⚖️Хутка пачнуць судзіць Таццяну Сцепу, затрыманую падчас рэйду КДБ за дапамогу палітвязням

54-гадовую Таццяну затрымалі за тыдзень да яе Дня народзінаў — 23 студзеня, падчас масавага хапуна супрацоўнікамі КДБ за салідарнасць з палітвязнямі.

Жанчыну абвінавачваюць паводле ч. 1 і ч. 2 арт. 361-4 КК (садзейнічанне экстрэмісцкай дзейнасці), а таксама паводле ч. 3 арт. 361 КК (заклікі да мераў абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы Рэспублікі Беларусь). Цяпер яе ўтрымліваюць у жодзінскай турме № 8.

Суд над жанчынай распачнецца 16 верасня ў Мінскім гарадскім судзе. Справу будзе весці суддзя Алена Шылько.

💌Месца ўтрымання: Следчая турма № 8. 222163, г. Жодзіна, вул. Савецкая, 22А, Таццяна Віктараўна Сцепа
💻Напісаць анлайн

💔За дапамогу палітвязням будуць судзіць 57-гадовую Ірыну Клязовіч

Жыхарка Салігорска была затрымана 23 студзеня падчас масавага рэйду КДБ на людзей, якія выказвалі салідарнасць з палітвязнямі. Ірыну абвінавачваюць у "садзейнічанні экстрэмісцкай дзейнасці" (арт. 361-4 Крымінальнага кодэксу).

Справу жанчыны пачнуць разглядаць 18 верасня ў Мінскім абласным судзе. Працэс будзе весці суддзя Сяргей Васілеўскі.

💌Месца ўтрымання: Следчая турма № 8. 222163, г. Жодзіна, вул. Савецкая, 22А, Ірына Мікалаеўна Клязовіч
💻Напісаць анлайн

⚖️Палітвязня, затрыманага па вяртанні з Польшчы, будуць судзіць па двух крымінальных артыкулах

Максім Хвашчынскі — жыхар Бабруйска, якога затрымалі 26 лютага — на наступны дзень пасля таго, як вярнуўся з Польшчы.

Спачатку яго асудзілі па адміністрацыйным артыкуле 19.11 (распаўсюд экстрэмісцкіх матэрыялаў), а затым завялі крымінальную справу паводле ч. 1 і ч. 2 арт. 361-1 КК (стварэнне экстрэмісцкага фармавання) — нібыта Максім датычны да стварэння экстрэмісцкага фармавання "Бабруйск 375", а таксама экстрамісцкага тг-чату "Бобр 97%". Акрамя гэтага яго вінавацяць у "паклёпе на Лукашэнку" (арт. 367 КК).

Справу палітвязня пачне разглядаць 18 верасня Магілёўскі абласны суд. Суддзя — Ігар Шведаў.

💌Месца ўтрымання Максіма: Турма № 4. 212011, г. Магілёў, вул. Крупскай, 99А, Максім Уладзіміравіч Хвашчынскі
💻Напісаць анлайн

❗️Супраць палітвязня Сяргея Раманава ўзбудзілі новую крымінальную справу

Па інфармацыі @belarus_abc, палітвязню прад'явілі чарговае абвінавачванне паводле арт. 411 КК (злоснае непадпарадкаванне адміністрацыі калоніі). Пры гэтым, у сакавіку 2023 года Раманаву дадалі яшчэ 11 месяцаў зняволення паводле гэтага артыкула. Новы суд, верагодна, распачнецца ўжо праз некалькі тыдняў.

Нядаўна Сяргея, які толькі ў траўні выйшаў з ПКТ, дзе правёў паўгода, зноў адправілі туды ў ліпені на 5 месяцаў. Пісьма ад Сяргея не даходзяць ужо больш за месяц.

Нагадаем, 22 снежня 2021 года Мінскі абласны суд прызначыў Аліневічу і Раманаву — па 20 гадоў калоніі; Рэзановічу — 19 гадоў калоніі; Дубоўскаму — 18 гадоў калоніі. Суд з першага пасяджэння адбываўся ў закрытым рэжыме.

💌Месца ўтрымання Сяргея: ПК № 9. 213410, г. Горкі, вул. Дабралюбава, 16
💻Напісаць анлайн

📍У Гродне распачаўся чарговы суд за салідарнасць з палітвязнямі

9 верасня 2024 года ў Гродзенскім абласным судзе пачалі судзіць 26-гадовую Кацярыну Мендрык. Яе абвінавачваюць паводле ч. 1 і ч. 2 арт. 361-4 КК (садзейнічанне экстрэмісцкай дзейнасці). Працэс вядзе суддзя Руслан Гурын.

Кацярыну затрымалі 28 студзеня пасля вяртання з Польшы ў Беларусь. Прычынай для пераследу стала падтрымка палітвязняў — дзяўчына рабіла грашовыя пераводы і дасылала пасылкі.

Згодна з інфармацыяй у сацсетках, яна нарадзілася ў Лідзе, але яшчэ ў дзяцінстве пераехала жыць у Гродна. Кацярына вучылася ў Варшаўскім універсітэце і доўгі час жыла ў Польшы.

💌Месца ўтрымання: Турма № 1. 230023, г. Гродна, вул. Кірава, 1, Кацярына Аляксандраўна Мендрык
💻Напісаць анлайн

❗️Палітвязня Андрэя Будая будуць судзіць па новай крымінальнай справе

Андрэй — фігурант па гучнай справе ініцыятывы "Буслы ляцяць", якую прызналі тэрарыстычнай. Яго прызналі вінаватым паводле чатырох артыкулаў Крымінальнага кодэкса. Суддзя Анастасія Папко 28 верасня 2022 года прызначыла яму 15 гадоў калоніі ва ўмовах узмоцненага рэжыму і штраф у 500 базавых велічынь.

Спачатку палітвязень адбываў тэрмін у віцебскай калоніі № 3, а пазней быў пераведзены ў бабруйскую калонію № 2. Вядома, што палітвязня рэгулярна змяшчаюць у ШІЗА. 

Стала вяома, што 23 верасня ў Бабруйску Андрэя будуць судзіць паводле ч. 2 арт. 411 КК за "злоснае непадпарадкаванне патрабаванням адміністрацыі калоніі". Справу будзе разглядаць суддзя Павел Карцінін. 

💌Месца ўтрымання: ПК № 2. 213800, г. Бабруйск, вул. Сікорскага, 1, Андрэй Вячаслававіч Будай
💻Напісаць анлайн

📍Палітзняволеную Таццяну Канеўскую перавялі з турмы ў гомельскую калонію

Таццяна — актывістка ініцыятывы “Матчын рух 328”. Змагалася за свабоду свайго сына, якога асудзілі па наркатычным артыкуле. У траўні 2021 года яе асудзілі да 6 гадоў калоніі па двух артыкулах Крымінальнага кодэкса: ч. 2 арт. 293 (удзел у масавых беспарадках) і арт. 292 (захоп будынкаў).

У калоніі Таццяну змяшчалі ў ШІЗА і ў ПКТ. У студзені 2022 года Таццяне ўзмацнілі пакаранне і перавялі на турэмны рэжым, дзе на яе аказвалі ціск.

Тэрмін турэмнага рэжыму скончыўся, таму палітзняволеню перавялі ў жаночую калонію № 4.

💌Месца ўтрымання: ПК № 4. 246035, г. Гомель, вул. Антошкіна, 3, Таццяна Васільеўна Канеўская
💻Напісаць анлайн

❗️Палітвязня Алега Яфрэменку трэці раз будуць судзіць за "непадпарадкаванне адміністрацыі калоніі"

У судзе Барысаўскага раёна 23 верасня будзе разгледжана чарговая справа супраць палітвязня Алега Яфрэменкі. Яго трэці раз абвінавачваюць паводле ч. 1 арт. 411 Крымінальнага кодэкса (злоснае непадпарадкаванне патрабаванням адміністрацыі папраўчай установы).

Раней палітвязню ўжо ўзмацнялі рэжым: у верасні 2021 Алега перавялі на турэмны рэжым, а пазней двойчы дадавалі па году калоніі за "непадпарадкаванне адміністрацыі". Алега ўтрымліваюць у зняволенні ўжо чатыры гады.

Падрабязнасці 👉 https://spring96.org/be/news/116232

⚖️Прызначана дата апеляцыі па справе палітвязня Аляксандра Францкевіча

У судзе Ваўкавыскага раёна 24 чэрвеня адбыўся суд над палітвязнем, асуджаным раней да 16 гадоў і дзевяці месяцаў калоніі ва ўмовах строгага рэжыму. Яго абвінавацілі паводле ч. 2 арт. 411 КК (злоснае непадпарадкаванне адміністрацыі калоніі). Суддзя Мікалай Сяргейка прызначыў палітвязню яшчэ адзін год пазбаўлення волі.

Гродзенскі абласны суд 24 верасня разгледзіць апеляцыйную скаргу Аляксандра. Рашэнне будзе прымаць судовая калегія пад старшынствам суддзі Васіля Скока.

Нагадаем, Аляксандр — актывіст анархісцкага руху і фігурант справы "Рэвалюцыйнага дзеяння". Палітвязня прызналі вынаватым па шэрагу цяжкіх Крымінальных артыкулаў.

19 ліпеня стала вядома пра затрыманне маці палітвязня — Таццяны. Яе абвінавачваюць ва "удзеле ў экстрэмісцкім фармаванні" паводле арт. 361-1 КК. Жанчыну ўтрымліваюць пад вартай у віцебскім СІЗА-2.

📍У Мінску распачаўся суд над Інай Плахатнюк. Верагодна, судзяць яе за салідарнасць з палітвязнямі

Іну абвінавачваюць паводле ч. 1 і ч. 2 арт. 361-4 Крымінальнага кодэкса. Судзіць жанчыну пачалі 12 верасня ў Мінскім абласным судзе. Справу разглядае суддзя Алена Бачышча.

«Вясна» знайшла жанчыну ў сацсетках, пра якую, верагодна, ідзе гаворка. Іне 49 гадоў, яна з Салігорску. Апошні «лайк» у Аднакласніках быў напачатку студзеня, якраз перад масавым рэйдам КДБ.

Сем месяцаў пасля рэйду за салідарнасць з палітвязнямі: больш за 20 чалавек пад вартай, 9 з іх патрапілі пад суд

✍️Калі вам вядомыя падрабязнасці справы, калі ласка, напішыце праваабаронцам на @Viasnainfo

🔗Прызначана дата новага суда над палітвязнем Сяргеем Раманавым

Палітвязню інкрымінуюць арт. 411 КК (злоснае непадпарадкаванне адміністрацыі калоніі). Пры гэтым, у сакавіку 2023 года Раманаву дадалі яшчэ 11 месяцаў зняволення паводле гэтага артыкула. Новы суд распачнецца ўжо 24 верасня ў Горках. Працэс прызначана весці суддзя Наталля Фомічава.

Нядаўна Сяргея, які толькі ў траўні выйшаў з ПКТ, дзе правёў паўгода, зноў адправілі туды ў ліпені на 5 месяцаў. Пісьма ад Сяргея не даходзяць ужо больш за месяц.

Нагадаем, 22 снежня 2021 года Мінскі абласны суд прызначыў Аліневічу і Раманаву — па 20 гадоў калоніі; Рэзановічу — 19 гадоў калоніі; Дубоўскаму — 18 гадоў калоніі. Суд з першага пасяджэння адбываўся ў закрытым рэжыме.

💌Месца ўтрымання Сяргея: ПК № 9. 213410, г. Горкі, вул. Дабралюбава, 16
💻Напісаць анлайн

🇺🇦Ураджэнца Херсона будуць судзіць у Мінску па 4 крымінальных артыкулах. Летась яго ўжо асудзілі за каментары

51-гадовы Сяргей Белы родам з украінскага Херсона, але амаль усё жыццё пражыў у Беларусі, піша @nashaniva. Усё жыццё працаваў на розных рабочых спецыяльнасцях. Мае двух непаўналетніх дзяцей.

Мужчыну затрымалі ў лютым 2023 года. На "пакаяльным" відэа ён кажа, што пакідаў каментары ў тэлеграме і «прайшоў рэгістрацыю ў чат-боце план «Перамога». У першы раз яго асудзілі ў кастрычніку 2023 года за «распальванне іншай сацыяльнай варожасці» (ч. 1 арт. 130 КК).

Наступны суд над Сяргеем пачнецца 27 верасня ў Мінскім гарадскім судзе. Яго абвінавачваюць па 4 артыкулах — «удзел у экстрэмісцкім фарміраванні» (ч. 3 арт. 361-1 КК), «распальванне іншай сацыяльнай варожасці» (ч. 1 арт. 130 КК), «абраза прадстаўніка ўлады» (арт. 369 КК) і «абраза Лукашэнкі» (ч. 1 арт. 368 КК). Сяргею пагражае да пяці гадоў калоніі ў дадатак да мінулага тэрміна. Справу будзе разглядаць суддзя Міхаіл Макарэвіч.

❗️Палітвязня Рамана Марусава будуць судзіць за "злоснае непадпарадкаванне адміністрацыі калоніі"

Раман — кантрактнік з 103-й віцебскай паветрана-дэсантнай брыгады, нарадзіўся ў Касцюковічах. Палітвязень быў затрыманы 23 сакавіка 2021 года. Яго асудзілі да шасці гадоў калоніі па арт. 130 КК (распальванне сацыяльнай варожасці) за перадачу інфармацыі BYPOL.

Праваабаронцам вядома, што яго збілі пры затрыманні. Сляды збіцця, кроў бачны і на «пакаяльным відэа». Адбываць тэрмін Рамана адправілі ў віцебскую калонію № 3. Пазней палітвязню ўзмацнілі пакаранне. Па рашэнні суддзі Міхаіла Зубені палітвязня перавялі на турэмны рэжым у Магілёў.

27 верасня ў судзе Ленінскага раёна Магілёва над ім распачнецца суд паводле ч. 2 арт. 411 КК (злоснае непадпарадкаванне адміністрацыі турмы). Справу будзе разглядаць суддзя Таццяна Рахманенка. Раману могуць дадаць яшчэ 2 гады зняволення.

💌Месца ўтрымання: Турма № 4. 212011, г. Магілёў, вул. Крупскай, 99А, Раман Браніслававіч Марусаў
💻Напісаць анлайн

49-гадовую Аксану Ляпко хутка будуць судзіць за салідарнасць з палітвязнямі

Аксана была затрымана 23 студзеня 2024 года падчас рэйду КДБ за дапамогу палітвязням. Жанчыне прад'явілі абвінавачванне паводле ч. 1 і ч. 2 арт. 361-4 КК (садзейнічанне экстрэмісцкай дзейнасці).

Суд над ёй распачнецца 16 верасня ў Гродзенскім абласным судзе. Справу будзе разглядаць суддзя Валерый Раманоўскі.

💌Месца ўтрымання: Турма № 1. 230023, г. Гродна, вул. Кірава, 1, Аксана Генрыхаўна Ляпко
💻Напісаць анлайн

На наступным тыдні пачнуць судзіць Змітра Дашкевіча

Суд Першамайскага раёна Мінска 25 верасня пачне разгляд справы палітзняволенага Змітра Дашкевіча. Справу будзе разглядаць суддзя Анастасія Кулік.

Змітру інкрымінаваны «народны» арт. 342 КК (актыўны удзел у групавых дзеяннях, якія груба парушаюць грамадскі парадак), а таксама ч. 1 арт. 411 КК (злоснае непадпарадкаванне патрабаванням адміністрацыі калоніі).

Нагадаем, актывіста разам з жонкай Настай абвінавацілі ва ўдзеле ў акцыі пратэсту 23 жніўня 2020 года. 14 ліпеня 2022 года Змітру прызначылі 1,5 года калоніі, а Насце — 3 гады «хатняй хіміі».

Актывіст мусіў выйсці на волю з папраўчай калоніі № 14 па заканчэнні тэрміну 11 ліпеня 2023 года. Але адразу па выхадзе яго затрымалі ў межах новай крымінальнай справы па арт. 411 КК. Суддзя Таццяна Дзеравянка прызначыла палітвязню яшчэ адзін год калоніі ва ўмовах строгага рэжыму. У гэтым траўні супраць яго распачалі новую крымінальную справу.

52-гадовую Наталлю Гаўрон хутка будуць судзіць за салідарнасць з палітвязнямі

Наталля была затрымана 23 студзеня падчас рэйду КДБ за дапамогу палітвязням. Жанчыне прад'явілі абвінавачванне паводле ч. 1 і ч. 2 арт. 361-4 КК (садзейнічанне экстрэмісцкай дзейнасці).

Суд над ёй распачнецца 30 верасня ў Мінскім абласным судзе. Справу будзе разглядаць суддзя Уладзімір Арэшка.

💌Месца ўтрымання: Следчая турма № 8. 222163, Жодзіна, Савецкая, 22А, Наталля Браніславаўна Гаўрон
💻Напісаць анлайн

🔹Сем месяцаў пасля рэйду за салідарнасць з палітвязнямі: больш за 20 чалавек пад вартай

Палітзняволенага Віктара Снегура асудзілі за «злоснае непадпарадкаванне адміністрацыі калоніі»

11 кастрычніка Мінскі абласны суд будзе разглядаць апеляцыю на прысуд у дачыненні да Віктара Снегура паводле ч. 2 арт. 411 КК (злоснае непадпарадкаванне патрабаванням адміністрацыі калоніі). Судовы працэс будзе ўзначальваць суддзя Алег Лапека.

Калі менавіта Віктара судзілі за «злоснае непадпарадкаванне» і якое рашэнне прыняў суд — пакуль невядома.

Віктар — фігурант «справе Аўтуховіча». Яго абвінавацілі па шэрагу артыкулаў Крымінальнага кодэксу і асудзілі да 19 гадоў калоніі ва ўмовах строгага рэжыму і 800 базавых велічыняў штрафу (25 600 рублёў).

🔹Беларусы на «крытай»: як палітвязняў працягваюць пераследаваць у калоніях

Палітзняволенага актывіста анархічнага руху Ігара Аліневіча зноў змясцілі ў ШІЗА

Пра гэта паведамляе @belarus_abc.

Да гэтага Ігар трымаў галадоўку пакуль знаходзіўся ў ШІЗА і змог дамагчыся адпраўкі ў бальніцу. З 13 па 26 чэрвеня Ігар трымаў галадоўку ў ШІЗА Жодзінскай турмы. У бальніцу яго забралі проста з карцэра. Зараз жа яго зноў кінулі ў ШІЗА. З самага пачатку зняволення на Ігара пастаянна аказваецца ціск.

Ігар — актывіст анархічнага руху, якога затрымалі пры пераходзе мяжы Беларусі ў ноч з 28 на 29 кастрычніка 2020 года. Яго абвінавацілі па шэрагу крымінальных артыкулаў за падпал службовых аўтамабіляў, будынка ДАІ, дзяржаўнага камітэта экспертыз у Гомельскай вобласці. У выніку Ігара асудзілі да 20 гадоў калоніі ўзмоцненага рэжыму.

💌Месца ўтрымання: Турма № 8. 222163, г. Жодзіна, вул. Савецкая, 22А, Ігар Уладзіміравіч Аліневіч
💻Напісаць анлайн

Палітзняволенага Сяргея Думаву, асуджанага да 9 гадоў калоніі, зноў судзілі

25 верасня ў судзе Бабруйска і Бабруйскага раёна ў Сяргея быў прызначаны разгляд справы «аб пераводзе ў папраўчую ўстанову іншага тыпу і зменаў умоваў утрымання». Працэс узначальваў суддзя Андрэй Літвін. Вынік судовага пасяджэння высвятляецца.

Нагадаем, Сяргея затрымалі 22 сакавіка 2021 году, калі ён расклейваў у горадзе налепкі. Яго абвінавацілі адразу па некалькіх артыкулах Крымінальнага кодэксу: ч. 1 арт. 293 КК (Арганізацыя масавых беспарадкаў), ч. 3 арт. 293 КК (Навучанне масавым беспарадкам), арт. 341 КК (Апаганьванне збудаванняў і псаванне маёмасці).

Пазней Думаве прызначылі 9 гадоў і 15 сутак калоніі ва ўмовах узмоцненага рэжыму.

Палітзняволенага фігуранта справы «Рабочага Руху» хочуць перавесці на турэмны рэжым

9 кастрычніка ў судзе горада Наваполацка будзе разглядацца справа «аб пераводзе ў папраўчую ўстанову іншага тыпу і зменаў умоваў утрымання» ў дачыненні да Валянціна Цераневіча. Працэс будзе ўзначальваць суддзя Алла Гаціх, якая толькі ў ліпені была прызначана суддзёй указам Лукашэнкі.

Валянцін Цераневіч — памочнік майстра на заводзе «Хімвалакно», які ўваходзіць у склад «Гродна Азота», намеснік старшыні Беларускага незалежнага прафсаюза «Гродна Азота». Быў затрыманы 20 верасня 2021 году.

У лютым 2023 году суддзя Аляксандр Піскуноў прызнаў Валянціна вінаватым паводле ч. 1 арт. 356 КК (здрада дзяржаве), ч. 3 арт. 361-1 КК (стварэнне экстрэмісцкага фармавання і ўдзел у ім) і прызначыў яму 12 гадоў зняволення ў калоніі ва ўмовах узмоцненага рэжыму.

Палітзняволенага «рэйкавага партызана» Уладзіміра Аўрамцава зноў судзілі

25 верасня ва Уладзіміра адбыўся разгляд справы ў судзе Івацэвіцкага раёна «аб пераводзе ў папраўчую ўстанову іншага віду і зменаў умоваў утрымання». Працэс узначальваў суддзя Сяргей Кухацкаволец. Вынік судовага пасяджэння высвятляецца.

Уладзімір Аўрамцаў — жыхар Бабруйска, затрыманы ў ноч на 30 сакавіка 2022 года. Паводле версіі следства, ён датычны да знішчэння двух рэлейных шаф сігнальнай ўсталёўкі пад Асіповічамі.

Яго абвінавацілі паводле арт. 356 КК (здрада дзяржаве), арт. 309 КК (наўмыснае прывядзенне ў непрыдатнасць транспартнага сродку або шляхоў зносін), арт. 289 КК (акт тэрарызму), арт. 290-4 КК (стварэнне арганізацыі для ажыццяўлення тэрарыстычнай дзейнасці або ўдзел у ёй) і асудзілі да 22 гадоў пазбаўлення волі ў калоніі ва ўмовах узмоцненага рэжыму.