Эндиликда заргарлар ҳам якка тадбиркор сифатида тилла буюмлари савдоси билан шуғулланиши мумкин бўлади.

Мутасаддиларга жойлардаги норасмий заргарлик расталарини замонавий кўринишга келтириб, уларнинг фаолиятини қонунийлаштириш топширилди.

Четдан мутахассис олиб келиш харажатининг 2,5 минг долларгача қисми камида 5 нафар шогирд чиқариш шарти билан қоплаб берилади.

Умуман, заргарликда ҳам саноат усулига ўтиб, ички бозорни ҳимоя қилиш ва миллий брендларни қўллаб-қувватлаш вақти келгани қайд этилди.

Бунинг учун заргарлик саноатида ишлатиладиган ускуналар ва уларни бутловчи қисмлари импорт божидан озод қилинади.

Навоий ва Олмалиқ комбинатларидан олтинни бўлиб тўлаш асосида сотиб олиш тартиби яна 3 йилга узайтирилади.

Нуфузли брендлар билан ҳамкорликни йўлга қўйиб, уларнинг дизайни ва қолипини олиб келиш харажатининг 30 минг долларгача қисми қоплаб берилади.

Facebook|Instagram|X

Аҳоли сони ўсиши, урбанизация жараёни қурилиш материалларига бўлган талабни оширмоқда.

Йил бошидан пудрат ишлари 10,3 фоизга ўсди. Лекин омборларда катта ҳажмда керамик плита, гипсокартон, ойна, базальт момиғи йиғилиб қолган. Ваҳоланки, йилига 225 миллион долларлик худди шундай товарлар импорт бўлмоқда.

Эндиликда девелоперларга айланма маблағ учун кредит ажратишда маҳаллий қурилиш материалига устуворлик берадиган тизим жорий қилинади.

Ўтган йили Қурилиш инспекцияси ўтказган ўрганишларда 1 минг 600 та ҳолатда сифатсиз қурилиш материаллари ишлатилгани аниқланган.

Шу муносабат билан “Шаффоф қурилиш” платформасида қурилиш материаллари корхоналари ва уларнинг маҳсулотлари реестри шакллантирилади. Маҳсулотлар сифати рейтинги юритилади ва ҳар чоракда янгилаб борилади.

Қурилишда янги турдаги, энергия тежамкор материаллар пайдо бўлмоқда. Лекин кўплаб маҳсулотларнинг стандарти йўқлиги, борлари ҳам халқаро талабларга мос эмаслиги кўрсатиб ўтилди.

Мутасаддиларга йил якунигача 68 та халқаро стандартни қабул қилиш топширилди.

Йиғилиш давомида соҳа ва ҳудуд раҳбарларининг ахбороти, тадбиркорларнинг таклифлари тингланди.

Facebook|Instagram|X

#_дастур ва ижро

ДАСТУРЛАР ИЖРОСИГА БИЗ ҲАМ МАСЪУЛМИЗ

Томорқа азал-азалдан ризқ-рўз манбаи, рўзғоримизнинг тўкин-сочин, ҳаётимизнинг фаровон бўлиши учун хизмат қилиб келган беминнат дастёр бўлиб, унга астойдил меҳр қўйсак, тер тўкиб меҳнат қилсак, бизни асло қуруқ қўймайди.
Шунинг учун ота-боболаримиз азалдан ернинг ҳар бир қаричини муқаддас билиб, унга ризқимиз манбаи сифатида алоҳида эътибор қаратиб келганлар.
Биз туманимизнинг “Мўминобод” маҳалласида истиқомат қилувчи Ўктам Эшонқуловнинг томорқачиликка ҳаваси баланд эканлигини эшитган эдигу, лекин бориб кўришга вақт топа олмаётган эдик.
Шунинг учун унинг “Бирлик” маҳалласида жойлашган, томорқачилик билан шуғулланиш учун сотиб олган дала ҳовлисига бордигу, у ернинг мақтаганларича бор эканлигига ишондик.
Асли касби ўқитувчи бўлиб, нафақага чиққунга қадар болаларга география фанидан дарс бериб келган Ўктам Эшонқуловнинг томорқачиликка ҳаваси баланд бўлиб, ўзи истиқомат қилаётган ҳовлисидаги томорқаси торлик қилгани учун, қўшимча томорқа ери сотиб олиб, одамлар тили билан айтганда, у ерни жаннатдек қилиб қўйганини кўрганимизда, томорқанинг эшитганларимиздан ҳам зиёда эканига ишондик.
Ўктам Эшонқуловнинг 10-15 сотихли томорқасидаги ободлик, саранжом-саришталикни кўриб ҳавасинг келади. Биргина мана шу томорқанинг ўзида помидору бодринг, қулупнаю бақлажон, саримсоқпиёзу карам, картошкаю пиёзларни, қовоғу лавлагиларни, ҳосили косачадек бўлиб қолган қовун-тарвузларни кўриб қувонган бўлсак, қатор қилиб экилган анжиру шафтоли, ноку олхўри, олмаю анор, олчаю гилос, хурмою шотутларни кўриб қойил қолдик. Боиси, ҳар бир дарахт шунчалик мутаносиблик, шунчалик тартиб билан экилганки, уларнинг ҳеч биридан хато ёки камчилик тополмайсиз.
-Экинларни экишда “Зироатнома” китобидан фойдаланаман. Чунки баъзи экинлар ёки дарахтларни бир-бирига яқин экиб бўлмайди. Аксинча, узум билан анорни ёнма-ён экишда хосият кўп бўлар экан, чунки бу иккала мева ҳам жуда шифобахш бўлиб, улар аралаштириб экилганида ҳам ҳосили, ҳам шифобахшлик хусусияти ортар экан, тераклар парваришида ҳам алоҳида усуллар бор бўлиб, бу ҳақда ҳам шу китобдан ўқиб билдим, -дейди Ўктам Эшонқулов.
Унинг айтишича, томорқасига қўшни бўлган иккита ташландиқ томорқанинг эгаларидан рухсат сўраб, ўзи етиштирган терак қаламчаларидан 2000 минг тупдан ўтқазиб, иккита эҳтиёжманд оилага берибди .
-Ҳозир уларнинг ҳам тераклари икки метрдан ошди. Астойдил парвариш қилишса, бир –икки йилда дарахтга айланади, теракларни сотишса, яхшигина даромад олишади, уларга қўлимиздан келганича ёрдам берсак, савоб бўлади, - дейди.
Ўзининг томорқасининг бир томонига экилган 5000 минг туп теракқаламчалари барг ёзиб, ажиб бир яшиллик, гўзаллик яратганидан кайфиятинг кўтарилади.
Томорқа этагига олиб борадиган йўлакнинг икки томонига экилган павлония дарахтлари ерга тангадек офтоб туширмагани учун вужудинг ёқимли, салқин ҳаводан яйрайди.
Томорқа четидаги ариқлар бўйига экилган турфа хил, ранг-баранг атиргуллар, “астраю”, “георгиня”лар, райҳону жамбиллар, геранларнинг барқ уриб очилиб ётганини, қийғос гуллаган анорларни, олманинг ноёб турлари бўлмиш “голдену”, “беш юлдуз”ларни, ”қозоқ афорти”ни, кўчати навниҳол бўлсада, ҳосили кўплигидан шохлари эгилиб қолган нок дарахтларини кўриб баҳру дилимиз очилиб кетди.
Бизни қойил қолдирган томонларидан яна бири, Ўктам Эшонқуловнинг республикамизнинг “Камбағалликдан фаровонлик сари” ҳамда “Яшил макон умуммиллий дастур”лари асосида чора-тадбирлар белгилаб, уларнинг барчасини амалга оширишга ҳаракат қилаётгани ва буларнинг амалий исботини ўз кўзимиз билан кўрганимиздир.
-Томорқамда 30 дан ортиқ дарахтлар, гуллар, полиз ва сабзавот экинларини етиштираман. Экинларни, дарахтларни, гулларни жуда яхши кўраман. Томорқада ишлаб дам оламан. Чарчоқларимни чиқараман.

Яратганга шукур, ҳеч нимага муҳтожлик жойим йўқ. Аёлим иккаламиз ҳам ўқитувчи бўлганимиз учун мўмайгина пенсия оламиз. Ўғилларим яхши ишларда ишлашади, топармон-тутармон. Лекин бу дегани, эртадан-кечгача бекор ўтириш мумкин дегани эмаску, қолаверса, тану жоним соғ, қувватим етарли, кетмон чопганим сари тетиклашаман, томорқамдаги экинлардан, мева-чевалардан қўшниларимга, муҳтож оилаларга эҳсон қиламан.
Бу дастурлар бекорга чиқариламаяпти, биз-фуқаролар ҳам унинг ижросига ўз ҳиссамизни қўшишимиз керак деб ўйлайман.
Чунки шу юрт, шу Ватан бизники, ҳаммамизники. Шундай экан, унинг гуллаб-яшнашига ҳар биримиз ўз ҳиссамизни қўшишимиз керак. Бу баландпарвоз гаплар эмас, оддий ҳақиқатлардир, - дейди Ўктам Эшонқулов ўйчанлик билан.
Томорқанинг бошидаги мўъжазгина уйнинг деворларига худди музейдаги каби тартиб билан осиб қўйилган, биз ҳали кўрмаган меҳнат қуролларини кўриб ажабланганимизни кўрган Ўктам Эшонқулов бизга: “Ҳар шанба-якшанба кунлари ўғил-қизларим, набираларим бу ерга келишади. Томорқа айниқса набираларимга жуда ёқади. Мен билан тенгма-тенг ишлаб, бу ердаги экинларнинг, дарахтларнинг тагини чопиб, юмшатишади, ўтаб, тозалашади, қулупнай, ўрик, гилослардан териб қўшниларга улашишади, шунинг учун мана шу хонани меҳнат музейи каби жиҳозлаганман, чунки улар бўлажак эркаклар, эркаклар эса аввало мана шу ишларни билишлари, айниқса, меҳнат қуролларини тўғри ишлатишни ўрганишлари керак.
Рўзғорнинг бутлиги, хонадонимизнинг тинчлиги, дастурхонимизнинг тўкин-сочинлигига биз - эркаклар масъулмиз.
Шундай экан, меҳнат қилишдан қочмаслигимиз, тадбиркор бўлишимиз, фақат ойлик маошни кутиб яшашимиз керак эмас, эркак ўз вазифасини билган хонадонда йўқчилик бўлмайди, - дейди Ўктам Эшонқулов.
Биз қаҳрамонимизнинг томорқасидаги ажиб бир файзни, яшилликни, барқ уриб ўсаётган экинларни, гулу дарахтларни кўриб, қаҳрамонимизнинг оддий бир фуқаро сифатида республикамизнинг “Яшил макон” умуммиллий дастури лойиҳаси ижросига қандай ҳисса қўшаётганини кўрган бўлсак, ”қутлуғ жойдан қуруқ кетмангиз”, –дея қўлимизга тутқазган халталардаги оқу қизил сархил картошкаларни, қулупнаю гилосларни, лавлагию саримсоқпиёзларни кўриб, “Камбағалликдан фаровонлик сари” дастурининг амалдаги исботини ҳалол меҳнат, пешона териси билан ризқ–рўз етиштириб, нафақат ўзининг оиласи, балки қўни-қўшниларига ҳам беминнат ёрдам бераётган инсон томонидан амалга оширилаётган ишлар мисолида яққол кўрдик ва бу инсонга нисбатан бўлган ҳурматимиз ўн чандон ортди.
Хаёлимиздан эса мана, шундай жонкуяр, меҳнаткаш, пешона тери билан ризқ яратадиган, фақат ўзини эмас, ўзгаларни ҳам ўйлаб яшайдиган, ўзини шу юрт ҳаётига дахлдор деб биладиган фуқаролари бор юрт янада гуллаб-яшнаши шубҳасиз деган фикрлар ўтди.

Башорат Сатторова.
Журналист.

@piskenthayoti