Nurobodda loyihalar ijrosi qat’iy nazoratda

Nurobod tumani hududida amalga oshirilayotgan yirik qurilish va infratuzilma loyihalarining borishi doimiy e’tibor markazida bo‘lib turibdi. Xususan, O‘zbekiston Respublikasi Prezidentining 2025-yil 27-dekabrdagi “Samarqand viloyatini ijtimoiy-iqtisodiy rivojlantirishga qaratilgan chora-tadbirlarni yanada jadallashtirish to‘g‘risida”gi PQ-392-son hamda “2026–2028-yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari to‘g‘risida”gi PQ-393-son qarorlari ijrosini ta’minlash maqsadida keng ko‘lamli ishlar olib borilmoqda.

Mazkur qarorlar ijrosi yuzasidan Nurobod tumani prokurori J.Abdixakimov tomonidan hududdagi qurilish obyektlarida o‘rganish ishlari olib borildi. O‘rganish jarayonida ijtimoiy soha obyektlari, yo‘l-transport infratuzilmasi, muhandislik-kommunikatsiya tarmoqlari hamda ishlab chiqarish quvvatlarini kengaytirishga qaratilgan qurilish-montaj ishlari bevosita ko‘zdan kechirildi.

Aniqlanishicha, ayrim obyektlarda ishlar belgilangan jadval asosida olib borilayotgan bo‘lsa-da, ba’zi hollarda qurilish sur’atini oshirish, sifat ko‘rsatkichlarini yanada yaxshilash va belgilangan muddatlarga qat’iy rioya etish zarurati mavjud. Shu munosabat bilan pudratchi tashkilotlar rahbarlariga aniq topshiriq va ko‘rsatmalar berildi.

Xususan, qurilish ishlarida zamonaviy va sifatli materiallardan foydalanish, texnika xavfsizligi va mehnat muhofazasi talablariga qat’iy amal qilish, ish jarayonlarini tizimli tashkil etish orqali muddatlarni qisqartirish, har bir obyektni belgilangan vaqtida foydalanishga topshirish bo‘yicha mas’uliyatni oshirish kabi masalalar alohida ta’kidlandi.

Shuningdek, mas’ullarga har bir loyiha bo‘yicha kundalik monitoring olib borish, mavjud kamchiliklarni zudlik bilan bartaraf etish hamda aholi manfaatlarini ustuvor yo‘nalish sifatida ko‘rish zarurligi eslatib o‘tildi.

🧡@nur_press

Nuroniylar qadami – qalblarni yoritgan, duolarga burkangan safar

Nurobod tumanining Tepaqul mahallasida istiqomat qiluvchi nuroniylar uchun tashkil etilgan ma’naviy-ma’rifiy sayohat chin ma’noda qalblarni yoritgan, duolarga yo‘g‘rilgan unutilmas safarga aylandi. Bu safar ular uchun nafaqat tarixiy maskanlarni ko‘rish, balki ruhiy poklanish, o‘tgan ajdodlar izidan yurish va hayot mazmunini yana bir bor teran his etish imkonini berdi.

Safar davomida nuroniylar qadimiy obidalar, ulug‘ ajdodlarimiz izlari saqlanib qolgan muqaddas maskanlarda bo‘lib, u yerda samimiy duolar, ezgu tilaklar bilan qalblarini boyitdilar. Har bir qadam, har bir nigoh – tarix bilan yuzma-yuz uchrashuvdek bo'ldi.

Ayniqsa, nuroniylarning Imom al-Buxoriy xotirasi abadiylashtirilgan muqaddas maskanga tashrifi safarning eng ta’sirli lahzalaridan biri bo‘ldi. Bu yerda nuroniylar chuqur ehtirom bilan Qur’on tilovat qilib, yurt tinchligi, xalqimiz farovonligi va kelajak avlodning baxtli hayoti uchun duolar qildilar. Ularning yuz-ko‘zlarida aks etgan sokinlik, qalblarida sezilgan yengillik bu safarning naqadar mazmunli va ta’sirli o‘tganidan dalolat edi.

Bu sayohat davomida nuroniylar nafaqat o‘zlari uchun ma’naviy oziqa oldilar, balki yoshlarga ibrat bo‘larli hayotiy saboqlarni yana bir bor namoyon etdilar. Ularning dono so‘zlari, hayotiy tajribasi va samimiy duolari — jamiyatimizda mehr-oqibat, hurmat va qadriyatlar mustahkamlanishiga xizmat qilmoqda.

Shubhasiz, bunday safarlar inson qalbini poklaydi, ruhini boyitadi va hayotga bo‘lgan qarashlarini o‘zgartiradi. Eng muhimi, bu kabi e’tibor va g‘amxo‘rlik nuroniylarimizning hayotiga quvonch, jamiyatimizga esa baraka olib kiradi.

Zero, nuroniylar bor joyda — duolar bor, baraka bor, hayotga nur baxsh etuvchi ezgulik bor!

🧡@nur_press