⭐المصادر⭐

Watch "01 طريق الإيمان قصة بداية الخلق ثم خلق آدم عليه السلام" on YouTube
https://youtu.be/aV-pnrYZztI

موسوعة قصص الانبياء - 1- بداية الخلق و قصة ادم في الجنة - الدكتور طارق السويدان - SoundCloud
Listen to موسوعة قصص الانبياء - 1- بداية الخلق و قصة ادم في الجنة - الدكتور طارق السويدان by Tadbrr #np on #SoundCloud
https://soundcloud.com/tadbrr/1-4

قصة آدم عليه السلام - الشريط الأول - سلسلة قصص الأنبياء للشيخ مسعد أنور - SoundCloud
Listen to قصة آدم عليه السلام - الشريط الأول - سلسلة قصص الأنبياء للشيخ مسعد أنور by وداعياً إلي الله بإذنه #np on #SoundCloud
https://soundcloud.com/user101419967/ddf41dru9av5

https://islamqa.info/ar/answers/145808/ما-الحكمة-من-خلق-الله-تعالى-ادم-عليه-السلام-على-مراحل-مع-قدرته-على-خلقه-بكلمة-كن

https://islamqa.info/ar/answers/72470/هل-كان-قبل-ادم-عليه-السلام-على-الارض-احد

http://fatwa.islamweb.net/fatwa/index.php?page=showfatwa&Option=FatwaId〈=A&Id=129754

https://islamqa.info/ar/answers/145808/ما-الحكمة-من-خلق-الله-تعالى-ادم-عليه-السلام-على-مراحل-مع-قدرته-على-خلقه-بكلمة-كن

https://ar.m.wikisource.org/wiki/قصص_الأنبياء_لابن_كثير/الجزء_الأول

https://ar.m.wikisource.org/wiki/البداية_والنهاية/الجزء_الأول/باب_خلق_الجان_وقصة_الشيطان

https://ar.m.wikisource.org/wiki/البداية_والنهاية/الجزء_الأول/باب_خلق_آدم_عليه_السلام

#قصص_الأنبياء
#الحلقة_الثانية
#قصة_آدم_الجزء_الثاني
#عصيان_إبليس_وخلق_حواء

وقفنا عند الملائكة إللي سجدت لآدم ماعدا كائن واحد لم يسجد وعصى أمر ربنا،
الكائن ده هو إبليس😬
قلنا عن إبليس إنه كان من الجن،
◇والجن ربنا خلقهم من لهيب أسود شديد الحرارة
إللي هو مَارِج من نار◇

¤ملحوظة مهمة¤
☆الجن ده عالم زي عالم البشر كده فيهم المؤمن والكافر....وكلمة شيطان تتقال على من كَفَر من الجن،
لكن مؤمنوا الجن لا يُقال عليهم شياطين،
فالشياطين جزء من الجن☆

ربنا رفع إبليس للسماء مع الملائكة مع إن الملائكة أفضل منه وأكرم،
حتى إن الملائكة كانت تقول:
ما خلق الله خلقا إلا وكنا أكرم منه وأعلم منه.
وطبعا الهدف إللي ربنا خلق البشر والجن عشانه هو إنهم يعبدوه سبحانه 👌
"وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ"

◇طيب السؤال إللي بيطرح نفسه هنا،
ربنا أمر الملائكة إنها تسجد لآدم عليه السلام، إيه إللي دخل إبليس في الموضوع🤔

احنا قلنا إن الملائكة هم أعظم وأكرم المخلوقات صح؟
طيب لما الأمر ييجي لشخص عظيم وينفذّه ...الطبيعي طبعا إن الأقل منه منزلة ينفذه بكل تلقائية،
فكان يجب على إبليس إللي أقل مكانة من الملائكة إنه يسمع كلام ربنا💁‍♂️

طيب خلونا نقول إن إبليس فِهم غلط واختلط عليه الأمر🙄
الطبيعي في الموقف ده إنه يقول إيه؟
يقول يارب إنت أمرت الملائكة وأنا من الجن فمكنتش عارف إني أنا كمان لازم أسجد😅
هو بقى مقلش كده😑
ده قال بكل بجاحة وكِبر :
" قَالَ لَمْ أَكُن لِّأَسْجُدَ لِبَشَرٍ خَلَقْتَهُ مِن صَلْصَالٍ مِّنْ حَمَإٍ مَّسْنُونٍ"
عارفين يعني إيه؟!
كأنه بيقول: أنا مسجدش لكائن متعفن 🙄

متستغربوش...متستغربوش😅
مش احنا قلنا المرة إللي فاتت إن الحمأ المسنون معناها الطين المتعفن الأسود،
وإبليس شاف مراحل خلق آدم،
فهو شايف نفسه إنه مخلوق من نار والنار دي حاجة عظيمة وأحسن من الطين المتعفن ده،
ده غير القدرات إللي عنده زي إنه ممكن يتمثل في صور متعددة زي صورة البشر أو الحيوان،

وآدم من وجهة نظره مخلوق من طين متعفن وكمان أجوف ،
فإزاي بقى النار العظيمة تسجد لطين متعفن😏
فكل كلامه فيه انتقاص من آدم عليه السلام،
مع إن الطين أنفع وخير من النار،
فالطين فيه: الرزانة، والحلم، والأناة، والنمو.
والنار فيها: الطيش، والخِفة، والسرعة، والإحراق.

فهو من الأول كده وقلبه فيه حسد من آدم بسبب إن ربنا خلقه بيده وأعطاله اهتمام وفوق كل ده أمره هو و الملائكة بالسجود له ،
يعني هو كان متعمد أصلا إنه ميطعش أمر ربنا بالسجود لآدم،
يعني معندهوش أي شبهة أهه ولا عذر😑
وخصوصا إن ربنا أصلا وجه الأمر مبااااشرة لإبليس بالسجود،
"قال مَا مَنَعَكَ أَلَّا تَسْجُدَ إِذْ أَمَرْتُكَ"
فإبليس عصى أمر ربنا عامد متعمد،

وهنا يا جماعة يبان بقى صِدق العبودية لله👌
مش ربنا كرّم إبليس بسبب علمه وعبادته؟
فالصادق في العبادة لله هينفذ أوامر ربنا حتى لو كانت مخالفة لهواه وهيقدم أومر ربنا على رغباته💁‍♂️

¤=وقفة هنا بقى مع نفسنا، نبص في حياتنا كده،
هل بنعبد ربنا كما يُريد ونطيع أوامره ولا بنعبد ربنا في الحاجات إللي على مزاجنا وحسب ظروفنا بس؟!=¤

فربنا لما أمر إبليس بحاجة عكس هواه؛
هل ضحّى إبليس وداس على هواه عشان ربنا وتقبل أوامره
ولا رفض أوامر ربنا وقعد يجادل ويبرر معصيته الواضحة😑

☆أكيد كلنا قابلنا في الحياة نماذج من البشر كده،
تقولها الصح تقعد تبرر وتدور على أي حجة وتجادل بالباطل،
سواء في أمور الدين أو الدنيا،
عشان كده لازم لما نسمع الصح من ربنا ننفذ،
حتى لو مقدرناش ننفذ على طول يبقى منردش الحق لأي سبب،
لما نتقبل الصح طاعة لله، ربنا هيسهله علينا بعد كده👌

المهم،
بسب بقى معصية إبليس دي ربنا طرده من رحمته وتوعّده بدخول النار،
هنا إبليس طلب من ربنا إنه يمد له في عمره لحاااد يوم القيامة،
طيب الطلب العجيب ده ليه؟
هل هو ناوي إنه يقضي الحياة دي تائب لله وطائع لعل ربنا يتجاوز عنه ويغفرله 😔
لأ 😑
ده طلب من ربنا كده عشان يُهلك بني آدم!!
قال لربنا مش انت يارب أضلتني، طيب أنا بقى هضل ذرية آدم،
" قَالَ فَبِمَا أَغْوَيْتَنِي لَأَقْعُدَنَّ لَهُمْ صِرَاطَكَ الْمُسْتَقِيمَ"
وهزيّن لهم المعصية وأحبّبهم فيها ومش هسيبهم لحد ما أضلهم كلهم،
"إلا عبادك منهم المُخلَصين"
فربنا حققله أمنيته وإداله العمر الطويل ،
" قَالَ فَإِنَّكَ مِنَ الْمُنظَرِينَ"
وقاله اعمل إللي انت عايزه، أي حد هيتبعك هيدخل معاك جهنم،
" لَّمَن تَبِعَكَ مِنْهُمْ لَأَمْلَأَنَّ جَهَنَّمَ مِنكُمْ أَجْمَعِينَ"
وأي حد هيتوب ويستغفر ويرجع هقبله وهيكون جزاؤه الجنة،
وده كان بداية العداء بين إبليس وذريته وآدم وذريته،
احنا هنسيب إبليس دلوقتي ونرجع لآدم عليه السلام ونشوف حصل معاه إيه👌

بعد ما ربنا خلق آدم مسح الله على ظهر آدم ،فنزلت أرواح ذرية آدم كووولهم من بداية الخلق حتى قيام الساعة بين يديه سبحانه،
زي ما رسول الله ﷺ قال في الحديث:
"أَخَذَ اللهُ الْمِيثَاقَ م

ِنْ ظَهْرِ آدَمَ ، فَأَخْرَجَ مِنْ صُلْبِهِ كُلَّ ذُرِّيَّةٍ ذَرَأَهَا، فَنَثَرَهُمْ بَيْنَ يَدَيْهِ كَالذَّرِّ "
وهنا ربنا أخذ عليهم العهد وسألهم:
"أَلَسْتُ بِرَبِّكُمْ".....فقال البشر كلهم: "قَالُوا بَلَى شَهِدْنَا"
وده معنى الآية:
"وَإِذْ أَخَذَ رَبُّكَ مِنْ بَنِي آدَمَ مِنْ ظُهُورِهِمْ ذُرِّيَّتَهُمْ وَأَشْهَدَهُمْ عَلَى أَنْفُسِهِمْ أَلَسْتُ بِرَبِّكُمْ قَالُوا بَلَى شَهِدْنَا أَنْ تَقُولُوا يَوْمَ الْقِيَامَةِ إِنَّا كُنَّا عَنْ هَذَا غَافِلِينَ"

آدم عليه السلام شاف ذريته ....شاف الفقير وشاف الغني وشاف السعيد وشاف الشقي،
فسأل ربنا ليه يارب فيهم الغني والفقير، ليه كلهم مش زي بعض؟
فقال الله:
"أردتُ أن أُشكَر"
وقال الله هؤلاء -من على اليمين- في الجنة ولا أبالي وهؤلاء-من على الشمال- في النار ولا أبالي،

فهنا واحد من الصحابة من إللي كانوا بيسمعوا القصة سأل رسول الله ﷺ :
طيب احنا نعمل أعمال صالحة ليه بقى؟ مش ربنا قضى الأمر خلاص 😳
فقال رسول الله ﷺ :
"اعملوا فكل مُيسر لما خُلق له"
يعني لما تلاقي نفسك بتعمل الخيرات وبتطيع ربنا صح،
يبقى انت إن شاء الله نهايتك للجنة،
ولو إنسان ماشي في طريق المعاصي لا يعرف معروف ولا يُنكر منكر ومش في دماغه حاجة،
ده مصيره إلى النار إلا أن يشاء الله حاجة تانية 😅

سكن آدم عليه السلام الجنة وأكل من ثمرها وعاش فيها لكنه استوحش، فربنا خلق له حواء عشان تُؤنسه،
كان نايم مرة وبعدين استيقظ لقى كائن تاني جنبه
مختلف عنه،
فلما شافها جنبه سألها انت ِمين؟!
فقالت له :امرأة،
فسألها: وليه اتخلقتي؟
قالت : لتسكن إليّ.
فآدم خُلق من تراب عشان كده الرجال يأنسوا إلى الدنيا،
وحواء خُلقت من آدم عشان كده المرأة بتأنس للرجل،

عدّى على آدم وحواء مجموعة من الملائكة وسألوه من دي يا آدم،
كانوا عايزين يختبروه يعني؛
لأن ربنا كان علّم آدم أسماء كل شيء، وعرضهم على الملائكة فمعرفوش وآدم إللي عرف،
"وَعَلَّمَ آدَمَ الْأَسْمَاءَ كُلَّهَا ثُمَّ عَرَضَهُمْ عَلَى الْمَلَائِكَةِ فَقَالَ أَنبِئُونِي بِأَسْمَاءِ هَٰؤُلَاءِ إِن كُنتُمْ صَادِقِينَ ۩
قَالُوا سُبْحَانَكَ لَا عِلْمَ لَنَا إِلَّا مَا عَلَّمْتَنَا ۖ إِنَّكَ أَنتَ الْعَلِيمُ الْحَكِيمُ"

فآدم عليه السلام قال لهم : حواء
فالملائكة سألته اشمعنى حواء،
فقال: لأنها خُلقت من شيء حي،

☆ وهو إيه الشيء الحي إللي حواء خُلقت منه😳

هي خُلقت من ضلع آدم عليه السلام الأيسر وربنا جعل مكان الضلع ده لحم، ومعنى خُلقت إن ربنا أخرجها من آدم زي ما بتخرج النخلة من النواة👌
عشان كده رسول الله ﷺ قال:
" استوصوا بالنساء، فإن المرأة خُلقت من ضلع،
وإن أعوج شيء في الضلع أعلاه، فإن ذهبت تقيمه كسرته، وإن تركته لم يزل أعوج، فاستوصوا بالنساء.
يعني النساء مختلفات عن الرجال، بسبب أصل خِلقتهن، فلازم الرجل يعامل المرأة على حسب خلقتها هي ويحسن إليها ويصبر عليها،
مش إنه يعاملها كأنه بيعامل رجل زيه وميراعيش إن مشاعرها بتغلب عليها في أغلب الأوقات👌

كانت حواء أجمل النساء على الإطلاق،
تيجي وراها في درجة الجمال على طول سارة زوجة إبراهيم عليه السلام👌
عاشت حواء مع آدم في الجنة وربنا قالهم كل الجنة لكم،
جنة عرضها السماوات والأرض،
كلوا إللي انتم عايزينه، روحوا في المكان إللي نفسكم فيه،
إلا الشجرة دي...شجرة واحدة بس متقربوش منها،
وفعلا عاش آدم وحواء في الجنة ومكنوش بيقربوا من الشجرة دي خالص،
واحنا منعرفش نوع الشجرة دي إيه، هي شجرة وخلاص، مفيش دليل عندنا في الإسلام إذا كانت دي شجرة تفاح أو شجرة إيه تحديدا🤷‍♂️

مين بقى إللي بيراقب وبيخطط من بعيد ومستني الفرصة😈
إبليس😑

ربنا كان حذّر آدم وحواء من إبليس وقالهم إنه مش هيسيبكم، هيعمل كل حاجة يقدر عليها عشان يطلعكم من الجنة فمتسمعوش كلامه مهما حصل،
"فَقُلْنَا يَا آدَمُ إِنَّ هَٰذَا عَدُوٌّ لَّكَ وَلِزَوْجِكَ"

وإبليس كل شوية عمال يِغري آدم بالشجرة ويزينها له وآدم
" يَا آدَمُ هَلْ أَدُلُّكَ عَلَىٰ شَجَرَةِ الْخُلْدِ وَمُلْكٍ لَّا يَبْلَىٰ"

وآدم عليه السلام ولا معبّره أصلا🙄
ومع ذلك إبليس ميأسش ،
عنده هدف ...هو عايش بس عشان يِغوي ويضل آدم وذريته،
عمال يفكر ويدور على طريقة يخلي آدم ياكل من الشجرة،
شاف إن آدم بيعظّم ربنا أوي ،
فعمل إيه؟!
أَقسم بالله لآدم إنه فعلا ناصح ليهم وإن الشجرة دي شجرة الخلد وأول ما ياكلوا منها هيكونوا من الملائكة،
" وَقَالَ مَا نَهَاكُمَا رَبُّكُمَا عَنْ هَٰذِهِ الشَّجَرَةِ إِلَّا أَن تَكُونَا مَلَكَيْنِ أَوْ تَكُونَا مِنَ الْخَالِدِينَ "

&&&ستوووووب ثواني كده😳
هو إزاي أصلا إبليس كان بيوسوس لآدم وآدم في الجنة وإبليس مطرود من الجنة😳

حاجة من اتنين:
◇يا إما ربنا سمح لإبليس بدخول الجنة لاختبار آدم وحواء،
◇أو إن إبليس وقف على طرف الجنة وأقسم لآدم وكلمه مشافهة كده من بعيد.
لكن موضوع إن إبليس دخل في فم الثعبان عشان يدخل الجنة عشان يوسوس لآدم ده غير صحيح وم

فيش عليه أي دليل من القرآن أو السنة👌
كان إيه رد فعل آدم عليه السلام لما إبليس أقسم له بالله ؟
هل آدم عليه السلام سمع كلام إبليس؟
هل فعلا أكل من الشجرة وعصى أمر ربنا؟

ده إللي هنعرفه في الجزء الجاي إن شاء الله😁


#Eman_Shalapy

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊

جاءنا أول سؤال👇

《هو ليه نزلتوا القصص من جديد؟ هي القديمه مالها؟》

الإجابة:
نزلنا القصص من جديد عشان عملنا تعديل وأضفنا معلومات زيادة للتوضيح أكثر،
وأضفنا أسئلة وإجابتها كان ناس سألوها في التعليقات على الفيس،
وكل الزيادة دي هتلاقوها في نسخة الpdf،
فحبينا إن إللي موجود في الpdf يكون موافق للي موجود في التليجرام،
وبالمرة تراجعوا القصص عشان تستفيدوا أكثر😁

سؤال تاني❤

#قصص_الأنبياء
#الحلقة_الثالثة
#قصة_آدم_الجزء_الثالث
#نزول_آدم_إلى_الأرض

وقفنا المرة إللي فاتت عند إبليس لما كان بيحاول يقنع آدم بإنه ياكل من الشجرة،
واستغل طاعته لربنا وتعظيمه لله وأقسم له بالله إن كلامه صحيح وإنه من الناصحين له👌
آدم عليه السلام بسبب فطرته السليمة لم يتصور أبدا إن في حد ممكن يقسم بالله كذب 😑

احنا ممكن نكون شفنا ناس بتحلف بالله كذب ،فممكن نكون مش متصورين الموضوع أوي😅
لكن آدم شاف قدرة ربنا يا جماعة👌
شاف الجنة وشاف الملائكة فإزاي حد يقسم بالله العظيم ده كذب😳
حتى رسول الله ﷺ يقول عن موضوع القسم بالله ده:
من حَلفَ بالله فليَصْدُق، ومن حُلِفَ لهُ بالله فليرضَ، ومن لم يرضَ بالله فليس من الله "
عشان كده آدم صدّق إبليس وخصوصا إن إبليس قعد يزين لآدم المعصية ويُغريه هو وحواء،
واستغل إبليس طبيعة آدم البشرية من ضعف العزم والنسيان،
فمع إلحاح إبليس وقسمه لآدم،
نسي آدم العهد إللي بينه وبين ربنا إنه مياكلش من الشجرة
فأكل من الشجرة هو و حواء،
"وَلَقَدْ عَهِدْنَا إِلَى آدَمَ مِنْ قَبْلُ فَنَسِيَ وَلَمْ نَجِدْ لَهُ عَزْمًا"

وكانت حواء أول من أكلت من الشجرة وزينت لآدم الأكل من الشجرة فأكل منها،
قال رسول الله ﷺ :
"لولا حواء لم تَخُن أنثى زوجها الدهر"
والمقصود بالخيانة هنا يا جماعة هو ميل المرأة لرغبة النفس،
يعني النساء طبيعتهم إن العاطفة بتغلب عليهم ولما نفسهم تشتهي شيء ويكون فيه أذى أو ضرر فبتتغاضى عن الأذى ده في مقابل إنها تعمل إللي نفسها فيه👌
وده مش معناه يا جماعة إن حواء وبناتها وحشين لا سمح الله،
القصد إن الحديث بيبين مدى تأثير النساء على الرجال ومدى حب الرجال لهن والتأثر بهن👌
ورسول الله ﷺ قال:
"ما رأيت أذهب لِلُب الرجل الحازم من إحداكن"
يعني الرجل بينسى عقله أحيانا بسبب افتتانه بإحدى النساء. وكذلك الأبناء بالنسبة للآباء فتنة..
"إنما أموالكم وأولادكم فتنة"
"إن من أزواجكم وأولادكم عدوّا لكم فاحذروهم"
و ده بيخلي على المرأة دور عظيم جدا إنها تكون رفيق صالح لا يَأمر إلا بكل خير ولا ينصح إلا بكل بِر وإنها لا تكون فتنة لغيرها،
وكذلك لا تعصي الله لترضي زوجها ولا أحدا من أبنائها👌

لازم تفهموا النقطة دي كويس؛ لأن في ناس واقعة إما في الإفراط أو التفريط،
يعني ناس بتنكر حديث رسول الله ﷺ خالص وبتنكر إللي حصل وإن حواء ملهاش أي دور نهائي،
وفي ناس تانية بتقول إن حواء هي السبب الرئيسي في خروج آدم عليه السلام من الجنة وبينظروا للمرأة على إنها بلاء😑
فاحنا لازم يكون عندنا توازن بين الاتنين👌

☆☆هو ليه ربنا قال لآدم وحواء متقربوش من الشجرة مع إن الحرام إنهم ياكلوا منها مش يقربوا🤔
لأن الإنسان ضعيف ولو قرب من المعصية هيعملها😬
عشان كده ربنا قالنا لا تتبعوا خطوات الشيطان،
الشيطان مش هيقول للإنسان اعمل الحرام على طول،
هيمشي معاه بالتدريج،
زي ما ربنا بيقولنا: "ولا تقربوا الزنا"
القرب منه:
¤إن مينفعش رجل وامرأة يقعدا مع بعض لوحدهم،
¤مينفعش إن رجل يلمس امرأة لا تحل له
¤يجب على المسلم غض البصر عن المحرمات، وهكذا..
ودي حاجة اسمها سد الذّرَائِع👌
يعني نقفل كل الأبواب إللي ممكن تؤدي بالإنسان للوقوع في المحرم.

وعلى فكرة صحيح مفيش دليل من القرآن ولا السنة على نوع الشجرة دي،
هل هي شجرة تفاح ولا شجرة إيه بالضبط😅
هي شجرة معينة وخلاص👌

فأول ما أكلا من الشجرة ظهرت عوراتهما لبعض، يعني همّ كانوا لابسين ملابس من الجنة،
لكن لما أكلا من الشجرة اختفت الملابس دي،
وبعض أهل العلم قالوا إن جسمهم كان مُغطى بالنور،

فبعد ما ظهرت عورتهما المغلظة كل واحد جري من التاني حياءا،
يعني كانوا مكسوفين من بعض ودي فطرة البشر... الحياء.
كل واحد فيهم بقى يشد من ورق الشجر إللي في الجنة بيحاول يغطي نفسه،
وهنا أدرك آدم عليه السلام إنه عصى أمر ربنا🙊

وهم بيجروا ربنا نادى عليهما :
مش أنا قلتلكم متاكلوش من الشجرة وحذرتكم من الشيطان إنه هيستخدم كل الطرق والسّبل عشان يجركم للمعصية،

"وَنَادَاهُمَا رَبُّهُمَا أَلَمْ أَنْهَكُمَا عَنْ تِلْكُمَا الشَّجَرَةِ وَأَقُلْ لَكُمَا إِنَّ الشَّيْطَانَ لَكُمَا عَدُوٌّ مُبِينٌ"

هنا بقى كان رد فعل آدم عليه السلام إيه؟!!
على طول اعترف بذنبه وبكى واستغفر ربنا وتاب ،
بعكس إبليس إللي تعمد المعصية وقعد يبرر غلطه🙄

خلينا نقرب المعنى،
لو عندك طفل جايبلك كوباية عصير وبعدين راح ماسك الكوباية وموقعها في الأرض،
وسألته ليه ياحبيبي عملت كده،
فرد عليك وقالك أهه كده...مزاجي كده...😒
ده ممكن تعمل فيه إيه😑

لكن لو طفل تاني وقعت منه كوباية العصير غصب عنه ،
وبعدها قعد يعتذر ويقول والله مكنش قصدي ومش هعمل كده تاني وهاخد بالي و...و....
أكيد رد الفعل هيختلف هنا👌
ولله المثل الأعلى في السماوات والأرض،
ربنا طرد إبليس من رحمته بسبب معصيته المتعمدة إللي كان أصلها الحسد والكبر في قلبه وإصراره عليها،

لكن الوضع اختلف مع آدم عليه السلام💁‍♂️
آدم تاب واستغفر وا

عترف بذنبه فربنا فتاب الله عليه ورزقه العمل بطاعته، وده دليل على إنه اصطفاه.
" ثُمَّ اجْتَبَاهُ رَبُّهُ فَتَابَ عَلَيْهِ وَهَدَى"

واحنا كذرية لآدم لازم نتبعه ...عملنا ذنب... على طول نتوب ونستغفر ونعمل صالحات
"إِنَّ الْحَسَنَاتِ يُذْهِبْنَ السَّيِّئَاتِ"
ورسول الله ﷺ يقول:
" أتبِع السيئةَ الحسنةَ تمحُها"
منعملش زي إبليس نتكبر على الحق ونقعد نبرر ...
أصل الناس كلها كده....
أصل الناس هتقول عليّ إيه....
أصل أنا مش مقتنعة...ماهو في شيوخ قالوا....

يبقى نتوب ونستغفر على طول مهما كررنا الذنب أو مهما كان الذنب عظيم👌

لما عصى آدم عليه السلام... ربنا أخرجه من الجنة وأنزله هو وحواء وإبليس للأرض.

♡طيب دلوقتي ممكن حد يقول:
أااااه 😒 يعني احنا نزلنا الأرض بسبب معصية أبونا آدم طب احنا ذنبنا إيه دلوقتي😞
والكلام ده فعلا قاله موسى لآدم عليه السلام👌
قال موسى :
أنت أبونا خيّبتنا!!
أخرجتنا ونفسك من الجنة!!"
فقال له آدم:
"أتلومني على شيء قد كتبه الله علي قبل أن يخلقني؟"
يعني إنت بتلومني إن ربنا كان كاتب عليّ إني هخرج من الجنة وأنزل الأرض من قبل ما اتخلق أصلا🤷‍♂️

فاكرين لما قلنا إن ربنا قال للملائكة إنه هيخلق خليفة في الأرض؟!
"وَإِذْ قَالَ رَبُّكَ لِلْمَلَائِكَةِ إِنِّي جَاعِلٌ فِي الْأَرْضِ خَلِيفَةً"
فمن الأول أصلا ربنا مقدّر إن آدم عليه السلام هينزل الأرض عشان يعمرها،
سواء كان السبب لخروجه من الجنة ونزوله للأرض معصية أو أي سبب تاني كده كده هو كان نازل الأرض👌

◇طيب في ناس سألت هل الجنة إللي خرج منها آدم عليه السلام دي هي جنة الخلد إللي إحنا عارفينها ولا جنة في الأرض كانت معمولة لآدم مخصوص🤔

المقصود فعلا هي جنة الخلد إللي اتوصفت لنا في القرآن ومش جنة على الأرض👌
قال شيخ الإسلام ابن تيمية رحمه الله :
" الْجَنَّةُ الَّتِي أَسْكَنَهَا آدَمَ وَزَوْجَتَهُ ، عِنْدَ سَلَفِ الْأُمَّةِ وَأَهْلِ السُّنَّةِ وَالْجَمَاعَةِ : هِيَ جَنَّةُ الْخُلْدِ"
وقال الشيخ ابن عثيمين رحمه الله :
" الصواب أن الجنة التي أسكنها الله- تعالى - آدم وزوجه هي الجنة التي وعد المتقون ؛
لأن الله - تعالى - يقول لآدم : "اسْكُنْ أَنْتَ وَزَوْجُكَ الْجَنَّةَ " ، والجنة عند الإطلاق هي جنة الخلد التي في السماء " .

فآدم عليه السلام أُنزل إلى الأرض مع حواء ومعهم إبليس،
آدم وحواء ليعمروا الأرض مع ذريته،
وإبليس مع ذريته يكونوا الإختبار لبني آدم👌

¤في هنا نقطة مهمة في وسط التقدم العلمي وكل شوية حد يتكلم عن الحياة على كواكب تانية¤
هل فعلا ممكن يكون في كوكب تاني البشر يقدروا يعيشوا عليه غير كوكب الأرض🤔
◇لا يمكن👌
لأن ربنا قال:
" فِيهَا تَحْيَوْنَ وَفِيهَا تَمُوتُونَ وَمِنْهَا تُخْرَجُونَ "
وقال:
"وَلَكُمْ فِي الْأَرْضِ مُسْتَقَرٌّ"
يعني كل الحياة والاستقرار في الأرض مش في أي مكان تاني.
ممكن الإنسان تطأ رجله كوكب تاني؟
ممكن...لكن الإستقرار لأ ..بمعنى إن الناس يتوالدون ويكون الكوكب ده لهم وطن يعيشوا فيه زي الأرض كده،
مفيش الإستقرار ده غير في الأرض
وده الفرق بين المسلم وغير المسلم،
عرفنا إن حاجة مستحيل تحصل فنصرف فيها الأموال ليه🤷‍♂️

نزل آدم عليه السلام إلى الأرض ومعه حواء،
المفسرون قالوا إن آدم نزل في الهند وحواء نزلت في جدة وهم الإتنين إلتقوا على جبل عرفات،
لكن مفيش حديث صحيح بكده،هو اجتهاد من المفسرين.

طبعا آدم كان يعلم كل حاجة مش زي ما الملحدين بيقولوا إن الإنسان أصله قرد وبعدين تطور وإن الإنسان الأول كان بدائي ميعرفش حتى الكلام😬

فآدم كان يعلم كل العلوم الزراعة مثلا وكل حاجة ليها اسم
" وَعَلَّمَ آدَمَ الْأَسْمَاءَ كُلَّهَا"
فمن البداية خالص كان الإنسان عنده المعرفة،
وآدم عليه السلام علم أبناؤه العلوم دي.

إزاي بدأت ذرية آدم وإزاي تناسلوا بعد كده؟
وإيه إللي حصل مع قابيل وهابيل ؟
وهل نجح إبليس تاني في غواية ذرية آدم؟

ده إللي هنعرفه الجزء الجاي إن شاء الله.


#Eman_Shalapy


☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊

#قصص_الأنبياء
#الحلقة_الرابعة
#قابيل_وهابيل

قبل ما نبدأ في قصة النهاردة حابة أوضح نقطتين:
◇أولا: قابيل وهابيل مش أنبياء لكن قصتهم مهمة فلازم نعرفها
◇ثانيا:
تفاصيل قصة قابيل وهابيل حتى أساميهم مفيش عليها دليل صريح من أحاديث رسول الله ﷺ، فالكلام إللي هقوله هو كلام جمهور المفسرين، وهتلاقوا في التعليقات إن شاء الله رابط لمصادر القصة👇

نرجع لقصتنا،
وقفنا المرة إللي فاتت عند نزول آدم عليه السلام إلى الأرض مع حواء ليعمّروا الأرض ويعبدوا ربنا فيها ونزل معاهم إبليس عشان يبقى اختبار لآدم وذريته،

¤إزاي بقى بدأ الخلق يتكاثروا🤔
كانت حواء بتولد في كل بطن أو في كل مرة توأم ولد وبنت، فالولد من البطن الأولى يتزوج من البنت في البطن الثانية ،
والبنت من البطن الأولى تتزوج من الولد إللي هييجي من البطن الثانية وهكذا،
لكن كان حرام إن الولد والبنت من البطن الواحدة يتزوجوا من بعض،
ويُقال إن حواء ولدت ٤٠ بطن يعني حوالي ٨٠ ذكر وأنثى كلهم تزوجوا من بعض، ودي كانت بداية نسل البشر على الأرض،
آدم عليه السلام كان بيعلم أبناؤه الدين وبيعلمهم من هو الله وطبعا بيحذّرهم من إبليس ،
آدم كان بشر وعنده أبناء زينا كده بالضبط حاولوا تتخيلوا الصورة معايا أب مع أبناؤه بيحبهم بيلعب معاهم... بيعلمهم ...بيراعيهم...
كان من أبناء آدم عليه السلام قابيل وهابيل،
اتولد مع قابيل أخت جميلة ، واتولد مع هابيل أخت أقل جمالا من أخت قابيل،
فالطبيعي زي ما قلنا إن قابيل يتزوج أخت هابيل وهابيل يتزوج أخت قابيل ...هو ده الشرع عندهم ساعتها.

لكن قابيل =وكان أكبر في السن من هابيل= اعترض إنه إزاي واشمعنى ياخد أخت هابيل الأقل جمالا، وهابيل ياخد أخته الجميلة😑
فكان عايز ياخد أخته لنفسه ويتزوجها هو،
طب إزاي يابني وكده حرام وده شرع ربنا؟
برده مصمم...زي ما ساعات بننصح الناس بالصح ويفضلوا مصممين على الغلط وراكبين دماغهم للأسف😞

حتى آدم عليه السلام أمره إنه يزوّج أخته لهابيل
ومع ذلك برده مفيش نتيجة، طب والحل؟!

نرجع لربنا وهو يحكم في الموضوع👌
ربنا بيقول:
"فَإِنْ تَنَازَعْتُمْ فِي شَيْءٍ فَرُدُّوهُ إِلَى اللَّهِ وَالرَّسُول"
ربنا هدى آدم عليه السلام لفكرة وهي إن كل واحد منهم يقدم قربان لله،
قربان يعني حاجة يتقرب بيها إلى الله، وإللي ربنا هيتقبل قربانه هو إللي هيتزوج أخت قابيل،
"وَاتْلُ عَلَيْهِمْ نَبَأَ ابْنَيْ آدَمَ بِالْحَقِّ إِذْ قَرَّبَا قُرْبَانًا"

هابيل كان بيشتغل في الرعي، وقابيل كان بيشتغل في الزراعة، هابيل دوّر على أحسن وأسمن كبش عنده عشان يقربه لربنا،
وقابيل دوّر على أسوأ حاجة عنده وقربها لربنا،
وكانت علامة قبول القُربان أن تنزل نار من السماء تحرق القربان ده،
فنزلت النار وأحرقت قربان هابيل وبكده ربنا تقبّل قربان هابيل،
"فَتُقُبِّلَ مِنْ أَحَدِهِمَا وَلَمْ يُتَقَبَّلْ مِنَ الْآخَرِ."
ويبقى كده عرفنا مين إللي هيتزوج أخت قابيل👌

◇وقفة مهمة جدا هنا◇
هابيل كان عايز حاجة ربنا يحققهاله وقابيل كان عايز نفس الحاجة لكن كل واحد فيهم قدّم إللي عنده على حسب الصّدق إللي في قلبه،
هابيل ضحى بأغلى حاجة عنده عشان يتقرب لربنا بيها،
وقابيل جاب أسوأ حاجة عنده مع إن هو كان عنده مجال يجيب برده أفضل حاجة...لكن معملش كده،
السؤال هنا :
هل احنا عايشين حياتنا زي هابيل ولّا زي قابيل؟
هل احنا بنضحي بأغلى حاجة عندنا في سبيل رضا ربنا،
ولّا على حسب الظروف؟... يعني ظروفي تسمح كان بها مسمحتش خلاص ..مش هقطع نفسي يعني🤷‍♂️
هل بنستقطع من وقتنا المزحوم بأشياء ممكن تكون عادية عشان نقرأ قرآن؟
هل ضحينا بإننا نترك معصية زي النمص أو سماع الأغاني أو لبس الموضة عشان رضى ربنا وهو الغني عن العالمين؟
ولا بندوّر على العبادات إللي بتيجي على مزاجنا وسهلة إننا نعملها مادام مفيهاش تضحية؟
كلنا نفسنا ندخل الجنة، لكن إيه القربان إللي قدمناه عشان ربنا يرضى علينا ويدخلنا الجنة؟

سامعاكم ياللي بتقولوا احنا هندخل الجنة برحمة ربنا مش بعملنا 😅
أيوة صح معاكم حق، احنا هندخل الجنة برحمة ربنا ولكن زي ما قلنا قبل كده ، رسول الله ﷺ بيقول:
"اعملوا فكل مُيسّر لما خُلق له"👌
كل واحد يسأل نفسه كده ....هل أنا زي هابيل ولا زي قابيل؟

فربنا تقبل خلاص من هابيل،
ها يا قابيل الحمد لله رضيت بأمر ربنا إللي حكم و اختار وهو أحكم الحاكمين ؟!
لأ...لم يرضَ قابيل😑
وقال لآدم ربنا تقبل من هابيل عشان لنت دعيتله إن ربنا يتقبل منه ومدعتليش😤

=هااااااار😳.....يعني هو مش شايف غلطه خالص وتقصيره وبيُلقي اللوم ويعلق أخطاؤه على حد تاني ...أبوه أبو الأنبياء🤦‍♂️
فغضب طبعا قابيل وقال لهابيل هقتلك عشان أستريح منك😠
وطبعا عشان ما يتزوج أخته، فكان كل شوية يتوعده بالقتل،
"قَالَ لَأَقْتُلَنَّكَ"
فقال هابيل:
" قَالَ إِنَّمَا يَتَقَبَّلُ اللَّهُ مِنَ الْمُتَّقِينَ"
وكأن لسان حال هابيل يقول في رسالة لكل إنسان حاله زي حال قابيل:
"أنا ذنبي إيه تقتلني...هل ذنبي إني اتقيت ربنا وع

ملت إللي يرضيه عني، بتلومني عشان انت فشلت ترضي ربنا؟
طيب ليه لم تتقِ الله من الأول قبل ما تضيع منك الفرصة،
ليه متصلحش من نفسك...
يعني هي المشكلة إني أنا موجود؟!
يعني لو أنا مش موجود ربنا كان هيتقبل منك؟
النتيجة كانت هتكون هي هي لأن المشكلة عندك انت مش عندي، ثم مش بدل ما تلومني، الأَوْلى إنك تصلح غلطك وتتعلم من أخطائك،
وَجّه طاقتك دي في إنك تبني نفسك بدل ما تلوم إللي حواليك.
لكن للأسف قابيل لم يستوعب الرسالة إللي هابيل كان عايز يوصلها له،
فلما شاف هابيل إن مفيش نتيجة راح مذكّره برابط الأخوة إللي بينهم إللي المفروض تكون سبب في التسامح والتجاوز عن الأخطاء،
فقاله لو انت اعتديت عليّ بالقتل ظلما وحسدا فأنا مش هعاملك بالمثل...لأني أخاف الله وأكره إن ربنا يراني قاتل لأخي😔
"لَئِن بَسَطتَ إِلَيَّ يَدَكَ لِتَقْتُلَنِي مَا أَنَا بِبَاسِطٍ يَدِيَ إِلَيْكَ لِأَقْتُلَكَ ۖ إِنِّي أَخَافُ اللَّهَ رَبَّ الْعَالَمِينَ"
إزاي أكون السبب في قتل أخي ....إزاي أعُق والديّ وأزعلهم 😔
مفيش نتيجة برده وقابيل مصمم على قتل هابيل😑
فهابيل استعمل آخر حاجة عنده وهو التخويف من الله ومن ناره ومن سوء المصير...
" إِنِّي أُرِيدُ أَن تَبُوءَ بِإِثْمِي وَإِثْمِكَ فَتَكُونَ مِنْ أَصْحَابِ النَّارِ "

بعد ده كوووله ....قابيل لسه مصمم على قتل هابيل😞
منفعش الترغيب... منفعش الإستعطاف...منفعش الترهيب ...
فاضل إيه؟
مفيش في إيده حاجة يعملها خلاص وكان هابيل عبدا صالحا وكان أقوى من قابيل في البِنيَة الجسدية يعني كان يقدر يقتل قابيل لو كان عايز بس مرضيش لأنه يخاف الله،
فَضّل إنه يكون عبد الله المقتول ولا يكون عبد الله القاتل،

في يوم من الأيام كان هابيل نايم في المرعى ورآه قابيل والحسد كان ملأ قلبه خلاص، فجاب صخرة كبيرة =في بعض الأقوال= ورماها على رأس هابيل فقتله.
"فَطَوَّعَتْ لَهُ نَفْسُهُ قَتْلَ أَخِيهِ فَقَتَلَهُ فَأَصْبَحَ مِنَ الْخَاسِرِينَ"
خسر أخوه ...خسر السند...خسر من عاش مع طفولته...خسر آخرته بعقوقه لأبويه...خسر وارتكب أشد جريمة على وجه الأرض: القتل👌
☆شوفتم النفس الأمارة بالسوء ممكن تعمل إيه👌
زي ما النفس الأمّارة بالسوء هي إللي سوّلت لإبليس إنه يعصي الله بعدم السجود لآدم عليه السلام😑

قابيل لم يتصور أبدا إنه لما يكبر ممكن يقتل أخوه،
لكن الحسد والغيرة والغضب ممكن يؤدوا إن الإنسان يعمل حاجات عمره ما كان يتخيل إنه يعملها،
والحسد إللي هو تمني زوال النعمة عن الغير هو أول معصية عُصي الله بها في السماء وخرج إبليس من رحمة ربنا بسببه،
وأول معصية برده عُصي الله بها في الأرض وكانت سبب في قتل نفس بغير حق👌
فمحدش يستهين بيه...بجد الحسد أخطر من السرطان ،
السرطان يأكل الجسد لكن الحسد يأكل القلب ويفسد دين الإنسان وآخرته😔
عشان كده لو حد حس بغيرة في قلبه أو حسد من ناحية أي إنسان ...يدفع الحسد والغيرة دي من قلبه بإنه يدعي للشخص ده بالبركة وإن ربنا يرزقه من فضله ويستعيذ بالله من الشيطان ويدعي ربنا إنه يطهر قلبه👌

بعد ما قتل قابيل هابيل مبآش عارف يعمل إيه😳
أول مرة حد يموت على الأرض 😥
طيب قابيل عمل إيه؟
حَمَل جثة أخوه على ظهره وفضل ماشي بيها فترة طويلة مش عارف يعمل بيها إيه،
لحد ما ربنا أرسل غرابين اتخانقوا مع بعض أمام قابيل وواحد فيهم قتل التاني فالقاتل حَفر حفرة عشان يدفن فيها جثة الغراب المقتُول ويعلم قابيل دفن الموتى،
"فَبَعَثَ اللَّهُ غُرَابًا يَبْحَثُ فِي الْأَرْضِ لِيُرِيَهُ كَيْفَ يُوَارِي سَوْءَةَ أَخِيهِ"
فلما شاف قابيل المنظر ده تحركت فيه مشاعر الإنسانية وقعد يلوم نفسه ويعاتبها ...إزاي يكون الغراب ده وهو من أخَس أنواع الطيور عرف يعمل إللي هو معرفهوش.
"قَالَ يَا وَيْلَتَا أَعَجَزْتُ أَنْ أَكُونَ مِثْلَ هَٰذَا الْغُرَابِ فَأُوَارِيَ سَوْءَةَ أَخِي فَأَصْبَحَ مِنَ النَّادِمِين"
ندم قابيل على حمل جثة أخيه وإنه مشي بيها ولم يفعل زي الغراب،
ندم على فراق أخوه...ندم لأنه مستفدش حاجة من قتله بالعكس ده أسخط والديه...
ولكن الندم لوحده لا يرفع العقوبة لأن الندم طبيعة بشرية...نفسنا تُسوّلنا الغلط وتزينه لينا لحد ما نقع فيه وبعدين نندم،
لكن الندم الصحيح إللي يرفع العقوبة عن الإنسان هو إللي ييجي وراه توبة صادقة ...يكون الإنسان عنده عزم أكيد إنه مش هيعمل الذنب ده تاني ويُتبع السيئات دي بالحسنات👌

حزن آدم عليه السلام لموت هابيل... ومحدش يعرف إيه إللي حصل مع قابيل بعد كده وهل تاب بعدين ولّا لأ ...وهل هو من أهل الجنة ولّا من أهل النار،
كل ده العلم فيه عند ربنا...لكن إللي نعرفه أكيد إن أي جريمة قتل بتحصل على الأرض بياخد وزرها قابيل لأن هو أول واحد سن القتل على الأرض،
قال رسول الله ﷺ:
"لَيْسَ مِنْ نَفْس تُقْتَلُ ظُلْمًا إلاَّ كَانَ عَلَى ابْنِ آدَمَ الأوْلِ كِفْلٌ مِنْ دَمِهَا، لأَنَّهُ كَانَ أوَّلَ مَنْ سَنَّ القَتلَ"

فاحنا يهمنا إننا ناخد العبرة والعِظة والخير من قصة قابيل وه

ابيل،
كل واحد يفكر بينه وبين نفسه هل أنا زي قابيل ولا زي هابيل؟

إيه إللي حصل بعد كده وهل الأرض فضلت على التوحيد ؟
وهل في أنبياء بين نوح وآدم ...وهل لإبليس دور بعد موت آدم ؟
ده إللي هنعرفه الجزء الجاي إن شاء الله.

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

⭐المصادر⭐
https://www.youtube.com/watch?v=aaJNtmYFIJA&feature=share

Watch "مسعد أنور قصة قابيل وهابيل" on YouTube
https://youtu.be/8q7UyyMTsoo

إللي كان متابع قصص الأنبياء صوت على الساوند كلاود للمهندس/أحمد المغازي هيلاقي باقي الحلقات على صفحته على الفيس بوك 👇


https://www.facebook.com/Mogatube/

#قصص_الأنبياء
#الحلقة_الخامسة
#بين_آدم_ونوح
#شِيث_عليه_السلام

اتكلمنا المرة إللي فاتت عن مقتل هابيل، وشوفنا إزاي إن الحسد ممكن يوصل الإنسان للقتل👌
بعد بقى ما قتل قابيل أخيه هابيل حزن آدم لموت ابنه الصالح هابيل واستمر يعلّم ذريته تعاليم الدين وخصوصا ابنه شِيث إللي بذل معاه مجهود أكبر عشان هيَعهد له بالنبوة يعني هيسلمه النبوة من بعده،
فآدم عليه السلام هو أول نبي لكنه مش رسول👌
سُئل رسول الله ﷺ عن آدم أنبي هو؟
قال: "نعم، نبيٌ مُكلم"

☆والفرق بين النبي والرسول :
إن النبي بيجيله الوحي لكن غير مأمور أو مُلزم بتبليغ الوحي ده...يعني يجيله الوحي إنه يصلي ويصوم يفعل الخيرات ويجتنب المحرمات ويتحلى بمكارم الأخلاق وهكذا،
لكن الرسول يأتيه الوحي إنه يعمل الصالحات وكمان يجب عليه إنه يأمر الناس إنهم يعملوا الخيرات،
فكل رسول نبي ومش كل نبي رسول👌
فالأنبياء أكتر من الرسل😊

☆طيب بالمناسبة دي ياترى كم عدد الأنبياء والرسل؟
الموضوع على خلاف بين العلماء،
في علماء قالوا إن مفيش حديث يوضح عدد الأنبياء بالضبط همّ كم، وعلماء تانيين صححوا بعض الأحاديث وقالوا إن عدد كل الأنبياء:
مائة ‏ألف، وأربعة وعشرون ألفا ، والرسل من ذلك: ثلاثمائة وخمسة عشر.
يعني الرسل والأنبياء عددهم كووولهم : ١٢٤٠٠٠
منهم《 ٣١٥ 》 رسول ....ربنا أخبرنا في القرآن عن《 ٢٥ 》
وفي السنة رسول الله ﷺ قالنا عن اثنين هما شيث بن آدم ويوشع بن نون.
عامة احنا مطلوب مننا نؤمن بكل الأنبياء والرسل بغض النظر همّ عددهم كم، فده إللي يهمنا👌

آدم عليه السلام نبي مطيع لربه بوحي يُوحى إليه..
وبيعلم أولاده الدين عشان تستمر عبادة ربنا في ذريته ومن بعدهم، لأن الأبناء تبع للأب في الغالب،
فآدم عليه السلام كان مُهتم ومركّز على تعليم ابنه شيث عشان يقود ذرية آدم من بعده،
عاش آدم عليه السلام ألف سنة وفي هنا قصة حصلت مع آدم بمناسبة عمره، وهي :
إن ربنا لما خلق آدم عليه السلام ومسح على ظهره ونزلت ذريته وشافهم ...كان بين عين كل واحد بريق من نور، يعني بين عين كل البشر ضوء بيبرق،
فلفت نظر آدم عليه السلام إن كان في واحد من أبناؤه البريق بتاعه قوي فسأل آدم عليه السلام ربنا :
مَن هذا؟
ربنا قاله : هذا داوُد
فقال آدم عمره هيبقى كم سنة؟
فقال الله: ستين سنة.
فقال آدم : يارب زوّده من عمري أربعين سنة.
فلما خلص عمر آدم عليه السلام إلا أربعين سنة وجاله ملك الموت عشان يقبض روحه فآدم قاله إن عمره لسه فيه أربعين سنة،
فملك الموت قاله مش انت أعطيتها لابنك داوُد؟
فجحد آدم جحود النسيان لأن داوُد كان في عالم الذر فنسي آدم الموضوع لما شاف ملك الموت😅
والقصة دي ممكن ناس تستغربها لكنها ثابتة في حديث صحيح👆😊

بعد ما مات آدم عليه السلام ورث العلم والنبوة من بعده ابنه شيث...وكان يدعو الناس للخير ويعلمهم الدين ...زي ما كان آدم عليه السلام بيعمل،
المفسرون بيقولوا إن كان في قسمين أو فرعين من أبناء آدم كانوا موجودين حسب موطن السكن:
جزء سكنوا الجبل⛰ وهو شيث وإللي معاه وكانوا صالحين مُتبعين لشريعة شيث وآدم عليهما السلام،
وكان الرجال فيهم شكلهم حلو والنساء شكلهم مش حلو...فيهم قُبح
وجزء تاني سكنوا السهل🏞 وكانت النساء فيهم جميلات والرجال لأ.
جاء إبليس لرجل من أهل السهل وكان معروف عنهم بإنهم يميلوا للباطل، جالهم في صورة غلام عشان يشتغل عنده ويخدمه 👌
فإبليس عمل لنفسه حاجة كده زي إللي الرعاة بيستعملوه زي مزمار يعني فأخرج منه صوت الناس مسمعتش زيه أبدا 😮
صوت المزمار يعني،
فبدأ الناس ييجوا للغلام إللي هو إبليس عشان يسمعوا الصوت ده كل شوية،
وكانوا عاملين عيد ...كل سنة يجتمع فيه الرجال والنساء، النساء تتبرج للرجال... يعني يتزينوا بأجمل ماعندهم ويخرجوا في أجمل منظر،
والرجال تتزين للنساء... وطبعا مع انتشار الصوت وصل الصوت لقوم شيث عليه السلام وكان محرم عليهم إنهم يختلطوا باللي عايشين في السهول ويُقال إنهم قوم قابيل،

في مرة تجرأ رجل من أهل الجبل وقرب منهم وهم في العيد فشاف النساء وجمالهن وتبرجهن وزينتهن ،
فرجع لأصحابه وحكى لهم على إللي شافه وأغراهم يروحوا معاه يشوفوا اللي شافه ،فسابوا عيشتهم في الجبل ونزلوا لأهل السهل،
طبعا الرجال افتتنوا بالنساء الجميلات والنساء افتتنوا بالرجال إللي كان في خلقتهم جمال😑
ووقعت خطيئة الزنا والعياذ بالله، وكان ده أول زنا يقع في تاريخ البشرية، وانتشرت الفاحشة بينهم، وده تفسير ابن عباس لقوله تعالى :
" وَلَا تَبَرَّجْنَ تَبَرُّجَ الْجَاهِلِيَّةِ الْأُولَى"

◇وكل ده كان نتيجة لإطلاق البصر عند مواطن الفتن، والتبرج بالزينة وترك الحياء، وعدم ستر العورات، واتباع خطوات الشيطان😓

خلال الفترة دي كان مات شيث عليه السلام ومات ابنه ومكنش في أنبياء في الفترة دي لحد ما أكرم الله تعالى إدريس عليه السلام بالنبوة ،فكان أول نبي بعد شيث وآدم عليهما السلام.
"وَاذْكُرْ فِي الْكِتَابِ إِدْرِيسَ إِنَّهُ كَانَ صِدِّيقًا نَبِيًّا "
كان إدريس عل

يه السلام أول نبي يُشرِع القتال في سبيل الله في عهده،
والقتال كان لأن قوم قابيل أو القوم إللي كانوا عايشين في السهل أفسدوا في الأرض وتعدّوا على أهل الإيمان من إللي بيسكنوا الجبل،
فجهز إدريس عليه السلام الجيوش وهجم عليهم بالخيول والمشاة فهزمهم وقتل منهم فكان ده سبب في التقليل من شرورهم،
ويُقال إن هو أول من كتب بالقلم وعلّم الناس الكتابة،
وربنا أثنى عليه ورفع مكانته،
"وَرَفَعْنَاهُ مَكَانًا عَلِيًّا"

☆ولما أقول لكم "يُقال" يعني دي صيغة تضعيف للخبر، بيستخدمها العلماء عشان يبينوا إنها معلومة مش مؤكدة.

رسول الله ﷺ كان قابل إدريس عليه السلام في ليلة الإسراء وهو في السماء الرابعة،
وفي قصة بيذكرها كثير من المفسرين عن ابن عباس رضي الله عنه،
إنه سأل كعب الأحبار عن قوله تعالى:
"وَرَفَعْنَاهُ مَكَانًا عَلِيًّا"
فقاله إن ربنا أوحى لإدريس عليه السلام إنه بيعطيه كل يوم مثل أجر بني آدم كلهم في زمانه،
لإن إدريس عليه السلام كان بيدعو الناس بجِد وقوة وكان مجتهد في الدعوة إلى الله بشكل عظيم،
فلما إدريس عرف الأجر العظيم إللي بياخده ده حب إنه يزوّد من عمره عشان يضاعف من عمله وبالتالي أجره يزيد💁‍♂️
فكان لإدريس عليه السلام صاحب من الملائكة ،
فقال له على إللي ربنا أوحى له به، وقال له على رغبته إنه عايز عمره يزيد فكان عايز يكلم ملك الموت إنه يسيبه ولا يقبض روحه في موعدها ويؤخر معاده👌
فالمَلك أخذه وطلع بيه للسماء وهم طالعين قابلوا ملك الموت نازل واتقابلوا كلهم في السماء الرابعة فأخبر المَلك إللي هو صاحب إدريس عليه السلام ملك الموت بالحكاية فقاله ملك الموت وأين إدريس؟!
فقاله معايا هنا، فقال له ملك الموت :
سبحان الله ! ربنا أمرني إني أقبض روحه في السماء الرابعة فتعجبت إزاي أقبض روحه في السماء وهو على الأرض فسأل المَلك إللي هو صاحب إدريس :
كم الباقي من عمر إدريس ؟
فقال ملك الموت : لم تبق له طرفة عين فنظر الملك على إدريس عليه السلام وكان شايله على جناحه فلقاه مات.
وده قول كثير من المفسرين في تفسير قوله تعالى:
" وَرَفَعْنَاهُ مَكَانًا عَلِيًّا"

☆بمناسبة الكلام عن ملك الموت، في سؤال ممكن يكون محير كثير من الناس هو:
إزاي ملك الموت يقدر يقبض أكثر من روح في نفس الوقت،
يعني لو أكثر من واحد جاءت ساعة وفاته إزاي ملك الموت بيقبض أرواحهم كلهم في نفس الوقت😳

شوفوا،
ربنا بيقرب لملك الموت مسافات الأرض حتى تكون بين إيده زي القصعة يعني زي الطبق إللي بيكون بين إيدنا يأخذ من حيث شاء،
وملك الموت له أعوان بيساعدوه في إخراج الروح من الجسد لحد ما يوصلوها للحلقوم،
فأول ما توصل الروح للحلقوم يقبضها ملك الموت👌

◇ملحوظة بقى:
قصة موت إدريس عليه السلام إللي قلتها دي من الإسرائيليات👆
وأنا تعمدت أقولهالكم عشان اشرحلكم يعني إيه إسرائيليات وحكمها إيه عندنا في الإسلام👌

□الإسرائيليات معناها:
الأخبار والروايات المنقولة عن بني إسرائيل، يعني بني إسرائيل عندهم معلومات وأخبار من الأمم إللي فاتت من بداية آدم عليه السلام وحتى بعثة رسول الله ﷺ.

☆حكمها إيه طيب؟!
حكمها إننا لا نصدقها ولا نكذبها لقول رسول الله ﷺ :
"لا تصدقوا أهل الكتاب ولا تكذبوهم"
لكن يجوز إننا نقول الأخبار والروايات دي من باب الوعظ والنصح ومعرفة أحداث التاريخ عشان نفهم الصورة كاملة،
ومن غييييير ما نُجزم إنها صحيحة أو باطلة مادام مفيش دليل على كده👌
لقوله ﷺ : "حدثوا عن بني إسرائيل ولا حرج"

¤الإسرائيليات بقى بتنقسم لثلاثة أقسام:
◇الأول: إنها نفس إللي في القرآن والسنة وده نصدقه ونقوله عادي.
◇الثاني: ما يكذبه القرآن أو السنة وده يجب علينا إننا نُكذبه👌
◇الثالث بقى ده إللي احنا بنتكلم فيه دلوقتي،
وهي أخبار وأحداث وروايات...القرآن لم يُصدقها ولم يكذبها فدي عادي نقولها من باب الإستئناس وإننا نعرف معلومة لكن من غير ما نصدقها ولا نكذبها 👌

¤طيب ياحجة انتِ بتقوليلنا الكلام ده ليه يعني🤨
◇أولا :
عشان يكون عندكم علم بمعناها؛
لأن في كثير من الناس ميعرفوش يعني إيه إسرائيليات وأول ما يسمعوا الكلمة يتخضوا يفكروها حاجة وحشة وكذب في الدين وكده يعني😅
فدي معلومة هتفيدكم إن شاء الله إنكم تغربلوا الإسرائيليات على ال ٣ أقسام زي ما شرحنا.

◇ثانيا:
كثير جدا من المفسرين زي ابن كثير والطبري وغيرهم حتى من الصحابة زي عبد الله بن عباس رضي الله عنه بيستعينوا بالإسرائيليات إللي هي القسم الثالث دي 👆في تفسير بعض آيات القرآن زي ما حكينا قصة إدريس عليه السلام وشرح آية
"وَرَفَعْنَاهُ مَكَانًا عَلِيًّا"
وده لأن مفيش معلومات مُفصلة عن معنى الآية ولا إزاي مات إدريس عليه السلام عشان كده عبد الله بن عباس ترجمان القرآن -رضي الله عنه- سأل كعب الأحبار إللي كان عالم من علماء أهل الكتاب وأسلم وكان عنده أخبار ومعلومات كتير
عن علوم التوراة و الأمم السابقة
ياترى بعد موت إدريس عليه السلام الناس فضلت على التوحيد ولا غيّروا الملة والفطرة؟
ومين هو أ

ول رسول على وجه الأرض وإيه قصته؟

ده إللي هنعرفه في الجزء الجاي إن شاء الله.

◇هتلاقوا المصادر إللي كتبت منها القصة في التعليقات للي عايز يرجعلها👇

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊



#Eman_Shalapy

⭐المصادر ⭐
Watch "قصص الانبياء ادريس عليه السلام" on YouTube
https://youtu.be/hvYwBdMnvMA

مراجع قصة شيث

https://islamqa.info/ar/answers/261528/هل-ظهرت-معصية-الموسيقى-في-عهد-شيث-ابن-ادم-عليه-السلام

http://bayanelislam.net/Suspicion.aspx?id=01-04-0007&value=&type=

http://www.islamweb.net/fatwa/index.php?page=showfatwa&Option=FatwaId&Id=143441

http://www.islamweb.net/fatwa/index.php?page=showfatwa&Option=FatwaId&Id=134649

http://fatwa.islamweb.net/fatwa/index.php?page=showfatwa&Option=FatwaId&Id=244264

Watch "قصص الانبياء ادريس عليه السلام" on YouTube
https://youtu.be/hvYwBdMnvMA

Watch "قصة شيث وقصة إدريس عليهم السلام" on YouTube
https://youtu.be/_pT9E47hdFw

Watch "قصص الانبياء قصة شيث و ادريس قصة نوح و هود عليهم السلام  الجزء الثاني" on YouTube
https://youtu.be/VqzYEtBrKKs

#قصص_الأنبياء
#الحلقة_السادسة
#قصة_نوح_عليه_السلام
#الجزء_الأول_الدعوة_إلى_الله

وقفنا المرة إللي فاتت عند موت إدريس عليه السلام وإنه كان بيدعو الناس لعبادة ربنا ويذكرهم دايما بالله وإنه أول من جاهد في سبيل الله،
بعد موت إدريس عليه السلام كل البشر كانوا على التوحيد، يعني كانوا عارفين إن ربنا هو الإله الخالق الرازق ملوش أي شريك وإن مفيش إله يعبدوه غيره وإن في جنة وفي نار👌

كان عندهم معاصي منتشرة بينهم وظهر الفساد وابتعدوا عن الشرع ...لكن مكنش في شرك بالله في الأرض نهائي،

في وسط المعاصي والفساد ده كان في بعض الصالحين،
وكان الناس بيحبوهم بس مش بيقلدوهم،
يعني زي بعض الناس إللي في زمانا دلوقتي يقولولك إحنا بنحب الدين والمشايخ والعلماء بس من بعيد من غير يعملوا زي ما بيقولوا لهم، من غير ما يطبقوا كلامهم يعني😅

المهم الصالحين دول كانوا بيأمروا الناس بالمعروف وينهوهم عن المنكر وكان ليهم أماكن معينة بيدعوا الناس فيها ،
زي تقريبا كده مجالس العلم عندنا،

فلما مات الصالحون الشيطان وسوس للناس إنهم يعملوا في الأماكن دي زي نُصُب تذكاري =خلينا نقول تماثيل =
ويسموا التماثيل بأسماء الصالحين دول،
قال يعني عشان كل ما يعدّوا من أمام التماثيل دي يفتكروا
الصالحين وأيامهم فيتشجعوا للعبادة كأنهم موجودين معاهم،

وفعلا صنعوا التماثيل دي....ومفيش واحد من الجيل ده عَبد التماثيل دي خالص... كلهم كانوا عارفين قصة هؤلاء الصالحين،
لما مات الجيل إللي كان عايش مع الصالحين وعارفين قصتهم؛ الشيطان وسوس للجيل إللي بعدهم إن آباؤهم كانوا بيعبدوا التماثيل دي وكان المطر بينزل بسبب عبادتهم للتماثيل، فعبدوا التماثيل دي فعلا😶
وهنا نلاحظ إن الشيطان نفسه طويييييل أوي👌
هو مكنش مستعجل أهم حاجة يحقق هدفه،
زرع بذرة في جيل وحصد الثمرة في الجيل إللي بعده،
عشان كده ربنا قالنا :
"لَا تَتَّبِعُوا خُطُوَاتِ الشَّيْطَانِ ۚ وَمَن يَتَّبِعْ خُطُوَاتِ الشَّيْطَانِ فَإِنَّهُ يَأْمُرُ بِالْفَحْشَاءِ وَالْمُنكَرِ"

لو اتبعنا خطوات الشيطان إللي هي ساعات ممكن تكون حاجات مُباحة أصلا هيوصل بينا الحال إننا نقع في الغلط😞
يعني مثلا بنت تتساهل في الاختلاط مع الرجال،
وشوية شوية تبدأ تكلمهم خاص،
وشوية شوية تبدأ تتلكك عشان تبعتله أي سؤال، وشوية شوية تبدأ تشتكيله أحزانها وتستشيره في حياتها...... لحد ما نوصل لآخر مشهد إللي كلكم أكيد حافظينه خلاص من كتر ما هو متكرر في واقعنا للأسف،
ساعتها هي بتستعيد شريط القصة من أوله بتلاقي إن أول خطوة كانت السبب الأول في النتيجة دي،
ولو كانت من البداية عاملة حدود ومنتبهة لموضع خطواتها خطوة خطوة ورا الشيطان، مكنش التساهل المتدرج ده حصل👌
والشيطان ما جالهاش في أول خطوة دي قال لها مباشرة "صاحبي فلان".. لا ده أخذها عالهادي خالص بالتدريج.

مثال كمان:
شاب بيقعد مع شباب بيشربوا سجاير، وبيقول مش هشرب.. مرة عالتانية طب هجرب عشان أخد فكرة بس..... لحد المشهد الأخير إللي كلكم برده عارفينه وإللي في أحيان كتير بيوصل لإدمان المخدرات كمان.
والشيطان في أول خطوة دي ما جالوش قاله اشرب مخدرات.. لأ اخده برده عالهادي خالص بالتدريج
وقيسوا على كده...
افتكروا كده موقف كنا مفكرين إن بدايته عادية وفي الآخر وقعنا في الغلط واحنا عمرنا ما تخيلنا أبدا إن الحال يوصل بينا لكده...فخدوا بالكم من خطوات الشيطان اقطعوا الطريق عليه من الأول👌

المهم نرجع لقصتنا😁
الناس عبدوا الأصنام وكان أول مرة تُعبد الأصنام على وجه الأرض، فربنا بعث أول نبي مُرسل وهو نوح عليه السلام،
وكان بين بعثته وبين موت آدم عشرة قرون يعني ألف سنة،
قال رجل : يا رسول الله: أَنبيٌّ كان آدم؟
قال: نعم مُكَلّم.
قال: فكم كان بينه وبين نوح؟
قال: عشرة قرون.

وربنا بعث نوح لقومه يعني هو رسول لقومه هو بس،
وكانت رسالته واضحة:
يا جماعة اعبدوا ربنا إللي خلقنا كلنا ومفيش إله غيره..اعملوا إللي يرضيه وابعدوا عن إللي يغضبه 👌
" لَقَدْ أَرْسَلْنَا نُوحًا إِلَى قَوْمِهِ فَقَالَ يَاقَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ"
ولو تركتم عبادة التماثيل دي واستغفرتم... ربنا هيغفرلكم إللي فات،
"أَنِ اعْبُدُوا اللَّهَ وَاتَّقُوهُ وَأَطِيعُونِ * يَغْفِرْ لَكُمْ مِنْ ذُنُوبِكُمْ"

ويرضى عنكم ويبارك لكم في ذريتكم ويرزقكم الأموال وينزل عليكم الأمطار وهتعيشوا في سعادة وفي الآخر هتدخلوا الجنة:
"فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا * يُرْسِلِ السَّمَاءَ عَلَيْكُمْ مِدْرَارًا * وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَارًا"

الكلام واضح ومنطقي أهه مفيش فيه أي مشكلة💁‍♂️

كان إيه بقى رد فعل قومه، وخصوصا الناس الأكابر أصحاب الأموال والنفوذ في البلد😬

قالوا إيه الضلال إللي إنت فيه ده😒
بقى كلنا غلط وانت إللي صح 🙄
"قَالَ الْمَلَأُ مِنْ قَوْمِهِ إِنَّا لَنَرَاكَ فِي ضَلَالٍ مُبِ

ينٍ"

رد عليهم نوح عليه السلام وقالهم ده مش ضلال لكن هو ده الحق، وأنا رسول من عند ربنا،
"قَالَ يَاقَوْمِ لَيْسَ بِي ضَلَالَةٌ وَلَكِنِّي رَسُولٌ مِنْ رَبِّ الْعَالَمِينَ"

مهمتي إني أبلغكم رسالته وبنصحكم بالحق وأنا أعرف عن ربنا إللي انتم متعرفهوش👌
"أُبَلِّغُكُمْ رِسَالَاتِ رَبِّي وَأَنْصَحُ لَكُمْ وَأَعْلَمُ مِنَ اللَّهِ مَا لَا تَعْلَمُونَ

فردوا عليه النصيحة وقالوا : انت بشر زيّنا من بني آدم فإزاي ربنا يُرسل رسول من البشر😒
"مَا نَرَاكَ إِلَّا بَشَرًا مِثْلَنَا"
ثم محدش اتبعك غير الضعفاء وسَفَلة القوم ومحدش من أكابر قومنا سِمع كلامك😏
"وَمَا نَرَاكَ اتَّبَعَكَ إِلَّا الَّذِينَ هُمْ أَرَاذِلُنَا بَادِيَ الرَّأْيِ "

واحنا مش شايفين أي تغيير يعني بعد ما خالفتم عبادة الأصنام وعبدتم ربنا إللي بتقولوا عليه 🙄
مش هنستفيد حاجة لو اتبعناكم... انتم زي مانتم...لا عندكم مال زيادة ولا حصل لكم شيء خارق،
مفيش جديد....واضح إنكم كذابين😤
"وَمَا نَرَى لَكُمْ عَلَيْنَا مِنْ فَضْلٍ بَلْ نَظُنُّكُمْ كَاذِبِين"

نوح عليه السلام قال لهم:
انتم ليه مستغربين إن ربنا يبعت لكم واحد زيكم من البشر ينصحكم ويقولكم الصح،
متركزوا في النصيحة ...مش مهم مين إللي بينصحكم وبينصحكم إزاي،
خدوا الكلام وفكروا فيه، مش يمكن كلامي صح وانتم إللي غلط😞
هل كُون إن أنا بشر ده يبقى مبرر ليكم إنكم تردوا نصيحتي بإنكم تتقوا الله عشان يرحمكم ويدخلكم الجنة😔
"أَوَعَجِبْتُمْ أَنْ جَاءَكُمْ ذِكْرٌ مِنْ رَبِّكُمْ عَلَى رَجُلٍ مِنْكُمْ لِيُنْذِرَكُمْ وَلِتَتَّقُوا وَلَعَلَّكُمْ تُرْحَمُونَ "

ثم هو أنا بقولكم أنا عندي خزائن السماوات والأرض من الكنوز ولو سمعتم كلامي الكنوز دي هتكون بتاعتكم
ولا بقولكم أنا ملك من الملائكة ولا بقولكم إني أعرف الغيب😑
"وَلَا أَقُولُ لَكُمْ عِنْدِي خَزَائِنُ اللَّهِ وَلَا أَعْلَمُ الْغَيْبَ وَلَا أَقُولُ إِنِّي مَلَكٌ"

☆قوم نوح يراجعوا نفسهم بقى ويفكروا في الكلام يمكن يكون صح؟.....أبدا🤦‍♂️
طلعوا بحجة جديدة 🙄
قالوا لبعض : ده بشر زينا بس عايز يكون أفضل مننا وأعظم فقال إنه نبي😏
"فَقَالَ الْمَلَأُ الَّذِينَ كَفَرُوا مِنْ قَوْمِهِ مَا هَذَا إِلَّا بَشَرٌ مِثْلُكُمْ يُرِيدُ أَنْ يَتَفَضَّلَ عَلَيْكُمْ"
ولو ربنا أراد فعلا إنه يرسل رسول لأرسل مَلك من الملائكة مش بشر😒
واشمعنى نوح يعني إللي تجيله النبوة وإحنا لأ، إحنا مسمعناش الكلام ده قبل كده😤
"وَلَوْ شَاءَ اللَّهُ لَأَنْزَلَ مَلَائِكَةً مَا سَمِعْنَا بِهَذَا فِي آبَائِنَا الْأَوَّلِينَ "

فقال لهم نوح عليه السلام :
لو كان معايا دليل وعِلم من ربنا إني أتبعه وأكون عبد لله بس ولا أعبد الأصنام،
وربنا وفقني وهداني لطاعته وانتم مش شايفين الحق ده ولا عايزين تقتنعوا وتؤمنوا بالله؛
فأنا مقدرش أَلزِمكم إنكم تتبعوني وتسمعوا كلامي وتشوفوا الحجج وتعترفوا بيها بالعافية وانتم معرضين عن الحق جملة واحدة😓

"قَالَ يَاقَوْمِ أَرَأَيْتُمْ إِنْ كُنْتُ عَلَى بَيِّنَةٍ مِنْ رَبِّي وَآتَانِي رَحْمَةً مِنْ عِنْدِهِ فَعُمِّيَتْ عَلَيْكُمْ أَنُلْزِمُكُمُوهَا وَأَنْتُمْ لَهَا كَارِهُونَ"

وأنا مش عايز منكم مقابل ولا عايز ملك ولا مال ولا أي حاجة كل إللي أنا بطلبه إنكم تُسلموا لله وتطيعوا أوامره،
ربنا هو إللي هيأْجرني 😟
"وَيَا قَوْمِ لَا أَسْأَلُكُمْ عَلَيْهِ مَالًا إِنْ أَجْرِيَ إِلَّا عَلَى اللَّهِ"

هل اقتنع قوم نوح عليه السلام😑...لأ🤦‍♂️
طلعوا بحجة جديدة🤓

قالوا له إنت إزاي عايزنا نتبعك ونسمع كلامك وانت إللي اتبعوك هم الفقراء والضعفاء وأصحاب المهن الوضيعة😏
اطردهم واحنا نقعد معاك ونتفاوض😒
"قَالُوا أَنُؤْمِنُ لَكَ وَاتَّبَعَكَ الْأَرْذَلُونَ "

☆إمممم بيفكروني بمين دول ياربي🤔
ٍآااااه بيفكروني باللي قال لم لأكن لأسجد لصلصالٍ من حمإ مسنون😏
إبليس.. لعنه الله😑
التكبر عن الحق والتكبر على الخلق سبب لغضب ربنا وسخطه وعدم دخول الجنة،
قال رسول الله ﷺ :
"لا يدخل الجنة من كان في قلبه مثقال ذرة من كِبْر"
متخيلين 😳...مثقال ذرة 👌
إوعوا حد يتكبر على الحق ولا على النصيحة،
خدوها إنها رسالة من ربنا ....مش مهم مين إللي بيقولها ...ولا بيقولهالك إزاي ولا بيقولهالك إمتى.
كونوا من :
" الَّذِينَ يَسْتَمِعُونَ الْقَوْلَ فَيَتَّبِعُونَ أَحْسَنَهُ "
لو عملنا كده هنكون من دول👇
" أُولَٰئِكَ الَّذِينَ هَدَاهُمُ اللَّهُ ۖ وَأُولَٰئِكَ هُمْ أُولُو الْأَلْبَابِ"

فنوح عليه السلام قال لهم:
طيب هو أنا مالي كانوا بيعملوا إيه😒
"قَالَ وَمَا عِلْمِي بِمَا كَانُوا يَعْمَلُونَ"
ناس آمنت واتبعت الحق يبقى أقبل منهم وقلوبهم دي بتاعة ربنا هو المُطلع عليها وهو إللي يحاسبهم أنا بشر ليا الظاهر الإيماني فقط..
والعبرة مش بالمكانة والشرف والزعامة والغِنَى، العبرة بالتقوى والاتباع لرسالة الله 😤
"إنْ حسَابُهم إلا على ربّي لو تَشْعرون"

وأنا مش هطردهم، لو أنا

طردتهم مين ينجيني من غضب ربنا عليّ لأني أسات لعباده الصالحين😞
"ومَا أنا بِطاردِ المؤمنينَ"
" وَيَا قَوْمِ مَنْ يَنْصُرُنِي مِنَ اللَّهِ إِنْ طَرَدْتُهُمْ أَفَلَا تَذَكَّرُونَ"

ياترى قوم نوح اقتنعوا واستجابوا لعبادة ربنا ولّا استمروا في العناد والكبر؟

ده إللي هنعرفه في الجزء الجاي إن شاء الله.

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy