‏"علّموا زاهي القلايد والغوايش
‏كلمةٍ ما قلتها بالخش والدّس

‏اضحكي ترضى على الصبح الدرايش
‏وينضج التفّاح والورد يتكدّس

‏جعل تفداك العيون اللّي ترايش
‏ياعيون اللّي نبرقعها على الدّس

‏مات كلّ اللي بصدري كان عايش
‏وعاد صوتك باقي ووجهك مقدّس"

‏"ياحبيبي كل شيٍ في محله
‏كل ابوهم من وهم وانت الحقيقه

‏انا احب البدر ماحب الاهله
‏الاهله كل ابوها في حريقه

‏السؤال اللي عجزت اصل لحله
‏رغم بأن حبال معرفتي وثيقه

‏ليلك اللي تنثره ويطيح كله
‏ينحسب بالشبر ولا بالدقيقه! "
- بندر الدويش

‏"بين درب الرحيل، وخطوة المستريح
‏دمعةٍ كنت آحايلها ولا أحتلتها

‏تعتذر عن وقوف وتعتذر عن مطيح
‏وأعتذر للحياة اللي تخيّلتها"
‏- مشاري محمد

‏"كل يوم أصافح طيوفك غلا مدري مبرّه
‏ووين مالديت أشوفك وجهتي ف أربع جهاتي

‏ماقدرت اعيش لذات الحياه المستمرّه
‏لابغيت أواكب الحاضر رجعت ل ذكرياتي

‏يوم جيتك جيّت اللي يدري إن الموت مره
‏تاركٍ من خلفي الدنيا و أهلها و أمنياتي

‏ايه واللي نفسي ب يده ورزقي و المجرّه
‏انك اللي تستحق أفضلك عن مغرياتي

‏مستعد أفرش لك الفرحه والبسك المسرّه
‏بس أبي تحفظ غرامي زين يا زينة حياتي"

‏"مع انك ظلام احبّ اشوفك بصيص النور
‏ومع انك ضياع احبّ اوقف على اعتابك

‏اعرفك ولو بيني وبينك سما وبحور
‏سحابي مطرك وحفنة ترابي ترابك

‏غِب ايام واسابيع وشهور تلو شهور
‏ولا تشرح ظروفك ولا تِبدي اسبابك

‏علي حقّ لا قلت القصايد بدون شعور
‏و لك حقّ .. لا مرّك قصيدي ولا جابك"

‏بالضلوع أسرح ، وبالخاطر تفيَّا
‏لا غَلا عمري عليك .. ولا سنيني

‏قد نهيت القلب من يمك وعيَّا
‏الهوى ماهو بشيٍ في يديني

‏أنت من كثرك على الدنيا محيَّا
‏وين مالديت ، لا أنت اللي بعيني

‏إن بقى للشوق .. وصلٍ ماتهيَّا
‏"مرني يا أعز وأغلى من يجيني"

‏- عبدالعزيز العبلان

‏"معك قلب لو يميل الوقت كلّه جايزٍ لي
‏اعرف انه ما يعرف من الظنون إلا النقيّه

‏جعلني ما انسى معاريفه ولا اخليّه للّي
‏ما يداري رقتّه، و احساسه، وشمسه، و فيّه

‏لا تحدد وش يحب القلب فيك وش يخلّي ؟
‏أنت عطني من رضاك شوي و الباقي عليّه"

"الوطن يقفون عنه والمسمى اغتراب
‏وأنا الوّح في محليّ لكن المقفي وطن"

- اوتش اوتش اوتش

"سبحان من جمع مزايا الخلق في أكمل مثال
أعجوبة فالحسن والمنطوق و أعجوبة فكر

زال الضيَّا ومشراق وجهك غير قابل للزوال
ثابت مثل دهشة قصيدة كتبت لآخر شطر"

‏«تغانمني ترى قد كبدي من الصبر عشر اقسام
‏على أدنى شي يمكنّي اغني لك وداعيّـه»

قصيدة الليله:

"تصدّ القلوب من الغلا والنفوس تملّ
يهون الجفا لا شافت العين ما تكره

على رمح صوتك ماتوا المشكله والحلّ
سراب الدروب أصدق من الحرف والنظره

تغلّى بكيفك لو تصير المحبه غلّ
لكن لا تساوم من يحبّك على قدره

تراي الفقير اللي غناته بـ كلمة ذلّ
تسامى وهو لو جاد فيها .. دفن فقره"

9:12 PM
"قصرت بيّ وأنا ما لحقني من الدنيا قصور"

‏"على وَسْق الليَالي ما لقيت من الحقايق عِدَّ
‏أباعد شرهتي والله عليم بـ ْشرهة أصحابي

‏أشوْف إنّ السنين الأوَّله: بَيْن الغضب، والوِدّ
‏مسافاتٍ.. تجدّد خطوتي، وتضيِّق رحَابي!

‏لو إني ما تدارَكتْ المشاعر، والسهر، والجِدّ
‏مضى عمْري وأنا أكسِّر غصوني، وأطرد أسرابي

‏حبيبي أعرِفك.. وأنت متوزِّع بَين ضدّ وضدّ
‏ولكني أحبَّك، وأعشق اِسمك يا أخر أحبابي

‏أمِلّ من الديَار الموْحشة، وأنزل معك، وأشدّ
‏عسى دارك تبرِّد خاطري.. وتداري أعصابي!

‏أعرْفك سيفٍ -إن مرَّ الحنايا- كن ما له حدّ..
‏أنا أستعذّب طعونه لو يخطّ الموت فـْ كتابي..

‏أقول إنك سؤال أحيان، وأحيانًا أشوفك رَدّ
‏أنا يا الله وِش جاري علي، ووش هي أسبابي؟

‏لو إني ما تحايل.. مثل خصرك يا رهيْف القَدّ
‏لا زلت أشدّ لك شدّ الركاب لـْ حكمة أعرابي

‏عشان الضحكة اللي ما لها بين الخلايق نِدّ
‏أسوق أقصى معاذير الغلا، وأشدِّد ركابي

‏لو إنه ما وقف بيني وبينك فـ البسيطة: حَدّ
‏أنا اللي واقفٍ بيني وبينك: «دمعة أهدابي»

‏أنا أولى بالهوَى، ودموع عينك، والهدب، والخدّ!
‏مع إن العبرة (اللي في خفايا صوتك) أولى بي..

‏إذا إنك ما دريت عن الجروح الموْجِعة، والصدّ؟
‏جروحي يا حبيبي كانت أدرى فيك وأدرى بي!"
- محمد السلطان

‏"ليت لي حيلةٍ واحتال في طيفك اللي
‏وين ما لدت عيوني .. بـ دربي لمحته"
‏- فهد العيبان

"أما الكلام اللي من الروح للروح
‏ولا السكوت اللي يكون بـ محله

‏ما فالجهات الاربعة باب مفتوح
‏أكرم ولا آوسع باب من رحمة الله

‏العزلة اللي كانت : اتعالج جروح
‏مع الاسف صارت سبب كل علة

‏والضيقة اللي كانت تْمرّ وتروح
‏صارت تمرّ .. وتاخذ اليوم كله"
- عبدالله السراهيد

‏"ضاقت معك عوْج السنين وتضايقَت:
‏واحتالَت أيَّام الرَّضا، والبشاير

‏وشعّ الصباح وفي ظنونك تعلَّقت:
‏وأنا عشان «أدلّ، وأتيه» حاير
‏
‏أفكّ لك حتى ضلوعي إليَا اشتَقت
‏وأقطع لك دروب السهَر، والزراير

‏مثل القصِيْد إذا اجتمعت، وتفرَّقت:
‏أيَّام، وأحداث، وكلام، وعباير!

‏عسى يداعب وَجْنتك كلّ ما ضقت:
‏صبحٍ نسانيسه تدفّ الستاير!

‏أخاف من غبَّة هوَاك إن تعمَّقت
‏أنا أتجمَّع فيْك: فَرْد، وعشاير

‏كل ما طرَقتك فـ الحياة، وتطرَّقت
‏كنت الزمَن، بس الزمَن كان جاير

‏ما نامَت عيوْني على ذكْرك، وفِقت
‏إلا لقيْتك: بَين روح.. وضماير..

‏اِضحك، ويضحك لي على شانك الوَقت
‏وأنسى التعب، وأنسى الزعل، والخساير"
- محمد السلطان

"في حوَرها ما يعدّي ساحة الشعر الحراوي
وفي قصيدي ما يشبّعها ويرضي ذائقتها"

"اللي سواليفها عذبه.. وفيها عناد
ياحلوها كل ماقالت لي شعورها

حلوة نبأ، طيّبة مبدأ، وريثة شداد
اليا مشت فوق الأرض تطيّر طيورها

نشميّةٍ دونها اللي يحتمون البلاد
اللي على سرجها واللي على كورها

تستاهل العود الأزرق والبكار التلاد
والطرقه اللي توقفني على سورها"
- مشاري محمد

‏"بسيطه يا سهر .. برقب لبنت الصبح لين تويق
‏على روحي و روحي ساكنه , و النور يسكنها

‏عليك الصبر يا حلم ٍ في حاجة همّه و توفيق
‏و علي الوقفه اللي ما اتريّح لين ابرهنها

‏تراني ما ضريت و لا رضيت الهون و التدنيق
‏طموحات الكبار كبار ما بارت معادنها ..

‏حبيبي لا تضيق و خل محبوبك بدلك يضيق
‏انا ليه اعشقك و احزان عمرك عنك ما احزنها

‏يراودني سؤال اتجاهله مع كل فكة ريق
‏طواريّ القديمه وش يردك تلتهي عنها ؟

‏نديمك لا سعى في غايته ظلّه يظلّ طويق
‏لو ان حتى الدروب اللي يبيها سامح ٍمنها

‏مع ان الخطوتين الحايره ما بعدها تحقيق
‏بقى فالنفس اماني غاليه نصرك من اثمنها

‏تعيش اليا احتضنها من عيونك مسرح و تصفيق
‏و تموت ان مالقتك بـ صادق احساسك تطمنها

‏معاك من الرضا و من السعد ما يقبل التشويق
‏و معي لهفة مُحب ٍ ما تبين الا فـ موطنها ..

‏وش اللي ما يخالجه التعب يـ الفاتن الذويق
‏و حياتي معك رغم اشراقها لا يمكن اضمنها

‏تشوف الهم في وجه الفرح لا اوغلت بـ التحديق
‏تباشر بـ ابتسامات الوجيه و لا تمعنها ..

‏يغيب المنطق فْـ لحظة نزاع العاطفه و يفيق
‏وانا من بينهم مدري من اللي يامر و ينهى"
- فهد بن بجاد

"ثنتين تجبر على الصدّه و قلّ الكلام
الفقر بعد الغنى والشوق بعد الجفى"
- محسن بن مترك