اللحن👆

مولاي مولاي..يبوفاضل دخيلك دخيلك
_________________________________

بطل گلبي يحن عالناس
بس حن لگبة العباس
الريشاته المتروسه احساس

انميزه العاشگ من الشوف
شما جبناك يكضه الخوف
يضل يرسم عالكاع اجفوف

گلبي ايضل يتخردل لو بيك انحچه
لو جابوا طاري المّي اولهم بچه
فحطان امن الدنيه شكد شابع قهر
وبس اباب الحضره مرتاح انتچه
______________________
يابو الخير الكلك خير
عدهه اهواي احلام الغير
وحلمي اصبح يم صحنك طير

انه بكيفك يا مولاي
امن ايدك هاي لأيدك هاي
ابصحنك بديني اويه الماي

شكد مرتاحه الرايه چي يم گبتّك
اعيوني شكد وازني يردن شوفتك
انه الما رايد شي من هالدنيا هاي
بس رايد تؤيني بديرة(ت) رحمتك
______________________
لو حبل الخيمه اشوي مال
رمش عيونه ايشده احبال
مو حگي اعشگ هيج افعال

من حچيي تغار العشاگ
ولو عفت الحضره ابقه اشتاگ
واسهر واكتب عن لفراگ

هم نعمه و حسبوني خادم خيمتك
زمزم لو لم روحه ايضيع بجربتك
طولك شبّع فقره و ينگط خبز
عدنه الفقره الجاعت تفرش صورتك
_________________________
مغرم مفتون ومجنون
انه اليبچي اويه اليبچون
لو اسمع عنك يحجون

عيشني احساس العطشان
كون اتعب مو حچيي السان
طش دمي انذور بميدان

يالحنيتك ديره و عيونك نهر
انته التضوي اعلينه جذاب الگمر
الغيره اربات جفوفك يالگول وفعل
الجود بصف جودك دنگ واعتذر
__________________________________
شما اوصف اطلع غلطان
جوه الله و فوگ الانسان
قبل الانس تخدمه الجان

سبحان الله السوااه
كلما ننضك و ننخاه
متحزم واگف نلگاه

كلما ضاگت بينه نعگد رايته
ومغزرة اشگد اسوالف نعمّته
امثوبتله توها امي وتتنخه بقت
وما كمّلت نخوتها وفزعت شارته
___________________________________
#توفيقهم_ونعمتهم

مصطفى صادق اللامي

مدد يا زهراء

#الليالي_الفاطمية

قال الامام الرضا(عليه السلام):
يا ابن أبي محمود إذا اخذ الناس يمينا وشمالا فالزم طريقتنا فإنه من لزمنا لزمناه ومن فارقنا فارقناه.

------------------------------
"عيون اخبار الرضاج2ص272"

#لمولاتي_الزهراء

اخذيني من هاي البشر يا فاطمه يا فاطمه
وديني باحزانچ سفر يا فاطمه يا فاطمه
وكلت الچ عيني..بكل شوغه بچيني..مولاتي ربيني يافاطمه
_______________________________
اتمنيت سطرات العدو..ما وصلتچ واجتني
اتمنيت دفعات الغدر..بضلوع صدري ذني
انه الگبل ماله وجه...واجروحي ميزتني
ما جان الي شان وقدر..ودموعي كبرتني

ابداعت الما عنده ضل يا فاطمه يا فاطمه
كون ابقه احبكم حب طفل يا فاطمه يا فاطمه
عالفطرة خليني..بكل شوغه بچيني..مولاتي ربيني يافاطمه
___________________________________
يا مفزعي بوكت الشدد..يالشدتچ جبيره
وضماد ضلعچ فاطمه..ايدور الي عنده غيره
ما ريد بعيوني بصر..انطيني بس بصيره
خليني اباوع بالگلب ..عين البشر گصيره

وهيج انضر الباب الخشب يا فاطمه يا فاطمه
امحضرله كد تعبچ عتب يا فاطمه يا فاطمه
مولاتي دليني..بكل شوغه بچيني..مولاتي ربيني يافاطمه
__________________________________
مثل السواد البعزه..حسبيني يا كريمه
لو ما لحزنچ انّصب..معناها مالي قيمه
وخل جرحي تعتگ صورته..هنيالي بالهضيمه
قانون عدنه بالعشگ ..اغلى الصور قديمه

بالحب ولا عندچ منع يا فاطمه يا فاطمه
گالوا كسر كلتي ضلع يا فاطمه يا فاطمه
بالعبره چويني..بكل شوغه بچيني..مولاتي ربيني يافاطمه
_______________________________
من شربتني امي اللبن..خلطته ابدمعه الكم
منها وكرهت انه الخشب..چي غادر بأبنكم
المالابس اقيود الدمع..ما عايش برزقكم
ميثم فرح من انصلب..چي مدمن الوجعكم

وبسيرته ايبين سبب يا فاطمه يا فاطمه
يتخلد الحب بأدب يا فاطمه يا فاطمه
يازهره ادبيني..بكل شوغه بچيني..مولاتي ربيني يافاطمه
_________________________________
مولاتي لتبدليني ابد..وغفريلي يالحنينة
شعليني بعتبابچ شمع..من تنطفي المدينه
والحاله حالي ومنكسر..بس انتي تشترينه
يغرگ بطوفان الذنب..الما حسبچ سفينه

ويا صورة الگاهه الچ يا فاطمه يا فاطمه
يمهه طواف اتوسلچ يا فاطمه يا فاطمه
قربان قدميني..بكل شوغه بچيني..مولاتي ربيني يافاطمه