Hokim qabuli – muammolar yechim topadigan manzil

Har bir murojaat – bu oddiy so‘z emas, balki insonning dardi, umidi va ishonchidir. Bugun Nurobod tumanida o‘tkazilgan navbatdagi hokim qabuli aynan shu ishonchni oqlash, fuqarolar muammolariga yechim topish yo‘lida muhim qadam bo‘ldi.

Tuman hokimi M.Buranov boshchiligida o‘tkazilgan ushbu qabulda tuman prokurori J.Abdixakimov, tuman IIB boshlig‘i S.Sharipov, hokim o‘rinbosarlari, tegishli tashkilot va korxonalar rahbarlari, shuningdek, murojaat bilan kelgan fuqarolar va yoshlar faol ishtirok etdilar.

Qabul jarayoni ochiq va samimiy tashkil etilib, har bir murojaat ortida inson taqdiri, uning dardi va umidi borligi chuqur anglangan holda yondashildi.

Fuqarolar tomonidan ijtimoiy himoya, tibbiy xizmatlar sifati, bandlik va ish o‘rinlari yaratish, kadastr va mulk masalalari, gaz, ichimlik suvi va elektr ta’minoti, ichki yo‘llarni ta’mirlash
va boshqa hayotiy muhim masalalar ko‘tarildi.

Eng muhimi, har bir murojaat shunchaki tinglanib qolmadi — mas’ullar ishtirokida joyida muhokama qilinib, aniq yechimlar, muddatlar va ijrochilar belgilab berildi. Ayrim muammolar shu yerning o‘zida ijobiy hal etilib, fuqarolarning yuzida mamnuniyat ifodasi paydo bo‘ldi.

Qabul davomida nafaqat mavjud muammolar, balki kelajak rivojiga qaratilgan taklif va tashabbuslar ham ilgari surildi. Xususan, tadbirkorlikni rivojlantirish, imtiyozli kreditlardan samarali foydalanish, yangi ish o‘rinlari yaratish masalalari atroflicha ko‘rib chiqildi.

Ayniqsa, “Yashil makon” dasturi doirasida hududda yangi bog‘lar barpo etish, yashil hududlarni kengaytirish bo‘yicha fuqarolar tomonidan bildirilgan takliflar alohida e’tibor bilan tinglandi. Bu borada mas’ullarga aniq topshiriqlar berilib, istiqbolli loyihalarni amalga oshirish yuzasidan kelishuvlarga erishildi.

🧡@nur_press

Sohibqiron Amir Temur tavalludining 690 yilligi: Nurobodda faxr va g‘ururga boy yurish marafoni

Nurobod tumanida buyuk sarkarda, davlat arbobi va milliy g‘urur timsoli bo‘lgan Amir Temur tavalludining 690 yilligi munosabati bilan keng ko‘lamli ma’naviy-ma’rifiy tadbirlar doirasida yurish marafoni tashkil etildi. Mazkur tadbir nafaqat sport bayrami, balki tarixiy xotirani e’zozlash, yosh avlod qalbida vatanparvarlik tuyg‘ularini mustahkamlashga qaratilgan muhim tashabbus bo‘ldi.

Marafonda tuman hokimligi, huquqni muhofaza qiluvchi organlar, tashkilot va muassasalar xodimlari, yoshlar, nuroniylar hamda keng jamoatchilik vakillari faol ishtirok etdi. Ishtirokchilar qo‘llarida bayroqlar, shiorlar va buyuk bobokalonimiz siymosi aks etgan ramzlar bilan yurish qilib, yurtimiz tarixiga hurmat va sadoqatini namoyon etdilar.

Tadbir tantanali ruhda boshlandi. Unda so‘zga chiqqanlar Amir Temur ning buyuk davlat barpo etishdagi jasorati, adolatli boshqaruv tamoyillari va ilm-fan, bunyodkorlikka bergan e’tiborini alohida ta’kidladilar. Uning “Kuch – adolatda” degan shiori bugungi kunda ham o‘z ahamiyatini yo‘qotmaganligi qayd etildi.

Marafon davomida ishtirokchilar belgilangan yo‘nalish bo‘ylab birgalikda harakatlanib, sog‘lom turmush tarzini targ‘ib qilish bilan birga, milliy birlik va hamjihatlik ruhini yanada mustahkamlashdi. Yoshlarning faol ishtiroki esa tadbirga o‘zgacha ruh bag‘ishlab, kelajak avlodning tarixiy merosga bo‘lgan hurmatini yaqqol namoyon etdi.

Shuningdek, tadbir doirasida ma’naviy targ‘ibot ishlari olib borilib, Sohibqironning boy merosi, davlat boshqaruvi tajribasi va yurt ravnaqiga qo‘shgan ulkan hissasi haqida keng tushunchalar berildi.

Mazkur yurish marafoni Nurobod tumanida nafaqat bayramona kayfiyat yaratdi, balki aholi o‘rtasida sog‘lom turmush tarzini ommalashtirish, milliy qadriyatlarga hurmatni oshirish va tarixiy xotirani asrab-avaylash yo‘lida muhim qadam bo‘ldi.

🧡@nur_press