Шынайы достық пен нағыз махаббаттың артынан жүгірмеңіз. Ешқашан. Себебі адамдарда тас жаратын болмыс бар. Бірақ қаласа ғана. Адамдар қалаған адамдарына “бос емес” уақыттарын босатады. Сөйлескісі келген адамдарына хат жазады, хабарласады.

Кездесуге қолым тимеді десе, сене салыңыз. Уақыт табуларын сұрамаңыз. Себебі ешкімді дос болуға, сүйікті болуға мәжбүрлеуге болмайды. Ол сезімдер жүрек пен қалаушықтан шықпаса, оның түк мәні, сәні мен мағынасы да қалмайтындай.

Ешкімге мені бірінші орынға қой деп те өтінбеңіз. Қаласа, сұрамай-ақ сол орынға жайғасар едіңіз. Қандай жағдай болмасын, қолдан келгенше оның таңдауы мен талғамы болар едіңіз.

Өміріңізден біреу кетемін десе, жіберіңіз. Қалуын да, кідіруін де өтінбеңіз. Бар ниеті кету болып тұрған адамның өміріңіздегі құны мен құндылығы қандай болмақ?

Кетемін деген адамдар үшін де, келемін деген адамдар үшін де шеңберіңіздің есігін ашық ұстаңыз. Керек жан керек уақытында сол есікті әдебімен, рұқсатымен қағып кіреді.
ҰН, #UN_notes

“өкініштер музейі әлде тәуекелдер галереясы?”

Жетінші түйсік (үзінді)
М.Шаханов

Гүл болып ашылмағанның тілегін кім бар жақтаған?
Рухы қосылмағанның сезімі шаттық таппаған.
Рухы қосылмағандар — жалынсыз, сәнсіз, жақұтсыз,
Сондықтан мына жалғанда екеудің бірі — бақытсыз.

Сондықтан махаббаттың да сырт санын құрайтындар көп
Жәй көзге күліп жүргенмен, жасырын жылайтындар көп
Тағдырдан қашу мүмкін бе, жүрсең де қандай жолменен,
Бір мәнді сұрақ алдыңда тұрады ылғи көлденең:

Жұбайың досың болды ма самғатқан сенім шырайың,
Нақ сондай ұлы бақытты берді ме саған құдайым?
Ойнай ма оның көзінде сезім мен рух жарқылы,
Ұға ма ол шаттық-мұңыңды жетінші түйсік арқылы?

Ұқпаса...
Ісің секілді дауылда мұзға жаққан от,
Рухани терең түйсіну жоқ кезде махаббат та жоқ.
Нағыз қыран мәңгі ардақтап өтер болар өз көгін,
Өзіңді-өзің ұмыта біл, бақыты үшін өзгенің.

Қол — жүректің жалғасы…
#UN_notes

жапырақпын. жапырақтардың ішіндегі ең кішкентайы, ең жұқасы мен сияқтымын.

мөлшерінен көп күн түссе құрғап, мезгіліне бағынатын. жел соқса, қоярға жер таппай, шайқалып, ық іздейтін. шексіз үміттер мен күдіктерден жұқарып, сарғаятын. жайлылықты жақсы көретін, жылулыққа құштар. діңгегінен нәр алатын, іздегенге көлеңке болатын, өзіндік орны бар, көп ішіндегі бір жапырақпын…
#UN_notes

Жабық есік даналығы.

Сабырсыз болмыс ойдағы болмай қалса, сонша қалаған есіктері ашылмай қалса, бұлқан-талқан болады. Сәл уақыт өткен соң шекті адами болмысым ойымдағы бір тамшы жақсылықтың орнына теңіздер мен мұхиттарды толтыруға жететін маған ғана арналған нығметтерді көргенде сабырсыздығына ұялады…

Ұялмас үшін бір нәрсені естен шығармау керек шығар…

Ол — жабық есік даналығы. Жабылған есікте даналық бар. Кешігіп қалған ұшақта нығмет бар. Болмай қалған жоспардың артында одан да үлкен мүмкіндіктер бар.

Бұл даналықты сезіне алу үшін сенім керек, көз жеткізе алу үшін уақыт керек…

#UN_notes

«Сайып келгенде әр адам - өз махаббатының бағбаны. Солып қалмауы үшін қай гүлге қашан су құю керектігін бұлжытпай білетін бағбан тәрізді, адам да өз махаббатының үнемі жайқалып тұруына тынбастан жағдай жасап отыруы тиіс. Бұл үшін ерлі-зайыптылардың әрқашан да бір-біріне құштарлығы, шексіз сенімі, әлдеқалай іште бас көтерген қызғанышты сыртқа шығармай, сабырмен жеңуі, ағат айтылған сөздерді кек тұтпауы, кешірімділігі, өзара қалтқысыз қамқорлығы, сыйластығы, ашуды тежеп, нәпсіні тыйып ұстауы қажет. Бір сөзбен айтқанда, өздерін тәртіппен ұстай білген зайыптардың махаббаты ешқашан өшпек емес. Бұл арада атақты Абайдың: «Болмаса мінезінің жат кесегі, майысқан бейне гүлдей толықсыған, кем емес алтын тақтан жар төсегі» деген сөздерін әрқашан да есте ұстау абзал. Сонда ғана ерлі-зайыптылар арасындағы жарасты махаббат үйге нұр, ұяға көрік береді, тұрмысқа ажар, көңілге базар орнатады.»

Әзілхан Нұршайықов «Махаббат қызық мол жылдар»

— «есейдің» дейді
— «өмір ғой» дедім…
#UN_notes

Жетістікті ақшамен, мал-мүлікпен, мансаппен өлшесең, бәлкім бұл сенің ұтылғаның болар.

Нағыз жетістік ауыр күннен кейін сауытыңды шешіп, шай үстінде шер тарқасатын жандардың болуы. Сені барлық күйіңде қабылдап, қолдау көрсететін ортаңның болуы. Сол жақындарыңа қолыңнан келгенше жылулық пен күлкі сыйлауға тырысуың, бақытты сәттердің себепшісі болуың.

#UN_notes

құбыжықтарымды
қорқыныштарымды
құпияларымды
қиялдарымды
құрбандықтарымды
қалаушықтарымды
қуаныштарымды
қанағатсыздықтарымды
қайғыларымды
қастандықтарымды
қылықтарымды
қабылдауға құштар қалпың қайда?

#UN_notes

Үміт құру үнсіздіктің күндесі,
Әрең тұр-ау арадағы іргесі….
Үзем ойды деп әуреге салынам,
Сосын әлім жоқ болады…
Күнде осы!

Жинап алам сезімдерді тірнектеп,
Шашады оны жүрек аңғал мың рет кеп…
Ақ парақты енді ғана бастаған
Осы жолы кімдер келіп…
Кірлетпек?

Бәрі өзін, өзін бәрі санайды ақ,
Деп күтеді қонар қашан арай бақ.
Бір ғажапты құшу үшін ақырын,
Мен де жүрмін
Сен де жүрсің
Қарайлап!
ҰН, 24.07.24

#UN_poetry

Шаңқай түс. Уағы да Құдаймен межеленіп қойғандай. Құдайға уағын шегелеген мен сабырсыз есермін, соны орындаған Ол бірақ тым мейірімді. Содан болар-болмас уақыт межесі сүйікті жерімде тез-ақ өтіп, ішімдегі сезім бояулары араласып жатты. Бір түйір ыңғайсыздық, екі түйір сыйластық, төрт түйір тығылып қалған сыр мен жарты түйір өзіме де белгісіз, атын әлі ешкім ойлап тапаған қызық бір күй. Дейтұрғанмен барлығы қосылып, нәтижесінде мен сонша күткен жеңілдік сезімін бергендей. Жо-жоқ, дәл солай. Жеңілдік…. Бәрі қайыр десем, мен байғұс қарап тұрсам, тәуекелге де бармаппын ғой. Бірақ қиялдың тетігін қосып, “әттеген-ай” деп емес, “шіркін-ай” деп қарай алсам, ортақ тұстар да, ұқсас реңдер де, ерекше ұйқастар да сондай үйлесімді болар еді. Сол уақта мен нағыз өзім болдым ба, болмадым ба, бірақ айналамдағылардың бәрі өзінің қалпында. Дәл өзінің. Не де болса, санымды соқпаймын, бармағымды да, тілімді де тістемеймін. Сараласам, бұның бәрі өсуім еді. Өстім. Жібермедім, себебі ұстамадым да. Ұстайтындай ештеңе де менікі емес. Жазмышқа бұйрық келсе, бұйрық дәл осындай болады екен-ау…

ҰН
#UN_notes

«Кешір, жүрек, бола бермейді адамдардың ойлағаны» деп емес, «Қуан, жүрек, бола бермейді адамдардың ойлағаны» деп айтуымыз керек-ау…

Адамның жоспарынан әл-Алимнің (бәрін білушінің) жоспары артық емес пе?

#UN_notes

Адам мен адамның арасы шақырым болса, арман мен адамның арасы — дұға…
#UN_notes

ыстық, ынтық сезімдер де суиды,
жаңа құйған алдыңдағы шай ұқсап…
#UN_poetry

Қоштасу жүрекке ауыр тиген болса, уақыттың жақсы өткені.
#UN_notes

Шамам жететіннің де, жетпейтіннің де, маған мәлімнің де, беймәлімнің де, маған ұнайтынның да, ұнамайтынның да, шынайылығымның да, қиялымның да, келімді-кетімді адамдар мен дүниенің де Иесі — Өзің… Саған тиесілінің барлығын Өзіңе тапсырт, ақылсыздықпен иемденіп алсам, көркем түрде тәубеме келтір…
#UN_notes

Таңертең дала жаңбыр. Қатты жауын болмаса да, жаңбырдың үстіңді кәдімгідей су қылатындай күші бар. Көліктен түсіп, жұмысыма қарай асығыс кетіп бара жатқанымда төбемде қолшатыр тұрғанын байқадым. Бейтаныс келіншек қолшатырлылардың арасындағы мені байқап, маған қамқорлық жасады. Ғимаратыма жете бергенімде жымиып қана қарады да, «жүгіріп кіріп кетіңіз, мен ары қарай барамын» деді… Бұл расында нағыз мейірім. Құдайдың адамдар арқылы маған жеткізгісі келген бір түйір мейірімі.
#UN_notes