الماضي

هو كل شي مرّ بحياتنا وتركناه، و مايصير نضل نفكر أو ننطي إهتمام على شي مرّ و ما نباوع اللي جاي او اللي أنت بي هسة لازم تركّز على كل فترة تمر بيها الان
أذا بقيت تباوع للماضي برأيك هل راح تجيك نتيجة و تغير من نفسك ؟
أكيد لا بدال كل هذا ركّز على الشي اللي جاي و ركّز على وقتك ، لأن الوقت ثمين وكل دقيقة تصنع شيء يفيدك بحياتك

الماضي : ينطيك فرصة حتى تتعلم، حتى ما تكرر الخطأ سويته قبل، بس مو طبيعي تضل متعلق بي و يعميك عن الحاضر و المستقبل

أصنع لنفسك عالمك الخاص، عالمٌ تلوذ به عن مُعكرات المزاج واضطراب العلاقات وإزعاج الحياة

مهما تهت في مسارح الحياة لاتنسى علاقتك مع الله،تحسسّها كأعظم شيء تخاف فقدانه،حافظ عليها مثل ما تحافظ على روحك لأنك بها كل شيء وبدونها ولاشيء!

الله : يحقق لك كل شيء تتمناه
ولا يتركك عند ضعفك و الصبر حلو

شنو هو الفشل ؟
هو ان شغلة الي تسويها متنجح
او بمعنى اوضح متنجح مثل ما انت تخيلتها تنجح !
بس مو معناها ان هدفك غلط
بس معناها انك تحتاج تغير طريقة الوصول للهدف
او تغير توقعاتك من الهدف هذه
علمود تتعلم ,وتتعلم بسرعة من التجربة
وهذه مبدأ اسمه (Fail fast)
دائماً شوف الأمور بصورة أوضح ومن الناحية الإيجابية وأقبل وكون راضي بالمقسوم الك
وحقق اهدافك وأهم شي ! تخلي ثقة بنفسك وتوصل

ولا تحط حاجز خايف افتح مشروعي او خايف ابلش وافشل
إبدأ بدون اي فكرة سلبية براسك.

أول خطوة للسلام الداخلي هي تبطّل تاخذ الأشياء بشكل شخصي، كل ما بطّلت اكثر، كلما فعلًا خفّت صراعات الأناء بداخلك .

أبسط مثال على هالشّي لمّا ينجذب شخص إلك، أوكي ينجذب لشخصيتك وصفاتك وكذا بس هي كلا أسباب سطحية، ينجذب إلك بالبداية لأسباب ضمنية تتعلق بي هوة وتتعلق بالصورة اللي راسمها إلك بذهنه قبل ما يستوعب حقيقتك الفعلية.

ونفس الشي لما تتعرض للرّفض من قِبل شخص مثلًا
أيضًا لأسباب تتعلق بي وبحاجاته الحالية اللي ما تخدمة بيها.


لا تاخذوا شيء بشكل شخصي

‏حابّ إتساع قُدرتي لِتقبل أي شيء يصير وراح يصير، رغم أنه يحفر بگلبي بس قوة التجاهل والتغافل عندي تِغلب كل شعور، وأني سعيد لوصولي هاي المرحلة وأتمنى كُل شخص مِنكم يوصلها، ييأس بطريقة جميلة يسوي إللي عليه، وخلها شون خل تجي، ويؤمن أنه الحياة تافهة بشكل مبالغ بي وماكو شي يسوى يِضيع نفسه علّموده، والخسران الوحيد هو المُتعلق بالحزن والماضي والتفكير وينتظر الدنيا تراضيه وتطبطب عليه، گوم راضي نفسك وحبها وطبطب عليها وعيشها صح بتفاصيلها الصغيرّة والمتاحة.

‏يقول لكم جورج بتاي: تكمُن فَضيلة السعادة في ندرتها، أما إذا كانت سهلة، فسوف تكون محتقرة، لأنها مترافقة مع الملل.

في ثقافتنا، آلاف المؤلفات و النهج في انضباط السلوك لقيمة ما، في الوعظ الأخلاقي، في ماهية الصواب و الخطأ، في الحرام و الحلال، في الطاعة و التبعية، لكن هل لدينا عشرين مؤلف في الفرح؟ في السعادة؟ في الابتعاد و الاستمتاع بالحياة؟ التعاسة لدينا مهارة مكتسبة بالتربية و التعليم.

( فلسفتك في الحياة )

لكل إنسانٍ فلسفته الخاصة في الحياة ، وله درْبهُ
وطريقه الذي يسلكه بكل ما فيه من تحديات وصعوبات

- من وجهة نظري البسيطة أرى أن الحياة أعمق مما قد نظن وأبسط مما قد نتخيل .

الحياة
صحيح متعبة لكن اذا ما حبيت حياتك
راح تصعب وتتعب اكثر، عيش وقتك بكل تفاصيله
أشتغل ، ادرس ، اضحك ، اتونس
راح يمر عليك أيام الحلوة و أيام صعبة بس گول الحمد لله والشكر
عيش هل الأيام بالطاقة الايجابية
خلي نفسك تتعود على هذا الشي
و أتقبل اي شي وارضى والشكر لله
ابتعد عن الطاقة السلبية ..
وخلي ابتسامتك بوجهك لا تحقد ولا تشيل هم لحد ولا تكره ،اترك الذكر الطيب لأسمك..

شلون الدُّنْيَا وياك ؟
عَرَفْت دورك شنو بيها ؟
عَرَفْت تَكُون بيها انسَان مِثل ميريدك الله سُبحانة
لَو صِرْت مِثل متريد الدُّنْيَا !
الدُّنْيَا مزرعة الْآخِرَةِ .. أنُ هِيه مزرعتك شكد ماراح تُزرَع راح تشوف حصادك بَعْدَ المَوتِ
أعرف شلون تعيش دنيتك بالصبر والرضى على ما كتب الله لك ، ابتعد عن الكلام السلبي ركّز بالنَّعَم إذَا ابتليت بمصيبة مو معناها انتهى كل شيء ! الله ماراح يبتليك بِشَيْء يَفُوق صَبْرُك كُل بَلاء هُوَ مُقَدَّر على كَدّ صَبْرُك
عيش يومك لا تفكر وتگول ( باچر شنو يصير ) وَكُل يوم تكرر هذا الكلام .. ربنا كاتب النا الخير دائماً وَكُل شيء مكتوب يصير أَمَا خير او شر و دائماً العوض موجود الحمد لله .

واحدة من علامات صبرك الجميل أن يراكَ الناس فيظنون أنك لا تَمُرّ بأي تعثرات أو مشاكل في حياتك،

أن يستوي حالك في النعمة والنقمة، فلا تحاول أن تثبت لمن حولك أنك تَمُرّ بالكثير من التعثرات والمصاعب لكنك ترضى وتتحمل، لا تحاول اثبات أي شيء لأي شخص، يكفيك عِلم الله بك والحَمدُلله.

المهم

مو شرط الي تريدة انتَ لازم يصير الك ماكو شيء راح يجي على الحاضر الك لازم تتعب ، تحاول وتوگع وترجع تكوم
بعدين راح توصل الى نتيجة ترضيك
راح تگول بس اني تعبت وما شفت نتيجة ، انتَ غلطان ليش ؟ لأن مو هذا الوقت المناسب المكتوب لك

هسة تگول بس اني اريد شي بسيط ومو چبير ما اريد شيء يستحق كل هذا العناء بس احب اكلك هاي انتَ تريد مو ربنا الي يريدك هيچ تصير
ربنا دائماً يكتب الخير للكل ان كنت على الطريق الصح و ان كنت على طريق الخطأ دائماً راح يكتب الك الخير
يبتليك بشيء بعدين يعوّضك أضعاف
العبد المؤمن مُبتلى
و الحمد لله .

"وَمَا هَذِهِ الْحَيَاةُ الدُّنْيَا إِلَّا لَهْوٌ وَلَعِبٌ وَإِنَّ الدَّارَ الْآخِرَةَ لَهِيَ الْحَيَوَانُ لَوْ كَانُوا يَعْلَمُونَ"
التفسير : بما فيها من الشهوات والمتاع إلا لَهْوٌ لقلوب المتعلقين بها ولعب ، ما يلبث أن ينتهي بسرعة ، وإن الدار الآخرة لهي الحياة الحقيقية لبقائها ، لو كانوا يعلمون لَمَا قدّموا ما يفنى على ما يبقى
-
( الْحَيَوَانُ ) الحَيَاةُ الحَقِيقيةُ الكَامِلَةُ الدَّائِمةُ.

وهسة احنه بزمان اغلب البشر نسوا الله
والمعصية بكل مكان وربنا گال ( كل نفس ذائقة الموت ثم إلينا ترجعون )
لا تخلي غباءك يخليك تخسر اخرتك خافوا من ربكم على اي لحظة ترجع الى الله وانت ما قدمت لله شيء
راح تگول بس اني اسوي ذنوب وذنوبي هواي :
( قل ياعبادي الذين اسرفوا على انفسهم لا تقنطوا من رحمة الله ان الله يغفر الذنوب جميعاً انه هو الغفور الرحيم )
بس المن هذا الكلام ؟ لمن تاب من الذنب
نسأل الله حسن الخاتمة

المجاهرة بالمعصية

أولاً : يعتبر نقص بالايمان وعدم مخافة الله
ثانياً : تشجع الناس على فعل الذنب الذي ارتكبته
والناس الي تكون ثقتهم بأنفسهم ضعيفة وإيمانهم ضعيف
ثالثاً : صعب راح تتوب ربك والعودة لله لأن تتباهى بمعصيتك وما تشعر بالندم

هذا الموضوع كلش منتشر بهذا الوقت
بعض الشباب يفتخر بهذا الشيء وما يعرف نتيجة عواقب هذا الموضوع !
والبعض يعرف بس مستمر بالغفلة الي هو عايش بيها
الموضوع عبارة يذل نفسه ويفضح ذنبه بالدنيا قبل الآخرة

اول شي انت عصيت ربك وفعلت ذنب ليش تروح تفضح نفسك اني سويت كذا وكذا ، ذنبك خلي النفسك وحاول تصححه وتعدله وتبدله بشيء يرضي الله سبحانة وتكون انسان نظيف ، انت من تذنب وتروح تحچي ذنبك عند الناس راح تتحمل هذا الذنب اضعاف عليك يصير ، والعقوبة بالدنيا وبالآخرة
( كل أمتي معافى إلا المجاهرين ) وقد يُحرم المجاهر من العفو الإلهي

{ لَا تَدْرِي لَعَلَّ اللَّهَ يُحْدِثُ بَعْدَ ذَلِكَ أَمْرًا }

هذه الآية تعبر عن التفاؤل والأمل في الله
الحياة عبارة عن تعثرات بس انت الي يكون عليك المحاولة ما ضبطت اول مرة !
حاول الثانية والثالثة..
مجرد اختبار من الله على صبرك
لا تشيل هم ولا تفكر خلي ظنك بالله لا يخيب ( أحسنوا الظن بالله فإنه لا يخذل من توكل عليه ولايخيب الله أمل من أحسن الظن به )

شنو برجك ؟

الكل يعرف موجود 12 نوع من الابراج وعلى حسب شهر ميلادك يكون برجك مثلاً ( السرطان او الدلو او الحمل ) ميزة هذا الابراج تتنبأ بمستقبلك وبقراراتك على حسب تصرفاتك ومواقفك

الموضوع تطور ووصل الى قراءة الابراج وكل شخص عنده خريطة تتنبأ بالمستقبل او شنو الي راح يصير وياك اهنا وصلنا الى موضوع اسمه ( التنجيم )
التنجيم حالة حال الابراج تتنبأ شنو يصيرلك بالمستقبل عن طريقة رصد حركة النجوم والكواكب
وطريقة تواجد موقعها
ومعروف التنجيم بالدين الاسلام شرك بالله

"إِنَّ اللَّهَ عِنْدَهُ عِلْمُ السَّاعَةِ وَينَزِلَ الْغَيْثَ وَيَعْلَمُ مَا فِي الْأَرْحَامِ وَمَا تَدْرِي نَفْسٌ مَاذَا تَكْسِبُ غَدَا وَمَا تَدْرِي نَفْسٌ بِأَيِّ أَرْضِ تَمُوتُ إِنَّ اللَّهَ عَلِيمٌ خَبِيرٌ (34)"

وطبعاً كل العلماء بالعصر الحديث اثبتوا ان الابراج كلها چذب ولا تمد للواقع بأي صلة وماكو اي دليل يثبت ان الابراج شي منطقي وصحيح

الابراج بالدين الاسلامي تعتبر شرك بالله
خل اسولفلك ليش تعتبر شرك بالله الي ما يعرف او جاهل بهذا الموضوع

الله تعالى هو عالم الغيب محد يعرف مستقبلك غير الله وكل شي مكتوب من ربنا يصيرلك ومحد غيره يكدر يعرف الغيب اما انت تروح تتبع شي دنيوي وتكون عندك قناعة تامة بي هذا يعتبر شرك بالله الموضوع طويل وحاولت اختصر هواي اشياء

من أقسى الابتلاءات اللي ممكن يمر بيها الإنسان، إنو يسوي ذنب وهو مستمتع ومرتاح، لكن بداخله شي ضعيف…
شنو هذا الشي؟ وليش ضعيف؟
هذا هو (ضميرك)… ضعيف لأنك غلبته بالذنوب والمعاصي، خنگته بسكوتك، وكل مرة تسوي نفس الغلط، وتگول: “ما صار شي”
تحس نفسك بخير، بس بالحقيقة روحك انطفت، وأنت مو واعي على هذا الشي.
تعيش كل يوم على نفس النمط، وتكرر نفس الأفعال، وما تدري إنك گاعد تغرك أكثر.

بس تذكر… ربّك موجود
(يمهل ولا يهمل)
يمهلك: يعني ينطيك وقت، يفتح لك باب التوبة، ينتظرك ترجع
لكن ما يهملك: ما ينسى اللي سويته، يجي يوم ويحاسبك… يمكن بالدنيا، ويمكن بالآخرة، ويمكن بالإثنين.

أشفق على هالنوع من الناس، خصوصًا بزمننا… هواي عايشين حياتهم بهالنمط، وهم مو مدركين شنو گاعد يصير بيهم.
بس بعدك تلحك… إذا ضميرك بعده ينبض، كوم رجّعه، لا تخليه يموت.

يگولون رجعت
طبعاً هاي القناة المكان الوحيد الي اسولف بي واني مرتاح يعني صعب اعوفها

والموضوع الي حاب اسولف بي
هو
- المجاملة الزايدة شلون تدمر شخصية الانسان

المجاملة الزايدة مو دائماً تعتبر احترام
مرات تتحول لشي يذوب شخصيتك شوية شوية.
لأن انت من تجامل الرايح والجاي بكل موقف، وتسكت عن الاشياء الي تضوجك حتى ترضي غيرك وعلى حساب نفسك، راح تبدي تخسر نفسك بدون ما تنتبه.

بالبداية تحاول تكسب الناس وما يكون الك رأي وتوافق على أشياء ما ترضيك
حتى ما يزعل أحد.
بس مع الوقت راح تعيش بشخصية مو شخصيتك الحقيقية
راح تعيش بشخصية مبنية على رضا الناس لا على راحتك وقناعتك

والمصيبة إن الناس الي حواليك راح تتعود على هذا الشي ويشوفونك دائماً متفهم او ساكت او ماعندك مشكلة…
ويبدون يستغلون هذا الشي

المجاملة الحلوة هي اللي تحافظ على الاحترام، بس بدون ما تلغي كرامتك أو حقيقتك.

- ليش الانسان يتعب وهو يدور راحته ؟

الغريب بالحياة أغلب الناس ما تدور التعب، بس تتعب أكثر وهي تدور
الراحة.

تشتغل، تخطط، تضحي، وتحاول توصل لمكان تحس بيه بالأمان والهدوء
بس كل ما تقرب، تكتشف إن الراحة مو مكان ثابت، ولا شي ينشرى بسهولة.

مرات تتعب من الناس، من التفكير، من المقارنات، ومن الضغط اللي يجي من كل جهة

والأصعب الإنسان مرات يكون هو سبب تعبه، بدون ما ينتبه
يفكر أكثر من اللازم، ويتعلق أكثر من اللازم، وينتظر أكثر من اللازم

الراحة يحتاج - تقبل ، توازن ، طريقة تفكير هادئة
يمكن المشكلة مو من ندور الراحة
المشكلة ندورها بطريقة تتعبنا أكثر مما تريحنا.