#قصص_الأنبياء(٢)
#السيرة_النبوية
#الحلقة_الرابعة_والسبعون
#الهزيمة_في_أحد

كنا واقفين المرة إللي فاتت عند نصر المسلمين في غزوة أحد، وقلنا إن المشركين هربوا من أرض المعركة وبدأ المسلمون بجمع الغنائم،
هرب المشركون ما عدا كتيبة خالد بن الوليد إللي كانت بتحاول تلف من حول جبل الرماة عشان تهجم على المسلمين فجأة، وكانوا كل ما يتقدموا يردهم سهام المسلمين من على جبل الرماة،
انتظر خالد بن الوليد بالكتيبة بتاعته بعيد يراقب المعركة عشان ينتهز أي فرصة تخليه يتقدم ويهجم على المسلمين،
الرماة على الجبل شافوا إن المعركة خلاص خلصت لدرجة إن المسلمين بيلموا الغنائم،
فقاموا إلا قليلا منهم عشان ينزلوا من على الجبل يلموا الغنائم عشان يضمنوا نصيبهم،
ماهم قاعدين فوق الجبل من الصبح يدافعوا عن المسلمين،
فعايزين يأخذوا نصيبهم في جمع الغنائم🤷‍♀️
فعبد الله بن جبير قائدهم قال لهم:
إنتم رايحين فين😳
فقالوا : خلاص المعركة خلصت والناس بتلم الغنائم ،هنقعد هنا نعمل إيه هنروح نلم الغنائم احنا كمان😕
فقال لهم عبد الله بن جبير:
بس رسول الله ﷺ كلامه كان واضح، قال منتحركش من مكاننا مهما حصل لحد ما هو يرسل حد يقول لنا سواء انتصر المسلمون أو انهزموا😟
معظمهم مسمعوش كلام عبد الله بن جبير على أساس إنهم شايفين إن خلاص المعركة انتهت هنستنى إيه تاني،
وممكن رسول الله ﷺ يكون انشغل أصلا بحاجات تانية فعشان كده لم يرسل إلينا، فخلاص بقى مهمتنا انتهت🤷‍♂️
عبد الله بن جبير صمّم على موقفه وقام وخطب فيهم وقال لهم :
هتعملوا إيه في كلام رسول الله ﷺ، لازم تطيعوا أوامر رسول الله ﷺ، مينفعش تخالفوا أمره😥
فقاموا وتركوه ونزلوا من على الجبل، وقعد مع عبد الله بن جبير عدد قليل جدا يُقال إنهم عشرة أو أقل من العشرة،
كان مراقب الأحداث دي من بعيد خالد بن الوليد وكان قائد عسكري عظيم، لدرجة إنه لم يخسر معركة واحدة في حياته أبدا😮
فأول ما شاف الرماة نزلوا من على الجبل انطلق بسرعة ناحية الجبل وكان معاه عكرمة بن أبي جهل،
وصلوا للجبل، الرماة الباقيين رموهم بالسهام إللي معاهم وأصابوا بعضهم لكن جيش خالد قدر إنه يوصل للرماة وقتلوهم، عبد الله بن جبير رماهم بالسهام إللي معاه لحد ما خلصت،
وقاتل بالرمح بتاعه لحد مانكسر، وكسر جفن السيف، يعني الجراب إللي بيتحط فيه السيف وقعد يقاتل به لحد ما قُتل رضي الله عنه، وكان الذي قتله عكرمةُ بن أبي جهل،
وكأن عبد الله بن جبير بيحاول إنه ينفذ وصية وأمر رسول الله ﷺ إنه لا يُؤْتَى المسلمون من قِبَلِك،
يعني إوعى إنت تكون الباب إللي يدخل منه المشركون ويهزموا المسلمين👌
مات عبد الله بن جبير في سبيل الدفاع عن أمر رسول الله ﷺ للنهاية،
ومع إنه كان لوحده مع عدد قليل إلا إنه صمم على موقفه، مقلش : يعني أنا لوحدي إللي صح وهم كلهم غلط، مش يمكن معاهم حق🤔
هو ثبت على على موقفه لحد آخر لحظة في حياته، فنتعلم من عبد الله بن جبير إن أصحاب الحق ناس قليلة،
وإن مهما الناس مشيوا في طريق الخطأ فاحنا لازم نثبت على موقفنا مهما كنا قليلين ولوحدنا مادام معانا نص كلام رسول الله ﷺ 👌

☆ احنا شايفين إن الرماة أخطأوا وكانوا سبب في قتل صاحبهم عبد الله بن جبير ومتضايقين من إللي عملوه ،صح؟
تخيلوا إن احنا بنعمل نفس الخطأ إللي الرماة عملوه وزعلانين منهم واحنا مش واخدين بالنا😔
الرماة اجتهدوا وأفتوا نفسهم بفتوى غلط ومشيوا وراء الدنيا، مع إن في نص واااضح من رسول الله ﷺ :
محدش يسيب مكانه مهما حصل 👌
بسبب اتباعهم لرغباتهم الدنيوية وهي إنهم يجمعوا الغنائم قُتل أصحابهم،
ودلوقتي في واقعنا ناس كتيييير جدا بتفتي نفسها مع إن قصادها النص الواضح من رسول الله ﷺ،
وتتبع هواها ورغباتها في الدنيا سواء مال حرام من ربا، أو تتنمص عشان شكلها يبقى حلو،
أو تسمع الأغاني بحجة إنها غذاء الروح، أو تلبس المجسم والمقطع والقصير والحجاب إللي مش حجاب عشان شكلها يبقى حلو وخايفة من كلام الناس،
مع إن كل الحاجات دي وغيرها كتييير فيها نص من رسول الله ﷺ😓
تعتقدوا إن الرماة لو كانوا يعرفوا إن بسبب اجتهادهم الخاطئ ده وتركهم أمر رسول الله ﷺ أصحابهم هيموتوا كان هيسيبوا مكانهم؟
طبعا لأ👌
طيب هم مكنوش يعرفوا إن عاقبة عصيانهم لأمر رسول الله ﷺ الواضح الصريح هتكون كارثية،
لكن احنا عرفنا وشفنا، فهل هنتعظ ونعتبر ونتعلم من خطأهم ولا هنستمر في عصيان أوامر رسول الله ﷺ الصريحة الواضحة وتحصل لنا الكوارث المستمرة إللي احنا بنستغرب منها وبنقول ليه يارب كده،
واحنا أصلا السبب فيها :
"وَمَا أَصَابَكُم مِّن مُّصِيبَةٍ فَبِمَا كَسَبَتْ أَيْدِيكُمْ وَيَعْفُو عَن كَثِيرٍ"
"أَوَلَمَّا أَصَابَتْكُمْ مُصِيبَةٌ قَدْ أَصَبْتُمْ مِثْلَيْهَا قُلْتُمْ أَنَّى هَذَا قُلْ هُوَ مِنْ عِنْدِ أَنْفُسِكُمْ "

بعد ما سقط عبد الله بن جبير ميتا، مثّل المشركون بجثته، يعني قعدوا يقطعوا في جسمه، ويضربوه بالرماح والسيوف،
لدرجة إن أحشاء بطنه خرجت😥
وياريت المأساة وقفت لحد هنا😔

بعد ما ك

#قصص_الأنبياء(٢)
#السيرة_النبوية
#الحلقة_الرابعة_والثمانون
#أحداث_السنة_الرابعة_من_الهجرة
#باقي_حادثة_ماء_الرجيع
#قصة_مقتل_عاصم_ومرثد_وخبيب_وزيد

وقفنا المرة إللي فاتت عند مقتل ثمانية من الصحابة عند ماء الرّجيع بسبب غدر وفد قبيلتي عَضُل والقارة واتبقى اثنين من الصحابة هما خُبَيْب بن عدي وزيد بن الدّثِنّة،
كان من الصحابة الثمانية إللي قتلوا واحد اسمه مرثد بن أبي مرثد،
والصحابي ده له قصة😁

☆لكن قبل ما نعرف قصته في نقطة قلتها الجزء إللي فات عايزة أوضحها عشان حسيت إنها ممكن تتفهم غلط😅
أنا قلت عن عضل والقارة إنهم 《استخدموا الخديعة هم كمان مع رسول الله ﷺ》
فكده يتفهم إن رسول الله ﷺ استخدم نفس خديعة عضل والقارة لما أراد إنه يقتل خالد بن سفيان الهذلي إللي اتكلمنا عليه في بداية الجزء إللي فات،
لكن طبعا في فرق كبير جدا بين الموقفين، رسول الله ﷺ كان في حالة حرب مع خالد بن سفيان، فهو استخدم الخداع المشروع زي ما قلنا إن الحرب خدعة،
وهو أصلا في حالة دفاع عن نفسه وعن المسلمين في المدينة، ولو مكنش خالد بن سفيان ده بيجمع الناس عشان يهجموا على المدينة مكنش رسول الله ﷺ أرسل أحد لقتله لأن الإسلام لا يأمر يقتلوا الآمنين ولا أي أحد معاه عهد👌

أما بقى وفد عضل والقارة فهم استخدموا الخداع الغير المشروع والمكر والغدر عشان يقتلوا المسلمين،
يعني هم أعطوا الأمان لرسول الله ﷺ والصحابة وغدروا بيهم عشان ينتقموا منهم، مع إن المسلمين لم يؤذوهم في شيء🤷‍♀️
فالموقف مختلف تماما بين رسول الله ﷺ وبين وفد عَضُل والقارة الغادر👌
◇أتمنى إن النقطة دي تكون وضحت، وأنا هعمل للجزء إللي فات تعديل إن شاء الله وأضيف له النقطة دي، بس حبيت أوضح للناس إللي قرأت الجزء إللي فات خلاص😊

نرجع لقصة مَرْثد بن أبي مرثد، مرثد ده كان قبل الإسلام بيحب واحدة اسمها عَناق وكانت امرأة بغي يعني بتشتغل زانية، تأخذ مال مقابل الزنا، وكانت من أجمل نساء قريش، وهو كان بيحبها وعلى علاقة بها وهي كمان كانت بتحبه،
فأسلم مرثد رضي الله، وقال :
والله لأكفرن عن كل إللي كنت بعمله قبل الإسلام👌
مع إن الإسلام يمسح كل الذنوب والمعاصي إللي كانت قبله، لكن من صدقه رضي الله عنه كان عايز يرضي ربنا بأيّ طريقة،
هاجر مرثد مع أبوه وعاش في المدينة، واحنا عارفين إن مش كل المسلمين استطاعوا الهجرة وفي صحابة منعهم أهلهم من الهجرة وبيُعذبوا في مكة،
تخيلوا إن مرثد كان بييجي من المدينة لمكة على رجله ويدخل مكة مُتسلل في الخفاء من غير ما حد يحس بيه وياخد واحد واحد من المسلمين،
يشيله على ظهره وياخده ويهربه للمدينة مشي🙊
والمسافة بين مكة والمدينة خمسمائة كيلو، يعني مسافة مش بسيطة خالص😅
واستمر يعمل كده، ياخد واحد من المسلمين المستضعفين من مكة للمدينة وبعدين يرجع تاني لمكة وهكذا،
في يوم من الأيام وهو متسلل لداخل مكة في الليل في ضوء القمر لمحته عَناق فندهت عليه : مرثد😮
فسمع صوتها وعرف إنها عناق فطلع يجري واستخبى في زاوية، طبعا الشيطان مسابهوش😶
جاله يوسوس له ويذكره بحبه وأوقاته مع عناق، ماهو الصحابة بشر زينا، يوسوس لهم الشيطان ويذكرهم بأخطائهم ويزين لهم المعصية عشان يقعوا فيها تاني👌
تخيلوا بقى الوساوس في دماغه وعناق قعدت تقرب وهي بتنادي عليه:
مرثد..مرثد..وهو مبيردش عليها خالص، فلما قربت منه جدا قال لها : ابعدي عني يا عناق😤
فقالت له : مرثد! تعال نام عندي في بيتي الليلة.
《تدعوه للزنا》
تخيلوا الفتنة والابتلاء إللي متعرض له مرثد في اللحظة دي،
نفسه والهوى والشيطان وامرأة يحبها وهي تحبه، كل ده بيضغط عليه،
فقال لها : يا عناق، أنا أسلمت والإسلام يُحرم الزنا😤
《الإسلام حرم الزنا من البداية في مكة》
فقالت له : تعال نام عندي الليلة وإلا صرخت ولميت عليك الناس فيأخذوك ويعذبوك😈
فقال لها: يا عناق! إن رجلا يبيع جنة عرضها السماوات والأرض بلذة ساعة معاكي لمجنون👌

☆إن امرأة تبيع جنة عرضها السماوات والأرض عشان كم شعرة تشيلها من حواجبها لمجنونة،
《لعن الله النامصة والمتنمصة》
إن امرأة تبيع جنة عرضها السماوات والأرض عشان شوية ملابس ضيقة تظهر مفاتنها للناس في الشارع لمجنونة،
《صنفان من أهل النار منهما: نساء كاسيات عاريات مائلات مُمِيلات لا يدخلن الجنة ولا يجدن ريحها》
إن رجلا يبيع جنة عرضها السماوات والأرض بترك الصلاة لمجنون،
《العهد الذي بيننا وبينهم الصلاة، فمن تركها فقد كفر》
أي إنسان يبيع جنة عرضها السماوات والأرض من أجل أي شيء مهما كان فهو مجنون كما قال مرثد رضي الله عنه👌

طبعا لأن عناق مشركة ومش فاهمة يعني إيه جنة عرضها السماوات والأرض دي، وإزاي الجنة دي أهم من حبها له وحبه لها راحت مصرخة عشان الناس تتجمع،
مرثد مستناش طلع يجري في اتجاه المدينة والناس وراه،
فضل يجري لحد ما وصل للمدينة وهو كان قوي جدا رضي الله عنه،
لدرجة إن رسول الله ﷺ في غزوة بدر كان بيخليه يشيل الأسرى من قوته 😅
المهم وصل مرثد للمدينة وأول ما دخل المدينة راح لرسول الله ﷺ

#قصص_الأنبياء(٢)
#السيرة_النبوية
#الحلقة_الرابعة_والتسعون
#أحداث_السنة_الخامسة_من_الهجرة
#غزوة_بني_قريظة

اتكلمنا المرة إللي فاتت عن نهاية غزوة الأحزاب ورجوع المشركين لديارهم، بعد ما مشيوا رسول الله ﷺ قال للصحابة :
اليوم نغزوهم ولا يغزونا👌
يعني من بعد النهاردة قريش مش هتيجي تقاتلنا مرة ثانية، واحنا إللي هنروح نقاتلهم،
جيش المشركين أكيد أصابه اليأس، بعد ما جمعوا الأعداد الكبيرة دي ومقدروش على هزيمة المسلمين، هيعملوا إيه تاني🤷‍♂️
رجع رسول الله ﷺ لبيته بعد انتهاء المعركة، لكن هل فعلا انتهت المعركة🤔
جاء جبريل عليه السلام لرسول الله ﷺ في صورة رجل وفي رواية إنه كان على صورة واحد من الصحابة اسمه دِحية الكلبي، فجاءه وكان يغتسل فقال له:
يا محمد! هل وضعت سلاحك؟
فإن الملائكة لم تضع أسلحتها👌
يعني جبريل عليه السلام بيقول لرسول الله ﷺ إن الحرب لسه منتهتش، ده لسه المعركة مستمرة، فسأله رسول الله ﷺ: فين!
فأشار جبريل عليه السلام لديار بني قريظة، بني قريظة إللي بخيانتهم عرضوا المسلمين للإبادة،
كان بقالهم خمس سنين محافظين على العهد مع رسول الله ﷺ، ودلوقتي أول ما جاءت لهم الفرصة نقضوا العهد،
إزاي هنقدر نسيبهم في المدينة بعد كده وكأن شيئا لم يكن،
الطابور الخامس ده لازم نتخلص منه، وإلا هيخوننا مرة واثنين وثلاثة كل ما جاءت له الفرصة وهيطعن المسلمين في ظهورهم👌
فنادى رسول الله ﷺ في المسلمين وقال:
من كان سامعاً مطيعاً فلا يُصلّيَنّ العصر إلا في بني قريظة👌
والكلام ده كان بعد الظهر ، وبني قريظة داخل المدينة يعني هي حي من أحياء المدينة لكنها بعيدة فمحتاجة وقت على ما يوصلوا لها،
فرسول الله ﷺ بيستعجلهم لأن على ما يتجمعوا فيها وقت، فمكنش عايز حد يتأخر أو ياخد راحته وهو بيتجهز،
جبريل عليه السلام انطلق مع الملائكة لديار بني قريظة وتجمع المسلمون وانطلقوا مع رسول الله ﷺ لديار بني قريظة،
والملائكة قاتلت المشركين في غزوة الأحزاب، ربنا بيقول:
"فَأَرْسَلْنَا عَلَيْهِمْ رِيحًا وَجُنُودًا لَمْ تَرَوْهَا "
حصل بين الصحابة اختلاف، في مجموعة حسوا إن العصر هيفوتهم فصلوه في الطريق لبني قريظة وقالوا رسول الله ﷺ أراد إنه يستعجلنا،
ومجموعة تانية قالوا لأ رسول الله ﷺ قال محدش يصلي العصر غير في بني قريظة فمصلوش غير في بني قريظة ولكن كان على آخر وقت العصر، فلما وصلوا لبني قريظة وقالوا لرسول الله ﷺ أقر كل مجموعة على فعلها على حسب ما فهموا من ظاهر كلام رسول الله ﷺ،
وصل رسول الله ﷺ والملائكة لحصون بني قريظة، لكن رسول الله ﷺ اختار المكان المناسب إللي هيخيم فيه الجيش،
هو مش هيقعد في أي مكان كده وخلاص، ده لازم ترتيب
لأنه عارف إن المسالة فيها حصار، وهياخد وقت لأن بني قريظة كانوا داخل حصون، يعني مكان له بوابات وأسوار مش مجرد إنه هيقعد يوم وتاني يوم يقول يلا هجوم ويخلص المعركة، الموضوع هياخد وقت،
فنزل حول بئر ماء،
دخل بنو قريظة حصونهم وقفلوا الأبواب عليهم والمسلمون خارج الحصون،
وهم عندهم أكلهم وماءهم داخل الحصون يعني مش هيحتاجوا يخرجوا لأي سبب🤷‍♂️
تخيلوا إن رسول الله ﷺ هيحاصر بني قريظة خمسة وعشرين يوم والدنيا برد ولسه حالة الفقر مستمرة😶
يعني هم لسه طالعين من حصار شهر وتعبانين وملحقوش يستريحوا وطلعوا لحصار تاني قريب من الشهر برده، لكن شوفوا العبرة هنا، الآية اتقلبت👌
بعد ماكانوا مُحاصَرين مستضعفين خايفين من الهجوم عليهم بقوا هم دلوقتي إللي بيحاصروا إللي كانوا هيجموا عليهم، سبحانه مغير الأحوال👌

لكن المشكلة دلوقتي بقى إزاي هيحصل قتال😕
بنو قريظة داخل حصونهم عندهم أكلهم وشربهم ونايمين في بيوتهم، والمسلمين برة قاعدين في برد ومعندهمش أكل وتعبانين،
إللي ينظر للموقف هيلاقي إن الكفة بتميل ناحية بني قريظة والمسلمون المفروض إنهم هيزهقوا ويرجعوا، لكن هنا في المواقف إللي زي كده تأتي رحمة الله،
المسلمين عملوا إللي عليهم خططوا ورتبوا وحاصروا...بذلوا كل الأسباب إللي يقدروا عليها، ربنا بقى بيوفي بوعده للمؤمنين، مش ربنا بيقول:
"وَكَانَ حَقًّا عَلَيْنَا نَصْرُ الْمُؤْمِنِينَ"
الصحابة مع رسول الله ﷺ حققوا الإيمان الكامل وبذلوا الأسباب فهنا يأتي النصر،
ربنا قذف الرعب في قلوب اليهود، أصل القلوب دي بين يدي الله يُقلبها كيف يشاء،
وإللي مفكر إنه بشطارته ممكن ينتصر أو يكسب قلوب الناس أو يخوفهم منه يبقى غلطان، ده ربنا هو إللي بيلقي المحبة أو الرعب في قلوب الناس👌

بنو قريظة عايشين في رعب من رسول الله ﷺ مع إن إللي يشوف الموقف يقول إن مفيش أي داعي للخوف خالص،
ده هم إللي منتصرين، لكن رب العالمين إذا أراد شيئا فإنما يقول له كن فيكون👌
كعب بن أسد زعيم اليهود من شدة خوفه جمع اليهود وقال لهم : أنا هديكم ثلاثة اختيارات اختاروا منهم واحد:
◇الأول :
إما أن تسلموا وتعصموا دماءكم وأموالكم، وانتم شوفتم إن محمد هو نبي آخر الزمان وهو إللي موجود وصفه عندكم في التوراة💁‍♂️
فقالوا: لأ طبعا، نسلم إيه ونترك دين ال

#قصص_الأنبياء
#الحلقة_الرابعة
#قابيل_وهابيل

قبل ما نبدأ في قصة النهاردة حابة أوضح نقطتين:
◇أولا: قابيل وهابيل مش أنبياء لكن قصتهم مهمة فلازم نعرفها
◇ثانيا:
تفاصيل قصة قابيل وهابيل حتى أساميهم مفيش عليها دليل صريح من أحاديث رسول الله ﷺ، فالكلام إللي هقوله هو كلام جمهور المفسرين، وهتلاقوا في التعليقات إن شاء الله رابط لمصادر القصة👇

نرجع لقصتنا،
وقفنا المرة إللي فاتت عند نزول آدم عليه السلام إلى الأرض مع حواء ليعمّروا الأرض ويعبدوا ربنا فيها ونزل معاهم إبليس عشان يبقى اختبار لآدم وذريته،

¤إزاي بقى بدأ الخلق يتكاثروا🤔
كانت حواء بتولد في كل بطن أو في كل مرة توأم ولد وبنت، فالولد من البطن الأولى يتزوج من البنت في البطن الثانية ،
والبنت من البطن الأولى تتزوج من الولد إللي هييجي من البطن الثانية وهكذا،
لكن كان حرام إن الولد والبنت من البطن الواحدة يتزوجوا من بعض،
ويُقال إن حواء ولدت ٤٠ بطن يعني حوالي ٨٠ ذكر وأنثى كلهم تزوجوا من بعض، ودي كانت بداية نسل البشر على الأرض،
آدم عليه السلام كان بيعلم أبناؤه الدين وبيعلمهم من هو الله وطبعا بيحذّرهم من إبليس ،
آدم كان بشر وعنده أبناء زينا كده بالضبط حاولوا تتخيلوا الصورة معايا أب مع أبناؤه بيحبهم بيلعب معاهم... بيعلمهم ...بيراعيهم...
كان من أبناء آدم عليه السلام قابيل وهابيل،
اتولد مع قابيل أخت جميلة ، واتولد مع هابيل أخت أقل جمالا من أخت قابيل،
فالطبيعي زي ما قلنا إن قابيل يتزوج أخت هابيل وهابيل يتزوج أخت قابيل ...هو ده الشرع عندهم ساعتها.

لكن قابيل =وكان أكبر في السن من هابيل= اعترض إنه إزاي واشمعنى ياخد أخت هابيل الأقل جمالا، وهابيل ياخد أخته الجميلة😑
فكان عايز ياخد أخته لنفسه ويتزوجها هو،
طب إزاي يابني وكده حرام وده شرع ربنا؟
برده مصمم...زي ما ساعات بننصح الناس بالصح ويفضلوا مصممين على الغلط وراكبين دماغهم للأسف😞

حتى آدم عليه السلام أمره إنه يزوّج أخته لهابيل
ومع ذلك برده مفيش نتيجة، طب والحل؟!

نرجع لربنا وهو يحكم في الموضوع👌
ربنا بيقول:
"فَإِنْ تَنَازَعْتُمْ فِي شَيْءٍ فَرُدُّوهُ إِلَى اللَّهِ وَالرَّسُول"
ربنا هدى آدم عليه السلام لفكرة وهي إن كل واحد منهم يقدم قربان لله،
قربان يعني حاجة يتقرب بيها إلى الله، وإللي ربنا هيتقبل قربانه هو إللي هيتزوج أخت قابيل،
"وَاتْلُ عَلَيْهِمْ نَبَأَ ابْنَيْ آدَمَ بِالْحَقِّ إِذْ قَرَّبَا قُرْبَانًا"

هابيل كان بيشتغل في الرعي، وقابيل كان بيشتغل في الزراعة، هابيل دوّر على أحسن وأسمن كبش عنده عشان يقربه لربنا،
وقابيل دوّر على أسوأ حاجة عنده وقربها لربنا،
وكانت علامة قبول القُربان أن تنزل نار من السماء تحرق القربان ده،
فنزلت النار وأحرقت قربان هابيل وبكده ربنا تقبّل قربان هابيل،
"فَتُقُبِّلَ مِنْ أَحَدِهِمَا وَلَمْ يُتَقَبَّلْ مِنَ الْآخَرِ."
ويبقى كده عرفنا مين إللي هيتزوج أخت قابيل👌

◇وقفة مهمة جدا هنا◇
هابيل كان عايز حاجة ربنا يحققهاله وقابيل كان عايز نفس الحاجة لكن كل واحد فيهم قدّم إللي عنده على حسب الصّدق إللي في قلبه،
هابيل ضحى بأغلى حاجة عنده عشان يتقرب لربنا بيها،
وقابيل جاب أسوأ حاجة عنده مع إن هو كان عنده مجال يجيب برده أفضل حاجة...لكن معملش كده،
السؤال هنا :
هل احنا عايشين حياتنا زي هابيل ولّا زي قابيل؟
هل احنا بنضحي بأغلى حاجة عندنا في سبيل رضا ربنا،
ولّا على حسب الظروف؟... يعني ظروفي تسمح كان بها مسمحتش خلاص ..مش هقطع نفسي يعني🤷‍♂️
هل بنستقطع من وقتنا المزحوم بأشياء ممكن تكون عادية عشان نقرأ قرآن؟
هل ضحينا بإننا نترك معصية زي النمص أو سماع الأغاني أو لبس الموضة عشان رضى ربنا وهو الغني عن العالمين؟
ولا بندوّر على العبادات إللي بتيجي على مزاجنا وسهلة إننا نعملها مادام مفيهاش تضحية؟
كلنا نفسنا ندخل الجنة، لكن إيه القربان إللي قدمناه عشان ربنا يرضى علينا ويدخلنا الجنة؟

سامعاكم ياللي بتقولوا احنا هندخل الجنة برحمة ربنا مش بعملنا 😅
أيوة صح معاكم حق، احنا هندخل الجنة برحمة ربنا ولكن زي ما قلنا قبل كده ، رسول الله ﷺ بيقول:
"اعملوا فكل مُيسّر لما خُلق له"👌
كل واحد يسأل نفسه كده ....هل أنا زي هابيل ولا زي قابيل؟

فربنا تقبل خلاص من هابيل،
ها يا قابيل الحمد لله رضيت بأمر ربنا إللي حكم و اختار وهو أحكم الحاكمين ؟!
لأ...لم يرضَ قابيل😑
وقال لآدم ربنا تقبل من هابيل عشان لنت دعيتله إن ربنا يتقبل منه ومدعتليش😤

=هااااااار😳.....يعني هو مش شايف غلطه خالص وتقصيره وبيُلقي اللوم ويعلق أخطاؤه على حد تاني ...أبوه أبو الأنبياء🤦‍♂️
فغضب طبعا قابيل وقال لهابيل هقتلك عشان أستريح منك😠
وطبعا عشان ما يتزوج أخته، فكان كل شوية يتوعده بالقتل،
"قَالَ لَأَقْتُلَنَّكَ"
فقال هابيل:
" قَالَ إِنَّمَا يَتَقَبَّلُ اللَّهُ مِنَ الْمُتَّقِينَ"
وكأن لسان حال هابيل يقول في رسالة لكل إنسان حاله زي حال قابيل:
"أنا ذنبي إيه تقتلني...هل ذنبي إني اتقيت ربنا وع

#قصص_الأنبياء
#الحلقة_الرابعة_عشرة
#قصة_إبراهيم(٤)
#البشارة_بإسحاق

وقفنا المرة إللي فاتت عند دهشة إبراهيم عليه السلام من السكينة التي لا تذبح وصوت المنادي إللي بينادي على إبراهيم عليه السلام😮
سمع المنادي بيقول :
يا إبراهيم قد صدقت الرؤيا!
"وَنَادَيْنَاهُ أَنْ يَا إِبْرَاهِيمُ *قَدْ صَدَّقْتَ الرُّؤْيَا"
يعني ربنا قال لإبراهيم إنت نفذت المطلوب منك خلاص ونجحت في الاختبار العظيم ده،
فالتفت إبراهيم عليه السلام لقى كبش ضخم عشان يذبحه فداء لإسماعيل عليه السلام، يعني يتم ذبحه بداله،
وخلاص البلاء انتهى وإبراهيم عليه السلام لم يذبح إسماعيل😊
¤إيه ده😳
طيب وكان لازمته إيه الموضوع من الأول مادام كده كده ربنا لا يريد قتل إسماعيل عليه السلام😥
لازم يعني الإبتلاء الشديد ده😖
أيوة لازم اختبار وتمحيص، وعشان كده احنا جينا الدنيا: 《ليبلوكم أيكم أحسن عملا 》
ربنا لا يبتلي عباده المؤمنين ليعذبهم أبدا👌
لكن كمان ربنا مش بيحاسبنا ولا بيجازينا بسابق علمه فينا...يعني لااااازم نشتغل ويبقى لينا عمل عشان على أساسه يحاسبنا فيعاقبنا أو يكافئنا،
إزاي ربنا هيكافئ إبراهيم عليه السلام ويرفع درجته بحاجة هو معملهاش لسه لكنه عارف عز وجل إنه هيعملها👌
مثال : إنت مكتوب لك عند ربنا إن ليك أجر الصابرين والكاظمين الغيظ،
إزاااااي هتاخد الأجر ده إلا لو ربنا ابتلاك بشخص سليط اللسان مش بيشوفك غير لما يحرق دمك🤓
ربنا مثلا كاتب لك أجر المجاهدين لأنفسهم...إزاااي هتاخد الأجر ده إلا لو إنت عمّال تجاهد نفسك وشيطانك على الطاعة وبعيد عن المعصية...وهكذا👌
وكذلك إبراهيم عليه السلام إزاي قصته هتكون مضرب للمثل في التسليم لأمر الله إلا لو اتحط في الإبتلاء ده؟
إزاي مكانته كخليل للرحمن هتيجي من غير ما يضحي بأغلى ما يملك في حياته في الوقت ده وهو ابنه👌

طيب فاكرين لما قلنا إن سارة غارت جدا من هاجر وابنها إسماعيل😊
إزاي قلب سارة هيهدى وتتحول قسوة الغيرة إلى شفقة وحب لو محصلتش الحادثة دي،
وإزاي كانت هتكون مناسك الحج لولا الحادثة دي😁

فمتفكرش أبدا أبدا إن ربنا بيقدّر الأمور عبثًا والعياذ بالله،لأ،
ده كل حاجة محطوطة في مكانها بالضبط...وكل حاجة متسجلة،
وجع قلبك ودموعك وقهرتك وظلم الناس ليك و...و...
كل ده ربنا مقدره عشان يشيل من عندك ذنب أو يطهر قلبك ويعلمك الصح من الغلط فتزكي نفسك أو يرفع درجتك في الجنة، واحنا قلنا إن ربنا لا يبتلي ليُعذب ...فما تقلقش😊

بعد ما ذبح إبراهيم عليه السلام الكبش فداءا لإسماعيل عليه السلام ورجعه لأمه هاجر رجع لفلسطين عند سارة من تاني
وكان إبراهيم عليه السلام ييزور إسماعيل وهاجر كل فترة زي ما قلنا،
وكان إسماعيل عليه السلام تزوّج من قبيلة جُرهم بعد موت أمه هاجر، فلما زاره إبراهيم عليه السلام ومالقاهوش
ولقي إمرأة وسألها عن إسماعيل، قالت له مش موجود، راح يصطاد لنا صيد ،
وكان إسماعيل بيخرج عشان يصطاد ،
فسألها عن حالهم بشكل عام عاملين إيه؟
فقالت له العيشة وحشة ومعندناش إللي يكفينا والحالة كرب و و و و... وقعدت تشتكي له من الحياة الزوجية مع إسماعيل😞
فقال لها لما زوجك ييجي سلمي عليه وقوليله غيّر عتبة بابك 😑
فلما رجع إسماعيل عليه السلام كإنه حس إن في حد جه، فسأل زوجته: حد جه النهاردة 🤔
فقالت له أيوة جالنا شيخ شكله كذا وكذا -ووصفته لإسماعيل عليه السلام- وسأل عليك وسأل عن حالنا فحكيت له،
فسألها ..طيب هو وصاكِ بحاجة🤔
قالت: قال لي أبلغك سلامه وبيقولك غير عتبة بابك،
فقالها ده أبويا وووصيته هي إني أفارقك..
وطلقها فعلا،
وتزوج امرأة تانية من جُرهم،
بعد مدة جه إبراهيم عليه السلام يزور إسماعيل مرة تانية وماكنش موجود و ردت عليه إمرأة تانية،
فسألها عن إسماعيل فقالت إنه خرج يصطاد، يعني في الشغل بلغة زماننا😅
فسألها عن حالهم وعيشتهم فحمدت ربنا وقالت إن ربنا موسع عليهم، فسألها بياكلوا إيه قالت: اللحم وسألها بيشربوا إيه: قالت الماء ،
فدعا لهم إبراهيم عليه السلام بالبركة وقالها:
لما زوجك يرجع سلمي عليه وقوليله ثبّت عتبة باباك،
فلما رجع إسماعيل عليه السلام سأل زوجته حد جه النهاردة🤔
قالت أيوة جالنا شيخ كبير -ووصفته ومدحته- وسأل على حالنا قلتله إننا كويسين،
فقال لها وصاكِ بحاجة🤔....قالت له: بيسلم عليك وبيقولك ثبّت عتبة بابك،
فقال لها ده أبي، وإنتِ العتبة إللي أمرني إني أثبتها، يعني بيوصيني ما أفارقكيش.

¤وييجي هنا سؤال...
هم ليه بيسموا المرأة عتبة 😕
لإن عتبة الباب والزوجة بيشتركوا في نفس الصفات الحميدة الطيبة: من حفظ البيت وستره وصيانة إللي جوة البيت من كل سوء برة البيت😊

¤طيب سؤال تاني 🤔
هو إسماعيل عليه السلام يسمع كلام أبوه كده على طول بدون ما يراعي مشاعر زوجته😥
طب وهي مراعتش ليه مشاعر زوجها لما واحد غريب ماتعرفوش يسألها عن حالهم وتقعد تشتكيله😑
يعني بغض النظر إن ده نبي هل ينفع إن المرأة تقعد تشتكي من زوجها للناس للرايح والجاي بصفة

#قصص_الأنبياء
#الحلقة_الرابعة_والعشرون
#قصة_أيوب

اتكلمنا عن قصة يوسف عليه السلام وإنه كان ابن يعقوب عليه السلام، وقلنا قبل كده إن إسحاق عليه السلام كان عنده ولدين هما يعقوب والعيص،
فكان من ذرية العيص نبي اسمه أيوب عليه السلام ودي قصتنا النهاردة إن شاء الله😊

☆لكن قبل ما نتكلم عن أيوب عليه السلام في أخت سألتني: إيه الحكمة إن ربنا أرسل يوسف عليه السلام ؟
يعني في الأمم السابقة كان الرسل بيدعوا قومهم ولو لم يؤمنوا ربنا يهلكهم، وربنا لم يهلك أهل مصر، فإيه السبب🤔

=يوسف عليه السلام كان نبيا رسولا، أُرسل لأهل مصر في زمن ملك مصر إللي أكرمه وأحسن إليه ومكّنه من خزائن مصر،
هو دعا الناس لعبادة الله والملك نفسه قرّبه إليه، فكان التركيز في القرآن على قصة حياة يوسف عليه السلام عشان نتعلم منها العِبر زي الصبر على البلاء والصبر على الأذى،
والقوة في مواجهة الفتنة، والإحسان لمن أساء إلينا، إلى آخرِه..
فلو كل الأحداث نسخة بالكربون يبقى احنا هنستفيد إيه🤷‍♂️
وربنا مش بيذكرلنا قصة إلا وهو يريد إنه يعلمنا منها حاجات جديدة من زوايا جديدة ومتنوعة👌
ده غير إن كل قصص الأنبياء السابقين إللي قومهم هلكوا كانوا بسبب إنهم كذّبوا أنبياؤَهم وطلبوا معجزات فيها تعنّت واستكبار وابتزاز وآذوا الأنبياء ،
لكن ده محصلش مع يوسف عليه السلام، فليه ربنا يهلكهم وخصوصا إنهم أكرموا يوسف والناس بتحبه وفي مجال إنهم يدخلوا في الدين؟!
والغاية أبدا مش إهلاك الناس... الغاية جعل الناس يؤمنوا بالله، فطول ماهو شغال في الدعوة والناس مش بتؤذيه وهو نفسه مدعاش عليهم خلاص...ربنا يسيبهم لعلهم يؤمنوا،
ولعل في ناس آمنت كثير بس مش ده المقصد من قصة يوسف عليه السلام،
الدروس إللي بنتعلمها من قصة يوسف عليه السلام غير الدروس إللي اتعلمناها من قصة هلاك قوم نوح مثلا أو قوم صالح...كل قصة ليها عبرة خاصة بيها، فربنا بيقولولنا إللي يفيدنا من كل قصة😊

نرجع بقى لقصة أيوب عليه السلام😁
قلنا قبل كده إن إسحاق عليه السلام كان عنده ولدين هما يعقوب والْعِيص،
فكان من ذرية العيص بن إسحاق بن إبراهيم النبي أيوب عليهم جميعًا السلام،
"إِنَّا أَوْحَيْنَا إِلَيْكَ كَمَا أَوْحَيْنَا إِلَى نُوحٍ وَالنَّبِيِّينَ مِنْ بَعْدِهِ وَأَوْحَيْنَا إِلَى إِبْرَاهِيمَ وَإِسْمَاعِيلَ وَإِسْحَاقَ وَيَعْقُوبَ وَالْأَسْبَاطِ وَعِيسَى وَأَيُّوبَ"
كان أيوب عليه السلام عنده أموال وأراضي وذرية كتير جدا،
كان عنده ١٤ ولد وبنت ، وكان عايش في أرض حُورَان في الشام مع قومه،
عاش أيوب عليه السلام في نعيم الأرض ده سبعين سنة،
وكان نبي مع النعيم ده كله....
وكان كريم جدا ...كان لو عدّى على اتنين بيتخانقوا وحلفوا على بعض بالله كان بيُصلح بينهم، ثم لمّا يروَّح بيتصدق عن حلفانهم ده من ماله الخاص تنزيهًا لاسم ربنا إن حد يحلف بيه كذب أو يحلف وميوفيش بحلفانه،
وكان يساعد الفقراء بكل كرم وسخاء ...على الرغم من كل الطاعات إللي كان بيعملها دي؛ بدأ البلاء ينزل بأيوب عليه السلام...
أبناؤه بدأوا يموتوا واحد ورا التاني🙊
الابن إللي كان بيلعب معاه وكِبر قصاد عينه، إذ فجأة داخل البيت زوجته تقوله ابنك مات😞
ياخده يغسله ويكفنه ويدفنه في القبر ويسيبه ويمشي والناس تعزيه ولسه نار قلبه مبردتش ويلاقي التاني مات😥
ويتكرر نفس الموضوع ١٤ مرة ...متخيلين؟!
ده لو حد مات له طفل ولا اتنين ولا حتى ثلاثة بيبقى هيتجنن ومش قادر😞
ده مات له ١٤ ابن ورا بعض،
ومش بس كده، ده كمان خسر أمواله كووولها😑
ثروته...والأراضي بتاعته كل حاجة ...كل حاجة بمعنى الكلمة،
ومش بس كده...ده بدأ كمان المرض ينزل عليه لدرجة مبقاش في مكان في جسمه إلا فيه مرض، ماعدا لسانه وقلبه😶
أنا عايزكم تتخيلوا معايا😦
واحد عياله كلهم ماتوا...خسر فلوسه كلها...نايم على السرير مبيتحركش...جسمه بقى مليان قُرَح... واستمر في المرض ده مش يوم ولا اتنين ولا شهر ولا شهرين...ده قعد مريض مش بيتحرك ١٨ سنة👌
إحنا الواحد فينا –ربنا يعافي الجميع- لما بيقعد في السرير كام يوم بيبقى مش طايق نفسه ومخنوق😑
ده إنسان قعد ١٨ سنة مريض بيتألم وكمان مبتلى بالحزن على فقد أولاده وفلوسه،
والمرض طول جدا لدرجة إن الناس زهقت من كتر ما بتروح تزوره،
وبِعدوا عنه وهجروه وبدأوا يتكلموا عليه،وطبعا إنتم عارفين كلام الناس😶
هَمّ تاني لوحده🙄
يعني كم واحد رجع عن طريق الإلتزام بسبب كلام الناس وكم واحدة خايفة تأمر بالمعروف وتنهى عن المنكر عشان خايفة من كلام الناس و....و.... 😑
المهم،
اتبقّى لأيوب عليه السلام اتنين أصحابه هم بس إللي استمروا يزوروه، لحد ما في يوم من الأيام وهما رايحين يزوروه واحد قال للتاني:
أكيد أيوب عمل ذنب عشان ربنا يبتليه الإبتلاء ده😤
السنين دي كلها في الإبتلاء وربنا ما بيرفعش عنه ويعافيه! أكيد عمل حاجة استحق بيها عقاب ربنا👌

☆بنسمع وبنقول الكلمة دي لبعض كتير صح😁
لما نلاقي حد ربنا بيبتليه ويبتليه ويبتليه بنقول أكيد ده عنده ذنب ف

#قصص_الأنبياء
#الحلقة_الرابعة_والثلاثين
#قصة_موسى_الجزء_التاسع
#موسى_والخضر

كنا واقفين المرة إللي فاتت عند موسى عليه السلام لما قابل الخِضر وشاف منه حاجات من وجهة نظر موسى عليه السلام كانت منكرة وعظيمة،
وبعد ما موسى عليه السلام اعترض على أفعال الخضر مرتين قال موسى عليه السلام للخضر إنه مش هيسأله عن حاجة تاني،
كملوا بقى رحلتهم لحد ماوصلوا لقرية، وكانوا محتاجين ياكلوا، فطلبوا الضيافة من أهل القرية فمحدش منهم رضي إنه يضيّفهم،
ودي قاعدة في جميع الشرائع حتى الإسلام، إن أي حد يدخل المدينة غريب وعابر سبيل، واجب على أهل المدينة دي إنهم يضيفوا الزائر ده يوم وليلة.
فهمّ لما دخلوا المدينة وطلبوا الضيافة كانوا بيطلبوا حق من حقوقهم مش بيطلبوا صدقة يعني، وأصلا الأنبياء لا تأكل الصدقة،
فحتى من غير ما كانوا يطلبوا كان من المروءة إن أي حد من أهل المدينة لما يشوف حد سافر عابر سبيل داخل القرية هيعرضوا عليه الطعام والمبيت.. لكن دول محدش فيهم ضايفهم أو أعطاهم أي حاجة،
"فَانطَلَقَا حَتَّى إِذَا أَتَيَا أَهْلَ قَرْيَةٍ اسْتَطْعَمَا أَهْلَهَا فَأَبَوْا أَن يُضَيِّفُوهُمَا "

فموسى عليه السلام ومعاه الخضر سابوهم وراحوا يتمشوا في القرية،
وهم ماشيين شافوا جدار فاضل له حاجة بسيطة وهيقع خلاص،
فالخضر عَدَله عشان ميقعش، سواء بقى جاب مواد بناء ورمم بيها الجدار، أو إنه مَرّر عليه إيده فاتعدل بقدرة الله ومعجزة ، الله أعلم..
"فَوَجَدَا فِيهَا جِدَارًا يُرِيدُ أَنْ يَنقَضَّ فَأَقَامَهُ"

فموسى عليه السلام معجبوش إللي حصل وقال للخِضر: انت كده عملت معروف للناس إللي رفضوا يضيّفونا بأقل شيء، طيب على الأقل اطلب منهم أجر، أو حتى اطلب الضيافة مقابل إصلاح الجدار ده😑
"قَالَ لَوْ شِئْتَ لَاتَّخَذْتَ عَلَيْهِ أَجْرًا"

فهنا الخِضر رد على موسى وقال له:
خلاص كده... احنا هنفترق.. ومش هنكمل مع بعض الرحلة 😊
لإنك للمرة التالتة مقدرتش تصبر زي ما قلتلك من الأول..
لكن قبل ما أسيبك هقولك تفسير الحاجات إللي أنا عملتها كلها👌
"قَالَ هَذَا فِرَاقُ بَيْنِي وَبَيْنِكَ سَأُنَبِّئُكَ بِتَأْوِيلِ مَا لَمْ تَسْتَطِع عَّلَيْهِ صَبْرًا"
وبدأ الخضر يحكي لموسى عليه السلام أعاجيب الأقدار والحكمة...
قال الخضر لموسى:
"أَمَّا السَّفِينَةُ فَكَانَتْ لِمَسَاكِينَ يَعْمَلُونَ فِي الْبَحْرِ فَأَرَدتُّ أَنْ أَعِيبَهَا وَكَانَ وَرَاءَهُم مَّلِكٌ يَأْخُذُ كُلَّ سَفِينَةٍ غَصْبًا"

يعني بيقوله فاكر السفينة إللي ركبنا فيها...دي كانت بتاعة ناس مساكين بيشتغلوا عليها ومعندهمش غيرها،
ففي طريق رحلتهم هيعدّوا على أرض بتاعة ملك ظالم،
والملك الظالم ده كل ما بيشوف سفينة كويسة مفيهاش عيوب بياخذها بالغصب من أصحابها،
فأنا عملت فيها عيب عشان لما جنود الملك يشوفوها يسيبوها للمساكين... لإن سفينة معيوبة بالنسبة لهم أحسن من لو مفيش سفينة خالص يسترزقوا منها😅

☆وده يعلمنا إيه😁
يعلمنا إن ما لا يُدرك كله لا يُترك جُله👌
مش لازم كل حاجة تبقى تمام التمام.. مش لازم أستنى لما الأمور تبقى 100% عشان أشتغل، وإلا مش هشتغل لحد ما الظروف تبقى زي مانا عايز🤷‍♂️
يعني لو مثلا مبقدرش أصلي قيام الليل ١٢ ركعة بـألف آية إللي بيهم أُكتب عند الله من المُقنطرين،
ولا حتى بقدر أقوم الليل بـمائة آية إللي بيهم أُكتب عند الله القانتين، على الأقل هصلي ركعتين بـعشر آيات قبل ما أنام،
آخذ بيهم وعد من ربنا إن اسمي متشال في الليلة دي من الغافلين،
زي ما رسول الله ﷺ قال في الحديث:
"من قام بعشر آيات لم يكتب من الغافلين، ومن قام بمائة آية كُتب من القانتين، ومن قام بألف آية كُتب من المقنطرين"

أنا مثلا بكسل أصلي سنن الصلاة يبقى أسيبها خالص 😑
لأ طبعا ...هصلي السنن وأنا قاعدة😁
آخذ نص الأجر ولا إني أسيب الأجر كله💁‍♂️
هصلي إللي أقدر عليه من السنن ومش هسيبها كلها لعل ربنا يقويني بعزيمتي وأكمل.
طيب واحدة مش بتعرف تقرأ قرآن بالترتيل... تسيب قراءة القرآن..؟ برده لأ .. تقرأ زي ما بتعرف وفي نفس الوقت تتعلم واحدة واحدة تقرأ بترتيل👌

◇بس استنوا 😅
مش معنى كده إننا بنتكلم عن فِعل المستطاع من الفرائض😱
لأ، احنا بنتكلم عن السنن والنوافل وفضائل الأعمال،
لكن الفرائض لازم تكون تامة مافيهاش حتة آه وحتة بعدين، والمنكرات المحرمات هي كمان لازم نسيبها كلها مرة واحدة هي كمان👌

الخضر كمّل تفسيره للأحداث وقال:
""وَأَمَّا الْغُلَامُ فَكَانَ أَبَوَاهُ مُؤْمِنَيْنِ فَخَشِينَا أَن يُرْهِقَهُمَا طُغْيَانًا وَكُفْرًا "
فاكر يا موسى الطفل إللي أنا قتلته؟
الطفل ده لما كان هيكبر كان هيكون كافر ورجل طاغية، وأمه وأبوه أصلا من المؤمنين،
فكان هيتعبهم جامد لما يكبر ويكسر قلبهم أكتر من دلوقتي وكان ممكن يفتنهم عن الإيمان وتبقى الطامة الأكبر على الإطلاق،
فرحمة من ربنا بيهم إنه أمر بقتل ابنهم وهو صغير لسه، وربنا هيعوضهم بواحد أحسن منه في الدنيا 👌

☆وطبعا هنا هييجي سؤال:
هو ينفع ط

#قصص_الأنبياء
#الحلقة_الرابعة_والأربعون
#قصة_عُزَير
#مقدمة_عن_ذي_القرنين

وقفنا المرة إللي فاتت عند بُخْتُنصّر لما أدخل أسدين مع النبي دانيال في بئر كبير عشان ياكلوا ويقتلوه وهو صاحي،
لكن سبحان الله الأسدين لم يؤذياه بالعكس ده قعدوا يلحسوا فيه😮
ربنا أيّد نبيه بمعجزة من عنده تُثبت إنه نبي 👌

☆وطبعا بُخْتُنصّر مش مستوعب ده اسمه إيه إللي حصل ده😳
ماهو أصله مش فاهم إن كل المخلوقات ماتقدرش تعمل حاجة إلا بأمر ربنا وإن ربنا هو مُسبب الأسباب ومالك الملك يقدر ينزع الأسباب ويعطلها في الوقت إللي يريده،
ميعرفش إنما أمره إذا أراد شيئا أن يقول له كن.. فيكون.. ميعرفش:
" إن الأمة لو اجتمعت على أن يضروك بشيء لن يضروك إلا بشيء قد كتبه الله عليك"👌
خرج دانيال من البئر سليم مُعافى😊
فعمل خاتم ونقش على الفص بتاعه صورة رجل بين أسدين والأسدين بيلحسوه، عشان مينساش نعمة ربنا عليه بإنه أنقذه في الوقت العصيب ده👌
من ضمن إللي بيُحكَي في قصة النبي دانيال، إن بُخْتُنصّر شاف رؤيا ونسيها، فسأل عنها دانيال،
فحكاها له دانيال زي ما شافها وفسرها له كمان، وكان تفسيرها بشارة ببعثة رسول الله ﷺ، وإن مُلك أمة التوحيد والإسلام هيبلغ مشارق الأرض ومغاربها👌

◇قصة دانيال عليه السلام👆 من الإسرائيليات التي لا تُصدق ولا تُكذب،
لكن الصحابة لما فتحوا مدينة تُسْتَر في فتوح فارس،
ودخلوا بيت مال الهُرمُزان إللي هو قائد الجيش الفارسي في معركة القادسية،
لقوا فيه تابوت، كان جواه جثة لرجل أنفه طولها ذراع، كان أهل الفرس لما ينقطع عنهم المطر كانوا بيستسقوا بجثة الراجل ده،
فأرسل الصحابة لعمر بن الخطاب رضي الله عنه يحكوا له عن قصة الجثة دي،
فقال لهم عمر: إن ده جسد نبي لإن الأرض والنار مش بياكلوا أجساد الأنبياء..
ولما لقوا الخاتم في يده، الصحابة سألوا الناس عنه، فالناس قالوا لهم إن دانيال ده كان ملك من الملوك السابقين أسَره وحصل كذا كذا.. وحكوا لهم حكايته مع الأسدين إللي على الخاتم،
فعرف الصحابة إنه النبي دانيال..
وحفر المسلمون ثلاثة عشر قبرا في النهار،
ودفنوا جثة النبي دانيال في واحد منهم بالليل عشان محدش يعرف مكانه ويطلعه تاني، ويحافظوا على التوحيد،
ويُبطلوا عبادة التوسل بالأموات إللي تعتبر شرك بالله تعالى👌
☆بالمناسبة :
مدينة تُسْتَر بالفتح، مع إن معظمنا كان بيمسعها بالضم "تُستُر" لكن لما بحثنا عنها بالتشكيل، لقينل الموجود كان بالفتح في تفسير ابن كثير، ومكنش موجود بالضم خالص.. فهل هي ليها تشكيلين ، واحد بالضم وواحد بالفتح؟ الله أعلم🤷‍♂️
لكن المؤكد إن التشكيل بالفتح ثابت👌

نرجع بقى شوية لبيت المقدس بعد خروج بُخْتُنصّر منه..
أصبح بيت المقدس خراب والناس مقتولين فيه، فمرّ على بيت المقدس رجل صالح من بني إسرائيل،
وكان راكب على حمار بتاعه، وكان معاه سلة فيها أكل يخصه.. كان فين ورايح فين؟ محدش يعرف😅
لكن المهم إنه لما دخل المدينة وشاف الناس مقتولة والمدينة خراب، قال في نفسه وهو بيتعجب:
إزاي الناس دي ربنا هيحييها مرة تانية😮
هو مكنش بيشك في قدرة ربنا.. لكنه كان مستغرب🤔
هقول لكم زي إيه عشان أقرب لكم المعنى👌
عارفين لما تشوفوا إعلان عن شقة هتكون عاملة إزاي بعد التشطيب 🤔
أو عمارة مثلا هتكون عاملة إزاي لما تتبنى وتخلص خالص وشكلها في الإعلان خرافي وشديد الإبهار،
وانتم على أرض الواقع مجرد شايفين يادوب الأساس هو إللي بيتحفر.. فيبقى فيه تعجب جواكم كده:
إزاي الناس دول هيعملوا العمارة لحد ما توصل في الآخر بالمنظر ده 😳
هو انتم هنا معندكوش شك إنها فعلا هتتبنى، لكن انتم بس مستغربين مندهشين متعجبين👌
ولله المثل الأعلى ...
أهه ده كان إحساس الرجل الصالح، ويقال إن اسمه أَرميا النبي إللي اتكلمنا عنه المرة إللي فاتت أو إنه اسمه عُزيْر إللي احنا عارفينه من القرآن،
بس العلماء اختلفوا هل عُزَير ده رجل صالح ولا نبي🤔
لكن المشهور عند أهل التفسير إنه رجل صالح واسمه عُزَير،
فلما شاف عُزيْر خراب المدينة وشاف كمية جثث القتلى وشدة المقتلة فيهم، استغرب إزاي ربنا هيرجع الأرض دي عمار مرة تانية😮
"أَوْ كَالَّذِي مَرَّ عَلَىٰ قَرْيَةٍ وَهِيَ خَاوِيَةٌ عَلَىٰ عُرُوشِهَا قَالَ أَنَّىٰ يُحْيِي هَٰذِهِ اللَّهُ بَعْدَ مَوْتِهَا"
فربنا توفاه لمدة 100 سنة، ثم أحياه من تاني.. وخلال المائة سنة دي أحداث كتيير حصلت...
بختنصر كان مات خلاص،
وحصلت معركة بين أهل بابل في العراق وبين الفُرس في إيران، وانتصر الفُرس على البابليين بمساعدة اليهود إللي كانوا في بابل عبيد زي ما قلنا،
وضم الفُرس حُكم فلسطين للدولة الفارسية، وانتهى الحكم البابلي العراقي لفلسطين، ودخل فيها الحُكم الفارسي..
وكان بعض اليهود رجعوا لأرض فلسطين في الوقت إللي هي فيه تحت الحكم الفارسي، وبدأوا يعمَّروا المدينة مرة تانية....
كل ده وعُزير ميت🙊
فبعد ما المائة سنة خلصوا ربنا بعثه وأحياه من تاني.. فلما قام، كان متخيل إنه نام كام ساعة بس كده،
فربنا سأله على ل

#قصص_الأنبياء
#الحلقة_الرابعة_والخمسون
#مريم_زكريا_الجزء_الرابع
#يحيى

اتكلمنا عن زكريا عليه السلام لما دعا ربنا إنه يرزقه بولد عشان يرث النبوة، وربنا استجاب دعاؤه وحملت زوجته "إشياع" بيحيى عليه السلام،
ولدت إشياع يحيى عليه السلام، وكان يحيى مختلف عن باقي الأطفال؛ لإن ربنا أعطاله الحكمة والفَهم من وهو صغير ،
حتى لما كِبِر شوية وكان الأطفال يقولوا له تعالى نلعب كان بيقول لهم:
احنا متخلقناش للعب وكان يسيب اللعب ويتعبد لله، و ده إللي ربنا قال عنه في القرآن:
" وَآتَيْنَاهُ الْحُكْمَ صَبِيًّا"

◇وممكن نشوف الكلام ده مع أطفال صغيرين حوالينا تلاقي البنت على صغر سنها تطلب إنها تلبس الحجاب،
وتلاقيها منها لنفسها كده متجهة لطاعة ربنا بالرغم إن إللي حواليها مش في دماغهم أصلا وكل همهم يلبسوا على الموضة ويتفسحوا ويتحرروا من أي أوامر أو التزامات شرعية و...و...
فلما تلاقي بنتك ولّا أختك ولا أي طفلة أو طفل ماشيين في طريق ربنا شجعهم كتير،
يمكن تشجيعك ليهم ده يكون سبب في ثباتهم على الدين وتكون أعمالهم بسبب تثبيتك لهم في ميزان حسناتك 😊
واوعوا.. 🤐
إوعوا تقولوا للبنت مثلا "يا حبيبتي انتِ لسه صغيرة"،
ولا "عاملة في نفسك كده ليه!"، ولا أي كلام من الكلام المحبط ده إللي بيقتل الهِمم والعزائم ده 😑
لو البنت رجعت عن الإلتزام بطريق ربنا وكنتم انتم السبب ، هتبقى في ميزان سيئاتكم😶
ولازم تكونوا عارفين إن المسلم إللي بينشأ في طاعة الله، بيكون من السبعة إللي ربنا بيظلهم يوم القيامة من حر الشمس في ظل عرشه لما تكون الشمس قريبة جدا من رؤوسنا نسأل الله السلامة..
مش لو حد فينا شاف طفل واقف في عز الشمس مش بيصعب علينا؟
أهه يوم القيامة هيبقى أشد من حر الدنيا 😞
فياريت يصعب عليك هناك أكتر من الدنيا، وخلوا أطفال المسلمين يبنوا لأنفسهم ظلهم يوم القيامة بدون ما تحبطوهم👌
المهم،
يحيى عليه السلام كان طائع لربنا من صغره وزاهد في اللعب ، وعنده جدية في الإلتزام، وده كان بسبب إن ربنا قال له《يَا يَحْيَى خُذِ الْكِتَابَ بِقُوَّةٍ》💪🏻
يعني خد التوراة باجتهاد وبجدية وهمة عالية.. ومش هتعرف تاخدها بجِد واجتهاد غير لما تفهمها صح الأول،
ولما تفهمها صح ساعتها العقيدة هتستقر عندك وتقدر تطبقها في أقوالك وأفعالك كلها 👌

☆وطبعا الكلام ده لما ربنا بيقوله في القرآن فهو مش ليحيى لوحده، ده لينا احنا كمان 💁‍♂️
يعني ربنا بيقول لنا خدوا القرآن بجدية.. افهموه صح عشان تعرفوا تطبقوه..
فلما ربنا يقول أطيعوا الله وأطيعوا الرسول،
يبقى لازم تاخد الموضوع بجدية وأول خطوة في الجدية دي أكيد هي:
إنك تتعلم وتفهم إيه هي الأوامر دي إللي مفروض تطيعها،
وبعدين تاني خطوة في الجدية بتكون إنك تطيع كل الأوامر دي،
مش الموضوع يبقى على حسب ظروفك ومزاجك وهواك: ده هطيعه وده لأ؟ 😕
"أَفَتُؤْمِنُونَ بِبَعْضِ الْكِتَابِ وَتَكْفُرُونَ بِبَعْضٍ "؟!
يعني ما ينفعش مثلا تقول :
والله أنا هطيع ربنا وأصلي وأقرأ قرآن وأصوم وأزكي،
لكن الموسيقى مش هقدر، لازم أسمع😤
أو السينما دي روحي، معرفش أعيش من غيرها،
أو كله إلا الاختلاط مش هقدر مكلمش زمايلي ونخرج مع بعض😤
الدين يا جماعة ماينفعش ناخد نصه ونسيب نصه، ولا حتى نسيب حتة منه بمزاجنا...
آه ممكن نقصر غصب عنا ونكون زعلانين بسبب تقصيرنا في فريضة أو معصية،
لكن ميبقاش بمزاجنا: الأمر الإلهي ده هعمله لإنه سهل، وده لأ مش هعمله لإني مش مقتنع إنه فرض أو هيضايقني لو عملته.. الدين مش كده..
الدين ناخده كده كله على بعضه 😅

ثم لو كل حاجة سهلة كده يبقى فين أجر المجاهدة 🤷‍♂️
وكمان الجنة حُفّت بالمكاره يعني متحوّطة كده بالحاجات إللي بنكره نعملها...الحاجات إللي هي ضد هوانا👌

يعني مش هندخل الجنة غير لما نكسر المكاره دي💪🏻
زي كده لما واحد بيعدّي حواجز عشان يوصل لهدفه👌
وربنا بيقول لنا:
"أَمْ حَسِبْتُمْ أَن تَدْخُلُوا الْجَنَّةَ وَلَمَّا يَعْلَمِ اللَّهُ الَّذِينَ جَاهَدُوا مِنكُمْ وَيَعْلَمَ الصَّابِرِينَ"
فين بقى مجاهدتنا لنفسنا وصبرنا على الطاعة وصبرنا عن المعصية 💁‍♂️
هو مين إللي بيبقى عايز يقوم في عز البرد يحط مية على جسمه عشان يتوضى؟
والله لولا إننا بنجاهد عشان نرضي ربنا وناخد الأجر مكنش في حد قام من تحت البطانية 😳
على فكرة الكلام ده لا يتعارض مع حديث لن يدخل أحد الجنة بعمله 😁
لأن واحد من الصحابة قال لرسول الله ﷺ خلاص بلاش نعمل ..فرسول الله قال:
"اعملوا فكل مُيَسر لما خُلق له"
فلما الواحد يلاقي نفسه واخدة الكتاب بقوة وماشية في طريق ربنا هنا نعرف إن ربنا ميسّرنا لطريق الجنة 😊
ربنا قال لنا اعمل كذا..حاضر يارب حاااالا،
متعملش كذا..حاضر يارب حااالا..مش نستنى لما نشوف ظروفنا تسمح ولّا لأ..ولا نقعد ندور على شيخ يقولنا عادي لو معملتش كذا أو يجوز إنك تعمل كذا على حسب الهوى🤓

فيحيى عليه السلام من صغره وهو بيطيع أمر ربنا👌
طب إيه باقي صفات يحيى عليه السلام؟
من الحاجات إللي ربنا رزقه بيها ك

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الرابعة
#حلقة_خاصة_للأسئلة_عن_المرحلة_الأولى_الجزء_الثاني
#تساؤلات_عن_ملك_الموت

وقفنا المرة إللي فاتت عند كم سؤال سألناه، الأسئلة كانت:
◇هي الروح دي موجودة من زمان قبل خلق الأجساد ولّا بتيجي منين؟
◇وإيه ظاهرة: دَيْجَا فُو (Déjà vu ) وإيه تفسيرها في الإسلام؟
◇وإيه حكاية تناسخ الأرواح 《 reincarnation》؟
◇وليه باب التوبة بيغلق عند الموت؟
طب لو واحد اتحكم عليه بالقتل أو كان في مكان بيحترق أو كان راكب طائرة مثلا والطائرة بتقع أو واحد مريض بالأمراض المهلكة زي الإيدز أو السرطان؛ هل كل دول توبتهم لا تصح؟

خلونا ناخدهم واحد واحد،
💠الأول:
هل الروح موجودة أصلا من زمان قبل خلق الأجساد ولّا بتيجي منين؟🤔

🔅موضوع هل الأرواح موجودة قبل خلق الأجساد ولّا بعدها على خلاف بين العلماء،
في فريق قال: إن الأرواح مخلوقة قبل الأجساد، وفريق قال إن الأجساد خُلقت الأول وبعدين الأرواح،
وكل فريق له أدلته من القرآن والسنة، يعني هم مش بيقولوا كده من دماغهم؛ لأن في أمور الغيب لازم دليل، محدش يقدر يتكلم برأيه😅👌
وأنا بصراحة مش حابة أدخل في التفاصيل؛ لأن الموضوع هيطول أوي كده وهندخل في متاهات🙈

🔹️لكن خُلاصة الموضوع وهو ده القول الراجح إن شاء الله:
🔺️بالنسبة لآدم عليه السلام فربنا خلق جسده قبل روحه،
🔻أما بالنسبة لنا احنا ذرية آدم عليه السلام فأرواحنا خُلقت قبل أجسادنا،
طبعا إللي قرأ معانا قصص الأنبياء هيفهم معنى الكلام، لكن خليني سريعا كده أوضح الموضوع عشان إللي مقرأش😅
شوفوا،
ربنا خلق آدم عليه السلام من قبضة قُبضت من الأرض، وجعله جسداً ثم نفخ الله جل وعلا فيه الروح،
وبعد أن نفخ الله فيه من روحه امتزجت تلك الروح التي خلقها الله جل وعلا في جسد آدم فأصبح آدم كائناً حياً ينطق،
وبعدها خلق الله عز وجل من ضلع آدم زوجته حواء وسكنوا الجنة مع بعض زي ما احنا عارفين،
فهنا نلاحظ إن جسد آدم عليه السلام خُلِق قبل روحه،
أما احنا بقى《بني آدم》 فأرواحنا اتخلقت الأول؛

¤إزاي 🤔
ربنا أخرج من ظهر آدم كل نَسَمة《يعني كل روح》من ذرية آدم من خلقه إلى يوم القيامة، وساعتها أخذ علينا العهد،
قال تعالى:
"وَإِذْ أَخَذَ رَبُّكَ مِن بَنِي آدَمَ مِن ظُهُورِهِمْ ذُرِّيَّتَهُمْ وَأَشْهَدَهُمْ عَلَى أَنفُسِهِمْ أَلَسْتُ بِرَبِّكُمْ قَالُواْ بَلَى شَهِدْنَا أَن تَقُولُواْ يَوْمَ الْقِيَامَةِ إِنَّا كُنَّا عَنْ هَذَا غَافِلِينَ" 《الأعراف آية (172)》
فالأرواح أهه مخلوقة، أما الأجساد فهي خُلقت وتكونت على هيئة أَجِنة في بطون أمهاتنا 👌
فلما يتكون الجنين في رحم الأم ويوصل عمره مائة وعشرين يوم، ربنا يرسل مَلك فينفخ الروح في الجنين ده👌
☆إللي عايز يعرف تفاصيل موضوع خلق الروح قبل الجسد هيلاقي الموضوع بالتفصيل في كتاب:
《لوامع الأنوار البهية وسواطع الأسرار الأثرية》
احنا إللي يهمنا من كل ده دلوقتي إن في روح دخلت الجسد وعاش الإنسان حياته بروح وجسد، وبعدين هييجي يوم وتخرج الروح من الجسد وتبدأ رحلتها في عالم البرزخ زي ما شرحنا كده👌

💠السؤال الثاني:
إيه هي ظاهرة: دَيْجَا فُو (Déjà vu ) وإيه تفسيرها في الإسلام🤔

🔅شوفوا،
مش ساعات بتحصل معانا مواقف ولما بنشوف المواقف دي بنحس إن الموقف ده حصل معانا قبل كده وإن مش دي أول مرة نعيش الموقف ده؟
أهه الظاهرة دي اسمها:
دَيْجَا فُو (Déjà vu) وهي كلمة فرنسية تعني "شُوهد من قبل"
الظاهرة دي ملهاش أي تفسير عندنا في الشريعة الإسلامية،
يعني معندناش نص من القرآن أو السنة بيوضح سبب إللي بيحصل ده، ولا حتى تكلم في الأمر أي أحد من علماء الإسلام،
فالله أعلم بحقيقة الأمر،
ولو كان في معرفتنا للأمر خير ، أو كان الموضوع ده مهم؛ كان ربنا أخبرنا بيه💁‍♂️
ولعل الموضوع متعلق بأمر الروح والله أعلم يعني وكده كده احنا منعرفش كتير عن الروح😅
إللي اتكلم في الظاهرة دي هم علماء النفس وعلماء الأعصاب،
وغيرهم من أصحاب المعتقدات الدينية المنحرفة،
وطبعا هنا أنا مش بناقش الظاهرة دي،
أنا بس حبيت أنبه على معلومة ممكن تكون محيرة بعض الناس😁

💠السؤال الثالث:
إيه حكاية تناسخ الأرواح دي《 reincarnation》🤔

🔅تناسخ الأرواح معناه إن الجسد إذا مات؛ الروح تنتقل منه إلى جسد آخر ، تسعد فيه أو تشقى نتيجة ما قدمته من عمل ، وتفضل كده تنتقل من جسد إلى جسد،
وطبعا الكلام ده بااااطل، والإيمان والتصديق بتناسخ الأرواح؛ أعظم الكفر بالله تعالى وبكتبه ورسله 👌
يا جماعة كل مخلوق له روح خاصة بيه، مفيش حاجة اسمها إن الروح تخرج من جسد واحد وتقوم داخلة في جسد حد تاني سواء بشر أو حيوان أو يحصل تبادل أرواح،

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الرابعة_عشر
#علامات_الساعة_الصغرى
#الجزء_السابع_وهم_في_غفلة_معرضون

في القرن السابع الهجري سنة ستمائة وأربع وخمسين للهجرة
حصل زلزال شديد جدا للأرض في المدينة وما حولها،
واستمر الزلزال ده من ليلة الأربعاء لحد يوم الجمعة، لدرجة إن الناس إللي كانوا في المسجد النبوي كانوا بيسمعوا صوت الحديد إللي في منبر رسول الله ﷺ من شدة الزلزلة،
وكانت الزلزلة دي لها صوت زي صوت الرعد القاصف، وطبعا الناس كانوا في قمة الرعب😶
وبعد الزلزلة دي ظهرت نار كبيرة جدا قريبة من دِيار بني قريظة قُرب المدينة،
الناس إللي كانوا داخل المدينة كانوا شايفين النار دي كأنها عندهم داخل المدينة،
والنار كانت عظيمة ومرتفعة جدا في السماء النار لدرجة إن الناس في مدينة بُصرى إللي في الشام شافوا ظل النار دي، وبُصرى هي مدينة حُوران حاليا في سُوريا،
وبقى في أودية تسيل بالنار والجبال بقت تسيل نار باتجاه المدينة،
انت أكيد شوفت البراكين لما بتفور وتسيل بتعمل إيه في الصخور والجبال والأرض👌
أهه إللي حصل ده كان فوران بركاني في منطقة الحَرّة وهي منطقة مليئة بالتكوينات البركانية السوداء،
والصخور البركانية دي اتكونت بسبب الأنشطة البركانية القديمة،
والنار الكبيرة بقى يَسِيل منها أودية من نيران واتجهت ناحية المدينة وأهل المدينة فزعوا منها جدا ومبقوش عارفين يعملوا إيه،
ومع النار دي حصل كسوف للشمس وبعدها خسوف للقمر،
يعني آيات وراء بعضها والناس خايفة،
فبدأ الناس يتوبوا ويتركوا المعاصي، ويدعون الله عزوجل،
ويتقربوا إليه بالطاعات،
ودخل أهل المدينة إلى المسجد النبوي مستغفرين تائبين إلى ربهم، وبات الناس بين مصلٍّ وتالٍ للقرآن، وراكع وساجد،
واستمر ثوران البركان والنار المشتعلة ثلاثة أشهر وبعدين النار دي انطفأت،
أهه إللي حصل ده هو علامة من علامات الساعة الصغرى إللي أخبر عنها رسول الله ﷺ في الحديث:
"لا تقوم الساعة حتى تخرج نار من أرض الحجاز، يُضيء لها أعناق الإِبل ببُصرى"
《رواه البخاري ومسلم》
وقال في حديث تاني:
"لا تقوم الساعة حتى تخرج نار من رُومان أو رَكُوبة يُضيء منها أعناق الإبل بِبُصرى"
《رواه الطبراني في المعجم الكبير》

وتكلم عن العلامة دي علماء كثير، زي الإمام النووي والإمام القرطبي وابن كثير وغيرهم،
وكل مَن ذَكر النار دي من المؤرخين والعلماء؛ يقول في آخر كلامه: ولا أقدر أشرح وصفها على الكمال،
يعني مع كل الوصف إللي وصفوه مش قادرين يعبروا النار دي عاملة إزاي من شدتها والأهوال إللي كانت فيها👌
طبعا وَصْف العلماء فيها كثير جدا مش هقدر أقوله كله، أنا قلت لك المختصر المفيد، انت ممكن تبقى ترجع لكلام العلماء لو حبيت.

تخيل بقى إن بعد ما رسول الله ﷺ قال إن هيحصل النشاط البركاني ده قبل قيام الساعة، وفعلا يتحقق ما قاله بعدها بستمائة سنة؛
ييجي واحد ويتجرأ ويُكذّب رسول الله ﷺ ويقول إنه مش رسول وإن هو إللي اخترع الدين وإن مفيش حاجة اسمها إله😑
يعني بالعقل، هو في كذبة ممكن تقعد أكثر من ألف وأربعمائة سنة؟!!
طيب والحاجات إللي قال إنها هتحصل وفعلا حصلت سواء في الزمن الماضي أو في الحاضر والكل شايفها بعينه، ده غير إللي لسه هيحصل في المستقبل؛ كل ده برده صدفة أو كذب🙄
"وَجَحَدُوا بِهَا وَاسْتَيْقَنَتْهَا أَنْفُسُهُمْ ظُلْمًا وَعُلُوًّا"
《النمل آية(14)》
الباحث عن الحق يكفيه دليل، وإللي عايز يمشي وراء هواه مش هتكفيه كل الأدلة على وجه الأرض 👌
"أَرَأَيْتَ مَنِ اتَّخَذَ إِلَٰهَهُ هَوَاهُ أَفَأَنتَ تَكُونُ عَلَيْهِ وَكِيلًا"
《الفرقان آية(43)》

☆ملحوظة مهمة عشان ميحصلش لخبطة،
النار إللي خرجت في أرض الحجاز دي، غير النار إللي هتخرج في آخر الزمان وهتقود الناس إلى أرض المحشر،
دي حاجة ودي حاجة تانية خالص، النار التانية دي هتخرج من قعر عدن في اليمن وهي من علامات الساعة الكبرى وهتعرفها بالتفصيل إن شاء الله لما ييجي وقتها👌

بعد العلامة دي بأربع سنين؛ حصلت علامة ثانية من علامات الساعة الصغرى، وهي《قتال التُّرك》

◇سمعت عن المغول؟
ناس كده عنيهم ضيقة ووجوههم حمراء وأنوفهم صغيرة وغليظة، ووجوههم مبطّطة وعريضة زي التِّرس إللي طُرق عليه بالحديد؟
أهه الناس دي اسمهم التُّرك،
خد بالك، بقول التّرك مش الأتراك إللي عايشين في تركيا في زمننا دلوقتي، في فرق بين الاتنين👌
قال رسول الله ﷺ:
" لَا تَقُومُ السَّاعَةُ حَتَّى تُقَاتِلُوا التُّرْكَ صِغَارَ الْأَعْيُنِ حُمْرَ الْوُجُوهِ ذُلْفَ الْأُنُوفِ كَأَنَّ وُجُوهَهُمْ الْمَجَانُّ الْمُطْرَقَةُ ، وَلَا تَقُومُ السَّاعَةُ حَتَّى تُقَاتِلُوا قَوْمًا نِعَالُهُمْ الشَّعَرُ"

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الرابعة_والعشرون
#علامات_الساعة_الكبرى_الجزء_التاسع
#طلوع_الشمس_من_مغربها_وخروج_الدابة

"طُوبَى لِعَيْشٍ بَعْدَ الْمَسِيحِ"《صحيح الجامع》
كلمة قالها رسول الله ﷺ لوصف المعيشة والحياة بعد نزول عيسى عليه السلام ومقتل الدجال ومقتل يأجوج ومأجوج،
ومعناها ما أطيب وأجمل العيش بعد انتهاء الفتن دي كلها، أو بالعامية كده يا بخت إللي هيعيش بعد حكم المسيح،
لأن الفترة إللي فاتت من قبل حتى خروج الدجال كانت كلها قحط وابتلاءات،
فبعد ما خلاص اتخلصوا من الدجال ويأجوج ومأجوج هيبدأ حكم عيسى عليه السلام وتبدأ مهمته في تحكيم شريعة الإسلام؛ فيكسر الصليب ويقتل الخنزير ويضع الجزية، زي ما قلت المرة إللي فاتت، وهنا بقى ربنا هيأمر الأرض إنها تُخرِج بركاتها،
فتبدأ الأرض تُنبِت بسرعة وبكثرة لدرجة إن لو حد رمى بذر على جبل الصفا، يعني أرض الجبل هتنبت وتطلع ثمار،
قال رسول الله ﷺ:
"حتى لو بذرْتَ حَبَّكَ على الصفَا لنَبَتَ"《صحيح الجامع》

والثمار إللي هتطلع من الأرض بصفة عامة هتكون مختلفة عن أي مرة طلعت فيها قبل كده،
يعني الثمرة الواحدة حجمها هيبقى كبير جدا لدرجة إنها تكفي مجموعة من الناس،
هقول لك مثال: شايف الرّمان حجمه بيكون صغير إزاي والواحدة مبتكفيش فرد واحد؟!
في الوقت ده بقى الرمانة الواحدة هتكفي مجموعة أفراد،
ومش بس كده؛ ده هيستظلوا بالقشرة الخارجية بتاعتها!!
قال رسول الله ﷺ:
"ثم يقالُ للأرضِ: أنبِتي ثمرتَكِ، وردِّي برَكَتَكِ، فيومئذٍ تأكلُ العصابةُ منَ الرِّمَّانةِ، فتُشبعُهُم، ويستظلُّونَ بقِحفِها"
《صحيح ابن ماجه》

وعنقود العنب الواحد يكفي مجموعة من الناس،
عنقود العنب إللي ممكن تخلصه في قاعدة وبتبقى عايز غيره،
فتخيل حجم عنقود العنب هيبقى عامل إزاي👌
ومش بس كده ده الحيوانات نفسها هتسمن ويفيض لبنها وهينتهي الرعي؛ لأن مفيش حد محتاج للرعي أصلا؛ لأن الخير منتشر في الأرض كلها،
قال رسول الله ﷺ:
"ويبارِكُ اللَّهُ في الرِّسْلِ{يعني اللبن}حتَّى إنَّ اللِّقحةَ منَ الإبلِ
{يعني النَّاقَةَ ذاتَ اللَّبَنِ} تَكْفي الفِئامَ منَ النَّاسِ،
{يعني تكفي مجموعة كبيرة من الناس}
واللِّقحةَ منَ البقرِ تَكْفي القبيلةَ، واللِّقحةَ منَ الغنمِ تَكْفي الفخِذَ
{والفخذ هنا معناها هم الأقارِبُ الذين يَنتسِبون إلى جَدٍّ قريب}《صحيح مسلم》

وهيفيض المال لدرجة إن الواحد ييجي يطلع صدقة ميلاقيش حد ياخدها من كثرة الخير إللي الناس فيه،
قال رسول الله ﷺ:
"وَاللَّهِ لَيَنْزِلَنَّ ابْنُ مَرْيَمَ حَكَمًا عَادِلًا ، فَلَيَكْسِرَنَّ الصَّلِيبَ ، وَلَيَقْتُلَنَّ الْخِنْزِيرَ ، وَلَيَضَعَنَّ الْجِزْيَةَ ،
وَلَتُتْرَكَنَّ الْقِلَاصُ{يعني الإبل القوية} فَلَا يُسْعَى عَلَيْهَا ، وَلَتَذْهَبَنَّ الشَّحْنَاءُ وَالتَّبَاغُضُ وَالتَّحَاسُدُ ، وَلَيَدْعُوَنَّ إِلَى الْمَالِ فَلَا يَقْبَلُهُ أَحَدٌ"
《صحيح مسلم》
ودي علامة من العلامات الصغرى إللي حصلت في زمن عمر بن عبد العزيز وقلت لك إنها هتحصل تاني في آخر الزمان وده وقتها،
ده غير الأمان إللي هينتشر بين الناس كلهم وكمان بين الحيوانات المفترسة وبين الناس،
يعني الذئب هيرعى مع الغنم عادي كأنه كلبها إللي بيحرسها، والأسُود تعيش وسط الناس،
والأطفال هيلعبوا مع الثعابين لدرجة إن الطفل يضع يده في فم الثعبان فلا يؤذيه؛ لأن ربنا هيكون نزع منها سمومها،
قال رسول الله ﷺ:
"وَتَقَعُ الْأَمَنَةُ فِي الْأَرْضِ ،حَتَّى يَرْعَى الْأَسَدُ مَعَ الْإِبِلِ ، وَالنَّمِرُ مَعَ الْبَقَرِ ، وَالذِّئَابُ مَعَ الْغَنَمِ ، وَتَلْعَبُ الصِّبْيَانُ بِالْحَيَّاتِ لَا يَضُرُّ بَعْضُهُمْ بَعْضًا" 《أخرجه أبو داود في سننه》

وربنا هينزع الكُره من بين الناس ومش هيبقى في شحناء ولا بغضاء بينهم،
ومش هيبقى في الأرض غير عبادة الله ومش هيبقى في شرك وطبعا مش هيكون في حروب؛ لأن الحرب أو الجهاد كان عشان نشر الدين، لكن دلوقتي كل الناس مؤمنين ومفيش بينهم مشاكل فمفيش أي داعي للحرب وهو ده السلام العالمي،
يعني تقدر تقول إنها جنة مُصغّرة على الأرض في الوقت ده، ولو انت عشت لحد ما تقابل عيسى عليه السلام؛ وصّل له السلام من رسول الله ﷺ، قال رسول الله ﷺ:
"من أدرك منكم عيسى ابن مريم فليقرأه مني السلام"
《إسناده صحيح》
وسيحج عيسى عليه السلام و يعتمر بعد قتله للدجال واستقرار الأمور، قال رسول الله ﷺ:
"وَالَّذِي نَفْسِي بِيَدِهِ، لَيُهِلَّنَّ ابْنُ مَرْيَمَ بِفَجِّ الرَّوْحَاءِ ، حَاجًّا أَوْ مُعْتَمِرًا، أَوْ لَيَثْنِيَنَّهُمَا" 《صحيح مسلم》
والرّوْحَاء مكان بين المدينة ووادي الصفراء في طريق مكة.

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الرابعة_والثلاثون
#المرحلة_الثالثة_اليوم_الآخر
#الأحداث_في_أرض_المحشر_الجزء_السادس
#بَعث_النار_وتطاير_الصُّحُف

اتكلمنا المرة إللي فاتت عن حساب الحيوانات والقصاص بينهم، أما البشر فحسابهم مختلف،
يوم القيامة في وسط الأهوال إللي الناس شايفاها ينادي الله عز وجل يوم القيامة على آدم عليه السلام والخلق يسمعون ويقول له:
"يا آدَمُ،
أخْرِجْ بَعْثَ النَّارِ،
فيقول آدم عليه السلام: وما بَعْثُ النَّارِ؟
فيقولَ الله عز وجل:
"مِن كُلِّ ألْفٍ تِسْعَ مِئَةٍ وتِسْعَةً وتِسْعِينَ،
فَعِنْدَهُ يَشِيبُ الصَّغِيرُ، وتَضَعُ كُلُّ ذاتِ حَمْلٍ حَمْلَها، وتَرَى النَّاسَ سُكارَى وما هُمْ بسُكارَى، ولَكِنَّ عَذابَ اللَّهِ شَدِيدٌ"
《صحيح البخاري》
يعني ربنا بيقول لآدم عليه السلام إنه يُمَيِّزْ أَهْلَ النَّارِ مِنْ غَيْرهمْ،
يعني إنه يُخرج من ذريته أهل النار إللي هيدخلوها،
فيسأل آدم عليه السَّلامُ ربنا عن عددهم ومِقدارُهم؟ فيَقولُ الله إن من كل أَلْفٍ هينجو واحد فقط والتِسْعَ مئةٍ وتِسْعةً وتِسعينَ هيدخلوا النار،
فلما الخلق يسمعوا الكلام ده في اللحظة دي يَشِيبُ الصَّغيرُ مِن شِدَّةِ الهَولِ؛ وبيحصل الشيب لأنَّ الهمَّ يُضْعِف القوِيَّ ويُسرِعُ بالشَّيبِ،
وعادي يكون في أطفال ساعتها لأنَّ كلَّ أحدٍ يُبعَثُ على ما ماتَ عليه، فيُبعَثُ الطِّفلُ طِفلًا،
والمرأة إللي ماتت وهي حامل تُبعث حامل، فلما تسمع عن بعث النار تضع حملها من الفزع،
وعامة الناس هيكونوا مَشْدُوهين مذهولين وكأنهم سُكَارى عقولهم غائبة عن الوعي من شدة هَولِ الموقفِ والحِسابِ👌

الصحابة رضي الله عنهم لما سمعوا من رسول الله ﷺ عن بعث النار اشتد عليهم الأمر وقالوا:
يا رَسولَ اللَّهِ، وأَيُّنا ذلكَ الواحِدُ؟
يعني مين الواحد إللي هينجو ده، فقال لهم:
"أبْشِرُوا؛ فإنَّ مِنكُم رَجُلًا، ومِنْ يَأْجُوجَ ومَأْجُوجَ ألْفًا"
《صحيح البخاري》
يعني متقلقوش، الواحد ده هو إللي هينجو من المؤمنين، أما باقي الألف فهيكونوا من يأجوج ومأجوج، واحنا شرحنا قصة يأجوج و مأجوج في علامات الساعة الكبرى لو تفتكروا،
ثُمَّ قالَ لهم رسول اللهﷺ:
"والذي نَفْسِي بيَدِهِ، إنِّي أرْجُو أنْ تَكُونُوا رُبُعَ أهْلِ الجَنَّةِ،
فَكَبَّر الصحابة،
فقالَ: أرْجُو أنْ تَكُونُوا ثُلُثَ أهْلِ الجَنَّةِ، فَكَبَّر الصحابة،
فقالَ: أرْجُو أنْ تَكُونُوا نِصْفَ أهْلِ الجَنَّةِ، فَكَبَّر الصحابة،
فقالَ: ما أنتُمْ في النَّاسِ إلَّا كالشَّعَرَةِ السَّوْداءِ في جِلْدِ ثَوْرٍ أبْيَضَ. أوْ كَشَعَرَةٍ بَيْضاءَ في جِلْدِ ثَوْرٍ أسْوَدَ."
《صحيح البخاري》

يعني رسول الله ﷺ بيُقسم بالله ويقول لهم إنه يرجو من الله إن أهل الإسلام والإيمان يكونوا ربع أهل الجنة،
فكَبَّرَ الصَّحابةُ رَضيَ اللهُ عنهم فرحا بالبِشارةِ العَظيمةِ دي، وكل ما زادهم رسول الله ﷺ في العدد كانوا يكبّروا،
ورسول الله ﷺ كان بيتدرج مع الصحابة في العدد عشان يستثير فرحتهم.
فكده النسبة النهائية لأمة رسول الله ﷺ ممَّن أجابُوه وآمَنوا به
هي إنهم هيكونوا نص أهل الجنة مقارنة بالمؤمنين من الأمم السابقة،
وبعدين رسول الله ﷺ قال لهم إن عددهم بالنسبة للأمم السابقة مؤمنهم وكافرهم زي الشعرة البيضاء في جلد الثور الأسود،
يعني عدد قليل جدا👌

☆ملحوظة:
في الحديث إللي قلناه ده رسول الله ﷺ تمنى من الله إن نصف أهل الجنة يكونوا من المؤمنين من أمته،
فأعطاه الله عز وجل رجاءه وزاده العدد وأصبح العدد النهائي للمؤمنين هو ثلثين أهل الجنة زي ما هنشوف بعدين إن شاء الله 👌

يبدأ بقى حساب البشر،
وحساب البشر يوم القيامة فيه تفصيل، فأول مرحلة من مراحل الحساب هو《العرض على الله》،
وده معناه بصفة عامة عَرض الخلائق على ربهم عز وجل وصحائفهم ظاهرة له لا تخفى عليه منهم خافية،
زي كده ولله المثل الأعلى لما يكون مدير المدرسة واقف والطلبة بيعدوا من أمامه وهو معاه ملف لكل واحد فيهم مكتوب فيه أعماله خلال السنة الدراسية كلها فبيشوف بقى كل واحد فيهم والملف بتاعه،
فالعباد كلهم هيتعرضوا على ربنا سواء إللي هيتحاسب منهم ويتناقش الحساب أو حتى إللي مش هيتحاسب،
طبعا العباد في اللحظة دي مش فاكرين أعمالهم أصلا،
يعني هم لما بيُبعثوا من قبورهم بيكونوا خارجين وهم مش فاكرين حاجة من أعمالهم إللي عملوها في حياتهم الدنيا،
ربنا بيقول:
"يَوْمَ يَبْعَثُهُمُ اللَّهُ جَمِيعًا فَيُنَبِّئُهُم بِمَا عَمِلُوا أَحْصَاهُ اللَّهُ وَنَسُوهُ"《سورة المجادلة آية(6)》
فكل حاجة متسجلة عليهم👌

وبعد العرض، هيحصل《تَطَايُر الصحف》
وده معناه:
تطاير الصحائف إللي مكتوب فيها كل أعمال العباد صغيرها وكبيرها و انتشارها في أرض المحشر وتوزيعها ليصل كل كتاب إلى صاحبه.
تخيل بلايين الكتب تطير😳

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الرابعة_والأربعون
#المرحلة_الثالثة_اليوم_الآخر
#الأحداث_في_أرض_المحشر_الجزء_السادس_عشر
#الميزان_الجزء_الثاني_أعمال_تُثقل_الميزان

اتكلمنا المرة إللي فاتت عن الميزان وعرفنا إيه هي الأعمال إللي تنسف الحسنات وتكون سبب في أن يخف الميزان يوم القيامة، في بقى أعمال بتثقل الميزان يوم القيامة، ومنها:

1️⃣التسبيح والتحميد والتهليل والتكبير:
يعني إنك تقول سبحان الله والحمد لله ولا إله إلا الله والله أكبر،
قال رسول الله ﷺ:
"التَّسبِيحُ نِصفُ المِيزانِ، والحمدُ للهِ يَملؤُهُ، والتَّكبِيرُ يَملأُ ما بين السماءِ والأرضِ"《حديث حسن》
يعني لما تقول سبحان الله يبقى انت كده ملأت نص الميزان، ولما تقول الحمد لله يبقى انت ملأت الميزان كله،
وخليني بس أفكرك بحجم الميزان وإنه لو وضع فيه السماوات والأرض لوسعهم، فتخيل ثقل سبحان الله والحمد لله في الميزان أد إيه👌
ولما تقول الله أكبر فإن أجرك هيكون بحجم المساحة إللي بين السماء والأرض،
وفي حديث تاني لرسول الله ﷺ يقول فيه:
"كَلِمَتانِ خَفِيفَتانِ علَى اللِّسانِ، ثَقِيلَتانِ في المِيزانِ، حَبِيبَتانِ إلى الرَّحْمَنِ: سُبْحانَ اللَّهِ وبِحَمْدِهِ، سُبْحانَ اللَّهِ العَظِيمِ"
يعني رسول الله ﷺ بيقول إن ذكر سُبْحانَ اللَّهِ وبِحَمْدِهِ، سُبْحانَ اللَّهِ العَظِيمِ ده من الأذكار السهلة الخفيفة على اللسان ويقولها بكل سهولة ويُسر، ولكنه في نفس الوقت فهو ذكر يحبه الله عز وجل ويثقل ميزان العبد يوم القيامة،
وهنا رسول الله ﷺ قال الرحمن عشان يبين لنا سعة رحمة الله وإزاي إنه بيكافئ العبد بالجزاء العظيم على العمل اليسير👌
رسول الله ﷺ بيقولك:
"سَبَقَ المُفَرِّدُونَ وهم الذَّاكِرُونَ اللَّهَ كَثِيرًا، وَالذَّاكِرَاتُ"
《صحيح مسلم》
يعني إللي بيذكر ربنا كتير هو ده إللي سبق ونال الدرجات العالية من الجنة، وده يبين لك دقة الميزان، يعني حتى كلمة سبحان الله دي بتتحط لك في الميزان،
ومش بس الكلمة، ده لو حاجة في حجم حبة الخردل أو حجم الذرة سواء كانت خير أو شر فربنا هيضعها لك في الميزان👌
فانت مستني إيه بقى😬
قل وردد دائما:
سُبْحانَ اللَّهِ وبِحَمْدِهِ، سُبْحانَ اللَّهِ العَظِيمِ.
سبحان الله والحمد لله ولا إله إلا الله والله أكبر.
متضيعش وقت، انت يوم القيامة هتكون محتاج لمثقال الذرة من الحسنات👌

☆انت ممكن تسأل ليه يعني الأجر بيكون عظيم كده مع إن العمل يعتبر بسيط🤔
والإجابة هي لأن أصلا الأعمال الصالحة والتكاليف الشرعية بتكون ثقيلة على النفس؛ لأنها عكس هواها حتى لو عمل صالح بسيط زي الذِّكر،
بمعني إن النفس بتحس بمرارة عمل الأعمال الصالحة في الدنيا، وده بعكس المعاصي إللي لذتها بتكون حاضرة في نفس لحظة ارتكاب المعصية،
يعني الأغاني سهلة، لكن صلاة الفجر ثقيلة، فالقيام لصلاة الفجر شاق على النفس،
فانت بتحس بثقل الحسنة، لكن حلاوة الحسنة متأجلة ليوم القيامة، وحتى حلاوة الطاعة في الدنيا الواحد مش بيحسها على طول، بيحتاج مجاهدة شوية، وكمان ثواب الحسنة لسه لم يأتِ وقته بعد،
أما السيئة بالعكس، بتستمتع بالسيئة في نفس اللحظة، لكن مرارة الحساب والعقاب عليها متأخر ليوم القيامة،
فالنفس تميل إللي اللذة العاجلة عشان كده تلاقيها تقع في المعاصي بسهولة،
فاللي يقاوم لذته العاجلة ويجاهد نفسه على الطاعة ولو بذكر بسيط كان من كرم الله ورحمته إنه يكافئه بعظيم الأجر👌
وقال أحد التابعين:
"إن الحسنة حضَرت مرارتها وغابت حلا‌وتها؛ فلذلك ثَقُلت على النفس، فلا‌ يَحملنَّك ثِقَلها على ترْكها،
والسيئة حضَرت حلا‌وتها وغابَت مرارتها؛ فلذلك خفَّت، فلا‌ تَحملنَّك خِفتها على ارتكابها"

2️⃣الولد الصالح يتوفى للمرء المسلم فيحتسبه:
يعني لو كان عندك ابن صالح وربنا ابتلاك بموته وانت احتسبته يعني ادخرت الأجْرَ والثَّوابَ عِندَ اللهِ عزَّ وجلَّ وانت راضي؛ ثقَلَ ميزانك يوم القيامة،
قال رسول الله ﷺ:
"بخٍ بخٍ وأشار بيدِه لخمسٍ 🖐 ما أثقلَهنَّ في الميزانِ:
سبحانَ اللهِ والحمدُ للهِ ولا إلهَ إلَّا اللهُ واللهُ أكبرُ، والولدُ الصَّالحُ يُتوَفَّى للمرءِ المسلمِ فيحتسِبُه"《إسناده صحيح أو حسن》

3️⃣حُسْن الخُلق:
قال رسول الله ﷺ:
"ما شيءٌ أثقلُ في ميزانِ المؤمِنِ يومَ القيامةِ مِن خُلُقٍ حسَنٍ، فإنَّ اللَّهَ تعالى ليُبغِضُ الفاحشَ البَذيءَ"
《صحيح الترمذي》
يعني رسول الله ﷺ بيقول إن مفيش حاجة أعظم في الثواب والأجر في صَحيفةِ العبْدِ وتثقّل له ميزانه زي حُسن الخُلق؛
وده لأن حسن الخلق هو تطبيقٌ عَمليٌّ لأوامرِ اللهِ تعالى ورسولِه ﷺ.

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الرابعة_والخمسون
#المرحلة_الثالثة_اليوم_الآخر
#الشفاعة_المقبولة_والشفاعة_المردودة_يوم_القيامة_الجزء_الرابع
#شفاعة_الملائكة_وأسباب_الحصول_على_الشفاعة

اتكلمنا المرة إللي فاتت عن شفاعة رسول الله ﷺ وعن الناس إللي هتشفع معاه،
وقلنا إن من ضمن الشفعاء إللي هيشفعوا في المذنبين الموحدين بعد ما يأذن لهم الله عز وجل؛ هم الملائكة👌

والملائكة زي ما كلنا عارفين هم خلق عظيم من مخلوقات الله، ربنا خلقهم من نور وأعطاهم قوة وقدرات عظيمة جدا، يعني مثلا يقدروا يتحركوا بسرعة شديدة جدا، ففي لحظة كان ينزل الوحي من السماء،
قَالَ رَسُولُ اللَّهِ ﷺ:
"خُلِقَتِ الْمَلَائِكَةُ مِنْ نُورٍ وَخُلِقَ الْجَانُّ مِنْ مَارِجٍ مِنْ نَارٍ وَخُلِقَ آدَمُ مِمَّا وُصِفَ لَكُمْ"《رواه مسلم》
وهم عندهم أجنحة، ولكنهم غير متساويين في القوة أو في عدد الأجنحة،
فأقواهم وأعظمهم وأكثرهم أجنحة هو جبريل عليه السلام👌

وبيقدروا يتشكلوا بأشكال غير أشكالهم الحقيقة،
وانت كنت شوفت ده واحنا بنتكلم في قصص الأنبياء في قصة إبراهيم عليه السلام لما جاءه الملائكة الثلاثة في هيئة بشر وبعدها راحوا لقوم لوط،
وكمان لما تجسد ملك الموت في هيئة بشر وراح لموسى عليه السلام، ولما تجسد جبريل في هيئة بشر وذهب إلى مريم عليها السلام، وغيرها من الأمثلة👌

وهم لهم أسماء لكن احنا منعرفش أسماء كل الملائكة،
جاء في القرآن والسنة بعض أسمائهم زي مثلا جبريل وميكائيل وهاروت وماروت،
وأعداد الملائكة لا يعلمها إلا الله عز وجل وهم لا بيتعبوا ولا بيملوا من عبادة وذكر ربنا ولا يعصون أوامر ربنا أبدا🙅
وهم لا يأكلون ولا يشربون وشكلهم جميل جدا،
ومينفعش نصفهم بالذكورة ولا بالأنوثة؛ لأن ربنا قال في القرآن إنهم ليسوا إناثا وإللي يقول إنهم إناث يكفر لأنه كده بيكذب صريح القرآن🤷
قال تعالى:
"وَجَعَلُوا الْمَلائِكَةَ الَّذِينَ هُمْ عِبَادُ الرَّحْمَنِ إِنَاثًا أَشَهِدُوا خَلْقَهُمْ سَتُكْتَبُ شَهَادَتُهُمْ وَيُسْأَلُونَ"《سورة الزخرف آية(19)》
وبرده مينفعش نقول عليهم ذكور لأن مفيش نص صريح بكده، احنا بس نقول إنهم خلق من مخلوقات الله معصومون من الوقوع في المعاصي👌
وهم من عالم الغيب إللي احنا لازم نؤمن بيه، والإيمان بالملائكة ركن من أركان الإيمان الستة:
《الإيمان بالله وملائكته وكتبه ورسله واليوم الآخر وبالقدر خيره وشرّه》
واحنا منعرفش تحديدا ربنا خلق الملائكة امتى، بس هم مخلوقين من قبل البشر، والدليل على كده إن ربنا قال لهم إنه هيجعل في الأرض خليفة قبل ما يخلق آدم عليه السلام👌

أهه الملائكة العظيمة دي مش بس هتشفع يوم القيامة للمذنبين الموحدين؛ دول حتى في حياتنا الدنيا دلوقتي بيستغفروا للمؤمنين، يعني بيدعوا ربنا إنه يغفر للمؤمنين ذنوبهم إللي وقعوا فيها وإنه يتجاوز عنه ويدخلهم الجنة وينجيهم من عذاب النار👌
قال تعالى:
"الَّذِينَ يَحْمِلُونَ العَرْشَ وَمَنْ حَوْلَهُ يُسَبِّحُونَ بِحَمْدِ رَبِّهِمْ وَيُؤْمِنُونَ بِهِ وَيَسْتَغْفِرُونَ لِلَّذِينَ آَمَنُوا رَبَّنَا وَسِعْتَ كُلَّ شَيْءٍ رَحْمَةً وَعِلْمًا فَاغْفِرْ لِلَّذِينَ تَابُوا وَاتَّبَعُوا سَبِيلَكَ وَقِهِمْ عَذَابَ الجَحِيمِ ۩
رَبَّنَا وَأَدْخِلْهُمْ جَنَّاتِ عَدْنٍ الَّتِي وَعَدْتَهُمْ وَمَنْ صَلَحَ مِنْ آَبَائِهِمْ وَأَزْوَاجِهِمْ وَذُرِّيَّاتِهِمْ إِنَّكَ أَنْتَ العَزِيزُ الحَكِيمُ ۩
وَقِهِمُ السَّيِّئَاتِ وَمَنْ تَقِ السَّيِّئَاتِ يَوْمَئِذٍ فَقَدْ رَحِمْتَهُ وَذَلِكَ هُوَ الفَوْزُ العَظِيمُ"《سورة غافر آية(7-9)》

انت بقى ممكن تستغرب وتسأل هو ليه الملائكة العظيمة دي صاحبة المكانة العالية عند ربنا شاغلين نفسهم بالاستغفار للمؤمنين في الدنيا وهيبشروهم لما يقابلوهم بعد البعث، وكمان هيشفعوا في العصاة منهم يوم القيامة🤔

¤أولا:
ده بسبب الرابطة إللي بين الملائكة وبين المؤمنين في الأرض وهي رابطة الإيمان بالله عز وجل👌
يعني هم الاتنين بيؤمنوا بالله والمؤمنون من البشر بيجاهدوا أنفسهم عشان يطيعوه، والملائكة عارفة طبيعة البشر وضعفهم، وعارفين طُرق الشياطين عشان يضلوهم،
فمع كل ده يجاهد المؤمنون أنفسهم عشان يفضلوا على الإيمان وعلى طريق ربنا،
فهم يحبوا الخير للمؤمنين وعايزين ربنا يثيبهم على أعمالهم فبيستغفروا لكل أهل الإيمان وهيشفعوا في المذنبين منهم حتى لو كانوا من أصحاب الكبائر👌

¤ثانيا:
استغفار الملائكة للمؤمنين وشفاعتهم لهم《تجري مجرى اعتذار عن ذَلَّة سبقت》👌
يعني إيه🤨
فاكر لما قلنا في قصص الأنبياء قبل خلق آدم إن ربنا قال للملائكة إنه هيجعل خليفة في الأرض؟

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الرابعة_والستون
#المرحلة_الثالثة_اليوم_الآخر
#وصف_الجنة_والنار_الجزء_الثامن
#أنهار_وعيون_الجنة

قلنا المرة إللي فاتت إنك هتشوف حاجة هي من أجمل وأعجب الحاجات إللي هتشوفها في الجنة وإللي لا تُذكَر الجنة وإلا ويُذكَر معها الحاجة دي👌
والحاجة دي هي أنهار الجنة😊
وانت بتقرأ آيات القرآن هتلاحظ إن كل ما ربنا بيكلمنا عن الجنة وبيوصفها لنا في القرآن؛ هتلاقيه بيقول لنا معاها إنها تجري من تحتها الأنهار، حوالي خمسة وثلاثين مرة في القرآن جاء ذكر:
《جنات تجري من تحتها الانهار》،
يعني مثلا ربنا قال:
"وَبَشِّرِ الَّذِين آمَنُواْ وَعَمِلُواْ الصَّالِحَاتِ أَنَّ لَهُمْ جَنَّاتٍ{تَجْرِي مِن تَحْتِهَا الأَنْهَارُ}"《البقرة آية( 25)》
وقال:
"أُوْلَـئِكَ جَزَآؤُهُم مَّغْفِرَةٌ مِّن رَّبِّهِمْ وَجَنَّاتٌ{تَجْرِي مِن تَحْتِهَا الأَنْهَارُ}"
《آل عمران آية(136)》
وقال:
"تِلْكَ حُدُودُ اللّهِ وَمَن يُطِعِ اللّهَ وَرَسُولَهُ يُدْخِلْهُ جَنَّاتٍ{تَجْرِي مِن تَحْتِهَا الأَنْهَارُ} خَالِدِينَ فِيهَا وَذَلِكَ الْفَوْزُ الْعَظِيمُ"
《النساء آية(13)》
وغيرها وغيرها من الآيات، فكل ده يدل على إن أنهار الجنة عظيمة وجميلة جدا وأكيد مختلفة عن أنهار الدنيا😅

ولو بصيت لوصف الأنهار دي هتلاقي إن أول اختلاف ظاهر فيها هي إنها تجري على السطح في غير《أخاديد》👌
والأخدود هو المجرى الذي يشقه النهر في الأرض، زي كده مثلا لما الفلاح بيحفر الأرض ويعمل فيها مجرى للماء،
فكل الأنهار في الدنيا بتمشي في مجرى للماء سواء كان المجرى كبير أو صغير،
أنهار الجنة بقى بتمشي سائحة على وجه الأرض كده، وفي نفس الوقت سبحان الله الأنهار دي تجري من تحت القصور والمنازل والغرف ومن تحت الأشجار😮

وأنهار الجنة منبعها من أعلى درجة في الجنة وهي درجة الفردوس وهنعرفها بالتفصيل بعدين إن شاء الله،
فبتبدأ أنهار الجنة من الفردوس وتنحدر إلى باقي أجزاء الجنة،
قال رسول الله ﷺ عن الفردوس:
"مِنْهُ تَفَجَّرُ أنْهارُ الجَنَّةِ"《رواه البخاري》

وأنهار الجنة الرئيسية أربعة، قال رسول الله ﷺ:
"إنَّ في الجنَّةِ بحرَ الماءِ، وبحرَ العسَلِ، وبحرَ اللَّبنِ، وبحرَ الخمرِ، ثمَّ تشقَّقُ الأنهارُ بعدُ"《صحيح الترمذي》
وقال الله عز وجل:
"مَثَلُ الْجَنَّةِ الَّتِي وُعِدَ الْمُتَّقُونَ فِيهَا أَنْهَارٌ مِنْ مَاءٍ غَيْرِ آسِنٍ وَأَنْهَارٌ مِنْ لَبَنٍ لَمْ يَتَغَيَّرْ طَعْمُهُ وَأَنْهَارٌ مِنْ خَمْرٍ لَذَّةٍ لِلشَّارِبِينَ وَأَنْهَارٌ مِنْ عَسَلٍ مُصَفًّى"《 سورة محمد آية( 15)》

يعني الجنة فيها أنهارًا مِن ماءِ عذْبٍ مش بيتغير لا بريح منتنة، ولا بمرارة، ولا بتكدير لأي سبب؛ بالعكس ده هو أعذب المياه وأصفاها، وأطيَبها ريحًا، وألذها في الطعم،
والبحر في الحديث معناه النهر الكبير، والمقصود بتتشقق الأنهار منها بعدُ يعني بيخرج من الأنهار دي الفروع الأصغر ومَجاري الماءِ الصَّغيرة والقَنَوات،
وربنا بيتكلم عن الماء العذب الصافي ده؛ لأن غالب مياه العَرب زمان كانت من الغُدران إللي هي جمع كلمة غدير، والغدير معناه الماء الراكد إللي بيتبقّى بعد ما ييجي السّيل،
وكمان كان عندهم زي الأحواض كده بيبنوها من الطين، فكانت بتمتلئ من ماء المطر أو من مرور السيول عليها،
فإذا استقر الماء فيها أياما؛ المياه تبدأ تتغير بسبب ما يدخل فيها من الأيدي وما يدخل فيها من الأواني، وكمان شرب الحيوانات منها،
فيبدأ يظهر على وش المية الطحالب الخضراء دي أو إللي بنقول عليه الرّيم،
وكانت بلاد قليلة إللي بتكون مجاورة للأنهار الجارية، فربنا بيقول للعرب إللي نزل عليهم القرآن إن عندكم في الجنة نهر جاري صاف مش هيتغير ماؤه لأي سبب من الأسباب،
زي كده لما مثلا تفتح الحنفية وتلاقي ريحتها مجاري أو ريحتها كلور🙂
في الجنة بقى مفيش الكلام ده خالص، الماء عذب صافي مفيش أحسن من طعمه وريحته👌

وكمان الجنة فيها أنهار مِن عسَل صافي من كل الشوائب، والعسل كان مرغوب عند العرب وبيحبوه،
وكانوا بيجيبوه من بلاد الجبال إللي النبات موجود فيها على طول إللي هو العسل الجبلي،
يعني حاجة جودتها عالية، والعسل الجبلي ده فعلا طعمه جميل جدا، مع إني مبحبش العسل بس العسل الجبلي ده كان طعمه مختلف تماما سبحان الله،
فما بالنا بنهر من عسل في الجنة طعمه لا يوصف أصلا😮
ربنا يرزقنا وإياكم الجنة يارب🤲

وفيها أنهار من لبن لا يتغير طعمه بحموضة أو غيره، فهو في غاية البياض والحلاوة والنعومة.

وكمان أنهار من الخمر يستمتع بيه إللي يشربه ويحس بلذة عظيمة، غير خمر الدنيا إللي طعمه كريه وبيسبب الصداع ويخلي الواحد يِسكَر ويغيب عقله،
فخمر الجنة لا يُسكِر ولا يُغيّب العقل👌

وكل ده فيه إشارة إلى إن ربنا بيقولك إن الحاجة اللي انت بتحبها وتشتهيها هتلاقيها في الجنة في أكمل صورة وأجمل وألذ طعم لا يخطر لك على بال👌

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الرابعة_والسبعون_والأخيرة
#الخاتمة

طبيعة البشر إنهم بيحبوا النهايات السعيدة حتى لو النهاية السعيدة غير منطقية في بعض الأحيان أو ضد كل القوانين أو....أو...
المهم إنها تبقى نهاية سعيدة👌

يعني الواحد فينا يتخيل نفسه كده ربنا يعافينا جميعا إنه تعرض لظلم كتير وحس بالقهر،
وناس أخذت حقوقه وعايش في فقر، والدنيا ملطشة معاه وبيمر بكل أنواع الابتلاءات،
فمع إللي كل الواحد بيمر بيه ده؛ دايما بيحلم إن حياته هتتغير للأحسن وبالتالي يحصل على النهاية السعيدة إللي يعيش فيها مرتاح البال ومفيش أي حاجة تنغص عليه عيشته،
وممكن فعلا يتحقق حلمه ده في يوم من الأيام وحقه يرجع له وينتقم من إللي ظلمه وربنا يفتح عليه من خيرات الدنيا كلها،
نهاية سعيدة بقى😅

لكن عارفين،
مهما كان الإنسان في غاية النعيم، وبقى عنده كل حاجة يتمناها في الدنيا من الأموال والخدم وكل ما يشتهي؛
مجرد بس ما يتذكر إن ممكن النعيم إللي هو فيه ده يزول؛ هيحس بالهم والغم،
وحتى لو كان عنده ضمان مثلا إنه هيستمر في النعيم ده؛ مجرد ما يفتكر إنه هيكبر في السن أو هيموت ويترك النعيم إللي هو فيه؛ يصيبه الهم والغم وتتكدر حياته😕

فالدنيا ليس فيها نهايات سعيدة، النهاية السعيدة إللي بجد هي الجنة،
رسول الله ﷺ قال عن إللي يدخل الجنة:
"مَن دخلَها ينعَمُ ولا يبأسُ، ويخلدُ ولا يموتُ، لا تبلَى ثيابُهُم، ولا يفنى شَبابُهُم"《صحيح الترمذي》

يعني بيقول لنا إن إللي يدخل الجنة هيتنعم بكل المُتع إللي في الجنة، ومش هيحصل أبدا إنه يتعرّض لشدة أو فقر،
وملابسه عمرها ما هتتوسخ ولا هيحصل إنها تكون قديمة، لأ دي هتكون جديدة على طول،
و مش هيكبر في السن، يعني هيفضل شباب على طول، وفوق كل ده فهو هيعيش في الجنة والنعيم ده للأبد👌

كل حسرة وألم وكَدر حسيته في الدنيا؛ مش هتلاقيه أبدا أبدا في الجنة و ربنا هيعوضك عنه في الجنة، وإللي هيكون نفسك هتاخده في الجنة،

كل واحد يتخيل نفسه كده وهو قاعد في وسط أهله على الأرائك المرفوعة في القصر بتاعه إللي مصنوع من طوبة فضة وطوبة ذهب،
أو بيته إللي من لؤلؤة شفافة،
وقاعد لابس ملابس من الحرير...
ولابس اللؤلو والذهب ومختلف أنواع الزينة...
وشايف قصادك شجر الجنة إللي جذعه من الذهب...
وأنهار العسل واللبن والخمر والماء بتجري أمامك...
وشايف الطيور بتطير...
والولدان المخلدون رايحين جايين بيطوفوا عليك وبيلبوا رغباتك...
وبتسمع غناء الحور العين إللي بيغنوا بأجمل صوت وألحان ممكن تسمعهم...

وانت بقى قاعد كده وشايف كل ده وبتفتكر تعبك في الدنيا وصبرك على أذى الناس وسخريتهم منك،
وبتفتكر صبرك على الطاعات بصفة عامة وفي مواسم الطاعة زي رمضان وذي الحجة بصفة خاصة،
وتفتكر صبرك على البلاء وصبرك عن المعاصي وبُعدك عنها مع إن كان كل حاجة بتغريك للوقوع فيها ومع ذلك جاهدت نفسك، والملائكة نفسها كل شوية يدخلوا عليك من أبواب قصرك المفتوحة عشان يسلموا عليك زي ما كنت بتسلم عليهم في الدنيا في صلاتك وبيقولوا لك:
"سَلَٰمٌ عَلَيْكُم بِمَا صَبَرْتُمْ ۚ فَنِعْمَ عُقْبَى ٱلدَّارِ"《سورة الرعد آية(24)》
يعني عيش في أمان وسلام في الجنان العالية جزاء على صبرك على كل ما يرضي الله،

لما تبقى شايف كل ده تطلع من قلبك كلمة:
الحمد لله...

"ٱلْحَمْدُ لِلَّهِ ٱلَّذِىٓ أَذْهَبَ عَنَّا ٱلْحَزَنَ ۖ إِنَّ رَبَّنَا لَغَفُورٌ شَكُورٌ"
《سورة فاطر آية(34)》

الحمد لله إن ربنا نجانا من النار....
الحمد لله إللي صَدقنا وعده و أدخلنا الجنة...
الحمد لله إللي أذهب عني الخوف....
الحمد لله إللي انتقم لنا ممن ظلمونا وقهرونا وعذبونا وقتلونا....
الحمد لله....
قمة الرضا والسلام النفسي والسعادة وانت بتقول الحمد لله بكل ذرة في قلبك👌

فالنهاية السعيدة هي:
أنت في الجنة أبدا...
الكافر في النار أبدا...
الملائكة مُحيطين بعرش الرحمن خاضعين لجلاله، معترفين بكماله، يسبحون بحمد ربهم....
"وَتَرَى ٱلْمَلَٰٓئِكَةَ حَآفِّينَ مِنْ حَوْلِ ٱلْعَرْشِ يُسَبِّحُونَ بِحَمْدِ رَبِّهِمْ ۖ وَقُضِىَ بَيْنَهُم بِٱلْحَقِّ وَقِيلَ ٱلْحَمْدُ لِلَّهِ رَبِّ ٱلْعَٰلَمِينَ"
《سورة الزمر آية(75)》

ففي النهاية الكل يقول:
الحمد لله 🤲

فالحمد لله كما ينبغي لجلال وجهه وعظيم سلطانه على تمام الحلقات بعون الله وفضله وكرمه وحوله وقوته🤲

أخيرا وليس آخرا....
بعد ما شوفنا أحداث الدار الآخرة أو أحداث اليوم الآخر من أول خروج الروح لحد نهاية المطاف سواء في الجنة أو في النار؛ أكيد عرفنا ليه الكلام عن الدار الآخرة مهم، وليه دايما لازم نتذكر الدار الآخرة👌
وبسبب أهميته دي كان أول ما أُنزل من القرآن هو الكلام بالتفصيل عن البعث وعن أهوال يوم القيامة وعن الجنة والنار،

فتعالوا كده نلخص مع بعض أهمية معرفة أحداث اليوم الآخر في نقط محددة عشان نفضل فاكرينها دايما:

#الخلفاء_الراشدون_إيمان_شلبي
#سيرة_أبو_بكر_وعمر
#الحلقة_الرابعة
#فضائل_ومكانة_أبي_بكر_وعمر_الجزء_الأول

اتكلمنا المرة إللي فاتت عن هجرة أبي بكر وعمر إلى المدينة، وقلنا إن دي مرحلة جديدة هتظهر فيها ابتلاءات واختبارات جديدة؛
لأن دي فترة استقرار بعكس الأوضاع في مكة إللي كانت كلها أذى واستضعاف،

أول ابتلاء يتعرض له الصديق هو إصابته بالحمى👌
قالت السيدة عائشة عن المدينة أنها أوْبَأُ أرْضِ اللَّهِ، فَكانَ بُطْحَانُ يَجْرِي نَجْلًا.《صحيح البخاري》
يعني كانت أرض مليئة بالأوبئة والأمراض، حتى إن وادي اسمه بُطحانَ في جَنوبِ المدينةِ قُريبَ المسجدِ النَّبويِّ الشَّريفِ؛ كان يَجْري طُولَ العامِ «نَجْلًا»، يعني يجري بالمياهِ المُتغيِّرةِ المُتعفِّنة الَّتي تَتركَّدُ فيه كثيرًا،
زي ترعة كده فيها مياه راكدة فيجتمع فيها العفن والحشرات، فتكون النتيجة كثرةُ الحُمِّيَّاتِ وانتشار الوَباءُ👌
وده طبعا بعكس مكة وأجواءها النقية ومياهها الصافية،
فأُصيب الصديق رضي الله عنه بالحمى وأصيب معه بلال رضي الله عنه،
فحنّوا لمكة ولأيام العافية،
وكان بلال يدعوا على شَيبةَ بنَ رَبيعةَ وعُتبةَ بنَ ربيعةَ، وأُمَيَّةَ بنَ خَلَفٍ، رُؤوسِ المشركينَ وزُعمائِهم في مكَّةَ؛ لأنهم كانوا سبب في إخراجهم من دار العافية إلى دار الوباء،
فلما شاف رسول الله ﷺ حالهم؛ دعا وقال:
"اللَّهُمَّ حَبِّبْ إلَيْنَا المَدِينَةَ كَحُبِّنَا مَكَّةَ أوْ أشَدَّ، اللَّهُمَّ بَارِكْ لَنَا في صَاعِنَا وفي مُدِّنَا، وصَحِّحْهَا لَنَا، وانْقُلْ حُمَّاهَا إلى الجُحْفَةِ"
《صحيح البخاري》

يعني دعا إنهم يحبوا المدينة زي حبهم لمكة بل أشد من حبهم لمكة، ودعا بالبركة في المكاييل إلي بيكيلوا بيها الأشياء، حاجة زي الكيلو كده،
ودعا إن الحمى تخرج من المدينة وتنتقل إلى مكان اسمه الجُحْفَة،
وهي مكان بين مكة والمدينة وكان أهلها مشركين،
فلما تصيبهم الحمى هينشغلوا بنفسهم ولن يعاونوا أهل مكة على أذى المسلمين👌
فاستجاب الله لدعوة رسوله ﷺ وأصبحت المدينة أحب البلاد إلى الصحابة وشُفيَ أبو بكر وبلال رضي الله عنهما👌

بعد ما استقر رسول الله ﷺ في المدينة؛ آخى بين المهاجرين والأنصار،
يعني أصبح لكلّ مهاجري أخًا له من الأنصار،
فآخى رسول الله ﷺ بين أبي بكر الصديق وبين الصحابي خَارِجة بن زيد وإللي هيتزوج أبو بكر ابنته حبيبة بعدين.

وآخى رسول الله ﷺ بين عمر بن الخطاب وبين عِتبانُ بنُ مالكٍ على الراجح،
وترتّب على المؤاخاة دي حقوق خاصة، مثل المواساة والتعاون على أعباء الحياة بين الاثنين وكذلك توارثهما دون ذوي الرحم،
يعني المهاجري يرث الأنصاري إذا مات والعكس، كأنه أخوه من النسب بالضبط👌
والمؤاخاة دي كانت بسبب إللي حصل مع المهاجرين من فقدهم لأموالهم وهجرهم لأوطانهم وأهليهم وإصابتهم بالحمى،
والتوارث في المؤاخاة كان لفترة زمنية، يعني لحد ما يعتاد المهاجرون الحياة في المدينة، ويقدروا يعوضوا بعض ما فقدوه من أموالهم،
وبعدين تم إلغاء نظام التوارث بنزول قوله تعالى:
"وَأُولُوا الأَرْحَامِ بَعْضُهُمْ أَوْلَى بِبَعْضٍ فِي كِتَابِ اللَّهِ"
《الأحزاب آية(6)》

وكان في تعاون بين الأنصار والمهاجرين حتى في طلب العلم من رسول الله ﷺ،
فعمر مثلا كان هو وأخوه من الأنصار عِتبانُ بنُ مالكٍ بيسكنوا في عَوَالِي المَدِينَةِ، ودي قُرى كانت موجودة خارج المدينة،
فبسبب ظُروف عَملِهما مكنوش يقدروا يروحوا لرسول الله ﷺ يوميا ويأخذوا منه العِلمِ، فكانا يتناوبان في الذهاب إلى رسول الله ﷺ،
يعني كان عمر يروح يوم ويتعلم إللي نزل من الوحي من رسول الله ﷺ وأخوه عِتبانُ بنُ مالكٍ كان يذهب لعمله، فكان عمر لما يرجع يعلم عِتبانُ بنُ مالكٍ إللي اتعلمه،
واليوم التالي كان عمر يروح عمله وعِتبانُ بنُ مالكٍ يروح يتعلم من رسول الله ﷺ ولما يرجع كان يعلم عمر رضي الله عنه ما تعلمه من رسول الله ﷺ وهكذا،
وده كان من حرصهم رضي الله عنهم على تعلم الدين من رسول الله ﷺ👌

أما أبو بكر الصديق فكان ملازما لرسول الله ﷺ لا يفارقه لا في السّلم ولا في الحرب،
فمثلا في غزوة بدر كان رسول الله ﷺ واقف يصلي ويدعو للمسلمين بالنصر، وأبو بكر واقف خلفه ﷺ،
فاشتد رسول الله ﷺ في الدعاء حتى سقط الرداء من على كتفه،
فأرجع أبو بكر الرداء على كتف رسول الله ﷺ وحضنه عشان يهوّن عليه وقال له:
"يا نَبِيَّ اللهِ، كَفَاكَ مُنَاشَدَتُكَ رَبَّكَ؛ فإنَّه سَيُنْجِزُ لكَ ما وَعَدَكَ"
《صحيح مسلم》
يعني متقلقش ربنا هينفذ لك وعده اللي وعدك بيه فخفف عن نفسك،
وده مِن علم وإيمان أبي بَكرٍ رَضيَ اللهُ عنه أنَّ اللهَ عزَّ وجلَّ سيُجِيبُ دَعوةَ نَبيِّه ﷺ👌

#الخلفاء_الراشدون_إيمان_شلبي
#سيرة_أبو_بكر_وعمر
#الحلقة_الرابعة_عشرة
#خطبة_أبي_بكر_وأصول_الولاية_العامة_في_الإسلام

كنا قلنا في الحلقة الثانية عشرة إن أبا بكر رضي الله ذهب في اليوم التالي لبيعة السقيفة إلى مسجد رسول الله ﷺ وصعد المنبر وجلس عليه،
وقام عمر رضي الله عنه يخطب في الناس فتكلم قبل ما يتكلم أبو بكر وبعدين حصلت البيعة العامة لأبي بكر رضي الله عنه،
بعد البيعة صعد أبو بكر للمنبر وبدأ يخطب في الناس فحمد اللهَ وأثنى عليه بما هو أهلُه ثم قال:
"أما بعد أيها الناسُ فإني قد وُلِّيتُ عليكم ولستُ بخيرِكم،
فإن أحسنتُ فأَعِينوني وإن أسأتُ فقوِّموني،
الصدقُ أمانةٌ والكذبُ خيانةٌ،
والضعيفُ منكم قويٌّ عندي حتى أزيحَ عِلَّتَه إن شاء اللهُ والقويُّ فيكم ضعيفٌ حتى آخذَ منه الحقَّ إن شاء اللهُ،
لا يدعُ قومٌ الجهادَ في سبيل اللهِ إلا ضربَهم اللهُ بالذُّلِّ،
ولا يُشِيعُ قومٌ قطُّ الفاحشةَ إلا عمَّهم اللهُ بالبلاء،
أَطيعوني ما أَطعتُ اللهَ ورسولَه فإذا عصيتُ اللهَ ورسولَه فلا طاعةَ لي عليكم، قوموا إلى صلاتِكم يرحمْكم اللهُ"
《إسناده صحيح》

مع إن خطبة أبي بكر رضي الله عنه كانت قصيرة وموجزة لكنها كانت بليغة وهادفة واشتملت على أصول الولاية العامة في الإسلام، يعني كان فيها القواعد إللي بيتبنى عليها تولي الخليفة حكم المسلمين، يعني هي منهج كامل في الحُكم👌
وهو كمان بيضع قاعدة مهمة من خلال إلقائه لخطبته وهي إن أي واحد يتولَّى أمرًا من أمور المسلمين لازم يُبيِّن لهم الخطَّة إللي هيمشي عليها ويتّبعها خلال حكمه.

تعالوا كده نشرح خطبته رضي الله عنه ونشوف سياسته في الحكم والأصول الصحيحة للحكم في الإسلام💁

¤أول حاجة قالها رضي الله عنه:
《إني قد وُلِّيتُ عليكم ولستُ بخيرِكم》
يعني بيقول أنه مطلبش الخلافة لنفسه ولكن أهل الشورى هم إللي اختاروه يعني الموضوع تم بالمشاورة والاتفاق وليس بالإكراه أو القوة،
وبعد كده عامة المسلمين وافقوا على الاختيار ده وبايعتوني بالخلافة مع إني مش أحسن واحد فيكم،
وطبعا هذا مِن تَواضُعِه وحُسن أخلاقِه رضي الله عنه وإلا فهو أفضل الناس بعد رسول الله ﷺ زي ما قلنا قبل كده،
فالصديق رضي الله عنه وأرضاه يضع قاعدة هامة لكل مَن يتولى أمراً للمسلمين وبيقول له:《لا تتكبر》👌
فالكِبر مُهلِك، يُهلك الأمة كلها، سواء كان الكِبر في الحاكم أو الهيئة الحاكمة.

ومن خلال أول جملة قالها دي هنستخرج أول أصلين من أصول الولاية العامة في الإسلام وهما:
1️⃣ مفيش أحد له حقَّ في ولاية أمر من أمور الناس إلا إذا الناس نفسهم قاموا بتولية الشخص ده،
يعني الأمة هي صاحبة الحق والسلطة في الولاية والعزل، فلا يتولَّى أحد أمرها إلا برضاها، فلا يُوَرّث الحكم ولا يُؤخَذ بالغصب ولا بالخداع👌
طبعا احنا عارفين إن الواقع غير كده بس هنعمل إيه🤷

2️⃣ الشخص الذي يتولَّى أمرًا من أمور الأمة يكون أكفؤها فيه لا خيرها في سلوكه،
بمعنى إن لو مثلا كان في شخص صوّام قوّام وعلى درجة عالية من الأخلاق لكنه معندوش خبرة ولا كفاءة في إدارة شركة أو مصنع مثلا، وفي واحد تاني أكثر منه خبرة وكفاءة ولكنه أقل منه في الطاعات،
فهنا يُقدم الأكثر كفاءة وخبرة على غيره👌
فالحاكم إللي أقل في الفضل وعنده خبرة وكفاءة في حكم المسلمين يُقدم على غيره حتى لو كان غيره أفضل منه ولكنه أقل في الكفاءة👌

¤ثاني حاجة قالها أبو بكر في خطبته:
《فإن أحسنتُ فأَعِينوني وإن أسأتُ فقوِّموني》
يعني بيقول لو أنا عملت حاجة كويسة ساعدوني إني أستمر عليها، ولو أخطأت عَدِّلوا خَطئِي بحُسنِ النُّصحِ والمشورةِ،
فهو هنا بيوضح العلاقة بين الحاكم والمحكوم وإنهم طرفين في منظومة واحدة هدفها الوصول إلى الحق وإلى الصواب وإلى الخير،
مش إن العلاقة بينهم علاقة تنافسية أو علاقة استعباد أو علاقة تقوم على الحذر والرعب والإرهاب والخوف زي ماهو حاصل دلوقتي في زماننا😓
فالمطلوب من الحاكم أن يُحسن، لكنه في النهاية بشر مُعرّض للخطأ، فممكن يجتهد ويختار رأي خطأ، فهنا هيحتاج للي ينصحه ويرشده للصواب وده دور المحكومين💁
فالحاكم إذا اجتهد فأصاب أعانه شعبه بكل طاقته،
وإذا اجتهد فأخطأ فعلى الشعب التوجيه والتقويم والإرشاد، وعلى الحاكم أن يقبل النصيحة في غير ضجر ولا غضب ولا...ولا....👌

وكمان من خلال كلام أبي بكر رضي الله عنه يظهر أهمية الشورى، فالحاكم مهما بلغت درجة ذكائه وفطنته وورعه وتقواه فهو يحتاج إلى الآخرين،
مش بس محتاجهم في النصيحة لكن كمان في أخذ القرار وتنفيذه،
ودائماً يجعل الله البركة في الجماعة وفي الشورى👌

وهنا نقدر نستخرج ثلاثة أصول أخرى من أصول الولاية العامة في الإسلام وهي:
3️⃣الأمة لها الحق في مراقبة أداء أُولي الأمر من حيث الإصلاح أو الإفساد، لأنَّ الناس هم مصدر سلطة الحاكم وصاحبة النظر في ولايتهم وعزلهم، يعني لو الناس لم تختر الحاكم ده مكنش جاء للحكم من الأول🤷

#الخلفاء_الراشدون_إيمان_شلبي
#سيرة_أبي_بكر_وعمر
#الحلقة_الرابعة_والعشرون
#حروب_الردة
#جيش_خالد_وجيش_مُسيلمة_في_أرض_اليمامة

قلنا المرة إللي فاتت إن أبا بكر رضي الله عنه أرسل رسالة لخالد بن الوليد رضي الله عنه وقال له إنه بعد ما يخلص قتال المرتدين في بني أسد وبني تميم يتوجه إلى اليمامة لقتال مسيلمة الكذاب وجيشه من بني حنيفة مع جيش عكرمة بن أبي جهل وشرحبيل بن حسنة،
وقلنا إن جيش عكرمة وجيش شرحبيل اتهزموا بسبب إنهم تسرعوا وقاتلوا جيش مسيلمة الكبير وهم كانوا أعدادهم صغيرة،
بعد الهزيمة أرسل أبو بكر جيش عكرمة إلى عُمان لمساعدة حذيفة بن محصن وعرفجة بن هرثمة وشرحنا الأحداث بالتفصيل المرة إللي فاتت👌
وبالنسبة لجيش شرحبيل فهو دلوقتي مستني خالد يأتيه بجيش عشان يتحدوا مع بعض ويقاتلوا المرتدين من بني حنيفة بقيادة مسيلمة الكذاب،
خالد رضي الله عنه خلاص خلص مهمته مع بني أسد وبني تميم ومتوجه دلوقتي إلى اليمامة💁

☆قبل ما نكمل باقي الأحداث في نقطة حابة اتكلم فيها وهي قصة رجل اسمه:《الرجَّال أو الرحَّال بن عُنفُوَة》
أنا كنت اتكلمت عنه قبل كده في السيرة لكن قصته هنا مطلوبة؛ لأن في كتب التاريخ لا يُذكر مسيلمة الكذاب إلا ويُذكر معه الرجَّال بن عُنفُوَة وإن فتنته كانت أشد من فتنة مسيلمة نفسه👌
القصة بتقول إن لما جاء وفد بني حنيفة إللي كان فيهم مسيلمة الكذاب للمدينة للقاء رسول الله ﷺ ومبايعته على الإسلام كان معهم الرجَّال بن عُنفُوَة،
وخلال الفترة إللي قعدها بنو حنيفة في المدينة؛ انتهز الرجَّال بن عُنفُوَة الفرصة وقعد يتعلم القرآن ويتفقه في الدين وكان رجل عنده ذكاء وبصيرة، فخلاه رسول الله ﷺ هو إللي يعلم أهل اليمامة الإسلام،
ولما رجع مسيلمة لليمامة ادّعى النبوة، وبنو حنيفة إللي كانوا أسلموا؛ ارتدوا واتبعوه،
كتب التاريخ زي البداية والنهاية وتاريخ الطبري بتقول إن هناك
حديث عن رسول الله ﷺ بيقول إن في مرة رسول الله ﷺ مرّ على مجموعة من الصحابة قاعدين مع بعض كان فيهم أبو هريرة والرجَّال بن عُنفُوَة، فقال لهم رسول الله ﷺ:
"إِنَّ فِيكُمْ لَرَجُلاً ضَرْسُهُ فِي النَّارِ أَعْظَمُ مِنْ أُحُدٍ"
فكان أبو هريرة خايف على نفسه وخصوصا إن كل إللي كان قاعدين معاه ماتوا في سبيل الله ماعدا هو والرجَّال بن عُنفُوَة، فالقصة بتقول إن الرجَّال ده لما رجع لليمامة؛ مسيلمة أغراه بالمُلك والمال وطلب منه إنه يقول للناس إن محمد ﷺ قال عن مسيلمة إنه رسول هو كمان،
فوافق الرجَّال وارتد هو كمان وفتن الناس وأخبرهم إن رسول الله ﷺ قال إن مسيلمة رسول وأمر الناس باتباعه،
وبكده بقى المقصود من الحديث إللي قاله رسول الله ﷺ هو الرجَّال بن عُنفُوَة،
لكن يا جماعة الحديث ده أصلا غير صحيح ولا يثبت عن رسول الله ﷺ 🙅‍♂️❌
وقصة ارتداد الرجَّال بن عُنفُوَة عن الإسلام لم تأتِ بطريق صحيح، يعني كل الروايات إللي جاءت فيها قصة ارتداد الرجَّال بن عُنفُوَة هي روايات غير صحيحة باطلة، فمينفعش الاستشهاد بيها 👌
وهتلاقوا في التعليقات روابط لتفصيل المسألة للمهتمين بعلم الحديث👇

وطبعا الحديث إللي قلناه من شوية ده غير الحديث الصحيح إللي قاله أبو هريرة رضي الله عنه عن وصف الكافر في النار👌
الحديث الصحيح بيقول:
"إن الرجل من أهل النار ليعظُم للنار، حتى يكون الضّرس من أضراسه كأحد"《رواه أحمد》
يعني الكفار لما يدخلوا النار مش هيبقوا زي ما هم كده ده هيبقى حجم جسمهم كبير جدا لدرجة إن حجم ضرس الواحد فيهم مثل جبل أحد كده والعياذ بالله، واحنا اتكلمنا عن الموضوع ده بالتفصيل في حلقات الدار الآخرة👌

فخُلاصة الكلام إن مفيش أي دليل صحيح يدل على ارتداد الصحابي الرجَّال بن عُنفُوَة وإن كانت قصة ارتداده منتشرة ومشهورة في كتب التاريخ👌

هنرجع بقى لخالد رضي الله عنه ونشوف تجهيزاته لقتال مسيلمة💁
لأن خالد رضي الله عنه كان عظيم الخبرة في الحرب وعنده نظرة حربية ثاقبة؛ فهو أرسل العيون لينقلوا له الأخبار ويستكشفوا له الطريق عشان يكون عارف أخبار عدوه ويعرف هيقاتل إزاي👌

كان من ضمن العيون إللي أرسلها خالد فرقة من ستين رجلا،
وهم بيستطلعوا الأخبار وجدوا في طريقهم مجموعة من بني حنيفة كانوا خرجوا من اليمامة للثأر من ناس كانوا قتلوا منهم رجل،
فأخذتهم الفرقة دي أسرى بدون ما يقتلوا منهم أحد ورجعوا لخالد رضي الله عنه،
سأل خالد المجموعة دي من بني حنيفة بيقولوا إيه عن مسيلمة وهل يتبعوه ولّا لأ، فردوا وقالوا: منكم نبي ومنا نبي.
يعني هم مصممين إنهم يتبعوا مسيلمة الكذاب وثابتين على ردتهم وبيقولوا عليه إنه نبي، وده طبعا كفر،
ولم يرضوا إنهم يرجعوا عن الردة بتاعتهم على الرغم من أسرهم وإحاطة جيش خالد بهم😬