#اول_سفير



اوّل ســفــيــر لـكـربـلـه     حـدد مـصـيـره ابمرجله

              بدم النحر خط موقفه الحاسم
              طب للقصر صـورة مجد راسم

                            *---------------*---------------*

             هاي البطوله لــ كـل بطل موقف
             مثل الجبل كـلـمـا فتن تـعـصـف
             شمرت علي ومنه الزلـم تـرجـف
             بْـقـوّه وإراده بـكـل فـخـر يهتف

اليوم اقـود الـمـلـحـمـه     رافـع شـعـاره وصـارمـه

              وصّل رساله لـ كل بَغي وظالم

                           *---------------*---------------*

             اروع مـثـل مَـــر الــزمـن يـذكَـر
             وحده ارتجل وارث صفة حيدر
             بهمه وعَزم صـوته اعـتـلـه وكَبّر
             لجل القيم رخص دمـه المـنـحـر

هز الطـغـات ابـوگـفـتـه     خـيـل و زلـم مـاهـمّـتـه

              صـاح بعزم مـسـلـم انـه القادم

                            *---------------*---------------*

             اشگد حـاولـوا رادوا فقط يـركع
             لـٰكـن قِـسـم بيده الـفـخـر يصنع
             من الـخـصـم اَي كلمه ما يـسـمع
             رغم الـعـدد والـجـيـش التـجـمّـع

مـحـد وگفـلـه ونـاصـره     الـوارث شجاعة حيدره

              غير السبط رافـض شَكو حاكم

                            *---------------*---------------*

             محتار اوصفه ابيا وصف مسلم
             رسّام احسّه بكل مـجـد يـرسـم
             بـهـالـمـعـركـه لازم امر يـحـسـم
             معنى الوفه لــ أهـلِ الوفه ايعلم

اهل الـمـواقـف خـالـده     ابمـسـلـم المـوقـف بده

              بيّن صفه وغـيـرت بني هاشم

                            *---------------*---------------*

             يحچي القصر دوم ويظل شاهد
             لـمـن دخـل لـيـه بـصـفـة قــائــد
             إنهار العرش و الــ عالعرش گاعد
             والد حـمـيـده الـذَل شـكـو حاقد

بإسمه الرجـولـه اموقّعه     لــ كل الـمـفـاخـر جـامعه

              الراد الـشـرف ثابت يظل لازم

                            *---------------*---------------*

             اوّل سـفـيـر اعلـه الـمـلـه اتـفـرّد
             بـديـرة غـرب بيه العـزم مـشـتـد
             هــاي الـزلـم مـو كـل زلـم تـنـعـد
             بس الصنع مـوقـف تـرى اتـخـلـد

ربنه اصـطـفـاه وشـرّفه     اهل الـمـراجـل تـعـرّفـه

              مـأتـم إلـه بطول الـزمـن دايـم

                            *---------------*---------------*

خادم مسلم ابن عقيل ع
✍الشاعر رعد الجريخي


https://t.me/joinchat/UShxzSh6DyF31x9W

يوليدي يوليدي....ترجعلي سالم ماردت
يوليدي يوليدي....فرحني كول استشهدت
يوليدي يوليدي....عند الحسين اتسجلت
يوليدي          يوليدي
.....................................
اكتب وصيتي        يوليدي استمع
حلمي ومنيتي        يترجمها هالدمع
كل ما اشوفك        بالزهره انجمع
يمه العهد من المهد وقعته للزهره
كلتلها ابني لو كبر فدوه الج عمره
ولوعندي عشره من الولد هم ترخص العشره
يوليدي.....كحل اعيوني بموتتك
يوليدي.....هاي امك انه اوصتك
يوليدي.....تشيع اريدن زفتك
يوليدي        يوليدي
...................................................
يا حلم عمري        يالشوفتك ضوى
بوداعك ادري         يخنكني هالهوى
الزهره باجر         تجمعنه هم سوى
من تختنك يمه ويدك كلبك فلا تخسر
شد عزمك واركض ركض مجلس لطم احضر
يتسجل اسمك خادم بتوقيع من حيدر
يوليدي.....عابس بخدمتهم ربح
يوليدي.....نال الشهاده وانذبح
يوليدي......مثله كل عاشك صبح
يوليدي       يوليدي
....................................................
يمه انه صدري        يتنفس الهضم
خايفه بكبري       امن حسين انحرم
يوليدي نذري         اتوزع إلي لطم
يمه الكبر من ينحفر وسعلي لحدي لحدي
خافن تجي الزهره وتسوي اقرايه عندي
انه امك وحكي ردت توفيلي عهدي عهدي
يوليدي.....من تحضر انته قرايه
يوليدي.....بالباب علك رايه
يوليدي.....امك واوصي بهايه
يوليدي       يوليدي
...................................
يا يمه بعدي          لاتنسى هالنذر
بكل مجلس احضر          امن حسين اعتذر
هاي انه امك         خادمته وافتخر
يمه وبعد البس جفن يوليدي بالعاشر
خاطر لمن تطبر تشوفك فاطمه حاضر
اجبر كلب زينب ترى مكسورة الخاطر
يوليدي.....جون اسود ونال الشرف
يوليدي.....بالطف نذر دمه ونزف
يوليدي.....خسران كلمن ماهتف
يوليدي        يوليدي
.....................................
يا يمه اودعك                   وبهايه اكتفي
وبوصيتي اذكرك               عن لا تختفي   
شمعة حياتك                  لحضه وتنطفي
يمه وربح كلمن خدم لحسين واتهنه
واتسجل بسجل الخدم مضمونه اله الجنه
للمحشر امك باجر بكل فخر تتعنه
يوليدي...... من تحضر المجلس لطم
يوليدي......اذكرني حتى لو حلم
يوليدي....... بانفاسك الخدمه اشم
يوليدي     يوليدي
.........................................
خادم خدمة الحسين
الشاعر
محمد الموالي


https://t.me/joinchat/UShxzSh6DyF31x9W

نعي للعليلة عليها السلام

راحو هلي وظليت بالدار
طفله وعليله وگلبي محتار
ابچي عله بوي حسين ونهار
مدري ببوي شصار ما صار
سهرانه ليلي والگلب نار

سهرانه ليلي وعيني عالباب
احسب ليالي وسلني الاحساب
بلكت علية تعود الاحباب
ذاب الگلب بجروحهم ذاب

طفله وعليله وزاد ونّي
وفراك ابوي حسين سلني
ظني انكطع يا ناس ظني
راح وبعد ما سأل عني


بشر ابن حذلم من سألته
جاوبني بدموعه وسمعته
مذبوح ابوج حسين عفته
هذا الخفت منه وعرفته

سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠


https://t.me/joinchat/UShxzSh6DyF31x9W

رئيسية هلالية

هلالك بالسمه
صوب فاطمه. بسهام المصيبه
ياشهر الحزن
مفجوعه وتون. بسهام المصيبه
٠٠٠٠٠٠٠٠٠٠٠٠٠٠٠
من هل بالسمه هلالك. يشهر الفاجعه الكبره
من سابع سمه حنّت لِبِنهه وناحت الزهره
نشرت للحزن والنوح. قميص حسين ابوالعتره
نصبت مأتم الاحزان. وگامت تسجب العبره
هيّجت الألم
بگلوب الخَدَم ما يخمد لهيبه
لمصاب الابن
مفجوعه وتون. بسهام المصيبه
٠٠٠٠٠٠٠٠٠٠٠٠٠٠٠
بجت من شافت هلالك. يشهر الدمعه منهضمه
بدينه انواسي دمعتها. ورفعنه الرايه للخدمه
نواسي الزهره بالآهات. نحطهن لچمه يم لچمه
لاشك تحضر الزهراء. بعزاء حسين ابواليمه
محنية الضلع
وتهلّ الدمع. لمصاب الغربيه
للمجلس تحن
مفجوعه وتون. بسهام المصيبه
٠٠٠٠٠٠٠٠٠٠٠٠٠٠٠٠٠
يشهر الفاجعه شسويت. فتحت جروح مصدوعه
هاي ام الگضه عطشان. حسين الكسروا ضلوعه
هاي ام الحسن يهلال. تكض لوعه وتهد لوعه
مصايب كربله انعادت. عليها وهيه مفجوعه
هلالك يا شهر
يرسم چم اثر. بجروح الحبيبه
تبرد لا تظن
مفجوعه وتون. بسهام المصيبه
٠٠٠٠٠٠٠٠٠٠٠٠٠٠٠٠
روح ام الحسن حضرت لا شك يا شهر عاشور
حضرت يم ابنها حسين. تنحب والضلع مكسور
شافت عالرمح راسه. وجسمه مگطع ومنحور
وخيل الداست بصدره. ودمه بكل كتر منثور
ينزف شافته
وشبگت جثّته بالمصرع سليبه
عالمامندفن
مفجوعه وتون. بسهام المصيبه
٠٠٠٠٠٠٠٠٠٠٠٠٠٠٠٠٠٠
وبعد من شافت هلالك. ذكرت زينب وهمها
تركض تجمع الأيتام. حين الحرگو خيمها
عكب عباس ابوالغيره. غريبه ولا اخو يمها
بين الخيل بين النار. بين الراد يهضمها
زينب تنسبي
بيد الناصبي. بس هاي العجيبه
ما غمضت جفِن
مفجوعه وتون. بسهام المصيبه
٠٠٠٠٠٠٠٠٠٠٠٠٠٠٠
نصبت مأتم الأحزان. فاطم بالسمه السبعه
وحين الشافت هلالك. كامت تلطم وتنعه
تتذكّر مصاب حسين. ابنها وتهمل الدمعه
وتحضر بالمجالس هاي تبچي وحيل منفجعه
تشاركنه اللطم
بدموع وهضم. عالمنبر قريبه
ورده بلا غصن
مفجوعه وتون. بسهام المصيبه

سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠


https://t.me/joinchat/UShxzSh6DyF31x9W

قصيدة للخدمة

خدمتك حياتي
وندعي بصلاتي
خادم أظل طول العمر يا حُسين
٠٠٠٠٠٠٠٠٠٠٠٠٠٠٠٠
سيدي يحسين من زغري تبعتك
امن الولادة اهلي نذروني لخدمتك
بگلبي مو بالعين يا مولاي شفتك
المغريات هواي لكن ما تركتك
ثابت بولائي
دمي كربلائي
بحبك ربيت امن الزغر. يا حُسين
٠٠٠٠٠٠٠٠٠٠٠٠٠٠٠
آنه تربات المجالس والمواكب
ابقى اخدمك شيعي وبثارك اطالب
مذهبي يختلف عن كل المذاهب
اعتبر حبك فرض منّ الله واجب
كل وكت اشوفك
كعبتي واطوفك
اسمك اشارة عله النصر. يا حُسين
٠٠٠٠٠٠٠٠٠٠٠٠٠٠
اشكر الله هواي وسجد كل مسية
لأن وفقني وصرت عبد الزجية
وخادمك يحسين وفخر للمنية
شما اقدّم ما ارد فضلك علية
بحبك اعتصامي
سيدي وامامي
مقصر اجيتك وعتذر. يا حُسين
٠٠٠٠٠٠٠٠٠٠٠٠٠٠٠
الف هنياله اليخدمك طول عمره
هذا وي حمزه الزغيّر يبقى ذِكره
آنه هم ابچي عليك بگلبي جمره
سجل اسمي بجاه امك لا تعبره
ما عفت عزائك
جنّتي بولائك
منك تعلّمت الصبر يا حُسين
٠٠٠٠٠٠٠٠٠٠٠٠
اني مو بس ابمحرم خدمتي وياك
عمري كلّه بخدمتك ما اكدر انساك
لكن بعاشور اكثر ابچي ونعاك
سيدي يحسين دامي بگلبي الگاك
انظر المصيبه
زينب الغريبه
مچتوفه بحبال الأسر. يا حُسين

سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠


https://t.me/joinchat/UShxzSh6DyF31x9W

حگ اليوم شيعتكم يفرحون

------------------------------------

اهلا بالغدير اتنصب الحيد
يعيد الله الچبير ومحلى هالعيد
علي هوه الامام وكلشي منريد

جماعة ياعلي خلهم يهوسون
حگ اليوم شيعتكم يفرحون

----------------------------------

شال چفوف حيدر فوگ الچفوف
محمد صاح بسمه وهوه معروف
الولايه الحيدريه اتخوف الخوف

لحد الان من عدهه يرجفون
حگ اليوم شيعتكم يفرحون

-------------------------------

انصر من ينصره وعادي الارجاس
دعى بهذا الدعاء اليعرف الناس
لأن شاف الذمم گدامه تنداس

وابد ما صدگ ابعض اليهنون
حگ اليوم شيعتكم يفرحون


------------------------------------------


باچر بالگبر شتگول وهناك
سؤال شكد عظيم ومحد وياك
جاوب من امامك ؟ ياهو مولاك

تواليمهن ولك ذوله اليشردون
حگ اليوم شيعتكم يفرحون

-----------------------------------------

يا شيعي الفرح هالليله مريود
عطوه من البواچي ودمع الخدود
تعال البس ضحكتك وانزع السود

تهوس يا علي وخلهم يدبچون
حگ اليوم شيعتكم يفرحون


كلمات الخادم / رعد الفريجي
14 /ذو الحجه / 1447


https://t.me/joinchat/UShxzSh6DyF31x9W