O‘zbekiston Milliy kutubxonasining “O‘zbekiston” zalida Shoir Miraziz A‘zam tavalludining 90 yilligi munosabati bilan “Yashagim keladi O‘zbekistonda” deb nomlangan kitob-rasmli ko‘rgazma qo‘yildi

Ko‘rgazmada shoirning ijodi haqida hikoya qiluvchi kitoblar,kattalar va bolalar uchun yozilgan she'rlari, tarjimalari va publisistik asarlari namunalari joy olgan.

Toshkent Davlat universitetini tugatgach, Miraziz A'zam Toshkent telestudiyasida, “G‘uncha” bolalar jurnalida, so‘ngra nashriyotlarda muharrir bo‘lib ishlagan. Ko‘p yillar O‘zbekiston Yozuvchilar uyushmasida maslahatchi, boshqaruv kotibi vazifasini bajargan.

Miraziz A'zamning ijodiy faoliyati talabalik yillarida boshlangan. Uning birinchi she'ri 1960-yilda, “Metallurg” deb nomlangan birinchi she'riy to‘plami esa 1964-yilda chop etilgan.

Keyinchalik bolalar uchun “Aqlli bolalar”, “Senga nima bo‘ldi”, “Bir cho‘ntak yong‘oq” kabi qator she'riy to‘plamlari bosilib chiqdi. Shoir o‘z she'rlari orqali bolalar qalbini, tuyg‘ularini tasvirlashga, olamni, odamni bilishga, yaxshilik bilan yomonlikni farqlashga, halol va pokiza mehnatni ulug‘lashga intilib keldi. Miraziz A'zamning “Sevaman”, “Tuyg‘ular”, “Sabot” kabi to‘plamlaridagi ko‘pchilik she'rlar o‘zining hayotiyligi va jozibaliligi bilan o‘quvchi qalbini zabt etgan.

U haroratli, shijoatli publisist hamdir. Uning madaniy-adabiy merosni ko‘z qorachig‘idek asrashga da'vat etuvchi bir qator maqolalari mavjud. Uning turk, rus, nemis adiblaridan qilgan, ayniqsa, islom madaniyatiga oid tarjimalari kitobxonlar tomonidan sevib o‘qiladi.

Ko‘rgazmadan shoirning turli yillarda nashr etilgan “Imon asoslari”, “Bir cho‘ntak yong‘oq”, “Buyuklar muhabbati”, “Er aylanadi”, “Erga dovrug‘ solamiz”, “Sabot”, “Senga nima bo‘ldi?”, “Tuyg‘ular”, “Haqiqatning ko‘zlari”, “Mahalla qahvaxonasi”, “Hozirgi zamon turk she'riyati” kitoblari o‘rin olgan.

📱Rasmiy sahifalarimizga obuna bo‘ling!
Telegram l Instagram l YouTube l Facebook l Twitter l Website

2026-yil 27-mart kuni O‘zbekiston Milliy kutubxonasida O‘zbekiston Qahramoni, O‘zbekiston xalq shoiri Abdulla Oripov xotirasiga bag‘ishlangan “El ardog‘idagi shoir” nomli xotira kechasi bo‘lib o‘tdi.

Tadbirda taniqli adiblar, san’atkorlar, adabiyotshunos va tarixshunos olimlar, Toshkent irrigatsiya va qishloq xo‘jaligini mexanizatsiyalash muhandislari instituti professor-o‘qituvchilari va talabalari hamda kutubxona foydalanuvchilari ishtirok etdilar.

Xotira kechasi avvalida Abdulla Oripovning hayoti va ijodiga bag‘ishlangan, unda zamondoshlarining fikrlari va shoir ijodidan namunalar jamlangan hujjatli film namoyish etildi.

Tadbirni ochib berar ekan, kutubxona direktori Umida Teshabaeva Abdulla Oripov fenomeni, uning ibratli hayoti, sermahsul ijodi va kitobxonlar qalbidan chuqur o‘rin olgan asarlari haqida alohida to‘xtalib o‘tdi. U o‘z so‘zida shunday dedi:
“Uning asarlarida hayot va odamlar, jamiyat va tabiat haqidagi badiiy talqin uyg‘unlashgan bo‘lib, bu shoirning yuksak kamolotidan dalolat beradi. Abdulla Oripov qaysi mavzuda qalam tebratmasin — lirik qahramon yaratadimi, Vatan haqida kuylaydimi yoki inson va olam haqida fikr yuritadimi — har doim hayot haqiqatiga sodiq qoladi.”

So‘zga chiqqanlar Abdulla Oripovning noyob iste’dod sohibi ekanini, uning she’riyati chuqur falsafiylik, milliy g‘urur, isyonkor ruh hamda diniy-axloqiy teranlik bilan sug‘orilganini alohida ta’kidladilar. Shuningdek, shoir ijodi o‘zbek xalqining milliy uyg‘onish jarayonida muhim o‘rin tutgani qayd etildi. Tadbir davomida ishtirokchilar shoirning she’rlaridan namunalar o‘qib, ularning mazmun-mohiyatini talqin etdilar.

Mazkur xotira kechasida shoirning qizi Shoira Oripova ham ishtirok etib, otasining bolalik va ijodiy hayotiga oid iliq xotiralari bilan o‘rtoqlashdi hamda kutubxona direktori Umida Teshabaevaga Abdulla Oripov nomidagi ko‘krak nishonini topshirdi. Tadbirga taniqli san’atkor Munojat Yo‘lchiyevaning tashrifi esa kechaga o‘zgacha ruh bag‘ishladi.

📱Rasmiy sahifalarimizga obuna bo‘ling!
Telegram l Instagram l YouTube l Facebook l Twitter l Website