Президентимиз таъкидлаганидек, саноат, экспорт ва тушум бўйича “республика – тармоқ – вилоят – туман” вертикал тизимидаги масалалар ўз вақтида ва тўлиқ ҳал қилинганида саноатда яна 2 фоизлик ўсишга эришиш мумкин эди.

Масалан, ўтган 4 ойда Пайариқда саноат қарийб 2 бараварга, Пахтачида 38 фоизга пасайгани оқибатида ишлаб чиқариш 210 миллиард сўмга камайди.

Пойтахт саноатининг учдан бирини берадиган Сергели ва Яшнободда 300 миллиард сўмлик маҳсулот кам ишлаб чиқарилгани боис Тошкент шаҳри саноатида 1,1 фоиз ўсиш бой берилди.

Ўртачирчиқ, Қибрай, Паркент, Оҳангарон туманлари, Ангрен, Бекобод шаҳарларидаги 25 та ҳудудий корхона ўтган йилгидан 1 триллион сўмга кам маҳсулот чиқаргани боис, 30 миллион доллар экспорт йўқотилди.

Ёки январь-март ойларида саноатда ўсиш қилган Қарши, Миришкор, Булунғур, Данғара, Ўзбекистон, Хива туманлари апрелга келиб кўрсаткичларини кескин тушириб юборган.

Шу муносабат билан уч кун муддатда “республика – тармоқ – вилоят – туман” вертикали бўйича ҳар бир масалани тезкор ҳал қилиш учун республикадан аниқ масъулларни белгилаш ва жойларга юбориш топширилди.

Вертикал бўйича қайси бўғинда муаммо ечилмаса, ўша тизим масъулларидан сўров қаттиқ бўлиши ҳақида огоҳлантирилди.

Facebook|Instagram|X

Миллий брендларни кўпайтириш, мавжудларини халқаро даражага олиб чиқиш бўйича ҳам янги тизим жорий қилиниши белгиланди.

Миллий брендларни қўллаб-қувватлаш компанияси ташкил қилинади. Ушбу компания:

- хориждан бренд-менежер, дизайнер, маркетолог, пиар-менежерларни олиб келади;

- халқаро сертификати бор, сифати юқори ва ташқи бозорда рақобатбардош бўлган камида 50 та миллий маҳсулотни танлаб олади;

- уларга сифат белгисини бериб, брендини дунёга танитиш учун катта тарғибот кампаниясини бошлайди.

Facebook|Instagram|X

Бугунги кунда мамлакатимизда тайёр кийим кечак, чарм-атторлик маҳсулотлари ва пойабзал ишлаб чиқарадиган 4 мингдан зиёд корхона бор.

Лекин уларни аҳолига танитиб, кенг танлов имконини берадиган, миллий маҳсулотлар бир жойда сотиладиган савдо марказлари йўқлиги кўрсатиб ўтилди.

Шу боис, фақат миллий маҳсулотлар сотиладиган “Mall of Uzbekistan” йирик савдо марказлари ишга туширилади. Бу ердаги савдо дўконлари тадбиркорларга минимал нархда ижарага берилади.

Ишчиларининг 15 фоизи эҳтиёжманд оиладан бўлган тўқимачилик ва чарм-пойабзал корхоналарига фойда солиғи 2 фоиз, ижтимоий солиқ 1 фоиз этиб белгиланган.

Эндиликда тўқимачилик ва чарм корхоналарига эҳтиёжманд одамларни ишга олиш бўйича 15 фоизли меъёр 2 баробар камайтирилади. Бундан буён имтиёз олиш учун корхонада эҳтиёжманд одамлар билан бирга ногиронлиги бор ишчилар ҳам ҳисобга олинади.

Facebook|Instagram|X

Ўтган йилнининг ўзида мебелсозлик йўналишида 920 та янги корхона иш бошлади. Соҳада 6 триллион 700 миллиард сўмлик маҳсулот ишлаб чиқарилди.

Буни каррасига ошириш учун қатор масалаларни ҳал қилиш зарур. Масалан, мебель маҳсулотларининг 25-30 фоизи хонадонларда тайёрланаяпти. Уйдаги ишлаб чиқаришдан саноат босқичига ўтишга интилаётган мебелсозлар кўп.

Шу боис, якка тартибдаги тадбиркорларга 5 нафаргача ишчи олиб, мебель ишлаб чиқаришга рухсат берилади. Ушбу фаолиятни бошлаш, кенгайиш истагида юрган ёш тадбиркорларга 7 йилга 5 миллиард сўмгача 18 фоизли кредит ажратилади.

Олтинкўл ва Хонқадаги “Мебелчилик маркази”да 100 дан зиёд корхона замонавий ускуналар ўрнатиб, мебель ишлаб чиқармоқда. Олдин уйидаги тор жойда мебель ясаган тадбиркорлар ҳозир яхлит комплексга жойлашиб, кластер тизимида ишлаяпти.

Шароф Рашидов, Янги Наманган, Пастдарғом, Ўртачирчиқ, Қува, Бувайда, Юнусобод ва Учтепада ҳам Хонқа тажрибаси асосида мебелчилик марказларини ишга тушириш топширилди.

Facebook|Instagram|X

Ўтган йили мебель экспорти 20 миллион долларга етди. Сифат, дизайн ва брендга эътибор қаратилса, мавжуд қувватларнинг ўзида экспорт ҳозиргидан 10 карра ошиши мумкинлиги кўрсатиб ўтилди.

Шу боис, мебелчиларга халқаро сертификат олиш харажати ҳамда хориждан жалб қилинган дизайнер, маркетолог, инженер-технологлар иш ҳақининг ярми қоплаб берилади.

Халқаро кўргазмаларда ижара пули компенсация қилинадиган майдон ҳозирги 20 квадратдан 40 квадрат метрга оширилади.

Мутасаддиларга малакали мутахассисларни жалб қилиб, йилига 1 минг нафар мебель усталарини замонавий кўникмаларга ўқитишни йўлга қўйиш топширилди.

Facebook|Instagram|X

2024 йилда заргарликда ишлаб чиқариш 200 миллион доллардан ошди, экспорт 17 фоизга ўсиб, 92 миллион долларга етди.

Шу билан бирга, мамлакатимизда йилига 100 тоннадан зиёд олтин қазиб олинаётгани билан имкониятларнинг ўндан бири ҳам ишга солинмаётгани қайд этилди.

Соҳада “хуфиёна” иқтисодиёт улуши юқори экани кўрсатиб ўтилди. Йилига 550-600 миллион долларлик буюмлар норасмий тилла бозорларида айланмоқда. Ёки, мустақил изловчилар 2020 йилда 40 килограмм олтин топширган бўлса, ўтган йили бу 100 карра камайган.

Йиғилишда соҳани “соя”дан чиқариш учун якка тадбиркорларга ҳам тилла буюмлари билан савдо қилишга рухсат бериш, заргарликда миллий бренд яратиш учун хориждан дизайнер, технолог, қимматбаҳо тошлар билан ишлайдиган геммологларни олиб келиш харажатининг бир қисмини қоплаш бўйича таклифлар билдирилди.

Давлатимиз раҳбари ушбу таклифларни маъқуллади.

Facebook|Instagram|X

Эндиликда заргарлар ҳам якка тадбиркор сифатида тилла буюмлари савдоси билан шуғулланиши мумкин бўлади.

Мутасаддиларга жойлардаги норасмий заргарлик расталарини замонавий кўринишга келтириб, уларнинг фаолиятини қонунийлаштириш топширилди.

Четдан мутахассис олиб келиш харажатининг 2,5 минг долларгача қисми камида 5 нафар шогирд чиқариш шарти билан қоплаб берилади.

Умуман, заргарликда ҳам саноат усулига ўтиб, ички бозорни ҳимоя қилиш ва миллий брендларни қўллаб-қувватлаш вақти келгани қайд этилди.

Бунинг учун заргарлик саноатида ишлатиладиган ускуналар ва уларни бутловчи қисмлари импорт божидан озод қилинади.

Навоий ва Олмалиқ комбинатларидан олтинни бўлиб тўлаш асосида сотиб олиш тартиби яна 3 йилга узайтирилади.

Нуфузли брендлар билан ҳамкорликни йўлга қўйиб, уларнинг дизайни ва қолипини олиб келиш харажатининг 30 минг долларгача қисми қоплаб берилади.

Facebook|Instagram|X

Аҳоли сони ўсиши, урбанизация жараёни қурилиш материалларига бўлган талабни оширмоқда.

Йил бошидан пудрат ишлари 10,3 фоизга ўсди. Лекин омборларда катта ҳажмда керамик плита, гипсокартон, ойна, базальт момиғи йиғилиб қолган. Ваҳоланки, йилига 225 миллион долларлик худди шундай товарлар импорт бўлмоқда.

Эндиликда девелоперларга айланма маблағ учун кредит ажратишда маҳаллий қурилиш материалига устуворлик берадиган тизим жорий қилинади.

Ўтган йили Қурилиш инспекцияси ўтказган ўрганишларда 1 минг 600 та ҳолатда сифатсиз қурилиш материаллари ишлатилгани аниқланган.

Шу муносабат билан “Шаффоф қурилиш” платформасида қурилиш материаллари корхоналари ва уларнинг маҳсулотлари реестри шакллантирилади. Маҳсулотлар сифати рейтинги юритилади ва ҳар чоракда янгилаб борилади.

Қурилишда янги турдаги, энергия тежамкор материаллар пайдо бўлмоқда. Лекин кўплаб маҳсулотларнинг стандарти йўқлиги, борлари ҳам халқаро талабларга мос эмаслиги кўрсатиб ўтилди.

Мутасаддиларга йил якунигача 68 та халқаро стандартни қабул қилиш топширилди.

Йиғилиш давомида соҳа ва ҳудуд раҳбарларининг ахбороти, тадбиркорларнинг таклифлари тингланди.

Facebook|Instagram|X

#_дастур ва ижро

ДАСТУРЛАР ИЖРОСИГА БИЗ ҲАМ МАСЪУЛМИЗ

Томорқа азал-азалдан ризқ-рўз манбаи, рўзғоримизнинг тўкин-сочин, ҳаётимизнинг фаровон бўлиши учун хизмат қилиб келган беминнат дастёр бўлиб, унга астойдил меҳр қўйсак, тер тўкиб меҳнат қилсак, бизни асло қуруқ қўймайди.
Шунинг учун ота-боболаримиз азалдан ернинг ҳар бир қаричини муқаддас билиб, унга ризқимиз манбаи сифатида алоҳида эътибор қаратиб келганлар.
Биз туманимизнинг “Мўминобод” маҳалласида истиқомат қилувчи Ўктам Эшонқуловнинг томорқачиликка ҳаваси баланд эканлигини эшитган эдигу, лекин бориб кўришга вақт топа олмаётган эдик.
Шунинг учун унинг “Бирлик” маҳалласида жойлашган, томорқачилик билан шуғулланиш учун сотиб олган дала ҳовлисига бордигу, у ернинг мақтаганларича бор эканлигига ишондик.
Асли касби ўқитувчи бўлиб, нафақага чиққунга қадар болаларга география фанидан дарс бериб келган Ўктам Эшонқуловнинг томорқачиликка ҳаваси баланд бўлиб, ўзи истиқомат қилаётган ҳовлисидаги томорқаси торлик қилгани учун, қўшимча томорқа ери сотиб олиб, одамлар тили билан айтганда, у ерни жаннатдек қилиб қўйганини кўрганимизда, томорқанинг эшитганларимиздан ҳам зиёда эканига ишондик.
Ўктам Эшонқуловнинг 10-15 сотихли томорқасидаги ободлик, саранжом-саришталикни кўриб ҳавасинг келади. Биргина мана шу томорқанинг ўзида помидору бодринг, қулупнаю бақлажон, саримсоқпиёзу карам, картошкаю пиёзларни, қовоғу лавлагиларни, ҳосили косачадек бўлиб қолган қовун-тарвузларни кўриб қувонган бўлсак, қатор қилиб экилган анжиру шафтоли, ноку олхўри, олмаю анор, олчаю гилос, хурмою шотутларни кўриб қойил қолдик. Боиси, ҳар бир дарахт шунчалик мутаносиблик, шунчалик тартиб билан экилганки, уларнинг ҳеч биридан хато ёки камчилик тополмайсиз.
-Экинларни экишда “Зироатнома” китобидан фойдаланаман. Чунки баъзи экинлар ёки дарахтларни бир-бирига яқин экиб бўлмайди. Аксинча, узум билан анорни ёнма-ён экишда хосият кўп бўлар экан, чунки бу иккала мева ҳам жуда шифобахш бўлиб, улар аралаштириб экилганида ҳам ҳосили, ҳам шифобахшлик хусусияти ортар экан, тераклар парваришида ҳам алоҳида усуллар бор бўлиб, бу ҳақда ҳам шу китобдан ўқиб билдим, -дейди Ўктам Эшонқулов.
Унинг айтишича, томорқасига қўшни бўлган иккита ташландиқ томорқанинг эгаларидан рухсат сўраб, ўзи етиштирган терак қаламчаларидан 2000 минг тупдан ўтқазиб, иккита эҳтиёжманд оилага берибди .
-Ҳозир уларнинг ҳам тераклари икки метрдан ошди. Астойдил парвариш қилишса, бир –икки йилда дарахтга айланади, теракларни сотишса, яхшигина даромад олишади, уларга қўлимиздан келганича ёрдам берсак, савоб бўлади, - дейди.
Ўзининг томорқасининг бир томонига экилган 5000 минг туп теракқаламчалари барг ёзиб, ажиб бир яшиллик, гўзаллик яратганидан кайфиятинг кўтарилади.
Томорқа этагига олиб борадиган йўлакнинг икки томонига экилган павлония дарахтлари ерга тангадек офтоб туширмагани учун вужудинг ёқимли, салқин ҳаводан яйрайди.
Томорқа четидаги ариқлар бўйига экилган турфа хил, ранг-баранг атиргуллар, “астраю”, “георгиня”лар, райҳону жамбиллар, геранларнинг барқ уриб очилиб ётганини, қийғос гуллаган анорларни, олманинг ноёб турлари бўлмиш “голдену”, “беш юлдуз”ларни, ”қозоқ афорти”ни, кўчати навниҳол бўлсада, ҳосили кўплигидан шохлари эгилиб қолган нок дарахтларини кўриб баҳру дилимиз очилиб кетди.
Бизни қойил қолдирган томонларидан яна бири, Ўктам Эшонқуловнинг республикамизнинг “Камбағалликдан фаровонлик сари” ҳамда “Яшил макон умуммиллий дастур”лари асосида чора-тадбирлар белгилаб, уларнинг барчасини амалга оширишга ҳаракат қилаётгани ва буларнинг амалий исботини ўз кўзимиз билан кўрганимиздир.
-Томорқамда 30 дан ортиқ дарахтлар, гуллар, полиз ва сабзавот экинларини етиштираман. Экинларни, дарахтларни, гулларни жуда яхши кўраман. Томорқада ишлаб дам оламан. Чарчоқларимни чиқараман.