Құрметті қыздар, мерекеміз құтты болсын!

Қалаған арманына жете білген, айналасына пайдасы тиген, өз жүрегі мен табиғатын тыңдай алатын, ең алдымен өзін сыйлаған, айтары бар қоғамның бір маңызды ТҰЛҒАСЫ болыңыздар! және… шаршап, тарыққанда әлсіз болуға рұқсат беретін, ақымақ болуға жағдай жасайтын жайлы мекеніңіз, жаныңыздың тең бөлшегі қасыңыздан табылсын!

әдемі көрініс көрсең, оның да көргенін,
ғажап сезімдерді құшсаң, оның да сезгенін,
мағыналы кітап оқысаң, оның да оқығанын,
салмақты ой түйсең, оның да түсінгенін…
қаласаң.

оны дұғаңа қосуды,
оны болашағың деп көруді,
оны көркем жаратылыс деп тануды,
оны жоспарыңа кіргізуді,
бір сәт те тоқтатпасаң

шынайы сезім деген сол шығар, иә?

осының бәрін құшу бәрімізге бұйырсын✨
#UN_notes

Құдай адамды қаншалықты ғажап етіп жаратқан, иә? Ал мен сол ғажап, қадірлі, күрделі жаратылыстардың жүректеріне қаяу болып, көңілдеріне кірбің болып түспесем екен. Ешкімнің ғұмырына салмақ салып, ешкімнің тағдыр жолына масыл болмасам екен. Ешкімнің ақысын жеп, ешкімді нала қылғым да келмеген. Менің алыстағанымды қалайтын адамнан дер кезінде алыстап, мен өз зиянымды тигізетін адаммен дер кезінде қоштасқым келеді. Өз уақытында. Менің себебімнен ешкім Сенің алдыңа жылап тұрған, ренжіп тұрған кейіпте келмесе ғой. Мен ешкімді өзіме, ешкім мені өзіне шамадан тыс, шектен шығарлықтай байлап та қоймаса… Айналамен қарым-қатынаста мен көбірек пайдалы болайын, береген болайын, себепші болайын, дәнекер болайын…
#UN_notes

Аспандағы жұлдызға жүрек жұтқан ғана, терең теңіздің түбіндегі маржанға батылы жеткен ғана, тау шыңында өсетін сирек гүлге қажырлық танытқан ғана қол жеткізе алатындай, сен де өз арманыңа, қалауыңа, қиялыңа табанды бол, шырағым…

#UN_notes

сенің жаныңның дәнегі Жәннәтта жаралған…

Жоқшылықтан емес, баршылықтан
қажеттіліктен емес, махаббаттан
ауыртпалықпен емес, жеңілдікпен
міндет деп емес, шартсыз түрде

мендегі барлыыық махаббатымды, мейірім мен қамқорлығымды үзіп беретін

тек ізгілікке, адалдық пен жылулыққа толы

шатырым,
шаңырағым,
шырағым
болса, бұйырса…🩵
#UN_notes

біреудің дұғасында болу — әдемі,
біреуді ұмытпай, дұғаңа қосу — одан да әдемі
#UN_notes

«есектің жүгі жеңіл болса, жатаған келеді»

аяма, аянба…

#UN_notes

Алла Тағала тез арада, сен ойламаған жерден, ретін келістіріп, дұғаңа жауап бергендегі сезім>>>

Рамазан бойы дұғамнан тастамаған бір дүниемді бүгін алақаныма оп-оңай салып берді ғой🥺 Жұмыстан үйге қайтып бара жатқанда жүрегім толқып, көз жасыма ерік бердім…

Сенен келген нығметтердің барлығы менің лайық болғанымнан емес, Сенің шексіз Мейірімің, сондай Жұмсақтығың мен шартсыз Махаббатыңнан, иә Аллам…
#UN_notes

қасымда бол, айым
қасыңда болайын
🪽

25.

Маған өлшеніп берген ғұмырға қиянат жасамауға, сол өмірде берілетін әр рөлді (мұсылман, қоғамның бөлшегі, тұлға, қыз, қарындас-сіңлі-әпке, әріптес, дос-құрбы, бұйырса аяулы жар мен ана) абыроймен атқаруға, маған келетін әр нығметтің өз уақытында қадірін білуге, әр сынақ пен сабақтың артындағы даналығын көре білуге жазсын… Тырмысуға, талпынуға, білуге, құлшынуға, сезінуге, ғашық болуға, қателесуге, қателіктерімді мойындауға, тәубе етуге, өзім болуға, қамқор болуға, маған біреудің қамқорлық танытуына, үміттенуге, өзіме және өзгеге қатысты сау қарым-қатынас құруға, бақытты болуға, бақыт құшуға мұрсат…

Жаным, ширек ғасырлы жүрегім, сені таңда оятатын, жандыратын, қанаттандыратын, сезімге ерік бергізетін, қиялыңды ұшыратын, жүрегіңді соқтыратын, жылататын, жұбататын, дамыл тапқыздырмайтын «БӘРІ ЖАҚСЫ БОЛАДЫ» деген АҚ ҮМІТТІ ЖАРЫҒЫҢ сөнбесін!

#UN_notes

Кедейлік үш ағайынды болады:
Үлкені - кежірлік,
Ортаншысы - еріншектік,
Кенжесі - ұйқы.
Мәшһүр-Жүсіп Көпейұлы

Жай ғана күнделікті майда-шүйденің аясындағы әңгіменің ғана емес, терең толғаныстарыма ой қосушы, тыпырлаған жүрегіме шабыт сыйлаушы болсаң деймін…

#UN_notes

Жасөспірім кезімде көпшілік назарының ортасында, жалт-жұлт еткен дүниенің арасындағы ересек өмірді елестететін едім. Ал қазір….

Құдай өзі әдемі жолдарымен, көркем тәрбиесімен мені жетелеп нағыз байлыққа әкеле жатқан сияқты. Айналдырған қас қағым сәтте құндылықтарым да өзгерді, өзім де біраз баяулап қалған сияқтымын.

Қазір мен үшін нағыз байлық — жақындарымның амандығы, олардың саған жаны ашып, қамқорлық танытуы, сапалы өмір мен сапалы өткен уақыт, саналы шешімдер, сенімді адамдар, еңбекпен ілесіп келетін мүмкіндіктер мен оларды дұрыс қолдана білу, қоғамның құнарлы алқабына бір дән болсын еге алу, елмен емес, өзгемен емес, өзіңнің ішіңдегі нәпсіңмен күресіп, кішкентай жеңістеріңе іштей қуану, ғұмырыңда болып жатқан құбылыстарыңды жария етпеу, қызғыштай қорғаштау, өмірді оны жаратқан Иесіне аманат етіп, тәуекел ете алу. Осының арасында ешкіммен алыспай, дәлелдемей, еншіңе түскен өз рөліңді, өз орныңды білу де үлкен жеңіс, қажырлы еңбек...

#UN_notes

Жан ұқпаған тағдыр дейтін бір ұғым,
Тәуірім бар, менің де бар сынығым.
Тұстарымда құритұғын оңалам,
Оңар жерден аңқауланып құрыдым….

Құбылма күй жүрегіме жайғасқан,
Бірде дауыл, бірде үнсіз айлы аспан.
Көретұғын жарығым көп сияқты,
Мені алда күтіп тұрған қай дастан?

Көпті ойлап, көзімнен бір шық құлар,
Өмір өзі жүріп-ақ қырсық қылар.
Арқалаған сезімің арқаңдағы,
Түнде кенет жаныңды тұншықтырар.

Кімге керек менің бұл шатпақтарым?
Дәуір көшсе, шашылып жатпақ барың.
Жанға айтпас менің бар шерлерімді,
Атарында жасырар аппақ таңым…
Ұ.Н.

#UN_poetry

Каспиймен сырласқанда…

Мне нравится смотреть сериалы в одиночестве и читать в одиночестве. Мне нравится ездить на автобусе в одиночестве и возвращаться домой в тишине. Нравится гулять в одиночку и просто быть наедине с собой. Но внезапно теперь мне больше по душе смотреть сериалы с тобой, читать где-нибудь, где есть ты, пусть ты в этот момент и не читаешь. Нравится ездить с тобой, куда бы то ни было и возвращаться отныне в наш общий дом. Нравится гулять с тобой, обсуждать мировую политику, пусть я практически и не смыслю в ней, нравится пить чай, пока ты пьешь кофе, и рассказывать тебе самые случайные, несвязные факты.. Мне все еще очень нравится одиночество, просто можно теперь где-нибудь рядом будешь ты?

Қалайсыздар?✨

Арнамды уақытша жауып қойдым, осы құраммен, осы тойғанымызбен шабыттың көзін ашып, кішкене тыпыршиын деп тұрмын бұйырса (әрине сіздерден қолдау болса…☺️)

Көз бен жүректің байланып қалуы әп-сәттік шаруа. Қолға түскен дүниенің жоқ болуы да оп-оңай. Жылдап жинаған абыройың мен мансабың да үп етсең, желдей ұшары жасырын емес. Ақыл көнерсе, жинаған білімің шашылады, жүрекке дақ түссе, толасыған иманың ортаяды. Сүйгенің алыстайды, жауың жақындайды. Іздегенің табылса, мәңгілік деп танығаның жоғалады. Жақсы дегенің жаманға, жаман дегенің жақсыға түрленеді. Ал ешқашаның әрқашанға айналып үлгергенін де байқамай қаласың. Бұл өзгерістің, түрлену дейтін құбылмалы табиғаттың бәрі адам баласының болмысына жақын дүние. Осы бір құбылмалы жалғандық біреуге өкініш, біреуге бармақ тістетер уайым, біреуге уақытша алданыш сыйлайды. Солай түптің түбінде болмашыға әуре болып, тыраштанамыз, тыпыршимыз. Несіне?
#UN_notes

Жаныңа кенет қаяу түскен жап-жарық, жып-жылы, жұп-жұмсақ, нұрлы болмыс, қасыңда бола алмасам да, көңіліңе мәңгі ұялаған қараңғылықты сейілте алмасам да, соны тілеген бір дұғамдасың💛
#UN_notes

«сенің еріншектігің – саған сенген адамдарға құрметсіздігің»

осыны оқып алып, біраз ойландым…

айтатын сылтауларымыз, жігерсіздігіміз, еріншектігіміз бен ойдағы істі кейінге қалдыра беруіміз, тәуекелге бармауымыз бізді сүйетін, бізге сенетін, біз үшін дұға ететін адамдарға деген қиянатымыз. және ең алдымен – Құдайдың шартсыз махаббатына жасалған қиянат.
#UN_notes