UZULOY XAYDAROVA ✍️

O‘YLAR

Ko‘ngil sandig‘ida qoladi armon,
Anglay olmay qolarsan — bu hol hikmatin.
Ba’zan sukut bo‘lar dardlarga darmon,
Ba’zan bir so‘z buzib qalb sukunatin.

Yo‘llaring qarshingda cho‘zilar uzoq,
Qadamlar ortida qoladi izlar.
Kecha deb atagan kunlaring yiroq,
Bugunning bag‘rida tug‘ilar so‘zlar.

Hayot — bir sahifa, varaqlab o‘tar,
Har satri taqdirning bitilgan izi.
Ba’zan kuldiradi, ba’zan g‘am yutar,
Ko‘zlarda yashirin dardning ildizi.

© Mualliflik huquqi qonun bilan himoyalangan. She’rlarimni o‘g‘irlab, o‘z nomidan yozganlar jinoiy javobgarlikka tortiladi, mualliflik huquqim himoya qilinadi, moddiy va ma’naviy tovon puli talab qilinadi.

UZULOY XAYDAROVA ✍️

TURON BIRLIGI

Bir osmon ostida birlashgan elmiz,
Bir tarix, bir ildiz, bir buyuk belmiz.
Qalbimizda Turon — muqaddas tilsim,
Birlik bilan yuksak kelajak elmiz.

Turon — ajdodlardan qolgan bir meros,
Nomida mujassam sharaf-u e’zoz.
Bir-biriga suyanch bo‘lsa turkiy el,
Dunyoga jar solar do‘stligimiz soz.

Ozar, o‘zbek, qozoq, qirg‘iz — bir safda,
Turkman, turk yuragi bir xil tarafda.
Tilimizda ohang, dilimizda mehr,
Qardoshlik yashaydi har bir yurakda.

Birligimiz — bizning qudrat, qanotdir,
Do‘stligimiz — qalblar uzra hayotdir.
Ajdodlardan meros qolgan bu rishta,
Kelajak avlodga buyuk saboqdir.

Birlik bor joylarda so‘nmaydi chiroq,
Mehr bilan bo‘lur har bir dil porloq.
Turonning osmoni bo‘lsin musaffo,
Qardoshlar yuragi bo‘lmasin yiroq.

Turonning birligi — ulug‘ bir niyat,
Unda mujassamdir mehr-u muhabbat.
Qalbimiz bir bo‘lsa, yo‘limiz ravon,
Birlik ila topar Turon saodat.

Kelajak avlodga qoldiraylik nom,
Birlikning qudratin etaylik davom.
Turonning bayrog‘i baland hilpirab,
Dillarda yashasin qardoshlik mudom!

© Mualliflik huquqi qonun bilan himoyalangan. She’rlarimni o‘g‘irlab, o‘z nomidan yozganlar jinoiy javobgarlikka tortiladi, mualliflik huquqim himoya qilinadi, moddiy va ma’naviy tovon puli talab qilinadi.

UZULOY XAYDAROVA ✍️

MUQADDAS TURONSAN

Muqaddas Turonsan, ey aziz makon,
Bag‘ringda ulg‘aygan ne-ne qahramon.
Tarixing bitilgan zarhal bir doston,
Ajdodlar merosi — senga bir nishon.

Samarqand — ko‘ksingda boqiy bir tamal,
Buxoro — ilmlarga ochilgan amal.
Xorazm — tafakkur nuriga misol,
Har bir qarich yering tarixga timsol.

Temuriylar ruhi kezadi senda,
Buyuklar nafasi yashaydi tanda.
Ulug‘bek yulduzlar sirini o‘rgandi,
Ilmning mash’ali porlagan senda.

Navoiy so‘zidan gulladi tilim,
Turkiy til sharafga to‘ldi, ey elim.
Ajdodlar nomiga faxr ila egil,
Ular qoldirgan yo‘l — bizlarga ta’lim.

Turkiy el birligi — ezgu bir niyat,
Mehr bilan yashash — buyuk saodat.
Birlik bor joylarda bo‘ladi qudrat,
Hamjihat avloddan bunyoddir millat.

Muqaddas Turonsan, azizdir noming,
Qalbimda jaranglar sharafli shoning.
Dunyoga taralsin buyuk dostoning,
Mangu yashayversin ulug‘ Turoning!

© Mualliflik huquqi qonun bilan himoyalangan. She’rlarimni o‘g‘irlab, o‘z nomidan yozganlar jinoiy javobgarlikka tortiladi, mualliflik huquqim himoya qilinadi, moddiy va ma’naviy tovon puli talab qilinadi.

UZULOY XAYDAROVA ✍️

MILLIY SERTIFIKAT — BOSHGA BALOSAN

Uylarda halovat yo‘qoldi asta,
G‘urbatlar ko‘paydi gul kabi dasta.
Kimdir ish qidirar, umidi hasta,
Milliy sertifikat — boshga balosan.

Talaba o‘y surib bo‘ldi parishon,
Najotni topolmay yuradi hayron.
«Nega o‘qidim?» deb yuragi vayron,
Milliy sertifikat — boshga balosan.

Davlatniki yana, xususiy deymiz,
O‘zimiz kamsitib, jonlarni yeymiz.
Qanday inson bo‘lib borayapmiz biz?
Milliy sertifikat — boshga balosan.

Birovlar ketmoqda chet elga shartta,
Taqdirin topshirib begona yurtga.
O‘qigan odamlar uchrar g‘urbatga,
Milliy sertifikat — boshga balosan.

Bu qanday yuksalish, qanaqa qadam,
Ish topmay sarsondir o‘qigan odam.
Mustahkam qil, ey Alloh, irodam,
Milliy sertifikat — boshga balosan.

© Mualliflik huquqi qonun bilan himoyalangan. She’rlarimni o‘g‘irlab, o‘z nomidan yozganlar jinoiy javobgarlikka tortiladi, mualliflik huquqim himoya qilinadi, moddiy va ma’naviy tovon puli talab qilinadi.

UZULOY XAYDAROVA ✍️

TANGANING IKKI TARAFI

Tanganing ikki tarafi bordir ayon,
Birida kulgu bor, birida armon.
Hayot ham shundaydir — sirli bir jahon,
Bir tarafda quvonch, bir tarafda fig‘on.

Yaxshilik — tangani bezagan ziynat,
Yomonlik — qalbdagi so‘nmagan illat.
Har kim o‘z yo‘lida topar haqiqat,
Taqdirning hukmida yashirin hikmat.

Bir taraf — sadoqat, mehr-u muhabbat,
Bir taraf — xiyonat, g‘am-u nadomat.
Ko‘ngilni asragan topadi rohat,
Pok qalbga yarashar go‘zal saodat.

Tanganing ikki yoni — aslida bir butun,
Biri yorug‘ kun-u, biri esa tun.
Hayot sinovidan o‘tgan har bir jon,
Sabr ila topadi baxtidan nishon.

© Mualliflik huquqi qonun bilan himoyalangan. She’rlarimni o‘g‘irlab, o‘z nomidan yozganlar jinoiy javobgarlikka tortiladi, mualliflik huquqim himoya qilinadi, moddiy va ma’naviy tovon puli talab qilinadi.

Muxlislarimga tashakkur aytaman va barchangizga, barchamizga bayram muborak bo‘lsin! Xalqni sevimlisi bo‘lish ajoyib tuyg‘u ekan!

XOTIRANOMA

Mustaqilligimizning 35 yilligi oldidan

Bugun biz — ozod va obod Vatan bag‘rida, tinch va musaffo osmon ostida, shukrona bilan yashayotgan avlodmiz. Mustaqilligimizning 35 yilligi arafasida qalblarimizni cheksiz faxr, minnatdorlik va chuqur xotira tuyg‘ulari chulg‘ab turibdi.
Bu ulug‘ va tarixiy kunlarga yetib kelishimizda mustaqilligimizning ilk tamal toshini qo‘ygan, Vatanimizning eng murakkab va mas’uliyatli davrlarida xalqimizga rahbarlik qilgan marhum Birinchi Prezidentimiz Islom Abdug‘aniyevich Karimovning nomi tariximizda alohida o‘rin tutadi.
U zotning xotirasi qalblarimizdan, xalqimiz yodidan hech qachon o‘chmaydi. Zero, bugungi tinch va osuda kunlarimiz, mustaqil davlat sifatida shakllangan taraqqiyot yo‘limiz, milliy qadriyatlarimiz va o‘zligimizga bo‘lgan e’tiborimiz — bularning barchasi xalqimiz bosib o‘tgan murakkab va sharafli tarixiy yo‘l bilan chambarchas bog‘liq.
Islom Abdug‘aniyevich Karimov o‘zining butun hayotini O‘zbekistonning mustaqilligi, davlatimiz ravnaqi va xalqimiz kelajagiga bag‘ishlagan yirik davlat arbobi sifatida tariximizdan munosib o‘rin oldi. Uning nomi mustaqillikning ilk yillari, milliy davlatchiligimizning shakllanishi va Vatanimizning yangi tarixidagi muhim voqealar bilan hamohangdir.
Bugun osmonimiz musaffo, yurtimiz tinch, xonadonlarimizda shukrona va ezgu niyatlar hukm surayotgan bir paytda, istiqlolimizning qadriga yetish, uni asrab-avaylash va kelajak avlodlarga munosib tarzda yetkazish — har birimizning muqaddas burchimizdir.
Mustaqillik — ajdodlarimizning asriy orzusi, bugungi avlodning bebaho ne’mati va kelajak avlodlarga qoldiradigan eng ulug‘ merosimizdir.
Shu qutlug‘ sana — O‘zbekiston Respublikasi Mustaqilligining 35 yilligi munosabati bilan marhum Birinchi Prezidentimiz Islom Abdug‘aniyevich Karimovning yorqin xotirasini chuqur hurmat va ehtirom bilan yod etaman.

Ruhingiz shod, joyingiz jannatda, xotirangiz abadiy bo‘lsin!

Bugungi tinch kunlarimizga, Vatanimizning osuda tonglariga, farzandlarimizning baxtli kelajagiga shukr aytib, mustaqil O‘zbekistonimizning kelajagi yanada nurli, xalqimiz hayoti yanada farovon bo‘lishini chin qalbimdan tilayman.

Mustaqilligimiz abadiy bo‘lsin!
Yurtimiz tinch, osmonimiz musaffo bo‘lsin!
O‘zbekistonimiz ravnaq topaversin!

Hurmat bilan:

Shoira, publisist,
Do‘rmon ijodkorlar klubining haqiqiy a’zosi
UZULOY XAYDAROVA ✍️

UZULOY XAYDAROVA ✍️

BIR KUNLIK KAPALAK

Bir kunlik kapalak menga o‘rtoqmi?
Bu umr tugarmi, nahotki erta?
Aslida haqiqiy shoirlar rosti,
Yaqin turadida bu ona yerga.

Kapalak misoli uchadi hayot,
Bir zumda so‘nadi qanotdagi nur.
Bugun kulib turgan go‘zal bir siyrat,
Ertaga qolarmi xotirada hur?

Umrning yo‘llari g‘oyat qisqadir,
Har qadam ortida ming bitta savol.
Shoirning qalbida so‘nmas bir taqdir,
So‘z bilan yashaydi u necha avlod.

Bir kuni qaytarman tuproq bag‘riga,
Qolarmi she’rlarim dillarda yodgor.
Qancha yashashimni bilmayman, ammo,
So‘zimning sehridan sog‘aysin bemor.

Kapalak, uchaver, osmon seniki,
Bir kunlik umring ham menga ibratdir.
Odamning umri ham qanot singari,
Qisqa, ammo izi abadiyatdir.

© Mualliflik huquqi qonun bilan himoyalangan. She’rlarimni o‘g‘irlab, o‘z nomidan yozganlar jinoiy javobgarlikka tortiladi, mualliflik huquqim himoya qilinadi, moddiy va ma’naviy tovon puli talab qilinadi.

UZULOY XAYDAROVA ✍️

SHOIR UMRI

Bir kunlik kapalak o‘xshamas menga,
Bu umr tugamas shunchaki erta.
Aslida haqiqiy shoir yuragi,
Tutashib turadi eng yorug‘ nurga.

Shoirning umri ham quyoshga o‘xshar,
So‘nsa ham, qoldirar olamda ziyo.
Uning har bir so‘zi dillarga ko‘chib,
Yuraklarda yashar bir ajib dunyo.

Bir kun qanot yozib uchadi jonim,
Tuproq bag‘riga ham qaytarman bir kun.
Ammo so‘zim bilan qoladi nomim,
She’rlarim yashaydi men ketganim kun.

Hayotning yo‘llari g‘oyat sirli yo‘l,
Har burilishida sinovlar bisyor.
Shoirga berilgan eng buyuk ko‘ngil —
Haqiqat oldida bo‘lishdir bedor.

Men uchun umrning o‘lchovi yillar,
Qancha yashaganim emasdir mezon.
Agar so‘zim bilan uyg‘onsa dillar,
Demak, yashab o‘tgan ekanman inson.

Sen ketarsan, qolmas qanotdan nishon,
Men ketarman, qolur so‘zimdan sado.
Bir kunlik umrga sig‘masa jahon,
Bir misra abadiy yashar — bas, ravo.

Tuproqqa aylansa bir kuni badan,
Ruhimni asraydi she’rlarning siri.
Shoirni o‘ldirmas na vaqt, na zamon,
So‘z bilan davom etar shoirning umri.

© Mualliflik huquqi qonun bilan himoyalangan. She’rlarimni o‘g‘irlab, o‘z nomidan yozganlar jinoiy javobgarlikka tortiladi, mualliflik huquqim himoya qilinadi, moddiy va ma’naviy tovon puli talab qilinadi.

UZULOY XAYDAROVA ✍️

VIJDONLAR KERAK

Men seni oqlab ham o‘tirmasman yo‘q,
Qoralab, qalblarga solmasman alam.
Birgina tilagim — yurtim tinch bo‘lsin,
Elimning baxtidan quvonsin olam.

Na gina istayman, na o‘ch, na qasos,
Ko‘nglimda Vatanim — mehrimga asos.
Kim bo‘lsang ham, yurtga xiyonat qilma,
Elning duosidan ayrilmagin, bas.

Tarix hukm qilar, vaqt aytar so‘zni,
Haqiqat yashirmas, yoritar o‘zni.
Men uchun eng aziz, eng oliy tilak —
Vatanga haqiqiy vijdonlar kerak.

© Mualliflik huquqi qonun bilan himoyalangan. She’rlarimni o‘g‘irlab, o‘z nomidan yozganlar jinoiy javobgarlikka tortiladi, mualliflik huquqim himoya qilinadi, moddiy va ma’naviy tovon puli talab qilinadi.

UZULOY XAYDAROVA ✍️

TURON UCHUN, TURKISTON UCHUN

Ko‘ngilda uyg‘onsin buyuk bir niyat,
El uchun atalgan bo‘lsin sadoqat.
Turonga baxsh etgin mehringni, himmat —
Turon uchun, Turkiston uchun!

Tarix sabog‘ini anglagin, ey dil,
Ajdodlar izidan yurmoqlikni bil.
Nomusni asrashni sharaf aylagil —
Turon uchun, Turkiston uchun!

Bir yoqadan bosh chiqarsa gar ellar,
Bir maqsad yo‘lida birlashsa dillar,
Tog‘larni ag‘dargay birlashgan qo‘llar —
Turon uchun, Turkiston uchun!

Kimdir qalam tutsin, kimdir chalsa soz,
Kimdir ilm izlab, yuksaltsin ovoz.
Baxshilar kuylasin, shoir, she’ringni yoz —
Turon uchun, Turkiston uchun!

Bobolar ruhidan olgin sen saboq,
Har qarich tuproqni bil muqaddas, pok.
Vatanga sadoqat — qalbdagi chiroq —
Turon uchun, Turkiston uchun!

Turonning osmoni kengdir, beqiyos,
Unda bitta umid, bitta buyuk ovoz.
Birlik qanotida yuksalsin parvoz —
Turon uchun, Turkiston uchun!

Yoshlarga qoldirgin nurli bir meros,
Ilm bilan bezat har kunni, e’zoz.
Kelajak avlodga bo‘lgin ezgu ovoz —
Turon uchun, Turkiston uchun!

Hech qachon so‘nmasin qalbdagi g‘urur,
El bor ekan, tirik orzu ham, surur.
Turon deb yongan dil topgaydir huzur —
Turon uchun, Turkiston uchun!

Xalqim, birlash endi — kuchingdir davlat,
Birliging bor ekan, yurtda barakat.
Turon deb urgan yuraklarda g‘ayrat —
Turon uchun, Turkiston uchun!

Ezgulik urug‘in sochgin dunyoga,
Mehringni aylantir ilm-u ziyoga.
Nomingni munosib yozgin samoga —
Turon uchun, Turkiston uchun!

Turon — yurakdagi o‘chmas bir armon,
Turkiston — boshimiz uzra keng osmon.
Xalq bilan buyukdir har qanday inson —
Turon uchun, Turkiston uchun!

Umring o‘tar, ammo qolsin ezgu iz,
Nomingni asrasin o‘sib o‘g‘il-qiz.
Yashashning ma’nosi — ezgulikda iz —
Turon uchun, Turkiston uchun!

Ko‘ksimda bir duo, tilimda nido:
Turon tinch, osmoni bo‘lsin musaffo.
El bilan mangulik topsin bu dunyo —
Turon uchun, Turkiston uchun!

© Mualliflik huquqi qonun bilan himoyalangan. She’rlarimni o‘g‘irlab, o‘z nomidan yozganlar jinoiy javobgarlikka tortiladi, mualliflik huquqim himoya qilinadi, moddiy va ma’naviy tovon puli talab qilinadi.

UZULOY XAYDAROVA ✍️

CHEKSIZ XAYOLLARIM

Sokin tun bag‘rida uyg‘onar armon,
Yulduzlar sochadi dillarga darmon.
Ko‘nglimda ming orzu, ming ezgu doston,
Cheksiz xayollarim sen tomon Vatan.

Bulutlar ortidan boqadi hilol,
Nurida ko‘rinar suvlar ham zilol,
Orzular charchaydi, ingranib behol,
Cheksiz xayollarim sen tomon Vatan.

Tonglarning nafasi taratar ziyo,
Quyoshdan boshlanar yangi bir dunyo.
Yurakda uyg‘onar eng go‘zal nido,
Cheksiz xayollarim sen tomon Vatan.

Ko‘ksimda umidlar yashaydi hamon,
Har nafas qalbimga bir ezgu farmon.
Parvozga chorlaydi buyuk bir imkon,
Cheksiz xayollarim sen tomon Vatan.

Dilimda so‘nmasin ezgu tilaklar,
Yo‘limni yoritib tursin yuraklar.
Baxt sari boshlasin buyuk istaklar,
Cheksiz xayollarim sen tomon Vatan.

© Mualliflik huquqi qonun bilan himoyalangan. She’rlarimni o‘g‘irlab, o‘z nomidan yozganlar jinoiy javobgarlikka tortiladi, mualliflik huquqim himoya qilinadi, moddiy va ma’naviy tovon puli talab qilinadi.

UZULOY XAYDAROVA ✍️

O‘TINCHIM SHUL

Har kimning ko‘ksida bir olam yashar,
Ko‘z ilg‘amas uning sirlarin bisyor.
Kimdir kulib yurib, ichidan yig‘lar,
Kimnidir kutadi ko‘ngli intizor.

Hayotning yo‘llari tekis emasdir,
Ba’zan gul undirar, ba’zan tikan.
Insonni insondan ajratib turar —
Qalbida asragan pokiza iymon.

Bir kun kechirilmas degan dard o‘tar,
Bir kun alamlarning qolmas nishoni.
Kechirish — ojizlik emasdir aslo,
Kechira olganning buyukdir shoni.

Odamlar bir-birin tushunsa edi,
Ko‘ngillar ko‘ngilga bo‘lsa edi yor.
Bir yetim ko‘ziga kulgu ulashib,
Bir baxtsiz hayotin aylasa bahor.

Necha bor yiqilar inson hayotda,
Ammo yiqilish ham saboqdir axir.
Qayta turmoqlikni bilgan bir yurak
Eng og‘ir kunlarda bo‘ladi botir.

Ey, mening Rabbim, yo‘limni yorug‘ qil,
Qadamim adashsa, O‘zing tut qo‘lim.
Dunyoda hech kimga ozor bermayin,
O‘zingga munosib bo‘lsin bu yo‘lim.

Bir kun bu hayotdan ketarman men ham,
Ortga qaytmas mening karvonim.
Mendan bir yaxshi so‘z qolsa kifoya —
Nafim tegsa, behuda o‘tmas onim.

© Mualliflik huquqi qonun bilan himoyalangan. She’rlarimni o‘g‘irlab, o‘z nomidan yozganlar jinoiy javobgarlikka tortiladi, mualliflik huquqim himoya qilinadi, moddiy va ma’naviy tovon puli talab qilinadi.

UZULOY XAYDAROVA ✍️

NOMUSNI ASRAGIN

Badaning ochibsan butun dunyoga,
Yuzingda o‘chgandir or-nomus, hayo.
O‘zingni yig‘ishtir, munofiq kimsa,
Seni kechirmoqqa kuch topay, illo.

Bulg‘ama o‘zbeklar nomini dog‘ etib,
Kafan ham buyurmas — bo‘lma umidvor.
Bugun yalang‘ochlik qo‘l kelgan bo‘lsa,
Sening tarbiyangni bersin bo‘sh mozor.

Nomusning qadrini bilmagan yurak,
El ichra o‘ziga topolmas qaror.
Bir kun qilgan ishing qarshingda turar,
Vijdoning bo‘ladi eng og‘ir bedor.

O‘zbekning sha’niga tegmasin qo‘ling,
Ajdodlar nomini qilmagin xor-zor.
Yetti ajdod ruhi qarab turibdi,
Har qadam hisobli, ey nodon, g‘addor.

Yolg‘onning ortidan ketmagin mag‘rur,
Haqiqat baribir chiqar bir kuni.
Bugun olam seni olqishlaganday,
Ertaga qoralar — unutma shuni.

Iffatni unutgan zamona quli,
O‘zligingni yo‘qotib, topmaysan panoh.
Odamlik libosin yechgan bir banda,
Qancha bezanmasin, baribir gunoh.

Elning qiz-u o‘g‘lin uyatga qo‘yma,
Har bir so‘zing bo‘lsin vijdonga hamroh.
O‘zbek degan nomni baloga qo‘yma,
Bu ishing ortida turibdi ming oh.

Bugunning havasin deb sotma ertang,
Bir lahza shon uchun qilmagin xato.
Nomusni asragin, inson bo‘lib qol,
Mol-dunyo ketadi, qolmaydi hatto.

Tarbiyang ko‘zgudir — unda aks etar,
Ota-ona bergan mehr ila saboq.
Kim o‘z ildizidan yuz o‘girsa gar,
Ildizdan uzilib, qoladi yiroq.

Hali ham qaytishing mumkin yo‘ldan sen,
Vijdoning uyg‘onsa, topilgay najot.
Insonlik qadrini asragin faqat,
Nomusdan ustunmas bu yolg‘on hayot.

© Mualliflik huquqi qonun bilan himoyalangan. She’rlarimni o‘g‘irlab, o‘z nomidan yozganlar jinoiy javobgarlikka tortiladi, mualliflik huquqim himoya qilinadi, moddiy va ma’naviy tovon puli talab qilinadi.

UZULOY XAYDAROVA ✍️

O‘ZBEK BO‘LMOQLIKNI O‘ZBEK BILADI

Kattaga hurmat-u, kichikka izzat,
Ko‘ngilda pok niyat, tilda halovat.
Nomusni asrashni bilar ibodat,
O‘zbek bo‘lmoqlikni o‘zbek biladi.

Ota so‘zi — hikmat, ona — mehribon,
Ularning duosi qalbga bir darmon.
Farzandga tarbiya — eng buyuk farmon,
O‘zbek bo‘lmoqlikni o‘zbek biladi.

Nonini bo‘lishar kelgan mehmonla,
Mehrini ulashar g‘amgin insonla.
Yaxshilik unutilmas o‘tgan zamonla,
O‘zbek bo‘lmoqlikni o‘zbek biladi.

Yurt desa uyg‘onar qalbida g‘urur,
Vatan tuprog‘idan topadi huzur.
El bilan yashashni biladi mag‘rur,
O‘zbek bo‘lmoqlikni o‘zbek biladi.

Ajdodlar qoldirgan sharafli nomni,
Asraydi ko‘zidek muqaddas shonni.
Or bilan bezaydi har bitta onni,
O‘zbek bo‘lmoqlikni o‘zbek biladi.

Boylikka berilmas, vijdonin sotmas,
Haq yo‘ldan og‘ishmas, yolg‘onga botmas.
O‘zganing haqiga o‘zini otmas,
O‘zbek bo‘lmoqlikni o‘zbek biladi.

Tilini asraydi — millatning joni,
O‘zligini saqlar — elning imoni.
Birlikda yuksalar Turon osmoni,
O‘zbek bo‘lmoqlikni o‘zbek biladi.

O‘zbeklik — yurakda bitilgan qasam,
Ajdodlar ruhidan keluvchi qadam.
Insonlik — eng oliy sharafdir har dam,
O‘zbek bo‘lmoqlikni o‘zbek biladi.

Lo‘ttiboz bo‘lmaydi haqiqiy o‘zbek,
Saqlamas do‘stiga gina yo kek.
O‘zbeklar o‘zbekdir, o‘zlariga bek,
O‘zbek bo‘lmoqlikni o‘zbek biladi.

Yopishmas amalga soxta mol uchun,
Ko‘rsatmas yuzaki chiranib kuchin.
Vatanin oldida bajarar burchin,
O‘zbek bo‘lmoqlikni o‘zbek biladi.

© Mualliflik huquqi qonun bilan himoyalangan. She’rlarimni o‘g‘irlab, o‘z nomidan yozganlar jinoiy javobgarlikka tortiladi, mualliflik huquqim himoya qilinadi, moddiy va ma’naviy tovon puli talab qilinadi.

Ismini yoritishni istamagan aziz muxlisim sizga ham mustaqilligimizni 35 yillik to‘yi muborak bo‘lsin! Allohim umringiz ziyoda aylasin!

Barchamizga muborak bo‘lsin!