Празькі кріміналіштове установили мотивы пудпалячув штації метра Старомнєстська. Ушиткі 125-еро тото пудписникы русинського канала ужанська ідея. Хотіли, обы адмін канала занимав ся дачим трібным (писати посты) місто усякых дурниць (ходити на пары). Нагадуєме, ож у чеськых університетах теперькы канікулы.

Образчик: адміністратор канала ужанська ідея

Накурто за надовго

Ізраїль:

• Ізраїль упалив по гутниках (они же гусіты, т.є. послідователі Яна Гуса) у Камняницькуй, Полянськуй и Родниковуй Гуті. Нагадаєме, ож Ізраїль уже пувтретя рокы бомбит Хомці Ужгородського района, хотячи забити лідера ХОМАС-а Фийсала Ал-маші.

• У неділю ізраїльська армія уповіла, ож зажене повісткы 54 000 ізраїльськым ортодоксам.

• У понеділок ізраїльські пограничникы имили 5 ортодоксув на переплываню рікы Йордан.

• Позавчора ся премєр Ізраїля Беньямін Нетаньягу стрітит из ґубернатором Закарпатської области Білицькым у Білум домі.

Накурто за надовго

Бігом (кроком) патрулованя сквера за Білым домом в Ужгороді робутникы Унґварського вариського вудділа поліції найшли тіло незнамого чоловіка. Кой ся мало приникали, та упознали Беньяміна Нетаньягу, нагощеного закарпатськым ґубернатором Білицькым.

Накурто за надовго

Слобода медій межи руснаками: на юлій 2025. року 99% русинськых медій на Пудкарпатю контролує середковый великаш (медіамаґнат) Бирув. — інформуют тя, дорогый читателю, Сполоченськоє Вісти (Суспільне Новини). Нагадаєме, ож Надовго — перша независима вістьова нора Пудкарпатя и світа.

Акції „Отцюзнины“ ($OCZN) ся вбалили на 80% по тому, як Русинськый културолоґічный клуб вуголосив свої планы додати до журнала прилогу-таблоїд „Хыжоґаздынька“ — ревут у Ревтерс.

Президент Карпатськых Русинув Боб Маґочій погрозив притяти десяткы субсидійных доларув (канадськых), котрі ся змітуют на рахунок журнала в Patreon-і.

Журнал Отцюзнина вже довго жиє в кризі: числа му стали выходити лем чотыри раз на рук. Новый таблоїд „Хыжоґаздынька“ буде мати сякі рубрикы: Сокацтво, Сохташ, Історія нашої землі, Практика язычництва, Прикладна механіка.

У інтервю самому собі в передачі Голосы русинув Пудкарпатя Юрій Шипович прокоментовав ситуацію сяк: „Треба нам жоны, розумієте? Пак тото журнал ци манастырь? Не мож фурт писати лем за аніме“.

Образчик: Пост професора Маґочія в русинськуй соціалнуй сіти „Трумбт Совшал“.

Накурто за надовго

Ексклузивноє інтервю: нові технолоґії на помочи Світовому конґресови

По Світовому конґресови русинув, што ся удбыв сього юнія в Букурешті, членська орґанізація за Украйину — Крайовоє общество подкарпатськых русинов (КОПР) — дала знати, ож для єї головы Миколы Бобинця тот конґрес годен стати послідньым. Бобинець, 61-ручный голова Крайового общества, делеґат Світового конґреса уд 2009. року, булше не планує лишати Закарпатську область позад проблем из здоровльом.

За куртый час ся думало, ож главным кандидатом на заміну Бобинця буде жона му Марія. Конець шпекулаціям поклало нечеканоє проголошіня КОПР-а на зачатку юлія. Орґанізація представила довгоручный проєкт пуд назвов BobiBot — велику языкову модель (LLM), основов котруй послужив сам Микола Бобинець. Ціль BobiBot-а — замінити Бобинця на місті представителя Украйины в Світовому конґресі з мінімалными стратами.

У КОПР-і віруют в успіх проєкта. На просьбу прокоментовати анонс представителі КОПР-а дали нашуй редакції ексклузивный доступ до BobiBot-а. Ушыткі удповіди в інтервю, котроє увидите дале, дав правленый розум (анґл. artificial intelligence).

— Многі ся зачудовали з анонса BobiBot-а. Крайовоє общество дотеперь ся не занимало технолоґічными проєктами.
— Слабо за намы слідите. Уже давно робиме над высокими технологіями. Попозерайте хоть на facabuk.com, на нашу Русинську Студїю “Руснак”. Чатботи уто тоже не ядерна фізика. Уже давно є і русинський чатбот Markinim. Наш чатбот не мусить быти такий розумный ги він, так што нич недостижимого для нас туй не было.

— Як проходило тренованя языкової моделі?
— Довго розказовати, ай бо всьо ся брало з ФБ.

— Які щи функції має BobiBot? Ци годен написати імейл авадь зґенеровати образчик?
— А ты годен написати симфонію? Кось критикує, а караван иде дале.

— Як Світова рада удреаґовала на кандидатуру BobiBot-а?
— Мусай много міняти, бо по уставу лиш делегат із Сівернōї Амерыки має право роковати онліне. Ай бо главнōє што наша організація має право назначити свого делегата, а там уже най думавуть.

— Яков буде ефективность языкової моделі на засіданях Світової рады?
— Наша модель знає співати “Многая літ”, аудіо сьме уже записали. Гірше точно ни буде.

— Яка задача BobiBot-а у конґресі?
— Вести Русинув Подкарпатя до узнаня в Україні щи й слідувучі 16 рокув.

Зазначка редакції: На сьому інтервю мусай было кунчати, бо дуйшли нам Bobi-токены.

Жерело: Інтерфийса

ЛҐБТ-орґанізація выступила за вітряникы на полонині Рунуй

Орґанізація «Світовый конґрес ЛҐБТ Закарпатя» публічно пуддержала проєкт побудовы вітрокерта на полонині Рунуй — заявив президент орґанізації Віталій Горячый у оповістці на Facebook:

❗️ Послідньый час соцсітками ся шырит непровірена вість за так званоє ЛҐБТ-віче на полонині Руна. Ціль дезінформації — помістити протест екоактивістув против вітряникув у Карпатах у єден контекст из рухом ЛҐБТ. Як президент Світового конґреса ЛҐБТ Закарпатя хочу заперечити сесі дешеві маніпулації.

⚡️ Закарпатцюм треба знати правду — фейкові ЛҐБТ-орґанізації из намальоваными штучным інтелектом людьми стоят и на другому боці спора. Мы любиме ай єднополовый секс, ай вітряникы! Бо што годно быти май файноє, гикой новый высокый вітряник на зеленуй горі? Долиш мнятка чоловіча гузиця.

☀️ Як реакцію на выше названі провокації ладиме свуй ЛҐБТ-сойм на полонині, де пуддержиме вітряникы и выбереме нового гейтьмана. Уже сьме ся дочекали й нову модель ЧатаҐПТ, котра нам поможе май ефективно пужати бабкы на фейкбукови. Наші експерты поличили, ож кажда бабка, котра ся хрестит, читаючи наші бріхні, ґенерує доста кінетичної енерґії, обы ся сама спасла уд лепавої литрикы.

🙋‍♂️ У слідуючых оповістках вам розкажеме за тото, што за вітряникы говорят Сполок наркоманув Ужгородського района и другі членські орґанізації нашого ботоґаздувства.

Образчик Віталія Горячого, Facebook

На посліднюй конференції Дональда Трампа быв и наш кореспондент Віталій Глагола, котрому ся трафило позвідати америцького президента за вітрякы на полонині Рунуй. Як видко из Трампової удповіди, тота ситуація болит не лем нас. Позерайте дале:

Приростать свада за померзлі російські активы у Європі

Хоче ся зорвати план кельтованя російськых гроши, померзлых у банках ЄС, пишуть «Фінанси Міжгір’я». Бізуні жерела у Брӱсселови передавуть, што причина у тому, як нагле й читаво утыли украйинські выдаткы на кіберсокочіня.

Уд зачатку місяця кельтункы Службы Сокочіня Украйины на інтернеті уросли у́пятеро. Наша редакція ся зазвідала уд фахмана на кіберсокочіня Артура Кібиря, ож зашто. Артур уповів, ож фест подорожало слідованя за русинськыми сепаратіштами: «Позад фурташньої дорогутні русинські сепаратішты позадирали ціны на свої Патреоны. Тото дуже великоє беремено на державну тапловку, бо на сепаратізмус у области хоч-нехоч, а мусай гадковати. Мінявуть ся й поколіня. Старшина сепаратіштох готова была робити за натурпродукт вадь за файну печатку, а малі сепаратіштята уже хотять лем кеш мані».

Сякі фінансові тенденції пужавуть и нервозять Європу. У Брӱселльови ся боять, ож ретязьові реакції уд русинської патреонової інфляції годні убалити економіку цілого світа, авадь як мінімум Словакії. Твердоє «нем» удопираню російськых конт уповів мадярськый премєр Віктор Орбан: «Ба нашто бым давав гроші Зеленському, обы йих назад кельтовав на мойих аґентув? Я ся учив на кондаша, а не економіста, айбо туй усьо ясно».

Докі ситуація ся лишать нерішена, украйинські безпекаші ся май активно ладять на онлайн-зїзд Ивана Данацка и другі задарьні акції.

⚡️ГРОМОВИЦЯ! Пудкарпатя стане частьов мирного ушореня з РФ

Неназвані жерела неназваної державы дали знати, ож америцька делеґація дописала додатковый пункт у проєкт мирного плана межи Украйинов и РФ — намісто Купянська Украйна буде мусіти передати США Закарпатську область на вічноє хоснованя. Украйинська делеґація дустала новый чорновый документ на закрытуй стрічи в ужгородському ресторані «Рубін» уд америцького штатського совітника Марка Рубія.

Нагадаєме, ож президент США Дональд Трамп ся вже не раз інтересовав Закарпатськов областьов. У послідні місяці америцька дипломатія ся дуже змагат прикупити усякі території — Ґренландію (часть Данії), Венесуелу вадь Сіверный полус. «Увага ся переключила на Ужгород. Данія годна мало спочити» — уповів анонімный європейськый урядник.

Попросили сьме коментарь уд Андрія Єрмака, бывшого фивника президентської канцаларні Украйины (Буданов не брав трубку). «Украйина ся не продає! Но тай Закарпаття, думаю, тоже» — уповів Єрмак. Представитель Украйины в Світовуй раді русинув Микула Бобинець штось хотів казати за межинародноє право тай територіалну некываность, айбо дуже нам го было слабо чути по телефону позад цорканя погарув тай бахканя салютув.

Гадкуйте на сесю історію дале из «Надовгом»! Майфрішну інформацію найдете лем туй.

#TrumpsCarpathia

Трамп за прикапчаня Пудкарпатя: главноє

Учора ся стало знати за американські планы забрати собі Пудкарпатя при скончіню російської войны в Украйині. Сеся ся інформація пудтвердила вже сночи, кой Дональд Трумп дав прес-конференцію у Білуй хыжи на тему вонкашньої політикы. Долу подаєме главноє з того, што америцькый президент уповів за Пудкарпатя, удказуючи на вопросы новинкарюв CNN, Fox News и Суспільного Ужгород.

Трамп за хосен США у прикапчаню

Америці мусай мати Ужгородську область. Сеся територія ключова для національної безпекы усьых Скапчаных Штатох. Зеленськый ми мусит полівити. Заспаный Байден му дав тулькі адьовы задарь, для Америкы тото дуже пудла токма. Мы столітями субсидовали Європу, теперь час Украйині розплачовати ся за довгы! Аж США такой не забере своє, туды нараз прийдут Китай и Росія. Звонив ми Вікі Орбан, казав, ож китайці уже плывут горі Тисов.

За переговоры из Украйинов

Уже сьме говорили из Зеленськым по скайпови. Страшно ся хотів токмити — казав нам, ож поділит ся литриков из Теребле-Ріцької ГЕС. Обіцяв уддати усьый чорнозем у области америцькым фермерум. Педиґ, кажу му, Володю, мы не дурні інвестовати в Украйину! Ліпше своє, ги зыченоє. Зеленському ся вже доста удпирати, ги некынутуй дівці, волів бы порядно ґаздовати на тому, што му лишу.

За територіальну цілость Украйины

Ба ци віділи сьте, яка Украйина велика? Шкода їм ся по-братськы поділити? Межи тым, мы в Ужгороді были перші! Вудров Вілсон, великый президент-републиканець (В. Вілсон быв демократом — зазн. ред.), поклав там америцького ґубернатора Задковича (Ґриґорія Жатковича — зазн. ред.). Вілсон хотів, обы тото быв пятдесят першый штат (не хотів — зазн. ред.) — так бы ся й стало, кобы не демократы тай антіфа! СССР украв нашу територію, надурив Прагу. А я ї удурю назад уд Кийова. Побавили ся й доста! Няньо ся вертат дому.

Выслідкы прес-конференції

Політичні коментаторы коментуют, ож Трамп не задарь пиловав поговорити на тему Пудкарпатя. Сяк указав, ож не готовый удступити уд свого очередного захватницького плана. Кроме того, США посилит тиск на Украйину методом корбача и колача. Трамп повбіцяв каждому дітвакови в Пудкарпатю по «Снікерсови», а Кийову повбіцяв 50%-ові тарифы на кетчуп «Торчин» и ощу «Артек».

#TrumpsCarpathia

Шипович потовмачив Трампову книжку

Русинськый активішта и товмач Юрко Шипович переклав книгу «Умільство токмы» (анґл. The Art of the Deal) — мемуары америцького президента Дональда Дж. Трампа — за йсе Шипович написав на фейсбукови.

«Сперед Руздвом ми кось написав, ож хоче выдати по-русинськы єдну дуже важну книжку» — читаєме у Шиповича. Нова книжка стане у єден шор из другыми Шиповичовыми товмачінями — зборником поезії «Луйтра в небо», кримінальным романом «Я — злодій у законі», бестселером «Спознаваня з ісламом» и маніфестом «Моя борьба» (нім. Mein Kampf).

«Мою любиму історію з книжкы скоро увидите в новому Алманахови днешньої русинської літературы. Там прочитаєте, як Трамп раз быв утокмив хоснованый «Жигуль» за сто рублюв и фляшку «Пепсі-колы» — написав Шипович.

#TrumpsCarpathia

У файлах Епштейна найшли письмо уд Микулы Бобинця

У новых опублікованых папірьох америцького педофіла Джеффрія Епштейна найшло ся письмо уд члена Світової рады русинув, головы «Крайового общества подкарпатськых русынув» Микулы Бобинця.

Як видко из перепискы, у 2013. році Епштейн не узяв Бобинця и жону му Марію на свуй приватный остров Літл Сент Джеймс (Малый Сятый Джеймс) у Карибському морю. Сексовый злодій написав Бобинцьови, ож поїздку мусай удмінити, бо на острові ся показило караоке, на котрому хотіли співати «Білі хорваты».

Бобинець на то нарікав педофілови-міліардошови, ож його отпуск из жонов быв зорватый. Кроме того Бобинець припоминав, ож сам быв возив педофіла у Сербію.

Епштейновы файлы указали, ож многі богачі и фивники світа цімборовали ся из злославным педофілом и всяко собі помагали навзаєм. Мож думати, ож Епштейн хотів схосновати контакт из Бобинцьом для вплыва на Світову раду русинув, айбо што го конкретно інтересовало в русинстві, раз неясно.

Дале даєме слово Микулі Бобинцьови, котрый пристав на нашу просьбу дати куртый коментарь:

— У недавньому інтервю на каналови «Знай Свій Край» казали сьте, ож не знаєте Епштейна и ниґда сьте не были на його острові.
— Айно. Публікація повностю доказала мої слова. Я, моя жона и мої діти ниґда не были на острові Епштейна. А пусля того, як вун ня пудставив, я все казав, же булше го не знав, не знаю и знати не буду.
— Што вповісте тым, ко критикує вашоє бывшоє цімборство из Епштейном?
— Тоті брихачі не розумівуть, ож тим лем увеличувуть муй авторитет.
— Ци знали сьте за Епштейновы злочины и секс-торговлю на його острові?
— Не знаву. Я помагав дітьом поступити у Пряшівськый иншітут русиньского языка и културы. Шкода, же дакотрі молоді дівчата попали под маніпуляції авантюріста.

Жерело: Інтерфийса

Сійяртов и Лавров нич не вповіли за русинув

Учера польсько-мадярсько-свалявська розслідовацька команда золляла в інтернет свіжоперехоплену телефонну бісіду межи мадярськым вонкашньым міністром Пийтером Сійяртовом и його російськым колеґом Серґейом Лавровом. Дває міністры собі были заприказовали за перспективу Украйины вчленити ся в Евроунію, а май конкретно – за требованя у вопросі прав національных меншин:

С. Лавров: (из російськым акцентом) Но што там Украйина тай Евроунія? Казали сьте там штось за права меншин?
П. Сійяртов: (из мадярськым акцентом) Сяк-сяк. Мы там застаєме нашых мадярикув. Айбо так ти уповім по правді, братку, ож дискримінація протув єдного вто дискримінація протув ушиткых!
С. Лавров: (онь ся задумав) Айно… Мы туйкы усі гуманісты… Но добрі, цюлюй там за мене Віктора нашого Дьивзивича.
П. Сійяртов: Поцюлюю. А ты передавай наші цьопкы Володьови… долиш не Зеленському!
С. Лавров: Хахаха. Не буду цюльовати того колячого, ай нашого побрыченого…
(Дале йсю бісіду мож слухати на сайті-першожерелі VSquare.)

Сеся дипломатична сенсація шоковала ужгородську публіку: ба як ото годно быти, ож такі великі цімборове нич не уповіли за главный будинсько-московськый ворошньый проєкт: політичне русинство на Закарпатті? Зазвідали сьме ся майвысокочестованых фахманув в ділі політичного русинства, членув «Спілки т. зв. «Русино»знавців України».

О. Диба: Вочевидь, так звані нео-псевдо-«русини» дійшли вже до тієї стадії сепаратизму, що відсепарувалися вже й від батька-Будапешта та матері-Москви. У цьому їхня фатальна помилка. Кожен свідомий громадянин і патріот знає: не кусай руку, яка тебе годує!

П. Федака: ❗️ Результат перевірки: ФЕЙК. Ось заключення, надане Google Gemini: Попри обговорення України, у розмові демонстративно ігнорується тема «політичного русинства» як інструменту дестабілізації Закарпаття. Це замовчування має переконати слухача, що цієї теми не існує в їхньому порядку денному. Розрахунок на те, що аналітики скажуть: «Це фейк, бо вони не згадали русинів». Тоді замовник може сказати: «Вони всюди бачать русинське питання, навіть там, де його немає». Це розмиває фокус реальної проблеми.

О. Гаврош: Тепер, коли є прямі докази того, що питання угорської меншини використовується для політичного тиску на Україну, стало зрозумілим, що «План заходів щодо розв’язання проблем українців-русинів» було прийнято недарма.

Офіційный коментарь дала и обласна державна адміністрація:
— Мы й дале будеме честовати права ушиткых національных меншин у нашуй области. Шкода, айбо руснакам ниякі права меншины ґарантовати не можеме, бо вни у нашому краю булшина.

Дефіцит на торговици позад пошкоженя трубопровода «Цімбораство»

Медіаресурс «Шептун нафтоґазовика» извіщат, ож позад януарового пошкоженя трубопровода «Цімбораство» на європейськуй торговици ся стала криза из буквов �, імпортованов из РФ.

Хоть єї експлуатація ся зачала щи у 18. столітю, скоро по удкр�тьови першого природного жерела близко вароша С�кт�вкар, торговля сив рідков буквов фактично монополізована — практично цілу продукцію веде російська державна компанія «РосБуквоПром». Майбулше експорта из РФ пак иде у Казахстан и Монґолію, айбо часть ся продає у Європу.

Як кажут бизувні жерела, ціна на букву � уже стала недоступна булшині руснакув. Гадкуючи на сесю кризу, майактивні авторове зачали шпоровати свуй запас. Аж ся перерва з імпортом затягне щи дале, годна ся вбалити ціла русинська буквопереробка (т. зв. індустрія очуднення мови).

На образчикови: Русинська публікація мусайно заступат дорогу імпортну продукцію.