сенің кеуде тұсыңда үздіксіз соғып тұрған өмірлік бір компасың бар. ол сені жолыңнан тайдырмайды, адастырмайды. тек соны қолдана біл, тани біл, жол сілтердегі дүрсілін тыңдай біл, жақсы ма? 🍀💚
#UN_notes

бір сәт санаңдағы ызыңдап дамыл таппас беймаза қоңыраушаңды өшіріп, дәл осы сәтте өзіңді еркелетіп көрші. жай ғана бар болғаның үшін өзіңді аялап көрші. көмектеседі екен. шын айтам…
#UN_notes

Айнам-ау, шындығына келетін болсақ, сен ұтылмадың да, ұтылмайсың да. Бірге ойланып көрейікші…
шартсыз сүйе алатын жүрегіңнің барында,
әдемілікті көре алатын көзіңнің барында,
мейірімге толы құшағыңның барында,
арын ойлаған адалдығыңның барында,
жылулық тарататын қалаушығыңның барында,
өзгені ойлаған жанашырлығыңның барында…

сен ешқашан кеміп қалмайсың, дым тарықпа, дым уайымдама…

асылында осының бәрін байқамаған, бағаламаған, көре алмаған жан ұтылар бәлкім?!
иә, дәл солай!

#UN_notes

белгісізіме…

екеуміз өмір бойына жалғасқан әдемі оқиғаның, біте қайнасқан тіршіліктің басты кейіпкерлері болайық.

алдымен жолыққанымызша қоғам бізді екі бөлек тұлға деп танысын. кейін сол қоғамға қажет, мәні бар бір композицияға айналайық.

шартсыздығымызбен, шынайылығымызбен сүйсіндірейік, сүйіндірейік, үлгі болайық, шабыт сыйлайық.

екеуміз де іштей ұмтылып жүрген сезімдерге, қиялдап жүрген сәттерге лайық болайық🦋🩵🪺

#UN_notes

Махаббат?
Махаббат деймісің?

Махаббат азаймайды, жоғалмайды, сарқылмайды, тартылмайды. Оны тіпті көзден таса да қалдыра алмайсың. Жұлып, шетке ысырып, тығып, көзін құрта алмайсың.

Махаббат әділетсіздікке қуанбайды, жамандық ойламайды, қиянатқа әлсіз келеді, бәрін ақ көреді, бәріне сенгіш, бәрінен үмітті, бәрін көтереді, бәрін сыйдырады.

Махаббат көкіректенбейді, міндетсінбейді, санаспайды, құбылмайды, бұзылмайды, есірмейді, ол мейірленеді, мерейленеді, береді, шаттанады, көбейтеді, қуантады, үйретеді, кеңейтеді.

Махаббат. Нағыз… Махаббат ешқашан қуат көзін сүйгенінен ажыратпайды, мұқтаждықта қалдырмайды.

Махаббат қорықпайды…

#UN_notes

қазақтар «қандай күшті, көп оқыған қыз» демейді, қазақтар «жүрген бір қиял ма, сондай бірдеңе өзі» дейді

Шексіз Рақымды, шексіз Мейірімді, шексіз Білім Иесі Аллаға әр сәтімізде шүкір етсек те, аздық етер…

Көкірегіміз жабық, кеудеміз қуыс біздер
қалағанымызды алғанда ғана,
сұрағанымызды бергенде ғана,
армандағанымыз жасалғанда ғана,
жоспарымыз орындалғанда ғана,
бір сәттік қуаныштың лебімен тек тілмен шүкір дейміз де, қоя саламыз…

Бірақ көкірек көзді оятып, ой санамызды қозғап, өтіп кеткен жолдарымызды сырттан талдайтын болсақ, көп нәрсені ұғар едік… әр нәрсені ұйқастырып, қиыстырып, сәтін салып, ал ең бастысы… бізді дайындап, шыңдап, білімімізді толықтырып болған соң, асқан махаббатпен Ол сондай көркем түрде бұйырған межесіне Өзі-ақ әкеледі екен…

Әрекет етіп, бірақ орындалмай қалған жоспарларыңыз болса, ақталмай қалған үміттеріңіз болса, ойланып көріңіздерші?

Мысалы мен болмысыма бір ой іліксе, соны бүге-шүгесіне дейін қиялдап, түрлі сюжеттерді ойша құрып тастайтын әдетім бар… Бірақ көзімнің нық жеткені — Оның маған арнап дайындаған сюжеті мен үшін бәрінен де қайырлы, бәрінен де мінсіз…

Кейде «тағдыр қандай, иә?» деп тамсанғаныңда, сол тағдырың Оның «қаламынан» шыққанын ұмытпа….

#UN_notes

жүректің шегін, көлемін, сыйымдылығы мен қуатын еш жаратылыс өлшей алмады.

ақындар да, жазушылар да, ғалымдар да…

#UN_notes

Мені дос санайтын, мен дос санайтын, сыйлас жақындарым, жүректерім, қандай ғажап едіңдер… Бүгін таң атқалы ойша әрқайсыңа қарап, әрбіріңе тамсанып отырмын. Сондай ерекше, сондай эмпат, сондай дарынды жандарды тағдырыма жанастырған мен бейбақтың бағы жанған болуы керек. Көңілімді шабыттандырасыңдар, білмегенімді үйретесіңдер, отымды жағасыңдар, жан сарайымды көркейтесіңдер. Дос-серіктерім, ғұмырлы болыңдаршы🪄

Көркем өмір сүру үшін көркем жүру керек, көркем ойлау керек, айналаңды көркемдеу керек. Ең маңыздысы — көркем мінез қалыптастыру керек.

Жаман ой, жағымсыз әдет, жұғымсыз мінез сумақай келеді. Жаманның өне бойыңа кіріп, қалыбыңа айналуы әп-сәтте. Жаманға еліктеу де оңай-ақ. Бұның бәрі нәпсіңе жағар…

Ал жақсылықтың адымы — баяу, оның бабы бар, байыбы бар… Сол үшін де әдемі, лайықты өмір сүру үшін ең алдымен шыдам мен сабыр керек. «Қалағаным ертең-ақ бола қалады» деген ойға үйір болма. Содан соң, ең алдымен өз-өзіңмен қарым-қатынаста көркем мінез танытуың керек. Өз-өзіңнің алқымыңнан алмай, жегідей жемей, жерден алып, жерге салмай.

Сабыр ет, табанды бол, шыдамды бол. Step by step…

(өз-өзіме ескерту)

#UN_notes

Мен ешкім емеспін.

Бүгін бар болсам, ертең жоқпын. Біреуге бүгін жақсы болсам, ертең жаманмын. Біреу түгіл, өзіме өзім бірде құбыжық, бірде көркем жаратылыс болып көрінемін. Бүгін шабытыма бір тамшы үлес қоса алсам, ертең маған біреу шабыт қосардай мұқтаж хәлде боламын. Бірде жұп-жұмыр жерді шалынбастай бассам, бірде жоқ жерден қателесіп жатамын. Күнде өзіме белгілі дүниелер аясында уәде беремін, бірақ сол уәделерімді бұзып қоя беремін. Кейде сараңмын, кейде қолым тым ашық. Оң жағыма қарасам Жұмақтан үмітті болып, сол жағыма қарасам Есеп сұрасар сәттен қорқамын. Кейде адамдар менің ойша құрған қиял-жолыммен жүрмесе, мұңайып қаламын. Ешкім менің ойымнан шығуға міндетті емес екенін түсінсем де…

Осындай құбылмалы қалыбы бар пендеден не сұрарың бар? Ол пенде асылында ешкім емес…

#UN_notes

Көктем келе жатыр, соған орай «сен маған көктем боп кел» десем қалай?😶‍🌫️

Сенімен кездесуге бір ай қалып,
— деп маған аян келсе шырайланып…
Бағымды түйіп, жаным, жүрер едім…
Шіркін-ай, мен бақыттан шыр айналып…

(сол баяғы қиялым ғой…)
Ұ.Н
#UN_poetry

кейде қаласаң да болмайтын дүниелер бар, ал ойтаспа Құдайдың жетектеуімен, шынымен де өз жолын өзі тапқан, өздігінен бола салған, оқырмандарын өзі іздеп тапқан дүние болған сияқты. ғажабын әлі түсіне алмадым, қадіріне әлі толық жетпеген де шығармын… кейде күйбең тіршіліктің ортасында сіздерден күтпеген ықыласты сөздер, ыстық лебіздер келіп жатады…. 🫂 аманат-сенімдеріңіз үшін рақмет!✨

көктем таяп қалды, шабыт та келіп қалар, иә?🌱🫶🏻

Бір күннен кейін айлардың сұлтаны болған қасиетті Рамазан айы…бұйырса…

Ең алғашқы Рамазанымды, Оразамды ешқашан ұмытпаймын. Сол кездегі жүрек пен жан тыныштығын кейде қатты сағынамын. Ауызашардан кейінгі серуендер, ғажайып оқиғалар, менің аппақ ынта-ниетім, алғыс пен шүкірлікке толы жүрек, сезімдерге толы кеуде.

Биылғы Рамазанда да сол күйді сезінуге, босап қалған жанымды тәртіпке бағындыруға ниеттімін.

Баршаңызға, баршамызға қайырлы болған айдан болсын💜🪄

Адамның әу бастағы жаратылысына көп нәрсе керек емес.

Бұның көрінісі әсіресе оразада қатты білінеді-ау. Таң шапағы атқаннан бастап күн батқанға дейінгі бойда жиналған шаршау, шөлдеу, сабырсыздығымыздың барлығы бір жұтым сумен-ақ сейіліп, басыла қалады.

Шын мәнінде бізге көп нәрсе керек емес, көбейтіп алатын өзіміз…

#UN_notes

Құрметті қыздар, мерекеміз құтты болсын!

Қалаған арманына жете білген, айналасына пайдасы тиген, өз жүрегі мен табиғатын тыңдай алатын, ең алдымен өзін сыйлаған, айтары бар қоғамның бір маңызды ТҰЛҒАСЫ болыңыздар! және… шаршап, тарыққанда әлсіз болуға рұқсат беретін, ақымақ болуға жағдай жасайтын жайлы мекеніңіз, жаныңыздың тең бөлшегі қасыңыздан табылсын!

әдемі көрініс көрсең, оның да көргенін,
ғажап сезімдерді құшсаң, оның да сезгенін,
мағыналы кітап оқысаң, оның да оқығанын,
салмақты ой түйсең, оның да түсінгенін…
қаласаң.

оны дұғаңа қосуды,
оны болашағың деп көруді,
оны көркем жаратылыс деп тануды,
оны жоспарыңа кіргізуді,
бір сәт те тоқтатпасаң

шынайы сезім деген сол шығар, иә?

осының бәрін құшу бәрімізге бұйырсын✨
#UN_notes

Құдай адамды қаншалықты ғажап етіп жаратқан, иә? Ал мен сол ғажап, қадірлі, күрделі жаратылыстардың жүректеріне қаяу болып, көңілдеріне кірбің болып түспесем екен. Ешкімнің ғұмырына салмақ салып, ешкімнің тағдыр жолына масыл болмасам екен. Ешкімнің ақысын жеп, ешкімді нала қылғым да келмеген. Менің алыстағанымды қалайтын адамнан дер кезінде алыстап, мен өз зиянымды тигізетін адаммен дер кезінде қоштасқым келеді. Өз уақытында. Менің себебімнен ешкім Сенің алдыңа жылап тұрған, ренжіп тұрған кейіпте келмесе ғой. Мен ешкімді өзіме, ешкім мені өзіне шамадан тыс, шектен шығарлықтай байлап та қоймаса… Айналамен қарым-қатынаста мен көбірек пайдалы болайын, береген болайын, себепші болайын, дәнекер болайын…
#UN_notes

Аспандағы жұлдызға жүрек жұтқан ғана, терең теңіздің түбіндегі маржанға батылы жеткен ғана, тау шыңында өсетін сирек гүлге қажырлық танытқан ғана қол жеткізе алатындай, сен де өз арманыңа, қалауыңа, қиялыңа табанды бол, шырағым…

#UN_notes