اخو سجى شكايل اله وشنو شاكي.. كايل اله.. من وره اختك اختي راح تطلك وعلاقتهه موزينه برجلهه .. وهي حامل والطفل شنو ذنبه يكبر بعيد عن اهله وشلون تخلووهه تلتقي بي .. كل شغله سمعتها وكفت شعر راسي..
ليش اني هيج حظي؟ فوك ضيم الله تجيني التهايم واني مالي بيها لاناقه ولاجمل!
ظليت اصرخ بحركه.. شسويت اني.. شذنبي غير حبيته..
ولشوكت ارتاح.. وين نايم حظي المعثر!
نوب من اذكر الطفل الجاي احس روحي تريد تطلع..
صح هذا شي طبيعي يصير بين المتزوجين..وصح مامنتظره منه يعوف مرته ويجيني يركض..
بس صعب اتقبلهه.. وميعرف بهل وجع اله المار بي..
ومرت ايام..
كافيه الناس خيري وشري مثل ميكول..
بس منو اليرحم.. ومنو اليعوفني بحالي..
كنت اخلص نهاري بالشغل.. لااحجي ولا اسولف...
ع كد اليسألني اجاوب.. ومنو غير حنان تسأل..
لان ست غصون متعاشرنا ولاتريدنا.. وهيج احسن اصلا من اشوفهه ينعاد كل المريت بي كبالي واصير نار..
وصلت مرحلة بعد مااكدر احجي.. بس مخنوكه خنك..
اريد اروح لامي وابويه.. اشتهي اموت من صدك..
وهم رجع هيثم عليه بيوم واني بالغرفه..
فتح الباب كل قوته..
خفت شفته مثل المجنون..
وبده يفتش بالغرفه.. ماكو مكان مافتشه.. لاخانه لا ملابس لا زاويه..
ظليت اني ع كعدتي بس عيوني تفتر علي..
وقابل شيلكه؟ هي روحي وصفت غربال من الحزن..
هيثم:تردين تشردين وي مأمون مو؟ عدكم هيج مخطط؟ وعبالج ماادري لو راح تفوتني؟
رحت يمه.. باوعت بعيونه حيل..
كلت اله:هيثم اني اختك! ماعندي شي ضامته ! لزمت ثوبي بأثنين اديه من فتحه الراس وكلت:هاي اني بطرك روحي! تريد روحي اخذها! ماظل شي عدي بعد!
دفعني وكال:الج يوم .. !
عفته وكعدت حيل مابيه لاي شي.. لا دمعت ولا بجيت ولاشكيت.. هذا هم حظي .. شلون تخلص ويا مادري..
مأمون ..
بعد ماايست من اسيل وماشفتهه.. رجعت للبيت..
ويوم والثاني والثالث مرن.. سجى يم اهلها..
وبطلت تتصل بيه..
واهلي بس يحجون.. رجعها رجعها..
امي حتى بجي بجت..
كالو عن سجى انها مريضه .. وبس تبجي تريد تشوفك..
طاوعتهم.. ورحنا لاهل سجى..
وياريت مارحنا.. كعدو ركبة ونص الي ولاهلي ..
انت مقصر وانت هاملها وماتدري بيها..
وفوك هذا هم حجو بأسيل.. اذا انته هيج ليش ورطت بتنا وروح اخذ بنت عمك اذا هيج والطفل يبقى يمنا..
طول الحجي وصار صياح بينا وبينهم..
كوه سكتنا..
تالي اجت سجى.. كالت لابوهه واخوانهه كافي تصيحون.. وبدت تبجي .. اجتها امها وسونها دراما كبالي..
مادري حتى دموعها ماتهز شعره بيه..
من اكون وياهه مثل الحايط اصير.. لا احساس ولا مشاعر..
تالي ابويه ظل يحجي وقنعهم ترجع ويانه..
عاد اخذناهه ورجعنا للبيت..
الطريق كله تبجي هي.. وامي بس تهدي بيها وتتوسلها تسكت.. وشتردين انطيج.. والبيت اخلي باسمج ..ذهبي كله الج وووو..
طكت روحي من امي كد ماتلوكت الها.. ومااعرف ع شنو..
وصلنا البيت.. راحت هي للغرفه ورواء وياهه..
تأخر الوقت ونعست اني..
صعدت فوك..
لكيتها لابسه ستن ناعم ابيض وفاتحة الشعر ولاعبه بوجهه اشكال الوان مخليه.. ومشغله بس التيبلام..
اخذت برنص ورحت للحمام اخذتلي دوش..
رجعت لكيتها بعدها كاعده ع الطابوريه..
سويت نفسي مااشوفها.. نشفت شعري بعيد عن المرا

يه..
اجت حضنتني من ظهري..
سجى:اشتاقيت!
سكتت مجاوبت.. اندارت صارت كبالي..
شالت ايدي وخلتها ع بطنها..
سجى:ابنا!
باوعت بعيونها.. نوب نزلت راسي ع ايدي الي يم بطنها.
سجى:حبيبي.. شنسمي؟
سحبت ايدي ووخرت:ماادري.. يجي والله كريم..
لبست ورحت مددت..
غمضت عيني.. سرحت بعيد.. اتخيل اليوم الي تصير بي اسيل حلالي..
ايد واجت ع صدري.. لزمتها واني مغمض.. ابتسمت..تخيلت انها اسيل.. الصوت وعاني..
سجى:حبيبي.. مشتاقه الك..
وخرت ايدي..
اجت فتحتها وخلت نفسها بحضني..
ظلت تسولف هواي.. بالي مو يمها ابد.. وكله تحجيلي اشتاقيت وتوجعت واشتهيت فلان شغله..
نمت ع كد ماسولفت ودوخت راسي..
كعدت بنص الليل.. مخنوك .. روحي طالعه..
اخذت الجكاير..
باب السطح قريب يم الغرفه.. تمشيت طلعت للسطح..
الجو احمر .. وهوى كلش عالي..ماكو صوت بشر.. بس اني واوجاعي وصوت الهوى يضرب بالشجر..
كعدت ع كرسي قديم موجود بالسطح وبديت ادخن..
كلش ضجت.. واحس الجكاير متكفي اطفي ناري..
لوجه الصبح كاعد وادخن.. فكرة تجيب وفكرة تودي..
طلع الضوة ودخلت للبيت..
نمت ع الجربايه.. وسجى كل شوي شامره ايدها عليه..
شلون كنت مرتاح منها .. هسه حتى بنومتي ممرتاح..
وره شي تلث ايام..
كنت بالمجمع.. دامشي الشغل وهستوه واحد طلع اشترى طباخ..
دك تلفوني .. كان المتصل هيثم..
فتحت خط داسلم تفاجئت بصوت هيثم العالي..
كبل عاط:شوف مأمون ! اذا ماتجوز من اسيل اذبحك واذبحها! سمعت! لو تكول لمرتك تنجب ومااتجيب طارينا يم اهلها!
-شكو؟ فهمني شصاير؟ سجى شدخلها؟
هيثم:نسيبك خابرني ويشكي ! ع شنو؟ اختي يمك؟ واصلتك؟ اذا عدك شي وياهه احجييي!
-شدتخربط! هذا مو حجي!
كبل نط:لا تخربط ولا بطيخ! شنو يجي الولد يشكي والله اختي ممرتاحه بحياتهه وابن عمك يريد يزوج اختك عليها! هاي سالفه بالله! اني عايز!
-اني اعلمها.. اجيك ونتفاهم..
هيثم:لاتجي ولااتعب نفسك! المن جايني!
-لاخر مره! اكلك اياهه! ولان انت بمقام ابوهه ! راح ارجع اطلبها منك.. تسد الحلوك التحجي ومراح اقصر وياهه!
سكت..
-شكلت؟
هيثم:لا! روح خلصني من نسابتك وحجيهم بالاول! يله مع السلامه!
سد التلفون بوجهي.. احس الحراره صعدت لراسي..
وصيت العامل يهتم بالشغل..
ورجعت للبيت..
امي:هايمه شو رجعت؟
-هاي الزماله شوكت ترجع!
امي:ياا منو هاي؟
عطت:سجى اكو غيرها زماله هنا!
امي:يا! شبيها شمسويه!
-خابريها خل ترجع هسه!
امي:غير عدها دوام! هي تكمل وتجي! بعدلها ساعتين هيج!
-خوش..
خليت وطلعت.. رجعت للمجمع..
عين ع الشغل والناس التجي وعين ع الساعه..
مرن الساعتين ورجعت..
سألت امي.. كالت توهه اجت..
صعدت للغرفه ..
لكيتها دتبدل..
-أنتِ شوكت تصيرين ادميه هااا!
سجى:شكو ؟ ليش تحجي هيج؟
-اخوج الخرا ليش يروح لهيثم ويحجي عن اسيل؟!
سجى:اهووو! هم اسيل! طلكني واخذها! روح اخذها منو لازمك! خايف مستحي؟!
-اكلي خراااا! اذا سمعت حرف طالع منج لو من اهلج ع اسيل لسانج اكصه وانعل ابوج لابو الخلفج!
ديري بالج اسمع مسويه شي يضرها! ايااااج!
واسيل اخذها غصبا عنج وعن اهلج ياغبيه!
كامت تبجي. عفتها وركعت باب الغرفه وطلعت..
امي رادت تحجي هم عفتها وطلعت كبل..
بوجهي اخذت السياره ورحت لبيت عمي..
مالكيت هيثم..كان بس فيصل موجود..
وشكله ميعرف شي.
مافتحت الموضوع ويا.. سويت نفسي جاي اسلم واروح..
وصدك سويتها سلمت ورحت..
ايام وماصارت الفرصه التقي بهيثم..
كل مااجيهم ماللكاه..
ايست منه.. وبديت اخطط اخذ اسيل ونشرد..
بعد مابيها كل انتظار..
حظرت مبلغ مرتب.. يكفي شي سنتين..
وخبرت طالب بمخططي.. طبعا هوايه حجه وصار ضدي بس ماسمعت اله .. كان لازم انهي هل عذاب بعد..
بقت لازم اخبر اسيل .. ونتفق بيوم نشرد..
كنت اتصور حالها من بعد ما اخو سجى راح لهيثم..
ادري بي مخبل.. يشوفها الويل ومايهتم لاحد..
فأكثر من مرة اروح لفيصل.. عسى ولعل اشوفهه..
ومره واثنين وتلاثه وماشفتها..
بس بوحدة من الروحات خطفت كدامي..
حتى سالفتي ويه فيصل ضيعتها وبقيت صافن بلكي ترجع مره لخ.. بس مارجعت.. وهي شافتني..
وصبرت.. وياما هيثم ذب حجي يمي ميقبل ع جيتي يمهم.. فصرت اتصل بفيصل اتأكد هيثم مموجود يله اروح الهم..
كثرت الروحات ومحصلت شي..
اسيل ماحاولت تشوفني ولا كدرت احجي وياهه..
يمكن خوف .. ويمكن تعبت من المشاكل ويه هيثم ومتريد تورط نفسهه ويا..
روحاتي مجابت نتيجة..
وبيوم رحت بالليل.. مختنك وروحي طالعه..
وشارب باقي بنص عقل تقريبا..
وكفت بعيد عن بيتهم.. اباوع واحترك حرك.. شكد قهرني هذا البيت.. وشكد تمنيت الي بي تصير حلالي..
ليش مداتصير.. وليش الناس كلها ضدنا.. شنو الي يضرهم اذا كنا سوا..
احس نار بصدري..اسيل مصيرج الي.. مايفرقني عنج بس الموت..
فتحت باب السياره ونزلت.. كبل افتريت ورا البيت مالهم..
دكيت شباك اسيل.. ومو هامني الي يسمع الصوت ولا شيصير بعدها..
كانت الدكة قويه.. شويه وانفتح الشباك.. بدون مااباوع بوجهه عطت بيها اطلعي خل اشوفج!
رادت تحجي كلت الها اطلعي لا اسوي مشكلة هسه!
سدت الشباك.. افتريت اني

يم باب المطبخ..
ظليت افتر برا ع ماطلعت..
فتحت باب المطبخ وتتلفت وراهه وخايفه..
وصلت كبالي.. رادت تحجي..
كبل سديت حلكها بأيدي.. باوعت بعيونها حيل..
دنكت راسي يمها:اششش.. ولا حرف اسيل!
فقدت واني اباوع بعيونها الخايفه والمليانه دموع..
بستها من عيونها الاثنين..خليت راسي يم اذنها وكلت:لتخافين.. مو اني الأذيج!
جريتها من ايدها ومشينا مسافه.. لحد ماوصلنا السيارة..
فتحت الباب الامامي.. كعدتها كوه..
هي بس تصيح وتكول وين مأمون ..مأمون كافي ! راح اعيط والمهم !
صعدت بالسياره.. كامت تبجي..
جريت اديها اثنيهن..
-كافي تصيرين جبانه! لهنا وكافي! راح اخذج ونروح بعيد منا..
جريت ايدي منها ..داشغل السياره..
كبل جرت ايدي وصرخت:لاااا.. رجعني مأمون رجعني! مااريد اروح وياك ماريد اروح!
ظلت تبجي وتتوسل..
مهتميت الها.. هي خايفه هسه.. شوي وتهده..
حركت السياره وبعدنا..
ظلت تصرخ وتضرب بنفسهه..كافي.. كافي..!..رجعني!
عطت بيها وضربت الاستيرن بيدي:أنتِ الي كافي! لا تصيرين جبانه! كافي عاد كافي! افهمي مداكدر بدونج! افهمي عاد!
ظلت تبجي ولازمة ايدي:فدوة رجعني ..والله هيثم يذبحني..
-ماراح يلكانه..
شفتها انتهت.. ظلت بس تبجي وتضرب ع رجليها ..
وكفت السياره.. جريتها يمي..
حضنت راسهه يم صدري.. حجيت بهدوء وياهه..
-اسيل.. روحي وعيوني أنتِ .. كافي لا تبجين.
هي تشاهك وتبجي.. رفعت راسهه ومسحت دموعهه..
باوعت بعيوني.. وكالت:مأمون اني خايفه.. وماريد اروح وياك..
عصبت.. بس مابينت الها .. لان مو عوزها اصيح بيها واعصب..
مسحت وجهه..
-ترجعين؟
هزت راسهه بأي..
-رجعني.. بسرعه لا يكعد هيثم ..
درت وجهي منها.. شغلت السياره ورجعنا..
مابعدنا ذيج المسافه الطويله..
فبسرعه وصلنا..
نزلت فتحت الها الباب.. مكدرت اباوع بوجها..
ضايج كلش منها ومن خوفها الزايد..
ماردت اجبرها ع شي..
فتحت الها الباب ونزلت.. ظليت برا من دخلت..
خفت لايكون هيثم كاعد ويلاكيها ..
انتظرت هوايه.. لحد ما اتأكدت ماكو شي يله رحت..
كعدت بالسياره .. شربت هواي بلا وعي..
مادري شلون سقت السيارة وصلت سالم..
وصلت البيت روحي طالعه..
ومالي خلك احد كلش..
صعدت الغرفه..
سجى نايمه..
ذبيت نفسي ع الفراش .. كعدت سجى..
اتذكر اشياء بسيطة بعدها.. خلت ايدها ع وجهي وسألتني شبيك. اتذكر بجيت هوايه..
واتذكر حضنتني وبقيت احجي بس مااميز شنو كلامي..
عبالك مو اني الي داحجي..
بعدها غفيت .. وكعدت الصبح ملكيت سجى..
تذكرت ليلة البارحة..
شوداني لاسيل.. وليش من صارت صدك واخذتها ماكملت .. ليش رجعتها.. عقلي وين جاااااان..
اخ بس.. كمت مااعرف روحي..
غسلت ونزلت جوه..
صبحت ع امي ورواء.. امي ماردت..
وباوعتلي بخزره..
رواء سوتلي ريوك وجابته.. داكل .. كالت:مأمون لشوكت تظل هيج؟ ترى ميصير والله!
-شكو؟ خير ياطير؟!
رواء:سجى.. بالليل نزلت تبجي ومقهوره .. نامت يمي ..
-وليش تبجي منو وياهه؟!
رواء:انته! اكو غيرك! حجتلي شلون جاي شارب وتبجي ع اسيل.. ترى عيب والله! مرتك حامل وتجرحهه؟ اسيل مو الك اقتنع عاد!
-اششش.. لتدخلين.. لاتفتحين هل موضوع مره ثانيه!
رواء:لا افتحه! كل مااشوفك هيج افتحه! داشوف بيتك يتهدم كبالي واسكت؟
-كلت الج كافي لاتحجين ! مااريد اسمع صوت! اس اس!
رواء:مو صوجك والله! يجي يوم وتندم! راح تخسر سجى بتصرفاتك هاي!
خلت وكامت..
امي اطب وتطلع تذب حجي.. سحر .. وعمل.. وبيتي محد مرتاح بي من الاعمال.. واني لازم اشوف حل لهل مهزلة..
مارديت عليها..
صعدت غيرت ملابسي وطلعت للمجمع..

اسيل..
كانت اصعب ليله امر بيها.. بلاوعي طلعت اله.. ومشيت خطوات ويا.. ومااعرف وين يريد.. من صعدت السياره وسمعت كلامه حسيته ممتوازن وبي شي..
كان كل كلامه نشرد ونروح بعيد ووو..
متت خوف.. واول ماخطر ابالي .. هيثم شلون يلكاني اني ويا ويقتلني مثل قتل كوثر.. وماردت اتخيل شنو ممكن يسوي بمأمون..بجيت هواي وتوسلته وهو ولاكأن..
فجأة مااعرف شنو الي صارله ورجعني!
كان كلش كلش مو بوعيه..
من وصلني مباوع بوجهي بعد حسيته ضايج حيل مني..
صح زعله ثكيل عندي.. بس مومال اعوف اهلي بهل الليل الاظلم واروح لمجهول.. ادري ميقصر..
وادري هو كدها.. وهمين ادري اخواني مراح يسكتون وراح يكون الثمن روحه لمأمون.. وماعندي استعداد اضحي بي..
ولا اريد شعره منه تنمس..
يكفي هو موجود واسمع اخباره.. بس ماريد يروح بسببي..
ولااريده يتأذه ...
دخلت ع طروف اصابعي..
ميته خوف لا يكون واحد منهم فقدني.. لو راح لغرفتي وملكاني..
دخلت ومحد حس عليه.. كلها نيام..
خلصت من خوفي لااحد يشوفني راجعه من برا بهل ليل..
هاجت عليه مواجع مأمون.. وحبنا المات قبل لا ينولد..
لزمت بلعومي..
داحس شي واكف هنا.. يمه اريد بس اصرخ..
بس مداتطلع.. ظليت مخنوكه ولازمه بلعومي وافتر..
شلون بيه .. وشلون راح تنحل..
وساعات واني ع هل حال..
تعبت.. وراسي وجعني حيل..
خليت ومددت.. منين مااندار اشوف عيونه كبالي..
هه لا ولازم انساه!
زين شلون.. اخ لو اعرف شلون!
نوب تعلقه بيه وحبه المجنون ي

جبرني احبه اضعاف اضعاف..
مادري شلون تسلل النوم لعيني..
كعدت ثاني يوم..
كالعاده بلشت الروتين اليومي.. وماكو جديد..
غصون تنكط سم عليه.. حنان انكسرت شوكتها مو مثل قبل..
حتى وياي صارت افضل.. بس بعد بيها حقارة..
فيصل.. هه مادري شوصفه.. الي يشوفه ويه غصون ميصدك انه اخوهه هو الاخذ شرفنا! ولا يصدك انها فصليه!
من اشوفه هيج.. نار وتكب بيه..
حتى اذاني تكب نار..
هيثم.. يكرهني.. ماطلع كدامه.. ولااشوفه..
خطفات اشوفه من يجي.. وكبل ادخل الغرفه..
ومر يوم واثنين وتلاثه واربع..
كله مثل بعضه.. ماكو غير بس حسرات كلبي..
ودموعي تالي الليل..
وبيوم.. كنت داغسل المطبخ..
ومدنكه راسي واكرف مي واطلع لبرا..
مااشوف بس رجلين صارت بالباب..
رفعت راسي..
جمدت بمكاني.. هذا الشكل شايفته بس وين مادري..
وين وين وين؟
الاثنين مو غريبين عليه!
بهتت ومكدرت احجي شي.. لان المنظر والهيئه كافيه تسكتني!
يتبع...
مدام جمعة وعطلة وادري معدكم شي نشرتلكم

#شُتات_انثى
السادس والعشرون

كانن يباوعلي بحقد..
وعيونهن تنكط شر.. من غير السواد الي لابساته والكدرة الي مبينه بالوجوه..
فززني بجيتهن.. ومن كد مافزيت وخفت.. تيهت منو ذني!
الشكل مو غريب .. وشايفته قبل!
بس منو؟؟
من حجت... وسمعت نبره الصوت عرفتها!
هي سجى! من سنوات مشايفتها! وميزتها من الصوت!
كد ماكان صوتها يرن بأذني من شفتها كم مرة يم بيت عمي..
سجى:اسيل مو؟
هزيت راسي اي..
سجى:عندي كم حجايه اريدج تسمعيهن!
الي وياهه. مرة كبيره.. تذكرتها هاي امها!
قربت كم خطوه من يمي.. باوعت بوجهي حيل..
نوب باوعتلي من فوك لجوه.. ويه نظرتها استهزاء هوايه..
سجى:أنتِ شتردين من مأمون ؟
ردت انطق .. ظليت بس اوتوت ..
اسمع صوت حنان ورايه..
حنان:ياهله ومرحبه.. شلونج خاله! شلون صحتج!
بعدها دتحجي وكبت بيها المره:لا طاب لونكم! وتسأليني شلوني!
حنان:يااا.. خير ياستار؟ شصاير!
سجى:اني اكلج شصاير! هاي حماتج الواكفه كدامج.. اكبر كوادة ونغله!
صح الحجي اهانه الي.. وكلش كبيره.. بس مااعرف شنو صارلي انربط لساني كدامهن! وله انمحى الكلام من عقلي وله شنو؟!
حنان صاحت :شنو هل حجي! مو عيب! جايه تتهجمين علينا ابيتنا!
سجى:تدرين ليش؟ لان بتكم مو شريفه! واذا هي صدك شريفه خل تبتعد عن مأمون ترى والله والاسمه الله العب بيكم خلقه! حتى سجون ادخلكم!
حنان:ع كيفج عيني! هي واصلته يمه؟! شو تخربطين أنتِ؟
ردت امها بصوت اعلى:لاااااا ابددد! مواصله خطيه!
الرجال راح يتخبل من وراهه! مباقي عقل براسه! بس شرب وسكر ويصيح اسيل اسيل!
سجى ذبت كل دمعه هل كدها.. اني من شفتها هم صبت دموعي مااعرف عليها لو عليه لو ع حظي المصخم..
حنان:قابل هي كايلتله يشرب! شو متعرفن تحجن!
سجى كامت تشهك وتكول:واني شذنبييي! شمدريني بي عاشك هاي! شمدريني هيج راح اعيش ويااا! لج حامل مايدري بيه جبت ذبيته نزفت وكعت! ميدري بيه!
يجي بصفي تالي الليل يصيح اسيل اسيل!
امها لزمتها وتهدي بيهه:كافي موزين ع طفلج! كافي!
عاطت بامها:ياكافي! يمه اني روحي طالعه!
اجت يمي وكالت:عليج الله عوفي! ركزت بعيني حيل.. هزت راسهه مثل الي تنتظرني اكول اي.. عوفي! اني احق بي! اني ام ابنه! تسمعيني ؟ اني احق بي..
هزيت راسي اي.. دموعي تصب مادري بيها..
سجى:راح تعوفي مو؟ تعوفي؟
هزيت راسي بأي.. احس كلبي راد يوكف..
امها :حنان.. هاي كدامج اكولها.. اذا اسيل مابطلت منه قسما بالله وداعت صباح اسوي المحد سوته! كافي انشلعت رواحنه اني وبنتي! شنو ماكو احساس ماكو اخوان تحاسب!
ولو هم متعودين ع فضايح بناتهم!
بعدها دتحجي ودخل هيثم..
اخ يمه.. اليوم منيتي يمكن..
وع شنو؟ مادري..
منو الي كايل الهن اني ومامون مكضينها مخابرات! لو طلعات! لو اريد اخرب بيته كان بليله الي اجاني رحت وياه وعفت كلشي وره ظهري..
هيثم باوع لوجوهنا كلنا.. واكثر شي عليه..
كان يحرك عيونه للكل.. وكل لحظه عليه..
هيثم:شكو؟ شنو هاي الهوسه والصياح؟
ام سجى:اجيت والله جابك.. طايحه ع الله وعليك!
كان ظهرها كبالي..باوعت الها وهزيت راسي بلا..انهدلت شفافي وحدها برطمت..
هيثم:كولي ؟
ام سجى:اسيل!
سديت عيني حيل.. ودعيت من كل كلبي.. الله ياخذ اسيل.. الله ياخذ عمر اسيل..
باوعلي وكال:شبيها؟
ام سجى:زوجها فدوة لهل شارب! ترى والله مليت مايصير بتي يوميه زعلانه وتشكيلي !
هيثم:واسيل شعليها! لو يوميه أنتِ وابنج مسوين سالفه علينا!
تعجبت.. وصفنت.. وكل شي بيه انصدم!
هذا منو اليحجي؟ هيثم لو غيره!
نسيت حتى الخوف.. ركزت بي اريد اعرف شنو راح يكول بعد؟!
ام سجى سكتت.. وره شويه كالت:سجى! يله مامه.. هاي ناس ماتستحي! احنه نعرف شنو همه ! وشنو بناتهم! غلطه واجينا!
دارت وجهه ورادت تطلع.. وبتهه وراهه..
هيثم:تعاي تعاي!
دارت وجهه علي وسكتت..
هيثم:اذا مره ثانيه انجاب طاري اسيل و مأمون سوه! والله والله! ادفن مأمون وهو عايش واريحكم منه!
ظلت تخازر بي وساكته..
هيثم عاط:يله!!!! دير بالكم احد يجي يشتكي! يللللله!
خلن وطلعن..
اني اباوع بوجه حنان.. وحنان تباوعلي وترجع لهيثم..
هو ظل صافن بوجهي..
قرب يمي.. ابتسمت اله.. واخيرا عندي اخو!
مادري شوكت شال ايده.. وجر شعري من وره..
خزر بوجهي وكال:مو كيفتي عبالج نفسج فقيره! ادريج ادبسز مثل اختج العار! بس سويت هيج حتى محد يحجي بعد! دبارج عندي! بس اصبريلي !
احس راسي انشلع بيده..
شمرني عنه وراح..
حنان لحكته..
افترت بيه الكاع.. كوه بقيت واكفه ع طولي..
لزمت الحياطين ورحت للغرفه..
مااحس بكل جسمي..
بس دموع تصب..
سديت باب غرفتي..
وكعت ورا الباب كعدت علي..
شهگت ااااااااااه.. ربي كافي!!!
ظليت  دموعي تصب.. لحد ماوكعت كلش ومددت بالكاع..
بيمن وله بيمن ابدي..
هنه هواي وجعات.. وهواي غصات..
بدن من يوم كوثر.. ولحد هل يوم ماانتهن!
عمري كله خلص بيهن وماعاد يخلصن..
ليا وجعه ابجي! وليا جرح منهن؟!
روحة امي ؟ لو من ذابت كدام عيني يوم ع يوم؟
لو موت ابويه الغفل صار وكدام عيني؟
لو مأمون.. الي مااعرف شلون اطشرنا.. وكل ماحاولنا نلتم نتفرق

اكثر..
لو هيثم وخباله؟ حنا لو غصون لو فيصل؟
هنوب سجى؟!
سجى جابج حظي لو شنو؟
اليكتلني! اني مادري مأمون وين وشنو يسوي ويامن كعد وتجي الناس تكلي عوفي! شعوف منه ياناس!
صح بعيد عني.. ومالي شغل بي.. ومستعده اعوفه بس خاطر يعيش مرتاح مني ومن مشاكلي..
بس ماانكر هو عايش بنص روحي..
اشتهيت اروح لامي.. انام يمهه .. اشكي واخلي كل الموتى تسمعني.. عسى هم احسن من الناس العايشه!
خدر كل جسمي.. وبديت انعس...
بين النايمه والكاعده.. شفت نفسي بالمقبره..
شابكه قبر امي وابجي..
لحد مااختفى كل شي.. وغطيت مادري نوم ماادري فقدت وعيي..

مأمون ..
مرت فتره احس الكل متأمرعليه..
من ابويه ونازل.. اسلم محد يرد..
امي بس متنكه ويوميه تجي تخنكني خنك بالغرفه بهل بخور وشعواط مدري شنو..
اما سجى اخ! ماادري شنو المخليني اتحملها لهل لحظه!
صارت من دوامهه وتطلع لاهلها.
صح اكيف ماتجي .. بس حسيتها بدت تقلل من قيمتي وتتصرف بكيفها وع مرامها..
كنت راجع من المجمع.. حوالي ساعه 10 او 9 ونص
دخلت الغرفه مالكيتهه..
سبحت وكملت رجعت للغرفه ...
مددت ع الفراش وهي دخلت..
اباوع الها رافعه راسهه ليفوك ومتباوع كدامهه..
خلت جنطته بالكاع ودتنزع رداءهه..
صحت:هي هي! وين جنتي؟
جاوبتني وهي دايره وجهه:يم اهلي!
كمت الها.. جريتها من ذراعهه..
-من احجي وياج توكفين عدل ومثل الاوادم تردين!
باوعت بعيوني وكالت:من تصير رجال صدك اعاملك هيج!
كبل شلت ايدي وضربتها راشدي كلش قوي!
-ادبسز حيوانه! البسي بسرعه خل ارجعج يم اهلج يله!
ظلت كاعده وتبجي وتصيح الله يكسر ايدك الله يكسر ايدك!
عطت بيها حيل:كومي يله!!!!!
لبست .. جريتها جر ونزلتها الدرج..
كلبت الدنيا بالعياط كلهاا طلعت ع صوتهه..
امي:ها ها ! شبيكم!
ابوي:تعال وين ماخذهه!
-اششش! لحد يدخل!
وصلنا ع السياره .. فتحت الباب ودفعتها..
صعدت ع السريع..
حركت بسرعه..
ظلت تبجي وتكول:فدوة لا ترجعني.. فدوة مااعيدها والله! مأمون اني غلطت سامحني..
-خل اهلج يربوج من جديد! حيوانه!
وصلنا ع بيت اهلها وهي مستمره تحجي وتتوسل..
جريتها من السياره كوه..
خليتها بالباب ورحت..
صح مو شيمتي اسوي هيج وياهه وهي حامل بس نرفزتني كلش وبلحظتها فقدت اعصابي حيل..
حركت السياره ورجعت للبيت..
اول مادخلت الصاله لكيت اهلي كلهم ملتمين..
من شافوني واحد بقى يباوع للثاني..
امي:وين وديتها؟
ابوي صاح:طلك بعد فد مرة وفضهه وخل ابنك يربى عدهم ونصير علج بحلك العالم!
-خل تتأدب يله تجي!
امي:ليش شبيهه! شناقصهه! ادب تسوه عشر نسوان بأدبهه! جمال تسوه عشيره! وابنك هل كم شهر ويترس حضنكم!
-هههههههه.. اي يمه اي.. كمليها فد مره وسويها نبي!
رواء:صدك وين وديتها؟
-يعني وين! وديتها لاهلها.. لاترجع قبل لاتتأدب..
اوس:شنو غلطت عليك؟
-انته لتدخل! ماشي؟
اوس:هو مو صوجك والله!
درت وجهي منهم وصعدت للغرفه..
شكد حلو من افتح الباب ومالكاهه.. وادري مراح تجي..
مددت بفراشي..
داير وجهي ع الجهه الثانيه.. الفراش فارغ..
للحظه تخيلي اسيل كبالي.. جسمها الناعم مقرفص كبالي..
دامشي ايدي ع وجهه.. وابعد خصلات شعرها عن وجهه..
عيونها تباوعلي وتضحك..ضحكتها تحجي حبها وحبي..
غمضت عيني هذا الوهم والخيالات..
الله لا يوفق كلمن صارن بطريقنا والخلاني اشوفهه حلم ووهم..
نمت ..
ثاني يوم كعدت من وقت ونشط.. باوعت بصفي..
ابتسمت.. تذكرت البارحة شلون كنت اتخيلها..
اخ يااسيل.. شوكت يجي هل يوم..
بدلت ونزلت اكلت لكمة وطلعت للمجمع..
لكيت ابويه هنا..
اول مادخلت دار وجه عني..
صبحت علي من بعيد .. ظليت افتر بالمجمع..
كعدت ع تخم معروض..
خليت رجل ع رجل.. وكعدت اتفرج ع لعبه طوبه..
كملت اللعبه ونزلت للطابق الجوه وابويه بعده..
سمعته يخابر..
شكله فرحان ..
من كال:هلا بيكم.. تنورنا بكل وقت.. هي بتكم بعد..
افتهمت المقصود هي رواء..
واكيد الي خابر خطابه..
سد التلفون ضحك بوجهي وكال:اني راح اطلع.. عدنا خطار العصر..
-خير منو؟
ابوي:ناس جايين يطلبون اختك..
-منو همه؟
ابوي:ابو جهاد تعرفه؟
-اي اي غير ابو المقاولات!
ابوي:اي هو .. رايد مره لسيف..
-ها.. اي خير ان شاء الله..
ابوي:يله دير بالك ع الشغل!
-الله وياك..
واضح ع ابويه الفرح حيل..
قبل رواء ياما اجتهه ناس.. وياما رفض..
وهسه من تلفون رحب بيهم وراح ينطيها..
وهي ماعايزه بعد.. تخرجت .. وكبرت وصارت واعيه كفايه..
ويمكن ابويه خاف تظل متتزوج من السمعه الي صارت من وره كوثر.. لذلك قرر ينطيها بهل سرعه..
من عرفت عدنا خطابه اليوم مرجعت للبيت..
دزيت ع غدا واكلت بالمجمع اني والعمال..
للمغرب خابرني ابويه..
يحجي بهدوء ع اساس خجل وبي فرحة مكتومة..
كال:اكلك انطيتها رواء!
-ها.. خوش بيها الخير.. هي موافقه؟
كال بحزم:ها! شلون مموافقه اكسر راسهه غير اذا ماتقبل!
-يابه خليها ع راحتهه اذا مقبلت مو اله تجبرها!
ابوي:لالا هي قابله.. انته شوكت تجي؟
-بعد فد ساعتين تلاثه واجي..
ابوي:تعال من وقت حتى نرجع مرتك..
-لا.. سد هذا الموضوع.. خلي بعدين..
ابوي:هو شنو تضحك العال

م علينا تريد! شبيك ماكو عقل كلش!
-يله عندي شغل.. مع السلامه..
سديت التلفون..
يعني لازم ينكدون عليه ..
خلص مابقى شي.. بس تولد .. اطلكها واخذ اسيل ونتزوج بالخارج.. نرجع ويكونون كدام امر واقع..
بس تبقى اسيل شلون تقتنع وهي تخاف من ظلها..
اذا اضطر الامر .. اخطفها ..
رجعت للبيت بالليل..
بيت فلاح يمنا والبيت هوسه..
سلمت وكعدت شوي يمهم..
تالي صفينا اني وفلاح..
ظل يحجي وينصح علمود سجى..
شكد حجه.. بس مااقتنعت ولاراح اقتنع..
وكل هذا ماكلت الهم شنو تجاسرت وحجت كدامي..
ساعات وفلاح يلح بهل الموضوع..
كلت اله:فلاح .. بس تجيب اطلكهه.. لا اطولوها وتعرضوها!
فلاح:عجيب! والله انته مو صاحي! شبيهه غير نفهم؟ شايف شي عليهه! مسويه غلط وياك!
-عبالي راح انسى .. وراح اعيش وياهه حياه كامله ..
بس مااكدر.. اكتشفت نفسي غلطان.. مو سجى الاخلص عمري وياهه!
فلاح:شبيك؟ فهمني شبيك انته؟ بعدك مصدك عود تاخذ اسيل؟ يابه وهي بنيه محد قبلك! نوب مطلكه؟!
-مااريد موافقه من احد.. وهذا العندي..
فلاح:والله مادري شكلك.. بس زاح تتعب واتعبنا وياك.. وراح تخسر بيتك ومرتك وابنك!
-مو مهم..
فلاح:شغله عناد؟
-تكدر تكول هيج
سد الموضوع.. وبده يحجي عن سيارته والشغل..
التهينا واخذتنا السوالف..
تعشو وراحو.. طبعا رواء لسه ماشفتهه..
قبل لا اصعد ..
مريت لغرفتها..
باوعتلي ضحكت ودارت وجهه..
كعدت يمهه..
-شلونج؟
رواء:زينه..
-مبروك.. شايفه كل خير..
رواء:شكرا..
-رواء..! شيلي راسج وحاجيني! هاي سنه الحياه أنتِ ممسويه شي غلط وادنكين!
باوعتلي.. خدودها ورديه وتبتسم..
-مقتنعه؟
هزت راسهه اي..
-قابله؟
هزت راسهه اي..
-محد ضغط عليج؟
هزت بلا..
ضحكت.. ههههه.. جريت راسهه وبستهه..
-لعد شايفه الف خير..
رواء:شكرا..
-يله نامي.. تصبحين ع خير..
رواء:وانت من اهله..
صعدت غرفتي.. راضي ع نفسي.. من ناحيه رواء..
ان شاء الله مااكون قصرت وياهه ..
ومرن ايام.. ع نفس الروتين..
رواء مابقالهه اله ايام معدوده يمنا..
واوس هم رجع لحبيبته الي سبق ان انفصل عنها وتأخر بالخطبه.. وهسه قرر يخطب..
سألنا عن اهلها وعنها طلعو خوش ناس.. وقررو ابويه وفلاح واوس يرحون الهم..
وراحو.. واهل البنيه بسرعه وافقو..
وره يومين عقدو.. شيخ ومحكمه..
رواء همين..
قبل خطبه اوس باسبوعين.. تزوجت..
سيف.. خوش ولد وحباب..
وطبعا اهله ناس واصلين ..
ولوما يعرفون ابويه من زمان ماكان اجو وخطبو مننا..
المهم.. يوم عرسهم..
اهلي راحو ومرجعين سجى بدون علمي..
لوما عرس رواء وماردت اكسر فرحتها كان عرفت شتصرف وياهه وويه اهلي..
لبست الوضع وسويت نفسي مااشوفهه..
نزلت من غرفتي .. الصاله هوسه.. ورواء كاعده بالابيض وبصفهه زوجهه.. سلمت علي.. ودنكت ع رواء بستها من راسهه.. دمعت عيونهه.. وظلو يسكتون بيهه..قبل لااطلع سلمت ع سيف.. وكلت اله:بالك تزعلها!
ضحك وكال رواء بعيوني..
خليت وطلعت..
اصلا زفه ونسوان وهوسه..
رحت للمجمع.. ساعات مرت..
صار الليل.. دكيت ع طالب..
طالب:هله بالحبيب!
-هههه هلا بيك حبيبي..
طالب:والله هسه ع بالي.. جيت اتصل بيك وانت سبقتني..
-ها.. لازم عندك عزيمه دسمه؟!
طالب:اي يله جايك نتعشى ونطلع!
-اني مو بالبيت ولك!
طالب:بالمجمع؟ هسه امرلك ونروح سوه للمطعم..
-اوكي.. مع السلامه..
اجه طالب.. وطلعنا اتعشينا برا..
بعدين ظلينا نفتر بالسياره..
تالي كال عندي الك حفله من الي تعجبك..
-يله.. وين؟
طالب:يم حنون..
-اوكي.. قابل اكولك لا؟! هههه
رحنا ع الحفله..
حفله ريفيه.. مطرب يغني.. ويجر مواويل.. اخ يابه تملخ الكلب.. وطبعا اسيل هي الحاضره بنص هاي الونات والاهات...
فقدت واني اسمع للمطرب .. من شافني متفاعل ويا كام بي وميزيد مواويل وكلمات مااعرف منين يجيبها ..
بديت اشرب واني اباوعله بتمعن..
طالب كل شوي يلزم ايدي  يشاورني يكله يله نطلع ..
اهز ايدي اله بلا..
همسلي:مأمون شكلك تعبان كوم خل نرجع كلها تباوعلك!
بعدته عني..
ماريد شي يلهيني.. اريد بس اركز بالمغني شديكول وشلون ديجر الموال..
اخ يابه كلبي تفطر..
مادري وين وصلت وله شنو سويت..
بس اذكر طالب طلعني جر..
واذكر من صعدنا السياره بجيت هواي.. وطالب حجى هوايه .. اتذكره من يكلي انساهه عاد راح تموت نفسك !
نزلني هو ساندني..
رحنا ع بيته.. ونمت هناك مادريت بنفسي..
كعدت الصبح مسطور راسي..
شفت طالب محضر ريوك..
كعدت شربت جاي .. وهو بس يسولف ويضحك.. يمكن يريد ينسيني البارحة.. واني مانسيت.. ولا انسى من نزلت دموعي بحركه.. لان صدك انقهرت..
وغضبت من قدرنا..عصبت من اهلي ومن اهلها ومن كل الناس الماخلتنا بحالنا..
بعد ماايس طالب ويايه.. كلي :يول شبيك اضحك عاد!
-شضحك! ع شنو! عوفني طالب عوفني!
طالب:عايفك  بس تريك حتى اوصلك !
-ااااخ
طالب:الله يريح كلبك..
-ضحكت بخيبه..ههههههههه اي.. اي ..
كملنا ورحنا لبيت اهلي..
وكفت برا..
-لشنو ادخل واشوفهم! ليش بعدني لهسه وياهم!
طالب:شبيك ياعيني! شنو تذكرت!
-ع اساس اني ناسي..
طالب:فوت يله.. غسل وارتاح..  يجوز بالليل ام

#شُتات_انثى
السابع والعشرون


امرلك..
رفعت ايدي سلمت علي ودخلت..
اسيل..
بعد جية سجى السودة هي وامها ..
انكبتت اكثر.. وطميت روحي اكثر..
كله حتى لايشوفني هيثم ويكب عليه..
اعرفه ع لحظة يجوز يتذكر ويجي يضربني ..
وماكان بيه حيل لاي شي.. لا ضرب ولااسمع كلام يجرح.
كلش كافي السمعته من سجى.
وكلش كافي البقالي ذكريات من امي..
وابويه..
خو مأمون كان هذا عذاب بحاله..
حاولت شكد مااكدر الهي نفسي وماافكر بالشغلات الموزينه المريت بيها .. بس ماكدرت..
وليش؟ لان حياتي كلها احداث سيئه.. مابيها شغلات تنذكر حلوه..
بس طفولتي.. ومن ارجع اذكرها واحاىل اشغل ذهني بيها الكي نفسي بدون وعي اتذكر امي وابويه ولمتنا وابجي ..
لو من احاول اشغل نفسي بلاشي..
مجرد اصفن..
هم بلاوعي يقبط صدري من الحزن.. ها هنا كعدت امي..
وهنا نامت.. ومن هذا الشباك حجه مأمون ..ومنا سمعت صوت مأمون تالي الليل وهو يكلي لتخافين اني وياج..
ومنا وكف ابويه لمن تمرضت امي..
ومنا سمعت صوت عياط اخواني..
ومنا انسحلت وهنا انضربت ووو..
يامكثرهن اللچمات..
وايام قليله مرت..
هدوء.. ماكو شي..
كملت شغلي.. غسلت البيت كله.. وكعدت اباب المطبخ.. شابكه رجليه لنفسي..
صافنه لبعيد..
اباوع للسما.. بيهه غيوم بيضه كلش.. وطاشه..
طيور تفتر..
شلت اصبعي ليفوك.. حركته ويه وحركه واحد من الطيور..
ظليت اروح وارجع بأصبعي ويا..
اختنكت.. واني اباوعله..
وحسرات بكلبي.. كلش كبيره..
حجيت.. بلا وعي..
كلت اله..اخذني وياك..
برطمت وصبت دموعي..
وظليت مراقبه سرب الطيور.. لحد ماراحن..
واجن غيرهن يمنا..
كلت:ها.. حتى انتن عفتني؟
مااسمع بس صوت غصون ورايه..
غصون:هذا منو العافج؟
باوعتلها وسكتت..
اكرهه لهل مخلوقه.. ولا اطيقها .. وجودها بحد ذاته جريمه!
بس اخواني مابيهم خير.. شكول غير هيج..
ردت النوب:مو احجي وياج! خرسه لو مخبله أنتِ؟
كمت من مكاني..
صارت كبالي.. دفعتها ورحت...
ظلت ادردم.. ماردت اسمعها واغث نفسي اكثر..
دخلت غرفتي..
سديتها عليه ومددت..
للعصر ماطلعت..
كعدت بالكاع.. فاتحه الشباك واباوع..
مااسمع بس صوت فيصل وصياحه كب بالبيت..
خفت اطلع.. لان اني بكل مصيبه لازم يخلوني بيهه..
ردت افهم شيكول..
سمعته صاح:وينهه هاي الادبسز!
بنفس اللحظه فتح الباب وباوعلي..
كانت عيونه كامزه من مكانهه..
فيصل:ولج صدك مرت مأمون جايه هنا؟
بهتت.. شراح اجاوب..
فيصل:مو احجي وياااااج!
هزيت راسي بأي..
طبك الباب ودخل..
تخوصر كبالي وكال بتساؤل وعصبيه ونفور:ايييي؟ وشرادت بالله! هيج جايه مو؟
بقيت ساكته..
مااحس اله الضربه مالته اجت برجلي..
فيصل:ولج ياعار! اليوم اسكطج والله!
كام بي ومايضرب.. فقد عليه..
اكثر الضرب كان جلاليق وع افخاذي..
كان يضرب ويصيح ..
:ماعرفتي تكعدين راحه.. اله ادورين صخام لوجهج!
مارهمتي يم عزام! مايعجبجن بس الفساد والزنا بنات فردوس!
من جاب اسم امي..
انهزيت هز.. حتى جسمي كزبر وهو يكفخ بيه..
ابن امي وابويه يعيرني بأمي!
عطت بي ولك اني اختك! وامي هي امك!
ظليت اصرخ وادك ع نفسي..
من شافني هيج ابتعد ..
دكيت ع صدري وشكيت منه شوي..
-ولك شلون هيج تكول! امي اشافت منك!
وللللج يماااا.. اخذيني يمج عاد مااحمل بعد!
ولك شنو انته ؟ من ايش مخلوق!
ماتردوني موتوني واخلصو! موتوني!
والله اكيف! بس موتني عاد! موتني يله!
تخبلت واني اباوعله .. كلمته ترن براسي..
بنات فردوس!
اخ يمه.. متي وماارتاحيتي..
منين تعلمتها يا فيصل منين؟ من مرتك لو من حنان لو منين سامعهه هل كلمه!
كبيت بي مره لخ:لو اموتني اشرفلك من هاي الحجايه! ولك انته مابيك خير! تدري ليش؟ لو بيك خير ما اخذت هاي ولا دللتهه! ولا سكتت ع السواه اخوهه!
رجع عليه ضربني..
عطت بي:لو مو تضربني! لو تموتني! انته واحد عااااار تسمع! ياناس اخويه عااااار!
يسمعني هيج.. ويكب بالزايد..
تخبل عليه.. ضرباته صارت بكل جسمي..
خشمي كام ينزف..
وجسمي كله يون..
فقدت مكدرت اصرخ بعد..
ظلمت الدنيا بعيني.. انسدت عيني ورحعت انفتحت..
وهم صارت ظلام وغمضت.. وفتحت..
يمكن حسيتهه سكرات موت مو  شي غيره..
ماادري شوكت اجت حنان..
وخرته مني.. وكوه دفعته طلعته..
كانت تحجي ويا بس مامنتبهه شنو..
من طلعته اجت يمي..
اني امدده مثل الجثه.. خشمي يصب دم وصل للكاع وع ايدي الي صايره جوايه..
حنان:كومي.. كومي غسلي لسانج شطوله دهر دهرج!
ظليت صافنه بعيونهه..
هاي هم اذتني هواي.. هم تعبتني.. وهم شاركت بدماري..
حنان:كومي يله! وجهج انترس دم!
ظليت ع نفس صفنتي..
جرت ايدي كبل دفعتهه عني..
كالت:هو موصوجج! اني صوجي ! تظلين عوبه!
خلت وطلعت..
ظليت اني مابيه كل حيل اكوم..
احس جسمي يبس.. صار مثل الخشبه.. مديت رجلي وهاج عليه وجع بيهه..
لميت روحي حيل.. بردت..
ويبس خشمي.. ضلوعي وجسمي كله يون..
غفيت مادري شكد..
صحيت ع وجع افخاذي..
كعدت ع حيلي.. ارتكيت ع الحايط..
ضربت راسي بالحايط الورايه..
ولهسه مامتت.. ولهسه مادري شراح يصير ويايه..
كمت كوه.. طلعت الي ثوب ومنشفه..
طلعت من الغرفه.. ع

يون حنان وغصون تريد تاكلني..
رحت للحمام..
فتحت المي وكعدت جواه..
مابيه اوكف ولااحرك شي..
جزعت .. مني ومن روحي ومن عيشتي كلها..
طولت هوايه بالحمام..
لحد مادكت حنان عليه الباب وتصيح اسيل؟ اسيل؟
جاوبتهه حتى اخلص مااتظل ادك يم راسي..
كالت:بسرعه كملي واطلعي يله..
كملت بيه مابيه..
لبست وطلعت..
مددت بلا ماامشط..
شويه واجت حنان جايبتلي عشا..
كالت:اكلي ..
طلعت ..
اباوع للصينيه.. حتى اذا ردت اكل مااكدر اكل.. كل وجهي يوجعني وبالذات الفك ..
لفيت راسي ونمت..
كل جسمي يون.. وكل شوي يفزلي طرف..
ساعه ايدي ساعه رجلي..
مانمت براحه..
حسيت نفسي داتخيل صوت شباكي يندك..
وصوت مأمون ديصيحلي..
شفت نفسي كمتله.. صاح لي تعالي بسرعه..
مشيت خطوات.. سمعت صوت الدك صدك..
فزيت.. كنت اتخيل.. دخيلك ربي..
بس هل عقل بقى.. لتاخذه..
رجعت الدكه ع شباك..
كمت.. صحت ع كيف منو؟
كال:اني مأمون .. اطلعي منتظرج برا.!
فتحت الشباك..
رجف كل جسمي من شفته..
ماردت اقرب.. هذا مو الي .. وكافي مشاكل..
يكفي اشوفه من بعيد.. اشبع عيوني بي..
مد ايده من الشباك وجرني اله..
كال:اطلعي برا هسه! يله!
هزيت راسي بلا..
-روح مأمون ..
عاط:ولج شنو اروح؟! هسه جايج!
دار راد يروح كوه جريت ايده..
-فدوة لاااا! دخيلك لاتسويهه! والله انتهي اليوم!  يموتوني! بداعتي عليك!
وكف.. صفن بعيوني..
مأمون :أنتِ ليش جبانه؟ فهميني  من شنو تخافين! شنو الي يمنعج ماتجين ويايه! ولج مراح اعوفج والله! مراح احد يكدر يمسج ويوصلج!
هزيت راسي بلا وبجيت..
وخر ايدي عنه..
عرفته مراح يعديها هيج..
شويه واسمع باب المطبخ يندك حيل..
كلبي كام يرجف مو يدك.. متت خوف..
دك هوايه.. سمعته يصيح اسييييييل!
لج اسييييل اطلعيييي!
سمعت صوت فتح باب غرف اخواني..
متت اله شوي..
مو خوفا ع نفسي.. خفت علي لا يأذو..
كبل طلعت من غرفتي..
وكفت بالباب..
فيصل وهيثم فتحو باب المطبخ..
هو كبل فات.. لزمه فيصل:هوب هوب! وييييين!
دفع فيصل .. لزمه هيثم:وين جاي! اصحى  كبل ماتجني ع روحك!
عاط:اسيييييل! لج تعالي اجيت اخلصج منهم! تعالي لحضني اريدج والله! محد يمسج يمي! بس تعالي! يله!
كان يباوعلي وماد ايده..
يأشرلي تعالي..
اخ يمه متت.. اشهك وابجي ماابيه اتقدم خطوه..
ضميت وجهي بأثنين اديه..
صاح:لج تعالي هنا بيتج! باوعليلي هنا بيتج!
وخرت ايدي .. كان يأشرلي ع صدره..
اخ لك اخ..
ويه مايحجي ويكلي هذا بيتج فيصل ضربه ع وجهه.. كبل وكع للكاع..
اخ كلبي.. صحت :لاتضربه!!!!!!!
شبي وكع ماعاد كام.. بس ظل يون اسيل.. اسيل..يمه !
تقدمت كم خطوه.. ايد وجرتني..
كانت حنان..
همستلي:لزمي نفسج وابقي هنا!
همست :ولج حنان شبي مأمون ميكوم! ليش هيج وكع! لج مأمون ميوكع هيج!
هيثم:روح ودي لابو.. هذا شارب لمن مال وجاي يدك يدك بالبيبان تالي الليل..
فيصل:خل اطيح حظ بالاول!
هيثم:لالتضربه! بس ودي لاهله وكلهم شسوه.. بسرعه شيله !
احس رجليه بادت كلش.. ماعرف شصارلي..
مثل الخدر من يبلش بالجسم.. هيج صار بيه..
جرتني حنان..
التفت.. شفت فيصل شاله من الكاع وطلعه..
حنان:يله يله امشي لا تباوعين!
وصلتني الغرفه.. كعدت..
كل جسمي يرعش..
كالت:احمدي الله واشكري! خلصتي منه! شوفي لو ماخذته ويجيج هيج سكران؟!
دتحجي ودخل هيثم.. صاح لحنان تعالي..
راحت .. بعد مرجعت..
ظليت الوب.. وجع وغصات..
منا جسمي.. منا روحي.. وكلبي وكل شي بيه يوجعني..
حتى منبت شعر راسي احسه يوجعني ..
ماارتاح كلبي لحد مارجع فيصل.. وسمعت هيثم سأله:ها وديته؟
فيصل:اي.. تعاركت وياهم واجيت..
هيثم:كلتلهم شحجه مو؟
فيصل:اي.. انت بس احد يحجي بعد وكلي!
هيثم:لا.. معليك بعد... هذا كافي لبيت عمي هسه.
فيصل:يله راح انام..
هيثم:روح..
بعدهه
حاولت انام..
بين نوم وبين فزات وبين خوف ..
خلص الليل..
مأمون ..
من يوم الرجعت سجى للبيت واني محرم دخلتي للغرفه وهي موجوده.. شكد توسلت.. وشكز افترت يمي..
ماعبرتهه.. وكل مااشوف وجهه اتذكر كلامهه..
طبعا ماظل احد ماادخل..
كلها تصيح روح لغرفتك روح لغرفتك..
ماهتميت .. وظليت جوه انام.. حتى ملابسي نزلتهن جوه بغرفه رواء..
وهل فتره فلاح صار يجينا هوايه..
لانو تجهيزات عرس اوس..
وهيمن اجت رواء هي وزوجها ابويه عزمهم..
كان الكل يضحك.. والكل فرحان ..
اله اني.. انطلمت وظلمت هواي..
من اباوع لامي واشوفها تسولف تضحك اضوج..
اي اضوج.. حرمتني من اغلى شي وانقى شي حبيته..
لوتفهمها.. جان عرفت هي حرمتني الراحه..
مو بس من اسيل..
كنت ع اعصابي اكعد وياهم ع الاكل..
وانحمل كلام سجى الغبي..
كل هذا وتحاول تبين انه زواجنه ع اتم وجه وماكو اي مشكله..
وبيوم حنة اوس..
كالعاده ابويه رفض سالفه القاعات.. ويكول ماعدنا بيت شنو؟ شتكول علينا الناس!
طبعا اوس مايبقى يمنا.. وعنده قطعه ديبني بيها..
ع مايكمل يطلع..
مشيت اليوم عادي.. وممهتم ولافرحان..
ومن صار الليل هاجت عليه المواجع..
تذكرت يوم حنتي الاسود..
لحظه لحظه ذكرته..
من اول ماشفت ظهر اسيل وشكيت بيها هي..
من شفت عيونهه ودموعهه.

.
من حجيت وياهه بالغرفه وحضنتها وشبعت انفاسي بيهه..
من خليتها هي التخليلي الحنه..
اخ يااصابيعج.. حفرن بكلبي هم مو بيدي..
كلهن اذكرتهن..
ويه كل حدث بالحنه اذكرهه..
ويه صينيه الحنه.. ويه صوت الهلاهل.. ويه الصفكات..
كوه تحملت..
لحد ماخلصت الحنه..
وثاني يىم التهينا بالعرس..
بين المعازيم والشغل..
طبعا ماكو لاهيثم ولافيصل..
هم مااجو لو محد عزمهم بعد مااعرفت ولاسألت..
خلص العرس مثل مامخطط اله..
ومثل مايريد ابويه طبعا..
ودخل اوس المدلل العش..
اني انتظرت لحد ماتخف الهوسه وتروح الناس يله دخلت لغرفه رواء.. مالي خلك الحجي والناس..
اخذت ملابسي وسبحت ورجعت للغرفه..
شغلت التلفون.. صغيرون يابعد اهلنا..
مااملها. شكد مااسمعها..
نعست.. ومادري شلون غفيت..
الضوه مشتغل والتلفون همين..
ماعرف شكد مر وقت نايم..
فزيت ع ايد انمدت ع صدري..
كبل كمشت الايد وفزيت..
سجى:هاي اني حبيبي.. لتخاف!
شمرت ايدها كبل..
-روحي منا..
سجى:والله خايفه! شبيك بس اليوم خليني يمك!
-كلتلج روحييي!
سجى:مااكدر انام! كل جسمي يوجعني وابنك متعبني! خليني عاد انام هنا!
-روحي! مكان ميكفي!
اجت تمددت بصفي:لا يكفي شوف..
درت وجهي عنها..
حضنتني:حبيبي.. مايكفي زعل؟
مارديت عليهه..
سجى:اموت عليك.. انته حبيبي ونور عيني وحياتي..
غمضت عيني..
سويت نفسي مااسمعهه..
ظلت تحجي بهل كلام..
بالي مو يمها ورجعت نمت..
فزيت بالليل.. بعدها بصفي..
خليت وكمت منها.. رحت للصاله نمت ع التخم..
كعدت امي من وقت..
امي:اسم الله شجابك هنا؟!
باوعت الها:يعني متخلون واحد يرتاح! شنو هل ليله السم !
امي:اسم الله ليش تكول هيج! ليله اخوك هاي !
كمت اغسل..
من رجعت داتريك شفتها بالمطبخ هي وسجى يبسبسن..
شافتي رأسا سكتن..
-ها؟ شعدجن ؟ مخطط لو مصيبه؟!
امي:محد غيرك ابو المصايب.. دهاك اتريك..
اكلت كم لكمه..
بدلت وطلعت ..رحت للمجمع..
كعدت هناك.. صح محد يجي هيج وقت..
بس احسن من كعده البيت ومكابله وجه سجى..
رجعت للبيت العصر..
خطار يمنا.. واوس طاير من الفرح..
امي كالت سلم ع مرت اخوك..
وخلي بيدهه شي..
اخذت محفظتي وصعدت..
سجى اجت ورايه..
دكت الباب.. حجت وياهه.. 
كالت الها يريد يسلم عليج وكذا..
دخلت.. اول ماشفتهه انصدمت..
ابد موحلوه.. مااعرف شعجب اوس ياخذ هيج وحده!
خاصه هو كلش حلو.. ومرتب..
بس بعد القاب ومايهوى.. مااكدر اكول اكثر..
الي عجبني امي شلون قبلت!
وشعجب وافقت ع هيج!
اسيل لوما كوثر هم جان طلعت الف عيب بيهه..
بس مو من ناحيه شكل.. لانو هي مقاصره..
من شفت هاله مرت اوس بقيت صافن..
بعدين يله سلمت.. باركت الهم وانطيتها 100..
طلعت من الغرفه لحكتني سجى..
نزلت لغرفه رواء وهي ورايه..
دخلت..
-خير؟ رايده شي؟
باوعتلي فاتحه عيونهه وكأنها ماسمعت شحجيت:شفتها؟ شفت شكلها؟
-استغفر الله! وانتي شعليج؟ خالقتها! لو أنتِ متزوجتها!!
سجى:لاا مو هيج..
قاطعتها:اسكتي! وياه روحي منا اريد انام..
سجى:بس...
-اني شكلت؟!
خلت وطلعت..
خليت راسي..ونمت..
ومرت ايام..
ع نفس الوضع.. اني جوه .. سجى فوك..
بس لكت شغله جديده تتحجج بيها.. انو الدرج يظرها ولازم تبقى جوه.. وسوتها صدك.. صارت تجي تنام جوه..
ونقلت اغراضهه..
اني شفتها هيج خليت ورجعت للغرفه الفوك..
بعد مكدرت تحجي .. وامي هم لحت عليها تبقى جوه..
وها.. هاله تعودت علينا بكم يوم قليلات..
الي يشوفها شلون تجامل وتحجي يكول الها سنين معاشرتنا..
خاصه من تشوفني جاي.. بس تريد تفتح موضوع وتسولف..
كنت اتصرف بتكبر هواي وياهه..
لان مالي خلك النسوان ودوختهن..
شغاله عقلي وحده ماتتكرر ولاتجي مثلها وحده..
وصارت اكثر من مره..
اصعد الدرج..
اشوف هاله كبالي.. وياريت شوفه بيها حظ ومحترمه..
كانت تطلع فوك بملابس النوم وتراكات واشياء تفضح ماتستر.. سكتت.. مره واثنين وتلاثه..
وماجبت سيره..
كد مااكدر غضيت نظري عنها واعتبرتها تصرفات لا اباليه بدون قصد..
بس كثرت هل المناظر المخزيه.. واوس مامنتبه عليها او يمكن يدري وهو سامح الها..
كلت احجي وياه وانبهه..
جبته بهدوء.. وحاجيته.. كلت اله كل شي واله حرمه .. تقبل تشوف سجى بملابس مو مناسبه..
كبل عاط من يمه لا وشنو سجى اكسر راسهه غير بس اشوفهه هيج..
كلت اله:لعد احجي ويه هاله.. يجوز بعدها متعرف طبعنا.. او هي متعوده هيج يم اهلها.. هنا ميصير واني موجود..
دنك بعدين كال:بس هي ملابسها مستوره؟ ماشايفها طالعه بغير الثوب والحجاب!
-يعني بربك تريد اوصفلك شلابسه شنو؟ كلت الك احجي وياهه خل شوي تلبس مستور واذا تريد تلبس لاتطلع بيهن وتبقى تفتر يم ساحه الدرج ماشي؟!
هز راسه وكال ميخالف..
والله لليل كب عياطهم بصف غرفتي..
ندمت لان حجيت اله.. وسويت مشكله بينهم..
بس كان لازم انبهه..
وشي زاد عن حده..
اسمعها بدت تعيط ونزلت جوه..
المهم مادخلت اسمع هوسه بس ماطلعت ولا حجيت..
خليت ونمت..
شويه وانفتح الباب كلش قوي..
صوت بجي سجى رن براسي..
كعدت:شكو شبيج؟! شجابج؟!
مسحت دموعهه وكالت:هسه اطلكني! يله طلكني!
-عجيب! شكو!
سجى:فوك ما م

تحمله اهمالك وشربك للسم تطلع مخيل ع مرت اخوك وتتحارش بيها!! كلي شنو انته! متستحي! ماعندك دم!
كمت.. متعجب ع الي تحجي..
-من وين الجزهل حجي؟ وج شتحجيييين!
سجى:لعبت نفسي منك طلكني! هيج بشاعه ودنائه مشايفه اني.. لك شلوووون ويه مرت اخوك شلوووون!
بعدها دتحجي كبلها انطيتها كف سكتها..
رادت تحجي:اش اش.. اطلعي برا! اطلعي!
احس راسي صدع كلش..
ماعرف شديصير.. افتريت بالغرفه شي عشرين مره..
تالي خليت وطلعت..
نزلت جوه.. اوس يباوعلي صفح ومدنك راسه..
ابويه:طيح الله حظك! ولك انته شوكت تصير ادمي هااا؟
-شنو الي صار! واحد يفهمني!
اوس خله وطلع من البيت..
ابويه:ولك شلون تتحارش بمرت اخوك! بس كلي شلون وشنو هل نفس العندك هااا!
عطت:شنو هل حجي هذا! وينها هي! خل تجي تحلف تكول اني هيج مسوي! وينهااااا! هااااااله!
طلعت هي وامي من غرفه امي..
تبجي وتون ون..
ابويه:اي! شمدريك بروحك اذا انته يوم والثاني تجي سكران! ها كلي شمدريك بروحك!
-يابه شنو هل حجي! لاتكفرني! اني واصلج! عندي شي وياج! لج احجيييي انطقي!
كامت تبجي وتكل لامي خاله والله حاط عينه عليه.. وكد ماتحارش ومانطيته مجال يوز اوس علليه بحجة ملابسي مو مستوره.. هاج شوي اني ممستوره؟ بربكم اني ممستوره! مو عيب هل حجي هذا! بالله سمعو اهلي؟
ابويه:حشاج .. كافي سدو الموضوع.. من باجر كل واحد ابيت.. ماترهم مأمون واوس ببيت واحد..
-صرخت:لحظة ! وصدكتو! اني ابنك متصدكني!  يمه!
اباوعلهم.. يباوعولي بأسف..
ابويه:كل شي توقعت منك.. اله هاي السالفه.. حقج علينه يابه.. هو هم يشرب ميدري بنفسه..
-لك خرا ع هيج عائله! خرا ع اليوم الصرت بي عدكم! انتو شنو فهمونيييي!
صعدت لبست ملابسي.. وطلعت من البيت..

يتبع...

#شُتات_انثى
الثامن والعشرون

مأمون ...
ظليت افتر بالسياره..
كلبي فاير ع اهلي كلهم.. بالذات ع اوس وع هاي الجابهه مدري منين!
شلون قنعت اهلي وصدكوهه مااعرف..
لا والحلوه مقتنعين كلش!
اخ لو الزمها.. عصبت حيل..
ضربت الستيرن.. ومديرتاح كلبي..
اتمنى هل ضربات تجي بهاله..
وره ماهديت شويه..
خابرت طالب..
كبل اجاني ..
ماحجيتله شصاير وياي بالبيت.. بس كلت اله راح ابقى يمك هل كم يوم..
رحنا ع بيته بالليل..
سهرنا لوقت متأخر..
بادخلي وجع كبير.. والكارثه السوتها بيه هاله متتسولف..
ولا هو هم وينشكي..
بقيتها بكلبي..
ويومين وتلاثه واكثر واني ابيت طالب..
حتى ع المجمع ماكنت اروح.. واهلي محد اتصل.. بس فلاح.. وهمين ماارد علي..
لحد ما خابرني فيصل بيوم..
تعجبت شعجب متصل. بس اكيد اكو مصيبه جديده..
فتحت خط:الو..
كبل عاط:شوف ولك.. اذا ماتخلي مرتك تجوز من عدنا بالله العظيم افجر بيتها وبيت الخلفها! شنو ماعدكم زلم تحاسب النسوان لو شنوووو!
كان يعيط ومفهمت منه شي..
صحت:شبيها سجى؟
فيصل:وتسأل شبيهااااا! ولك ماخلت حجايه ماحجتها! اختي يمكم؟ حاجيه وياك! عدها شي وياك خل تكول ونظم عارنا بيدنا اذا هيج! كول عدها شي لازمته عليك وي اختي!
احس كلبي تفلش ..
منا كبيت كب ع سجى.. ومنا الحجي المايرحم ع اسيل يهدم كل شي بيه..
-شنو حجت ووين شفتها احجيليييي!
فيصل:اجت للبيت هي وامها! زين وعرفت من مرتي بالصدفه! لا والنوب اخوهه مخابر هيثم من فتره! بس فهمني انته شعندك وليش هيج حاطه راسهه ويانه! ترى نمحيها والله!
بعده يحجي .. سديت التلفون..
كبل شغلت السياره ورحت للبيت..
مااعرف شلون صبرت الطريق كله..
دفعت باب المطبخ..
امي كانت تغسل فزت:يمه اسم الله! مأمون؟ شبيك؟!
عفتها وكبل صعدت للغرفه..
فتحت الباب..
شفت الخانم نايمه ع الجربايه ودتلعب بفونها..
ركعت الباب.. باوعتلي وكامت ع طولهه..
ظلت تباوعلي بتكبر وتبين انها زعلانه عود..
قربت منها..
متحملت.. ولا كدرت احجي واتعارك..
كبل انطيتها كف ع وجهه وكعت للكاع..
عاطت وصاحت هواي..
لزمتها من شعرها وسحلتها..
طلعتها من الغرفه.. ردت انزلها الدرج سحل..
بس لحكتها امي..
وصارت بنصنا..
كانت تصيح والله خاله ممسويه شي والله محاجيه..
ركعت الحايط بيدي اكثر من مره وعطت ولج شلون ممسويه! ولج شتسوين بعد! من وين هل جرأة ترحين للبيت عمي منيييييين!
ظلت تبجي وتصيح:والله علمودك! وعلمود حياتنا وابنا!
مأمون ليش ماتفهم هذا كله علمودك ومن حبي الك!
باوعت الها..
صفنت بوجهه وهي تبجي..
مايكفي.. اذا ضربت.. واذا عيطت!
اعرفها بلا كرامه..
كلت:أنتِ طالك! سمعتي طالك!
وباجر تجيج ورقتج ..
امي صاحت ولك لااااا..
-راح اطلع! ارجع مالكاج هنا! هواي صبرت عليج! وهسه انتهى كل شي.. اخذي راحتج ست سجى!
درت وجهي وطلعت..
اسمعهن هي وامي ظلن يبجن..
حسيت حمل وكع مني من طلكتها..
اصلا مااعرف شنو الي صبرني عليها لهل لحظة..
شغلت السياره..
ظليت افتر لحد ماصارت ليل..
تالي رحت وكعدت .. كبال الشط.. نسمات بارده..
صوت المي.. يريح اعصابي..
شغلت اغنيه..شكثر مشتاگ ياعمري..شكثر مشتاگ ياروحي.. ابوس عيونك الحلوة واضم صدرك ع صدري..
اخ .. كلهن عليج اسيل..
كنت جايب شرب ويايه.. خليت الجكاير كبالي..
وبديت اشرب.. دخان ومشروب..
كلما توصل الاغنيه مقطع ليله من العمر رايد انا وياك نتلاكه واكلك شوف هاي الروح ع شوفك مشتاگه..
ارجع اعيده.. اخ شكد مشتاق..
كانت كعده مريحه.. وحدي .. اني واحزاني وخيالي بأسيل..
وره شويه عفت الشرب..
صح بدت دوخه.. بس مو كلش قويه..
صعدت السياره..
بلاوعي كمت اسوق..
لحد ماشفت نفسي وصلت بيت عمي..
كملت شرب.. فقدت واني اباوع ع بابهم..
ع المكان الي كنا نلتقي بي..
فار دمي.. احترك حرك مو بس فار..
نزلت.. شيصير خل يصير..
كبل رحت لشباك غرفه اسيل..
دكيت هوايه..
صحت اسيل.. اكثر من مره.. فتحتلي..
تهيئلي انها باجيه.. او اني عيوني غوشت..
صحت بيها اطلعي برا بسرعه..
رفضت.. حاولت مره لخ وهم رفضت..
شفتها جبانه حيل..
افتريت ع باب المطبخ.. دكيت هوايه..
صحيت اسييييل.. لج اطلعي ..
انفتح الباب.. طلعولي هيثم وفيصل..
مااعرف شحجو.. وكعت عيني ع باب غرفتها.. شفتها واكفه هناك..  لامه اديها يم وجهه..دفعته وردت ادخل..
لزمني.. واذكر ضربني وداخ راسي..
وكعت مكدرت اوكف ع رجليه.. بس اذكر كنت اسمع صوتي .. هوايه هذيت..
تالي ماشفت نفسي اله وصلت بيت اهلي..
شلون وصلت وشصار مااعرف..
فتحت عيني بصعوبه.. لكيت امي يم راسي..
تبجي ومخليه ايدهه ع راسي..
امي:ليش هيج تسوي بنفسك يمه؟ وليدي ونظر عيني.. يمه شبيك هيج تسوي؟
باوعت بعيونها.. تعباااااان.. مااكدر احجي..
بس صفنت بعيونهاا..
ظلت مكابلتني وتبجي..
غمضت عيني .. وصرت بس اسمع صوتهه وهي تشاهك وتبجي.. غطيت بنوم طويل ...
كعدت ثاني يوم ..
صعدت للغرفه.. وهمزين مالكيت سجى..
لان اتوقعتها تبقى ماعدها مانع..
سبحت ونزلت.. اوس ماله اثر لا هو ولا مرته..
يمكن طالعين او مو هنا ماادري..
شفت امي وابويه كاعدين سوه..

ابويه:تعال اكعد..
-خير!
ابويه:شيجي منك انته خير؟!
-احجي اريد اطلع!
بويه:ترجع مرتك! سمعت رجعها واحترم نفسك ترا هواي انطيتك مجال! اوس وطلع من البيت! وبس انته راح تبقى يمنا! مشاكل مااريد! هوسه وعرايك مااريد!
-لو تبقى اخر مره ماارجعهه! يله اني طالع..
درت وجهي ورحت..
طلعت للمجمع..
كان اوس هناك.. من شافني سلم من وره خشمه وطلع..
ههه شكول.. هي بقت عليك!
كعدت كم ساعه.. رجعت للبيت تغديت..
وهمين ع المجمع..
ومرن ايام هيج ماشيه..
من البيت للمجمع والعكس.
مرات نلتقي اني وطالب..
صح مقهور ع اسيل.. بس من اذكر اني خلصت من سجى ارتاح.. طبعا خليت محامي يمشيلي بالطلاق بالمحكمه..
اهلي ميدرون وكلت محامي...
بس لابد يعرفون عن طريق سجى.. ومو مهم..
عرفو وله ماعرفو..
ومرت ايام..
كنت بالمجمع الصبح.. اجه هيثم كبالي .. تعجبت منين طلع وشوكت اجه..
كبل اجه ضربني بوكس.. رجعتها اله بوكسين..
-لك ليش تضرب حيواااان!
تلاطشنا وواحد لازم الثاني..
يصيح ويكولي وين وديت اسيل؟ وين اخذتها!
سمعت هيج.. دفعته عني وصفنت بوجهه..
-وين اسيل؟
عاط:اني اكلك وينها! احجي قسما بالله هسه اموتك هنا!
عبالك كلبي بده ينكمش.. ومدافهم وينها؟
-لك شعرفني! مو انت يمها! مو ع اساس يمك وانت سبع ماكو منك! اسييييل وووووين!
شويه ودخل ابويه..
ابويه:شنو هاي! ماتستحون! شبيها اسيل بعد؟!
هيثم:كول لابنك يطلع اسيل.. احسن للكل.. ترا اسويكم فرجة للعالم!
ابويه:شنو؟ اسيل شجابهه يم مأمون ؟
باوعلي ابوي..
عطت بي:لاتباوع انت الثاني! مااعرف وينها!!!
هيثم:يعني اقنعني اذا مو يمك وين راحت هااااا؟
ابويه جر هيثم وصاحلي..
ابوي:فصحتونا! العمال كلها سمعت! تعالو للبيت
خل نفهم شنو السالفه!
صعدنا وي هيثم..
اخذنا ع بيتهم حسب ماطلب ابويه..
بس كان يسوق ويذب حجي.. وعينك عينك يكلي انت خاطفهه.. انت ماخذهه وضامهه من عدنا!
وصلنا ع بيتهم.. كعدنا بالاستقبال..
ابوي:احجيلي شصار وشلون ووين راحت؟
هيثم عاط:اعرف اني وين راحت؟ ما تسأل ابنك! محد يعرف غيره!
ابوي:لا ! مو يمه! مأمون ماطالع لا منا ولامنا.. كله بالبيت ويمنا!
-لاتحجي حجي زايد! كول شوكت فقدتوها وخل نلحك ندورها!
هيثم:حنان خابرتني قبل شوي كالت اسيل ماكو.. اجيت دورت .. ماخليت شبر بهاي الكاع مادورته.. مالكيت الها اثر .. مااعرف شوكت طلعت وويامن!
ابوي:عجيب! شجاهن خواتك!
هيثم دنك راسه وسكت..
-مسويلها شي؟ ضاربهه؟ متعاركين؟
هيثم:لا.. بس اليوم ع اساس نعقد الها!
ابوي:تعقد الها؟ المن؟ وليش ماعدي خبر!
هيثم:وانته من شوكت تدري بينا عمي!
-لمنو انطيتها؟
هيثم:واحد اعرفه!
ابوي:غير نعرفه منووو! احجي !
هيثم:ابو كامل.. تعرفه عمي..
ابوي:هااا؟! كل عقلك! تنطيها لهذا!
هيثم:وليش هي منو قابل بيهه حتى ماانطيها! شوانت شردت منها شرده!
كبت عندي كلش.. كلام هيثم يشعل نار بصدري.. لزمته من قميصه..خزرته صكيت سنوني وكلت:ولك شنو انته!
جرني ابويه منه وكال:كافي مو وكتهه ! خل نلكاهه كبل لاتسمع بينه الناس نصير فضيحه..
باوعت لابويه بعتب..
درت وجهي وطلعت برا..
اخ يل قهر..
ليش هيج اسيل.. وين رحتي.. شصفى بيج هسه..
شنو الحسيتي بي وشنو الوصلتيله حتى هيج تسوين..
ظليت اروح وارجع برا..
فكرت هواي.. خطرلي اروح لخالاتهه عسى ولعل رايحه يمهن..
دخلت لهيثم وابويه:تعال وصلني..
هيثم:عرفت شي؟
-لا.. بس خل ندورها.. نتفرق ندورها.. اني رايح لخالاتهه..
هيثم:يله.. خابرت فيصل راح يجي هسه..
ابوي:يله ننتظره ونطلع ندور.. كل لعمك ابو سلام هم خل ولده يدورون ويانه..
-لاماكو داعي.. احنا ندور ونلكاهه لااطشون الخبر..!
هيثم:اي.. بلكي نلكيها .. بس والله والله مااخليها عايشه!
خل الكيها واذبحها بعتبه هذا الباب يشهد الله!
-اكلك.. ماخذه شي وياهه؟
هيثم:اي.. جنسيتها.. وفلوسي لكيتها ناقصه.. ملابس يمكن هم ماخذه!
-وشلون ماحسيت عليها شلووون!
ابوي:كافي مو وكت صياحكم!
دنحجي ودخل فيصل..
مخطوف لونه ومفجوع..
فيصل:ولكم صدك هذا الخبر! صدك هاي المصيبه!
هيثم:اي.. يله بسرعه خل نتفرق وندور ..
فيصل دك ع راسه:ولك وين شدور؟ وين ادور؟
هيثم:امشي هسه وع تلفون نتواصل..
طلعنا من البيت..
وصلني ع المجمع..
ابويه بقى بي.. واني اخذت سيارتي ورحت لخالاتهه تلاثتهن..
نوب شكد حاولت اضم ومااكشف انها شردت بس الكل يعرف .. من فجعتي عليها وخوفي وسؤالي عنها..
مالكيتها.. ولااحد يعرف عنها خبر..
حسيت راسي راح ينفجر..
وين راحت وييييين..
وكفت السياره ونزلت بنص الطريق..
تخوصرت ووكفت.. اسأل المحلات؟ اسأل منو ووين الكاهه؟ اسأل الناس التمشي بالشارع؟
خابرت هيثم..
هيثم:هاا بشر؟
-ماكو.. وين دورت؟
هيثم:وسطت واحد يدورلي بالمستشفيات.. بلكي الله الكاهه ميته بالثلاجات بالطب العدلي شو وين!
-ياستار! الله لايكولها! يله اذا اكو جديد خابرني..
صارت دنيا ليل..
واسيل ماكو..
وين صفيتي .. شنو نمله أنتِ واختفيتي؟
فص ملح وذاب ؟
ظليت متأمل.. عسى ولعل تجييلي.. او تخابرني..
رجعت للبيت ساعه ب11..
اهلي كلهم ملتمين عدا اوس طبعا..
ي

حجون بسالفه اسيل..
انكسر كسر من اسمعهم يحجون بيها..
لج ليش خليتي الناس تحجي بيج ليش..
ليش مااجيتي ويايه ورحنا سوى.. ع الاقل بالي يرتاح عليج..
امي ماقصرت بالحجي عليها..
اي هي هاي تربيتهن.. متعودات ع هيج..
عطت:كافي رحمه لابوج! كافي! شعرفج أنتِ بيها وتحجين!
هزت ايدها وكالت:ديله! كل هذا؟ شسوي بعد وتقتنع!
ابوي:كااافي! سدو السالفه! خلونه نفكر وين راحت وويامن!
يكتلوني كتل من يكولون ويامن راحت!
ولكم ويامن! اخ يابه اخ..
للحظه بده دماغي يفكر انها صدك شردت ويه واحد..
لالا بس مستحيل.. اسيل تسويها؟ لالا مااصدك..
اعرفها انقى من كل الكاعدين كبالي ومن كل الاعرفهم..
بس حظا ماكعد .. لا وياي ولا بالحياه كلها..
فلاح:اكلكم خاف انتحرت؟
-ياساتر!
ابوي:اي يجوز.. بس خو تنتحر ابيتهم!
تذكرت من رادت تحرك نفسها..
نار واشتعلت بيه.. بس لا سوتهه صدك..
وج شلون يهون عليج ترحين شلون..
شلون هان عليج تكطعين بيه هيج..
امي جابت اكل وحطته كبالي..
امي:اكل.. شوف شصاير بحالك يمه!
-مااريد شيلي!
فلاح:اكل لا تسويها قصه!
-مااريد شبيك!
خليت وكمت منهم..
صعدت الغرفه.. حاير ودايخ بزماني..
خايف وكلبي يوجعني..
راسي صار كومه افكار..
انتحرت؟ لالا.. يجوز فقدت وعيها بفد مكان؟
زين شوكت طلعت.. ووين ياترى تروح؟
خابرت هيثم..
-الو.. ها هيثم؟
هيثم حجه بثقل وحسره:ها؟ رجع العار من جديد.. صوجي اني اذبحهه واخلص!
-تذبحهه ومتقبل تنطينياهه! لك شلون تفكر !
هيثم:يعني بربك انته متزوج وانطيك اياهه!
-لاتصير ناكر! اجيتك قبل لااتزوج وانت وابوك ماقبلتو!
هسه احسن هيج! لك مو جانت قابله بيه!
هيثم:والله كول لاهلك! يعني وين صايره انطيها الك واهلك مراضين!
اختنكت خنك.. كلت اله:سد الموضوع كافي!
هيثم:كلي هسه شسوي؟ مأمون ؟ بداعه اغلى شي عندك.. انت تعرف وينها مو؟
-اخخخخ! لك شكلك! ادعي عليك؟ اسبك؟ روح هيثم! عوفني بحالي روح!
سديت التلفون ..
شمرته بالكاع.. لك اخ من هل حظ..
ظليت اروح وارجع بالغرفه..
ماهديت ولالحظه..
اخذت السويج ونزلت.
اهلي نايمين..
طلعت ادور الشوارع.. شارع شارع افتريت.. كل فرع ودربونه صارت كبالي دخلت بيهه..اباوع بالوجوه.. اباوع للمحلات.. لبيبان البيوت..
شلون.. ادخل ادك المحافظه بيت بيت؟
اسأل منو.. يارب صعبت وماتصعب عليك..
طلعت روحي .. بزعت ومليت.
اسمع القرأن بده يقره..
باوعت للساعه 3 بالليل..
رجعت للبيت.. سبحت ورحت مددت..
ماغمض لي جفن..
وينج هسه بهذا الليل.. وين اكلتي ووين شربتي..
معقوله ماتت؟ لا ياالله.. اخذ عمري كبلها.. مااريد اسمع ولااشوف هل يوم..
يمكن لحظات ..
غمضت بيهن عيني.. وهم فزيت..
دكيت ع هيثم..
كبل فتح خط..
شكله كاعد مثلي مااجاه نوم..
هيثم:ها؟
-ها؟
هيثم:ماكو شي لحد هسه.. دورت لمن مليت..
-وين ندور بعد؟
هيثم:مادري والله ماادري.. كلي اني شمسوي بدنياي حتى هيج اتعاقب بشرفي وسمعتي كلييي!
-لاتنسى روحك شكد اذيتها.. شكد ضربتها شكد هنتها! وهسه من وراك انت وهذا ابو مدري منو راحت!
هيثم:مو من كيفي اسوي هيج! خفت لاهم تصير مثل ذيج ال.. استغفر الله.. خل اصلي.. بلكت الله يشوف حالي! مو عيشه هاي!
يمكن لاول مره احس هيثم ضعيف ومكسور..
كان يحجي مايدري بنفسه شيكول.. يمكن لان  وقت فجر..
ويمكن كد التعب والدواره ماعرف شديحجي..
مددت.. نمت شي ساعه..
كعدت ..
ابويه كاعد بالمطبخ..
صبحت علي وكعدت ..
ابوي:ها.. ماكو خبر شي؟
-لا
ابوي:والله كارثه.. ليلي كله مانمت.. شلون هسه؟
-هو منو النايم بينا؟!
امي:مالكم شغل! هسه يومين وترجع.. تطلع وي واحد او شو وين جانت.. ابد لاتدخلون.. اني اعرف هيج نوع..
ابوي:كافي شلج بهل حجي !
امي:هااا؟ نسينا اختهه شسوت لو شنو؟ من متوقعهه من كوثر؟ وهسه لا اني اتوقع الاكثر من اسيل.. بعد تعودن!
عطت:شبيج فهميني! دتحجين عن وحده ماتت وعظامهه بلت ويم ربهه والثانيه ممعروف وينها .. ويجوز تطلع ميته وانتي تحجين هل حجي!
امي:لا لتخاف.. جنهه عرج ماتموت!
ابوي:والله تموت احسن ماترجع.. ليافضيحه ترجع!
-خل نلكاهه عود.. وبعدين خططو للسمعه وللناس.. هذا همكم.. وهي الله اعلم شحل بيها هسه..
شربت جايي واخذت براسيتول وطلعت..
رحت يم بيت عمي..
فيصل وهيثم التعب مبين بوجوهم وعيونهم منفخه..
كعدنا بالاستقبال..
ساكتين واصلا واحد شيحجي وشيكول..
كله بسبب هيثم.. وبسبب غباءه طفرهه..
دخلت حنان..
كلنا باوعنا الها..
كالت:ها؟ شصار؟
هيثم:شصار يعني!
كالت:ماتشوفون بيت خالكم بال.....
هيثم:اي صدك! شلون نسينا!
امشو نروح بسرعه..
-يله.. راح من بالي !
رحنا اني وهيثم بسيارتي..
هو خالهم ميت.. بس بيته واولاده موجودين بغير محافظه..
مسافه الطريق ساعتين.. وصلنا الهم بعد معاناة طويله وسألنا هوايه.. طلعلنا ولد شاب..
عرف هيثم بس اني ماعرفني..
رحب بينا ودخلنا جوه..
كل شوي اهمس لهيثم احجي بسرعه!
مااعرف شمنتظر.. بس هم الجماعه ماانطو مجال..
كل شوي جاي واحد مسلم علي..
وبين سوالف واسأله هوايه..
فصلت عنهم.. وركزت سمعي جوه..
عسى اسمع صوت اسيل.. بس ماحس

يت بوجودهه..
ولا بين ع ولد خالهه انهم يعرفون بيها..
اصلا هم قاطعين علاقتهم بيهم.. ويمكن من الاحراج يسألون مو اكثر..
طلعو وبقينا وحدنا..
-شوكت راح تحجي؟
هيثم:مبين انها مو يمهم! مداشوف سألو عنها؟
-يجوز هي موصيتهم؟
هيثم:يعني عود هي جوه؟
-اي يجوز؟
هيثم:شتكول ادخل؟
-عيب اكيد نسوانهم جوه !
هيثم:لعد شلون؟
-اسألهم.. واذا كذبو راح يبين عليهم..
هيثم:خوش..
دخل الاسمه انمار..
هيثم كبل طكها.. كلها اني جاي ادور ع اسيل..
انمار انصدم.. وتعجب من سؤاله..
ووب بده يسأل.. شلون ووين وليش..
كوه خلصنا منه..
نوب بدل مانسد السالفه دتكبر وكلها عرفت..
راد نبقى يمهم ع الغدا.. بس رفضنا وكبل رجعنا..
بالطريق.. كلت اله:خل نبلغ الشرطه..
-لا مستحيل! افضح روحي بالمراكز !
-لعد الحل شنو!
-انتظر كم يوم.. واذا ماكو انصب فاتحه! شسوي ابو كامل اذا اكله شردت يفضحني ويكرع راسي!
اخ بس اخ..
رجعنا للبيت..
بالروحة والرجعة خلص النهار ومافهمنا شي ولاعرفنا وينها..
كرهت روحي..وكرهت هيثم بذاك اليوم..
عفتهم ورجعت للبيت..
تعبت من التفكير ومن كلشي..
وصار الليل.. وهاي الليله الثانيه وهي ماكو..
ساعات تمر مثل السم.. عين ع التلفون وعين ع الساعه..
شكد انتظرت..
عبالي راح ترجعلي.. تعرف بيه احميهه وماا اخلي احد يأذيها.. وانتظرت.. ساعات ..
عسى تتصل.. او اي احد يتصل ويكلي لكيناهه..
مادري شلون غفيت..
عطيت بنوم عميق..

يتبع

#شُتات_انثى
التاسع والعشرون

اسيل..
فتحت عيني.. مره كبالي .. باوعت فوك.. سكف كلش واسع..
ثريا ضخمه بالنص.. مراوح جانبيه مو سقفيه..
رجعت باوعت للمره..محجبه بحجاب اسود هذا الي يصير واصل جوه الصدر للبطن.. عيونهه كبار وتتمعن بيه حيل..
كالت:اللهم صل ع محمد وال محمد.. صحت ببركات اهل البيت.. صحت وفتحت عينها.. اللهم صل ع محمد وال محمد..
غمضت عيني..
مادري شصارلي..
اريد اعرف اني وين.. هاي منو.. وشجابني لهنا..
التموعليه.. هوايه نسوان مااعرفهن..
كلهن محجبات بنفس الحجاب..
بيهن شابات وبيهن لا كبار..
داخ راسي.. غمضت عيني .. كلها تباوعلي خفت..
وين كنت اني.. وشجابني لهنا..
مر مثل الخيال كدامي..
شخص غريب كبير بالعمر كاعد بصالتنا..
يباوعلي بنظره ثاقبه تفصل بجسمي تفصل..
اختفت هل صوره..
وشفت نفسي ابجي بالغرفه..
واختفت.. وشفت فيصل يضرب بيه من كل جهه يحجي واشوف شفافه تتحرك بس ماادري شنو!
واختفت .. شفت امي تبجي..
واختفت شفت نفسي داطلع بالليل من البيت..
شفت مأمون يبجي..
شفت كوثر.. شفت دم هوايه..
غمضت حيل..
مثل الصور وتتكلب كبالي بسرعه..
مالحك اذكر ولااربط احداث..
صرخت حيل وكعدت حيلي كاااافي لااااا!
فتحت عيوني..
النسوان ملتمات يمي صافنات بيه..
الي كانت كبالي اول مفتحت كعدت بصفي.. رجعتني لمكاني..
كالت:اعوذ بالله من شر الشيطان الرجيم.. اعوذ بالله..
خلت ايدهه ع راسي.. قرت ايه الكرسي..
من كالت:الله الذي لااله الا هو الحي القيوم..
احس كل جسمي كزبر..
دمعت عيوني.. خليت ايدي ع كلبي وكلت ياعظيم بعظمتك خلصني .. مداعرف اني منو.. وشجابني هنا..
هاي المريه منو؟
كملت .. صاحت:علياء جيبي مي بسرعه..
وخابري الحجي كليله البنيه صحت..
دخت اكثر..
ياحجي.. وشتقصد.. يصير الحجي نفسه هو الي شفته بالصور المرت كدامي..
نوب من هوستهن ومنظرهن كدامي مداكدر اذكر شلون وصلت هنا..
مسحت ع وجهي وكالت:شسمج ياحلوه؟
ظليت صافنه بوجهه..
كالت:تسمعيني؟ تعرفين تحجين؟ اذا اي هزي راسج؟!
كلت:اسيل..
صاحت:اللهم صل ع محمد وال محمد..
اطلعن بنات.. خلوهه ترتاح.. البنيه تحجي مابيهه شي..
طلعن كبل..
باوعت لايدي بيهه كانونه.. احس كل جسمي يون تعب وارهاق كلهن..
اجت الي اسمهه علياء.. انطت المي للمريه..
كعدتني وشربت..
نوب صبت بيدهه شوي ومسحت ع وجهي وكالت من بركات بيت الشيخ..
لزمت ايدهه:اني شجابني هنا؟ انتو منو؟
نزلت ايدي.. طبطبت ع كتفي وكالت:ارتاحي هسه.. وراح تعرفين كل شي.. مو زين اتعبين نفسج..
مددت..
صفى بالي هواي.. مو مثل اول ماكعدت..
مااعرف نفسي منو..
تذكرت اهلي.. تذكرت تفاصيل هوايه..تذكرت فيصل..
شسوه بيه.. شلون ضربني وشحجى..
وكله بسبب سجى..
وظليت ايام اتوجع ..
تذكرت من ردت ادخل المطبخ وسمعت هيثم يكول لحنان:كوليلها لهاي الغبيه.. خل تحضر نفسهه راح يجي ابو كامل هل سبوع هذا يشوفها..
حنان كالت بفرح:ياا.. قبل مو؟
هيثم:اي .. بس يكول اشوفهه يله..
حنان:اي خوش.. سهله اذا هيج.. خوش هو زنكين تنسى بفلوسه..
هيثم سكت بعد مارد عليهه..
ماخفت..
ولا ضجت .. تعودت ع عمايلهم بيه.
مابقت ع هاي..
ومرن ايام.. مابينت اني اعرف شي.
ولا بدر مني لا كلمه ولا تصرف يدل ع انه سمعت هيثم..
مشيتها هيج وهيج..
واجت حنان.. كالعاده اخبارهه السيئه وياهه..
بدت تمهد الطريق حتى تحجي بابو كامل..
سمعتهه للاخير..
كاتمه بداخلي عضب وحزن.. بس احس ماكو منفذ يطلع منه هل الغضب هذا..
اذا حجيت واذا صيحت واذا بجيت ..
محد يعبرني اصلا..
سكتت.. وع حجي حنان.. العصر اجه الاسمه ابو كامل..
اجتني كالت رتبي نفسج واطلعي خل يشوفج..
لفيت حجابي وكمت وراهه..
اباوع بالصاله رجال بكد ابويه.. ويمكن اكبر..
محاول كد مايكدر يصغر نفسه.. صابغ شعره وشواربه بلون اسود حبر عبالك..
لابس قاط رصاصي..
من قربت .. باوعلي بنظره كزت نفسي منه..
الي مثله اصيحله عمو جدو!
مو يكعد يباوع لجسمي بالتفصيل!
رجفة سرت بكل جسمي..
خليت وطلعت كبل للمطبخ بدون حتى مااسلم..
اسمعه كال لهيثم ليش ماسلمت؟ هي بيهه شي ؟ ضام عليه؟
هيثم ضحك وراد يضيع.. كله لا شنو هل حجي .. عاااط وج اسيل! جيبي الجاي!
اخذت صينيه الجاي ورحت الهم..
قدمته.. اباوع لهيثم..
احس بركان صار بداخلي.. عيوني رادت تطلع علي..
مباوعت ع الشايب الجايبه يمه..
ظليت بس مركزه بي..
اسمع الرجال كله هاي هي .. ع بركة الله نقره الفاتحة..
درت وجهي ورحت منهم..
ماكو حتى دموع.. ماكو حتى حيل..
كل شي بيه انتهى..
كعدت بعرفتي بس اتصفن..
فكرت وفكرت.. كلت بيني وبين نفسي..
كافي اطاوعهم.. كافي كلشي يريده هيثم اسوي..
لهنا وكافي.. اني مو حيوان..
اني بشر.. صفيت غصن يابس من وراهم..
طفو عمري وشبابي كله..
لو اخر يوم بعمري بعد مراح ارضخ الهم.. شيصير يصير..
اطلع منا.. احسن شي..
مااذكر بالضبط كم يوم بقيت..
بس خططت.. اشرد.. لوين مادري..
كنت كلما اشوف هيثم مو بغرفته وكاعدين هو وحنان لو ياكلون لو يسولفون ادخل غرفته..
الكه محفظته يم الجربايه.. اخذ منها العشره والعشرين..
حتى فيصل

صارت فرصه واخذت منه.
طبعا مو بغرفته لان مرته لازكه بيهه متطلع..
لميت مبلغ صح قليل بس كافي  يطلعني من هل مكان المشؤوم والمحافظه الاني بيهه..
اخذت جنسيتي .. وكم قطعه ملابس..
خليتهن بجنطه شوي واسعه تشيل..
ليليه اكول اليوم اطلع.. بس من يصير الليل اخاف هواي..
واتردد وارجع لغرفتي..
بس .. من كالت حنان باجر او بعده يجي ابو كامل..
طبعا حجتلي عنه هواي.. وما اهتميت ولا حتى بقى ابالي شي من الي كالته عنه..
هنا تشجعت.. وحيل..
مو لان هو كبير.. ولا لان اني مرايدته..
بس هيج ردت اسويهه واطلع واشوف اخواني شنو اكدر اسوي.. اشوفهم شخلو بيه وشوصلوني..
بليلتها مانمت.. قلقه.. جسمي كله مثلج..
بالرغم هي حاره وصيف..
انتظرت الكل نام.. كل شوي اباوع للساعه..
اطلع هسه؟ لالا بعد وقت..
اي غصون دائما تطلع هيج وقت للحمام..
طلعت تمشيت بالصاله ع كيفي.. ماسمعت صوت..
هدوء وتبين الي كلها نامت..
صليت.. دعيت اخلص من كل هم الي.. دعيت ارتاح .. حتى لو بموت .. هم ميخالف..كملت باوعت للساعه..
حوالي تلاثه ونص..
لبست ردائي وشالي.. شلت جنطتي..
وصلت يم باب الغرفه.. باوعت الها حيل..
ذبيت حسره.. راح اخلص منج.. عساني لارجعت هنا..
فتحت ع كيف.
مشيت خطوات. ماريد التفت.. اخاف الكه واحد منهم ورايه..
كلبي كام ينبض بسرعه..
بلعومي كام يطك.. واخاف اباع ريكي لا يطلع صوت..
وحتى لو طلع ماينسمع من صوت الاجهزه.. بس خفت..
وصلت باب المطبخ.. كلها خطوتين تبعدني عنه..
واخيراااا..
فتحته.. طلعت وسديته ورايه..
مشيت ع كيفي..
خفت لااحد يشوفني..
بعدت من البيت هوايه.. ركضت كل مابيه..
طير وطلع من القفص.. ردت بس ابعد..
صرت اركض وابجي بصوت واصيح اه اه..
وصلت الشارع العام..
اخذت نفس.. مسحت وجهي لان عركت ودموعي ترست وجهي..
وكفت هواي بالطريق.. مرن سيارات هواي..
وكل ماتمر سياره واشوف البيها ولد شاب لو كبير بس يبقى يباوعلي اخاف اكثر..
واخاف لا يلكوني..
طلعت الشمس.. واني بعدني ع الشارع..
دنكت وايست تجي سياره.. بس لو اموت ماارجع..
لو اعرف هذا الطريق كله امشي..
رفعت راسي.. واشوف هديه رب العالمين اليه..
سياره بيك اب.. بيهه اثنين نسوان..
ورجال يسوق..
اشرتلهم.. كبل وكفولي..
باوعت للبدي مال سياره.. بي صواني وجدوره مشدوده بوصله.. عرفت ذولي النسوان يبيعن كيمر ولبن..
ضحكن بوجهي وكالن:صباحج خير .. وين تردين خاله؟ مضيعه شني؟
دخت.. شحجي حتى مايشكون بيه؟
كلت :لا خاله.. مامضيعه.. اريد اوصل للكراج..
خاله:ها..
هزيت راسي اي وكلت:اي.. منتظره سياره وتأخرت علي.. عندي شغله مستعجله ..
اشرتلي الثانيه.. صعدت..
باوعلي بتعجب..
الرجال كال :عمي أنتِ عدج دوام؟
-اي.. طالبه كليه وتأخرت حيل..
رجعت وحده سألتني:جا اهلج شعيب(شعجب ) مايودونج!
-ماعندي بس امي وخواتي.. ماعدنه سياره.. وعندي خط يجيني يوصلني للكراج ومناك اروح.. بس شو هل مره مااجه..
مادري شلون طلع من الكلام هيج.. يمكن لو مرتبه لهل حجي من زمان ماكان طلع هيج.. بس من صارت فجأه كله الحجي طلع دفعه وحده..
ظلن يسألن بيه طول الطريق.. هواي اسأله. وهواي جاوبت واخذت وانطيت وياهن.. بس مااذكر شحجيت..
وصلنا للمدينه.. ذبني يم الكراج..
تشكرت منه وطلعت من جنطي فلوس..
انطيته.. رفض ياخذهن.. لحيت ويا.. مقبل..
تشكرت وعفتهم..
ماعندي وقت.. اخاف هسه كعدو..
دخلت الكراج..
مادري وين اروح.. اصوات هوايه وهوسه..
مافايته الكراج من لمن كنت بالابتدائي..
لمن كنا نروح اني وامي لبيت خالي..
كله متغير..
صوت نجف نجف رن براسي..
كامت رجليه تاخذني لمصدر الصوت..
باوعت ..
واحد كبير.. كال نجف؟
هزيت راسي اي..
كال صعدي.. صعدت.. شفت مريه كاعده..
كلت:بلازحمه اكدر اكعد هنا؟
هزت راسهه وضحكت كالت اي..
بعدتلي.. كعدت يم الجامه..
مظليت مدنكه راسي.. لااحد يشوفني..
لحد ماقبطت وحركنا روحي اله شوي طلعت..
دخت الطريق كله راسي يفتر..
المريه البصفي كل شوي تلتفت الي..
الحلو بيها ماتسولف ولاتحجي..
غفيت شوي بالطريق.. ومادري شلون طاوعتني عيني..
كعدت من حسيت السياره وكفت وصوت الوشه الي تصير من تمشي السياره وتضرب بالهوى راح..
باوعت هاي سيطره..
دنكت راسي .. سويت نفسي نايمه..
بس داخلي ميته خوف.. كلت اي اكيد راح يعرفون .. اكيد راح يرجعوني الشرطه..
ماوكفنا هواي.. عبرنا.. بس بعديش.. متت خوف..
وعيت اكثر.. وكلت بداخلي مراح انام.. مراح انام..
هواي مشت السياره.. مادري شكد..
لا ساعه عندي ولاكدرت اسأل اليمي ..
بس حسيت الوقت حوالي سبعه الصبح او ثمانيه..
نزلنا بشارع..مااعرف اني وين..
دخت وانسطرت.. ماعاد اركز بشي..
الكاع كامت تفتر بيه..
كعدت ع حافه الشارع وكمت ابجي..
هذا حدي.. يمه شلون الكاج..يابه اريد اجيكم..
فقدت واني ابجي..
اشوف اثنين زلم ونسوان اربعه مدري خمسه كبالي..
شفتهم ارعبت اكثر..
كلت اي دزهم هيثم ماكو غيرها.. لو يعرفونه وراح يرجعوني يمهم..
دنكت راسي..
واحد كال:يابه شبيج؟ ليش تبجين؟ ضايعه ؟ انباك منج شي؟
هزيت راسي بلا..
وحده من النسوان:شبيج؟ لي

ش هيج حالج؟
صحت ودوني لامي.. ودوني الها..
وين امج؟
صرت اسمع الصوت بس مااعرف منو يحجي..
كلت الهم بالمقبره بس مااعرف وين..
مااندلها..
اشوفهم انخبصو..
واحد يكلي فتحه ثانيه ولخ خامسه ووو..
كلت مااعرف وين.. اريد امي وصلوني الها دخيلكم..
واحد من الزلم كال راح اخابر ابو مادري منو سما..
شويه ورجع كلي انتو منين.. وامج شسمها..
خفت احجي وظليت بس اباوع..
كال  .. شلون اعرف اذا متحجين؟ شلون اوصلج الها؟ لتخافين احجي !
كلت اله.. الاسم والعشيره ..
رجع اخذ تلفونه وراح..
متت خوف.. كلت اي هذا هيثم ويا ع الخط..
ظليت اباوع منا ومنا.. اريد فرصه واشرد منهم..
رجع ..
كال هسه دقايق وتوصلين يمهم..
مادري شلون بقيت كاعده بنصهم.. لااعرفهم ولااعرف المصير الينتظرني..
شويه وصعدو سيارتهم.. كيه كبيره..
صعدت وياهم.. وين ماتوصل خل توصل..
اذا صعبت كلش اموت نفسي وانتهت..
حركت السياره مسافه..
وكفو .. صعد وياهم واحد شكله يخوف.. مادري ليش حسيته هو دفان ..
ظل يسولف وياهم.. ويدليهم .. هنا تأكدت ماكو شي واني راح اوصل امي ..
بدت القبور تظهر.. انقبضت روحي.. بلا وعي دموعي بدت تصب.. ظليت اقره الاسماء وادور اسم امي وابويه..
وكفت السياره.. بديت امشي ورا الزلم..
يمشون ويحجون.. بس ممركزه وياهم..
امشي واباوع ع الاسماء..
داخ راسي وكمت اخبط اسم من قبر ع اسم قبر ثاني..
مااشوف بس اسم امي صار كدامي..وبصفه اسم ابويه..
شهكت.. اخ يمه اجيتج..
حاجوني.. اشرتلهم بيدي .. مااعرف شنو لوحت وشنو حجيت..
قربت من القبر.. وكعت للكاع..
هذا حدي.. وهاي قدرتي بعد..
مااكدر لاامشي ولااحجي..
صرت بنص القبرين.. اشبك منو واندار لمنو..
كنت بس اشهك.. اريد انطق مااكدر...
عبرات تصعد وتنزل ويه النفس..
بداخلي اشكي .. احسهم يسمعوني اكثر من الصوت..
مر الوقت.. واني هناك.. بين القبرين..
هديت شويه.. ماكو صوت.. بس العصافير تزقزق ومااشوفهه وين..
وحدي بالمقبره..
سمعت اصوات بجي ونواح بعيده..
كعدت ساعات كبال اسمهم.. صارت حاره حيل..
يمكن وقت الظهر صار..
الشمس صارت تنزل ع راسي عبالك تزرف بي..
حتى مي ماعندي.. والي وصلوني يمكن راحو.. لاكيد راحو لان مر وقت هوايه من وصلت..
ظليت اتلمس اسماء امي وابويه..
دموعي ماوكفت .. حسيت جسمي صفر من المي..
منا عركت ومنا دموع..
خليت راسي ع قبر امي.. هنا بديت احجي..
بصوت خافت .. بصوت كله وجع..
يمه اجيت.. يمه تدرين شصار بيه؟ يمه اخذيني يمج..
راح ابقى هنا.. مااعوفكم بعد.. بس انتو هم عفتوني..
ليش رحتو.. تدرين ابنج شسوه بيه؟
اي اكيد تدرين.. اي تدرين.. يمه مشتاقه..
يابه.. ميته ع شوفتك مو بس مشتاقه..
الله ينتقم من الطشرنا..
دخت.. كمت احجي ماادري بنفسي..
غفيت هناك.. رغم الحراره..
كعدت دنيا عصر.. بده الخوف يتسلل..
اباوع للشمس واكلها لاتغيبين فدوه.. اخاف من الظلمه..
يبس بلعومي حيل.. تمنيت قطره مي ابلل حلكي بيهه..
من شفت الشمس بدت تسلم..
غمضت عيني.. وتخيلت شغلات حلوه.. تخيلت نفسي صغيره وكاعده بحضن امي.. تلعب بشعري .. ابويه هم كاعد بصف امي .. مادري شوكت هم جانو هيج ..
بس ردت اي شي ينسيني اني وين والظلمه الراح تجي..
كد ماتخيلت دخت.. حيل دخت.. افتح عيني مااشوف شي..
عبالك مثل العمى..لااكدر اصرخ اخاف يسمعني احد واكون بشي واصير بشي..
كنت ابقى اتلمس القبر..
اخاف لاايدي تجي ع شي غير القبر.. اخاف لاايد تطلعلي..
كمت ارجف.. اغمض وافتح نفس الظلمه..
رادت تطلع روحي..
وكل هذا واكول بداخلي راح ابقى ومراح اتحرك..
راح ابقى هنا لحد مااموت..
كل لحظة مرت بسنه..
راسي من دوخه لوجع للعبان نفس..
عبالك شي وخاض جسمي كله..
غمضت عيني بعدهه مادريت شي..
كعدت لكيت نفسي يمهم.. منو هم وشجابني يمهم مااعرف..
صافنه ع كنتور كبالي واذكر كل هذا المريت بي..
اسمع صوت كحة رجال.. وياهه يصيح ياالله.. يااالله..
فاتت المريه ..
كالت اكعدي وغطي ع راسج.. الشيخ يستحرم..
كعدت ع حيلي .. لبست وغطيت نفسي..
راح بالي انه شيخ عشيره..
بس لما دخل بعمامته.. مااعرف شنو صارلي..
خفت وله فرحت ماادري..
كان مدنك.. لحيته مخلوطه بيها شيب..
لابس نفس شيوخ الدين الي كنت اشوفهم بقنوات التلفزيون..
قدمتله المريه كرسي وكعد طرف الغرفه..
وهو مدنك كال:السلام عليكم..
رديت وعليكم السلام..
كال:بنتي شلون صحتج؟ شتحسين روحج؟
-الحمد لله..
تعرفين اسمج؟ اهلج ؟
ترددت اجاوب..
كرر السؤال عليه.. كلت اي..
كال:بنتي شنو المخليج بالمقبره لليل؟
شنو قصتج؟ احجيلي عسى ولعل رب العالمين يوفقني واكدر اساعد بشي..
المريه باوعتلي.. بنظره اطمئنان..
كال:أنتِ بأمان هنا.. لا تخافين من شي ..
كلت:اني اسيل.. كبل صبت دموعي..
مكدرت اكمل.. لان منين ابدي.. ومن يافضيحه ابديها؟
كال:عوفي البجي واحجيلي.. واذا حاسه نفسج تعبانه نعوفج ترتاحين ..
مسحت دموعي .. تشجعت.. كافي.. خل تعرف الناس..
خل تعرف شنو عشت.. خل تعرف اختي شسوت..
خل يصير اللوم ع اهلي مو عليه.. خل يعرفون ليش شردت..
بديت احجيله..
طبعا كان يحاجيني مد