●ملحوظة مهمة●
أي حد عايز ياخد القصص عشان ينشرها عادي ياخدها من غير ما يستأذن 😊
أهم حاجة يحتسب نية نشر العلم عشان ياخد الأجر 😁✌

#قصص_الأنبياء
#قصة_آدم
#الجزء_الثاني

وقفنا عند الملائكة إللي سجدت لآدم ماعدا كائن واحد لم يسجد وعصى أمر ربنا😊
الكائن ده هو إبليس،
قلنا عن إبليس إنه كان من الجن،
■والجن ربنا خلقهم من لهيب أسود شديد الحرارة
إللي هو مارج من نار■

&ملحوظة مهمة&
☆الجن ده عالم زي عالم البشر....وكلمة شيطان تتقال على من كفر من الجن،
لكن مؤمنوا الجن لا يُقال عليهم شياطين،
فالشياطين جزء من الجن☆

فربنا رفع إبليس للسماء مع الملائكة مع إن الملائكة أفضل منه وأكرم،
حتى إن الملائكة كانت تقول:
ما خلق الله خلقا إلا وكنا أكرم منه وأعلم منه.
وطبعا الهدف إللي ربنا خلق البشر والجن هو إنهم يعبدوه سبحانه 👌
"وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ"

طيب السؤال إللي بيطرح نفسه هنا،
ربنا أمر الملائكة إنها تسجد إيه إللي دخل إبليس في الموضوع🤔
إحنا قلنا إن الملائكة هم أعظم وأكرم المخلوقات صح،
طيب لما الأمر ييجي لشخص عظيم وينفذه ...الطبيعي طبعا إن الأقل منه منزلة ينفذه بكل تلقائية،

طيب خلينا نقول إن إبليس فهم غلط وإختلف عليه الأمر🙄
الطبيعي في الموقف ده إنه يقول إيه،
يقول يارب إنت أمرت الملائكة وأنا من الجن فمكنتش عارف إني أنا كمان لازم أسجد😅
هو بأى مقلش كده😑
ده قال بكل بجاحة وكِبر :
" قَالَ لَمْ أَكُن لِّأَسْجُدَ لِبَشَرٍ خَلَقْتَهُ مِن صَلْصَالٍ مِّنْ حَمَإٍ مَّسْنُونٍ"
عارفين يعني إيه 😏
كأنه بيقول: أنا مسجدش لكائن معفن 🙄

متستغربوش متستغربوش😅
مش إحنا قلنا المرة إللي فاتت إن الحمأ المسنون معناها الطين المتعفن الأسود،
وإبليس شاف مراحل خلق آدم،
فهو شايف نفسه إنه مخلوق من نار والنار دي حاجة عظيمة
ده غير القدرات إللي عنده زي إنه ممكن يتمثل في صور متعددة زي البشر أو الحيوان،

وآدم مخلوق من طين متعفن وكمان أجوف ،
فإزاي بأى النار العظيمة تسجد لطين متعفن😏
فكل كلامه فيه انتقاص من آدم عليه السلام،
مع إن الطين أنفع وخير من النار
فالطين فيه: الرزانة، والحلم، والأناة، والنمو.
والنار فيها: الطيش، والخفة، والسرعة، والإحراق

فهو من الأول وفي قلبه حسد من آدم بسبب إن ربنا خلقه بيده وأعطاله اهتمام وفوق كل ده أمره هو و الملائكة بالسجود له ،
يعني هو كان متعمد أصلا إنه ميطعش أمر ربنا بالسجود لآدم،
يعني معندهوش أي شبهة أهه ولا عذر😑
وخصوصا إن ربنا أصلا وجه الأمر مبااااشرة لإبليس بالسجود،
"قال مَا مَنَعَكَ أَلَّا تَسْجُدَ إِذْ أَمَرْتُكَ"
فإبليس عصى أمر ربنا عامد متعمد،

وهنا يبان بأى صدق العبودية لله👌
مش ربنا كرم إبليس بسبب علمه وعبادته،
فالصادق في العبادة لله هينفذ أوامر ربنا حتى لو كانت مخالفة لهواه وهيقدم أومر ربنا على رغباته😊

¤=وقفة هنا مع نفسنا نبص في حياتنا كده،
هل بنعبد ربنا كما يريد ونطيع أوامره ولا بنعبد ربنا في الحاجات إللي على مزاجنا وحسب ظروفنا بس=¤

فربنا أمر إبليس بحاجة عكس هواه،
هل ضحى إبليس وداس على هواه عشان ربنا وتقبل أوامره
ولا رفض أوامر ربنا وقعد يجادل ويبرر معصيته الواضحة😑

أكيد كلنا قابلنا في الحياة نماذج من البشر كده،
تقوليها الصح تقعد تبرر وتدور على أي حجة وتجادل بالباطل،
سواء في أمور الدين أو الدنيا،
عشان كده لازم لما نسمع الصح من ربنا ننفذ،
حتى لو مقدرناش ننفذ يبأى منردش الحق لأي سبب،
لما نتقبله طاعة لله ربنا هيسهله علينا بعد كده😊

فبسب معصية إبليس ربنا طرده من رحمته وتوعده بدخول النار،
هنا إبليس طلب من ربنا إنه يمد في عمره لحاااد يوم القيامة،
طيب الطلب العجيب ده ليه؟
هل هو ناوي إنه يقضي الحياة دي تائب لله وطائع لعل ربنا يتجاوز عنه ويغفرله 😔
لأ 😑
ده طلب من ربنا كده عشان يهلك بني آدم،
قال لربنا مش إنت يارب أضلتني طيب أنا بأى هضل ذرية آدم،
" قَالَ فَبِمَا أَغْوَيْتَنِي لَأَقْعُدَنَّ لَهُمْ صِرَاطَكَ الْمُسْتَقِيمَ"
وهزيّن لهم المعصية وأحبّبهم فيها ومش هسيبهم لحد ما أضلهم كلهم
"إلا عبادك منهم المخلَصين"
فربنا حققله أمنيته وإداله العمر الطويل ،
" قَالَ فَإِنَّكَ مِنَ الْمُنظَرِينَ"
وقاله إعمل إللي إنت عايزه،
أي حد هيتبعك هيدخل معاك جهنم،
" لَّمَن تَبِعَكَ مِنْهُمْ لَأَمْلَأَنَّ جَهَنَّمَ مِنكُمْ أَجْمَعِينَ"
وأي حد هيتوب ويستغفر ويرجع هقبله وهيكون جزاؤه الجنة،
وده كان بداية العداء بين إبليس وذريته وآدم وذريته،

نرجع بأى لآدم عليه السلام😊
بعد ما ربنا خلق آدم مسح الله على ظهر آدم ،فنزلت أرواح ذرية آدم كووولهم، من بداية الخلق حتى قيام الساعة،
وهنا ربنا أخذ عليهم العهد وسألهم:
"أَلَسْتُ بِرَبِّكُمْ".....فقال البشر كلهم: "بلى"
آدم شاف ذريته ....شاف الفقير وشاف الغني وشاف السعيد وشاف الشقي،
فسأل ربنا ليه يارب فيهم الغني والفقير ليه كلهم مش زي بعض؟
فقال الله:
"أردت أن أُشكر"
وقال الله هؤلاء -من على اليمين

#قصص_الأنبياء(٢)
#السيرة_النبوية
#الحلقة_مائة_وخمسة_عشر
#علامات_الساعة_الصغرى
#الجزء_الثاني

اتكلمنا المرة إللي فاتت عن أول عشر علامات من علامات الساعة الصغرى، وهم عالسريع كده :
بعثة رسول الله ﷺ وانشقاق القمر وموت رسول الله ﷺ، وفتح بيت المقدس ومُوتَان يصيب الأمة، واستفاضة المال، وظهور الفتن وظهور مُدعي النبوة، وانتشار الأمن والفتنة إللي تدخل بيوت العرب،
11◇هندخل في العلامة الحادية عشر وهي: خروج نار من أرض الحجاز، قال رسول الله ﷺ:
"لا تقوم الساعة حتى تخرج نار من أرض الحجاز، يضيء لها أعناق الإبل ببُصرى"
وقال في حديث تاني:
"لا تقوم الساعة حتى تخرج نار من رُومان أو رَكُوبة يضيء منها أعناق الإبل ببصرى"
والكلام ده معناه إن الأرض ستنشقّ ويخرج منها الحمم الملتهبة، وإن النار دي هتكون عظيمة لدرجة إن الناس في الشام هيشوفوها، وبُصرى هي مدينة حوران في سُوريا،
والعلامة دي حصلت فعلا في عهد الإمام النووي سنة ستمائة وأربع وخمسين للهجرة،
وفي علماء كثير تكلموا عنها زي الإمام القرطبي وابن كثير وغيرهم،
قالوا إن النار دي كان بدايتها إن حصل زلزال شديد جدا للأرض من ليلة الأربعاء لحد يوم الجمعة، لدرجة إن الناس إللي كانوا في السجد النبوي كانوا بيسمعوا صوت الحديد إللي في منبر رسول الله ﷺ من شدة الزلزلة،
وكانت الزلزلة دي لها صوت زي صوت الرعد القاصف، طبعا الناس كانوا في قمة الرعب😶
وبعد الزلزلة دي ظهرت نار كبيرة جدا قريبة من ديار بني قريظة قرب المدينة،
الناس إللي كانوا داخل المدينة كانوا شايفين النار دي كأنها عندهم داخل المدينة،
والنار كانت مرتفعة جدا في السماء وبقى في أودية تسيل بالنار والجبال بقت تسيل نار،
انتم أكيد شوفتم البراكين لما بتفور وتسيل بتعمل إيه في الصخور والجبال والأرض،
أهه إللي حصل ده كان فوران بركاني في منطقة الحَرّة وهي منطقة مليئة بالتكوينات البركانية السوداء،
والصخور البركانية دي اتكونت بسبب الأنشطة البركانية القديمة،
فرسول الله ﷺ تنبأ إن هيحصل نشاط بركاني قبل قيام الساعة، وفعلا بعد ما قال كده بستمائة سنة تحقق كلامه ﷺ،
وبعدين ييجي واحد ويتجرأ ويُكذب رسول الله ﷺ ويقول إنه مش رسول وإن هو إللي اخترع الدين وإن مفيش حاجة اسمها إله😑
هو في كذبة ممكن تقعد أكثر من ألف وأربعمائة سنة؟!!
طيب والحاجات إللي قال إنها هتحصل وفعلا حصلت وهتحصل ، كل ده برده صدفة أو كذب🙄
"وَجَحَدُوا بِهَا وَاسْتَيْقَنَتْهَا أَنْفُسُهُمْ ظُلْمًا وَعُلُوًّا "
الباحث عن الحق يكفيه دليل، وإللي عايز يمشي على هواه مش هتكفيه كل الأدلة على وجه الأرض 👌
"أَرَأَيْتَ مَنِ اتَّخَذَ إِلَٰهَهُ هَوَاهُ أَفَأَنتَ تَكُونُ عَلَيْهِ وَكِيلًا"

المهم، النار الكبيرة بقى يسيل منها أودية من نيران واتجهت ناحية المدينة وأهل المدينة فزعوا منها جدا ومبقوش عارفين يعملوا إيه،
ومع النار دي حصل كسوف للشمس وبعدها خسوف للقمر،
يعني آيات وراء بعضها والناس خايفة،
فبدأ الناس يتوبوا ويتركوا المعاصي، ويدعون الله عزوجل،
ويتقربوا إليه بالطاعات،
ودخل أهل المدينة إلى المسجد النبوي مستغفرين تائبين إلى ربهم تعالى، وبات الناس بين مصلٍّ وتالٍ للقرآن، وراكع وساجد،
واستمر ثوران البركان والنار المشتعلة ثلاثة أشهر وبعدين النار دي انطفأت،
وكل من ذكر النار دي من المؤرخين والعلماء يقول في آخر كلامه: ولا أقدر أشرح وصفها على الكمال،
يعني مع كل الوصف إللي وصفوه مش قادرين يعبروا النار دي عاملة إزاي من شدتها والأهوال إللي كانت فيها😮
طبعا وَصْف العلماء فيها كثير جدا مش هقدر أقوله كله، أنا قلت المختصر المفيد إللي عايز تفاصيل ووصف أكثر هيلاقي روابط في التعليقات ممكن يرجع لها😊👇

☆ملحوظة مهمة بقى،
النار إللي خرجت في أرض الحجاز دي غير النار إللي هتخرج في آخر الزمان وهتقود الناس إلى أرض المحشر،
دي حاجة ودي حاجة تانية خالص، النار التانية دي هتخرج من قعر عدن في اليمن وهي من علامات الساعة الكبرى وهنتكلم عنها إن شاء الله لما ييجي وقتها👌

12◇العلامة الثانية عشرة: ضياع الأمانة، جاء رجل من الأعراب وسأل رسول الله ﷺ عن ميعاد يوم القيامة فقال له رسول الله ﷺ:
" إذا ضُيِّعت الأمَانَة فانتظر السَّاعة. فقال الأعرابي :
كيف إضاعتها؟
قال: إذا وُسِّد الأمر إلى غير أهله فانتظر السَّاعة"
والكلام ده معناه إن الناس هييجي عليهم زمن يكونوا في مكان مش مكانهم ولا يستحقوا يكونوا فيه،
تلاقي رئيس دولة مينفعش للرئاسة، نلاقي مدرس بيشتغل في مدرسة مينفعش للتدريس، نلاقي موظف في مصلحة مينفعش للشغل ولكن أخذوا العمل عن طريق الواسطة والرشاوي والأمور غير المشروعة،
وطبعا للأسف احنا شايفين تضييع الأمانة في واقعنا عامل إزاي، وبنسمع عن إللي بيزور شهادات والرشاوي إللي بتندفع 😓
وهييجي يوم تُرفع الأمانة من قلوب الناس، والرجل إللي كان أمين في يوم من الأيام هيصحى ويبقى خائن وترفع الأمانة من قلبه،
وده هيحصل للي مبقاش يخشى الله وبقى إيمانه ضعيف، وخالط أهل الخيانة فبقى

#قصص_الأنبياء(٢)
#السيرة_النبوية
#الحلقة_مائة_وثمانية_وأربعون
#أحداث_السنة_السابعة_من_الهجرة
#طريقة_تعامل_رسول_الله_مع_أخطاء_زوجاته
#الجزء_الثاني

اتكلمنا المرة إللي فاتت عن تعامل رسول الله ﷺ مع بعض أخطاء زوجاته، وزي ما طلبتم هنكمل النهارده الكلام عن طريقة تعامل رسول الله ﷺ مع أخطاء زوجاته😊

◇الموقف الخامس:
الموقف الرابع إللي اتكلمنا عنه المرة إللي فاتت كان عن غيرة السيدة عائشة رضي الله عنها وشوفنا إن بسبب الغيرة دي هي وقعت في الخطأ، وشوفنا إزاي رسول الله ﷺ اتعامل مع الخطأ ده،
الموقف إللي هنقوله دلوقتي برده عن غيرة السيدة عائشة، لكن رسول الله ﷺ اتعامل معاه بطريقة مختلفة، خلونا نشوف الموقف:
السيدة أم سلمة جاءت لرسول الله ﷺ ومعها صَحْفَةٍ فِيهَا طَعَامٌ حاجة زي طبق كده له ولأصحابه،
وفي رواية تاني إن صفية رضي الله عنها هي إللي أرسلت الطبق إللي في طعام مع خادم لرسول الله ﷺ،
المهم إن في حد من زوجات رسول الله ﷺ أرسلت بطبق فيه طعام، واليوم ده كان يوم عائشة رضي الله عنها،
فلما عائشة شافت الطبق غارت وضربت يد الخادم أو ضربت الطبق فوقع الطبق في الأرض انكسر والطعام اتكب على الأرض،
رسول الله ﷺ بكل هدوء بدأ يلم الطعام إللي في الأرض ويقول : غارت أمكم...غارت أمكم!
رسول الله ﷺ عذَر السيدة عائشة إنها عملت كده بسبب الغيرة، لكن الموقف بيقف عندنا هنا ونقول يا سلام شوفوا حلم رسول الله ﷺ وإن الموقف ده حصل قصاد الصحابة ومع ذلك رسول الله ﷺ لم يَصرخ ولم يشتم وراعى نفسية زوجته الغيور و....و.... كل الكلام ده حلو أوي👍
لكن في نص تاني احنا مش بناخد بالنا منه، وهو تصحيح الخطأ نتيجة الغيرة👌
الغيرة مش مبرر أبدا للخطأ أو إن الشخص إللي بيغير ميتحملش نتيجة خطأه بسبب الغيرة دي،
هنا حصل خطأ وهو كسر الإناء أو الطبق إللي كان فيه الطعام،
ورسول الله ﷺ عادل حكيم، فأخذ الطبق المكسور نصين وحاول إنه يجمعه في بعضه، يعني كأنه بيلزقه كده🤔
وأعطاه للسيدة عائشة لأنها هي إللي كسرته،
وأخذ طبق السيدة عائشة السليم وأعطاه للي اتكسر طبقها، سواء بقى كانت السيدة أم سلمة أو السيدة صفية رضي الله عنهم أجمعين، وقال: طعام بطعام وإناء بإناء،
ففي نفس الوقت إللي رسول الله ﷺ عذر الغيرة إللي عند السيدة عائشة كذلك هو خلاّها تصلّح خطأها إللي حصل بسبب الغيرة،
يعني رسول الله ﷺ بيعلمنا إن أه نُعذر الشخص لما يغير سواء كان رجل أو امرأة أو حتى طفل لكن مش معنى كده إنه لما يغلط بسبب الغيرة دي ويتعدّى حدوده يبقى نسكت ونُقره على غلطه ومنعالجش غلطه👌
مادام أخطأ يبقى يتحمل نتيجة خطأه ويدفع ثمنه بحجم الخطأ ده،
السيدة عائشة رضي الله عنها كسرت الطبق فبقى من نصيبها، وطبقها السليم أُرسل للي اتكسر طبقها وهو ده العدل👌
ومحدش يقول طيب ما هو رسول الله ﷺ قال:
《إن الْغَيْرَى لَا تُبْصِرُ أَسْفَلَ الْوَادِي مِنْ أَعْلَاهُ》
هقولكم الحديث ده ضعيف لا يثبت عن رسول الله ﷺ أصلا💁‍♂️
ولو فعلا الكلام ده صحيح مكنش رسول الله ﷺ عاتب السيدة عائشة ولَهَدَها في صدرها لما غارت وخرجت وراه زي ما حكينا المرة إللي فاتت،
ومكنش برده صلّح غلطها لما غارت وأعطاها هي الطبق المكسور وأخذ طبقها السليم،
كان على الأقل يشتري طبق تاني بدل إللي اتكسر على أساس يعني إن السيدة عائشة غيرانة ومش واعية بقى بنفسها ولاّ باللي هي عملته🤷‍♂️
فالغيرة مش مبرر للغلط ولا التعدي على حقوق الغير، لكن نلتمس العذر للغيران ونتعامل معاه بحكمة زي ما رسول الله ﷺ عمل عشان منزوّدش غيرته ونخليه يغلط بزيادة👌

☆طبعا كل الكلام ده لا يَقدح ولا يُسيء للسيدة عائشة إطلاقا،
هي فقط بشر زي باقي البشر وهي مش معصومة فطبيعي جدا إن ممكن يحصل منها بعض الأخطاء، وربنا ارتضاها لرسوله زوجة في الدنيا والآخرة👌
ومادام الإنسان بصفة عامة بيعترف بخطأه وبيصلحه فدي حاجة متعيبوش أبدا، ورسول الله ﷺ نفسه قال :
"لا يَفْرَكْ مُؤْمِنٌ مُؤْمِنَةً إِنْ كَرِهَ مِنْهَا خُلُقًا، رَضِيَ مِنْهَا آخَرَ"
يعني مينفعش الرجل يكره زوجته بسبب إنه شايف فيها عيوب معينة مش عاجباه،
لأنه لو كره فيها خُلق معين أكيد هيلاقي فيها خُلق تاني كويس،
يعني مثلا ممكن واحدة تكون شَرِسة الخُلُق لكنها في نفس الوقت عفيفة وعندها دين فمفيش إنسان بريء من العيب💁‍♂️
وحديث رسول الله ﷺ ده قاعدة عامة للكل،
يعني سواء بين الزوج وزوجته أو الزوجة وزوجها أو بين الصاحب وصاحبه أو بين الآباء وأباءهم وهكذا،
فزي ما في عيوب في مميزات، فلازم يكون في موازنة بين الاتنين👌

◇الموقف السادس:
برده عن السيدة عائشة بس المرة الموضوع معكوس بقى، يعني هي إللي اتغار منها😁

كان معروف بين الصحابة إن أحب الناس إلى رسول الله ﷺ هي عائشة رضي الله عنها،
فكان الصحابة بيتحرّوا ليلة السيدة عائشة إللي رسول الله ﷺ هيكون فيها عندها ويرسلوا فيها الهدايا ،
وكان زوجات رسول الله ﷺ حزبين😅
حزب فيه عائشة وحفصة وسودة وصفية،
والحزب الثاني كان فيه أم سلمة وباقي زوجات رسول الله ﷺ ،

#قصص_الأنبياء
#الحلقة_السابعة
#قصة_نوح_عليه_السلام
#الجزء_الثاني_الطوفان

اتكلمنا المرة إللي فاتت عن رفض قوم نوح لدعوة التوحيد وشوفنا الحجج إللي قالوها لنوح عليه السلام،
وشوفنا كمان رد نوح عليه السلام عليهم، لكن قوم نوح مسكتوش برده ومقتنعوش😑
قالوا انت بتفتري الكلام ده وبتألّف 😤
قالهم لو أنا بألّف وبفتري الكذب؛ أنا إللي هشيل الذنب ملكوش دعوة👌
وانتم كمان هتشيلوا ذنب إنكم مسمعتوش الكلام، ركزوا في المهم...في القضية نفسها، احكموا على محتواها.. هل هو حق ولّا باطل🤷‍♂️
"أَمْ يَقُولُونَ افْتَرَاهُ ۖ قُلْ إِنِ افْتَرَيْتُهُ فَعَلَيَّ إِجْرَامِي وَأَنَا بَرِيءٌ مِّمَّا تُجْرِمُونَ"

¤وفي هنا ملحوظة وهي إن ربنا لما بيبعث نبي أو رسول بيكون من القبيلة نفسها يعني همّ يعرفوه كويس ومعاشرينه وعارفين نسبه وأخلاقه وكل حاجة عنه، مش واحد غريب جاي من برة،
والأنبياء أخلاقهم كريمة ومحدش منهم بيكذب أبدا وبيكونوا أشراف ونسبهم عالي في قومهم،
عشان ميكنش لهم أي حجة في إنهم يردوا الحق،
زي مثلا لما إنسان بيكون على خلق ومؤدب ومحترم بطبيعته وأهله وأصحابه بيحبوه..
وبعدين ربنا يهديه للالتزام ويتعلم العلم الشرعي الصحيح ..
ويشوف مخالفات عند أهله وأصحابه ويبدأ ينصحهم بالصح عشان نفسه إنهم يفرحوا زيه بالحق إللي هو عرفه وحياته بقت أسعد بيه..
فهم بدل ما يسمعوا الكلام ويقتنعوا بالدليل والحق الواضح
تلاقيهم بقى يحاربوه ويزهّقوه وممكن يتعدوا عليه بالشتيمة أو السخرية أو يوْجعوه بالخصام ،
وهو يا عيني يكون مستغرب فين يا جماعة معاملتكم ليا بتاعة زمان😧
مش هيلاقيها لإنه بقى ينصحهم بحاجة مش على هواهم،
ودي سُنة كونية حصلت لجميع الأنبياء ومن سار على درب الدعوة إلى الله، فمحدش يزعل لو حصل معاه كده دي سنة كونية👌

لما قوم نوح لقوا إن مفيش فايدة من نوح وإنه مصمم على الضلال بتاعه ده،
قالوا يانوح انت بتجادل كتير ومش عايز تقتنع =واخدين بالكم😏= مش انت بتخوفنا بالعذاب، خلاص هات العذاب إللي انت بتقول عليه ده🙄
قَالُوا يَا نُوحُ قَدْ جَادَلْتَنَا فَأَكْثَرْتَ جِدَالَنَا فَأْتِنَا بِمَا تَعِدُنَا إِن كُنتَ مِنَ الصَّادِقِينَ"

نوح قالهم أنا مش بإيدي حاجة 🤷‍♂️
لو ربنا أراد؛ هينزّل عليكم العذاب، ودي حاجة سهلة يعني😏 إنتم مطلبتوش المستحيل😑
"قَالَ إِنَّمَا يَأْتِيكُم بِهِ اللَّهُ إِن شَاءَ وَمَا أَنتُم بِمُعْجِزِينَ".

ولو ربنا لم يُرد لكم الهداية مش هتنفعكم نصيحتي مهما قلت، فهو أعلم إذا كنتم تستاهلوا الهداية فعلا ولاّ تَستحبّون العَمَى على الهدى😤
"وَلَا يَنفَعُكُمْ نُصْحِي إِنْ أَرَدتُّ أَنْ أَنصَحَ لَكُمْ إِن كَانَ اللَّهُ يُرِيدُ أَن يُغْوِيَكُمْ ۚ هُوَ رَبُّكُمْ وَإِلَيْهِ تُرْجَعُونَ"

أنا عايزاكم تتخيلوا إن نوح عليه السلام كان بيدعو قومه في كل الأوقات، يعني الحوار إللي قلناه ده👆
مكنش مرة واحدة ولا في قاعدة واحدة كده وخلصت القصة😅
لاااااااااا 😶......ده قعد يدعو قومه سنييييين 👌
وكان بينوّع في الأسلوب، يعني شوية باللين وشوية بالشدة ،
شوية يُوْعدهم ويُبشرهم برحمة ربنا...وشوية يُخوفهم من عذابه،
مش بس كده ده كان حتى بينوّع في الوقت ،
يعني كان بيدعوهم بالنهار في مجالسهم،
وكان بيروح لهم بالليل لما يكونوا لوحدهم يدعوهم،
لأن في ناس ممكن تكون اقتنعت بس خايفة تُعلن الإيمان عشان محدش من أكابر القوم المجرمين يؤذيهم وهمّ مش هيستحملوا الأذى،
فهو جرب كوووول أساليب الدعوة👌
"قَالَ رَبِّ إِنِّي دَعَوْتُ قَوْمِي لَيْلًا وَنَهَارًا "
"ثُمَّ إِنِّي دَعَوْتُهُمْ جِهَارًا "
"ثُمَّ إِنِّي أَعْلَنتُ لَهُمْ وَأَسْرَرْتُ لَهُمْ إِسْرَارًا"

طيب كان رد فعل قومه إيه بقى😑
كل ماكان نوح عليه السلام عليه السلام يدعوهم ينفروا من كلامه و يهربوا منه بكل الطرق، لدرجة إنهم بدأوا يحطوا صوابعهم في ودانهم عشان ميسمعوش🙉

هل نوح قال خلاص أنا عملت اللي عليا أديني بقولهم وهم مش سامحين لودانهم تسمع حتى؟
فأنا مش هتكلم تاني بقى خلاص 😞

بالعكس 👌
بقى يشاورلهم بإيده،
بيدعوهم بإيده... يشاور عالسماء وينصحهم ويوصل لهم كلامه بالإشارة بدل العبارة😅

☆سبحان الله على قوة عزمه وإصراره على تبليغ رسالة ربنا😮

فقوم نوح راحوا واخدين هدومهم وحاطينها على وشهم عشان لا يسمعوه ولا حتى يشوفوه😑

كان ممكن يغمضوا عينهم، لكنهم حطوا الهدوم على وشهم، يعني مش عايزين نشوفك نهائي😤
"وَإِنِّي كُلَّمَا دَعَوْتُهُمْ لِتَغْفِرَ لَهُمْ جَعَلُوا أَصَابِعَهُمْ فِي آذَانِهِمْ وَاسْتَغْشَوْا ثِيَابَهُمْ وَأَصَرُّوا وَاسْتَكْبَرُوا اسْتِكْبَارًا"

شوفوا شدة الإعراض عن الحق....طيب ليه ده كله يا جماعة 😳
طيب متجربوا واسمعوا الكلام مش هتخسروا حاجة😐
الكِبر للأسف يعمل أكتر من كده😑
الكِبر من أخطر أمراض القلوب إللي تودّي في داهية فعلا ،
وهنشوف في الآخر وصية نوح لابنه بيقوله إيه عن الكبر بس لما نوصل ليها إن شاء الله.

نوح عليه السلام قعد يدعو قومه ويصبر على

#قصة_نهاية_البداية_إيمان_شلبي
#الدار_الآخرة_بالعامية
#الحلقة_التاسعة
#علامات_الساعة_الصغرى
#الجزء_الثاني

عارف لما تبقى ماشي في الشارع وعينك تقع《فجأة》على بنت لابسة ملابس ضيقة ومبينة زينتها وأجزاء من جسدها؟
أهه التبرج إللي البنات بتعمله ده من علامات الساعة الصغرى👌
بمعنى إن《ظهور النساء الكاسيات العاريات》ده من علامات الساعة الصغرى،
ومعنى الكاسيات العاريات إن النساء دول لابسين ملابس؛ لكنها ضيقة ومفصّلة لأجسادهن فكأنها عارية أو لابسين ملابس خفيفة رقيقة مبينة لأجسامهن والجديد في عصرنا بقى و بقينا شايفينه؛ إن النساء بتلبس المقطع ومبينة جسمها،
وللأسف الصنف ده قال عنه رسول الله ﷺ:
صِنْفَان مِنْ أَهْلِ النَّارِ لَمْ أَرَهُمَا: وذكر منهم:
"نِسَاءٌ كَاسِيَاتٌ عَارِيَاتٌ مُمِيلَاتٌ مَائِلَاتٌ، رُؤُوسُهُنَّ كَأَسْنِمَةِ الْبُخْتِ الْمَائِلَةِ"《رواه مسلم》
تخيل إن النساء دول مكنوش موجودين أيام الجاهلية؟!
رسول الله ﷺ مشفهمش في حياته حتى قبل الإسلام، فلك أن تتخيل كمية الانحدار إللي وصل إليه تبرج النساء👌
ورسول الله ﷺ بيقول إن النساء إللي وَصْفُهم كده؛ لو ماتوا من غير 《توبة》هيكونوا من أهل النار والعياذ بالله😓
لأن إللي بيعملوه ده كبيرة من الكبائر، والكبيرة هي:
"هي التي وَرَد فيها وعيد خاص أو حَدٌّ في الدنيا أو عذاب في الآخرة"
يعني لما احنا اتكلمنا عن الناس إللي هيتعذبوا في القبر زي آكل الربا،
ده كان عمل كبيرة من الكبائر لأن له وعيد خاص زي ما شرحنا وشوفنا عذابه كان عامل إزاي،
أو السرقة مثلا، هي كبيرة من الكبائر لأن لها حَد في الدنيا وهو قطع يد السارق،
وكذلك التبرج وعدم لبس الحجاب الشرعي الصحيح هو كبيرة من الكبائر؛ لأن له عذاب في الآخرة وهو إن النساء دول هيكونوا من أهل النار👌
فانت لو ليك أخت أو زوجة أو بنت أو أي واحدة من محارمك مش لابسة حجاب شرعي ووصفهم زي ما جاء في حديث رسول الله ﷺ كده؛ انصحهم بالحُسنى إنهم يلتزموا بالحجاب الشرعي عشان ميدخلوش في حديث رسول الله ﷺ👌

¤طبعا مش محتاجة أفكرك بإنك لا يجوز لك إنك تقعد تبص للبنت المتبرجة👀
يجب عليك غض البصر مهما كانت هي لابسة إيه👌
ورسول ﷺ اتسأل عن نظر الفجأة فأمر بصرف النظر،
يعني تُدِير وجهك ولا تنظر مرة ثانية،
ومش معنى إن البنت لابسة اللبس المتبرج ده؛ يبقى ده مبرر ليكِ إنك متغضش بصرك عنها،
أيوة هي هتاخد ذنب التبرج وعدم طاعة ربنا بإنها لم تلبس الحجاب الشرعي؛
لكن انت برده هتتحاسب لو قعدت تبص عليها ومصرفتش نظرك عنها👌

وبما إن نساء كتير بقوا كاسيات عاريات وبيمشوا في الشوارع بالمنظر ده ورجال كتير بيشوفوهم؛ فالنتيجة الطبيعية لكده ظهور علامة تانية من علامات الساعة الصغرى وهي《انتشار الزنا》؛ لأن أعظم فتنة على الرجال هي النساء👌
فالشاب يشوف البنت فيعجب بجسدها فيحاول يوقعها في حباله باسم الحب وما شابه حتى يحصل ما لا يُحمد عقباه👌
وانتشار الزنا من العلامات إللي ظهرت بطريقة مرعبة في الفترة الأخيرة،
وبقى في مُجاهرة بالعلاقات المحرمة إللي المفروض إنها حصلت في السر حتى على مواقع التواصل الاجتماعي والموضوع للأسف بقى عادي جدا عند الناس إلا من رحم الله،
تخيل إن الزنا هينتشر وسط الناس لحد ما يوصلوا إنهم يستحلّوه والعياذ بالله😞
قال رسول الله ﷺ:
"ليكونن من أمتي أقوام يستحلُّون الحِرَ والحرير والخمر والمعازف"
《حديث صحيح-أخرجه البخاري موصولا》
والحِرَ معناه الزنا،
ولو انت متابع هتلاقي إن في زماننا دلوقتي الشاب له صاحبة والبنت لها صاحب إلا من رحم الله،
لأ وبيتفاخروا ويعلنوا ده وسط الناس، وبتخرج مع صاحبها عادي ويعملوا قصاد الناس ما يفعل الرجل مع زوجته في خلوتهم،
مع إن زمان كان نادرا لما تشوف بنت ماشية مع شاب،
ولو حصل؛ بتبقى مكسوفة وحاسة إنها بتعمل حاجة غلط،
لكن دلوقتي الآية اتعكست وبقى الطبيعي إن البنات يكون لهن أصحاب شباب،
وياريت الموضوع هيقف لحد هنا، ده هييجي اليوم إللي الرجل هيزني بالمرأة في الشارع كده علنا عادي ومحدش هيكلمه،
وهيكون أحسن واحد ساعتها هو إللي هيقول له :
لو إنك تزني بيها وراء الجدار أحسن!
متخيل إنه مش بينكر الزنا!
ده بيقول له ازني بس روح وراء الجدار مش في وسط الشارع،
وده كلام رسول الله ﷺ، قال:
"والذي نفسي بيده لا تفنى هذه الأمة حتى يقوم الرجل إلى المرأة فيَفْتَرِشُها في الطريق فيكون خِيَارهم يومئذ من يقول لو وَاريتها وراء هذا الحائط"《السلسلة الصحيحة》

أنا شخصيا لما كنت بسمع الحديث ده زمان كنت بستغرب إزاي ممكن الحال يوصل للدرجة دي!
لحد ما شفت الحال إللي وصلنا له وكل ده كان بالتدريج،
الشيطان مش بيزهق، هو بيحط البذرة ويفضل يرعاها ومعندوش مشكلة إنه يحصد الزرع بتاعه في الجيل إللي بعده👌
ربنا يعافينا ولا يجعلنا نحن ولا ذرياتنا بذرة أو حصاد😞