❗️Адміністрацыя калоніі не паведамляе Рыгору Кастусёву вынікі анкалагічнага даследавання

Пра гэта "Свабодзе" паведаміў зяць старшыні партыі БНФ Дзмітрый Антончык. Паводле яго, палітвязень выйшаў з ШІЗА пасля 10 сутак і патэлефанаваў сваякам:

"Расказаў, што цяпер вельмі баляць ногі. Ногі ацякаюць, бо ў яго моцны варыкоз. Ва ўмовах ШІЗА з варыкозам вельмі цяжка. Ноччу даводзіцца ляжаць на голых дошках, а ўдзень нармальна немагчыма нават пасядзець.

Сваякі кажуць, што спадар Рыгор і цяпер, пасля ШІЗА, ня ведае вынікаў дасьледаваньня. Нічога ня кажуць. І ён больш нічога пра стан здароўя ня кажа".

Нагадаем, 66-гадовага былога старшыню Партыі БНФ асудзілі да 10 гадоў калоніі. У зняволенні ў Рыгора абвастрыліся праблемы са здароўем — у яго выявілі анкалагічнае захворванне.

💌Падтрымайце палітвязня: ПК № 22, 225295, Брэсцкая вобласць, Івацэвічы, ст. Даманава, а/с 20, Рыгор Андрэевіч Кастусёў
💻Напісаць анлайн

Падтрымайце палітвязня Андрэя Марціновіча пасылкамі з прыемнымі дробязямі і грашовымі пераводамі

32-гадовага Андрэя напрыканцы жніўня затрымалі супрацоўнікі ГУБАЗіКу на працоўным месцы. Спачатку яго арыштавалі на 10 сутак нібыта за "непадпарадкаванне міліцыянту". Арышт ён адбываў у ЦІПе на Акрэсціна.

Пасля гэтага яго перазатрымалі ўжо ў межах крымінальнай справы па арт. 342 КК (Актыўны ўдзел у групавых дзеяннях, што груба парушаюць грамадскі парадак). Цяпер яго да суда ўтрымліваюць у жодзінскай турме № 8.

💌Андрэя можна падтрымаць грашовымі пераводамі, пасылкамі з прыемнымі дробязямі і тэлеграмамі: Следчая турма № 8. 222163, г. Жодзіна, вул. Савецкая, 22А, Андрэй Міхайлавіч Марціновіч
💻Напісаць анлайн

🎉Павіншуйце палітзняволеную Алену Яфрэменку з Днём народзінаў

Алена ўжо больш за год утрымліваецца ў зняволенні. У лістападзе 2022 года ў Гродне над ёй адбыўся суд паводле пяці артыкулаў Крымінальнага кодэкса за каментары і ўдзел у паслявыбарчых акцыях пратэсту. Справу жанчыны разглядаў суддзя Уладзімір Пазняк, але вынік суда пакуль невядомы. Вядома, што ў жанчыны на волі засталіся дзве непаўнагадовыя дачкі.

У сакавіку праваабаронцам стала вядома, што Алена ў калоніі моцна перахварэла, але ёй нават не аказвалі медыцынскую дапамогу:

"Калі аднойчы Алена была ў вельмі цяжкім стане, ёй не аказвалася меддапамога, хаця ўсё было надзвычай дрэнна. Трымалася тэмпература пад 40, трызніла, потым пачаліся праблемы з суставамі, абсцэс. Але тады яе нават у санчастку не прызначылі, зняволеныя самі яе туды аднеслі".

8 кастрычніка палітзняволенай споўніцца 46 гадоў.

💌Павіншуйце яе лістамі і тэлеграмамі: ПК № 4. 246035, г. Гомель, вул. Антошкіна, 3, Алена Аляксандраўна Яфрэменка
💻Напісаць анлайн

🎉Павіншуйце палітвязня Віталя Жылінскага з Днём народзінаў

Віталя затырмалі ў студзені 2023 года ў межах крымінальнай справы аб групавых дзеяннях, якія груба парушаюць грамадскі парадак (арт. 342 КК). Пазней яму таксама выставілі абвінавачванне паводле арт. 130 КК (распальванне іншай сацыяльнай варожасці) за каментары пра "вайскоўцаў, якія ажыццяўлялі міратворчую дзейнасць у Рэспубліцы Казахстан".

У Мінгарсудзе ў ліпені 2022 года палітвязня асудзілі да трох гадоў калоніі ва ўмовах агульнага рэжыму. Цяпер ён адбывае тэрмін у папраўчай калоніі № 15 у Магілёве.

Сёння, 8 кастрычніка, Віталь адзначае 45-годдзе.

💌Павіншуйце палітвязня лістамі, паштоўкамі і тэлеграмамі: ПК № 15. 213105, г. Магілёў, п/а Вейна, Слаўгарадская шаша, 183, Віталь Аляксандравіч Жылінскі
💻Напісаць анлайн

✊Падтрымайце магілёўца, якога асудзілі да 2 гадоў калоніі за «клас» у «Аднакласніках»

У судзе Ленінскага раёна Магілёва 31 жніўня да двух гадоў калоніі ва ўмовах агульнага рэжыму асудзілі мясцовага жыхара і працоўнага прадпрыемства «Сварметпрофіль» Аляксандра Ніканава. Яго абвінавацілі паводле арт. 368 КК (абраза Лукашэнкі) і арт. 367 КК (паклёп на Лукашэнку) за тое, што ён паставіў рэакцыю «клас» пад постам у «Аднакласніках».

Вядома, што Аляксандра затрымалі 26 чэрвеня.

💌Падтрымайце Аляксандра грашовымі пераводамі, пасылкамі і лістамі: Турма № 4, 212011, Магілёў, Крупскай, 99А, Аляксандр Яўгенавіч Ніканаў
💻Напісаць анлайн

📍Палітвязні Сяргей Крыўчэня і Ігар Петран — на волі

Сяргея Крыўчэню затрымалі 18 жніўня 2020 года. Палітвязень двух непаўнагадовых дзяцей.

Яго абвінавацілі ва ўдзеле ў акцыі пратэсту ў Брэсце 10 жніўня 2020 года паводле ч. 2 арт. 293 Крымінальнага кодэксу (масавыя беспарадкі). 10 сакавіка 2021 года ў судзе Маскоўскага раёна Брэста Сяргею прызначылі 3 гады і 6 месяцаў калоніі ўзмоцненага рэжыму.

Тэрмін ён адбываў ў бабруйскай калоніі № 2. Па інфармацыі "Брэсцкай Вясны", напачтку кастрычніка Сяргей выйшаў на волю. У зняволенні ён адбыў больш за 3 гады і 1 месяц.

Таксама на волю выйшаў жыхар Баранавіч Ігар Петран, асуджаны да 2 гадоў калоніі за каментар у "Аднакласніках". Тэрмін ён адбываў у івацэвіцкай калоніі № 5.

Супрацоўніцу IT-кампаніі "Гейм Стрым" Ксенію Алькенаву этапавалі ў гомельскую калонію

Ксенія — супрацоўніца IT-кампаніі "Гейм Стрым". Яе затрымалі 11 сакавіка ў Мінску. Паводле сілавікоў, у 2020-2021 гадах праз данаты ў Facebook яна зрабіла 9 плацяжоў у фонды салідарнасці на агульную суму 425$. Праўладныя тэлеграм-каналы апублікавалі відэа з ператрусу, падчас якога ў Алькенавай знойдзены і канфіскаваны БЧБ-сцяг, 20 000$ і аргтэхніка.

Яе абвінавацілі паводле ч.1 арт. 361-2 КК (Фінансаванне экстрэмісцкай дзейнасці) і арт. 361-2 КК (Фінансаванне дзейнасці экстрэмісцкага фарміравання).

Суд над палітзняволенай адбыўся ў ліпені ў Мінгарсудзе. Суддзя Яўген Хаткевіч прызначыў ёй 4 гады пазбаўлення волі.

Вядома, што Ксенія пачала адбываць тэрмін у гомельскай жаночай калоніі

💌Падтрымайце Ксенію паштоўкамі і лістамі салідарнасці: ПК № 4. 246035, г. Гомель, вул. Антошкіна, 3, Ксенія Аляксандраўна Алькенава (на канвертах пазначаць «каранцін»)
💻Напісаць анлайн

⚖️Палітвязня Змітра Дашкевіча пачнуць судзіць па новай крымінальнай справе 11 кастрычніка

Нагадаем, актывіста разам з жонкай Настай абвінавацілі ва ўдзеле ў акцыі пратэсту 23 жніўня 2020 года. 14 ліпеня 2022 года Змітру прызначылі 1,5 года калоніі, а Насце — 3 гады «хатняй хіміі».

Зміцер павінен быў выйсці на волю па заканчэнні тэрміну 11 ліпеня. Але адразу па выхадзе яго затрымалі ў межах новай крымінальнай справы па арт. 411 КК (злоснае непадпарадкаванне патрабаванням адміністрацыі калоніі).

Суд над ім распачнецца ў судзе Барысаўскага раёна 11 кастрычніка. Справу будзе разглядаць суддзя Таццяна Дзеравянка.

💌Заклікаем падтрымаць яго грашовымі пераводамі, пасылкамі і тэлеграмамі: Следчая турма № 8. 222163, г. Жодзіна, вул. Савецкая, Зміцер Вячаслававіч Дашкевіч
💻Напісаць анлайн

🎉Павіншуйце палітзняволенага Яўгена Бабака з Днём народзінаў

Былога памочніка пракурора Першамайскага раёна Мінска затрымалі 11 чэрвеня 2021 года. Спачатку яго двойчы асудзілі паводле адміністрацыйных пратаколаў, а пасля затрымалі ў межах крамінальнай справы.

Яго абвінавацілі па двух артыкулах Крымінальнага кодэкса: ч. 1 арт. 342 (групавыя дзеянні, якія парушаюць грамадскі парадак) і ч. 1 арт. 130 (распальванне варожасці), і прызначылі яму чатыры гады пазбаўлення волі.

Яўген вядомы тым, што ў жніўні 2020-га ініцыяваў праверку людзей у форме ДАІ, якія збівалі байкераў ноччу 11 жніўня. Праверка ні да чаго не прывяла, а сам Бабак звольніўся.

Сёння палітвязень адзначае ў зняволенні 32-годдзе.

💌Павіншуйце Яўгена лістамі і паштоўкамі: ПК № 3. 211322, Віцебская вобласць, п. Віцьба, Яўген Ігаравіч Бабак
💻Напісаць анлайн

❗️Палітвязня Уладзіміра Гундара перавялі на турэмны рэжым

Пра гэта паведамляе "Берасцейская Вясна".

Нагадаем, Гродзенскі абласны суд 6 чэрвеня пакінуў прысуд палітвязню без зменаў — 20 гадоў калоніі. Ужо на наступны дзень адразу з карцара яго этапавалі ў калонію. Пры гэтым жонцы Гундара дазволілі спатканне з ім, але яна не паспела трапіць на яго праз хуткі этап.

Па прыбыцці ў калонію яго некалькі разоў змяшчалі ў штрафны ізалятар. Акрамя гэтага, у лісце да родных ён паведаміў, што яго хочуць перавесці ў турму.

Напачатку кастрычніка блізкім стала вядома, што Гундара ўсё ж адправілі ў магілёўскую турму № 4. Па якой прычыне і ці быў суд па замене рэжыму — сваякам не патлумачылі.

💌Падтрымайце Уладзіміра: Турма № 4, 212011, Магілёў, Крупскай, 99А, Уладзімір Тадэвушавіч Гундар
💻Напісаць анлайн

🗓Агляд навінаў палітвязняў з 26 верасня па 10 кастрычніка

Больш за тры гады ў Беларусі бесперапынна працягваюцца масавыя рэпрэсіі. Амаль штотыднёва ў краіне павялічваецца колькасць палітзняволеных, а праваабаронцы кожны дзень атрымліваюць інфармацую пра ўтрыманне вязняў у жудасных умовах, пра ціск на іх з боку адміністрацыі ўстановаў, а таксама пра пагаршэнне здароўя палітвязняў у зняволенні.

🔹Цалкам адбылі тэрміны і выйшлі на волю 15 палітвязняў.

🔹Пяць палітзняволеных былі асуджаныя да пазбаўлення волі.

🔹У калоніі пагоршыўся стан здароўя палітвязня Аляксея Ільінчыка і Васіля Бераснева.

🔹Палітвязняў Уладзіміра Гундара і Ягора Лянкевіча перавялі на турэмны рэжым у Магілёў.

🔹Палітзняволенага анархіста Дзмітрыя Рэзановіча змясцілі ў ПКТ.

🔹Палітзняволеную Вікторыю Кульшу зноў змяшчалі ў ШІЗА.

📌"Вясна" распавядае апошнія навіны пра палітвязняў у штотыднёвым аглядзе па спасылцы.

✊Падтрымайце палітвязня Кірыла Гняздзілава, асуджанага да 8 гадоў калоніі

Кірыл з 2007 года працаваў у міліцыі, адкуль звольніўся ў жніўні 2020 года і перайшоў працаваць у сферу IT. Берасцейца затрымалі проста на мяжы, калі той вярнуўся з Польшчы наведаць жонку і дзяцей. У суседняй краіне мужчына жыў апошнія паўгады.

У Брэсцкім абласным судзе 3 жніўня яго асудзілі паводле ч. 6 арт. 16 і ч. 1 арт. 130 КК (Садзейнічанне распальванню іншай сацыяльнай варожасці), ч. 1 арт. 179 КК (Незаконныя дзеянні ў дачыненні інфармацыі аб прыватным жыцці). Суддзя Андрэй Лешчанка прызначыў Кірылу 8 гадоў калоніі ўзмоцненага рэжыму.

Суд праходзіў у закрытым рэжыме. Справу разглядалі цягам шасці судовых пасяджэнняў. Вядома, што яна звязаная з «Чорнай кнігай Беларусі».

Цяпер мужчына чакае разгляду апеляцыйнай скаргі.

💌Падтрымайце яго грашовымі пераводамі, пасылкамі і тэлеграмамі: СІЗА-7. 224030, г. Брэст, вул. Савецкіх памежнікаў, 37, Кірыл Віктаравіч Гняздзілаў
💻Напісаць анлайн

🎉Павіншуйце палітвязня Ягора Дуднікава з Днём народзінаў

Палітзняволенага расейца Ягора Дуднікава затрымалі 4 траўня 2021 года ў Мінску, моцна збілі і катавалі, пра што ён сам распавёў. Асудзілі Ягора па двух артыкулах Крымінальнага кодэкса — ч. 3 арт. 130 (распальванне варожасці) і ч. 3 арт. 361 (заклікі да дзеянняў, накіраваных на прычыненне шкоды нацыянальнай бяспецы Беларусі). У снежні 2021-га суддзя Сяргей Хрыпач прысудзіў хлопцу 11 гадоў калоніі.

15 чэрвеня 2022-га суд Бабруйскага раёна і Бабруйска змяніў Ягору рэжым з узмоцненага на турэмны тэрмінам на тры гады.

Сёння Ягор адзначае 23-годдзе ў магілёўскай турме.

💌Павіншуйце Ягора праз тэлеграмы і лісты па адрасе: Турма № 4. 212011, Магілёў, Крупскай, 99А, Ягору Аляксандравічу Дуднікаву
💻 Напісаць анлайн

«Яму і так далі не малы тэрмін, але і гэтага ім аказалася мала». Палітвязня Ягора Дуднікава пераводзяць з калоніі ў турму

⚖️Палітзняволеную Святлану Лупач пачнуць судзіць 16 кастрычніка

Яе затрымалі напачатку траўня глыбоцкія міліцыянты. У той дзень яна адпачывала на Глыбоччыне разам з сябрамі, міліцыянты прыехалі ў самы разгар адпачынку і спачатку затрымалі ўсіх, але пасля выпусцілі і пакінулі ў міліцыі адну Святлану.

Суд Глыбоцкага суда 3 траўня пакараў яе спачатку 10 суткамі па ч. 2 арт. 19.11 КаАП (распаўсюд экстрэмісцкіх матэрыялаў). Пасля гэтага над ёй быў яшчэ адзін суд, падчас якога дзяўчыне прызначылі яшчэ 25 базавых велічыняў штрафу. Пазней Святлану перавялі ў віцебскі СІЗА у межах крымінальнай справы. Цяпер яе абвінавачваюць па «народным» арт. 342 КК (актыўны ўдзел у дзеяннях, якія груба парушаюць грамадскі парадак).

Суд над ёй распачнецца 16 кастрычніка ў Першамайскім судзе Віцебску. Справу будзе разглядаць суддзя Міхаіл Юрчанка.

💌Падтрымайце Святлану грашовымі пераводамі, пасылкамі і тэлеграмамі: СІЗА-2. 210026, г. Віцебск, вул. Гагарына, 2
💻 Напісаць анлайн

✊Падтрымайце палітзняволеную выкладчыцу Надзею Старавойтаву

47-гадовая Надзея — выкладчыца беларускай мовы, кандыдатка філалагічных навук і дацэнтка кафедры беларускай і рускай моў.

Жанчыну затрымалі 23 ліпеня 2023 года. У "пакаяльным відэа" яна кажа, што наведвала мітынгі, падчас якіх выходзіла на дарогу, зарэгістравалася ў плане "Перамога" і была падпісана на "дэструктыўныя" каналы.

Цяпер Надзею абвінавачваюць паводле арт. 342 КК (актыўны ўдзел у дзеяннях, якія груба парушаюць грамадскі парадак).

💌Падтрымайце палітзняволеную грашовымі пераводамі, пасылкамі і тэлеграмамі: Следчая турма № 8. 222163, г. Жодзіна, вул. Савецкая, 22А, Надзея Пятроўна Старавойтава
💻 Напісаць анлайн

💔Пенсіянера Васіля Дземідовіча праз тыдзень пачнуць судзіць ужо ў сёмы раз

У Старых Дарогах 19 кастрычніка распачнецца суд над 71-гадовым палітзняволеным Васілём Дземідовічам. Яго абвінавачваюць паводле арт. 369 КК (абраза прадстаўніка ўлады) і арт. 368 КК (абраза Лукашэнкі). Справу будзе разглядаць суддзя Наталля Зык.

Гэта ўжо сёмы суд над пенсіянерам. Агулам яго асудзілі на 7 гадоў пазбаўлення волі, пры гэтым вынік апошніх двух судоў пакуль невядомы. У зняволенні Васіля Іванавіча ўтрымліваюць ужо амаль год і чатыры месяцы.

У сувязі з тым, што палітзняволенага ўнеслі ў «спіс тэрарыстаў», яму нельга рабіць грашовыя пераводы. Апроч гэтага, у Васіля няма сваякоў, якія маглі б яго падтрымаць. Адзначым, што за апошні год пенсіянер перажыў дзясяткі этапаў. Этапуюць палітвязняў у цяжкіх умовах — таму гэта пакідае вельмі дрэнны адбітак на здароўі Васіля.

(Не) апошняе слова Васіля Іванавіча на адным з судоў

📍Палітзняволеныя Рыта Зотава і Мікіта Хількевіч выйшлі на волю

Іх затрымалі па даносе 9 жніўня 2021 года за расклейванне пратэсных налепак і ўлётак у Чачэрску. Але пазней іх адпусцілі пад падпіску аб нявыездзе. 28 снежня 2021 года іх зноў затрымалі і абвінавацілі паводле  арт. 341 КК (апаганьванне будынкаў і псаванне маёмасці) і арт. 342 КК (актыўны ўдзел у дзеяннях, якія груба парушаюць грамадскі парадак).

У сакавіку 2022 года суд прызначыў ім па два гады калоніі. Рыта адбывала тэрмін ў гомельскай жаночай калоніі № 4, а Мікіта — у івацэвіцкай калоніі № 22. Па інфармацыі "Гомельскай Вясны", яны цалкам адбылі тэрміны і выйшлі на волю.

📸Падчас Канферэнцыі АБСЕ у Варшаве прайшла выстава, прысвечаная палітзняволеным адвакатам

У межах Канферэнцыі АБСЕ па чалавечым вымярэнні прайшла адкрытая выстава "Беларускія адвакаты ў турме".

На выставе былі прадстаўленыя партрэты Максіма Знака, Аляксандра Данілевіча, Віталя Брагінца, Анастасіі Лазарэнкі, Юліі Юргілевіч, Аляксея Бародкі.

Адрасы для падтрымкі палітзняволеных можна знайсці ў іх профілях па спасылках.

⚖️Апеляцыйныя скаргі журналіста Паўла Мажэйкі і адвакаткі Юліі Юргілевіч разгледзяць 17 кастрычніка

Палітзняволеных абвінавацілі па ч. 2 арт. 361-4 КК за "іншае садзейнічанне экстрэмісцкай дзейнасці, здзейсненае паўторна, групай асоб па папярэдняй змове" і асудзілі да 6 гадоў калоніі. Справу ў Гродзенскім абласным судзе разглядаў суддзя Максім Філатаў.

Паводле матрыялаў справы, Юлія перадала Паўлу інфармацыю пра пазбаўленне яе адвакацкай ліцэнзіі, а таксама звесткі пра разгляд крымінальнай справы ў дачыненні да Алеся Пушкіна і прызначэнне яму пакарання. Абвінавачванне было ўпэўненае, што Мажэйка перадаў гэтыя звесткі для публікацыі на "Белсат".

Вярхоўны суд 17 кастрычніка ў закрытым рэжыме разгледзіць апеляцыйныя скаргі Паўла і Юліі. Рашэнне будзе прымаць судовая калегія пад старшынствам суддзі Паўла Каршуновіча.

💌Падтрымайце Паўла і Юлію грашовымі пераводамі і тэлеграмамі: Турма № 1. 230023, Гродна, Кірава, 1, Павел Іванавіч Мажэйка, Юлія Пятроўна Юргілевіч
💻Напісаць анлайн