رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

#قصص_الأنبياء(٢)
#السيرة_النبوية
#الحلقة_مائة_وستون
#أحداث_السنة_الثامنة_من_الهجرة
#قرار_فتح_مكة

اتكلمنا المرة إللي فاتت عن قريش لما ساعدت بني بَكر في الهجوم على خُزاعة ونَقْضِهم الصريح لصلح الحُدَيبيَة،
وشوفنا إن عمرو بن سالم استطاع إنه يهرب من مكة ويروح المدينة ويحكي لرسول الله ﷺ إللي حصل ورسول الله ﷺ رد عليه وقال له إنه هينصره،
بعد ما جاء عمرو بن سالم وحكى إللي حصل جاء لرسول الله ﷺ من مكة بُدَيْل بن وَرقَاء عشان يشتكي لرسول الله ﷺ هو كمان ويطلب منه إنه يجيب له حقه وحق قبيلته إللي اتغدر بيها،
وبُديل كان من خُزَاعة وله بيت في مكة، فكان في بيته إللي في مكة ده وقت ما حصل الاعتداء من بني بكر على المجموعة بني خزاعة،
فبعض الأشخاص من بني خزاعة إللي حصل عليهم الاعتداء عرفوا يهرب ويروحوا لبُدَيل في بيته ويستنجدوا بيه وحكوا له إللي حصل،
وبُدَيْل ده لو تفتكروا كان من الناس إللي قريش أرسلتهم لرسول الله ﷺ كوسيط لما كان جاي مكة للعمرة قبل صُلح الحديبية عشان يعمل مفاوضات مع رسول الله ﷺ،
يعني بُديل بن ورقاء صديق لقريش، ومش بس كده ده كان ساعتها لسه مشرك ومَصالح بُديل كلها من تجارة وغيرها في داخل مكة المكرمة، وكمان بُدَيل كان صديق شخصي لأبي سفيان إللي كان ساعتها زعيم مكة،
يعني كان المفروض يروح لأبي سفيان عشان يحل له الموضوع💁‍♂️
لكن بُديل مرحش لأبي سفيان واستنجد بيه وقال له قبيلتك والمتحالفين معاهم قتلوا ناس من قبيلتي وادفع لنا ديّات القتلى بتوعنا،
بُديل ساب الناس كلها وراح لرسول الله ﷺ عشان عارف إن مفيش حق بيضيع عند رسول الله ﷺ، أيوة الحقوق ممكن تضيع عند قريش وعند المشركين لكن عند رسول الله ﷺ كل واحد بياخد حقه بالعدل👌
قبل ما نعرف رد فعل رسول الله ﷺ وإيه الموقف إللي أخذه، خلونا نشوف قريش هتعمل إيه في الورطة إللي هم فيها دي😅

قريش عملت مجلس للتشاور بينهم بقيادة أبو سفيان زعيم مكة وحضر المجلس ده عكرمة بن أبي جهل وصفوان بن أمية وسُهيل بن عمرو وغيرهم من رجال مكة وزعمائها،
قعدوا مع بعض وبدأوا يفكروا بقى هيحلوا المشكلة دي إزاي،
وطبعا وهم بيفكروا حاطين في اعتبارهم وضع المسلمين دلوقتي وخصوصا أبو سفيان👌
يعني الوضع وصل بيهم لحد الانبهار بالمسلمين، يعني الناس المستضعفين إللي خرجوا مطاردين وتركوا أموالهم وديارهم من ثماني سنوات دلوقتي انتصروا على اليهود في خيبر، وملك الروم هرقل نفسه خايف من المسلمين بعد الحوار إللي حصل بينه وبين أبو سفيان واتكلمنا عنه قبل كده،
ده غير انتصار المسلمين في مؤتة على المائتين ألف مقاتل من الروم والغساسنة،
وكمان دخول بعض الدول المحيطة بمكة للإسلام، زي البحرين واليمن،
وضيفوا للكلام ده كله دخول رسول الله ﷺ لمكة في عمرة القضاء وحرص رسول الله ﷺ على إظهار قوة المسلمين أمام قريش وإللي فعلا سابت عندهم أثر كبير جدا في نفوسهم👌

فكل ده بقى مخلي عندهم خوف ورهبة من مواجهة المسلمين،
ده غير كمان إنهم لقوا نفسهم مستفادوش أي حاجة من مساعدتهم لبني بكر في الاعتداء على قبيلة خزاعة، بالعكس ده المساعدة دي هتضرهم أهه 😑
وهم بيتشاوروا وبيفكروا شافوا إن احتمال وقوع حرب بينهم وبين المسلمين احتمال وارد، هو أه صعب يتصوروا الاحتمال ده، لكنه احتمال واحتمال كبير كمان وهم مش أد الاحتمال ده😕
فملقوش قصادهم غير حل واحد وهو:
الذهاب إلى المدينة عشان يستسمحوا رسول الله ﷺ في إنه يتغاضى عن الخطأ إللي حصل ده ويكبر دماغه وخلاص يعديها ويزودوا كمان الهدنة إللي بينهم😅
وفعلا أخدوا القرار بإنهم يرسلوا لرسول الله ﷺ واحد منهم عشان يستسمحه، والقرار ده يعتبر أصعب قرار أخدته قريش لأنه فيه تنازل كبير جدا من قريش،
لأ ومش بس كده ده كمان اختاروا أبو سفيان عشان هو إللي يروح يكلم رسول الله ﷺ 🙊
أبو سفيان زعيم مكة كلها وزعيم بني أمية وإللي بينه وبين المسلمين حروب... غزوة أُحد والأحزاب وهجومه على المدينة يعني ده مش أي حد😶
فعلا سبحان الله المُعزّ المُذِل👌
تجهّز أبو سفيان وخرج من مكة للمدينة عشان يقابل رسول الله ﷺ ويستسمحه في إللي حصل ويطلب منه يزوّد العهد إللي بينه وبين مكة،
على ما يوصل بقى أبو سفيان للمدينة خلونا نرجع لرسول الله ﷺ ونشوف هو ناوي على إيه مع قريش بعد ما نقضوا العهد😁

نَقْض العهد إللي حصل ده يُعتبر أزمة كبيرة جدا، والإنسان الناجح بيعرف يحوّل الأزمة لفرصة يطلع منها بمكاسب لصالحه أو على الأقل يطلع بأقل الخسائر الممكنة،
وهو ده إللي رسول الله ﷺ كان عايز يعمله👌
إزاي يخرُج من أزمة نقض الصلح ومقتل أعداد من المسلمين والمشركين ظلما في أرض الحرم بفائدة للإسلام والمسلمين🤔
خلونا نفكر مع رسول الله ﷺ ونشوف وضع المسلمين في الجزيرة العربية في الوقت الحالي ووضع قريش👌

◇أولاً: الوضع السياسي والعسكري للمسلمين:
الوضع السياسي والعسكري للمسلمين بعد غزوة مؤتة وذات السلاسل وضع ممتاز جدا، وأعداد المسلمين بتزيد،
والجيش الإسلامي متدرب تدريب كويس جدا في معارك حقيقية على مدار سبع

سنين مع اليهود والمشركين وكمان مع الرومان زي ما شوفنا إللي حصل في مؤتة ومحقق انتصارات كتيرة،
فبالتالي معنويات المسلمين عالية جدا،
ده غير إن سُمعة المسلمين طيبة على مستوى الجزيرة كلها وعلى مستوى العالم بشهادة هرقل،
والدولة الإسلامية لها علاقات قوية جداً مع أكثر من مملكة من ممالك الأرض، فاليمن دولة مسلمة، والبحرين دولة مسلمة، وفي علاقات مع الحبشة ومع مصر،
وكمان حصل تناقص في أعداء الإسلام، يعني اليهود خلاص خلصنا منهم، ومعظم القبائل العربية إما مهزومة من المسلمين أو بينهم وبين المسلمين عهد، حتى قبيلة غطفان إللي دايما عاملة قلق مع المسلمين أرسل لهم رسول الله ﷺ آخر سرية زي ما حكينا المرة إللي فاتت فمفيش منهم خطر دلوقتي،
ومش بس كده ده هييجوا كمان يشاركوا المسلمين في فتح مكة زي ما هنشوف إن شاء الله👌

◇ثانيا: الوضع العسكري لقريش
الوضع العسكري لقريش كان ضعيف، وبيزيد ضعف مع مرور الوقت،
ورسول الله ﷺ نفسه قال بعد هزيمة قريش في الأحزاب :
" الآن نغزوهم ولا يغزونا"
فرسول الله ﷺ كان شايف إن الدولة الإسلامية كل يوم في عُلُو واضح وقريش في هبوط واضح،
ومننساش طبعا دخول خالد بن الوليد وعمرو بن العاص وعثمان بن طلحة في الإسلام، دول لوحدهم ضربة جامدة لقريش في الناحية العسكرية🤭
ده غير إن مبقاش لهم حلفاء غير بني بكر تقريبا، وحتى بني بكر كان في بينهم وبين قريش خلافات والعلاقة بينهم مش جامدة أوي يعني،
فتقدروا تقولوا إن قريش دلوقتي واقفة بطولها قصاد المسلمين وحلفاءهم وقوتهم😅
يعني باختصار كده وضع الدولة الإسلامية مستقر جداً وفي الناحية التانية قريش وضعها ضعيف جدا وغير مستقر👌

◇ثالثا: الوضع القانوني والشرعي للمسلمين.
بمعنى إن بعد نقض قريش المعاهدة بقتل أبرياء وكمان داخل الحرم محدش هيقدر يُنكر على المسلمين لو المسلمين أخدوا قرار الحرب وفتح مكة، لأن قريش هي إللي نقضت العهد والمسلمين دلوقتي لهم حق الرد💁‍♂️
وفتح مكة أصلا كان هيحصل عاجلا أم آجلا، لكن مكنش لسه في فرصة، فدلوقتي جاءت الفرصة بتدبير من عند ربنا،
فقرر رسول الله ﷺ إنه ينتهز الفرصة دي عشان يفتح مكة👌

◇رابعا:
المسلمين عليهم واجب شرعي إنهم يساعدوا خُزاعة إللي اتظلمت دي ومينفعش يسيبوهم بدون مساعدة؛
لأن ده إللي اتفقوا عليه معاهم في صلح الحديبية وإن أي حد يعتدي عليهم يبقى كده اعتدى على المسلمين ويجب على المسلمين إنهم يدافعوا عنهم، وزي ما قال رسول الله ﷺ :
"الْمُسْلِمُونَ عَلَى شُرُوطِهِمْ"
وفي نفس الوقت الدفاع عن خُزاعة واجب سياسي مهم جدا، لأن ده تعدي على كرامة الدولة الإسلامية لأن الناس إللي اتقتلت دي حُلفَاء المسلمين فمعنى الاعتداء ده إنهم مش عاملين حساب للمسلمين ومش معترفين بيهم،
ومش بس كده ده كمان كان في مسلمين وسط القتلى،
فلازم وقفة قوية ضد إللي حصل ده👌

فكانت النتيجة إللي توصّل لها رسول الله ﷺ إنه أخذ القرار بفتح مكة، والقرار ده مكنش سهل على فكرة😬
ده كان من أصعب القرارات؛
لأن مكة مش زي أي بلد، مكة دي عُقر دار قريش ولها تاريخ طويل، وقريش مش قبيلة سهلة، دي أعز قبيلة في العرب، والعرب كلهم بيحترموها وبيوقّروها،
وفي ناس كتير ممكن يغيروا موقفهم من رسول الله ﷺ إذا شافوا إن قريش اتهددت في عقر دارها مكة إللي هي البلد الحرام،
ومكة لها مكانة كبيرة جدا في قلوب كل العرب،
فالموضوع أه فرصة لكن في نفس الوقت مش سهل👌

وعلى فكرة يا جماعة إللي ساعد رسول الله ﷺ إنه يقدر ياخد القرار بفتح مكة في الوقت ده هو 《الجاهزية التامة》،
يعني رسول الله ﷺ كان عارف إنه هيفتح مكة في يوم من الأيام، لكن عشان يفتحها لازم يكون مستعد للحظة دي،
يعني يبقى عنده جيش قوي الإيمان متدرب ومُنظم ومستعد للقتال في أي لحظة،
لكن تخيلوا كده لو المسلمين مش مدربين ولا متربيين إيمانياً وعايشين حياة مُرفهة مش هاممهم غير ملذات الدنيا ومتعلقين بالدنيا؛ لو رسول الله ﷺ قالهم يلا عشان نجاهد ونفتح مكة حد فيهم هيفكر في الخروج أصلا وهو في احتمال إنه يموت، طبعا لأ لأنهم ساعتها مش هيبقوا فاهمين يعني إيه قضية الجهاد أصلا ولا نشر الإسلام ولا تعبيد الناس لرب العالمين،
فرسول الله ﷺ أول ما جاءت له الفرصة عرف يستغلها لأنه كان بيستعد لها بقاله سنين👌

طبعا لما جاء بُديل بن ورقاء لرسول الله ﷺ كان
أقصى أحلامه إن رسول الله ﷺ يأمر قريش إنهم يقتلوا القاتلين، أو على الأقل يدفعوا دية الناس إللي اتقتلت من خزاعة دي😅
متخيلش أبدا إن رسول الله ﷺ هيجهز جيش وهيروح يفتح مكة👌

◇ممكن حد يسأل سؤال ويقول معلش يعني فرصة إيه واجتهاد إيه، هو مش رسول الله ﷺ مش بيعمل حاجة إلا بالوحي، يعني هو بينفذ إللي ربنا بيأمره وخلاص🤷‍♂️

براحة كده وواحدة واحدة عشان النقطة دي مهمة😁
الأقوال والأفعال إللي رسول الله ﷺ بيقولها وبيعملها بتنقسم لقسمين ✌
☆القسم الأول:
أقوال وأفعال صادرة بتوقِيف من الوحي و بِأَمْر من ربنا،
يعني ربنا يقول لرسول الله ﷺ قل كذا وافعل كذا، فيكون رسول الله ﷺ فيها مُبلّ

غا ناقلاً أميناً،
والقسم ده هو الغالب على أقوال وأفعال رسول الله ﷺ👌

☆القسم الثاني:
أقوال وأفعال صادرة عن رأي رسول الله ﷺ واجتهاده، بدون ما يكون فيها رسول الله ﷺ مُبلّغا ولا ناقلا، ولكنه مشرِّعًا مجتهدا،
ولو كان في قرار رسول الله ﷺ واجتهاده خطأ يأتي الوحي بتعديل الخطأ ده،
لكن لو قراره صحيح إما يأتي الوحي بإقرار فعل رسول الله ﷺ أو إن ميجيش وحي أصلا ويبقى ده إقرار لفعل رسول الله ﷺ عن طريق السكوت عنه،
يعني مثلا فاكرين قصة الزبير بن العوام وجاره الأنصاري لما اختلفوا مع بعض على مين إللي يسقي الأرض الأول، ورسول الله ﷺ حكم للزبير رضي الله عنه😁
أهه ده كان من اجتهاد رسول الله ﷺ إللي سكت عنه الوحي، في حين إن رسول الله ﷺ لما اجتهد في مصير أسرى بدر وشاف إنه ياخد بدالهم الفداء وده كان اجتهاد خاطئ من رسول الله ﷺ نزل القرآن يوضح الخطأ إللي حصل ده ويقول لرسول الله ﷺ الصح كان إيه👌
" مَا كَانَ لِنَبِيٍّ أَنْ يَكُونَ لَهُ أَسْرَى حَتَّى يُثْخِنَ فِي الأرض"

◇وكده هيطلع لنا سؤال تاني، وهو : أمّال إيه معنى:
"وَمَا يَنطِقُ عَنِ الْهَوَىٰ ۩ إِنْ هُوَ إِلا وَحْيٌ يُوحَى" 😳

شوفوا،
الكفار كانوا بيقولوا إن إللي بيعلم رسول الله ﷺ القرآن بشر، فربنا أنزل الآية دي وقال لهم إن القرآن وحي من عند ربنا وإن رسول الله ﷺ مش بيجيب حاجة من عنده ولا بيعلمه بشر، ومش بيحكم ولا بيتكلم بهواه ولا بِكذب ولا بيفترى على الله، ولكنه بيحكم ويجتهد عن طريق القرآن والأمثلة إللي ربنا ضربها لرسول الله ﷺ في القرآن عن الأمم السابقة👌

فلما نيجي نقول بقى إن رسول الله ﷺ شاف إن نقض قريش للعهد فرصة مناسبة رسول الله ﷺ استغلها عشان يفتح مكة نعرف إن رسول الله ﷺ اجتهد هنا زي ماحنا كبشر بنجتهد عادي جدا، ومادام الوحي مجاش يُنكر على رسول الله ﷺ اجتهاده يبقى كده اجتهاده صحيح😁

♡أنا حبيت أوضح النقطة دي بالذات لأن ناس كتير جدا فاهمة إن رسول الله ﷺ كان مجرد آلة كده مش بيفكر ولا بيجتهد وقاعد بس كده مبيعملش حاجة خالص غير لما يجيله الوحي، وده طبعا غير صحيح👌
رسول الله ﷺ بيخطط وبيرتب وبيشاور الصحابة وبياخد برأيهم ويشوفوا أحسن رأي وبيعملوا بيه مادام الوحي مجاش يقول عكس رأيهم واجتهادهم👌

☆طبعا تفصيل المسألة بالأدلة هتلاقوه في رابط في التعليقات من موقع الإسلام سؤال وجواب👇

وصل أبو سفيان زعيم مكة للمدينة خلاص، ياترى هل هيقدر يقنع رسول الله ﷺ إنه يتغاضى عن نقض العهد وإنه يمد العهد إللي بين قريش وبين المسلمين🤔

ده إللي هنعرفه الجزء الجاي إن شاء الله 😊

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊



#Eman_Shalapy

⭐ المصادر ⭐



https://www.google.com/amp/s/islamqa.info/amp/ar/answers/135586

https://audio.islamweb.net/audio/index.php?page=FullContent&audioid=208199
https://audio.islamweb.net/audio/index.php?page=FullContent&audioid=208191

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

#قصص_الأنبياء(٢)
#السيرة_النبوية
#الحلقة_مائة_وواحد_وستون
#أحداث_السنة_الثامنة_من_الهجرة
#مفاوضات_أبو_سفيان_مع_رسول_الله

وقفنا المرة إللي فاتت عند وصول أبو سفيان للمدينة عشان يحاول يقنع رسول الله ﷺ إنه يطوّل مدة العهد إللي بين قريش وبين المسلمين وإن رسول الله ﷺ يَتغاضى عن نَقْض قريش لصلح الحديبية،
وقبل ما يوصل أبو سفيان للمدينة كان رسول الله ﷺ أخبر الصحابة بمجيء أبو سفيان قال للصحابة:
" كأنكم بـأبي سفيان قد جاءَكم يَشُدّ في العَقد ويزيد في المدة"
يعني أبو سفيان هييجي عشان يأَكد على الصّلح وكمان يزيد المدة، ودي طبعا معجزة لرسول الله ﷺ إنه قال لهم عن غيب لسه محصلش،
وفعلا جاء أبو سفيان للمدينة ودخل على رسول الله ﷺ عشان يكلمه،

☆في هنا بقى قصة مشهورة ولكنها غير صحيحة، وهي:
《 إن أبا سفيان لما جاء للمدينة قبل ما يدخل على رسول الله ﷺ ويكلمه راح لبنته أم حبيبة زوجة رسول الله ﷺ عشان يكلمها تتوسط له عند رسول الله ﷺ،
فلما جه يتكلم معاها وجه يقعد على الفراش إللي موجود في الغرفة، أم حبيبة أخدت الفراش وطبقته ومنعت أبوها إنه يقعد على الفراش ده،
فأبو سفيان استغرب وسألها
" يَا بُنَيَّةُ مَا أَدْرِي أَرَغِبْتِ بِي عَنْ هَذَا الْفِرَاشِ ، أَمْ رَغِبْتِ بِهِ عَنِّي؟"
يعني انتي منعتيني اقعد على الفراش ده لأنك شايفة إنه لا يليق بسيد مكة يقعد عليه ويستحق أفضل من كده، ولاّ الفراش هو إللي غالي عليكِ فمش عايزاني أقعد عليه، فردت عليه أم حبيبة وقالت له:
هو فِراش رسول الله ﷺ وأنتَ مُشرك نَجِس، فلم أحبّ أن تجلس على فراشه "
"ّفقال لها أبو سفيان : "يا بُنَيّة والله لقد أصابك بعدي شَر
وخرج من بعدها وهو غضبان وراح لرسول الله ﷺ》

القصة دي كلها مع إنها مشهورة وفي مشايخ بيقولوها لكنها للأسف غير صحيحة👆🙅‍♂️❌
لأن إسنادها ضعيف وفي رواة في القصة مجهولين وكمان المتن بتاعها إللي هو القصة نفسها لا يصح وبيخالف القرآن والحديث الصحيح، إزاي🤔
◇أولا:
ربنا قال في القرآن :
" وَإِنْ جَاهَدَاكَ عَلَى أَنْ تُشْرِكَ بِي مَا لَيْسَ لَكَ بِهِ عِلْمٌ فَلا تُطِعْهُمَا وَصَاحِبْهُمَا فِي الدُّنْيَا مَعْرُوفًا"
يعني المسلم يجب عليه إن يبر أبويه حتى لو كانوا مشركين، وحتى لو دعوه للإشراك بالله فهو ميسمعش كلامهم لكن في نفس الوقت يعاملهم معاملة حسنة،
وهنا أم حبيبة أم المؤمنين معملتش كده، بالعكس ده عاملت أبوها معاملة سيئة وأغضبته وخالفت القرآن وأم المؤمنين متعملش كده👌

◇ثانيا:
أم حبيبة رضي الله عنها لما طبّقت الفراش ومنعت أباها من إنه يجلس عليه عشان هو نجس، هيتفهم من تصرف أم حبيبة ده إن المشرك نجس نجاسة حِسِّيّة، يعني جسمه نجس وده غير صحيح لأن المشرك نجس نجاسة معنوية،
والنجاسة المعنوية هي نجاسة الكفر والفسوق والعصيان👌

◇ثالثا:
أم أسماء بنت أبي بكر الصديق جاءت للمدينة عشان تزور بنتها أسماء وكانت مشركة،
فأسماء راحت سألت رسول الله ﷺ تعمل إيه مع أمها، هل تَصِلهَا وتُحْسِن إليها ولاّ لأ، فقال لها رسول الله ﷺ:
" نعم صِلِي أمك"
وأسماء بنت أبي بكر أخت السيدة عائشة من أبوها، يعني أم أسماء كانت مشركة لكن أم السيدة عائشة كانت مسلمة وعايشة معاها في المدينة وكان اسمها أم رُومان،
فهنا مُقدمة القصتين واحدة فالمفروض تكون النهاية واحدة، يعني السيدة أسماء جاءتها أمها المشركة تزورها،
وأم حبيبة جاءها أبوها المشرك يزورها، فالمفروض إن أم حبيبة تُحسن لأبوها زي ما رسول الله ﷺ قال لأسماء،
وإلا كده هيبقى ظاهر إن أم حبيبة تخالف هدي رسول الله ﷺ وده مستحيل لأن زوجات رسول الله ﷺ هن أكثر الناس اتباع لهَدْي رسول الله ﷺ👌

《تفصيل المسألة بالأدلة والشرح هتلاقوها في رابط في التعليقات👇》

فأبو سفيان توجه مباشرة لرسول الله ﷺ عشان يحاول معاه إنه يطوّل مدة العهد إللي بينهم،
دخل أبو سفيان على رسول الله ﷺ وبدأ يكلمه ويقول له عن رغبته في إطالة مدة الصّلح،
لكن رسول الله ﷺ رفض إنه يرد على أبي سفيان أصلا، يعني أبو سفيان بيتكلم ورسول الله ﷺ مبيردش عليه نهائي😶
وطبعا دي مش عادة رسول الله ﷺ أبدا،
يعني رسول الله ﷺ كان من عادته إنه بيُحسِن استقبال الضيوف ويُكرمهم
وكان يستمع ويقبل منهم ويتحاور معهم وخاصة الزّعماء،
لكن ده محصلش هنا مع إن أبو سفيان زعيم قريش👌
ليه بقى🤔
لأن رسول الله ﷺ عايز يفتح مكة وعايز يستغل الفرصة إللي بين إيده دلوقتي ومش عايز كلام أبي سفيان يُؤثر عليه بأي صورة من الصور👌
وفي نفس الوقت رسول الله ﷺ مقلش لأبي سفيان انتم عملتم كذا وكذا، ولم يهدّده مثلا ولم يقل له كلاماً شديداً،
كل ده عشان رسول الله ﷺ ميلفتش نظر أبي سفيان إلى إن في احتمال لفتح مكة والهجوم عليها،
لأن رسول الله ﷺ عايز يفتح مكة بدون أي قتال، عايز مكة تستسلم له وميحصلش قتال عشان يشوفوا عظمة الإسلام والمسلمين يكون ده دافع لهم للدخول في الإسلام،
لأن زي ما قلنا قبل كده إن إللي يهم رسول الله ﷺ هو إدخال الناس للإسلام مش همه الانتقام ولا إنه ياخد أموالهم

ويقتلهم👌
أبو سفيان لما شاف إن رسول الله ﷺ لم يقبل إنه يتفاوض معاه، وإنه مردش عليه أصلا خرج من عند رسول الله ﷺ،
والمُتوَقع هنا من أبي سفيان إنه يرجع لمكة وهو غضبان ويجهز جيش ويهجم على المدينة عشان ينتقم لكرامته إللي اتهانت دي وتحصل أزمة بين قريش والمدينة😅
لكن حصل عكس كده تماما😮
خرج أبو سفيان من عند رسول الله ﷺ وتوجّه لوزير رسول الله ﷺ الأول أبو بكر الصديق رضي الله عنه وطلب منه نفس الكلام،
يعني إنه عايز يجدد العهد ويزيد المدة فكان عايز يتوسط له عند رسول الله ﷺ لكن الصديق رضي الله عنه قال له في حَزم وقوة واضحة:
ما أنا بفاعل😤
يعني أنا مش هتوسط بينك وبين رسول الله ﷺ، فخرج أبو سفيان من عند أبي بكر وهو مصدوم الصدمة التانية😕

أول صدمة لأبي سفيان كانت مع رسول الله ﷺ والثانية مع أبي بكر، ومع ذلك لم ييأس،
اتّجه إلى الوزير الثاني لرسول الله ﷺ وهو عمر بن الخطاب رضي الله عنه عشان يتوسط له عند رسول الله ﷺ،
وياريته ما كان راح😅
أول ما راح أبو سفيان لعمر وطلب منه نفس الطلب عمر قاله بمنتهى القوة:
أنا أشفع لكم عند رسول الله ﷺ 😠
والله لو لم أجد لكم إلا الذَّر لجاهدتكم به😤
يعني انت عايزني أنا اتوسط لك عند رسول الله ﷺ؟! ده أنا لو ملقتش جيش يقاتلكم غير النمل الصغير لقاتلتكم به،
الكلام صدم أبا سفيان طبعا هو متوقعش إن عمر يرد عليه الرد ده😅
خرج من عنده وهو مصدوم الصدمة الثالثة، ومع ذلك لسه مستسلمش؛ لأن وضعه ضعيف دلوقتي وعارف إنه مش هيقدر على حرب المسلمين فكان بيبذل كل مجهوده عشان يخلّي رسول الله ﷺ يرضى إنه يجدد العهد بينهم،
فبعد ما خرج من عند عمر راح لعلي بن أبي طالب فدخل عنده وكانت معاه زوجته فاطمة بنت رسول الله ﷺ وكان معاهم ابنهم الحسن وكان غلام صغير بيلعب وسطهم،
فقال أبو سفيان لعلي رضي الله عنه:
يا علي! إنك أَمسُّ القومِ بي رحماً، وإني قد جئتُ في حاجة فلا أرجعنّ كما جئتُ خائباً...اشفع لي إلى محمد😥
يعني هو بيقول لعلي إنه أقرب واحد له من ناحية الرحم وصلة القرابة، وهو جاء له يطلب منه خدمة ومش عايزه يرجعه خائب من غير ما ينفذ له طلبه، فطلب منه إنه يتوسط له عند رسول الله ﷺ،
فقال له علي:
وَيْحك يا أبا سفيان! لقد عزم رسول الله ﷺ على أمر ما نستطيعُ أن نكلّمَه فيه🤷‍♂️
يعني رسول الله ﷺ لمّا سمع بخيانة بني بكر وقريش وقتلهم لرجال من خزاعة وصل لدرجة من الغضب إن مفيش حد يقدر يكلمه ومحدش عارف هو هيعمل إيه ﷺ، ودي كانت الصدمة الرابعة لأبي سفيان😅
الْتَفت أبو سفيان إلى فاطمة وقال لها:
هل لكِ أن تأمري ابنك هذا فيُجِير بين الناس فيكون سيّد العرب إلى آخر الدهر😥
يعني بيطلب من السيدة فاطمة إنها تخلي الحسن وهو غلام صغير يقوم وسط الناس ويعلن حمايته لقريش وإن إللي هيتعرض لهم بسوء يبقى تعرض للحسن بسوء، ومش هننسى له الجميل ده أبدا،
إللي هو كلام غير منطقي أصلا، طفل إيه إللي يقف وسط الناس ويقول إن قريش في حمايته😅
فانتم تخيلوا المرحلة إللي وصل لها أبو سفيان عشان يطلب من غلام صغير إنه يحمي قريش😶
ففاطمة رضي الله عنها قالت له:
والله ما يَبْلغُ ابني ذاكَ أن يُجِير الناس🤨
وما يجيرُ أحدٌ على رسول الله 😤
يعني بتقوله ابني ده أصلا ميقدر يعمل إللي بتقوله ده لأنه صغير، وحتى لو يقدر فهو مش هيعمل كده من غير إذن ورضا رسول الله ﷺ،
ودي كانت الصدمة الخامسة لأبي سفيان، وساعتها الدنيا ضلّمت في وجه أبي سفيان فقال لعلي وكله يأس وقنوط:
يا أبا الحسن إني أرى الأمور قد اشتدت عليّ، فانصحني😓
فقال له عليّ:
والله ما أعلم لك شيئا يُغني عنك، ولكنك سيد بني كنانة فقم فَأَجِر بين الناس، ثم الْحِق بأَرضك👌
يعني أنا مش لاقيلك أي حل بصراحة، لكن انت سيد بني كِنانة، فانت قُم بين الناس وقل إن قريش في حمايتك ومحدش يعتدي عليهم وبعدين ارجع لبلدك،
فأبو سفيان اتحمس وسأل علي:
أَوَ ترى ذلك مغنياً عني شيئاً؟!😮
يعني لو أنا عملت كده هيبقى في فايدة والناس هتسمع كلامي،
فقال له علي:
لا والله ما أظنه، ولكني لم أجد لك غير ذلك🤷‍♂️
يعني لو عملت كده مش هيفيدك في حاجة لكن ده الحل الوحيد إللي قصادك،
ولإن أبا سفيان كان في حالة إحباط شديدة قام فعلا في المسجد وقال:
أيها الناس! إني قد أَجَرْتُ بين الناس🤚
يعني خلاص أنا فرضت حمايتي بين الناس ومفيش حد يعتدي على حد وخلاص المشكلة اتحلت،
وركب البعير بتاعه وانطلق ناحية مكة🤨
إللي هو عَرْض الرّجل الواحد one man show 😅
وأبو سفيان ماشي من المدينة متجه لمكة عدّى على سلمان الفارسي وصهيب الرومي وبلال بن رباح الحبشي وكانوا واقفين مع مجموعة من الصحابة،
فقالوا:
والله ما أخذتْ سيوفُ الله من عنقِ عدو الله مأخذهاَ 😏
يعني انت لسه عايش ومأخدتش جزاءك ومُت زي باقي أعداء الله إللي قتلهم المسلمين زي أبي جهل وأمية بن خلف وغيرهم من الكفار،
وإللي بيتكلموا مين🤭
ده مش ناس من أشراف العرب مثلا فممكن الكلمة متأثرش في أبي سفيان، أو يبلعها لهم لأ، ده الثلاثة سلمان وصهيب وبلال مش من العرب أصل

ا وكمان كانوا عبيد يُباعوا ويُشتروا😅
فالموقف كان شديد على أبي سفيان، فسمع كلامهم أبو بكر الصديق رضي الله عنه فقال لهم:
أتقولون هذا لشيخ قريش وسيدهم؟!!
هو قال الكلمة دي عشان يتألّف ويكسب قلب أبو سفيان ويستمِيله للإسلام، يعني مكنش عايزه يسمع إللي يُنفّره عن الإسلام،
فرجع أبو بكر لرسول الله ﷺ وأخبره إللي حصل، فكان رد فعل رسول الله ﷺ مختلف👌
قال رسول الله ﷺ لأبي بكر:
"يَا أَبَا بَكْرٍ لَعَلَّكَ أَغْضَبْتَهُمْ، لَئِنْ كُنْتَ أَغْضَبْتَهُمْ، لَقَدْ أَغْضَبْتَ رَبَّكَ"
يعني رسول الله ﷺ بيقول لأبي بكر إن كلامه ده ممكن يكون زعّل سلمان وصهيب وبلال،
والصحابة دول مكانتهم عالية في الإسلام فرضاهم هم أَوْلى من رضِا الكافر؛ لأن ربنا عظّم من شَأْن عبادِه المؤمنين المُتّقين،
فهو سبحانه يرضى لرضاهم ويغضب لغضبهم👌
منزلة عالية طبعا مش أي حد يوصل لها😅

فرجع لهم أبو بكر فَقَالَ: يَا إِخْوَتَاهْ أَغْضَبْتُكُمْ ؟
يعني هو بيسألهم إذا كانوا زعلوا من كلامه أو الكلام إللي قاله أغضبهم وضايقهم ولاّ لأ،
مقالش مثلا على كيفهم أنا معملتش حاجة غلط🙄
ده راح يستسمحهم ويتأكد من إنهم مش زعلانين مع إن أبا بكر أفضل منهم كلهم أصلا👌
فقَالُوا له: لَا ؛ يَغْفِرُ اللهُ لَكَ يَا أُخِي!
يعني قالوا له لأ مش زعلانين ودعوا له بالمغفرة، وده بيدل على كمال نفوس الصحابة وصفاء قلوبهم،
وإلا في ناس في موقفهم كانوا ممكن يستغلوا الموقف فيقولوا:
أه زعلانين ومش مسامحينك وبينا وبينك ربنا😤
الصحابة مكنوش كده والثلاثة دول بالذات رسول الله ﷺ شهد لهم بالتقوى والصلاح👌
فموقف الصحابة ده بيعلمنا إننا منقفش على كل كلمة تتقال ونُحسن الظن بالمسلمين ونلتمس لهم الأعذار😊

رجع أبو سفيان لمكة واجتمع معاه سادات قريش وسألوه:
ما وراءك؟! يعني عملت إيه🤔
فحكى لهم أبو سفيان إللي حصل معاه قال:
ًجئتُ محمداً فكلمتُه، فوالله ما ردّ عليّ شيئا 🤷‍♂️
ًثم جئتُ ابنَ أبي قحافةَ فلم أجدْ فيهِ خيرا😕
ثم جئتُ عمرَ بن الخطابِ فوجَدتُّه أَعدى العدو😑
ثم جئتُ علياَّ فوجدتُّه أَلْيَن القومِ👌
وقد أشارَ عليّ بشئٍ صنعتُه، فوالله ما أدري هل يُغنِي عنِّي شيئاً أم لا😓
قالوا: وبم أمَرَك🤔
قال: أَمرني أن أُجِيرَ بينَ النّاسِ، ففعلتْ😤
فقالوا له: فهل أجازَ ذلكَ محمداً؟😮
يعني محمد ﷺ وافق وأقرّ إللي انت عملته ده،
فقال لهم: لا😕
قالوا له: وَيْلك، إن زادَ الرجلُ على أن لَعِب بك😏
يعني زي ما بنقول كده: يا نهارك أبيض، ده ضحك عليك واستغفِلك😅
فقال: لا والله ما وجدت غير ذلك😞
يعني بيقول لهم إن مكنش قصاده غير إللي هو عمله ده،
هنا قريش عرفت إنها في مشكلة جامدة وبقى في احتمال كبير لغزو مكة وهم مش قادرين يعملوا حاجة ومفيش في إيدهم غير انتظار الأحداث الجاية👌

ده كان الوضع في مكة، طيب الوضع في المدينة كان إيه وإيه إللي رسول الله ﷺ عمله بعد كده🤔
ده إللي هنعرفه الجزء الجاي إن شاء الله 😊

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

⭐ المصادر ⭐

https://audio.islamweb.net/audio/index.php?page=FullContent&audioid=208199

https://khaledalsabt.com/explanations/2459/حديث-يا-ابا-بكر-لعلك-اغضبتهم

https://majles.alukah.net/t100728/

http://www.sahaba.rasoolona.com/Ghazawat/15/فتح-مكة/أبو-سفيان-يخرج-إلى-المدينة-ليجدد-الصلح

http://midad.com/article/202854/قصة-أم-حبيبة-مع-أبيها-أبي-سفيان

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

#قصص_الأنبياء(٢)
#السيرة_النبوية
#الحلقة_مائة_واثنان_وستون
#أحداث_السنة_الثامنة_من_الهجرة
#المَسِير_إلى_مكة

اتكلمنا المرة إللي فاتت عن أبي سفيان لما راح المدينة عشان يقابل رسول الله ﷺ ويجدد معاه العهد ويمدّه لفترة أطول،
وبعد محاولات كتير رجع مكة خائبا من غير ما يحقق أي حاجة وفضلت قريش قلقانة ومستنية تشوف رسول الله ﷺ والمسلمين هيعملوا إيه،
ده كان الوضع في مكة، هنرجع بقى لرسول الله ﷺ في المدينة ونشوف هيعمل إيه،
قلنا إن رسول الله ﷺ انتهز فرصة الأحداث إللي حصلت دي وأخذ القرار بفتح مكة،
عمل إيه بقى رسول الله ﷺ عشان ينفّذ القرار ده🤔
أول حاجة رسول الله ﷺ عملها إنه أمر المسلمين إنهم يتجهزوا للخروج للجهاد، حتى إنه أرسل للقبائل القريبة من المدينة وكانت على الإسلام إنهم يتجهزوا،
لكن مقلش لأي حد لسه هو هيروح فين بالضبط ، يعني يا جماعة اتجهزوا احنا خارجين للجهاد، فين بقى المكان إللي هيتوجهوا له محدش كان عارف👌
حتى إن أبا بكر دخل على ابنته عائشة رضي الله عنها، وهي بتحرك بعض جِهاز رسول الله ﷺ فسألها:
أي بنية! أَأَمركم رسول الله ﷺ أن تجهزوه؟
يعني رسول الله ﷺ أمركم إنكم تجهزوا لسفره للغزو،
قالت له عائشة: نعم، فتجهّز👌
يعني انت كمان تجهّز عشان تخرج مع رسول الله ﷺ،
فسألها : فأين تَرَيْنه يُريد؟
يعني تفتكري ناوي يروح فين للغزو، فقالت له:
لا والله ما أدري! يعني هي كمان مش عارفة رسول الله ﷺ هيروح فين،
لأن رسول الله ﷺ مكنش عايز الأخبار توصل لمكة إن المسلمين هييجوا يفتحوا مكة عشان قريش متجهزش جيش وتحصل حرب،
وبعد شوية رسول الله ﷺ أخبر الناس إن وجهة الغزوة دي هي مكة عشان يستعدوا بجديّة👌
وزيادة بقى في التّمْوِيه عشان المشركين ميعرفوش وجهة رسول الله ﷺ فين بالضبط رسول الله ﷺ أخرَج سرية مكونة من ثمانية رجال من الصحابة بقيادة أبي قتادة ناحية وادي إِضَم كطليعة للجيش، يعني كأنهم فرقة استكشافية للجيش إللي هييجي بعدين،
وأرسل رسول الله ﷺ للقبائل إللي طلب منهم يخرجوا معاه للجهاد إنهم يقابلوه في منطقة اسمها مَرّ الظَّهْران على بُعد حوالي اثنان وعشرون كيلو من مكة،
يعني القبائل هتيجي من طرق مختلفة ويتقابلوا في منطقة مَر الظهران عشان عيون قريش متعرفش حاجة عن الجيش إللي هييجي لمكة،
وفي رواية تانية برده إنهم تقابلوا مع رسول الله ﷺ وهو خارج من المدينة وانضموا لجيش رسول الله ﷺ،
المهم يعني إن الجيش هيبقى مكتمل قبل دخوله مكة😅

تجهز الصحابة في المدينة للخروج للقتال، وأمر رسول الله ﷺ إن محدش يُخبر أي إنسان خارج المدينة عن موضوع اتجاه المسلمين لغزو مكة،
ورفع رسول الله ﷺ يده للسماء ودعا وقال:
"اللهم خُذْ على أسماعِهم وأبصارِهم فلا يرونا إلا بَغْتة، ولا يسمعون بنا إلا فجأة"
يعني رسول الله ﷺ بيدعي ربنا إنه ميخليش قريش تعرف أي حاجة عن المسلمين وجيشهم ويتفاجؤا بالجيش ده،
وبدأ الإستعداد للخروج من المدينة،
حصلت هنا حادثة مهمة👌
واحد من الصحابة من أهل بدر اسمه حاطِب بن أبي بَلْتَعة كتب رسالة وأعطاها لامرأة عشان توصلها لقريش، والرسالة دي كان مكتوب فيها إن رسول الله ﷺ مجهز جيش وهييجي يغزو مكة😶
وحاطب ده لو تفتكروا كان أرسله رسول الله ﷺ برسالة للمقوقس حاكم مصر بيدعوه فيها للإسلام، يعني ده مش واحد عادي، ومع ذلك عمل الخيانة دي،
أيوة دي خيانة كبيرة جدا لرسول الله ﷺ والمسلمين، يعني مطلّع أسرار الدولة الإسلامية للأعداء😬
جاء الوحي لرسول الله ﷺ يخبره إن حاطب بن أبي بلتعة أرسل رسالة مع امرأة لقريش وهي في مكان كذا باتجاه مكة،
فأمر رسول الله ﷺ علي بن أبي طالب والزبير بن العوام إنهم يروحوا المكان إللي فيه المرأة ويجيبوا منها الرسالة،
وانطلق علي والزبير لحد ما وصلوا للمرأة ووقفوها وقعدوا يدوروا في المتاع بتاعها الموجود على الدابة ملقوش حاجة فقالوا لها هاتي الرسالة إللي معاكِ👌
فطبعا أنكرت وقالت إن معهاش أي رسائل🤷‍♂️
فقال لها علي:
"إِنِّي أَحْلِفُ بِاللَّهِ مَا كَذَبَ رَسُولُ اللَّهِ ﷺ وَلَا كُذِبْنَا،
لَتُخْرِجِنَّ الْكِتَابَ أَوْ لَنُلْقِيَنَّ الثِّيَابَ"
يعني بيقولها إن رسول الله ﷺ مكذبش علينا لما قال إنك معاكِ رسالة ولا الوحي كذب على رسول الله ﷺ وعلينا،
فطلعي الرسالة وإلا هنفتشك احنا👌
فلما المرأة شافت إصرارهم وانهم بيتكلموا جد وفعلا هيفتشوها قالت لعلي الزبير :
أَعْرِضا!
يعني التفتوا لمكان تاني عشان أعرف أطلع لك الرسالة، فأعْرَض علي والزبير،
فالمرأة فكّت شعرها وكانت عاملاه ضفيرة ومخبية الرسالة داخل الضفيرة😅
وأعطت لهم الرسالة فأخذوها ورجعوا للمدينة لرسول الله ﷺ وأعطوه الرسالة،
أرسل رسول الله ﷺ لحاطب بن أبي بلتعة، فجاء حاطب لرسول الله ﷺ، فقال له رسول الله ﷺ:
" يَا حَاطِبُ، مَا هَذَا؟ مَا حَمَلَكَ عَلَى هَذَا؟"
يعني إيه ده وإيه إللي خلاك تعمل كده؟!!
فقال حاطب لرسول الله ﷺ:
يَا رَسُولَ اللَّهِ، لَا تعجل عليَّ، إني كنتُ امرأً مُلْصَقًا فِي قُرَيْشٍ وَلَمْ أكُن من أنفسِها،
وكان م

َن معك من المُهاجرين مَن لهم قرابات يحمون بها أهليهم وأموالهم،
فأحببتُ إذا فَاتَنِي ذَلِكَ مِنَ النَّسَبِ فِيهِمْ أَنْ أَتَّخِذَ عندهم يدًا يحمون قَرَابَتِي، وَلَمْ أَفْعَلْهُ ارْتِدَادًا عَنْ دِينِي، وَلَا رِضًا بِالْكُفْرِ بَعْدَ الْإِسْلَامِ"
يعني حاطب بيقول لرسول الله ﷺ : استنى عليّ يارسول الله واسمعني، أنا حليف لقريش لكني مش من أهل المكة الأصليين،
وأنا عندي أهل في مكة ضعفاء مفيش حد يحميهم،
وانت والمهاجرين إللي معاك لكم قرابة وأهل أقوياء يقدروا يحموا نفسهم،
فأنا حبيت إن يكون ليّ فضل على قريش فيحفظوا جميلي ويحموا أهلي، وربنا هينصرك أصلا سواء أنا قلت لهم أو لأ،
وأنا معملتش كده عشان أنا منافق أو ارتديت على الإسلام ولا رضيت بالكفر بعد الإسلام👌
يعني باختصار هي لحظة ضعف خاف فيها حاطب على نفسه وعلى أهله،
فقال رسول الله ﷺ:
" لَقَدْ صَدَقَكُمْ"
يعني هو فعلا صادق في كلامه في إنه لم يكفر ولم ينافق ولكن هي لحظة ضعف منه،
لكن طبعا مش مبرر إنه عشان يحمي عيلته يخون الله ورسوله وتحصل مجزرة بين المسلمين وبين أهل مكة،
في حين إن لو جيش المسلمين دخل مكة فجأة في احتمال كبير إن أهل مكة يدخلوا الإسلام،
فالموقف هنا مش موقف سهل ولا عادي، حتى عمر بن الخطاب رضي الله عنه إللي كان حاضر الموقف قال لرسول الله ﷺ :
" يَا رَسُولَ اللَّهِ، دَعْنِي فَلْأَضْرِبْ عُنُقَهُ؛ فَإِنَّ الرَّجُلَ قَدْ نَافَقَ"
يعني خليني أقتله يا رسول الله لأنه نافق وخان الله ورسوله،"
يعني عمر نفسه شايف إن حاطب يستحق القتل بسبب خيانته دي،
لكن رسول الله ﷺ رد على عمر وقال له
" وَمَا يُدْرِيكَ يَا عُمَرُ، لَعَلَّ الله قد اطَّلع على أَصْحَابِ بَدْرٍ يَوْمَ بَدْرٍ فَقَالَ: اعْمَلُوا مَا شِئْتُمْ فَقَدْ غَفَرْتُ لكم"
يعني حاطب من أهل بدر وأهل بدر لهم مكانة خاصة عند ربنا وهم كلهم من أهل الجنة وربنا غفر لهم وعفا عن سيئاتهم إللي ممكن يعملوها، وخصوصا إن حاطب كمان اعترف بغلطه وهو معملش كده لأنه نافق أو كفر بالله ورسوله👌
ورسول الله ﷺ بيعلمنا هنا إن لما يحصل خطأ من أهل الفضل نعذرهم وخصوصا إن الخطأ مش متعمد ولكنه مُتَأَوّل
يعني حاطب عارف إن الخطاب بتاعه مش هيأثر حاجة في نصر الله لرسوله فعشان كده أرسله،
ونزلت في حاطب الآيات الأولى من سورة الممتحنة:
" يَا أَيُّهَا الَّذِينَ آمَنُوا لَا تَتَّخِذُوا عَدُوِّي وَعَدُوَّكُمْ أَوْلِيَاءَ تُلْقُونَ إِلَيْهِمْ بِالْمَوَدَّةِ وَقَدْ كَفَرُوا بِمَا جَاءَكُم مِّنَ الْحَقِّ يُخْرِجُونَ الرَّسُولَ وَإِيَّاكُمْ ۙ أَن تُؤْمِنُوا بِاللَّهِ رَبِّكُمْ إِن كُنتُمْ خَرَجْتُمْ جِهَادًا فِي سَبِيلِي وَابْتِغَاءَ مَرْضَاتِي"

☆طيب لو واحد من المسلمين دلوقتي أفشى أسرار المسلمين لأعداءهم وهو متعمد الخيانة يبقى حكمه إيه🤔
باختصار حكم الجاسوس على خلاف بين العلماء، في علماء قالوا إنه مرتد ويُقتل، وعلماء قالوا إنه لا يُقتل،
والصحيح إن الحكم يرجع لإمام المسلمين ويشوف الصلحة فين، يعني لو كان قَتْلُه فيه مصلحة للمسلمين يبقى يقتله ، وإن كان استبقاؤه وعدم قتله أصْلح للمسلمين استبقاه ولا يقتله👌
《تفصيل المسألة في رابط في التعليقات👇 من موقع الإسلام سؤال وجواب 》

خرج رسول الله ﷺ من المدينة مع جيش من الصحابة مكون من عشرة آلاف مقاتل متوجهين لمكة، وفي رواية تانية إنهم كانوا اثنا عشر ألف،
عشرة آلاف من المهاجرين والأنصار لم يَتَخلّف منهم أحد وألفين من القبائل إللي أسلمت،

☆رقم عشرة آلاف ده مش بيفكركم بحاجة😊
فاكرين غزوة الأحزاب إللي كانت من ثلاث سنوات وكان عدد المشركين فيها عشرة آلاف؟!
أهه الآية اتقلبت دلوقتي وبقى جيش المسلمين المُحاصر لقريش عشرة آلاف مقاتل من الصحابة، نفس العدد لكن فرق كبير جدا بين فريق الإيمان وفريق الكفر👌
"وَتِلْكَ الأَيَّامُ نُدَاوِلُهَا بَيْنَ النَّاسِ"

كان خروج رسول الله ﷺ في العاشر من رمضان في السنة الثامنة من الهجرة وكان صائم ﷺ وكان الصحابة كمان صايمين معاه،
بعد ما خرج رسول الله ﷺ من المدينة بفترة قابل رسول الله ﷺ العباس بن عبد المطلب جاء مع أهله مهاجرا للمدينة،
فكان هو آخر المهاجرين لأن مفيش هجرة بعد فتح مكة،
فزي ما خُتِمت النبوة برسول الله ﷺ فالهجرة خُتِمت بالعباس رضي الله عنه،
وفرح به رسول الله ﷺ فرحا شديدا فهو من أحب الناس إلى قلبه ﷺ،
واحنا منعرفش هل العباس كان مسلم من أيام بدر زي ماهو كان قايل لرسول الله ﷺ لما أُسر في بدر وكان بقاؤه في مكة السنين دي كلها عشان ينقل لرسول الله ﷺ أخبار قريش،
ولاّ هو لسه مسلم دلوقتي وبعد ما أسلم هاجر على طول🤷‍♂️
مفيش أي دليل على أي قول من القولين دول،
لكن الأكيد عندنا إن هو آخر المهاجرين من مكة إلى المدينة،
فانضم العباس لجيش المسلمين وأكمل أهله هجرتهم نحو المدينة👌

بالقرب من منطقة الجَحْفَة قبل مكة بحوالي مائة وثمانين كيلو كان في رجلين التقيا بجيش رسول الله ﷺ واستأذنا للدخول على رسول الله ﷺ، لكن رسول الله ﷺ لم يأذن

لهم بالدخول عليه ورفض إنه يقابلهم،
واحد اسمه أبو سفيان بن الحارث وهو ابن عم رسول الله ﷺ وكمان أخوه من الرضاعة وكان صاحب لرسول الله ﷺ قبل البعثة وكان في بينهم أُلفة، لكن بعد البعثة أبو سفيان ده عادَى رسول الله ﷺ وهَجاه وهجى أصحابه، يعني هو شاعر فكان بيقول شعر بيشتم فيه رسول الله ﷺ وأصحابه،
وأبو سفيان بن الحارث ده يا جماعة غير أبو سفيان بن حرب زعيم مكة، عشان بس محدش يتلخبط😅
أما الرجل الثاني إللي كان معاه فهو عبد الله بن أبي أُمَيَّة بن المُغِيرَة وهو ابن عمة رسول الله ﷺ عاتكة بنت المطلب،
إيه بقى إللي خرّجهم من مكة🤔
كانوا خارجين متجهين للمدينة عشان يُسلموا عند رسول الله ﷺ ومكنوش يعرفوا بأمر الجيش إللي كان قريب جدا من مكة ده،
فلما قابلوا الجيش واستأذنوا للدخول على رسول الله ﷺ لم يأذن لهم رسول الله ﷺ ورفض مقابلتهم،
فلما رفض رسول الله ﷺ مقابلتهم دخل عبد الله بن أمية على أخته أم سلمة وهي أخته من أبيه، وكانت أم سلمة مع رسول الله ﷺ في الغزوة دي،
فطلب منها إنها تشفع لهم عند رسول الله ﷺ، فدخلت أم سلمة رضي الله عنها على رسول الله ﷺ وقالت له:
" يا رسول الله صِهْرُك وابنُ عَمِّك وابن عَمَّتِك وأخوك من الرَّضَاعة وقد جاء الله بهما مُسْلِمَيْنِ لا يكونَا أشْقَى الناسِ بك"
يعني اصفح عنهم واقبل منهم وتجاوز عنهم، لأن رسول الله ﷺ كان أهْدر دمهم، يعني أي حد يقابلهم يقتلوه،
لأن عداوتهم كانت شديدة لرسول الله ﷺ حتى رسول الله ﷺ قال لأم سلمة:
" لا حَاجَةَ فِيهمَا، أمَّا ابْنُ عمِّي فهتَكَ عِرْضِيِ، وأما ابْن عمَّتى فَقَالَ لِي بِمَكةَ مَا قَالَ"
يعني أنا مش عايزهم، ابن عمي هتك عرضي يعني تكلم بكلام شديد فاحش في عرض رسول الله ﷺ وفي شخصه وكان حسان بن ثابت رد عليه بقصيدة يدافع عن عرض رسول الله ﷺ،
أما ابن عمته فهو إللي قال لرسول الله ﷺ :
" لَن نُّؤْمِنَ لَكَ حَتَّى تَفْجُرَ لَنَا مِنَ الْأَرْضِ يَنبُوعًا ۩ أَوْ تَكُونَ لَكَ جَنَّةٌ مِّن نَّخِيلٍ وَعِنَبٍ فَتُفَجِّرَ الْأَنْهَارَ خِلَالَهَا تَفْجِيرًا ۩
أَوْ تُسْقِطَ السَّمَاءَ كَمَا زَعَمْتَ عَلَيْنَا كِسَفًا أَوْ تَأْتِيَ بِاللَّهِ وَالْمَلائِكَةِ قَبِيلًا ۩ أَوْ يَكُونَ لَكَ بَيْتٌ مِّن زُخْرُفٍ"
ده غير إنه كان بيؤذي المسلمين في أي فرصة بيلاقيها،
فلما وصل لهما كلام رسول الله ﷺ قال أبو سفيان بن الحارث وكان معاه ابن له:
"وَاللَّهِ لَيَأَذْنَنَّ رَسُولُ الله ﷺ أَوْ لَآخُذَنَّ بِيَدِ ابْنِي هَذَا ، ثُمَّ لَنَذْهَبَنَّ فِي الْأَرْضِ حَتَّى نَمُوتَ عَطَشًا أَوْ جُوعًا"
يعني والله لو رسول الله ﷺ مرضيش يقابلنا لآخد ابني ده ونمشي في الصحراء لحد مانموت أنا وهو من الجوع أو العطش،
فلما سمع رسول الله ﷺ كلام ابن عمه، قلبه رق لهما ﷺ وأذن لهم بالدخول عليه، ودخل أبو سفيان بن الحارث وأنشد أمام رسول الله ﷺ بقصيدة يعتذر له فيها ويعلن فيها إسلامه،
فهم فعلا كانوا جايين ندمانين وعرفوا غلطهم،
وفي رواية بتقول إن علي بن أبي طالب قال لأبي سفيان بن الحارث إنه يقول لرسول الله ﷺ ما قال إخوة يوسف ليوسف:
"قَالُوا تَاللّهِ لَقَد آثَرَكَ اللّهُ عَلَينَا وَإِن كُنَّا لَخَاطِئِين"
فقال أبو سفيان بن الحارث الآية لرسول الله ﷺ، فقال له رسول الله ﷺ:
" لاَ تَثرَيبَ عَلَيكُمُ اليَومَ يَغفِرُ اللّهُ لَكُم وَهُوَ أَرحَمُ الرَّاحِمِينَ"
وعفا عنهم رسول الله ﷺ وقَبِل إسلامهم👌

وصل رسول الله ﷺ لمنطقة الْكَدِيدِ بَيْنَ عُسْفَانَ وَأَمَجَ، كل دي مناطق قريبة من مكة، فلما وصل المنطقة دي شرب الماء وأفطر بين الناس عشان يشوفوه ويعملوا زيه ،وقال لجيش المسلمين:
" إِنَّكُمْ قَدْ دَنَوْتُمْ مِنْ عَدُوِّكُمْ وَالْفِطْرُ أَقْوَى لَكُمْ"
يعني انتم قربتم من عدوكم فالأفضل إنكم تفطروا عشان لو حصل وجاء العدو نبقى احنا مستعدين، وطبعا المُفطر أقوى من الصائم في القتال والكر والفرّ👌
فبعض الصحابة أفطروا والبعض التاني اكمل صيامه، لأن هنا أمر الصيام مكنش على سبيل الإلزام لكن على سبيل الاختيار،
لكن لما وصل الجيش منطقة مرّ الظَّهْرَانِ قال للصحابة:
"إِنَّكُمْ مُصَبِّحُوا عَدُوِّكُمْ وَالْفِطْرُ أَقْوَى لَكُمْ فَأَفْطِرُوا "
يعني خلاص احنا كده هنقابل العدو بالتأكيد فيجب عليكم الفطر وفعلا أفطر الصحابة هنا لأمر رسول الله ﷺ؛ لأن هنا الموضوع مش اختياري👌
خدوا بالكم إن الفِطر هنا عشان يتقوُّوا على الجهاد مش عشان السفر، يعني يجوز للمسلم إنه يصوم في السفر عادي لو مكنش عليه مشقة،
لكن لو عليه مشقة في السفر فيجوز له إنه يفطر ويقضي الصيام بعدين👌

لما وصل رسول الله ﷺ لمنطقة مر الظَّهْرَانِ كان وقت العشاء والدنيا ليل، فأمر رسول الله ﷺ الصحابة إنهم يُوقدوا نار لكن مش أي نار👌
يعني رسول الله ﷺ كان عايز يعمل لقريش هزيمة نفسية؛ عشان يدخل مكة بأقل الخسائر الممكنة،
فأمر الصحابة رضي الله عنهم وأرضاهم إنهم يُشعلوا النيران جميعاً، يعني كل فرد منهم يُشعل شعلة ويرفعها بيده🔥 فبقى في عش

رة آلاف شعلة من النيران، والنار بحد ذاتها مرعبة، فلما الناس يشوفوها هيحسوا بالرهبة والخوف وهو ده المطلوب👌
فبقى منظر الجيش من بعيد مرعب لأي حد يشوفه🙊
لحد دلوقتي أهل مكة ميعرفوش حاجة عن جيش رسول الله ﷺ إللي بقى على بُعد اثنان وعشرون كيلو متر فقط من مكة،
في الوقت ده كان أبا سفيان قلقان ومش عارف رسول الله ﷺ هيعمل إيه، هو توقع إن ممكن رسول الله ﷺ يأتي مكة بجيش،
فخرج أبو سفيان خارج مكة عشان يشوف أي حد جاي من طريق المدينة فيسأله عن رسول الله ﷺ وإذا كان خرج في جيش ولاّ لأ وكان معاه ساعتها حكيم بن حُزام إللي كان ساعد في نقض صحيفة مقاطعة بني هاشم لو تفتكروا😊

خرج أبو سفيان خارج مكة وشاف النيران المشتعلة وكان منظر مهيب جدا بالنسبة له وأصابه الخوف والفزع،
في الوقت ده كان خرج بُدَيْل بن وَرْقاء عشان يشوف جيش رسول الله ﷺ جه ولاّ لسه لأنه كان عارف إن رسول الله ﷺ مش هيسكت عن إللي قريش عملته،
فشاف جيش رسول الله ﷺ وشاف أبو سفيان وهو واقف بيبص على جيش رسول الله ﷺ وهو ميعرفش إن ده جيش رسول الله ﷺ 😅
فيا ترى هيكون رد فعل أبي سفيان إيه لما يعرف إن الجيش الكبير ده جيش رسول الله ﷺ؟!

ده إللي هنعرفه الجزء الجاي إن شاء الله 😁

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊



#Eman_Shalapy