Хотира ва Қадр куни муносабати билан Пискент ҳаёти газетаси жамоаси томонидан ташкил этилаётган эзгу челленжлар, халқни ўтмишни унутмасликка, инсон қадрини улуғлашга чорлайдиган мақолалар ҳар бир ўқувчининг қалбига етиб бормоқда. Бир лаҳза бўлсин кузатмай ўтиб кетгинг келмайди, чунки ҳар бир сатрда халқ дарди, инсон қадри ва юртга муҳаббат мужассам.

Бугун шундай элпарвар, юракдан хизмат қиладиган инсонлар борлигидан фахрланамиз. Айниқса, газетанинг бугунги муҳаррири Башорат Сатторованинг меҳнати, ташаббускорлиги ва ижодга бўлган фидойилиги алоҳида таҳсинга лойиқ. У киши нафақат ўз ишининг устаси, балки халқ дардини ҳис қиладиган, қалам орқали инсонларни яхшиликка чорлай оладиган ижодкор сифатида ҳурмат қозонмоқда. Ҳар бир мақола ортида катта меҳнат, изланиш ва халққа бўлган ҳурмат сезилиб туради.

Бу табаррук даргоҳда меҳнат қилган, халқ хизматида қалами билан из қолдирган марҳум ижодкорларимиз — Тўхташ Қосимов ва Анвархон каби устозларимизни ҳам меҳр ва ҳурмат билан ёд этамиз. Улар ёзган сатрлар, айтган фикрлар бугун ҳам халқ қалбида яшамоқда. Руҳлари шод бўлсин, жойлари жаннатдан бўлсин.
Келинг, шундай инсонларнинг хотирасини дуолар билан ёд этиб, улар қолдирган маънавий меросни қадрлайлик. Чунки инсон ўтса ҳам, унинг эзгу номи ва халқ учун қилган хизматлари абадий яшайди.

Хурмат билан Дилноза Рустамовна

#"соғинч "челленжи

Онажоним,отажоним,меҳрибонларим.Мана,сизнинг мехрингиз нуридан бебаҳра бўлиб яшаётганимизга ҳам ўн йилдан ортиқ вақт ўтибти
Лекин ўтган бу йиллар юрагимизда ёнган соғинч оловини бадтар аланга олдирмоқда.
Чунки сизларсиз ҳаётимиз ғоят бефайз ва ғариб бўлиб қолди.
Онажон,отажон,сизлар бизнинг жону жахонимиз,ишонган боғимиз,суянган тоғимиз бўлган экансиз.
Энди бу боғлар хувиллаб ,хазонга юз тутди, тоғлар чўкиб виқори йўқолди.
Ота- она ўлмоқ меросдир деган гап ҳам аслида ота- онасини йўқотиш фарзандлар учун ниҳоятда оғир бўлишини билганлар айтган гап экан аслида.
Онажон,отажон! Жойларингиз жаннатларнинг тўрида бўлсин илоҳим.
Рухингиз шод, охиратингиз обод бўлсин !
Сизларни беҳад соғинган фарзандларингиз номидан
Қизингиз Манзурахон .
@piskenthayoti

#,"соғинч" челленжига

Акажон,СИЗ кетган дунё чин дунё,
Қолган дунёларнинг барчаси бекор...
Хақиқатан ҳам акамиз кетган дунё - охират дунёси чин дунё бўлса ҳам, лекин уларнинг иссиқ дийдорлари,меҳру оқибатлари , ширин сўзларини согинаяпмиз.
Соғинч эса дунёдаги ЭНГ азиз ва хақиқий инсоний туйғу бўлиб, у қўмсаган дийдорнинг азобига чидаб бўлмайди.
Акажон,яхшиям ортингизда сизнинг йўлларингизни давом эттирувчи , чехраси сиздан андоза олган фарзандларингиз- жигарларимиз қолди.
Уларни кўриб гўё сизни кўргандек бўламиз, уларнинг юзларидан,кўзларида, сўзларида сизни кўрамиз
Акажон, охиратингиз обод, рухингиз шод бўлсин.
Соғинган Синглингиз
Манзурахон Ишонова .
@piskenthayoti

​​Маснавийдан: «Кекса чолғувчи» хикояси

Айни шу дақиқаларда Ҳазрат Умар девонда давлат ишлари билан машғул эди. Гарчи кундуз вақти бўлса ҳам халифанинг кўзларига уйқу бостириб келаверди. Ҳазрат Умар бир неча бор бу уйқуни кетказиш учун ҳаракат қилиб кўрдилар. Тинимсиз уйқу босавергач: “Бунда бир ҳикмат бўлса керак!” – дея унга таслим бўлди.
Бир неча дақиқа ўтмай қаттиқ уйқуга кетган халифа туш кўрди. Тушида ғойибдан: “Эй Умар! Ўрнингдан тур-да Бақеъ қабристонига йўл ол. У ерда Бизнинг бир хос бандамиз бор. Байтул молдан етти юз динор ол ва унинг қўлига бер! Кейин ўша бандамизга: “Эй биродар, ҳозирча шу пулни эҳтиёжларингга ишлатиб тур. Тугаса яна шу ерга кел!” – деб айт” – деган овоз келди.
Ҳазрат Умар уйқудан турибоқ, етти юз динорни олганча қабристонга йўл олди. Бақеъга етиб боргач қабристонни тўлиқ айланиб чиқди. Фақатгина бир қабр тепасида ухлаб ётган қариядан бошқа ҳеч кимни кўрмади. Шундан сўнг: “Менимча, тушимда айтилган Аллоҳнинг хос бандаси бу қария бўлмаса керак. Ахир у оддий бир мусиқачи бўлса! Балки яхшироқ қарамаганим учун кўрмай қолгандирман!” – деган ўйда бутун атрофни яна икки марта айланиб чиқди.
Охирида: “Аллоҳ таоло қанчадан-қанча зулматлар ичига нур яширган бўлиши ҳеч гап эмас!” – деб ухлаб ётган чолғувчининг ёнига келди. Унинг уйғонишини кута бошлади. Бу орада қаттиқ аксириб юборди.
Ҳазрат Умарнинг аксирганидан уйғониб кетган кекса чолғувчи ёнгинасида кимсан халифани кўриб қаттиқ қўрқиб кетди. “Шарманда бўлдим!” – деганча орқа-олдига қарамай қочишга уринди.
– Эй биродар! Мендан қочма. Сен Аллоҳнинг севган бир бандаси экансанки, У мени сенинг аҳволингдан хабардор қилиб, олдингга жўнатди. Заруратинг учун ҳозирча мана бу пулни ишлатиб тур. Агар тугаса яна шу ерга кел, – деди Ҳазрат Умар.
Кекса чолғувчи бу сўзларни эшитгач, ўзини ерга отди. Қўллари билан уст-бошини пора-пора қила бошлади.
– Эй тенги ва шериги бўлмаган Аллоҳим! Бечора бир қулингни уятда қолдирдинг! – деб фарёд қилди. У бир муддат шу тарзда йиғлади, дард ва қайғуси ҳаддан ошди. Кейин чангни кўтариб ерга тарс урди. Чанг майда-майда бўлакларга бўлиниб кетди. Қария синиб ётган чангга қараб шундай деди:
– Эй Роббим билан менинг орамда парда бўлган, эй мени Ҳақ йўлидан оздириб, адаштирган, эй етмиш йилдан бери қонимни ичиб, Парвардигорим қаршисида юзимни қаро қилган, чолғу! Сенинг охиринг шудир!
Шундан кейин у яна Роббига нидо қилди:
– Аллоҳим, менга шундай бир умр бердинг, мен эса бутун умримни бекорга сарфладим. Аллоҳим, берган неъматларинг учун рози бўла олмаган, доим ношукурлик қилган нафсимнинг чангалидан дод дейман. Мен Сен учун девона бўлдим. Ақлу ҳушимни йўқотдим. Ўтмишим учун тавба қилишни истайман!
Кекса чолғувчининг сўзларига қулоқ тутиб турган ҳазрат Умар унга шундай деди:
– Сенинг бу дод-фарёдинг ҳозирча ақлинг жойида эканини кўрсатиб турибди. Ўтмишни эслаш, ақл билан иш кўриш ҳуш жойида эканлигига ишоратдир. Аслида ўтмишни хотирлаш ва келажакдан қўрқиш ҳам инсонга хос Олий фазилатдур.
Ҳазрат Умарнинг бу ҳикматли сўзларидан кекса чолғувчининг мудроқ руҳи уйғонди. Аввалги жони кетиб, умуман бошқа жон ила тирилди. Унинг қалбига шундай файз ва ҳайроналик келдики, ердан ҳам ажралди, кўкдан ҳам. Шу тариқа бутун оламни унутди.

@piskenthayoti

#_соғинч

Туман Солик инспекцияси ходимларининг хотирасига.

@piskenthayoti

* * *
Икки асосий омил сизнинг кейинги беш йил ичида қандай инсон бўлишингизни ҳал қилади: сиз мулоқот қиладиган одамлар ва сиз ўқиган китоблар.
 
© Робин Шарма
@piskenthayoti

Бир куни ота-ўғил тоққа сафарга чиқишибди. Анча йўл юриб, баланд жойга етганларида, боланинг оёғи тойилиб кетибди ва у тиззасини тошга уриб олиб, йиғлаб юборибди:
- Аааааааааайййййй!!!
Қизиқ томони, тоғнинг қаеридандир худди шу овозга ўхшаш товушлар эшитилибди:
- АААааааааайййййй!!! ААааййй!
Бола йиғидан овунибди ва овоз келаётган томонга бақирибди:
- Ким гапиряпти?
Тоғларнинг бағридан келаётган овоз саволга жавоб қайтариш ўрнига боланинг ўзини саволга тутибди:
- Ким гапиряпти, Ким гапиряпти, Ким . .
Бу жавобдан жахли чиққан бола сўкинишга тушибди:
- Қўрқоқ!!
Шу захоти жавоб эшитилибди:
- Қўрқоқ!! Қўрқоқ! Қўрқоқ!
Бу холатга ажабланган бола отасини сўроққа тутибди:
- Нима унақа бўляпти, дада?
Ўғлининг ишларини кузатиб турган дадаси тушунтира бошлабди:
- Қара, ўғлим, хозир мен сенга бир нарса кўрсатаман!
Шундай деб у хам бор кучи билан бақирибди:
- Мен сени яхши кўраман!
Халиги овоз бунга жавоб қайтарибди:
- Мен сени яхши кўраман! Мен сени яхши кўраман!
Ўғлининг хайрон бўлиб турганини кўрган ота яна бақиришда давом этибди:
- Сен зўрсан!
Ўша захоти жавоб эшитилибди:
- Сен зўрсан! Сен зўрсан! Сен зўрсан!
Бола тоғдаги овознинг отасига бошқача жавоб қайтараётганига, хозиргина болани қўрқоқ деб ёмонлаган бўлса-да, отасини яхши кўришига ва зўр деб тан олаётганига ажабланибди.
- Бунинг номи акс-садо, деб тушунтирибди ота ажабланиб қараб турган ўғлига. - Лекин аслида буни ҳаёт деб атасак хам бўлаверади.
- Тушунмадим, дада,- дебди бола.
- Акс-садо сен нима гап гапирсанг, худди шуни ўзингга қайтариб беради. Хаётда хам биз худди шу акс-садо каби муносабатлар қуршовида яшаймиз. Бу ерда акс-садо сенинг қанақа гап айтаётганингга қараб худди шу гап билан жавоб қайтарса, хаётда сенинг қанақа иш қилаётганингга қараб атрофдагилар худди шунақа жавоб қайтаришади. Акс-садо «қўрқоқ» деб айтганингда «қўрқоқ» деб жавоб қайтарганидек, ҳаётда хам бошқаларга ёрдам кўлини чўзишдан қўрқоқлик қилсанг, вақти келганида бошқалар хам сенга ёрдам қўлини чўзишга қўрқоқлик қилишади. Атрофдагилардан қанақа муносабат кўришни хохласанг, ўзинг хам уларга шу муносабатни кўрсат, шунда акс-садоси ўзингга қайтади. Ўртоқларинг сени яхши кўришини хохлайсанми, сен хам ўртоқларингни яхши кўр. Танишларинг сени хурмат қилишини ёқтирасанми, сен хам танишларингга хурмат кўрсат. Бегоналардан ёрдам сўрамоқчимисан, аввало ўзинг бегоналарга ёрдам қўлини чўзиб, акс-садони бошлаб бер. Хаёт шу акс-садонинг ўзгинаси, нима берсанг, сенга шуни қайтариб беради.
Отанинг ўғлига берган маслаҳатларига эътибор қаратсангиз, бугунги мавзумиз хақида тўлиқ тасаввурга эга бўласиз. Аммо юқоридаги гапларга шуни хам қўшимча қилишни истардикки, бугунги:
Ҳаётингиз тасодиф эмас. Бугунги ҳаётингиз ўзингизнинг аксингиз.

Ва... Сўнгги сўзни "акс-садо" айтади, шуни ҳам унутманг..

@piskenthayoti

КУНДОШНИНГ ИСМИ...

2016- йил, 30- сентябрь,
муборак жума эди.

Онажоним зиёратига ошиқдим. Файзиобод  "Дамас"ига ўтирдим. Энг сўнггида қорачадан келган, ёши олтмишлардан
ошган, болалик аёл чиқиб келди. Қизча икки ёшлардан ошган , буғдой ранг , кўзчалари қоп-қора, қошлари энликкина, одамни ўзига тортадиган эди. Негадир қизчанинг исмини  билгим келди.
-  Бу қизчанинг исми нима?
     Бувижониси хотиржамлик, кўнгил тўқлик  билан, худди ўзидан рози бўлгандай оҳангда жавоб айтди.
-  Неварамга кундошимнинг исмини қўйганман. Шарофатхон.
- Кундошимнинг исми дейсизми?
- Ҳа...
- Мана, етмишга етай деётган бўлсам, кундошнинг исмини ардоқлаб, набирасига қўйган одамни биринчи марта эшитдим. Кўнглингизга тасанно! Шунақа кенг, шунақа дарё эканда-а...
Худди шу дақиқада  орқага ўгирилгим, қора майиздеккина, куйди-пишдигина бу аёлни қучоқлаб, ўпгим келаётган эди. Аёл мен сўролмаётган саволларни беихтиёр ўзи ҳикоя қила кетди.
- Кундошим раҳматли яхши аёл бўлган экан. Одамлар уни тез-тез эслашади. Касалликка чалиниб, бевақт ўтиб кетган.
Бир ўғли, бир қизи менга қолган. Шу набирамнинг отаси мен келганимда етти яшар бола эди. Шу ўғлимни уйладик. Ўн йил деганда, зўрғагина  шу қизни Аллоҳ берди.
- Исмини нима қўямиз? -деди дадаси. Мен айтдим:
- Сен мени ҳурмат қиласан. Эъзозлайсан, раҳмат. Қизингга онангнинг исмини қўямиз, - дедим.
Ўғлим "дод" деб йиғлаб, уйга, ичкарига кириб кетди. Мен ҳам роса йиғладим. Ҳеч ким ўз онасидан қолмасин...
    Ўғлим  роса йиғлади. Ич-ичида йиғилган айрилиқ, соғинчларини тўкиб йиғлади. Кейин чиқиб, ёш юқи кўзларини юзларимга суртиб, бетларимдан ўпди.
- Раҳмат, аяжон,- деди яна тўлиқиб.- Соғ бўлинг...
    Олдимдан чиқиб, аммасиникига борибди. Аммаси ҳам сўрабди.
- Қизингнинг отини нима қўйдиларинг?
   Ўғлим Умиджоним аммасига қарармишу, гапиролмай, кўзидан ёши қуйилармиш... Айтолмабди, фақат йиғлабди, холос.
Шу қизгинамнинг исми шарофати билан яна бир яхшиликлар бўлди. Кундошимнинг опа-сингиллари мен шу оилага келибманки, қадам босиб келишмаганди. Сингилларининг исмини набирамизга қўйганимизни эшитиб, йўқлаб, эшикдан кириб келишди. Улар билан борди-келдили бўлиб қолдик.
    
Матлуба  Деҳқон қизи.

@piskenthayoti

МУҲАББАТИНГ АСРАДИ
(ҳазил шеър)

Билсанг, агар ошиқ жонида,
Ишқнинг ўзи энг гўзал тадбир.
Мени қонли жанг майдонида,
Муҳаббатинг асради, кампир!

Не бор ишқнинг амалларида,
Хатинг асраб камарларида,
Ленинград қамалларида,
Муҳаббатинг асради, кампир!

Кўмишдилар белгача мени,
Солди қаро ергача мени,
Қирқ бешинчи йилгача мени,
Муҳаббатинг асради, кампир!

Ўзинг бўлдинг шарафим-шоним,
Зулматимда энг нурафшоним,
Сеникидир барча нишоним,
Муҳаббатинг асради, кампир!

Ёвни мағлуб этгунимча то,
Ғолиб бўлиб кетгунимча то,
Берлин сари етгунимча то,
Муҳаббатинг асради, кампир!

Уруш ҳақда мен нима дейин,
У кунларни унутмоқ қийин,
Энг аввало Оллоҳ ва кейин,
Муҳаббатинг асради, кампир!

Қулоғимда қолган гапларинг,
Шивирлаган маҳзун лабларинг,
«Соғиндим» деб ёзган хатларинг,
Муҳаббатинг асради, кампир!

Менсиз ўтган тунлар учун ҳам,
Чекилган оҳ, унлар учун ҳам,
Шундай ёруғ кунлар учун ҳам,
Муҳаббатинг асради, кампир!

Ўлмасбек Самарқандий

@piskenthayoti

* * *
Бўм-бўш кўчада тунда ёниб турган чироқдек бўлма!
Ким учун ёниб турганинг аниқ бўлсин...

Нажиб Фозил
@piskenthayoti

ХАЙРЛИ ТУН

Инсоннинг азизлиги меҳр- муҳаббати ва самимий табассумида
Сиз бу дунёга азиз бўлиш учун келгансиз ва албатта Азиздирсиз!
Ҳалиям азиз инсон эканлигингиз учун, муҳаббат ифорини таратиб яшанг.


@piskenthayoti

AССАЛОМ. АЛАЙКУМ
ХАЙРЛИ ТОНГ

Aста тонг отмоқда сокин, мусаффо,
Қалбингиз мунаввар нурларга ўранг.
Яшамоқ бахт эрур, тириклик сафо,
Гўзал кунларингизга шукрона айтинг.

Ўткинчи ҳисларла яшаманг зинҳор
Кенгга кенг дунёдир, торлар учун тор,
Ғанимат ҳаммаси,ғанимат дийдор,
Гўзал кунларингизга шукрона айтинг.

Умрингиз энг гўзал кўклами бу пайт,
Нафс,кибр,разолат йўлидан қайтинг.
Аллоҳга минг бора ҳамду сано деб,
Гўзал кунларингизга шукрона айтинг.

Шунчаки яшаманг рўёлар ютиб,
Боғритош диллардан муҳаббат кутиб,
Азиз инсонларнинг қўлидан тутиб,
Гўзал кунларингизга шукрона айтинг.

Яшамоқ бахт эрур,тириклик ҳилқат,
Қаранг нур ёғар осмондан қат,қат,
Умрлар ўткинчи,кунлар ғанимат,
Гўзал кунларингизга шукрона айтинг...
@piskenthayoti

Атиргулли сомса .
Бир хилликдан зериккан ва бетакрор кўринишдаги дастурхон тузмоқчи бўлсангиз атиргул сомсадан яхшиси бўлмайди.
Юмшоқлиги ва ажойиб мазаси сомсага алохида хусусият бағишлайди.
@piskenthayoti