بوت الاسئلة الخاصة بقصص الأنبياء و السيرة النبوية

@prophetsstories_bot

#قصة_نهاية_البداية_بالعامية_إيمان_شلبي
#الدار_الآخرة
#الحلقة_الثالثة
#حلقة_خاصة_للأسئلة_عن_المرحلة_الأولى_الجزء_الأول
#تساؤلات_عن_الروح_والجسد

اتكلمنا عن خروج روح المؤمن وخروج روح الكافر، وشرحنا إن كل واحد فيهم بيشوف حاجة مختلفة عن التاني،
حلقة النهاردة هي إجابة لبعض الأسئلة عن الروح والموت، ولأن الأسئلة كثيرة فهتبقى على جزئين إن شاء الله 😊

الأول بس يا جماعة عايزة أقول لكم على نقطة مهمة هتريحنا كتير واحنا بنتكلم،
الكلام إللي احنا بنقوله في السلسلة دي كله من الغَيْبيّات إللي عقولنا مش هتقدر تستوعبها،
عشان كده في حاجة اسمها 《الإيمان بالغيب》
🔸️والغيب هو:
العلم الذي يَختَص به الله سبحانه وتعالى دون غيره من خلقه،
يعني هي أمور محدش يعرفها أبدا غير ربنا، وممكن ربنا يُخبر بعض من الغيب ده لمَن يصطفي من الرسل والأنبياء،
زي كده لما ربنا أطلع رسول الله ﷺ على الفتوحات إللي حصلت بعد موته ﷺ وغيرها وغيرها من المواقف إللي حكيناها في السيرة،
لكن الأصل أن الغيب لايعلمه إلا الله سبحانه وتعالى👌
ربنا قال عن نفسه:
"وَعِندَهُ مَفاتِحُ الغَيبِ لا يَعلَمُها إِلّا هُوَ"
《سورة الأنعام آية(59)》
🔸️وكلمة الإيمان معناها التصديق التااام بشيء معين بدون ما يكون فيه أي شك،
فعشان نكون مؤمنين لازم نحقق أركان الإيمان الستة وهي:
الإيمان بالله، وملائكته وكتبه ورسله 《واليوم الآخر》 والإيمان بالقدر خيره وشره👌
وربنا وعد الذين آمنوا وعملوا الصالحات بالمغفرة والأجر العظيم ووعدهم بالفردوس 💁‍♂️
قال تعالى:
"إِنَّ الَّذِينَ آمَنُوا وَعَمِلُوا الصَّالِحَاتِ كَانَتْ لَهُمْ جَنَّاتُ الْفِرْدَوْسِ نُزُلًا"
《سورة الكهف آية( 107)》
وقال:
" وَعَدَ اللَّهُ الَّذِينَ آمَنُوا وَعَمِلُوا الصَّالِحَاتِ ۙ لَهُم مَّغْفِرَةٌ وَأَجْرٌ عَظِيمٌ"
《سورة المائدة آية(9)》
وهتلاقوا آيات كثيرة ربنا بيوصف فيها المؤمنين دول بأنهم يؤمنون بالله واليوم الآخر، أو يؤمنون بالغيب بصفة عامة،
يعني مثلا في الآية الثالثة من سورة البقرة إللي هي بداية القرآن ربنا بيقول عن صفات المتقين إللي هيدخلوا الجنة:
"الَّذِينَ يُؤْمِنُونَ بِالْغَيْب"
وقال في الآية إللي وراها:
"وَالَّذِينَ يُؤْمِنُونَ بِمَا أُنزِلَ إِلَيْكَ وَمَا أُنزِلَ مِن قَبْلِكَ 《وَبِالْآخِرَةِ هُمْ يُوقِنُونَ》"
وقال عن إللي مش بيؤمن بالله واليوم الآخر إنه ضال:
"وَمَنْ يَكْفُرْ بِاللَّهِ وَمَلائِكَتِهِ وَكُتُبِهِ وَرُسُلِهِ وَالْيَوْمِ الْآخِرِ فَقَدْ ضَلَّ ضَلالًا بَعِيداً"《سورة النساء الآية(136)》

فاحنا لازم نؤمن ونصدق بالغيب تصديق تااام بدون ما يكون فيه أدنى شك👌

¤ليه بقول الكلام ده؟
لأن مش كل سؤال هييجي في دماغنا هنلاقي له إجابة، أو حتى لو لقينا إجابة ممكن عقلنا أصلا ميستوعبهاش،
فاحنا إللي محتاجينه هو الإيمان بالغيب💁‍♂️

لأن هنا بالذات تظهر عبودية 《العقل البشري 》 لله عز وجل 👌
يعني لما الواحد فينا يُؤمن بأمور عقله مش قادر يتصورها ولا يستوعبها وأمور لا تُعقل أصلا؛ هنا تظهر عبودية العبد بفعل وتصديق إللي مش قادر يفهم معناه ولا الهدف منه إيه👌
وده لأن الحاجة إللي بنكون فاهمين الحكمة منها إيه أو عقلنا مستوعبها بيكون سهل علينا تصديقها وفهمها وتنفيذها بخلاف إللي احنا مش فاهمينه ومش مستوعبينه🤷‍♂️
ساعتها بقى هيبان صدق العبودية والتسليم لله؛ لأن هيكون السبب الوحيد للتسليم والتصديق بالأمور دي هو الإيمان واليقين في الغيب👌

♻️نرجع بقى للأسئلة بتاعتنا ونشوف أول سؤال💁‍♂️

هنبدأ بسؤال اتكرر كتير وهو:
💠لو إنسان مسلم بيعمل طاعات، لكن في نفس الوقت بيعمل معاصي، نهايته هتبقى إيه؟
هل تأخذه ملائكة العذاب؟ أم ملائكة الرحمة🤔

🔅بصوا يا جماعة هو الموضوع مش بيتقاس كده،
المسألة بتبقى إيه الغالب؟
يعني هل الحسنات هي الأكثر أم السيئات؟
لو الحسنات هي الأكثر والمسلم عنده بعض المعاصي متبش منها؛
ممكن ربنا يشدد عليه في سكرات الموت بحيث يخرج من الدنيا معلهوش ولا سيئة،
أو إنه يبتليه بابتلاء من مرض او غيره قبل موته يكفر عنه السيئات إللي عنده،
لكن لو مجموع السيئات كان أكثر وغطى على الحسنات لدرجة إن حتى سكرات الموت مطهرتوش، ولا حتى ابتلاؤه بالمرض كفّر السيئات إللي عنده فهنا روحه هتبقى مع ملائكة العذاب والعياذ بالله👌
والموضوع على فكرة موضوع قلوب،
يعني لو ربنا يعلم من العبد إنه حريص على رضاه، بس ساعات نفسه بتغلبه؛ هتلاقوا إن ربنا رزقه قبل الموت توبة أو ابتلاء يكفر عنه سيئاته،
كم مرة سمعتم عن ناس كانوا بيعملوا معاصي كتير وفي آخر حياتهم تابوا؟
فالأعمال بالخواتيم،
وعندكم قصة قاتل المائة نفس خير دليل على كلامنا💁‍♂️

فربنا المُطلع على القلوب يعلم مين إللي يستحق التيسير والتوفيق للهداية والتوبة من إللي لا يستحقها👌
المهم بس إن الواحد يكون صادق مع الله وميأجلش التوبة مهما تكرر منه الذنب👌
وإللي عايز يموت على حاجة معينة؛ يُكثر منها،
إللي عايز يموت وهو ساجد يُكثر من الصلاة، صلاة سنن وقيام ليل،
وإللي عايز يموت على توبة؛ يُكثر من التوبة في حياته، وهكذا،
وطبعا متنسوش الدعاء بحسن الخاتمة، رزقنا الله وإياكم مِيتةً تُرضيه🤲❤

💠السؤال الثاني:
هل الأحياء يقدروا يشموا ريحة الروح سواء كانت ريحتها حلوة أو سيئة زي ما شرحنا كده🤔

🔅بصراحة يا جماعة أنا مقرأتش فيها حاجة من الوحي، حتى لما بحثت ملقتش حاجة بتفصّل النقطة دي،
بس كواقع وكقصص حصلت، فعلا في ناس كتير من المغسلين كانوا بيشموا رائحة جميلة جدا من الميت أو رائحة سيئة جدا،
لكن الريحة الحلوة دي بتكون كرامات لبعض الناس مش كلهم،
ولو ريحة سيئة بتبقى برده من باب فضح العبد الفاجر أو الكافر في الدنيا قبل الآخرة،
وأنا شخصيا غسّلت موتى قبل كده ومشمتش بصراحة ريحة جميلة أو رائحة سيئة أوي أقدر أقول إنها رائحة منتنة زي ما جاء وصفها في الحديث،
فمش كل ميت تظهر منه ريحة حلوة أو ريحة وحشة،
لكن هل في دليل من الدين بيوضح المسألة دي من القرآن او السنة؟ لأ، لكن على مر العصور بتحصل أمور بتدل على حسن الخاتمة وسوء الخاتمة للميت، ومنها موضوع الرائحة ده،
وفي قصص كتير عن سوء وحسن الخاتمة هتتعجبوا لما تسمعوها، بتبقى كرامات للميت أو فضائح له ربنا يعافينا.

💠السؤال الثالث: عايزين نعرف يعني إيه موت🤔

🔅أصل كلمة الموت في لغة العرب هو السكون، والموت عكس الحياة،
ومن مظاهر الحياة : الحركة،
فلما الإنسان يتوقف عن الحركة ويَسكن بسبب خروج الروح يبقى كده مات وقامت قيامته،
فالموت هو《القيامة الصغرى》👌
فحياة الإنسان تبدأ بنفخ الروح في الجنين وهو في رحم أمه،
وتنتهي الحياة دي بخروج الروح من جسده،
يبقى الموت هو:
《انقطاع تعلُّق الروح بجسم الإنسان انقطاع تام》

ولازم الانقطاع التام ده يا جماعة؛ لأن الروح ممكن تخرج من الجسد وتكون لسه متصلة بيه وبيكون لسه فيه مظاهر الحياة زي التنفس ووجود نبض القلب وده كده يبقى النوم👌

💠وده هياخدنا للسؤال الرابع وهو: إيه الفرق بين النوم والموت🤔
🔅رسول الله ﷺ قال:
"النومُ أخو الموتِ"《صحيح الجامع》
يعني في تشابه بين النوم والموت، فهنلاقي إن الروح تخرج من الجسد في حالة الموت والنوم لكن في حالة النوم يكون خروج الروح خروج جزئي،
والخروج الجزئي ده بيسبب فَقْد الإدراك، يعني الواحد مش بيبقى حاسس بحاجة حواليه،
لكن في نفس الوقت بتكون الروح مرتبطة ومتصلة بالجسد بطريقة وبكيفية لا يعلمها إلا الله سبحانه وتعالى، عشان كده تلاقوا الإنسان يتحرك ويتنفس، ويتكلم أحيانا وهو نائم😅
والنوم اسمه《الوفاة الصغرى》
ربنا بيقول:
"اللَّهُ يَتَوَفَّى الْأَنْفُسَ حِينَ مَوْتِهَا وَالَّتِي لَمْ تَمُتْ فِي مَنَامِهَا فَيُمْسِكُ الَّتِي قَضَى عَلَيْهَا الْمَوْتَ وَيُرْسِلُ الْأُخْرَى إِلَى أَجَلٍ مُسَمًّى"
《سورة الزمر آية (42)》
يعني لما البشر يناموا؛ تخرج أرواحهم خروج جزئي وتكون بيد الله سبحانه وتعالى،
واللي انتهى أجله وهو نائم لا تعود روحه لجسده، أما إللي لسه في عمره بقية؛ فترجع روحه لجسده مرة أخرى، وهكذا كل يوم،
عشان كده رسول الله ﷺ قال:
"إذا أوَى أحَدُكُمْ إلى فِراشِهِ فَلْيَنْفُضْ فِراشَهُ بداخِلَةِ إزارِهِ، فإنَّه لا يَدْرِي ما خَلَفَهُ عليه،
ثُمَّ يقولُ: باسْمِكَ رَبِّ وضَعْتُ جَنْبِي وبِكَ أرْفَعُهُ، إنْ أمْسَكْتَ نَفْسِي فارْحَمْها، وإنْ أرْسَلْتَها فاحْفَظْها بما تَحْفَظُ به عِبادَكَ الصَّالِحِينَ."
《 صحيح البخاري》
فجملة 《أمسكت نفسي》معناها قَبْض الروح في وقت النوم، والإرسال يعني رجوع الروح للجسد ليمارس الإنسان حياته👌

🔆واحنا منعرفش يا جماعة الروح بتروح فين عند النوم، لكن من ظاهر الحديث والآية إن الروح بتطلع للملأ الأعلى،
وفي حديث بيقول إن المؤمن إذا نام على طهارة، وهو متوضئ يعني، فإن روحه تذهب وتسجد عند العرش،
لكن الحديث ده 《ضعيف》،
وأمور الغيب مينفعش نتكلم فيها إلا بأحاديث صحيحة👌
يبقى خُلاصة الكلام إن أهم فرق بين النوم والموت هو خروج الروح من الجسد تماما ومش بيبقى في أي مظاهر من مظاهر الحياة في الجسد في حالة الموت👌
🔸️فاحنا كده يبقى عندنا جسد و روح💁‍♂️

💠وده هياخدنا للسؤال الخامس: إيه الفرق بين الجسد والروح؟
🔅شوفوا،
🔹️الجسد أصله مخلوق من طين،
وأول خلق البشر كان آدم عليه السلام، خلقه الله بيديه سبحانه من طين ونفخ فيه الروح،
وبعد كده بقى نسل آدم عليه السلام من ماء مهين وبدأ تناسل البشر، ويستمر التناسل ده لحد يوم القيامة،
قال الله تعالى:
"الَّذِي أَحْسَنَ كُلَّ شَيْءٍ خَلَقَهُ وَبَدَأَ خَلْقَ الإِنسَانِ مِن طِينٍ ۩
ثُمَّ جَعَلَ نَسْلَهُ مِن سُلالَةٍ مِّن مَّاء مَّهِينٍ"
《سورة السجدة آية(7، 8)》

🔹️الروح بقى هي إللي منعرفش هي إيه بالضبط!
ربنا قال:
"وَيَسْأَلُونَكَ عَنِ الرُّوحِ ۖ قُلِ الرُّوحُ مِنْ أَمْرِ رَبِّي وَمَا أُوتِيتُم مِّنَ الْعِلْمِ إِلَّا قَلِيلًا"
《سورة الإسراء آية(85)》
يعني الروح دي أمر عظيم وشأن كبير من أمر الله تعالى، وهي مخلوق من مخلوقات الله،
ولتعظيم أمر الروح ربنا نسبها لنفسه، ربنا قال:
"فَإِذَا سَوَّيْتُهُ وَنَفَخْتُ فِيهِ مِن رُّوحِي فَقَعُوا لَهُ سَاجِدِينَ"
《سورة الحجر آية (29)》

فنسبة الروح هنا لله مش لأنها جزء من ذات الله سبحانه وتعالى؛
لأ🙅‍♂️❌
لكن النسبة لتعظيم وتشريف أمر الروح، زي ناقة الله وبيت الله الحرام وعباد الله وهكذا👌

🔺️طيب ليه ربنا أخفى عننا أمر الروح؟
¤ربنا جعل أمر الروح مَخفِي ولم يُفصّل لنا فيه؛ عشان الإنسان يعرف عجزه عن علم حقيقة نفسه مع العلم بوجودها،
يعني احنا عارفين إن في داخلنا روح، لكن منعرفش عنها إلا القليل جدا،
فلما الإنسان يكون عاجز عن معرفة حاجة موجودة داخله؛ فطبيعي إنه يكون عاجز عن إدراك حقيقة الله عز وجل👌
يعني عقولنا عاجزة عن إدراك معرفة مخلوق مجاور له ، فإزاي عايزين نفهم ونُدرك حقيقة الخالق سبحانه وتعالى🙃
فحقيقة الروح وطبيعتها وهي إيه بالضبط؟ محدش يعرف عنها حاجة🤷‍♂️
لكن جاءت الآيات والأحاديث بوصف الروح بأوصاف معينة فقط،
فمن خلال الكتاب والسنة نقدر نوصل للنتائج التالية:
¤الروح ليست صفة من صفات الجسد زي الطول والعرض والبياض والسواد؛
لأن الصفة لا تقوم بنفسها، لكن الروح تقوم بنفسها، يعني هي شيء مستقل بذاته💁‍♂️

والنصوص من القرآن والسنة بتدل على أن:
¤الروح تدخل وتخرج وتصعد وتنزل وتُكَفّن وتُشَم وتُمسك وتُرسَل وتَسِيل وتُنَعم وتُعَذّب وتسمع وتبصِر، وتعلَم وتُسَاكن البدن وتُفارقه وتُنفَخ فتحل في البدن،
واحنا شوفنا ده لما الملائكة أخذوها وكفنوها👌

وكل ده بيدل على أنها جسم، لكنها جسم خفيف ملوش وزن ظاهر،
يعني منقدرش نجيب الروح كده ونحطها على الميزان ونعرف وزنها إيه زي باقي الأجساد المحسوسة إللي نقدر نوزنها😅
فنقدر نقول إن الروح هي الطاقة أو القوة المُدَبرة المُحرِّكة للجسد، فإذا فارقته بالموت خرجت منه الحياة وأصبح جثة هامدة👌

فالروح هي أساس حياتنا وهي المُحرك الرئيسي للجسد،
يعني هي إللي بتحس بالمشاعر سواء بالهم أو الحزن أو الألم أو...أو....
احنا نقدر نشبّه وجود الروح في الجسم وسريانها فيه؛ زي كده النار إللي بتسري في الفحم، وزي كده الكهرباء إللي بتسرِي أو بتمشي في الأسلاك،
يعني احنا مش شايفين الكهرباء لكن شايفين آثارها حوالينا، فكذلك الروح احنا مش شايفينها لكن شايفين آثارها على الجسد💁‍♂️
يعني الروح لما تدخل الجسد يحصل في الجسد ده الحس والحركة الإرادية، وإذا خرجت منه فَقَد الحس والحركة الإرادية،
يعني نقدر نقول إن الجسد ده بالنسبة للروح زي البدلة إللي بنلبسها، أو الدابة إللي بيركبها الإنسان عشان توصله لمكان معين.

🔹️️وأقرب كلام نقدر نفهم بيه العلاقة بين الجسد والروح؛ كلام تُرجمان القرآن عبد الله بن عباس رضي الله عنه،
قال الحافظ ابن كثير -رحمه الله- في تفسيره لقوله تعالى:
"ثُمَّ إِنَّكُمْ يَوْمَ الْقِيَامَةِ عِندَ رَبِّكُمْ تَخْتَصِمُونَ" الزمر آية(31)
أن ابن عباس رضي الله عنهما أنه قال:
"يَختصم الناسُ يوم القيامة، حتى تختصم الروح مع الجسد،
فتقول الروح للجسد: أنت فعلت
ويقول الجسد للروح أنت أمرت وأنت سوّلت...."
يعني الناس هيقعدوا يتخانقوا مع بعض وده يقول انت عملت كذا وانت عملت كذا، لدرجة إن الروح والجسد هيتخانقوا مع بعض وده يقول انت عملت كذا،
والتاني يقول انت إللي أمرتني أعمل كده وشجعتني على كده،
".....فيبعث الله تعالى مَلكًا يفصل بينهما، فيقول لهما إن مثلكما كمثل
رجل مُقعَد بصير والآخر ضرير دخلا بستانا،
فقال المُقعد البصير للضرير :
إني أرى هاهنا ثمارًا ولكن لا أَصل إليها،
فقال له الضرير: اركبني فتناوَلها، فركبه فتناولها،
فأيهما المعتدي؟
فقالا: كلاهما😕
فيقول لهما الملك: فإنكما قد حكمتُما على أنفسكما👌
يعني ربنا هيرسل مَلك للروح والجسد عشان يحكم بينهما،
فالملك بيقول لهم انتم الاتنين عاملين زي رجلين واحد مشلول مُقعد ولكنه بصير، ورجل ثاني أعمى لكنه بيقدر يتحرك، والاتنين دخلوا بستان،
فالرجل المشلول القاعد ده بيقول للأعمى أنا شايف ثمار حلوة بس مش هقدر آخد منها لأني مُقعد ومش هقدر أتحرك،
فالرجل الأعمى قال له تعال هشيلك واقطف الثمار دي،
فكده مين إللي يتعاقب🤔
فالروح والجسد هيقولوا: هم الاتنين يتعاقبوا لأنهم اشتركوا في الخطأ،
فقال لهما الملك انتم كده حكمتم على نفسكم؛ لأن الروح تركب الجسد زي لما الإنسان يركب الدابة عشان توصله لغايته زي ما قلنا👌

فالجسد مع الروح بيكوّنوا النفس البشرية،
يعني زي كده لما بنخلط ماء مع مسحوق الشاي فبيطلع لنا خليط جديد اسمه الشاي،
فالماء وبودرة الشاي بيكوّنوا مشروب الشاي، وزي بودرة القهوة لما بنضعها على الماء ونمزجها وبتتحول بعد كده لمشروب قهوة،
فكذلك الجسد مع الروح بيكوّنوا النفس البشرية👌

والنفس البشرية دي من أوصافها إنها ممكن تكون نفس أمارة بالسوء أو نفس لوّامة أو نفس مطمئنة زي ما ربنا قال في القرآن:
"إِنَّ النَّفْسَ لَأَمَّارَةٌ بِالسُّوءِ إِلَّا مَا رَحِمَ رَبِّي إِنَّ رَبِّي غَفُورٌ رَحِيمٌ" يوسف آية(53)
" وَلَا أُقْسِمُ بِالنَّفْسِ اللَّوَّامَةِ" القيامة آية( 2)
"يَا أَيَّتُهَا النَّفْسُ الْمُطْمَئِنَّةُ ۩ ارْجِعِي إِلَى رَبِّكِ رَاضِيَةً مَّرْضِيَّةً ۩ فَادْخُلِي فِي عِبَادِي ۩ وَادْخُلِي جَنَّتِي"
الفجر آية (27⬅️30)
والنفس بتيجي بمعنى الروح، يعني ربنا بيقول:
"وَلَوْ تَرَىٰ إِذِ الظَّالِمُونَ فِي غَمَرَاتِ الْمَوْتِ وَالْمَلَائِكَةُ بَاسِطُو أَيْدِيهِمْ أَخْرِجُوا أَنفُسَكُمُ"
《سورة الأنعام آية(93)》
فالمقصود هنا بالنفس: الروح👌
ولو تلاحظوا هتلاقوا إن في فرق بين《جسد وجسم》يعني ربنا في القرآن قال عن طالوت:
"إِنَّ اللّهَ اصْطَفَاهُ عَلَيْكُمْ وَزَادَهُ بَسْطَةً فِي الْعِلْمِ وَالْجِسْمِ "
البقرة آية(247)
فهنا قال الجسم؛ لأن طالوت بيتكون من روح وجسد، بعكس لما قال عن السامري لما صنع العجل لبني إسرائيل قال:
"فَأَخْرَجَ لَهُمْ عِجْلاً جَسَداً لَهُ خُوَارٌ" طه(88)
فربنا عبّر عن العجل بكلمة جسد لأنه لا روح فيه👌

💠السؤال السادس:
طيب هل ده معناه إن الروح هي سر الحياة🤔
لأ؛ لأن الروح أصلا بتدخل في جسد حي، يعني الجنين قبل ما تُنفخ فيه الروح بيكون حي فيه نبض، فالحياة شيء والروح شيء تاني خالص👌
وفي ضوء ما جاء في القرآن والسنة العلماء قالوا إن الحياة حياتان:
¤الحياة الأولى:
حياة ذات روح، تسمع وتُبصر، وتخرج وتأتي، وحركات إرادية،
والحياة دي للحيوانات، ولبني آدم،
يعني الحيوانات هي كمان لها روح، لكنها مختلفة عن أرواح البشر،
ولما تخرج الروح الخاصة بالحيوانات دي هي كمان؛ الحيوانات بتموت،
وطول ما الجسد قابل وصالح لوجود الروح فيه؛ بتفضل موجودة،
أما إذا خَرب الجسد ومبقاش صالح لوجود الروح فيه؛ هنا يأذن الله بخروج الروح من الجسد👌
والملائكة والجن برده لهم أرواح، لكنها كذلك مختلفة عن أرواح البشر👌

¤الحياة الثانية:
هي حياة النمو والزيادة والحركة اللاإرادية زي حياة النباتات والأشجار، ربنا جعلها تنمو وتشيب وتهلك، فالحياة دي حياة النمو بسبب الماء، أو بأسباب أخرى، وزي حياة الجنين قبل نفخ فيه الروح، بيكون فيه نبض ودورة دموية وحركة لا إرادية👌
فالحياة دي حياة خاصة، وليست حياة الروح التي تدخل وتخرج وتسمع، يعني حياة جمادية، ملهاش خصائص الروح التي فيها السمع والبصر والخروج والذهاب والمجيء والحس💁‍♂️


◇طيب هي الروح دي موجودة أصلا من زمان قبل خلق الأجساد ولّا بتيجي منين؟
◇وإيه ظاهرة: دَيْجَا فُو (Déjà vu ) وإيه تفسيرها في الإسلام؟
◇وإيه حكاية تناسخ الأرواح دي《 reincarnation》؟
◇وليه باب التوبة بيغلق عند الموت؟
طب لو واحد اتحكم عليه بالقتل أو كان في مكان بيحترق أو كان راكب طائرة مثلا والطائرة بتقع أو واحد مريض بالأمراض المهلكة زي الإيدز أو السرطان؛ هل كل دول توبتهم لا تصح؟
كل الأسئلة وغيرها هنعرف إجابتها في الحلقة الجاية من حلقات الأسئلة إن شاء الله،
إللي عنده سؤال يسيب تعليق وهجاوب عليه إن شاء الله في حلقات الأسئلة👇

♡طبعا أي ملاحظة ياريت تقوليلي فالمؤمن مرآة أخيه❤

#Eman_Shalapy

⭐ المصادر ⭐

https://dorar.net/hadith/sharh/65409

https://www.islamweb.net/ar/fatwa/279520/%D8%AE%D8%B1%D9%88%D8%AC-%D8%A7%D9%84%D8%B1%D9%88%D8%AD-%D8%B9%D9%86%D8%AF-%D8%A7%D9%84%D9%86%D9%88%D9%85-%D9%8A%D8%AE%D8%AA%D9%84%D9%81-%D8%B9%D9%86-%D8%AE%D8%B1%D9%88%D8%AC%D9%87%D8%A7-%D8%B9%D9%86%D8%AF-%D8%A7%D9%84%D9%85%D9%88%D8%AA

https://www.islamweb.net/ar/fatwa/69503/%D8%AD%D9%82%D9%8A%D9%82%D8%A9-%D8%A7%D9%84%D9%88%D9%81%D8%A7%D8%A9-%D8%A7%D9%84%D8%B5%D8%BA%D8%B1%D9%89-%D9%88%D8%A7%D9%84%D9%88%D9%81%D8%A7%D8%A9-%D8%A7%D9%84%D9%83%D8%A8%D8%B1%D9%89

http://quran.ksu.edu.sa/tafseer/qortobi/sura17-aya85.html

https://majles.alukah.net/t29554/

https://www.islamweb.net/ar/fatwa/46544/%D9%87%D9%84-%D9%84%D9%84%D9%85%D8%AE%D9%84%D9%88%D9%82%D8%A7%D8%AA-%D8%A7%D9%84%D8%A3%D8%AE%D8%B1%D9%89-%D8%A3%D8%B1%D9%88%D8%A7%D8%AD-%D8%A7%D9%84%D9%81%D8%B1%D9%82-%D8%A8%D9%8A%D9%86-%D8%A7%D9%84%D8%B1%D9%88%D8%AD-%D9%88%D8%A7%D9%84%D9%86%D9%81%D8%B3-%D9%88%D8%A7%D9%84%D8%AC%D8%B3%D8%AF

https://binbaz.org.sa/fatwas/2823/%D9%87%D9%84-%D9%84%D9%84%D9%86%D8%A8%D8%A7%D8%AA-%D8%A7%D9%84%D8%B0%D9%8A-%D9%8A%D9%86%D9%85%D9%88-%D8%B1%D9%88%D8%AD

https://islamweb.net/ar/library/index.php?page=bookcontents&idfrom=197&idto=199&bk_no=107&ID=182

http://www.saaid.net/Doat/almgamce/26.htm

Watch "وقفات من سورة لقمان درس الشيخ أحمد عبد المنعم" on YouTube
https://youtu.be/swl2vGYh6hk

https://youtube.com/watch?v=ss56A0UyheM&feature=share

https://youtube.com/watch?v=UaXnac5e4wk&feature=share

https://youtube.com/watch?v=ye2Fx2QVLbo&feature=share

https://youtube.com/watch?v=y3ZtjQLuI9o&feature=share

https://youtube.com/watch?v=Ma-s7ijp7kM&feature=share

https://youtube.com/watch?v=z4wx3JZ-Ylk&feature=share

https://ar.islamway.net/fatwa/41913/%D8%AD%D9%83%D9%85-%D9%82%D9%88%D9%84-%D8%A5%D9%86-%D8%B1%D9%88%D8%AD-%D8%A7%D9%84%D8%A5%D9%86%D8%B3%D8%A7%D9%86-%D8%AC%D8%B2%D8%A1-%D9%85%D9%86-%D8%B1%D9%88%D8%AD-%D8%A7%D9%84%D9%84%D9%87

https://islamqa.info/ar/answers/165456/%D9%87%D9%84-%D9%88%D8%AC%D9%88%D8%AF-%D9%86%D8%A8%D8%B6-%D9%84%D9%82%D9%84%D8%A8-%D8%A7%D9%84%D8%AC%D9%86%D9%8A%D9%86-%D9%8A%D8%B9%D8%AF-%D8%B9%D9%84%D8%A7%D9%85%D8%A9-%D8%B9%D9%84%D9%89-%D8%A7%D9%86%D9%87-%D9%82%D8%AF-%D9%86%D9%81%D8%AE-%D9%81%D9%8A%D9%87-%D8%A7%D9%84%D8%B1%D9%88%D8%AD

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

بوت الاسئلة الخاصة بقصص الأنبياء و السيرة النبوية

@prophetsstories_bot

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الرابعة
#حلقة_خاصة_للأسئلة_عن_المرحلة_الأولى_الجزء_الثاني
#تساؤلات_عن_ملك_الموت

وقفنا المرة إللي فاتت عند كم سؤال سألناه، الأسئلة كانت:
◇هي الروح دي موجودة من زمان قبل خلق الأجساد ولّا بتيجي منين؟
◇وإيه ظاهرة: دَيْجَا فُو (Déjà vu ) وإيه تفسيرها في الإسلام؟
◇وإيه حكاية تناسخ الأرواح 《 reincarnation》؟
◇وليه باب التوبة بيغلق عند الموت؟
طب لو واحد اتحكم عليه بالقتل أو كان في مكان بيحترق أو كان راكب طائرة مثلا والطائرة بتقع أو واحد مريض بالأمراض المهلكة زي الإيدز أو السرطان؛ هل كل دول توبتهم لا تصح؟

خلونا ناخدهم واحد واحد،
💠الأول:
هل الروح موجودة أصلا من زمان قبل خلق الأجساد ولّا بتيجي منين؟🤔

🔅موضوع هل الأرواح موجودة قبل خلق الأجساد ولّا بعدها على خلاف بين العلماء،
في فريق قال: إن الأرواح مخلوقة قبل الأجساد، وفريق قال إن الأجساد خُلقت الأول وبعدين الأرواح،
وكل فريق له أدلته من القرآن والسنة، يعني هم مش بيقولوا كده من دماغهم؛ لأن في أمور الغيب لازم دليل، محدش يقدر يتكلم برأيه😅👌
وأنا بصراحة مش حابة أدخل في التفاصيل؛ لأن الموضوع هيطول أوي كده وهندخل في متاهات🙈

🔹️لكن خُلاصة الموضوع وهو ده القول الراجح إن شاء الله:
🔺️بالنسبة لآدم عليه السلام فربنا خلق جسده قبل روحه،
🔻أما بالنسبة لنا احنا ذرية آدم عليه السلام فأرواحنا خُلقت قبل أجسادنا،
طبعا إللي قرأ معانا قصص الأنبياء هيفهم معنى الكلام، لكن خليني سريعا كده أوضح الموضوع عشان إللي مقرأش😅
شوفوا،
ربنا خلق آدم عليه السلام من قبضة قُبضت من الأرض، وجعله جسداً ثم نفخ الله جل وعلا فيه الروح،
وبعد أن نفخ الله فيه من روحه امتزجت تلك الروح التي خلقها الله جل وعلا في جسد آدم فأصبح آدم كائناً حياً ينطق،
وبعدها خلق الله عز وجل من ضلع آدم زوجته حواء وسكنوا الجنة مع بعض زي ما احنا عارفين،
فهنا نلاحظ إن جسد آدم عليه السلام خُلِق قبل روحه،
أما احنا بقى《بني آدم》 فأرواحنا اتخلقت الأول؛

¤إزاي 🤔
ربنا أخرج من ظهر آدم كل نَسَمة《يعني كل روح》من ذرية آدم من خلقه إلى يوم القيامة، وساعتها أخذ علينا العهد،
قال تعالى:
"وَإِذْ أَخَذَ رَبُّكَ مِن بَنِي آدَمَ مِن ظُهُورِهِمْ ذُرِّيَّتَهُمْ وَأَشْهَدَهُمْ عَلَى أَنفُسِهِمْ أَلَسْتُ بِرَبِّكُمْ قَالُواْ بَلَى شَهِدْنَا أَن تَقُولُواْ يَوْمَ الْقِيَامَةِ إِنَّا كُنَّا عَنْ هَذَا غَافِلِينَ" 《الأعراف آية (172)》
فالأرواح أهه مخلوقة، أما الأجساد فهي خُلقت وتكونت على هيئة أَجِنة في بطون أمهاتنا 👌
فلما يتكون الجنين في رحم الأم ويوصل عمره مائة وعشرين يوم، ربنا يرسل مَلك فينفخ الروح في الجنين ده👌
☆إللي عايز يعرف تفاصيل موضوع خلق الروح قبل الجسد هيلاقي الموضوع بالتفصيل في كتاب:
《لوامع الأنوار البهية وسواطع الأسرار الأثرية》
احنا إللي يهمنا من كل ده دلوقتي إن في روح دخلت الجسد وعاش الإنسان حياته بروح وجسد، وبعدين هييجي يوم وتخرج الروح من الجسد وتبدأ رحلتها في عالم البرزخ زي ما شرحنا كده👌

💠السؤال الثاني:
إيه هي ظاهرة: دَيْجَا فُو (Déjà vu ) وإيه تفسيرها في الإسلام🤔

🔅شوفوا،
مش ساعات بتحصل معانا مواقف ولما بنشوف المواقف دي بنحس إن الموقف ده حصل معانا قبل كده وإن مش دي أول مرة نعيش الموقف ده؟
أهه الظاهرة دي اسمها:
دَيْجَا فُو (Déjà vu) وهي كلمة فرنسية تعني "شُوهد من قبل"
الظاهرة دي ملهاش أي تفسير عندنا في الشريعة الإسلامية،
يعني معندناش نص من القرآن أو السنة بيوضح سبب إللي بيحصل ده، ولا حتى تكلم في الأمر أي أحد من علماء الإسلام،
فالله أعلم بحقيقة الأمر،
ولو كان في معرفتنا للأمر خير ، أو كان الموضوع ده مهم؛ كان ربنا أخبرنا بيه💁‍♂️
ولعل الموضوع متعلق بأمر الروح والله أعلم يعني وكده كده احنا منعرفش كتير عن الروح😅
إللي اتكلم في الظاهرة دي هم علماء النفس وعلماء الأعصاب،
وغيرهم من أصحاب المعتقدات الدينية المنحرفة،
وطبعا هنا أنا مش بناقش الظاهرة دي،
أنا بس حبيت أنبه على معلومة ممكن تكون محيرة بعض الناس😁

💠السؤال الثالث:
إيه حكاية تناسخ الأرواح دي《 reincarnation》🤔

🔅تناسخ الأرواح معناه إن الجسد إذا مات؛ الروح تنتقل منه إلى جسد آخر ، تسعد فيه أو تشقى نتيجة ما قدمته من عمل ، وتفضل كده تنتقل من جسد إلى جسد،
وطبعا الكلام ده بااااطل، والإيمان والتصديق بتناسخ الأرواح؛ أعظم الكفر بالله تعالى وبكتبه ورسله 👌
يا جماعة كل مخلوق له روح خاصة بيه، مفيش حاجة اسمها إن الروح تخرج من جسد واحد وتقوم داخلة في جسد حد تاني سواء بشر أو حيوان أو يحصل تبادل أرواح،

أو إن مثلا الروح تسافر عبر الزمن 😬
الكلام ده خرافة وغير صحيح إطلاقا🙅‍♂️❌
الروح بعد الموت إما بتُنعم أو بتعذب لحد يوم القيامة زي ما هنشوف بالتفصيل إن شاء الله،
انتبهوا من النقطة دي عشان إللي بيتابع أنمي أو مانجا يبقى عارف؛ لأن الموضوع ده مالي الأنمي، وكمان في ناس مشهورة ظاهرهم الإسلام بيقولوا بيه، وللأسف الجهل منتشر جدا ومحدش بقى له صبر إنه يتعلم😞
فانتبهو وعرفوا عيالكم العقيدة الصحيحة عن اليوم الآخر👌
《لتفاصيل أكثر عن الموضوع؛ هتلاقوا الرابط في التعليقات من موقع الإسلام سؤال وجواب👇》

💠السؤال الرابع:
دايما بنسمع عن حاجة اسمها:《سكرات الموت》وفي منكم إللي شاف ناس وهي في سكرات الموت، فإيه هي السكرات دي🤔

🔅️سكرة الموت:
هي حالةٌ من الإغشاء سببها شدّة المُعاناة والألم التي تُصيب الإنسان وهو يحتضر يعني في وقت مغادرة الروح للجسد،
فهو بيكون في حالة ما بين إنه واعي ومش واعي في نفس الوقت،
ومدة سكرات الموت وشدتها تختلف من شخص لآخر،
يعني ممكن ناس يقعدوا في سكرات دي أيام، وممكن ساعات وممكن لحظات،
قال تعالى:
"وَجَاءَتْ سَكْرَةُ الْمَوْتِ بِالْحَقِّ ذَلِكَ مَا كُنْتَ مِنْهُ تَحِيدُ"
《سورة ق آية (19)》
وهي بتكون أشد ما يكون على الكافرين،
والمؤمن ممكن يشتد عليه سكرات الموت عشان ربنا يرفع درجته في الجنة ويكفّر عنه سيئات له مكنش تاب منها،
وممكن تكون سكرات الموت خفيفة على كثير من المؤمنين👌
فخلاصة الكلام إن النّاس في بينهم اختلاف في شدّة سكرات الموت وضعفها،
ففي منهم إللي بيعاني من سكرات الموت، ومنهم إللي مش بيحس بسكرات الموت، فينتقل بين الحياة والموت كما ينتقل النّائم بين اليقظة والغفلة.

🔸️لكن يا جماعة مفيش علاقة بين شدّة سكرات الموت وقوّة الإيمان أو ضعفه 👌
يعني احنا عندنا رسول الله ﷺ وهو أفضل الخلق كان يعاني من سكرات الموت، قال رسول الله ﷺ وهو في مرض موته:
"لا إله الإ الله، إنّ للموت سكرات"
《صحيح البخاري》
فمن الشدة إللي تعرض لها رسول الله ﷺ وقت الموت؛ نعرف إن شدة سكرات الموت مش علامة من العلامات إللي بتدل على سوء عاقبة المتوفى أو إن هَوْن الموت وسهولته يبقى من الكرامات👌
ورسول الله ﷺ قال:
"المؤمنُ يموتُ بعرَقِ الجَبينِ"《صحيح الترمذي》
الجبين يعني الجبهة إللي بنسجد عليها،
والعرق بيبقى بسبب شدة الموت، فشدة الموت هتؤدي إلى تمحيص الذنوب أو رفع الدرجات، وقيل في معنى الحديث هو علامةُ الخيرِ عندَ الموتِ،
المهم يعني إن كل البشر هيعانوا من سكرات الموت،
لكنها بدون شك أهون على المؤمن بكثير مهما اشتدت عليه مقارنة باللي هيعاني منه الفاجر والكافر 👌
ربنا يهون علينا وعليكم سكرات الموت يارب🤲

💠طيب إيه حكاية الغرغرة بتاعة الموت دي😥

🔅قال رسول الله ﷺ:
"إنَّ اللهَ يَقبَلُ توبةَ العبدِ ما لم يُغَرْغِرْ"
《صحيح الترمذي》
يعني ربنا بيقبل من عبده التوبة والرجوع للحق مادام هو لسه في وعيه ومدخلش في حالة الاحتضار إللي العبد يرى فيها ملائكةَ ربِّه ويتيقَّنُ أنَّه ميِّتٌ ولا اختيارَ له في العودةِ؛《فإنَّ التَّوبةَ بعدَ التَّيقُّنِ بالموتِ لا يُعتَدُّ بها》👌
والروح بتكون موجودة في كل أعضاء الجسد، وبتسري فيه زي سريان الكهرباء في الأسلاك،
فلما الروح بتخرج من الجسد؛ بيبدأ خروجها من القدم وبتستمر مغادرة الروح للجسد لحد ما توصل الروح للحلقوم،
وأول ما توصل الروح للحُلقوم تحصل 《الغرغرة》 وهي بتبقى عبارة عن أصوات بتصدر من الشخص إللي قاربت روحه على فراق جسده تماما👌

💠ممكن حد يسأل ويقول:
طيب ليه باب التوبة بيتقفل هنا😢

🔅السبب في كده إن توبة العبد وإيمانه في اللحظة دي بالذات عند الغرغرة بقى إيماناً مشاهداً زي إيمان الناس في يوم القيامة،
وإللي بينفع ويقبله الله هو الإيمان الاختياري بالغيب مش إن الواحد بقى مُجبر على الإيمان لأنه خلاص شاف الملائكة👌
زي فرعون كده يا جماعة لما خلاص أدركه الغرق وتيقن بالهلاك وعرف الحق وشاف عذاب ربنا واقع به قال:
"آمَنْتُ أَنَّهُ لا إِلَهَ إِلا الَّذِي آمَنَتْ بِهِ بَنُو إِسْرَائِيلَ وَأَنَا مِنَ الْمُسْلِمِينَ"
فطبعا هنا مش هينفع له توبة💁‍♂️

وده هياخدنا للسؤال إللي بعد كده،

💠هل معنى الكلام إن لو واحد اتحكم عليه بالقتل أو كان في مكان بيحترق أو كان راكب طائرة مثلا والطائرة بتقع أو واحد مريض بالأمراض المُهلكة زي الإيدز أو السرطان؛ هل كل دول توبتهم لا تصح🤔

🔅لأ بالعكس، لو تابوا توبتهم صحيحة؛ لأن الموت لسه محصلش أصلا، يعني في احتمال نجاتهم من الموت،
فلو واحد مثلا موجود في بيت يحترق؛ ممكن حد يأتي وينقذه، بعكس واحد خلاص أصلا اتحرق وبيطلّع في الروح وشاف الملائكة وهم بياخدوا روحه وبلغت روحه الحلقوم،

والمريض مرض مُهلك أو إللي اتحكم عليه بالقتل، كل دول لم ينزل بهم الموت فتكون توبتهم مقبولة،
والسبب في عدم قبول التوبة إنه خلاص زي ما قلنا شاف الملائكة ومش هينفعه الإيمان هنا،
وكمان نقطة مهمة وهي إن من شروط التوبة الصحيحة إللي ربنا يَقبلها هي:
العزم على عدم العودة للذنب 👌
يعني إن الواحد يكون ناوي نية صادقة إنه مش هيعمل الذنب ده تاني أبدا في حياته في المستقبل،
فلو خلاص حياته انتهت؛ إزاي هيعزم على عدم فعل شيء في مستقبل مش موجود أساسا🤷‍♂️
فمادام الإنسان لسه لم ينزل به الموت فهو عنده فرصة للتوبة والرجوع إلى الله👌

💠طيب احنا قعدنا نقول ملك الموت وملائكة الرحمة وملائكة العذاب والملائكة إللي في السماء، إيه موضوع الملائكة ده🤨

🔅مبدئيا كده الملائكة هي مخلوقات من نور، من صفاتهم إنهم لا يعصون الله ما أمرهم، وعددهم كبير جدا لا يعلمه إلا الله👌
والملائكة لها أعمال مختلفة ربنا أمرهم بها،
يعني مثلا:
🔹️جبريل عليه السلام هو المُوَكَل أو المسؤول عن توصيل الوحي من الله إلى رسله عليهم السلام.
🔹️والمَلك ميكال أو ميكائيل هو المُوَكَّل أو المسؤول عن تصريف المطر.
🔹️والمَلك إسرافيل هو المُوَكَّل بالنفخ في الصُّور.
🔹️وفي ملائكة مُوَكَّلين بحفظ وكتابة أعمال العباد من خير أو شر وهم: الكِرام الكاتبون، فالذي عن اليمين يكتب الحسنات، والذي عن الشمال يكتب السيئات.
🔹️وفي ملائكة مُوَكَّلين بقبض الأرواح وهو:
ملك الموت وأعوانه،

¤في ناس بتقول إن مَلك الموت اسمه عزرائيل، لكن الاسم ده لم يثبت في القرآن أو السنة، لكن ربنا قال عنه في القرآن:
《ملك الموت》عليه السلام، واسم عزرائيل ده جاء في بعض الإسرائليات،
واحنا اتكلمنا عن حكم الأخذ بالإسرائيليات في قصص الأنبياء، فاحنا منقدرش نقول إن الاسم ده صحيح أو خطأ لأن احنا منعرفش؛ لكن إللي نعرفه أكيد إن ربنا قال عنه في القرآن: ملك الموت،
قال تعالى:
"قُلْ يَتَوَفَّاكُمْ مَلَكُ الْمَوْتِ الَّذِي وُكِّلَ بِكُمْ ثُمَّ إِلَى رَبِّكُمْ تُرْجَعُونَ"
《في سورة السجدة آية (11)》
فاحنا هنقول عليه ملك الموت زي ما ربنا قال لنا.

يبقى ملك الموت هو المُوَكل والمسؤول عن قبض أرواح البشر👌

💠ممكن حد يسأل ويقول:
إزاي يعني ملك الموت هو المسؤول عن قبض الأرواح وربنا بيقول في سورة الأنعام آية(61):
"حَتَّىٰ إِذَا جَاءَ أَحَدَكُمُ الْمَوْتُ تَوَفَّتْهُ رُسُلُنَا وَهُمْ لَا يُفَرِّطُونَ"
وقال في سورة النساء آية (97 ):
"إِنَّ الذين تَوَفَّاهُمُ الملائكة ظالمي أَنْفُسِهِمْ"
فده معناه كده إن في أكثر من مَلك يقبض الروح 😕

🔅لأ مش كده،
ملك الموت له أعوان أو خلينا نقول مساعدين تحت أمره بيساعدوه في قبض الأرواح،
يعني هم بِيُخرجوا الروح من الجسد بأمر من ملك الموت، وأول ما الروح توصل للحُلقوم يقبضها ملك الموت،
هقول لكم مثال لتقريب الصورة،
عارفين لما الواحد بيروح يعمل عملية، أو بيروح عشان يكشف، مش بيبقى في ممرضات وممرضين هم إللي بيجهزوا المريض للعملية بأمر من الطبيب، وبعد كده الطبيب هو إللي بيقوم بعمل العملية أو بالكشف على المريض🤔
لما العملية بتخلص بنقول إللي عمل العملية مين؟
مش الطبيب؟
فكون إننا بنقول إن الطبيب هو إللي عمل العملية ده مش معناه إن مكنش معاه مساعدين💁‍♂️
وممكن برده نقول إن الطاقم الطبي هو إللي عمل العملية، ومن ضمن الطاقم الطبي ده: الطبيب👌
فهو تقريبا نفس الوضع مع الملائكة هنا،
الملائكة بتجهز الروح للخروج من الجسد بأمر ملك الموت وأول ما تيجي لحظة الخروج إللي هي خلاص المرحلة النهائية إللي شرحناها؛ يقوم ملك الموت بعملية قبض الروح👌
《وده قول عبد الله بن عباس رضي الله عنه وغيره من المفسرين》راجعوا تفسير ابن كثير.

💠طيب لو في ناس هتموت في نفس اللحظة، إزاي ملك الموت بيقبض أرواحهم كلهم في نفس الوقت👀

🔅شوفوا،
ربنا بيقرب لملك الموت مسافات الأرض حتى تكون بين إيده زي القصعة، يعني زي الطبق إللي بيكون بين إيدنا يأخذ من حيث شاء،
وده كلام عبد الله بن عباس برده👌
وتاني بفكركم، ده عالم غيب منعرفش عنه حاجة غير إللي ربنا أخبرنا بيه في القرآن والسنة، وفي أمور عقولنا مش هتستوعبها، فاحنا لازم نؤمن بالغيب سواء كنا مستوعبين أو لأ 👌

💠طب هو ملك الموت مسؤول عن قبض أرواح باقي الخلق ولّا لأ 🤔

🔅الظاهر والله أعلم إن ملك الموت هو المسؤول عن قبض الأرواح بصفة عامة، سواء من البشر أو من الجن أو من الملائكة أو الحيوانات،
لكن مفيش دليل صحيح صريح واضح بيقول إن ملك الموت هو إللي بيقبض أرواح الملائكة والحيوانات والجن وباقي الخلق،
لكن عندنا أدلة صحيحة وواضحة بتثبت إن ملك الموت بيقبض أرواح البشر، وهو ده إللي يهمنا يا جماعة👌

يعني احنا بنتعلم إللي يفيدنا وينفعنا في أمور ديننا، والمفروض ننشغل بالتدبر والتأمل في الأمور إللي تزيد قوة الإيمان والاستعداد الجاد لما بعد الموت من أهوال،
ومعرفتنا بالموضوع مش هينبني عليه عمل،
إللي يهمنا إننا نعرف إن ملك الموت هيقبض أرواحنا احنا كبشر وكل واحد فينا هيواجه اللحظة دي فلازم نكون مستعدين لها👌

♻️في معلومة استنتجتها وأنا بكتب الحلقة لكن الله أعلم هي صحيحة أو لأ، لأني بصراحة مقرأتش فيها حاجة😅
فهقولها لكم من باب العلم بالشيء،
ربنا قال:
"قُلْ يَتَوَفَّاكُمْ مَلَكُ الْمَوْتِ الَّذِي وُكِّلَ بِكُمْ ثُمَّ إِلَى رَبِّكُمْ تُرْجَعُونَ"
《سورة السجدة آية (11)》
والقرآن نزل للثَّقلين:《لإنس والجن》، يعني الآية هنا بتخاطب الجن زي ما بتخاطب البشر، يبقى ده كده معناه إن ملك الموت هو إللي بيقبض أرواح الجن👌
والله أعلم🙈

💠آخر سؤال معانا عن الروح:
هل الروح تفنى زي ما ربنا قال:
"كُلُّ مَنْ عَلَيْهَا فَانٍ" 《الرحمن آية (26)》🤔

🔅هو مش معنى الآية إن الروح هتفنى فناء العدم زي ما الجسد بيفنى ويتحلل، لأ،
الروح أيوة هتذوق الموت لأن:
"كُلُّ نَفْسٍ ذَائِقَةُ الْمَوْتِ" 《آل عمران آية (185)》
وموتها هو مفارقتها للجسد زي ما قلنا لكن هي هتفضل موجودة إما تُنَعَّم أو تُعَذَّب في عالم البرزخ إلى يوم القيامة زي ما هنشوف إن شاء الله؛ لكنها مش هتنعدم نهائي👌
وبكده يبقى خلصنا أكثر الأسئلة المتعلقة بالمرحلة الأولى وهي الموت،
إن شاء الله من الحلقة الجاية هنتكلم عن المرحلة الثانية من رحلة الروح إلى عالم البرزخ👌

♡طبعا أي ملاحظة ياريت تقوليلي فالمؤمن مرآة أخيه❤

#Eman_Shalapy

⭐المصادر⭐

https://www.google.com/amp/s/islamqa.info/amp/ar/answers/14379

https://dorar.net/aqadia/2130/%D8%A7%D9%84%D9%85%D8%A8%D8%AD%D8%AB-%D8%A7%D9%84%D8%AB%D8%A7%D9%86%D9%8A:-%D8%A7%D9%86%D9%82%D8%B7%D8%A7%D8%B9-%D8%A7%D9%84%D8%AA%D9%88%D8%A8%D8%A9-%D8%A8%D8%AD%D8%B6%D9%88%D8%B1-%D8%A7%D9%84%D9%85%D9%88%D8%AA

https://almunajjid.com/speeches/lessons/173

https://www.islamweb.net/ar/fatwa/74868/%D9%87%D9%84-%D8%AA%D9%82%D8%A8%D9%84-%D8%AA%D9%88%D8%A8%D8%A9-%D9%85%D9%86-%D8%A3%D8%B4%D8%B1%D9%81-%D8%B9%D9%84%D9%89-%D8%A7%D9%84%D9%85%D9%88%D8%AA

https://www.dorar.net/hadith/sharh/65540

https://www.google.com/amp/s/islamqa.info/amp/ar/answers/40671

https://www.google.com/amp/s/islamqa.info/amp/ar/answers/213293

https://www.google.com/amp/s/islamqa.info/amp/ar/answers/39201

https://www.google.com/amp/s/islamqa.info/amp/ar/answers/128486

https://www.islamweb.net/ar/fatwa/20657/

https://islamqa.info/ar/answers/229770/%D9%87%D9%84-%D8%A7%D9%82%D9%88%D8%A7%D9%84-%D8%B9%D9%84%D9%85%D8%A7%D8%A1-%D8%A7%D9%84%D8%B5%D8%AD%D8%A7%D8%A8%D8%A9-%D8%AD%D8%AC%D8%A9-%D9%84%D8%A7-%D9%8A%D8%AC%D9%88%D8%B2-%D9%85%D8%AE%D8%A7%D9%84%D9%81%D8%AA%D9%87%D8%A7

https://www.google.com/amp/s/islamqa.info/amp/ar/answers/228565

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman