Nuroniylar qadami – qalblarni yoritgan, duolarga burkangan safar

Nurobod tumanining Tepaqul mahallasida istiqomat qiluvchi nuroniylar uchun tashkil etilgan ma’naviy-ma’rifiy sayohat chin ma’noda qalblarni yoritgan, duolarga yo‘g‘rilgan unutilmas safarga aylandi. Bu safar ular uchun nafaqat tarixiy maskanlarni ko‘rish, balki ruhiy poklanish, o‘tgan ajdodlar izidan yurish va hayot mazmunini yana bir bor teran his etish imkonini berdi.

Safar davomida nuroniylar qadimiy obidalar, ulug‘ ajdodlarimiz izlari saqlanib qolgan muqaddas maskanlarda bo‘lib, u yerda samimiy duolar, ezgu tilaklar bilan qalblarini boyitdilar. Har bir qadam, har bir nigoh – tarix bilan yuzma-yuz uchrashuvdek bo'ldi.

Ayniqsa, nuroniylarning Imom al-Buxoriy xotirasi abadiylashtirilgan muqaddas maskanga tashrifi safarning eng ta’sirli lahzalaridan biri bo‘ldi. Bu yerda nuroniylar chuqur ehtirom bilan Qur’on tilovat qilib, yurt tinchligi, xalqimiz farovonligi va kelajak avlodning baxtli hayoti uchun duolar qildilar. Ularning yuz-ko‘zlarida aks etgan sokinlik, qalblarida sezilgan yengillik bu safarning naqadar mazmunli va ta’sirli o‘tganidan dalolat edi.

Bu sayohat davomida nuroniylar nafaqat o‘zlari uchun ma’naviy oziqa oldilar, balki yoshlarga ibrat bo‘larli hayotiy saboqlarni yana bir bor namoyon etdilar. Ularning dono so‘zlari, hayotiy tajribasi va samimiy duolari — jamiyatimizda mehr-oqibat, hurmat va qadriyatlar mustahkamlanishiga xizmat qilmoqda.

Shubhasiz, bunday safarlar inson qalbini poklaydi, ruhini boyitadi va hayotga bo‘lgan qarashlarini o‘zgartiradi. Eng muhimi, bu kabi e’tibor va g‘amxo‘rlik nuroniylarimizning hayotiga quvonch, jamiyatimizga esa baraka olib kiradi.

Zero, nuroniylar bor joyda — duolar bor, baraka bor, hayotga nur baxsh etuvchi ezgulik bor!

🧡@nur_press

Mahallalarda xavfsiz muhit – jinoyatchilikka qarshi tizimli kurash

Nurobod tumanida jinoyatchilikning oldini olish, aholi osoyishtaligini ta’minlash hamda mahallalarda xavfsiz muhitni shakllantirish borasida izchil va manzilli ishlar olib borilmoqda. Xususan, tuman prokurori J.Abdixakimov tomonidan hududlarga chiqilgan holda jinoyatchilik ahvoli chuqur o‘rganilib, mavjud muammolarni joyida hal etish choralari ko‘rilmoqda.

Mazkur o‘rganishlar O‘zbekiston Respublikasi Prezidentining 2026-yil 5-yanvardagi “Respublika mahallalarida xavfsiz muhitni yaratish yo‘nalishida yaxlit manzilli ishlash tizimini joriy etishga qaratilgan qo‘shimcha chora-tadbirlar to‘g‘risida”gi PQ-1-sonli hamda “2026-yilda respublika mahallalarida jinoyatchilikning barvaqt profilaktikasi samaradorligini yanada oshirish bo‘yicha tashkiliy chora-tadbirlar to‘g‘risida”gi PQ-2-sonli qarorlari ijrosini ta’minlash maqsadida tashkil etildi.

O‘rganishlar doirasida tumanning “Mehnatkash” mahallasida jinoyatchilikning oldini olish borasida amalga oshirilayotgan ishlar holati atroflicha tahlil qilindi. Ayniqsa, giyohvandlik va ichkilikbozlikka ruju qo‘ygan shaxslar tomonidan sodir etilishi mumkin bo‘lgan huquqbuzarliklarning oldini olish, bunday toifadagi fuqarolarni aniqlash va ular bilan individual ishlash masalalariga alohida e’tibor qaratildi.

Jarayon davomida sog‘lig‘ida muammolari mavjud bo‘lgan, spirtli ichimlik va giyohvand moddalarga qaram bo‘lib qolgan fuqarolarni aniqlash, ularni davolash muassasalariga yo‘naltirish, sog‘lom turmush tarziga qaytarish hamda bandligini ta’minlash bo‘yicha aniq vazifalar belgilab olindi. Shu bilan birga, mas’ul tashkilotlar rahbarlariga bu boradagi ishlarni tizimli ravishda olib borish, profilaktik tadbirlarni kuchaytirish yuzasidan qat’iy ko‘rsatmalar berildi.

Ta’kidlash joizki, jinoyatchilikka qarshi kurash faqat huquqni muhofaza qiluvchi organlarning vazifasi emas, balki butun jamiyatning umumiy mas’uliyatidir. Shu bois mahallalarda sog‘lom muhitni yaratish, fuqarolarning huquqiy madaniyatini oshirish, ayniqsa yoshlarni turli salbiy illatlardan asrash ustuvor vazifalardan biri bo‘lib qolmoqda.

Nurobod tumanida olib borilayotgan bunday manzilli va tizimli ishlar, shubhasiz, jinoyatchilikni kamaytirish, aholi osoyishtaligini mustahkamlash hamda har bir mahallani xavfsiz hududga aylantirishga xizmat qiladi.

🧡@nur_press