عيدكم مبارك 💗.

على مطلع العيد وعلى مطلع الافراح
‏يقولون بان العيد واقول مابنتي !!

‏تسامي على كل البني من عجم وأقحاح
‏و تغني على شعر .. مايستاهل الا انتي

‏على وجهك النير اشوف الكدر ينزاح
‏تلين الليالي القاسيه بس ما لنتي

‏ وانا في خيالي وجهك اللي عليه ارتاح
‏يقولون .. زنتي يعلم الله ماشنتي .

‏من الورد والريحان و العطر لا من فاح
‏علي الله المعبود .. .. بـ انك تكونتي !

‏يعرفون وقت العيد في هلاله الوضاح
‏وانا اشوف وجه العيد لامن تزينتي

‏مخارج حروفك عافيه ومبسمك ذباح
‏وقلبي معك يا غايته وين ما كنتي

‏على كل نجلا سحرها غالب ، و فضاح
‏ما مكنهم الله ، وانتي اللي .. تمكنتي

‏عيونك سكنها الموت ماترحم الأرواح
‏سلبتي مشاعرهم وعندي تهيمنتي

‏على كثر ماجاني من الضيق والألحاح
‏يكفيني انك .. ما نكرتي و لا خنتي ❤️.

العيد والله ثالث العيد يا سعود ❤️.

‏يصنع البسّمه لـ نفسه وهو قلبه صويّب
وإن جلس هوجس وكنّ البشر ماحدٍ معاه .

ودّك ترجّع كلّ شيّ بـ مكانه
‏بسّ المسير لوين والخطوة لمنّ
‏
‏لا خانك اللي كنت خوفه وأمانه
‏بـ يخونك التعبير ويخونك الظنّ .

‏" لا تنحنح .. وإقلط بمدهال صدري
‏والله إنك ما دخلت إلا ديارك "

القصيد العذب يا جرحه و طبّه
‏ما يعَدّ الا على وصلك و صدّك

إن تراضينا كتبت اللي تحبه
‏و إن تجافينا كتبت اللي يردك !

تباهي وغني واضحكي ولايهمك شيء
‏لامالت ظروفك فيه لك من يعدلها

‏بتلقين لك في جوف قلبي براد وفّي
‏هنا منزلك والناس تعرف منازلها

لا تنتظر حتى من الحب إعاده
بينك وبين معاوده يفتح الله

اللي يبي منك تناديه ناده
واللي يبي منك تخليه خله .

ليت قلبي يشبه لـ قلب ابو نوم ٍثقيل
‏اللي لو يشب فـ اطراف ثوبه ما صحى

‏بس انا من كثر ماني شقي نومي قليل
‏والهموم تدور في خاطري دور الرحى

‏صرت لـ الاحزان ملجى ولـ الضيقه عميل
‏واتظاهر بـ السعاده وانا حالي محى

‏وسالفة بـ اعدل النوم هذي مستحيل
‏والله يا بعض الليالي ما انام الا الضحى .

هوى القلب ياما قاد له رووسٍ ما تنقاد
‏عسى القلب ما ينزل به إلا من يحنّه .

وانا بعد خوفي منك يالله ماني بْخاف
إلا إني لا أتردّى عند غالي وانا غالي .

مالنا ند في وقت الفخر والممارى
‏ إن رجعنا نعدّ الفعل وإن ما رجعنا

‏مجدنا المعتلي يجلا عماس السهارى
‏واسمنا يعطي التاريخ قيمة ومعنى

‏كان مزعلكم إن تاريخنا ما يجارى
‏مشكلتكم مع التاريخ ماهيب معنا .

ان كان غبنا نفتّقد واليا حضرنا نشق خام
‏وبعض العرب متساويه بغيابها ووجودها .

عزيت نفسي عن بشر ظنهم شين
‏مھٓمآ رفعت بقدرهم قل ادبهم
‏
‏حاولت اكسبهم على العسر و اللين
‏و اقفيت عنهم يوم ربي كشفهم .

الظن يوجع راعـي الظن لا خاب
‏والنفس لا عافت من الشي عافت .

في صدّري و في ذاكرة جوالي
‏اشياء تجبرني اعيش بخلوه
‏ٰ
‏كل ما تمر الذكرَيات ف بالي
‏ما توجع الا الذكريات الحلوه .

ينام جفنك ويسهر بـ الخفا جفني
‏وما تدري إني سهرت الليل بأسبابك .

انت غبت وضحكتك صارت على بالي مقيمه
‏كل ماضاق الفضا فيني جلت عنّي عماسي

‏يابعد من باع خلق الله وحبك من صميمه
‏من يصدق لو اقول انك نسيت ..وصرت قاسي؟!

‏ما اقول ان عشرتك كانت عواقبها وخيمة
‏كنتِ اجمل من كسر قلبي وطيّر لي نعاسي

‏انهزمت وذقت في حبك ملذاات الهزيمه
‏في سبيلك منهزم قلبي ..وانا مرفوع راسي

على طاري العيد وعلى طاري الغالين
‏ومع صوت ورقٍ يشعف المشتحن نوحه

‏ذكرت أول العشرين ونهاية العشرين
‏وذكرت الغلا الي دمر الواقع صروحه

‏بنينا الامل في مقبل العمر بين اثنين
‏ودار الزمان وراح والروحه الروحه

‏صبرت وتناسيت وتحملت فقده لين
‏وصلني بعد طول البطى والهجر بوحه

‏رسالة عذر فيها تساؤل وليه ، وين
‏وتذكااار وقتٍ غيرنا نال مصلوحه

‏ تقول انت وينك قلت مدري لكن الحين
‏ مسامحك والايام ماهي بـ مسموحه

‏الي بيننا اكبر من معاتب ومن تخمين
‏تعالي وبيبان السراجيف مفتوحه

‏علي الحرام انك على روحي تمونين
‏مكانتك محفوظه وزلتك مدموحه

‏ ترى كل ليل فيه في بالي تمرين
‏كرامتك من بين المعاليق مذبوحه

‏ارحب بطيفك لاضوى والعرب ممسين
‏تراحيب عود تو ماطابت جروحه
‏
‏رزقه الله بطفل بعد ما فهق خمسين
‏وغدا عنده اغلى من عيونه ومن روحه