Мінск. На Арлоўскай пратэстоўцы пагналі сілавікоў, перадае карэспандэнт @nashaniva. Гучаць моцныя выбухі, падобна, што гэта святлошумавыя гранаты. Чытачы паведамляюць як мінімум пра 4 выбухі.

Мінск. Як мінімум адзін чалавек пацярпеў ад выбуху святлошумавой гранаты. Ашкепкамі яму пашкодзіла галёнку, перадае карэспандэнт @nashaniva Неабыякавыя людзі дапамаглі пацярпеламу выйсці з небяспечнай зоны.

Мінск. Чытачы даслалі відэа, на якім бачныя ўспышкі святла на Арлоўскай. Хутчэй за ўсё ад святлошумавых гранат. Калі вы таксама знялі, што там адбывалася, дашліце, калі ласка, у наш чат-бот @NashaNivaBot

‼️ У дварах на Арлоўскай сілавікі ўжылі святлошумавыя гранаты супраць дэманстрантаў. Відэа: TUT.by

У пад’ездзе на Арлоўскай ад выбухаў святлошумавых гранат павылятала шкло. Фота: TUT.by

Як пачаўся разгон. Хвост калоны на Арлоўскай падпіралі сілавікі на бусах. Людзі іх пагналі, тыя мусілі здаць назад. Але на скрыжаванні Арлоўскай і Нававіленскай яны перагрупіраваліся і калі дэманстранты да іх наблізіліся, у іх бок паляцелі святлошумавыя гранаты. Тады людзі кінуліся па дварах, а сілавікі пачалі зачыстку, перадае карэспандэнт @nashaniva

Зміцер Дашкевіч затрыманы. Пра гэта паведаміла яго жонка Наста ў фэйсбуку.

Лукашэнкаўцы са шчытамі заблакавалі мост цераз Свіслач на Машэрава ў раёне стэлы. Там жа сканцэнтраваная вялікая колькасць вайсковага транспарту. Відэа чытача @nashaniva

Яшчэ адно шакуючае відэа разгону дэманстрантаў у Мінску. Людзям услед кідаюць святлошумавыя гранаты. Гукі стрэлаў і выбухаў не сціхаюць.

"Новая газета" апублікавала здымак параненага гумовай куляй у Мінску.

У каментары РІА Навіны прымяненне святлошумавых гранат мінская міліцыя патлумачыла тым, што пратэстоўцы «спрабавалі нападаць на сілавікоў».

Паглядзіце відэа @belsat. На ім не заўважныя спробы нападу.

Чытач @nashaniva даслаў відэа затрыманняў на Старавіленскім тракце на рагу з Асіпенкі. Затрымлівалі людзей, якія разбягаліся пасля абстрэлу святлошумавымі гранатамі на Арлоўскай.

Святлошумавыя гранаты на Арлоўскай выкарысталі літаральна за сотню метраў ад РНПЦ "Маці і дзіця", дзе ляжаць цяжарныя і нованароджаныя.

На гэтым відэа чытачкі @nashaniva можна пералічыць, колькі было выбухаў.

Бачна, што снарады ўзрываліся проста ў гушчы мінчукоў.

У Брэсце сёння затрымалі каля 40 чалавек, піша "Брэсцкая газета".

Вайсковы шпіталь, гараць вокны аперацыйных. Фота: @belxalat

На Арлоўскую пасля выбухаў выязджалі каля 10 машын "хуткай".

Агульная колькасць пацярпелых пакуль невядомая.

UPD. @belxalat удакладніў, што параненыя дастаўленыя толькі ў вайсковы шпіталь, у БХМД і 6-ы шпіталь не дастаўлялі.

Насупраць 23 гімназіі на праспекце Незалежнасці вайсковы грузавік сутыкнуўся з бронемашынай. Відэа: @belteanews

Жабінка (Брэсцкая вобласць) сёння адправіла прамяні цяпла мінскім пратэстоўцам. Відэа: @binklbinkl

У спісах "Вясны" — ужо больш за 210 прозвішчаў затрыманых падчас сённяшніх акцый.

Выніковая лічба, вядома, узрасце ў разы, бо больш за 120 чалавек затрымалі толькі ў Гродне і Брэсце, 20 чалавек затрымалі ў Барысаве.