𝐍𝐢𝐠𝐡𝐭𝐢𝐧𝐠𝐚𝐥𝐞 𝐂𝐡𝐚𝐧𝐧𝐞𝐥

ချင်းပြည်သစ်ကွန်ဂရက်ပါတီကို စစ်ကောင်စီက ပါတီတည်ထောင်ခွင့်ပြု

မေလ ၂၈ ရက်

စစ်ကောင်စီရဲ့ ရွေးကောက်ပွဲကော်မရှင်က ချင်းပြည်သစ်ကွန်ဂရက်ပါတီကို နိုင်ငံရေးပါတီ တည်ထောင်ခွင့်ပြုလိုက်တယ်လို့ ပြည်ထောင်စုရွေးကောက်ပွဲကော်မရှင်က ထုတ်ပြန်ပါတယ်။

ချင်းပြည်သစ်ကွန်ဂရက်ပါတီဟာ ခွင့်ပြုချက် ရရှိသည့်နေက စပြီး ရက်ပေါင်း ၃၀ အတွင်း နိုင်ငံရေးပါတီ မှတ်ပုံတင်ခြင်း နည်းဥပဒေ ၇ နဲ့အညီ ကော်မရှင်ကို နိုင်ငံရေးပါတီအဖြစ် မှတ်ပုံတင်ပေးဖို့ လျှောက်ထားရမှာ ဖြစ်ပါတယ်။

ချင်းပြည်သစ်ကွန်ဂရက်ပါတီကို နိုင်ငံရေးပါတီများ မှတ်ပုံတင်ခြင်း ဥပဒေ၊ နည်းဥပဒေနဲ့အညီ ညီညွတ်ကြောင်း စိစစ်တွေ့ရှိရလို့ မေလ ၂၆ ရက်မှာ ပါတီ တည်ထောင်ခွင့် လျှောက်ထားခြင်းကို ခွင့်ပြုလိုက်တာလို့ ဆိုပါတယ်။

ချင်းပြည်သစ်ကွန်ဂရက်ပါတီ တည်ထောင်ခွင့်ကို မတ်လ ၆ ရက်က စစ်ကောင်စီရဲ့ ရွေးကောက်ပွဲကော်မရှင်ထံ လျှောက်ထားခဲ့တာပါ။

လာမယ့် ရွေးကောက်ပွဲမှာ ပါ၀င်ဖို့ ဇိုမီးအမျိုးသားပါတီ၊ ခူမီးအမျိုးသားပါတီတို့လည်း ပါတီတည်ထောင်ခွင့် လျှောက်ထားပြီး ခူမီးအမျိုးသားပါတီကတော့ ပါတီတည်ထောင်ခွင့်ရရှိပါပြီ။

စစ်ကောင်စီတပ်က ၂၀၂၅ ခုနှစ် ဒီဇင်ဘာလမှာရွေးကောက်ပွဲကို ကျင်းပသွားမယ်လို့ ကြေညာထားပါတယ်။
လက်ရှိမှာ ပါတီ တည်ထောင်ခွင့် ပြုထားတဲ့ နိုင်ငံရေးပါတီ ၁၆ ခု ရှိပြီး ပါတီ တည်ထောင်ခွင့်လျှောက်ထားသူ ၂၇ ခု ရှိနေတယ်လို့ သိရပါတယ်။

#ZL

596 views06:08