✅ 2026-yil 15-mart kuni O‘zbekiston Milliy kutubxonasi “Ijod” zalida O‘zbekiston xalq artisti, qo‘shiqchi va raqqosa, baletmeyster, o‘zbek professional raqsi asoschilaridan biri Tamaraxonimning 120 yilligiga bag‘ishlangan “Sharqning ilk qaldirgʻochi” deb nomlangan kitob-rasmli ko‘rgazma ochildi. Ko‘rgazmada mashhur balerina va raqqosaning hayoti haqida hikoya qiluvchi va uning ijodining lahzalari muhrlangan fotosuratlar, kitoblar va jurnallar o‘rin olgan.

📚 O‘zbek xonandasi, raqqosasi va baletmeysteri Tamaraxonim (Tamara Artemovna Petrosyan) 1906-yilda Farg‘ona viloyatida tug‘ilgan. Yoshligidan san'atga qiziqqan Tamaraxonim ko‘cha artistlari, masxarabozlar, ko‘zboylog‘ichlardan o‘zbek xalq raqs sirlarini va qo‘shiqlarini o‘rganib, uyda ularni takrorlar edi.

📚 U 1922-yilda Toshkent balet truppasiga kirib A.Hidoyatov, Ye.Bobojonov, A.Ibragimovlar rahbarlik qilgan professional konsert guruhlari bilan chiqishlarda ishtirok etar edi. 1923-yilda Lunacharskiy nomidagi Moskva teatr texnikumida o‘qib, u yerda u “Sharq qaldirg‘ochi” deb nom qozondi. 1930-yilda baletmeyster sifatida o‘z faoliyatini boshlab, 1932-yilda rejissyor Z.Qobulov va kompozitor P.Rahimovlar bilan hamkorlikda Urgench teatriga asos solgan. U yerda Tamaraxonim ham baletmeyster, ham raqqosa, ham pedagog-repetitor sifatida faoliyat ko‘rsatgan. Tamaraxonim tashabbusi bilan Toshkentda klassik balet maktabi ham tashkil etildi.

📚 Kitob-rasmli ko‘rgazmada Tamaraxonimning raqqosalik faoliyati, ta'qiqlarga qaramay odamlar ko‘ngliga zavq bag‘ishlash maqsadidagi sayi harakatlari haqida hikoya qiluvchi “Sahnamiz lochinlari”, “O‘zbekiston san'ati”, “O‘zbek milliy raqsi tarixidan”, “Tamaraxonim”, “O‘zbekiston madaniyati namoyandalari”, “Sahna jilolari”, “O‘zbek raqslari” kitoblari o‘rin olgan.
O‘zbekiston xalq artisti, qo‘shiqchi va raqqosa, baletmeyster, o‘zbek professional raqsi asoschilaridan biri Tamaraxonimning 120 yilligiga bag‘ishlangan “Sharqning ilk qaldirgʻochi” deb nomlangan kitob-rasmli ko‘rgazmaga tashrif buyurganlar uning o‘z ichida ikki janr- qo‘shiqchilik va raqqosalik janrlarini mujassamlashtirgan sahna san'ati haqida ko‘p qiziqarli ma'lumotlarni bilib oldilar.

📱Rasmiy sahifalarimizga obuna bo‘ling!
Telegram l Instagram l YouTube l Facebook l Twitter l Website

2026-yil 17-mart kuni O'zbekiston Milliy kutubxonasida “Navro‘zing muborak, O‘zbekistonim” shiori ostida “Kitobxon onalar” mavzusida ma’naviy-ma’rifiy davra suhbati bo‘lib o‘tdi.

Tadbirni kutubxonaning ma’naviy-ma’rifiy ishlar bo‘yicha targ‘ibotchisi Gulchehra Shahobiddin qizi olib berdi. U yig‘ilganlarni bahor, yangilanish va yasharish ayyomi — Navro‘z bayrami bilan samimiy qutlab, oila ma’naviy kamolotida ayollarning o‘rni beqiyos ekanini alohida ta’kidladi. Ayniqsa, ayollarning kitobxonlikka bo‘lgan mehr-muhabbati farzand tarbiyasi va jamiyat ma’naviyati yuksalishida muhim omil ekani e’tirof etildi.

Davra suhbatida so‘zga chiqqan ishtirokchilar yurtimiz bo‘ylab kezib yurgan Navro‘z nafasi, u bilan kirib kelgan bahoriy kayfiyat, dasturxonlarni bezayotgan milliy taomlar, doshqozonlarda qaynayotgan sumalakning o‘ziga xos tarovati haqida iliq va samimiy fikrlar bildirdilar. Ular Navro‘zning xalqimiz hayotidagi o‘rni, uning obodlik, tinchlik-totuvlik, millatlararo ahillik va bag‘rikenglik timsoli ekanini alohida urg‘uladilar.

Shuningdek, tadbir davomida bahor va Navro‘zga bag‘ishlangan she’rlar o‘qildi, Vatan, tabiat uyg‘onishi va inson qalbidagi ezgulikni tarannum etuvchi o‘lanlar, laparlar hamda yor-yorlar ijro etildi. Bu chiqishlar yig‘ilganlarga bayramona ruh bag‘ishlab, milliy qadriyatlarimizning boyligini yana bir bor namoyon etdi.

Mazkur tadbirda

Qoraqalpog‘iston Respublikasi

, viloyatlar hamda

Toshkent

shahar va tuman (shahar) axborot-kutubxona markazlari vakillari Zoom platformasi orqali masofadan turib faol ishtirok etdilar. Bu esa tadbirning qamrovini yanada kengaytirib, mamlakatimizning turli hududlarida kitobxonlikni targ‘ib etish borasidagi hamkorlikni mustahkamlashga xizmat qildi.

📱Rasmiy sahifalarimizga obuna bo‘ling!
Telegram l Instagram l YouTube l Facebook l Twitter l Website